សង្គម និងសេដ្ឋកិច្ច - La Reine Media

លំហូរទុន FDI ដែលវិនិយោគមកលើ អាស៊ាន កើនឡើងដល់ជាង ១៧០ ពាន់លានដុល្លារអាម៉េរិក

របាយការណ៍ប្រចាំឆ្នាំរបស់ អាស៊ាន (ASEAN) បានសង្កត់ធ្ងន់ថា ការងើបឡើងវិញយ៉ាងលឿនបានបង្ហាញអំពីសមត្ថភាពនៃការទប់ទល់ និងកម្លាំងទាក់ទាញរបស់ អាស៊ាន ក្នុងនាមជាតំបន់វិនិយោគធំមួយរបស់ពិភពលោក និងជាចលករនៃកំណើន FDI។

កាលពីថ្ងៃទី ១៤ កញ្ញា កិច្ចប្រជុំថ្នាក់រដ្ឋមន្ត្រីអាស៊ាន-ក្រុមប្រឹក្សាតំបន់វិនិយោគអាស៊ានលើកទី ២៥ បានប្រកាសរបាយការណ៍វិនិយោគអាស៊ាន (AIR) ឆ្នាំ ២០២២ ក្នុងមូលបទ «ស្ដារសេដ្ឋកិច្ចក្រោយជំងឺរាតត្បាតសកល និងសម្រួលការវិនិយោគ»។

របាយការណ៍ខាងលើបានបង្ហាញថា លំហូរទុនផ្ទាល់ពីបរទេស (FDI) ចូលមកកាន់តំបន់អាស៊ាន បានកើន ៤២% ឡើងដល់ ១៧៤ ពាន់លានដុល្លារក្នុងឆ្នាំ ២០២១។ នេះគឺជាកំណើនខ្ពស់បំផុតនៅចំពោះមុខជំងឺរាតត្បាតកូវីដ-១៩ និងការកែប្រែស្ថានការណ៍នៃឱនភាពសេដ្ឋកិច្ចដែលកើតឡើងដោយសារ កូវីដ-១៩ ក្នុងឆ្នាំ ២០២០។

របាយការណ៍ប្រចាំឆ្នាំរបស់ អាស៊ាន (ASEAN) បានសង្កត់ធ្ងន់ថា ការងើបឡើងវិញយ៉ាងលឿនបានបង្ហាញអំពីសមត្ថភាពនៃការទប់ទល់ និងកម្លាំងទាក់ទាញរបស់ អាស៊ាន ក្នុងនាមជាតំបន់វិនិយោគធំមួយរបស់ពិភពលោក និងជាចលករនៃកំណើន FDI។

បណ្ដាសមាជិកអាស៊ាន (AMS) បានប្រឹងប្រែងក្នុងការផ្ដល់អំណោយផលដល់ការវិនិយោគក្នុងប៉ុន្មានឆ្នាំកន្លងមកនេះ។ ការសម្រួលលើការវិនិយោគនៅ អាស៊ាន (AIFF) ក្នុងឆ្នាំ ២០២១ បានបង្ហាញអំពីការសន្យារបស់ អាស៊ាន នៅក្នុងការកែលំអបន្ថែមទៀតចំពោះបរិស្ថានវិនិយោគ និងពាណិជ្ជកម្មក្នុងតំបន់។

យោងតាមរបាយការណ៍ដដែល បើទោះជា AMS បានអនុវត្តវិធានការ AIFF ស្ទើរតែទាំងអស់ រួមនឹងបណ្ដាវិធានការសម្រួលការវិនិយោគកាន់តែប្រកបដោយប្រសិទ្ធភាព ប៉ុន្តែក៏នៅមានចន្លោះប្រហោងដែលត្រូវការបំពេញបន្ថែម។

តាមគម្រោង AIR ២០២២ នឹងត្រូវបានប្រកាសបន្តនៅក្នុងកិច្ចប្រជុំកំពូលស្ដីពីការវិនិយោគ និងពាណិជ្ជកម្មអាស៊ាន នៅក្នុងខែវិច្ឆិកាខាងមុខ៕

September 15, 2022

ម៉ូតូលេខអូតូអគ្គិសនី Blueshark R1 ត្រូវបានផលិតនៅ ម៉ាឡេស៊ី

ម៉ូតូអគ្គិសនីដែលមានលេខអូតូ Blueshark R1 ត្រូវបានបង្ហាញជាផ្លូវការនៅក្នុង ទីផ្សារម៉ាឡេស៊ី ដែលនេះក៏ជាការបើកផ្លូវសម្រាប់ម៉ូតូប្រភេទនេះ ពង្រីកវត្តមានរបស់ខ្លួននៅក្នុង ទីផ្សារអាស៊ីអាគ្នេយ៍ ផងដែរ។

ម៉ូតូលេខអូតូគឺជាយានយន្តដែលទទួលបានការគាំទ្រច្រើនបំផុតនៅក្នុង ទ្វីបអាស៊ី ដោយសារតែតម្លៃសមស្រប និងភាពងាយស្រួលប្រើប្រាស់របស់ពួកវា។ ក្នុងទីផ្សារម៉ូតូអគ្គិសនី ម៉ូតូលេខអូតូនឹងកាន់តែពេញនិយមថែមទៀត ដោយសារថា វាជួយសំច័យថាមពលបានច្រើនជាង ងាយស្រួលថែទាំជាង ព្រមទាំងចំណេញលើពន្ធនៅក្នុងប្រទេសមួយចំនួន។

នៅ ម៉ាឡេស៊ី ក្រុមហ៊ុនមួយក្នុងទីផ្សារយានយន្តអគ្គិសនី អាចនឹងចូលរួមប្រកួតប្រជែងនាពេលឆាប់ៗខាងមុខនេះ ក្នុងនោះ ផលិតផលរបស់ក្រុមហ៊ុននេះអាចត្រូវបានផលិតក្នុងស្រុក ជាហេតុឱ្យគេជឿបានថា ម៉ូតូលេខអូតូអគ្គិសនីតម្លៃទាបនឹងបង្ហាញខ្លួននៅទីផ្សារនេះ។

យោងតាមក្រុមហ៊ុនស្រាវជ្រាវទីផ្សារ Edge Markets ក្រុមហ៊ុនផលិតគ្រឿងបន្លាស់រថយន្ត EP Manufacturing បានចុះកិច្ចព្រមព្រៀងកាលពីខែមីនា ជាមួយនឹងក្រុមហ៊ុនបច្ចេកវិទ្យា Sharkgulf និងមូលនិធិ CIS Pride Silver Rock ដើម្បីផលិត និងចែកចាយទោចក្រយានយន្តអគ្គិសនីសម្រាប់ ទីផ្សារម៉ាឡេស៊ី និង អាស៊ីអាគ្នេយ៍។

CIS គឺជាមូលនិធិវិនិយោគដែលដំណើរការដោយ Silver Rock Capital, Realchamp Asset Management និង The Pride Group ខណៈដែល Sharkgulf មានទីស្នាក់ការកណ្ដាលនៅ ប្រទេសចិន ដែលជាអ្នកផលិតម៉ូតូអគ្គិសនីយីហោ Blueshark។ ម៉ាឡេស៊ី នឹងក្លាយជាស្រុកកំណើតរបស់រោងចក្រផលិត ចែកចាយ និងលក់ប្រភេទកង់សម្រាប់ម៉ូតូអគ្គិសនី Blueshark។

ម៉ូតូអគ្គិសនីលេខអូតូ Blueshark R1 ដែលផលិតដោយ Sharkgulf មានកម្លាំង ៥ kW។ វាប្រើប្រាស់ថ្មផ្ទុកអគ្គិសនី ១,៤៤០ Wh ចំនួន ២ គ្រាប់ អាចឱ្យវារត់ក្នុងល្បឿន ២៦ គីឡូម៉ែត្រ/ម៉ោង បានចម្ងាយ ១៦០ គីឡូម៉ែត្រ ខណៈដែលល្បឿនអតិបរមារបស់វាគឺ ៨០ គីឡូម៉ែត្រ/ម៉ោង។ តម្លៃរបស់ Blueshark នៅក្នុងទីផ្សារមួយចំនួននៅ អាស៊ីអាគ្នេយ៍ ដែលនាំចូលមិនផ្ដាច់មុខ មានតម្លៃប្រមាណ ២,៩០០ ដុល្លារអាម៉េរិក៕

មានបំពាក់ប្រព័ន្ធអង្គញាណ ឬហៅថា សែនសឺរ ទំនើប

September 15, 2022

អាម៉េរិក បញ្ចេញប្រាក់ ៩០០ លានដុល្លារ ដើម្បីដំឡើងស្ថានីយបញ្ចូលថាមពលសម្រាប់រថយន្តអគ្គិសនី

សេតវិមានបានឱ្យដឹងថា ប្រធានាធិបតី ចូ បៃដិន នឹងចូលរួមព្រឹត្តិការណ៍ពិព័រណ៍រថយន្ត Detroit និងប្រកាសអនុម័តកញ្ចប់ថវិកាជំនួយ ៩០០ លានដុល្លារដំបូងដើម្បីសាងសង់ស្ថានីយបញ្ចូលថាមពលសម្រាប់រថយន្តអគ្គិសនីនៅក្នុង ៣៥ រដ្ឋ ដែលទុកដូចជាមួយផ្នែកនៃច្បាប់ហេដ្ឋារចនាសម្ព័ន្ធដែលមានតម្លៃ ១ ទ្រីលានដុល្លារអាម៉េរិក។

នៅក្នុងព្រឹត្តិការណ៍ពិព័រណ៍រថយន្ត Detroit លោក បៃដិន អាចនឹងនិយាយអំពីវឌ្ឍនភាពនានាដែលទាក់ទងនឹងវិស័យយានយន្តអគ្គិសនី ក៏ដូចជាគម្រោងនានារបស់រដ្ឋាភិបាលក្នុងការលើកទឹកចិត្តឱ្យមានការប្រើប្រាស់យានយន្តអគ្គិសនីឱ្យបានទូលំទូលាយជាងបច្ចុប្បន្ន។

យោងតាមលោក បៃដិន ទីផ្សាររថយន្តអគ្គិសនីនៅ សហរដ្ឋអាម៉េរិក គ្រោងនឹងកើនពី ២៨.២៤ ពាន់លានដុល្លារក្នុងឆ្នាំ ២០២១ ឡើងដល់ ១៣៧.៤៣ ពាន់លានដុល្លារក្នុងឆ្នាំ ២០២៨ ហើយរដ្ឋាភិបាលក៏កំពុងតែជំរុញតម្រូវការនោះ។ កាលពីខែធ្នូ ២០២១ លោក បៃដិន បានចុះហត្ថលេខាលើបទបញ្ជាមួយដែលណែនាំឱ្យអាជ្ញាធរទិញ និងប្រើប្រាស់តែរថយន្តអគ្គិសនី ឬរថយន្ត plug-in hybrid EV ចាប់ពីឆ្នាំ ២០២៧។

សេតវិមានបានឱ្យដឹងថា កាលពីឆ្នាំ ២០២០ តួលេខនៃរថយន្តអគ្គិសនីដែលត្រូវបានទិញដូរក្នុងទឹកដីអាម៉េរិក គឺមានត្រឹមតែ ១% ប៉ុណ្ណោះ។ ក្នុងឆ្នាំដំបូងនៃអាណត្តិប្រធានាធិបតីរបស់លោក បៃដិន ចំនួនរថយន្តអគ្គិសនីដែល រដ្ឋាភិបាលអាម៉េរិក បានទិញ បានកើនឡើងទ្វេដង ហើយក្នុងឆ្នាំសារពើពន្ធ ២០២២ អាជ្ញាធរអាម៉េរិក បានទិញរថយន្តច្រើនជាងមុនរហូតដល់ ៥ ដង។

ស្ថានីយបញ្ចូលថាមពលសម្រាប់យានយន្តអគ្គិសនីមួយកន្លែងនៅក្នុងរដ្ឋ California សហរដ្ឋអាម៉េរិក

រដ្ឋាភិបាលអាម៉េរិក កំពុងតែជួយជំរុញការងាកទៅប្រើប្រាស់យានយន្តអគ្គិសនី។ ការផ្ដល់ជំនួយសម្រាប់ការសាងសង់ស្ថានីយបញ្ចូលថាមពលនឹងជួយដោះស្រាយឧបសគ្គមួយដ៏ធំចំពោះការជំរុញកំណើននៃការប្រើប្រាស់រថយន្តអគ្គិសនី។

ច្បាប់ស្ដីពីហេដ្ឋារចនាសម្ព័ន្ធដែល ប្រធានាធិបតី បៃដិន បានចុះហត្ថលេខាកាលពីខែវិច្ឆិកា ២០២១ មានតម្លៃ ៧.៥ ពាន់លានដុល្លារ សម្រាប់ប្រព័ន្ធបញ្ចូលថាមពលយានយន្តអគ្គិសនី និងបណ្ដាមធ្យោបាយបញ្ចូលថាមពលជំនួសដទៃទៀត។ ៥ ពាន់លានដុល្លារក្នុងកញ្ចប់ថវិកា ៧.៥ ពាន់លានដុល្លារនោះ ត្រូវបានប្រគល់ឱ្យកម្មវិធីរូបមន្តហេដ្ឋារចនាសម្ព័ន្ធសម្រាប់យានយន្តអគ្គិសនីជាតិ (NEVI)។

យោងតាមកម្មវិធី NEVI រដ្ឋនានារបស់ សហរដ្ឋអាម៉េរិក អាចទទួលបានកញ្ចប់ជំនួយពីស្ថាប័នគ្រប់គ្រងផ្លូវល្បឿនលឿនរបស់រដ្ឋ (FHWA) រហូតដល់ ៨០% ធៀបនឹងតម្លៃរបស់គម្រោងដែលមានលក្ខខណ្ឌគ្រប់គ្រាន់៕

September 15, 2022

កម្ពុជា ស្នើឱ្យពិចារណាលើ «ការតភ្ជាប់ខ្សែបញ្ជូន និងបំពង់ឧស្ម័នក្នុងតំបន់អាស៊ាន»

ដើម្បីបង្កើនសកម្មភាពពាណិជ្ជកម្មលើវិស័យថាមពលអគ្គិសនី និងចូលរួមឱ្យបានយ៉ាងសកម្ម ដើម្បីសម្រេចគោលដៅថាមពលអាស៊ាន កម្ពុជា ស្នើដល់រដ្ឋមន្ត្រីថាមពលអាស៊ាន ពិចារណាលើការតភ្ជាប់ខ្សែបញ្ជូន និងបំពង់ឧស្ម័នរវាងប្រទេសនៅក្នុង សមាគមប្រជាជាតិអាស៊ីអាគ្នេយ៍ (អាស៊ាន-ASEAN)។

សំណើខាងលើនេះត្រូវបានធ្វើឡើងដោយ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន នាថ្ងៃនេះ នៅក្នុងពិធីបើកកិច្ចប្រជុំរដ្ឋមន្ត្រីថាមពលអាស៊ានលើកទី ៤០ និងកិច្ចប្រជុំពាក់ព័ន្ធ រួមនឹងវេទិកាធុរកិច្ចថាមពលអាស៊ានឆ្នាំ ២០២២ ក្រោមមូលបទ «បង្កើនល្បឿនអន្តរកាលថាមពល ៖ ការស្ដារសេដ្ឋកិច្ចឡើងវិញ និងកំណើនប្រកបដោយចីរភាព»។

នៅក្នុងកិច្ចប្រជុំតាមរយៈប្រព័ន្ធវីដេអូនេះដែរ សម្ដេចនាយករដ្ឋមន្ត្រីកម្ពុជា មានប្រសាសន៍ថា ក្នុងក្របខណ្ឌអាស៊ាន ក្នុងនាមជាប្រធាននៅក្នុងឆ្នាំ ២០២២ នេះ កម្ពុជា នឹងបន្តចូលរួមចំណែកបង្កើតគំនិតផ្តួចផ្តើមថ្មីៗ និងជំរុញការចូលរួមបន្ថែមលើគ្រប់សកម្មភាព និងគម្រោងអន្តរកាលថាមពលក្នុងតំបន់នេះ ប្រកបដោយប្រសិទ្ធភាពខ្ពស់បំផុត។

ក្នុងរយៈពេល ០២ ថ្ងៃនៃកិច្ចប្រជុំនេះ រដ្ឋមន្ត្រីថាមពលនៃបណ្ដាប្រទេសអាស៊ាន នឹងមានកិច្ចប្រជុំសំខាន់ៗជាច្រើនដែលទាក់ទងនឹងវឌ្ឍនភាពក្នុងកិច្ចខិតខំប្រឹងប្រែងអភិវឌ្ឍន៍វិស័យថាមពល ជាផ្លូវឆ្ពោះទៅរកការបង្កើនល្បឿនអន្តរកាលថាមពល និងការជំរុញសកម្មភាពស្ដារសេដ្ឋកិច្ចនៃបណ្ដាប្រទេសអាស៊ាន៕

September 15, 2022

«ទិដ្ឋាការមាស» របស់ ប្រទេសថៃ ទាក់ទាញជនជាតិអាម៉េរិក និង ជនជាតិចិន ច្រើនជាងគេ

អាជ្ញាធរថៃ ចាប់ផ្ដើមផ្ដល់ទិដ្ឋាការស្នាក់នៅរយៈពេលយូរ (LTR) ចាប់ពីខែនេះ ដើម្បីបង្កើនការទាក់ទាញពលរដ្ឋបរទេសដែលជាអ្នកមានមកវិនិយោគ ក្នុងបំណងជំរុញកំណើនសេដ្ឋកិច្ចរបស់ប្រទេសនេះ។

ប្រទេសថៃ ទទួលបានការចុះឈ្មោះស្នើសុំទិដ្ឋាការទៅតាមកម្មវិធីស្នាក់នៅក្នុងរយៈពេលយូរ (LTR) ពីប្រជាពលរដ្ឋបរទេសចំនួនប្រហែល ៤០០ នាក់ ក្នុងរយៈពេលតែ ១២ ថ្ងៃដំបូង បន្ទាប់ពីបានចាប់ផ្ដើមដំណើរការកម្មវិធី។ នេះបើយោងតាមលោក Narit Therdsteerasukdi អគ្គលេខាធិការរងនៃក្រុមប្រឹក្សាវិនិយោគថៃ។

លោក Narit បញ្ជាក់ថា ជនជាតិអាម៉េរិក មានចំនួន ២០% ក្នុងចំណោមពាក្យសុំទិដ្ឋាការ។ ចំណាត់ថ្នាក់លេខ ២ បានទៅលើ ជនជាតិចិន (១៥%) និងតាមពីក្រោយដោយ ជនជាតិអង់គ្លេស (១០%)។

ប្រទេសថៃ ចាប់ផ្ដើមផ្ដល់ទិដ្ឋាការស្នាក់នៅរយៈពេលយូរចាប់ពីខែនេះ ដើម្បីបង្កើនការទាក់ទាញជនជាតិបរទេសដែលជាអ្នកមាន មកវិនិយោគនៅ ប្រទេសថៃ ក្នុងបំណងលើកស្ទួយសេដ្ឋកិច្ចជាតិ។ កម្មវិធី LTR កំណត់គោលដៅទាក់ទាញអ្នកមានទ្រព្យច្រើន និងអ្នកមានជំនាញការងារខ្ពស់ពីបរទេសឱ្យបាន ១ លាននាក់ក្នុងរង្វង់ ៥ ឆ្នាំខាងមុខ ដែលនេះនឹងរួមចំណែក ១ ទ្រីលានបាត (២៧ ពាន់លានដុល្លារអាម៉េរិក) ដល់សេដ្ឋកិច្ចប្រទេសនេះ។

ក្រុមពលរដ្ឋបរទេសជាគោលដៅរបស់ LTR ត្រូវបានបែងចែកជា ៤ ប្រភេទ រួមមាន ពលរដ្ឋអ្នកមានទ្រព្យច្រើន, អ្នកចូលនិវត្តន៍មានទ្រព្យច្រើន, អ្នកឯកទេសបរទេសដែលធ្វើការនៅ ប្រទេសថៃ និងអ្នកឯកទេសបរទេសដែលមានជំនាញខ្ពស់។

លក្ខខណ្ឌពិសេសមួយចំនួនត្រូវបានអនុវត្តសម្រាប់បេក្ខភាពដែលស្នើសុំទិដ្ឋាការ LTR ក្នុងនោះមានដូចជា ពលរដ្ឋបរទេសដែលវិនិយោគយ៉ាងតិចកន្លះលានដុល្លារនៅ ប្រទេសថៃ ឬមានទ្រព្យចាប់ពី ១ លានដុល្លារអាម៉េរិក និង ពលរដ្ឋបរទេសដែលធ្វើការនៅប្រទេសថៃ ត្រូវមានបទពិសេសន៍យ៉ាងតិច ៥ ឆ្នាំ ក្នុងវិស័យដែលខ្លួនកំពុងធ្វើការ។ល។

កម្មវិធីខាងលើអនុញ្ញាតឱ្យអ្នកមានទិដ្ឋាការ LTR អាចសុំពន្យារពេលលើការស្នាក់នៅរហូតដល់ ១០ ឆ្នាំ រួមនឹងសិទ្ធិពិសេសជាច្រើនផ្សេងទៀត។

ក្នុងចំណោមមនុស្សប្រហែល ៤០០ នាក់ដំបូងដែលបានចុះឈ្មោះសុំទិដ្ឋាការ LTR មាន ៤០% ជាអ្នកចូលនិវត្តន៍ដែលមានទ្រព្យច្រើន, ៣០% ជាអ្នកឯកទេសធ្វើការនៅ ប្រទេសថៃ។ ក្រៅពីនេះគឺជាពលរដ្ឋអ្នកមាន និងអ្នកឯកទេសមានជំនាញខ្ពស់៕

September 15, 2022

វិស័យហិរញ្ញវត្ថុរបស់ រុស្ស៊ី ខាតបង់អស់រាប់រយពាន់លានដុល្លារអាម៉េរិក ដោយសារទណ្ឌកម្មរបស់បស្ចិមលោក

ឯកសារផ្ទៃក្នុងរបស់ ក្រសួងហិរញ្ញវត្ថុរុស្ស៊ី បានឱ្យដឹងថា វិស័យនេះបាន «ខាតបង់ផ្ទាល់» អស់រាបរយពាន់លានដុល្លារអាម៉េរិក ព្រោះតែទណ្ឌកម្មដែលដាក់ចេញដោយបណ្ដាប្រទេសនៅលោកខាងលិច។

ការប៉ាន់ប្រមាណនេះរួមបញ្ចូលទាំងការខាតបង់នៅក្នុងទីផ្សារមូលបត្រ ដែលទុនរបស់បណ្ដាធនាគារ ក៏ដូចជាប្រាក់ ៣០០ ពាន់លានដុល្លារនៃទុនបម្រុងរូបិយប័ណ្ណបរទេស ត្រូវបានបង្កកនៅខាងក្រៅស្រុក។ តួលេខនេះត្រូវបានលើកឡើងនៅក្នុងបទបង្ហាញនៅឯកិច្ចប្រជុំកំពូលរបស់មេដឹកនាំរុស្ស៊ី កាលពីខែកន្លង។ នេះបើតាមប្រភពព័ត៌មានរបស់ Bloomberg។

បទបង្ហាញនេះបានបរិយាយអំពីការខូចខាតចំពោះហេដ្ឋារចនាសម្ព័ន្ធហិរញ្ញវត្ថុ។ នោះគឺ ៨០% នៃទ្រព្យសម្បត្តិក្នុងវិស័យធនាគារ ស្ថិតក្នុងក្របខណ្ឌនៃទណ្ឌកម្ម។ រុស្ស៊ី ក៏ត្រូវបានលុបចេញពីប្រព័ន្ធទូទាត់សកល SWIFT និងមិនបានប្រើប្រាស់កម្មវិធីកុំព្យូទ័រ និងឧបករណ៍បច្ចេកវិទ្យាចាំបាច់នានា។ បណ្ដាឧករណ៍ដូចជា និស្សន្ទ (Derivative), មូលនិធិការពារហានិភ័យ, បូលបត្របំណុលដែលបោះលក់ជារូបិយបណ្ណបរទេស និង IPO ជាដើម ហាក់បានបាត់ខ្លួនទាំងស្រុង។

ទោះជាយ៉ាងណាក៏ដោយ របាយការណ៍ខាងលើនេះ មិនបានបញ្ចេញតួលេខសរុបស្ដីពីការខាតបង់ដោយសារទណ្ឌកម្មរបស់លោកខាងលិច ក៏ដូចជាមិនបានលើកឡើងអំពីផលប៉ះពាល់រួមទៅលើសេដ្ឋកិច្ចរបស់ រុស្ស៊ី។

ក៏ប៉ុន្តែ ក្នុងកម្មវិធីទូរទស្សន៍មួយកាលពីដើមសប្ដាហ៍នេះ ប្រធានាធិបតីរុស្ស៊ី លោក ពូទីន បានថ្លែងថា «រុស្ស៊ី មានភាពជឿជាក់ក្នុងការទប់ទល់បានជាមួយនឹងសម្ពាធពីខាងក្រៅ» ហើយថា សេដ្ឋកិច្ច «កំពុងតែមានស្ថិរភាព ឆ្ពោះទៅកាន់គន្លងនៃការរីកចម្រើន»៕

September 15, 2022

កម្ពុជា សម្ពោធបើកដំណើរការស្ថានីយបញ្ចូលថាមពលយានយន្តអគ្គិសនី នៅ ខេត្តសៀមរាប

ពិធីសម្ពោធបើកឱ្យដំណើរការជាផ្លូវការ ស្ថានីយបញ្ចូលថាមពលយានយន្តអគ្គិសនីថ្មី ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប ត្រូវបានរៀបចំឡើងនាថ្ងៃទី ១៤ ខែកញ្ញា ឆ្នាំ ២០២២ ក្រោមអធិបតីភាព ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

ស្ថានីយបញ្ចូលថាមពលសម្រាប់យានយន្តអគ្គិសនីថ្មីនេះ ត្រូវបានឧបត្ថម្ភដោយ កម្មវិធីអភិវឌ្ឍន៍អង្គការសហប្រជាជាតិ (UNDP) ដែលធ្វើឡើងក្នុងបំណងបញ្ជ្រាបការយល់ដឹងអំពីយានយន្តអគ្គិសនី ដើម្បីជំរុញការប្រើប្រាស់យានយន្តប្រភេទថ្មីនេះ។

ការដាក់ដំណើរការស្ថានីយថ្មីខាងលើនេះ ក៏ជាផ្នែកមួយដើម្បីជាការបើកផ្លូវសម្រាប់ក្រុមហ៊ុនឯកជន ចូលរួមវិនិយោគក្នុងវិស័យថ្មីនេះ ក្នុងគោលដៅកាត់បន្ថយការបំភាយឧស្ម័នផ្ទះកញ្ចក់ដែលជាសារធាតុបំពុលបរិស្ថាន និងនាំឱ្យផែនដីឡើងកម្ដៅ។

ទាក់ទងនឹងការដាក់ពង្រាយស្ថានីយបញ្ចូលថាមពលសម្រាប់យានយន្តអគ្គិសនី រដ្ឋមន្ត្រីក្រសួងសាធារណការ បានមានប្រសាសន៍ថា ក្រសួងបាន និងកំពុងពិភាក្សាជាមួយបណ្ដាក្រុមហ៊ុនឯកជនដែលជាម្ចាស់ស្ថានីយប្រេងឥន្ធនៈ ដើម្បីស្នើឱ្យដាក់ស្ថានីយបញ្ចូលថាមពលសម្រាប់យានយន្តអគ្គិសនីនេះ។ បច្ចុប្បន្ន មានក្រុមហ៊ុនមួយចំនួនបានចាប់ផ្ដើមដាក់ពង្រាយ ហើយមួយចំនួនទៀតកំពុងតែរៀបចំដំឡើង។

ឯកឧត្តមទេសរដ្ឋមន្ត្រី ស៊ុន ចាន់ថុល បានឱ្យដឹងថា គិតចាប់ពីខែមករា ដល់ខែកក្កដា ២០២២ កម្ពុជា មានយានយន្តអគ្គិសនីប្រមាណ ៣០៥ គ្រឿង ហើយបច្ចុប្បន្នបានឡើងដល់ជិត ១,០០០ គ្រឿង ដែលតួលេខនេះច្រើនជាងឆ្ងាយបើធៀបនឹង ១៦ គ្រឿងកាលពីឆ្នាំ ២០២១។

ទាក់ទងនឹងការលើកទឹកចិត្តដើម្បីឱ្យប្រជាពលរដ្ឋងាកមកប្រើប្រាស់យានយន្តអគ្គិសនី ឯកឧត្តមទេសរដ្ឋមន្ត្រី ស៊ុន ចាន់ថុល បានបញ្ជាក់ថា កម្ពុជា បានបញ្ចុះអត្រាពន្ធ ៦៣% សម្រាប់ការទិញមធ្យោបាយធ្វើដំណើរប្រភេទថ្មីនេះ។

យោងតាម រដ្ឋមន្ត្រីក្រសួងសាធារណការ និងដឹកជញ្ជូន សម្រាប់យានយន្តដែលបញ្ចូលថាមពលអគ្គិសនីនៅតាមស្ថានីយនានា នឹងត្រូវបង់ប្រាក់តែ ១៥០០ រៀលប៉ុណ្ណោះ នៅក្នុង ១ គីឡូវ៉ាត់។

នៅក្នុងពិធីសម្ពោធនេះដែរ ឯកឧត្តមទេសរដ្ឋមន្ត្រី ស៊ុន ចាន់ថុល ក៏បានឱ្យដឹងថា កម្ពុជា បាន និងកំពុងសិក្សាអំពីគម្រោងសាងសង់ផ្លូវរថភ្លើងក្រោមដីនៅ ភ្នំពេញ, ផ្លូវល្បឿនលឿនទី ២ ភំពេញ-បាវិត ខេត្តស្វាយរៀងរួមនឹងគម្រោងស្ថាបនាហេដ្ឋារចនាសម្ព័ន្ធជាច្រើនផ្សេងទៀត។

ក្រៅពីនេះ លោកទេសរដ្ឋមន្ត្រី ក៏បានស្នើឱ្យក្រុមហ៊ុនដឹកជញ្ជូនទំនិញ គោរពច្បាប់ចរាចរណ៍ កុំដឹកទំនិញលើសចំណុះ ដើម្បីចូលរួមថែរក្សាផ្លូវឱ្យនៅគង់វង្សបានយូរអង្វែង៕

September 14, 2022

កម្ពុជា ឈរលំដាប់ទី ៤០ ក្នុងតារាងចំណាត់ថ្នាក់ទីផ្សារដឹកជញ្ជូនទាំង ៥០ ដែលទើបលេចធ្លោជាងគេក្នុងពិភពលោក

យោងតាមតារាងចំណាត់ថ្នាក់របស់ Agility កម្ពុជា ជាប់ចំណាត់ថ្នាក់ទី ៤០ ក្នុងចំណោមទីផ្សារដឹកជញ្ជូនដែលទើបតែលេចធ្លោជាងគេក្នុងពិភពលោក និងទី ៦ នៅក្នុងតំបន់អាស៊ីអាគ្នេយ៍។

Agility ដែលជាអ្នកផ្គត់ផ្គង់សេវាដឹកជញ្ជូន និងឃ្លាំងផ្ទុកទំនិញ ថ្មីៗនេះបានប្រកាសបញ្ជីចំណាត់ថ្នាក់ស្ដីពីទីផ្សារដឹកជញ្ជូនទាំង ៥០ ដែលទើបតែលេចធ្លោ និងទាក់ទាញជាងគេក្នុងពិភពលោក។ ទីផ្សារធំជាងគេទាំង ៣ នៅក្នុងតារាងចំណាត់ថ្នាក់នេះ គឺ ប្រទេសចិន ឥណ្ឌា និង អេមីរ៉ាតអារ៉ាប់រួម (UAE)។

កម្ពុជា ជាប់លេខ ៤០ នៅក្នុងតារាងចំណាត់ថ្នាក់នេះ ដោយលោតឡើងបាន ១ ថ្នាក់ ធៀបនឹងលេខ ៤១ កាលពីឆ្នាំ ២០២១។

បណ្ដាប្រទេសនៅក្នុងតំបន់អាស៊ីអាគ្នេយ៍ដែលមានឈ្មោះនៅក្នុង top 10 នៃតារាងនេះ រួមមាន ម៉ាឡេស៊ី (លេខ ៤), ឥណ្ឌូណេស៊ី (លេខ ៥) និង ប្រទេសថៃ (លេខ ៨) ខណៈ វៀតណាម ជាប់លេខ ១១។

នៅក្នុងតំបន់អាស៊ីអាគ្នេយ៍វិញ ក្នុងចំណោមប្រទេសដែលមានឈ្មោះនៅក្នុងតារាងចំណាត់ថ្នាក់នេះ កម្ពុជា ជាប់លេខ ៦ ដោយ ឈរពីក្រោយ ម៉ាឡេស៊ី ឥណ្ឌូណេស៊ី ប្រទេសថៃ វៀតណាម ហ្វ៊ីលីពីន ប៉ុន្តែ នៅពីលើ មីយ៉ានម៉ា។

September 14, 2022

ទីផ្សារដឹកជញ្ជូនទំនិញតាមរថភ្លើងនឹងកើនដល់ ២០៥ ពាន់លានដុល្លារអាម៉េរិក

ទីផ្សារដឹកជញ្ជូនទំនិញតាមផ្លូវដែកទូទាំងពិភពលោកគ្រោងនឹងកើនឡើងដល់ ២០៥.៣ ពាន់លានដុល្លារអាម៉េរិក ដោយមានអត្រាកំណើនប្រចាំឆ្នាំជារួម (CAGR) ៤.៣% ក្នុងអំឡុងពីឆ្នាំ ២០២២-២០២៦។

របាយការណ៍របស់ Research And Markets បានព្យាករថា ទីផ្សារនេះនឹងសម្រេចបាន ១៦៩.៨ ពាន់លានដុល្លារក្នុងឆ្នាំ ២០២២។ Intermodals (ការដឹកជញ្ជូនពហុផ្នែក-ក្នុងនោះ ទំនិញត្រូវបានដឹកតាមមធ្យោបាយដឹកជញ្ជូនចាប់ពី ២ ប្រភេទឡើងទៅ) ត្រូវបានព្យាករថា នឹងមានកំណើនប្រចាំឆ្នាំ ៣.៧% និងសម្រេចបាន ៩៦ ពាន់លានដុល្លារនៅឆ្នាំ ២០២៦។

ចំណែកការដឹកទំនិញតាមរថយន្ត ត្រូវបានព្យាករថា នឹងមានកំណើន CAGR ៤.៥% ក្នុងរយៈពេល ៧ ឆ្នាំទៀត។ ផ្នែកនេះបច្ចុប្បន្នកាន់កាប់ ២៣% ក្នុងទីផ្សារដឹកជញ្ជូនតាមផ្លូវដែកទូទាំងពិភពលោក។

នៅក្នុងបណ្ដាតំបន់ដែលត្រូវបានស្រាវជ្រាវ ទីផ្សារអាម៉េរិក ត្រូវបានគណនាឃើញថានឹងសម្រេចបាន ៥៨ ពាន់លានដុល្លារក្នុងឆ្នាំ ២០២២ នេះ ខណៈដែល ប្រទេសចិន នឹងសម្រេចបាន ៣៥.៤ ពាន់លានដុល្លារនៅឆ្នាំ ២០២៦ ជាមួយនឹងកំណើន CAGR ៥.៥% ក្នុងដំណាក់កាលដែលបានវិភាគ។ បច្ចុប្បន្ន សហរដ្ឋអាម៉េរិក គ្រប់គ្រង ៣៤.៤% ក្នុងទីផ្សារដឹកជញ្ជូនតាមផ្លូវដែកទូទាំងពិភពលោក។

September 14, 2022

Tesla ដំឡើងប្រព័ន្ធបញ្ចូលថាមពលថ្ម V4 ដំបូង ដែលប្រើប្រាស់កម្ដៅព្រះអាទិត្យ

ស្ថានីយបញ្ចូលថាមពលអគ្គិសនី V4 ថ្មីនេះនឹងមានឧបករណ៍បញ្ចូលថាមពលចំនួន ៤០ ឈុត, ប្រព័ន្ធសូឡាមួយគ្រឿង និងប្រព័ន្ធថ្មផ្ទុកអគ្គិសនីខ្នាតយក្សមួយគ្រឿង។

Tesla ត្រូវបានគេជឿថា នឹងសាងសង់ស្ថានីយបញ្ចូលថាមពល Supercharger V4 ដំបូងរបស់ខ្លួននៅក្នុងស្រុក Yuma រដ្ឋ Arizona សហរដ្ឋអាម៉េរិក ស្ថិតនៅលើបណ្ដោយផ្លូវជាតិលេខ ។

យោងតាម Twitter @MarcoRPTesla ដែលហៅខ្លួនឯងថា Supercharger King ស្ថានីយថ្មីនេះនឹងមានឧបករណ៍សម្រាប់បញ្ចូលថាមពលចំនួន ៤០ ឈុត ដែលទាញយកអគ្គិសនីពីកម្ដៅព្រះអាទ្យិតាមរយៈផ្ទាំងសូឡា និងមានប្រព័ន្ធផ្ទុកថាមពលជាទម្រង់ Megapack ៣ MWh ដែលអាចបញ្ចូលថាមពលឱ្យរថយន្តអគ្គិសនីខ្នាតធំប្រហែល ៤០ គ្រឿង។

ល្បឿននៃការបញ្ចូលថាមពលក៏នឹងលឿនជាងមុន ដោយប្រើប្រាស់ប្រព័ន្ធបញ្ចូលថាមពលរហ័ស V4 ដែលឡើងដល់ ៣៥០ KW។ នេះបើតាមប្រកាសកាលពីឆ្នាំ ២០២១ របស់នាយកប្រតិបត្តិ Tesla លោក Elon Musk។

ប្រព័ន្ធបញ្ចូលថាមពល V2 បច្ចុប្បន្នរបស់ Tesla ផ្ដល់កម្លាំងអតិបរមា ១៥០ kW កើនបន្តិច ធៀបនឹង ១២០ kW របស់កំណែដំបូង។

មហាសេដ្ឋី Elon Musk បានប្រកាសជាច្រើនលើកហើយថា ការដែលស្ថានីយបញ្ចូលថាមពល អាចផលិត និងរក្សាទុកអគ្គិសនី គឺជាអាទិភាពកំពូលរបស់ Tesla ប៉ុន្តែ ការដាក់ពង្រាយស្ថានីយបែបនេះគឺនៅមានភាពយឺតយ៉ាវ។

Tesla ក៏នឹងដំឡើងប្រព័ន្ធបញ្ចូលថាមពលពិសេសសម្រាប់រថយន្តដឹកទំនិញ Semi អគ្គិសនីរបស់ខ្លួន។ ប្រព័ន្ធនេះនឹងមានខ្សែកាបដែលបញ្ចុះកម្ដៅដោយធាតុរាវ ដើម្បីអនុញ្ញាតឱ្យបញ្ចូលថាមពលបន្ថែមដល់ថ្មខ្នាតធំនៅលើរថយន្ត Tesla Semi ដោយប្រើពេលខ្លី៕

September 14, 2022

Category: សង្គម និងសេដ្ឋកិច្ច