សង្គម និងសេដ្ឋកិច្ច - La Reine Media

រថយន្តអគ្គិសនីដែលមានសុវត្ថិភាពជាង Model S របស់ Tesla ទៅទៀត (វីដេអូធ្វើតេស្ត)

នៅក្នុងការសាកល្បងថ្មីបំផុតរបស់ Euro NCAP គេឃើញថា រថយន្តដើរដោយអគ្គិសនីទាំងស្រុង Hyundai Ioniq 6 ដែលត្រៀមបង្ហាញខ្លួនក្នុងទីផ្សារ មិនត្រឹមតែបានទទួលចំណាត់ថ្នាក់ផ្កាយ 5 នោះទេ ប៉ុន្តែក៏បានបង្កើតស្ដង់ដាសម្រាប់ម៉ូដែលរថយន្តដែលយោងទៅលើថ្នាល E-GMP។

យោងតាមរបាយការណ៍របស់ Euro NCAP រថយន្តអគ្គិសនី Hyundai Ioniq 6 អាចការពារមនុស្សពេញវ័យដល់កម្រិតមួយដែលស្ទើរតែឥតខ្ជោះ ពោលគឺពិន្ទុរបស់វាឡើងដល់ 97%។ ប្រការនេះគឺល្អជាង Tesla Model S (94%) និងស្មើនឹង Tesla Model Y (97%)។

សមត្ថភាពក្នុងការការពារកូនក្មេងក្នុងរថយន្តរបស់ Hyundai Ioniq 6 ក៏ល្អប្រសើរ ដោយទទួលបានពិន្ទុកម្រិត 87% ដែលអត្រានេះស្មើនឹង Tesla Model Y។

Hyundai Ioniq 6 ទទួលបានពិន្ទុស្ដីពីជំនួយសុវត្ថិភាព 90% (ទាបជាង 8% ធៀបនឹង Tesla Model S) ខណៈដែលសមត្ថភាពការពារអ្នកឆ្លងកាត់ផ្លូវគឺ 66%។

បើប្រៀបធៀប Hyundai Ioniq 6 ជាមួយនឹងបណ្ដារថយន្តអគ្គិសនីដែលយោងទៅតាមថ្នាល E-GMP ដទៃទៀតរបស់ Hyundai យើងឃើញថា Hyundai Ioniq 6 ល្អជាង Hyundai Ioniq 5 (សាកល្បងកាលពីឆ្នាំ 2021), Kia EV6 (សាកល្បងឆ្នាំ 2022) និង Genesis GV60 (សាកល្បងឆ្នាំ 2022)៕

រថយន្តដើរដោយអគ្គិសនីទាំងស្រុង Hyundai Ioniq 6

រថយន្តដើរដោយអគ្គិសនីទាំងស្រុង Hyundai Ioniq 6 កំពុងធ្វើតេស្តផ្នែកការពារសុវត្ថិភាព

November 17, 2022

កាតា ច្រានចោលការចោទប្រកាន់ដែលថា «ជួលមនុស្សមកគាំទ្រ World Cup Qatar 2022»

អាជ្ញាធរកាតា បានបដិសេធចំពោះការចោទប្រកាន់ដែលថា ប្រទេសនេះបានជួលមនុស្សមកធ្វើជាអ្នកគាំទ្រក្នុងព្រឹត្តិការណ៍ World Cup 2022 បន្ទាប់ពីវីដេអូមួយដែលបានចែករំលែកលើបណ្ដាញសង្គមបង្ហាញថា ជនជាតិឥណ្ឌា មួយក្រុមអបអរសាទរ ក្រុមជម្រើសជាតិអង់គ្លេស។

«អ្នកគាំទ្រមកពីគ្រប់ទិសទីក្នុងពិភពលោក រួមចំណែកបង្កើតបានជាបរិយាកាសអ៊ូអរនៅក្នុងស្រុកនាពេលថ្មីៗនេះ មនុស្សជាច្រើនក្នុងចំណោមពួកគេបានចាត់ទុក កាតា ជាផ្ទះ។ ពួកគេធ្វើការហែក្បួនពាសពេញផ្ទៃប្រទេស និងទទួលអំណរបណ្ដាក្រុមជម្រើសជាតិដែលបានមកកាន់សណ្ឋាគារ» គណៈកម្មការកំពូលកាតា 2022 ដែលជាស្ថាប័នចាត់ចែងព្រឹត្តិការណ៍ World Cup នៅ កាតា បានប្រកាសដូច្នេះកាលពីថ្ងៃទី 16 វិច្ឆិកា។

«អ្នកសារព័ត៌មាន និងអ្នកវិភាគមួយចំនួននៅលើបណ្ដាញសង្គម មានមន្ទិលថា តើពួកគេពិតជាអ្នកគាំទ្រមែន ឬមិនមែន។ យើងខ្ញុំសូមបដិសេធទាំងស្រុងចំពោះការចោទប្រកាន់ដែលគួរឱ្យអស់សង្ឃឹម និងមិនមានអ្វីដែលគួរឱ្យភ្ញាក់ផ្អើលនេះ»។

គណៈកម្មការកំពូល World Cup Qatar ប្រកាសដូច្នេះបន្ទាប់ពីវីដេអូមួយដែលត្រូវបានចែករំលែកតៗគ្នាលើបណ្ដាញសង្គម បង្ហាញថា មានអ្នកគាំទ្រជាជនជាតិឥណ្ឌា រាប់រយនាក់នៅ កាតា នាំគ្នាចេញអបអរសាទរដល់ ក្រុមជម្រើសជាតិអង់គ្លេស នៅពេលក្រុមនេះមកដល់សណ្ឋាគារកាលពីថ្ងៃទី 15 វិច្ឆិកា។

World Cup 2022 នឹងត្រូវបានធ្វើឡើងនៅ ប្រទេសកាតា ចាប់ពីថ្ងៃទី 20 វិច្ឆិកាដល់ 18 ធ្នូ 2022។ ការប្រកួតដំបូងរវាងក្រុមម្ចាស់ផ្ទះកាតា និង អេក្វាទ័រ នឹងប្រព្រឹត្តិទៅនៅថ្ងៃទី 20 វិច្ឆិកា បន្ទាប់ពីពិធីបើកការប្រកួតនៅទីលាន Al Bayt ជាកន្លែងដែលអាចផ្ទុកមនុស្សបាន 60,000 នាក់៕

November 17, 2022

រើសបានមូលប្បទានបត្រតម្លៃជិត 5 លានដុល្លារអាម៉េរិក តែត្រូវបានអរគុណដោយស្ករគ្រាប់ 6 កញ្ចប់

(អាល្លឺម៉ង់)-បុរសម្នាក់រើសបានមូលប្បទានបត្រតម្លៃ 4.8 លានដុល្លារអាម៉េរិក របស់ក្រុមហ៊ុនផលិតស្ករគ្រាប់ល្បីឈ្មោះមួយ ប៉ុន្តែទទួលបានស្ករគ្រាប់តែ 6 កញ្ចប់សម្រាប់ជាការដឹកគុណ បន្ទាប់ពីបានធ្វើតាមការណែនាំរបស់ក្រុមហ៊ុននេះ។

Anouar G អាយុ 38 ឆ្នាំ រស់នៅក្នុងតំបន់ Frankfurt ប្រទេសអាល្លឺម៉ង់ រើសបានសែកមួយសន្លឹកនៅឯស្ថានីយរថភ្លើងមួយនៅពេលទៅសួរសុខទុក្ខម្ដាយ នេះបើតាម Insider ចុះផ្សាយនាថ្ងៃនេះ។ ពេលអានអក្សរ គាត់ភ្ញាក់ផ្អើលណាស់ ដោយសារតែមូលប្បទានបត្រនេះមានតម្លៃរហូតដល់ 4,631,538.8 អឺរ៉ូ (ប្រហែលនឹង 4.8 លានដុល្លារអាម៉េរិក)។

សែកមួយសន្លឹកនេះត្រូវបានផ្សារទំនើប Rewe ផ្ញើទៅឱ្យក្រុមហ៊ុនផលិតស្ករគ្រាប់ទន់ Haribo របស់ អាល្លឺម៉ង់ តាមរយៈធនាគារ DZ Bank។

នៅពេល Anouar ទាក់ទងទៅកាន់ Haribo មេធាវីរបស់ក្រុមហ៊ុននេះក៏បានស្នើឱ្យគាត់កម្ទេចសែកនេះចោល និងថតរូបផ្ញើឱ្យពួកគេដើម្បីជាភស្ដុតាង។

ប៉ុន្មានថ្ងៃក្រោយមក Anouar ក៏បានទទួលអំណោយមួយប្រអប់ ក្នុងនោះមានស្ករគ្រាប់ 6 កញ្ចប់ ដើម្បីជាការដឹងគុណ។

ក្រុមហ៊ុនផលិតស្ករគ្រាប់ខាងលើបានបញ្ជាក់ថា ពិតជាមានហេតុការណ៍នេះ និងបានអះអាងថា «ដោយសារតែនេះគឺជាសែកដែលមានឈ្មោះ ដូច្នេះមានតែក្រុមហ៊ុនទើបមានសិទ្ធិប្ដូរជាប្រាក់។ ចំណែកស្ករគ្រាប់ 6 កញ្ចប់នេះគឺជាអំណោយស្ដង់ដាដែលយើងខ្ញុំតែងតែផ្ញើ»។

ហេតុការណ៍នេះបាននាំឱ្យមានមតិចម្រូងចម្រាសជាច្រើននៅក្នុងបណ្ដាញសង្គម។ អ្នកខ្លះថា «ខ្ញុំនឹងចូលទៅកាន់ធនាគារ ហើយប្រាប់ថា ខ្ញុំគឺជាលោក Haribo បើសិនជាគាត់នេះ»។ អ្នកខ្លះក៏សរសេរថា «គ្រប់គ្នាធ្វើដូចការដកប្រាក់ពីសែកតម្លៃ 4.8 លានដុល្លារអាម៉េរិក ជារឿងងាយស្រួលអីចឹង»។

Haribo គឺជាក្រុមហ៊ុនផលិតស្ករគ្រាប់ធំបំផុតនៅ អឺរ៉ុប ដែលជាកម្មសិទ្ធិរបស់គ្រួសារ Riegel។ ក្រុមហ៊ុននេះត្រូវបានគេចាត់ទុកថា ជាយីហោមួយដែលងាយស្រួលចំណាំបំផុតក្នុងពិភពលោក។ ប្រាក់ចំណូលសរុបរបស់ Haribo ប្រហែល 2.9 ពាន់លានដុល្លារអាម៉េរិក/ឆ្នាំ៕

November 17, 2022

គម្រោងផ្លូវរថភ្លើងក្នុងក្រុងដំបូងរបស់ទីក្រុងធំជាងគេនៅវៀតណាម នឹងដាក់ឱ្យប្រើប្រាស់នៅឆ្នាំក្រោយ

(ទីក្រុងហូជីមិញ)-កម្មកររាប់សិបនាក់កំពុងតែដំឡើងកញ្ចក់សុវត្ថិភាព Tempered glass ចំនួន 85 ផ្ទាំង សម្រាប់ដំបូលអណ្ដូងកម្ពស់ 6 ម៉ែត្រ របស់ស្ថានីយរថភ្លើងក្នុងក្រុងកំណាត់ផ្លូវដែក Line 1 ដែលជាផ្លូវរថភ្លើងក្នុងក្រុងដំបូងនៅ ទីក្រុងហូជីមិញ (ព្រៃនគរ)។

ស្ថាបត្យកម្មនៃដំបូលអណ្ដូងរបស់ស្ថានីយនេះគឺជាចំណុចពិសេសដែលជានិមិត្តរូបរបស់ស្ថានីយក្រោមដីនេះ ក៏ដូចជារបស់កំណាត់ផ្លូវដែក Metro លេខ 1 (Line 1)។

អណ្ដូងដំបូលកញ្ចក់នេះនឹងផ្ដល់ពន្លឺសម្រាប់ផ្នែកខាងក្រោមរបស់ស្ថានីយរថភ្លើង និងបង្កើតបានជាលំហ ជួយឱ្យអ្នកដំណើរអាចមើលឃើញផ្សារធំនៅក្បែរនោះ។

អណ្ដូងក្រោមដីដែលជាស្ថានីយរថភ្លើងស្ថិតក្នុងគម្រោង Line 1 នេះ មានរូបរាងមូល កម្ពស់ 6 ម៉ែត្រ និងមានអង្កត់ផ្ចិត 21.6 ម៉ែត្រ មានដំបូលធ្វើអំពីកញ្ចក់ សុវត្ថិភាព tempered glass ចំនួន 85 ផ្ទាំង ដែលមួយផ្ទាំងៗមានទម្ងន់ 245 គីឡូក្រាម និងត្រូវបាននាំចូលពី ប្រទេសជប៉ុន។

ស្ថានីយក្រោមដីខាងលើនេះមានបណ្ដោយ 236 ម៉ែត្រ, ទទឹង 60 ម៉ែត្រ, ជម្រៅប្រហែល 32 ម៉ែត្រ និងមាន 4 ជាន់។ នេះគឺជាចំណុចតភ្ជាប់រវាងខ្សែរថភ្លើងនានានៅក្នុងទីក្រុងហូជីមិញ ដែលជាទីក្រុងធំជាងគេនៅ ប្រទេសវៀតណាម។ ទីនេះក៏មានមជ្ឈមណ្ឌលពាណិជ្ជកម្មមួយដែលមានទំហំ 45,000 ម៉ែត្រក្រឡា។

កំណាត់ផ្លូវ Metro លេខ 1 គឺជាគម្រោងផ្លូវដែកក្នុងក្រុងដំបូងនៅ ទីក្រុងហូជីមិញ និងមានប្រវែងជិត 20 គីឡូម៉ែត្រ។ គម្រោងដែលមានទុនវិនិយោគសរុបជិត 44 ទ្រីលានដុង (ប្រហែល 1.76 ពាន់លានដុល្លារអាម៉េរិក) នេះ គ្រោងនឹងបើកដំណើរការពាណិជ្ជកម្មចាប់ពីត្រីមាសទី 4 នៃឆ្នាំ 2023៕

November 17, 2022

កម្ពុជា ទទួលបានទេសចរជាង 2.7 លាននាក់ ដែលដើរកំសាន្តនៅក្នុងសប្តាហ៍ទីពីរនៃខែវិច្ឆិកា

ទេសចរទូទាំងប្រទេសមានចំនួន 2,724,491 នាក់ ក្នុងនោះភ្ញៀវជាតិជាង 2.6 លាន នាក់ និងភ្ញៀវបរទេសផ្ទៃក្នុងចំនួនជិត 58,000 នាក់ បានចេញដើរកំសាន្តក្នុងសប្ដាហ៍ទី 2 ចាប់ពីថ្ងៃទី 7 ដល់ 13 វិច្ឆិកា 2022 នេះបើតាម ក្រសួងទេសចរណ៍កម្ពុជា ប្រកាសនាថ្ងៃនេះ។

យោងតាមក្រសួងខាងលើ បណ្ដាគោលដៅទេសចរណ៍ដែលទទួលបានភ្ញៀវច្រើនជាងគេ រួមមាន ខេត្តព្រះសីហនុ, ខេត្តកំពត, ខេត្តសៀមរាប, ខេត្តកំពង់ស្ពឺ, ខេត្តត្បូងឃ្មុំ, ខេត្តបាត់ដំបង និង ខេត្តកែប។

នាឱកាសថ្ងៃឈប់រយៈពេល 3 ថ្ងៃនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ត្រូវនឹងថ្ងៃទី 7-9 វិច្ឆិកា នៅទូទាំងប្រទេសទទួលបានភ្ញៀវសរុបជាង 2.5 លាននាក់ ក្នុងនោះភាគច្រើនជាភ្ញៀវជាតិ។

November 16, 2022

តំបន់ដែលព្រះអាទិត្យស្ទើរតែ «មិនដែលលិច» ក្នុងរដូវក្ដៅ នៅលើពិភពលោក

បើសិនជាមួយថ្ងៃព្រះអាទិត្យមិនលិច តើនឹងមានសភាពយ៉ាងណា? ប្រជាជនដែលរស់នៅក្នុងតំបន់មួយចំនួនដែលស្ថិតនៅក្បែរប៉ូលរបស់ផែនដី នឹងឃើញថា ព្រះអាទិត្យហាក់មិនបាន «ចូលគេង» នៅរដូវក្ដៅ។ កាណាដា ស៊ុយអែត ឬ ន័រវែស ជាដើម គឺជាប្រទេសមានតំបន់ដែលព្រះទិនករ «ហាក់មិនចេះចូលនិទ្រា»។

បាតុភូតនេះកើតឡើងដោយសារផែនដីទ្រេតនៅលើអ័ក្សរបស់វាប្រហែលជិត 23 អង្សា។ នៅតាមបណ្ដាប៉ូលខាងជើង និងខាងត្បូង ព្រះអាទិត្យហាក់រះ និងលិចតែម្ដងគត់នៅក្នុងមួយឆ្នាំ។

ខាងក្រោមនេះគឺជាបណ្ដាតំបន់ដែលស្ទើរតែមិនចេះមានយប់ ៖

ប្រទេសស៊ុយអែត

ទិដ្ឋភាពពាក់កណ្ដាលយប់ក្នុងតំបន់ខ្លះនៅ ស៊ុយអែត

ក្នុងអំឡុងពេលពីដើមខែឧសភា រហូតដល់ចុងខែសីហា នៅ ប្រទេសស៊ុយអែត ព្រះអាទិត្យតែងតែលិចនៅពាក់កណ្ដាលយប់ និងចាប់ផ្ដើមរះឡើងនៅវេលាម៉ោង 4 កន្លះទៀបភ្លឺ។ ចាប់ពីខែឧសភាដល់ខែមិថុនា តំបន់ជាច្រើនរបស់ ប្រទេសស៊ុយអែត ទទួលបានកម្ដៅថ្ងៃច្រើននៅពេលរសៀល ហើយព្រះអាទិត្យរៀបលិចនៅពាក់កណ្ដាលយប់។

ប្រទេសន័រវែស

ក្នុងបណ្ដាខែនៅរដូវក្ដៅ ចាប់ពីចុងខែឧសភាដល់ខែកក្កដា ព្រះអាទិត្យមិនដែលចុះទាបជាងជើងមេឃនៅតំបន់ភាគខាងជើងជុំវិញប៉ូលខាងជើងរបស់ផែនដី។ ពាក់កណ្ដាលប្រទេសន័រវែស មានពន្លឺថ្ងៃ 20 ម៉ោង ដូច្នេះ បើចង់ធ្វើការថែមម៉ោងដើម្បីរកប្រាក់បានច្រើន នោះ ន័រវែស គឺជាគោលដៅល្អ។

ប្រទេសអ៊ីស្លង់

នេះគឺជាប្រទេសដែលមានទិដ្ឋភាពសម្បូរបែប និងស្រស់ស្អាត ជាទីដែលអ្នកអាចទស្សនាជ្រោះទឹកធ្លាក់ ភ្នំភ្លើង ទន្លេទឹកកក ឬខ្សែទឹកបាញ់ចេញពីដីជាដើម។ល។

ប្រទេសកាណាដា

ជាប្រទេសធំជាងគេទីពីរក្នុងពិភពលោក កាណាដា ក៏មានតំបន់ជាច្រើនដែលស្ថិតក្រោមទឹកកក និងព្រឹលក្នុងរយៈពេលច្រើនឆ្នាំជាប់ៗគ្នា។ តំបន់ដូចជា Inuvik និងតំបន់ភាគពាយព្យប្រទេស ព្រះអាទិត្យសំកាំងកាយលើមេឃ 50 ថ្ងៃនៅរដូវក្ដៅ។

នៅពាក់កណ្ដាលរដូវក្ដៅ ព្រះអាទិត្យនៅតំបន់ Whitehorse ចែងចាំងពន្លឺ 19 ម៉ោង និង 09 នាទីជារៀងរាល់ថ្ងៃ។ នៅ Inuvik និង Northwest Territories របស់ កាណាដា ព្រះអាទិត្យបញ្ចេញពន្លឺពេញ 24 ម៉ោង/ថ្ងៃ ដោយ «មិនខ្ចីលិច»។

តំបន់ Alaska របស់ សហរដ្ឋអាម៉េរិក

ចាប់ពីចុងខែឧសភាដល់ចុងខែកក្កដា រៀងរាល់ឆ្នាំ ព្រះអាទិត្យនៅ Alaska នឹងមិនលិចជាដាច់ខាត។ ប៉ុន្តែ ដើម្បីបានដល់ថ្ងៃដ៏ស្រស់ស្រាយនេះ Alaska ក៏ត្រូវឆ្លងកាត់ភាពងងឹតអស់ជាច្រើនខែបន្តបន្ទាប់ ជាមួយនឹងអាកាសធាតុចុះត្រជាក់ស្ទើរដាច់ស្លឹកត្រចៀកនៅរដូវរងា៕

November 16, 2022

Shakira «រាជនីចម្រៀង World Cup» នឹងច្រៀងនៅ កាតា ក្នុងថ្ងៃសម្ពោធបើកការប្រកួត

តារាចម្រៀងស្រី នាង Shakira ត្រូវបានគេដាក់ឈ្មោះឱ្យថា «រាជនីចម្រៀង World Cup» ជាមួយនឹងបទចម្រៀងដ៏ល្បីល្បាញ «Hips don’t lie Bamboo», «Waka Waka» និង «La la la»។

តារាចម្រៀងស្រីរូបនេះនឹងច្រៀងនៅក្នុងពិធីបើកការប្រកួត World Cup 2022 នៅទីលានប្រកួត Al Bayt របស់ ប្រទេសកាតា នៅថ្ងៃទី 20 វិច្ឆិកា 2022 ខាងមុខ។ យោងតាមទំព័រសារព័ត៌មាន Musicmundial ស្ថាប័ន FIFA បានអញ្ជើញ Shakira មកច្រៀង ដោយសារតែបណ្ដាបទចម្រៀងដែល FIFA បានបញ្ចេញកន្លងមក មិនទទួលបានជោគជ័យដូចការរំពឹងទុក។

Hayya Hayya (Better Together) ជាបទចម្រៀងដែលច្រៀងដោយ Trinidad Cardona, Davido និង Aisha មានអ្នកចូលមើលតែ 29 លានលើក (16 វិច្ឆិកា 2022) បន្ទាប់ពីបានបង្ហោះលើបណ្ដាញ Youtube រយៈពេល 7 ខែ ហើយ FIFA ក៏ទទួលបានការស្នើឱ្យប្រើប្រាស់បទ Waka Waka របស់ Shakira ឡើងវិញ។

យោងតាម Billboard តារាចម្រៀង Shakari បានបង្ហាញអំពីឥទ្ធិពលជាមួយនឹង World Cup តាមរយៈបទចម្រៀងជានិមិត្តរូបមួយចំនួនដែលតារាចម្រៀងក្រោយៗពិបាកយកឈ្នះ។ ទំព័រសារព័ត៌មាន Rolling Stone យល់ថា រូបមន្តជោគជ័យនៅក្នុងផលិតផលរបស់ Shakira គឺ ចង្វាក់ភ្លេងបែប catchy tune ដ៏គគ្រឹកគគ្រេង ស៊ិចស៊ី រួមនឹងភាពល្បីល្បាញរបស់នាង។

Shakari ចាប់ផ្ដើមភ្ជាប់ទំនាក់ទំនងជាមួយនឹង World Cup ចាប់ពីឆ្នាំ 2006 ជាមួយនឹងបទ Hips don’t lie/Bamboo។ ខុសពីបទចម្រៀងដែលបានជ្រើសរើសជាផ្លូវការរបស់ឆ្នាំនោះ The time of our lives របស់ Shakari បានធ្វើឱ្យកក្រើកបរិយាកាសនៅទីលានប្រកួតរបស់ ប្រទេសអាល្លឺម៉ង់ នាពេលនោះ។

ក្នុងកិច្ចសម្ភាសមួយ Shakari បានឱ្យដឹងថា បទចម្រៀង The time of our lives ខាងលើត្រូវបានដាក់ឈ្មោះដែលមានទំនាក់ទំនងជាមួយនឹងការជជែកគ្នាលេងរបស់នាងជាមួយនឹងតារាចម្រៀងដទៃ។ នាងបកស្រាយថា «ចង្កេះរបស់ខ្ញុំនឹងមិនដែលនិយាយកុហក់ឡើយ។ បើសិនវាមិនគ្រលែង គឺមានន័យថា បទភ្លេងនេះមិនទាន់បានល្អត្រឹមត្រូវ»។

Shakra បានច្រៀង និងសម្ដែងបទ Hips don’t lie នៅក្នុងពិធីបើកការប្រកួត World Cup 2006 នៅ Munich និងមុនការប្រកួតចុងក្រោយនៅ បែរឡាំង ហើយទាក់ទាញការចូលមើលបាន 500 លាននាក់នៅលើ Youtube និង 700 លាននាក់មើលតាមទូរទស្សន៍កាលណោះ។ ឆ្នាំ 2021 Time Out New York បានចាត់ Hips don’t lie ទៅក្នុងចំណាត់ថ្នាក់ទី 11 ស្ដីពីបទចម្រៀងប៉ប់ដែលពីរោះ និងអស្ចារ្យជាងគេក្នុងប្រវត្តិសាស្ត្រ។

បួនឆ្នាំក្រោយមក Shakira ក៏បានច្រៀងបទចម្រៀងផ្លូវការ Waka Waka របស់ World Cup នៅ អាហ្វ្រិកខាងត្បូង។ មនុស្សជាច្រើននៅ អាហ្វ្រិក យល់ថា ការជ្រើសរើស Shakira គឺជារឿងមិនសមស្រប ហើយនាងគួរតែទុកឱកាសនេះឱ្យតារាចម្រៀងក្នុងស្រុក។ ប៉ុន្តែ ភាពទាក់ទាញរបស់ Waka Waka បានបញ្ជាក់ថា ការជ្រើសរើស Shakira គឺជារឿងត្រឹមត្រូវបំផុត។

ចំណែកបទ La la la របស់ World Cup 2014 នៅ ប្រេស៊ីល ដែលជាបទទីពីររបស់រដូវកាល និងត្រូវបានច្រៀងដោយ Shakira ក៏មិនអន់ឡើយ៕

November 16, 2022

ក្រុមហ៊ុន Foxconn សហការជាមួយក្រុមហ៊ុនប្រេងសាំងថៃ ផលិតរថយន្តអគ្គិសនីនៅខេត្ត Chonburi

ក្រុមហ៊ុនចិនតៃវ៉ាន់ Foxconn កំពុងពង្រីកការផលិតរថយន្តអគ្គិសនីនៅ ប្រទេសថៃ ដែលមានសមត្ថភាពអាចផលិតឡើងដល់ 150,000 គ្រឿងជារៀងរាល់ឆ្នាំ។

Foxconn បានសម្ពោធការដ្ឋានសាងសង់រោងចក្រផលិតរថយន្តអគ្គិសនីនៅ ប្រទេសថៃ ដែលជាផ្នែកមួយនៃការបណ្ដាក់ទុនរួមជាមួយនឹងក្រុមហ៊ុនប្រេងសាំង PTT។ រោងចក្រនេះគ្រោងនឹងដំណើរការចាប់ពីឆ្នាំ 2024 ជាមួយនឹងសមត្ថភាពផលិត 50,000 គ្រឿង/ឆ្នាំក្នុងដំណាក់កាលដំបូង និងឡើងដល់ 150,000 គ្រឿងក្នុងដំណាក់បន្ទាប់។

ក្រុមហ៊ុនបណ្ដាក់ទុនរួមនេះត្រូវបានបង្កើតឡើងកាលពីឆ្នាំមុនដែលមានឈ្មោះថា Horizon Plus ហើយនឹងសាងសង់រោងចក្រតម្លៃប្រហែល 1 ពាន់លានដុល្លារអាម៉េរិក នៅក្នុងតំបន់ឧស្សាហកម្ម Rojana Nhongyai ក្នុងខេត្ត Chonburi។

ក្រុមហ៊ុនខាងលើប្រកាសថា បណ្ដារថយន្តអគ្គិសនីដែលផលិតដោយរោងចក្ររបស់ពួកគេនៅ Chonburi ភាគច្រើននឹងត្រូវបានផ្គត់ផ្គង់ក្នុងតំបន់ អាស៊ីអាគ្នេយ៍៕

November 15, 2022

វិស័យទេសចរណ៍របស់កោះ Bali សង្ឃឹមថានឹងងើបឡើងវិញនៅក្នុងកិច្ចប្រជុំកំពូល G20

នៅពេលចំណាប់អារម្មណ៍របស់ពិភពលោកបាញ់ឆ្ពោះទៅរកកិច្ចប្រជុំកំពូល G20 នៅ Bali ដែលមានការចូលរួមរបស់មេដឹកនាំរាប់សិបរូបមកពីបណ្ដាប្រទេសអ្នកមានៗនៅជុំវិញពិភពលោក វិស័យទេសចរណ៍នៅកោះនេះក៏កំពុងត្រូវបានរំពឹងថា នឹងងើបឡើងវិញ។

កោះ Bali គឺជាទីរស់នៅរបស់ប្រជាជនជាង 4 លាននាក់ដែលរកប្រាក់ចំណូលសំខាន់បានពីវិស័យទេសចរណ៍។ មុនពេលវិបត្តិកូវីដ-19 កើតឡើង កោះ Bali បានទទួលភ្ញៀវបរទេសជាង 6.2 លាននាក់ជារៀងរាល់ឆ្នាំ។

ក៏ប៉ុន្តែ នៅពេលកូវីដ-19 ករណីដំបូងត្រូវបានរកឃើញនៅ ឥណ្ឌូណេស៊ី កាលពីខែមីនា 2020 ស្ថានភាពបានប្រែប្រួលទាំងស្រុង។ ភ្ញៀវបរទេសមកកាន់កោះ Bali ថយចុះមកនៅត្រឹម 1 លាននាក់ក្នុងឆ្នាំ 2020 នេះបើតាម Reuters។ មកដល់ឆ្នាំ 2021 តួលេខនេះបានថយចុះមកនៅត្រឹមតែប៉ុន្មានសិបនាក់ប៉ុណ្ណោះ។

ដោយសារតែមិនមានភ្ញៀវ ហាងទំនិញ ភោជនីយដ្ឋាន និងតំបន់លំហែកាយក៏ត្រូវបានបិទទ្វារជាបន្តបន្ទាប់ ខណៈដែលពលរដ្ឋជាង 92,000 នាក់ដែលរស់ដោយសារវិស័យទេសចរណ៍ក៏ត្រូវបាត់បង់ការងារ និងត្រូវរកការងារថ្មី។

សេដ្ឋកិច្ចរបស់កោះ Bali ក៏ធ្លាក់ចុះជាបន្តបន្ទាប់ ក្នុងនោះ កំណើនក្នុងឆ្នាំ 2020 ស្មើនឹង 9.3% ក្រោមសូន្យ ធៀបនឹងឆ្នាំ 2019 ហើយបន្តធ្លាក់ដល់ 2.5% ក្រោមសូន្យនៅឆ្នាំ 2021។

ក៏ប៉ុន្តែ អំឡុងចុងឆ្នាំ 2022 ស្ថានភាពទំនងជាអាចនឹងប្រសើរឡើងវិញបន្តិច។ គិតត្រឹមខែតុលាកន្លងទៅ ភ្ញៀវបរទេសជាង 1.5 លាននាក់ និងភ្ញៀវក្នុងប្រទេសជាង 3.1 លាននាក់ បានមកលេងកោះ Bali។

មេដឹកនាំកោះ Bali លោក Dewa Made Indra បានឱ្យដឹងថា ការដែលព្រលានយន្តហោះអន្តរជាតិ Bali បើកដំណើរការឡើងវិញ បូករួមនឹងការដែលភ្ញៀវរាប់ពាន់នាក់មកចូលរួមកិច្ចប្រជុំ G20 និងកិច្ចប្រជុំពាក់ព័ន្ធ ត្រូវបានរំពឹងថា នឹងអាចជួយដល់លើកស្ទួយសេដ្ឋកិច្ចតំបន់នេះបានមួយកម្រិតធំ៕

November 14, 2022

បុរសដែលមានជំនាញក្នុងការផលិត «ពានមាស» សម្រាប់ World Cup

ចាប់តាំងពីឆ្នាំ 2014 ឱ្យតែជិតដល់រដូវកាល World Cup លោក ង្វៀន វ៉ាន់ តាម (Nguyen Van Tam) នៅ ទីក្រុងហូជីមិញ (ព្រៃនគរ) ប្រទេសវៀតណាម ក៏បើកកន្លែងច្នៃចម្លងពាន «World Cup FIFA» សម្រាប់លក់ឱ្យអតិថិជនយកទៅធ្វើជាអំណោយអនុស្សាវរីយ៍។

ជំហានដំបូងគឺត្រូវចាក់ពុម្ពដោយប្រើប្រាស់ជ័រ composite និងធាតុគីមីដទៃមួយចំនួនទៀត ទៅតាមរូបមន្តដោយឡែក។ «ពិបាកបំផុតគឺការធ្វើពុម្ព ព្រោះថាវាកំណត់អំពីរូបរាងរបស់ផលិតផល។ ខ្ញុំត្រូវស្រាវជ្រាវទៅលើរូបរបស់ពានដែលថតពីគ្រប់ជ្រុងដើម្បីធ្វើតាម។ រដូវកាល World Cup នីមួយៗ ខ្ញុំត្រូវធ្វើពុម្ពផ្សេងៗគ្នា» លោក ង្វៀន វ៉ាន់ តាម ប្រាប់ដូច្នេះ។

កាលពីថ្ងៃទី 11 តុលា នៅក្នុងរោងសិប្បកម្មទំហំប្រហែល 50 ម៉ែត្រក្រឡា លោក តាម និងបុគ្គលិកពីរនាក់ទៀត នាំគ្នាធ្វើពាន។ លោក តាម វ័យ 59 ឆ្នាំ បានឱ្យដឹងថា «ខ្ញុំមានបំណងធ្វើពាន World Cup នេះតាំងពីទសវត្សរ៍ឆ្នាំ 1990 ប៉ុន្តែ រហូតដល់ឆ្នាំ 2014 ទើបមានឱកាសធ្វើ»។

ក្រោយរយៈពេលប្រហែល 10 នាទីដែលទុកឱ្យសមាសធាតុចុះត្រជាក់ និងរឹង ពុម្ពក៏ត្រូវបានបើកចេញ។ ដោយសារមានពុម្ពតែមួយ ហើយរាល់ដំណាក់កាលត្រូវធ្វើដោយដៃ ដូច្នេះក្នុងមួយថ្ងៃពួកគេអាចចាក់ពុម្ពពានបានត្រឹមតែជិត 10 ប៉ុណ្ណោះ។

ក្រោយពីបើកពុម្ព ពួកគេយកក្រដាសខាត់ សម្អាតពាន មុនពេលលាបថ្នាំ គូររូប និងពាសមាស។ មាសសុទ្ធប្រភេទសន្លឹកត្រូវបានពាសពេញផ្ទៃរបស់ពាន ដែលទាំងអស់ប្រហែលពី 40 ទៅ 50 សន្លឹក។ កិច្ចការនេះអាចចំណាយពេលប្រហែល 90 នាទី។

ម្ចាស់សិប្បកម្មខាងលើបានឱ្យដឹងថា «សិប្បកម្មនេះអាចពាសប្រភេទមាសទៅតាមការស្នើរបស់អតិថិជន»។

ផលិតផលនេះមានរូបរាងប្រហាក់ប្រហែលនឹងពាន World Cup ពិត ដោយវាមានកម្ពស់ 36.5 សម, ទទឹងធំបំផុត 13 សម ប៉ុន្តែមានទម្ងន់ស្រាលជាង ពោលគឺប្រហែល 1.5 គីឡូក្រាម។

ពានចម្លងរបស់សិប្បកម្មលោក តាម មានតម្លៃប្រហែល 1 លានដុង (40.5 ដុល្លារអាម៉េរិក) អាស្រ័យទៅលើតម្លៃរបស់មាសដែលយកមកពាស។ មកដល់បច្ចុប្បន្ន សិប្បកម្មនេះបានផលិតពាន World Cup ប្រហែល 50 រួចទៅហើយ។ ក្នុងរដូវកាល World Cup 2022 នេះ លោក តាម មានគម្រោងផលិតឱ្យបាន 500 ពាន។

World Cup 2022 ដែលមានក្រុមបាល់ទាត់ 32 ក្រុមចូលរួម នឹងធ្វើការប្រកួតនៅ ប្រទេសកាតា ចាប់ពីថ្ងៃទី 20 វិច្ឆិកា ដល់ 18 ធ្នូ 2022។ ឆ្នាំនេះ World Cup នឹងប្រកួតក្នុងរយៈពេល 29 ថ្ងៃ មិនមែន 32 ថ្ងៃដូចកាលពីមុន។ នេះក៏ជាលើកទីមួយហើយដែល World Cup ត្រូវបានធ្វើឡើងក្នុងរដូវរងា ដោយសារតែទឹកដីរបស់ប្រទេសម្ចាស់ផ្ទះមានអាកាសធាតុក្ដៅខ្លាំងនៅរដូវក្ដៅ៕

November 14, 2022

Category: សង្គម និងសេដ្ឋកិច្ច