សង្គម និងសេដ្ឋកិច្ច - La Reine Media

តម្លៃប្រេងឆៅពិភពលោក ឡើងខ្ពស់បំផុតក្នុងរង្វង់ ៥ សប្ដាហ៍

តម្លៃប្រេង Brent ឡើងជិតដល់ ១០០ ដុល្លារក្នុង ១ ធុង នៅក្នុងការជួញដូរកាលពីព្រឹកមិញ ដែលនេះគឺជាការឡើងថ្លៃបន្តបន្ទាប់ ក្រោយពី OPEC+ សម្រេចកាត់បន្ថយការផលិតប្រេង។

បន្ទាប់ពីបានបើកទ្វារជួញដូរនាព្រឹកនេះ ប្រេងឆៅ Brent ឡើងដល់ ៩៨.៧៥ ដុល្លារ/ធុងបារ៉ែល ខ្ពស់បំផុតរាប់ចាប់ពីថ្ងៃទី ៣០ សីហា។ ប្រេងឆៅរបស់ អាម៉េរិក WTI ក៏បានឡើងដល់ចំណុចកំពូលក្នុងរង្វង់ ៥ សប្ដាហ៍កន្លងមកនេះ ដោយត្រូវបានជួញដូរ ៩៣.៤៨ ដុល្លារ/ធុង។

ប្រេងឆៅទាំងពីរប្រភេទខាងលើបានឡើងថ្លៃក្នុងល្បឿនយ៉ាងលឿននៅក្នុងការជួញដូរប៉ុន្មានថ្ងៃកន្លងទៅនេះ ក្រោយពីក្រុមប្រទេសនាំចេញប្រេង និងដៃគូ (OPEC+) បានសម្រេចចិត្តកាត់បន្ថយការផលិតប្រេង ២ លានធុងក្នុង ១ ថ្ងៃ ចាប់ពីខែវិច្ឆិកា ២០២២។ ការសម្រេចចិត្តនេះក៏ត្រូវបានធ្វើឡើងបន្ទាប់ពី សហភាពអឺរ៉ុប គ្រោងនឹងហាមការនាំចូលប្រេងរបស់ រុស្ស៊ី ដែលមានសុពលភាពចាប់ពីដើមធ្នូខាងមុខ។

ក៏ប៉ុន្តែ មកដល់ថ្ងៃត្រង់នេះ តម្លៃប្រេងខាងលើបានធ្លាក់ចុះបន្តិច ក្នុងនោះ ប្រេង Brent បច្ចុប្បន្នធ្លាក់ថ្លៃ ០.៩% ចុះមកនៅត្រឹម ៩៧.០៤ ដុល្លារ/ធុង ខណៈដែល WTI ធ្លាក់ថ្លៃ ០.៨៤% មកនៅត្រឹម ៩១.៨៦ ដុល្លារ៕

October 10, 2022

គម្រោងផ្លូវដែកថៃ-ឡាវ គ្រោងនឹងដំណើរការពាណិជ្ជកម្មចាប់ពីពាក់កណ្ដាលឆ្នាំ ២០២៣

ក្រុមហ៊ុនផ្លូវដែកថៃ (SRT) បានឱ្យដឹងថា ការតភ្ជាប់គម្រោងផ្លូវដែកឡាវ-ថៃ កំពុងតែត្រូវបានធ្វើឡើងដូចទៅនឹងផែនការ ហើយគម្រោងនេះគ្រោងនឹងដំណើរការពាណិជ្ជកម្មចាប់ពីពាក់កណ្ដាលឆ្នាំក្រោយ។

យោងតាម SRT ប្រទេសថៃ និង ឡាវ បច្ចុប្បន្នកំពុងតែបណ្ដុះបណ្ដាលបុគ្គលិកសម្រាប់ការដំណើរការរថភ្លើង និងសេវាកម្មដែលទាក់ទងនានា។

ក្រោយពីកម្មវិធីបណ្ដុះបណ្ដាលបានបញ្ចប់នៅក្នុងខែធ្នូ ២០២២ ភាគីថៃ និង ឡាវ នឹងពិភាក្សាគ្នាអំពីការដំណើរការរថភ្លើង និងតម្លៃសំបុត្រ រួមនឹងបញ្ហាផ្សេងៗ។ កិច្ចចរចានេះនឹងត្រូវធ្វើរួចរាល់នៅមុនពេលដំណើរការរថភ្លើងទៅតាមផែនការនៅពាក់កណ្ដាលឆ្នាំ ២០២៣។

គម្រោងតភ្ជាប់ផ្លូវដែកថៃ – ឡាវ នឹងភ្ជាប់ខេត្ត Nongkhai (ប្រទេសថៃ) ជាមួយនឹង រដ្ឋធានីវៀងចន្ទន៍ របស់ ឡាវ ដែលពីទីនេះនឹងតភ្ជាប់ជាមួយនឹងផ្លូវដែកឡាវ – ចិន ដែលរត់ទៅដល់ខេត្ត Kunming (ប្រទេសចិន)។ គម្រោងនេះក៏ត្រូវបានគេរំពឹងថា នឹងជំរុញពាណិជ្ជកម្មឆ្លងព្រំដែន និងទេសចរណ៍រវាងប្រទេស ៣ គឺ ថៃ ឡាវ និង ចិន។

នៅពេលដាក់ឱ្យដំណើរការដំណាក់កាលដំបូងនៅពាក់កណ្ដាលឆ្នាំក្រោយ គម្រោងផ្លូវដែកខាងលើនឹងមានជើងរថភ្លើងទៅមកចំនួន ៤ ជារៀងរាល់ថ្ងៃ។ ផ្លូវរថភ្លើងនេះក៏រត់ឆ្លងកាត់កំពង់ផែស្ងួត Thanaleng ផងដែរ។

យោងតាមក្រុមហ៊ុនផ្លូវដែកថៃ ដំណាក់កាលទីពីរនៃការដំណើរការផ្លូវដែកថៃ – ឡាវ នេះ នឹងចាប់ផ្ដើមពីឆ្នាំ ២០២៤ ដោយការតភ្ជាប់ទៅកាន់ស្ថានីយ Udon Thani និង Nakhon Ratchasima ជាមួយនឹងជើងរថភ្លើងចំនួន ២ រត់ពីស្ថានីយ Nakhon Ratchasima ទៅកាន់ Vientiane Khamsavath និងត្រលប់មកវិញ។

ដំណាក់កាលទីបីដែលដំណើរការពីឆ្នាំ ២០២៥ របស់គម្រោងផ្លូវដែកថៃ – ឡាវ នឹងត្រូវបានភ្ជាប់ទៅកាន់ស្ថានីយ Bang Sue ដែលតភ្ជាប់ រាជធានីបាងកក របស់ ថៃ ជាមួយនឹង Vientiane Khamsavath របស់ ឡាវ៕

October 10, 2022

ទួរប៊ីនខ្យល់ដែលមានកម្លាំងផលិតអគ្គិសនីខ្ពស់បំផុតនៅប្រទេសចិន

ក្រុមហ៊ុន Huadian new Energy របស់ ចិន ជិតដំឡើងរួចរាល់នូវទួរប៊ីនខ្យល់កម្លាំង ៦.៧ megawatt ដំបូងរបស់ប្រទេសនេះ នៅក្នុងតំបន់ស្វយ័ត Xinjiang។

យោងតាម Huadian New Energy រចនាសម្ព័ន្ធសំខាន់របស់ទួរប៊ីនខ្យល់នេះដែលរួមមាន សសរទ្រ និងស្លាបកង្ហារខ្នាតយក្ស ត្រូវបានខ្ទូចដាក់ដំឡើងកាលពីថ្ងៃទី ០៦ តុលា និងកំពុងស្ថិតក្នុងដំណាក់កាលដំឡើងចរន្តអគ្គិសនី។

ទួរប៊ីនខ្យល់នេះ មានកម្ពស់រហូតដល់ ១១០ ម៉ែត្រ (ស្មើនឹងអគារកម្ពស់ ៣០ ជាន់) គិតត្រឹមចំណុចកណ្ដាលរបស់ស្លាបកង្ហារ, ស្លាបកង្ហារនីមួយៗមានប្រវែង ៩៣ ម៉ែត្រ ខណៈដែលស្នូលកណ្ដាលរបស់ទួរប៊ីនមានទម្ងន់ ១៣៤ តោន។ នេះគឺជាទួរប៊ីនខ្យល់ដែលមានទំហំធំជាងគេបំផុតនៅតំបន់ Xinjiang។ វាក៏ជាទួរប៊ីនទោលដែលមានកម្លាំងខ្លាំងបំផុតរបស់ ប្រទេសចិន នាបច្ចុប្បន្ន។

ទួរប៊ីន ៦.៧ megawatt នេះគឺជាផ្នែកមួយនៃគម្រោងផលិតអគ្គិសនីដោយថាមពលខ្យល់ Mulei Forty Wells ដែលមានកម្លាំង ៨០០ megawatt និងប្រព័ន្ធទួរប៊ីន ១២៥ ឈុត។ នេះគឺជាប្រភេទទួរប៊ីនដែលសមស្របនឹងបរិស្ថាន អាចដំណើរការប្រកបដោយស្ថិរភាពក្នុងបណ្ដាស្ថានីយផលិតអគ្គិសនីដើរដោយកម្លាំងខ្យល់នៅលើដីគោក ដែលមានកម្លាំងខ្យល់ខ្លាំង និងមធ្យម។

ទុនវិនិយោគសរុបរបស់គម្រោងនេះគឺ ៤.១៨ ពាន់លានយុន (៥៨៧ លានដុល្លារអាម៉េរិក)។ ក្រោយពីសាងសង់រួចរាល់ ស្ថានីយនេះនឹងផលិតអគ្គិសនីប្រចាំឆ្នាំបាន ២.២ ពាន់លាន kWh ជួយកាត់បន្ថយការប្រើប្រាស់ធ្យូងថ្មបាន ៦៧០,០០០ តោន និងកាត់បន្ថយការបំភាយឧស្ម័នកាបូនឌីអុកស៊ីត បាន ១.៧៦ លានតោន» Song Yanfeng អនុប្រធាននៃគម្រោង Mulei Forty Wells ឱ្យដឹងដូច្នេះ។

ក្នុងប៉ុន្មានឆ្នាំមកនេះ ដោយយោងទៅលើប្រភពថាមពលខ្យល់ដ៏ច្រើន តំបន់ស្វយ័ត Xinjiang បាន និងកំពុងផលិតអគ្គិសនីស្អាត និងផ្គត់ផ្គង់ដល់បណ្ដាតំបន់នៅភាគកណ្ដាល និងភាគខាងកើតរបស់ ប្រទេសចិន។ ស្រុក Mulei បច្ចុប្បន្នមានក្រុមហ៊ុនផលិតអគ្គិសនីដើរដោយថាមពលខ្យល់ចំនួន ៤១ ស្ថាប័ន ដោយមានទំហំនៃការផលិតអគ្គិសនីឡើងដល់ ៤.៥៩ ពាន់លាន kWh ចាប់ពីខែមករា ដល់ខែសីហា ឆ្នាំនេះ៕

October 10, 2022

ថ្មផ្ទុកអគ្គិសនីដែលអាចឱ្យឡានរត់បានចម្ងាយ ៦៣០ គីឡូម៉ែត្រ ក្រោយបញ្ចូលថាមពលម្ដង

ក្រុមអ្នកវិទ្យាសាស្ត្របានអភិវឌ្ឍថ្មផ្ទុកអគ្គិសនីមួយប្រភេទដែលមានដង់ស៊ីតេថាមពលខ្ពស់ជាង ៤០% ធៀបនឹងបណ្ដាប្រភេទថ្មផ្ទុកអគ្គិសនីមុនៗ។

វិស័យឧស្សាហកម្មថ្មផ្ទុកអគ្គិសនីក្នុងស្រុករបស់ កូរ៉េខាងត្បូង បានកំណត់គោលដៅស្វែងរកវិធីថ្មីដើម្បីបង្កើនសមត្ថភាពផ្ទុកអគ្គិសនីរបស់ថ្ម ដោយការប្រើប្រាស់បច្ចេកវិទ្យាថ្មី ឬវត្ថុធាតុ anode ផ្សេងទៀត។

ក៏ប៉ុន្តែ ក្រុមអ្នកស្រាវជ្រាវនៅសាកលវិទ្យាល័យវិទ្យាសាស្ត្រ និងបច្ចេកវិទ្យា Pohang (POSTECH) និងវិទ្យាស្ថានជាតិវិទ្យាសាស្ត្រ និងបច្ចេកវិទ្យា Ulsan (UNIST) បានអភិវឌ្ឍថ្ម lithium ដែលមិនប្រើប្រាស់វត្ថុធាតុ anode ដែលអាចប្រើបានយូរជាងមុន បន្ទាប់ពីបញ្ចូលថាមពលម្ដង នេះបើតាម Science Daily ចេញផ្សាយកាលពីថ្ងៃទី ០៦ តុលា។ លទ្ធផលនៃការស្រាវជ្រាវនេះ ត្រូវបានបោះពុម្ភផ្សាយនៅលើទំព័រទស្សនាវដ្ដី Advanced Functional Materials។

ថ្មផ្ទុកអគ្គិសនីថ្មីនេះមានដង់ស៊ីតេថាមពលកម្រិត ៩៧៧ Wh/លីត្រ ខ្ពស់ជាង ៤០% ធៀបនឹងបណ្ដាប្រភេទថ្មបច្ចុប្បន្ន (៧០០ Wh/លីត្រ)។ ប្រការនេះមានន័យថា ថ្មថ្មីនេះអាចអនុញ្ញាតឱ្យរថយន្តធ្វើដំណើរបាន ៦៣០ គីឡូម៉ែត្រ បន្ទាប់ពីបានបញ្ចូលថាមពលម្ដង។ ជាងនេះ ក្រុមអ្នកស្រាវជ្រាវខាងលើក៏បានរកឃើញវិធីធ្វើឱ្យថ្មីផ្ទុកអគ្គិសនីនេះមានអាយុកាលវែងជាងមុនផងដែរ។

October 8, 2022

ក្រុមហ៊ុនមេរបស់ TikTok ខាតជាង ៧ ពាន់លានដុល្លារអាម៉េរិក កាលពីឆ្នាំមុន

ByteDance ដែលជាក្រុមហ៊ុនមេរបស់ TikTok មានការខាតបង់ជាង ៣ ដងក្នុងឆ្នាំកន្លង ឡើងដល់ ៧ ពាន់លានដុល្លារអាម៉េរិក ដោយសារការចំណាយច្រើនដើម្បីការរីកចម្រើន។

Wall Street Journal ដកស្រង់របាយការណ៍ហិរញ្ញវត្ថុផ្ទៃក្នុងរបស់ ByteDance ឱ្យដឹងថា កាលពីឆ្នាំកន្លង ខ្ទង់ខាតបង់របស់ក្រុមហ៊ុននេះគឺ ៧.១៥ ពាន់លានដុល្លារអាម៉េរិក ខ្ពស់ជាង ៣ ដង ធៀបនឹង ២.១២ ពាន់លានដុល្លារកាលពីឆ្នាំ ២០២០។

ទោះជាយ៉ាងណាក៏ដោយ ByteDance រកបានប្រាក់ចំណេញក្នុងត្រីមាសដំបូងនៃឆ្នាំ ២០២២។ នេះគឺជាសញ្ញាបង្ហាញថា ក្រុមហ៊ុនបច្ចេកវិទ្យានេះជិតដល់ដំណាក់កាលមានប្រាក់ចំណេញច្រើន ក្រោយពីខាតបង់អស់ច្រើនឆ្នាំ។

ByteDance កម្រនឹងចែករំលែកអំពីព័ត៌មានហិរញ្ញវត្ថុរបស់ខ្លួន។ របាយការណ៍ខាងលើនេះត្រូវបានផ្ញើទៅកាន់បុគ្គលិកកាលពីខែសីហា ២០២២ ក្នុងនោះមានទាំងទិន្នន័យពីឆ្នាំ ២០២០, ២០២១ និងត្រីមាសដំបូងនៃឆ្នាំ ២០២២។

របាយការណ៍ខាងលើបង្ហាញថា ប្រាក់ចំណូលរបស់ ByteDance កើនជិត ៨០% ឡើងដល់ ៦១.៧ ពាន់លានដុល្លារ ក្នុងឆ្នាំ ២០២១។ ក៏ប៉ុន្តែ ការចំណាយរបស់ពួកគេក៏កើនឡើងខ្ពស់ ដោយសារផ្ដោតទៅលើកំណើននៃការរីកចម្រើនរបស់ក្រុមហ៊ុន។ ប្រាក់ចំណាយសម្រាប់ការស្រាវជ្រាវ និងអភិវឌ្ឍ (R&D) គឺ ១៤.៦ ពាន់លានដុល្លារ។ ចំណាយសម្រាប់ការផ្សព្វផ្សាយ និងការលក់គឺ ១៩.២ ពាន់លានដុល្លារ។ ការចំណាយដទៃទៀតគឺ ២៧.៤ ពាន់លានដុល្លារ។

ត្រីមាសដំបូងឆ្នាំនេះ ប្រាក់ចំណូលរបស់ ByteDance សម្រេចបាន ១៨.៣ ពាន់លានដុល្លារ កើន ៥៤% ធៀបនឹងឆ្នាំកន្លេង។ ការចំណាយដែលត្រូវបានកាត់បន្ថយ បានជួយឱ្យពួកគេមានប្រាក់ចំណេញមុនបង់ពន្ធ៕

October 8, 2022

គោលនយោបាយ «លើកទឹកចិត្តរថយន្តអគ្គិសនី» របស់ ប្រទេសថៃ ទទួលបានចំណាប់អារម្មណ៍ច្រើនពីអ្នកវិនិយោគ

ក្រោយពី ប្រទេសថៃ ប្រកាសគោលនយោបាយលើកទឹកចិត្តសម្រាប់វិស័យរថយន្តអគ្គិសនីកាលពីដើមឆ្នាំ ពេលនេះមានក្រុមហ៊ុនធំៗជាច្រើនកំពុងតែផ្ដោតលើការដំឡើងរថយន្តអគ្គិសនី ការផលិតថ្មផ្ទុកអគ្គិសនី និងការសាងសង់ស្ថានីយបញ្ចូលថាមពលថ្មអគ្គិសនីសម្រាប់រថយន្តអគ្គិសនីនៅប្រទេសនេះ។

គោលនយោបាយលើកទឹកចិត្តដែលរួមមាន ការកាត់បន្ថយអត្រាពន្ធ ការបង្កើនជំនួយដល់អ្នកប្រើប្រាស់ និងអ្នកផលិតជាដើមខាងលើនេះរបស់ ប្រទេសថៃ កំពុងតែទាក់ទាញការវិនិយោគទាំងក្នុង និងក្រៅប្រទេស។ ក្នុងនោះ ក្រុមហ៊ុនប្រេងឥន្ធនៈជាតិរបស់ ប្រទេសថៃ (PTT) ក៏កំពុងតែកំណត់គោលដៅក្លាយជាអ្នកផលិតសំខាន់មួយក្នុងវិស័យឧស្សាហកម្មរថយន្តអគ្គិសនី (EV)។

ប្រធាន និងជានាយកប្រតិបត្តិរបស់ PPT លោក Auttapol Rerkpiboon បានឱ្យដឹងថា បណ្ដាក្រុមហ៊ុនបុត្រសម្ព័ន្ធរបស់ PTT កំពុងជំរុញគម្រោងទាំងឡាយដែលទាក់ទងនឹងរថយន្តអគ្គិសនី ពិសេសគឺជាបណ្ដាគម្រោងដែលមានកិច្ចសហការប្រតិបត្តិជាមួយបណ្ដាក្រុមហ៊ុនបច្ចេកវិទ្យា ដើម្បីអនុវត្តគម្រោងដំឡើងរថយន្តអគ្គិសនី ពង្រីកស្ថានីយបញ្ចូលថាមពល និងផ្ដល់សេវាកម្មជួលរថយន្តអគ្គិសនី។

PTT កំពុងសហការជាមួយ Hon Hai Precision Industry Co, ដែលជាក្រុមហ៊ុនផលិតឧបករណ៍អេឡិចត្រូនិចពហុជាតិ និងមានទីស្នាក់ការកណ្ដាលនៅ កោះតៃវ៉ាន់ និងត្រូវគេស្គាល់ថា Foxconn ដើម្បីបង្កើតរោងចក្រផលិតរថយន្តអគ្គិសនី ដោយមានទុនវិនិយោគចាប់ពី ១ ទៅ ២ ពាន់លានដុល្លារអាម៉េរិក នៅក្នុងតំបន់របៀងសេដ្ឋកិច្ចភាគខាងកើតរបស់ ប្រទេសថៃ។

លោក Auttapol Rerkpiboon និយាយថា មូលដ្ឋាននេះនឹងដើរតួនាទីជួយដល់បណ្ដាក្រុមហ៊ុនបរទេសដែលមានបំណងដំឡើងរថយន្តអគ្គិសនីនៅ ប្រទេសថៃ ជំនួសឱ្យការចំណាយប្រាក់ច្រើនដើម្បីបង្កើតរោងចក្រផលិតរថយន្តអគ្គិសនីយីហោថ្មី។

សកម្មភាពផលិតរថយន្តអគ្គិសនីរបស់ក្រុមហ៊ុន PTT-Foxconn គ្រោងនឹងចាប់ផ្ដើមពីឆ្នាំ ២០២៤ និងអាចដំឡើងបាន ៥ ម៉ឺនគ្រឿងជារៀងរាល់ឆ្នាំ នៅក្នុងឆ្នាំ ២០៣០។

ក្រៅពីការផលិត ឬដំឡើងរថយន្តអគ្គិសនី ក្រុមហ៊ុន PTT ក៏កំពុងតែអភិវឌ្ឍផ្នែកពាណិជ្ជកម្មលើថ្មផ្ទុកអគ្គិសនី តាមរយៈកិច្ចសហការជាមួយបណ្ដាក្រុមហ៊ុនផលិតថ្មអគ្គិសនី ក៏ដូចជាការស្រាវជ្រាវ អភិវឌ្ឍដើម្បីកែលំអបច្ចេកវិទ្យាថ្ម។

PTT នឹងផលិតថ្មសម្រាប់រថយន្តអគ្គិសនី ដោយការប្រើប្រាស់បច្ចេកវិទ្យារបស់ 24M Technologies Inc ដែលជាក្រុមហ៊ុនមួយរបស់ សហរដ្ឋអាម៉េរិក៕

October 8, 2022

គម្រោងបង្កើតរោងចក្រកាត់ដេរសម្លៀកបំពាក់ថ្មីមួយទៀត ទទួលបានការអនុម័តពី ក្រុមប្រឹក្សាអភិវឌ្ឍន៍កម្ពុជា

សំណើសុំវិនិយោគលើគម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន CONCEPT CREATOR FASHION (CAMBODIA) CO., LTD ត្រូវបានអនុម័តចុះបញ្ជីគម្រោងវិនិយោគរួចហើយពី គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា។

យោងតាម ក្រុមប្រឹក្សាអភិវឌ្ឍន៍កម្ពុជា គម្រោងខាងលើនេះ នឹងមានទីតាំងវិនិយោគស្ថិតនៅអគារ A ភូមិត្រពាំងភ្លូ ឃុំអូរសារាយ ស្រុកត្រាំកក់ ខេត្តតាកែវ។

ក្រុមប្រឹក្សាអភិវឌ្ឍកម្ពុជា បានឱ្យដឹងថា ក្រុមហ៊ុន CONCEPT CREATOR FASHION (CAMBODIA) CO., LTD គ្រោងនឹងបណ្ដាក់ទុនវិនិយោគប្រមាណ ៥.៨ លានដុល្លារអាមេរិក និងអាចបង្កើតការងារបានចំនួន ១,៤៤១ កន្លែង៕

October 7, 2022

មួកសុវត្ថិភាពបំពាក់បច្ចេកវិទ្យាជួយឱ្យក្រុមពន្លត់អគ្គិភ័យមើលធ្លុះផ្សែង

(ស្កុតឡេន)-មួកសុវត្ថិភាពរបស់ក្រុមអ្នកស្រាវជ្រាវនៅសាកលវិទ្យាល័យ Edinburgh បំពាក់កាំមេរ៉ា រ៉ាដា អង្គញាណ ដែលជួយឱ្យបុគ្គលិកពន្លត់អគ្គិភ័យរកឃើញជនរងគ្រោះ និងស្គាល់បុគ្គលិករួមក្រុមបានដោយងាយ។

បុគ្គលិកពន្លត់អគ្គិភ័យទាំងនេះកំពុងមួកសុវត្ថិភាពដែលមានបំពាក់បច្ចេកវិទ្យាបញ្ញាសិប្បនិម្មិត (AI)។

មួកសុវត្ថិភាពដែលអភិវឌ្ឍឡើងដោយក្រុមអ្នកស្រាវជ្រាវនៅសាកលវិទ្យាល័យ Edinburgh នេះ ជួយឱ្យក្រុមពន្លត់អគ្គិភ័យមើលធ្លុះផ្សែង។ ឧបករណ៍កាមេរ៉ា រ៉ាដា និងអង្គញាណដែលបំពាក់លើមួកនេះ មានតួនាទីប្រមូលទិន្នន័យ។

«អ្នកមើលឃើញហើយនេះ មានអង្គញាណសំខាន់ចំនួន ២ នៅទីនេះ» Chris Xiaoxuan Lu សាស្ត្រាចារ្យរងនៅសាកលវិទ្យាល័យ Edinburgh បង្ហាញមួកពិសេស។ «មួយគឺកាមេរ៉ាស្កែនកម្ដៅ ជាអង្គញាណពិសេសអាចមើលធ្លុះផ្សែង ហើយពួកវាធ្វើការក្នុងប្រវែងរលក (wavelength) ខុសៗគ្នា។ AI បកស្រាយបង្ហាញអំពីទិន្នន័យដល់អ្នកប្រើប្រាស់មួកភ្លាមៗ។

ប្រការខាងលើនេះជួយឱ្យបុគ្គលិកពន្លត់អគ្គិភ័យរកឃើញជនរងគ្រោះ ស្គាល់បុគ្គលិករួមក្រុម និងកំណត់ទីតាំងរបស់ខ្លួននៅកន្លែងកើតហេតុបានដោយងាយ។

មួកនេះមិនត្រឹមតែផ្ដល់លទ្ធផលព្យាករដល់បុគ្គលិកពន្លត់អគ្គិភ័យ «ជួរមុខ» នោះទេ តែក៏បញ្ជូនទិន្នន័យនេះទៅកាន់ក្រុមមេបញ្ជាការនៅខាងក្រៅផងដែរ។ ក្រោយមក មេបញ្ជាការអាចប្រើប្រាស់ទិន្នន័យទាំងនេះដើម្បីណែនាំសហការប្រកបដោយប្រសិទ្ធភាពសម្រាប់បុគ្គលិកពន្លត់អគ្គិភ័យនៅខាងក្នុង។

ការពិសោធនេះមានការចូលរួមពីក្រុមពន្លត់អគ្គិភ័យមកពីនាយកដ្ឋានសង្គ្រោះ និងពន្លត់អគ្គិភ័យស្កុតឡេន។ Glynn Macaffer មេបញ្ជាការម្នាក់មកពី នាយកដ្ឋានសង្គ្រោះ និងពន្លត់អគ្គិភ័យស្កុតឡេន និយាយថា «វាមិនប៉ះពាល់ដល់សកម្មភាព។ ឧបករណ៍នៅលើមួកសុវត្ថិភាពនេះស្រាលខ្លាំងណាស់បើធៀបនឹងប្រភេទមួកដែលយើងកំពុងប្រើប្រាស់»៕

October 7, 2022

ប្រទេសឡាវ អភិវឌ្ឍថ្នាលបច្ចេកវិទ្យាសម្រាប់ការជួញដូរប្រាក់ឌីជីថលដំបូង

ថ្មីៗនេះ ថ្នាលបច្ចេកវិទ្យា Bitqik បានចាប់ផ្ដើមដំណើរការជាផ្លូវការនូវមជ្ឈមណ្ឌលជួញដូរប្រាក់ឌីជីថលដំបូងនៅ ប្រទេសឡាវ។

ប្រាក់ឌីជីថលគឺជាវិស័យមួយដែលទទួលបានការយកចិត្តទុកដាក់ខ្ពស់ពីប្រទេសនានា និងអ្នកវិនិយោគក្នុងមួយរយៈពេលចុងក្រោយនេះ។ ប៉ុន្តែ ប្រទេសឡាវ មិនទាន់មានថ្នាលជួញដូរប្រាក់ឌីជីថលផ្ទាល់ខ្លួន ធ្វើឱ្យអ្នកវិនិយោគក្នុងវិស័យប្រាក់ឌីជីថលជួបការលំបាក នៅពេលត្រូវប្រើប្រាស់ថ្នាលបច្ចេកវិទ្យារបស់បរទេស។ Simeuang Group បានឆ្លៀតយកឱកាសនេះ អភិវឌ្ឍថ្នាល Bitqik ដើម្បីជួយដល់សកម្មភាពទិញដូរប្រាក់ឌីជីថលនៅ ប្រទេសឡាវ។

Bitqik គឺជាថ្នាលបច្ចេកវិទ្យាសម្រាប់ការទិញដូរប្រាក់ឌីជីថលតាមអនឡាញដែលទទួលបានវិញ្ញាបនបត្រទទួលស្គាល់ និងចុះបញ្ជីពាណិជ្ជកម្មពី ធនាគារជាតិរបស់ ឡាវ។ ក្រុមហ៊ុនអភិវឌ្ឍ និងដំណើរការសេវាកម្ម Bitqik គឺ Simeuang Group របស់លោក Ekaphan Phaphithak ដែលជាប្រធានក្រុមប្រឹក្សាភិបាលនៃធនាគារអភិវឌ្ឍន៍ចម្រុះ (Joint Development Bank-JDB)។

បច្ចុប្បន្ន Bitqik អាចធ្វើការជួញដូរប្រាក់ឌីជីថល ២០ ប្រភេទ រួមមាន BTC, ETH, USDT, BNB, ADA, XRP, BUSD, SOL, DOGE, DOT, TRX, DAI, AVAX, SHIB, MATIX, LTC, NEAR, UNI, ETC និង BCH។ ប៉ុន្តែ Bitqik នៅតែត្រូវប្រឈមនឹងបញ្ហាមួយចំនួន ពិសេសគឺស្ថានការណ៍ធ្លាក់ថ្លៃរបស់ប្រាក់ឌីជីថលមួយចំនួនធំ ដោយសារតែ រតនាគារជាតិអាម៉េរិក (Fed) ដំឡើរការប្រាក់ ខណៈដែលប្រាក់ឌីជីថលភាគច្រើនកំពុងស្ថិតក្នុងដំណាក់កាលបង្ហាញអំពីតម្លៃរបស់ខ្លួន។

ដូច្នេះ Bitqik ត្រូវតែអភិវឌ្ឍប្រព័ន្ធអតិថិជន អភិវឌ្ឍប្រព័ន្ធទីផ្សារប្រកបដោយសមកាលកម្ម និងទូលំទូលាយ។ល។ បើសិនចង់អភិវឌ្ឍខ្លួនទៅជាថ្នាលជួញដូរប្រាក់ឌីជីថលលំដាប់កំពូលនៅ ប្រទេសឡាវ នាពេលខាងមុខ៕

October 7, 2022

United Airlines របស់ សហរដ្ឋអាម៉េរិក កំណត់គោលដៅប្រើប្រាស់យន្តហោះអគ្គិសនីដើម្បីបន្ថយការបំភាយឧស្ម័ន

ដើម្បីសម្រេចបានគោលដៅរបស់ក្រុមហ៊ុន ក្នុងការកាត់បន្ថយទាំងស្រុងនូវការបំភាយឧស្ម័នកាបូនឱ្យចុះមកនៅត្រឹម ០ ក្នុងឆ្នាំ ២០៥០ United Airlines របស់ សហរដ្ឋអាម៉េរិក កំពុងរៀបផែនការប្រើប្រាស់យន្តហោះអគ្គិសនីសម្រាប់ជើងហោះហើរក្នុងតំបន់ នៅឆ្នាំ ២០៣០។

យោងតាម CNBC បណ្ដាយន្តហោះដែលប្រើប្រាស់ថ្មផ្ទុកអគ្គិសនីនេះ កំពុងតែត្រូវបានអភិវឌ្ឍដោយក្រុមហ៊ុន Heart Aerospace របស់ ស៊ុយអែត។ United Airlines បានបញ្ជាទិញយន្តហោះអគ្គិសនី ១០០ គ្រឿង ពីក្រុមហ៊ុនខាងលើ កាលពីខែកក្កដា ២០២១។ ទន្ទឹមនឹងនេះ ក្រុមហ៊ុនអាកាសចរណ៍អាម៉េរិក មួយនេះ ក៏បានវិនិយោគទឹកប្រាក់មួយចំនួនទៅក្នុងក្រុមហ៊ុន Heart Aerospace តាមរយៈមូលនិធិបណ្ដាក់ទុនរបស់ខ្លួន។

ក្រៅពីនេះ United Airlines ថ្មីៗនេះក៏បានបង្កើនការវិនិយោគទៅលើវិស័យអាកាសចរណ៍ដែលបំភាយឧស្ម័នកម្រិតទាប ក៏ដូចជាប្រកាសអំពីគម្រោងការទិញតាក់ស៊ីហោះដំណើរការដោយអគ្គិសនី និងយន្តហោះដែលអាចហោះឡើងត្រង់ទៀតផង។

ក្រុមហ៊ុនអាកាសចរណ៍នេះថែមទាំងមានបំណងផ្ដោតការវិនិយោគទៅលើបច្ចេកវិទ្យាមួយចំនួនទៀត រួមមានម៉ូទ័រអគ្គិសនី អ៊ីដ្រូសែន និងបណ្ដាក្រុមហ៊ុនដែលនៅពីក្រោយបច្ចេកវិទ្យាដែលកំពុងរីកចម្រើនខ្លាំងក្លានាបច្ចុប្បន្ន។

ប្រធានក្រុមហ៊ុន United Airlines លោក Mike Leskinen នៅក្នុងក្របខណ្ឌនៃសន្និបាតនិម្មិត ESG Impact របស់ CNBC កាលពីថ្ងៃទី ០៦ តុលា បានឱ្យដឹងថា ក្រុមហ៊ុននេះមិនអាចបន្តការងាររបស់ខ្លួនដូចមុនទៀតទេ នៅក្នុងគ្រាដែលបច្ចេកវិទ្យាមានការរីកចម្រើន និងវិបត្តិអាកាសធាតុកំពុងកើតឡើង។ ដូច្នេះ លោកអះអាងថា United Airlines ត្រូវតែផ្លាស់ប្ដូរវិធីដំណើរការ និងជំនួញ តាមរយៈកញ្ចប់វិនិយោគទៅក្នុងវិស័យបច្ចេកវិទ្យា៕

October 7, 2022

Category: សង្គម និងសេដ្ឋកិច្ច