មហាគម្រោង Gati Shakti តម្លៃ ១.២ ទ្រីលាន (១,២០០,០០០,០០០,០០០) ដុល្លារអាម៉េរិក ត្រូវបាន ឥណ្ឌា រំពឹងថា នឹងប្រែក្លាយប្រទេសនេះទៅជាមជ្ឈមណ្ឌលផលិតរបស់សកលលោក ជំនួសឱ្យ ប្រទេសចិន។
គំនិតផ្ដួចផ្ដើម Gati Shakti ដែលក្នុង ភាសាហិណ្ឌូ មានន័យថា «ថាមពលរបស់ល្បឿន» ត្រូវបានរដ្ឋាភិបាលរបស់លោកនាយករដ្ឋមន្ត្រីឥណ្ឌា Narendra Modi លើកឡើងដើម្បីកសាងថ្នាលបច្ចេកវិទ្យាឌីជីថលមួយដែលមានផ្ទុកស្ថាប័នចំនួន ១៦។ ថ្នាលព័ត៌មានវិទ្យានេះនឹងផ្ដល់ជាយន្តការច្រកចេញ-ចូលតែមួយប្រកបដោយភាពងាយស្រួលសម្រាប់ក្រុមអ្នកវិនិយោគ និងសហគ្រាសនៅក្នុងការបង្កើត អនុម័តគម្រោងវិនិយោគនានា និងកាត់បន្តយការចំណាយ។
ប្រហែលពាក់កណ្ដាលនៃគម្រោងហេដ្ឋារចនាសម្ព័ន្ធនៅ ឥណ្ឌា កំពុងតែជួបបញ្ហាយឺតយ៉ាវ ខណៈ ២៥% ផ្សេងទៀតត្រូវដំឡើងទុន ធៀបនឹងគម្រោងដំបូង។ នាយករដ្ឋមន្ត្រី Modi ជឿថា មហាគម្រោង Gati Shakti ដែលមានតម្លៃ ១០០,០០០ ពាន់លានរូពី (១.២ ទ្រីលានដុល្លារអាម៉េរិក) នេះ នឹងជាដំណោះស្រាយសម្រាប់បញ្ហាខាងលើ។
«ភារកិច្ចរបស់ Gati Shakti គឺអនុវត្តបណ្ដាគម្រោងដោយមិនឱ្យមានភាពយឺតយ៉ាវ និងដំឡើងទុន» មន្ត្រីនៃក្រសួងឧស្សាហកម្ម និងពាណិជ្ជកម្មឥណ្ឌា Amrit Lal Meena ឱ្យដឹងដូច្នេះ។ «គោលដៅគឺការប្រែក្លាយ ឥណ្ឌា ទៅជាជម្រើសដំបូងដើម្បីឱ្យបណ្ដាក្រុមហ៊ុនអន្តរជាតិ កសាងមជ្ឈមណ្ឌលផលិតរបស់ពួកគេនៅទីនេះ»។
មហាគម្រោងនេះត្រូវបានរំពឹងថា នាំមកនូវអំណោយផលល្អសម្រាប់ ឥណ្ឌា ក្នុងគ្រាដែល ប្រទេសចិន ហាក់បិទទ្វារដោយសារកូវីដ-១៩ មានភាពស្មុគ្រស្មាញ។ បណ្ដាក្រុមហ៊ុនអន្តរជាតិក៏កំពុងស្វែងរកទីផ្សារថ្មីក្រៅពីប្រទេសចិន ដើម្បីពង្រីក និងធ្វើពិពិធកម្មអាជីវកម្ម ក៏ដូចជាបណ្ដាញផ្គត់ផ្គង់របស់ពួកគេ។
ផែនការមេ Gati Shakti តម្លៃ ១.២ ទ្រីលាន (១,២០០,០០០,០០០,០០០) ដុល្លារអាម៉េរិក របស់ ឥណ្ឌា នឹងអាចប្រកួតប្រជែងបានជាមួយ ប្រទេសចិនឥណ្ឌា ដែលជាខឿនសេដ្ឋកិច្ចធំជាងគេលំដាប់ទីបីនៅ អាស៊ី មិនត្រឹមតែអាចផ្គត់ផ្គង់កម្លាំងពលកម្មតម្លៃទាបនោះទេ តែកម្លាំងពលកម្មនៅទីនេះភាគច្រើនអាចនិយាយភាសាអង់គ្លេស បើទោះហេដ្ឋារចនាសម្ព័ន្ធនៅមានកម្រិត និងខ្វះភាពទាក់ទាញសម្រាប់អ្នកវិនិយោគ។
«វិធីតែមួយគត់ដើម្បីប្រកួតប្រជែងជាមួយ ប្រទេសចិន គឺការកាត់បន្ថយចំណាយបានកាន់តែច្រើន កាន់តែល្អ» Anshuman Sinha ដៃគូប្រចាំ Kearney India ដែលជាក្រុមហ៊ុនខ្នាតយក្សក្នុងវិស័យដឹកជញ្ជូន និងហេដ្ឋារចនាសម្ព័ន្ធឥណ្ឌា អះអាងដូច្នេះ និងបន្តថា «Gati Shakti នឹងធ្វើឱ្យទំនិញចរាចរណ៍បានងាយស្រួលជាងបច្ចុប្បន្ន នៅទូទាំងប្រទេស»។
លោក Anshuman Sinha និយាយថា ភារកិច្ចរបស់មហាគម្រោង Gati Shakti គឺកំណត់ទីតាំងដែលមានសក្ដានុពលដើម្បីសាងសង់មជ្ឈមណ្ឌលផលិតថ្មី តភ្ជាប់មជ្ឈមណ្ឌលទាំងនេះជាមួយបណ្ដាញផ្លូវដែក កំពង់ផែ និងព្រលានយន្តហោះ។
នាយករដ្ឋមន្ត្រីឥណ្ឌា លោក Modi បានឱ្យដឹងថា «ឥណ្ឌា សន្យាថា ជំរុញការវិនិយោគលើការអភិវឌ្ឍហេដ្ឋារចនាសម្ព័ន្ធទំនើប ធានាមិនឱ្យគម្រោងនានាជួបឧបសគ្គ។ ហេដ្ឋារចនាសម្ព័ន្ធគុណភាពខ្ពស់គឺជាគន្លឹះដើម្បីដំណើរការសកម្មភាពសេដ្ឋកិច្ច ទន្ទឹមនឹងនេះក៏បង្កើតការងារទ្រង់ទ្រាយធំ។ មិនមានហេដ្ឋារចនាសម្ព័ន្ធ ឥណ្ឌា នឹងមិនអាចរីកចម្រើនគ្រប់វិស័យ»៕
