សង្គម និងសេដ្ឋកិច្ច - La Reine Media

សម្ពោធសេវាកម្មដឹកជញ្ជូនទំនិញផ្លូវអាកាសថ្មីរវាង ប្រទេសចិន និង សហរដ្ឋអាម៉េរិក

ជារៀងរាល់សប្ដាហ៍នឹងមានការដឹកជញ្ជូនតាមជើងហោះហើរចំនួន ៣ គឺនៅថ្ងៃចន្ទ ពុធ និងថ្ងៃសុក្រ ដែលក្នុងនោះ មួយជើងៗអាចដឹកទំនិញបាន ៤៥ តោន ចេញដំណើរពីទីក្រុង Harbin របស់ ចិន ទៅកាន់ Los Angeles របស់ សហរដ្ឋអាម៉េរិក។

យោងតាមសារព័ត៌មានចិន Xinhua យន្តហោះ Boeing 787-9 ១ គ្រឿងដែលដឹកទំនិញ ៤១.៤ តោន បានហោះឡើងកាលពីយប់ថ្ងៃទី ២២ សីហា ពីទីក្រុង Harbin នៃខេត្ត Heilongjiang ភាគឦសានប្រទេសចិន ឆ្ពោះទៅកាន់ទីក្រុង Los Angeles សហរដ្ឋអាម៉េរិក។ ជើងហោះហើរនេះគឺតំណាងឱ្យការចាប់ផ្ដើមសេវាកម្មដឹកជញ្ជូនផ្លូវអាកាសថ្មីរវាង ប្រទេសចិន និង សហរដ្ឋអាម៉េរិក។

ក្រុមហ៊ុន Heilongjiang LongYuLian International Logistics Co., Ltd. ដែលជាអ្នកគ្រប់គ្រងសេវាដឹកជញ្ជូនទំនិញខាងលើ បានឱ្យដឹងថា សប្ដាហ៍នេះនឹងមានជើងហោះហើរចំនួន ៣ ចេញដំណើរក្នុងថ្ងៃចន្ទ ពុធ និង សុក្រ ហើយជើងហោះហើរនីមួយៗនឹងអាចដឹកបាន ៤៥ តោន ដោយចំណាយពេលហោះហើរ ១១ ម៉ោង។

ក្រុមហ៊ុនគ្រប់គ្រងព្រលានយន្តហោះ Heilongjiang ឱ្យដឹងថា ទំនិញដែលបានដឹកតាមជើងហោះហើរដំបូងរវាង Harbin និង Los Angeles នេះ រួមមាន សម្លៀកបំពាក់ និងគ្រឿងអេឡិចត្រូនិក។ ក្រុមហ៊ុនគ្រប់គ្រងព្រលានយន្តហោះខាងលើក៏មានគម្រោងអភិវឌ្ឍ Heilongjiang ឱ្យទៅជាមជ្ឈមណ្ឌលដឹកជញ្ជូនទំនិញអន្តរជាតិ និងមូលដ្ឋានតភ្ជាប់ការដឹកជញ្ជូនទំនិញជាមួយ តំបន់អឺរ៉ុប និង អាម៉េរិកខាងជើង ផងដែរ៕

August 23, 2022

ការកែច្នៃលើរថយន្តអគ្គិសនី អាចដោះស្រាយបញ្ហាខ្វះថាមពលនៅទូទាំងពិភពលោក

រថយន្តអគ្គិសនីទាំងឡាយអាចក្លាយជាមធ្យោបាយដ៏អស្ចារ្យនៅក្នុងការរក្សាទុកអគ្គិសនីដែលបានពីថាមពលកកើតឡើងវិញ និងអាចបញ្ជូនចូលទៅក្នុងបណ្ដាញអគ្គិសនីនៅពេលតម្រូវការប្រើប្រាស់កើនឡើងខ្ពស់។ ជាងនេះ អ្នកប្រើប្រាស់ក៏អាចនឹងមិនត្រូវបង់ថ្លៃអគ្គិសនីប្រចាំខែ ដោយប្រើប្រាស់ការកែច្នៃថ្មីនេះ។

Paul Kershaw មិនមែនជាទេវតា ប៉ុន្តែបុរសរូបនេះអាចទាញយកថាមពលរបស់ខ្យល់ និងព្រះអាទិត្យសម្រាប់ការប្រើប្រាស់តាមតម្រូវការ។

ជារៀងរាល់ព្រឹកនៅឯផ្ទះរបស់ខ្លួនក្បែរ Cambridge ចក្រភពអង់គ្លេស លោក Kershaw បញ្ចូលថាមពលឱ្យរថយន្តអគ្គិសនី Nissan Leaf របស់គាត់។ អគ្គិសនីដែលគាត់ប្រើគឺបានមកពីស្លាបកង្ហារប្រើកម្លាំងខ្យល់ចំនួន ១២ គ្រៀង នៅឯកស្ថានីយផលិតអគ្គិសនីពីកម្លាំងខ្យល់ Red Tile និងស្ថានីយសូឡារ Ryston។ ចាប់ពីព្រលប់ Kershaw ភ្ជាប់ចរន្តអគ្គិសនីពីរថយន្តរបស់គាត់ ទៅឱ្យអ្នកជិតខាងដែលត្រូវការចាំបាច់។

បុរសវ័យ ៥១ ឆ្នាំដែលបានចូលនិវត្តន៍រូបនេះ មិនសូវប្រើប្រាស់រថយន្តអគ្គិសនីដែលគាត់មាន។ គាត់ប្រើម្ដងម្កាល ពេលដឹកសុនកទៅគយគន់ធម្មជាតិ។ លោក Kershaw ឱ្យដឹងថា «អារម្មណ៍ដែលដឹងថា ខ្លួនកំពុងធ្វើអ្វីមួយដែលល្អគឺពិតជាអស្ចារ្យខ្លាំងណាស់។ វាមិនត្រឹមតែជារថយន្តនោះទេ…វាគឺជាដំណោះស្រាយ» សម្រាប់បញ្ហាខ្វះអគ្គិសនី។

Kershaw គឺជាមនុស្សម្នាក់ក្នុងចំណោមពលរដ្ឋ ៣៥០ នាក់នៅ អង់គ្លេស ដែលយកអគ្គិសនីពីរថយន្តដើម្បីប្រើប្រាស់ក្នុងផ្ទះ និងទីតាំងអាជីវកម្ម ចាប់តាំងពីឆ្នាំ ២០១៨។ នេះគឺជាផ្នែកមួយដែលទើបលេចធ្លោនៃពាណិជ្ជកម្មតម្លៃថាមពលខុសគ្នា ដែលត្រូវបានគេស្គាល់ថា V2G។

គំនិតច្នៃប្រឌិតនៅទីនេះនោះគឺ ការបញ្ចូលថាមពលអគ្គិសនីនៅពេលថាមពលកកើតឡើងវិញសល់ច្រើន ពិសេសនៅពេលថ្ងៃត្រង់ ហើយក្រោយមកបញ្ចេញអគ្គិសនីនេះត្រលប់មកវិញនៅពេលតម្រូវការប្រើប្រាស់អគ្គិសនីកើនឡើងខ្ពស់។ បច្ចេកវិទ្យា V2G អនុញ្ញាតឱ្យបណ្ដារថយន្តអគ្គិសនី បញ្ជូនថាមពលដែលវាបានទាញយកពីកម្ដៅថ្ងៃ ឬកម្លាំងខ្យល់ ចូលទៅក្នុងបណ្ដាញអគ្គិសនី។

បច្ចុប្បន្ន ក្រុមមនុស្សដែលប្រើប្រាស់ V2G របស់ អង់គ្លេស គ្រាន់តែជាផ្នែកមួយនៃការពិសោធ។ សកម្មភាពនេះក៏អាចធ្វើបានតែនៅលើរថយន្ត Nissan Leaf ប៉ុណ្ណោះ ហើយថ្លៃទិញឧបការណ៍បញ្ចូលថាមពលឆ្លាតវៃ គឺជាការឧបត្ថម្ភរបស់ រាជរដ្ឋាភិបាល។

លោក Kershaw បើករថយន្អអគ្គិសនី Nissan Leaf របស់គាត់

ក៏ប៉ុន្តែ គេរំពឹងថា នៅពេលមានរថយន្តអគ្គិសនីច្រើនគ្រប់គ្រាន់ បច្ចេកវិទ្យា V2V នឹងអាចបង្កើតសមិត្ថផលល្អៗជាច្រើនសម្រាប់អាកាសធាតុ ជួយឱ្យហេដ្ឋារចនាសម្ព័ន្ធអាចប្រើប្រាស់ថាមពលកកើតឡើងវិញបានច្រើនជាងបច្ចុប្បន្ន និងជៀសវាងការប្រើប្រាស់ប្រេងរ៉ែ ឧស្ម័ន ឬធ្យូងថ្មជាដើម នៅក្នុងការផលិតអគ្គិសនី៕

ខាងក្រោមគឺជារូបភាពរបស់រថយន្តអគ្គិសនី Nissan Leaf ៖

លោក Paul Kershaw និងរថយន្តអគ្គិសនីរបស់គាត់

August 23, 2022

បរិមាណប្រេងរ៉ែនៅ សហរដ្ឋអាម៉េរិក នឹងកើនឡើងខ្ពស់បំផុតចាប់ពីឆ្នាំក្រោយ

យោងតាម រដ្ឋមន្ត្រីក្រសួងថាមពល Granholm សហរដ្ឋអាម៉េរិក នឹងមានបរិមាណប្រេងរ៉ែច្រើនបំផុតចាប់ពីឆ្នាំ ២០២៣ ដោយគ្រោងនឹងកើន ១២.៧ លានធុង/ថ្ងៃ ខ្ពស់ជាងបន្តិចធៀបនឹង ១២ លានធុង/ថ្ងៃ នាបច្ចុប្បន្ន។

ទីភ្នាក់ងារសារព័ត៌មាន The Hill កាលពីថ្ងៃទី ២១ សីហា មានកិច្ចសម្ភាសជាមួយ រដ្ឋមន្ត្រីក្រសួងថាមពលអាម៉េរិក Jennifer Granholm ក្នុងនោះ លោកស្រីបានសង្កត់ធ្ងន់ថា «សហរដ្ឋអាម៉េរិក នឹងសម្រេចបានបរិមាណប្រេងខ្ពស់បំផុតនៅឆ្នាំ ២០២៣»។ លោកស្រីថា សហរដ្ឋអាម៉េរិក នឹងមានបរិមាណប្រេងរ៉ែច្រើនបំផុតចាប់ពីឆ្នាំ ២០២៣ ដោយគ្រោងនឹងកើន ១២.៧ លានធុង/ថ្ងៃ ខ្ពស់ជាងបន្តិចធៀបនឹង ១២ លានធុង/ថ្ងៃ នាបច្ចុប្បន្ន។

រដ្ឋមន្ត្រីថាមពលអាម៉េរិក យល់ថា សង្គ្រាមនៅ អ៊ុយក្រែន បានធ្វើឱ្យទីផ្សារនៅទូទាំងពិភពលោកខ្វះប្រេងរ៉ែរាប់លានធុង/ថ្ងៃ។ មូលហេតុនេះហើយ នាំឱ្យលោកស្រី Granholm សង្កត់ធ្ងន់ថា សហរដ្ឋអាម៉េរិក ត្រូវតែបង្កើនការផលិតប្រេងឥន្ធនៈដើម្បីបង្គ្រប់ការខ្វះខាតនេះ។

តម្លៃប្រេងនៅ សហរដ្ឋអាម៉េរិក បានថយចុះជារៀងរាល់ថ្ងៃ ក្នុងរយៈពេល ២ ខែកន្លង ដោយមធ្យមបានចុះមកនៅក្រោម ៤ ដុល្លារ/gallon (៣.៧៨ លីត្រ) នៅទូទាំងប្រទេស។ ឥន្ធនៈសម្រាប់យន្តហោះ និងប្រេងម៉ាស៊ូតក៏កំពុងតែធ្លាក់ថ្លៃ។ ប្រការនេះក៏កំពុងជួយឱ្យតម្លៃអាហារ និងសំបុត្រយន្តហោះ ថយចុះបន្តិច៕

August 22, 2022

សេដ្ឋកិច្ចកូរ៉េខាងត្បូង នឹងមានកំណើនយឺត ដោយសារអតិផរណាកើនឡើងខ្ពស់

ក្នុងខែកក្កដា ២០២២ តម្លៃទំនិញនៅ កូរ៉េខាងត្បូង បានកើន ៦.៣% ធៀបនឹងខែកក្កដា ២០២១ ដែលនេះក៏ជាកម្រិតខ្ពស់បំផុតក្នុងអំឡុង ២៤ ឆ្នាំកន្លងមក។

កាលពីថ្ងៃទី ១៩ សីហា ក្រសួងសេដ្ឋកិច្ចកូរ៉េខាងត្បូង (MOEF) បានឱ្យដឹងថា សេដ្ឋកិច្ចប្រទេសនេះនឹងមានកំណើនយឺត ព្រោះតែបញ្ហាអតិផរណាកើនឡើងខ្ពស់ ហើយការនាំចេញអាចត្រូវថយចុះដោយសារស្ថានការណ៍អស្ថិរភាពនៅក្នុងពិភពលោក។

នៅក្នុងរបាយការណ៍វាយតម្លៃប្រចាំខែដែលមានឈ្មោះថា សៀវភៅបៃតង ក្រសួងសេដ្ឋកិច្ចកូរ៉េខាងត្បូង ឱ្យដឹងថា រតនាគារអាម៉េរិក (Fed) ដំឡើងការប្រាក់ខ្ពស់ សេដ្ឋកិច្ចចិន ជួបឱនភាព និងបញ្ហាសង្គ្រាមនៅ អ៊ុយក្រែន បានធ្វើឱ្យហានិភ័យវិបត្តិសេដ្ឋកិច្ចសកលមានការកើនឡើងខ្ពស់។

MOEF ព្យាករថា សេដ្ឋកិច្ចរបស់ កូរ៉េខាងត្បូង ក្នុងខែសីហា អាចថយចុះ ដែលគឺជាខែទី ៣ ជាប់ៗគ្នា ដែលសេដ្ឋកិច្ចប្រទេសនេះជួបឱនភាព ក្នុងគ្រាដែលមានការបារម្ភអំពីផលអាក្រក់ដែលកើតពីបញ្ហាអតិផរណា និងកំណើនសេដ្ឋកិច្ចយឺត។

សម្ពាធពីអតិផរណានៅ កូរ៉េខាងត្បូង កើនឡើងយ៉ាងឆាប់រហ័ស ព្រោះតែប្រេងឥន្ធនៈឡើងថ្លៃ នាំឱ្យតម្លៃទំនិញផ្សេងៗត្រូវកើនឡើងខ្ពស់ រួមនឹងតម្រូវការនៃការងើបឡើងវិញរបស់សេដ្ឋកិច្ច ក្រោយសម័យកូវីដ-១៩។

ក្នុងខែកក្កដា តម្លៃទំនិញនៅ កូរ៉េខាងត្បូង បានកើន ៦.៣% ធៀបនឹងខែកក្កដា ២០២១ ដែលនេះក៏ជាកម្រិតខ្ពស់បំផុតក្នុងអំឡុង ២៤ ឆ្នាំកន្លងមក។ ធនាគារជាតិកូរ៉េខាងត្បូង កំណត់គោលដៅរក្សាអតិផរណាឱ្យនៅត្រឹម ២% ក្នុងរយៈពេលមធ្យម៕

August 22, 2022

លេចធ្លាយអត្តសញ្ញាណអ្នកវិនិយោគកូរ៉េខាងត្បូង ដែលបានបោះទុនទៅក្នុង SpaceX របស់មហាសេដ្ឋី Elon Musk

បញ្ជីរាយនាមអ្នកវិនិយោគអាថ៌កំបាំងរបស់ SpaceX នាពេលថ្មីៗនេះក៏មានឈ្មោះក្រុមហ៊ុនថ្មី Mirae Asset Global Investments ដែលជាក្រុមហ៊ុនរបស់ កូរ៉េខាងត្បូង ចំណោមអ្នកវិនិយោគពីរស្ថាប័នដែលនាំមុខគេនៅក្នុងការប្រមូលទុន ២៥០ លានដុល្លាររបស់ SpaceX កាលពីពេលថ្មីៗនេះ។

ក្នុងការប្រមូលទុនបន្ថែមលើកចុងក្រោយនេះ ក្រុមហ៊ុន SpaceX ទទួលបានជោគជ័យ ដោយប្រមូលបាន ២៥០ លានដុល្លារអាម៉េរិក ពីអ្នកវិនិយោគមួយក្រុមដែលមិនត្រូវបានគេប្រកាសអំពីអត្តសញ្ញាណ។

ក៏ប៉ុន្តែ ថ្មីៗនេះ Forbes បានបង្ហើបឱ្យដឹងថា Mirae Asset Global Investments របស់ កូរ៉េខាងត្បូង គឺជាមួយក្នុងចំណោមពីរក្រុមហ៊ុនដែលនាំមុខគេនៅក្នុងការប្រមូលទុនខាងលើ។

ការប្រមូលទុននេះនៅតែកំណត់តម្លៃ SpaceX ត្រឹម ១២៥ ពាន់លានដុល្លារដូចឆ្នាំមុន ធ្វើឱ្យក្រុមហ៊ុនរបស់លោក Musk ក្លាយជា startup ដែលមានតម្លៃជាងគេបង្អស់នៅ សហរដ្ឋអាម៉េរិក។ ប្រការនេះមានន័យថា បច្ចុប្បន្ន តម្លៃមូលធនទីផ្សារជាក់ស្ដែងរបស់ SpaceX គឺ ១២៧ ពាន់លានដុល្លារ ដោយសារថា ទុនសរុបដែលក្រុមហ៊ុននេះប្រមូលបានក្នុងឆ្នាំនេះ មាន ២ ពាន់លានដុល្លារ។

August 22, 2022

ក្រសួងពាណិជ្ជកម្ម ប្រកាសអំពីតម្លៃប្រេងឥន្ធនៈសម្រាប់អនុវត្តពីថ្ងៃទី ២១ ដល់ ៣១ សីហា ២០២២

នាព្រឹកថ្ងៃទី ២២ ខែសីហានេះ ក្រសួងពាណិជ្ជកម្ម បានប្រកាសអំពី តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ២១ ដល់ថ្ងៃទី ៣១ ខែសីហា ឆ្នាំ ២០២២។

ក្នុងប្រកាសរបស់ ក្រសួងពាណិជ្ជកម្ម គេឃើញថា សាំងធម្មតាមានតម្លៃ ៤,៧០០ រៀល (ឡើង ៥០ រៀល) និង ម៉ាស៊ូតតម្លៃ ៥,១០០ រៀល (ឡើង ១០០ រៀល)។

ព័ត៌មានលម្អិត សូមអានសេចក្ដីប្រកាសខាងក្រោម ៖

August 22, 2022

គម្រោងស្ពានអាកាសថ្មីចំនួន ២ នៅ ភ្នំពេញ នឹងបើកការដ្ឋានសាងសង់នាពេលឆាប់ៗខាងមុខ

រដ្ឋបាលរាជធានីភ្នំពេញ កំពុងតែត្រៀមទីតាំងសម្រាប់រៀបចំពិធីសម្ពោធបើកការដ្ឋានសាងសង់ស្ពានអាកាសថ្មីចំនួន ២ ទៀតក្នុងពេលឆាប់ៗមុខនេះ ដើម្បីសម្រួលចរាចរណ៍ នេះបើតាម លោកនួន ផារ័ត្ន អភិបាលរងរាជធានីភ្នំពេញ។

កាលពីថ្ងៃទី ១៩ សីហា នៅលើទំព័របណ្ដាញសង្គម លោកនួន ផារ័ត្ន បានសរសេរថា «ចូលរួមជាមួយ ឯកឧត្តម យូ ស៊ុនឡុង រដ្ឋមន្ត្រីប្រតិភូអមនាយករដ្ឋមន្ត្រី ចុះពិនិត្យទីតាំងត្រៀមរៀបចំពិធីបើកការដ្ឋានសាងសង់ស្ពានអាកាសត្រង់ចំណុចប្រសព្វ មហាវិថីសម្តេចតេជោ ហ៊ុន សែន, វិថីកងយោធពលខេមរភូមិន្ទ និងមហាវិថីព្រះមុនីវង្ស ស្ថិតក្នុងភូមិសាស្ត្រខណ្ឌមានជ័យ និងខណ្ឌចំការមន»។

អភិបាលរងរាជធានីភ្នំពេញ លោក លោកនួន ផារ័ត្ន បានបន្តថា ក្រៅពីស្ពានអាកាសខាងលើ រដ្ឋបាលរាជធានីភ្នំពេញ ក៏នឹង «សាងសង់ស្ពានអាកាសនៅចំណុចប្រសព្វមហាវិថីសហព័ន្ធរុស្សី និងមហាវិថីសម្តេចចៅហ្វាវាំង» ផងដែរ។

លោកអភិបាលរងបញ្ជាក់ថា ពិធីសម្ពោធបើកការដ្ឋានសាងសង់ស្ពានអាកាសទាំងនេះ នឹងត្រូវរៀបចំក្នុងពេលឆាប់ៗខាងមុខ។

ក្នុងរង្វង់មូលគឺជាចំណុចប្រសព្វ មហាវិថីសម្តេចតេជោ ហ៊ុន សែន, វិថីកងយោធពលខេមរភូមិន្ទ និងមហាវិថីព្រះមុនីវង្ស ស្ថិតក្នុងភូមិសាស្ត្រខណ្ឌមានជ័យ និងខណ្ឌចំការមន

August 22, 2022

ក្រុមហ៊ុនអាកាសចរណ៍ឯកជនធំបំផុតនៅ មីយ៉ានម៉ា ជិតបង្ហាញវត្តមាននៅ វៀតណាម

ចាប់ពីខែកញ្ញាខាងមុខ ក្រុមហ៊ុនអាកាសចរណ៍ Myanmar Airways International នឹងចាប់ផ្ដើមធ្វើការហោះហើរជាលើកដំបូងទៅកាន់ ប្រទេសវៀតណាម។

ក្រុមហ៊ុនអាកាសចរណ៍ Myanmar Airways International (MAI) នឹងចាប់ផ្ដើមដឹកអ្នកដំណើរជាលើកដំបូងទៅកាន់ ប្រទេសវៀតណាម ចាប់ពីថ្ងៃទី ១៦ កញ្ញា ដោយហោះទៅ-មករវាងទីក្រុង Yangon របស់ មីយ៉ាន់ម៉ា និងទីក្រុង Noi Bai របស់ វៀតណាម ក្នុងនោះ រួមមាន ជើងហោះហើរទៅមក ២ លើក/សប្ដាហ៍ គឺនៅថ្ងៃចន្ទ និងថ្ងៃសុក្រ។

បន្ទាប់មក ចាប់ពីថ្ងៃទី ២២ កញ្ញា MAI នឹងបន្តបើកដំណើរការជើងហោះហើរទៅមក Yangon-HCM ១ លើក/សប្ដាហ៍ នៅថ្ងៃព្រហស្បតិ៍។ ជើងហោះហើរទាំងអស់របស់ក្រុមហ៊ុន MAI គឺសុទ្ធតែប្រើប្រាស់យន្តហោះ Airbus A320។

Myanmar Airways International ដែលត្រូវបានបង្កើតឡើងកាលពីឆ្នាំ ១៩៩៣ គឺជាក្រុមហ៊ុនអាកាសចរណ៍អន្តរជាតិធំមួយដែលធ្វើសកម្មភាពនៅ មីយ៉ានម៉ា។

August 22, 2022

សេវាទេសចរណ៍អវកាសតម្លៃ ៥១៤ លានរៀល ប្រើបាឡុងហោះរបស់ក្រុមហ៊ុនអាម៉េរិក

ទេសចរណ៍អវកាសប្រកបដោយសុវត្ថិភាព មិនបំភាយឧស្ម័នពុល ប៉ុន្តែនៅតែអាចគយគន់សម្រស់របស់ផែនដី និងអវកាសបាន គឺជាគោលដៅរបស់ក្រុមហ៊ុនអវកាសចរណ៍ធំៗលើពិភពលោក ក្នុងនោះក៏មាន Apace Perspective ផងដែរ។

ការប្រកួតប្រជែងក្នុងវិស័យទេសចរណ៍អវកាសកំពុងតែក្ដៅគគុកជាងពេលណាៗទាំងអស់។ ប៉ុន្តែ អ្វីដែលត្រូវបានគេរំពឹងថានឹងមានសក្ដានុពលខ្ពស់នាពេលដ៏ខ្លីខាងមុន នោះគឺសេវាទេសចរណ៍អវកាសតាមរយៈបាឡុងហោះដែលមិនបញ្ចេញឧស្ម័នពុល។

ក្រុមហ៊ុន Space Perspective នៅ Florida សហរដ្ឋអាម៉េរិក មានគម្រោងនាំអតិថិជនឡើងទៅកាន់កម្ពស់ជាង ៣០,០០០ ម៉ែត្រ តាមរយៈបាឡុងហោះ។ អតិថិជននឹងបានហោះហើរក្នុងទីអវកាសដោយជិះក្នុងបន្ទប់មួយដែលភ្ជាប់ពីខាងក្រោមបាឡុងហោះខ្នាតយក្ស បំពាក់បច្ចេកវិទ្យាទំនើប។ រូបភាពនានាដែលត្រូវបានប្រកាសកាលពីចុងខែកក្កដា បង្ហាញថា រចនារូបរាងថ្មីរបស់បន្ទប់ដែលមានឈ្មោះថា Space Neptune ទទួលបានវិញ្ញបនបត្រពីស្ថាប័នរដ្ឋរួចហើយ។

បន្ទប់ Space Neptune សម្រាប់ភ្ញៀវ ធំទូលាយជាង ធៀបនឹងកំណែមុន ជួយឱ្យអតិថិជនឈរត្រង់បានយ៉ាងស្រួលខ្លួន ក៏ដូចជាសមត្ថភាពនៃការស៊ូទ្រាំនឹងសម្ពាធមានកម្រិតខ្ពស់ជាងមុន។

Space Perspective សហការជាមួយ studio of My Imagination (OMI) ដែលមានទីស្នាក់ការកណ្ដាលនៅ ទីក្រុងឡុងដ៍ ដើម្បីរចនានូវរូបរាងរបស់បន្ទប់ Space Neptune ថ្មីនេះ។

ក្រុមហ៊ុន Space Perspective កំណត់ផែនការថា នៅចុងឆ្នាំ ២០២៤ នឹងចាប់ផ្ដើមនាំទេសចរ ៨ នាក់ ឡើងទៅគយគន់ផែនដី និងអវកាសពីចម្ងាយ ដោយប្រើប្រាស់ពេល ៦ ម៉ោង។ បាឡុងហោះនេះនឹងស្ថិតនៅលើស្រទាប់បរិយាកាស stratosphere របស់ផែនដី។

អតិថិជនដែលនឹងធ្វើដំណើរទេសចរណ៍ក្នុងកម្មវិធីបាឡុងហោះប្រើប្រាស់ឧស្ម័នអ៊ីដ្រូសែន របស់ Space Perspective នឹងមិនចាំបាច់ឆ្លងកាត់ការបណ្ដុះបណ្ដាលស៊ីជម្រៅដូចអ្នកអវកាសឡើយ។

តម្លៃសំបុត្រសម្រាប់មនុស្សម្នាក់គឺ ១២៥ ពាន់ដុល្លារអាម៉េរិក (ប្រហែល ៥១៤ លានរៀល)។ Space Perspective ឱ្យដឹងថា សំបុត្រចំនួនជាង ៩០០ ត្រូវបានលក់ឱ្យអតិថិជនរួចហើយ៕

>ទេសចរណ៍នាពេលអនាគត ៖ ជិតក្នុងបាឡុងហោះខ្នាតយក្សទស្សនាទិដ្ឋភាពភាពកោងរបស់ផែនដីពីលើមេឃ

>ទេសចរណ៍អវកាស! Virgin Galactic មានអតិថិជនជាង 600នាក់ក្នុងដៃ ខណៈ Blue Origin មិនទាន់ប្រកាសពីតម្លៃសំបុត្រធម្មតានៅឡើយ

August 20, 2022

មាសពិភពលោក កំពុងធ្លាក់ថ្លៃរយៈពេលវែងបំផុត រាប់ពីខែវិច្ឆិកា ២០២១

តម្លៃមាសកាលពីម្សិលមិញ បានបន្តដាំក្បាលចុះ ធ្វើឱ្យរយៈពេលនៃការធ្លាក់ថ្លៃរបស់វា អូសបន្លាយដល់ ៥ ថ្ងៃជាប់ៗគ្នា ដែលនេះគឺជាការធ្លាក់ថ្លៃយូរជាងគេ រាប់ចាប់ពីខែវិច្ឆិកា ២០២១។

បញ្ចប់ការជួញដូរកាលពីថ្ងៃសុក្រ តម្លៃមាសប្រគល់ភ្លាម ធ្លាក់ថ្លៃ ០.៦% ចុះមកនៅត្រឹម ១,៧៤៨.៥៨ ដុល្លារ/អោន (១ អោន (ounce) ស្មើនឹង ៨.២៩៤២៦ ជី) ដែលជាតម្លៃទាបបំផុតរាប់ចាប់ពីថ្ងៃទី ២៨ កក្កដា។ មាសប្រគល់ក្នុងកាលកំណត់ បាត់បង់តម្លៃអស់ ០.៥% មកនៅត្រឹម ១,៧៦២.៩ ដុល្លារ/អោន។

ក្រោយពីបានឡើងថ្លៃក្នុង ៤ សប្ដាហ៍កន្លង តម្លៃមាសបានថយចុះ ២.៩% ក្នុងសប្ដាហ៍នេះ ដែលនេះក៏ជាសប្ដាហ៍ដែលមាសធ្លាក់ថ្លៃខ្លាំងបំផុត រាប់ចាប់តាំងពីសប្ដាហ៍ដែលបញ្ចប់នៅថ្ងៃទី ០៨ កក្កដា ២០២២។

ក្រុមអ្នកវិភាគទីផ្សារបានឱ្យដឹងថា កត្តាដែលនាំឱ្យមាសធ្លាក់ថ្លៃគឺការងើបឡើងនៃតម្លៃប្រាក់ដុល្លារអាម៉េរិក និងការដែល រតនាគារជាតិអាម៉េរិក ត្រូវការដំឡើងការប្រាក់ដើម្បីទប់ទល់នឹងអតិផរណា។

August 20, 2022

Category: សង្គម និងសេដ្ឋកិច្ច