សង្គម និងសេដ្ឋកិច្ច - La Reine Media

គម្រោងបង្កើតរោងចក្រចាក់សម្លៀកបំពាក់របស់ក្រុមហ៊ុន RUNSING KNITTING INTERNATIONAL នៅខេត្តកណ្ដាល

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នាថ្ងៃទី 11 នេះ បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុន RUNSING KNITTING INTERNATIONAL CO., LTD ដែលបានស្នើសុំវិនិយោគលើគម្រោងបង្កើតរោងចក្រចាក់សម្លៀកបំពាក់នៅ កម្ពុជា។

ក្រុមហ៊ុន RUNSING KNITTING INTERNATIONAL មានគម្រោងផលិតរោងចក្រនៅផ្លូវជាតិលេខ 110 អគារលេខ 5-6-7-8 ក្នុងភូមិព្រែកដូង ឃុំកំពង់ស្វាយ ស្រុកកៀនស្វាយ ខេត្តកណ្តាល។

ក្រុមហ៊ុនខាងលើគ្រោងនឹងបណ្ដាក់ទុនវិនិយោគប្រមាណ 5.3 លានដុល្លារអាមេរិក និងអាចបង្កើតការងារបានចំនួន 1,786 កន្លែង។

November 11, 2022

តម្លៃលក់រាយប្រេងឥន្ធនៈថ្មីនៅ កម្ពុជា ដែលត្រូវអនុវត្ត ចាប់ពីថ្ងៃទីនេះ ដល់ថ្ងៃទី 20 ខែវិច្ឆិកា

ក្រសួងពាណិជ្ជកម្ម នារសៀលថ្ងៃទី 11 វិច្ឆិកា បានចេញសេចក្ដីជូនដំណឹងស្ដីពី តម្លៃលក់រាយប្រេងឥន្ធនៈនៅ កម្ពុជា ដែលត្រូវអនុវត្ត ចាប់ពីថ្ងៃទី 11 ដល់ថ្ងៃទី 20 ខែវិច្ឆិកា ឆ្នាំ 2022។

តម្លៃលក់រាយសម្រាប់សាំងធម្មតា បានចុះមកនៅត្រឹម 4,400 រៀល/លីត្រ និងប្រេងម៉ាស៊ូតតម្លៃ 5,100 រៀល/លីត្រ។

November 11, 2022

ក្រុមហ៊ុន Hero MotoCorp បញ្ចេញម៉ូតូអគ្គិសនី Vinda V1 ជាផ្លូវការ

ម៉ូតូលេខស្វ័យប្រវត្តអគ្គិសនី Vinda V1 គឺជាម៉ូតូអគ្គិសនីដំបូងបង្អស់របស់ក្រុមហ៊ុនឥណ្ឌា Hero MotoCorp។

Vinda V1 ដែលជាម៉ូតូអគ្គិសនីដំបូងរបស់ Hero MotoCorp និងត្រូវបានគេរំពឹងច្រើន បានបង្ហាញវត្តមានជាផ្លូវការ។ តម្លៃរបស់កំណែ V1 Plus និង V1 Pro គឺ 1,762 និង 1,932 ដុល្លារអាម៉េរិក។

Vinda V1 គឺជាម៉ូតូលេខអូតូប្រើប្រាស់អគ្គិសនីទាំងស្រុង និងទំនើប លេចធ្លោជាង បើធៀបនឹង Ola S1។ កំណែ V1 Pro បំពាក់ថ្មកម្លាំង 3.94 kWh ខណៈដែលកំណែ V1 Plus បំពាក់ថ្ម 3.44 kWh។ V1 Pro អាចធ្វើដំណើរបាន 166 គីឡូម៉ែត្រ និង V1 Plus ធ្វើដំណើរបាន 143 គីឡូម៉ែត្រ បន្ទាប់ពីបញ្ចូលថាមពលអគ្គិសនីពេញ។

ថ្មរបស់ម៉ូតូអគ្គិសនីខាងលើអាចដោះចេញពីម៉ូតូបាន និងថាមពលរបស់ពួកវាអាចឡើងដល់ 80% បន្ទាប់ពីបញ្ចូលអគ្គិសនីប្រហែលជិត 1 ម៉ោង។ ការប្រគល់ទំនិញគ្រោងនឹងចាប់ផ្ដើមពីខែធ្នូខាងមុខ នៅ ប្រទេសឥណ្ឌា។

November 11, 2022

អ៊ីឡុន ម៉ាស (Elon Musk) ថា Twitter អាចនឹងក្ស័យធននៅឆ្នាំក្រោយ

ការងាររបស់ អ៊ីឡុន ម៉ាស នៅ Twitter កំពុងប្រែជាលំបាកជាងមុន។ កាលពីថ្ងៃព្រហស្បតិ៍កន្លងទៅ លោក ម៉ាស បាននិយាយប្រាប់បុគ្គលិកនៅក្នុងកិច្ចប្រជុំបន្ទាន់ថា មិនអាចរំលងចោលលទ្ធភាពដែល Twitter អាចក្ស័យធននៅឆ្នាំក្រោយ។

លោក ម៉ាស លើកឡើងនូវការយល់ឃើញនេះនៅក្នុងកិច្ចប្រជុំជាមួយបុគ្គលិកទាំងអស់ ក្រោយពីមានសំណួរអំពីល្បឿននៃដំណើរការបច្ចុប្បន្នរបស់ក្រុមហ៊ុន។

មហាសេដ្ឋីអាម៉េរិកដើមកំណើតអាហ្វ្រិកខាងត្បូង ក៏បាននិយាយជាមួយបុគ្គលិកថា បើសិនពួកគេមិនប្រឹងប្រែងធ្វើការ 40 ម៉ោង/សប្ដាហ៍នោះទេ ពួកគេគួរតែដាក់ពាក្យសុំឈប់។ លោក ម៉ាស បានស្នើឱ្យបុគ្គលិកមកធ្វើការនៅការិយាល័យ បើទោះមុននោះ ខាងក្រុមហ៊ុនបានអនុញ្ញាតឱ្យធ្វើការនៅផ្ទះ ឬពីចម្ងាយ។

នាយកមួយចំនួនរបស់ Twitter បានលាលែងពីតំណែងនៅក្នុងប៉ុន្មានសប្ដាហ៍ចុងក្រោយនេះ ក្នុងនោះក៏មានប្រធានសន្តិសុខព័ត៌មាន Lea Kissner, ប្រធានផ្នែកផ្សាយពាណិជ្ជកម្ម Robin Wheeler និងប្រធានផ្នែកការពារទិន្នន័យ Yoel Roth ផងដែរ។

ភាពច្របូកច្របល់បានកើតឡើងនៅពេលលោក ម៉ាស ព្យាយាមរកប្រាក់ពី Twitter ពិសេសគឺការលក់ tick ពណ៌ផ្ទៃមេឃក្នុងតម្លៃ 8 ដុល្លារ/ខែ។ ប្រការនេះធ្វើឱ្យមានការតវ៉ាពីអ្នកលេង Twitter។

លោក ម៉ាស សម្រេចបានកិច្ចព្រមព្រៀងក្នុងការទិញ Twitter ក្នុងតម្លៃ 44 ពាន់លានដុល្លារកាលពីពេលថ្មីៗនេះ។ ចាប់ពីពេលនោះ លោក ម៉ាស ចាប់ផ្ដើមដាក់ផែនការបញ្ឈប់បុគ្គលិកជាបន្តបន្ទាប់ និងរំសាយក្រុមប្រឹក្សាភិបាល ហើយធ្វើឱ្យ Twitter ក្លាយជាក្រុមហ៊ុនឯកជន។ Twitter ក៏ប្រឈមនឹងការបាត់បង់អតិថិជនជាបន្តបន្ទាប់ផងដែរ៕

November 11, 2022

គម្រោងផ្លូវល្បឿនលឿនម៉ុកបាយ (ច្រកព្រំដែនម៉ុកបាយ-បាវិត) -ហូជីមិញ របស់ វៀតណាម

គម្រោងផ្លូវល្បឿនលឿនម៉ុកបាយ-ហូជីមិញ របស់ វៀតណាម ដែលមានប្រវែង 50 គីឡូម៉ែត្រ និងត្រូវចំណាយថវិកាជាង 16.7 ទ្រីលានដុង នឹងតភ្ជាប់ទីក្រុងធំជាងគេរបស់ វៀតណាម ជាមួយនឹង ផ្លូវល្បឿនលឿនភ្នំពេញ-បាវិត របស់ កម្ពុជា។

គម្រោងផ្លូវល្បឿនលឿនម៉ុកបាយ-ហូជីមិញ នឹងត្រូវបានសាងសង់ពី ទីក្រុងហូជីមិញ ឆ្ពោះមកកាន់ច្រកព្រំដែនអន្តរជាតិម៉ុកបាយ នៃខេត្ត Tay Ninh (រោងដំរី) របស់ វៀតណាម ដែលជាប់នឹងច្រកព្រំដែនបាវិត នៃ ខេត្តស្វាយរៀង របស់ កម្ពុជា។

គម្រោងនេះ ត្រូវបានអាជ្ញាធរវៀតណាម គណនាឃើញថា ត្រូវការទុនវិនិយោគជាង 16.7 ទ្រីលានដុង សម្រាប់ដំណាក់កាលទីមួយដែលត្រូវស្ថាបនា 4 គន្លង អាចបើកបរក្នុងល្បឿន 120 គីឡូម៉ែត្រ/ម៉ោង។ នៅក្នុងទុនវិនិយោគសរុបជាង 16.7 ទ្រីលានដុង (673 លានដុល្លារអាម៉េរិក) អ្នកវិនិយោគគ្រោងនឹងប្រមូលទុនជិត 9.3 ទ្រីលានដុង ក្រៅពីនេះគឺជាបន្ទុករបស់ រដ្ឋវៀតណាម។

ខ្លោងទ្វារនៃផ្លូវជាតិមួយខ្សែក្នុងខេត្ត Tay Ninh

ផ្លូវដែលមានប្រវែងប្រហែល 50 គីឡូម៉ែត្រនេះ នឹងស្ថិតក្នុង ទីក្រុងហូជីមិញជិត 24 គីឡូម៉ែត្រ និងប្រហែល 26 គីឡូម៉ែត្រទៀតស្ថិតក្នុងខេត្តរោងដំរី។ ហេដ្ឋារចនាសម្ព័ន្ធមួយនេះនឹងចាប់ផ្ដើមការស្ថាបនាពីឆ្នាំ 2024 ដល់ឆ្នាំ 2027។

នេះគឺជាផ្លូវល្បឿនលឿនដ៏សំខាន់សម្រាប់ការលើកកម្ពស់សមត្ថភាពទាញយកផលប្រយោជន៍ពីការដឹកជញ្ជូនអន្តរជាតិដែលតភ្ជាប់រវាង ទីក្រុងធំបំផុតរបស់ វៀតណាម និង កម្ពុជា៕

November 11, 2022

ផ្លូវល្បឿនលឿនភ្នំពេញ-បាវិត រួមចំណែកក្នុងការតភ្ជាប់រវាង ប្រទេសចិន មីយ៉ានម៉ា ថៃ កម្ពុជា និង វៀតណាម

រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា បានឱ្យដឹងថា ផ្លូវល្បឿនលឿនភ្នំពេញ-បាវិត ខេត្តស្វាយរៀង (ដែលជាប់នឹងច្រកព្រំដែនខេត្ត Tay Ninh (រោងដំរី) របស់ វៀតណាម) នឹងចាប់ផ្ដើមការស្ថាបនានៅឆ្នាំ 2023 ដោយប្រើប្រាស់ថវិកាជាង 1.6 ពាន់លានដុល្លារអាម៉េរិក។

«ផ្លូវល្បឿនលឿននេះមានប្រវែង 138 គីឡូម៉ែត្រ ហើយក្នុងនោះក៏មានការសាងសង់ស្ពានវែងមួយដែលឆ្លងកាត់ទន្លេមេគង្គ ជាមួយនឹងថវិកាសរុបប្រមាណ 1.6 ពាន់លានដុល្លារអាម៉េរិក។ តាមគម្រោង កម្ពុជា នឹងចាប់ផ្ដើមការសាងសង់ផ្លូវនេះនៅឆ្នាំ 2023 ហើយនឹងរួចរាល់ជាស្ថាពរនៅចុងឆ្នាំ 2026 ឬដើមឆ្នាំ 2027» នៅក្នុងពិធីចុះកិច្ចព្រមព្រៀងស្ដីពីការស្ថាបនាផ្លូវល្បឿនលឿនភ្នំពេញ-បាវិត រវាង រាជរដ្ឋាភិបាលកម្ពុជា ជាមួយនឹង ក្រុមហ៊ុនសំណង់ផ្លូវស្ពានចិន (CRBC) ឯកឧត្តម ស៊ុន ចាន់ថុល រដ្ឋមន្ត្រីក្រសួងសារធារណការ និងដឹកជញ្ជូន បានឱ្យដឹងដូច្នេះ។

រដ្ឋមន្ត្រីក្រសួងសារធារណការ ក៏បានបញ្ជាក់ថា ផ្លូវល្បឿនលឿនភ្នំពេញ-បាវិត នឹងស្ថាបនារួចរាល់ដំណាលគ្នានឹងផ្លូវល្បឿនលឿនពី ទីក្រុងហូជីមិញ មកកាន់ច្រកព្រំដែន ម៉ុកបាយ-បាវិត។

បច្ចុប្បន្ន កម្ពុជា កំពុងតែចាប់ផ្ដើមពង្រីកផ្លូវពី 2 គន្លងមកជា 4 គន្លង ដែលតភ្ជាប់ ភ្នំពេញ ជាមួយនឹង ច្រកព្រំដែនប៉ោយប៉ែត ខេត្តបន្ទាយមានជ័យ ដែលជាប់នឹង ប្រទេសថៃ។

យោងតាម រដ្ឋមន្ត្រីក្រសួងសារធារណការ ផ្លូវល្បឿនលឿនភ្នំពេញ-បាវិត នេះ មានសារសំខាន់ក្នុងការតភ្ជាប់រវាង ប្រទេសចិន មីយ៉ានម៉ា ថៃ កម្ពុជា និង វៀតណាម៕

November 11, 2022

Volvo បញ្ចេញផលិតផលថ្មីនៅ អឺរ៉ុប វាយលុក «ទីផ្សាររថយន្តអគ្គិសនី» ពិភពលោក

Volvo EX90 ថ្មីនេះគឺជារថយន្តប្រភេទ SUV មានកៅអី 7 បំពាក់បច្ចេកវិទ្យាទំនើប ហើយបញ្ចូលថាមពលអគ្គិសនីម្ដងអាចជិះបាន 600 គីឡូម៉ែត្រ។

ក្រុមហ៊ុនផលិតរថយន្ត Volvo ទើបតែបានបង្ហាញម៉ូដែលរថយន្តអគ្គិសនីថ្មីរបស់ខ្លួននៅ Stockholm ប្រទេសស៊ុយអែត ដែលជាការចាប់ផ្ដើមរបស់ក្រុមហ៊ុនក្នុងការឆ្ពោះទៅរកអនាគតរថយន្តដើរដោយថាមពលអគ្គិសនីទាំងស្រុង។

Volvo ឱ្យដឹងថា EX90 ថ្មីនេះគឺជារថយន្ត SUV កៅអី 7 និងដំណើរការដោយអគ្គិសនីទាំងស្រុង ជាមួយនឹងស្ដង់ដាសុវត្ថិភាពខ្ពស់។ ម៉ូដែលរថយន្តដែលត្រូវបានប្រកាសកាលពីថ្ងៃទី 09 វិច្ឆិកានេះក៏មានបំពាក់បច្ចេកវិទ្យាទំនើបទាក់ទងនឹងប្រព័ន្ធកុំព្យូទ័រ ការតភ្ជាប់បណ្ដាញបច្ចេកវិទ្យា និងប្រព័ន្ធអគ្គិសនីដើម្បីលើកកម្ពស់សុវត្ថិភាព ប្រសិទ្ធភាព និងសោភណភាព។

ប្រធាន និងជានាយកប្រតិបត្តិរបស់ Volvo លោក Jim Rowan ឱ្យដឹងថា «Volvo EX90 គឺជាប្រកាសមួយបង្ហាញថា យើងខ្ញុំកំពុងស្ថិតនៅចំណុចណា និងកំណត់ទិសដៅដែលយើងខ្ញុំនឹងឆ្ពោះទៅរក»។

យោងតាមលោក Rowan រថយន្តអគ្គិសនី Volvo EX90 នេះ អាចជិះបានចម្ងាយផ្លូវ 600 គីឡូម៉ែត្រ បន្ទាប់ពីបានបញ្ចូលថាមពលអគ្គិសនីម្ដង។ Volvo EX90 នឹងត្រូវបានផលិតនៅ សហរដ្ឋអាម៉េរិក ចាប់ពីឆ្នាំ 2023 ហើយក្រោយមកនឹងផលិតនៅ ប្រទេសចិន។

ក្រុមហ៊ុន Volvo របស់ ស៊ុយអែត ប្រកាសថា ចាប់ពីឆ្នាំ 2030 ពួកគេនឹងផលិត និងលក់តែរថយន្តដើរដោយថាមពលអគ្គិសនីទាំងស្រុងប៉ុណ្ណោះ៕

November 11, 2022

តើម្ចាស់ជើងឯក World Cup 2022 នឹងទទួលបានប្រាក់រង្វាន់ប៉ុន្មានលានដុល្លារអាម៉េរិក?

(កាតា)- ម្ចាស់ជើងឯក World Cup 2022 នឹងទទួលបាន 42 លានដុល្លារអាម៉េរិក ច្រើនជាង 4 លានដុល្លារធៀបនឹងប្រាក់រង្វាន់ដែល បារាំង បានទទួលពី FIFA កាលពីឆ្នាំ 2018។

FIFA បានព្យាករថា ប្រាក់ចំណូលក្នុងឆ្នាំ 2022 នឹងមានចំនួន 4.6 ពាន់លានដុល្លារអាម៉េរិក ក្នុងនោះ ប្រាក់ដែលបានពីការលក់សិទ្ធិផ្សាយបន្តតាមទូរទស្សន៍បាននាំមកនូវចំណូលឱ្យពួកគេ 2.6 ពាន់លានដុល្លារ។ កាលពីខែមេសា 2022 ស្ថាប័ន FIFA កំណត់យក 440 លានដុល្លារសម្រាប់មូលនិធិប្រាក់រង្វាន់ World Cup 2022 កើន 40 លានដុល្លារបើធៀបនឹងឆ្នាំ 2018។ World Cup 2014 នៅ ប្រេស៊ីល ប្រាក់រង្វាន់សរុបគឺ 358 លានដុល្លារ។ ប្រការនេះមានន័យថា ប្រាក់រង្វាន់ World Cup បានកើន 23% ក្នុងរយៈពេល 2 រដូវកាល។

ក្រុមបាល់ទាត់ដែលឈ្នះនៅ World Cup 2022 នឹងទទួលបានប្រាក់រង្វាន់ 42 លានដុល្លារ ខណៈដែលក្រុមម្ចាស់ជើងឯកចំនួន 3 ចុងក្រោយបង្អស់គឺ បារាំង បានទទួល 38 លានដុល្លារ, អាល្លឺម៉ង់ បានទទួល 35 លានដុល្លារ និង អេស្ប៉ាញ បានទទួល 30 លានដុល្លារ។ មុននោះ ម្ចាស់ជើងឯកអ៊ីតាលី បានទទួល 20 លានដុល្លារ ក្នុងឆ្នាំ 2006, ប្រេស៊ីល បានទទួល 8 លានដុល្លារ ក្នុងឆ្នាំ 2020។ ក្រោយរយៈពេល 20 ឆ្នាំ ប្រាក់រង្វាន់សម្រាប់ម្ចាស់ជើងឯក World Cup បានកើនឡើងខ្ពស់ជាងមុនជាង 5 ដង។

ក្រុមបាល់ទាត់ចំនួន 32 ក្រុមដែលចូលរួមប្រកួតនៅ World Cup 2022 នឹងត្រលប់ទៅវិញជាមួយនឹងប្រាក់រង្វាន់រាប់លានដុល្លារ អាស្រ័យលើសមិទ្ធផលរបស់ពួកគេ។ ក្រុមដែលចាញ់នៅក្នុងវគ្គចែកពូលនឹងទទួលបាន 9 លានដុល្លារ, វគ្គ 1/8 នឹងបានទទួល 13 លានដុល្លារ និងវគ្គ 8 ក្រុមចុងក្រោយ (quarter-final) នឹងទទួលបាន 17 លានដុល្លារ។ ក្រុមដែលជាប់ចំណាត់ថ្នាក់លេខ 4 នឹងទទួលបានប្រាក់រង្វាន់ 25 លានដុល្លារ, ក្រុមជាប់លេខ 3 នឹងទទួលបាន 27 លានដុល្លារ ខណៈដែលក្រុមជាប់លេខ 2 នឹងទទួលបាន 30 លានដុល្លារ៕

November 10, 2022

គម្រោងសាងសង់អគារភ្លោះកប់ពពកដែលមានដាំរុក្ខជាតិ 30,000 ដើម

(អារ៉ាប់រួម)-អគារភ្លោះរាងអក្សរ V កម្ពស់ 190 ម៉ែត្រ និង 150 ម៉ែត្រនេះនឹងនាំមកនូវអត្ថប្រយោជន៍របស់ព្រៃក្នុងទីក្រុង មានដូចជា ការស្រូបយកធូលីល្អិត និងបញ្ចុះកម្ដៅបរិយាកាសក្នុងទីក្រុងជាដើម។

ក្រុមហ៊ុនអ៊ីតាលី Stefano Boeri Architetti បានបង្ហើបអំពីផែនការបន្ថែមពណ៌បៃតងដល់ ទីក្រុងឌូបៃ របស់ អេមីរ៉ាតអារ៉ាប់រួម ដោយប្រើប្រាស់គម្រោង «តំបន់ព្រៃបញ្ឈរត្រង់»។ គម្រោងនេះរួមមានអគារភ្លោះកប់ពពកដែលគ្របដណ្ដប់ដោយដើមឈើរាប់ពាន់ដើម និងមានរចនាបថបែបចីរភាពដើម្បីជួយកាត់បន្ថយតម្រូវការប្រើប្រាស់បណ្ដាញអគ្គិសនី នេះបើតាម Nes Atlas ចុះផ្សាយកាលពីថ្ងៃទី 09 វិច្ឆិកា 2022។

អគារភ្លោះនេះមានរាងជាអក្សរ V និងតភ្ជាប់ជាមួយគ្នាដោយខឿនរួម។ ពួកវាមានកម្ពស់ 190 ម៉ែត្រ និង 150 ម៉ែត្រ ហើយគ្រោងនឹងដាំដើមឈើជាង 2,600 ដើម និងរុក្ខជាតិប្រភេទគុម្ពចំនួន 27,000 គុម្ពនៅខាងក្រៅ និងមានផ្ទះកញ្ចក់ និងសួនអ៊ីដ្រូប៉ូនិច (សួនដាំរុក្ខជាតិលើទឹក) ជាច្រើនទៀត។ ក្រៅពីនេះ អគារទាំងនេះក៏នឹងមានយ៉រ និងទីលានលើដំបូលជាច្រើនផងដែរ។

គម្រោងនេះផ្ដោតសំខាន់ទៅលើការរក្សាទឹក ដោយសារថា ឌូបៃ តែងតែរាំងស្ងួត។ ប្រព័ន្ធបន្សាបជាតិប្រៃនឹងត្រូវបានដំឡើងជាមួយនឹងប្រព័ន្ធកែច្នៃទឹកកខ្វក់ដែលបញ្ចេញពីសកម្មភាពមួយចំនួនដូចជា ការគក់ខោអាវជាដើម។ ទន្ទឹមនឹងនេះ អគារទាំងនេះក៏នឹងកាត់បន្ថយការប្រើប្រាស់បណ្ដាញខ្សែភ្លើង តាមរយៈការបំពាក់ប្រព័ន្ធអគ្គិសនីដើរដោយថាមពលព្រះអាទិត្យដែលអាចផលិតអគ្គិសនីបាន 5,100 kWh។

គម្រោងខាងលើនេះត្រូវបានប្រកាសនៅក្នុងកិច្ចប្រជុំស្ដីពីបម្រែបម្រួលអាកាសធាតុ COP27 ដែលធ្វើឡើងចាប់ពីថ្ងៃទី 06 ដល់ 18 វិច្ឆិកា នៅ Sharm El Sheikh ប្រទេសអេហ្ស៊ីប។ ក្រុមហ៊ុន Stefano Boeri Architetti បានឱ្យដឹងថា ខ្លួនកំពុងសិក្សាបន្ថែមអំពីរចនាបថ និងចីរភាពទាំងមូលរបស់គម្រោង។ បច្ចុប្បន្ន មិនទាន់មានព័ត៌មានអំពីពេលវេលានៃការសាងសង់រួចរាល់នៅឡើយ៕

November 10, 2022

ប្រទេសកាតា អាចរកចំណូលបាន 17 ពាន់លានដុល្លារពី World Cup 2022

World Cup ត្រូវបានគេរំពឹងថា នឹងក្លាយជាកត្តាជំរុញសេដ្ឋកិច្ចដ៏ធំសម្រាប់ ប្រទេសកាតា ក្នុងនោះ ភាគច្រើនស្ថិតក្នុងវិស័យសំណង់ និងទេសចរណ៍។

Nasser AI Khater ប្រធាន FIFA World Cup Qatar 2022 បានប្រាប់ Bloomberg ថា ប្រទេសកាតា គ្រោងនឹងទាក់ទាញភ្ញៀវបានពី 1 ទៅ 1.5 លាននាក់នៅក្នុងរដូវ World Cup ឆ្នាំនេះ។ ដូច្នេះ ព្រឹត្តិការណ៍ប្រកួតបាល់ទាត់ធំជាងគេក្នុងពិភពលោកនេះ អាចនាំមកនូវប្រាក់ចំណូលឱ្យ កាតា 17 ពាន់លានដុល្លារអាម៉េរិក (ទាបជាងបន្តិច ធៀបនឹងការព្យាករ 20 ពាន់លានដុល្លារមុននោះ)។

តួលេខដែលប្រធាន FIFA World Cup Qatar 2022 បានលើកឡើងគឺប្រហាក់ប្រហែលនឹង 10% នៃ GDP ឆ្នាំ 2021 របស់ កាតា។ Hassan AI Thawadi ដែលជាអគ្គលេខាធិការនៃគណៈកម្មការទទួលបន្ទុកសាងសង់ហេដ្ឋារចនាសម្ព័ន្ធសម្រាប់ World Cup 2022 បាននិយាយថា ការគណនាខាងលើគឺជាលទ្ធផលមួយនៃ «ការស្រាវជ្រាវជាន់ខ្ពស់»។ ក៏ប៉ុន្តែ ការព្យាករលម្អិតនឹងពិបាកប៉ានស្មាននាបច្ចុប្បន្ន។

World Cup ត្រូវបានគេរំពឹងថា នឹងក្លាយជាកត្តាជំរុញសេដ្ឋកិច្ចដ៏ធំសម្រាប់ ប្រទេសកាតា ក្នុងនោះ ភាគច្រើនស្ថិតក្នុងវិស័យសំណង់ និងទេសចរណ៍។ លោក Hassan AI Thawadi ឱ្យដឹងថា World Cup «នឹងដើរតួជាក្បាលម៉ាស៊ីនជំរុញ និងពន្លឿនសម្រាប់គំនិតផ្ដួចផ្ដើមដែលរដ្ឋាភិបាលបានសន្យាអនុវត្ត និងបានរៀបផែនការពីមុន ទោះជាការអភិវឌ្ឍទីក្រុង ឬពិពិធកម្មសេដ្ឋកិច្ច»។

កាតា ចង់ប្រើប្រាស់ព្រឹត្តិការណ៍ World Cup 2022 ដើម្បីឃោសនាប្រទេសរបស់ខ្លួន ក្នុងបំណងជំរុញកំណើនសេដ្ឋកិច្ច ក្នុងនោះ ការទាក់ទាញភ្ញៀវបរទេសដែលជាអ្នកគាំទ្រវិស័យបាល់ទាត់ត្រូវបានយកចិត្តទុកដាក់ជាងគេ។

កីឡដ្ឋានបាល់ទាត់ Ahmed bin ali នៅ ប្រទេសកាតា

បន្ទប់រាប់ពាន់ក្នុងបណ្ដាសណ្ឋាគារលំដាប់ខ្ពស់ត្រូវបានទុកសម្រាប់តែក្រុមមន្ត្រី FIFA និងកីឡាករបាល់ទាត់។ លោក AI Khater បានឱ្យដឹងថា ប្រទេសកាតា ក៏នឹងបង្កើនចំនួនបន្ទប់សម្រាប់ទេសចរផងដែរ។ ជាសរុប កាតា បានចំណាយប្រហែល 200 ពាន់លានដុល្លារសម្រាប់ស្ថាបនាហេដ្ឋារចនាសម្ព័ន្ធ បណ្ដាគម្រោងដទៃ រាប់ចាប់តាំងពីដណ្ដើមបានសិទ្ធិធ្វើជាម្ចាស់ផ្ទះការប្រកួតបាល់ទាត់ពិភពលោក (World Cup)។

ក៏ប៉ុន្តែ មនុស្សជាច្រើនមានការបារម្ភថា World Cup នៅ កាតា នឹងមិនសូវ «គគ្រឹកគគ្រេង» ព្រោះតែវិន័យសាសនាអ៊ីស្លាម ដែលប្រកាន់តឹងតាំងពីការស្លៀកពាក់ រហូតដល់ភេសជ្ជមានជាតិអាល់កុល។

ទោះជាយ៉ាងណាក៏ដោយ លោក Al Thawadi បានបញ្ជាក់ថា វិស័យឯកជននឹងមានសិទ្ធិសម្រេចលើការផ្ដល់សម្លៀកបំពាក់ដល់អតិថិជន។ ចំណែកស្រាក៏នឹងត្រូវបានអនុញ្ញាតឱ្យប្រើប្រាស់នៅក្នុងទីតាំងដែលបានកំណត់ ដូចជាទីតាំងសម្រាប់អ្នកគាំទ្របាល់ទាត់ជាដើម៕

November 10, 2022

Category: សង្គម និងសេដ្ឋកិច្ច