សង្គម និងសេដ្ឋកិច្ច - La Reine Media

ការដោះដូរពាណិជ្ជកម្មរបស់កម្ពុជាក្នុងអាស៊ាន និងអាស៊ានជាមួយពិភពលោក កើនឡើងជាបន្តបន្ទាប់

ទំហំពាណិជ្ជកម្មផ្ទៃក្នុងអាស៊ាន ក៏ដូចជា អាស៊ាន ជាមួយនឹងអន្តរជាតិ បានកើនឡើងជាបន្តបន្ទាប់រាប់ចាប់ពីឆ្នាំ 2010 ដល់ឆ្នាំ 2021។

ការដោះដូរពាណិជ្ជកម្មផ្ទៃក្នុងអាស៊ាន បានកើនពី 502.9 ពាន់លានដុល្លារអាម៉េរិក ក្នុងឆ្នាំ 2010 ឡើងដល់ 712 ពាន់លានដុល្លារនៅក្នុងឆ្នាំ 2021។ តួលេខនេះរួមចំណែកប្រមាណ 21.3% នៅក្នុងទំហំពាណិជ្ជកម្មសរុបរបស់សហគមន៍នេះ។

គិតពីឆ្នាំ 2003 ដល់ឆ្នាំ 2021 សឹង្ហបុរី ឈរលំដាប់លេខ 1 ស្ដីពីទំហំនៃការនាំចេញ-នាំចូលទំនិញផ្ទៃក្នុងរបស់ អាស៊ាន។

ទំហំនៃការនាំចេញ-នាំចូលទំនិញផ្ទៃក្នុងអាស៊ាន របស់ កម្ពុជា ក្នុងឆ្នាំ 2003 ឈរលំដាប់ទី 8 ហើយឆ្នាំ 2008, 2009 និង 2010, 2011, 2013 និង 2014 ឈរលំដាប់ចុងក្រោយគេ ខណៈដែលឆ្នាំ 2021 ឈរលំដាប់ទី 7 នៅក្នុងចំណោមសមាជិក 10 ប្រទេសរបស់ អាស៊ាន។ ទំហំពាណិជ្ជកម្មរបស់ កម្ពុជា នៅក្នុង អាស៊ាន សម្រេចបាន 1.8 ពាន់លានដុល្លារក្នុងឆ្នាំ 2003 និងកើនឡើងដល់ 12.1 ពាន់លានដុល្លារក្នុងឆ្នាំ 2021។

ទំហំពាណិជ្ជកម្មរបស់ អាស៊ាន នៅក្នុងទីផ្សារពិភពលោកក៏បានកើនពី 6.5% ក្នុងឆ្នាំ 2010 ឡើងដល់ 7.5% នៅឆ្នាំ 2021។ តួលេខនេះបង្ហាញថា កំណើនសេដ្ឋកិច្ចរបស់ អាស៊ាន កើនឡើងលឿនជាងបណ្ដាតំបន់ដទៃរបស់ពិភពលោក និងឆ្លុះបញ្ចាំងពីទិដ្ឋភាពនៃការធ្វើសមាហរណកម្មអាស៊ានទៅក្នុងពិភលោក៕

November 10, 2022

ប្រធានអាស៊ានឆ្នាំ 2022 បានកំណត់បន្ថែមគោលដៅយុទ្ធសាស្ត្រចំនួន 4 សម្រាប់សហគមន៍

(ភ្នំពេញ)៖ កម្ពុជា ក្នុងនាមជាប្រធានអាស៊ានប្តូរវេនឆ្នាំ 2022 បានកំណត់បន្ថែមនូវ «គោលដៅយុទ្ធសាស្ត្រចំនួន 4» ដើម្បីពង្រឹងការតភ្ជាប់ឌីជីថល ក៏ដូចជាការកាត់បន្ថយគម្លាតអភិវឌ្ឍន៍ ក្នុងបំណងធ្វើឱ្យការប្រកួតប្រជែងរបស់អាស៊ាន និងការអភិវឌ្ឍប្រកបដោយចីរភាព នេះបើតាមការបញ្ជាក់នៅក្នុងសុន្ទរកថារបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានប្តូរវេន ឆ្នាំ 2022 ថ្លែងក្នុងពិធីបើកកិច្ចប្រជុំកំពូលធុរកិច្ច និងវិនិយោគអាស៊ាន ឆ្នាំ 2022។

យោងតាមសុន្ទរកថារបស់ សម្តេចតេជោ ហ៊ុន សែន «គោលដៅយុទ្ធសាស្ត្រចំនួន 4» រួមមាន ទីមួយ ៖ ការពង្រឹងការតភ្ជាប់ឌីជីថល, វិទ្យាសាស្ត្រ និងបច្ចេកវិទ្យា, ទីពីរ ៖ ការកាត់បន្ថយគម្លាតអភិវឌ្ឍន៍ ដើម្បីភាពប្រកួតប្រជែងរបស់អាស៊ាន, ទីបី ៖ ការជំរុញសមាហរណកម្ម, បរិយាប័ន្ន, ភាពធន់ និងភាពប្រកួតប្រជែងអាស៊ានឱ្យខ្លាំងជាងមុន និងទីបួន ៖ អាស៊ានជាសកលសម្រាប់ភាពរីកចម្រើន និងការអភិវឌ្ឍ សំដៅជំរុញកំណើនសេដ្ឋកិច្ចឡើងវិញ ប្រកបដោយចីរភាព, បរិយាប័ន្ន និងភាពធន់ផងដែរ។

សូមបញ្ជាក់ថា ពិធីបើកកិច្ចប្រជុំកំពូលធុរកិច្ច និងវិនិយោគអាស៊ានឆ្នាំ 2022 នេះ ត្រូវបានធ្វើឡើងនៅព្រឹកថ្ងៃ ទី 10 វិច្ឆិកា 2022 នាសណ្ឋាគារសូហ្វីតែលភូគីត្រាភ្នំពេញ ក្នុងគ្រាដែល កម្ពុជា ក្នុងនាមជាប្រធានអាស៊ានបន្តវេន 2022 ធ្វើជាម្ចាស់ផ្ទះសម្រាប់កិច្ចប្រជុំកំពូលអាស៊ានលើកទី 40 និង 41 ដែលប្រព្រឹត្តទៅចាប់ពីថ្ងៃទី 10 ដល់ 13 វិច្ឆិកា 2022៕

November 10, 2022

មហាសេដ្ឋី អ៊ីឡុន ម៉ាស ៖ ប្រាក់ចំណូលរបស់ Twitter ថយចុះខ្លាំង «ព្រោះអតិថិជនផ្អាកការផ្សាយពាណិជ្ជកម្ម»

លោក អ៊ីឡុន ម៉ាស ដែលជាម្ចាស់ថ្មីរបស់បណ្ដាញសង្គម Twitter កាលពីថ្ងៃទី 04 វិច្ឆិកា បានឱ្យដឹងថា បណ្ដាញសង្គមនេះកំពុងរង «ការបាត់បង់ប្រាក់ចំណូលយ៉ាងច្រើន» ប៉ុន្តែមិនបានបង្ហាញតួលេខជាក់ស្ដែង។

ក្នុងសារនៅលើគណនី Twitter ផ្ទាល់ខ្លួន អ្នកមានជាងគេក្នុងពិភពលោកបានទម្លាក់កំហុសទៅលើ «ក្រុមសកម្មជនដែលបង្កសម្ពាធលើបណ្ដាក្រុមហ៊ុន» ធ្វើឱ្យពួកគេឈប់ផ្សាយពាណិជ្ជកម្មលើ Twitter។ លោក ម៉ាស អះអាងថា បណ្ដាញសង្គមនេះមិនទាន់ប្ដូរផ្លាស់យុទ្ធសាស្ត្រចាប់ពិរុទ្ធខ្លឹមសារ ហើយ Twitter បានធ្វើ «រឿងគ្រប់យ៉ាងដែលអាចបំពេញចិត្តក្រុមសកម្មជន» ប៉ុន្តែមិនបានសម្រេច។

ទោះជាយ៉ាងនេះក្ដី មហាសេដ្ឋីអាម៉េរិករូបនេះ មិនបានលើកឡើងនូវតួលេខជាក់លាក់អំពីប្រាក់ចំណូលដែល Twitter បានបាត់បង់នោះទេ ហើយក៏មិនបានបង្ហាញភស្ដុតាងដែលថា ការដកខ្លួនរបស់ក្រុមអ្នកផ្សាយពាណិជ្ជកម្មគឺដោយសារការដាក់សម្ពាធពីក្រុមសកម្មជននោះដែរ។

ចាប់តាំងពីម្ចាស់ Tesla បានចូលមកគ្រប់គ្រង Twitter កាលពីថ្ងៃទី 28 តុលា បណ្ដាញសង្គមនេះបានបញ្ឈប់បុគ្គលិកប្រមាណជា 50%។ ប៉ុន្មានថ្ងៃកន្លងទៅនេះ ក្រុមហ៊ុនជាច្រើនបានប្រកាសផ្អាកការផ្សាយពាណិជ្ជកម្មនៅលើ Twitter ដើម្បីវាយតម្លៃចំពោះការផ្លាស់ប្ដូរនៅពេលលោក ម៉ាស ចូលគ្រប់គ្រង។

យោងតាមទិន្នន័យរបស់ MediaRadar ចំនួនអតិថិជនដែលផ្សាយពាណិជ្ជកម្មលើបណ្ដាញសង្គមនេះបានថយពី 3,900 ស្ថាប័នក្នុងខែឧសភា ចុះមកនៅត្រឹម 2,300 ស្ថាប័នក្នុងខែសីហា។ ឈានចូលខែកញ្ញា តួលេខនេះបែរជាកើនឡើង 2,900 ស្ថាប័ន៕

November 5, 2022

សេតវិមានបញ្ចេញកញ្ចប់ថវិកា 185 ពាន់លានដុល្លារ ដើម្បីវិនិយោគលើការស្ដារហេដ្ឋារចនាសម្ព័ន្ធ

អ្នកសម្របសម្រួលផ្នែកហេដ្ឋារចនាសម្ព័ន្ធរបស់ សេតវិមាន បានលើកឡើងថា រដ្ឋាភិបាលអាម៉េរិក បានកំណត់យកគម្រោងចំនួន 6,200 ដែលត្រូវការដើមទុន សម្រាប់ការស្ដារហេដ្ឋារចនាសម្ព័ន្ធ។

ប្រកាសកាលពីថ្ងៃទី 04 វិច្ឆិការបស់ សេតវិមាន បានឱ្យដឹងថា សហរដ្ឋអាម៉េរិក ទើបតែបញ្ចេញប្រាក់ 185 ពាន់លានដុល្លារពីច្បាប់ហេដ្ឋារចនាសម្ព័ន្ធតម្លៃជាង 1 ទ្រីលាន (1,000,000,000,000.00) ដុល្លារអាម៉េរិក ដើម្បីវិនិយោគទៅលើការជួសជុលផ្លូវ ពង្រីកបណ្ដាញអ៊ីនធើណិត ប្ដូរបំពង់បង្ហូរស្អាត និងស្ដារបណ្ដាញអគ្គិសនី។

នៅចំពោះមុខក្រុមអ្នកយកព័ត៌មាន អ្នកសម្របសម្រួលផ្នែកហេដ្ឋារចនាសម្ព័ន្ធរបស់ សេតវិមាន Mitch Landrieu លើកឡើងថា រដ្ឋាភិបាលអាម៉េរិក បានកំណត់យកគម្រោងចំនួន 6,200 ដែលត្រូវការដើមទុន និងជួលបុគ្គលិករដ្ឋថ្មីជាង 3,000 នាក់ ដើម្បីតាមដានការចំណាយសម្រាប់គម្រោងទាំងនេះ។

លោក Mitch Landrieu បានអះអាងថា «រដ្ឋាភិបាលបានបញ្ចេញប្រាក់ប្រហែល 1/5 (នៃកញ្ចប់ថវិកាសម្រាប់ហេដ្ឋារចនាសម្ព័ន្ធតម្លៃជាង 1 ទ្រីលាន) នៅក្នុងឆ្នាំដំបូង»។

សេចក្ដីព្រាងច្បាប់ហេដ្ឋារចនាសម្ព័ន្ធតម្លៃជាង 1 ទ្រីលានដុល្លារ ត្រូវបាន ប្រធានាធិបតី ចូ បៃដិន ចុះហត្ថលេខាកាលពីខែវិច្ឆិកា 2021។ នេះគឺជាច្បាប់ដែលត្រូវបានអនុម័តដើម្បីស្ដារហេដ្ឋារចនាសម្ព័ន្ធទ្រង់ទ្រាយធំបំផុតរបស់ សហរដ្ឋអាម៉េរិក ក្នុងរង្វង់ជាងកន្លះសតវត្សរ៍កន្លងមកនេះ។ ច្បាប់នេះអនុញ្ញាតឱ្យរដ្ឋវិនិយោគទៅលើបណ្ដាញផ្លូវថ្នល់ ស្ពាន ផ្លូវដែក ប្ដូរបំពង់បង្ហូរទឹកស្អាត បង្កើតបណ្ដាញបញ្ចូលថាមពលថ្មសម្រាប់យានយន្តអគ្គិសនី និងពង្រីកប្រព័ន្ធអ៊ីនធើណិត៕

November 5, 2022

ក្រុមហ៊ុនចិន បញ្ជាទិញយន្តហោះ Airbus 140 គ្រឿង តម្លៃ 17 ពាន់លានដុល្លារ

ក្រុមហ៊ុនផលិតយន្តហោះ Airbus បានឱ្យដឹងថា យន្តហោះ 140 គ្រឿងនេះសុទ្ធតែស្ថិតក្នុងការសន្យាទិញដែលមានពីមុន និងស្ថិតក្នុងការបញ្ជាទិញ 292 គ្រឿងដែលបានប្រកាសកាលពីដើមឆ្នាំ។

ក្រុមហ៊ុន China Aviation Supply (CAS) Holding របស់ ប្រទេសចិន បានចុះហត្ថលេខាទិញយន្តហោះ 140 គ្រឿងរបស់ Airbus (បារាំង) ក្នុងតម្លៃប្រហែល 17 ពាន់លានដុល្លារអាម៉េរិក កាលពីថ្ងៃទី 04 វិច្ឆិកា 2022។

ក្រុមហ៊ុនផលិតយន្តហោះ Airbus បានឱ្យដឹងថា យន្តហោះទាំងនេះសុទ្ធតែស្ថិតក្នុងការសន្យាទិញដែលមានពីមុន ហើយមួយចំនួនស្ថិតក្នុងការបញ្ជាទិញយន្តហោះប្រតិកម្ម 292 គ្រឿងដែលបានប្រកាសកាលពីដើមឆ្នាំ 2022។ ការចុះហត្ថលេខាលើកិច្ចព្រមព្រៀងកាលពីម្សិលមិញនេះ ត្រូវបានធ្វើឡើងស្របពេលដែលមានដំណើរទស្សនកិច្ចនៅ ប្រទេសចិន របស់ នាយករដ្ឋមន្ត្រីអាល្លឺម៉ង់ Olaf Scholz។

ក្រុមហ៊ុនអាកាសចរណ៍ធំៗចំនួន 3 របស់ រដ្ឋចិន រួមមាន Air China, China Eastern និង China Southern កាលពីខែកក្កដា បានសន្យាថាទិញយន្តហោះប្រតិកម្មសរុបចំនួន 292 គ្រឿងរបស់ Airbus ដែលនេះគឺជាការបញ្ជាទិញធំជាងគេនាអំឡុងពេលនោះរបស់ ប្រទេសចិន រាប់ចាប់តាំងពីវិបត្តិកូវីដបានផ្ទុះឡើង។

CAS បានឱ្យដឹងថា កិច្ចព្រមព្រៀងទិញយន្តហោះកាលពីម្សិលមិញ រួមមានយន្តហោះស៊េរី A320 ចំនួន 132 គ្រឿង និង យន្តហោះស៊េរី A350 ចំនួន 8 គ្រឿង៕

November 5, 2022

ប្រទេសចិន សាងសង់ផ្លូវដែកល្បឿនលឿនប្រវែង 76 គីឡូម៉ែត្រឆ្លងកាត់សមុទ្រ

ផ្លូវដែកល្បឿនលឿនថ្មីដែលនឹងមានស្ពានទំហំធំ និងមធ្យមចំនួន 36 កន្លែង, រូងក្រោមដី 17 កន្លែង និងអាចបើកបរក្នុងល្បឿន 250 គីឡូម៉ែត្រ/ម៉ោង ត្រូវបានសម្ពោធបើកការដ្ឋានកាលពីថ្ងៃទី 03 វិច្ឆិកា 2022។

ផ្លូវដែកល្បឿនលឿនឆ្លងកាត់សមុទ្រ Yong-Zhou នឹងតភ្ជាប់បណ្ដាទីក្រុង Ningbo និង Zhoushan នៅក្នុងខេត្ត Zhejiang នេះបើតាមក្រុមហ៊ុនសិក្សា និងស្ថាបត្យកម្មផ្លូវដែកចិន Siyuan។

នៅតាមបណ្ដោយផ្លូវដែកប្រវែងជាង 76 គីឡូម៉ែត្រនេះ នឹងមានស្ពានធំ និងមធ្យមចំនួន 36 ស្ពាន រួមនឹងរូងក្រោមដីចំនួន 17 កន្លែង។ បណ្ដាស្ពាន និងរូងក្រោមដីនឹងមានចំណែករហូតដល់ជាង 90% នៃប្រវែងសរុបរបស់ផ្លូវដែក។ ផ្លូវដែកល្បឿន 250 គីឡូម៉ែត្រ/ម៉ោង និងមានស្ថានីយចំនួន 7 នេះ នឹងត្រូវបានសាងសង់ឆ្លងកាត់ផ្លូវទឹកចំនួន 4 រួមមាននៅតំបន់ Jintang, Xihoumen, Taoyaomen និង Fuchimen។

តាមគម្រោង ផ្លូវដែកនេះនឹងមានរូងក្រោមសមុទ្រប្រវែងជាង 16 គីឡូម៉ែត្រនៅត្រង់កំណាត់ផ្លូវក្រោមទឹក Jintang។ នៅឯកំណត់ផ្លូវក្រោមទឹកនៅ Xihoumen ក្រុមហ៊ុននឹងសាងសង់ស្ពានថ្មើរជើង-ផ្លូវដែកប្រវែងជាង 1.5 គីឡូម៉ែត្រ។ ហេដ្ឋារចនាសម្ព័ន្ធនៃគម្រោងទាំងមូលគ្រោងនឹងស្ថាបនារួចរាល់ក្នុងរយៈពេល 6 ឆ្នាំទៀត។

នៅពេលសាងសង់រួចរាល់ ផ្លូវដែកល្បឿនលឿននេះនឹងជួយកាត់បន្ថយពេលវេលានៃការធ្វើដំណើររវាង Ningbo និង Zhoushan ចុះមកនៅត្រឹម 30 នាទី ដែលប្រហាក់ប្រហែលនឹង 1/3 នៃពេលវេលាធ្វើដំណើរនាបច្ចុប្បន្ន។ ចំណែកការធ្វើដំណើរ 4.5 ម៉ោងតាមឡានក្រុង ឬ 2.5 ម៉ោងតាមឡានផ្ទាល់ខ្លួន រវាងក្រុងរដ្ឋបាល Hangzhou របស់ខេត្ត Zhejiang និងក្រុង Zhoushan ក៏ត្រូវចុះមកនៅត្រឹម 80 នាទី។

យោងតាម CGTN ផ្លូវដែក Yong-Zhou ដែលស្ថិតក្នុងផែនការសាងសង់ «រង្វង់ចរាចរណ៍ផ្លូវដែកល្បឿនលឿនមួយម៉ោង» នៅក្នុងខេត្ត Zhejiang នេះក៏នឹងជួយពន្លឿនដំណើរការបញ្ចូល Zhoushan និង Ningbo ទៅក្នុងខ្សែក្រវាត់សេដ្ឋកិច្ចទន្លេ Yangtze របស់ ប្រទេសចិន ផងដែរ៕

November 5, 2022

គម្រោងសាងសង់រោងចក្រថ្មី ផលិតកាបូប និងកេសកាតុង នៅ ខេត្តកណ្ដាល និងកំពង់ស្ពឺ ទទួលបានការអនុញ្ញាត

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគចំនួនពីរ តាមសំណើសុំវិនិយោគរបស់ក្រុមហ៊ុន នេះបើតាមទំព័របណ្ដាញសង្គមរបស់ ក្រុមប្រឹក្សាអភិវឌ្ឍន៍កម្ពុជា ចេញផ្សាយនារសៀលថ្ងៃទី 04 វិច្ឆិកា 2022។

ក្រុមហ៊ុនវិនិយោគទាំងនេះដែលរួមមាន ក្រុមហ៊ុន «NEW SHUI YAT (CAMBODIA) CO., LTD និងក្រុមហ៊ុន KANJIN (CAMBODIA) LUGGAGE CO., LTD នេះ គ្រោងនឹងបណ្ដាក់ទុនវិនិយោគសរុប 14 លានដុល្លារអាម៉េរិក និងបង្កើតការងារសរុបជាង 2,000 កន្លែង។

ក្រុមហ៊ុន «NEW SHUI YAT (CAMBODIA) CO., LTD» គ្រោងនឹងបង្កើតរោងចក្រផលិតកេសកាតុង ថង់ប្លាស្ទិក និងអេប៉ុង ស្ថិតនៅភូមិបូរីកម្មករ សង្កាត់ច្បារមន ខេត្តកំពង់ស្ពឺ មានទុនវិនិយោគប្រមាណ 8.5 លានដុល្លារអាម៉េរិក និងអាចបង្កើតការងារបានចំនួន 358 កន្លែង។

ក្រុមហ៊ុន «KANJIN (CAMBODIA) LUGGAGE CO., LTD» គ្រោងនឹងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅផ្លូវជាតិលេខ21B ភូមិអន្លង់សាន្ត ឃុំព្រែកស្តី ស្រុកកោះធំ ខេត្តកណ្តាល មានទុនវិនិយោគប្រមាណ 5.5 លានដុល្លារអាម៉េរិក និងអាចបង្កើតការងារបានចំនួន 1,770 កន្លែង។

November 4, 2022

អារ៉ាប៊ីសាអូឌីត បង្កើតក្រុមហ៊ុនផលិតរថយន្តអគ្គិសនីដំបូង ដើម្បីរួមចំណែកកាត់បន្ថយការបំភាយឧស្ម័ន

ក្រុមហ៊ុនផលិតរថយន្តអគ្គិសនីដំបូងរបស់ ប្រទេសអារ៉ាប៊ីសាអូឌីត ដែលមានឈ្មោះថា Ceer នឹងសហការជាមួយ Foxconn ដែលជាក្រុមហ៊ុនឯកជនធំបំផុតមួយរបស់ កោះតៃវ៉ាន់ ដើម្បីអភិវឌ្ឍរចនាសម្ព័ន្ធអគ្គិសនីសម្រាប់រថយន្ត។

កាលពីថ្ងៃទី 03 វិច្ឆិកា អារ៉ាប៊ីសាអូឌីត បានប្រកាសបង្ហាញក្រុមហ៊ុនផលិតរថយន្តអគ្គិសនីដំបូងរបស់ពួកគេ នៅក្នុងកិច្ចប្រឹងប្រែងដើម្បីធ្វើពិពិធកម្មសេដ្ឋកិច្ចរបស់ប្រទេសនេះ ដែលជាអ្នកនាំចេញប្រេងឆៅធំជាងគេបង្អស់ក្នុងពិភពលោក។

យោងតាមទីភ្នាក់ងារសារព័ត៌មានរបស់ អារ៉ាប៊ីសាអូឌីត (SPA) ក្រុមហ៊ុនរថយន្តអគ្គិសនីដំបូងរបស់ប្រទេសនេះនឹងរួមចំណែកក្នុងការឆ្ពោះទៅរកការកាត់បន្ថយការបំភាយឧស្ម័នកាបូន និងជំរុញស្ថិរភាពដើម្បីដោះស្រាយផលប៉ះពាល់នៃបញ្ហាបម្រែបម្រួលអាកាសធាតុ។ Ceer នឹងសហការជាមួយ Foxconn ជាក្រុមហ៊ុនឯកជនធំបំផុតមួយរបស់ កោះតៃវ៉ាន់ ដើម្បីអភិវឌ្ឍរចនាសម្ព័ន្ធអគ្គិសនីរបស់រថយន្ត។

ក្រុមហ៊ុន Ceer ឱ្យដឹងថា នឹងផលិតរថយន្តអគ្គិសនីច្រើនប្រភេទដើម្បីឆ្លើយតតាមតម្រូវការអ្នកប្រើប្រាស់នៅក្នុងប្រទេស ក្នុងតំបន់មជ្ឈិមបូព៌ា និង អាហ្វ្រិកខាងជើង ក្នុងនោះមានរថយន្តប្រភេទសេដាន់ និងរថយន្តកីឡាពហុមុខងារផងដែរ។

តាមផែនការ ក្រុមហ៊ុននឹងបង្កើតបានការងារផ្ទាល់ និងប្រយោលប្រហែល 30,000 កន្លែង ហើយគ្រោងនឹងដាក់លក់រថយន្តអគ្គិសនីដំបូងរបស់ខ្លួនក្នុងទីផ្សារចាប់ពីឆ្នាំ 2025។

កាលពីខែវិច្ឆិកា 2021 នៅក្នុងកិច្ចប្រជុំ COP26 ស្ដីពីអាកាសធាតុ លើកទី 26 នៅ អង់គ្លេស អារ៉ាប៊ីសាអូឌីត បានសន្យាថា នឹងសម្រេចឱ្យបានគោលដៅបំភាយឧស្ម័នកម្រិតសូន្យនៅឆ្នាំ 2060៕

November 4, 2022

ការនាំចេញទំនិញរបស់កម្ពុជាទៅកាន់វៀតណាម សម្រេចបាន 1.5 ពាន់លានដុល្លារ ក្នុងរយៈពេល 9 ខែដើមឆ្នាំ 2022

ទំហំពាណិជ្ជកម្មទ្វេភាគីសរុបរវាង ប្រទេសកម្ពុជា និង ប្រទេសវៀតណាម សម្រេចបានជាង 4 ពាន់លានដុល្លារអាម៉េរិក នៅក្នុងរយៈពេល 9 ខែដើមឆ្នាំ 2022 ដែលនេះបានជួយឱ្យ ប្រទេសវៀតណាម ក្លាយជាដៃគូពាណិជ្ជកម្មធំជាងគេបង្អស់របស់ កម្ពុជា នៅក្នុង តំបន់អាស៊ាន។

ការនាំចេញទំនិញរបស់ កម្ពុជា ទៅកាន់ វៀតណាម សម្រេចបាន 1.5 ពាន់លានដុល្លារ កើន 3% ធៀបនឹងឆ្នាំ 2021 និងការនាំចូលទំនិញពី វៀតណាម សម្រេចបាន 3 ពាន់លានដុល្លារ កើន 35%។ ដូច្នេះ នៅក្នុងរយៈពេល 3 ត្រីមាសដើមឆ្នាំ 2022 នេះ ការដោះដូរទំនិញសរុបរវាង កម្ពុជា និង វៀតណាម សម្រេចបានជាង 4 ពាន់លានដុល្លារអាម៉េរិក កើន 22% ធៀបនឹងឆ្នាំ 2021។

នៅក្នុង តំបន់អាស៊ីអាគ្នេយ៍ ប្រទេសថៃ គឺជាដៃគូពាណិជ្ជកម្មធំជាងគេលំដាប់ទី 2 របស់ កម្ពុជា សម្រាប់ 9 ខែដើមឆ្នាំនេះ។ ក្នុងរយៈពេល 9 ខែដើមឆ្នាំ 2022 ការនាំចេញរបស់ កម្ពុជា ទៅកាន់ទីផ្សារប្រទេសថៃ សម្រេចបានជាង 6 រយលានដុល្លារអាម៉េរិក កើន 38% បើធៀបទៅនឹងរយៈពេលដូចគ្នានៅឆ្នាំ 2021 ខណៈដែលការនាំចេញរបស់ ប្រទេសថៃ មកកាន់ កម្ពុជា សម្រេចបានជិត 3 ពាន់លានដុល្លារអាម៉េរិក កើន 25%។ ជារួម ទំហំពាណិជ្ជកម្មទ្វេភាគីរវាង ប្រទេសថៃ និង កម្ពុជា សម្រេចបានជាង 3 ពាន់លានដុល្លារ កើន 27% ធៀបនឹង 9 ខែដើមឆ្នាំ 2021។

ដោយឡែក ការដោះដូរពាណិជ្ជកម្មរវាង កម្ពុជា ជាមួយនឹងបណ្ដាប្រទេសអាស៊ាន ក្នុងរយៈពេល 9 ខែដើមឆ្នាំ 2022 នេះ សម្រេចបានជាង 12 ពាន់លានដុល្លារអាមេរិក កើន 10% ធៀបនឹង 9 ខែដើមឆ្នាំមុន។ ចំណែកការដោះដូរពាណិជ្ជកម្មរវាង កម្ពុជា ជាមួយនឹងពិភពលោកទាំងមូល សម្រេចបានជាង 41 ពាន់លានដុល្លារអាមេរិក កើនជាង 18% បើធៀបនឹង 9 ខែដើមឆ្នាំ 2021៕

November 4, 2022

ការបារម្ភអំពីឱនភាពសេដ្ឋកិច្ចសកល ធ្វើឱ្យប្រេងឆៅលើពិភពលោកធ្លាក់ថ្លៃ

បញ្ចប់ការជួញដូរក្នុងថ្ងៃទី 03 វិច្ឆិកា តម្លៃប្រេងឆៅ Brent ថយចុះ 1.49 ដុល្លារអាម៉េរិក ខណៈដែលប្រេងឆៅ WTI ធ្លាក់ថ្លៃ 1.83 ដុល្លារអាម៉េរិក។

តម្លៃប្រេងពិភពលោកធ្លាក់ចុះក្នុងការជួញដូរកាលពីថ្ងៃទី 03 វិច្ឆិកា (04 វិច្ឆិកានៅ កម្ពុជា) ក្នុងគ្រាដែលអត្រាការប្រាក់នៅ សហរដ្ឋអាម៉េរិក កើនឡើង បានរុញច្រានប្រាក់ដុល្លារអាម៉េរិក ឡើងថ្លៃខ្ពស់ ធ្វើឱ្យមានការបារម្ភអំពីវិបត្តិសេដ្ឋកិច្ចសកល ដែលប៉ះពាល់ដល់តម្រូវការប្រើប្រាស់ថាមពល។

ក៏ប៉ុន្តែល្បឿន និងអត្រានៃការធ្លាក់ថ្លៃរបស់ប្រេង ត្រូវបានទប់ទល់ដោយការបារម្ភអំពីប្រភពផ្គត់ផ្គង់ដែលត្រូវបានរឹតបន្តឹង។

បញ្ចប់ការជួញដូរនៅក្នុងទី 03 វិច្ឆិកា តម្លៃប្រេងឆៅ Brent ថយចុះ 1.49 ដុល្លារអាម៉េរិក (1.5%) មកនៅត្រឹម 94.67 ដុល្លារ/ធុង។ ចំណែកប្រេងឆៅ WTI ក៏បានធ្លាក់ថ្លៃ 1.83 ដុល្លារ (2%) ចុះមកនៅត្រឹម 88.17 ដុល្លារ/ធុង។

តម្លៃប្រេងឆៅ 2 ប្រភេទនេះ សុទ្ធតែបានកើនជាង 1% ក្នុងការជួញដូរកាលពីថ្ងៃទី 02 វិច្ឆិកា ដោយសារតែព័ត៌មានបង្ហាញថា បរិមាណប្រេងឆៅក្នុងឃ្លាំងយុទ្ធសាស្ត្ររបស់ សហរដ្ឋអាម៉េរិក បានថយចុះ បើទោះ រតនាគារជាតិអាម៉េរិក ដំឡើងអត្រាការប្រាក់ ហើយថានឹងពិចារណាអំពីការផ្អាកដំឡើងការប្រាក់នាពេលឆាប់ៗនេះ។ ប្រការនេះបានរុញច្រានតម្លៃរូបិយប័ណ្ណដុល្លារអាម៉េរិក ឡើងខ្ពស់ក្នុងថ្ងៃទី 03 វិច្ឆិកា។

ប្រាក់ដុល្លារឡើងថ្លៃ ធ្វើឱ្យតម្រូវការប្រេងថយចុះ បណ្ដាលឱ្យវាប្រែថ្លៃសម្រាប់អតិថិជនដែលទូទាត់ដោយការប្រើប្រាស់រូបិយប័ណ្ណដទៃក្រៅពីប្រាក់ដុល្លារអាម៉េរិក៕

November 4, 2022

Category: សង្គម និងសេដ្ឋកិច្ច