សង្គម និងសេដ្ឋកិច្ច - La Reine Media

នាយករដ្ឋមន្ត្រីវៀតណាម មកបំពេញទស្សនកិច្ចជាផ្លូវការនៅ កម្ពុជា នាសប្ដាហ៍ក្រោយ

នាយករដ្ឋមន្ត្រីវៀតណាម លោក Pham Minh Chinh នឹងមកបំពេញទស្សនកិច្ចផ្លូវការនៅ កម្ពុជា និងចូលរួមសន្និសីទកំពូលអាស៊ាន ចាប់ពីថ្ងៃទី 08 ដល់ 13 វិច្ឆិកា 2022។

តបតាមការអញ្ជើញរបស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នាយករដ្ឋមន្ត្រីវៀតណាម Pham Minh Chinh នឹងមកធ្វើទស្សនកិច្ចកម្ពុជា ចាប់ពីថ្ងៃទី 8-9 វិច្ឆិកា និងចូលរួមកិច្ចប្រជុំកំពូលអាស៊ានលើកទី 40, 41 រួមនឹងបណ្ដាកិច្ចប្រជុំដែលពាក់ព័ន្ធចាប់ពីថ្ងៃទី 10 ដល់ 13 វិច្ឆិកា 2022។

នេះគឺជាដំណើរទស្សនកិច្ចមកកាន់ កម្ពុជា ជាលើកដំបូងរបស់ លោក Pham Minh Chinh ក្នុងនាមជានាយករដ្ឋមន្ត្រី ហើយក៏ជាដំណើរទស្សនកិច្ចដំបូងរបស់មេដឹកនាំជាន់ខ្ពស់វៀតណាម មកកាន់ កម្ពុជា ក្នុងឆ្នាំមិត្តភាពវៀតណាម-កម្ពុជាឆ្នាំ 2022 នេះផងដែរ៕

November 3, 2022

ក្រុមហ៊ុនផលិតរថយន្តអគ្គិសនីរបស់ វៀតណាម សហការជាមួយក្រុមហ៊ុនកែច្នៃថ្មផ្ទុកថាមពលនៅ អាម៉េរិកខាងជើង

ក្រុមហ៊ុន Li-Cycle នឹងផ្គត់ផ្គង់ដំណោះស្រាយក្នុងការកែច្នៃថ្មផ្ទុកថាមពលអគ្គិសនីទ្រង់ទ្រាយសកលសម្រាប់ ក្រុមហ៊ុនថាម VinES និងក្រុមហ៊ុនផលិតរថយន្តអគ្គិសនី VinFast របស់ វៀតណាម។

ថ្ងៃទី 03 វិច្ឆិកានេះ VinES ដែលជាក្រុមហ៊ុនបុត្រសម្ព័ន្ធផ្នែកថាមពលរបស់ក្រុមហ៊ុនផលិតរថយន្តអគ្គិសនីវៀតណាម Vingroup និងក្រុមហ៊ុន Li-Cycle Holdings Corp., របស់ កាណាដា ដែលមានជំនាញក្នុងវិស័យស្ដារធនធាន និងកែច្នៃថ្មផ្ទុកថាមពលប្រភេទ lithium-ion បានប្រកាសអំពីកិច្ចសហប្រតិបត្តិសកលទាក់ទងនឹងការកែច្នៃថ្មសម្រាប់រថយន្តអគ្គិសនី។

យោងតាមកិច្ចព្រមព្រៀង ក្រុមហ៊ុន Li-Cycle នឹងផ្គត់ផ្គង់ដំណោះស្រាយក្នុងការកែច្នៃថ្មផ្ទុកថាមពលអគ្គិសនីទ្រង់ទ្រាយសកលសម្រាប់ VinES និង VinFast ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនវៀតណាម Vingroup។

Li-Cycle បច្ចុប្បន្នមានរោងចក្រកែច្នៃចំនួន 4 នៅ អាម៉េរិកខាងជើង និងអាចចាត់ចែងកែច្នៃវត្ថុធាតុ 30,000 តោន/ឆ្នាំ ស្មើនឹងថ្មផ្ទុកថាមពលពីរថយន្តអគ្គិសនីប្រមាណ 60,000 គ្រឿង។ ក្រៅពីនេះ Li-Cycle ក៏មានរោងចក្រដែលមានជំនាញផ្សេងពីនេះជាច្រើនទៀតផងដែរ។

ចំណែក VinFast វិញ បានប្រកាសអំពីគម្រោងសាងសង់រោងចក្រផលិតរថយន្តអគ្គិសនីធំនៅ North Carolina របស់ សហរដ្ឋអាម៉េរិក ដោយប្រើប្រាស់ទុនវិនិយោគ 2 ពាន់លានដុល្លារសម្រាប់ដំណាក់កាលទីមួយ និងអាចផលិតបាន 150,000 គ្រឿង/ឆ្នាំ។ គម្រោងរបស់ VinFast ក៏ទទួលបានកញ្ចប់អនុគ្រោះផ្នែកសេដ្ឋកិច្ចតម្លៃ 1.2 ពាន់លានដុល្លារពីអាជ្ញាធររដ្ឋ North Carolina ផងដែរ៕

November 3, 2022

មហាសេដ្ឋីអាម៉េរិក អ៊ីឡុន ម៉ាស (Elon Musk) គ្រោងនឹងបញ្ឈប់បុគ្គលិកជិត 4,000 នាក់របស់ Twitter

លោក អ៊ីឡុន ម៉ាស ត្រូវបានគេជឿថា កំពុងតែត្រៀមបញ្ឈប់ការងាររបស់បុគ្គលិកចំនួនពាក់កណ្ដាលរបស់បណ្ដាញសង្គម Twitter នៅក្នុងសប្ដាហ៍នេះ។

យោងតាម The Verge មហាសេដ្ឋីអាម៉េរិកដើមកំណើតអាហ្វ្រិកខាងត្បូងរូបនេះ បានជួបពិភាក្សាជាមួយក្រុមប្រឹក្សាយោបល់កាលពីព្រលប់ថ្ងៃទី 02 វិច្ឆិកា ក្នុងនោះមានទាំងអតីតនាយកប្រតិបត្តិរបស់ PayPal លោក David Sacks ផងដែរ។ លោក Sacks ត្រូវបានគេព្យាករថា អាចនឹងចូលកាន់តំណែងជាអ្នកគ្រប់គ្រង Twitter នាពេលអនាគត។

ប្រភពព័ត៌មានខាងលើឱ្យដឹងថា លោក ម៉ាស បានកំណត់ផែនការបញ្ឈប់បុគ្គលិកប្រហែល 3,800 នាក់នាពេលខាងមុខ។ ចំណែក Bloomberg វិញ ផ្សាយថា តួលេខនេះគឺ 3,700 នាក់។ បច្ចុប្បន្ន បណ្ដាញសង្គម Twitter មានបុគ្គលិកជាង 7,500 នាក់។

យោងតាម Bloomberg សេចក្ដីជូនដំណឹងអំពីការបញ្ឈប់បុគ្គលិកខាងលើនឹងត្រូវបានប្រកាសនៅថ្ងៃស្អែក (04 វិច្ឆិកា)។ បុគ្គលិកដែលត្រូវបានបញ្ឈប់ពីការងារនេះអាចទទួលបានសំណងរយៈពេល 60 ថ្ងៃ។

ផែនការខាងលើនេះបានលេចឡើងបន្ទាប់ពីលោក ម៉ាស បានបញ្ឈប់ការងារមេដឹកនាំសំខាន់ៗរបស់ Twitter មានដូចជា CEO Parag Agrawal និងក្រុមប្រឹក្សាភិបាលដែលមានមនុស្ស 9 នាក់ ក្រោយពីគាត់បានចូលគ្រប់គ្រងបណ្ដាញសង្គមនេះ៕

November 3, 2022

ក្រុមហ៊ុន Google អភិវឌ្ឍបញ្ញាសិប្បនិម្មិត (AI) ដើម្បីកែសម្រួលមុខងារបកប្រែ

ក្រុមហ៊ុន Google នឹងអភិវឌ្ឍកម្មវិធី AI ដែលបំពាក់ភាសាប្រមាណ 1,000 ដែលត្រូវបានគេប្រើប្រាស់ច្រើនជាងគេក្នុងពិភពលោក ក្នុងគ្រាដែលបណ្ដាក្រុមហ៊ុនបច្ចេកវិទ្យាខ្នាតយក្សកំពុងប្រជែងគ្នាគ្រប់គ្រងទីផ្សារអ៊ីនធើណិត។

Google កាលពីថ្ងៃទី 2 វិច្ឆិកា បានឱ្យដឹងថា ក្រុមហ៊ុននេះកំពុងរៀបផែនការអភិវឌ្ឍកម្មវិធីបញ្ញាសិប្បនិម្មិត ដោយបំពាក់ភាសាចំនួន 1,000 ដែលត្រូវបានប្រើប្រាស់ច្រើនជាងគេនៅលើពិភពលោក ក្នុងបំណងកែសម្រួលមុខងារបកប្រែ ដោយសារថា ទិន្នន័យគឺជាកត្តាសំខាន់ដើម្បីឆ្ពោះទៅរកការរីកចម្រើននៃវិស័យ AI និងជួយឱ្យផលិតផលរបស់ពួកគេដំណើរការបានល្អជាងមុន និងមានប្រយោជន៍កាន់តែច្រើនសម្រាប់មនុស្សភាគច្រើន។

លោក Johan Schalkwyk អ្នកស្រាវជ្រាវនៅ Google បានឱ្យដឹងថា បច្ចុប្បន្ន ពិភពលោកមានភាសាជាង 7,000 ឯណោះ ប៉ុន្តែ Google មកដល់ពេលនេះបានផ្ដល់ការបកប្រែសម្រាប់ភាសាតែជាង 130 ប៉ុណ្ណោះ។ ដូច្នេះ ក្រុមហ៊ុននេះកំពុងឆ្ពោះទៅរកការពង្រីកមុខងារបកប្រែ និងចង់ទាញយកទិន្នន័យនៅលើភាសាថ្មីដែលមិនត្រឹមតែយោងទៅលើអត្ថបទដែលមាននៅលើអ៊ីនធើណិតនោះទេ តែក៏នឹងទាញយកពីវីដេអូ រូបភាព និងសំឡេងផងដែរ។

Google គ្រោងនឹងបំពាក់សមិទ្ធផលដែលកើតចេញពីការអភិវឌ្ឍបញ្ញាសិប្បនិម្មិតខាងលើទៅក្នុងបណ្ដាផលិត ផលរបស់ខ្លួន ក្នុងនោះក៏រួមមានទាំង Youtube និង Google Translate ផងដែរ។

Google មិនមែនជាក្រុមហ៊ុនតែមួយដែលមានមហិច្ឆតាដូចខាងលើឡើយ។ កាលពីដើមឆ្នាំនេះ Meta ដែលជាក្រុមហ៊ុនមេរបស់ Facebook ក៏បានប្រកាសគម្រោងមួយដែលមានឈ្មោះថា «No Language Left Behind» (មិនមានភាសាណាមួយត្រូវទុកចោល)។ គម្រោងរបស់ Meta នេះ បានកំណត់គោលដៅបង្កើតប្រព័ន្ធដែលអាចបកប្រែរាប់រយភាសានៅក្នុងពិភពលោក៕

November 3, 2022

ម៉ូតូអគ្គិសនី Kymco Like 125 EV ធ្វើដំណើរបានជិត 200 គីឡូម៉ែត្រក្រោយបញ្ចូលថាមពលពេញ

ម៉ូតូអគ្គិសនី Kymco Like 125 EV របស់ក្រុមហ៊ុនតៃវ៉ាន់ ត្រូវបានបំពាក់បច្ចេកវិទ្យាទំនើប អាចជិះបាន 199 គីឡូម៉ែត្រ បន្ទាប់ពីបានបញ្ចូលថាមពលពេញ។

Kymco Like 125 EV ត្រូវបានដាក់លក់ក្នុងទីផ្សារនៅ ទ្វីបអឺរ៉ុប ហើយថ្មីៗនេះមានព័ត៌មានថា វាអាចត្រូវបាននាំចូលទីផ្សារនៅ ទ្វីបអាស៊ី និង អាម៉េរិកខាងជើង។ ប្រការនេះមិនមានអ្វីចម្លែក ដោយសារថា Kymco ដែលជាយីហោរបស់ ចិនតៃវ៉ាន់ បានមានវត្តមាននៅ ទ្វីបអាស៊ី រួចហើយ។

ម៉ូតូអគ្គិសនី Kymco Like 125 EV ត្រូវបានបំពាក់ម៉ាស៊ីនដើរដោយអគ្គិសនីមួយគ្រឿងដែលមានកម្លាំងឡើងដល់ 3,200W ហើយម៉ាស៊ីននេះត្រូវបានចាត់ទុកថាល្អខ្លាំងសម្រាប់បរិស្ថាន និងមានមុខងារប្រហាក់ប្រហែលនឹងម៉ាស៊ីនចំហេះក្នុង។

ម៉ូតូនេះប្រើប្រាស់ថ្មផ្ទុកអគ្គិសនីដែលមានឈ្មោះថា Lonex អាចឱ្យជិះបាន 199 គីឡូម៉ែត្រ បន្ទាប់ពីបញ្ចូលថាមពលអគ្គិសនីបាន 1 ម៉ោង។ យោងតាមអាយុកាលរបស់ថ្ម ម៉ូតូនេះនឹងអាចបញ្ចូលថាមពលបានប្រហែល 1,000 លើក ដែលនេះត្រូវបានគេចាត់ទុកថាជាលក្ខណៈបច្ចេកទេសដ៏អស្ចារ្យ។

ឧបករណ៍ទំនើបនានានៅលើម៉ូតូ Kymco Like 125 EV មានដូចជាប្រព័ន្ធភ្លើង LED, នាឡិកា TFT ជាដើម អាចភ្ជាប់ជាមួយនឹងទូរស័ព្ទឆ្លាតវៃ សម្រាប់មុខងារកំណត់ទិស GPS ។ល។

ម៉ូតូអគ្គិសនី Kymco Like 125 EV មានរូបរាងស្រដៀងនឹងម៉ូតូប្រភេទ scooter និងប្រើប្រាស់លេខអូតូ ងាយស្រួលបើកបរ។ ម៉ូតូនេះមានទម្ងន់ត្រឹមតែ 99 គីឡូក្រាមប៉ុណ្ណោះ។ ចំណែកតម្លៃវិញ Kymco Like 125 EV ត្រូវបានដាក់លក់ត្រឹម 1,195 ដុល្លារអាម៉េរិក នៅទីផ្សារ អឺរ៉ុប ដែលនេះអាចនិយាយបានថា «ថោក» ពិតមែន៕

November 3, 2022

ប្រទេសឡាវ ផលិតសាំងជីវសាស្ត្រដើម្បីកាត់បន្ថយការនាំចូលឥន្ធនៈពីបរទេស

រដ្ឋាភិបាលឡាវ កំពុងមានផែនការផលិតជីវឥន្ធនៈដើម្បីរួមចំណែកក្នុងការកាត់បន្ថយការនាំចូលប្រេងសាំងពីបរទេស។

ថ្មីៗនេះ ក្រុមហ៊ុនឥន្ធនៈរដ្ឋឡាវ បានចុះកិច្ចព្រមព្រៀងជាមួយក្រុមហ៊ុន GAIA Petro របស់ កូរ៉េខាងត្បូង ដើម្បីចាប់ផ្ដើមអនុវត្តគម្រោងផលិតឥន្ធនៈជីវសាស្ត្រ (biofuel production project) ដែលមានតម្លៃ 20 លានដុល្លារអាម៉េរិក នៅ ប្រទេសឡាវ។

គម្រោងនេះនឹងមានរោងចក្រមួយសាងសង់នៅតំបន់ Dongphosy ក្នុងខណ្ឌ Hadxayfong នៃ រដ្ឋធានីវៀងចន្ទន៍។

ក្រុមហ៊ុនកូរ៉េខាងត្បូង AGIA Petro កាន់កាប់ភាគហ៊ុន 55% របស់គម្រោងនេះ ខណៈដែល 22.5% គ្រប់គ្រងដោយក្រុមហ៊ុនឥន្ធនៈរដ្ឋឡាវ និង 22.5% ផ្សេងទៀតគឺជាកម្មសិទ្ធិរបស់ក្រុមអ្នកវិនិយោគក្នុងស្រុក។

ក្រុមហ៊ុនបណ្ដាក់ទុនរួមគ្នាខាងលើនេះ បានកំណត់គោលដៅថា នឹងផលិតសាំងជីវសាស្ត្រឱ្យបាន 500,000 លីត្រ/ថ្ងៃ។

តាមផែនការ ឆ្នាំដំបូងក្រុមហ៊ុនខាងលើអាចផ្គត់ផ្គង់សាំងប្រភេទនេះប្រមាណ 10 លានលីត្រជារៀងរាល់ខែ។ បរិមាណសាំងជីវសាស្ត្រនឹងកើនឡើង 20% ជារៀងរាល់ឆ្នាំ ចាប់ពីឆ្នាំទីពីរ។

ឥន្ធនៈជីវសាស្ត្រ ឬជីវឥន្ធនៈ គឺជាឥន្ធនៈដែលត្រូវបានផលិតឡើងដោយប្រើពេលខ្លី ពីជីវម៉ាស ជំនួសឱ្យដំណើរការតាមធម្មជាតិដែលស៊ីពេលយូរមុននឹងបង្កើតបានជាឥន្ធនៈហ្វូស៊ីល មានដូចជាប្រេងរ៉ែជាដើម៕

November 3, 2022

ក្រុមហ៊ុនរបស់ កូរ៉េខាងត្បូង បើករោងចក្រផលិតម៉ូតូអគ្គិសនីនៅ វៀតណាម

ក្រុមហ៊ុនផលិតម៉ូតូអគ្គិសនី Zio Motors របស់ កូរ៉េខាងត្បូង កាលពីថ្ងៃទី 31 តុលា បានសម្ពោធរោងចក្រមួយនៅ វៀតណាម ដែលអាចផលិតម៉ូតូអគ្គិសនីបានប្រហែល 12,000 គ្រឿងក្នុងមួយឆ្នាំនៅដំណាក់កាលដំបូង។

តាមផែនការ ក្នុងដំណាក់កាលទីមួយ រោងចក្រ Zio Motors ដែលមានទីតាំងនៅក្បែរ រដ្ឋធានីហាណូយ នេះ នឹងអាចផលិតម៉ូតូអគ្គិសនីបាន 12,000 គ្រឿង/ឆ្នាំ ស្មើនឹង 1,000 គ្រឿង/ខែ។ ក្នុងដំណាក់កាលទីពីរ ឆ្នាំ 2025 រោងចក្រនេះគ្រោងនឹងផលិតឱ្យបានចាប់ពី 300,000 ដល់ 400,000 គ្រឿង/ឆ្នាំ។

ភ្ញៀវដែលបានអញ្ជើញឱ្យចូលរួមក្នុងពិធីសម្ពោធខាងលើ ត្រូវបានអនុញ្ញាតឱ្យបើកបរសាកល្បងម៉ូតូអគ្គិសនីច្រើនម៉ូដែលដែលប្រើប្រាស់បច្ចេកវិទ្យាចុងក្រោយរបស់ កូរ៉េខាងត្បូង ហើយគ្រោងនឹងដាក់លក់ក្នុងទីផ្សារប្រទេសវៀតណាម នាពេលខាងមុខ។

យោងតាមគម្រោង នៅចុងឆ្នាំនេះ ក្រុមហ៊ុន Zio នឹងដាក់លក់ម៉ូតូអគ្គិសនីឆ្លាតវៃគុណភាពខ្ពស់ ដើម្បីឆ្លើយតបទាន់ពេលវេលាទៅតាមតម្រូវការទីផ្សារ៕

November 2, 2022

ក្រុមហ៊ុន Yamaha គ្រោងនឹងដាក់លក់ម៉ូតូអគ្គិសនី Yamaha E01 នៅឆ្នាំក្រោយ

ក្រោយពីបានបង្ហាញនៅក្នុង ពិព័រណ៍ម៉ូតូអន្តរជាតិឥណ្ឌូណេស៊ី (IMOS) 2022 កាលពីខែមេសា 2021 ក្រុមហ៊ុន Yamaha ក៏បានរៀបផែនការដាក់ធ្វើតេស្តម៉ូតូលេខអូតូអគ្គិសនី Yamaha E01 មុននឹងដាក់លក់នៅឆ្នាំក្រោយ។

លទ្ធផលនៃការសាកល្បងបើកបរដំបូងៗរបស់ក្រុម Tribunnews បានបង្ហាញថា ម៉ូតូអគ្គិសនី Yamaha E01 នេះពិតជាគួរឱ្យចាប់អារម្មណ៍។

ក៏ប៉ុន្តែ ក្រុមហ៊ុនជប៉ុន មួយនេះ នឹងមិនប្រញាប់ដាក់លក់ Yamaha E01 ក្នុងទីផ្សារនោះទេ ព្រោះថា ម៉ូតូអគ្គិសនីនេះនឹងត្រូវឆ្លងកាត់ការពិសោធជាច្រើនទៀតនៅ ឥណ្ឌូណេស៊ី ក្នុងរយៈពេលមួយឆ្នាំពេញ។

ក្នុងការពិសោធខាងលើ Yamaha នឹងប្រមូលមតិពីសាធារណជនដែលធ្លាប់សាកល្បងបើកបរ Yamaha E01 មុនពេលផលិតទ្រង់ទ្រាយធំ និងលក់ក្នុងទីផ្សារ។

ចំណុចសំខាន់ៗរបស់ ម៉ូតូលេខអូតូអគ្គិសនី Yamaha E01 រួមមាន រូបរាងបែបអនាគត, ល្បឿន 100 គម/ម៉ោង, ការបើកបរមាន 3 ទម្រង់ (Power, Standard និង Eco), កម្លាំង 8.1 kW, ថ្មមានថាមពល 4.9 kWh, មានទម្រង់បើកបរថយក្រោយ, ការបញ្ចូលថាមពលមាន 3 ជម្រើស (លឿន, ធម្មតា និងចល័ត) ។ល។

November 2, 2022

ឡាវ បង្កើនចំណេះដឹងសម្រាប់ការងាកទៅរកថាមពលកកើតឡើងវិញ ជំនួសថាមពលបំភាយកាបូន

កាលពីថ្ងៃទី 31 តុលា 2022 នៅ រដ្ឋធានីវៀងចន្ទន៍ ក្រសួងថាមពលនិងរ៉ែ បានបើកវគ្គបណ្ដុះបណ្ដាលរយៈពេលខ្លីក្រោមប្រធានបទ «ការតភ្ជាប់ថាមពលជំនួសទៅក្នុងបណ្ដាញបញ្ជូន» (Grid Integration of Renewable Energy) ចាប់ពីថ្ងៃទី 31 តុល ដល់ 30 វិច្ឆិកា 2022។

ពិធីបើកវគ្គខាងលើ មានការចូលរួមរបស់ប្រធាននាយកដ្ឋានផែនការ និងសហប្រតិបត្តិការរបស់ ក្រសួងថាមពលនិងរ៉ែឡាវ និងលោក Dan Heldon ឯកអគ្គរដ្ឋទូតរងអូស្ត្រាលីប្រចាំប្រទេសឡាវ រួមនឹង មន្ត្រីឡាវជាង 40 នាក់ផ្សេងទៀត។

កម្មវិធីបណ្ដុះបណ្ដាលនេះទទួលបានការឧបត្ថម្ភពី រដ្ឋាភិបាលអូស្ត្រាលី សហការជាមួយ សាកលវិទ្យាល័យជាតិអូស្ត្រាលី។ ការបណ្ដុះបណ្ដាលនេះត្រូវបានធ្វើឡើងដើម្បីផ្ដល់ចំណេះដឹង និងបច្ចេកទេសនៅក្នុងការប្ដូរផ្លាស់បន្តិចម្ដងៗទៅរកថាមពលដែលមិនបំភាយឧស្ម័នកាបូន គោលនយោបាយតភ្ជាប់ថាមពលជំនួសទៅក្នុងបណ្ដាញអគ្គិសនី និងគោលនយោបាយកាត់បន្ថយការបំភាយឧស្ម័នក្នុងគ្រប់វិស័យ។

វគ្គបណ្ដុះបណ្ដាលនេះនឹងរួមចំណែកក្នុងការលើកកម្ពស់ប្រភពធនធានមនុស្សសម្រាប់ការអភិវឌ្ឍ និងការប្រើប្រាស់ថាមពលស្អាតដើម្បីសម្រេចបានគោលដៅមិនបំភាយឧស្ម័នកាបូន Net-zero នៅឆ្នាំ 2050៕

November 2, 2022

អ៊ីឡុន ម៉ាស យកថ្លៃប្រើប្រាស់សេវា Twitter ព្រោះតែ «ត្រូវការទូទាត់ការចំណាយ»

បន្ទាប់ពីរងការរិះគន់ដោយសារតែការយកថ្លៃសេវា 20 ដុល្លារ/ខែ មហាសេដ្ឋី អ៊ីឡុន ម៉ាស និយាយថា លោកត្រូវការយកថ្លៃសេវា Twitter Blue ដើម្បីទូទាត់ការចំណាយ ជំនួសឱ្យការពឹងផ្អែកទៅលើតែការផ្សាយពាណិជ្ជកម្ម។

«ប្រព័ន្ធបែងចែកព្រះអម្ចាស់ និងកសិករបច្ចុប្បន្នរបស់ Twitter តាមរយៈការមាន ឬមិនមានសញ្ញាធិចពណ៌ផ្ទៃមេឃគឺជារឿងផ្ដេសផ្ដាស។ អំណាចសម្រាប់មនុស្សគ្រប់គ្នា។ ពណ៌ផ្ទៃមេឃមានតម្លៃ 8 ដុល្លារអាម៉េរិក/ខែ» លោក ម៉ាស បង្ហោះសារដូច្នេះកាលពីថ្ងៃទី 02 វិច្ឆិកា។

ប្រតិកម្មរបស់លោក ម៉ាស ត្រូវបានលើកឡើងបន្ទាប់ពីមានព័ត៌មានថា Twitter គ្រោងនឹងយកថ្លៃសេវា 20 ដុល្លាររាល់ខែចំពោះគណនី Twitter Blue ដែលចុះឈ្មោះថ្មី។ Blue គឺជាគណនីត្រូវបង់ថ្លៃសម្រាប់អ្នកប្រើប្រាស់ Twitter ដែលបង្ហាញតាមរយៈអ៊ីនធើហ្វេស (interface) ពណ៌ផ្ទៃមេឃនៅពេលចូលទៅប្រើប្រាស់។ ម្ចាស់គណនីប្រភេទនេះនឹងទទួលបានសិទ្ធិបន្ថែមមួយចំនួនដូចជា ការកែប្រែសារ មើលបញ្ជីអត្ថបទដំបូងៗរបស់អ្នកដែលពួកគេតាមដាន សិទ្ធិប្រើប្រាស់ដោយមិនមានការរំខានពីការផ្សាយពាណិជ្ជកម្ម ការប្រើប្រាស់រូបសំណាង NFT ។ល។

តម្លៃសេវា 20 ដុល្លារ បានទទួលការរិះគន់ និងការមន្ទិលច្រើនពីអ្នកលេង Twitter ក្នុងនោះមានទាំងអ្នកនិពន្ធល្បីឈ្មោះ ជនជាតិអាម៉េរិក Stephen King ដែលមានអ្នកតាមដានជិត 7 លាននាក់នៅលើបណ្ដាញសង្គមនេះ។ «20 ដុល្លារអាម៉េរិកក្នុង 1 ខែ គឺគ្រាន់តែដើម្បីរក្សាសញ្ញាធិចពណ៌ផ្ទៃមេឃនៅលើគណនីរបស់ខ្ញុំ?» លោក King ដាក់ជាសំណួរដូច្នេះ។

ក្រោយមក លោក ម៉ាស បានឆ្លើយតបថា «ខ្ញុំត្រូវបានទូទាត់ការចំណាយតាមរយៈវិធីណាមួយ។ Twitter មិនអាចពឹងផ្អែកទៅលើតែការផ្សាយពាណិជ្ជកម្មនោះទេ។ ដូច្នេះ តម្លៃ 8 ដុល្លារ វាយ៉ាងណាដែរ?»។

នៅក្នុងសារជាច្រើនបន្តបន្ទាប់មកទៀតនៅក្នុងថ្ងៃទី 02 វិច្ឆិកា លោក ម៉ាស បន្តរម្លឹកដល់តម្លៃ 8 ដុល្លារ និងចែករំលែកផែនការថ្មី។ មហាសេដ្ឋីរូបនេះឱ្យដឹងថា អ្នកចុះឈ្មោះ Blue នឹងទទួលបានសិទ្ធិអាទិភាពទាក់ទងនឹងការស្វែងរក ទទួលបានជំនួយខ្លឹមសារសំឡេង និងវីដេអូខ្នាតវែងជាង ហើយការបង្ហាញខ្លឹមសារផ្សាយពាណិជ្ជកម្មមានកម្រិតតិចជាងពាក់កណ្ដាលធៀបនឹងគណនីមិនគិតថ្លៃ។ ចំណែកអ្នកធ្វើវីដេអូ អ្នកនិពន្ធដែលធ្វើការនៅលើបណ្ដាញសង្គមនេះក៏នឹងត្រូវបានបន្ធូរបន្ថយថ្លៃសេវា។ «ប្រការនេះនឹងនាំមកនូវប្រភពចំណូលមួយដើម្បីផ្ដល់រង្វាន់ដល់អ្នកផលិតខ្លឹមសារ» លោក ម៉ាស បន្ថែមដូច្នេះ។

ក្នុង tweet ថ្មីបំផុត លោក ម៉ាស ថែមទាំងបានរម្លឹកអំពីការតវ៉ានៅលើបណ្ដាញសង្គមនេះ។ យោងតាមលោក ម៉ាស គ្រប់គ្នា «អាចតវ៉ាបានគ្រប់ពេល ប៉ុន្តែនឹងត្រូវចំណាយ 8 ដុល្លារ»។ យ៉ាងនេះក្ដី លោក ម៉ាស មិនបាននិយាយច្បាស់ថា ការចំណាយនេះសម្រាប់តែការតវ៉ាម្ដង ឬច្រើនដង/ថ្ងៃ ឬប្រចាំខែនោះទេ។

យោងតាម CNN ឥរិយាបថខាងលើរបស់លោក ម៉ាស បង្ហាញថា គាត់កំពុងផ្ដោតយ៉ាងខ្លាំងទៅលើការដោះស្រាយបញ្ហាបង្កើនប្រាក់ចំណូល និងចំណេញសម្រាប់ Twitter ដែលបណ្ដាញសង្គមនេះបានខាតអស់មួយរយៈពេលមកហើយ៕

November 2, 2022

Category: សង្គម និងសេដ្ឋកិច្ច