Category: សង្គម និងសេដ្ឋកិច្ច

ផ្លូវល្បឿនលឿនភ្នំពេញ-ក្រុងព្រះសីហនុ នឹងបើកឱ្យប្រើប្រាស់សាកល្បងដោយឥតគិតថ្លៃ ចាប់ពីថ្ងៃទី ០១ ដល់ថ្ងៃទី ៣១ ខែតុលា ឆ្នាំ ២០២២ ដូច្នេះ ដើម្បី​អ្នក​បើកបរ​គួរ​តែ​ដឹង​ច្បាស់​អំពី​ «ទីតាំង​ឈប់​សម្រាក» នៅ​តាម​បណ្ដោយ​ផ្លូវ​នេះ​។

“ទីតាំង​សម្រាប់​ឈប់សម្រាក និងផ្តល់សេវាកម្ម” នៅ​តាម​បណ្ដោយ​ផ្លូវល្បឿនលឿន ភ្នំពេញ-ព្រះសីហនុ មាន​ ៤ កន្លែង ក្នុង​នោះមាន ២ កន្លែង​នៅ ខេត្ត​កំពង់​ស្ពឺ និង ២ កន្លែង​នៅ​ ខេត្ត​ព្រះសីហនុ។

កន្លែងឈប់សម្រាក និងផ្តល់សេវាកម្មទាំង​នេះ​សុទ្ធតែ​មានចំណតយានយន្ត ស្ថានីយប្រេងឥន្ធនៈ បន្ទប់ទឹក អាហារដ្ឋាន និងកន្លែងផ្តល់សេវាកម្មផ្សេងៗ។

ទីតាំងទាំង ៤ កន្លែង​នេះ រួមមាន៖ ទីតាំងកំពង់ស្ពឺ (គ.ម 40), ទីតាំងកំពង់ស្ពឺខាងលិច (គ.ម 63), ទីតាំងកំពង់សិលា ខេត្ត​ព្រះសីហនុ​ (គ.ម 109) និង ទីតាំងព្រៃនប់ខាងលិច ខេត្ត​ព្រះសីហនុ (គ.ម 156)។

គម្រោង​ផ្លូវ​ល្បឿន​លឿន​នេះ មាន​ប្រវែង​សរុប​ជាង ១៩០ គីឡូម៉ែត្រ ក្នុងនោះ​វា​មាន​ទទឹង​តួ​ផ្លូវ ២៤.៥ ម៉ែត្រ និង​ក្រាល​បេតុង​កៅស៊ូ (AC) កម្រាស់ ១០ សង់ទីម៉ែត្រ។ គន្លង​ផ្លូវ​ធ្វើ​ចរាចរណ៍​ចែកជា ៤ គន្លង (២ គន្លង​ទៅ ២គន្លង​មក)។ ផ្លូវ​នេះ​អនុញ្ញាតឱ្យ​យានយន្ត​គ្រប់​ប្រភេទ អាច​បើកបរ​ក្នុង​ល្បឿន​រហូតដល់ ១០០ គីឡូម៉ែត្រ/ម៉ោង និង​កន្លែង​ខ្លះ​អាច​បើកបរ ក្នុង​ល្បឿន​ដល់ ១២០ គីឡូម៉ែត្រ/ម៉ោង។

ផ្លូវ​ល្បឿន​លឿន ភ្នំពេញ-ព្រះសីហនុ មាន​ស្ពាន​តូច​ចំនួន ៥ កន្លែង, ស្ពាន​ធំ និង​ស្ពាន​មធ្យម​ចំនួន ៨០ កន្លែង។ ផ្លូវ​នេះ​ក៏មាន​ស្ពាន​រំលង​ផ្លូវ​ចំនួន ២០ កន្លែង, ចំណត​ឈប់សម្រាក​ចំនួន ៣ កន្លែង, ចំណតរថយន្ត​ចំនួន ១កន្លែង, មណ្ឌល​ប្រតិបត្តិការ និង​ថែទាំ​ផ្លូវ​ចំនួន ៤ កន្លែង និង​បញ្ជរ​បង់ប្រាក់​ចំនួន ៩ កន្លែង៕

ក្រុម​ហ៊ុន​បច្ចេកវិទ្យា​ Hon Hai របស់ តៃវ៉ាន់ បាន​ឱ្យ​ដឹង​ថា ពួក​គេ​បាន​បង្កើត​ក្រុម​ហ៊ុន​បណ្ដាក់​ទុន​រួមជាមួយ PT Mitra Motor Group (MMG) ដែលជា​ក្រុម​ហ៊ុន​បុត្រ​សម្ព័ន្ធ​មួយ​របស់​ Indonesia PT Indika Energy ដើម្បី​ផលិត​រថយន្ត​អគ្គិសនី​ និង​ថ្ម​ផ្ទុក​ថាមពល​នៅ​ ប្រទេស​ឥណ្ឌូណេស៊ី​។

Hon Hai ឬ​ហៅ​ជា​លក្ខណៈ​អន្តរជាតិ​ថា Foxconn បង្ហើប​ឱ្យ​ដឹង​ថា កិច្ច​ព្រម​ព្រៀង​ត្រូវ​បាន​ចុះ​ហត្ថលេខា​​ដោយ​ក្រុមហ៊ុន​បុត្រ​សម្ព័ន្ធ​របស់​ពួក​គេ​គឺ Foxteq Singapore។ ក្រុម​ហ៊ុន​បណ្ដាក់​ទុន​រួម​គ្នា​ថ្មី គឺ PT Foxconn Indika Motor (FIM) នឹង​ទទួល​បាន​វិញ្ញាបនបត្រ​ផ្នែក​បច្ចេក​វិទ្យា​ផលិត​រថយន្ត​អគ្គិសនី​ពី​ក្រុម​ហ៊ុន​មេ​នៅ តៃវ៉ាន់ (Foxconn)។

មេដឹកនាំ​ផ្នែក​យុទ្ធសាស្ត្រ​​ទទួល​បន្ទុក​​​ថ្ម​ផ្ទុក​ថាមពល​របស់ Foxconn លោក Troy Wu បាន​និយាយ​នៅ​ក្នុង​ប្រកាស​មួយ​កាល​ពីពេល​ថ្មី​ៗ​នេះ​ថា «ឥណ្ឌូណេស៊ី ដែល​ជា​ខឿន​សេដ្ឋកិច្ច​ធំជាង​គេ​នៅ អាស៊ីអាគ្នេយ៍​ បាន​សន្យា​ទាក់​ទង​នឹង​គោលដៅ​មិន​បញ្ចេញ​ឧស្ម័ន​ប្រកប​ដោយ​មហិច្ឆតា។ ក្រុមហ៊ុន​បណ្ដាក់​ទុន​រួម​នេះ​សង្កត់​ធ្ងន់​ចំពោះ​ការសន្យា​របស់ Foxconn ក្នុងការ​គាំទ្រ​ដៃ​គូ​របស់​យើង​នៅ ឥណ្ឌូណេស៊ី សម្រាប់​គោល​ដៅ​រួម​របស់​យើង គឺ​ការ​ស្ថាបនា​បណ្ដាញ​ប្រកប​ដោយ​ស្ថិរភាព​»។

រដ្ឋាភិបាល​ឥណ្ឌូណេស៊ី បាន​កំណត់​គោលដៅ​ដល់​ឆ្នាំ​ ២០៣០ នឹង​មាន​រថយន្ត​អគ្គិសនី​ចំនួន ២ លាន​គ្រឿង និង​ម៉ូតូអគ្គិសនី​ចំនួន ១៣ លាន​គ្រឿងដែល​ប្រើប្រាស់​ក្នុង​ប្រទេស​នេះ​។

ប្រធាន​ផ្នែក​វិនិយោគ​របស់ Indika Energy លោក Purbaja Pantja អះអាង​ថា «យើងមើល​ឃើញ សក្ដានុពល​ធំធេង​សម្រាប់​ការ​អភិវឌ្ឍ​រថយន្ត​អគ្គិសនី​នៅ ឥណ្ឌូណេស៊ី»។ លោក​បន្ថែម​ថា កិច្ច​សហការ​រវាង​ MMG និង Foxteq Singapore នឹង​ជួយ​ជំរុញ​ឱ្យ​ ឥណ្ឌូណេស៊ី ក្លាយជា​អ្នក​អភិវឌ្ឍ​បណ្ដាញ​រថយន្ត​អគ្គិសនី​ និង​ថ្ម​ផ្ទុក​ថាមពល​លំដាប់​កំពូល​របស់​ពិភពលោក​៕​

តាមសំណើសុំវិនិយោគរបស់ក្រុមហ៊ុន ​គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនថ្មី​ចំនួន ៨ ទៀត​ ដែល​នឹង​បណ្ដាក់​ទុន​ក្នុង​វិស័យ មន្ទីរពេទ្យ អភិវឌ្ឍ​កោះ​ត្បាល់ រោង​ចក្រ​កែច្នៃ​ម្ហូប ផលិត​គ្រឿង​បន្សំ​ស្បែក​ជើង ផ្គុំដំឡើងខ្សែគ្រឿងអេឡិចត្រូនិក និង​កាត់ដេរសម្លៀកបំពាក់។

គម្រោង​ថ្មី​ទាំង​ ៨ រួម​មាន​ដូចខាង​ក្រោម​ ៖

១-“ORIENDA INTERNATIONAL HOSPITAL CO., LTD” គម្រោងសាងសង់ និងអាជីវកម្មមន្ទីរពេទ្យអន្តរជាតិ ចំនួន ១១៧ គ្រែ ដែលមានទីតាំងវិនិយោគស្ថិតនៅផ្លូវដួងងៀប២ ភូមិដំណាក់ធំ ៣ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ក្នុងទុនវិនិយោគចំនួន ២១ លានដុល្លារអាមេរិក និងអាចបង្កើតការងារបានចំនួន ១៧៨ កន្លែង។

២-“NEW WORLD HEART & VASCULAR HOSPITAL CO., LTD” គម្រោងសាងសង់ និងអាជីវកម្មមន្ទីរ​ពេទ្យ​បេះដូង​និងសរសៃឈាម ចំនួន ៣០០ គ្រែ ដែលមានទីតាំងវិនិយោគស្ថិតនៅផ្លូវលេខ ១៩៣៤ ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ក្នុងទុនវិនិយោគចំនួន ២០ លានដុល្លារអាមេរិក និងអាចបង្កើតការងារបានចំនួន ៣៤៨ កន្លែង។

៣-“TRY PHEAP KOH TUNSAY RESORTS CO., LTD” គម្រោងអភិវឌ្ឍន៍កោះត្បាល់ ដែលមានទីតាំងវិនិយោគស្ថិតនៅភូមិកែប សង្កាត់កែប ក្រុងកែប ខេត្តកែប ក្នុងទុនវិនិយោគចំនួន ១៧ លានដុល្លារអាមេរិក និងអាចបង្កើតការងារបានចំនួន ១០៥ កន្លែង។

៤-“GLOBAL PASS BIOTECHNOLOGY CO., LTD” គម្រោងបង្កើតរោងចក្រកែច្នៃម្ហូបអាហារ ដែលមានទីតាំងវិនិយោគស្ថិតនៅភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល ក្នុងទុនវិនិយោគប្រមាណ ៧.២ លានដុល្លារអាមេរិក និងអាចបង្កើតការងារបានចំនួន ១៣២ កន្លែង។

៥-“YURA HARNESS (CAMBODIA) CO., LTD” គម្រោងបង្កើតរោងចក្រផ្គុំដំឡើងខ្សែគ្រឿងអេឡិចត្រូនិក ដែលមានទីតាំងវិនិយោគស្ថិតនៅភូមិទួលធ្នង់ សង្កាត់រការធំ ក្រុងច្បារមន ខេត្តកំពង់ស្ពឺ ក្នុងទុនវិនិយោគប្រមាណ ៦.៨ លានដុល្លារអាមេរិក និងអាចបង្កើតការងារបានចំនួន ៥១៤ កន្លែង។

៦-“RISE STEADY FOOTWEAR MATERIAL (CAMBODIA) CO., LTD” គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិតាសែន ឃុំសូទិប ស្រុកជើងព្រៃ ខេត្តកំពង់ចាម ក្នុងទុនវិនិយោគប្រមាណ ៦.៥ លានដុល្លារអាមេរិក និងអាចបង្កើតការងារបានចំនួន ៥៤៨ កន្លែង។

៧-“TWHQ GARMENTS CO., LTD” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៨ ភូមិវិហារសួគ៌ជើង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ក្នុងទុនវិនិយោគប្រមាណ ៥.៤ លានដុល្លារអាមេរិក និងអាចបង្កើតការងារបានចំនួន ១,៩៥៨ កន្លែង។

៨-“COBEST (CAMBODIA) FIRST GARMENT CO., LTD” គម្រោងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិត្រពាំងទួល សង្កាត់កំបូល ខណ្ឌកំបូល រាជធានីភ្នំពេញ ក្នុងទុនវិនិយោគប្រមាណ ៥.១ លានដុល្លារអាមេរិក និងអាចបង្កើតការងារបានចំនួន ១,៦៥០ កន្លែង។

ជាសរុប ទុន​វិនិយោគ​សម្រាប់​បណ្ដា​គម្រោង​ខាងលើ​នេះ​មាន​ចំនួន​ជិត​ ៩០ លាន​ដុល្លារ​អាម៉េរិក និង​បង្កើត​ការ​ងារ​ចំនួនជាង​ ៥,០០០ កន្លែង​។

គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រ​ចុះ​បញ្ជី​គម្រោង​វិនិយោគ​​ថ្មី​ចំនួន ៤ ទៀត​ ដែល​មាន​តម្លៃ​សរុប​ប្រមាណ​ជិត​ ២៤ លាន​ដុល្លារ​អាម៉េរិក​។

គម្រោង​បង្កើត​រោង​ចក្រ​ថ្មី​ចំនួន ៤ ដែល​នឹង​បង្កើត​ការ​ងារ​បានជិត ៣,០០០ កន្លែង​នេះ នឹង​ដាក់​ទីតាំង​នៅ​ ខេត្ត​ស្វាយ​រៀង​ ចំនួន ៣ រោង​ចក្រ និង​រោង​ចក្រ​ ១ ទៀត​នៅ​ក្នុង​ ក្រុង​ព្រះសីហនុ។

គម្រោង​បង្កើត​រោង​ចក្រ​ថ្មី​ទាំង​នេះ​រួម​មាន​ដូច​ខាង​ក្រោម ៖

១- “HOME STYLE LIVING CO., LTD.” គម្រោងបង្កើតរោងចក្រផលិតគ្រឿងសង្ហារឹម និងពូកគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស៊ីន បាវិត, ខេត្តស្វាយរៀង, ក្នុងទុនវិនិយោគចំនួន ៦.៦ លានដុល្លារអាមេរិក និងអាចបង្កើតការងារបានចំនួនប្រមាណ ៣៨០ កន្លែង។

២- “MCL HANDBAG FACTORY (CAMBODIA) COMPANY LIMITED.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, ក្នុងទុនវិនិយោគចំនួន ៦.៥ លានដុល្លារអាមេរិក និងអាចបង្កើតការងារបានចំនួនប្រមាណ ៨៥០ កន្លែង។

៣- “GREEN LINK ELECTRIC CO., LTD.” គម្រោងបង្កើតរោងចក្រផលិតអំពូលភ្លើងគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ ផាក, ខេត្តស្វាយរៀង, ក្នុងទុនវិនិយោគចំនួន ៥.៥ លានដុល្លារអាមេរិក និងអាចបង្កើតការងារបានចំនួនប្រមាណ ១,៥០០ កន្លែង។

៤- “RAINBOW LIGHTING CO., LTD.” គម្រោងបង្កើតរោងចក្រផលិតអំពូលភ្លើង អំពូលភ្លើងលម្អរ និងគ្រឿងបង្គុំអំពូលភ្លើង ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ ផាក, ខេត្តស្វាយរៀង, ក្នុងទុនវិនិយោគចំនួន ៥.៣ លានដុល្លារអាមេរិក និងអាចបង្កើតការងារបានចំនួនប្រមាណ ១៧០ កន្លែង។

យោង​តាម CNN យន្តហោះ​ដឹក​អ្នកដំណើរ​ដែល​ប្រើប្រាស់​អគ្គិសនី​ទាំង​ស្រុង​ បាន​ហោះ​ហើរ​ដោយ​ជោគជ័យ​នៅក្នុង​ជើង​ហោះ​ហើរ​រយៈ​ពេល ៨ នាទី ក្នុង​រយៈ​កម្ពស់​ប្រហែល​ជាង ១,០០០ ម៉ែត្រ​។

ក្រុមហ៊ុន Eviation របស់ អ៊ីស្រាអែល បាន​ទទួល​ជោគ​ជ័យ​ក្នុងការ​បើកបរ​យន្តហោះ​ដឹក​អ្នក​ដំណើរ​ប្រើ​ប្រាស់​ថាមពល​អគ្គិសនី​ទាំង​ស្រុង Alice កាលពី​ថ្ងៃទី ២៧ កញ្ញា​ ដោយ​ហោះឡើងពី​ព្រលាន​យន្តហោះ​អន្តរជាតិ​ក្នុងស្រុក Grant រដ្ឋវ៉ាស៊ីងតោន សហរដ្ឋ​អាម៉េរិក​។ យន្តហោះ​ដែល​មិន​បំភាយ​ឧស្ម័ន​នេះ​ ហោះ​ហើរ​ក្នុង​កម្ពស់ ១,០៦៦ ម៉ែត្រ​ នៅក្នុង​ជើង​ហោះ​ហើរ​ដំបូង​ដែល​អូស​បន្លាយ​ពេល​ ៨ នាទី​។

«នេះ​គឺជា​ប្រវត្តិសាស្ត្រ» ប្រធាន​ក្រុមហ៊ុន Eviation លោក Gregory Davis ថ្លែង​ដូច្នេះ និងបន្ថែមថា «យើង​មិន​ធ្លាប់​បាន​ឃើញ​ការ​ផ្លាស់​ប្ដូរ​គ្រឿង​ម៉ាស៊ីន​លើ​យន្ត​ហោះ​ ចាប់តាំង​ពី​ការ​ប្ដូរ​ពី​ម៉ាស៊ីន​ piston មក​ម៉ាស៊ីន turbine»។

ដោយ​ប្រើ​ប្រាស់ថ្ម​ដែល​មាន​បច្ចេកវិទ្យា​ដូចទៅ​នឹង​ថ្ម​រថយន្តអគ្គិសនី ឬ​ទូរស័ព្ទ និង​ការ​បញ្ចូល​ថាមពល​ត្រឹម​តែ​ ៣០ នាទី យន្តហោះ Alice ដែលដឹក​ភ្ញៀវ​ ៩ នាក់ អាច​ហោះហើរ​បាន​ក្នុង​ ១ ម៉ោង​។ យន្តហោះ​នេះ​មានល្បឿន​ឡើង​ដល់ ៤៦៣ គីឡូម៉ែត្រ​/​ម៉ោង​។ យន្តហោះ Boeing 737 ដំណើរ​ការ​ដោយ​ប្រេងសាំង មាន​ល្បឿន​ ៩៤០ គីឡូម៉ែត្រ​/ម៉ោង​។

ក្រុម​ហ៊ុន​ Eviation ត្រូវ​បាន​បង្កើត​ឡើង​កាលពី​ឆ្នាំ ២០១៥ ហើយ​ផ្ដើម​អភិវឌ្ឍ​យន្តហោះ​អគ្គិសនី Alice តាំង​ពី​ពេល​នោះ​។ ក្រុមហ៊ុន​នេះ​សង្ឃឹមថា ឆ្នាំ​ ២០២៥ នឹង​ទទួល​បាន​វិញ្ញាបនបត្រ​ពី សហរដ្ឋ​អាម៉េរិក ហើយ​សាកល្បង​ហោះ​ហើររយៈ​ពេល​ពី ១ ទៅ ២ ឆ្នាំ​ មុន​ពេល​ប្រគល់​ Alice ដល់​ដៃ​អតិថិជន​៕

យោង​តាម Korea Times កូរ៉េខាងត្បូង​ កំពុងរក​វិធី​ជំរុញ​សកម្មភាព​ផលិត​រថយន្ត​អគ្គិសនី​ និង​កំណត់គោល​ដៅ​បង្កើន​ការ​ក្ដោប​ក្ដាប់​ទី​ផ្សារ​ឱ្យ​បាន​ទ្វេ​ដង​ធៀប​នឹង​បច្ចុប្បន្ន របស់​បណ្ដា​ក្រុមហ៊ុន​ផលិត​រថយន្ត​អគ្គិសនី​របស់​ប្រទេស​នេះ​នៅ​ក្នុង​ទីផ្សារ​អន្តរជាតិ​ និងយក​ចំណែក​ទីផ្សារ​​ឱ្យ​បាន​ ១២% នៅ​ឆ្នាំ​ ២០៣០​។

យោង​តាម​ ក្រសួង​ពាណិជ្ជកម្ម​ ឧស្សាហកម្ម និង​ថាមពល​កូរ៉េខាង​ត្បូង រដ្ឋាភិបាល​ប្រទេស​នេះ​បាន​សន្យា​ផ្ដល់ការ​អនុគ្រោះ​ពន្ធ​ និង​វិធានការ​គាំទ្រ​ជា​ច្រើន​ផ្សេង​ទៀត​ដើម្បី​ទាក់​ទាញ​ការ​វិនិយោគ​របស់​បណ្ដា​ក្រុមហ៊ុន​ផលិតរថយន្ត​ ឱ្យ​បាន​ដល់​ ៦៦.០៣ ពាន់​លាន​ដុល្លារ​ក្នុង​ឆ្នាំ​ ២០២៦​។

ក្រុម​អ្នកផលិត​រថយន្ត​របស់ កូរ៉េខាងត្បូង មាន​ផែនការ​បង្កើន​បរិមាណ​រថយន្ត​អគ្គិសនី​ឱ្យ​បាន​ដល់ ៣.៣ លាន​គ្រឿង​នៅ​ឆ្នាំ​ ២០៣០ សម្រាប់ពិភពលោក ច្រើន​ជាង​ឆ្ងាយ​ធៀប​នឹង​ប្រហែល ២៥៤,០០០ គ្រឿង​កាលពី​ឆ្នាំ​កន្លង​ ដើម្បី​ក្ដោប​ក្ដាប់​ចំណែក​ទីផ្សារ​រថយន្ត​អគ្គិសនី ១២% នៅ​ទូទាំង​សកល​លោក​។ កាលពី​​ឆ្នាំ​ ២០២១ ក្រុមហ៊ុន​ផលិត​រថយន្ត​របស់ កូរ៉េខាងត្បូង កាន់កាប់ ៥% នៅ​ក្នុង​ទីផ្សារ​រថយន្ត​អគ្គិសនី​ពិភពលោក​។

ដើម្បី​សម្រេច​បាន​គោលដៅ ក្រុម​អ្នក​ផលិតរថយន្ត​ក្នុង​ស្រុក​របស់ កូរ៉េខាងត្បូង សន្យា​ថា​នឹង​ធ្វើកិច្ច​ការ​សំខាន់​ៗ​ជា​ច្រើន​ មាន​ដូចជា ការ​អភិវឌ្ឍ​បច្ចេកវិទ្យា​ផ្ដាច់​មុខ​របស់​ពួក​គេ​សម្រាប់​រថយន្ត​អគ្គិសនី​ ការ​បណ្ដុះ​បណ្ដាល​ធនធាន​មនុស្ស​រាប់​ម៉ឺន​នាក់​ក្នុង​វិស័យ​រថយន្ត​ ក៏ដូចជា​បង្កើត​ក្រុម​ហ៊ុន​រាប់រយ​ដែល​មាន​ជំនាញ​ក្នុង​ការ​អភិវឌ្ឍ​កម្មវិធីបច្ចេកវិទ្យា​សម្រាប់​​រថយន្ត​អគ្គិសនី​ ចាប់ពី​ពេល​នេះ​ដល់​ឆ្នាំ ២០៣០​។

រដ្ឋាភិបាល​កូរ៉េខាងត្បូង កំពុងយក​ចិត្ត​ទុក​ដាក់​ខ្លាំង​ទៅ​លើ​វិស័យ​រថយន្ត​អគ្គិសនី​ ក្នុង​នោះ បច្ចេកវិទ្យា​បើកបរ​ស្វ័យ​ប្រវត្ត​សម្រាប់​រថយន្ត​អគ្គិសនី​នឹង​ត្រូវ​បាន​វិនិយោគ​ ស្រាវជ្រាវ​ អភិវឌ្ឍ​ និង​ផលិត​ចាប់ពី​ឆ្នាំ​ ២០២៤​ ទន្ទឹម​នឹង​ការ​ជួយ​គាំទ្រ​វិស័យ​នេះ​ តាម​រយៈ​ការ​អនុគ្រោះ​ពន្ធ​ ការ​ជំរុញ​ការ​ប្រើប្រាស់​រយន្ត​អគ្គិសនីជា​ដើម​។ល។

ក្រុមហ៊ុន Virgin Atlantic អនុញ្ញាត​ឱ្យ​បុគ្គលិក​ស្លៀក​ពាក់​​ឯកសណ្ឋាន​​បែប​ណា​​ក៏​បាន​ ឱ្យ​តែ​ពួក​គេ​គិតថា​សម​ស្រប​ ក្នុងនោះ បុគ្គលិក​ជា​បុរស​អាច​ស្លៀក​រ៉ូប​ធ្វើការ​។

ក្នុង​កិច្ច​ប្រឹង​ប្រែង​ក្លាយជា «ក្រុម​ហ៊ុន​អាកាស​ចរណ៍​ល្អ​ឯក​លើ​អាកាស» Virgin Atlantic របស់ អង់គ្លេស កាលពី​ថ្ងៃទី ២៨ កញ្ញា បាន​ប្រកាស​អំពី​ការ​កែប្រែ​គោល​ការណ៍​ថ្មី​ស្ដី​ពី​ឯកសណ្ឋាន​របស់​បុគ្គលិក ដើម្បី​លើក​កម្ពស់​ឯកជន​ភាព​។ បុគ្គលិក​អាច​ជ្រើស​រើស​ឯកសណ្ឋាន​តាម​ចិត្ត​ ដោយ​មិន​រង​ឥទ្ធិពល​ពី​ «អត្តសញ្ញាណ​ភេទ ឬ​ការ​បង្ហាញ​អំពី​ភេទ​»។

ក្នុង​វីដេអូ​ដែល​ត្រូវ​បាន​បង្ហោះ​លើ Youtube គេឃើញ​មាន​រូប​ភាព​បុរស​ជា​អ្នកបម្រើ​លើ​យន្តហោះ​ស្លៀក​រ៉ូប​ពណ៌​ក្រហម ខណៈ​នារី​ជា​អ្នកបម្រើ​ស្លៀក​ពាក់​ឈុត​អាវ​ធំ​ និង​ក្រវាត់​ក​បែប​បុរស​។ បុគ្គលិក​របស់ Virgin Atlantic ក៏​អាច​ពាក់ស្លាក​ឈ្មោះ​ដែល​ពួក​គេ​ចូល​ចិត្ត​ និង​ចង់​ឱ្យ​ហៅ​។

Virgin Atlantic ក៏​មាន​គោល​ការណ៍​ថ្មីដែល​ល្អ​​សម្រាប់​បុគ្គលិក​ដែល​សុំ​ច្បាប់​សម្រាក​ព្យាបាល​ទាក់ទង​នឹង​ការ​ប្ដូរ​ភេទ​ និង​អនុញ្ញាត​ឱ្យ​ពួក​គេ​ជ្រើស​រើស​បន្ទប់​ផ្លាស់​សម្លៀក​បំពាក់​ និង​បន្ទប់​ងូត​ទឹក​ផងដែរ​។

ក៏ប៉ុន្តែ គោល​ការណ៍​ថ្មី​របស់ Virgin Atlantic បាន​បង្ក​ឱ្យ​មាន​មតិ​ចម្រូង​ចម្រាស​ច្រើន​។ អ្នក​ខ្លះ​សរសើរ​ថា នេះ​គឺជា​គោល​ការណ៍​ទាន់​សម័យ​ ខណៈ​អ្នក​ខ្លះ​ថា វា​ជា​ការ​វិវត្ត​ដ៏​អាក្រក់​៕

https://www.youtube.com/watch?v=B-haq1V-xJo

ស្ថានីយ​វា​រី​អគ្គិសនី​ចុងក្រោយ​នៅ​ឆ្នេរ​ខាងឆ្វេង​របស់​ទំនប់​វា​រី​អគ្គិសនី Baihetan នៅលើ​ទន្លេ Jinsha ត្រូវបាន​ដាក់ឱ្យ​ដំណើរការ​ពាណិជ្ជកម្ម​ជា​ផ្លូវការ​កាលពី​សប្ដាហ៍​កន្ល​ង។

ស្ថានីយ​វា​រី​អគ្គិសនី​ថ្មី​មួយ​របស់ ទំនប់​វា​រី​អគ្គិសនី Baihetan នៅ​ភាគ​និរតី​នៃ ប្រទេស​ចិន បានបញ្ចប់​ដំណើរការ​សាកល្បង​រយៈ​ពេល ៧២ ម៉ោង និង​ចាប់ផ្ដើម​ដំណើរការ​ពាណិជ្ជកម្ម​ជា​ផ្លូវការ​កាលពី​សប្ដាហ៍​មុន នេះ​បើតាម សារព័ត៌មាន Xinhua។

ការ​ដំណើរការ​ស្ថានីយ​វា​រី​អគ្គិសនី​លេខ ៨ គឺជា​ការ​បញ្ជាក់ថា ស្ថានីយ​ផលិត​អគ្គិសនី​ទាំងអស់​នៅ​ឆ្នេរ​ខាងឆ្វេង​របស់​ទំនប់​វា​រី​អគ្គិសនី Baihetan បាន​ដំណើរការ​សកម្មភាព​ពា​ណិ​ជ្ជ​កម្ម​ទាំងស្រុង។

ទំនប់​វា​រី​អគ្គិសនី Baihetan ស្ថិតនៅលើ​ទន្លេ Jinsha ដែលជា​ដៃទន្លេ​ផ្នែក​ខាងលើ​របស់​ទន្លេ Yangtze ក្នុង​ខេត្ត Sichuan និង​ខេត្ត Yunnan នៅ​ភាគ​និរតី​នៃ ប្រទេស​ចិន។

ទំនប់​វា​រី​អគ្គិសនី Baihetan មាន​ស្ថានីយ​ផលិត​អគ្គិសនី​ចំនួន ១៦ ហើយ​ស្ថានីយនីមួយៗមាន​កម្លាំង ១ លាន​គីឡូ​វ៉ាត។ នេះ​គឺជា​ប្រភេទ​ស្ថានីយ​វា​រី​អគ្គិសនី​ដែលមាន​កម្លាំង​ខ្លាំងជាងគេ​ក្នុង​ពិភពលោក។ ស្ថានីយ​វា​រី​អគ្គិសនី​ទាំងអស់​ដែល​នៅសល់​របស់​ទំនប់​វា​រី​អគ្គិសនី Baihetan នឹងត្រូវ​បានដាក់​ឱ្យ​ដំណើរការ​នៅ​ចុងឆ្នាំ​នេះ។

នៅពេល​ដំណើរការ​ពេញលេញ ទំនប់​វា​រី​អគ្គិសនី Baihetan នឹង​ក្លាយជា​រោងចក្រ​វា​រី​អគ្គិសនី​ធំជាងគេ​លំដាប់​ទី​ពីរ​ក្នុង​ពិភពលោក ស្ដីពី​កម្លាំង​ដំឡើង​សរុប បន្ទាប់ពី​ទំនប់​វា​រី​អគ្គិសនី Three Gorges Dam ដែល​នៅលើ​ទន្លេ Yangtze ក្នុង​ខេត្ត Hubei ភាគ​កណ្ដាល​ប្រទេស​ចិន។

បណ្ដាញ​បំពង់​បង្ហូរ​ឧស្ម័ន​ថ្មី​នេះ នឹង​​តភ្ជាប់​​តំបន់​​​ភាគ​ពាយព្យ​ប្រទេស​ចិន ទៅ​កាន់​​តំបន់​ស្វយ័ត​ Ningxia Hui នៅ​ភាគ​កណ្ដាល​នៃ​តំបន់​ខាង​ជើង​របស់ប្រទេស​នេះ​។

នាថ្ងៃទី ២៨ កញ្ញានេះ ប្រទេស​ចិន​ បាន​សម្ពោធ​បើក​ការដ្ឋាន​សាងសង់​បណ្ដាញ​បំពង់​បង្ហូរ​ឧស្ម័ន​ទី ៤ ក្នុង​ក្រប​ខណ្ឌ​នៃ​គម្រោង​បណ្ដាញ​បំពង់​បង្ហូរ​ថាមពល​ខ្នាត​យក្ស ដែល​បង្ហូរ​ឧស្ម័ន​ធម្មជាតិ​ពី​ភាគ​ខាង​លិច ទៅ​កាន់​ភាគ​ខាង​កើត​ប្រទេស​នេះ​។

ដោយ​មាន​ប្រវែង​សរុប ៣,៣៤០ គីឡូម៉ែត្រ បណ្ដាញ​បំពង់​បង្ហូរ​ឧស្ម័ន​ថ្មី​នេះ​ ​ចាប់ផ្ដើមភ្ជាប់​​ពី​ស្រុក Wuqia នៃ​តំបន់​ស្វយ័ត​ Xinjiang នៅ​ភាគ​ពាយព្យ​ប្រទេស​ចិន ទៅ​កាន់​ទីក្រុង Zhongwei ក្នុង​តំបន់​ស្វយ័ត​ Ningxia Hui នៅ​ភាគ​កណ្ដាល​នៃ​តំបន់​ខាង​ជើង​របស់ ប្រទេស​ចិន​។

ប្រធានក្រុម​ប្រឹក្សាភិបាល​របស់​​ក្រុមហ៊ុន​​បណ្ដាញ​បំពង់​បង្ហូរ​​ប្រេង​ និង​​​ឧស្ម័ន​ចិន (China Oil & Gas Piping Network Corporation) លោក Zhang Wei បាន​ឱ្យ​ដឹង​ថា ក្រោយ​ពី​សាងសង់​រួច​រាល់ បណ្ដាញ​បំពង់​បង្ហូរ​ឧស្ម័ន​នេះ​នឹង​ជួយ​ឱ្យ​ការ​បង្ហូរ​ឧស្ម័ន​របស់គម្រោង​បណ្ដាញ​បំពង់​បង្ហូរ​ខ្នាត​យក្ស​នេះ​ ឡើង​ដល់​ ១០០ ពាន់​លាន​ម៉ែត្រ​គុប​/​ឆ្នាំ​។

លោក Zhang Wei បញ្ជាក់​ថា ក្រុម​ហ៊ុននេះ​កំពុង​ជំរុញ​ការ​ស្ថាបនា​បណ្ដាញ​បំពង់​បង្ហូរប្រេង​ និង​ឧស្ម័ន​នៅ​ ប្រទេស​ចិន ដើម្បី​ធានា​សន្តិសុខ​ថាមពល​សម្រាប់​​ប្រទេស​នេះ​៕