សង្គម និងសេដ្ឋកិច្ច - La Reine Media

Jeep បង្ហាញរថយន្តអគ្គិសនីដំបូងនៅ ប៉ារីស និងគ្រោងលក់តែរថយន្តអគ្គិសនីសុទ្ធនៅ អឺរ៉ុប ចាប់ពីឆ្នាំ ២០៣០

យីហោរថយន្ត Jeep មានផែនការសម្រេចគោលដៅលក់រថយន្តអគ្គិសនីឱ្យបាន ១០០% នៅចុងទសវត្សរ៍នេះ ក្នុងនោះ រថយន្តអគ្គិសនីដំបូងរបស់ Jeep គឺ Jeep Avenger នឹងត្រូវបានបង្ហាញនៅក្នុងព្រឹត្តិការណ៍ពិព័រណ៍ពិភពរថយន្តប៉ារីស Mondial de L’Automobile នៅសប្ដាហ៍ក្រោយ។

Jeep Avenger ដែលជារថយន្តអគ្គិសនីដំបូងរបស់ Jeep អាចបរបាន ៤០០ គីឡូម៉ែត្រ បន្ទាប់ពីបានបញ្ចូលថាមពលរួច។ Jeep Avenger នឹងត្រូវបានផលិតដោយយោងទៅលើថ្នាល STLA Small។ រថយន្តអគ្គិសនីប្រភេទ SUV ខ្នាតតូចរបស់ Jeep នេះ នឹងមានសមត្ថភាព «មិនរើសសណ្ឋានផ្លូវឡើយ» នេះបើតាម Antonella Bruno មេដឹកនាំរបស់ Jeep អឺរ៉ុប នៃក្រុមហ៊ុន Stellantis។

រថយន្តអគ្គិសនី Jeep Avenger នឹងត្រូវបានផលិតនៅ ប៉ូឡូញ និងមានគម្រោងប្រគល់ដល់ដៃអតិថិជននៅ អឺរ៉ុប នៅដើមឆ្នាំ ២០២៣ មុនពេលបានទៅដល់ដៃអតិថិជននៅ ជប៉ុន និង កូរ៉េខាងត្បូង។ល។

Jeep មានគម្រោងបង្ហាញរថយន្តអគ្គិសនីច្រើនម៉ូដែលបន្ថែមទៀតនៅឆ្នាំ ២០២៥ និងកំណត់គោលដៅថា រថយន្ត Jeep ដែលត្រូវបានលក់នៅ អឺរ៉ុប ចាប់ពីឆ្នាំ ២០៣០ នឹងសុទ្ធតែជារថយន្តអគ្គិសនី។ រថយន្តអគ្គិសនីម៉ូដែលបន្តបន្ទាប់របស់ Jeep រួមមាន Jeep Wagoneer S និង Jeep Recon។

October 13, 2022

កម្ពុជា ឈរលំដាប់លេខ ៥ ក្នុងការព្យាករអំពីកំណើន GDP ឆ្នាំ ២០២២ នៅតំបន់ ASEAN+3

ស្ថាប័ន AMRO ព្យាករថា សេដ្ឋកិច្ចរបស់ កម្ពុជា នឹងមានកំណើន ៥% ក្នុងឆ្នាំនេះ ហើយឈរលំដាប់ទី ៥ នៅក្នុងតំបន់ ASEAN+3 ដោយនៅពីក្រោម ម៉ាឡេស៊ី វៀតណាម ហ្វ៊ីលីពីន និង ឥណ្ឌូណេស៊ី។

ការិយាល័យស្រាវជ្រាវម៉ាក្រូសេដ្ឋកិច្ច ASEAN+3 (AMRO) ថ្មីៗនេះបានប្រកាសទិន្នន័យថ្មីសម្រាប់ខែតុលា ២០២២ នៃរបាយការណ៍ស្ដីពី «ទស្សនវិស័យសេដ្ឋកិច្ចតំបន់ ASEAN+3 ឆ្នាំ ២០២២»។

យោងតាមរបាយការណ៍ខាងលើ AMRO ព្យាករថា តំបន់អាស៊ាន (ASEAN) នឹងមានកំណើន ៥.៣% ក្នុងឆ្នាំនេះ ខ្ពស់ជាងការព្យាករកាលពីខែកក្កដា ២០២២ ដែលបានចេញផ្សាយកន្លងមក។

AMRO បានដំឡើងការព្យាករអតិផរណាឆ្នាំ ២០២២ សម្រាប់តំបន់អាស៊ាន ឡើងដល់ ៧.៦% ដោយកើន ១.៤% ធៀបនឹងខែកក្កដា។ សម្រាប់ឆ្នាំ ២០២៣ កំណើនសេដ្ឋកិច្ចនឹងកើនឡើង ៤.៩% ខណៈអតិផរណាត្រូវបាន AMRO ព្យាករថា នឹងស្ថិតក្នុងអត្រា ៤%។

សេដ្ឋកិច្ចរបស់ កម្ពុជា ត្រូវបាន AMRO ព្យាករថា នឹងមានកំណើន ៥% ក្នុងឆ្នាំ ២០២២ ឈរលំដាប់ទី ៥ ក្នុងតំបន់ ASEAN+3 (ASEAN+3 រួមមាន ម៉ាឡេស៊ី វៀតណាម ហ្វ៊ីលីពីន ឥណ្ឌូណេស៊ី កម្ពុជា ឡាវ ចិន ថៃ សិង្ហបុរី កូរ៉េខាងត្បូង ជប៉ុន មីយ៉ានម៉ា និង ព្រុយណេ) ដោយស្ថិតនៅពីក្រោម ម៉ាឡេស៊ី វៀតណាម ហ្វ៊ីលីពីន និង ឥណ្ឌូណេស៊ី៕

October 12, 2022

អាជ្ញាធរតំបន់របស់ វៀតណាម ស្នើបង្កើតអាកាសយានដ្ឋានអន្តរជាតិមួយទៀតនៅភាគខាងត្បូងប្រទេស

ដល់ឆ្នាំ ២០៣០ ព្រលានយន្តហោះ Lien Khuong ក្នុងខេត្ត Lam Dong នៅភាគខាងត្បូងប្រទេសវៀតណាម ត្រូវបានស្នើឱ្យមានការអភិវឌ្ឍទៅជាអាកាសយានដ្ឋានអន្តរជាតិ និងស្ថាបនាអគារដែលអាចទទួលអ្នកដំណើរបាន ៥ លាននាក់/ឆ្នាំ។

ការិយាល័យអាកាសចរណ៍វៀតណាម ទើបតែមានរបាយការណ៍ដំបូងស្ដីពីការកែប្រែផែនការសម្រាប់ព្រលានយន្តហោះ Lien Khuong (ខេត្ត Lam Dong) នៅភាគខាងត្បូងប្រទេសនេះ ក្នុងដំណាក់កាលដល់ឆ្នាំ ២០៣០ ក្នុងទស្សនវិស័យដល់ឆ្នាំ ២០៥០។

យោងតាមការវាយតម្លៃរបស់ស្ថាប័នជំនាញ Lam Dong គឺជាខេត្តក្នុងតំបន់ភ្នំដែលមានសក្ដានុពលសម្រាប់ការអភិវឌ្ឍវិស័យទេសចរណ៍ និងកសិផលតម្លៃខ្ពស់។ នេះគឺជាកត្តាសំខាន់សម្រាប់ការអភិវឌ្ឍអាកាសចរណ៍។

អាកាសយានដ្ឋានខាងលើត្រូវបានវិនិយោគជាមូលដ្ឋានទៅតាមការផែនការដែលបានសម្រេចកាលពីឆ្នាំ ២០០៦ ប៉ុន្តែ តំបន់អាកាសចរណ៍ស៊ីវិលរបស់អាកាសយានដ្ឋាននេះត្រូវការពង្រីកបន្ថែមដើម្បីឱ្យសមស្របនឹងស្ថានភាព។

យោងតាមការព្យាករ នៅក្នុងឆ្នាំ ២០៣០ អាកាសយានដ្ឋាន Lieng Khuong នឹងអាចទទួលអ្នកដំណើរក្នុងស្រុកបានជាង ៤.៣ លាននាក់ និងអ្នកដំណើរអន្តរជាតិជិត ៧ សែននាក់ និងទំនិញជាង ១៨,០០០ តោន។

ក្រោយពីបានវាយតម្លៃស្ថានភាពជាថ្មីទាក់ទងនឹងចំនួនអ្នកដំណើរ និងទំហំទំនិញជាដើម ស្ថាប័នប្រឹក្សាយោបល់បានស្នើឱ្យកែប្រែផែនការ ដើម្បីពង្រីកព្រលានយន្តហោះ Lieng Khuong ខាងលើឱ្យទៅជាអាកាសយានដ្ឋានអន្តរជាតិ លំដាប់ 4E ដូចទៅនឹង អាកាសយានដ្ឋានអន្តរជាតិខេត្តព្រះសីហនុ៕

October 12, 2022

IMF និង WB ព្រមានអំពីហានិភ័យកើតមានវិបត្តិសេដ្ឋកិច្ចសកលនៅឆ្នាំ ២០២៣

មូលនិធិរូបិយវត្ថុអន្តរជាតិ (IMF) និង ធនាគារពិភពលោក (WB) សុទ្ធតែព្រមានថា សេដ្ឋកិច្ចសកលកំពុងមានកំណើនយឺតមកវិញ និងអាចត្រូវយឺតយ៉ាវទាំងស្រុងនៅក្នុងឆ្នាំ ២០២៣។

«ពិភពលោកទាំងមូលមានហានិភ័យខ្ពស់ប្រឈមនឹងវិបត្តិសេដ្ឋកិច្ចនៅឆ្នាំក្រោយ» RT ដកស្រង់ និងចុះផ្សាយអំពីការព្យាកររបស់ ប្រធាន WB លោក David Malpass និង អគ្គនាយក IMF លោកស្រី Kristalina Georgieva លើកឡើងនៅក្នុងកិច្ចប្រជុំមួយកាលពីថ្ងៃទី ១០ តុលា។

មេដឹកនាំស្ថាប័នទាំងពីរខាងលើសុទ្ធតែយល់ថា ការដែលធនាគារកណ្ដាលនានាបន្តដំឡើងការប្រាក់ដើម្បីគ្រប់គ្រងអតិផរណា កំពុងតែបង្កផលប៉ះពាល់បញ្ច្រាស ដោយសារល្បឿននៃកំណើនសេដ្ឋកិច្ចត្រូវបានបង្អាក់។

លោក Malpass សង្កត់ធ្ងន់ថា កំណើនសេដ្ឋកិច្ចយឺតមកវិញនៅតាមបណ្ដាប្រទេសអភិវឌ្ឍ និងនិន្នាការធ្លាក់ថ្លៃនៃរូបិយប័ណ្ណនៅក្នុងបណ្ដាប្រទេសកំពុងអភិវឌ្ឍ កំពុងតែផ្ដល់សញ្ញាអំពីស្ថានភាពវិបត្តិរបស់សេដ្ឋកិច្ចពិភពលោក។

លោកស្រី Georgieva យល់ស្របនឹងការលើកឡើងរបស់លោក Malpass និងជឿថា «ហានិភ័យវិបត្តិសេដ្ឋកិច្ចបានកើនឡើង»។ លោកស្រីបន្ថែមថា ១/៣ នៃបណ្ដាប្រទេសក្នុងពិភពលោកនឹងធ្លាក់ទៅក្នុងឱនភាពសេដ្ឋកិច្ច និងបានព្រមានថា ប្រទេសទាំងនេះអាចនឹងបានឃើញសេដ្ឋកិច្ចមានកំណើនអវិជ្ជមាននៅក្នុងត្រីមាសចុងក្រោយរបស់ឆ្នាំ ២០២២ និងត្រីមាសដំបូងនៃឆ្នាំ ២០២៣។

អគ្គនាយក IMF លោកស្រី Kristalina Georgieva

យោងតាម មូលនិធិរូបិយវត្ថុអន្តរជាតិ ការខាតបង់ទូទាំងសកលលោកដោយសារវិបត្តិសេដ្ឋកិច្ច អាចឡើងដល់ ៤ ទ្រីលាន (៤,០០០,០០០,០០០,០០០) ដុល្លារអាម៉េរិក នៅឆ្នាំ ២០២៦។ ក៏ប៉ុន្តែ លោកស្រី Georgieva ក៏បានអំពាវនាវដល់ក្រុមអ្នករៀបចំគោលនយោបាយ ឱ្យចាត់វិធានការដើម្បីកុំឱ្យអតិផរណាក្លាយជា «រថភ្លើងដែលមិនមានហ្វ្រាំង»៕

October 12, 2022

Foxconn ដំឡើងរថយន្តអគ្គិសនី INDI One ឱ្យក្រុមហ៊ុន INDI EV

INDIEV ត្រូវបានបង្កើតឡើងដោយអតីតនាយកប្រតិបត្តិ ២ រូបរបស់ក្រុមហ៊ុនផលិតរថយន្តអគ្គិសនី Faraday Future គឺ Steve Orsario និង Steven Offutt កាលពីឆ្នាំ ២០១៧។ ក្រុមហ៊ុននេះបានបង្ហាញរថយន្តអគ្គិសនី INDI One កាលពីរដូវស្លឹកឈើជ្រុះឆ្នាំ ២០២១ ហើយនេះគឺជា crossover អគ្គិសនីដែលមានតម្លៃចាប់ពី ៤៥,០០០ ដុល្លារអាម៉េរិក។

កាលពីថ្ងៃទី ៦ តុលាកន្លងទៅ ក្រុមហ៊ុនផលិតរថយន្តអគ្គិសនី INDIEV ដែលមានមូលដ្ឋាននៅ Los Angeles សហរដ្ឋអាម៉េរិក ប្រកាសថា បានចុះកិច្ចព្រមព្រៀងជាមួយក្រុមហ៊ុនបច្ចេកវិទ្យា Hon Hai (Foxconn)។ យោងតាមកិច្ចព្រមព្រៀងនេះ Foxconn នឹងដំឡើងរថយន្តអគ្គិសនី INDI One នៅក្នុងរោងចក្ររបស់ខ្លួននៅ Ohio សហរដ្ឋអាម៉េរិក។

រថយន្តអគ្គិសនី INDI One ដែលមានទំហំធំបន្តិច បើធៀបនឹង Tesla Model Y ឬ Ford Mustang Mach-e បំពាក់ថ្មផ្ទុកអគ្គិសនី ៩៥ kWh ជួយឱ្យវាយធ្វើដំណើរបាន ៤៨៣ គីឡូម៉ែត្រ បន្ទាប់ពីបញ្ចូលថាមពលម្ដង។ INDI One បំពាក់ម៉ូទ័រអគ្គិសនីចំនួន ២ គ្រឿង ដែលមានកម្លាំងសរុប ៤១០ សេះ។

កាលពីខែមករា ក្រុមហ៊ុន INDIEV បានបង្ហាញ INDI One របស់ខ្លួននៅ CES និងទទួលការបញ្ជាទិញចាប់ពីត្រីមាសដំបូងនៃឆ្នាំ ២០២២ ហើយនឹងចាប់ផ្ដើមប្រគល់រថយន្តនៅក្នុងឆ្នាំនេះ។ គោលដៅនេះធ្លាប់ត្រូវបានគេសង្ស័យថា ប្រហែលមិនអាចសម្រេចបាន។ ក៏ប៉ុន្តែ ពេលនេះ INDIEV មាន Foxconn ជួយជ្រោមជ្រែកក្នុងការផលិត៕

October 11, 2022

កិច្ចព្រមព្រៀងពាណិជ្ជកម្ម CPTPP នឹងមានសុពលភាពសម្រាប់ ម៉ាឡេស៊ី ចាប់ពីខែវិច្ឆិកា ២០២២

ប្រភពព័ត៌មានបានឱ្យដឹងថា កិច្ចព្រមព្រៀងពាណិជ្ជកម្ម CPTPP ដែលនឹងមានសុពលភាពជាផ្លូវការសម្រាប់ ប្រទេសម៉ាឡេស៊ី ចាប់ពីថ្ងៃទី ២៩ វិច្ឆិកាខាងមុខ នឹងជួយឱ្យប្រទេសនេះក្លាយជាប្រទេសទី ៩ ដែលបានអនុម័តកិច្ចព្រមព្រៀងពាណិជ្ជកម្មនេះ។

មុននោះ ម៉ាឡេស៊ី បានប្រកាសជាផ្លូវការអំពីការសម្រេចរួចរាល់ក្នុងការអនុម័តលើ កិច្ចព្រមព្រៀង កិច្ចព្រមព្រៀងទូលំទូលាយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) កាលពីថ្ងៃទី ០៥ តុលា ២០២២។

ក្នុងចំណោម ១១ ប្រទេសដែលបានចុះហត្ថលេខាលើ កិច្ចព្រមព្រៀងទូលំទូលាយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក ម៉ាឡេស៊ី គឺជាប្រទេសទី ៩ ដែលបានអនុម័តកិច្ចព្រមព្រៀងនេះ ក្រោយដំណើរការអនុម័តរបស់ ៨ ប្រទេសដំបូង ចាប់ពីឆ្នាំ ២០១៨ ដល់ឆ្នាំ ២០២១ រួមមាន ម៉ិកស៊ិក ជប៉ុន សិង្ហបុរី អូស្ត្រាលី នូវែលសេឡង់ កាណាដា វៀតណាម និង ប៉េរូ។

រដ្ឋាភិបាលម៉ាឡេស៊ី សង្ឃឹមថា កិច្ចព្រមព្រៀងពាណិជ្ជកម្មនេះនឹងជួយឱ្យប្រទេសនេះជំរុញពាណិជ្ជកម្មរបស់ខ្លួន ដោយការចូលទៅកាន់ទីផ្សារដែល ម៉ាឡេស៊ី មិនទាន់មានកិច្ចព្រមព្រៀងពាណិជ្ជកម្មទ្វេភាគី ក្នុងនោះមានដូចជា ប្រទេសកាណាដា ម៉ិកស៊ិក និង ប៉េរូ ជាដើម។ CPTPP ក៏នឹងជួយឱ្យ ម៉ាឡេស៊ី រកបានប្រភពវត្ថុធាតុដើមគុណភាពខ្ពស់ និងតម្លៃទាប ក៏ដូចជាជួយឱ្យប្រទេសនេះក្លាយជាទីទាក់ទាញអ្នកវិនិយោគផងដែរ។

ក្រុមប្រទេសនៃកិច្ចព្រមព្រៀង កិច្ចព្រមព្រៀងទូលំទូលាយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP)

មុននោះ ក្រសួងពាណិជ្ជកម្ម និងឧស្សាហកម្មម៉ាឡេស៊ី (MITI) បានឱ្យដឹងថា កាលពីថ្ងៃទី ៣០ កញ្ញា រដ្ឋាភិបាលប្រទេសនេះបានដាក់ឯកសារអនុម័ត CPTPP ទៅកាន់ ប្រទេសនូវែលសេឡង់ ដែលជាអ្នករក្សាទុកកិច្ចព្រមព្រៀង CPTPP។ លទ្ធផលនៃ «ការវិភាគផលប្រយោជន៍ និងការចំណាយ» របស់ ម៉ាឡេស៊ី បង្ហាញថា ដោយមានកិច្ចព្រមព្រៀង CPTPP ទំហំពាណិជ្ជកម្មសរុបរបស់ ម៉ាឡេស៊ី ត្រូវបានព្យាករថា នឹងកើនឡើងដល់ ៦៥៥.៧ ពាន់លានដុល្លារអាម៉េរិក នៅឆ្នាំ ២០៣០៕

October 11, 2022

តាក់ស៊ីហោះអគ្គិសនីស្វ័យប្រវត្តិ ល្បឿន ១៣០ គូឡូម៉ែត្រ/ម៉ោង សាកល្បងនៅ ឌូបៃ

ក្រុមហ៊ុន XPeng Inc ធ្វើការសាកល្បងម៉ូដែលតាក់ស៊ីហោះអគ្គិសនីដែលហោះឡើង និងចុះចតដោយត្រង់នៅ ឌូបៃ កាលពីថ្ងៃទី ១០ តុលា នៅ ទីក្រុងឌូបៃ នៃ ប្រទេសអេមីរ៉ាតអារ៉ាប់រួម ដោយរំពឹងថានឹងក្លាយជាមធ្យោបាយដឹកជញ្ជូនរវាងទីក្រុងនាពេលអនាគត។

តាក់ស៊ីហោះអគ្គិសនី XPeng X2 ដែលអភិវឌ្ឍដោយក្រុមហ៊ុនចិន XPeng Inc គឺជាគម្រោងមួយក្នុងចំណោមរាប់សិបគម្រោងស្ដីពីតាក់ស៊ីហោះនៅពាសពេញពិភពលោក។ ក្នុងចំណោមបណ្ដាគម្រោងខាងលើ មានតែប៉ុន្មានគម្រោងប៉ុណ្ណោះដែលបានជោគជ័យ និងនៅត្រូវការពេលច្រើនឆ្នាំទៀត មុនពេលអាចដាក់ឱ្យដំណើរការពាណិជ្ជកម្មជាផ្លូវការ។

ក្រុមហ៊ុន XPeng Inc កាលពីម្សិលមិញ បានធ្វើការសាកល្បងចំពោះតាក់ស៊ីហោះអគ្គិសនី XPeng X2 ដោយប្រើប្រាស់ប្រព័ន្ធស្វ័យប្រវត្ត។ មុននោះ XPeng Inc ធ្លាប់បានសាកល្បងហោះហើរដោយមានមនុស្សបើកបរកាលពីខែកក្កដា ២០២១។

តាក់ស៊ីហោះ XPeng X2 អាចដឹកអ្នកដំណើរបាន ២ នាក់ និងដំណើរការបានដោយប្រើម៉ូទ័ររុញច្រានចំនួន ៨ គ្រឿង។ XPeng X2 អាចហោះបានក្នុងល្បឿនអតិបរមា ១៣០ គីឡូម៉ែត្រ/ម៉ោង។

មិនដូចទៅនឹងយន្តហោះ ឬឧទ្ធម្ភាគចក្រធម្មតា តាក់ស៊ីហោះអគ្គិសនី Xpeng X2 អាចហោះឡើង និងចុះចតត្រង់ដោយស្វ័យប្រវត្ត និងអាចដឹកអ្នកដំណើរពីកន្លែងមួយទៅកន្លែងមួយបានឆាប់រហ័ស។

នាពេលអនាគត តាក់ស៊ីហោះអគ្គិសនីស្វ័យប្រវត្តដូច XPeng X2 នឹងអាចដឹកភ្ញៀវនៅក្នុងទីក្រុង ដោយការហោះហើរពីខាងលើបណ្ដាផ្លូវដែលមានចរាចរណ៍មមាញឹកខ្លាំង។ ប៉ុន្តែ មធ្យោបាយធ្វើដំណើរទំនើបនេះនៅមានបញ្ហាជាច្រើនដែលត្រូវដោះស្រាយ រួមមាន អាយុកាលរបស់ថ្មផ្ទុកអគ្គិសនី បញ្ហាសុវត្ថិភាព ការគ្រប់គ្រងអាកាសចរណ៍ និងបញ្ហាហេដ្ឋារចនាសម្ព័ន្ធជាដើម៕

October 11, 2022

ម៉ាឡេស៊ី ដកបទបញ្ជាហាមនាំចេញមាន់រស់ចាប់ពីថ្ងៃទី ១១ ខែតុលា ឆ្នាំ ២០២២

អាជ្ញាធរគ្រប់គ្រងអាហារសិង្ហបុរី បានឱ្យដឹងថា រដ្ឋាភិបាលម៉ាឡេស៊ី នឹងដកបម្រាមលើការនាំចេញជាបណ្ដោះអាសន្នចំពោះមាន់រស់ ចាប់ពីថ្ងៃទី ១១ តុលា ក្រោយពីបានធ្វើឱ្យតម្លៃ និងប្រភពផ្គត់ផ្គង់ក្នុងស្រុកមានស្ថិរភាពរយៈពេលជាង ៤ ខែមកនេះ។

អាជ្ញាធរគ្រប់គ្រងអាហារសិង្ហបុរី (SFA) ប្រកាសថា ពួកគេបានទទួល «ប្រកាសផ្លូវការ» ពីការិយាល័យបសុពេទ្យម៉ាឡេស៊ី ទាក់ទិននឹងការដកបម្រាមខាងលើ។ SFA បានឱ្យដឹងថា ពួកគេសាទរចំពោះដំណឹងនេះ។

ក៏ប៉ុន្តែ អាជ្ញាធរគ្រប់គ្រងអាហារសិង្ហបុរី និយាយថា «ដោយសារតែ សិង្ហបុរី នៅតែបន្តប្រឈមមុខនឹងបញ្ហារអាក់រអួលទាក់ទិននឹងប្រភពផ្គត់ផ្គង់ ព្រោះតែកត្តាពីខាងក្រៅ SFA នឹងបន្តបង្កើនការនាំចូលសាច់មាន់ និងធ្វើការជាមួយក្រសួង ស្ថាប័នពាក់ព័ន្ធដើម្បីធ្វើពិពិធកម្មលើប្រភពផ្គត់ផ្គង់»។

យោងតាម រដ្ឋមន្ត្រីក្រសួងកសិកម្ម និងឧស្សាហកម្មអាហារម៉ាឡេស៊ី Ronald Kiandee បម្រាមចំពោះការនាំចេញមាន់រស់របស់ប្រទេសនេះនឹងត្រូវបានបន្ធូរបន្ថយទៅតាមដំណាក់កាល ក្នុងនោះនឹងអនុញ្ញាតឱ្យនាំចេញដោយចាប់ផ្ដើមពីបរិមាណ ១.៨ លានក្បាល/ខែ។ ប៉ុន្តែ ការហាមនាំចេញសាច់មាន់ និងកូនមាន់អាយុ ១ ថ្ងៃ នៅតែត្រូវអនុវត្តបន្ត។

យោងតាម Observatory of Economic Complexity ម៉ាឡេស៊ី គឺជាអ្នកផ្គត់ផ្គង់មាន់រស់សំខាន់របស់ សិង្ហបុរី ថៃ ជប៉ុន និង ព្រុយណេ។ ទំហំនៃការនាំចេញសត្វទ្វិបាទរបស់ ម៉ាឡេស៊ី សម្រេចបាន ១៨.៩ លានដុល្លារអាម៉េរិក ក្នុងឆ្នាំ ២០២០ និងក្លាយជាប្រទេសនាំចេញទំនិញប្រភេទនេះធំជាងគេលំដាប់ទី ៤៩ ក្នុងពិភពលោក។

ក៏ប៉ុន្តែ សង្គ្រាមនៅ អ៊ុយក្រែន បាននាំឱ្យអ្នកលក់នៅ ម៉ាឡេស៊ី ត្រូវលក់ទំនិញជាមាន់រស់ និងសាច់មាន់ក្នុងតម្លៃខ្ពស់ ដើម្បីអាចទូទាត់ការចំណាយ ខណៈដែលប្រភពផ្គត់ផ្គង់ជួបបញ្ហា។ បញ្ហានេះនាំឱ្យរដ្ឋាភិបាលត្រូវដាក់បម្រាមលើការនាំចេញជាបណ្ដោះអាសន្នចាប់ពីថ្ងៃទី ០១ មិថុនា៕

October 11, 2022

ក្រុមហ៊ុនវៀតណាម សន្យាលក់រថយន្តមិនបំភាយឧស្ម័ន ១០០% ចាប់ពីឆ្នាំ ២០៣៥

នៅថ្ងៃទី ១០ តុលា ក្រុមហ៊ុនផលិតរថយន្តវៀតណាម VinFast បានចូលរួមប្រកាសថា អភិវឌ្ឍយានយន្តដែលមិនបំភាយឧស្ម័ន (Zero Emission Vehicles Declaration – ZEV) របស់ COP26។

VinFast សន្យាថា ឆ្ពោះទៅកាន់គោលដៅលក់យានយន្តមិនបំភាយឧស្ម័ន ១០០% នៅក្នុងទីផ្សារចាប់ពីឆ្នាំ ២០៣៥ ដែលជាការចូលរួមជំរុញបដិវត្តន៍ចរាចរណ៍អគ្គិសនីទូទាំងសកលលោក ដើម្បីអនាគតយូរអង្វែង។

ប្រកាស ZEV នៅក្នុងសន្និសីទកំពូលស្ដីពីបម្រែបម្រួលអាកាសធាតុរបស់ អង្គការសហប្រជាជាតិលើកទី ២៦ (COP26 ZEV) ត្រូវបានប្រារព្ធឡើងនៅក្នុងក្របខណ្ឌនៃព្រឹត្តិការណ៍សប្ដាហ៍អាកាសធាតុ New York 2022 ដើម្បីប្រកាសសមាជិកថ្មីដែលនឹងចូលរួមជាមួយ COP27 និងបង្ហាញអំពីសម្ព័ន្ធមិត្តជំរុញគោលដៅបំភាយឧស្ម័នស្មើនឹង ០ ដែលនឹងត្រូវបានបង្ហាញនៅក្នុងព្រឹត្តិការណ៍ COP27។

ដោយបានប្រកាសដូចខាងលើ VinFast បានក្លាយជាក្រុមហ៊ុនផលិតរថយន្តដែលចូលរួមក្នុងក្រុមនាំមុខគេនៃក្រុមហ៊ុនផលិតរថយន្តចំនួន ១៤ ដែលបានប្រកាសសន្យាផលិតរថយន្តមិនបំភាយឧស្ម័ន។

October 10, 2022

Concept តំបន់រស់នៅបែបសប់ខ្យល់លើឋានព្រះចន្ទរបស់ក្រុមហ៊ុនអូទ្រីស

ក្រុមហ៊ុនស្ថាបត្យកម្ម Pneumocell របស់ ប្រទេសអូទ្រីស បានបង្ហើបឱ្យដឹងអំពីគំនិតស្ដីពីបរិស្ថានរស់នៅលើឋានព្រះចន្ទដែលអាចសប់ខ្យល់ឱ្យប៉ោងដោយយោងទៅតាមរចនាសម្ព័ន្ធមហាស្រាល។

គំនិតនេះនិយាយអំពីទិដ្ឋភាពតំបន់រស់នៅក្នុងអនាគតដែលតភ្ជាប់គ្នាដោយសំណង់ដែលអាចសប់ខ្យល់ និងកប់នៅក្រោមដីរបស់ព្រះចន្ទ។ ពួកវានឹងត្រូវបានដាក់នៅក្នុងតំបន់ក្បែរប៉ូលទាំងពីរ ជាទីដែលតែងតែមានពន្លឺព្រះអាទិត្យ។

Concept (គំនិត) ដែលត្រូវបានបង្កើតឡើងដោយក្រុមហ៊ុនស្ថាបត្យកម្ម Pneumocell នេះគឹជាផ្នែកមួយនៅក្នុងថ្នាលបង្កើតបរិយាកាសបើកចំហ (OSIP) ដែលគាំទ្រដោយ ទីភ្នាក់ងារអវកាសអឺរ៉ុប (ESA) ក្នុងបំណងស្វែងរកគំនិតដែលប្រកបដោយក្ដីសង្ឃឹមសម្រាប់ការស្រាវជ្រាវបរិយាកាសពីគ្រប់ប្រភព។

ក្រោយពីត្រូវបានសប់ខ្យល់ពេញ សំណង់សម្រាប់រស់នៅនេះនឹងត្រូវបានកប់ជម្រៅពី ៤ ទៅ ៥ ម៉ែត្រ ខាងក្រោមស្រទាបដីរបស់ ព្រះចន្ទ ដើម្បីការពារមនុស្សពីអាចម៍ផ្កាយ កម្ដៅ និងវិទ្យុសកម្មពីទីអវកាស។

នៅលើដំបូលរបស់សំណង់នឹងមានកញ្ចក់។ វាត្រូវបានផលិតឡើងដើម្បីបង្វែរទិសដៅទៅរកព្រះអាទិត្យ និងចាំងរស្មីចុះទៅកាន់រណ្ដៅសិប្បនិម្មិតមួយ ជាទីដែលកញ្ចក់ដទៃទៀតបង្វែងពន្លឺទៅរកផ្ទះកញ្ចក់នៅជុំវិញ។ ដើម្បីបង្កើតបរិយាកាសយប់នៅក្នុងផ្ទះកញ្ចក់នេះ គេគ្រាន់តែបង្វែរកញ្ចក់នៅលើដំបូលចេញពីព្រះអាទិត្យប្រហែលពី ៥ ទៅ ៦ ម៉ោងក្នុងវដ្ដ ២៤ ម៉ោងគឺជាការស្រេច។

តំបន់រស់នៅនេះនឹងដំណើរការតាមបែបម្ចាស់ការក្នុងរយៈពេលយូរ ដោយការផលិត និងកែច្នៃអុកស៊ីសែន ដាំដុះ ក៏ដូចជាចិញ្ចឹមសត្វនៅក្នុងកសិដ្ឋានកញ្ចក់ធំៗ។

ក្រុមហ៊ុន Pneumocell បានឱ្យដឹងថា សំណង់ដ៏ស្រាលនេះអាចនាំទៅកាន់ឋានព្រះចន្ទដោយភាពងាយស្រួល។ Pneumocell ក៏កំពុងពិនិត្យមើលយានអវកាសដែលមាននាបច្ចុប្បន្ន ឬកំពុងអភិវឌ្ឍ ដើម្បីដឹកជញ្ជូនវត្ថុធាតុ និងអ្នកអវកាសឡើងទៅកាន់ផ្កាយរណបធម្មជាតិរបស់ផែនដី។

October 10, 2022

Category: សង្គម និងសេដ្ឋកិច្ច