សង្គម និងសេដ្ឋកិច្ច - La Reine Media

ធនាគារពិភពលោក ៖ កម្ពុជា មានសន្ទស្សន៍ភាពចាស់ទុំនៃបច្ចេកវិទ្យារដ្ឋាភិបាល «ល្អជាងមុន»

«អបអរសាទរដល់ ព្រះរាជាណាចក្រកម្ពុជា ដែលទទួលបានសន្ទស្សន៍ភាពចាស់ទុំនៃបច្ចេកវិទ្យារដ្ឋាភិបាល (GovTech Maturity Index — GTMI) កើនឡើងពីកម្រិត C កាលពីឆ្នាំ 2020 មកកម្រិត B នៅចុងឆ្នាំ 2022 នេះ» នេះបើតាមការឱ្យដឹងរបស់ ក្រសួងសេដ្ឋកិច្ច និងហិរញ្ញវត្ថុកម្ពុជា។

យោងតាមក្រសួងខាងលើ ថ្មីៗនេះ ធនាគារពិភពលោក បានបង្ហាញរបាយការណ៍ស្តីពីសន្ទស្សន៍ភាពចាស់ទុំនៃបច្ចេកវិទ្យារដ្ឋាភិបាល (GovTech Maturity Index—GTMI) ឆ្នាំ 2022 សម្រាប់ធ្វើការវាស់វែងលើការធ្វើបរិវត្តកម្មឌីជីថល នៅក្នុងរដ្ឋាភិបាល នៅតាមប្រទេសនីមួយ។

សន្ទស្សន៍ GTMI គឺជាការបន្សំនៃអនុសន្ទស្សន៍ 4 ទៀតគឺ 1-សន្ទស្សន៍នៃប្រព័ន្ធស្នូលរបស់រដ្ឋាភិបាល (Core Government Systems Index – CGSI), 2-សន្ទស្សន៍ការផ្តល់សេវាសាធារណៈ (Public Service Delivery Index – PSDI), 3-សន្ទស្សន៍ការចូលរួមរបស់ប្រជាពលរដ្ឋ (Citizen Engagement Index – CEI), និង 4-សន្ទស្សន៍បច្ចេកវិទ្យារដ្ឋាភិបាលជំរុញ (GovTech Enablers Index – GTEI)។

នៅក្នុងតំបន់អាស៊ីអាគ្នេយ៍ ប្រទេសដែលទទួលបានកម្រិត A មាន សិង្ហបុរី, ថៃ, ម៉ាឡេស៊ី, និង ឥណ្ឌូនេស៊ី, កម្រិត B មាន កម្ពុជា, វៀតណាម, ប្រ៊ុយណេ និងហ្វីលីពិន ខណៈកម្រិត C មាន ឡាវ និងកម្រិត D មាន មីយ៉ាន់ម៉ា៕

November 19, 2022

សហគ្រាសអាស៊ី នាំគ្នាបង្ហាញខ្លួន «ច្រើនមិនធ្លាប់មានពីមុន» នៅក្នុងព្រឹត្តិការណ៍ World Cup Qatar 2022

បណ្ដាក្រុមហ៊ុនអាស៊ី បានចំណាយប្រាក់យ៉ាងច្រើនដើម្បីយកឈ្នះលើក្រុមម្ចាស់ឧបត្ថម្ភរបស់លោកខាងលិចនៅក្នុងរដូវកាលប្រកួតបាល់ទាត់ពិភពលោក (World Cup) ដែលជិតធ្វើឡើងនៅ ប្រទេសកាតា។

ទ្វីបអាស៊ី ពីមុនមក មិនធ្លាប់បានបង្ហាញវត្តមានច្រើនដូចនៅ World Cup លើកនេះ ទាំងក្នុង និងក្រៅទីលានបាល់ទាត់។ ក្រុមបាល់ទាត់ 6 ក្រុមរបស់ អាស៊ី ក្នុងចំណោម 32 ក្រុម នឹងប្រកួតនៅ World Cup 2022 ដែលនេះគឺជាតួលេខច្រើនជាងពេលណាៗទាំងអស់។ ចំណែកនៅក្រៅទីលានប្រកួត បណ្ដាក្រុមហ៊ុនរបស់ អាស៊ី មានរហូតដល់ 9 ស្ថាប័ន ក្នុងចំណោមដៃគូសហការ និងម្ចាស់ឧបត្ថម្ភទាំង 14 ស្ថាប័នរបស់ FIFA នារដូវកាលនេះ។

នេះគឺជាការប្រែប្រួលធំធៀបនឹង World Cup នៅ អាស៊ី ដែល ជប៉ុន និង កូរ៉េខាងត្បូង ធ្វើជាម្ចាស់ផ្ទះ កាលពី 20 ឆ្នាំមុន។ កាលណោះមានតែម្ចាស់ឧបត្ថម្ភ 6 ស្ថាប័នប៉ុណ្ណោះដែលជារបស់ អាស៊ី ក្នុងចំណោមម្ចាស់ឧបត្ថម្ភ 15 ស្ថាប័នរបស់ FIFA។ ក្រៅពីនេះគឺសុទ្ធតែជាក្រុមហ៊ុនរបស់ អឺរ៉ុប និង សហរដ្ឋអាម៉េរិក។

ការឧបត្ថម្ភគឺជាបញ្ហាសំខាន់សម្រាប់ FIFA។ បន្ទាប់ពីការលក់អាជ្ញាប័ណ្ណផ្សាយបន្តផ្ទាល់តាមទូរទស្សន៍ (2.6 ពាន់លានដុល្លារ) ការឧបត្ថម្ភគឺប្រភពចំណូលធំបំផុត ដោយរួមចំណែករហូតដល់ 1.35 ពាន់លានដុល្លារ ប្រហែល 29% នៃប្រាក់ចំណូលសរុបរបស់ FIFA ក្នុងឆ្នាំ 2022។

ក្នុងចំណោមក្រុមហ៊ុនដែលជាម្ចាស់ឧបត្ថម្ភធំៗនៅ World Cup 2022 ក៏មានក្រុមហ៊ុនធុរកិច្ចថ្មីផ្នែកអប់រំរបស់ ឥណ្ឌា Byju’s បើទោះប្រទេសនេះមិនមានក្រុមបាល់ទាត់ទៅចូលរួមប្រកួត។ ដូចគ្នានេះដែរ ចិន ក៏មិនមានក្រុមបាល់ទាត់ទៅប្រកួតនៅ World Cup ប៉ុន្តែមានម្ចាស់ឧបត្ថម្ភរហូតដល់ 4 ស្ថាប័ន ខណៈដែល សិង្ហបុរី មាន 1 ស្ថាប័ន។

កូរ៉េខាងត្បូង មានក្រុមបាល់ទាត់នៅ World Cup និងមានម្ចាស់ឧបត្ថម្ភចំនួន 1 ស្ថាប័ន គឺ Hyundai-Kia។ ចំណែក ប្រទេសម្ចាស់ផ្ទះ កាតា មានម្ចាស់ឧបត្ថម្ភចំនួន 2។

បណ្ដាក្រុមបាល់ទាត់របស់ អាស៊ី ដែលចូលរួមប្រកួតនៅ World Cup លើកនេះ នៅតែមានចំនួនតិច ក៏ប៉ុន្តែ ក្រុមម្ចាស់ឧបត្ថម្ភដែលមកពីទ្វីបនេះ ត្រូវបានគេសង្ឃឹមថា នឹងមានឥទ្ធិពលភាគច្រើនទៅលើទស្សនិកជន ទាំងនៅក្នុងទីផ្សារក្នុងស្រុក និងអន្តរជាតិ៕

November 19, 2022

កប៉ាល់ផ្គត់ផ្គង់ឧស្ម័នធម្មជាតិរាវ (LNG) ធំជាងគេលើពិភពលោក ត្រូវបានដាក់ឱ្យដំណើរការសេវាកម្ម

ប្រទេសចិន កាលពីថ្ងៃទី 15 វិច្ឆិកា បានដាក់ដំណើរការកប៉ាល់ដឹកជញ្ជូនឧស្ម័នធម្មជាតិរាវ (LNG) ខ្នាតយក្សមួយគ្រឿងដែលអាចផ្គត់ផ្គង់ LNG បាន 1,650 ម៉ែត្រគុប/ម៉ោង។

កប៉ាល់ដឹកជញ្ជូន និងផ្គត់ផ្គង់ឧស្ម័នធម្មជាតិរាវដំបូងរបស់ ប្រទេសចិន ឈ្មោះ Offshore Oil 301 ត្រូវបានធ្វើឱ្យប្រសើរឡើង និងបញ្ចេញពីរោងចក្រនៅទីក្រុង Guangzhou ខេត្ត Guangdong ដើម្បីចាប់ផ្ដើមផ្គត់ផ្គង់ថាមពលឱ្យបណ្ដាកប៉ាល់ដើរដោយ LNG នេះបើតាមក្រុមហ៊ុនប្រេងឧស្ម័នលើលំហសមុទ្រចិន (CNOOC)។

កប៉ាល់ផ្គត់ផ្គង់ LNG គឺជាប្រភេទកប៉ាល់ចល័តដ៏សំខាន់ក្នុងការជំរុញការប្រើប្រាស់ LNG ជាថាមពលសម្រាប់យានយន្តក្នុងការដឹកជញ្ជូន។

ក្រុមអ្នកជំនាញអះអាងថា ការរីកចម្រើនថ្មីបំផុតនេះរបស់ ចិន នឹងដើរតួនាទីយ៉ាងសកម្មក្នុងការកសាងមជ្ឈមណ្ឌលផ្គត់ផ្គង់ LNG ដល់បណ្ដាកប៉ាល់អន្តរជាតិ ព្រមទាំងជំរុញការផ្លាស់ប្ដូរថាមពល និងការអភិវឌ្ឍថាមពលបៃតង។

កប៉ាល់ Offshore Oil 301 ដំបូងឡើយគឺជាកប៉ាល់ដឹក LNG ធម្មតា មានបណ្ដោយ 184.7 ម៉ែត្រ និងទទឹង 28.1 ម៉ែត្រ អាចដឹកឧស្ម័នធម្មជាតិរាវ LNG បាន 30,000 ម៉ែត្រគុប។

មុខងារផ្គត់ផ្គង់ LNG ត្រូវបានធ្វើឱ្យប្រសើរឡើងតាមរយៈការបន្ថែមឧបករណ៍ជាច្រើនដូចជា ឧបករណ៍ផ្ទុកឧស្ម័ន ប្រព័ន្ធផ្គត់ផ្គង់ (បូម) ពីកប៉ាល់ទៅកប៉ាល់ និងឧបករណ៍ធ្វើឱ្យរាវឡើងវិញ ក៏ដូចជាប្រព័ន្ធសុវត្ថិភាព និងប្រព័ន្ធផ្សេងៗទៀត។

ក្រោយពីត្រូវបានធ្វើឱ្យប្រសើរឡើង Offshore Oil 301 មានកម្លាំងអាចបូមឧស្ម័នបាន 1,650 ម៉ែត្រគុប/ម៉ោង នាំឱ្យវាក្លាយជាកប៉ាល់ផ្គត់ផ្គង់ឧស្ម័នធម្មជាតិរាវ LNG ធំជាងគេបង្អស់លើពិភពលោក និងអាចផ្ដល់សេវាកម្មដល់បណ្ដាកប៉ាល់ដឹកកុងតឺន័រ កប៉ាល់ដឹកប្រេងឆៅ និងកប៉ាល់ដឹកជញ្ជូនយានយន្ត (Ro-Ro Ship) ខ្នាតធំ។

យោងតាម Global Times ក្រុមហ៊ុនចិន CNOOC កំពុងញាប់ដៃញាប់ជើងក្នុងការស្ថាបនាបណ្ដាមជ្ឈមណ្ឌលផ្គត់ផ្គង់ LNG អន្តរជាតិនៅតំបន់វាលរាបទន្លេ Zhu Jiang និងវាលរាបទន្លេ Yangtze។ ក្រោយពីត្រូវបានប្រគល់ឱ្យអតិថិជន កប៉ាល់ Offshore Oil 301 នឹងផ្គត់ផ្គង់ LNG ដំបូងដល់បណ្ដាកប៉ាល់អន្តរជាតិក្នុងពេលឆាប់ៗខាងមុខ៕

November 19, 2022

ក្រុមហ៊ុនរថយន្តអគ្គិសនវៀតណាម ទទួលបានជំនួយពី អូស្ត្រាលី ក្នុងការផលិត និងដំឡើងបណ្ដាញបញ្ចូលថាមពលថ្មនៅប្រទេសជាប់របងកម្ពុជា

យោងតាម ស្ថានទូតអូស្ត្រាលីនៅវៀតណាម ទឹកប្រាក់ជំនួយរាប់សិបលានដុល្លារអាម៉េរិក ដែល រដ្ឋាភិបាលអូស្ត្រាលី ផ្ដល់ឱ្យ នឹងត្រូវបានក្រុមហ៊ុនផលិតរថយន្តអគ្គិសនីរបស់ វៀតណាម VinFast ប្រើប្រាស់សម្រាប់ការផលិតរថយន្តក្រុងអគ្គិសនីសាធារណៈ និងបណ្ដាញបញ្ចូលថាមពលថ្មដំបូងសម្រាប់រថយន្តអគ្គិសនីនៅ វៀតណាម។

ខ្ទង់ប្រាក់ជំនួយ 50 លានដុល្លារអាម៉េរិកខាងលើនេះ គឺជាការវិនិយោគទីពីររបស់ ការិយាល័យហិរញ្ញវត្ថុនាំចេញអូស្ត្រាលី (EFA) សម្រាប់វិស័យថាមពលកកើតឡើងវិញនៅ វៀតណាម។ មុននោះ EFA បានផ្ដល់ជំនួយលើកដំបូងតម្លៃ 32 លានដុល្លារអាម៉េរិក សម្រាប់ស្ថានីយផលិតអគ្គិសនីពីកម្លាំងខ្យល់ចំនួន 3 កន្លែងនៅប្រទេសជាប់របងកម្ពុជាមួយនេះ។

VinFast គឺជាក្រុមហ៊ុនបុត្រសម្ព័ន្ធរបស់ Vingroup នៅ ប្រទេសវៀតណាម។ ក្រោយពីបានប្រកាសឈប់លក់យានយន្តចំហេះក្នុង ក្រុមហ៊ុន VinFast ក៏បានក្លាយជាអ្នកផលិតរថយន្ត និងម៉ូតូដើរដោយថាមពលអគ្គិសនី 100%៕

យោងតាម ឯកអគ្គរដ្ឋទូតអូស្ត្រាលីនៅវៀតណាម លោក Andrew Goledzinowski

រថយន្តក្រុងអគ្គិសនីផលិតដោយក្រុមហ៊ុនវៀតណាម VinFast

ប្រព័ន្ធបញ្ចូលថាមពលថ្មសម្រាប់រថយន្តអគ្គិសនីរបស់ VinFast

រថយន្តក្រុងអគ្គិសនី VinFast បើកបរសាកល្បងនៅ វៀតណាម

November 18, 2022

ក្រុមហ៊ុនកូរ៉េខាងត្បូង បោះទុនរាប់ពាន់លានដុល្លារលើគម្រោងអភិវឌ្ឍតំបន់លំហែកាយមួយនៅប្រទេសឡាវ

ថ្មីៗនេះ ក្រសួងសន្តិសុខសាធារណៈឡាវ ទើបតែបានចុះកិច្ចព្រមព្រៀងជាមួយនឹងក្រុមហ៊ុនមួយរបស់ កូរ៉េខាងត្បូង ដើម្បីស្ថាបនាតំបន់លំហែកាយមួយដែលមានតម្លៃ 2.9 ពាន់លានដុល្លារអាម៉េរិក។

កិច្ចព្រមព្រៀងលើគម្រោងដែលមានឈ្មោះថា Resort Lao Complex នេះ ត្រូវបានចុះហត្ថលេខាដោយឧត្តមសេនីយទោ Thongsouk Yaeulaoly អគ្គនាយកស្តីទីនៃនាយកដ្ឋានភស្តុភារ ក្រសួងសន្តិសុខសាធារណៈឡាវ និងលោក Jeong Taejin ប្រធានក្រុមហ៊ុន Oriental Pearl។

តំបន់លំហែកាយដែលមានទំហំ 1,200 ហិកតានេះ ស្ថិតនៅក្នុងស្រុក Phonhong ខេត្តវៀងចន្ទន៍ ភាគពាយព្យប្រទេសឡាវ។

មុននោះ ភាគីឡាវ និងក្រុមហ៊ុន Oriental Pearl បានចុះហត្ថលេខាលើអនុស្សារណៈនៃការយោគយល់មួយកាលពីខែកុម្ភៈ 2016 ដែលអនុញ្ញាតឱ្យចាប់ផ្ដើមការសិក្សាអំពីសក្ដានុពលរបស់គម្រោងនេះ។

ក្រោយពីការសិក្សាបានបញ្ចប់ គម្រោងនេះក៏ទទួលបានការអនុញ្ញាតពីរដ្ឋាភិបាលឡាវ ក្នុងការចាប់ផ្ដើមដំណើរការអភិវឌ្ឍ។

November 18, 2022

ស្ថាបនិករបស់ក្រុមហ៊ុនរចនាម៉ូដសម្លៀកបំពាក់ Tom Ford ក្លាយជាមហាសេដ្ឋី

ក្រោយពីមានការទិញដូរជាមួយក្រុមហ៊ុន Estee Lauder លោក Tom Ford ក៏ទើបតែមាននាមថ្មីមួយទៀត នោះគឺ «មហាសេដ្ឋី» ទន្ទឹមនឹងនាមជា «អ្នករចនាម៉ូដ», «អ្នកដឹកនាំសម្ដែង» និង «នាយកផ្នែកច្នៃប្រឌិត (Creative Director)។

ក្រុមហ៊ុនផលិតគ្រឿងសម្អាង Estee Lauder បានចំណាយប្រាក់ 2.8 ពាន់លានដុល្លារអាម៉េរិក ដើម្បីទិញយកក្រុមហ៊ុនច្នៃម៉ូដសម្លៀកបំពាក់ Tom Ford កាលពីថ្ងៃទី 16 វិច្ឆិកា 2022។ យោងតាម Bloomberg Billionaires Index ការទិញដូរនេះបានជួយឱ្យទ្រព្យសម្បត្តិរបស់អ្នកច្នៃម៉ូដ Tom Ford ឡើងដល់ជាង 2 ពាន់លានដុល្លារដោយសារកាន់កាប់ភាគហ៊ុនភាគច្រើននៅក្នុងក្រុមហ៊ុននេះ។

លោក Tom Ford វ័យ 61 ឆ្នាំ បានឱ្យដឹងថា លោកជឿជាក់ថា Estee Lauder នឹងបន្តអភិវឌ្ឍ Tom Ford នាពេលខាងមុខ។ លោក Ford នៅតែបន្តទទួលខុសត្រូវក្នុងផ្នែកច្នៃប្រឌិតសម្រាប់យីហោនេះរហូតដល់ដាច់ឆ្នាំ 2023។

Tom Ford បង្កើតក្រុមហ៊ុនដែលដាក់ឈ្មោះយីហោទៅតាមឈ្មោះរបស់គាត់កាលពីឆ្នាំ 2014 ដោយសហការជាមួយនឹងនាយកប្រតិបត្តិរបស់ Gucci លោក Domenico De Sole។ ដំបូងឡើយ Tom Ford ផ្ដោតទៅលើការអភិវឌ្ឍទឹកអប់ និងគ្រឿងសម្អាង ប៉ុន្តែក្រោយមកក៏បានផលិតវ៉ែតា និងសម្លៀកបំពាក់បុរសប្រភេទប្រណិត។

មហាសេដ្ឋី Tom Ford និងតារាចម្រៀង Jennifer Lopez

មុននោះ លោក Ford ធ្វើជាប្រធានផ្នែកច្នៃប្រឌិតនៅក្នុងក្រុមហ៊ុន Gucci ប៉ុន្តែបានចាកចេញពីក្រុមហ៊ុននេះនៅពេល Gucci ត្រូវបានលក់ទៅឱ្យ ក្រុមហ៊ុនបារាំង Kering ព្រោះតែបារម្ភថា ម្ចាស់ថ្មីនឹងគ្រប់គ្រងលើគំនិតច្នៃប្រឌិតរបស់គាត់។

លោក Ford ក៏ធ្លាក់ជាអ្នកសម្ដែង និងបង្កើតក្រុមហ៊ុនផលិតភាពយន្ត ក្នុងនោះគាត់សរសេររឿង និងដឹកនាំការសម្ដែង។ ក្រៅពីនេះ Tom Ford ក៏ជាអ្នកនិពន្ធសៀវភៅស្ដីពីម៉ូដែលសម្លៀកបំពាក់ផងដែរ៕

November 18, 2022

ព្រះបរមរាជវាំង នឹងបើកទទួលទេសចរឡើងវិញ ចាប់ពីថ្ងៃទី 01 ធ្នូ 2022

ក្រសួងព្រះបរមរាជវាំង នឹងបើកដំណើរការឡើងវិញ ទទួលទេសចរជាតិ-អន្តរជាតិ ចូលទស្សនាព្រះបរមរាជវាំង ចាប់ពីថ្ងៃទី 01 ខែធ្នូ តទៅ នេះបើតាម សេចក្ដីជូនដំណឹងរបស់ សម្ដេចចៅហ្វាវាំង គង់ សំអុល ចុះថ្ងៃទី 17 វិច្ឆិកា 2022។

យោងតាមសេចក្ដីជូនដំណឹង ការសម្រេចនេះត្រូវបានធ្វើឡើងដោយយោងទៅតាមព្រះរាជតម្រិះរបស់ ព្រះមហាក្សត្រកម្ពុជា និងព្រះវររាជមាតា ជាទីគោរពសក្ការះដ៏ខ្ពស់ខ្ពស់ ក៏ដូចជាយោងទៅលើលិខិតរបស់ ក្រសួងទេសចរណ៍កម្ពុជា។

ព័ត៌មានលម្អិត សូមអានសេចក្ដីជូនដំណឹងរបស់ ព្រះបរមរាជវាំង ដូចខាងក្រោម ៖

November 18, 2022

អគារស្នាក់នៅខ្ពស់ជាងគេលើពិភពលោក ត្រូវបានបើកការដ្ឋានសាងសង់ក្នុងសប្ដាហ៍នេះ

(អារ៉ាប់រួម)-អគារស្នាក់នៅកម្ពស់ជាង 100 ជាន់ដែលមានរចនាបថមកុដពេជ្ររាងស្ដើង ត្រូវបានចាប់ផ្ដើមសាងសង់នៅ ឌូបៃ របស់ អេមីរ៉ាតអារ៉ាប់រួម (UAE)។

ក្រុមហ៊ុនអភិវឌ្ឍអចលនទ្រព្យ Binghatti របស់ UAE សហការជាមួយក្រុមហ៊ុនផលិតគ្រឿងអលង្ការប្រណិត Jacob & Co ដើម្បីសាងសង់ស្ថាបត្យកម្មថ្មីនៅតំបន់ Business Bay ក្នុងទីក្រុង ឌូបៃ ដែលគ្រោងនឹងក្លាយជាអគារស្នាក់នៅខ្ពស់ជាងគេបង្អស់លើពិភពលោក ក្រោយពីស្ថាបនារួចរាល់ នេះបើតាម Design Boom ចុះផ្សាយកាលពីថ្ងៃទី 17 វិច្ឆិកា។

នាយកប្រតិបត្តិរបស់ Binghatti លោក Muhammad Binghatti និងប្រធានក្រុមហ៊ុន Jacob & Co លោក Jacob Arabo បានទៅដល់ទីតាំងគម្រោង និងប្រកាសបើកការដ្ឋានសាងសង់អគារនេះកាលពីថ្ងៃទី 15 វិច្ឆិកា 2022។

អគារដែលមានឈ្មោះថា Burj Binghatti Jacob & Co Residences មានជាង 100 ជាន់ ប៉ុន្តែកម្ពស់ពិតប្រាកដមិនទាន់ត្រូវបានបង្ហើបឱ្យដឹងនៅឡើយ។ ចំណែកអគារស្នាក់នៅដែលមានកម្ពស់ខ្ពស់ជាងគេបង្អស់លើពិភពលោកនាបច្ចុប្បន្នគឺ Central Park Tower ដែលមាន 98 ជាន់។ Central Park Tower ស្ថិតនៅក្នុងទីក្រុង New York សហរដ្ឋអាម៉េរិក មានកម្ពស់ 472.4 ម៉ែត្រ។

រូបភាពស្ដីពីរចនាបថរបស់ Burj Binghatti Jacob & Co Residences មានរូបរាងស្ដើង ហើយកំពូលរបស់វាគឺជាស្ថាបត្យកម្មដែលស្រដៀងនឹងមកុដដាំត្បូងពេជ្រ៕

November 18, 2022

អ៊ីឡុន ម៉ាស (Elon Musk) ប្រកាសថា មិនចង់ធ្វើជា CEO របស់ក្រុមហ៊ុនណាទាំងអស់

«និយាយដោយស្មោះ ខ្ញុំមិនចង់ធ្វើជា CEO របស់ក្រុមហ៊ុនណាទាំងអស់» សម្ដីមួយឃ្លានេះរបស់មហាសេដ្ឋី អ៊ីឡុន ម៉ាស ដែលជាអ្នកមានទ្រព្យច្រើនជាងគេលើពិភពលោក ត្រូវបានលើកឡើងនៅក្នុងតុលាការ Chancery កាលពីពេលថ្មីៗនេះ។

The Verge បានរាយការណ៍ថា លោក ម៉ាស ទើបតែបានបង្ហាញវត្តមាននៅតុលាការ Chancery ក្នុងរដ្ឋ Delaware សហរដ្ឋអាម៉េរិក ដើម្បីបកស្រាយអំពីកញ្ចប់រង្វាន់ធំសម្រាប់តំណែង CEO របស់ Tesla។ សវនាការបានចាប់ផ្ដើមពីម្សិលមិញ ដើម្បីបញ្ជាក់ឱ្យបានច្បាស់ថា តើក្រុមប្រឹក្សាភិបាលរបស់ Tesla មានសកម្មភាពសមស្របមុនពេលអនុម័តលើកញ្ចប់រង្វាន់តម្លៃប្រហែល 52 លានដុល្លារសម្រាប់លោក ម៉ាស ឬទេ ហើយថា តើលោក ម៉ាស បានបញ្ចេញឥទ្ធិពលទៅលើការសម្រេចនេះដែរ ឬយ៉ាងណា?

អ្វីដែលគួរឱ្យចាប់អារម្មណ៍គឺថា នៅក្នុងសវនាការនេះ លោក ម៉ាស បានរៀបរាប់ថា «និយាយដោយស្មោះ ខ្ញុំមិនចង់ធ្វើជា CEO របស់ក្រុមហ៊ុនណាទាំងអស់»។

យោងតាម The Verge លោក ម៉ាស បានបកស្រាយនូវមូលហេតុដែលនាំឱ្យគាត់មានអារម្មណ៍ពិបាកទ្រាំជាមួយនឹងតំណែងនេះ។ លោក ម៉ាស ក៏បាននិយាយថា «ខ្ញុំគិតថា នឹងកាត់បន្ថយពេលវេលានៅ Twitter និងរកនាយកប្រតិបត្តិម្នាក់មកជំនួស»។

លោក ម៉ាស ថែមទាំងគិតដល់ការលាលែងពីតំណែង CEO របស់ Tesla ទៀតផង នេះបើតាម James Murdoch អតីតសមាជិកក្រុមប្រឹក្សាភិបាលរបស់ Tesla៕

November 17, 2022

កម្ពុជា ឈ្នះពានរង្វាន់ «អង្ករល្អជាងគេលើពិភពលោក» ប្រចាំឆ្នាំ 2022

«ពិតជាកិត្តិយសសម្រាប់ប្រទេសកម្ពុជា និងមោទកភាពរបស់ប្រជាជនខ្មែរ ដែលអង្ករកម្ពុជាបានឈ្នះពានរង្វាន់ «អង្ករល្អផ្តាច់គេលើពិភពលោក» សាជាថ្មី (លើកទី 5) នៅក្នុងវេទិកាសន្និសីទអង្ករពិភពលោក» នេះបើតាមក្រសួងពាណិជ្ជកម្មកម្ពុជា។

នៅលើបណ្ដាញសង្គមផ្លូវការរបស់ ក្រសួងពាណិជ្ជកម្មកម្ពុជា នាថ្ងៃទី 17 វិច្ឆិកា 2022 នេះ ក្រសួងបានប្រកាសចូលរួមអបអរសាទរចំពោះដំណឹងដែលថា កម្ពុជា ឈ្នះពានរង្វាន់ «អង្ករល្អជាងគេលើពិភពលោក» ប្រចាំឆ្នាំ 2022។

ក្រសួងពាណិជ្ជកម្ម បានបញ្ជាក់ថា ការឈ្នះពានរង្វាន់ «អង្ករល្អផ្តាច់គេលើពិភពលោក» របស់ កម្ពុជា នេះ គឺនៅពេល កម្ពុជា ចូលរួមព្រឹត្តិការណ៍ ដែលរៀបចំឡើងនៅ ខេត្តភូកេត ប្រទេសថៃ នាថ្ងៃទី 17 ខែវិច្ឆិកា ឆ្នាំ 2022។ ចំណែក ក្រសួងព័ត៌មាន វិញ ឱ្យដឹងថា អង្ករកម្ពុជា ដែលបានឈ្នះពានរង្វាន់ពិភពលោក នៅខេត្តភូកេត នេះ គឺជាពូជអង្ករ “ផ្ការំដួល”។

នេះគឺជាលើកទី 5 ហើយដែល កម្ពុជា បានឈ្នះពានរង្វាន់បែបនេះ បន្ទាប់ពីបានឈ្នះកាលពីឆ្នាំ 2012, 2013, 2014 និង 2018។

November 17, 2022

Category: សង្គម និងសេដ្ឋកិច្ច