ការដែល OPEC+ កាត់បន្ថយបរិមាណប្រេងឆៅ អាចធ្វើឱ្យតម្លៃប្រេងងើបឡើងទៅកាន់រង្វង់ ១០០ ដុល្លារ/ធុង ហើយបញ្ហាអតិផរណានឹងពិបាកថមថយ ប៉ុន្តែវាអាចនឹងជួយឱ្យ រុស្ស៊ី រកបានប្រាក់ច្រើន ចំណែក សហរដ្ឋអាម៉េរិក វិញ កាន់តែជួបបញ្ហា។
កាលពីថ្ងៃទី ០៥ តុលា ក្រោយពីកិច្ចប្រជុំផ្ទាល់លើកដំបូងរាប់ចាប់តាំងពីឆ្នាំ ២០២០ នៅ រដ្ឋធានីវីយែន ប្រទេសអូទ្រីស អង្គការនៃបណ្ដាប្រទេសនាំចេញប្រេងរ៉ែ និងសម្ព័ន្ធមិត្ត (OPEC+) បានប្រកាសថា ចាប់ពីខែវិច្ឆិកា នឹងមានការកាត់បន្ថយការផលិតប្រេងឆៅ ២ លានធុងជារៀងរាល់ថ្ងៃ។
ភាគហ៊ុនថាមពលបានឡើងថ្លៃបន្តិច បន្ទាប់ពីមានព័ត៌មានខាងលើ។ ចំណែកតម្លៃប្រេងឆៅបានកើនឡើងមុនកិច្ចប្រជុំរបស់ OPEC+ នៅពេលក្រុមអ្នកវិភាគបានព្យាករអំពីលទ្ធផលនៃកិច្ចប្រជុំនោះ។
ក្រោយពីព័ត៌មានស្ដីពីការកាត់បន្ថយការផលិតប្រេង ២ លានធុង/ថ្ងៃ ត្រូវបានប្រកាស តម្លៃប្រេងឆៅកាលពីម្សិលមិញបានហក់ឡើងខ្ពស់បំផុតក្នុងអំឡុង ៣ សប្ដាហ៍មកនេះ។ ប្រេងឆៅ Brent ឡើងថ្លៃ ២.០១ ដុល្លារ ស្មើនឹង ២.២% ដោយត្រូវបានជួញដូរក្នុងតម្លៃ ៩៣.៨១ ដុល្លារ/ធុង កាលពីម៉ោង ១៥ និង ៤០ នាទី (GMT)។ ក្នុងថ្ងៃដដែល តម្លៃរបស់ប្រេងនេះ មានពេលខ្លះបានឡើងដល់ ៩៣.៩៦ ដុល្លារ/ធុង ខ្ពស់បំផុតរាប់ពីថ្ងៃទី ១៥ កញ្ញា។
«គោលបំណងនៃការកាត់បន្ថយបរិមាណប្រេងឆៅរបស់ OPEC+ គឺដើម្បីទប់ការធ្លាក់ថ្លៃរបស់ប្រេងឆៅ។ បើសិនជាពួកគេជោគជ័យ ប្រេងសាំងក៏នឹងឈប់ធ្លាក់ថ្លៃ និងត្រូវបានជួញដូរក្នុងរង្វង់តម្លៃដូចបច្ចុប្បន្ន រហូតដល់ពេលរងផលប៉ះពាល់ពីកត្តាទីផ្សារអ្វីមួយ» Bob McNally អ្នកវិភាគផ្នែកថាមពលរបស់ Rapidan Energy Group យល់ឃើញដូច្នេះ។
Rohan Reddy ប្រធានផ្នែកស្រាវជ្រាវរបស់ Global X ETFs ជឿថា ការសម្រេចចិត្តរបស់ OPEC+ អាចធ្វើឱ្យតម្លៃប្រេងឆៅងើបឡើងទៅកាន់តម្លៃ ១០០ ដុល្លារ/ធុង បើសិនជាមិនមានរលកនៃការផ្ទុះឆ្លងកូវីដ-១៩ ទ្រង់ទ្រាយសកល និង រតនាគារជាតិអាម៉េរិក មិនដំឡើងការប្រាក់ខ្ពស់ភ្លាមៗ។
ចំណាត់ការនេះរបស់ OPEC+ ក៏អាចធ្វើឱ្យសម្ពាធនៃអតិផរណានៅ សហរដ្ឋអាម៉េរិក និង អឺរ៉ុប កើនឡើងខ្ពស់បន្ថែមទៀត នេះបើតាមការវាយតម្លៃរបស់ Stephen Brennock អ្នកវិភាគជាន់ខ្ពស់មកពី PVM Oil Associates នៅ ទីក្រុងឡុងដ៍។
ចំណែក រុស្ស៊ី វិញ នឹងមានប្រៀបជាងគេនៅក្នុងបញ្ហាហិរញ្ញវត្ថុ។ ថវិកាភាគច្រើនរបស់ វិមានក្រឹមឡាំង ពឹងផ្អែកលើការលក់ឧស្ម័ន និងប្រេង។ ជោគជ័យក្នុងការកាត់បន្ថយការផលិតប្រេងឆៅ នឹងជួយឱ្យ រុស្ស៊ី មានឱកាសលក់ប្រេងក្នុងតម្លៃខ្ពស់ជាងបច្ចុប្បន្ន។
ក្រៅពីបញ្ហាខាងលើ ការកាត់បន្ថយបរិមាណប្រេងរបស់ OPEC+ ក៏នឹងអាចប៉ះពាល់ដល់ការបោះឆ្នោតពាក់កណ្ដាលអាណត្តិនៅ សហរដ្ឋអាម៉េរិក ដែលនឹងត្រូវធ្វើឡើងប្រហែល ១ ខែទៀតប៉ុណ្ណោះ។ តម្លៃប្រេងសាំងចុះទាបក្នុងរដូវក្ដៅនេះបានរួមចំណែកសំខាន់ក្នុងការលើកកម្ពស់អនុភាពផ្នែកនយោបាយរបស់ បក្សកាន់អំណាច ជាក្រុមដែលកំពុងតែប្រឈមមុខនឹងការបោះឆ្នោតដ៏លំបាក៕
