សង្គម និងសេដ្ឋកិច្ច - La Reine Media

ម្ចាស់ Facebook បាត់បង់ទ្រព្យជាង ៧០ ពាន់លានដុល្លារក្នុងឆ្នាំនេះ

ទ្រព្យសម្បត្តិរបស់ម្ចាស់ Facebook បានថយចុះអស់ជាងពាក់កណ្ដាលចាប់ពីដើមឆ្នាំ ដែលនេះគឺជាតួលេខខ្ពស់ជាងគេបង្អស់ក្នុងបញ្ជីមហាសេដ្ឋីពិភពលោករបស់ Bloomberg។

បើទោះជាឆ្នាំនេះគឺជាឆ្នាំដែលលំបាកចំពោះមហាសេដ្ឋីគ្រប់រូបនៅក្នុងវិស័យបច្ចេកវិទ្យានៅ សហរដ្ឋអាម៉េរិក ប៉ុន្តែ ការធ្លាក់ចុះនៃទ្រព្យសម្បត្តិរបស់ Mark Zuckerberg ដែលជា CEO របស់ Meta Platforms (ក្រុមហ៊ុនមេរបស់ Facebook) នៅតែគួរឱ្យយកចិត្តទុកដាក់ជាងគេ។ ជាសរុប តាំងពីដើមឆ្នាំរហូតដល់បច្ចុប្បន្ន ម្ចាស់ Facebook បាត់បង់ទ្រព្យអស់ ៧១ ពាន់លានដុល្លារ។

បច្ចុប្បន្ន Zuckerberg នៅសល់ទ្រព្យ ៥៥.៩ ពាន់លានដុល្លារ ឈរលំដាប់ទី ២០ ក្នុងពិភពលោក។ នេះគឺជាចំណាត់ថ្នាក់ទាបបំផុតរបស់ម្ចាស់ Facebook គិតចាប់ពីឆ្នាំ ២០១៤។

ភាគហ៊ុន Facebook បានថយចុះជិត ៥៧% ក្នុងឆ្នាំនេះ។ ការថយចុះនេះខ្ពស់ជាងឆ្ងាយធៀបនឹង Apple (ថយចុះ ១៤%), Amazon (-២៦%) និង Alphabet (-29%)។

ទ្រព្យសម្បត្តិភាគច្រើនរបស់ Zuckerberg គឺផ្សារភ្ជាប់ជាមួយនឹងភាគហ៊ុន Meta។ បច្ចុប្បន្នគាត់កាន់កាប់ជាង ៣៥០ លានហ៊ុននៅក្នុងក្រុមហ៊ុននេះ។

កាលពីជិត ២ ឆ្នាំមុន Zuckerberg មានទ្រព្យ ១០៦ ពាន់លានដុល្លារ និងជាមហាសេដ្ឋីលំដាប់ទី ៣ ក្នុងពិភពលោក។ ទ្រព្យរបស់គាត់បានឡើងដល់ ១៤២ ពាន់លានដុល្លារអាម៉េរិក កាលពីខែកញ្ញាឆ្នាំកន្លង នៅពេលតម្លៃភាគហ៊ុនរបស់ Meta ឡើងដល់ ៣៨២ ដុល្លារ/ហ៊ុន។ តម្លៃនេះកាលពីម្សិលមិញ នៅសល់តែ ១៤៨ ដុល្លារ។

Laura Martin ដែលជាអ្នកវិភាគ Internet ប្រចាំក្រុមហ៊ុន Needham & Co យល់ថា ការវិនិយោគទៅលើ metaverse (ចក្រវាលនិម្មិត) បានទាញក្រុមហ៊ុន Meta ឱ្យធ្លាក់ចុះ។ Zuckerberg ធ្លាប់បាននិយាយថា គម្រោងនេះអាចត្រូវការប្រាក់ច្រើនក្នុងរយៈពេលពី ៣ ទៅ ៥ ឆ្នាំទៀត។ Martin និយាយថា Meta កំពុងខំប្រឹងដើម្បីអូសទាញអ្នកប្រើប្រាស់ពី TikTok ត្រលប់មកវិញ។ ជាងនេះ Meta ក៏ត្រូវរងសម្ពាធខ្លាំងពីការដែលប្រទេសជាច្រើនរឹតបន្តឹងលើ Facebook៕

September 20, 2022

ឡានហោះអគ្គិសនីបញ្ចូលថាមពលរហ័ស ល្បឿនជាង ២០០ គីឡូម៉ែត្រ/ម៉ោង

ឡានហោះ H1 ប្រើពេលប្រហែល ២០ នាទី ដើម្បីបញ្ចូលថាមពលថ្មពី ២០% ឡើងដល់ ៨០% និងហោះបានជិត ១០០ គីឡូម៉ែត្រ ដោយដឹកមនុស្ស ២ នាក់។

ក្រុមហ៊ុនអាកាសចរណ៍ Doroni មានទីស្នាក់ការនៅ Miami សហរដ្ឋអាម៉េរិក ចាប់ផ្ដើមទទួលការបញ្ជាទិញជាមុនសម្រាប់ឡានហោះឯកជន H1 នេះបើតាម Interesting Engineering ចុះផ្សាយកាលពីថ្ងៃទី ១៩ កញ្ញា។

ក្នុងគ្រាដែលបណ្ដាក្រុមហ៊ុនផលិតយានយន្តអគ្គិសនីហោះហើរ និងចុះចតត្រង់ភាគច្រើនកំណត់គោលដៅទីផ្សារតាក់ស៊ីហោះនៅក្នុងទីក្រុង ក្រុមហ៊ុន Doroni ឯណេះវិញមានបំណងវាយលុកទីផ្សារផ្សេងពីនេះ។ ក្រុមហ៊ុននេះឆ្ពោះទៅរកអ្នកបើកបរឯកជន និងអះអាងថា H1 ងាយស្រួលប្រើប្រាស់ជាង បើធៀបនឹងឧទ្ធម្ភាគចក្រ ឬយន្តហោះធម្មតា។ គ្រប់គ្នាឱ្យតែមានប័ណ្ណបើកបរធម្មតាគឺអាចប្រើប្រាស់ H1 ក្រោយពីបានបញ្ចប់វគ្គហ្វឹកហាត់ប្រហែល ២០ ម៉ោង។

H1 គឺជាឡានហោះ ២ កៅអី មានកង់ មានប្រព័ន្ធស្លាបចំនួន ២ និងមានស្លាបកង្ហារធំៗ អាចដឹកទម្ងន់ ២២៧ គីឡូក្រាម។ អ្នកប្រើប្រាស់អាចបើកបរ H1 ចូលទៅក្នុងស្ថានីយបញ្ចូលថាមពលធម្មតា។ ជាមួយនឹងមុខងារបញ្ចូលថាមពលរហ័ស H1 ចំណាយពេលតែ ២០ នាទីប៉ុណ្ណោះ គឺអាចបន្ថែមថាមពលពី ២០% ឡើងដល់ ៨០% នេះបើតាម Doron Merdinger នាយកប្រតិបត្តិរបស់ក្រុមហ៊ុន Doroni។

ល្បឿនអតិបរមារបស់ H1 នឹងឡើងដល់ ២២៥ គីឡូម៉ែត្រ/ម៉ោង និងអាចហោះបានចម្ងាយជិត ១០០ គីឡូម៉ែត្រ។ H1 ក៏មានបំពាក់ឆត្រយោងមួយដើម្បីធានាសុវត្ថិភាព។

ក្រុមហ៊ុន Doroni បានបង្ហាញប្រព័ន្ធនានារបស់ H1 នៅក្នុងពិព័រណ៍អាកាសចរណ៍ Experimental Aircraft Association (EAA) AirVenture នៅឯព្រលានយន្តហោះក្នុងតំបន់ Wisconsin សហរដ្ឋអាម៉េរិក កាលពីខែកក្កដា។

Doroni នឹងចាប់ផ្ដើមប្រគល់ទំនិញនៅត្រីមាសចុងក្រោយនៃឆ្នាំ ២០២៤។ ក្រុមហ៊ុននេះទទួលការបញ្ជាទិញមុនតែ ៣៦ គ្រឿងប៉ុណ្ណោះ។ តាមការគណនា នៅពេលបង្ហាញខ្លួនជាផ្លូវការ ឡានហោះនេះអាចនឹងមានតម្លៃ ១៥០,០០០ ដុល្លារអាម៉េរិក៕

https://www.youtube.com/watch?v=tFkJ-TVZizM

September 20, 2022

គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ ៥ សម្រេចបានជាង ៥៨ ភាគរយ

នៅទីស្ដីការក្រសួងសាធារណការ និងដឹកជញ្ជូន ឯកឧត្តម យិត បុណ្ណា រដ្ឋលេខាធិការក្រសួង និងជា នាយកគម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ បានអញ្ជើញដឹកនាំកិច្ចប្រជុំតាមប្រព័ន្ធវីដេអូពីចម្ងាយ ដើម្បីត្រួតពិនិត្យវឌ្ឍនភាពនៃការអនុវត្តគម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ ៥។

អង្គប្រជុំដែលមានការចូលរួមពីថ្នាក់ដឹកនាំក្រសួង ទីប្រឹក្សាត្រួតពិនិត្យបច្ចេកទេស និងមន្រ្តីជំនាញបច្ចេកទេសគម្រោងពាក់ព័ន្ធនេះ បានពិនិត្យ និងពិភាក្សាលម្អិតលើវឌ្ឍនភាពការងារ ការនាំចូលសម្ភារៈវត្ថុធាតុដើម ការបែងចែកកម្លាំងពលកម្ម-កម្មករជំនាញតាមអគារនីមួយៗ និងបញ្ហាប្រឈមនានា ព្រមទាំងបានស្នើ ឱ្យទីប្រឹក្សាត្រួតពិនិត្យបច្ចេកទេសរៀបចំផែនការលម្អិតលើការងារនាំចូលសម្ភារៈវត្ថុធាតុដើម និងការសាងសង់ ដើម្បីតាមដាន ត្រួតពិនិត្យ និងជំរុញឱ្យពាក់ព័ន្ធ អនុវត្តគម្រោងឱ្យសម្រេចតាមផែនការដែលបានសន្យា។

របាយការណ៍របស់អង្គភាពគ្រប់គ្រងគម្រោងបានឱ្យដឹងថា គិតត្រឹមថ្ងៃទី ១៩ ខែកញ្ញា ឆ្នាំ ២០២២ គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ ៥ ដែលអនុវត្តដោយ ក្រុមហ៊ុន CM Grand Development និង Tan Kim Eng សម្រេចបានចំនួន ៥៨,៤៨%៕

September 20, 2022

គម្រោងទិញដូរអគ្គិសនីពហុប្រទេសដំបូងគេបង្អស់នៅក្នុងតំបន់អាស៊ាន ផ្ដល់សញ្ញាវិជ្ជមានសម្រាប់ការតភ្ជាប់បណ្ដាញអគ្គិសនីរួមនៅទូទាំងតំបន់

គម្រោងទិញដូរអគ្គិសនីរវាង ឡាវ-ថៃ-ម៉ាឡេស៊ី-សិង្ហបុរី បានក្លាយជាការពិត ដែលនេះគឺជាការបើកផ្លូវឱ្យមានក្ដីសង្ឃឹមចំពោះការតភ្ជាប់បណ្ដាញអគ្គិសនីរួមរបស់បណ្ដាប្រទេសដែលជាសមាជិកនៃសមាគមប្រជាជាតិអាស៊ីអាគ្នេយ៍។

គម្រោងទិញដូរអគ្គិសនីរវាង ឡាវ និង សិង្ហបុរី គឺជាផ្នែកមួយនៃគម្រោងតភ្ជាប់បណ្ដាញអគ្គិសនីទ្រង់ទ្រាយធំជាងនេះដែលមានការចូលរួមរបស់ប្រទេសចំនួន ៤ គឺ ឡាវ-ថៃ-ម៉ាឡេស៊ី-សិង្ហបុរី (គម្រោង LTMS-PIP) ដែលត្រូវបានប្រទេសទាំងនេះអនុម័តជាផ្លូវការនៅក្នុងចក្ខុវិស័យអាស៊ាន ២០២០។

ថ្មីៗនេះ គម្រោងទិញដូរអគ្គិសនីពហុភាគីដំបូងគេនៅក្នុង អាស៊ាន រវាង ៤ ប្រទេសខាងលើបានក្លាយជាការពិត ដែលនេះគឺជាការបើកផ្លូវឱ្យមានការរំពឹងទុកចំពោះការតភ្ជាប់បណ្ដាញអគ្គិសនីរួមនៅក្នុងតំបន់អាស៊ាន។

គម្រោងដែលមានគោលដៅបង្កើតជាប្រព័ន្ធសន្តិសុខថាមពលសម្រាប់ទូទាំងតំបន់ តាមរយៈការតភ្ជាប់ទៅក្នុងបណ្ដាញអគ្គិសនីរួម សមាជិកទាំងឡាយអាចចែករំលែកអគ្គិសនីដល់គ្នា ក្នុងនោះ ប្រទេសដែលសល់អគ្គិសនីនឹងអាចលក់ទៅឱ្យបណ្ដាប្រទេសដែលមានតម្រូវការ ប្រកបដោយភាពងាយស្រួល។

ចាប់ពីចុងខែមិថុនា សិង្ហបុរី បាននាំចូលអគ្គិសនីពីប្រភពថាមពលកកើតឡើងវិញរបស់ ឡាវ នៅក្នុងដំណាក់កាលសាកល្បងរយៈពេល ២ ឆ្នាំ។ តួលេខ ១០០ មេហ្គាវ៉ាត់ ដែលស្មើនឹង ១.៥% នៃតម្រូវការអគ្គិសនីក្នុងម៉ោងមានការប្រើច្រើនរបស់ សិង្ហបុរី ក្នុងឆ្នាំ ២០២០ គឺគ្រប់គ្រាន់សម្រាប់ផ្គត់ផ្គង់ដល់ ១៤៤,០០០ គ្រួសារនៅក្នុង ១ ឆ្នាំ។

លោក Chanthaboun Soukaloun អគ្គនាយកនៃក្រុមហ៊ុនអគ្គិសនីឡាវ (EDL) បានឱ្យដឹងថា EDL លក់អគ្គិសនីឱ្យ សិង្ហបុរី ទៅតាមកម្រិតនៃថាមពល។ បច្ចុប្បន្ន គម្រោងផលិតអគ្គិសនីប្រមាណ ៩០% របស់ ប្រទេសឡាវ គឺត្រូវបានផលិតឡើងដោយថាមពលកកើតឡើងវិញ ឬហៅថា ថាមពលបៃតង។ ឡាវ ក៏កំពុងតែទាក់ទាញអ្នកវិនិយោគនៅក្នុងវិស័យផលិតអគ្គិសនីពីថាមពលបៃតង ដូចជា ខ្យល់ កម្ដៅព្រះអាទិត្យ និងវារីអគ្គិសនីជាដើម។

ដើម្បីជំរុញការទិញដូរថាមពលរវាងបណ្ដាប្រទេសក្នុងតំបន់អាស៊ាន ពិសេសគឺការជំរុញការស្ថាបនាបណ្ដាញអគ្គិសនីអាស៊ាន ប្រទេសជាសមាជិកត្រូវតែប្រញាប់បង្កើតស្ដង់ដារួមស្ដីពីប្រព័ន្ធបញ្ជូន និងទាញយកអគ្គិសនីក្នុងតំបន់។ ប្រការនេះមិនត្រឹមតែជួយឱ្យការតភ្ជាប់បណ្ដាញអគ្គិសនីឆ្លងព្រំដែនមានភាពងាយស្រួលនោះទេ តែក៏ជួយកាត់បន្ថយការចំណាយក្នុងការអនុវត្តគម្រោងផ្សេងៗនាពេលអនាគត។

គម្រោងសមាហរណកម្មថាមពលឡាវ-ថៃ-ម៉ាឡេស៊ី-សិង្ហបុរី នឹងបង្កើតឱ្យមានការចាប់ផ្ដើមដ៏ល្អសម្រាប់ទីផ្សារទិញដូរថាមពលរវាងប្រទេសជាសមាជិករបស់ អាស៊ាន នាពេលខាងមុខ។ ចំណែកជោគជ័យរបស់គម្រោងទិញដូរអគ្គិសនីរវាង ឡាវ និង សិង្ហបុរី មិនត្រឹមតែផ្ដល់ផលប្រយោជន៍ដល់ប្រទេសដែលចូលរួមនោះទេ តែក៏ជួយឱ្យមានក្ដីសង្ឃឹមខ្ពស់សម្រាប់ការជំរុញដំណើរការស្ថាបនាបណ្ដាញអគ្គិសនីរួមរបស់ អាស៊ាន ជាប្រការដែលនឹងនាំមកនូវប្រសិទ្ធភាពផ្នែកសេដ្ឋកិច្ចយ៉ាងខ្ពស់សម្រាប់អ្នកវិនិយោគ និងផលប្រយោជន៍សម្រាប់អ្នកប្រើប្រាស់ ព្រមទាំងការពង្រីកទីផ្សារទិញដូរអគ្គិសនី ជំរុញការវិនិយោគ ហើយពិសេសគឺការធានាសន្តិសុខថាមពលសម្រាប់សមាជិកអាស៊ានទៀតផង៕

September 20, 2022

ឡាវ អភិវឌ្ឍគម្រោងផលិតអគ្គិសនីដើរដោយថាមពលខ្យល់តម្លៃជាង ២ ពាន់លានដុល្លារអាម៉េរិក

គម្រោងផលិតអគ្គិសនីថាមពលខ្យល់នៅក្នុងតំបន់ Lako ស្រុក Xepon ខេត្ត Savannakhet នេះ ត្រូវបានអនុវត្តដោយ រដ្ឋាភិបាលឡាវ និងក្រុមហ៊ុនថាមពលកកើតឡើងវិញ Savan Vayu សហការជាមួយក្រុមហ៊ុន LMT ឡាវ។

តំបន់ដែលត្រូវសិក្សាសម្រាប់គម្រោងខាងលើ មានផ្ទៃក្រឡា ២៨,៥១៣ ហិកតា ជាមួយនឹងកម្លាំងដំឡើង ១,២០០ មេហ្គាវ៉ាត់ និងចំណាយថវិកាប្រមាណ ២.១៦ ពាន់លានដុល្លារអាម៉េរិក។ គ្រោងនេះគ្រោងនឹងស្ថាបនារួចរាល់ និងចាប់ផ្ដើមដំណើរការនៅចុងឆ្នាំ ២០២៥ ដើម្បីផ្គត់ផ្គង់អគ្គិសនីក្នុងស្រុក ក៏ដូចជាការនាំចេញទៅប្រទេសជិតខាង។

ក្រុមអ្នកអភិវឌ្ឍគម្រោង បានចាប់ផ្ដើមសិក្សាបឋមអំពីគម្រោងអគ្គិសនីដើរដោយកម្លាំងខ្យល់នេះចាប់ពីពាក់កណ្ដាលឆ្នាំ ២០២១ និងបានរកឃើញថា គម្រោងនេះពិតជាមានសក្ដានុពល។ ដូច្នេះ ពួកគេក៏បានដាក់សំណើទៅកាន់ រដ្ឋាភិបាលឡាវ។ ក្រោយការពិនិត្យ ពិភាក្សា និងពិចារណា រដ្ឋាភិបាលឡាវ ក៏បានយល់ព្រម និងអនុម័តលើសំណើសិក្សាលទ្ធភាពអភិវឌ្ឍគម្រោងអគ្គិសនីដើរដោយកម្លាំងខ្យល់ធំបំផុតនៅ ប្រទេសនេះ។

កាលពីថ្ងៃទី ០៩ កញ្ញាកន្លងទៅ អនុរដ្ឋមន្ត្រីក្រសួងផែនការ និងវិនិយោគឡាវ Sthabandith Insisienmay និងនាយកប្រតិបត្តិរបស់ក្រុមហ៊ុនថាមពលកកើតឡើងវិញ Savan Vayu លោក Sengsack Xayyarath បានចុះហត្ថលេខាលើអនុស្សារណៈនៃការយោគយល់ស្ដីពីការសិក្សាលទ្ធភាព (FS) នៃការអភិវឌ្ឍគម្រោងអគ្គិសនីដើរដោយកម្លាំងខ្យល់ខាងលើ ក្រោមអធិបតីភាពរបស់ អនុរដ្ឋមន្ត្រីក្រសួងថាមពល និងរ៉ែឡាវ Sinava Souphanouvong, តំណាងក្រុមហ៊ុន LMT ឡាវ រួមនឹងដៃគូសហការដែលពាក់ព័ន្ធផ្សេងទៀត៕

September 20, 2022

រដ្ឋាភិបាលឡាវ អនុម័តលើការសិក្សាអំពីសក្ដានុពលនៃគម្រោងផ្លូវដែកឡាវ-វៀតណាម

រដ្ឋាភិបាលឡាវ ទើបតែបានសម្រេចអនុញ្ញាតឱ្យក្រុមហ៊ុនចិន Jiangsu Hengtong Construction Engineering Co., Ltd អនុវត្តគម្រោងសិក្សាអំពីលទ្ធភាពនៃការស្ថាបនាផ្លូវដែកប្រវែង ២២០ គីឡូម៉ែត្រ ពីខេត្ត Savannakhet របស់ ឡាវ ទៅកាន់ព្រំដែនជាប់នឹងតំបន់ Lao Bao នៃខេត្ត Quang Tri របស់ វៀតណាម។

លោក Sonesack Nhansana អគ្គនាយករងនៃអគ្គនាយកដ្ឋានផ្លូវដែកឡាវ បានឱ្យដឹងថា បើសិនជាគម្រោងស្ថាបនាត្រូវបានអនុម័ត ផ្លូវដែកនេះនឹងត្រូវចំណាយប្រាក់ប្រហែល ៥ ពាន់លានដុល្លារអាម៉េរិក។

ចំណែកការសិក្សាអំពីគម្រោងផ្លូវដែកនេះវិញ នឹងត្រូវចំណាយពេល ២ ឆ្នាំ ហើយការស្ថាបនានឹងស៊ីពេលអស់ប្រហែល ៣ ឆ្នាំ។

ក្រុមហ៊ុនចិនខាងលើក៏បានស្នើសុំ រដ្ឋាភិបាលឡាវ ធ្វើសម្បទានដីសម្រាប់ការសាងសង់ស្ថានីយរថភ្លើងធំៗចំនួន ៤ កន្លែង និងស្ថានីយតូចៗ ៧ កន្លែង នៅតាមបណ្ដោយផ្លូវដែក លើផ្ទៃដីសរុប ៤,១០០ ហិកតា។

September 19, 2022

XPeng បង្ហាញកម្មវិធីសម្រាប់រថយន្តបើកបរស្វ័យប្រវត្ត City NGP ដូច Tesla FSD

មុខងារជួយដល់ការបើកបរកម្រិតខ្ពស់របស់ XPeng Motors ចុងក្រោយក៏ត្រូវបានបំពាក់នៅលើរថយន្តអគ្គិសនីមួយចំនួននៅ ប្រទេសចិន។

ក្រុមហ៊ុន XPeng ថ្ងៃនេះបានប្រកាសថា មុខងារបើកបរស្វ័យប្រវត្តក្នុងទីក្រុង (City NGP) របស់ខ្លួន ត្រូវបានដំណើរការក្នុងទ្រង់ទ្រាយសាកល្បងនៅក្នុងទីក្រុង Guangzhou ជាទីដែល XPeng ដាក់ទីស្នាក់ការកណ្ដាល។ ប្រការនេះបានជួយឱ្យ XPeng ក្លាយជាក្រុមហ៊ុនផលិតរថយន្តរបស់ ចិន ដំបូងដែលបង្ហាញប្រព័ន្ធជំនួយការបើកបរកម្រិតខ្ពស់ (ADAS)។

XPeng ឱ្យដឹងថា ម្ចាស់រថយន្តអគ្គិសនី XPeng P5 មួយចំនួននៅ Guangzhou បច្ចុប្បន្នអាចប្រើប្រាស់មុខងារ City NGP តាមរយៈកំណែបច្ចុប្បន្នភាព OTA។

លោក He Xiaopeng ដែលជាប្រធាន និងជានាយកប្រតិបត្តិរបស់ក្រុមហ៊ុនផលិតរថយន្តចិន XPeng បាននិយាយថា «យើងជឿថា បទពិសោធន៍នៃការប្រើប្រាស់ដែលត្រូវបានលើកកម្ពស់របស់ City NGP នឹងជំរុញដំណើរការប្ដូរផ្លាស់ទម្លាប់បើកបរទៅរកយុគសម័យស្វ័យប្រវត្ត និងការបើកបរស្វ័យប្រវត្តិក្នុងពេលអនាគត»។

City NGP គឺជាមុខងារ ADAS ដូចទៅនឹងមុខងារបើកបរស្វ័យប្រវត្តទាំងស្រុង (Full Self-Driving – FSD) របស់ Tesla ដែលអនុញ្ញាតឱ្យរថយន្តអនុវត្តគ្រប់តួនាទីរបស់អ្នកបើកបរនៅពេលវាត្រូវបានបើកដំណើរការ និងទីតាំងជាគោលដៅដែលត្រូវបានម្ចាស់រថយន្តកំណត់៕

September 19, 2022

ក្រុមហ៊ុន Gogoro ផ្គត់ផ្គង់បណ្ដាញស្ថានីយប្ដូរថ្មផ្ទុកថាមពលសម្រាប់ម៉ូតូអគ្គិសនីនៅ សិង្ហបុរី

ប្រទេសសិង្ហបុរី គឺជាប្រទេសទីពីរហើយដែលសហការជាមួយនឹងក្រុមហ៊ុនផលិតថ្មផ្ទុកថាមពលអគ្គិសនី Gogoro របស់ តៃវ៉ាន់។

កាលពីថ្ងៃទី ០២ កញ្ញា ២០២២ ក្រុមហ៊ុន Gogoro បានប្រកាសថា ពួកគេនឹងដំឡើងស្ថានីយប្ដូរថ្មផ្ទុកថាមពលរបស់ខ្លួននៅ សិង្ហបុរី។ ចំណែកនាយកដ្ឋានចរាចរណ៍ផ្លូវគោករបស់ សិង្ហបុរី ក៏ទើបតែបានផ្ដល់វិញ្ញាបនបត្រដើម្បីអនុញ្ញាតឱ្យ Gogoro ដំឡើងហេដ្ឋារចនាសម្ព័ន្ធសម្រាប់ផ្ដល់សេវាប្ដូរថ្មយានយន្តនៅ សិង្ហបុរី។

Gogoro ប្រកាសថា កំពុងសហការជាមួយក្រុមហ៊ុន Jardine Cycle & Carriage ក្នុងតំបន់ ដើម្បីធ្វើកិច្ចការខាងលើនេះ។ Jardine Cycle & Carriage គឺជាក្រុមហ៊ុនលំដាប់កំពូលដែលវិនិយោគរយៈពេលយូរទៅលើបណ្ដាអាជីវកម្មនានាដែលនាំមុខគេនៅពាសពេញអាស៊ីអាគ្នេយ៍។ បច្ចុប្បន្ន Jardine Cycle & Carriage មានវត្តមាននៅក្នុងប្រទេសសិង្ហបុរី មីយ៉ានម៉ា ថៃ ម៉ាឡេស៊ី វៀតណាម និង ឥណ្ឌូណេស៊ី។

បច្ចុប្បន្ន Jardine Cycle & Carriage ក៏ជាអ្នកចែកចាយផ្ដាច់មុខម៉ូតូអគ្គិសនី Gogoro នៅក្នុងទីផ្សារមួយចំនួនផងដែរ។ ពួកគេនឹងដំឡើង ដំណើរការ និងគ្រប់គ្រងស្ថានីយប្ដូរថ្ម Gogoro ដើម្បីផ្ដល់ថាមពលសម្រាប់ម៉ូតូលេខស្វ័យប្រវត្តអគ្គិសនីដែលពួកគេលក់។

អាជីវកម្មខាងលើទាក់ទងនឹងផែនការបៃតងរបស់ សិង្ហបុរី សម្រាប់ឆ្នាំ ២០៣០ (Singapore Green Plan 2030 – SGP 2030) ក្នុងនោះក៏មានការកំណត់គោលដៅច្បាស់លាស់មួយចំនួនសម្រាប់កម្មវិធីនានាដែលត្រូវដោះស្រាយ ក្នុងបំណងបង្កើនស្ថិរភាពរបស់បរិស្ថាន និងការបន្សានកាបូន។

SGP 2030 ក៏បានប្រកាសថា សិង្ហបុរី កំពុងកំណត់គោលដៅដាក់ឱ្យដំណើរការស្ថានីយបញ្ចូលថាមពលអគ្គិសនីចំនួន ៦០,០០០ កន្លែង នៅឆ្នាំ ២០៣០ ដោយចែកជា ៤០,០០០ ទីតាំងនៅក្នុងចំណតរថយន្តសាធារណៈ និង ២០,០០០ ទីតាំងនៅក្នុងគម្រោងនានារបស់វិស័យឯកជន៕

September 19, 2022

អគ្គិភ័យកំពុងឆាបឆេះឃ្លាំងមួយកន្លែង ដែលស្ថិតនៅសង្កាត់ទួលស្វាយព្រៃទី១

ពេលនេះ មានករណីអគ្គិភ័យកំពុងឆាបឆេះឃ្លាំងមួយកន្លែង ដែលស្ថិតនៅសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។

នាវេលាម៉ោង ៩ និង ០៥ នាទីព្រឹក ថ្ងៃទី ១៩ ខែកញ្ញា ឆ្នាំ ២០២២ មានករណីអគ្គិភ័យកំពុងឆាបឆេះឃ្លាំងមួយកន្លែង ដែលស្ថិតនៅសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ។ នេះបើតាមទំព័របណ្ដាញសង្គមរបស់ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ។

កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍ភ្លាមៗ បន្ទាប់ពីទទួលបានដំណឹង។

September 19, 2022

ក្រុមហ៊ុន Shell នឹងដំឡើងឧបករណ៍បញ្ចូលថាមពលយានយន្តអគ្គិសនី ១០,០០០ កន្លែងនៅពាសពេញទឹកដីឥណ្ឌា

ក្រុមហ៊ុនប្រេងឥន្ធនៈ Shell របស់អង់គ្លេសសាខានៅ ឥណ្ឌា កំពុងដំណើរការឧបករណ៍ចាក់សាំងចំនួន ៣២៧ គ្រឿង ក្នុងចំណោម ៨៣,៨៨៨ គ្រឿងនៅប្រទេសនេះ។ ក្រុមហ៊ុននេះបានបង្ហាញប្រព័ន្ធបញ្ចូលថាមពលអគ្គិសនីដំបូងរបស់ខ្លួននៅ ប្រទេសឥណ្ឌា សម្រាប់រថយន្តអគ្គិសនី និងម៉ូតូអគ្គិសនីក្នុងទីក្រុង Bengaluru កាលពីថ្ងៃព្រហស្បតិ៍សប្ដាហ៍នេះ។

ក្នុងប្រកាសរបស់ខ្លួន Shell បានឱ្យដឹងថា «ឥណ្ឌា គឺជាទីផ្សារដំបូងដែល Shell បញ្ចេញប្រព័ន្ធបញ្ចូលថាមពលសម្រាប់ម៉ូតូអគ្គិសនី។ ក្រុមហ៊ុនមានគម្រោងដំឡើងស្ថានីយបញ្ចូលថាមពលជាង ១០,០០០ កន្លែងនៅពាសពេញទឹកដីឥណ្ឌា គិតត្រឹមឆ្នាំ ២០៣០»។

Shell សហការជាមួយក្រុមហ៊ុនប្រេងរបស់ ឥណ្ឌា IOC និង Reliance-BP នៅក្នុងការសាងសង់ស្ថានីយបញ្ចូលថាមពលសម្រាប់យានយន្តអគ្គិសនី ដើម្បីបង្កើនចំនួនអតិថិជនប្រើប្រាស់រថយន្តអគ្គិសនី និងម៉ូតូអគ្គិសនីនៅប្រទេសឥណ្ឌា។ Shell អះអាងថា ១០០% នៃថាមពលដែលប្រើប្រាស់សម្រាប់ស្ថានីយបញ្ចូលអគ្គិសនីគឺជាថាមពលស្អាត។

ក្នុងដំណាក់កាលដំបូងនៃគម្រោងខាងលើ Shell នឹងដំឡើងស្ថានីយបញ្ចូលអគ្គិសនីនៅ Yeshwantpur, Marathalli, Old Madras Road, Brookefield និង Kanakpura។ ក្រៅពីនេះ Shell ក៏គ្រោងនឹងដំឡើងឧបករណ៍បញ្ចូលអគ្គិសនីនៅក្នុងស្ថានីយប្រេងសាំងរបស់ដៃគូនៅក្នុងរដ្ឋជាច្រើននៅ ឥណ្ឌា ផងដែរ៕

September 17, 2022

Category: សង្គម និងសេដ្ឋកិច្ច