សង្គម និងសេដ្ឋកិច្ច - La Reine Media

យន្តហោះធំបំផុតក្នុងពិភពលោក ដឹកយានល្បឿនលឿនជាងសំឡេង 6 ដង (វីដេអូ)

(សហរដ្ឋអាម៉រិក)-នេះគឺជាលើកដំបូងហើយដែល Stratolaunch សាកល្បងដឹកយានគំរូល្បឿនលឿនជាងសំឡេង Talon ដោយប្រើប្រាស់យន្តហោះធំជាងគេបង្អស់ក្នុងពិភពលោក កាលពីថ្ងៃទី 28 តុលា 2022។

យន្តហោះដឹកជញ្ជូនខ្នាតយក្ស Roc ដែលមានស្លាបវែងជាងព្រលានបាល់ទាត់ បាននាំយកយានគំរូសាកល្បង Talon-A (TA-0) ឡើងទៅលើដែនអាកាសរបស់សមុទ្រខ្សាច់ Mojave ក្នុងរដ្ឋ California។ ជើងហោះហើរនេះត្រូវបានធ្វើឡើងក្នុងបំណងបញ្ជាក់ថា Roc អាចដឹកយានល្បឿនលឿនជាងសំឡេងដែលត្រូវបានផលិតឡើងដើម្បីបង្ហោះចេញពីអាកាស។

យន្តហោះ Roc របស់ Stratolaunch ហោះឡើងពីព្រលានយន្តហោះ និងអវកាស Mojave ដឹកយានគំរូសាកល្បង Talon ប្រវែង 8.5 ម៉ែត្រ ភ្ជាប់ទៅនឹងសសរនៅកណ្ដាលស្លាបប្រវែង 117 ម៉ែត្រ។ ជើងហោះហើរនេះមានថេរវេលាជាង 5 ម៉ោង និងហោះក្នុងរយៈកម្ពស់ 7,000 ម៉ែត្រ។ ក្រុមហ៊ុន Stratolaunch ឱ្យដឹងថា ជើងហោះហើរនេះបានឆ្លើយតបគ្រប់យ៉ាងទៅនឹងគោលដៅដែលបានដាក់ចេញ។

ក្រុមហ៊ុន Stratolaunch ត្រូវបានបង្កើតឡើងដោយសហស្ថាបនិករបស់ Microsoft លោក Paul Allen ដើម្បីបាញ់បង្ហោះរ៉ុក្កែតពីអាកាសទៅកាន់បរិយាកាសផែនដី។ ក្រុមហ៊ុននេះកំពុងធ្វើតេស្តយាន Talon ដែលអាចហោះបានក្នុងល្បឿន Mach 6 (7.408 គីឡូម៉ែត្រ/ម៉ោង)។ ជើងហោះហើររបស់ TA-0 កាលពីថ្ងៃទី 28 តុលា គឺជាការហោះហើរសាកល្បងលើកទី 8 របស់យន្តហោះ Roc។

ក្រុមហ៊ុន Stratolaunch គ្រោងនឹងធ្វើការហោះហើរសាកល្បងនូវយានល្បឿនលឿនជាងសំឡេងពេញលេញដំបូងគឺ Talon-A TA-1 ក្នុងឆ្នាំ 2023 បើសិនការសាកល្បងទម្លាក់ក្នុងខែធ្នូខាងមុខទទួលបានជោគជ័យ។ ក្រុមហ៊ុននេះក៏កំពុងតែអភិវឌ្ឍកំណែ TA-2 និង TA-3 ដែលអាចប្រើប្រាស់ឡើងវិញទាំងស្រុងផងដែរ។

យោងតាម Space ក្រុមហ៊ុន Stratolaunch មានផែនការផ្ដល់សេវាកម្មហោះហើរដោយប្រើយានដែលមានល្បឿនលឿនជាងសំឡេងសម្រាប់រដ្ឋាភិបាល និងអតិថិជនក្នុងវិស័យពាណិជ្ជកម្មចាប់ពីឆ្នាំ 2023៕

October 31, 2022

សុនករ៉ូបូត បង្ហាញក្បាច់រាំត្រាប់តាមបទចម្រៀងល្បីរបស់ K-pop (វីដេអូ)

សុនករ៉ូបូត Spot ជាច្រើនគ្រឿងរបស់ក្រុមហ៊ុន Boston Dynamics បន្តធ្វើឱ្យទស្សនិកជនមានការភ្ញាក់ផ្អើលខ្លាំងនៅពេលពួកវារាំជាក្រុមទៅតាមបទចម្រៀងល្បីឈ្មោះរបស់ BTS បានយ៉ាងល្អ។

ត្រូវបានបង្ហាញជាលើកដំបូងកាលពីឆ្នាំ 2016 រ៉ូបូត Spot របស់ Boston Dynamics គឺជាសុនកយន្តស្វ័យប្រវត្តទំនើបដែលមានសមត្ថភាពហក់លោត រាំរែក ឡើងទួល ដើរឆ្លងកាត់ឧបសគ្គ ចាប់កាន់វត្ថុ និងអាចធ្វើសកម្មភាពធម្មតាប្រចាំថ្ងៃដូចជា បើកទ្វារ និងកាន់ទំនិញជាដើម។ ដោយបច្ចេកវិទ្យារីកចម្រើនខ្លាំងក្នុងរយៈពេលច្រើនឆ្នាំកន្លង ការសម្ដែងបង្ហាញរបស់ Spot ក៏កាន់តែគួរឱ្យចាប់អារម្មណ៍។

នៅក្នុងវីដេអូថ្មីបំផុតដែលត្រូវបានចែករំលែកដោយក្រុមហ៊ុន Boston Dynamics គេឃើញសុនករ៉ូបូត Spot ចំនួន 7 គ្រឿង សម្ដែងបង្ហាញក្បាច់រាំអមជាមួយនឹងបទចម្រៀង Permission to Dance ដែលជាបទល្បីខ្លាំងរបស់ក្រុមចម្រៀងកូរ៉េខាងត្បូង BTS ដែលមានសមាជិក 7 នាក់ដូចគ្នានេះដែរ។ វីដេអូនេះថែមទាំងមានការចូលរួមរបស់ Atlas ដែលជារ៉ូបូតរូបរាងជាមនុស្ស កម្ពស់ 1.8 ម៉ែត្រ របស់ Boston Dynamics។

ក្រុមហ៊ុន Boston Dynamics ដែលមានទីស្នាក់ការកណ្ដាលនៅ សហរដ្ឋអាម៉េរិក ត្រូវបានក្រុមហ៊ុនផលិតរថយន្ត Hyundai Motor របស់ កូរ៉េខាងត្បូង ទិញភាគហ៊ុនភាគច្រើនក្នុងតម្លៃ 1.1 ពាន់លានដុល្លារកាលពីឆ្នាំកន្លង។

វីដេអូនេះថែមទាំងមានការចូលរួមរបស់ Atlas ផងដែរ

វីដេអូថ្មីនេះត្រូវបានបង្កើតឡើងដោយមានកិច្ចសហការរវាង Hyundai Motor និង BTS សម្រាប់ការប្រគំតន្ត្រី «Yet to Come» របស់ពួកគេនៅ Busan នាខែតុលា 2022 ជាព្រឹត្តិការមួយដែលធ្វើឡើងដើម្បីគាំទ្រកិច្ចប្រឹងប្រែងរបស់ កូរ៉េខាងត្បូង នៅក្នុងការប្រកួតប្រជែងដណ្ដើមសិទ្ធិប្រារព្ធព្រឹត្តិការណ៍ពិព័រណ៍បច្ចេកវិទ្យាពិភពលោក World Expo នៅឆ្នាំ 2030។

នេះមិនមែនជាលើកដំបូងទេដែលរ៉ូបូត Spot «cover» ក្បាច់រាំរបស់ BTS។ កាលពីខែមិថុនា 2021 ដើម្បីជាការសាទរដល់ការទិញ Boston Dynamics របស់ Hyundai ក្រុមហ៊ុននេះក៏បានចាប់ដៃជាមួយក្រុមចម្រៀង BTS ដើម្បីធ្វើវីដេអូមួយដែលសម្ដែងក្បាច់រាំអមជាមួយនឹងចម្រៀង IONIQ: I’m On It ផងដែរ៕

https://www.youtube.com/watch?v=yEW-9SbXahI

October 31, 2022

កាមេរ៉ាឌីជីថលធំជាងគេបង្អស់ក្នុងពិភពលោក តម្លៃរាប់រយលានដុល្លារអាម៉េរិក

ក្រុមអ្នកវិទ្យាសាស្ត្រនៅ California កំពុងបង្ហើយកិច្ចការផលិតកាមេរ៉ា 3,200 megapixel ទំហំប្រហែលនឹងរថយន្តមួយគ្រឿង ដែលត្រូវបានរំពឹងថា នឹងជួយឱ្យអ្នកវិទ្យាសាស្ត្ររកឃើញផ្កាយថ្មីរាប់ពាន់លានដួងបន្ថែមទៀត។

«ខ្ញុំកំពុងស្ថិតនៅក្នុងបន្ទប់ស្អាតមួយនៅ California ខាងជើង ជាមួយនឹងកាមេរ៉ាឌីជីថលធំជាងគេបង្អស់ក្នុងពិភពលក» Andy Altman និយាយដូច្នេះ។

«កាមេរ៉ាលើដៃខ្ញុំនេះមានតម្លៃប្រហែល 6,000 ដុល្លារអាម៉េរិក។ ចំណែកមួយគ្រឿងនៅខាងក្រោយខ្ញុំមានតម្លៃ 168,000,000 ដុល្លារអាម៉េរិក។ នេះគឺជាឱកាសដ៏កម្រដែលយើងបានមើលគ្រឿងប្រដាប់ខាងក្នុងរបស់កាមេរ៉ានេះ ដោយសារតែគម្របមិនទាន់បិទ។ យើងអាចមើលឃើញរាល់ឧបករណ៍ និងសេនសឺរ»។

អ្នកធ្លាប់បានឮគេនិយាយដល់តេឡេស្កុប Hubble ហើយថ្មីៗនេះគឺតេឡេស្កុប James Webb។ ពេលនេះចូរត្រៀមសម្រាប់មើលតេឡេស្កុបដ៏អស្ចារ្យបន្ទាប់ ដែលត្រូវបានគេរំពឹងថា នឹងរកឃើញផ្កាយថ្មីរាប់ពាន់លានដួង រុករកវត្ថុអវកាសថ្មីរាប់លាននៅក្នុងប្រព័ន្ធព្រះអាទិត្យ និងកែប្រែវិធីដែលយើងមើលចក្រវាលនាបច្ចុប្បន្ន។

កាមេរ៉ានេះមានទំហំប៉ុនកូនឡានមួយគ្រឿង និងជាចំណុចស្នូលនៃការរុករកបេតិកភណ្ឌអវកាស និងពេលវេលា (LSST) ដែលជាគម្រោងមួយមានរយៈពេល 10 ឆ្នាំ ដើម្បីបង្កើតផែនទីសម្រាប់ផ្ទៃមេឃទាំងមូលនៅទិសខាងត្បូងប្រកបដោយភាពលម្អិត។

តើលម្អិតដល់កម្រិតណា?

កាមេរ៉ា 3,200 megapixel នេះខ្លាំងរហូតដល់ថ្នាក់ អាចមើលឃើញកូនបាល់ golf មួយគ្រាប់ដែលស្ថិតនៅចម្ងាយ 24 គីឡូម៉ែត្រ។ នៅពេលគម្រោងដែលមានរយៈពេល 10 ឆ្នាំនេះបានបញ្ចប់ជាស្ថាពរ ក្រុមអ្នកវិទ្យាសាស្ត្រក៏នឹងបង្កើតបានភាពយន្ត 3D មួយស្ដីពីផ្ទៃមេឃ បង្ហាញអំពីរបៀបដែលវត្ថុអវកាសរាប់ទ្រីលានផ្លាស់ទីជាមួយគ្នា រួមនឹងរបៀបដែលពន្លឺត្រូវកាច់ឱ្យកោងនៅជុំវិញវត្ថុអវកាសខ្នាតយក្ស និងដំណើរការនៃការវិវត្តរាប់ពាន់លានឆ្នាំរបស់ប្រព័ន្ធផ្កាយ និងកាឡាក់ស៊ី។

នៅពេលការផលិតបានរួចរាល់ កាមេរ៉ា LSST នឹងក្លាយជា «បេះដូង» របស់ស្ថានីយសង្កេតតារា Vera C. Rubin នៅតំបន់ភ្នំភាគខាងជើងនៃ ប្រទេសស៊ីលី។

ក្នុងបន្ទប់ពិសោធម៉ាស៊ីនបង្កើនល្បឿន SLAC នៅក្បែរសាកលវិទ្យាល័យ Stanford ក្រុមអ្នកវិទ្យាសាស្ត្រកំពុងតែបន្ថែមឧបករណ៍ចុងក្រោយសម្រាប់កាមេរ៉ាធំជាងគេបង្អស់នេះ។ ដូចទៅនឹងកាមេរ៉ាទូរស័ព្ទ គ្រប់យ៉ាងចាប់ផ្ដើមពីឡែន។ ប៉ុន្តែ កាមេរ៉ានេះមានប្រវែង 4 ម៉ែត្រ ហើយឡែនមានអង្កត់ផ្ចិត 1.5 ម៉ែត្រ។ នេះគឺជាកំណត់ត្រាពិភពលោកមួយ ហើយវាត្រូវការពេល 5 ឆ្នាំក្នុងការផលិត។

ក្រោយពីឆ្លងកាត់ឡែន ពន្លឺនឹងរត់ដល់កញ្ចក់ចម្រាញ់មួយក្នុងចំណោម 6 ឬច្រើនជាងនេះ។ កញ្ចក់ចម្រាញ់ពន្លឺនីមួយៗត្រូវបានផលិតឡើងដើម្បីប្រមូលពន្លឺតាមប្រភេទកាំនៅក្នុងវិសាលគមពន្លឺ ចាប់ពីកាំរស្មីអ៊ុលត្រាវីយូឡេ រហូតដល់កាំរស្មីជិតអ៊ីនហ្វ្រារ៉េដ។ បន្ទាប់ពីត្រូវបានចម្រាញ់ ពន្លឺកនឹងចូលទៅដល់ចំណុចផ្ដិតយករូបភាពដែលមានអង្គញាណ ឬហៅថា សេនសឺរដោយឡែកចំនួន 189។

វីដេអូនេះបង្ហាញថា ក្រុមការងារកំពុងដំឡើងសេនសឺរចំនួន 25 ក្រុម ក្នុងរយៈពេល 6 ខែ។ ក្រុមនីមួយៗមានតម្លៃ 3 លានដុល្លារ។

ក្រុមអ្នកវិទ្យាសាស្ត្របានសាកល្បងឧបករណ៍ផ្ដិតយករូបភាពរបស់កាមេរ៉ានេះកាលពីឆ្នាំកន្លង និងបង្កើតបានជារូបភាពដូចនាទីចុងក្រោយក្នុងវីដេអូនេះ។

LSST នឹងឆ្លងកាត់ការធ្វើតេស្តជាច្រើននៅក្នុងប៉ុន្មានខែខាងមុខ មុននឹងត្រូវបានដឹកទៅកាន់ ប្រទេសស៊ីលីនៅខែឧសភាឆ្នាំក្រោយ ដើម្បីដំណើរការ និងប្រើប្រាស់នៅក្នុងស្ថានីយសង្កេតតារានៅទីនោះ៕

October 29, 2022

អគ្គិភ័យកំពុងឆាបឆេះផ្ទះមួយកន្លែងនៅសង្កាត់ទួលស្វាយព្រៃទីមួយ ខណ្ឌបឹងកេងកង រាជធានីភ្នំពេញ

អគ្គិភ័យកំពុងឆាបឆេះផ្ទះមួយកន្លែង ដែលស្ថិតនៅ ខណ្ឌបឹងកេងកង រាជធានីភ្នំពេញ នាវេលាម៉ោង 5 រសៀល ថ្ងៃទី 28 ខែតុលា ឆ្នាំ 2022។

យោងតាមការចែករំលែកព័ត៌មាននៅលើបណ្ដាញសង្គម ករណីអគ្គិភ័យនេះ កើតមាននៅផ្សារលូ ខាងក្រោយសាលាទួលស្លែង ក្នុង សង្កាត់ទួលស្វាយព្រៃទីមួយ ខណ្ឌបឹងកេងកង រាជធានីភ្នំពេញ។

កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍។

October 28, 2022

ម្ចាស់ Facebook បាត់បង់ទ្រព្យអស់ 100 ពាន់លានដុល្លារក្នុងមួយឆ្នាំ

ទ្រព្យសម្បត្តិរបស់នាយកប្រតិបត្តិនៃក្រុមហ៊ុន Meta បន្តថយចុះអស់ 11 ពាន់លានដុល្លារទៀតនៅក្នុងសប្ដាហ៍នេះ ធ្វើឱ្យទំហំទឹកប្រាក់ដែលគាត់បានបាត់បង់ ឡើងដល់ជាង 100 ពាន់លានដុល្លារ ក្នុងរយៈពេល 13 ខែកន្លង។

សារព័ត៌មាន Bloomberg បានផ្សាយថា ទ្រព្យបច្ចុប្បន្នរបស់លោក Zuckerberg គឺ 38.1 ពាន់លានដុល្លារ តិចជាងឆ្ងាយធៀបនឹង 142 ពាន់លានដុល្លារកាលពីខែកញ្ញា 2021។ ក្នុងឆ្នាំនេះ ទ្រព្យរបស់មហាសេដ្ឋីភាគច្រើនក្នុងពិភពលោកសុទ្ធតែបានថយចុះ ប៉ុន្តែ ក្នុងចំណោមនោះ លោក Zuckerberg គឺជាអ្នកដែលបានបាត់បង់ទ្រព្យច្រើនជាងគេបង្អស់។

យោងតាមប្រកាសថ្មីបំផុតរបស់ Meta បច្ចុប្បន្នលោក Zuckerberg កាន់កាប់ភាគហ៊ុន Meta ជាង 350 លានហ៊ុន។ ឆ្នាំ 2018 លោក Zuckerberg ធ្លាប់យកឈ្នះលើមហាសេដ្ឋី Warren Buffett និងក្លាយជាអ្នកមានជាងគេលំដាប់ទីបីក្នុងពិភពលោក បន្ទាប់ពី Jeff Bezos និង Bill Gates។ ក៏ប៉ុន្តែ ចំណាត់ថ្នាក់របស់ម្ចាស់ Facebook បច្ចុប្បន្ន បានធ្លាក់ដល់ទី 23 ទៅហើយ។

យោងតាមក្រុមអ្នកវិភាគ បច្ចុប្បន្ន Meta កំពុងជួបបញ្ហាធំទាក់ទងនឹងមហិច្ឆតា metaverse ដោយសារតែការចំណាយទៅលើការអភិវឌ្ឍបច្ចេកវិទ្យានេះកើនឡើងខ្ពស់ នាំឱ្យក្រុមអ្នកវិនិយោគបាត់បង់ទំនុកចិត្ត។ តម្លៃភាគហ៊ុនរបស់ Meta បច្ចុប្បន្នស្ថិតនៅត្រឹម 100 ដុល្លារ/ហ៊ុន ដែលជាកម្រិតទាបបំផុតរាប់ចាប់ពីឆ្នាំ 2016។

លោក Zuckerberg ក៏ទទួលស្គាល់បញ្ហាខាងលើ។ ប៉ុន្តែ គាត់យល់ថា អនាគតរបស់ Meta គឺពិភព metaverse ហើយអ្នកវិនិយោគដែលមានការអត់ធ្មត់នឹងទទួលបានការតបស្នងយ៉ាងស័ក្ដិសម៕

October 28, 2022

មហាសេដ្ឋី អ៊ីឡុន ម៉ាស សរសេរថា «សត្វមានសេរីភាពហើយ» (“the bird is freed”)

ភ្លាមៗបន្ទាប់ពីការចូលគ្រប់គ្រង Twitter លោក អ៊ីឡុន ម៉ាស នាព្រឹកនេះបានបង្ហោះសារនៅលើបណ្ដាញសង្គមនេះយ៉ាងខ្លីថា “the bird is freed” ដែលមានន័យថា «សត្វមានសេរីភាពហើយ»។

ក្រុមអ្នកវិភាគយល់ថា សារថ្មីនេះរបស់លោក ម៉ាស មិនត្រឹមតែចង់អះអាងថា បណ្ដាញសង្គមនេះបានមកលើដៃគាត់នោះទេ ប៉ុន្តែថែមទាំងសង្កត់ធ្ងន់ថា គោលដៅជំរុញសេរីភាពបញ្ចេញមតិនៅលើ Twitter ត្រូវបាន «បើកសោរួចហើយ។ មុននោះ នៅក្នុងផែនការទិញ Twitter មហាសេដ្ឋីអាម៉េរិកដើមកំណើតអាហ្វ្រិកខាងត្បូង អ៊ីឡុនម៉ាស ធ្លាប់បានសន្យាថា នឹងកែទម្រង់បណ្ដាញសង្គមនេះតាមរយៈការបន្ធូរបន្ថយការចាប់ពិរុទ្ធខ្លឹមសារ ក៏ដូចជាធ្វើឱ្យប្រព័ន្ធនេះមានតម្លាភាពជាងមុន។

CNBC បានឱ្យដឹងថា CEO របស់ Tesla ក៏ប្រញាប់ចម្រាញ់បណ្ដាញសង្គមនេះ នៅពេលគាត់បញ្ឈប់ការងាររបស់មេដឹកនាំសំខាន់មួយចំនួន មានដូចជា CEO Parag Agrawal, ប្រធានផ្នែកហិរញ្ញវត្ថុ Ned Segal, ប្រធានរដ្ឋបាល និងផ្នែកច្បាប់ Vijaya Gadde និងទីប្រឹក្សា Sean Edgett ជាដើម ដោយយល់ថា ពួកគេមិនមានតម្លាភាពទាក់ទងនឹងតួលេខនៃគណនីក្លែងក្លាយនៅលើ Twitter។

លោក ម៉ាស ឱ្យដឹងថា លោកមានបំណងលុបបំបាត់គណនីសំរាម និង bot នៅលើបណ្ដាញសង្គម Twitter កែសម្រួលរបៀបតម្រៀបខ្លឹមសារ និងទប់ស្កាត់បណ្ដាញសង្គមនេះមិនឱ្យក្លាយជាកន្លែងផ្ទុកព័ត៌មានអាក្រក់ សូម្បីតែនៅពេលការចាប់ពិរុទ្ធខ្លឹមសារត្រូវបានបន្ធូរបន្ថយ។

ម្ចាស់ថ្មីរបស់ Twitter ក៏បានរំងាប់អារម្មណ៍របស់បុគ្គលិក នៅពេលអះអាងថា នឹងមិនមានការកាត់បន្ថយបុគ្គលិក 75% នៅពេលលោកចូលកាន់តំណែងជា CEO ដូចពាក្យចចាមអារ៉ាមឡើយ។ លោក ម៉ាស ក៏និយាយសំដៅលើក្រុមអ្នកផ្សព្វផ្សាយពាណិជ្ជកម្មថា ការរិះគន់របស់លោកនាពេលកន្លង នឹងមិនប៉ះពាល់ដល់បណ្ដាញសង្គមមួយនេះ។

លោក អ៊ីឡុន ម៉ាស កាលពីខែមេសា 2022 ប្រកាសថា សម្រេចបានកិច្ចព្រមព្រៀងទិញ Twitter។ ប៉ុន្តែ ខែកក្កដា 2022 លោក ម៉ាស បែរជាប្រកាសដកខ្លួន ដោយចោទថា បណ្ដាញសង្គមនេះបានរំលោភលើកិច្ចព្រមព្រៀង។ ខែកញ្ញាកន្លងទៅ លោក ម៉ាស ក៏បានប្ដូរចិត្ត ដោយថា លោកនឹងនៅតែទិញ Twitter ក្នុងតម្លៃ 44 ពាន់លានដុល្លារអាម៉េរិកដូចមុន៕

October 28, 2022

«មោទនភាពរបស់នាងខ្ញុំគឺនាងខ្ញុំអាចកើតជាកូនខ្មែរ» ជាការថ្លែងរបស់ ពេជ្រ វត្តីសារ៉ាវឌ្ឍី បន្ទាប់ពីជោគជ័យនៅ MGI 2022

បវរកញ្ញា Miss Grand Cambodia 2022 ពេជ្រ វត្តីសារ៉ាវឌ្ឍី បានបង្ហាញអំពីមោទកភាពរបស់ខ្លួនយ៉ាងជ្រាលជ្រៅក្នុងនាមជាកូនខ្មែរ បន្ទាប់ពីកញ្ញាទទួលបានតំណែងលំដាប់រងទី ៥ ក្នុងកម្មវិធីប្រកួតសម្រស់ Miss Grand International 2022 កាលពីរាត្រីថ្ងៃទី 25 តុលា 2022 នៅ ឥណ្ឌូណេស៊ី។

នៅលើទំព័របណ្ដាញសង្គម ពេជ្រ វត្តីសារ៉ាវឌ្ឍី បានសរសេរថា «មោទនភាពរបស់នាងខ្ញុំគឺនាងខ្ញុំអាចកើតជាកូនខ្មែរ រស់នៅក្រោមម្លប់នៃប្រទេសកម្ពុជា កាន់ទង់ជាតិកម្ពុជាទៅឆាកអន្តរជាតិ និងនាំយកភាពជោគជ័យមកកាន់ប្រទេសវិញ»។

ជោគជ័យរបស់ វត្តី បាន និងកំពុងធ្វើឱ្យ ប្រជាជនកម្ពុជា មានមោទកភាព ក៏ដូចជារំភើប និងសប្បាយរីករាយពន់ពេក ដោយសារថា បានជួយលើកមុខមាត់ប្រទេសជាតិនៅលើឆាកអន្តរជាតិ។

ក្រោយពីបានត្រលប់មកបាតុប្រទេសវិញ ជយលាភីបវរកញ្ញារងលំដាប់លេខ 5 ក្នុងកម្មវិធី Miss Grand International 2022 កញ្ញា ពេជ្រ វត្តីសារ៉ាវឌ្ឍី ក៏បានថ្លែងអំណរគុណដល់គ្រប់គ្នាដែលបានគាំទ្រដល់រូបនាង។ វត្តី សរសេរថា «នាងខ្ញុំ ពេជ្រ វត្តីសារ៉ាវឌ្ឍី Miss Grand Cambodia 2022 សូមថ្លែងអំណរគុណចំពោះការគាំទ្ររបស់អ្នកទាំងអស់គ្នា បងប្អូនទាំងគ្នាជាកម្លាំងចិត្តរបស់នាងខ្ញុំ អរគុណសម្រាប់ក្តីស្រឡាញ់»។

October 28, 2022

ជេហ្វ បេហ្សូស (Jeff Bezos) អាចនឹងបាត់បង់ 23 ពាន់ដុល្លារនៅក្នុងរយៈពេលតែមួយថ្ងៃ

ទ្រព្យសម្បត្តិរបស់ស្ថាបនិក Amazon អាចថយចុះច្រើនក្នុងថ្ងៃនេះ បន្ទាប់ពីក្រុមហ៊ុននេះបានព្យាករថា ប្រាក់ចំណូលក្នុងរដូវទិញដូរចុងឆ្នាំនឹងជួបការលំបាក។

ក្រុមហ៊ុនលក់រាយធំជាងគេក្នុងពិភពលោក Amazon កាលពីម្សិលមិញបានព្យាករអំពីលទ្ធផលជំនួញនៅក្នុងត្រីមាសចុងក្រោយនៃឆ្នាំនេះថា អន់ខ្លាំង បើធៀបនឹងការវាយតម្លៃរបស់ក្រុមអ្នកវិភាគ។ Amazon ព្យាករថា ប្រាក់ចំណូលក្នុងត្រីមាសទីបួនឆ្នាំនេះអាចសម្រេចបានត្រឹមតែពី 140 ដល់ 148 ពាន់លានដុល្លារ កើនពី 2 ដល់ 8% ធៀបនឹងឆ្នាំកន្លង។ ចំណែកក្រុមអ្នកវិភាគយល់ថា តួលេខនេះនឹងជា 155 ពាន់លានដុល្លារ។ ប្រាក់ចំណូលក្នុងត្រីមាសទីបីរបស់ Amazon កើន 15% ដោយវិលត្រលប់ទៅរកកំណើន 2 ខ្ទង់ ប៉ុន្តែនៅតែមិនសម្រេចបានដូចការរំពឹងរបស់ Wall Street។

ព័ត៌មានខាងលើបានធ្វើឱ្យភាគហ៊ុន Amazon បាត់បង់ 21% នៅក្នុងការជួញដូរក្រៅម៉ោងកាលពីថ្ងៃទី 27 តុលា។ បើសិនជាអត្រាថយចុះនេះកើតមាននៅក្នុងថ្ងៃទី 28 តុលា នោះមានន័យថា មហាសេដ្ឋី ជេហ្វ បេហ្សូស នឹងបាត់បង់ទ្រព្យ 23 ពាន់លានដុល្លារអាម៉េរិក។ នេះនឹងជាអត្រាថយចុះប្រចាំថ្ងៃធំលំដាប់ទី 5 នៅក្នុងប្រវត្តិតាមដានរបស់ Bloomberg Billionaires Index។ ពេលនោះ លោក ជេហ្វ បេហ្សូស នឹងនៅសល់ទ្រព្យត្រឹមតែ 111 ពាន់លានដុល្លារ ស្មើនឹងពាក់កណ្ដាលធៀបនឹងទ្រព្យរបស់គាត់កាលពីខែកក្កដា 2021។

ទ្រព្យរបស់លោក ជេហ្វ បេហ្សូស (អាយុ 58 ឆ្នាំ) បានថយចុះអស់ជាង 58 ពាន់លានដុល្លារក្នុងឆ្នាំនេះ គិតត្រឹមថ្ងៃទី 27 តុលា 2022 ដោយសារតែក្រុមភាគហ៊ុនបច្ចេកវិទ្យាដាំក្បាលចុះ។

ដូចទៅនឹងបណ្ដាក្រុមហ៊ុនបច្ចេកវិទ្យាដទៃ Amazon យល់ថា ផលវិបាកនេះបានកើតឡើងដោយសារបញ្ហាអតិផរណា ហើយថា តម្លៃឥន្ធនៈកើនឡើង និងតម្រូវការថយចុះនឹងអូសបន្លាយពេលយូរទៀត។ ពួកគេក៏ត្រូវរងផលប៉ះពាល់នៅពេលអ្នកប្រើប្រាស់វិលទៅរកទម្លាប់ទិញទំនិញដោយផ្ទាល់ ក្រោយកូវីដ-១៩ បានបញ្ចប់។

ឆ្នាំនេះ ភាគហ៊ុន Amazon បានធ្លាក់ថ្លៃ 33%។ ជេហ្វ បេហ្សូស បច្ចុប្បន្នកាន់កាប់ភាគហ៊ុន Amazon ចំនួន 996 លានហ៊ុន នេះបើតាមរបាយការណ៍កាលពីខែសីហា។ ទ្រព្យសរុបរបស់មហាសេដ្ឋីលំដាប់ទីពីរក្នុងពិភពលោក ជេហ្វ បេហ្សូស (ឈរបន្ទាប់ពី អ៊ីឡុន ម៉ាស (Elon Musk) បច្ចុប្បន្នមាន 171 ពាន់លានដុល្លារអាម៉េរិក៕

October 28, 2022

សំបុកត្រចៀកកាំកម្ពុជា អាចនាំចេញបានច្រើនទៅកាន់ទីផ្សារជាងពាន់លាននាក់ បន្ទាប់ពីអនុស្សរណៈនៃការយោគយល់មួយបានចូលជាធរមាន

អនុស្សរណៈនៃការយោគយល់ ស្តីពីកិច្ចសហប្រតិបត្ដិការជំរុញការនាំចេញសំបុកត្រចៀកកាំកម្ពុជា ទៅកាន់ ប្រទេសចិន របស់ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្មកម្ពុជា និង មជ្ឈមណ្ឌលពាណិជ្ជកម្មកម្ពុជានៅទីក្រុងសៀមិន ត្រូវបានចុះហត្ថលេខានៅ ប្រទេសចិន រួចហើយ។

ពិធីចុះហត្ថលេខាលើនេះត្រូវបានធ្វើឡើងកាលពីថ្ងៃទី 27 តុលា នៅ ទីក្រុងសៀមិន (Xiamen) ដោយមានវត្តមាន ឯកឧត្តម ឈួនដារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងពាណិជ្ជកម្ម និងជាតំណាង ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម រួមនឹងក្រសួង ស្ថាប័ន និងក្រុមមន្ត្រី និងតំណាងក្រុមហ៊ុនពាក់ព័ន្ធនឹងវិស័យសំបុកត្រចៀកកាំ។

អនុស្សរណៈនៃការយោគយល់គ្នានេះ ផ្ដោតទៅលើសកម្មភាពនៃកិច្ចសហប្រតិបត្តិការសំខាន់ៗ រួមមាន៖ ការស្វែងរកដៃគូផលិត និងផ្គត់ផ្គង់ផលិតផលសំបុកត្រចៀកកាំ, កិច្ចគាំពារឱ្យមានការបង្កើត រោងចក្រកែច្នៃផលិតផលទឹកមាត់ត្រចៀកកាំ, ការជំរុញឱ្យមានការបើកច្រកពាណិជ្ជកម្ម លើផលិតផលទឹកមាត់ត្រចៀកកាំរវាងកម្ពុជា និងចិន, ការពង្រឹងបណ្តាញធុរកិច្ច តាមរយៈការរៀបចំព្រឹត្តិការណ៍ពាណិជ្ជកម្មផ្សេងៗ ដូចជា វេទិការធុរកិច្ច ជំនួបពាណិជ្ជកម្ម និងការចូលរួមពិព័រណ៍ពាណិជ្ជកម្មជាដើម នេះបើតាម ឯកឧត្តម កៅ កោសល អគ្គនាយកនៃអគ្គនាយកដ្ឋានជំរុញពាណិជ្ជកម្ម។

យោងតាមក្រសួងពាណិជ្ជកម្មកម្ពុជា ប្រធានមជ្ឈមណ្ឌលពាណិជ្ជកម្មកម្ពុជានៅទីក្រុងសៀមិន លោក Mr. Zeng Youmin បានថ្លែងថា មជ្ឈមណ្ឌលពាណិជ្ជកម្មកម្ពុជានៅទីក្រុងសៀមិន មានបំណងលើកកម្ពស់កិច្ចសហប្រតិបត្តិការចិន-កម្ពុជា និងរួមចំណែកក្នុងការនាំចេញសំបុកត្រចៀកកាំកម្ពុជា ទៅកាន់ប្រទេសចិន។

ឯកឧត្តម ឈួន ដារ៉ា បានថ្លែងថា ក្រសួងពាណិជ្ជកម្ម គាំទ្រដល់មជ្ឈមណ្ឌលពាណិជ្ជកម្មនៅទីក្រុងសៀមិន សម្រាប់កិច្ចខិតខំប្រឹងប្រែងក្នុងការរៀបចំផែនការជំរុញការនាំចេញផលិតផលសំបុកត្រចៀកកាំកម្ពុជា ទៅកាន់ទីផ្សារចិន។ គំនិតផ្តួចផ្តើមនេះគឺជាដំណឹងដ៏ល្អ និងជាឱកាសដ៏អស្ចារ្យសម្រាប់វិស័យពាណិជ្ជកម្មនៅ ប្រទេសកម្ពុជា។

ឯកឧត្តមរដ្ឋលេខាធិការក្រសួងពាណិជ្ជកម្មកម្ពុជា បានអះអាងថា ផលិតផលសំបុកត្រចៀកកាំកម្ពុជា នឹងអាចនាំចូលទៅកាន់ទីផ្សារប្រទេសចិន បានយ៉ាងច្រើននាពេលអនាគតដ៍ខ្លីខាងមុខ ក្រោយពីអនុស្សារណៈនៃការយោគយល់នេះចូលជាធរមាន៕

October 28, 2022

មហាសេដ្ឋី អ៊ីឡុន ម៉ាស (Elon Musk) ចូលគ្រប់គ្រងបណ្ដាញសង្គម Twitter

មហាសេដ្ឋីអាម៉េរិក លោក អ៊ីឡុន ម៉ាស ត្រូវបានគេអះអាងថា បានសម្រេចរាល់ជំហានចុងក្រោយនៅក្នុងការចូលគ្រប់គ្រង Twitter និងបញ្ឈប់បុគ្គលិកជាន់ខ្ពស់ជាច្រើននាក់។

យោងតាម CNBC នាយកប្រតិបត្តិរបស់ Twitter លោក Parag Agrawal និងនាយកផ្នែកហិរញ្ញវត្ថុ Ned Segal បានចាកចេញពីទីស្នាក់ការកណ្ដាលនៅ San Francisco។ អ្នកទាំងពីរនឹងឈប់ធ្វើការនៅ Twitter ចាប់ពីថ្ងៃទី 28 តុលា ក្រោយពី អ៊ីឡុន ម៉ាស ចូលគ្រប់គ្រង។

ប្រភពព័ត៌មានរបស់ WSJ បានឱ្យដឹងថា Agrawal និង Segal ត្រូវបានលោក ម៉ាស បញ្ឈប់ ក្រោយពីម្ចាស់ Tesla បានទៅកាន់ការិយាល័យរបស់ Twitter កាលពីថ្ងៃទី 27 តុលា។ ចំណែក Bloomberg វិញ ផ្សាយថា ក្រៅពី Agrawal និង Segal ក៏នៅមានមេដឹកនាំផ្នែកច្បាប់ និងគោលការណ៍ Vifaya Gadde រួមនឹង ទីប្រឹក្សារួម Sean Edgett ផងដែរ ដែលត្រូវបានបញ្ឈប់ពីការងារ។

Agrawal នឹងមិនចាកចេញដោយដៃទទេឡើយ។ យោងតាម Reuters កិច្ចសន្យារវាង Agrawal និង Twitter តម្រូវឱ្យបណ្ដាញសង្គមនេះបង់ប្រាក់ប្រហែល 42 លានដុល្លារដល់ Agrawal។

តំណាងរបស់បណ្ដាញសង្គម Twitter មិនទាន់មានការបកស្រាយនៅឡើយ ដោយបានបដិសេធការស្នើសុំការអធិប្បាយអំពីបញ្ហាខាងលើ។

កាលពីថ្ងៃទី 27 តុលា មហាសេដ្ឋី អ៊ីឡុន ម៉ាស បានទៅដល់ទីស្នាក់ការរបស់ Twitter និងនាំយកឡាបូលាងដៃមួយមកតាមខ្លួន ព្រមទាំងបានបង្ហោះវីដេអូខ្លីមួយនៅលើបណ្ដាញសង្គមនេះ។ នៅលើទំព័រព័ត៌មានផ្ទាល់ខ្លួន លោក ម៉ាស ក៏បានប្ដូរខ្លឹមសារណែនាំខ្លួនទៅជា «ម្ចាស់ Twitter» ផងដែរ ដែលនេះត្រូវបាន Business Insider វាយតម្លៃថា ជាកាយវិការបង្ហាញថា លោក ម៉ាស មានគម្រោងធ្វើជា CEO របស់ Twitter។

លោក អ៊ីឡុន ម៉ាស កាលពីខែមេសា 2022 ប្រកាសថា សម្រេចបានកិច្ចព្រមព្រៀងទិញ Twitter។ ប៉ុន្តែ ខែកក្កដា 2022 លោក ម៉ាស បែរជាប្រកាសដកខ្លួន ដោយចោទថា បណ្ដាញសង្គមនេះបានរំលោភលើកិច្ចព្រមព្រៀង។ ខែកញ្ញាកន្លងទៅ លោក ម៉ាស ក៏បានប្ដូរចិត្ត ដោយថា លោកនឹងនៅតែទិញ Twitter ក្នុងតម្លៃ 44 ពាន់លានដុល្លារអាម៉េរិកដូចមុន៕

October 28, 2022

Category: សង្គម និងសេដ្ឋកិច្ច