សង្គម និងសេដ្ឋកិច្ច - La Reine Media

តាក់ស៊ីហោះ 2X របស់ក្រុមហ៊ុន Volocopter ហោះហើរសាកល្បងដំបូងនៅ បារីស

(បារាំង)-ម៉ូដែលតាក់ស៊ីហោះអគ្គិសនីដែលបំពាក់ rotor ច្រើន បានហោះហើរសាកល្បងលើកដំបូងនៅក្បែរ ទីក្រុងបារីស កាលពីថ្ងៃទី 10 វិច្ឆិកា មុនពេលត្រៀមសម្រាប់ការហោះហើរពាណិជ្ជកម្មចាប់ពីឆ្នាំ 2024។

យន្តហោះសាកល្បងរបស់ Volocopter មាន rotor ចំនួន 8 បានហោះហើរសាកល្បងដឹកមនុស្សម្នាក់ពីព្រលានយន្តហោះ Pontoise-Cormeilles នៅជាយក្រុងបារីស និងហោះឆ្វែលក្នុងរយៈពេលខ្លី។ បច្ចុប្បន្ន Volocopter មានល្បឿនអតិបរមា 90 គឺឡូម៉ែត្រ/ម៉ោង និងហោះបានចម្ងាយ 20 គីឡូម៉ែត្រ នេះបើតាម Reuters ចុះផ្សាយកាលពីថ្ងៃទី 12 វិច្ឆិកា។

Dirk Hoke នាយកប្រតិបត្តិរបស់ក្រុមហ៊ុន Volocopter របស់ អាល្លឺម៉ង់ បានឱ្យដឹងថា ក្នុងរង្វង់ 18 ខែទៀត ពួកគេនឹងត្រៀមស្នើសុំលិខិតអនុញ្ញាតសម្រាប់ម៉ូដែលយន្តហោះ Volocopter 2X នេះ ហើយសង្ឃឹមថា អាចហោះហើរពាណិជ្ជកម្មរយៈចម្ងាយខ្លីចាប់ពីឆ្នាំ 2024 នៅពេល បារីស ប្រារព្ធព្រឹត្តិការណ៍កីឡារដូវក្ដៅ (Summer Olympic Games)។

ក្រុមហ៊ុនខាងលើមានបំណងធ្វើឱ្យយន្តហោះមានកៅអី 2 នេះ អាចហោះហើរដោយស្វ័យប្រវត្ត ប៉ុន្តែបានទទួលស្គាល់ថា នៅមានការងារជាច្រើនទៀតត្រូវធ្វើ ក្នុងនោះមានដូចជា ផ្នែកហេដ្ឋារចនាសម្ព័ន្ធ ដែនអាកាស និងការរង់ចាំទទួលស្គាល់ពីសាធារណជនជាដើម។

អ្នកបើកបរសាកល្បង Paul Stone បានឱ្យដឹងថា យន្តហោះនេះងាយស្រួលបើកបរជាង បើធៀបនឹងឧទ្ធម្ភាគចក្របច្ចុប្បន្ន។

Volocopter 2X ដំណើរការទៅតាមបច្ចេកវិទ្យា drone និងប្រើប្រាស់រ៉ូបូតក្នុងការប្ដូរថ្មមុនពេលបន្តការហោះហើរ។ ក្រុមហ៊ុន Volocopter កំពុងឆ្ពោះទៅរកគោលដៅដឹកអ្នកដំណើរឱ្យបាន 100,000 នាក់នៅពាសពេញពិភពលោកជារៀងរាល់ម៉ោងក្នុងរង្វង់ 10 ឆ្នាំខាងមុខ។ ដោយសារតែប្រើប្រាស់អគ្គិសនី ដូច្នេះ Volocopter 2X មិនបំភាយឧស្ម័ន ហើយក៏មិនបង្កសំឡេងរំខាន៕

https://www.youtube.com/watch?v=pcxLOunnfrw

November 14, 2022

ជនទុច្ចរិតអាចបើកសោទូរស័ព្ទ Android បានយ៉ាងងាយ ដោយគ្រាន់តែប្ដូរស៊ីម (SIM) ថ្មី

បន្ទាប់ពីត្រូវជាប់សោស៊ីមកាត់ (SIM) លោក David Schutz បានប្រទះឃើញដោយចៃដន់ថា ការប្ដូរស៊ីមអាចធ្វើឱ្យទូរស័ព្ទ Google មិនសួររកពាក្យសម្ងាត់សម្រាប់បើកសោទូរស័ព្ទ។

David Schutz បានឱ្យដឹងថា គាត់បានរាយការណ៍ប្រាប់ Google តាំងពីខែមិថុនា ប៉ុន្តែ រហូតដល់ថ្ងៃទី 07 វិច្ឆិកា ទើបបញ្ហាត្រូវបានដោះស្រាយ។ David Schutz ណែនាំឱ្យអ្នកប្រើប្រាស់ទូរស័ព្ទ Android ធ្វើបច្ចុប្បន្នភាពកំណែជួសជុលថ្មី ដើម្បីចៀសវាងត្រូវគេលួចចូលប្រើទូរស័ព្ទដោយប្រការណាមួយ។

កំហុសខាងលើអាចនាំឱ្យទូរស័ព្ទមួយចំនួនត្រូវជនទុច្ចរិតលួចបើកសោអេក្រង់ដោយការដាក់ស៊ីមដទៃ និងអនុវត្តកិច្ចការ 5 ជំហានដ៏ងាយស្រួលក្នុងរយៈពេលតែប៉ុន្មាននាទីប៉ុណ្ណោះ។

ការរកឃើញកំហុសដោយចៃដន់

បើទោះខ្លួនគឺជាអ្នកជំនាញផ្នែកការពារទិន្នន័យ ប៉ុន្តែ David Schutz មិនមែនស្រាវជ្រាវដោយផ្ទាល់អំពីប្រព័ន្ធប្រតិបត្តិ Android ឡើយ។ David Schutz រកឃើញកំហុសខាងលើដោយចៃដន់ប៉ុណ្ណោះនៅពេលប្រើប្រាស់ទូរស័ព្ទ Pixel 6 របស់ Google។

មានម្ដងនោះ ក្រោយពីថ្មអស់ថាមពលរលីង និងត្រូវបានបញ្ចូលថាមពលជាថ្មី ហើយបើកទូរស័ព្ទឡើងវិញ វាក៏ស្នើឱ្យ David Schutz បញ្ចូលលេខសម្ងាត់ PIN របស់ស៊ីម។ ដោយសារមិនចាំ និងបញ្ចូលខុស 3 ដង ស៊ីមរបស់ David Schutz ក៏ត្រូវបានបិទសោ និងត្រូវបញ្ចូលលេខសម្ងាត់ PUK បើសិនចង់បើកសោស៊ីម។

PUK គឺជាលេខការពារស៊ីមដែលមាន 8 ខ្ទង់ ដែលតែងត្រូវបានបោះពុម្ភនៅលើសម្បកស៊ីមកាតនៅពេលទិញពីក្រុមហ៊ុន។ David Schutz ត្រូវទៅរកសម្បកស៊ីម និងបញ្ចូលកូដ PUK ហើយប្ដូរលេខ PIN ថ្មីដើម្បីបើកសោស៊ីម។ ប៉ុន្តែ អ្វីដែលគាត់ភ្ញាក់ផ្អើលនោះគឺថា បន្ទាប់ពីបើកសោស៊ីម ទូរស័ព្ទ Pixel 6 របស់គាត់គ្រាន់តែស្នើឱ្យគាត់ប្រើប្រាស់ក្រយៅដៃប៉ុណ្ណោះដើម្បីបើកសោទូរស័ព្ទ។

«ប្រការនេះគួរតែមិនត្រូវកើតមាន។ ព្រោះថា បន្ទាប់ពីបើកដំណើរការទូរស័ព្ទ ឧបករណ៍នឹងស្នើឱ្យអ្នកប្រើប្រាស់បញ្ចូលពាក្យសម្ងាត់សម្រាប់បើកសោទូរស័ព្ទយ៉ាងតិចម្ដង» David Schutz វាយតម្លៃដូច្នេះ។ ការបញ្ចូលពាក្យសម្ងាត់បន្ទាប់ពីបើកដំណើរការម៉ាស៊ីន ក៏ជាដំណើរការដែលត្រូវបានតម្រូវនៅលើគ្រប់ឧបករណ៍ iOS ឬ Android នាបច្ចុប្បន្ន។

ក្រោយមក David Schutz ក៏បានធ្វើសាចុះសាឡើងដើម្បីបញ្ជាក់អំពីកំហុស និងធ្វើរបាយការណ៍។ David Schutz ក៏បានរកឃើញថា ទូរស័ព្ទរបស់គាត់មិនបានសួររកក្រយៅដៃ ប៉ុន្តែ អនុញ្ញាតឱ្យអ្នកប្រើប្រាស់ចូលទៅកាន់អេក្រង់កម្មវិធីដោយគ្រាន់តែបើកសោស៊ីម។

ទំព័រ Bleeping Computer វាយតម្លៃថា កំហុសនេះនឹងប៉ះពាល់ធ្ងន់ធ្ងរនៅក្នុងករណីមួយចំនួនដូចជា ទូរស័ព្ទត្រូវគេលួច ត្រូវគេរើសបាន ឬត្រូវប៉ូលិសស៊ើបអង្កេត។ល។

យោងតាមប្រកាសរបស់ Google កំហុសនេះប៉ះពាល់ដល់ឧករណ៍ទាំងអស់ដែលប្រើប្រាស់ Android កំណែ 10, 11, 12 និង 13 បើសិនមិនទាន់ធ្វើបច្ចុប្បន្នភាពកំណែជួសជុលខែវិច្ឆិកា 2022។ ដើម្បីមានសិទ្ធិចូលប្រើទូរស័ព្ទអ្នកដទៃ ជនទុច្ចរិតគ្រាន់តែប្រើប្រាស់ស៊ីមរបស់ពួកគេ (ដែលមានកូដ PUK ស្រាប់) និងស្កេនក្រយៅដៃ និងបញ្ចូល PIN ឱ្យខុសច្រើនដងដើម្បីឱ្យបិទសោស៊ីម ហើយក្រោយមកបញ្ចូលលេខកូដ PUK ដើម្បីបើកសោស៊ីម គឺជាការស្រេច។

ភាពយឺតយ៉ាវរបស់ Google

ក្រុមហ៊ុន Google បានចំណាយពេលយ៉ាងយូរដើម្បីជួសជុលកំហុសឆ្គងខាងលើនេះ។ យោងតាមសម្ដីរបស់ David Schutz នៅពេលរកឃើញកំហុសកាលពីខែមិថុនា គាត់បានរាយការណ៍ឱ្យ Google និងត្រូវបានផ្នែក Android VRP ទទួលយកភ្លាម។ David Schutz គ្រោងនឹងឆាប់ប្រកាសអំពីការរកឃើញរបស់ខ្លួននៅលើប្លក់ផ្ទាល់ខ្លួន បន្ទាប់ពី Google បញ្ចេញកំណែជួសជុស ហើយគាត់ក៏អាចទទួលបានប្រាក់រង្វាន់ពីកម្មវិធីប្រមាញ់កំហុសផ្នែកការពារទិន្នន័យរបស់ Google។ ការរកឃើញកំហុសធំបែបនេះ អ្នករាយការណ៍ដំបូងអាចទទួលបានប្រាក់រង្វាន់ឡើងដល់ 100,000 ដុល្លារអាម៉េរិក។

ប៉ុន្តែ 1 ខែក្រោយមក David Schutz បានទទួលដំណឹងពី Google ថា កំហុសដែលគាត់បានប្រទះឃើញ ត្រូវបានអ្នកស្រាវជ្រាវម្នាក់រាយការណ៍មុនគាត់បាត់ទៅហើយ ចំណែក Google ក៏កំពុងជួសជុសកំហុសនេះ។ ប្រការនេះមានន័យថា David Schutz មិនទទួលបានប្រាក់រង្វាន់ ហើយក៏មិនអាចប្រកាសអំពីកំហុសនេះ។

2 ខែក្រោយមកទៀត នៅពេលចូលរួមក្នុងព្រឹត្តិការណ៍ស្ដីពីការការពារភាពសម្ងាត់របស់ Google លោក David Schutz ក៏បានរកឃើញថា កំហុសនេះនៅតែមិនទាន់ត្រូវបានជួសជុលនៅឡើយ។ David Schutz ក៏បានជជែកដោយផ្ទាល់ជាមួយមនុស្សមួយចំនួននៅក្នុងផ្នែក Android VRP និងបានបង្ខំឱ្យពួកគេជួសជុលកំហុសនេះបន្ទាន់ មិនដូច្នេះទេ David Schutz នឹងប្រកាសជាសាធារណៈនៅចុងខែតុលា 2022។

ចុងក្រោយ កំហុសខាងលើក៏ត្រូវបាន Google ប្រកាសកាលពីដើមខែវិច្ឆិកា ដោយដាក់ឈ្មោះថា CVE-2022-20465។ លោក David Schutz បើទោះមិនមែនជាអ្នកដែលបានរកឃើញកំហុសខាងលើដំបូងគេ ប៉ុន្តែក៏បានទទួលប្រាក់រង្វាន់ 70,000 ដុល្លារអាម៉េរិក ដោយសាររបាយការណ៍ទីពីររបស់គាត់។ អ្នកប្រើប្រាស់ឧបករណ៍ Android ពិសេសគឺទូរស័ព្ទ Pixel ត្រូវបានណែនាំឱ្យធ្វើបច្ចុប្បន្នភាពប្រព័ន្ធដំណើរការថ្មីបំផុតដើម្បីចៀសវាងកំហុសខាងលើនេះ៕

November 14, 2022

មេដឹកនាំរបស់ Volvo និយាយថា រថយន្តអគ្គិសនីនឹងមានតម្លៃទាបដូចរថយន្តសាំងនៅឆ្នាំ 2025

ប្រការនេះអាចមានលទ្ធភាពកើតឡើងចំពោះតែក្រុមហ៊ុនផលិតរថយន្ត Volvo និងបណ្ដាក្រុមហ៊ុនរថយន្តប្រណិត ឬជារឿងទូទៅ?

បណ្ដាក្រុមហ៊ុនផលិតរថយន្ត និងយានជំនិះដើរដោយម៉ាស៊ីនចំហេះក្នុងធ្លាប់បាននិយាយថា យានយន្តអគ្គិសនីនឹងមានតម្លៃថោកជាងបច្ចុប្បន្ន នៅពេលតម្លៃថ្មផ្ទុកថាមពលថយចុះ និងបរិមាណនៃការផលិតកើនឡើង។ ការយល់ឃើញនេះអាចត្រូវ ហើយវាអាចកើតឡើងជាបណ្ដើរៗទៅតាមពេលវេលា ប៉ុន្តែ កូវីដ-19 រួមនឹងបញ្ហាកង្វះបន្ទះអេឡិចត្រូនិក (semiconductor) និងតម្លៃប្រេងសាំងឡើងខ្ពស់ខ្លាំងបានជំរុញឱ្យតម្រូវការប្រើប្រាស់រថយន្តអគ្គិសនីកើនឡើងយ៉ាងគំហុក នាំឱ្យកើតមានឥទ្ធិពលបញ្ច្រាស ពោលគឺយានយន្តអគ្គិសនីកាន់តែឡើងថ្លៃនាបច្ចុប្បន្ន។

ថ្មីនេះ នាយកប្រតិបត្តិរបស់ក្រុមហ៊ុន Volvo លោក Jim Rowan ជឿថា រថយន្តអគ្គិសនីនឹងមានតម្លៃស្មើនឹងរថយន្តប្រេងសាំងម៉ូដែលដូចគ្នា យ៉ាងឆាប់ចាប់ពីឆ្នាំ 2025។ ក៏ប៉ុន្តែ បើសិនជាយើងនៅតែស្ថិតនៅក្នុងដំណាក់កាលវិបត្តិហិរញ្ញវត្ថុ ហើយតម្លៃប្រេងសាំងនៅតែស្ថិតក្នុងកម្រិតខ្ពស់ខ្លាំង នោះការព្យាកររបស់លោក Jim Rowan ទំនងជាអាចប្រែប្រួល។

លោក Jim Rowan មិនត្រឹមតែនិយាយដូចខាងលើទេ ប៉ុន្តែក៏បាននិយាយដល់រឿងផ្គត់ផ្គង់តាមតម្រូវការរបស់ក្រុមមនុស្សដែលមិនមានប្រាក់ច្រើនផងដែរ ដោយលោកលើកឡើងថា បណ្ដាក្រុមហ៊ុនផលិតរថយន្តអគ្គិសនី មិនគួររំពឹងទៅលើតែជំនួយរបស់រដ្ឋដើម្បីជោគជ័យឡើយ។ លោកថា ក្រុមហ៊ុនរថយន្តគួររកវិធីផលិតរថយន្តអគ្គិសនីដែលមនុស្សគ្រប់រូបចង់ទិញ និងមានតម្លៃទាបដែលគ្រប់គ្នាអាចទិញបាន។

យោងតាម Automotive News Europe នៅក្នុងព្រឹត្តិការណ៍មួយនាពេលថ្មីៗនេះនៅ ស្តុកខុល ប្រទេសស៊ុយអែត នាយកប្រតិបត្តិរបស់ Volvo បានឱ្យដឹងថា «យើងខ្ញុំគិតថា យើងខ្ញុំសម្រេចបាន [តម្លៃប្រហាក់ប្រហែលគ្នា] នៅឆ្នាំ 2025 ជាពេលវេលាដែលនឹងមានបច្ចេកវិទ្យាគ្រប់គ្រាន់ជួយបញ្ចុះតម្លៃថ្មផ្ទុកថាមពល។ បច្ចេកវិទ្យានឹងជួយឱ្យរថយន្តធ្វើដំណើរបានឆ្ងាយជាង។ រថយន្តអគ្គិសនីអាចត្រូវការថ្មដែលមានទម្ងន់ស្រាលជាង ប៉ុន្តែធ្វើដំណើរបានឆ្ងាយជាង ហើយមានតម្លៃទាបជាង – យើងនឹងសម្រេចបានចំណុចនោះ»។

ក្រុមហ៊ុន Volvo ដែលកន្លងមកធ្លាប់ប្រកាសថា នឹងលក់តែរថយន្តអគ្គិសនី 100% នាពេលអនាគត ថ្មីៗនេះទើបតែបានបញ្ចេញរថយន្តអគ្គិសនីប្រភេទតម្លៃមធ្យម EX90 មានកៅអី 3 ជួរ ដែលនឹងចូលមកជំនួស Volvo XC90 បច្ចុប្បន្ន។ Volvo ក៏បង្ហាញរថយន្ត crossover អគ្គិសនី ដែលមានរូបរាងតូចជាង EX90 ផងដែរ។ បច្ចុប្បន្ន ក្រុមហ៊ុននេះផ្គត់ផ្គង់រថយន្តអគ្គិសនីម៉ូដែលខ្នាតតូច XC40 Recharge និង C40 Recharge។

តម្លៃរថយន្តអគ្គិសនី EX90 ប្រភេទ SUV ដែលជិតត្រូវបាន Volvo ដាក់លក់ក្នុងទីផ្សារនឹងមានតម្លៃក្រោម 80,000 ដុល្លារអាម៉េរិក ជាមួយនឹងលក្ខណៈបច្ចេកទេសល្អ៕

November 14, 2022

Concept នាវាទេសចរណ៍ខ្នាតយក្សមានរូបរាងដូចអណ្ដើក អាចដាក់មនុស្សបាន 60,000 នាក់

ក្រុមហ៊ុនមួយរបស់ អ៊ីតាលី បានបង្ហើបឱ្យដឹងអំពីគំនិតមួយស្ដីពីនាវាទេសចរណ៍ប្រវែង 550 ម៉ែត្រ ដែលមានរូបរាងដូចទីក្រុងអណ្ដើក និងត្រូវការពេលវេលា 8 ឆ្នាំដើម្បីសាងសង់។

ក្រុមហ៊ុនស្ថាបត្យកម្មអ៊ីតាលី Lazzarini បានបង្ហាញ concept កំពូលនាវាទេសចរណ៍ខ្នាតយក្ស Pangeos ដែលមានរូបរាងដូចទៅនឹងទីក្រុងចល័តអណ្ដែតលើទឹក នេះបើតាម Design Boom ចុះផ្សាយកាលពីថ្ងៃទី 11 វិច្ឆិកា។ នាវាទេសចរណ៍នេះមានសណ្ឋាគារ មជ្ឈមណ្ឌលពាណិជ្ជកម្ម ឧទ្យាន កំពង់ផែ ព្រលានយន្តហោះ និងហេដ្ឋារចនាសម្ព័ន្ធចាំបាច់ជាច្រើនផ្សេងទៀតដែលអាចបម្រើដល់ការរស់នៅរបស់អ្នកដំណើរ 60,000 នាក់ នៅលើផ្ទៃសមុទ្រ។

នាវាទេសចរណ៍ Pangeos ត្រូវបានដាក់ឈ្មោះទៅតាម មហាទ្វីបដែលធ្លាប់មានកាលពីរាប់លានឆ្នាំមុន។ នាវាទេសចរណ៍នេះមានបណ្ដោយប្រវែង 550 ម៉ែត្រ និងទទឹងឡើងដល់ 610 ម៉ែត្រ ត្រង់ជើងខាងមុខរបស់វា។ បើសិនជាបានក្លាយជាការពិត នាវាទេសចរណ៍នេះអាចក្លាយជាស្ថាបត្យកម្មធំបំផុតក្នុងពិភពលោក។

Pangeos បំពាក់ម៉ាស៊ីន HTS ចំនួន 9 គ្រឿង ក្នុងនោះ មួយគ្រឿងៗមានកម្លាំង 16,800 សេះ។ នាវានេះអាចធ្វើដំណើរលើផ្ទៃទឹកក្នុងល្បឿន 9 គីឡូម៉ែត្រ/ម៉ោង។ ក្នុងពេលធ្វើដំណើរ កន្ទុយធំរបស់វានឹងទទួលថាមពលពីរលកសមុទ្រ ហើយ Pangeos អាចធ្វើដំណើរដោយមិនបំភាយឧស្ម័ន។ ទន្ទឹមនឹងនេះ ដំបូលរបស់វាក៏បំពាក់ផ្ទាំងសូឡាដែលអាចផ្គត់ផ្គង់អគ្គិសនីស្អាតដល់នាវា។

ក្រុមហ៊ុន Lazzarini សង្ឃឹមថា Pangeos នឹងមិននៅជាគំនិតទៀតទេនៅក្នុងពេលអនាគត។ ដើម្បីសាងសង់នាវាទេសចរណ៍ខ្នាតយក្សនេះ ក្រុមអ្នកជំនាញបានគណនាឃើញថា ពួកគេនឹងត្រូវការប្រាក់ 8 ពាន់លានដុល្លារ និងពេលវាលា 8 ឆ្នាំ៕

November 14, 2022

គាស់ដីផ្សងរកត្បូង ប្រទះឃើញពេជ្រមួយគ្រាប់ក្នុងថ្ងៃខួបអាពាហ៍ពិពាហ៍

(សហរដ្ឋអាម៉េរិក)-គ្រាប់ពេជ្រពណ៌ប្រផេះ 1.90 ការ៉ាតមួយគ្រាប់ ត្រូវបានរកឃើញដោយប្ដីប្រពន្ធមួយគូ នៅក្នុងឧទ្យានដែលមានថ្មភ្នំភ្លើង lamproite និងអាចមានតម្លៃរាប់ម៉ឺនដុល្លារអាម៉េរិក។

ប្ដីប្រពន្ធ Jessica និង Seth Erickson រស់នៅក្នុងតំបន់ Chatfield នៃរដ្ឋ Minnesota បានចូលទៅកំសាន្តនៅក្នុងឧទ្យាន Crater of Diamonds ក្នុងរដ្ឋ Arkansas ក្នុងឱកាសខួប 10 ឆ្នាំនៃអាពាហ៍ពិពាហ៍ នេះបើតាម Newsweek ចុះផ្សាយកាលពីថ្ងៃទី 11 វិច្ឆិកា។ ព្រឹកថ្ងៃទី 04 វិច្ឆិកា នៅពេលជីកគាស់ និងរែងដីក្នុងឧទ្យាន ពួកគេបានប្រទះឃើញត្បូងមួយគ្រាប់ដែលមានពណ៌ពិសេស។

ក្រោយមក ពួកគេក៏បាននាំយកត្បូងនេះទៅកាន់ មជ្ឈមណ្ឌលស្វែងរកពេជ្ររបស់ឧទ្យាន Crater of Diamonds ហើយក៏ត្រូវបានបញ្ជាក់ថា នេះគឺជាត្បូងពេជ្រពណ៌ប្រផេះ ទម្ងន់ 1.90 ការ៉ាត។

Crater of Diamonds ស្ថិតនៅចម្ងាយពីព្រំប្រទល់របស់ Arkansas និង Oklahoma ប្រហែល 95 គីឡូម៉ែត្រទៅទិសខាងកើត។ នេះគឺជាអណ្ដូងរ៉ែពេជ្រសាធារណៈតែមួយគត់នៅលើពិភពលោក ដែលមនុស្សគ្រប់គ្នាអាចចូលទៅស្វែងរកត្បូងពេជ្រតាមចិត្ត។

បន្ទាប់ពីត្រូវបានកាត់តម្រឹម ត្បូងពេជ្រថ្លាមួយគ្រាប់ទម្ងន់ 1.90 ការ៉ាត អាចមានតម្លៃជាមធ្យម 25,000 ដុល្លារអាម៉េរិក។ តម្លៃរបស់ត្បូងពេជ្រក៏នឹងប្រែប្រួលទៅតាមពណ៌របស់វាផងដែរ៕

November 12, 2022

ម៉ូតូអគ្គិសនី EM1 របស់ក្រុមហ៊ុន Honda នៅក្នុងពិព័រណ៍ EICMA 2022

Honda EM1 ដែលជាម៉ូដែលម៉ូតូអគ្គិសនីដំបូងរបស់ក្រុមហ៊ុន Honda សម្រាប់ អតិថិជនអឺរ៉ុប នឹងចេញលក់ក្នុងទីផ្សារនេះចាប់ពីរដូវក្ដៅឆ្នាំ 2023។

ក្រុមហ៊ុន Honda បានប្រកាសគម្រោងមួយដែលប្រកបដោយមហិច្ឆតា នោះគឺការបញ្ចេញម៉ូតូអគ្គិសនីយ៉ាងតិច 10 ម៉ូដែលនៅក្នុងឆ្នាំ 2025។ ពួកគេមិនមានពេលវេលាច្រើនទៀតទេ ប៉ុន្តែពិតណាស់ ក្រុមហ៊ុនធំមួយដូច Honda នឹងមិនប្រកាសដូច្នេះ បើសិនពួកគេមិនមានម៉ូដែលខ្លះនៅក្នុងដៃស្រាប់។

កាលពីខែវិច្ឆិកា 2022 ក្រុមហ៊ុន Honda នៅ អឺរ៉ុប បានបង្ហាញម៉ូតូអគ្គិសនីដំបូងសម្រាប់អតិថិជននៅ ទ្វីបអឺរ៉ុប នោះគឺ Honda EM1 (EM នៅក្នុងឈ្មោះម៉ូតូនេះគឺជាអក្សរកាត់របស់ពាក្យ «Electric Moped»)។

ម៉ូដែលម៉ូតូអគ្គិសនី Honda EM1 អាចធ្វើដំណើរបាន 40 គីឡូម៉ែត្រ បន្ទាប់ពីបានបញ្ចូលថាមពលអគ្គិសនីម្ដង។

បច្ចុប្បន្ន ក្រុមហ៊ុន Honda មិនទាន់ប្រកាសព័ត៌មានណាមួយស្ដីពីលក្ខណៈបច្ចេកទេសរបស់ម៉ូតូអគ្គិសនី EM1 នេះនៅឡើយ៕

November 12, 2022

ប្រធានាធិបតីអាម៉េរិក អញ្ជើញមកកាន់ កម្ពុជា ដើម្បីចូលរួមកិច្ចប្រជុំកំពូលអាស៊ាន (ASEAN)

យន្តហោះដឹកប្រធានាធិបតីអាម៉េរិក លោក ចូ បៃដិន ចុះចតនៅឯ អាកាសយានដ្ឋានអន្តរជាតិភ្នំពេញ នាថ្ងៃនេះ នៅពេលលោកត្រៀមចូលរួមកិច្ចប្រជុំកំពូលអាស៊ាន ជាមួយនឹងដៃគូសហការ។

លោក បៃដិន មកកាន់ កម្ពុជា បន្ទាប់ពីបានចូលរួមសន្នសីទកំពូលស្ដីពីអាកាសធាតុ COP27 នៅ អេហ្ស៊ីប។ នៅ ភ្នំពេញ លោក បៃដិន នឹងចូលរួមកិច្ចប្រជុំកំពូលអាស៊ាន និងដៃគូពាក់ព័ន្ធ ក៏ដូចជា ជួបពិភាក្សាការងារជាមួយមេដឹកនាំរបស់ កម្ពុជា ជប៉ុន និង កូរ៉េខាងត្បូង។

«ប្រធានាធិបតី បៃដិន នឹងសង្កត់ធ្ងន់ទៅលើជំនួយរបស់ សហរដ្ឋអាម៉េរិក ចំពោះរចនាសម្ព័ន្ធតំបន់ដែលដឹកនាំដោយ អាស៊ាន និងពិភាក្សាអំពីបណ្ដាឱកាសដើម្បីធានានូវ តំបន់ឥណ្ឌូ-ប៉ាស៊ីនហ្វិក មួយដែលប្រកបដោយសេរីភាព បើកចំហ ផ្សារភ្ជាប់ រុងរឿង សុវត្ថិភាព និងបត់បែនជាងមុន» ទីប្រឹក្សាសន្តិសុខជាតិអាម៉េរិក Jake Sullivan ថ្លែងក្នុងសន្និសីទសារព័ត៌មានរបស់ សេតវិមាន កាលពីថ្ងៃទី 10 វិច្ឆិកា។

ក្រោយពីចាកចេញពី កម្ពុជា លោក បៃដិន នឹងធ្វើដំណើរទៅកាន់ Bali ប្រទេសឥណ្ឌូណេស៊ី ដើម្បីចូលរួមកិច្ចប្រជុំកំពូល G20 ជាទីដែលលោកគ្រោងនឹងជួបពិភាក្សាជាមួយ ប្រធានាធិបតីចិន លោក ស៊ី ជីនពីង។

កម្ពុជា កំពុងធ្វើជាម្ចាស់ផ្ទះនៃ កិច្ចប្រជុំកំពូលអាស៊ានលើកទី 40 និង 41 រួមនឹងកិច្ចប្រជុំពាក់ព័ន្ធ ជាមួយនឹងដៃគូសហការ ក្នុងនោះមាន សហរដ្ឋអាម៉េរិក ផងដែរ។

កិច្ចប្រជុំកំពូលអាស៊ានលើកទី 40 និង 41 រួមនឹងកិច្ចប្រជុំពាក់ព័ន្ធ ត្រូវបានធ្វើឡើងក្នុងគ្រាដែលស្ថានការណ៍សន្តិសុខ សេដ្ឋកិច្ចក្នុងតំបន់ និងពិភពលោក កំពុងមានភាពស្មុគស្មាញ ដែលត្រូវការក្រុមមេដឹកនាំរបស់ អាស៊ាន និងពិភពលោក ចូលរួមពិភាក្សា រកដំណោះស្រាយដើម្បីអាចស្ដារសេដ្ឋកិច្ច និងបណ្ដាវិបត្តិបច្ចុប្បន្ន ឱ្យបានឆាប់រហ័ស៕

November 12, 2022

អ្នកត្រូវឆ្នោតរង្វាន់ពិសេសតម្លៃជាង 2 ពាន់លានដុល្លារអាម៉េរិក អាចទទួលបានតែជាង 600 លានប៉ុណ្ណោះ

ម្ចាស់រង្វាន់ពិសេសតម្លៃ 2.04 ពាន់លានដុល្លារអាម៉េរិក ដែលបានត្រូវឆ្នោតនៅ សហរដ្ឋអាម៉េរិក អាចទទួលបានប្រាក់តែជាង 620 លានដុល្លារប៉ុណ្ណោះ ក្រោយពីបានបង់ពន្ធទៅតាមការកំណត់។

គេហទំព័ររបស់ Powerball កាលពីថ្ងៃទី 08 វិច្ឆិកា 2022 បានប្រកាសអំពីសន្លឹកឆ្នោតដែលត្រូវរង្វាន់ធំបំផុតក្នុងប្រវត្តិសាស្ត្រ តម្លៃ 2.04 ពាន់លានដុល្លារអាម៉េរិក ដែលត្រូវបានលក់ដោយហាងទំនិញ Joe នៅ Altadena រដ្ឋ California បញ្ចប់ការចេញឆ្នោត 40 លើកដែលមិនមានអ្នកត្រូវ។ ម្ចាស់សន្លឹកឆ្នោតដែលត្រូវរង្វាន់ពិសេសនេះ មិនទាន់ទាក់ទងមកកាន់ Powerball ដើម្បីទទួលប្រាក់រង្វាន់នៅឡើយ។

អ្នកត្រូវឆ្នោតខាងលើអាចជ្រើសរើសការទទួលប្រាក់រង្វាន់សរុបម្ដង 997.6 លានដុល្លារ ឬទទួល 2.04 ពាន់លានដុល្លារក្នុងរយៈពេល 29 ឆ្នាំ។ ក៏ប៉ុន្តែ ទាំងនេះមិនមែនជាទឹកប្រាក់ពិតប្រាកដដែលពួកគេត្រូវទទួលបានឡើយ។

ក្នុងករណីទទួលប្រាក់រង្វាន់សរុបម្ដង (997.6 លានដុល្លារ) អ្នកត្រូវឆ្នោតនឹងត្រូវបង់ពន្ធ 24% ដែលប្រហែលនឹង 239.4 លានដុល្លារ។ ដូច្នេះ ប្រាក់រង្វាន់ពិតដែលអ្នកត្រូវឆ្នោតទទួលបានគឺ 758.2 លានដុល្លារ នេះបើតាម Forbes។

ក៏ប៉ុន្តែ ដោយទទួលបានប្រាក់រង្វាន់ខាងលើ អ្នកត្រូវឆ្នោតនឹងត្រូវបានបញ្ចូលទៅក្នុងប្រភេទពលរដ្ឋដែលមានប្រាក់ចំណូលខ្ពស់ និងត្រូវបង់ពន្ធឡើងដល់ 37% នៃប្រាក់រង្វាន់ 997.6 លានដុល្លារ ឬ 13% ស្មើនឹង 129.7 លានដុល្លារនៃប្រាក់រង្វាន់ 758.2 លានដុល្លារ ឱ្យបានមុនថ្ងៃទី 15 មេសា 2023។

ម្ចាស់រង្វាន់ពិសេសតម្លៃ 2.04 ពាន់លានដុល្លារអាម៉េរិក ដែលបានត្រូវឆ្នោតនៅ សហរដ្ឋអាម៉េរិក អាចទទួលបានប្រាក់តែជាង 620 លានដុល្លារប៉ុណ្ណោះ ក្រោយពីបានបង់ពន្ធទៅតាមការកំណត់នានារបស់រដ្ឋ។

ទន្ទឹមនឹងបណ្ដាពន្ធខាងលើ អ្នកត្រូវឆ្នោតក៏ត្រូវបង់ពន្ធលើប្រាក់ចំណូលទៅតាមរដ្ឋដែលពួកគេរស់នៅផងដែរ។ រដ្ឋ California យកពន្ធលើប្រាក់ចំណូល 13.3% ប៉ុន្តែ សំណាងល្អ រដ្ឋនេះមិនយកពន្ធលើប្រាក់រង្វាន់ឆ្នោត។ បើសិនជាត្រូវបង់ពន្ធនេះទៀត អ្នកត្រូវឆ្នោតខាងលើនឹងអស់ប្រាក់ 132.7 លានដុល្លារបន្ថែមទៀត៕

November 11, 2022

បណ្ដាប្រទេសអាស៊ាន (ASEAN) គាំទ្រការដាក់បញ្ចូល ទីម័រខាងកើត ជាសមាជិកថ្មី

នៅក្នុងសន្និសីទកំពូលអាស៊ាន (ASEAN) លើកទី 40 មេដឹកនាំបណ្ដាប្រទេសក្នុង សមាគមប្រជាជាតិអាស៊ីអាគ្នេយ៍ (អាស៊ាន/ASEAN) បានគាំទ្រគោលការណ៍ស្ដីពីការបញ្ចូល ប្រទេសទីម័រខាងកើត (Timor Leste) ជាសមាជិកទី 11។

ក្នុង សន្និសីទកំពូលអាស៊ាន (ASEAN) លើកទី 40 ដែលកំពុងប្រព្រឹត្តទៅនៅ កម្ពុជា ថ្ងៃនេះ មេដឹកនាំបណ្ដាប្រទេសអាស៊ាន បានអនុម័តលើសេចក្ដីប្រកាសអំពីការសុំចូលជាសមាជិកអាស៊ាន របស់ ទីម័រខាងកើត និងគាំទ្រគោលការណ៍បញ្ចូលប្រទេសនេះជាសមាជិកទី 11 ព្រមទាំងប្រគល់តួនាទីជាអ្នកសង្កេតការណ៍ដល់ប្រទេសនេះ។

ក្រុមមេដឹកនាំអាស៊ាន ក៏បានប្រគល់ការងារកសាងដំណើរការបញ្ចូល ទីម័រខាងកើត ជាសមាជិក ទៅឱ្យ ក្រុមប្រឹក្សាសម្របសម្រួល ដើម្បីដាក់សំណើឡើងទៅកាន់ សន្និសីទកំពូលអាស៊ានលើកទី 42 ដើម្បីធ្វើការពិនិត្យ និងសម្រេច។

សន្និសីទកំពូលអាស៊ានលើកទី 40 នេះ ក៏បានសម្រេចតែងតាំងលោក កៅ គឹមហួន ជា អគ្គលេខាធិការអាស៊ាន សម្រាប់អាណត្តិ 2023-2027 ផងដែរ។

ទីម័រខាងកើត បានស្នើសុំចូលជាសមាជិកអាស៊ាន តាំងតែពី 10 ឆ្នាំមុន ប៉ុន្តែ ការទទួលយកប្រទេសនេះជាសមាជិក គឺត្រូវការការយល់ព្រមពីសមាជិកទាំងអស់របស់ អាស៊ាន៕

November 11, 2022

គម្រោង «មជ្ឈមណ្ឌលភស្តុភារកម្មពហុបំណងភ្នំពេញ» ត្រូវបានដាក់បង្ហាញជាផ្លូវការ

គម្រោង «មជ្ឈមណ្ឌលភស្តុភារកម្មពហុបំណងភ្នំពេញ» – MULTI-MODAL PHNOM PENH LOGISTICS COMPLEX (PPLC) ដែលជាចំណុចតភ្ជាប់ដ៏សំខាន់សម្រាប់ពាណិជ្ជកម្មក្នុងតំបន់ និងចូលរួមក្នុងការពង្រឹងសេដ្ឋកិច្ចប្រទេសកម្ពុជា ត្រូវបានដាក់បង្ហាញរូបរាងជាផ្លូវការ នៅក្នុងអំឡុងកិច្ចប្រជុំកំពូលអាស៊ាន លើកទី 40 និង 41 នេះបើតាមការប្រកាសរបស់ ក្រសួងសាធារណការ និងដឹកជញ្ជូន។

ការដាក់បង្ហាញគម្រោងខាងលើនេះ ត្រូវបានធ្វើឡើងនៅថ្ងៃទី 11 វិច្ឆិកា ឆ្នាំ 2022 នៅសណ្ឋាគាររ៉េស៊ីដង់សុខា ភ្នំពេញ ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន រួមជាមួយនឹងឯកឧត្តមបណ្ឌិត Vivian Balakrishnan រដ្ឋមន្ត្រីក្រសួងការបរទេស នៃសាធារណរដ្ឋសិង្ហបុរី ក៏ដូចជាភាគីពាក់ព័ន្ធ។

គម្រោងមជ្ឈមណ្ឌលភស្តុភារកម្មពហុបំណងភ្នំពេញ PPLC ត្រូវបានសិក្សាដោយក្រុមហ៊ុន YCH Group ដែលជាក្រុមហ៊ុនផ្តល់សេវាដឹកជញ្ជូន និងការផ្គត់ផ្គង់សេវាកម្មជាចង្កោមដ៏ធំបំផុតនៅក្នុងតំបន់អាស៊ី។ ការដាក់បង្ហាញនេះធ្វើឡើងបន្ទាប់ពីការចុះហត្ថលេខាលើកិច្ចព្រមព្រៀងក្របខ័ណ្ឌរវាងក្រសួងសាធារណការ និងដឹកជញ្ជូន នៃព្រះរាជាណាចក្រកម្ពុជា ជាមួយនឹងក្រុមហ៊ុន YCH Group កាលពីខែមីនា 2021។

«គម្រោងមជ្ឈមណ្ឌលភស្តុភារកម្មពហុបំណងភ្នំពេញ PPLC ត្រូវបានចាត់ជាអាទិភាពទៅក្នុងផែនការមេថ្នាក់ជាតិលើវិស័យដឹកជញ្ជូន និងភស្តុភារកម្ម ឆ្នាំ 2022-2030» នេះបើតាមឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន។

ការដាក់បង្ហាញគម្រោង PPLC ជាផ្លូវការនាឱកាសនេះ គឺឆ្លុះបញ្ចាំងអំពីការជំរុញលើកចិត្តការវិនិយោគរវាងវិនិយោគិនបរទេស និងវិនិយោគិនក្នុងស្រុក និងការពង្រឹងការតភ្ជាប់លើវិស័យដឹកជញ្ជូន និងភស្តុភារកម្ម ក្នុងក្របខណ្ឌមហាអនុតំបន់មេគង្គ (GMS) អាស៊ាន និងពិភពលោក។ល។

November 11, 2022

Category: សង្គម និងសេដ្ឋកិច្ច