សង្គម និងសេដ្ឋកិច្ច - La Reine Media

Tesla នឹងស្នងតំណែងរបស់ BMW និង Mercedes «ក្លាយជាអ្នកផលិតរថយន្តលំដាប់ប្រណិតបំផុតក្នុងពិភពលោក»

Tesla កំពុងតែបន្តរីកចម្រើនក្នុងល្បឿនយ៉ាងលឿន ខណៈដែលក្រុមហ៊ុននេះកំពុងកំណត់គោលដៅក្លាយជាយីហៅគុណភាពលេខ ១ ក្នុងពិភពលោក។ ប្រការនេះមានន័យថា Tesla នឹងដណ្ដើមយកតំណែងរបស់ BMW។

ក្រុមអ្នកវិភាគយល់ថា ដោយសំអាងលើរោងចក្រខ្នាតយក្សទាំងពីរ គឺ Giga Texas នៅ សហរដ្ឋអាម៉េរិក និង Giga Berlin នៅ អាល្លឺម៉ង់ ក្រុមហ៊ុន Tesla នឹងសម្រេចផែនការយកឈ្នះលើ BMW និង Mercedes នៅឆ្នាំ ២០២៣។

យោងតាម Reuters ក្រុមហ៊ុន Tesla ជឿថា ពួកគេនឹងផលិតរថយន្តអគ្គិសនី Model 3 និង Model Y ចំនួន ៤៩៥,០០០ គ្រឿង នៅក្នុងត្រីមាសទី ៤ ឆ្នាំនេះ។ ចំណែកក្នុងត្រីមាសទី ៣ Tesla បានប្រគល់ជូនអតិថិជនចំនួន ៣៤៣,៨៣០ គ្រឿង។ ក្រុមអ្នកវិភាគសង្ឃឹមថា Tesla នឹងផ្គត់ផ្គង់ដល់ទីផ្សារសរុបប្រហែល ១.៤ លានគ្រឿងនៅក្នុងឆ្នាំនេះ។

ការពង្រីករោងចក្រ Giga Shanghai និង Fremont របស់ Tesla ក៏នឹងធានាដល់បរិមាណរថយន្តមានការកើនឡើងជាបន្តបន្ទាប់ បើទោះជាបញ្ហាទាក់ទិននឹងបណ្ដាញផ្គត់ផ្គង់កំពុងកើតមាននៅក្នុងវិស័យរថយន្ត។

អ្នកវិភាគជាច្រើនជឿថា Tesla នឹងផ្គត់ផ្គង់រថយន្តអគ្គិសនី ២ លានគ្រឿងក្នុងឆ្នាំក្រោយ។ នៅក្នុងឆ្នាំនោះ Tesla នឹងក្លាយជាការគំរាមកំហែងពិតប្រាកដចំពោះ Mercedes និង BMW ជាក្រុមហ៊ុនផលិតរថយន្តដែលលក់បាន ២.១ លានគ្រឿង និង ២.៥ លានគ្រឿងក្នុងឆ្នាំកន្លង។

បើសិនជា Tesla អាចយកឈ្នះលើក្រុមហ៊ុនទាំងនេះ Tesla នឹងក្លាយជាអ្នកផលិតរថយន្តលំដាប់គុណភាពខ្ពស់បំផុតក្នុងពិភពលោក៕

October 3, 2022

ស្រឡាងហោះប្រើថាមពលអគ្គិសនីទាំងស្រុង អាចដឹកអ្នកដំណើរបាន ១៥០ នាក់

ម៉ូដែលស្រឡាងហោះអគ្គិសនីដែលមិនបំភាយឧស្ម័ននេះនឹងដឹកអ្នកដំណើរលើផ្ទៃទឹកនៅក្នុងបណ្ដាទីក្រុងដែលមានការកកស្ទះចរាចរណ៍ខ្លាំង និងក្នុងល្បឿន ៦៩ គីឡូម៉ែត្រ/ម៉ោង។

ក្រុមហ៊ុន Artemis Technologies បានបង្ហាញមធ្យោបាយដឹកជញ្ជូន EF-24 ដំណើរការដោយថាមពលអគ្គិសនី ១០០%។ EF-24 គឺជាមធ្យោបាយធ្វើដំណើរមួយក្នុងចំណោមកប៉ាល់មិនបំភាយឧស្ម័នដែលត្រូវបានផលិតដោយក្រុមហ៊ុន Artemis Technologies ដែលមានទីស្នាក់ការកណ្ដាលនៅ Belfast អៀរឡង់ខាងជើង នេះបើតាម Interesting Engineering ចុះផ្សាយកាលពីថ្ងៃទី ០១ តុលា។

EF-24 ដែលមានបណ្ដោយ ២៤ ម៉ែត្រ «ហោះ» លើផ្ទៃទឹកដោយប្រើប្រាស់បច្ចេកវិទ្យារុញដោយថាមពលអគ្គិសនី ជួយកាត់បន្ថយការកកិតជាមួយនឹងរលកទឹក ផ្ដល់ផាសុកភាពដល់អ្នកដំណើរ ១៥០ នាក់។ ស្រឡាងនេះនឹងផ្លាស់ទីដោយស្លាបនៅខាងក្រោមទឹក ដែលលើកដងខ្លួនស្រឡាងផុតពីផ្ទៃទឹក ដូចទៅនឹងពេលយន្តហោះរៀបនឹងហោះឡើង នៅក្នុងល្បឿនអតិបរមា ៦៩ គីឡូម៉ែត្រ/ម៉ោង។

ស្រឡាង EF-24 ដែលជាលទ្ធផលនៃកិច្ចសហការរវាង Artemis Technologies និងសាកលវិទ្យាល័យ Queen Belfast នេះ ប្រើប្រាស់បច្ចេកវិទ្យាពិសេស ធានាសុវត្ថិភាពនៅពេលធ្វើដំណើរ ដោយមិនឱ្យប៉ះទង្គិចជាមួយនឹងមច្ឆាជាតិ និងវត្ថុនានានៅក្នុងទឹក។

«ស្រឡាងដឹកអ្នកដំណើរល្បឿនលឿនរបស់យើង នាំមកនូវដំណោះស្រាយផ្នែកចរាចរណ៍សាធារណៈប្រកបដោយការសន្សំសំច័យ ជួយកាត់បន្ថយការបំពុលបរិស្ថាន ការកកស្ទះចរាចរណ៍ និងសំឡេងរំខាន» បណ្ឌិត Iain Percy OBE ដែលជាស្ថាបនិក និងជានាយកប្រតិបត្តិរបស់ក្រុមហ៊ុន Artemis Technologies ឱ្យដឹងដូច្នេះ។

EF-24 នឹងត្រូវបានដាក់ឱ្យដំណើរការដឹកអ្នកដំណើររវាង Belfast និង Bangor នៅ អៀរឡង់ខាងជើង ដែលប្រើពេល ២៥ នាទី។ កម្មវិធីសាកល្បងគ្រោងនឹងចាប់ផ្ដើមពីឆ្នាំ ២០២៤ ដោយ Artemis Technologies សហការជាមួយ Condor Ferries៕

October 3, 2022

តម្លៃប្រេងឥន្ធនៈនៅ កម្ពុជា សម្រាប់រយៈពេលពីថ្ងៃទី ០១ ដល់ទី ១០ តុលា ២០២២

តម្លៃមធ្យមប្រេងឥន្ធនៈលើទីផ្សារអន្តរជាតិ ចាប់ពីថ្ងៃទី ០១ ដល់ទី ១០ តុលា ២០២២ គឺ ៤,៥១៦ រៀល ក្នុង ១ លីត្រ សម្រាប់សាំងធម្មតា និង ៤,៩៦៧ លីត្រ សម្រាប់ប្រេងម៉ាស៊ូត។

យោងតាមតម្លៃខាងលើ ក្រសួងពាណិជ្ជកម្ម បានកំណត់ថា ចាប់ពីថ្ងៃទី ០១ ដល់ទី ១០ តុលា ២០២២ ថ្លៃលក់រាយប្រេងឥន្ធនៈនៅ កម្ពុជា នឹងត្រូវលក់ ៤,២៥០ រៀល ក្នុង ១ លីត្រ សម្រាប់សាំងធម្មតា និង ៤,៧០០/លីត្រ សម្រាប់ប្រេងម៉ាស៊ូត។

ដូច្នេះ ធៀបនឹងមុននេះ តម្លៃប្រេងឥន្ធនៈ ចាប់ពីថ្ងៃទី ០១ ដល់ទី ១០ តុលា ២០២២ បានធ្លាក់ថ្លៃ ១០០ រៀល សម្រាប់ប្រេងសាំងធម្មតា និង ១៥០ រៀល សម្រាប់ប្រេងម៉ាស៊ូត។

October 3, 2022

កូរ៉េខាងត្បូង ចំណាយ ៤០ លានដុល្លារ ដើម្បីសង្គ្រោះវិស័យគីមជី (Kimchi) ក្នុងស្រុក

រដ្ឋាភិបាលកូរ៉េខាងត្បូង ទើបតែបានសម្រេចសាងសង់រោងចក្រចំនួន ២ បន្ថែមទៀត ដើម្បីរក្សាទុកស្ពៃបូកគោ ដែលមានតម្លៃ ៤០ លានដុល្លារអាម៉េរិក ក្នុងគ្រាដែលបណ្ដាក្រុមហ៊ុនផលិតជ្រក់គីមជីនៅប្រទេសនេះ ជួបបញ្ហាកង្វះប្រភពផ្គត់ផ្គង់។

សារព័ត៌មាន Reuters បានឱ្យដឹងថា រោងចក្ររក្សាស្ពៃបូកគោនីមួយៗ មានទំហំ ៩,៩០០ ម៉ែត្រក្រឡា នឹងត្រូវបានសាងសង់នៅតំបន់ជនបទក្នុងទឹកដី Goesan និង Haenam។ ទំហំសរុបរបស់រោងចក្រទាំងពីរនេះគឺប្រហាក់ប្រហែលនឹងទីលានបាល់ទាត់ចំនួន ៣ និងអាចរក្សាទុកស្ពៃបូកគោបានរហូតដល់ ១០,០០០ តោន និងជ្រក់ស្ពៃបូគោបាន ៥០ តោនជារៀងរាល់ថ្ងៃ។

គម្រោងរោងចក្រទាំងខាងលើដែលគ្រោងនឹងត្រូវចំណាយប្រហែល ៥៨ ពាន់លានវ៉ុន (៤០ លានដុល្លារអាម៉េរិក) នេះ នឹងត្រូវបានសាងសង់រួចរាល់ជាស្ថាពរនៅឆ្នាំ ២០២៥។

ស្ថានភាពអាកាសធាតុប្រែប្រួលក្នុងរយៈពេលប៉ុន្មានឆ្នាំមកនេះ បានបណ្ដាលឱ្យមានសីតុណ្ហភាពកើនឡើងខ្ពស់ និងភ្លៀងធ្លាក់ច្រើនជាងមុន ធ្វើឱ្យប្រភពផ្គត់ផ្គង់ស្ពៃបូកគោដែលជាវត្ថុធាតុដើមសំខាន់របស់គីមជី ត្រូវថយចុះច្រើន។ ក្នុងឆ្នាំនេះ តម្លៃស្ពៃបូកគោនៅ កូរ៉េខាងត្បូង បានកើនឡើងទ្វេដងក្នុងរង្វង់មិនដល់ ៣ ខែ ដោយមូលហេតុបណ្ដាលមកពីអតិផរណាក្នុងខែកក្កដាឆ្នាំនេះ បានកើនឡើងខ្ពស់បំផុតក្នុងអំឡុង ២៤ ឆ្នាំចុងក្រោយនេះ។

លោក Ahn Ik-jin នាយកប្រតិបត្តិរបស់ក្រុមហ៊ុនផលិតគីមជី Cheongone Organic បានឱ្យដឹងថា «យើងតែងតែទិញស្ពៃបូកគោនៅក្នុងខែមិថុនា ដើម្បីរក្សាទុក និងប្រើប្រាស់បណ្ដើរៗ បន្ទាប់ពីតម្លៃកើនឡើង។ ប៉ុន្តែ ឆ្នាំនេះ យើងអស់ទំនិញរលីងហើយ»។

«យើងធ្លាប់ផលិតគីមជី ១៥ តោនជារៀងរាល់ថ្ងៃ។ ប៉ុន្តែ ពេលនេះ តួលេខនេះនៅសល់តែ ១០ តោន ឬទាបជាងនេះ» លោក Ahn Ik-jin បញ្ជាក់ និងបន្ថែមថា ក្រុមហ៊ុនបានដំឡើងតម្លៃគីមជីដល់ ២/៣ ធៀបនឹងតម្លៃមុននោះ ពោលគឺស្មើនឹង ៣.៥ ដុល្លារអាម៉េរិក/គីឡូក្រាម។

វិស័យឧស្សាហកម្មគីមជីរបស់ កូរ៉េខាងត្បូង បានធ្លាក់ចុះក្នុងរយៈពេលយ៉ាងយូរ ខណៈដែលការនាំចូលពី ប្រទេសចិន (តម្លៃស្មើនឹង ១/៣ នៃតម្លៃគីមជីដែលផលិតក្នុងស្រុក) បានកើនឡើងក្នុងរង្វង់ ២ ទសវត្សរ៍កន្លង ដោយកាន់កាប់ចំណែកទីផ្សារគីមជីក្នុង ប្រទេសកូរ៉េខាងត្បូង ប្រមាណ ៤០%។

យោងតាមការស្រាវជ្រាវរបស់ Korea Rating & Data កាលពីឆ្នាំមុន ជិតពាក់កណ្ដាលក្នុងចំណោមអ្នកផលិតគីមជី របស់ កូរ៉េខាងត្បូង បានបិទទ្វារជារៀងរហូត ឬងាកទៅរកអាជីវកម្មផ្សេង។ ក្នុងពេលនេះ ក្រុមអ្នកផលិតគីមជីនៅ កូរ៉េខាងត្បូង កំពុងតែរំពឹងថា គម្រោងថ្មីរបស់រដ្ឋាភិបាល យ៉ាងហោចណាស់ក៏នឹងអាចជួយឱ្យបណ្ដាក្រុមហ៊ុនផលិតគីមជីក្នុងស្រុក មិនបាត់បង់ «មុខនាទី»៕

October 1, 2022

រ៉ូបូតជើងពីរដែលរត់បានលឿនជាងគេបង្អស់ក្នុងពិភពលោក

រ៉ូបូត Cassie បង្កើតបានកំណត់ត្រាពិភពលោក Guinness ស្ដីពីរ៉ូបូតជើងពីរដែលរត់លឿនជាងគេក្នុងរយៈចម្ងាយ ១០០ ម៉ែត្រ ដែលនេះគឺជាស្នាដៃដ៏អស្ចារ្យ។

Cassie គឺជារ៉ូបូតរបស់ Agility Robotics ដែលជាក្រុមហ៊ុនបច្ចេកវិទ្យារបស់សាកលវិទ្យាល័យ Oregon ត្រូវបានបង្ហាញកាលពីឆ្នាំ ២០១៧។ កាលពីឆ្នាំ ២០២១ Cassie ចំណាយពេលតែជាង ៥៣ នាទីប៉ុណ្ណោះ ក្នុងការរត់ចម្ងាយ ៥ គីឡូម៉ែត្រ។

Cassie ត្រូវបានបង្កើតឡើងជាមួយនឹងបច្ចេកវិទ្យាទំនើបៗជាច្រើន ហើយក្បាលជង្គង់របស់វា ត្រូវបានផលិតឡើងដូចទៅនឹងសត្វអូទ្រីសដើម្បីអាចរក្សាលំនឹងបានល្អ។ Cassie ស្ថិតក្នុងចំណោមរ៉ូបូតជើងពីរដែលចេះរត់ ក្នុងនោះមានដូចជា រ៉ូបូតរាងមនុស្ស Atlas របស់ Boston Dynamics និង Mabel របស់សាកលវិទ្យាល័យ Michigan ជាដើម។

មុននឹងបង្កើតបានកំណត់ត្រាពិភពលោក Guinness រ៉ូបូត Cassie បានជោគជ័យក្នុងការរត់ចម្ងាយ ១០០ ម៉ែត្រ ដោយចំណាយពេល ២៤.៧៣ វិនាទី។ ល្បឿននេះ យឺតជាងឆ្ងាយ បើធៀបនឹងអ្នករត់ប្រណាំងឆ្នើមជាងគេក្នុងពិភពលោក ដែលចំណាយពេលរត់មិនដល់ ១០ វិនាទី។ ក៏ប៉ុន្តែ ក្រុមអ្នកស្រាវជ្រាវយល់ថា លទ្ធផលនេះអាចកែលំអបាននាពេលខាងមុខ៕

October 1, 2022

ក្រុមហ៊ុន Dongfeng Motor នាំចេញរថយន្តអគ្គិសនី SUV Voyah ៥០០ គ្រឿង ទៅកាន់ ន័រវែស

ន័រវែស គឺជាទីសំចតដំបូងរបស់ Voyah សម្រាប់ទីផ្សារអន្តរជាតិ ហើយក្រុមហ៊ុន Dongfeng គ្រោងនឹងវាយលុកចូលទីផ្សាររបស់ប្រទេសមួយចំនួនទៀតនៅ តំបន់អឺរ៉ុប។

កាលពីដើមសប្ដាហ៍នេះ Dongfeng Motor បានប្រកាសថា រថយន្តប្រភេទ SUV អគ្គិសនីយីហោ Voyah Free ដំបូងចំនួន ៥០០ គ្រឿង នឹងត្រូវដឹកទៅកាន់ ប្រទេសន័រវែស។ ទំនិញខាងលើត្រូវបានដឹកពីរោងចក្ររបស់ Dongfeng Motor នៅ Wuhan ខេត្ត Hebei ប្រទេសចិន ដែលជាទីស្នាក់ការកណ្ដាលរបស់ពួកគេ។

ក្រុមហ៊ុននេះបានឱ្យដឹងថា នឹងប្រគល់ Voyah Free ដល់ដៃអតិថិជននៅ ន័រវែស ចាប់ពីចុងខែវិច្ឆិកាខាងមុខ។

ន័រវែស គឺជាទីសំចតដំបូងរបស់ Voyah សម្រាប់ទីផ្សារអន្តរជាតិ ហើយក្រុមហ៊ុន Dongfeng គ្រោងនឹងវាយលុកចូលទីផ្សាររបស់ប្រទេសមួយចំនួនទៀត មានដូចជា ស៊ុយអែត ហូឡង់ ដាណឺម៉ាក ជាដើម ដោយចាប់ផ្ដើមពីឆ្នាំក្រោយ។

Dongfeng Motor បានប្រកាសបញ្ចេញរថយន្តម៉ាក Voyah និង Voyah FREE កាលពីចុងឆ្នាំ ២០២០ ដើម្បីអនុវត្តមហិច្ឆតាវាយលុកទីផ្សាររថយន្តអគ្គិសនីលើពិភពលោក។ Voyah FREE បច្ចុប្បន្នមានតម្លៃចាប់ពី ៣១៣,៦០០ យុន (៤៣,៧៦០ ដុល្លារអាម៉េរិក) ដល់ ៣៩៣,៦០០ យុន នៅ ប្រទេសចិន។

Voyah Space ដែលជាហាងដំបូងរបស់ Voyah ដែលនៅខាងក្រៅ ប្រទេសចិន។ ហាងនេះត្រូវបានបើកដំណើរការនៅ ន័រវែស តាំងពីខែមិថុនា ២០២២៕

October 1, 2022

ក្រុមហ៊ុន CATL សង់រោងចក្រផលិតថ្មផ្ទុកថាមពលអគ្គិសនី ដើម្បីត្រៀមសម្រាប់យុគសម័យ TWh និងតាមតម្រូវការទីផ្សាររថយន្តអគ្គិសនី

ក្រុមហ៊ុន CATL មានគម្រោងសាងសង់រោងចក្រផលិតថ្មផ្ទុកអគ្គិសនីថ្មីនៅទីក្រុង Luoyang នៃខេត្ត Henan ប្រទេសចិន ដើម្បីត្រៀមទទួលយក «យុគសម័យ TWh (terawatt hour/តេរ៉ាវ៉ាត់ម៉ោង) ដែលនឹងមកដល់នាប៉ុន្មានឆ្នាំខាងមុខ។

គម្រោងរបស់ CATL (Contemporary Amperex Technology) ដែលនឹងមានទុនវិនិយោគឡើងដល់ ១.៩ ពាន់លានដុល្លារអាម៉េរិកនេះ ធ្វើឡើងក្នុងបំណងជំរុញការអភិវឌ្ឍពាណិជ្ជកម្ម និងការផ្គត់ផ្គង់តាមតម្រូវការទីផ្សារយានយន្តអគ្គិសនី ដែលកំពុងកើនឡើងយ៉ាងឆាប់រហ័ស។

រោងចក្រនេះគ្រោងនឹងសាងសង់រួចរាល់ដោយប្រើពេល ៣៦ ខែ រាប់ចាប់ពីថ្ងៃបើកការដ្ឋាន។ គម្រោងនេះ គ្រោងនឹងអនុវត្តនៅលើផ្ទៃដីប្រមាណ ១១២ ហិកតា នៅក្នុងទីក្រុង Luoyang នៃខេត្ត Henan ប្រទេសចិន។

យោងតាមព័ត៌មានដែលត្រូវបានប្រកាសនៅលើគេហទំព័រក្រុមហ៊ុន បច្ចុប្បន្ន CATL មានរោងចក្រផលិតថ្មផ្ទុកអគ្គិសនីសរុបចំនួន ១០ កន្លែង នៅពាសពេញពិភពលោក។

ក្រុមហ៊ុនចិន CATL នេះ គឺជាអ្នកផលិតថ្មផ្ទុកអគ្គិសនីធំជាងគេបង្អស់នៅ ប្រទេសចិន ក្នុងនោះមាន ១២.៩៩ GWh ត្រូវបានដំឡើងក្នុងខែសីហា ២០២២ និងកំពុងកាន់កាប់ចំណែកទីផ្សារ ៤៦.៧៩%។ យោងតាម SNE Research ក្រុមហ៊ុន CATL ក៏នាំមុខគេក្នុងទីផ្សារថ្មផ្ទុកថាមពលអគ្គិសនីទូទាំងពិភពលោក ដោយកាន់កាប់ចំណែកទីផ្សារ ៣៣.៥% ក្នុងខែកក្កដា ២០២២៕

September 30, 2022

ផែនទីអេឡិចត្រូនិច (Google Map) សម្រាប់រកទីតាំងច្រកចេញ-ចូល ផ្លូវល្បឿនលឿនភ្នំពេញ-ក្រុងព្រះសីហនុ

ផ្លូវល្បឿនលឿនភ្នំពេញ-ក្រុងព្រះសីហនុ ដែលនឹងបើកឱ្យប្រើប្រាស់សាកល្បងដោយឥតគិតថ្លៃ ចាប់ពីថ្ងៃទី០១ ដល់ថ្ងៃទី ៣១ ខែតុលា ឆ្នាំ ២០២២ ខាងមុខនេះ មានច្រកចេញ-ចូល ចំនួន ៨ កន្លែង។

ក្រសួងសាធារណការ និងដឹកជញ្ជូន បានបង្ហាញទីតាំងតាមរយៈតំណភ្ជាប់ផែនទី Google Map ដែលប្រាប់អំពីច្រកចេញ-ចូលទាំងនោះដូចខាងក្រោម ៖

១- ភ្នំពេញ ផ្លូវកប់ស្រូវ (គ.ម 3): https://maps.app.goo.gl/GEjwTC9bxG1Nnf7U6?g_st=it

២- កំពង់ស្ពឺខាងកើត (គ.ម 26): https://maps.app.goo.gl/hkVAo6wHgtyAVMTw6?g_st=it

៣- កំពង់ស្ពឺខាងលិច (គ.ម 43): https://maps.app.goo.gl/7wkmuctNm277bmwL8?g_st=it

៤- ត្រែងត្រយឹង (គ.ម 76): https://maps.app.goo.gl/dCMLrP2e7HTKxQrk8?g_st=it

៥- កំពង់សិលា (គ.ម 114): https://maps.app.goo.gl/EQc2N1p3fMbdpmxo8?g_st=it

៦- ស្រែអំបិល (គ.ម 135): https://maps.app.goo.gl/91UDqjrSvBcSzwmv6?g_st=it

៧- ស្ទឹងហាវ (គ.ម 172): https://maps.app.goo.gl/b2ZXe1eQt8q3gDRy8?g_st=it

៨- ក្រុងព្រះសីហនុ (គ.ម 182): https://maps.app.goo.gl/MRdX3368qDfDcfZV7?g_st=it

September 30, 2022

ប្រទេសចិន និង សហរដ្ឋអាម៉េរិក គឺជាដៃគូពាណិជ្ជកម្មសំខាន់ជាងគេរបស់ អាស៊ាន

ប្រទេសចិន ឈរលំដាប់លេខ ១ នៅក្នុងតារាងចំណាត់ថ្នាក់ស្ដីពីដៃគូពាណិជ្ជកម្មសំខាន់ៗរបស់ សមាគមប្រជាជាតិអាស៊ីអាគ្នេយ៍ (អាស៊ាន) នៃព្រឹត្តិបត្រពាណិជ្ជកម្មលេខ ០៣ វ៉ុលទី ០២ ខែកញ្ញា ឆ្នាំ ២០២២ ចេញផ្សាយដោយ ក្រសួងពាណិជ្ជកម្មកម្ពុជា នៅថ្ងៃទី ៣០ កញ្ញា ២០២២។

នៅក្នុងព្រឹត្តិបត្រពាណិជ្ជកម្មនេះ ក្រសួងបានឱ្យដឹងថា អាស៊ាន គឺជាខឿនសេដ្ឋកិច្ចធំទី ៥ ក្នុងពិភពលោកក្នុងឆ្នាំ ២០២១ ហើយ ប្រទេសចិន គឺជាដៃគូពាណិជ្ជកម្មសំខាន់ជាងគេរបស់ អាស៊ាន ដោយទំហំពាណិជ្ជកម្មទ្វេភាគីឡើងដល់ ៧៣២.៩៦ ពាន់លានដុល្លារអាម៉េរិក ដែលស្មើនឹង ២១.៣៨% ធៀបនឹងទំហំពាណិជ្ជកម្មសរុបរវាង អាស៊ាន និងពិភពលោក។

ឈរលំដាប់ទី ២ គឺ សហរដ្ឋអាម៉េរិក ដោយទំហំពាណិជ្ជកម្មទ្វេភាគីជាមួយ អាស៊ាន ឡើងដល់ ៣៧៣.៧៨ ពាន់លានដុល្លារ ស្មើនឹង ១០.៩០%។ សហភាពអឺរ៉ុប ឈរលំដាប់ទី ៣ (២៨២.០១ ពាន់លានដុល្លារអាម៉េរិក ស្មើនឹង ៨.២៣%), ជប៉ុន (២៣៨.៩០ ពាន់លានដុល្លារ ស្មើនឹង ៦.៩៧%), កូរ៉េខាងត្បូង (១៩១.២៥ ពាន់លានដុល្លារ ស្មើនឹង ៥.៥៨%)។ ទំហំពាណិជ្ជកម្មរវាង អាស៊ាន និងបណ្ដាប្រទេសក្រៅពីប្រទេសទាំងឡាយខាងលើគឺមានប្រមាណជិត ៤៧% ធៀបនឹងទំហំពាណិជ្ជកម្មសរុបរវាង អាស៊ាន និងពិភពលោក។

ក្រៅពីនេះ ព្រឹត្តិបត្រខាងលើក៏បានឱ្យដឹងថា បច្ចុប្បន្ន អាស៊ាន មានកិច្ចព្រមព្រៀងពាណិជ្ជកម្មចំនួន ០៦ ដែលត្រូវបានចុះហត្ថលេខារួចរាល់ ជាមួយនឹងបណ្ដាប្រទេស និងដែនដីមួយចំនួន រួមមាន អាស៊ាន-ចិន, អាស៊ាន-ឥណ្ឌា, អាស៊ាន-សាធារណរដ្ឋកូរ៉េ, អាស៊ាន-ជប៉ុន, អាស៊ាន-អូស្ត្រាលី-នូវែលសេឡង់, អាស៊ាន-ហុងកុង រួមនឹងកិច្ចព្រមព្រៀងមួយចំនួនផ្សេងទៀតដែលកំពុងស្ថិតក្នុងការចរចា ក៏ដូចជាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយជាមួយបណ្ដាប្រទេសផងដែរ។

September 30, 2022

យន្តហោះដំណើរការដោយថាមពលនុយក្លេអែរ «ហោះពី ញូវយ៉ក ទៅ សិង្ហបុរី» ចំណាយពេលតែជាង ៣ ម៉ោងប៉ុណ្ណោះ

អ្នករចនាម៉ូដជនជាតិអេស្ប៉ាញ បានបង្ហាញគំនិត (concept) ស្ដីពីយន្តហោះល្បឿនមហាលឿន គឺលឿនជាងទ្វេដង ធៀបនឹងកំពូលយន្តហោះ Concorde និងអាចដឹកអ្នកដំណើរបាន ១៧០ នាក់។

ការហោះហើរពី ក្រុងឡុងដ៍ របស់ អង់គ្លេស ទៅកាន់ ញូវយ៉ក របស់ សហរដ្ឋអាម៉េរិក ដោយចំណាយពេលតែ ៨០ នាទី អាចក្លាយជាការពិតនាពេលអនាគត ដោយប្រើប្រាស់ Hyper Sting ដែលជាគំនិតស្ដីពីយន្តហោះល្បឿនមហាលឿន ដំណើរការដោយថាមពលនុយក្លេអែរ នេះបើតាមសារព័ត៌មាន Sun ចេញផ្សាយកាលពីថ្ងៃទី ២៩ កញ្ញា។

Hyper Sting គឺជាគំនិតរបស់អ្នករចនាជនជាតិអេស្ប៉ាញ Oscar Vinals។ លោក Oscar ឱ្យដឹងថា យន្តហោះនេះអាចហោះក្នុងល្បឿនធម្មតាប្រហែល ៤ ពាន់គីឡូម៉ែត្រក្នុង ១ ម៉ោង និងល្បឿនអតិបរមា ៤,២៨៧ គីឡូម៉ែត្រ/ម៉ោង លឿនជាង ៣ ដងធៀបនឹងល្បឿនរបស់សំឡេង និងលឿនជាងទ្វេដងធៀបនឹងកំពូលយន្តហោះ Concorde របស់ អង់គ្លេស និងបារាំង។

Hyper Sting មានរូបរាងធំជាងឆ្ងាយធៀបនឹង Concorde និងអាចដឹកអ្នកដំណើរបាន ១៧០ នាក់។ យន្តហោះក្នុងក្ដីស្រមៃនេះមានបណ្ដោយដងខ្លួនប្រវែង ១០០ ម៉ែត្រ និងស្លាបប្រវែង ៥២ ម៉ែត្រ។ យន្តហោះនេះមានម៉ាស៊ីនប្រតិកម្មនុយក្លេអែរមួយគ្រឿង ជាប្រភពថាមពលសម្រាប់ម៉ាស៊ីនជំនាន់ថ្មីចំនួន ៦ របស់វា។

លោក Oscar Vinals និយាយថា Hyper Sting គឺជាគំនិតថ្មីសម្រាប់យន្តហោះល្បឿនលឿនជាងសំឡេងនាពេលអនាគត។

ជើងហោះហើរពាណិជ្ជកម្មដែលវែងបំផុតក្នុងពិភពលោកនាបច្ចុប្បន្នគឺ ១៥,៣៤៨ គីឡូម៉ែត្រ ពី ញូវយ៉ក ទៅកាន់ សិង្ហបុរី ដោយចំណាយពេលប្រហែល ១៩ ម៉ោង ប៉ុន្តែ Hyper Sting អាចហោះបានចម្ងាយនេះដោយប្រើពេលតែ ៣ ម៉ោង និង ៤០ នាទីប៉ុណ្ណោះ៕

September 30, 2022

Category: សង្គម និងសេដ្ឋកិច្ច