សង្គម និងសេដ្ឋកិច្ច - La Reine Media

កម្ពុជា ទើបតែទទួលបានពានរង្វាន់ពិភពលោកចំនួន ២ ទាក់ទងនឹងវិស័យទេសចរណ៍

កម្ពុជា ទទួលបានពានរង្វាន់ពិភពលោកចំនួន ២ ពីស្ថាប័ន World Travel Awards ទាក់ទងនឹងវិស័យទេសចរណ៍ ឆ្នាំ ២០២២ ដែលពិធីប្រគល់ពានរង្វាន់ត្រូវបានធ្វើឡើងនៅទីក្រុងព្រៃនគរ។

ស្ថាប័ន World Travel Awards បានប្រគល់ពានរង្វាន់ទាក់ទងនឹងវិស័យទេសចរណ៍ចំនួន ២ ដល់ កម្ពុជា ក្នុងនោះរួមមាន ពានរង្វាន់ «គោលដៅវប្បធម៌ឈានមុខគេក្នុងទ្វីបអាស៊ីឆ្នាំ ២០២២ (Asia’s Leading Culture Destination 2022)» និងពានរង្វាន់ «គោលដៅទេសចរណ៍យុវជនឈានមុខគេក្នុងទ្វីបអាស៊ីឆ្នាំ ២០២២ (Asia’s Leading Youth Travel Destination 2022)»។

ការទទួលបានពានរង្វាន់ទាំងនេះ គឺកើតឡើងដោយសារមានការគាំទ្រពីសំណាក់ទេសចរប្រមាណ ២ លាននាក់មកពីជុំវិញពិភពលោក ដែលបានចូលរួមបោះឆ្នោតជ្រើសរើស កម្ពុជា ជាគោលដៅទេសចរណ៍វប្បធម៌ និង គោលដៅទេសចរណ៍យុវជនឈានមុខគេ ក្នុងទ្វីបអាស៊ីឆ្នាំ ២០២២។

ពិធីប្រគល់ និងទទួលពានរង្វាន់ខាងលើ ត្រូវបានប្រារព្ធឡើង នៅទីក្រុងហូជីមិញ (ព្រៃនគរ) ប្រទេសវៀតណាម កាលពីថ្ងៃទី ០៧ ខែកញ្ញាកន្លងទៅ នៅក្នុងព្រឹត្តិការណ៍ពិព័រណ៍ទេសចរណ៍អន្តរជាតិ ITE HCMC 2022។

ក្នុងនាមជាតំណាងរាជរដ្ឋាភិបាល និងប្រជាជនកម្ពុជា លោក ថោង រដ្ឋសក្តិ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ នៃក្រសួងទេសចរណ៍ បានអញ្ជើញទៅទទួលពានរង្វាន់ទាំងនេះ៕

September 8, 2022

អាម៉េរិក-កូរ៉េខាងត្បូង យល់ព្រមបើកការសន្ទនាថ្នាក់ខ្ពស់ស្ដីពីច្បាប់ដែលគាំពារក្រុមហ៊ុនអាម៉េរិក

កូរ៉េខាងត្បូង និង សហរដ្ឋអាម៉េរិក បានឯកភាពគ្នាក្នុងការបើកកិច្ចចរចាថ្នាក់ខ្ពស់ក្នុងពេលឆាប់ៗខាងមុខ ស្ដីអំពីវិធានការកាត់បន្ថយផលប៉ះពាល់ដោយសារច្បាប់កាត់បន្ថយអតិផរណា (IRA) ចំពោះបណ្ដាក្រុមហ៊ុនផលិតរថយន្តរបស់ កូរ៉េខាងត្បូង។

រដ្ឋមន្ត្រីពាណិជ្ជកម្មកូរ៉េខាងត្បូង Ahn Duk-geun កាលពីថ្ងៃទី ០៧ កញ្ញាប្រកាសថា ប្រទេសនេះ និង សហរដ្ឋអាម៉េរិក បានយល់ព្រមប្រញាប់បើកកិច្ចចរចាថ្នាក់រដ្ឋមន្ត្រី ស្ដីពីវិធានការកាត់បន្ថយផលប៉ះពាល់ដោយសារច្បាប់កាត់បន្ថយអតិផរណា ចំពោះក្រុមហ៊ុនផលិតរថយន្តរបស់ កូរ៉េខាងត្បូង។

ក្រោយជំនួបជាមួយតំណាងពាណិជ្ជកម្មអាម៉េរិក (USTR) លោកស្រី Katherine Tai មន្ត្រីកូរ៉េខាងត្បូង បានឱ្យដឹងថា «យើងនឹងពិភាក្សាអំពីពេលវេលាជាក់លាក់ និងរឿងលម្អិតផ្សេងទៀត (ទាក់ទិននឹងគម្រោងបើកកិច្ចចរចា) កាន់តែឆាប់ កាន់តែល្អ ប៉ុន្តែ ខ្ញុំគ្រោងនឹងជួបលោកស្រី Katherine Tai ជារៀងរាល់សប្ដាហ៍ ចាប់ពីសប្ដាហ៍ក្រោយ និងសប្ដាហ៍បន្ទាប់»។

មុននោះ លោក Ahn បានទៅដល់ វ៉ាស៊ីងតោន កាលពីថ្ងៃទី ០៥ កញ្ញា ដើម្បីចរចាអំពីច្បាប់ថ្មីរបស់ សហរដ្ឋអាម៉េរិក ដែលកំណត់ថា នឹងមានកម្មវិធីលើកទឹកចិត្តផ្នែកពន្ធតម្លៃឡើងដល់ ៧,៥០០ ដុល្លារ សម្រាប់ពលរដ្ឋអាម៉េរិក ទិញរថយន្តអគ្គិសនីដែលដំឡើងនៅ សហរដ្ឋអាម៉េរិក លើកលែងតែរថយន្តដែលផលិតដោយក្រុមហ៊ុនកូរ៉េខាងត្បូង។

ទីក្រុងសេអ៊ូល យល់ថា IRA បំពានលើកិច្ចព្រមព្រៀងពាណិជ្ជកម្មសេរី (FTA) កូរ៉េខាងត្បូង-សហរដ្ឋអាម៉េរិក ដែលក្នុងនោះ តម្រូវឱ្យប្រទេសនីមួយៗប្រព្រឹត្តចំពោះផលិតរបស់គូភាគីក្នុងកិច្ចព្រមព្រៀង ឬបណ្ដាប្រទេសដែលទទួលបានអត្ថប្រយោជន៍ពី ប្រព័ន្ធអនុគ្រោះពន្ធ MFN ឱ្យដូចទៅនឹងផលិតផលក្នុងស្រុក៕

September 8, 2022

វៀតណាម អនុម័តការវិនិយោគលើគម្រោងកំពង់ផែអន្តរជាតិនៅភាគកណ្ដាល ដើម្បីទទួលដឹកទំនិញពី ឡាវ និង ថៃ

អាជ្ញាធរគ្រប់គ្រងតំបន់សេដ្ឋកិច្ចខេត្ត Quang Binh នៅភាគកណ្ដាលនៃ ប្រទេសវៀតណាម កាលពីម្សិលមិញ បានអនុម័តការវិនិយោគលើគម្រោងកំពង់ផែចម្រុះអន្តរជាតិ Hon La ជាមួយនឹងទុនវិនិយោគជាង ២.១ ទ្រីលានដុង។

គម្រោងកំពង់ផែចម្រុះអន្តរជាតិ Hon La នេះ ត្រូវបានបែងជា ២ ដំណាក់កាលនៃការវិនិយោគ ក្នុងនោះ ដំណាក់កាលទី ១ អនុវត្តពីឆ្នាំ ២០២២ ដល់ ២០២៤ ដោយប្រើប្រាស់ទុនវិនិយោគជិត ៩៤០ ពាន់លានដុង និងដំណាក់កាលទី ២ ចាប់ពីឆ្នាំ ២០២៥ ដល់ ២០២៦ ដោយប្រើទុនជាង ១.១ ទ្រីលានដុង។

ក្រុមហ៊ុនសាជីវកម្ម Hon La ដែលជាម្ចាស់គម្រោងខាងលើនេះ ត្រូវបានអនុញ្ញាតឱ្យអនុវត្ត និងដំណើរការរយៈពេល ៥០ ឆ្នាំ រាប់ចាប់ពីថ្ងៃចុះហត្ថលេខា។

គោលដៅនៃការវិនិយោគនេះគឺក្នុងបំណងស្ថាបនាកំពង់ផែចម្រុះលក្ខណៈអន្តរជាតិ សម្រាប់បម្រើដល់វិស័យសេដ្ឋកិច្ចនៅតំបន់ Hon La និងតំបន់ឧស្សាហកម្មក្នុងខេត្ត Quang Binh, ការដឹកជញ្ជូនទំនិញពី ប្រទេសឡាវ ក៏ដូចជាពី ភាគឦសានប្រទេសថៃ។ កំពង់ផែនេះអាចទទួលកប៉ាល់ដឹកទំនិញ និងកប៉ាល់ដឹកអ្នកដំណើរអន្តរជាតិ៕

September 7, 2022

BYD គ្រោងនឹងផលិតរថយន្តអគ្គិសនីនៅ ប្រទេសថៃ ដើម្បីដណ្ដើមទីផ្សារនៅ អាស៊ីអាគ្នេយ៍

ក្រោយពី Tesla របស់ អាម៉េរិក បង្កើនការជ្រើសរើសបុគ្គលិក ក្នុងបំណងពង្រីកទីផ្សារទៅក្នុង ប្រទេសថៃ ភ្លាមនោះ BYD របស់ ចិន ក៏មានមហិច្ឆតាប្រែក្លាយ ប្រទេសថៃ ឱ្យទៅជាមជ្ឈមណ្ឌលផលិតដំបូងរបស់ខ្លួននៅក្នុង តំបន់អាស៊ីអាគ្នេយ៍។

BYD ដែលជាអ្នកផលិតរថយន្តអគ្គិសនីលំដាប់កំពូលរបស់ ប្រទេសចិន និងជាគូប្រជែងសំខាន់មួយរបស់ Tesla នឹងប្រែក្លាយ ប្រទេសថៃ ឱ្យទៅជាមជ្ឈមណ្ឌលផលិតរថយន្តអគ្គិសនីដំបូងរបស់ខ្លួននៅក្នុង តំបន់អាស៊ីអាគ្នេយ៍។

យោងតាមសារព័ត៌មាន Nikkei នេះអាចជាឧបសគ្គមួយសម្រាប់បណ្ដាក្រុមហ៊ុនផលិតរថយន្តអគ្គិសនីចិនផ្សេងទៀតដែលកំពុងមានវត្តមាននៅ ប្រទេសថៃ។ BYD បានត្រៀមខ្លួនរួចរាល់ក្នុងការប្រើប្រាស់តម្រូវការរថយន្តអគ្គិសនីដែលកំពុងកើតឡើងខ្ពស់ ក៏ដូចជាកញ្ចប់ជំនួយដែលផ្ដល់ដោយ រដ្ឋាភិបាលថៃ ដើម្បីដណ្ដើមចំណែកទីផ្សារនៅប្រទេសនេះ ក៏ដូចជា អាស៊ីអាគ្នេយ៍ ទាំងមូល។

យោងតាមមន្ត្រីមួយរូបនៅក្នុងក្រុមប្រឹក្សាវិនិយោគរបស់ ប្រទេសថៃ ក្រុមហ៊ុន BYD នឹងបោះទុនសរុប ១៧.៩ ពាន់លានបាត (៤៨៨ លានដុល្លារអាម៉េរិក) ទៅក្នុងខេត្ត Rayong ជាទីដែលត្រូវបានគេជឿថា BYD បានទិញដី ១១២ ហិកតា ដើម្បីសាងសង់រោងចក្រផលិតរថយន្តអគ្គិសនី។

កាលពីខែមុន ក្រុមប្រឹក្សាវិនិយោគថៃ បានផ្ដល់សិទ្ធិវិនិយោគពិសេសមួយទៅឱ្យ BYD។ មន្ត្រីមួយរូបរបស់ ប្រទេសថៃ បាននិយាយថា បច្ចុប្បន្ន BYD ត្រូវចាប់ផ្ដើម «វិនិយោគក្នុងរង្វង់ ៣ ឆ្នាំ»។

បរិមាណរថយន្តអគ្គិសនីដែលត្រូវបានលក់ចេញនៅ ប្រទេសថៃ ត្រូវបានគេព្យាករថា នឹងកើនឡើងយ៉ាងឆាប់រហ័ស ដោយសារតែកញ្ចប់ជំនួយរបស់ រដ្ឋាភិបាលថៃ ដែលនឹងជួយឱ្យតម្លៃរថយន្តអគ្គិសនីថោកជាងទីផ្សារខាងក្រៅ។

គំនិតផ្ដួចផ្ដើមក្នុងការបញ្ចេញកញ្ចប់ជំនួយសម្រាប់វិស័យរថយន្តអគ្គិសនីនេះ ត្រូវបានធ្វើឡើងក្នុងបំណងទាក់ទាញអ្នកប្រើប្រាស់ដើម្បីបង្កើតបានជាខឿនសេដ្ឋកិច្ចមួយ និងជំរុញការវិនិយោគក្នុងវិស័យនេះ។ តម្លៃនៃកញ្ចប់ជំនួយទាំងឡាយអាចឡើងដល់ ១៥០,០០០ បាត សម្រាប់រថយន្តអគ្គិសនីមួយគ្រឿង៕

September 7, 2022

បារាំងបញ្ចេញស្រឡាងបៃតងទំនើប បំពាក់ប្រព័ន្ធប្រឆាំងនឹងការបំភាយឧស្ម័នពុល

ក្រុមហ៊ុនសាងសង់កប៉ាល់ La Meridionale បានបញ្ចេញស្រឡាងថ្មីដែលសមស្របនឹងបរិស្ថាន ដោយអាចបំបាត់ភាគល្អិតប្រមាណជា ៩៩.៩% ក្នុងចំណោមភាគល្អិតជាឧស្ម័នផ្ទះកញ្ចក់ដែលបញ្ចេញម៉ាស៊ីនចំហេះក្នុង។

កាលពីថ្ងៃទី ០៥ កញ្ញា ស្រឡាងមួយគ្រឿងដែលមិនបំពុលបរិស្ថាន ត្រូវបានដាក់ឱ្យដំណើរការក្នុងការដឹកជញ្ជូនផ្លូវទឹករវាងតំបន់ Marseille និង Bastia របស់ ប្រទេសបារាំង។

យោងតាមក្រុមហ៊ុន La Meridionale ស្រឡាងខ្នាតយក្សនេះប្រើប្រាស់ប្រព័ន្ធចម្រាញ់ baghouse ដ៏ទំនើប ដែលភ្ជាប់ជាមួយនឹងបំពង់ផ្សែង ដើម្បីចម្រាញ់ចោលឧស្ម័នពុល។

«តាមពិត យើងមិនបានស្វែងរកឯណាឆ្ងាយ មិនបានស្រាវជ្រាវរកឃើញអ្វីទាំងអស់។ នោះគឺជាប្រព័ន្ធមួយ ជាដំណើរការដែលត្រូវបានប្រើប្រាស់នៅក្នុងបណ្ដារោងចក្រដុតសំរាមឧស្សាហកម្ម សំរាមប្រើប្រាស់ប្រចាំថ្ងៃ និងរោងចក្រអគ្គិសនីដើរដោយថាមពលជីវម៉ាស» ប្រធានផ្នែកបច្ចេកទេស Christophe Ceguinot របស់ La Meridionale ឱ្យដឹងដូច្នេះ។

Christophe Ceguinot បន្តថា «ប្រព័ន្ធចម្រាញ់ baghouse មានវត្តមានជិត ៣០ ឆ្នាំមកហើយ។ ដូច្នេះ ឧបសគ្គរបស់យើងគឺការធ្វើឱ្យវាសមស្របនឹងវិស័យដឹកជញ្ជូនផ្លូវទឹក»។

ការបំពាក់ប្រព័ន្ធចម្រាញ់ baghouse ទំនើបទៅក្នុងប្រព័ន្ធបំពង់ផ្សែង អនុញ្ញាតឱ្យយាននេះបំបាត់ភាគល្អិតនៃផ្សែងខ្មៅបានរហូតដល់ ៩៩.៩% ព្រមទាំងកាត់បន្ថយការបំភាយសារធាតុស្ពាន់ធ័រអ៊ុកស៊ីត ផងដែរ។

ជាក់ស្ដែង ស្ពាន់ធ័រ និងគ្រាប់ល្អិតដែលបញ្ចេញពីម៉ាស៊ីន នឹងត្រូវបានបន្សាបដោយ sodium bicarbonate ហើយក្រោយមកវាត្រូវឆ្លងកាត់ប្រព័ន្ធចម្រាញ់។ ចុងក្រោយ សារធាតុរឹងនឹងត្រូវបាននាំទៅកាន់អាងកែច្នៃឡើងវិញ។ ដូច្នេះ លែងមានឧស្ម័នផ្ទះកញ្ចក់ និងសារធាតុស្ពាន់ធ័រណាដែលអាចបំភាយទៅក្នុងបរិយាកាសទៀតឡើយ៕

September 7, 2022

ស្ថានីយផលិតអគ្គិសនីពីកម្ដៅព្រះអាទិត្យមានរូបរាងដូចសេះនៅលើសមុទ្រខ្សាច់

ក្រៅពីការផ្ដល់អគ្គិសនី ស្ថានីយ Tiancihu ទំហំ ១.៤ លានម៉ែត្រក្រឡា នៅលើសមុទ្រខ្សាច់ Kubuqi ក៏ថែមទាំងបង្កើតការងារ និងជួយលើកស្ទួយប្រព័ន្ធអេកូផងដែរ។

រូបរាងសត្វសេះដែលកំពុងផាយនេះ ត្រូវបានបង្កើតឡើងដោយផ្ទាំងសូឡារជាង ១៩៦,០០០ ផ្ទាំង ដែលតម្រៀបលើសមុទ្រខ្សាច់មួយនៅតំបន់ម៉ុងហ្គោលីខាងក្នុង (Inner Mongolia) នៅ ប្រទេសចិន។ នេះគឺជាស្ថានីយផលិតអគ្គិសនីពីកម្ដៅព្រះអាទិត្យ Tiancihu ដែលមានទំហំប្រហែល ១.៤ លានម៉ែត្រក្រឡា។

ស្ថិតនៅលើសមុទ្រសខ្សាច់ Kubuqi ដែលជាសមុទ្រខ្សាច់ធំជាងគេលំដាប់ទី ៧ របស់ ប្រទេសចិន ស្ថានីយ Tiancihu មិនត្រឹមតែមានតួនាទីផ្ដល់អគ្គិសនីនោះទេ តែក៏ចូលរួមចំណែកក្នុងការការពារបរិស្ថានផងដែរ។

យើងអាចមើលឃើញរបងទប់លំហូរខ្សាច់ ដែលត្រូវបានបង្កើតឡើងពីមែករុក្ខជាតិ។ មែកឈើទាំងនេះត្រូវបានដោតទៅក្នុងដី ដើម្បីជួយទប់ខ្សាច់មិនឱ្យផ្លាស់ទី។ នេះត្រូវបានគេហៅថា ការស្ដារជីវសាស្ត្រ នៅខាងក្រោមផ្ទាំងសូឡារ។

ទំហំខ្សាច់ដែលត្រូវបានគ្រប់គ្រង បានឡើងដល់ជាង ៨,០០០ mu (៥៣៣ ហិកតា)។ ដោយការដាំរុក្ខជាតិ amorpha និងដើមពុទ្រាចិនជាដើម ស្ថានីយផលិតអគ្គិសនីពីកម្ដៅព្រះអាទិត្យ Tiancihu បានបង្ហាញសញ្ញានៃការងើបឡើងយ៉ាងច្បាស់របស់ជីវសាស្ត្រ។

ទន្ទឺមនឹងនេះ ស្ថានីយនេះក៏បង្កើតការងារជូនប្រជាជន និងលើកកម្ពស់ប្រាក់ចំណូលរបស់ពួកគេផងដែរ។

«ខ្ញុំជាពលករថែទាំស្ថានីយ Tiancihu ទទួលបានប្រាក់ខែ ៨៦៥ ដុល្លារ/ខែ។ ក្រៅពីការដាំដំណាំ និងចិញ្ចឹមសត្វ ប្រជាជនក្នុងភូមិអាចមកកាន់ស្ថានីយនេះ ដើម្បីរៀបចំ សម្អាតខ្សាច់ និងស្មៅព្រៃ» Zhao Jinlong ដែលជាប្រជាជននៅក្បែរស្ថានីយ និយាយដូច្នេះ។

លោក Zhao បន្តថា «ស្ថានីយអគ្គិសនីព្រះអាទិត្យនេះ មិនត្រឹមតែបង្កើតការងារឱ្យយើងនោះទេ តែក៏បានកែលំអបរិស្ថានជីវសាស្ត្រគួរឱ្យកត់សម្គាល់ទៀតផង។ ទីនេះ ធ្លាប់ជាតំបន់ខ្សាច់ដ៏ធំធេង ប៉ុន្តែបច្ចុប្បន្ន បានក្លាយជាតំបន់បៃតងទៅហើយ»៕

September 7, 2022

តម្លៃប្រេងឆៅបែរជាធ្លាក់ថ្លៃខ្លាំង ក្រោយពី OPEC+ សម្រេចកាត់បន្ថយបរិមាណនៃការផលិត

អារ៉ាប៊ីសាអូឌីត បានទម្លាក់តម្លៃប្រេងដែលលក់ទៅឱ្យអតិថិជននៅ ទ្វីបអាស៊ី ដោយសារតែវិធានការទប់ស្កាត់កូវីដ-១៩ និងការថមថយកម្លាំងរបស់សេដ្ឋកិច្ច។

វិធានការបិទខ្ទប់ដើម្បីប្រឆាំងនឹងកូវីដ-១៩ នៅ ប្រទេសចិន បានបណ្ដាលឱ្យការបង្ការហានិភ័យកើនឡើងខ្ពស់នៅក្នុងទីផ្សារប្រេង។ ទន្ទឹមនឹងនេះ ការនៅទ្រឹងនៅក្នុងការជួញដូរចុងក្រោយបង្អស់នេះក៏បានរាំងស្ទះកំណើននៃតម្លៃប្រេង ក្រោយការប្រជុំរបស់ក្រុមប្រទេសនាំចេញប្រេង (OPEC)។

បញ្ចប់ការជួញដូរកាលពីថ្ងៃទី ០៦ កញ្ញា តម្លៃប្រេង Brent នៅលើទីផ្សារក្រុងឡុងដ៍ បានថយចុះ ៣.០៤% មកនៅត្រឹម ៩២.៨៣ ដុល្លារ/ធុង។ តម្លៃប្រេង WTI នៅលើទីផ្សារ ញូវយ៉ក មិនមានការប្រែប្រួលច្រើន ដោយត្រូវបានលក់ក្នុងតម្លៃ ៨៦.៨៨ ដុល្លារ/ធុង។

ថ្មីៗនេះ អារ៉ាប៊ីសាអូឌីត បានទម្លាក់តម្លៃប្រេងដែលលក់ទៅឱ្យអតិថិជននៅ ទ្វីបអាស៊ី ដោយសារតែវិធានការទប់ស្កាត់នឹងកូវីដ-១៩ នៅ ប្រទេសចិន និងការដែលសេដ្ឋកិច្ចថមថយកម្លាំង បានធ្វើឱ្យតម្រូវការថាមពលក្នុងតំបន់ត្រូវថយចុះ។ វិធានការទប់ស្កាត់កូវីដ-១៩ នៅ ប្រទេសចិន ត្រូវបានអនុវត្តក្នុងទ្រង់ទ្រាយធំជាងមុន បណ្ដាលឱ្យអ្នកវិនិយោគជាច្រើនបារម្ភអំពីហានិភ័យកើតមានឱនភាពសេដ្ឋកិច្ចសកល។

កាលពីថ្ងៃទី ០៥ កញ្ញា តម្លៃប្រេង WTI បានកើនឡើងដល់ ៩០ ដុល្លារ/ធុង បន្ទាប់ពីក្រុមប្រទេសនាំចេញប្រេង និងដៃគូសហការ (OPEC+) ក្នុងនោះមាន រុស្ស៊ី ជាដើម បានយល់ព្រមកាត់បន្ថយបរិមាណប្រេងឆៅចំនួន ១ សែនធុងជារៀងរាល់ថ្ងៃ ក្នុងបំណងលើកស្ទួយតម្លៃក្នុងទីផ្សារ៕

September 7, 2022

ចិន ចាប់ផ្ដើមសាងសង់រោងចក្រវារីអគ្គិសនីតម្លៃ ១៧ ពាន់លានដុល្លារ ក្នុងប្រទេសមួយនៅអាស៊ីអាគ្នេយ៍

គម្រោងរោងចក្រវារីអគ្គិសនីដែលរួមមាន ទំនប់ចំនួន ៥ កន្លែង និងអាចផ្ដល់ថាមពលអគ្គិសនីខ្លាំងជាងគេនៅ អាស៊ីអាគ្នេយ៍ នេះ គ្រោងនឹងត្រូវចំណាយទុន ១៧ ពាន់លានដុល្លារអាម៉េរិក និងបញ្ចប់ជាស្ថាពរនៅឆ្នាំ ២០៣៥។

Kayan Hydro Energy (KHE) ដែលជាក្រុមហ៊ុនបុត្រសម្ព័ន្ធមួយរបស់សាជីវកម្មសាងសង់បណ្ដាញអគ្គិសនីរបស់ប្រទេសចិន (PowerChina) បានចាប់ផ្ដើមការស្ថាបនារោងចក្រវារីអគ្គិសនីកម្លាំង ៩GW នៅលើកោះ Borneo របស់ ប្រទេសឥណ្ឌូណេស៊ី ដើម្បីបម្រើដល់គម្រោងអភិវឌ្ឍវិស័យឧស្សាហកម្មបៃតងនានាក្នុងតំបន់។

បច្ចុប្បន្ន KHE កំពុងសាងសង់ផ្លូវទៅកាន់ទីតាំងរបស់គម្រោងវារីអគ្គិសនី Kayan Cascade ដែលស្ថិតនៅតាមបណ្ដោយទន្លេ Kayan ក្នុងខេត្ត Kalimantan ខាងជើង។

គម្រោងដែលរួមមាន ទំនប់វារីអគ្គិសនីចំនួន ៥ កន្លែង និងអាចផ្ដល់ថាមពលអគ្គិសនីខ្លាំងជាងគេបង្អស់នៅក្នុងតំបន់អាស៊ីអាគ្នេយ៍ នេះ គ្រោងនឹងត្រូវចំណាយដើមទុន ១៧ ពាន់លានដុល្លារអាម៉េរិក និងបញ្ចប់ជាស្ថាពរនៅឆ្នាំ ២០៣៥។

ទិដ្ឋភាពគ្រឿងចក្រកំពុងចាប់ផ្ដើមអនុវត្តគម្រោង

ទំនប់វារីអគ្គិសនីដំបូងរបស់គម្រោងខាងលើ គឺ Kayan 1 ដែលផ្ដល់ថាមពល ៩០០MW គ្រោងនឹងចាប់ផ្ដើមផ្គត់ផ្គង់អគ្គិសនីនៅឆ្នាំ ២០២៦។ ទំនប់ចុងក្រោយគឺ Kayan 5 ដែលផ្ដល់ថាមពលរហូតដល់ ៣.៣GW គ្រោងនឹងស្ថាបនារួចរាល់នៅក្នុងឆ្នាំ ២០៣៥។

ប្រធាន និងជាអគ្គនាយករបស់ KHE លោក Andrew Suryali បានឱ្យដឹងថា ក្រុមហ៊ុន PowerChina Huadong នឹងទទួលខុសត្រូវក្នុងការគូរប្លង់ ចំណែក SinoHydro នឹងរ៉ាប់រងផ្នែកបច្ចេកទេស ការទិញសម្ភារសំណង់ និងការសាងសង់។

PowerChina Huadong និង SinoHydro គឺជាក្រុមហ៊ុនបុត្រសម្ព័ន្ធរបស់ PowerChina។ ពួកគេក៏ជាអ្នកចូលរួមក្នុងដំណើរការអនុវត្តគម្រោងស្ថាបនាផ្លូវរថភ្លើងល្បឿនលឿនដំបូងរបស់ ឥណ្ឌូណេស៊ី ដែលតភ្ជាប់ពី រដ្ឋធានីហ្សាការតា ជាមួយនឹង Bandung ដែលជាទីក្រុងរដ្ឋបាលរបស់ខេត្តជ្វាខាងលិចផងដែរ៕

September 6, 2022

ធនាគារជាតិនៃកម្ពុជា ប្រកាសថា នឹងបោះផ្សាយមូលបត្របំណុលដំបូង នៅថ្ងៃស្អែក

ការដេញថ្លៃមូលបត្ររដ្ឋ លើកទីមួយដែលមានទំហំទឹកប្រាក់ ១០០ ពាន់លានរៀល ដែលប្រហែល ២៥ លានដុល្លារអាម៉េរិក នឹងត្រូវបានធ្វើឡើងនៅថ្ងៃទី ០៧ កញ្ញាខាងមុខ នេះបើតាម ធនាគារជាតិកម្ពុជា ប្រកាសកាលពីម្សិលមិញ។

យោងតាមសេចក្ដីប្រកាសរបស់ ធនាគារជាតិកម្ពុជា មូលបត្ររដ្ឋដំបូងខាងលើនេះ នឹងដាក់ឱ្យដេញថ្លៃតាមរយៈផ្លែតហ្វមរបស់ធនាគារជាតិនៃកម្ពុជា (NBCP) ចាប់ពីម៉ោង ៨ ព្រឹក ដល់ ២ រសៀល ថ្ងៃទី ០៧ កញ្ញា។ មូលបត្របំណុលនេះ មានតម្លៃចារឹត (Face Value) ចំនួន ១ លានរៀល ដែលស្មើនឹង ២៥០ ដុល្លារអាម៉េរិក ក្នុង ១ បណ្ណ ជាមួយនឹងការផ្ដល់អត្រាការប្រាក់ ២% ថេរក្នុងមួយឆ្នាំ ដែលរដ្ឋនឹងទូទាត់សងក្នុងរយៈពេល ៦ ខែម្តង។

នេះគឺជាជំហានទីមួយរបស់ រាជរដ្ឋាភិបាលកម្ពុជា នៅក្នុងគម្រោងបោះលក់មូលបត្របំណុលក្នុងទំហំទឹកប្រាក់ ២,២១៩ ពាន់លានរៀល ដែលប្រហាក់ប្រហែលនឹង ៣០០ លានដុល្លារអាម៉េរិក នៅក្នុងឆ្នាំ ២០២២។

មូលហេតុនៃការបោះផ្សាយមូលបត្របំណុលនេះត្រូវបានលើកឡើងថា គឺក្នុងបំណងប្រមូលទុនវិនិយោគក្នុងប្រទេស សម្រាប់គាំទ្រដល់ការអភិវឌ្ឍសេដ្ឋកិច្ចជាតិ៕

September 6, 2022

ផ្លូវដែកឡាវ-ចិន ដឹកជញ្ជូនទំនិញបានជាង ១០ ពាន់លានយុន ក្រោយដំណើរការបាន ៩ ខែ

ខ្សែរថភ្លើងឡាវ-ចិន ដឹកជញ្ជូនទំនិញអន្តរជាតិបានរាប់លានតោន គិតជាតម្លៃបានជាង ១០ ពាន់លានយុន ក្រោយពីត្រូវបានដាក់ឱ្យដំណើរការជាផ្លូវការកាលពីចុងឆ្នាំកន្លង។

យោងតាម Global Times ចាប់តាំងពី ផ្លូវដែកចិន-ឡាវ បានដំណើរការកាលពីថ្ងៃទី ០៣ ធ្នូ ២០២១ អាជ្ញាធរនៅកំពង់ផែ Mohan នៃខេត្ត Yunnan ប្រទេសចិន ដែលស្ថិតនៅជាប់នឹងព្រំដែនជាមួយ ប្រទេសឡាវ បានអនុញ្ញាតឱ្យរថភ្លើងឆ្លងកាត់ព្រំដែនចំនួន ១,៨៦៨ ជើង។ ទំនិញសរុបដែលត្រូវបានដឹកតាមខ្សែរថភ្លើងនេះមានចំនួន ១.២៨ លានតោន ក្នុងនោះមាន ៣៤០,០០០ តោន គឺជាទំនិញនាំពីប្រទេសចិន ចូលប្រទេសឡាវ និង ៩៤០,០០០ តោន ជាទំនិញនាំពី ប្រទេសឡាវ ចូល ប្រទេសចិន។

ទំនិញដែលត្រូវបានដឹកជញ្ជូនតាមរយៈផ្លូវដែកចិន-ឡាវ នេះ មានចំនួនប្រមាណ ២ ពាន់មុខ រួមមានដូចជា ផលិតផលអេឡិចត្រូនិក ផ្ទាំងសូឡា ឧបករណ៍ទូរគមនាគមន៍។ល។ គិតមកដល់ដើមខែសីហាកន្លងទៅ ផ្លូវដែកនេះក៏ដឹកជញ្ជូនអ្នកដំណើរបាន ៥.៥៤ លានជើងរួចហើយដែរ។

ផ្លូវដែកចិន-ឡាវ គឺជាគម្រោងស្ថិតក្នុងគំនិតផ្ដួចផ្ដើមខ្សែក្រវាត់ និងផ្លូវ ដែលបង្កើតឡើងដោយប្រទេសចិន។ ផ្លូវដែកនេះរត់ឆ្លងកាត់ ៣០ ខេត្ត និងតំបន់ស្វយ័តនៅក្នុងទឹកដីរបស់ ប្រទេសចិន និង ៨ ប្រទេសនៅ តំបន់អាស៊ីអាគ្នេយ៍ មានដូចជា ប្រទេសឡាវ, មីយ៉ានម៉ា, ថៃ និង វៀតណាម ជាដើម។

ផ្លូវដែកចិន-ឡាវ បានក្លាយជាភ្នាក់ងារតភ្ជាប់ដ៏សំខាន់រវាង ប្រទេសចិន ជាមួយនឹងបណ្ដាប្រទេសនៅក្នុងសមាគមប្រជាជាតិអាស៊ីអាគ្នេយ៍ ដែលជាដៃគូពាណិជ្ជកម្មធំបំផុតរបស់ ប្រទេសចិន។

ផ្លូវដែកប្រវែង ១,០៣៥ គីឡូម៉ែត្រនេះ អាចជួយសន្សំសំច័យប្រាក់ក្នុងការដឹកជញ្ជូនបានពី 40-50% សម្រាប់បណ្ដាក្រុមហ៊ុន អាជីវករនាំចេញ នាំចូល។ ប្រការនេះនាំឱ្យ ប្រទេសចិន និងប្រទេសមួយចំនួននៅ អាស៊ីអាគ្នេយ៍ កំពុងមានគម្រោងពង្រីកផ្លូវដែកនេះបន្ថែមទៀត៕

September 6, 2022

Category: សង្គម និងសេដ្ឋកិច្ច