សង្គម និងសេដ្ឋកិច្ច - La Reine Media

អាស៊ាន និង សហភាពអឺរ៉ុប ចុះកិច្ចព្រមព្រៀងដឹកជញ្ជូនតាមអាកាសអន្តរតំបន់ដំបូងគេក្នុងពិភពលោក

សមាគមប្រជាជាតិអាស៊ីអាគ្នេយ៍ (ASEAN) និង សហភាពអឺរ៉ុប (EU) បានចុះហត្ថលេខាលើកិច្ចព្រមព្រៀងដឹកជញ្ជូនតាមអាកាសពេញលេញ (ASEAN-EU CATA) នៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី ២៨ ដែលត្រូវបានធ្វើឡើងនៅ Bali ប្រទេសឥណ្ឌូណេស៊ី កាលពីថ្ងៃទី ១៧ តុលាកន្លងទៅ។

យោងតាមប្រកាសលើគេហទំព័រផ្លូវការរបស់ អាស៊ាន ASEAN-EU CATA គឺជាកិច្ចព្រមព្រៀងផ្នែកដឹកជញ្ជូនតាមអាកាសរវាងតំបន់នឹងតំបន់ដំបូងគេបង្អស់ក្នុងពិភពលោក ដែលនេះបានស្ដែងឱ្យឃើញនូវគំនិតស្ដីពីគោលនយោបាយថ្មីបំផុតទាក់ទងនឹងការកំណត់នានានៅក្នុងវិស័យអាកាសចរណ៍។ ការចរចាស្ដីអំពីកិច្ចព្រមព្រៀងនេះបានដំណើរការឡើងវិញកាលពីឆ្នាំ ២០១៦ និងបញ្ចប់ជាស្ថាពរកាលពីថ្ងៃទី ០២ មិថុនា ២០២១។ កិច្ចព្រមព្រៀងនេះកំពុងរង់ចាំបណ្ដាប្រទេសជាសមាជិករបស់ EU និង ASEAN អនុម័តការនីតិវិធី។

ASEAN-EU CATA ត្រូវបានគេរំពឹងថា នឹងនាំមកនូវឱកាសធំធេងសម្រាប់បណ្ដាក្រុមហ៊ុនអាកាសចរណ៍របស់ អាស៊ាន និង សហភាពអឺរ៉ុប ក្នុងការដឹកភ្ញៀវ និងទំនិញតាមផ្លូវអាកាសរវាងតំបន់ទាំងពីរនេះ។ កិច្ចព្រមព្រៀងនេះនឹងជួយពន្លឿនការស្ដារសេវាកម្មអាកាសចរណ៍រវាងតំបន់ទាំងពីរ ក្រោយពីវិបត្តិកូវីដ-១៩។ អ្នកដំណើរនឹងមានជម្រើសច្រើនជាងមុន ទាក់ទងនឹងទីតាំងចុះចត ចំនួនជើងហោះហើរជាដើម រវាង អាស៊ីអាគ្នេយ៍ និង ទ្វីបអឺរ៉ុប។

អាស៊ាន និង សហភាពអឺរ៉ុប ចុះកិច្ចព្រមព្រៀងដឹកជញ្ជូនតាមអាកាសអន្តរតំបន់ដំបូងគេក្នុងពិភពលោក កាលពីថ្ងៃទី ១៧ តុលា ២០២២ នៅ ឥណ្ឌូណេស៊ី

កិច្ចព្រមព្រៀងនេះក៏នឹងអនុញ្ញាតឱ្យបណ្ដាក្រុមហ៊ុនអាកាសចរណ៍របស់បណ្ដាប្រទេសក្នុងតំបន់ទាំងពីរ អាចដឹកអ្នកដំណើរបានរហូតដល់ ១៤ ជើងក្នុង ១ សប្ដាហ៍ និងមិនមានការកំណត់ចំនួនជើងហោះហើរសម្រាប់ការដឹកទំនិញទៅកាន់ប្រទេសនីមួយៗនៃតំបន់ម្ខាងទៀត។

ASEAN-EU CATA អាចចូលមកជំនួសកិច្ចព្រមព្រៀងទ្វេភាគីជាង ១៤០ នៅក្នុងវិស័យអាកាសចរណ៍នៃបណ្ដាប្រទេសក្នុងតំបន់អឺរ៉ុប និង អាស៊ាន។

លោក Budi Karya Sumadi ប្រធានកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី ២៨ និងជា រដ្ឋមន្ត្រីក្រសួងដឹកជញ្ជូនឥណ្ឌូណេស៊ី បានឱ្យដឹងថា «ការចុះហត្ថលេខាលើកិច្ចព្រមព្រៀងនេះនឹងបង្កើតឱ្យមានឯកភាពយ៉ាងសុខដុម ដើម្បីពន្លឿនដំណើរការស្ដារសេដ្ឋកិច្ច ពិសេសគឺការតភ្ជាប់វិស័យអាកាសចរណ៍រវាង អាស៊ាន និង អឺរ៉ុប»៕

October 18, 2022

ឧស្សាហកម្មផលិតទំពាំងឬស្សីពកនៅខេត្ត Guizhou ប្រទេសចិន ជួយគាំទ្រដល់កសិករជាង ៤២ ពាន់នាក់

ដោយមានប្រព័ន្ធម៉ាស៊ីនស្វ័យប្រវត្ត ទំពាំងឫស្សីពកជ្រុងរាប់ម៉ឺនតោននៅក្នុងស្រុក Tongzi ក្រុង Zunyi នៃខេត្ត Guizhou ភាគនិរតីប្រទេសចិន ត្រូវបានទិញ កែច្នៃ និងលក់ទៅកាន់ទីក្រុងធំៗ។

ស្រុក Tongzi នៃខេត្ត Guizhou ភាគនិរតីប្រទេសចិន ត្រូវបានគេស្គាល់ថាជាស្រុកកំណើតរបស់ដើមឫស្សីពកជ្រុង (square bamboo)។ ក្នុងប៉ុន្មានឆ្នាំមកនេះ ស្រុក Tongzi បានប្រើប្រាស់ចំណុចខ្លាំងនេះដើម្បីអភិវឌ្ឍវិស័យឧស្សាហកម្មទំពាំងឫស្សីពកជ្រុង ក្នុងបំណងជំរុញកំណើនសេដ្ឋកិច្ច។

ចាប់តាំងពីឆ្នាំ ២០២០ ស្រុក Tongzi បានដាំឫស្សីពកជ្រុងនេះជាង ១ លាន mu (៦៦,៦០០ ហិកតា) ដែលផ្ដល់ទំពាំង ៥៥,០០០ តោន តម្លៃ ៦៥០ លានយុន (ប្រហែល ៩០ លានដុល្លារអាម៉េរិក) ក្នុងឆ្នាំ ២០២១។

ដើម្បីជំរុញការរីកចម្រើនទូទៅនៅក្នុងការផលិត ការកែច្នៃ និងការលក់ មជ្ឈមណ្ឌលពាណិជ្ជកម្មទំពាំងឫស្សីពកជ្រុងមួយត្រូវបានដាក់ឱ្យដំណើរការសាកល្បងកាលពីពេលថ្មីៗនេះ។

«យើងកំពុងផលិតទំពាំងវេចខ្ចប់។ នេះគឺជាផលិតផលសរីរាង្គដែលត្រូវបានផលិតទៅតាមស្ដង់ដាជាតិនាំចេញ ជាមួយនឹងកាលបរិច្ឆេទប្រើប្រាស់ ២ ឆ្នាំ។ យើងមានការគាំទ្រពីអ្នកប្រើប្រាស់នៅទីក្រុង Chengdu, Chongqing និង Shanghai» លោក Jiang Jinjie អនុប្រធានក្រុមហ៊ុនវិនិយោគ និងផលិត Guizhou Loushan បានឱ្យដឹងដូច្នេះ។

មជ្ឈមណ្ឌលពាណិជ្ជកម្មទំពាំងឫស្សីពកជ្រុង Guizhou Loushan មានប្រព័ន្ធផលិតស្វ័យប្រវត្តចំនួន ៤ ដែលរួមមានដំណាក់កាលស្ងោរ រក្សាទុកបែបបង្កករហ័ស សម្ងួត និងវេចខ្ចប់។

ទំពាំងឫស្សីពកជ្រុងចិន ត្រូវការប្រមូលផលក្នុងរយៈពេលខ្លី។ លោក Jiang Jinjie និយាយថា មជ្ឈមណ្ឌល Guizhou Loushan អាចទទួលទិញទំពាំងស្រស់របស់ប្រជាកសិករក្នុងបរិមាណច្រើន ក្រោយមកយកវាទៅលក់ ឬកែច្នៃ ដើម្បីធានាថា មិនមានទំពាំងល្អមួយណាត្រូវបានបោះចោល។

មជ្ឈមណ្ឌលពាណិជ្ជកម្មនេះក៏ជួយជំរុញការស្រាវជ្រាវ និងការអភិវឌ្ឍថ្មីទៅលើផលិតផលទំពាំងនានាក្នុងតំបន់ ដើម្បីលើកកម្ពស់សមត្ថភាពប្រកួតប្រជែងក្នុងទីផ្សារ។

បច្ចុប្បន្ន មានប្រជាកសិករក្នុងតំបន់ជាង ៤២ ពាន់នាក់ កំពុងរស់នៅដោយការពឹងផ្អែកលើវិស័យផលិតទំពាំងឫស្សីពកជ្រុងនេះ៕

October 18, 2022

គម្រោងរោងចក្រវារីអគ្គិសនី Thac Ba 2 ដែលទើបត្រូវបានវៀតណាមចាប់ផ្ដើមស្ថាបនាកាលពីសប្ដាហ៍កន្លង

គម្រោងរោងចក្រវារីអគ្គិសនី Thac Ba 2 មានកម្លាំង ១៨.៩ MW ដោយមានបណ្ដុំម៉ាស៊ីនវារីអគ្គិសនីចំនួន ៣ ត្រូវបានវិនិយោគក្នុងទំហំទឹកប្រាក់ ៥៧៥ ពាន់លានដុង។

យោងតាមអាជ្ញាធរវៀតណាម ដែលបានប្រកាសកាលពីឆ្នាំ ២០២០ គម្រោងខាងលើនេះ ត្រូវបានវិនិយោគដោយក្រុមហ៊ុនវិនិយោគវារីអគ្គិសនី Thac Ba 2 (TBC2) ក្នុងនោះមានភាគហ៊ុនិកចំនួន ៣ ចូលរួម គឺ ក្រុមហ៊ុនវារីអគ្គិសនី Thac Ba, ក្រុមហ៊ុនប្រឹក្សាផ្នែកស្ថាបនាអគ្គិសនី ២ និងក្រុមហ៊ុនវិស្វកម្មអគ្គិសនី។

គម្រោងរោងចក្រវារីអគ្គិសនី Thac Ba 2 ត្រូវបានស្ថាបនាលើទំហំផ្ទៃដី ១៥៣ ហិកតា នៅក្នុងខេត្ត Yen Bai និងខេត្ត Tuyen Quang ភាគខាងជើងប្រទេសវៀតណាម ជាមួយនឹងទុនវិនិយោគសរុបជិត ៥៧៥ ពាន់លានដុង។

យោងតាមឯកសារផ្លូវការ គម្រោងរោងចក្រវារីអគ្គិសនី Thac Ba 2 គឺជាប្រភេទវារីអគ្គិសនីថ្នាក់ក្រោមរបស់ រោងចក្រវារីអគ្គិសនី Thac Ba ដែលកំពុងដំណើរការផលិតអគ្គិសនីនាបច្ចុប្បន្ន និងអភិវឌ្ឍទៅតាមគោលការណ៍ «ទទួលរងបរិមាណទឹក» ដែលបញ្ចេញពីទំនប់ជាន់ខាងលើរបស់ រោងចក្រវារីអគ្គិសនី Thac Ba ដើម្បីផលិតអគ្គិសនី។

គម្រោងដែលមានកម្លាំង ១៨.៩ MW នេះ គ្រោងនឹងត្រូវបានដាក់ឱ្យដំណើរការផលិតអគ្គិសនីចាប់ពីត្រីមាសទី ១ ឆ្នាំ ២០២៥ និងផ្គត់ផ្គង់អគ្គិសនីប្រមាណ ៧០.២ លានគីឡូវ៉ាត់ម៉ោង/ឆ្នាំ។

គម្រោងរោងចក្រវារីអគ្គិសនី Thac Ba 2 ខាងលើ ត្រូវបានសម្ពោធបើកការដ្ឋានសាងសង់កាលពីថ្ងៃទី ១៥ ខែតុលា ឆ្នាំ ២០២២។

October 17, 2022

ណាសា (NASA) ជិតសាកល្បងយន្តហោះល្បឿនលឿនជាងសំឡេង ក្រោយរយៈពេល ៧៥ ឆ្នាំ

យន្តហោះ X-59 ត្រូវបានគេរំពឹងថានឹងបើកទំព័រយុគសម័យថ្មីក្នុងវិស័យអាកាសចរណ៍ ដោយមានសមត្ថភាពអាចហោះក្នុងល្បឿនលឿនជាងសំឡេង និងបង្កសំឡេងរំខានតិចជាងធៀបនឹងយន្តហោះ Concorde។

ក្រុមអ្នកជំនាញផ្នែកអាកាសចរណ៍ក្នុងគម្រោង Quesst របស់ ណាសា កំពុងរកវិធីដើម្បីឆ្លងផុតពីឧបសគ្គសំឡេងម្ដងទៀត ទៅតាមវិធីដែលអាចជួយឱ្យភ្ញៀវធ្វើដំណើរលឿនដូចទៅនឹងអ្នកបើកបរយន្តហោះល្បឿនលឿនជាងសំឡេង X-1 នេះបើតាម Tech Times ចេញផ្សាយកាលពីថ្ងៃទី ១៦ តុលា។

ដើម្បីវាយតម្លៃលើសមត្ថភាពកាត់បន្ថយសំឡេងរំខានរបស់បច្ចេកវិទ្យាថ្មី ណាសា នឹងប្រើប្រាស់ប្រព័ន្ធអង្គញាណដើម្បីវាស់ស្ទង់សំឡេងរំខានពីលើដី។ តាមគម្រោង X-59 នឹងអាចហោះហើរនៅដើមឆ្នាំ ២០២៣។

Catherine Bahm វិស្វករអាកាសចរណ៍នៅ មជ្ឈមណ្ឌលហោះហើរ Armstrong របស់ ណាសា នៅ California គឺជាអ្នកគ្រប់គ្រងគម្រោងសាកល្បងហោះហើរដែលមានសំឡេងរំខានកម្រិតទាប។ ក្រុមរបស់នាងទទួលខុសត្រូវក្នុងការរចនា និងបង្កើត X-59 ដែលជាយន្តហោះសាកល្បងសំខាន់ក្នុងគម្រោង Quesst។ តាមរយៈ Quesst អង្គការណាសា មានផែនការបញ្ជាក់ថា X-59 អាចហោះហើរលឿនជាងសំឡេង ប៉ុន្តែមិនបង្កសំឡេងរំខានខ្លាំងដែលធ្លាប់ធ្វើឱ្យយន្តហោះលឿនជាងសំឡេងត្រូវបានហាមឃាត់ការហោះហើរពីលើដីគោកកាលពីឆ្នាំ ១៩៧៣។

យន្តហោះ X-59 ត្រូវបានរចនាឡើងដើម្បីអាចដឹកភ្ញៀវ និងហោះក្នុងល្បឿន ១,៧០០ គីឡូម៉ែត្រ/ម៉ោង (លឿនជាងល្បឿនរបស់សំឡេងជិត ១.៤ ដង) និងហោះបានកម្ពស់ ១៦.៨ គីឡូម៉ែត្រ ធៀបនឹងផ្ទៃដី។ ដោយហោះក្នុងល្បឿននេះ អ្នកបើកបរចំណាយពេលតែ ៣ ម៉ោងប៉ុណ្ណោះ ក្នុងការហោះហើរពី ក្រុងឡុងដ៍ ទៅកាន់ ញូវយ៉ក។

បច្ចេកវិទ្យាថ្មីត្រូវបានគេរំពឹងថា នឹងជួយឱ្យ X-59 មានសំឡេងរំខានត្រឹម ៦០ dBA តែប៉ុណ្ណោះ ដែលនេះគឺជាកម្រិតទាបជាងឆ្ងាយ បើធៀបនឹងយន្តហោះ Concord៕

October 17, 2022

ស្ថានីយផលិតអគ្គិសនីដើរដោយពន្លឺព្រះអាទិត្យខ្ពស់ជាងគេនៅ ប្រទេសចិន ត្រូវបានដាក់ឱ្យដំណើរការ

ស្ថានីយផលិតអគ្គិសនីដើរដោយពន្លឺព្រះអាទិត្យ Xingchuan ស្ថិតនៅលើកម្ពស់ជាង ៣,៩០០ ម៉ែត្រ ក្នុងខេត្ត Sichuan ប្រទេសចិន ដែលបានចាប់ផ្ដើមផលិតអគ្គិសនីកាលពីចុងសប្ដាហ៍កន្លង មានកម្លាំង ៦០០ មេហ្គាវ៉ាត់ (MW)។

បណ្ដុំប្រព័ន្ធផលិតអគ្គិសនីដំបូងរបស់ស្ថានីយអគ្គិសនីដើរដោយថាមពលព្រះអាទិត្យ Xingchuan ក្នុងខេត្ត Sichuan ប្រទេសចិន បានចាប់ផ្ដើមផលិតអគ្គិសនី និងតភ្ជាប់ជាមួយបណ្ដាញអគ្គិសនីកាលពីចុងសប្ដាហ៍កន្លងទៅ ដែលនេះគឺជាការចាប់ផ្ដើមដំបូងដែលគម្រោងប្រភេទនេះត្រូវបានដាក់ឱ្យដំណើរការនៅក្នុងបរិស្ថានដែលមានកម្ពស់ខ្ពស់។

Xingchuan គឺជាស្ថានីយផលិតអគ្គិសនីដើរដោយថាមពលព្រះអាទិត្យដែលស្ថិតនៅលើទីខ្ពស់បំផុតរបស់ ប្រទេសចិន។ ស្ថានីយនេះត្រូវបានក្រុមហ៊ុនវិនិយោគអគ្គិសនីរដ្ឋចិន សាងសង់នៅលើតំបន់វាលស្មៅ Dinggong ដែលមានកម្ពស់ចាប់ពី ៣,៩០០ ដល់ ៤,៥០០ ម៉ែត្រ ធៀបនឹងផ្ទៃទឹកសមុទ្រ។

ស្ថានីយ Xingchuan ត្រូវបានស្ថាបនាឡើងដើម្បីក្លាយជាថ្នាលថ្នាក់ជាតិសម្រាប់ការសាកល្បងក្នុងបំណងជំរុញការអភិវឌ្ឍក្នុងវិស័យឧស្សាហកម្មអគ្គិសនីព្រះអាទិត្យ និងការរក្សាថាមពល។ ស្ថានីយនេះមាន ៥ តំបន់សម្រាប់ការសាកល្បង និងការបញ្ជាក់អំពីបច្ចេកវិទ្យាផ្គត់ផ្គង់ទិន្នន័យសម្រាប់ការពិនិត្យប្រៀបធៀបក្នុងការរចនា ដំណើរការ និងការជ្រើសរើសឧបករណ៍សម្រាប់បណ្ដារោងចក្រផលិតអគ្គិសនីពីថាមពលព្រះអាទិត្យនៅតំបន់ខ្ពស់ខ្លាំង និងខ្ពស់មធ្យមនៅលើពិភពលោក។

ដោយមានផ្ទាំងសូឡាដែលមានកម្លាំងសរុប ៦០០ MW គ្របដណ្ដប់តំបន់មួយដែលមានទំហំ ៩១០ ហិកតា ស្ថានីយ Xingchuan អាចផលិតអគ្គិសនីប្រចាំឆ្នាំជាមធ្យមបានប្រហែលជាង ១.២ ពាន់លានគីឡូវ៉ាត់/ម៉ោង ដែលជួយសំច័យធ្យូងថ្មប្រហែល ៣៩០,០០០ តោន និងកាត់បន្ថយឧស្ម័ន កាបូនឌីអុកស៊ីត ១.០៧ លានតោន ជារៀងរាល់ឆ្នាំ៕

October 17, 2022

ផ្លូវល្បឿនលឿនភ្នំពេញ-ព្រះសីហនុ មានករណីគ្រោះថ្នាក់ចរាចរណ៍ត្រឹមតែ ០.០០៤% ប៉ុណ្ណោះ ក្នុងរយៈពេល ១៥ ថ្ងៃ បន្ទាប់ពីការបើកឱ្យប្រើប្រាស់សាកល្បង

រាប់ចាប់ពីថ្ងៃបើកឱ្យដំណើរការសាកល្បង នាថ្ងៃទី ០១ ខែតុលា ឆ្នាំ ២០២២ ដល់ ថ្ងៃទី១៥ ខែតុលា ឆ្នាំ ២០២២ មានយានយន្តចំនួន ១៩០,៣៤៦ គ្រឿង បានធ្វើចរាចរណ៍លើផ្លូវល្បឿនលឿនភ្នំពេញ-ព្រះសីហនុ នេះបើតាម ក្រសួងសាធារណការ និងដឹកជញ្ជូន។

យោងតាមកំណត់ត្រាស្ថិតិយានយន្ត និងស្ថានភាពចរាចរណ៍ ធៀបទៅនឹងទំហំចរាចរណ៍ដែលមានយានយន្តចំនួន ១៩០,៣៤៦ គ្រឿងធ្វើដំណើរ ផ្លូវល្បឿនលឿនភ្នំពេញ-ព្រះសីហនុ នេះ មានករណីគ្រោះថ្នាក់ត្រឹមតែ ០,០០៤% ប៉ុណ្ណោះ ក្នុងអំឡុង ១៥ ថ្ងៃដំបូងនៃការបើកឱ្យប្រើប្រាស់សាកល្បងដោយមិនគិតថ្លៃរយៈពេល ១ ខែ។

ថ្ងៃទី ១៥ ខែតុលា ដែលជាថ្ងៃប្រារព្ធព្រះរាជពិធីបុណ្យរម្លឹកខួប ១០ ឆ្នាំ នៃការយាងសោយព្រះទិវង្គត របស់ព្រះបរមរតនកោដ្ឋ គឺជាថ្ងៃដែលផ្លូវល្បឿនលឿនភ្នំពេញ-ព្រះសីហនុ មានចរាចរណ៍មមាញឹកជាងគេ ក្នុងអំឡុង ១៥ ថ្ងៃកន្លង ដោយមានយានយន្តសរុបចំនួន ២១,៧៩៨ គ្រឿង បានធ្វើដំណើរ។

ក្រសួងសាធារណការ និងដឹកជញ្ជូន ស្នើឱ្យប្រជាពលរដ្ឋគ្រប់រូប ចូលរួមស្វែងយល់ និងអនុវត្តតាមសេចក្តីណែនាំឱ្យបានម៉ឺងម៉ាត់ចំពោះគ្រប់លក្ខខណ្ឌក្នុងការបើកបរលើផ្លូវល្បឿនលឿននេះ និងគោរពច្បាប់ចរាចរណ៍ឱ្យបានខ្ជាប់ខ្ជួន ដើម្បីធ្វើដើម្បីប្រកបដោយសុខសុវត្ថិភាពទាំងអស់គ្នា៕

October 17, 2022

ក្រុមហ៊ុនរបស់ នូវែលសេឡង់ កំពុងអភិវឌ្ឍបច្ចេកវិទ្យាបញ្ជូនអគ្គិសនីមិនមានខ្សែពីទីអវកាសមកកាន់ផែនដី

ក្រុមហ៊ុនមួយរបស់ នូវែលសេឡង់ កំពុងអភិវឌ្ឍបច្ចេកវិទ្យាបញ្ជូនអគ្គិសនីដោយមិនប្រើខ្សែ ពីផ្ទាំងសូឡាក្នុងទីអវកាសមកកាន់ផែនដី តាមរយៈការប្រើប្រាស់កាំរស្មីអេឡិចត្រូម៉ាញ៉េទិច។

ក្រុមហ៊ុនបច្ចេកវិទ្យា Emrod នៅ នូវែលសេឡង់ កំពុងតែអភិវឌ្ឍបច្ចេកវិទ្យាបញ្ជូនអគ្គិសនីដោយមិនបាច់ប្រើខ្សែ។ Emrod កាលពីថ្ងៃទី ២៧ កញ្ញា បានប្រកាសថា ខ្លួនបានទទួលជោគជ័យក្នុងការបញ្ជូនអគ្គិសនីដោយមិនប្រើខ្សែ ពីម៉ាស៊ីនបញ្ជូនអគ្គិសនី ទៅកាន់ម៉ាស៊ីនទទួលអគ្គិសនី ក្នុងរយៈចម្ងាយ ៣៦ ម៉ែត្រ នៅក្នុងមូលដ្ឋានមួយដែលគ្រប់គ្រងដោយក្រុមហ៊ុនអាកាសចរណ៍ Airbus នៅ Munich ប្រទេសអាល្លឺម៉ង់។

ម៉ាស៊ីនបញ្ជូនអគ្គិសនីដែលមានអង្កត់ផ្ចិត ១.៩២ ម៉ែត្រ បញ្ជេញរលកសញ្ញាដែលមានប្រេកង់ ៥.៨ gigahertz ឆ្លងកាត់បន្ទប់ ទៅកាន់ម៉ាស៊ីនទទួលដែលមានទំហំប៉ុនគ្នានេះ។ Emrod សង្ឃឹមថា បច្ចេកវិទ្យានេះអាចប្រើប្រាស់ដើម្បីបញ្ជូនអគ្គិសនីនៅពាសពេញផែនដី ដោយមិនបាច់ដំឡើងបណ្ដាញខ្សែកាបអគ្គិសនីតង់ស្យុងខ្ពស់។

«គោលដៅសំខាន់របស់យើងគឺប្រព័ន្ធដែលប្រើប្រាស់នៅលើដី ក្នុងករណីតភ្ជាប់ជាមួយប្រភពអគ្គិសនីកកើតឡើងវិញពីចម្ងាយ ការផ្គត់ផ្គង់អគ្គិសនីសម្រាប់សហគមន៍ដាច់ស្រយាល តំបន់ដែលមានឧបសគ្គច្រើនសម្រាប់ការដំឡើងបណ្ដាញខ្សែភ្លើង តំបន់រងគ្រោះធម្មជាតិ ប្រតិកម្មរហ័សករណីដាច់ភ្លើង និងការផ្ដល់ថាមពលអគ្គិសនីដល់មធ្យោបាយដឹកជញ្ជូនខ្នាតធំដូចជា កប៉ាល់ រថភ្លើង ក្នុងបំណងកាត់បន្ថយការបំភាយឧស្ម័នកាបូនក្នុងវិស័យឧស្សាហកម្ម» អ្នកនាំពាក្យរបស់ Emrod ឱ្យដឹងដូច្នេះ។

អ្នកនាំពាក្យខាងលើបន្ថែមថា «ចំពោះអគ្គិសនីពីថាមពលព្រះអាទិត្យនៅទីអវកាសវិញ ដំណើរការស្រាវជ្រាវ និងអភិវឌ្ឍនឹងត្រូវការពេលយូរ និងទាមទារទុនវិនិយោគធំជាងនេះ។ ត្រូវការពេលយ៉ាងតិច ១០ ឆ្នាំ ដើម្បីបង្កើតប្រព័ន្ធដែលអាចធ្វើសកម្មភាពពាណិជ្ជកម្ម»។

បច្ចុប្បន្ននេះ ក្រុមហ៊ុន Emrod កំពុងឆ្ពោះទៅកាន់គោលដៅសាកល្បងបច្ចេកវិទ្យានៅលើគន្លងគោចររបស់ផែនដី នៅក្នុងរង្វង់ ៥ ឆ្នាំខាងមុខ៕

October 17, 2022

ខួរក្បាលបណ្ដុះ និងចិញ្ចឹមនៅក្នុងបន្ទប់ពិសោធន៍ ចេះលេងល្បែងអេឡិចត្រូនិច

កោសិកាខួរក្បាលមនុស្ស និងកណ្ដុរចំនួន ៨០០,០០០ ដែលត្រូវបានអ្នកវិទ្យាសាស្ត្របណ្ដុះ និងចិញ្ចឹមនៅក្នុងបន្ទប់ពិសោធន៍ នៅ អូស្ត្រាលី បានបង្ហាញសមត្ថភាពនៅពេលលេងហ្គេម Pong។

ក្រុមអ្នកវិទ្យាសាស្ត្រនៅ Melbourne អភិវឌ្ឍកោសិកាមនុស្ស និងកណ្ដុរចំនួន ៨ សែន នៅក្នុងចានពិសោធន៍ និងឱ្យពួកវាលេងហ្គេមអេឡិចត្រូនិច Pong។ លទ្ធផលនៃការពិសោធន៍ថ្មីដែលត្រូវបានចុះផ្សាយលើទស្សនាវដ្ដី Neuron កាលពីថ្ងៃទី ១២ តុលា បានបង្ហាញថា កោសិកាខួរក្បាលដែលបណ្ដុះ និងចិញ្ចឹមក្នុងបន្ទប់ពិសោធន៍ក៏បង្ហាញអំពីភាពឆ្លាតវៃ និងកែតម្រូវសកម្មភាពទៅតាមពេលវេលា។

ដំបូង អ្នកវិទ្យាសាស្ត្រភ្ជាប់កោសិកាទាំងនេះជាមួយនឹងកុំព្យូទ័រដើម្បីឱ្យពួកវាដឹងថា តើបន្ទះទប់ក្នុងហ្គេម Pong បានទប់ចំបាល់ដែរ ឬទេ។ ពួកគេតាមដានសកម្មភាព និងប្រតិកម្មរបស់កោសិកាខួរក្បាលដែលបានឆ្លើយតប តាមរយៈការប្រើប្រាស់ម៉ាស៊ីនស្កេនរលកអគ្គិសនីដែលបង្ហាញជាទម្រង់ «បន្លា» នៅលើប្រព័ន្ធមួយ។

បន្លាទាំងនោះប្រែទៅជាខ្លាំងក្លាជាងមុន នៅពេលកោសិកាបញ្ជាបន្ទះទប់ និងទប់ចំគ្រាប់បាល់។ នៅពេលទប់មិនចំគ្រាប់បាល់ ការលេងរបស់កោសិកានឹងត្រូវបានកម្មវិធីកុំព្យូទ័រមួយរបស់បន្ទប់ពិសោធន៍ Cortical នៅ Melbourne ធ្វើការរិះគន់។ ការស្រាវជ្រាវនេះបង្ហាញថា កោសិកាខួរក្បាលអាចកែតម្រូវសកម្មភាព ដើម្បីសមស្របនឹងបរិស្ថានដែលបានប្ដូរផ្លាស់ ទៅតាមវិធីដែលមានការគ្រោងទុក និងទៅតាមពេលវេលាជាក់ស្ដែង។

ហ្គេមខាងលើ មិនមែនជាល្បែងតែមួយដែលក្រុមអ្នកវិទ្យាសាស្ត្រនេះយកមកធ្វើការពិសោធន៍ចំពោះខួរក្បាលដែលពួកគេបានបណ្ដុះ និងចិញ្ចឹមនេះទេ។ ហ្គេម Bolan ដែលបង្ហាញខ្លួននៅពេល Google Chrome មានបញ្ហា ក៏ត្រូវបានយកមកពិសោធន៍សម្រាប់កោសិកាខួរក្បាលទាំងនេះ។

Brett Kagan ប្រធានផ្នែកវិទ្យាសាស្ត្រនៅបន្ទប់ពិសោធន៍ Cortical នៅ Melbourne និងជាសមាជិកក្រុមស្រាវជ្រាវខាងលើបានឱ្យដឹងថា ពួកគេនៅមានការងារជាច្រើនទៀតត្រូវធ្វើដើម្បីបង្កើតបរិស្ថានថ្មីសម្រាប់គោលដៅជាក់លាក់។

ក្រុមអ្នកវិទ្យាសាស្ត្រឱ្យដឹងថា លទ្ធផលនៃការស្រាវជ្រាវនេះអាចប្រើប្រាស់បាននៅក្នុងការបង្កើតរូបមន្តជំងឺ ស្វែងរកថ្នាំព្យាបាល ជួយបង្កើនការយល់ដឹងអំពីវិធីដំណើរការ និងវិធីដែលបញ្ញាបង្ហាញវត្តមាន៕

October 14, 2022

Startup កូរ៉េខាងត្បូង អភិវឌ្ឍតាក់ស៊ីហោះប្រភេទ Hybrid ល្បឿន ៣៥០ គីឡូម៉ែត្រ/ម៉ោង

តាក់ស៊ីហោះឡើង និងចុះចតត្រង់របស់ក្រុមហ៊ុន Plana Aero អាចដឹកមនុស្សបាន ៧ នាក់ និងហោះហើរក្នុងរង្វង់ ៥០០ គីឡូម៉ែត្រ។

ក្រុមហ៊ុនធុរកិច្ចថ្មីរបស់ កូរ៉េខាងត្បូង Plana Aero បង្ហាញម៉ូដែលតាក់ស៊ីហោះថ្មី ដែលមានសមត្ថភាពហោះឡើង និងចុះចតត្រង់ ហើយហោះរយៈចម្ងាយឆ្ងាយ នេះបើតាម New Atlas ចេញផ្សាយកាលពីថ្ងៃទី ១៣ តុលា។ តាក់ស៊ីហោះនេះត្រូវបានរចនាឡើងដើម្បីអាចដឹកមនុស្សបាន ៧ នាក់ ជាមួយនឹងការហោះហើរចម្ងាយប្រហែល ៥០០ គីឡូម៉ែត្រ និងមានល្បឿនអតិបរមា ៣៥០ គីឡូម៉ែត្រ/ម៉ោង។

យន្តហោះរបស់ Plana Aero ប្រើប្រាស់ប្រព័ន្ធកង្ហារអគ្គិសនីចំនួន ៦ គ្រឿងដែលអាចបង្វិលទិសដៅ បំពាក់នៅលើស្លាបរបស់វា។

នៅពេលយន្តហោះនេះហោះឡើង និងចុះចតដោយត្រង់ កង្ហារ ២ គ្រឿងនៅខាងក្រោយនឹងវិលចុះក្រោម ខណៈដែលកង្ហារដទៃទៀតវិលឡើងទៅលើ។ កង្ហារទាំងអស់នឹងផ្ដេកខ្លួននៅពេលយន្តហោះនេះ ហោះត្រង់ទៅមុខ។

ក្រុមហ៊ុន Plana Aero ទើបតែប្រមូលទុនបានប្រហែល ៨.៣ លានដុល្លារអាម៉េរិក ជួយឱ្យទុនសរុបរបស់ក្រុមហ៊ុននេះឡើងដល់ជិត ១០ លានដុល្លារ។ ខ្ទង់ប្រាក់នេះនឹងគ្រប់គ្រាន់សម្រាប់ការស្រាវជ្រាវ អភិវឌ្ឍតាក់ស៊ីហោះដែលមានទំហំស្មើនឹង ១/២ នៃទំហំពិតរបស់វា។

តាក់ស៊ីហោះរបស់ Plana Aero មានទំហំធំគ្រាន់បើ និងដំណើរការដោយម៉ាស៊ីន hybrid។ ប៉ុន្តែ យន្តហោះនេះនឹងត្រូវបានដាក់ឱ្យដំណើរការយឺតជាងគូប្រជែងនានាបន្តិច។ ក្រុមហ៊ុនជាច្រើនដែលអភិវឌ្ឍយន្តហោះប្រភេទហោះឡើង និងចុះចតត្រង់ កំពុងតែប្រឹងប្រែងឆ្ពោះទៅគោលដៅទទួលបានវិញ្ញាបនបត្រពាណិជ្ជកម្ម និងបម្រើសេវាកម្មនៅឆ្នាំ ២០២៤។ ក្រុមហ៊ុន Plana Aero មានផែនការសាកល្បងការយន្តហោះរបស់ខ្លួននៅឆ្នាំ ២០២៤ និងទទួលវិញ្ញាបនបត្រ ក៏ដូចជាផលិតនៅឆ្នាំ ២០២៨៕

October 14, 2022

ក្លាយជាមហាសេដ្ឋី ដោយសារលក់សម្លៀកបំពាក់អាពាហ៍ពិពាហ៍ប្រពៃណី

Modi បានក្លាយជាមហាសេដ្ឋីក្នុងវិស័យសម្លៀកបំពាក់ឥណ្ឌា នៅពេលមនុស្សម្នាកាន់តែចូលចិត្តពិធីរៀបអាពាហ៍ពិពាហ៍ធំៗ ច្រើនថ្ងៃ និងស្លៀកពាក់ឈុតប្រពៃណីដូចក្នុងភាពយន្ត Bollywood។

នៅពាក់កណ្ដាលទសវត្សរ៍ទី ៩០ ពេលទៅជួយការងារក្នុងហាងសម្លៀកបំពាក់របស់ឪពុកនៅ Kolkata (ប្រទេសឥណ្ឌា) ក្រោយចេញពីរៀន Ravi Modi រកឃើញឱកាសធំមួយ។ ហាងរបស់គ្រួសារគាត់លក់សម្លៀកបំពាក់ទាន់សម័យ និងមិនមានសម្លៀកបំពាក់បែបប្រពៃណីរបស់ ឥណ្ឌា។

«មានតម្រូវការ ប៉ុន្តែមិនមានរបស់ផ្គត់ផ្គង់» លោក Modi បច្ចុប្បន្នមានអាយុ ៤៥ ឆ្នាំ រៀបរាប់រឿងរ៉ាវកាលពីថ្ងៃដំបូងៗដែលគាត់ចាប់អារម្មណ៍លើការជួញដូរសម្លៀកបំពាក់ប្រពៃណី។ Modi ព្យាយាមបញ្ចុះបញ្ចូលឪពុកដើម្បីឱ្យគាត់លក់អាវ kurta និងខោ pajama ប្រពៃណី ប៉ុន្តែមិនបានសម្រេច។ ដូច្នេះ នៅពេលឪពុករបស់គាត់ទៅចូលរួមហែធម្មយាត្រាកាលពីឆ្នាំ ១៩៩៦ Modi (ពេលនោះមានអាយុ ១៩ ឆ្នាំ) រកបានសម្លៀកបំពាក់ kurta-pajama សម្រាប់បុរសចំនួន ១០០ ឈុត និងលក់បាន ៨០ ឈុតនៅចុងសប្ដាហ៍។

«នៅពេលឪពុកខ្ញុំត្រលប់មកវិញ ដំបូងគាត់ខឹងណាស់។ ប៉ុន្តែ ពេលដឹងថាខ្ញុំលក់បាន ៨០ ឈុត គាត់ក៏សប្បាយចិត្ត» លោក Modi រម្លឹករឿងអតីតកាល។ នោះគឺជារឿងរ៉ាវដែលបាននាំគាត់ចូលក្នុងវិស័យសម្លៀកបំពាក់ប្រពៃណី។ សព្វថ្ងៃ Vedant Fashions របស់លោក Modi គឺជាក្រុមហ៊ុនលំដាប់កំពូលនៅក្នុងទីផ្សារសម្លៀកបំពាក់សម្រាប់អាពាហ៍ពិពាហ៍ និងពិធីបុណ្យនៅ ឥណ្ឌា ដោយលក់បានប្រមាណ ៤ លានខោអាវជារៀងរាល់ឆ្នាំ។

កាលពីខែកុម្ភៈ ២០២២ Modi បាននាំយកក្រុមហ៊ុន Vedant Fashions ឡើងផ្សារហ៊ុន។ ទ្រព្យសម្បត្តិនេះត្រូវបានកំណត់តម្លៃឡើងដល់ ៣.៧៥ ពាន់លានដុល្លារអាម៉េរិក ជួយឱ្យលោក Ravi Modi មានឈ្មោះនៅក្នុងបញ្ជីចំណាត់ថ្នាក់មហាសេដ្ឋីនៅ ប្រទេសឥណ្ឌា។

ក្នុងឆ្នាំសារពើពន្ធ ២០២១ ដែលបានបញ្ចប់កាលពីថ្ងៃទី ៣១ មីនា ២០២២ ប្រាក់ចំណូលរបស់ Vendant Fashions បានកើន ៨៤% ដោយឡើងដល់ ១០.៤ ពាន់លានរ៉ូពីឥណ្ឌា (១៣៨ លានដុល្លារអាម៉េរិក) និងប្រាក់ចំណេញក្រោយពីការទូទាត់ពន្ធ កើនទ្វេដង ដោយឡើងដល់ ៣.១ ពាន់លានរ៉ូពី ធៀបនឹងឆ្នាំ ២០២០។ បើធៀបនឹងឆ្នាំ ២០១៩ ប្រាក់ចំណូលរបស់ Vendant Fashions កើន ៣០% ខណៈប្រាក់ចំណេញកើន ៧៩%។

មូលនិធិវិនិយោគ Axis Capital នៅ Mumbai បានព្យាករថា ប្រាក់ចំណូល និងប្រាក់ចំណេញរបស់ក្រុមហ៊ុន Vedant Fashions នឹងកើនក្នុងអត្រា ៣០% ក្នុងពីរឆ្នាំសារពើពន្ធខាងមុខ។ Modi មានផែនការបង្កើនផ្ទៃក្រឡាសម្រាប់ការលក់រាយក្នុងប៉ុន្មានឆ្នាំខាងមុខ ឡើងដល់ជាង ២២០,០០០ ម៉ែត្រការ៉េ៕

October 14, 2022

Category: សង្គម និងសេដ្ឋកិច្ច