សង្គម និងសេដ្ឋកិច្ច - La Reine Media

មហាអំណាចអាស៊ី បញ្ចេញកប៉ាល់ផ្ទុកកុងតឺន័រធំជាងគេបង្អស់ក្នុងពិភពលោក (វីដេអូ)

ប្រទេសចិន កាលពីថ្ងៃទី 29 តុលា បានបញ្ចេញកប៉ាល់ផ្ទុកកុងតឺន័រខ្នាតយក្សពីរគ្រឿងដែលមានបណ្ដោយជិត 400 ម៉ែត្រ និងអាចផ្ទុកបានរហូតដល់ 24,346 កុងតឺន័រប្រភេទ 20 feet។

កប៉ាល់ផ្ទុកកុងតឺន័រខាងលើដែលត្រូវបានសាងសង់ដោយក្រុមហ៊ុនទទួលខុសត្រូវមានកម្រិត Jiangsu Yangzi Xinfu Shibuilding ត្រូវបានបញ្ចេញពីរោងចក្រនៅក្នុងទីក្រុង Taixing នៃខេត្ត Jiangsu ភាគខាងកើតប្រទេសចិន កាលពីថ្ងៃទី 29 តុលា។

កប៉ាល់នីមួយៗអាចផ្ទុកបាន 24,346 TEU ឬកុងតឺន័រស្ដង់ដា 20 feet ដែលនេះក៏ជាការបំបែកកំណត់ត្រាថ្មីនៅក្នុងវិស័យសាងសង់កប៉ាល់កុងតឺន័រខ្នាតយក្សរបស់ពិភពលោក។

កប៉ាល់ទាំងពីរគ្រឿងខាងលើសុទ្ធតែមានបណ្ដោយ 399.99 ម៉ែត្រ និងទទឹង 61.3 ម៉ែត្រ ហើយទំហំរបស់ដំបូលកប៉ាល់ (ship’s deck) ឡើងដល់ 24,000 ម៉ែត្រក្រឡា ធំជាង 3.5 ដង បើធៀបនឹងទីលានបាល់ទាត់ស្ដង់ដា។

កប៉ាល់ទាំងនេះនឹងត្រូវប្រគល់ឱ្យអតិថិជននៅក្នុងខែកុម្ភៈ 2023 ក្រោយពីបានបំពាក់ឧបករណ៍ចុងក្រោយ និងសាកល្បងធ្វើដំណើរលើសមុទ្ររួចរាល់។

កប៉ាល់កុងតឺន័រខ្នាតយក្ស គឺជាកប៉ាល់ដែលមានកម្លាំងផ្ទុកចាប់ពី 10,000 TEU ឡើងទៅ។ វិស័យសាងសង់កប៉ាល់របស់ ប្រទេសចិន កំពុងបន្តនាំមុខគេនៅក្នុងទីផ្សារអន្តរជាតិក្នុងអំឡុង 3 ត្រីមាសដើមឆ្នាំ 2022 ក្នុងនោះ បណ្ដាកប៉ាល់កុងតឺន័រដែលមានកម្លាំងផ្ទុកលើសពី 10,000 TEU កាន់កាប់ 51.7% នៃចំណែកទីផ្សារទូទាំងពិភពលោក៕

November 2, 2022

ព្រលានយន្តហោះអន្តរជាតិ Bokeo របស់ប្រទេសឡាវ ស្ថាបនាជិតរួចរាល់ហើយ

ដំណើរការស្ថាបនាអាកាសយានដ្ឋាន Bokeo របស់ ប្រទេសឡាវ បច្ចុប្បន្នសម្រេចបាន 86% ហើយគ្រោងនឹងបើកដំណើរសម្រាប់ការហោះហើរក្នុងស្រុកចាប់ពីចុងឆ្នាំនេះ។

តាមផែនការ ជើងហោះហើរក្នុងស្រុករវាង រដ្ឋធានីវៀងចន្ទន៍ និង Bokeo នឹងដំណើរការនៅថ្ងៃចន្ទ ពុធ និងថ្ងៃសៅរ៍រៀងរាល់សប្ដាហ៍ បន្ទាប់មកនឹងបើកឱ្យមានជើងហោះហើរអន្តរជាតិ។

គម្រោងព្រលានយន្តហោះ Bokeo ដែលត្រូវបានសម្ពោធបើកការដ្ឋានសាងសង់កាលពីខែកញ្ញា 2020 ត្រូវបានរំពឹងថា នឹងទាក់ទាញទេសចរកាន់តែច្រើនសម្រាប់ភាគខាងជើងប្រទេសនេះ ជាទីដែលមានតំបន់កំសាន្តសម្បូរបែប និងអាចអូសទាញភ្ញៀវពី ប្រទេសចិន។

ព្រលានយន្តហោះ Bokeo ស្ថិតនៅក្បែរតំបន់សេដ្ឋកិច្ចពិសេស និងមានទំហំ 300 ហិកតា។ នេះគឺជាព្រលានយន្តហោះទីពីររបស់ខេត្ត Bokeo។ ព្រលាននេះអាចទទួលយន្តហោះខ្នាតធំ មានដូចជា Boeing 747 និង Airbus 320 ជាដើម។

អគារទទួលភ្ញៀវរបស់ព្រលានយន្តហោះ Bokeo អាចដាក់មនុស្សបាន 600 នាក់ ហើយនៅពេលដាក់ឱ្យដំណើរការពេញលេញ វានឹងអាចទទួលអ្នកដំណើរបានពី 1.5 លាន ទៅ 2 លាននាក់/ឆ្នាំ។

ព្រលានដែលត្រូវបានសាងសង់តាមទម្រង់សម្បទាន 50 ឆ្នាំនេះ ត្រូវបានអនុវត្តដោយក្រុមហ៊ុនវិនិយោគ និងអភិវឌ្ឍ Greater Bay Area Investment and Development (HK) Limited ដែលជាសមាជិកមួយរបស់ Dok Ngiew Kham Group និងមានទីស្នាក់ការនៅ ហុងកុង។ ខ្ទង់ប្រាក់វិនិយោគសម្រាប់ គម្រោងនេះ គឺ 157 លានដុល្លារអាម៉េរិក៕

November 1, 2022

តម្លៃប្រេងសាំងបច្ចុប្បន្ន នៅ ប្រទេសកម្ពុជា ថៃ ឡាវ និង វៀតណាម

ល្ងាចថ្ងៃទី 01 វិច្ឆិកានេះ ក្រសួងពាណិជ្ជកម្មកម្ពុជា បានកែប្រែតម្លៃលក់រាយប្រេងឥន្ធនៈ សម្រាប់អនុវត្តចាប់ពីថ្ងៃទី 01 ដល់ថ្ងៃទី 10 ខែវិច្ឆិកា ឆ្នាំ 2022។

យោងតាមប្រកាសរបស់ ក្រសួងពាណិជ្ជកម្មកម្ពុជា តម្លៃលក់រាយសាំងធម្មតា EA92 គឺ 4,250 រៀល/លីត្រ និងប្រេងម៉ាស៊ូត DO 50ppm តម្លៃ 5,150 រៀល/លីត្រ។

តម្លៃសាំងនៅប្រទេសជិតខាងរបស់ កម្ពុជា ៖ ប្រទេសថៃ តម្លៃលក់រាយសាំងធម្មតា ប្រហែល 3,900 រៀល/លីត្រ, នៅទីផ្សារ វៀតណាម សាំងធម្មតាតម្លៃប្រហែល 3,700 រៀល/លីត្រ ខណៈដែលនៅប្រទេសឡាវ សាំងធម្មតាមានតម្លៃប្រហែល 4.900 រៀល/លីត្រ។

តួលេខខាងលើបង្ហាញថា សាំងនៅ ប្រទេសឡាវ មានតម្លៃខ្ពស់ជាងគេក្នុងចំណោមប្រទេសទាំង 4 នេះ។ ចំណែក ប្រទេសវៀតណាម វិញ សាំងមានតម្លៃទាបជាងគេបង្អស់។

November 1, 2022

«ទីផ្សារមានតែរថយន្តអគ្គិសនី អ្នកក្រនឹងមិនមានរថយន្តជិះនឹងគេ» មេរបស់ BMW អះអាងដូច្នេះ

នាយកប្រតិបត្តិរបស់ក្រុមហ៊ុនផលិតរថយន្ត BMW បានសម្ដែងការបារម្ភរបស់ខ្លួនអំពីការដែលតំបន់ជាច្រើនបានប្រកាសហាមលក់រថយន្តចំហេះក្នុងចាប់ពីទសវត្សរ៍ក្រោយ។

កាលពីពេលថ្មីៗនេះ ប្រទេសជាច្រើននៅ អឺរ៉ុប បានអនុម័តសេចក្ដីព្រាងច្បាប់ «ហាមលក់រថយន្តចំហេះក្នុង» (រថយន្តប្រើសាំង/ម៉ាស៊ូត) នៅតំបន់នេះចាប់ពីឆ្នាំ 2035។

មុននោះ ទីក្រុងមួយចំនួននៅពាសពេញពិភពលោក និងរដ្ឋមួយចំនួនរបស់ សហរដ្ឋអាម៉េរិក ក៏បានកំណត់គោលដៅ ហាមលក់រថយន្តចំហេះក្នុងចាប់ពីទសវត្សរ៍ថ្មី ដោយចាប់ផ្ដើមពីថ្ងៃដំបូងនៃឆ្នាំ 2030 ឬយ៉ាងយូរចាប់ពីឆ្នាំ 2035។

នាយកប្រតិបត្តិ Oliver Zipse របស់ BMW បានសម្ដែងការព្រួយបារម្ភអំពីការកំណត់គោលដៅខាងលើ នៅពេលមានកិច្ចសម្ភាសជាមួយ Reuters កាលពីពេលថ្មីៗនេះ។

«យើងមិនចង់ឱ្យរថយន្តត្រូវបានប្លន់ពីដៃអ្នកប្រើប្រាស់ទូទៅ» លោក Zipse សង្កត់ធ្ងន់ដូច្នេះ។ «បើសិននៅសុខៗស្រាប់តែប្រែក្លាយឱកាសកាន់កាប់រថយន្តឱ្យទៅជារបស់សម្រាប់តែអ្នកមាន នោះវាគឺជារឿងដែលគ្រោះថ្នាក់បំផុត»។

តម្លៃរថយន្តអគ្គិសនី យ៉ាងហោចនៅក្នុងអនាគតខ្លី នៅតែខ្ពស់ជាង 10,000 ដុល្លារ ធៀបនឹងរថយន្តប្រើម៉ាស៊ីនចំហេះក្នុង នៅក្នុងប្រភេទ ទំហំដូចគ្នា។ ការដែលមិនមានជម្រើសរថយន្តតម្លៃទាប នឹងធ្វើឱ្យឱកាសមានរថយន្តជិះ ទៅជារឿងហួសសមត្ថភាព ពិសេសគឺនៅក្នុងស្ថានភាពដែលតម្លៃរថយន្តចេះតែកើនឡើង។

យោងតាម CEO របស់ BMW បណ្ដាក្រុមហ៊ុនរថយន្ត រួមទាំងរដ្ឋាភិបាលនានា គួរតែផ្ដល់ជម្រើសឱ្យបានច្រើនបំផុតសម្រាប់អ្នកប្រើប្រាស់ ជំនួសឱ្យការកំណត់ដ៏តឹងរឹងនេះ។

ក្រៅពីនាយកប្រតិបត្តិរបស់ BMW មុននោះ ក៏មានមតិប្រហាក់ប្រហែលនេះដែរ ក្នុងនោះមានដូចជាមតិរបស់នាយកប្រតិបត្តិរបស់ក្រុមហ៊ុន Renault លោក Luca de Meo ជាដើម៕

November 1, 2022

ផ្លូវល្បឿនលឿនភ្នំពេញ-ក្រុងព្រះសីហនុ ចាប់ផ្ដើមគិតកម្រៃសេវា ដោយមានការបញ្ចុះតម្លៃ

ផ្លូវល្បឿនលឿនភ្នំពេញ-ក្រុងព្រះសីហនុ នឹងចាប់ផ្ដើមគិតកម្រៃសេវា ដោយមានការបញ្ចុះតម្លៃ 20% ពីថ្ងៃទី 01 ខែវិចិ្ឆកា ឆ្នាំ 2022 ដល់ថ្ងៃទី 31 ខែតុលា ឆ្នាំ 2023 នេះបើតាម ក្រសួងសាធារណការ និងដឹកជញ្ជូន។

យោងតាមក្រសួងសាធារណការ ការគិតកម្រៃសេវាដោយមានការបញ្ចុះតម្លៃ 20% ខាងលើនេះ គឺធ្វើឡើងទៅតាមចម្ងាយផ្លូវជាក់ស្តែង និងប្រភេទយានយន្តដែលអ្នកដំណើរបើកបរ។

ក្រសួងបញ្ជាក់ថា យានយន្តត្រូវបានបែងចែកជាប្រភេទ «A, B, C, D, E» ដូចខាងក្រោម ៖

-ប្រភេទ “ A ” (1) ទោចក្រយានយន្ត ដែលមានទំហំស៊ីឡាំង ចាប់ពី 500CC ឡើងទៅ និងមានបិទស្ទីគ័រសម្គាល់ អនុញ្ញាតដោយក្រសួង, (2) រថយន្តគ្រួសារ មិនលើសពី 7 កៅអី, (3) រថយន្តដឹកទំនិញ អាចផ្ទុកទំនិញក្រោម 2 តោន

-ប្រភេទ “ B ” (1) រថយន្តដឹកអ្នកដំណើរចាប់ពី 8 កៅអី ដល់ 19 កៅអី, (2) រថយន្តដឹកទំនិញ អាចផ្ទុកទំនិញចាប់ពី 2 តោន ដល់ 5 តោន

-ប្រភេទ “ C ” (1) រថយន្តដឹកអ្នកដំណើរចាប់ពី 20 កៅអី ដល់ 56 កៅអី, (2) រថយន្តដឹកទំនិញ អាចផ្ទុកទំនិញចាប់ពី 5 តោន ដល់ 10 តោន

-ប្រភេទ “ D ” (1) រថយន្តដឹកទំនិញ អាចផ្ទុកទំនិញចាប់ពី 10 តោន ដល់ 20 តោន

-ប្រភេទ “ E ” (1) រថយន្តដឹកទំនិញ អាចផ្ទុកទំនិញលើសពី 20 តោនឡើងទៅ (គិតទាំងកុងតឺន័រ)

November 1, 2022

ក្រុមហ៊ុនផលិតថ្មផ្ទុកថាមពលធំជាងគេក្នុងលោក សហការជាមួយក្រុមហ៊ុនផលិតរថយន្តអគ្គិសនីវៀតណាម

ក្រុមហ៊ុនផលិតថ្មផ្ទុកថាមពលអគ្គិសនីធំជាងគេបង្អស់ក្នុងពិភពលោក CATL បានចុះកិច្ចព្រមព្រៀងសហការរកស៊ីជាមួយក្រុមហ៊ុនផលិតរថយន្តអគ្គិសនី VinFast របស់ វៀតណាម។

កាលពីថ្ងៃទី 30 តុលា នៅ ប្រទេសជប៉ុន តំណាងក្រុមហ៊ុនផលិតថ្មផ្ទុកថាមពលអគ្គិសនី Contemporary Amperex Technology (CATL) របស់ ចិន បានចុះកិច្ចព្រមព្រៀងសហប្រតិបត្តិការយុទ្ធសាស្ត្រជាមួយនឹងក្រុមហ៊ុនផលិតរថយន្តអគ្គិសនី Vinfast របស់ វៀតណាម។ ពិធីចុះហត្ថលេខានេះមានវត្តមានរបស់លោក Robin Zeng ដែលជាប្រធានក្រុមហ៊ុន CATL និងលោក Pham Nhat Vuong ប្រធានក្រុមហ៊ុន Vingroup និងជាប្រធានក្រុមហ៊ុន VinFast។

បច្ចុប្បន្ន CATL គឺជាអ្នកផលិតថ្មផ្ទុកអគ្គិសនីធំជាងគេបង្អស់ក្នុងពិភពលោក។ យោងតាម Companiesmarketcap តម្លៃមូលធនទីផ្សាររបស់ CATL គឺ 124.63 ពាន់លានដុល្លារអាម៉េរិក។ ស្ថាបនិករបស់ CATL លោក Robin Zeng កាលពីឆ្នាំ 2021 មានទ្រព្យជាង 60 ពាន់លានដុល្លារអាម៉េរិក ហើយបើយោងតាម Forbes លោក Zeng គឺជាមហាសេដ្ឋីលំដាប់ទីបីនៅ ប្រទេសចិន។ លោកក៏ជាអ្នកមានជាងគេលំដាប់ទី 23 ក្នុងពិភពលោក នេះបើតាម Bloomberg។

ពិធីចុះហត្ថលេខាកាលពីថ្ងៃទី 30 តុលា នៅ ប្រទេសជប៉ុន រវាង CATL និង VinFast

លោក Zeng បង្កើតក្រុមហ៊ុនផលិតថ្មផ្ទុកអគ្គិសនី Amperex Technology Ltd (ATL) កាលពីឆ្នាំ 1999។ ក្រុមហ៊ុនផលិតគ្រឿងបន្លាស់អេឡិចត្រូនិច TDK របស់ ជប៉ុន បានទិញ ATL កាលពីឆ្នាំ 2005 ក្នុងតម្លៃ 100 លានដុល្លារអាម៉េរិក និងបន្តគ្រប់គ្រង ATL ដូចទៅនឹងក្រុមហ៊ុនបុត្រសម្ព័ន្ធ។

ឆ្នាំ 2011 ក្រុមអ្នកវិនិយោគចិន មួយក្រុម ដែលដឹកនាំដោយលោក Zeng បានទិញភាគហ៊ុន 85% ក្នុងផ្នែកផលិតថ្មផ្ទុកថាមពលសម្រាប់រថយន្តអគ្គិសនរបស់ក្រុមហ៊ុន TDK។ ចុងឆ្នាំ 2011 ពួកគេបានបង្កើតក្រុមហ៊ុនអភិវឌ្ឍថ្មសម្រាប់រថយន្តអគ្គិសនីជាផ្លូវការដែលមានឈ្មោះថា Contemporary Amperex Technology Co Ltd (CATL)។ អតិថិជនដំបូងរបស់ CATL គឺក្រុមហ៊ុនផលិតរថយន្ត BMW (អាល្លឺម៉ង់) ហើយបន្ទាប់មកគឺ GM, Volkswagen និង Tesla។

ខាងក្នុងរោងចក្រផលិតថ្មអគ្គិសនី CATL នៅ ប្រទេសចិន

បច្ចុប្បន្នក្រុមហ៊ុន CATL ដែលមានទីស្នាក់ការកណ្ដាលនៅ ប្រទេសចិន មានភាគហ៊ុន ដៃគូសហការ និងក្រុមហ៊ុនបណ្ដាក់ទុនរួមរាប់រយនៅទូទាំងពិភពលោក និងកំពុងកាន់កាប់ចំណែកទីផ្សារថ្មអគ្គិសនីប្រមាណជាង 50% នៅ ប្រទេសចិន និងជាង 30% នៅក្នុងពិភភពលោក។

ខាងក្នុងរោងចក្រផលិតរថយន្តអគ្គិសនីរបស់ VinFast

យោងតាមកិច្ចព្រមព្រៀងខាងលើ CATL និង VinFast គ្រោងនឹងសហការគ្នាដើម្បីអភិវឌ្ឍបច្ចេកវិទ្យាថ្មី ក្នុងនោះមានថ្មផ្ទុកថាមពល និងគ្រឿងបន្លាស់ជាច្រើនទៀតដែលប្រើប្រាស់សម្រាប់រថយន្តអគ្គិសនីរបស់ ក្រុមហ៊ុនវៀតណាម៕

November 1, 2022

មហាសេដ្ឋី អ៊ីឡុន ម៉ាស (Elon Musk) ប្រកាសថា ខ្លួនជា CEO ថ្មីរបស់ Twitter

មហាសេដ្ឋី អ៊ីឡុន ម៉ាស ប្រកាសជាផ្លូវការថា បានទទួលតំណែងជានាយកប្រតិបត្តិ (CEO) ថ្មីរបស់បណ្ដាញសង្គម Twitter ដែលលោកទើបតែទិញក្នុងតម្លៃ 44 ពាន់លានដុល្លារ។

មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស ទើបតែបានបញ្ជាក់អំពីមុខតំណែងថ្មីរបស់គាត់នៅក្នុងក្រុមហ៊ុន Twitter កាលពីថ្ងៃទី 31 តុលា (ម៉ោងនៅ សហរដ្ឋអាម៉េរិក) ក្រោយពីទិញបណ្ដាញសង្គមនេះបាន 3 ថ្ងៃ។

បច្ចុប្បន្ន ក្រៅពីតំណែង CEO របស់ Twitter លោក ម៉ាស ក៏ជានាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla និងក្រុមហ៊ុនបច្ចេកវិទ្យាអវកាស SpaceX ផងដែរ។

កាលពីសប្ដាហ៍កន្លង ករណីទិញដូរ Twitter របស់លោក ម៉ាស ដែលមានតម្លៃ 44 ពាន់លានដុល្លារ ត្រូវបានសម្រេចជាស្ថាពរ ក្រោយការប្រែប្រួលអស់ជាច្រើនខែ។

ការទិញបណ្ដាញសង្គមខាងលើរបស់លោក ម៉ាស ត្រូវបានធានាខ្ទង់ប្រាក់កម្ចីពីបណ្ដាធនាគារ ហើយក៏ទទួលបានការគាំទ្រពីអ្នកវិនិយោគល្បីល្បាញមួយចំនួនផងដែរ៕

November 1, 2022

វិធីសាស្ត្រដើម្បី «រក្សាជីវិត» ពេលជាប់គាំងក្នុងហ្វូងមនុស្សប្រជ្រៀតគ្នាដ៏ច្របូកច្របល់

នៅពេលបានឃើញមនុស្សរាប់រយ ឬរាប់ពាន់នាក់ស្លាប់នៅក្នុងហេតុការណ៍ប្រជ្រៀត និងជាន់គ្នា មនុស្សជាច្រើនមិនដឹងថា គួរធ្វើយ៉ាងណាដើម្បីរំដោះខ្លួនពីគ្រោះថ្នាក់នេះ។

ការស្រាវជ្រាវមួយបានបង្ហាញថា ចាប់ពីឆ្នាំ 1980 ដល់ 2007 មានហេតុការណ៍រត់ជាន់គ្នា ឬប្រជ្រៀតគ្នាចំនួនប្រហែល 215 ករណី នាំឱ្យមនុស្សជាង 7,000 នាក់ស្លាប់ និងជាង 14,000 នាក់រងរបួស នេះបើតាមទំព័រសុខភាព WebMD។

ខាងក្រោមនេះគឺជាវិធីសាស្ត្ររបស់អ្នកជំនាញមួយចំនួន ដែលអាចជួយឱ្យអ្នករំដោះជីវិតនៅពេលជាប់គាំងនៅក្នុងហ្វូងមនុស្សដែលកំពុងប្រជ្រៀតគ្នាខ្លាំង ៖

ទីមួយ ៖ រកមើលសញ្ញានៃគ្រោះថ្នាក់

ក្នុង 1 ម៉ែត្រក្រឡាមានមនុស្ស 6 នាក់គឺជាសញ្ញាប្រាប់ថា គ្រោះថ្នាក់នៃការប្រជ្រៀតគ្នា ការជាន់គ្នាជិតមកដល់។ ចូរចាប់ផ្ដើមរកវិធីចេញឱ្យផុតពីហ្វូងមនុស្សនេះ ហើយកុំរង់ចាំដល់ពេលមនុស្សនៅជុំវិញអាចប៉ះស្មាទាំងពីររបស់អ្នក។

ទីពីរ ៖ ត្រូវរក្សាលំនឹងឱ្យបានល្អបំផុត

ដើម្បីឈរឱ្យនឹង អ្នកត្រូវឈរជ្រែងជើង និងដាក់ដៃដូចអ្នកប្រដាល់។ មិនដូច្នេះទេ អ្នកអាចនឹងដួល ហើយត្រូវគេជាន់ស្លាប់ ឬរបួសធ្ងន់។

ទីបី ៖ បើសិនជាដួល មិនត្រូវបណ្ដោយឱ្យដេកផ្ងារ ឬដេកសណ្ដូក

ពេលដួល ត្រូវរកវិធីក្រោកឈរភ្លាម និងជួយដល់អ្នកដែលបានដួល។ បើសិនមិនអាចក្រោកឈរបាន ចូរយកដៃឱបជិតក្បាល អង្កួញជើង និងដេកផ្អៀងដើម្បីការពារដងខ្លួន។

ទីបួន ៖ ព្យាយាមដកដង្ហើម បើទោះក្នុងស្ថានភាពលំបាកបំផុត

មូលហេតុចម្បងដែលនាំទៅរកការស្លាប់នៅក្នុងហេតុការណ៍ហ្វូងមនុស្សប្រជ្រៀតជាន់គ្នាគឺបញ្ហាខ្វះអុកស៊ីសែន។ ដូច្នេះ ពេលស្ថិតក្នុងស្ថានភាពនេះ ចូរបោះដៃទៅមុខ និងរក្សាវានៅត្រង់នោះ អ្នកនឹងមានលំហបន្ថែមដើម្បីដកដង្ហើមបានស្រួលបន្តិច។

ទីប្រាំ ៖ ប្រឹងស្មារតី

ចូរកុំស្រែក ព្រោះថា ពុំមានអ្នកណាអាចឮអ្នកស្រែកនៅក្នុងស្ថានការណ៍បែបនេះឡើយ ប៉ុន្តែវាថែមទាំងធ្វើឱ្យអ្នកឆាប់បាត់បង់អ៊ុស៊ីសែន នាំឱ្យសន្លាប់ ហើយត្រូវគេជាន់ស្លាប់។

ទីប្រាំមួយ ៖ ដើរតាមបណ្ដោយហ្វូងមនុស្ស

អ្នកអាចដើរតាមបណ្ដោយហ្វូងមនុស្ស ដើរបញ្ឆិត ឬដើរចេញទៅឆ្វេង ឬស្ដាំ ឆ្ពោះទៅទិសដែលមានមនុស្សតិច ហើយចាកចេញពីការប្រជ្រៀតគ្នា។ បើសិនជាជ្រុះរបស់អ្វីមួយ ចូរបោះបង់វាចុះ។

ទីប្រាំពីរ ៖ ជួយដល់អ្នកនៅក្បែរ

បើសិនអ្នកជួយដល់អ្នកដទៃ ពួកគេនឹងជួយអ្នក ឬជួយអ្នកដទៃទៀតវិញដែរ។ នៅពេលការជួយគ្នានេះត្រូវបានធ្វើឡើង វានឹងធ្វើឱ្យបរិយាកាសបានល្អប្រសើរ និងមានប្រយោជន៍៕

October 31, 2022

តម្លៃប្រេងឆៅនៅ ទ្វីបអាស៊ី ធ្លាក់ចុះក្នុងការជួញដូរនៅដើមសប្ដាហ៍នេះ

ប្រេងឆៅនៅ ទ្វីបអាស៊ី ធ្លាក់ថ្លៃក្នុងការជួញដូរនៅថ្ងៃទី 31 តុលា 2022 ដោយសារតែការបារម្ភដែលថា ការរឹតបន្តឹងវិធានការដែលទាក់ទងនឹង កូវីដ-19 នៅ ប្រទេសចិន នឹងធ្វើឱ្យតម្រូវការថាមពលរបស់ប្រទេសនេះថយចុះ។

ការជួញដូរក្នុងព្រឹកនេះនៅឯផ្សារជួញដូរសិង្ហបុរី តម្លៃប្រេង WTI បានធ្លាក់ថ្លៃ 23 សេនអាម៉េរិក (0.3%) មកនៅត្រឹម 87.67 ដុល្លារអាម៉េរិក/ធុង បន្ទាប់ពីបានថយចុះ 1.2% កាលពីចុងសប្ដាហ៍កន្លង។ ប្រេង Brent ប្រគល់តាមកាលកំណត់ក៏បានបាត់បង់តម្លៃ 36 សេនអាម៉េរិក (0.4%) មកនៅត្រឹម 95.41 ដុល្លារអាម៉េរិក/ធុង។

ក្រុមអ្នកវិភាគបានឱ្យដឹងថា ការដែល ចិន រឹតបន្តឹងវិធានការបង្ការជំងឺ កូវីដ-19 តែងតែធ្វើឱ្យមានការបារម្ភចំពោះតម្រូវការប្រេងឆៅរបស់បណ្ដាក្រុមហ៊ុននាំចូលប្រេងនៅប្រទេសនេះ នាំឱ្យតម្លៃប្រេងត្រូវធ្លាក់ថ្លៃខ្លាំង។

ក៏ប៉ុន្តែ តម្លៃប្រេង WTI នៅតែទទួលបានការគាំទ្រទាក់ទងនឹងព័ត៌មានអំពីអណ្ដូងរ៉ែប្រេងរបស់ សហរដ្ឋអាម៉េរិក។ ក្រុមអ្នកផលិតប្រេងធំៗនៅ សហរដ្ឋអាម៉េរិក យល់ថា កម្លាំងផលិត និងបរិមាណប្រេងឆៅនៅតំបន់ Pernian របស់ប្រទេសនេះ កំពុងបង្អង់ល្បឿនមកវិញ៕

October 31, 2022

ក្រសួងពាណិជ្ជកម្ម ស្នើឱ្យអ្នកជំនួញ «កែតម្រូវសកម្មភាព និងខ្លឹមសារផ្សព្វផ្សាយពាណិជ្ជកម្ម» តាមគ្រប់រូបភាព

គណៈកម្មាធិការជាតិការពារអ្នកប្រើប្រាស់ «គ.ជ.ក.ប.» របស់ ក្រសួងពាណិជ្ជកម្មកម្ពុជា នៅថ្ងៃទី 31 តុលានេះ បានចេញជូនដំណឹងមួយស្ដីពី «ការកែតម្រូវ សកម្មភាព និងខ្លឹមសារផ្សាយពាណិជ្ជកម្មដែលមិនអនុលោមទៅនឹងច្បាប់ និងបទប្បញ្ញត្តិជាធរមាន» ដើម្បីការពារផលប្រយោជន៍អ្នកប្រើប្រាស់ និងសង្គមជាតិទាំងមូល។

នៅក្នុងសេចក្ដីជូនដំណឹងនេះ ក្រសួងបានឱ្យដឹងថា «កន្លងមកនេះ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និង បង្ក្រាបការក្លែងបន្លំ «ក.ប.ប.» ដែលជាសេនាធិការនៃ គ.ជ.ក.ប. បានចេញសេចក្តីប្រកាសព័ត៌មាន ដោយទុករយៈពេល 30 (សាមសិប) ថ្ងៃ (ពីថ្ងៃទី 8 ខែកញ្ញា 2022 ដល់ថ្ងៃទី 8 តុលា 2022) ដើម្បី (អ្នកផ្សាយពាណិជ្ជកម្ម) កែតម្រូវសកម្មភាព និងខ្លឹមសារផ្សាយពាណិជ្ជកម្មដែលមិនអនុលោមទៅនឹងច្បាប់ និងបទប្បញ្ញត្តិជាធរមាន»…។

ក្រសួងពាណិជ្ជកម្ម បន្តថា «បុគ្គលផ្សាយពាណិជ្ជកម្ម ឬបុគ្គលទទួលសិទ្ធិឱ្យចាត់ចែងផ្សាយពាណិជ្ជកម្ម នៅតែបន្តសកម្មភាពល្មើស ផ្សព្វផ្សាយពាណិជ្ជកម្មរបស់ខ្លួនតាមគ្រប់ប្រភេទ ទម្រង់ និងគ្រប់មធ្យោបាយ មានលក្ខណៈភូតកុហក បំភាន់ការពិត អាចធ្វើឱ្យអ្នកប្រើប្រាស់មានការយល់ច្រឡំអំពីការទទួលបាននូវអត្ថប្រយោជន៍ផ្សេងៗ ប៉ះពាល់ដល់ដំណើរការប្រកួតប្រជែងប្រកបដោយសុចរិត និងកាត់បន្ថយប្រសិទ្ធភាពសេដ្ឋកិច្ច ដែលត្រូវបានហាមឃាត់ដោយច្បាប់ និង បទប្បញ្ញត្តិ ជាធរមាន ជាពិសេសច្បាប់ស្ដីពីកិច្ចការពារអ្នកប្រើប្រាស់»។

ដើម្បីទប់ស្កាត់នូវបញ្ហាខាងលើ ក្រសួងពាណិជ្ជកម្ម ក្រើនរំលឹកដល់បុគ្គលផ្សាយពាណិជ្ជកម្ម ឬបុគ្គលទទួលសិទ្ធិឱ្យចាត់ចែងផ្សាយពាណិជ្ជកម្ម ត្រូវអនុវត្តឱ្យបានត្រឹមត្រូវ តាមខ្លឹមសារ នៃច្បាប់ និង បទប្បញ្ញត្តិជាធរមាន។

ក្រសួងស្នើឱ្យបុគ្គលផ្សាយពាណិជ្ជកម្ម ឬបុគ្គលទទួលសិទ្ធិឱ្យចាត់ចែងផ្សាយពាណិជ្ជកម្ម ត្រូវសហការជាមួយ អគ្គនាយកដ្ឋាន ក.ប.ប. ដើម្បីផ្តល់ឯកសារពាក់ព័ន្ធនឹងការផ្សាយពាណិជ្ជកម្ម ផ្តល់រង្វាន់ និង កែតម្រូវ សកម្មភាព និងខ្លឹមសារផ្សព្វផ្សាយពាណិជ្ជកម្មរបស់ខ្លួន ឱ្យស្របតាមខ្លឹមសារនៃច្បាប់ និង បទប្បញ្ញត្តិ ក្នុងរយៈពេល 3 (បី) ថ្ងៃ បន្ទាប់ពីថ្ងៃចេញសេចក្ដីជូនដំណឹងនេះ។

ក្រសួងពាណិជ្ជកម្ម បញ្ជាក់ថា ក្នុងករណីរកឃើញថា បុគ្គលណាមួយនៅតែប្រព្រឹត្តល្មើស ហើយមិនបានអនុវត្តតាមការណែនាំខាងលើ គ.ជ.ក.ប. នឹងចាត់វិធានការតាមផ្លូវច្បាប់ និងបទប្បញ្ញត្តិជាធរមាន៕

October 31, 2022

Category: សង្គម និងសេដ្ឋកិច្ច