យោងតាមសេចក្ដីជូនដំណឹងរបស់ ក្រសួងពាណិជ្ជកម្ម តម្លៃប្រេងឥន្ធនៈ ដែលនឹងត្រូវលក់ ចាប់ពីថ្ងៃទី 0១ ដល់ថ្ងៃទី ១០ ខែកញ្ញា ឆ្នាំ ២០២២ បង្ហាញថា ប្រេងសាំងមានតម្លៃ ៤,៧០០ រៀល/លីត្រ និង ប្រេងម៉ាស៊ូតតម្លៃ ៥,៥០០ រៀល/លីត្រ។
ព័ត៌មានលម្អិត សូមអានសេចក្ដីជូនដំណឹងរបស់ ក្រសួងពាណិជ្ជកម្ម ខាងក្រោម ៖
ក្រុមហ៊ុនផលិតរថយន្តរបស់ ប្រទេសជប៉ុន មួយនេះ នឹងចាប់ផ្ដើមផលិតថ្មផ្ទុកអគ្គិសនីពីឆ្នាំ ២០២៤ ដល់ ២០២៦ ដោយប្រើប្រាស់ទុនប្រមាណ ៧៣០ ពាន់លានយេន ដើម្បីបង្កើនសមត្ថភាពក្នុងការផលិតថ្ម ទាំងនៅ ជប៉ុន ទាំងនៅ សហរដ្ឋអាម៉េរិក ឱ្យបានឡើងដល់ ៤០ GWh។
Toyota ដែលជាក្រុមហ៊ុនផលិតរថយន្តរបស់ ជប៉ុន កាលពីថ្ងៃទី ៣១ សីហា បានឱ្យដឹងថា នឹងវិនិយោគ ៧៣០ ពាន់លានយេន (ប្រហែល ៥.២៧ ពាន់លានដុល្លារអាម៉េរិក) នៅ ជប៉ុន និងនៅ សហរដ្ឋអាម៉េរិក ដើម្បីផលិត និងផ្គត់ផ្គង់ថ្មផ្ទុកថាមពលសម្រាប់រថយន្តដើរដោយកម្លាំងអគ្គិសនី។
Toyota កំណត់គោលដៅចាប់ផ្ដើមផលិតថ្មផ្ទុកអគ្គិសនីពីឆ្នាំ ២០២៤ ដល់ ២០២៦ ដោយប្រើប្រាស់ទុនខាងលើ ដើម្បីបង្កើនសមត្ថភាពក្នុងការផលិតថ្ម ទាំងនៅ ជប៉ុន ទាំងនៅ សហរដ្ឋអាម៉េរិក ឱ្យបានដល់ ៤០ GWh។
ក្នុងខ្ទង់ប្រាក់វិនិយោគខាងលើ Toyota នឹងចំណាយប្រហែល ៤០០ ពាន់លានយេន សម្រាប់រោងចក្រផលិតថ្មផ្ទុកអគ្គិសនីនៅ ជប៉ុន និងប្រមាណ ២.៥ ពាន់លានដុល្លារទៀត សម្រាប់ការផលិតនៅ សហរដ្ឋអាម៉េរិក។
បណ្ដាក្រុមហ៊ុននៅទូទាំងពិភពលោក កំពុងតែចំណាយប្រាក់រាប់សិបពាន់លានដុល្លារ ដើម្បីបង្កើនការផលិតរថយន្តអគ្គិសនី និងថ្មផ្ទុកអគ្គិសនី ក្នុងគ្រាដែលបណ្ដាប្រទេស និងអង្គការអន្តរជាតិនានា ចាប់ផ្ដើមរឹតបន្តឹងលើការការពារបរិស្ថាន៕
ជាមួយនឹងទិសដៅបង្កើនការនាំចេញ និងអភិវឌ្ឍស្លាកយីហោវៀតណាម ក្រុមហ៊ុន Bong Bach Tuyet កំពុងសម្លឹងគោលដៅទីផ្សារនៅក្នុងបណ្ដាប្រទេសក្បែរខាង ក្នុងនោះមាន កម្ពុជា ផងដែរ។
កន្លងទៅថ្មីៗនេះ សាជីវកម្ម Bong Bach Tuyet នៅ ប្រទេសវៀតណាម បានចុះហត្ថលេខាលើកិច្ចព្រមព្រៀងផ្គត់ផ្គង់ផ្ដាច់មុខនូវផលិតផលសម្លីថែទាំស្បែក Calla, ម៉ាស និងសម្លីសម្អាតជាដើម ជាមួយនឹងក្រុមហ៊ុន TM & DV VK Mart (VK Mart) ដែលជាអ្នកផ្គត់ផ្គង់ផលិតផលនានាទៅឱ្យបណ្ដាផ្សារទំនើបនៅ កម្ពុជា។
Bong Bach Tuyet គឺជាយីហោដែលមានអាយុកាលយូរមួយនៅ វៀតណាម ដោយមានបទពិសោធន៍ ៦២ ឆ្នាំ ក្នុងវិស័យផលិត និងផ្គត់ផ្គង់ផលិតផលសុខាភិបាលទាក់ទងនឹងសម្លីកប្បាស ដូចជាសម្លីជូតសម្អាតរបួស បង់រុំរបួស។ល។
ផលិតផលដែលលេចធ្លោជាងគេនាពេលថ្មីៗរបស់ Bong Bach Tuyet គឺម៉ាស N95 និងធ្យូងកែច្នៃដែលទទួលវិញ្ញាបនបត្រ FFP3 របស់ អឺរ៉ុប។
ក្រុមហ៊ុនគ្រប់គ្រងកម្មវិធី GoTo បានខាតអស់ប្រមាណ ១៤.១៧ ទ្រីលានរូពី (ប្រហែល ៩៥៥ លានដុល្លារអាម៉េរិក) ក្នុងអំឡុង ៦ ខែដើមឆ្នាំ ២០២២ ច្រើនជាងទ្វេដង ធៀបនឹង ៦ ខែដើមឆ្នាំ ២០២១។
៦ ខែដើមឆ្នាំ ២០២២ GoTo ដែលជាម្ចាស់គ្រប់គ្រងរបស់ក្រុមហ៊ុនហៅរថយន្តតាក់ស៊ី Gojek បានខតបង់អស់ ១៤.១៧ ទ្រីលានរូពី ច្រើនជាងទ្វេដង ធៀបនឹងការខាតបង់អស់ ៦.៦ ទ្រីលានរូពី កាលពី ៦ ខែដើមឆ្នាំកន្លង។ ក្នុងអំឡុង ៦ ខែដើមឆ្នាំនេះដែរ ប្រាក់ចំណូលរបស់ Gojek បានកើន ៣.៣ ទ្រីលានរូពី។
នេះគឺជារបាយការណ៍ហិរញ្ញវត្ថុលើកទីបីរដែល GoTo ប្រកាស រាប់ចាប់តាំងពីបានឡើងផ្សារហ៊ុនកាលពីខែមេសា ២០២២ ហើយក៏ជារបាយការណ៍ដែលបង្ហាញអំពីឧបសគ្គដែល Gojek បានជួបប្រទះ។
GoTo ត្រូវបានបង្កើតឡើងកាលពីខែឧសភា ២០២១ បន្ទាប់ពីការច្របាច់បញ្ចូលគ្នារវាងកម្មវិធីទូរស័ព្ទហៅយានជំនិះ និងអាហារ Gojek ជាមួយនឹងក្រុមហ៊ុនផ្សារអនឡាញ Tokopedia របស់ ឥណ្ឌូណេស៊ី។
ឆ្នាំ ២០២១ GoTo ខក ២១.៤ ទ្រីលានរូពី។ ក្នុង ៣ ខែដើមឆ្នាំនេះ GoTo ក៏បន្តខាតប្រមាណ ៦ ទ្រីលានរូពី ច្រើនជាងឆ្ងាយធៀបនឹងខ្ទង់ប្រាក់ខាតបង់ ១.៨ ទ្រីលានរូពី នៅមុនពេលច្របាច់បញ្ចូលគ្នា កាលពីឆ្នាំកន្លង។
ទោះជាយ៉ាងនេះក៏ដោយ ក្រុមហ៊ុនបច្ចេកវិទ្យារបស់ ឥណ្ឌូណេស៊ី នេះ នៅតែសង្ឃឹមយ៉ាងមុតមាំថា ស្ថានការណ៍ជំនួញនឹងត្រូវបានកែលំអ នៅពេលតម្លៃប្រតិបត្តិការសរុប និងប្រាក់ចំណូលសរុបនៅតែកើនឡើងក្នុងឆ្នាំ ២០២១ និងត្រីមាសទីមួយឆ្នាំ ២០២២៕
ក្នុងចំណោមធនធានមនុស្សដែលក្រុមហ៊ុនរបស់ វៀតណាម Vingroup ត្រូវការ មានប្រហែល ២០% ជាបុគ្គលិកជាន់ខ្ពស់ដែលតម្រូវឱ្យមានសញ្ញាបត្របរិញ្ញា និងប្រហែល ១០% សម្រាប់ផ្នែកផលិតផលនាំចេញទៅបរទេស។
ដំណឹងខាងលើនេះត្រូវបានអគ្គនាយករបស់ក្រុមហ៊ុន Vingroup ប្រកាសកាលពី ២ សប្ដាហ៍មុន នៅចំពោះមុខ នាយករដ្ឋមន្ត្រីវៀតណាម Pham Minh Chinh។
យោងតាម អគ្គនាយករបស់ Vingroup ក្រុមហ៊ុននេះបច្ចុប្បន្នមាន ៣ ផ្នែកសំខាន់ៗគឺ បច្ចេកវិទ្យា និងឧស្សាហកម្ម, ពាណិជ្ជកម្ម និង សេវាកម្ម និងទី ៣ គឺ សង្គមស្ម័គ្រចិត្ត។
មកដល់បច្ចុប្បន្ន Vingroup មានបុគ្គលិកសរុបប្រមាណ ៤៥,០០០ នាក់ ប៉ុន្តែ ក្រុមហ៊ុននេះគ្រោងនឹងជ្រើសរើសបន្ថែមឱ្យបានឡើងដល់ ១៥០,០០០ នាក់ នៅក្នុងអំឡុង ២ ឆ្នាំខាងមុខ។ ក្នុងចំណោមធនធានមនុស្សដែលក្រុមហ៊ុននេះត្រូវការ មានប្រហែល ២០% ជាបុគ្គលិកជាន់ខ្ពស់ដែលតម្រូវឱ្យមានសញ្ញាបត្របរិញ្ញា និងប្រហែល ១០% សម្រាប់ផ្នែកផលិតផលនាំចេញទៅបរទេស។
ក្រុមហ៊ុនដែលត្រូវបានបង្កើតឡើងដោយមហាសេដ្ឋី Pham Nhat Vuong របស់ វៀតណាម មួយនេះ មានក្រុមហ៊ុនបុត្រសម្ព័ន្ធជាច្រើន មានដូចជា VinFast ជាក្រុមហ៊ុនផលិតរថយន្តអគ្គិសនី, Vinhomes ខាងអភិវឌ្ឍលំនៅឋាន, VinSmart ផលិតឧបករណ៍បច្ចេកវិទ្យា និង VinID ជាក្រុមហ៊ុនអភិវឌ្ឍមុខងារបច្ចេកវិទ្យា។ល។
ពិធីសម្ពោធបើកការដ្ឋានសាងសង់ស្ពានអាកាសក្នុង រាជធានីភ្នំពេញចំនួន ២ ដែលមានតម្លៃសរុបជាង ៤៦ លានដុល្លារអាមេរិក ត្រូវបានធ្វើឡើងក្រោមអធិបតីភាព សម្តេចតេជោ ហ៊ុន សែន នៅព្រឹកថ្ងៃទី ៣១ ខែសីហានេះ។
ស្ពានអាកាសថ្មីចំនួន ២ ខាងលើនេះ រួមមាន ស្ពានទី ១ ស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយផ្លូវលេខ ២៧១ (វិថីកងយោធពលខេមរភូមិន្ទ) ក្នុងទឹកដីខណ្ឌចំការមន និងខណ្ឌមានជ័យ។ ស្ពានអាកាសទី ២ ស្ថិតនៅចំណុចប្រសព្វមហាវិថីសហព័ន្ធរុស្ស៉ី ជាមួយផ្លូវលេខ ២០០៤ (មហាវិថីសម្ដេចចៅហ្វាវាំងវរវៀងជ័យអធិបតីស្រឹង្គារ គង់ សំអុល) ក្នុងខណ្ឌពោធិ៍សែនជ័យ រាជធានីភ្នំពេញ។
ស្ពានអាកាសដែលស្ថិតនៅចំណុចប្រសព្វមហាវិថីសម្តេចតេជោ ហ៊ុន សែន មហាវិថីព្រះមុនីវង្ស ជាមួយវិថីកងយោធពលខេមរភូមិន្ទ-២៧១ ក្នុងទឹកដីខណ្ឌចំការមន និងខណ្ឌមានជ័យ ត្រូវបាន សម្តេចតេជោ ហ៊ុន សែន បានប្រសិទ្ធនាមថា «ស្ពានអាកាសព្រះមុនីវង្ស» ខណៈដែលស្ពានអាកាសនៅចំណុចប្រសព្វរវាង មហាវិថីសហព័ន្ធរុស្ស៊ី និងផ្លូវលេខ ២០០៤ ក្នុង ខណ្ឌពោធិ៍សែនជ័យ ត្រូវបានហៅថា «ស្ពានអាកាស គង់ សំអុល»។
គិតមកដល់បច្ចុប្បន្ន រាជធានីភ្នំពេញ មានស្ពានអាកាសចំនួន ៧ កន្លែង រួមទាំងស្ពានអាកាសចំនួន ២ ដែលត្រូវសម្ពោធបើកការដ្ឋានសាងសង់នៅព្រឹកនេះ៕
ក្រុមហ៊ុន Tesla នឹងមានទំហំធំជាងទ្វេដង ធៀបនឹងរាល់ក្រុមហ៊ុនផលិតរថយន្តក្នុងប្រវត្តិសាស្ត្រ ដោយកាន់កាប់ ២០% នៃចំណែកទីផ្សារក្នុងពិភពលោក បើសិនលក់រថយន្តអគ្គិសនីបាន ២០ លានគ្រឿងក្នុងឆ្នាំ ២០៣០។
នាយប្រតិបត្តិ (CEO) របស់ក្រុមហ៊ុនផលិតរថយន្តអគ្គិសនី Tesla Inc លោក Elon Musk ថ្មី ៗនេះបានកំណត់គោលដៅប្រកបដោយមហិច្ឆតា នោះគឺ លក់រថយន្តអគ្គិសនី (EV) ឱ្យបាន ២០ លានគ្រឿងនៅឆ្នាំ ២០៣០។
នេះក៏ជាប្រការសំខាន់នៅក្នុងការសន្យាជំរុញកំណើនរថយន្ត ក៏ដូចជាការជំរុញការប្រើប្រាស់ថាមពលកកើតឡើងវិញរបស់ Tesla នៅចំពោះមុខក្រុមម្ចាស់ភាគហ៊ុន។
បើសិនជាសម្រេចគោលដៅ «លក់រថយន្តអគ្គិសនីឱ្យបាន ២០ លានគ្រឿងនៅឆ្នាំ ២០៣០» ក្រុមហ៊ុន Tesla នឹងមានទំហំធំជាងទ្វេដង ធៀបនឹងរាល់ក្រុមហ៊ុនផលិតរថយន្តក្នុងប្រវត្តិសាស្ត្រ ដោយកាន់កាប់ ២០% នៃចំណែកទីផ្សារក្នុងពិភពលោក។
ក៏ប៉ុន្តែ យោងតាមការវិភាគរបស់ទីភ្នាក់ងារសារព័ត៌មាន Reuters កំណើនទ្វេដងដូច្នេះ នឹងធ្វើឱ្យ Tesla ត្រូវចំណាយប្រាក់ច្រើនមិនធ្លាប់មាន នៅក្នុងការផលិត ពោលគឺឡើងដល់រាប់សែនពាន់លានដុល្លារ។ គោលដៅរបស់ Tesla ក៏នឹងដាក់សម្ពាធទៅលើការផលិតគ្រឿងបន្លាស់ ក្នុងនោះមានទាំងវត្ថុធាតុដើមសម្រាប់ផលិតថ្មផ្ទុកអគ្គិសនី។ល។
ជាងនេះ Tesla ក៏កំពុងតែត្រូវប្រកួតប្រជែងយ៉ាងខ្លាំងក្លាពីសំណាក់ក្រុមហ៊ុនផលិតរថយន្តអគ្គិសនីតម្លៃទាបរបស់ ប្រទេសចិន មានដូចជា ក្រុមហ៊ុន Xpeng Inc, Nio Inc និង Li Auto Inc ជាដើម បើទោះបរិមាណរថយន្តដែលបានលក់ចេញរបស់ក្រុមហ៊ុនទាំងនេះនៅទាប ប៉ុន្តែ មានកំណើនយ៉ាងលឿន។
ក្រុមហ៊ុន BYD របស់ ប្រទេសចិន កំពុងលក់រថយន្ត EV និងរថយន្តកូនកាត់ EV តម្លៃទាប ខណៈដែល Ford Motor Co និង Rivian Automotive Inc បានយកឈ្នះលើ Tesla នៅលើទីផ្សារនៃរថយន្តអគ្គិសនីប្រភេទទ្រុង ជាប្រភេទដែលទើបតែចាប់ផ្ដើមមានការពេញនិយមនៅ អាម៉េរិកខាងជើង៕
យោងតាមលទ្ធផលនៃកំណើនសេដ្ឋកិច្ចកើនឡើងខ្ពស់ខ្លាំងក្នុងអំឡុងពាក់កណ្ដាលដើមឆ្នាំ ២០២២ បណ្ដាអង្គការអន្តរជាតិ បានលើកឡើងនូវការព្យាករអំពីកំណើនសេដ្ឋកិច្ចរបស់ វៀតណាម និងបណ្ដាប្រទេសក្នុងតំបន់ ASEAN-6 សម្រាប់ឆ្នាំ ២០២២ និង ២០២៣។
យោងទៅលើរបាយការណ៍ព្យាករសេដ្ឋកិច្ចទូទាំងសកលលោកថ្មីបំផុតរបស់ វិទ្យាស្ថានគណនេយ្យករជាន់ខ្ពស់ចក្រភពអង់គ្លេស និងវែល (ICAEW) និង Oxford Economics ដែលត្រូវបានប្រកាសកាលពីខែមិថុនា ២០២២ បង្ហាញថា វៀតណាម ត្រូវបានព្យាករថាជាប្រទេសដែលមានសក្ដានុពលកំណើនសេដ្ឋកិច្ចខ្ពស់ក្នុងតំបន់ ពោលគឺ ៦.៥% ក្នុងឆ្នាំ ២០២២ និង ៨.៣% ក្នុងឆ្នាំ ២០២៣ (ខ្ពស់ជាងគេបង្អស់ក្នុងតំបន់ ASEAN-6)។
ចំណែក ឥណ្ឌូណេស៊ី ថៃ ម៉ាឡេស៊ី សិង្ហបុរី និង ហ្វ៊ីលីពីន ត្រូវបានព្យាករថា មានកំណើន GDP តាមពីក្រោយ ប្រទេសវៀតណាម ដោយមានកំណតាមលំដាប់គឺ ៥.៧%, ៤.៤%, ៧.២%, ២.៩%, ៧.៣% នៅឆ្នាំ ២០២២ និង ៥.៧%, ៦.១%, ៤.២%, ២.២%, ៥.២% នៅឆ្នាំ ២០២៣។
ទំហំ GDP របស់ ឥណ្ឌូណេស៊ី នឹងនាំមុខគេក្នុងតំបន់ ASEAN-6 ក្នុងឆ្នាំ ២០២២ និង ២០២៣ ដោយ GDP សម្រេចបាន ១.២១ ទ្រីលានដុល្លារអាម៉េរិក និង ១.២៨ ទ្រីលានដុល្លារ។ ឈរបន្ទាប់ពី ឥណ្ឌូណេស៊ី គឺ ប្រទេសថៃ, ម៉ាឡេស៊ី, សិង្ហបុរី, ហ្វ៊ីលីពីន និង វៀតណាម។
យោងតាមការព្យាកររបស់ មូលនិធិរូបិយប័ណ្ណអន្តរជាតិ (IMF) កំណើនសេដ្ឋកិច្ចរបស់ វៀតណាម នឹងសម្រេចបាន ៦% ឈរលំដាប់ទី ២ ក្នុងតំបន់ ASEAN-6 នៅឆ្នាំ ២០២២ និង ៧.២% ឈរលំដាប់ទី ១ ក្នុងតំបន់ ASEAN-6 (ASEAN-6 រួមមាន ១០ ប្រទេសនៃ សមាគមប្រជាជាតិអាស៊ីអាគ្នេយ៍ បូកនឹង ចិន, ជប៉ុន, កូរ៉េខាងត្បូង, អូស្ត្រាលី, នូវែលសេឡង់ និង ឥណ្ឌា) នៅឆ្នាំ ២០២៣។
ចំណែក ឥណ្ឌូណេស៊ី, ថៃ, ម៉ាឡេស៊ី, សិង្ហបុរី និង ហ្វ៊ីលីពីន ត្រូវបានព្យាករថា នឹងមានកំណើនសេដ្ឋកិច្ចតាមពីក្រោយ ប្រទេសវៀតណាម នៅឆ្នាំ ២០២២ និង ២០២៣។
ដូច្នេះ យោងតាមការព្យាកររបស់ ICAEW, IMF និង AMRO ទំហំ GDP របស់ វៀតណាម ក្នុងឆ្នាំ ២០២២ ឈរលំដាប់ទី ៦ ក្នុងតំបន់ ASEAN-6។ ដល់ឆ្នាំ ២០២៣ ទំហំ GDP របស់ប្រទេសនេះនឹងឈរលំដាប់ទី ៤ ក្នុងតំបន់ ASEAN-6 ដោយមានទំហំ GDP មិនលើសខ្វះគ្នាប៉ុន្មាន បើប្រៀបធៀបរវាងការព្យាកររបស់អង្គការទាំង អន្តរជាតិទាំង ៣ ខាងលើនេះ៕
នារសៀលថ្ងៃទី ៣០ សីហា ២០២២ នេះ មន្ទីរសាធារណការ និងដឹកជញ្ជូនរាជធានីភ្នំពេញ បានប្រកាសឱ្យដឹងអំពីព័ត៌មានលំអិត នៃគម្រោងសាងសង់ស្ពានអាកាសនៅចំណុចប្រសព្វមហាវិថី សម្តេចតេជោ ហ៊ុន សែន មហាវិថីព្រះមុនីវង្ស និងវិថីកងយោធពលខេមរភូមិន្ទ ដែលស្ថិតក្នុងខណ្ឌចំការមន និងខណ្ឌមានជ័យ រាជធានីភ្នំពេញ។
សេចក្ដីលម្អិតស្ដីអំពីគម្រោងនេះ មានដូចខាងក្រោម ៖
-ជាគម្រោងរបស់រាជរដ្ឋាភិបាលកម្ពុជាតាមរយៈរដ្ឋបាលរាជធានីភ្នំពេញ
-សាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC
-គ្រោងចំណាយថវិកាចំនួន ៣៦.៧៧៥.០០០ដុល្លាអាមេរិក
-រយៈពេលសាងសង់ ៣៦ខែ
លក្ខណៈបច្ចេកទេសនៃផ្លូវថ្នល់ផ្ទាល់ដី ស្ពានអាកាសជាន់ទី ១ និងជាន់ទី២ ៖
១. ផ្លូវថ្នល់ផ្ទាល់ដីៈ
មានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា។
១.១ រង្វង់មូល (មានបរិមាត្រ ១៧៨ម៉ែត្រ x ទទឹង១១.៨៥ម៉ែត្រ)
– កាំរង្វង់ក្នុង ២០.០០ម៉ែត្រ និងកាំរង្វង់ក្រៅ ៣៣.០០ម៉ែត្រ ដែលមានតួនាទីជារង្វង់មូលដើម្បីបែងចែកទិសដៅចរាចរណ៍
– គន្លងចរាចរណ៍មាន៣គន្លងផ្លូវ (សម្រាប់រថយន្តមានទំហំ ៣.៩៥ម៉ែត្រក្នុងមួយគន្លង)
– កម្ពស់សុវត្ថិភាព : ៥.០០ម៉ែត្រ ផ្នែកឆ្លងកាត់ក្រោមស្ពានអាកាសជាន់ទី១
១.២ ផ្លូវថ្នល់ផ្ទាល់ដី តាមបណ្តោយស្ពាន និងក្រោមស្ពានដែលតភ្ជាប់ទៅនឹងរង្វង់មូល (មានទទឹង ៧ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅទៅ និងមកពីមហាវិថីសម្តេចតេជោ ហ៊ុន សែន មហាវិថីព្រះមុនីវង្ស វិថីកងយោធពលខេមរភូមិន្ទ ស្ពានព្រះមុនីវង្ស និងផ្លូវជាតិលេខ២
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ)។
២. ស្ពានអាកាសជាន់ទី១ :
ជាស្ពានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា នៃមហាវិថីសម្តេចតេជោ ហ៊ុន សែន ស្ពានព្រះមុនីវង្ស មហាវិថីព្រះមុនីវង្ស និងវិថីកងយោធពលខេមរភូមិន្ទ
២.១ ស្ពានអាកាសរង្វង់មូល (មានបរិមាត្រ ១៧៨ម៉ែត្រ x ទទឹង១២.៨៥ម៉ែត្រ)
– កាំរង្វង់ក្នុង ២០.០០ម៉ែត្រ និងកាំរង្វង់ក្រៅ ៣៣.០០ម៉ែត្រ ដែលមានតួនាទីជារង្វង់មូលដើម្បីបែងចែកទិសដៅចរាចរណ៍
– គន្លងចរាចរណ៍ មាន៣គន្លងផ្លូវ (សម្រាប់រថយន្តមានទំហំ ៣.៩៥ម៉ែត្រ ក្នុងមួយគន្លង)
– កម្ពស់សុវត្ថិភាព : ៥.០០ម៉ែត្រ ផ្នែកឆ្លងកាត់ក្រោមស្ពានអាកាសជាន់ទី២
២.២ ស្ពានអាកាសខ្នែង A ឆ្ពោះទៅស្ពានព្រះមុនីវវង្ស (មានប្រវែង ២០០ម៉ែត្រ x ទទឹង ១១.៥០ម៉ែត្រ)
– ទិសដៅចរាចរណ៍ : ផ្លូវទ្វេទិស មានទិសដៅទៅមកពីស្ពានព្រះមុនីវង្ស
– គន្លងចរាចរណ៍ : ៤គន្លងផ្លូវទៅមក (២គន្លងទៅ និង២គន្លងមក ដែលម្ខាងមាន ១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងគន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)
២.៣ ស្ពានអាកាសខ្នែង B វិថីកងយោធពលខេមរភូមិន្ទ (មានប្រែវង ២០០ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅឆ្ពោះទៅវិថីកងយោធពលខេមរភូមិន្ទ
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត មានទំហំ ១.៥០ម៉ែត្រ)
២.៤ ស្ពានអាកាសខ្នែង C មហាវិថីព្រះមុនីវង្ស (មានប្រវែង ១៤៤ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅមកពីមហាវិថីព្រះមុនីវង្ស
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវ សម្រាប់ទោចក្រយានយន្តមានទំហំ ១.៥០ម៉ែត្រ)
២.៥ ស្ពានអាកាសខ្នែង D មហាវិថីព្រះមុនីវង្ស (មានប្រវែង ១៦១ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅឆ្ពោះទៅមហាវិថីព្រះមុនីវង្ស
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)
២.៦ ស្ពានអាកាសខ្នែង E មហាវិថីសម្តេចតេជោ ហ៊ុន សែន (មានប្រវែង ១៥១ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅមកពីមហាវិថីសម្តេចតេជោ ហ៊ុន សែន
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)។
២.៧ ស្ពានអាកាសខ្នែង F មហាវិថីសម្តេចតេជោ ហ៊ុន សែន (មានប្រវែង ១៣១ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅឆ្ពោះទៅមហាវិថីសម្តេចតេជោ ហ៊ុន សែន
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)។
៣. ស្ពានអាកាសជាន់ទី២ : (មានប្រវែង ១,២០០ម៉ែត្រ x ទទឹងពី ១៤.០០ម៉ែត្រ ទៅ ១៥.៨០ម៉ែត្រ)
– ទិសដៅចរាចរណ៍ : ផ្លូវទ្វេទិស មានទិសដៅទៅមករវាង មហាវិថីព្រះមុនីវង្ស និងមហាវិថីសម្តេចតេជោ ហ៊ុន សែន
– គន្លងចរាចរណ៍ : ៤គន្លងផ្លូវ (២គន្លងទៅ និង២គន្លងមក ដែលម្ខាងមាន២គន្លងផ្លូវសម្រាប់រថយន្តមានទំហំ ៣.២៥ម៉ែត្រ ទៅ ៣.៧០ម៉ែត្រ)
• ធ្នឹមប្រអប់ជាបេតុងអាមេ ដែលមានកម្ពស់ ១.៥០ម៉ែត្រ
• សសរស្ពាននីមួយៗប្រើបេតុង ជាមួយនឹងជើងតាងកម្ពស់ ១.៥០ម៉ែត្រ
• ប្រភេទគ្រឹះខួង (Bored pile) មានអង្កត់ផ្ចិតទំហំ ១.៥០ម៉ែត្រ ទៅ ១.២០ម៉ែត្រ និងមានជម្រៅប្រមាណ៥០ម៉ែត្រ
• ជម្រាលទទឹងស្ពាន: ២%
• ជម្រាលបណ្តោយស្ពាន: ៥%
• បង្កាន់ដៃស្ពានមានកម្ពស់: ១.១០ម៉ែត្រ
• ល្បឿនសុវត្ថិភាព: ២០គ. ម/ម៉ោង ទៅ៤០គ.ម/ម៉ោង
• ទម្ងន់ផ្ទុកអនុញ្ញាត: ៣០តោន
• កម្ពស់អនុញ្ញាត: ៥.០០ម៉ែត្រ
• អ៊ុតកៅស៊ូ AC កម្រាស់ ០.១០ម៉ែត្រ
• ដាក់ស្លាកសញ្ញាចរាចរ និងអ៊ុតគំនូសចរាចរដោយប្រើថ្នាំទែរម៉ូប្លាស្ទឹក
• រៀបចំប្រព័ន្ឋបង្ហូរទឹកនិងបណ្តាញលូ និងកែសម្រួចចិញ្ចើផ្លូវអមសងខាង
• បំពាក់ភ្លើងបំភ្លឺផ្លូវ និងបំភ្លឺស្ពាន
• រៀបចំសួនច្បារ
ធនាគារកណ្ដាលនៃ ប្រទេសឥណ្ឌណេស៊ី អភិវឌ្ឍកូដ QR មួយប្រភេទ អនុញ្ញាតឱ្យអ្នកប្រើប្រាស់សេវាទូទាត់នានារបស់ប្រទេសនេះ អាចផ្ទេរប្រាក់ និងទទួលប្រាក់ជាមួយនឹងសេវាទូទាត់ប្រាក់ដទៃនៃបណ្ដាប្រទេសនៅក្នុង សមាគមអាស៊ាន ទាំងមូល។
ប្រធានាធិបតីឥណ្ឌូណេស៊ី កាលពីថ្ងៃទី ២៩ សីហា បានប្រកាសបង្ហាញកូដ QR អន្តរជាតិ ស្ដង់ដារ ឥណ្ឌូណេស៊ី (QRIS) ដើម្បីភ្ជាប់បណ្ដាញទូទាត់ប្រាក់របស់ប្រទេសនេះទៅនឹងបណ្ដាញទូទាត់របស់សមាជិកនានាក្នុងតំបន់អាស៊ាន។
QRIS ដែលត្រូវបានអភិវឌ្ឍដោយធនាគារកណ្ដាលនៃ ប្រទេសឥណ្ឌណេស៊ី អនុញ្ញាតឱ្យអតិថិជន ប្រើប្រាស់សេវាទូទាត់របស់នានារបស់ប្រទេសនេះ ផ្ទេរប្រាក់ និងទទួលប្រាក់ជាមួយនឹងសេវាទូទាត់ប្រាក់ដទៃនៅក្នុង សមាគមប្រជាជាតិអាស៊ីអាគ្នេយ៍ (អាស៊ាន-ASEAN) ទាំង ១០ ប្រទេស។
នៅក្នុងពិធីប្រកាសបង្ហាញ QRIS ប្រធានាធិបតីឥណ្ឌូណេស៊ី Joko Widodo លើកឡើងថា «ប្រព័ន្ធទំនើបនេះបង្ហាញថា ប្រទេសរបស់យើងបត់បែនបានជាមួយនឹងបច្ចេកវិទ្យាឌីជីថល ហើយយើងក៏មិនត្រូវស្ថិតនៅពីក្រោយធៀបនឹងបណ្ដាប្រទេសដទៃ»។
ប្រធានាធិបតីឥណ្ឌូណេស៊ី Joko Widodo រំពឹងថា QRIS នឹងអាចជួយកាត់បន្ថយការចំណាយរបស់អាជីវករ ម្ចាស់ក្រុមហ៊ុន ក៏ដូចជាក្នុងវិស័យទេសចរណ៍ ក្នុងការផ្ដល់សេវាកម្ម និងទំនិញដែលមានតម្លៃអាចប្រកួតប្រជែងបាននៅក្នុងទីផ្សារសកល។
ទេសាភិបាលរបស់ ធនាគារកណ្ដាលឥណ្ឌូណេស៊ី Perry Warjiyo បានឱ្យដឹងថា ថៃ គឺជាប្រទេសដំបូងគេដែលមានប្រព័ន្ធទូទាត់ទាំងស្រុងជាមួយនឹង QRIS របស់ ឥណ្ឌូណេស៊ី។ ចំណែករដ្ឋាភិបាលមួយចំនួនទៀត ដូចជា ម៉ាឡេស៊ី សិង្ហបុរី និង ហ្វ៊ីលីពីន ជាដើម ក៏បានអះអាងថា នឹងភ្ជាប់ជាមួយប្រព័ន្ធទូទាត់មួយនេះក្នុងពេលឆាប់ៗខាងមុខ៕