សង្គម និងសេដ្ឋកិច្ច - La Reine Media

មហាសេដ្ឋីឥណ្ឌា ក្លាយជាអ្នកមានជាងគេលំដាប់ទីពីរក្នុងពិភពលោក

មហាសេដ្ឋី Gautam Adani បាន «យកឈ្នះ» លើលោក Bernard Arnault (ជនជាតិបារាំង) ក្លាយជាមហាសេដ្ឋីដែលមានទ្រព្យច្រើនជាងគេលំដាប់ទីពីរក្នុងពិភពលោក។

យោងតាមស្ថិតិរបស់ Forbes លោក Adani មានទ្រព្យសុទ្ធដែលមានតម្លៃ ១៥៤.៩ ពាន់លានដុល្លារអាម៉េរិក ច្រើនជាងលោក Arnault ដែលមាន ១៥៣.៤ ពាន់លានដុល្លារ។ មហាសេដ្ឋីឥណ្ឌារូបនេះរកស៊ីក្នុងវិស័យជាច្រើន តាំងពីហេដ្ឋារចនាសម្ព័ន្ធ ស៊ីម៉ង់ រហូតដល់ព្រលានយន្តហោះ។

ចំណាត់ថ្នាក់លេខ ២ របស់លោក Adani ក៏ជួយឱ្យលោកក្លាយជាជនជាតិអាស៊ីដំបូងគេដែលមានវត្តមាននៅក្នុង top 3 ស្ដីពីមហាសេដ្ឋីមានទ្រព្យច្រើនជាងគេលើលោក។ ក្នុងរយៈពេល ២ ឆ្នាំមកនេះ ទ្រព្យរបស់លោក Adani បានកើនឡើង ១៣ លើក។

ឆ្នាំ ១៩៨៨ លោក Adani បានបើកក្រុមហ៊ុន Adani Exports ដើម្បីដោះដូរទំនិញ។ ក្រោយមក លោកក៏បានបង្កើតកំពង់ផែ Mundra សម្រាប់បម្រើដល់ការនាំចេញ-នាំចុល។ ក្នុងរយៈពេល ១០ ឆ្នាំ ក្រុមហ៊ុននេះបានក្លាយជាក្រុមហ៊ុនធំជាងគេនៅក្នុងស្រុកដែលរកស៊ីក្នុងវិស័យធ្យូងថ្ម និងជាស្ថាប័នដែលមានប្រភពចំណូលពីបរទេសធំជាងគេរបស់ ឥណ្ឌា។

ស្ថិតិរបស់ Forbes បង្ហាញថា ក្នុងពេលថ្មីៗនេះ លោក Adani បានយកឈ្នះលើមហាសេដ្ឋី Jeff Bezos ម្ចាស់ក្រុមហ៊ុន Amazon និងកាន់កាប់តំណែងលេខ ២។ ក្រោយមក មហាសេដ្ឋីបារាំង លោក Bernard Arnault ក៏ដណ្ដើមបានតំណែងនេះ ប៉ុន្តែ លោក Adani យកមកវិញបានដោយប្រើពេលយ៉ាងខ្លី។ បច្ចុប្បន្ន មហាសេដ្ឋីឥណ្ឌា លោក Adani មានទ្រព្យច្រើនជាងគេលំដាប់ទីពីរក្នុងពិភពលោក ដោយឈរពីក្រោយមហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk៕

September 17, 2022

ពិព័រណ៍អាស៊ាន-ចិនលើកទី ១៩ មានក្រុមហ៊ុនចូលរួមរហូតដល់ជាង ៣,៦០០ ស្ថាប័ន

ពិព័រណ៍អាស៊ាន-ចិន (CAEXPO) និងកិច្ចប្រជុំកំពូលស្ដីពីពាណិជ្ជកម្ម-វិនិយោគអាស៊ាន-ចិន (CABIS) លើកទី ១៩ ប្រារព្ធឡើងពីថ្ងៃទី ១៦ ដល់ ១៩ កញ្ញា នៅទីក្រុង Nanning ក្នុងតំបន់ស្វយ័តជនជាតិ Zhuang នៃខេត្ត Guangxi ប្រទេសចិន។

យោងតាមព័ត៌មានពីគណៈកម្មការរៀបចំកម្មវិធី ព្រឹត្តិការណ៍ពិព័រណ៍នេះមានការចូលរួមពីក្រុមហ៊ុនជាង ៣,៦០០ ស្ថាប័ន មកពីបណ្ដាប្រទេសក្នុងតំបន់អាស៊ាន និង ប្រទេសចិន។ ក្នុងនោះ មាន ១,៦៥៣ ក្រុមហ៊ុន ចូលរួមដោយផ្ទាល់ និងជាង ២,០០០ ក្រុមហ៊ុន ចូលរួមពីចម្ងាយ តាមរយៈការផ្សាយផ្ទាល់លើបណ្ដាញអ៊ីនធើណិត។

តំណាងរបស់ ក្រសួងពាណិជ្ជកម្មចិន បានឱ្យដឹងថា ឆ្នាំនេះគឺជាឆ្នាំចាប់ផ្ដើមដំបូងសម្រាប់ទំនាក់ទំនងជាដៃគូយុទ្ធសាស្ត្រគ្រប់ជ្រុងជ្រោយរវាង ប្រទេសចិន និង អាស៊ាន និងជាឆ្នាំដំបូងដែលចាប់ផ្ដើមអនុវត្តកិច្ចព្រមព្រៀងដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ដើម្បីត្រៀមសម្រាប់ការស្ថាបនាកំណែ ៣.០ នៃតំបន់ពាណិជ្ជកម្មសេរីអាស៊ាន-ចិន។

ពិព័រណ៍លើកនេះនឹងធ្វើឡើងក្រោមប្រធានបទ «ចែករំលែកឱកាសថ្មីពី RCEP, ជំរុញកំណែ ៣.០ នៃតំបន់ពាណិជ្ជកម្មសេរីអាស៊ាន-ចិន», កែលំអការសន្ទនាថ្នាក់ខ្ពស់, លើកកម្ពស់កិច្ចសហប្រតិបត្តិការក្នុងវិស័យនីមួយៗ, ជំរុញកិច្ចសហប្រតិបត្តិការពហុវិស័យ ដើម្បីរួមចំណែកក្នុងការកសាងទំនាក់ទំនងជិតស្និទ្ធថែមទៀតរវាង ប្រទេសចិន និងបណ្ដាប្រទេសក្នុងតំបន់អាស៊ាន។

ក្នុងពិព័រណ៍នេះដែរ ក៏មានការរៀបចំតាំងបង្ហាញផលិតផលពិសេស និងលេចធ្លោរបស់បណ្ដាប្រទេសក្នុង សមាគមប្រជាជាតិអាស៊ីអាគ្នេយ៍ និង RCEP។

ក្រៅពីទីតាំងពិព័រណ៍ថ្មីដូចជា រថយន្តអគ្គិសនី ទេសចរណ៍វប្បធម៌ និងពាណិជ្ជកម្មលើអ៊ីនធើណិតជាដើម ព្រឹត្តិការណ៍ពិព័រណ៍លើកនេះក៏មានការរៀបចំវេទិកាលំដាប់ខ្ពស់ចំនួន ២១ កន្លែង ដែលពិភាក្សាអំពីកិច្ចសហប្រតិបត្តិការក្នុងវិស័យសារព័ត៌មាន ការប្រើប្រាស់ថាមពលអាតូមិកក្នុងគោលដៅសន្តិភាព។ល។

September 17, 2022

ក្រសួងសាធារណការ ប្រកាសកាលបរិច្ឆេទសម្រាប់ប្រជាពលរដ្ឋជិះរថភ្លើងទៅស្រុកកំណើតដោយឥតគិតថ្លៃ

ក្រសួងសាធារណការ និងដឹកជញ្ជូន នារសៀលថ្ងៃនេះ បានផ្សព្វផ្សាយអំពីកាលបរិច្ឆេទសម្រាប់ប្រជាពលរដ្ឋអាចជិះរថភ្លើងទៅកាន់ស្រុកកំណើត ដោយឥតគិតថ្លៃ ក្នុងឱកាសបុណ្យភ្ជុំបិណ្ឌ។

ការដឹកជញ្ជូនដោយមិនគិតថ្លៃនេះកើតឡើងពីកិច្ចសហការរវាង ក្រសួងសាធារណការ និងដឹកជញ្ជូន ជាមួយនឹងក្រុមហ៊ុនរ៉ូយ៉ាល់រេលវេ (Royal Railway)។

ប្រជាពលរដ្ឋអាចជិះរថភ្លើងរបស់ ក្រុមហ៊ុនរ៉ូយ៉ាល់រេលវេ ទៅកាន់ស្រុកកំណើត ដោយឥតគិតថ្លៃ ក្នុងឱកាសបុណ្យភ្ជុំបិណ្ឌ ចាប់ពីថ្ងៃទី ២៣ ដល់ថ្ងៃទី ២៦ ខែកញ្ញា ឆ្នាំ ២០២២។

September 16, 2022

អាកាសចរណ៍ឡាវ និង វៀតណាម ពន្លឿនកិច្ចសហប្រតិបត្តិការនាពេលខាងមុខ

កាលពីចុងខែសីហាកន្លងទៅ ប្រធានក្រុមហ៊ុនរដ្ឋ Lao Airlines បានជួបពិភាក្សាជាមួយនឹងភ្នាក់ងារលក់សំបុត្រយន្តហោះ និងដៃគូពាណិជ្ជកម្មនៅឯសាខារបស់ Lao Airlines នៅ ទីក្រុងហូជីមិញ ប្រទេសវៀតណាម ដើម្បីវាយតម្លៃអំពីលទ្ធភាពនៃការបង្កើនជើងហោះហើរនាពេលខាងមុខ។

នៅក្នុងដំណើរទស្សនកិច្ចខាងលើ លោក Khamla Phommavanh ប្រធានក្រុមហ៊ុនអាកាសចរណ៍រដ្ឋ Lao Airlines បានសម្ដែងការអបអរចំពោះការបើកដំណើរការជើងហោះហើរ ឡាវ-វៀតណាម ឡើងវិញ។

ប្រធានក្រុមហ៊ុនរដ្ឋ Lao Airlines ក៏បានជួបពិភាក្សាអំពីបច្ចេកទេស និងការថែទាំយន្តហោះ ជាមួយនឹងតំណាងក្រុមហ៊ុន Aerotechnic Indochina Pre Ltd. ដែលជាអ្នកឯកទេសខាងជួសជុល និងថែទាំយន្តហោះ។

លោក Khamla Phommavanh ក៏បានជួបពិភាក្សាជាមួយលោក Dinh Viet Phuong នាយកប្រតិបត្តិរបស់ក្រុមហ៊ុនអាកាសចរណ៍ Vietjet ទាក់ទងនឹងកិច្ចសហការដើម្បីពង្រីកបណ្ដាញរបស់ក្រុមហ៊ុនទាំងពីរនៅក្នុងតំបន់។

September 16, 2022

រថយន្តអគ្គិសនីជិតឈានចូលដល់យុគសម័យបញ្ចូលថាមពលដោយមិនប្រើខ្សែ

ការបញ្ចូលថាមពលអគ្គិសនីដោយមិនប្រើខ្សែត្រូវបានប្រើប្រាស់នៅលើទូរស័ព្ទឆ្លាតវៃ ហើយនៅលើរថយន្តអគ្គិសនី ការបញ្ចូលថាមពលដោយមិនប្រើខ្សែក៏ដំណើរការដូចគ្នានេះដែរ គ្រាន់តែខុសត្រង់ថា មានថាមពលខ្ពស់ជាង និងប្រើប្រាស់ថ្មធំជាងប៉ុណ្ណោះ។ ក្រោយពីមានកំណែ demo និងព័ត៌មានពីបណ្ដាក្រុមហ៊ុនផលិតរថយន្ត គេអាចដឹងបានថា បច្ចេកវិទ្យានេះហាក់មិនមែនជាអ្វីមួយដែលចម្លែកទៀតឡើយ។

ក្រុមវិស្វករនៅក្នុងក្រុមហ៊ុននានា កំពុងតែញាប់ដៃញាប់ជើងក្នុងការអភិវឌ្ឍបច្ចេកវិទ្យាខាងលើ។ បច្ចុប្បន្ន បណ្ដារថយន្តអគ្គិសនីដំបូងដែលបំពាក់បច្ចេកវិទ្យាបញ្ចូលថាមពលដោយមិនប្រើខ្សែកំពុងតែចាប់ផ្ដើមបង្ហាញខ្លួននៅក្នុងប្រទេសមួយចំនួន។ ដោយសារតែភាពងាយស្រួលរបស់ឧបករណ៍បញ្ចូលថាមពលគ្មានខ្សែ អ្នកជំនាញរំពឹងថា បច្ចេកវិទ្យានេះពិតជាមានសក្ដានុពល។

មើលទៅលើអតីតកាល មុខងារបញ្ចូលថាមពលគ្មានខ្សែនៅលើរថយន្ត បានលេចឡើងកាលពីឆ្នាំ ២០១៥។ កាលណោះ ក្រុមហ៊ុន QualComm អភិវឌ្ឍឧបករណ៍មួយដែលហៅថា Halo ដែល Qualcomm ធ្លាប់បានធ្វើបទបង្ហាញនៅក្នុងការប្រកួតបញ្ចូលថាមពលឱ្យថ្មរបស់រថយន្ត plug-in hybrid BMW i8។ ប៉ុន្តែ Qualcomm មិនមែនជាក្រុមហ៊ុនតែមួយដែលអភិវឌ្ឍបច្ចេកវិទ្យាខាងលើនេះទេ។ នៅ Massachusetts កម្មវិធីមួយរបស់សាកលវិទ្យាល័យ MIT ដែលមានឈ្មោះថា WiTricity ក៏បានចាប់ផ្ដើមសាកល្បងមុខបញ្ចូលថាមពលគ្មានខ្សែនៅលើរថយន្តកាលពីឆ្នាំ ២០១០ បន្ទាប់ពីបានទទួលខ្ទង់ប្រាក់វិនិយោគរបស់ Toyota។

ដោយសារតែស្ថិតក្នុងដំណាក់កាលដំបូង បច្ចេកវិទ្យាបញ្ចូលថាមពលខ្មានខ្សែនេះមិនទាន់មានស្ដង់ដាច្បាស់លាស់ ដូច្នេះក្រុមវិស្វករកំពុងតែធ្វើការដើម្បីដោះស្រាយបញ្ហានេះ។ Alex Gruzen នាយកប្រតិបត្តិរបស់ WiTRicity និយាយថា «យើងរួមជាមួយនឹងក្រុមការងារនៅ សមាគមវិស្វកររថយន្តអាម៉េរិក កំពុងតែធ្វើការដើម្បីបង្កើតប្រព័ន្ធស្ដង់ដាសម្រាប់បច្ចេកវិទ្យាបញ្ចូលថាមពលគ្មានខ្សែសម្រាប់រថយន្តអគ្គិសនី»។

បច្ចុប្បន្ន នៅ កូរ៉េខាងត្បូង រថយន្តអគ្គិសនី Genesis GV60 ត្រូវបានបំពាក់ឧករណ៍បញ្ចូលថាមពលគ្មានខ្សែរួចហើយ។ ប៉ុន្តែ គួរឱ្យស្ដាយ បច្ចេកវិទ្យានេះមាននៅលើតែ GV60 កំណែក្នុងស្រុក (កូរ៉េខាងត្បូង) ប៉ុណ្ណោះ។

ប្រទេសចិន វិញ ក្រុមហ៊ុនផលិតរថយន្តចំនួន ៣ បានចាប់ផ្ដើមផ្គត់ផ្គង់បច្ចេកវិទ្យាបញ្ចូលថាមពលគ្មានខ្សែនៅ ប្រទេសនេះ ខណៈដែលក្រុមហ៊ុនដទៃទៀតនឹងចូលរួមប្រកួតប្រជែងចាប់ពីឆ្នាំក្រោយ៕

September 16, 2022

APEC ២០២២ ៖ ថៃ ប្រកាសអំពីគោលដៅក្លាយជាមជ្ឈមណ្ឌលដឹកជញ្ជូននៅ អាស៊ីអាគ្នេយ៍

ប្រទេសថៃ កំពុងតែឆ្ពោះទៅរកគោលដៅក្លាយជាមជ្ឈមណ្ឌលតភ្ជាប់តំបន់អាស៊ីអាគ្នេយ៍ទាំងមូល ស្ដីពីការដឹកជញ្ជូនផ្លូវគោក ផ្លូវអាកាស និងផ្លូវសមុទ្រ។

រដ្ឋមន្ត្រីក្រសួងដឹកជញ្ជូនថៃ Saksayam Chidchob បានថ្លែងដូចខាងលើនាថ្ងៃនេះនៅក្នុងពិធីបើកកិច្ចប្រជុំក្រុមបេសកកម្ម APEC ក្នុងវិស័យដឹកជញ្ជូន ដែលធ្វើឡើងនៅ រាជធានីបាងកក ប្រទេសថៃ ចាប់ពីថ្ងៃទី ១៥-១៦ កញ្ញា។

ដើម្បីឆ្ពោះទៅរកគោលដៅនេះ រដ្ឋមន្ត្រីក្រសួងដឹកជញ្ជូនថៃ បានឱ្យដឹងថា ប្រទេសនេះកំពុងតែដំណើរការគម្រោងជាច្រើន រួមមាន ច្រករបៀងសេដ្ឋកិច្ចខាងកើត (EEC), គម្រោងផ្លូវដែកល្បឿនលឿនតភ្ជាប់ព្រលានយន្តហោះ ៣ Don Mueang – Suvarnabhumi – Utapao, គម្រោងស្ដារ និងកែលំអព្រលានយន្តហោះ Utapao ជាដើម។ ប្រទេសថៃ ក៏កំពុងតែអនុវត្តគម្រោងផ្លូវដែកល្បឿនលឿនដែលតភ្ជាប់ផ្លូវដែកល្បឿនលឿងឡាវ-ចិន ផងដែរ។

ទន្ទឹមនឹងនេះ រដ្ឋាភិបាលថៃ ក៏មានផែនការស្ថាបនាស្ពានគោកដែលតភ្ជាប់សមុទ្រ Andaman និងឈូងសមុទ្រថៃ បង្កើតបានជាមជ្ឈមណ្ឌលដែលតភ្ជាប់មហាសមុទ្រឥណ្ឌា ជាមួយនឹងមហាសមុទ្រប៉ាស៊ីហ្វិក។ បច្ចុប្បន្ន អាជ្ញាធរកំពុងសិក្សាទីតាំងនៅក្នុងខេត្តចំនួន ២ គឺ Ranong និង Chumphon ហើយគ្រោងនឹងចាប់ផ្ដើមការសាងសង់នៅឆ្នាំ ២០៣០។

រដ្ឋមន្ត្រីក្រសួងដឹកជញ្ជូនថៃ Saksayam Chidchob

ក្រោមប្រធានបទ «ការដឹកជញ្ជូនប្រកបដោយនិរន្តរភាព ឆ្លាតវៃ និងចីរភាព» ក្រុមមន្ត្រីនៅក្នុងវិស័យដឹកជញ្ជូនមកពី ២១ ប្រទេសដែលជាសមាជិករបស់ APEC នឹងផ្ដោតការពិភាក្សាលើវិធានការដើម្បីបង្កភាពងាយស្រួលសម្រាប់ការដោះដូរទំនិញ និងស្ដារការតភ្ជាប់ជាសកលក្នុងវិស័យដឹកជញ្ជូន និងទេសចរណ៍។

ទន្ទឹមនឹងនេះ ក្រុមប្រទេសជាសមាជិកក៏នឹងចែករំលែកបទពិសោធន៍ទាក់ទងនឹងការអភិវឌ្ឍហេដ្ឋារចនាសម្ព័ន្ធសម្រាប់ការដឹកជញ្ជូន និងបណ្ដាញផ្គត់ផ្គង់នៅក្នុងដំណាក់កាលក្រោយកូវីដ-១៩ផងដែរ៕

September 16, 2022

ចិន បញ្ចេញប្រាក់ជាង ២៨ ពាន់លានដុល្លារ ដើម្បីជួយដល់សហគ្រាសក្នុងស្រុក

ធនាគារប្រជាជនចិន (PBOC) ទើបតែបានប្រកាសថា នឹងបែងចែកកញ្ចប់ថវិកាខ្នាតធំបន្ថែមទៀតដើម្បីជួយដល់សេដ្ឋកិច្ច និងវិនិយោគ។

កញ្ចប់ថវិកាតម្លៃ ២០០ ពាន់លានយុន ប្រហែល ២៨.៧ ពាន់លានដុល្លារអាម៉េរិក នឹងត្រូវបានបែងចែកទៅឱ្យបណ្ដាធនាគារពាណិជ្ជ និងសម្រាប់តែខ្ទង់ប្រាក់កម្ចីពីសហគ្រាស។

តាមរយៈប្រព័ន្ធធនាគារពាណិជ្ជ ស្ថាប័ន PBOC នឹងបញ្ចេញទុនសម្រាប់បណ្ដាសហគ្រាសជាមួយនឹងអត្រាការប្រាក់ខ្ពស់បំផុតត្រឹម ៣.២% ក្នុង ១ ឆ្នាំ។ កម្មវិធីនេះនឹងអូសបន្លាយពេល ១ ឆ្នាំ និងអាចពន្យារសុពលភាពថែម ២ លើក។

អ្វីដែលគួរឱ្យចាប់អារម្មណ៍នោះគឺថា រដ្ឋាភិបាលចិន នឹងផ្ដល់ជំនួយ ២.៥% នៃអត្រាការប្រាស់របស់ខ្ទង់ប្រាក់កម្ចី ដូច្នេះសហគ្រាសនានានឹងកាត់បន្ថយការចំណាយលើប្រាក់កម្ចីបានច្រើនគួរសម។

នេះគឺជាវិធានការជំនួយកំណើនសេដ្ឋកិច្ចថ្មីបំផុតដែលត្រូវបាន រដ្ឋាភិបាលចិន អនុវត្ត។ មុននោះ ទីក្រុងប៉េកាំង បានអនុវត្តវិធានការមួយចំនួនដើម្បីជួយឱ្យសេដ្ឋកិច្ចងើបឡើងវិញ ក្នុងមានដូចជា ការបង្កើនការវិនិយោគទៅលើហេដ្ឋារចនាសម្ព័ន្ធ ការលើកលែង ឬកាត់បន្ថយអត្រាពន្ធ និងជំរុញសកម្មភាពផ្ដល់ប្រាក់កម្ចី ពិសេសចំពោះសហគ្រាសធុនតូច និងធម្យម។

ក្រៅពីការជួយ «សម្រាលទុក្ខ» នៅក្នុងខ្ទង់ប្រាក់កម្ចី រដ្ឋាភិបាលចិន ក៏អនុញ្ញាតឱ្យបណ្ដារោងចក្រ សហគ្រាសធុនតូច ក្រុមហ៊ុនផ្ដល់សេវាកម្មនានា ពន្យារការបង់ពន្ធដែលមានតម្លៃ ៦៣ ពាន់លានដុល្លារអាម៉េរិក ក្នុងដំណាក់កាលពីខែកញ្ញា ដល់ខែធ្នូឆ្នាំនេះ៕

September 16, 2022

ទីក្រុងទាំង ១០ ដែលមានសេដ្ឋីច្រើនជាងគេបង្អស់ក្នុងពិភពលោក

យោងតាមរបាយការណ៍ថ្មីបំផុតរបស់ក្រុមហ៊ុនប្រឹក្សាផ្នែកវិនិយោគ Henley & Partners ទីក្រុង New York គឺជាទីដែលមានបុគ្គលដែលមានតម្លៃទ្រព្យសម្បត្តិសុទ្ធខ្ពស់ជាងគេនៅលើពិភពលោក។

របាយការណ៍ខាងលើបានបង្ហាញថា មានសេដ្ឋីប្រហែល ៣៤៥,០០០ នាក់ កំពុងស្ថិតនៅក្នុងតំបន់ Big Apple (រហ័សនាមរបស់ទីក្រុង New York) ក្នុងនោះមាន ១៥,៤៧០ នាក់ មានទ្រព្យសម្បត្តិលើសពី ១០ លានដុល្លារ, ៧៣៧ នាក់មានទ្រព្យចាប់ពី ១០០ លានដុល្លារ រួមនឹងមហាសេដ្ឋីចំនួន ៥៩ នាក់។ New York ក៏ត្រូវបានចាត់ទុកថាជាទីក្រុងមានបំផុតក្នុងពិភពលោក ដោយយោងទៅលើគោលការណ៍ជាច្រើន។

យោងតាមរបាយការណ៍ ប្រហែល ៤% ក្នុងចំណោមប្រជាជនសរុប ៨.៣៨ លាននាក់របស់ New York មានទ្រព្យដែលអាចវិនិយោគ (អចលនទ្រព្យ សាច់ប្រាក់សុទ្ធ ឬភាគហ៊ុន) ដែលមានតម្លៃលើសពី ១ លានដុល្លារ។

តម្លៃទ្រព្យឯកជនសរុបដែលពលរដ្ឋនៅ New York កាន់កាប់ បច្ចុប្បន្នបានកើនលើសពី ៣ ទ្រីលាន (៣,០០០,០០០,០០០,០០០) ដុល្លារអាម៉េរិក។ តួលេខនេះគឺច្រើនជាងតម្លៃទ្រព្យសរុបដែលកាន់កាប់ដោយឯកជននៅក្នុងប្រទេសនានាដែលជាសមាជិករបស់ G20 (ក្រុមប្រទេសដែលមានឧស្សាហកម្មរីកច្រើនជាងគេក្នុងពិភពលោក)។

រាជធានីតូក្យូ (ជប៉ុន) ឈរលំដាប់ទី ២ ដោយមានមនុស្ស ៣០៤,៩០០ នាក់ មានទ្រព្យសម្បត្តិសុទ្ធខ្ពស់ ក្នុងនោះមាន សេដ្ឋី ៧,៣៥០ នាក់ មានទ្រព្យលើសពី ១០ លានដុល្លារអាម៉េរិក, ២៦៣ នាក់មានទ្រព្យច្រើនជាង ១០០ លានដុលលារ និង ១២ នាក់គឺជាមហាសេដ្ឋី។

តំបន់ឈូងសមុទ្រ San Francisco រួមទាំងជ្រលង Silicon (សហរដ្ឋអាម៉េរិក) ឈរលំដាប់ទី ៣ ដោយមាន ២៧៦,៤០០ នាក់ មានទ្រព្យច្រើន ក្នុងនោះ ១២,៨៩០ នាក់ មានទ្រព្យលើសពី ១០ លានដុល្លារ, ៦២៣ នាក់ មានទ្រព្យច្រើនជាង ១០០ លានដុល្លារ និង ៦២ នាក់គឺជាមហាសេដ្ឋី។

ក្នុង Top 10 នៃទីក្រុងមានបំផុតក្នុងពិភពលោក ក្រៅពី New York និងតំបន់ San Francisco សហរដ្ឋអាម៉េរិក ក៏នៅមាន Los Angeles (លេខ ៦), Chicago (លេខ ៧) និង Houston (លេខ ៨) ផងដែរ។

តារាងនៃបណ្ដាទីក្រុងដែលមានជាងគេបង្អស់ក្នុងពិភពលោក និងចំនួនបុគ្គលដែលមានទ្រព្យសុទ្ធច្រើនជាងគេ ដែលត្រូវបានវាយតម្លៃដោយ Henley & Partner ៖

១-New York របស់ សហរដ្ឋអាម៉េរិក (មានអ្នកមាន ៣៤៥,៦០០ នាក់)

២-Tokyo របស់ ជប៉ុន (៣០៤,៩០០ នាក់)

៣-តំបន់ San Francisco របស់ សហរដ្ឋអាម៉េរិក (២៧៦,៤០០ នាក់)

៤-London របស់ អង់គ្លេស (២៧២,៤០០ នាក់)

៥-Singapore របស់ សិង្ហបុរី (២៤៩,៨០០ នាក់)

៦-Los Angeles របស់ សហរដ្ឋអាម៉េរិក (១៩២,៤០០ នាក់)

៧-Chicago របស់ សហរដ្ឋអាម៉េរិក (១៦០,១០០ នាក់)

៨-Houston របស់ សហរដ្ឋអាម៉េរិក (១៣២,៦០០ នាក់)

៩-Beijing របស់ ប្រទេសចិន (១៣១,៥០០ នាក់)

១០-Shanghai របស់ ចិន (១៣០,១០០ នាក់)

September 16, 2022

ក្រុមហ៊ុនថាមពលកកើតឡើងវិញ ១០០% ធំបំផុតក្នុងពិភពលោក លោតចូលទីផ្សារអាស៊ីអាគ្នេយ៍

Acciona Energía (អេស្ប៉ាញ) កាលពីថ្ងៃទី ១៤ កញ្ញា បានប្រកាសថា សម្រេចបានកិច្ចព្រមព្រៀងទិញភាគហ៊ុន ៥០% របស់ The Blue Circle (សិង្ហបុរី) ដើម្បីក្លាយជាដៃគូសហការយុទ្ធសាស្ត្រក្នុងការអភិវឌ្ឍ ស្ថាបនា និងដំណើរការប្រព័ន្ធនៃបណ្ដាគម្រោងថាមពលកកើតឡើងវិញនៅក្នុងតំបន់អាស៊ីអាគ្នេយ៍។

យោងតាមកិច្ចព្រមព្រៀងខាងលើ ការទិញដូរដំបូងគឺ ៣៤ ពាន់ដុល្លារអាម៉េរិក ត្រូវបាន Acciona Energía ចំណាយសម្រាប់ទិញភាគហ៊ុន ៥០% របស់ The Blue Circle រួមជាមួយនឹងកិច្ចសន្យាផ្ដល់ទុនវិនិយោគឡើងដល់ ១១៣.៥ លានដុល្លារ សម្រាប់បណ្ដាគម្រោងដែលត្រៀមរួចរាល់ក្នុងការស្ថាបនា។

ក្រោយពីការទិញដូរបានរួចរាល់ជាស្ថាពរ Acciona Energía នឹងក្លាយជាភាគហ៊ុនិកធំបំផុតរបស់ The Blue Circle។ នេះគឺជាលើកដំបូងបង្អស់ដែល Acciona Energía អភិវឌ្ឍ ស្ថាបនា និងដំណើរការគម្រោងនានានៅ អាស៊ីអាគ្នេយ៍។

លោក Olivier Duguet ប្រធាន និងជានាយកប្រតិបត្តិរបស់ The Blue Circle បានឱ្យដឹងថា ក្រុមហ៊ុននេះបានអភិវឌ្ឍគម្រោងអគ្គិសនីកម្លាំងខ្យល់មួយចំនួននៅ អាស៊ីអាគ្នេយ៍ ចាប់ពីឆ្នាំ ២០១៣ ហើយគិតមកដល់ពេលនេះ ក្រុមហ៊ុននេះបាននាំមុខគេនៅក្នុងប្រទេសមួយចំនួននៅតំបន់នេះ ដោយមានមូលនិធិកាន់កាប់ដីធ្លីប្រមាណ ៩៤,៤៧៥ ហិកតា។

«កិច្ចសហការយុទ្ធសាស្ត្រជាមួយនឹង Acciona Energía នៅក្នុងអំឡុងថាមពលកកើតឡើងវិញកំពុងរីកចម្រើនក្នុងតំបន់ នឹងជួយឱ្យ The Blue Circle សម្រេចបានកំណើនលេចធ្លោក្នុងពេលខាងមុខ» លោក Duguet ឱ្យដឹងដូច្នេះ។

លោក Rafael Mateo នាយកប្រតិបត្តិរបស់ក្រុមហ៊ុន Acciona Energía បញ្ជាក់ថា «ក្រោយការវិនិយោគនៅ អូស្ត្រាលី យើងពិតជាចង់សហការជាមួយ The Blue Circle នៅក្នុងទីផ្សារថាមពលកកើតឡើងវិញរបស់ អាស៊ីអាគ្នេយ៍។ ហើយការសហការនេះ បើកផ្លូវឱ្យមានឱកាសរីកចម្រើនថ្មីសម្រាប់យើង»៕

September 16, 2022

មហាសេដ្ឋីមួយរូប ជូនក្រុមហ៊ុនទាំងមូលទៅឱ្យមូលនិធិមនុស្សធម៌ ដើម្បីសង្គ្រោះផែនដី

(សហរដ្ឋអាម៉េរិក)-មហាសេដ្ឋីមួយរូបដែលជាស្ថាបនិករបស់ Patagonia ប្រកាសជូនក្រុមហ៊ុននេះទៅឱ្យមូលនិធិមនុស្សធម៌មួយ ហើយប្រាក់ចំណូលទាំងអស់របស់ក្រុមហ៊ុននេះនឹងទុកសម្រាប់ប្រយុទ្ធប្រឆាំងនឹងបញ្ហាបម្រែបម្រួលអាកាសធាតុ។

Yvon Chouinard មហាសេដ្ឋីអាម៉េរិក ដែលកាន់កាប់យីហោសម្ភារៈកីឡាដ៏ធំ និងជោគជ័យបំផុតមួយនៅក្នុងពិភពលោក កាលពីថ្ងៃទី ១៤ កញ្ញា បានប្រកាសជូនក្រុមហ៊ុនទាំងមូលដល់អង្គការមិនស្វែងរកប្រាក់ចំណេញ ហើយមូលនិធិមួយត្រូវបានបង្កើតឡើងដើម្បីគ្រប់គ្រងប្រាក់ចំណេញរបស់ក្រុមហ៊ុននេះ ទុកសម្រាប់បេសកកម្មសង្គ្រោះផែនដី។

«គិតមកដល់ពេលនេះ ផែនដីគឺជាភាគហ៊ុនិកតែមួយគត់របស់យើង» ក្រុមហ៊ុន Patagonia ប្រកាសដូច្នេះ។ «ប្រាក់ចំណូលទាំងអស់នឹងទុកសម្រាប់បេសកកម្មសង្គ្រោះពិភពលោករបស់យើង»។

Chouinard វ័យ ៨៣ ឆ្នាំ រួមនឹងភរិយា កូន ២ នាក់ និងក្រុមមេធាវី បានបង្កើតប្រព័ន្ធមួយដែលអនុញ្ញាតឱ្យ Patagonia ធ្វើសកម្មភាពដូចទៅនឹងក្រុមហ៊ុនមួយ ប៉ុន្តែ ប្រាក់ចំណេញដែលរកបាននឹងត្រូវបានចំណាយទៅក្នុងការប្រឹងប្រែងការពារបរិស្ថាន។

ហាងសម្លៀកបំពាក់យីហោ Patagonia របស់មហាសេដ្ឋី Chouinard

គ្រួសារ Chouinard បានបរិច្ចាគភាគហ៊ុន ២% និងសិទ្ធិសម្រេចទៅឱ្យមូលនិធិមួយដែលគ្រប់គ្រងបេសកកម្ម និងតម្លៃរបស់ក្រុមហ៊ុន។ ចំណែកភាគហ៊ុន ៩៨% ដែលនៅសល់ នឹងត្រូវបានផ្ទេរទៅឱ្យអង្គការមិនស្វែងរកប្រាក់ចំណេញ Holdfast Collective ជាស្ថាប័នដែលនឹង «ប្រើប្រាស់ខ្ទង់ប្រាក់ដែលទទួលបាន ដើម្បីប្រយុទ្ធប្រឆាំងនឹងវិបត្តិបរិស្ថាន ការពារធម្មជាតិ និងធ្វើពិពិធកម្មលើជីវសាស្ត្រ ក៏ដូចជាការជួយដល់សហគមន៍អភិវឌ្ឍចីរភាពប្រកបដោយភាពលឿនរហ័សបំផុត តាមដែលអាចធ្វើទៅបាន»។

ប្រាក់ចំណេញប្រចាំឆ្នាំដែល Patagonia រកបាន ក្រោយពីបានវិនិយោគជាថ្មី នឹងត្រូវបានបែងចែកទៅឱ្យ Holdfast Collective ដើម្បីប្រយុទ្ធប្រឆាំងនឹងបម្រែបម្រួលអាកាសធាតុ។ វិធីនេះត្រូវបានធ្វើឡើងក្នុងបំណងបញ្ចៀសការលក់ក្រុមហ៊ុន ដែលអាចនាំឱ្យតម្លៃរបស់ Patagonia ត្រូវប្រែប្រួល។ លោក Chouinard បានឱ្យដឹងថា ប្រាក់ចំណេញដែលក្រុមហ៊ុននេះរកបានក្រោយពីទូទាត់ខ្ទង់វិនិយោគឡើងវិញ នៅក្នុងឆ្នាំនេះគឺប្រមាណ ១០០ លានដុល្លារអាម៉េរិក។

លោក Chouinard ជាអ្នកជំនួញដែលល្បីឈ្មោះខាងធ្វើរឿងមិនដូចគេឯង បានចាប់ផ្ដើមមុខជំនួញរបស់ខ្លួនដោយការច្នៃទំពក់ឡើងភ្នំធ្វើអំពីលោហធាតុ និងតែងរស់នៅក្នុងរថយន្តដឹកទំនិញនៅទីតាំងឡើងភ្នំនានាក្នុងរយៈពេលច្រើនឆ្នាំ។ Forbes គណនាឃើញថា ទ្រព្យរបស់លោក Chouinard ក្នុងឆ្នាំ ២០២២ នេះគឺ ១.២ ពាន់លានដុល្លារ ចំណែកប្រាក់ចំណូលក្នុងឆ្នាំនេះរបស់ក្រុមហ៊ុន Patagonia គឺ ១.៥ ពាន់លានដុល្លារ។

«កន្លងមក លោក Chouinard បាននិយាយថា «ខ្ញុំខឹងណាស់នៅពេលទស្សនាវដ្ដី Fortune ដាក់ចំណាត់ថ្នាក់ជាមហាសេដ្ឋីឱ្យខ្ញុំ។ ខ្ញុំមិនមាន ១ ពាន់លានដុល្លារនៅក្នុងធនាគារ ហើយក៏មិនមានរថយន្ត Lexus»។

គ្រួសាររបស់លោក Chouinard តែងតែសកម្មនៅក្នុងកិច្ចការមនុស្សធម៌។ David Callahan ដែលជាស្ថាបនិកនៃគេហទំព័រ Inside Philanthropy បានបញ្ចេញយោបល់ថា «អ្នកគិតថា មហាសេដ្ឋីភាគច្រើនគ្រាន់តែបរិច្ចាគមួយផ្នែកតូចនៃទ្រព្យសម្បត្តិរបស់ពួកគេជារៀងរាល់ឆ្នាំ ប៉ុន្តែ គ្រួសារ Chouinard វិញ គឺជាករណីលើកលែង»៕

September 16, 2022

Category: សង្គម និងសេដ្ឋកិច្ច