សង្គម និងសេដ្ឋកិច្ច - La Reine Media

មហាសេដ្ឋីឥណ្ឌា ក្លាយជាអ្នកមានជាងគេលំដាប់ទីបីក្នុងពិភពលោក

មហាសេដ្ឋី Gautam Adani គឺជាអ្នកមានជាងគេនៅក្នុង ទ្វីបអាស៊ី ដែលមានឈ្មោះនៅក្នុង top 3 ក្នុងចំណោមអ្នកមានទ្រព្យច្រើនជាងគេបង្អស់នៅក្នុងពិភពលោក ដោយមានទ្រព្យជិត ១៤០ ពាន់លានដុល្លារអាម៉េរិក។

កាលពីប៉ុន្មានឆ្នាំមុន នៅខាងក្រៅ ប្រទេសឥណ្ឌា មានមនុស្សតិចណាស់ដែលបានស្គាល់លោក Gautam Adani។ ប៉ុន្តែ មួយរយៈពេលចុងក្រោយនេះ អ្នកជំនួញជនជាតិឥណ្ឌា រូបនេះ បានបង្កការភ្ជាក់ផ្អើលជាបន្តបន្ទាប់ ព្រោះតែទ្រព្យរបស់គាត់កើនឡើងមិនឈប់ឈរ។

បច្ចុប្បន្ន លោក Adani មានទ្រព្យសរុប ១៣៧.៤ ពាន់លានដុល្លារអាម៉េរិក ច្រើនជាងមហាសេដ្ឋីបារាំង Bernard Arnault ទៅទៀត ដែលនេះបាននាំឱ្យគាត់ជាប់ចំណាត់ថ្នាក់ទីបីស្ដីពីអ្នកមានជាងគេក្នុងពិភពលោក។

នេះគឺជាលើកដំបូងហើយដែល ជនជាតិអាស៊ីម្នាក់ មានឈ្មោះនៅក្នុង top 3 នៃបញ្ជីចំណាត់ថ្នាក់អ្នកមានរបស់ Bloomberg Billionaires Index។

បច្ចុប្បន្ន មហាសេដ្ឋី Gautam Adani ឈរពីក្រោយលោក Elon Musk និងលោក Jeff Bezos។ ក្នុងឆ្នាំនេះ មហាសេដ្ឋី Adani រកបានប្រាក់សរុប ៦០.៩ ពាន់លានដុល្លារ ខ្ពស់ជាង ៥ ដង ធៀបនឹងមហាសេដ្ឋកិច្ចដទៃ។

August 30, 2022

ឥណ្ឌូណេស៊ី បន្តការលើកលែងពន្ធសម្រាប់ការនាំចេញប្រេងដូងរហូតដល់ចុងខែតុលា

កសិករឥណ្ឌូណេស៊ី នឹងទទួលបានផលចំណេញ ខណៈដែលតម្លៃប្រេងដូង និងប្រេងរុក្ខជាតិដទៃនៅក្នុងស្រុកមានស្ថិរភាព នៅពេល ឥណ្ឌាណេស៊ី បន្តការលើកលែងពន្ធសម្រាប់ការនាំចេញប្រេងដូង។

កាលពីថ្ងៃទី ២៩ សីហា ក្រសួងសម្របសម្រួលកិច្ចការសេដ្ឋកិច្ចឥណ្ឌូណេស៊ី បានប្រកាសថា ប្រទេសនេះបានបន្តការលើកលែងពន្ធនាំចេញប្រេងដូងរហូតដល់ថ្ងៃទី ៣១ ខែតុលាខាងមុខ។

ការដែល ឥណ្ឌាណេស៊ី បន្តការលើកលែងពន្ធសម្រាប់ការនាំចេញប្រេងដូងនេះ នឹងជួយរក្សាតម្លៃប្រេងដូង និងប្រេងរុក្ខជាតិនានានៅក្នុងស្រុកឱ្យមានស្ថិរភាពដូចបច្ចុប្បន្ន ក្នុងគ្រាដែលតម្លៃបន្លែផ្លែឈើស្រស់កើនឡើងក៏នាំមកនូវផលចំណេញសម្រាប់ប្រជាកសិករ។

ឥណ្ឌូណេស៊ី គឺជាប្រទេសដែលនាំចេញប្រេងដូងធំជាងគេបំផុតក្នុងពិភពលោក ប៉ុន្តែ ក្រុមអ្នកផលិតប្រេងដូងរបស់ ឥណ្ឌូណេស៊ី កន្លងមក ត្រូវដោះស្រាយបញ្ហាប្រេងដូងសល់ក្នុងឃ្លាំង បន្ទាប់ពីប្រទេសនេះហាមការនាំចេញក្នុងរយៈពេល ៣ សប្ដាហ៍ ដែលបានអនុវត្តចាប់ពីថ្ងៃទី ២៨ មេសា ដល់ ២៣ ឧសភា ដើម្បីបញ្ចុះតម្លៃប្រេងក្នុងប្រទេស។

ក្រោយពីបានដកចេញបម្រាមខាងលើ ឥណ្ឌូណេស៊ី បានដាក់ចេញគោលការណ៍ជួញដូរទំនិញមួយដែលត្រូវបានហៅថា កាតព្វកិច្ចទីផ្សារក្នុងស្រុក (DMO) ក្នុងបំណងរក្សាសកម្មភាពផលិតប្រេងរុក្ខជាតិក្នុងស្រុក។ ទន្ទឹមនឹងនេះ ប្រទេសនៅ អាស៊ីអាគ្នេយ៍មួយនេះក៏ប្រឹងប្រែងក្នុងការកាត់បន្ថយទំនិញសល់ក្នុងឃ្លាំង តាមរយៈការកាត់បន្ថយពន្ធនាំចេញ និងបង្កើនល្បឿននៃការដឹកជញ្ជូនទំនិញ។

ក្នុងខែកក្កដា ឥណ្ឌូណេស៊ី បានកាត់បន្ថយពន្ធនាំចេញប្រេងដូងពី ២០០ ដុល្លារអាម៉េរិក/តោន មកនៅត្រឹម ០ ដុល្លារ/តោន ដើម្បីជំរុញការនាំចេញ និងកាត់បន្ថយបញ្ហាសល់ទំនិញនៅក្នុងស្រុក៕

August 30, 2022

រថភ្លើងអគ្គិសនីប្រភេទព្យួរដំបូងរបស់ ប្រទេសចិន ចាប់ផ្ដើមដំណើរការ

រថភ្លើងប្រភេទព្យួរនេះអាចដឹកមនុស្សបាន ២០០ នាក់ បើកបរក្នុងល្បឿន ៧០ គីឡូម៉ែត្រ/ម៉ោង បំពាក់បច្ចេកវិទ្យាបើកបរស្វ័យប្រវត្ត និងប្រើប្រាស់ថាមពលតិច។

រថភ្លើងអគ្គិសនីប្រភេទព្យួរដំបូងរបស់ ប្រទេសចិន ចាប់ផ្ដើមបរចេញពីរោងចក្ររបស់ក្រុមហ៊ុន CRRC Sifang នៅទីក្រុង Qingdao ខេត្ត Shandong ភាគខាងកើតនៃ ប្រទេសចិន កាលពីថ្ងៃទី ២៦ សីហា ២០២២។ រថភ្លើងអគ្គិសនីដែលអាចបើកបរក្នុងល្បឿន ៧០ គីឡូម៉ែត្រ/ម៉ោង និងអាចដឹកមនុស្សបាន ២០០ នាក់នេះ ត្រូវបានផលិតឡើងដើម្បីបម្រើដល់វិស័យទេសចរណ៍នៅក្នុងទីក្រុង Wuhan ខេត្ត Hebei ប្រទេសចិន។

រថភ្លើងព្យួរពាណិជ្ជកម្មនេះបំពាក់បច្ចេកវិទ្យាទំនើបៗ និងបើកបរស្វ័យប្រវត្ត ប៉ុន្តែ ត្រូវការឱ្យមានអ្នកបើកបរម្នាក់ដែលត្រៀមសម្រាប់ហេតុការណ៍បន្ទាន់ នេះបើតាម CRRC Sifang។ រថភ្លើងនេះក៏អាចបើកបរដោយខ្លួនឯងទៅកាន់ស្ថានីយដែលនៅក្បែរបំផុត ក្នុងករណីដាច់ចរន្តអគ្គិសនី។

រថភ្លើងអគ្គិសនីប្រភេទព្យួរនេះ ត្រូវបានរំពឹងថា នឹងជួយជំរុញវិស័យទេសចរណ៍នៅ Wuhan និងនាំមកនូវបទពិសោធន៍ដ៏អស្ចារ្យសម្រាប់ទេសចរ។ រថភ្លើងនេះនឹងរត់តាមផ្លូវដែកសម្រាប់ដំណើរកម្សាន្តដែលមានប្រវែងជាង ២៧ គីឡូម៉ែត្រ។ ដំណាក់កាលដំបូងរបស់គម្រោងខាងលើ រួមមានផ្លូវដែកប្រវែង ១០.៥ គីឡូម៉ែត្រ និង ចំណត ៦ កន្លែង៕

August 29, 2022

វៀតណាម បោះបង់បទបញ្ញាតិស្ដីពីធ្វើការមូលដ្ឋានីយកម្មលើរថយន្ត

យោងតាមក្រុមអ្នកជំនាញ ក្នុងស្ថានភាពនៃសមាហរណកម្មអន្តរជាតិ បទបញ្ញាតនានាស្ដីពីវិធីសាស្ត្រកំណត់អត្រានៃមូលដ្ឋាននីយកម្ម (localization rate) ចំពោះរថយន្ត លែងសមស្របទៀតហើយសម្រាប់ភាពជាក់ស្ដែងនៅក្នុងវិស័យឧស្សាហកម្មនេះ។

បទបញ្ញាតនានាស្ដីពីការកំណត់អត្រាលើមូលដ្ឋាននីយកម្មចំពោះរថយន្តនៅ វៀតណាម នឹងត្រូវបានលុបចោលចាប់ពីថ្ងៃទី ០១ តុលា ២០២២ ដោយសារតែលែងសមស្របសម្រាប់ស្ថានភាពជាក់ស្ដែងរបស់វិស័យផលិតរថយន្ត នៅក្នុងការធ្វើសមាហរណកម្មនាបច្ចុប្បន្ន។

យោងតាមក្រុមអ្នកជំនាញ ក្នុងស្ថានការណ៍ជាក់ស្ដែងនៃសមាហរណកម្មអន្តរជាតិ បទបញ្ញាតនានាស្ដីពីការកំណត់អត្រានៃមូលដ្ឋាននីយកម្ម (អត្រានៃការធ្វើមូលដ្ឋានីយកម្ម គឺជាអត្រានៃធនធាន ឬ វត្ថុធាតុដើមក្នុងស្រុកដែលប្រើប្រាស់សម្រាប់ការផលិតអ្វីមួយ ធៀបនឹងការនាំចូល) ចំពោះរថយន្ត លែងសមស្របទៀតហើយនៅក្នុងវិស័យឧស្សាហកម្ម ព្រោះថា វៀតណាម បច្ចុប្បន្ន នៅតែប្រើប្រាស់វិធីគណនាអត្រាមូលដ្ឋានីយកម្មទៅតាមចង្កោមលម្អិតនៃផលិតផលដែលត្រូវបានផលិតក្នុងប្រទេស។

ផ្ទុយទៅវិញ បណ្ដាប្រទេសនៅ អាស៊ាន គណនាទៅតាមតម្លៃសរុបនៃផលិតផលដើម្បីទទួលបានការអនុគ្រោះពន្ធទៅតាមកិច្ចព្រមព្រៀងពាណិជ្ជកម្មទំនិញអាស៊ាន (ATIGA)។

យោងតាមអ្នកជំនាញការផ្នែកច្បាប់ ការដែល វៀតណាម បោះបង់ បទបញ្ញាតិស្ដីពីការធ្វើមូលដ្ឋានីយកម្មលើរថយន្ត គឺជាជំហានថ្មីមួយនៅក្នុងការកសាងគោលនយោបាយសម្រាប់វិស័យឧស្សាហកម្មរថយន្ត នាពេលខាងមុខរបស់ប្រទេសនេះ។

ជាក់ស្ដែងបានបង្ហាញថា ក្នុងរយៈពេល ៣០ ឆ្នាំនៃការរីកចម្រើនរបស់វិស័យឧស្សាហកម្មរថយន្ត បណ្ដាក្រុមហ៊ុន សាជីវកម្មរបស់ វៀតណាម សុទ្ធតែសន្យាអំពី អត្រាការមូលដ្ឋានីយកម្មលើរថយន្ត ដែលកើនឡើងទៅតាមដំណាក់កាលនីមួយៗ ប៉ុន្ត គោលនយោបាយមិនមានការដាក់ទណ្ឌកម្មលើការបង្កើនអត្រានៃការធ្វើមូលដ្ឋានីយកម្មទេ។ នេះគឺជាកត្តាមួយដែលនាំឱ្យ វិស័យឧស្សាហកម្មរថយន្តរបស់ វៀតណាម មកដល់ពេលនេះ នៅតែត្រូវឈឺក្បាលជាមួយនឹងបញ្ហា មូលដ្ឋានីយកម្ម៕

August 29, 2022

ប្រទេសថៃ ប្រកាសអំពីវឌ្ឍនភាពនៃការស្ថាបនាផ្លូវដែកល្បឿនលឿនដំបូង

ផ្លូវដែកនេះ នៅពេលស្ថាបនារួចរាល់នឹងតភ្ជាប់ជាមួយនឹងផ្លូវដែកល្បឿនលឿនចិន-ឡាវ នៅក្នុងបណ្ដាញផ្លូវដែកមួយតភ្ជាប់ពីតំបន់ Kunming ប្រទេសចិន ទៅកាន់ សិង្ហបុរី។

កាលពីថ្ងៃទី ២៨ សីហា អ្នកនាំពាក្យរបស់ រាជរដ្ឋាភិបាលថៃ Traisuree Taisaranakul បានឱ្យដឹងថា ការអនុវត្តគម្រោងផ្លូវដែកល្បឿនលឿនរវាង រាជធានីបាងកក និងទីក្រុង Nong Khai ខេត្ត Nong Khai នៅភាគឦសានប្រទេសនេះ កំពុងដំណើរការទៅតាមការកំណត់។

ដំណាក់កាលទីមួយនៃគម្រោងស្ថាបនាផ្លូវដែកល្បឿនលឿនដែលមានប្រវែង ២៥០ គីឡូម៉ែត្រ ពី បាងកក ទៅកាន់ Nakhon Ratchasima គ្រោងនឹងបញ្ចប់ជាស្ថាពរនៅក្នុងឆ្នាំ ២០២៦។

ដំណាក់កាលទីពីររបស់គម្រោងផ្លូវដែកខាងលើ មានប្រវែង ៣៥៧ គីឡូម៉ែត្រ ភ្ជាប់ពី Nakhon Ratchasima ទៅកាន់ Nong Khai បច្ចុប្បន្នកំពុងត្រូវបានវាយតម្លៃអំពីផលប៉ះពាល់ដល់បរិស្ថាន។

អ្នកនាំពាក្យរបស់ រាជរដ្ឋាភិបាលថៃ ក៏បានបង្ហើបឱ្យដឹងថា នាយកដ្ឋានផ្លូវល្បឿនលឿននៃក្រសួងចរាចរណ៍ដឹកជញ្ជូនថៃ កំពុងតែសហការជាមួយភាគី ឡាវ ដើម្បីសាងសង់ស្ពានមួយកន្លែងដែលឆ្លងកាត់ទន្លេមេគង្គ ដើម្បីបម្រើឱ្យផ្លូវដែកល្បឿនលឿនខាងលើផងដែរ។ ការពិភាក្សាលម្អិតអំពីគម្រោងសាងសង់ស្ពាននេះនឹងត្រូវបានធ្វើឡើងនៅក្នុងខែតុលា ២០២២។

នេះគឺជាផ្លូវដែកល្បឿនលឿនដំបូងរបស់ ប្រទេសថៃ។ ផ្លូវដែកនេះ នៅពេលស្ថាបនារួចរាល់នឹងតភ្ជាប់ជាមួយនឹងផ្លូវដែកល្បឿនលឿនចិន-ឡាវ នៅក្នុងបណ្ដាញផ្លូវដែកមួយតភ្ជាប់ពីតំបន់ Kunming ប្រទេសចិន ទៅកាន់ ប្រទេសសិង្ហបុរី៕

August 29, 2022

វៀតណាម មានគម្រោងស្ថាបនាផ្លូវដែកសម្រាប់រថភ្លើងល្បឿនលឿន រត់ពី ហាណូយ ទៅ ហូជីមិញ ចំណាយពេល ៦ ម៉ោង

ក្រសួងចរាចរណ៍ និងដឹកជញ្ជូនរបស់ វៀតណាម បានស្នើគម្រោងរថភ្លើងល្បឿនលឿនប្រើប្រាស់បច្ចេកវិទ្យាដូចទៅនឹងរថភ្លើង Shinkanshen នៅ ប្រទេសជប៉ុន។ បើសិនត្រូវបានអនុម័តយល់ព្រម ប្រទេសនេះនឹងមានផ្លូវដែកល្បឿនលឿនដែលអាចភ្ជាប់ពីភាគខាងជើង ដល់ភាគខាងត្បូង ដោយចំណាយពេលដ៏ខ្លីក្នុងការធ្វើដំណើរ។

គម្រោងផ្លូវដែកល្បឿនលឿនឧត្តរ-ទក្សិណ របស់ វៀតណាម គ្រោងនឹងត្រូវបានដាក់ឡើងទៅកាន់ការិយាល័យនយោបាយ ដើម្បីត្រួតពិនិត្យ និងណែនាំនៅក្នុងខែកញ្ញាខាងមុខ។ បើសិនត្រូវបានអនុម័តយល់ព្រម នេះនឹងក្លាយជាជំហានសំខាន់សម្រាប់គម្រោងដែលប្រកបដោយការលំបាកនេះ។

សារព័ត៌មានវៀតណាម បានឱ្យដឹងថា តាមគម្រោង ១០ ឆ្នាំទៀត ប្រទេសនេះនឹងមានផ្លូវរថភ្លើងល្បឿនលឿន។ ក៏ប៉ុន្តែ មកដល់បច្ចុប្បន្ន គម្រោងនេះកំពុងស្ថិតនៅក្នុងតំណាក់កាលជជែកគ្នា និងមិនទាន់បានជ្រើសរើសបច្ចេកវិទ្យា និងល្បឿនកម្រិតណានៅឡើយ។

បើសិនជាមានរថភ្លើងល្បឿនលឿនប្រើប្រាស់បច្ចេកវិទ្យាដូចទៅនឹងរថភ្លើង Shinkanshen នៅ ជប៉ុន នោះគេនឹងចំណាយតែ ៦ ម៉ោងប៉ុណ្ណោះក្នុងការធ្វើដំណើរពី រដ្ឋធានីហាណូយ ទៅកាន់ ទីក្រុងហូជីមិញ (ព្រៃនគរ ឬសាយហ្កន) ដែលនេះគឺប្រហាក់ប្រហែលនឹងការធ្វើដំណើរទៅព្រលានយន្តហោះ បំពេញបែបបទ និងជិះយន្តហោះទៅកាន់ ទីក្រុងហូជីមិញ ដែលត្រូវចំណាយប្រហែល ៥ ម៉ោងនាបច្ចុប្បន្ន៕

August 27, 2022

Tesla ជិតដល់ថ្ងៃត្រូវបើកហាងលក់រថយន្តជាផ្លូវការនៅ ប្រទេសថៃ

កម្មវិធីទូរស័ព្ទ Tesla បង្ហាញខ្លួននៅលើ iOS App Store នៅ ប្រទេសថៃ ដែលនេះបង្ហាញថា ពេលវេលាបើកលក់រថយន្តរបស់ក្រុមហ៊ុន Tesla នៅក្នុងប្រទេសអាស៊ីអាគ្នេយ៍មួយនេះ ខិតជិតមកដល់ហើយ។

Tesla ទើបតែបន្ថែម iOS App Store ថៃ ទៅក្នុងបញ្ជីស្ដីពីតំបន់ដែលកម្មវិធីទូរស័ព្ទសម្រាប់អ្នកប្រើប្រាស់អាចទាញយកបាន។ កត្តានេះបង្ហាញថា Tesla បានត្រៀមខ្លួនរួចរាល់ហើយក្នុងការបើកលក់រថយន្តអគ្គិសនីទីផ្សាររបស់ ថៃ បន្ទាប់ពីបានត្រៀមខ្លួនតាំងពីដើមឆ្នាំ។

កម្មវិធី Tesla លើទូរស័ព្ទ អនុញ្ញាតឱ្យអ្នកប្រើប្រាស់បញ្ជារថយន្តពីចម្ងាយ និងមានតែនៅក្នុងបណ្ដាប្រទេសដែល Tesla មានតំណាងចែកចាយផ្លូវការប៉ុណ្ណោះ។

កម្មវិធីទូរស័ព្ទ Tesla បង្ហាញខ្លួននៅលើ iOS App Store នៅ ប្រទេសថៃ

នៅក្នុងតំបន់អាស៊ីអាគ្នេយ៍ មុននោះក៏មានប្រទេសមួយដែលមានសាលតាំងបង្ហាញរបស់ Tesla នោះគឺ សិង្ហបុរី។ ប៉ុន្តែ Showroom នេះ មានចំនួនតែ ១ កន្លែងប៉ុណ្ណោះ ដែលនេះត្រូវបានគេចាត់ទុកថាជានិម្មិតរូបច្រើនជាងពាណិជ្ជកម្ម។

August 27, 2022

ស្ពានផ្លូវដែកដែលខ្ពស់ជាងតួ Eiffel ស្ថាបនាជិតរួចរាល់ហើយ (វីដេអូ)

(ឥណ្ឌា)-ការស្ថាបនាស្ពាន Chenab ដែលជាស្ពានផ្លូវដែកមានទម្រកោងតែមួយខ្ពស់ជាងគេបង្អស់ក្នុងពិភពលោក ដោយមានកម្ពស់ពីទឹកទន្លេប្រមាណ ៣៥៩ ម៉ែត្រ បច្ចុប្បន្នសម្រេចបានប្រហែល ៩៨%។

កំណាត់ចុងក្រោយនៃផ្ទៃស្ពានផ្លូវដែកដែលខ្ពស់ជាងតួ Eiffel នេះ ត្រូវបានដំឡើងកាលពីថ្ងៃទី ១៣ សីហា។ ស្ពាន Chenab នៅ Kashmir នៃ ប្រទេសឥណ្ឌា ខ្ពស់ជាងតួ Eiffel ប្រហែល ២៩ ម៉ែត្រ។ ស្ពាននេះមានកម្ពស់ ៣៥៩ ម៉ែត្រ ធៀបនឹងផ្ទៃទឹកទន្លេ Chenab ដែលស្ថិតនៅខាងក្រោម។

ស្ពាន Chenab នឹងត្រូវបានដាក់ឱ្យប្រើប្រាស់នាពេលឆាប់ៗខាងមុខ។ ស្ពាននេះនឹងជួយបង្កើនការតភ្ជាប់រវាងតំបន់នានានៅ Kashmir។ Chenab ត្រូវបានបើកការដ្ឋានសាងសង់តាំងពីឆ្នាំ ២០០៤ ប៉ុន្តែ សំណង់នេះត្រូវបានពន្យារពេលអស់មួយរយៈ។

ក្រុមវិស្វករឱ្យដឹងថា ការងារប្រមាណ ៩៨% ត្រូវបានធ្វើរួចរាល់ បន្ទាប់ពីបានដំឡើងផ្ទៃរបស់ស្ពាន។ ស្ពានដែលមានប្រវែង ១,៣១៥ ម៉ែត្រនេះ ស្ថិតក្នុងចំណោមស្ពានចំនួន ១៦ ដែលកំពុងត្រូវបានស្ថាបនានៅក្នុងតំបន់ Kashmir។

ស្ពានផ្លូវដែក Chenab ត្រូវបានរចនាឡើងក្នុងបំណងអាចទប់ទល់នឹងខ្យល់ដែលមានល្បឿន ២៦៦ គីឡូម៉ែត្រ/ម៉ោង ដែលតែងកើតមាននៅតំបន់នេះ៕

August 27, 2022

រថយន្តរបស់តារាសម្ដែងជាតួអង្គ James Bond ត្រូវបានលក់ដេញថ្លៃ តម្លៃរាប់លានដុល្លារអាម៉េរិក

នោះគឺជារថយន្ត Aston Martin DB5 ឆ្នាំ ១៩៦៤ ដែលតួអង្គចារបុរសអង់គ្លេស James Bond (សម្ដែងដោយលោក Connery) បានបើកបរនៅក្នុងខ្សែភាពយន្តមួយចំនួនក្នុងទសវត្សរ៍ ១៩៦០។

តួអង្គ James Bond ត្រូវបានសម្ដែងដោយតារាសម្ដែងជាច្រើនរូប និងបើកបររថយន្តច្រើនប្រភេទនៅក្នុងភាពយន្តជាង ២០ វគ្គរបស់ខ្សែភាពយន្តនេះស្ដីពីចារបុរស ០០៧ នេះ។ រថយន្តដែលត្រូវបានប្រើប្រាស់សម្រាប់តួអង្គ Bond មានដូចជា BMW, Bentley, Chevrolets និង Ford។ ក៏ប៉ុន្តែ រថយន្តម៉ាក Aston Martin ឆ្នាំ ១៩៦៤ នៅតែជា «Bond car» (រថយន្តរបស់តួអង្គ Bond) ដែលត្រូវបានគេស្គាល់ច្រើនជាងគេ។

រថយន្តដែលត្រូវបានយកមកលក់ដេញថ្លៃនេះគឺជារថយន្តរបស់អតីតតារាសម្ដែងជនជាតិអង់គ្លេស Sean Connery ជាអ្នកដែលបានសម្ដែងជាតួអង្គ James Bond ក្នុង ៧ វគ្គ នៃខ្សែភាពយន្តភ្នាក់ងារសម្ងាត់ ០០៧ ចាប់ពីឆ្នាំ ១៩៦២ ដល់ ១៩៨៣។

Aston Martin DB5 ឆ្នាំ ១៩៦៤ ពណ៌ទឹកប្រាក់នេះត្រូវបានលក់ក្នុងតម្លៃ ២.៤ លានដុល្លារអាម៉េរិក ខ្ពស់ជាងឆ្ងាយបើធៀបនឹងការរំពឹងទុកពី ១.៤ ដល់ ១.៨ លានដុល្លារ នៅក្នុងព្រឹត្តិការណ៍ «សប្ដាហ៍រថយន្តបុរាណ» ប្រចាំឆ្នាំ Monterey ដែលរៀបចំឡើងនៅលើ ឧបទ្វីប Monterey របស់ សហរដ្ឋអាម៉េរិក៕

August 27, 2022

តើមេថ្មីរបស់ Facebook មានទ្រព្យសម្បត្តិប៉ុន្មានលានដុល្លារ?

Facebook បានប្រកាសជាផ្លូវការថា លោក Javier Olivan ដែលបានចូលមកធ្វើការនៅក្រុមហ៊ុន Facebook ចាប់តាំងពីឆ្នាំ ២០០៧ គឺជាអ្នកដែលនឹងត្រូវចូលមកជំនួសអ្នកស្រី Sheryl Sandberg ក្នុងការគ្រប់គ្រងតំណែងប្រធានប្រតិបត្តិ (COO)។

ការក្លាយទៅជាមេដឹកនាំកំពូលៗរបស់ក្រុមហ៊ុនខ្នាតយក្សដូច Facebook លោក Javier Olivan ត្រូវបានតម្រូវឱ្យប្រកាសព័ត៌មានជាច្រើនដល់សមត្ថកិច្ច។

ព័ត៌មានដែល Olivan បានផ្ដល់ឱ្យ គណៈកម្មការមូលបត្រអាម៉េរិក ក្នុងនាមជាប្រធានប្រតិបត្តិរបស់ Facebook ក៏មានព័ត៌មានទាក់ទងនឹងចំនួនភាគហ៊ុនដែលលោកទទួលបានក្នុងពេលថ្មីៗបំផុត ហើយតួលេខនេះជាចំណែកមួយភាគធំនៅក្នុងប្រាក់ចំណូលរបស់គាត់។

ប្រាក់រង្វាន់ជាភាគហ៊ុនមានកំណត់ (RSU) ថ្មីបំផុតដែល Olivan បានទទួលគឺខ្ពស់ជាងធៀបនឹងប៉ុន្មានឆ្នាំមុន ដោយមានតម្លៃជាង ១៦ លានដុល្លារ បើគិតតាមតម្លៃភាគហ៊ុន ២០០ ដុល្លារនៅក្នុងគ្រាដែលបានទទួលនោះ។ នេះមិនទាន់និយាយដល់ប្រាក់ខែ និងខ្ទង់ប្រាក់រង្វាន់ផ្សេងៗ។

ទោះជាយ៉ាងណាក៏ដោយ Olivan អាចនឹងមានទ្រព្យច្រើនជាងនេះ និងក្លាយជាមហាសេដ្ឋី បើសិនគាត់បន្តស្ថិតនៅក្នុងក្រុមហ៊ុន Facebook បានច្រើនឆ្នាំទៀត។

និយាយអំពីអ្នកស្រី Sandberg ដែលជាអតីត COO របស់ Facebook វិញ នៅពេលចាកចេញពីតំណែង COO អ្នកស្រីបានក្លាយជាមហាសេដ្ឋិនីទៅហើយ តាមរយៈការទទួល និងលក់ភាគហ៊ុន Facebook។ អ្នកស្រីបានធ្វើការឱ្យ Facebook អស់រយៈពេល ១៤ ឆ្នាំ ដែលក្នុងអំឡុងពេលនោះ អ្នកស្រីទទួលបានរង្វាន់ RSU ចំនួន ៤៨ លានហ៊ុន និងលក់ស្ទើរតែទាំងអស់ក្នុងតម្លៃប្រហែល ១.៧ ពាន់លានដុល្លារ។ បើទោះជាបានចាកចេញពីតំណែង COO ប៉ុន្តែ អ្នកស្រី Sandberg នឹងនៅតែស្ថិតក្នុងគណៈគ្រប់គ្រងរបស់ក្រុមហ៊ុន៕

August 26, 2022

Category: សង្គម និងសេដ្ឋកិច្ច