សង្គម និងសេដ្ឋកិច្ច - La Reine Media

ជាមធ្យម ប្រជាជនវៀតណាម ម្នាក់ ត្រូវរែកពុនបំណុលសាធារណៈជិត ៤០ លានដុង

ធៀបនឹងចំនួនប្រជាជនសរុបគិតត្រឹមថ្ងៃទី ០១ មករា ២០២២ ដែលមានប្រហែល ៩៨.៥ លាននាក់ ខ្ទង់បំណុល/ចំនួនប្រជាជនវៀតណាម គឺប្រហែល ៣៧ លានដុង។

យោងតាមសេចក្ដីប្រកាសព័ត៌មានរបស់ ក្រសួងហិរញ្ញវត្ថុវៀតណាម ដែលទើបតែចេញផ្សាយនាពេលថ្មីៗនេះ ខ្ទង់ប្រាក់បំណុលសាធារណៈរបស់ វៀតណាម ក្នុងឆ្នាំ ២០២១ ថយចុះ ៤៣.១% ធៀបនឹង ៥៥.៩% របស់ឆ្នាំ ២០២០។ យ៉ាងណាក៏ដោយ វៀតណាម បានចាត់ទុកថា នេះគឺជាដំណឹងល្អសម្រាប់សេដ្ឋកិច្ច។ ខ្ទង់បំណុលសាធារណៈរបស់ វៀតណាម ក៏ទាបជាងឆ្ងាយបើធៀបនឹងកម្រិតពិតាន ៦០%/GDP ដែលសភាបានកំណត់។

ជាមួយនឹងទំហំ GDP ៣៦៨ ពាន់លានដុល្លារសហរដ្ឋអាម៉េរិក ក្នុងឆ្នាំ ២០២១ តួលេខបំណុលសាធារណៈ/GDP របស់ វៀតណាម មានប្រមាណ ១៥៨.៦ ពាន់លានដុល្លារ។ ធៀបនឹងចំនួនប្រជាជនសរុបគិតត្រឹមថ្ងៃទី ០១ មករា ២០២២ ដែលមានប្រហែល ៩៨.៥ លាននាក់ ខ្ទង់បំណុល/ចំនួនប្រជាជនវៀតណាម គឺប្រហែល ៣៧ លានដុង។

ប្រការសំខាន់ជាងគេដែល វៀតណាម ត្រេកអរ នោះគឺថា អត្រាបំណុលរបស់រដ្ឋាភិបាល/GDP បានថយចុះច្រើន ពោលគឺពី ៥១.៧%/GDP ក្នុងឆ្នាំ ២០១៧ មកនៅត្រឹម ៣៩.១%/GDP ក្នុងឆ្នាំ ២០២១។ ចំណែកបំណុលសាធារណៈផ្សេងៗទៀតក៏បានថយចុះផងដែរ៕

August 26, 2022

មហាសេដ្ឋី Warren Buffett ចំណេញ ៤ ពាន់លានដុល្លារពី Occidental ក្នុងរយៈពេលមិនដល់កន្លះឆ្នាំ

ក្រុមហ៊ុន Berkshire Hathaway របស់លោក Warren Buffett បានវិនិយោគ ១០ ពាន់លានដុល្លារទៅក្នុងក្រុមហ៊ុនប្រេងឥន្ធនៈ Occidental Petroleum។

ក្នុងរយៈពេលមិនដល់កន្លះឆ្នាំ ក្រុមហ៊ុន Berkshire Hathaway របស់លោក Warren Buffett រកបានប្រាក់ចំណេញ ៤ ពាន់លានដុល្លារពីការបោះទុនទៅក្នុងក្រុមហ៊ុន Occidental Petroleum ដោយសារតែភាគហ៊ុនថាមពលកើនឡើងខ្ពស់បំផុតក្នុងរង្វង់ជិត ៤ ឆ្នាំមកនេះ។

យោងតាមការ Markets Insider ក្រុមហ៊ុនវិនិយោគដ៏ល្បីឈ្មោះរបស់មហាសេដ្ឋីអាម៉េរិក ខាងលើ បានបណ្ដាក់ទុន ១០ ពាន់លានដុល្លារទៅក្នុងក្រុមហ៊ុនរុករក និងទាញយករ៉ែប្រេង Occidental Petroleum ចាប់ពីថ្ងៃទី ២៨ កុម្ភៈ ដល់ថ្ងៃទី ០៨ សីហា។

Berkshire មានភាគហ៊ុនចំនួន ១៨៨ លានហ៊ុន ស្មើនឹងជាង ២០% នៅក្នុងក្រុមហ៊ុន Occidental Petroleum ក្នុងនោះ ភាគហ៊ុននេះមានតម្លៃចាប់ពី ៤១ ដល់ ៦០ ដុល្លារ/ហ៊ុន។

ចាប់ពីតាំងពីមហាសេដ្ឋី Buffett បានវិនិយោគ ភាគហ៊ុនរបស់ Occidental Petroleum បានឡើងថ្លៃប្រហែល ៨៣%។ បច្ចុប្បន្ន ភាគហ៊ុននេះត្រូវបានជួញដូរក្នុងរង្វង់ ៧៥ ដុល្លារអាម៉េរិក/ហ៊ុន ដែលជាតម្លៃខ្ពស់បំផុតរាប់ចាប់ពីខែវិច្ឆិកា ២០១៨ នាំឱ្យតម្លៃវិនិយោគរបស់ Berkshire នៅក្នុងក្រុមហ៊ុន Occidental Petroleum ឡើងដល់ជាង ១៤ ពាន់លានដុល្លារអាម៉េរិក៕

August 26, 2022

ក្រុមហ៊ុនស្វ៊ីស ផលិតរថយន្តកីឡាដ៏ទំនើបដំបូងគេក្នុងលោកដែលអាចបរលើផ្ទៃទឹក និងមុជក្រោមទឹក

រថយន្ត sQuba ត្រូវបានបង្ហាញជាសាធារណៈលើកដំបូងនៅក្នុងពិព័រណ៍រថយន្ត Geneva កាលពីថ្ងៃទី ១៦ មីនា ២០០៨។

Rinspeed Inc. គឺជាក្រុមហ៊ុនផលិតរថយន្តដ៏អស្ចារ្យរបស់ ប្រទេសស្វ៊ីស នេះ។ Rinspeed Inc. ត្រូវបាន Frank M. Rinderknecht (កើតឆ្នាំ ១៩៥៥) បង្កើតឡើងកាលពីឆ្នាំ ១៩៧៩ និងបានធ្វើការជាមួយអ្នកផ្គត់ផ្គង់ជាច្រើនដូចជា Harman, Sosram, ZF, SAP, Borbet, Dekra, Harting។ល។

រថយន្ត sQuba ដែលត្រូវបានអភិវឌ្ឍដោយក្រុមហ៊ុនស្វ៊ីស Rinspeed គឺជារថយន្តដំបូងក្នុងពិភពលោកដែលអាចបើកបរទាំងនៅលើគោក ទាំងនៅលើទឹក និងនៅក្រោមដី។ រថយន្តនេះត្រូវបានអភិវឌ្ឍទៅតាមខ្សែភាពយន្ត James Bond ឆ្នាំ ១៩៧៧ ដែលមានឈ្មោះថា The Spy Who Loved Me។

SQuba គឺជារថយន្តដើរដោយថាមពលអគ្គិសនីទាំងស្រុង ដោយមានម៉ូទ័រអគ្គិសនីចំនួន ៣ គ្រឿង ក្នុងនោះ ២ គ្រឿងសម្រាប់ដំណើរការក្រោមទឹក និង ១ គ្រឿងសម្រាប់បរលើកគោក។ រថយន្តនេះអាចស្ថិតនៅក្រោមទឹកជម្រៅ ១០ ម៉ែត្រ ហើយពេលនៅលើទឹក វាផ្លាស់ទីដូចទៅនឹងនាវាមុជទឹក។

រថយន្តអគ្គិសនី sQuba ដែលប្រើប្រាស់ថ្មប្រភេទ lithium-ion នេះ អាចបើកបរបានក្នុងល្បឿន ១២០ គីឡូម៉ែត្រ/ម៉ោងពេលនៅលើគោក និង ៦ គីឡូម៉ែត្រ/ម៉ោងពេលនៅលើទឹក និង ៣ គីឡូម៉ែត្រ/ម៉ោងពេលនៅក្រោមទឹក។

រថយន្តទំនើប sQuba អាចដឹកមនុស្សបាន ២ នាក់។ ពេលនៅក្រោមទឹក អ្នកនៅក្នុងរថយន្តនឹងដកដង្ហើមដោយប្រព័ន្ធបញ្ជាតាមបែបអ្នកមុជទឹក។ ពេលមិនមានអ្នកបើកបរ sQuba នឹងងើបឡើងលើផ្ទៃទឹកដោយស្វ័យប្រវត្ត៕

August 26, 2022

ក្រុមហ៊ុន Honda កាត់បន្ថយ ៤០% នៃបរិមាណរថយន្តដែលផលិតនៅក្នុង ប្រទេសជប៉ុន

ក្រុមហ៊ុនផលិតរថយន្ត Honda យល់ថា ការកាត់បន្ថយបរិមាណរថយន្តដែលផលិតនៅ ជប៉ុន នេះ គឺដោយសារភាពយឺតយ៉ាវក្នុងផ្នែកផ្គត់ផ្គង់គ្រឿងបន្លាស់ និងបញ្ហាដឹកជញ្ជូន។ល។

ក្រុមហ៊ុនផលិតរថយន្ត Honda Motor របស់ ជប៉ុន កាលពីថ្ងៃទី ២៥ សីហា ប្រកាសថា នឹងកាត់បន្ថយគម្រោងផលិតនៅ ប្រទេសជប៉ុន រហូតដល់ ៤០% នៅដើមខែកញ្ញា ព្រោះតែការរអាក់រអួលនៃបណ្ដាញផ្គត់ផ្គង់ និងបញ្ហាដែលទាក់ទិននឹងការដឹកជញ្ជូន ដោយសារតែ កូវីដ-១៩។

ដំណឹងនេះបានលេចឡើងនៅក្នុងគ្រាដែលក្រុមហ៊ុនផលិតរថយន្តដទៃនៅ ជប៉ុន មានភាពជឿជាក់ប្រកបដោយការប្រុងប្រយ័ត្ន ដោយយល់ថា ស្ថានភាពខ្វះឈីប Semiconductor កំពុងថយចុះ។

ការកាត់បន្ថយបរិមាណរថយន្តខាងលើនេះនឹងត្រូវបានអនុវត្តចំពោះរោងចក្រ Saitama (១០%) និងរោងចក្រ Suzuka (៣០%) នៅដើមខែកញ្ញាខាងមុខ។

ពេលដែល Honda កំពុងមានផែនការកាត់បន្ថយបរិមាណរថយន្ត ក្រុមហ៊ុន Toyota ឯណោះវិញបែរជារកវិធីបង្កើនបរិមាណរហូតដល់ដំណាច់ខែវិច្ឆិកា។ Toyota ឱ្យដឹងថា ពួកគេគ្រោងនឹងផលិតរថយន្ត ៨៥០,០០០ គ្រឿង នៅទូទាំងសកលលោកនៅខែកញ្ញា៕

August 26, 2022

វិស័យផ្លូវដែកនៃបណ្ដាប្រទេសអាស៊ាន ប្រឹងប្រែងដើម្បីចូលរួមអភិវឌ្ឍបណ្ដាញដឹកជញ្ជូនឱ្យកាន់តែប្រសើរ

ក្នុងគ្រាដែលសេដ្ឋកិច្ចនៃបណ្ដាប្រទេសក្នុង សមាគមប្រជាជាតិអាស៊ីអាគ្នេយ៍ កំពុងងើបឡើង ផ្លូវដែកនៅក្នុងបណ្ដាប្រទេសអាស៊ាន ត្រូវការកំណត់គោលដៅ ភារកិច្ចជាក់ស្ដែងដើម្បីនាំមកនូវផលប្រយោជន៍នៅក្នុងប្រទេសនីមួយៗ ក៏ដូចជាតំបន់ទាំងមូល។

ល្ងាចថ្ងៃទី ២៥ សីហា នៅ ប្រទេសវៀតណាម ក្រុមហ៊ុនផ្លូវដែកវៀតណាម បានចាប់ផ្ដើមបើកសន្និសីទសម្រាប់អគ្គនាយកក្រុមហ៊ុនផ្លូវដែក ASEAN លើកទី ៤។

ក្នុងរយៈពេល ៣ ថ្ងៃ ក្រុមបេសកកម្ម ដែលរួមមាន អគ្គនាយក ប្រធានបច្ចេកទេស ប្រធានផ្នែកគ្រប់គ្រង និងប្រធានផ្នែកទីផ្សារ បានពិនិត្យ ពិភាក្សាទៅលើរបាយការណ៍ស្ដីពីការងើបឡើង ក៏ដូចជាវឌ្ឍនភាពនៃវិស័យផ្លូវដែក។

ក្នុងគ្រាដែលសេដ្ឋកិច្ចនៃបណ្ដាប្រទេសក្នុង សមាគមប្រជាជាតិអាស៊ីអាគ្នេយ៍ កំពុងងើបឡើង ផ្លូវដែកនៅក្នុងបណ្ដាប្រទេសអាស៊ាន ត្រូវការកំណត់គោលដៅ ភារកិច្ចជាក់ស្ដែងដើម្បីនាំមកនូវផលប្រយោជន៍នៅក្នុងប្រទេសនីមួយៗ ក៏ដូចជាតំបន់ទាំងមូល។

ដើម្បីអនុវត្តផែនការឆ្ពោះទៅកាន់គោលដៅខាងលើ អង្គសន្និសីទបានឯកភាពថា ផ្លូវដែកនីមួយៗនៅក្នុងបណ្ដាប្រទេសនៃតំបន់អាស៊ីអាគ្នេយ៍ នឹងប្រឹងប្រែង ម្ចាស់ការជាងមុន ដើម្បីឱ្យផ្លូវដែកដំណើរការប្រកបដោយសុវត្ថិភាព និងជំរុញសមាហរណកម្មក្នុងតំបន់ ក៏ដូចជានៅទូទាំងសកលលោក។

អង្គសន្និបាតខាងលើ បានសម្រេចថា នឹងរៀបចំសន្និបាតអគ្គនាយកផ្លូវដែកអាស៊ាន លើកទី ៤៣ នៅ ហ្វ៊ីលីពីន នៅឆ្នាំ ២០២៣៕

August 26, 2022

តម្លៃរបស់ Grab បច្ចុប្បន្ន ស្មើនឹងពាក់កណ្ដាលក្រុមហ៊ុនមេ GoTo

Grab ធ្លាប់ជាក្រុមហ៊ុនធុរកិច្ចថ្មីដែលមានតម្លៃខ្ពស់ជាងគេបង្អស់នៅ អាស៊ីអាគ្នេយ៍ ប៉ុន្តែ បច្ចុប្បន្ន តម្លៃមូលធនទីផ្សាររបស់ក្រុមហ៊ុននេះ នៅត្រឹមតែ ១៣ ពាន់លានដុល្លារអាម៉េរិក ស្មើនឹងពាក់កណ្ដាលនៃតម្លៃរបស់ក្រុមហ៊ុនមេ GoTo (PT GoTo Gojek Tokopedia Tbk)។

ច្រើនឆ្នាំកន្លងមកនេះ Grab និង GoTo ត្រូវប្រឈមមុខនឹង «សង្គ្រាម» ដែលត្រូវចំណាយច្រើនដើម្បីដណ្ដើមចំណែកទីផ្សារក្នុងតំបន់។ ក៏ប៉ុន្តែ ក្រុមហ៊ុននេះកំពុងតែខាតចង់ច្រើន និងត្រូវបញ្ចុះបញ្ចូលក្រុមអ្នកវិនិយោគ ដោយការពន្យល់អំពីសក្ដានុពលរបស់ពួកគេក្រោយពីការធ្វើ IPO។

ដោយសារតែតម្លៃភាគហ៊ុនថយចុះក្នុងកម្រិតទាប តម្លៃមូលធនទីផ្សាររបស់ GoTo បច្ចុប្បន្នប្រហែលនៅសល់ប្រហែល ២៦ ពាន់លានដុល្លារអាម៉េរិក ក្នុងពេលដែល Grab នៅសល់ ១៣ ពាន់លានដុល្លារ។ ក្រុមហ៊ុនទាំងពីរនេះនឹងបញ្ចេញរបាយការណ៍ហិរញ្ញវត្ថុប្រចាំត្រីមាសនៅប៉ុន្មានថ្ងៃខាងមុខ។

Grab បច្ចុប្បន្ននៅតែចាត់ទុក សិង្ហបុរី ជាទីផ្សារធំបំផុតរបស់ខ្លួន សូម្បីតែបានពង្រីកខ្លួនទៅក្នុងទីផ្សារឥណ្ឌូណេស៊ី ដែលជាខឿនសេដ្ឋកិច្ចធំបំផុតនៅ អាស៊ីអាគ្នេយ៍។ ចំណែក GoTo វិញ កំពុងគ្រងតំណែងលេខ ១ នៅក្នុងទីផ្សារស្រុកកំណើត។

Grab កាន់កាប់ចំណែកទីផ្សារប្រមាណ ៤៩% នៅក្នុងទីផ្សារប្រគល់អាហារនៅ ឥណ្ឌូណេស៊ី ខណៈដែល ToTo 45% នេះបើតាម Bloomberg ស្រង់ប្រភពព័ត៌មានពី Momentum Works៕

August 26, 2022

អាជ្ញាធរថៃ អនុញ្ញាតឱ្យដំឡើងថ្លៃមីកញ្ចប់ចាប់ពីថ្ងៃទី ២៥ សីហា ២០២២

ក្រុមអ្នកផលិតមីកញ្ចប់នៅ ប្រទេសថៃ បានស្នើសុំអាជ្ញាធរថៃ ដើម្បីដំឡើងថ្លៃមីកញ្ចប់ ២ បាត (២២៩.១៩ រៀល) ចាប់ពីឆ្នាំ ២០២១ ប៉ុន្តែ នាយកដ្ឋានពាណិជ្ជកម្មក្នុងស្រុកបានស្នើឱ្យរក្សាតម្លៃចាស រហូតដល់ថ្ងៃទី ២៤ សីហា ២០២២។

ប្រធាននាយកដ្ឋានពាណិជ្ជកម្មក្នុងស្រុក នៃក្រសួងពាណិជ្ជកម្មថៃ Wattanasak Sur-iam កាលពីថ្ងៃទី ២៤ សីហា ២០២២ បានឱ្យដឹងថា សហគ្រាសចំនួន ៣ ដែលផលិតមីកញ្ចប់របស់ប្រទេសនេះ គឺ Thai President Foods (Mama), Thai Preserved Food (Wai Wai) និង Wan Thai Foods Industry (Yum Yum) ទទួលបានការអនុញ្ញាតឱ្យដំឡើងថ្លៃមីកញ្ចប់ថែម ១ បាត ដោយលក់ក្នុងតម្លៃ ៧ បាត (៨០២ រៀល) /កញ្ចប់ ចាប់ពីថ្ងៃទី ២៥ សីហា ២០២២។

ក៏ប៉ុន្តែ បើសិនជាមានករណីលក់ក្នុងតម្លៃខ្ពស់ជាងតម្លៃខាងលើ អ្នកលក់អាចនឹងត្រូវជាប់ពន្ធនាគារ ៧ ឆ្នាំ ឬពិន័យជាប្រាក់ ១៤០,០០០ បាត (ជាង ១៦ រៀល)។

ដើម្បីឈានដល់ការសម្រេចចិត្តខាងលើ រដ្ឋមន្ត្រីពាណិជ្ជកម្មថៃ បានពិនិត្យលើការចំណាយក្នុងការផលិត និងឃើញថាមានការកើនឡើង។ ប៉ុន្តែ ការសម្រេចនេះបានកំណត់ថា បើសិនជាការចំណាយលើការផលិតថយចុះ តម្លៃមីកញ្ចប់ក៏នឹងត្រូវបញ្ចុះតម្លៃទៅតាមនោះ។

នាយកដ្ឋានពាណិជ្ជកម្មក្នុងស្រុក នៃ ក្រសួងពាណិជ្ជកម្មថៃ ក៏បានតម្រូវឱ្យក្រុមអ្នកផលិតមីរាយការណ៍អំពីការចំណាយទៅលើវត្ថុធាតុដើមក្នុងការផលិតផងដែរ។

ក្រុមអ្នកផលិតមីកញ្ចប់នៅ ប្រទេសថៃ បានស្នើអាជ្ញាធរថៃ អនុញ្ញាតឱ្យដំឡើងថ្លៃមីកញ្ចប់ ២ បាតទៀត ចាប់ពីឆ្នាំ ២០២១ ប៉ុន្តែ នាយកដ្ឋានពាណិជ្ជកម្មក្នុងស្រុក បានតម្រូវឱ្យរក្សាតម្លៃចាស។ ក៏ប៉ុន្តែ ចាប់ពីថ្ងៃទី ២៥ សីហា ២០២២ ក្រុមអ្នកផលិតមីកញ្ចប់នៅ ប្រទេសថៃ ត្រូវបានអនុញ្ញាតឱ្យដំឡើងថ្លៃថែម ១ បាត/កញ្ចប់៕

August 26, 2022

គម្រោងរថភ្លើងអគ្គិសនីក្រោមដីហ្សាការតា ត្រូវដំឡើងទុនដល់ជាង ១.៧ ពាន់លានដុល្លារអាម៉េរិក

ការចំណាយកើនឡើងដោយសារតែការស្ថាបនាផ្លូវដែកក្រោមដីមកដល់ដំណាក់កាលដែលមានភាពស្មុគស្មាញជាងធៀបនឹងដំណាក់កាលទីមួយ ដោយសារបញ្ហាជាច្រើន ក្នុងនោះមានបញ្ហាទាក់ទងនឹងដីធ្លីជាដើម។

រដ្ឋមន្ត្រីក្រសួងសេដ្ឋកិច្ចឥណ្ឌាណេស៊ី Airlangga Hartarto បានឱ្យដឹងថា ថវិកាសម្រាប់ដំណាក់កាលទីពីរនៃគម្រោងស្ថាបនាផ្លូវរថភ្លើងអគ្គិសនីក្រោមដីហ្សាការតា ពីរង្វង់មូល HI នៅតំបន់កណ្ដាលរបស់ ហ្សាការតា ដល់ Ancol នៅភាគខាងជើងរដ្ឋធានីនេះ បានកើនឡើងដល់ ២៦ ទ្រីលានរូពី (ជាង ១.៧៥ ពាន់លានដុល្លារអាម៉េរិក)។

យោងតាមទីភ្នាក់ងារសារព័ត៌មាន Antara កាលពីថ្ងៃទី ២៤ សីហា នៅឯការិយាល័យប្រធានាធិបតី រដ្ឋមន្ត្រីសេដ្ឋកិច្ចបានថ្លែងថា ថវិកាដំបូងរបស់គម្រោងយុទ្ធសាស្ត្រមួយនេះគឺត្រឹមតែ ២២.៥ ទ្រីលាន (២២,៥០០,០០០,០០០,០០០) រូបពីប៉ុណ្ណោះ។

ការចំណាយកើនឡើងដោយសារតែការស្ថាបនាផ្លូវដែកក្រោមដីមកដល់ពេលនេះមានភាពស្មុគស្មាញជាងធៀបនឹងដំណាក់កាលទីមួយ ដោយភ្ជាប់ពីរង្វង់មូល HI និង Lebak Bulus នៅ ហ្សាការតាខាងត្បូង ក៏ដូចជាបញ្ជាទាក់ទងនឹងដីធ្លី ពិសេសគឺនៅតំបន់ក្រុងបុរាណ Kota Tua។

ជាក់ស្ដែង ក្នុង ១៥.៧ គីឡូម៉ែត្ររបស់ដំណាក់កាលទីមួយ កំណត់ផ្លូវដែកក្រោមដីមានប្រវែងតែ ៥.៧ គូឡូម៉ែត្រ និង ១០ គូឡូម៉ែត្រគឺជាផ្លូវនៅលើទីខ្ពស់។ ចំណែកដំណាក់កាលទីពីរនៃគម្រោងផ្លូវដែកក្រោមដីនេះមានប្រវែង ១២.៣ គីឡូម៉ែត្រ ប៉ុន្តែ វាស្ថិតក្រោមដីទាំងស្រុង។

ដំណាក់កាលទីពីររបស់គម្រោងផ្លូវរថភ្លើងអគ្គិសនីក្រោមដីហ្សាការតា នេះ នឹងតភ្ជាប់ជាមួយផ្លូវរបៀងឧត្តរ-ទក្សិណរបស់ដំណាក់កាលទីមួយដែលត្រូវបានដាក់ឱ្យដំណើរការតាំងពីឆ្នាំ ២០១៩។

បន្ទាប់ពីបានបញ្ចប់ការសាងសង់ជាស្ថាពរ ពេលវេលាធ្វើដំណើរពីស្ថានីយរថភ្លើង Lebak Bulus ទៅដល់ស្ថានីយចុងក្រោយ Kota នឹងចំណាយពេលប្រហែលតែ ៤៥ នាទីប៉ុណ្ណោះ៕

August 25, 2022

ធនាគារជាតិកម្ពុជា សេចក្តីប្រកាសព័ត៌មាន ស្តីពី «ការផ្សព្វផ្សាយ និងផ្តល់ឥណទានដោយខុសច្បាប់»

ធនាគារជាតិកម្ពុជា បានចេញសេចក្ដីប្រកាសព័ត៌មាន ស្ដីពី «ការផ្សព្វផ្សាយ និងផ្តល់ឥណទានដោយខុសច្បាប់» នៅថ្ងៃនេះ ក្នុងនោះ មានការបញ្ជាក់ថា នឹងចាត់វិធានផ្លូវច្បាប់ ចំពោះ «កម្ចីខុសច្បាប់» តាមប្រព័ន្ធអនឡាញ បណ្ដាញសង្គម និងខិតប័ណ្ណតាមទីសាធារណៈជាដើម។

សេចក្ដីសម្រេចខាងលើនេះត្រូវបានធ្វើឡើងដោយយោងតាមច្បាប់ស្ដីពី គ្រឹះស្ថានធនាគារ និងហិរញ្ញវត្ថុ បន្ទាប់ពីស្ថាប័ន ឬបុគ្គលិកមួយចំនួនបានផ្សព្វផ្សាយជាសាធារណៈអំពីការផ្ដល់ប្រាក់កម្ចីក្រៅច្បាប់ នេះបើតាមប្រកាសរបស់ ធនាគារជាតិកម្ពុជា។

ស្ថាប័ននេះក៏បានព្រមានថា កំពុងសហការជាមួយអាជ្ញាធរមានសមត្ថកិច្ចពាក់ព័ន្ធដើម្បីចាត់វិធានការតាមផ្លូវច្បាប់ចំពោះស្ថាប័ន និងបុគ្គលដែលធ្វើសកម្មភាពផ្ដល់ «កម្ចីខុសច្បាប់» តាមប្រព័ន្ធអនឡាញ បណ្ដាញសង្គម និងខិតប័ណ្ណនៅតាមទីសាធារណៈជាដើមផងដែរ។

ព័ត៌មានលម្អិត សូមអានសេចក្ដីប្រកាសរបស់ ធនាគារជាតិកម្ពុជា ខាងក្រោម ៖

August 25, 2022

ក្រុមហ៊ុនផ្ដល់សេវាកម្មហៅរថយន្តតាក់ស៊ីនៅប្រទេសឡាវ ពន្លឿនការសាងសង់ស្ថានីយបញ្ចូលថាមពលអគ្គិសនីរហ័ស

ថ្មីៗនេះ Loca បានចាប់ផ្ដើមការស្ថាបនា និងដំឡើងស្ថានីយបញ្ចូលថាមពលអគ្គិសនីរហ័សនៅទីតាំងមួយចំនួន ក្នុង រដ្ឋធានីវៀងចន្ទ នៃ ប្រទេសឡាវ។

បច្ចុប្បន្ន ក្រុមហ៊ុន Loca ដែលរកស៊ីក្នុងវិស័យសេវាកម្មហៅរថយន្តតាក់ស៊ីនៅ ប្រទេសឡាវ កំពុងពន្លឿនដំណើរការដំឡើងស្ថានីយបញ្ចូលថាមពលអគ្គិសនីនៅ ប្រទេសឡាវ ដោយចាប់ផ្ដើមពី រដ្ឋធានីវៀងចន្ទន៍ ឆ្ពោះទៅកាន់តំបន់ Pakse នៃ ខេត្តចំប៉ាស័ក្ដិ នៅលើផ្លូវជាតិលេខ ៣ ដើម្បីបង្កភាពងាយស្រួលសម្រាប់អ្នកប្រើប្រាស់រថយន្តអគ្គិសនី ទៅតាមការគ្រោងទុក។

ទូបញ្ចូលថាមពលអគ្គិសនីនីមួយៗ មានកម្លាំងឡើងដល់ ១២០ គីឡូវ៉ាត អនុញ្ញាតឱ្យបញ្ចូលថាមពលអគ្គិសនីតែ ១០ នាទី ប៉ុន្តែអាចឱ្យរថយន្តអគ្គិសនីធ្វើដំណើរបាន ១២០ គីឡូម៉ែត្រ។ បច្ចុប្បន្ន ទូបញ្ចូលថាមពលអគ្គិសនីនានារបស់ Loca មានទាំងឆ្នាំងសាក GB/T សម្រាប់ប្រភេទរថយន្តអគ្គិសនីផលិតនៅ ប្រទេសចិន និងទាំង CCS Type 2 សម្រាប់រថយន្តអគ្គិសនីរបស់ អឺរ៉ុប និង អាស៊ាន ផងដែរ។

មកដល់ពេលនេះ ក្រុមហ៊ុន Loca មានស្ថានីយបញ្ចូលថាមពលអគ្គិសនីចំនួន ៣ រួចហើយ រួមាន នៅសណ្ឋាគារ Vientiane Plaza, ភោជនីយដ្ឋាន The Kao និងសណ្ឋាគារ Inthara នៅក្នុង រដ្ឋធានីវៀងចន្ទ ប្រទេសឡាវ។

ក្រុមហ៊ុនខាងលើក៏អភិវឌ្ឍកម្មវិធីទូរស័ព្ទ Loca EV ដើម្បីឱ្យអតិថិជនប្រើប្រាស់សេវាកម្មបញ្ចូលថាមពលអគ្គិសនីសម្រាប់រថយន្ត និងបង់ប្រាក់ដោយប្រើប្រាស់កាត Credit ឬ BCEL ONE បានងាយស្រួល៕

August 25, 2022

Category: សង្គម និងសេដ្ឋកិច្ច