សង្គម និងសេដ្ឋកិច្ច - La Reine Media

កីឡដ្ឋានទាំង 8 សម្រាប់ World Cup 2022 នៅ ប្រទេសកាតា

ដើម្បីបម្រើដល់ការប្រកួត 64 ប្រកួត ក្នុងក្របខណ្ឌ World Cup 2022 ដែលចាប់ផ្ដើមពីថ្ងៃទី 20 វិច្ឆិកាដល់ 18 ធ្នូ 2022 ប្រទេសកាតា ប្រើប្រាស់កីឡដ្ឋានចំនួន 8 ដែលក្នុងនោះកីឡដ្ឋាននីមួយៗមានរចនាបថពិសេសដាច់ដោយឡែក។

ទី 1 ៖ ក្នុងចំណោមកីឡដ្ឋានទាំង 8 ខាងលើ កីឡដ្ឋាន Lusail ក្នុងទីក្រុង Lusail ប្រទេសកាតា អាចដាក់មនុស្សបានរហូតដល់ 80,000 នាក់។ នេះគឺជាកីឡដ្ឋានធំជាងគេបង្អស់ក្នុងរដូវកាល World Cup 2022 ជាទីដែលនឹងមានការប្រកួតផ្ដាច់ព្រ័ត្រ។

កីឡដ្ឋាន Lusail ដែលត្រូវបានរចនាឡើងដោយក្រុមហ៊ុន Foster + Partners និងក្រុមហ៊ុន Populous នេះ គឺយកលំនាំតាមពន្លឺ និងស្រមោលរបស់គោម។ ផ្នែកខាងមុខរបស់កីឡដ្ឋានរួមមានបន្ទះក្ដោបរាងត្រីកោណ និងគ្រោងដែកថែប រួមនឹងរូបភាពលំអដែលត្រាប់តាមរចនាបថនៃរូបភាពនៅលើចានក្នុងតំបន់។

កៅអីរបស់កីឡដ្ឋាន Lusail ត្រូវបានបែងចែកជា 3 ថ្នាក់។ ដំបូលដែលធ្វើអំពី PTFE អនុញ្ញាតឱ្យពន្លឺចាំងចំស្មៅដើម្បីឱ្យវាលូតលាស់បានល្អ ទន្ទឹមនឹងនេះ ក៏អាចរារាំងខ្យល់ក្ដៅ និងធូលីពីខាងក្រៅ និងផ្ដល់ម្លប់ ជួយកាត់បន្ថយសម្ពាធដែលប្រព័ន្ធម៉ាស៊ីនត្រជាក់ត្រូវរាប់រង។

ក្រោយរដូវកាល World Cup 2022 កីឡាដ្ឋាន Lusail នឹងត្រូវបានប្ដូរទៅជាមជ្ឈមណ្ឌលមួយដែលមានអគារស្នាក់នៅតម្លៃទាប ហាងទំនិញ ភោជនីយដ្ឋាន បន្ទប់ពិគ្រោះជំងឺ និងសាលារៀន។

ទី 2 ៖ World Cup 2022 ត្រូវបានសម្ពោធបើកការប្រកួតកាលពីថ្ងៃទី 20 វិច្ឆិកានៅកីឡដ្ឋាន Al Bayt។ កីឡដ្ឋានដែលត្រូវបានសម្ពោធដាក់ឱ្យដំណើរការកាលពីឆ្នាំ 2021 នេះ គឺជាស្ថាបត្យកម្មដែលរចនាដោយក្រុមហ៊ុន Dar Al-Handasah។ នេះគឺជាកន្លែងមួយក្នុងចំណោមកីឡដ្ឋានសម្រាប់ការប្រកួតវគ្គពាក់កណ្ដាលផ្ដាច់ព្រ័ត្រ។ ក្រោយការប្រកួត World Cup កីឡដ្ឋានដែលដាក់មនុស្សបាន 60,000 នាក់នេះ នឹងត្រូវបានបន្ថយមកនៅត្រឹម 40,000 កៅអី។

ទី 3 ៖ កីឡដ្ឋាន Ahmad Bin Ali នៅ Umm Al Afaei ផ្ទុកមនុស្សបាន 40,000 នាក់។ ក្រោយ World Cup កៅអីចំនួន 20,000 របស់កីឡដ្ឋាននេះនឹងត្រូវបានរើចេញ និងប្រើប្រាស់សម្រាប់ព្រឹត្តិការណ៍កីឡាដទៃទៀត។ កីឡដ្ឋាន Ahmad Bin Ali នឹងក្លាយជាកន្លែងស្នាក់នៅរបស់កីឡាករក្នុងប្រទេស។ កីឡដ្ឋាននេះត្រូវបានរចនាដោយក្រុមហ៊ុន Ramboll and Pattern Design។

ទី 4 ៖ កីឡដ្ឋាន Al Janoub នៅ Al Wakrah អាចដាក់មនុស្សបាន 40,000 នាក់។ កីឡដ្ឋាននេះនឹងត្រូវក្រុមបាល់ទាត់ក្នុងស្រុកប្រើប្រាស់ និងកាត់បន្ថយកន្លែងអង្គុយមកនៅត្រឹម 20,000 កន្លែង ក្រោយពី World Cup 2022 បានបញ្ចប់។ AECOM និង Zaha Hadid Architects គឺជាក្រុមដែលបានរចនាកីឡដ្ឋាននេះ។

ទី 5 ៖ កីឡដ្ឋាន Al Thumama នៅ Al Thumama អាចដាក់មនុស្សបាន 40,000 នាក់។ កីឡដ្ឋានដែលត្រូវបានសម្ពោធដាក់ឱ្យប្រើប្រាស់កាលពីឆ្នាំ 2021 នេះ ត្រូវបានរចនាឡើងដោយស្ថាបត្យករ Ibrahim M. Jaidah។ ក្រោយ World Cup 2022 កៅអី 20,000 នឹងត្រូវយកចេញ ខណៈដែលសណ្ឋាគារលំដាប់ខ្ពស់មួយនឹងត្រូវបានបង្កើតឡើងនៅជាន់ខាងលើ។

ទី 6 ៖ កីឡដ្ឋាន Education City នៅតំបន់ Al Rayyan អាចដាក់មនុស្សបាន 40,000 នាក់។ កីឡដ្ឋានដែលត្រូវបានរចនាឡើងដោយក្រុមហ៊ុន Fenwick-Iribarren Architects និង Pattern Desing នេះ ត្រូវបានបើកដំណើរការកាលពីឆ្នាំ 2020។ ក្រោយ World Cup កៅអី 20,000 នឹងត្រូវបានរើចេញ ហើយ Education City នឹងក្លាយជាកីឡដ្ឋានសម្រាប់សាធារណៈ ខណៈជាន់លើគេនឹងក្លាយជាសាលាសម្រាប់សាកលវិទ្យាល័យនៅក្បែរនោះ។

ទី 7 ៖ កីឡដ្ឋានអន្តរជាតិ Khalifa នៅ Aspire អាចដាក់មនុស្សបាន 40,000 នាក់។ នេះគឺជាកីឡដ្ឋានតែមួយគត់ដែលត្រូវបានកែលំអ មិនមែនជាការសាងសង់ថ្មី។ កីឡដ្ឋាននេះសាងសង់កាលពីឆ្នាំ 1976 និងជួសជុល កែលំអឡើងវិញកាលពីឆ្នាំ 2017 ដោយក្រុមហ៊ុន Dar Al-Handasah។

ទី 8 ៖ កីឡដ្ឋាន 974 នៅ Ras Abu Aboud អាចដាក់មនុស្សបាន 40,000 នាក់ និងត្រូវបានសាងសង់ទាំងស្រុងពីកុងតឺន័រចំនួន 974 រួមនឹងដែកថែបប្រភេទម៉័រឌុល។ នេះគឺជាកីឡដ្ឋាន World Cup ដំបូងគេលើពិភពលោកដែលអាចដំឡើង និងដោះចេញបានក្រោយពីការប្រកួត។ កីឡដ្ឋានដែលរចនាឡើងដោយក្រុមហ៊ុន Fenwick-Iribarren Architects នេះ ត្រូវបានសម្ពោធកាលពីឆ្នាំ 2021។

November 22, 2022

គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ 5 ប្រឈមនឹងការពន្យារពេលសាងសង់

គណៈកម្មការវិវេចនាលទ្ធកម្ម (PRC) នៃ ក្រសួងសាធារណការ និងដឹកជញ្ជូន បានបើកកិច្ចប្រជុំមួយកាលពីម្សិលមិញ ដើម្បីពិភាក្សាលើការពន្យារពេលនៃការសាងសង់របស់គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ 5។

ឯកឧត្តម សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន ទទួល បន្ទុកជាប្រធានគណៈកម្មការវិវេចនាលទ្ធកម្ម (PRC) កាលពីថ្ងៃទី 21 វិច្ឆិកា 2022 បានដឹកនាំកិច្ចប្រជុំស្តីពីគម្រោងរៀបចំច្រកទ្វាអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ 5 នៅទីស្ដីការក្រសួង ដោយមានការចូលរួមពីថ្នាក់ដឹកនាំក្រសួង និងតំណាងភាគីពាក់ព័ន្ធ។

យោងតាម ក្រសួងសាធារណការ និងដឹកជញ្ជូន កិច្ចប្រជុំនេះធ្វើឡើងដើម្បីពិភាក្សាលើការងារពន្យារពេលសាងសង់ បម្រែបម្រួល ការងារក្នុងកិច្ចសន្យា ការពន្យាពេលកិច្ចសន្យា និងការបន្ថែមប្រាក់ឈ្នួលសម្រាប់សេវាត្រួតពិនិត្យបច្ចេក ទេសគម្រោង ព្រមទាំងការស្នើសុំពិនិត្យលើបម្រែបម្រួលតម្លៃសម្ភារៈសំណង់ និងអត្រាប្តូរប្រាក់របស់ ក្រុមហ៊ុនសាងសង់។

គិតមកដល់បច្ចុប្បន្ន គម្រោងសាងសង់ស្ថានីយច្រកទ្វារព្រំដែនស្ទឹងបត់ និងផ្លូវតភ្ជាប់ទៅផ្លូវជាតិលេខ 5 សម្រេចវឌ្ឍនភាពការងារបាន 72% ក្នុងនោះរួមមាន ៖ អគារច្រកទ្វារអន្តរជាតិ និងផ្លូវតភ្ជាប់ទៅផ្លូវជាតិលេខ 5, អគារអន្តេវាសិកដ្ឋាន, ចំណតផ្ទេរផ្ទុកទំនិញ, ឃ្លាំង និង ទីលានកុងតឺន័រ៕

November 22, 2022

ការអនុវត្តគម្រោងស្ថាបនាផ្លូវជាតិលេខ 48 ប្រវែង 148 គីឡូម៉ែត្រ សម្រេចបានជិត 12%

«គម្រោងសាងសង់ផ្លូវជាតិលេខ 48 សម្រេចវឌ្ឍនភាពការងារបាន 11.76% ហើយ» នេះបើតាម ក្រសួងសាធារណការ និងដឹកជញ្ជូន ចុះផ្សាយកាលពីថ្ងៃទី 21 វិច្ឆិកា 2022 បន្ទាប់ពី ឯកឧត្តម ហេង រត្នពិសិដ្ឋ អគ្គនាយក នៃអគ្គនាយកដ្ឋានសាធារណការ របស់ ក្រសួងសាធារណការ និងដឹកជញ្ជូន ទទួលបន្ទុកជានាយកគម្រោងលើកកម្រិតគុណភាពផ្លូវជាតិលេខ 48 បានដឹកនាំមន្ត្រីជំនាញក្រសួង និងភាគីពាក់ព័ន្ធ ចុះពិនិត្យការដ្ឋានសាងសង់ផ្លូវជាតិលេខ 48។

ការចុះពិនិត្យនេះធ្វើឡើងក្នុងគោលបំណងពិនិត្យតាមដានពីស្ថានភាពវិវឌ្ឍនជាក់ស្ដែងក្នុងការដ្ឋានសង់សង់ផ្លូវជាតិលេខ 48 ដែលអនុវត្តការសាងសង់ដោយក្រុមហ៊ុនកូរ៉េ IL SUNG & HANIL Joint Venture និងដើម្បីអាចឱ្យក្រុមការងារអនុវត្តគម្រោងរៀបចំផែនការសកម្មភាពបន្ទាប់ សំដៅពន្លឿនការសាងសង់ឱ្យសម្រេចបញ្ចប់តាមផែនការដែលបានកំណត់។

យោងតាម ក្រសួងសាធារណការ និងដឹកជញ្ជូន គិតត្រឹមពាក់កណ្តាលខែវិច្ឆិកា 2022 គម្រោងសាងសង់ផ្លូវជាតិលេខ 48 ដែលចាប់ផ្ដើមពីចំណុចភូមិអូរជ្រៅ ឃុំបឹងព្រាវ ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង ខាងលើនេះ សម្រេចវឌ្ឍនភាពការងារបាន 11.76%៕

គម្រោងសាងសង់ផ្លូវជាតិលេខ 48 ដែលគ្រោងនឹងបញ្ចប់ការសាងសង់នៅខែមិថុនា ឆ្នាំ 2024 ចំណាយថវិកាសរុបប្រមាណជាង 65 លានដុល្លារអាមេរិក។ ផ្លូវនេះបែងចែកជា 2 គន្លង ប្រវែង ជាង 122 គីឡូម៉ែត្រ និងផ្លូវ 4 គន្លងមានប្រវែងជាង 25 គីឡូម៉ែត្រ៕

November 22, 2022

កីឡាករ Messi ថា «នេះគឺជាឱកាសចុងក្រោយសម្រាប់ខ្ញុំក្លាយជាជើងឯក World Cup»

នៅក្នុងសន្និសីទសារព័ត៌មានកាលពីថ្ងៃទី 21 វិច្ឆិកា ប្រធានក្រុមជម្រើសជាតិរបស់ អាហ្សង់ទីន លោក Lionel Messi បាននិយាយថា គាត់កំពុងតែរីករាយជាមួយនឹងបាល់ទាត់ និងអះអាងជាថ្មីថា កាតា 2022 គឺជា World Cup ចុងក្រោយសម្រាប់គាត់។

ព្រលប់ថ្ងៃទី 21 វិច្ឆិកា Messi និងគ្រូបង្វឹក Lionel Scaloni បានចូលរួមសន្និសីទសារព័ត៌មានមុនការចេញប្រកួត។ នៅពេលត្រូវសួរថា តើនេះអាចជាពេលវេលាល្អបំផុតក្នុងអាជីពរបស់គាត់ លោក Messi ឆ្លើយថា «ខ្ញុំមិនដឹងទេ ប៉ុន្តែខ្ញុំកំពុងមានអារម្មណ៍ថាល្អ។ ខ្ញុំកំពុងព្យាយាមរីករាយក្នុងការលេងបាល់ឱ្យបានច្រើនបំផុត។ វ័យបានជួយឱ្យខ្ញុំយល់ឃើញខុសពីមុន និងយកចិត្តទុកដាក់ទៅលើភាពលម្អិតដែលមុននោះខ្ញុំចាប់អារម្មណ៍»។

ជាថ្មីម្ដងទៀត លោក Messi អះអាងថា នេះគឺជារដូវកាល World Cup ចុងក្រោយរបស់គាត់។ «នេះគឺជាឱកាសចុងក្រោយដើម្បីឱ្យខ្ញុំក្លាយជាជើងឯក World Cup ដែលជាពានរង្វាន់សំខាន់បំផុតសម្រាប់ខ្ញុំ» លោក Messi ថ្លែងដូច្នេះ។ «ក្រុមអាហ្សង់ទីន បច្ចុប្បន្នដឹងថាត្រូវធ្វើអ្វី ហើយខ្ញុំមានអារម្មណ៍ថា សមាសភាពបច្ចុប្បន្នគឺដូចទៅនឹងឆ្នាំ 2014»។

Messi ធ្លាប់ជិតបានក្លាយជាជើងឯកនៅ World Cup 2014 ប៉ុន្តែ អាហ្សង់ទីន ចាក់ អាល្លឺម៉ង់ 0-1 នៅក្នុងការប្រកួតផ្ដាច់ព្រ័ត្រ។

ដូចទៅនឹង Messi គ្រូបង្វឹក Scaloni ថាមិនទទួលរងសម្ពាធនៃពានរង្វាន់ជើងឯក World Cup 2022។ «យើងមិនទទួលរងសម្ពាធដែលបង្ខំឱ្យលើកពាន យើងគ្រាន់តែរីករាយជាមួយនឹងបាល់ទាត់ប៉ុណ្ណោះ មិនមានអ្វីលើសពីនេះ» លោក Ccaloni ថ្លែងដូច្នេះ៕

November 22, 2022

អ្នកគាំទ្របាល់ទាត់មកពី បង់ក្លាដែស តទង់ជាតិប្រវែងជាង 3 គីឡូម៉ែត្រ ដើម្បីលើកទឹកចិត្តក្រុមជម្រើសជាតិកូរ៉េខាងត្បូង

Abu Kowsir និយាយថា កូរ៉េខាងត្បូង បាននាំមកនូវភាពរុងរឿងដល់គ្រួសាររបស់គាត់ ទើបគាត់ចង់បង្ហាញការដឹងគុណដោយការតទង់ជាតិដើម្បីជាការគាំទ្រដល់ក្រុមបាល់ទាត់ជម្រើសជាតិរបស់ប្រទេសនេះនៅ World Cup 2022។

Abu Kowsir និងភរិយាបានធ្វើឱ្យអ្នកជិតខាងមានការភ្ញាក់ផ្អើលនៅពេលគាត់តទង់ជាតិរបស់ កូរ៉េខាងត្បូង ប្រវែង 3.5 គីឡូម៉ែត្រ ដោយចាប់ផ្ដើមពីផ្ទះរបស់គាត់ អូសបន្លាយតាមដងផ្លូវ និងឆ្លងកាត់ទន្លេឆ្ពោះទៅកាន់ភូមិក្បែរខាងនៅក្នុងតំបន់ Bancharampur ភាគខាងកើតរបស់ ប្រទេសបង់ក្លាដែស។

ទឹកប្រាក់ 5,000 ដុល្លារអាម៉េរិកដែល Abu Kowsir បានចំណាយគឺជាសាក្ខីភាពសម្រាប់ក្ដីស្រលាញ់របស់គាត់ចំពោះ កូរ៉េខាងត្បូង ជាទីដែលលោក Kowsir អាយុ 45 បានចំណាយពេលភាគច្រើននៃវ័យកំលោះសម្រាប់បំពេញការងារចិញ្ចឹមជីវិត។

«យើងស្រលាញ់ កូរ៉េខាងត្បូង ហើយនេះគឺជាវិធីដែលពួកយើងជ្រើសរើសដើម្បីលើកទឹកចិត្តក្រុមបាល់ទាត់» Sabina ដែលជាភរិយារបស់ Kowsir និយាយដូច្នេះ និងបន្តថា «ពួកយើងនឹងបន្តគាំទ្រ និងបួងសួងសូមឱ្យ កូរ៉េខាងត្បូង បានឈ្នះ»។

ទង់ជាតិកូរ៉េខាងត្បូង ត្រូវបានតឆ្លងកាត់ទន្លេ

Sabina មិនធ្លាប់បានទៅដល់ប្រទេសដែលស្វាមីរបស់អ្នកស្រីធ្វើជាពលករក្នុងរយៈពេល 15 ឆ្នាំ ប៉ុន្តែ ចាប់អារម្មណ៍ខ្លាំងតាមរយៈរឿងរ៉ាវដែលស្វាមីបានរៀបរាប់ប្រាប់។

ក្នុងរោងចក្រនៅឯ កូរ៉េខាងត្បូង Kowsir ទទួលខុសត្រូវក្នុងការងារកោសគ្រឿងបន្លាស់ទូរស័ព្ទចាស់ៗ និងមុខទំនិញជាច្រើនទៀត ក៏ដូចជាការងារស្លមាសឡើងវិញ។

ពេលវេលានៅ កូរ៉េខាងត្បូង បាននាំមកនូវប្រាក់ចំណូល និងដើមទុនដើម្បីឱ្យគ្រួសាររបស់ Kowsir អាចបង្កើតមុខរបរជួញដូរគ្រឿងអលង្ការនៅឯស្រុកកំណើត។ លោក Kowsir អះអាងថា ការធ្វើជាពលករនៅ កូរ៉េខាងត្បូង បានជួយលើកជីវភាពគ្រួសាររបស់គាត់ទៅក្នុងស្រទាប់វណ្ណៈកណ្ដាលនៅ បង់ក្លាដែស។

ក្រុមជម្រើសជាតិកូរ៉េខាងត្បូង ដែលឈរលំដាប់ទី 28 លើពិភពលោក ត្រូវបានគេព្យាករថា នឹងជួបការលំបាកច្រើននៅពេលប្រកួតជាមួយ អ៊ុយរូហ្កាយ នៅថ្ងៃទី 24 វិច្ឆិកា ហើយក្រោយមកត្រូវប្រឈមមុខនឹង ព័រទុយហ្កាល។ លោក Kowsir ឱ្យដឹងថា គាត់ធ្លាប់ត្រូវអ្នកជិតខាងបង្អាប់លេងអំពីក្ដីសង្ឃឹមសម្រាប់ក្រុមបាល់ទាត់ជម្រើសជាតិរបស់ កូរ៉េខាងត្បូង ប៉ុន្តែ គាត់មិនយកចិត្តទុកដាក់។

ភរិយារបស់លោក Kowsir កំពុងរៀបចំទង់ជាតិរបស់ កូរ៉េខាងត្បូង

«ការប្រកួតណាក៏មានអ្នកចាញ់ និងអ្នកឈ្នះ។ ជាអ្នកគាំទ្រម្នាក់របស់ ក្រុមជម្រើសជាតិកូរ៉េខាងត្បូង ខ្ញុំសង្ឃឹមថា ពួកគេនឹងលេងបានល្អ។ បើទោះពួកគេមិនឡើងដល់វគ្គផ្ដាច់ព្រ័ត្រ ខ្ញុំនៅតែគាំទ្រដដែល»៕

November 22, 2022

ប្រជាកសិករវៀតណាម ប្រើប្រាស់យន្តហោះដ្រូន (Drone) ក្នុងការដាំដុះ

ដោយការប្រើប្រាស់បច្ចេកវិទ្យា ប្រជាកសិករនៅដែនដីសណ្ដទន្លេមេគង្គ នៃទឹកដីកម្ពុជាក្រោម (វៀតណាមខាងត្បូង) ពេលនេះអាច «អង្គុយគងអន្ទាក់ខ្លាមើលស្រូវលូតលាស់» ដោយសារអាចកាត់បន្ថយការចំណាយកម្លាំងបានច្រើននៅឯវាលស្រែ។

ប៉ុន្មានឆ្នាំមកនេះ យន្តហោះគ្មានមនុស្សបើកបរ (ដ្រូន-drone) សម្រាប់វិស័យកសិកម្ម ដែលជាឧបករណ៍បច្ចេកវិទ្យាលំដាប់ខ្ពស់ កំពុងទទួលបានការនិយមប្រើប្រាស់នៅតំបន់ដែនដីសណ្ដទន្លេមេគង្គ ដែលស្ថិតក្នុងដែនដីកម្ពុជាក្រោម (វៀតណាមខាងត្បូង)។

បច្ចុប្បន្ន យន្តហោះដ្រូនត្រូវបានកែលំអ និងបំពាក់មុខងារច្រើន ដូចជា មុខងារបាចជី បាញ់ថ្នាំការពារស្រូវ រុក្ខជាតិ និងជំនួសមនុស្សក្នុងការសាបព្រោះស្រូវជាដើម។

លោក ឡេ ថាញ់ ង្វៀន អាយុ 62 ឆ្នាំ នៅ វៀតណាមខាងត្បូង ឱ្យដឹងថា គាត់បានប្រើប្រាស់ដ្រូន XAG ដើម្បីធ្វើស្រែទំហំ 7 ហិកតា។ គាត់ប្រាប់ថា ក្នុងរយៈពេលជាង 40 ឆ្នាំមកនេះ គាត់ធ្វើស្រែតាមរបៀបប្រពៃណី។ ពេលនេះ ការប្រើប្រាស់ឧបករណ៍បច្ចេកវិទ្យា បានជួយឱ្យគាត់កាត់បន្ថយការលំបាកបានយ៉ាងច្រើន។

ចំណែកកសិករម្នាក់ទៀតឈ្មោះ ង្វៀន វ៉ាន់ ហ្វឿង ដែលធ្វើស្រែ 40 ហិកតា បានឱ្យដឹងថា នេះគឺជារដូវទី 6 ហើយដែលគាត់ប្រើប្រាស់ដ្រូនដើម្បីបាញ់ថ្នាំការពារស្រូវ។

«កាលពីមុន ខ្ញុំធ្វើស្រែតែ 3 ហិកតា បាញ់ថ្នាំការពារស្រូវតាមបែបប្រពៃណី ត្រូវចំណាយពេលវេលា និងកម្លាំងច្រើន។ បច្ចុប្បន្ន ដោយសារមានឧបករណ៍ហោះហើរនេះ ខ្ញុំបានស្រួលខ្លួនណាស់» លោក ហ្វឿងប្រាប់ដូច្នេះ។

ខេត្តដុងថាប (Dong Thap) គឺជាតំបន់ដំបូងរបស់ ប្រទេសវៀតណាម ដែលត្រូវបានជ្រើសរើសជាកន្លែងសម្រាប់កសាង និងអនុវត្តគម្រោងស្ដារកសិកម្ម។ ប៉ុន្មានឆ្នាំកន្លងទៅនេះ បណ្ដាក្រុមហ៊ុន អាជ្ញាធរ និងប្រជាកសិករនៅ ដុងថាប បានពឹងផ្អែក និងសង្ឃឹមច្រើនទៅលើឧបករណ៍បច្ចេកវិទ្យាស្វ័យប្រវត្តដែលនាំមកនូវប្រសិទ្ធភាពខ្ពស់ក្នុងការសាបព្រោះបណ្ដុះដាំ៕

November 21, 2022

ក្រសួងពាណិជ្ជកម្ម ជូនដំណឹងស្ដីពី «តម្លៃលក់រាយប្រេងឥន្ធនៈថ្មី ចាប់ពីថ្ងៃទី 21 ដល់ថ្ងៃទី 30 វិច្ឆិកា 2022

នាព្រឹកថ្ងៃទី 21 វិច្ឆិកា នេះ ក្រសួងពាណិជ្ជកម្ម បានចេញសេចក្ដីជូនដំណឹងស្ដីពី «តម្លៃលក់រាយប្រេងឥន្ធនៈថ្មី ដែលអនុវត្តចាប់ពីថ្ងៃទី 21 ដល់ថ្ងៃទី 30 វិច្ឆិកា 2022។

សេចក្ដីជូនដំណឹងថ្មីនេះបង្ហាញថា ចាប់ពីថ្ងៃទី 21 វិច្ឆិកាដល់ 30 វិច្ឆិកា 2022 តម្លៃលក់រាយប្រេងឥន្ធនៈនឹងចុះមកនៅ 4,350 រៀល/លីត្រ សម្រាប់ប្រេងសាំងធម្មតា EA92 និង 5,000 រៀល/លីត្រ សម្រាប់ប្រេងម៉ាស៊ូត DO 50ppm។

យោងតាមការប្រៀបធៀបជាមួយនឹងតម្លៃប្រេងនាពេលកន្លង ឃើញថា តម្លៃប្រេងសាំងដែលអនុវត្តចាប់ពីថ្ងៃទី 21 ដល់ 30 ខែវិច្ឆិកា 2022 មានការធ្លាក់ចុះ ក្នុងនោះ សាំងធ្លាក់ថ្លៃ 50 រៀល ខណៈដែលម៉ាស៊ូតធ្លាក់ថ្លៃ 100 រៀល។

ព័ត៌មានលម្អិត សូមអានសេចក្ដីជូនដំណឹងរបស់ ក្រសួងពាណិជ្ជកម្ម ខាងក្រោម ៖

November 21, 2022

ក្រុមហ៊ុនចិន សាកល្បង «ឡានហោះ» ដែលអាចដោះចេញពីគ្នាដំបូងគេលើពិភពលោក (វីដេអូ)

គំរូឡានហោះមួយអាចប្ដូរការពីការធ្វើដំណើរនៅលើដី ទៅជាការហោះហើរលើអាកាសបានដោយងាយ ត្រូវបានបង្ហាញនៅ Chongqing ប្រទេសចិន កាលពីសប្ដាហ៍កន្លង។

ឡានហោះមានកៅអីចំនួន 2 នេះគឺជាប្រភេទដំបូងគេលើពិភពលោកដែលអាចដោះចេញពីគ្នាបាន និងត្រូវបានបង្ហាញនៅទីក្រុង Chongqing ភាគនិរតីនៃ ប្រទេសចិន កាលពីថ្ងៃទី 18 វិច្ឆិកា 2022។

ឡានហោះនេះអាចដឹកវត្ថុទម្ងន់ជាង 500 គីឡូក្រាម និងហោះក្នុងល្បឿន 80 គីឡូម៉ែត្រ/ម៉ោង។ យានយន្តនេះត្រូវបានសហការក្នុងការអភិវឌ្ឍដោយ មជ្ឈមណ្ឌលច្នៃប្រឌិត Chongqing នៃ វិទ្យាស្ថានបច្ចេកវិទ្យាប៉េកាំង រួមនឹងក្រុមហ៊ុនបច្ចេកវិទ្យា Cool Black (ប៉េកាំង) និង អាជ្ញាធរនៃទីក្រុង Chongqing។

ដោយប្រើប្រាស់បច្ចេកវិទ្យាកំណត់ទិស ណែនាំ និងដំឡើងដ៏សុក្រឹត អ្នកប្រើប្រាស់អាចប្ដូរផ្លាស់ផ្នែកនានារបស់ឡានហោះនេះ ពីរបបបើកបរលើដី ទៅជាការហោះហើរលើអាកាសបានយ៉ាងងាយស្រួល។ ឡានហោះនេះអាចហោះឡើង និងចុះចតដោយត្រង់ជាមួយនឹងកាប៊ីនឆ្លាតវៃ។

ថ្វីបើគម្រោងឡានហោះនេះកំពុងស្ថិតនៅក្នុងដំណាក់កាលដំបូងនៅឡើយ ប៉ុន្តែ ភាគីក្រុមហ៊ុនបាននិយាយថា ការហោះហើរ ក៏ដូចជាការបើកបរនៅលើដីដែលបង្ហាញជាសាធារណៈ នឹងត្រូវធ្វើឡើងនាពេលឆាប់ៗខាងមុខនៅទីក្រុង Chongqing៕

November 21, 2022

វិស័យមាន់បំពងរបស់ កូរ៉េខាងត្បូង «ផ្ទុះឡើង» ដោយសារ World Cup

ភាគហ៊ុនដែលទាក់ទងនឹងវិស័យឧស្សាហកម្មមាន់នៅលើផ្សារមូលបត្ររបស់ កូរ៉េខាងត្បូង ត្រូវបានគេព្យាករថា នឹងកើនឡើងខ្ពស់ខ្លាំងនៅពេលដំណាលគ្នានឹងព្រឹត្តិការណ៍ World Cup 2022 នៅ ប្រទេសកាតា។

ក្នុងការជួញដូរនៅចុងសប្ដាហ៍កន្លង ភាគហ៊ុនរបស់ Kyochon F&B ដែលជាបណ្ដាញភោជនីយដ្ឋានធំជាងគេមួយនៅ កូរ៉េខាងត្បូង ត្រូវបានជូញដូរក្នុងតម្លៃ 12,600 វ៉ុន/ហ៊ុន នៅលើផ្សារមូលបត្រ Kospi ដែលតួលេខនេះកើន 2% ធៀបនឹងពេលបិទទ្វារ ហើយក៏ខ្ពស់ជាងជិត 27% បើធៀបនឹង 1 ខែមុននោះ។

ភាគហ៊ុនរបស់ Maniker ដែលជាអ្នកផលិតមាន់ក្នុងស្រុក និងក្រុមហ៊ុន Maniker F&G ដែលត្រូវបានដាក់ឱ្យជួញដូរនៅលើផ្សារហ៊ុន Kosdaq ក៏ឡើងថ្លៃក្នុងខែវិច្ឆិកានេះ។

ភាគហ៊ុនរបស់វិស័យឧស្សាហកម្មមាន់ឡើងថ្លៃនៅមុនរដូវកាល World Cup 2022 គឺមិនមានអ្វីចម្លែក ព្រោះថា អ្នកគាំទ្រវិស័យបាល់ទាត់នៅ កូរ៉េខាងត្បូង ចូលចិត្តញ៉ាំ «chimaek» ដែលជាមាន់បំពងអមនឹងស្រាបៀរនៅពេលទស្សនាការប្រកួតបាល់ទាត់៕

November 21, 2022

ប្រទេសកាតា បង្កើតបាន «ឯតទគ្គកម្មក្រៀមក្រំ» នៅ World Cup

(ប្រទេសកាតា)-បរាជ័យនៅចំពោះមុខ អេក្វាទ័រ ធ្វើឱ្យ កាតា ក្លាយជាក្រុមម្ចាស់ផ្ទះដំបូងគេដែលបានចាញ់នៅក្នុងការប្រកួតបើកឆាក World Cup។

ក្នុងការប្រកួតបើកឆាកកាលពីថ្ងៃទី 20 មករា កាតា បានចាញ់ អេក្វាទ័រ 0-2។ កីឡាករខ្សែប្រយុទ្ធ Enner Valencia រកបាន 2 គ្រាប់សម្រាប់ក្រុមជម្រើសជាតិអេក្វាទ័រ ដោយការទាត់បាល់ពិន័យនៅនាទីទី 16 និងការតែតបញ្ចូលទីនៅនាទីទី 31។

ដោយទទួលបានលទ្ធផលនេះ កាតា បានក្លាយជាម្ចាស់ផ្ទះដំបូងគេដែលចាញ់នៅក្នុងការប្រកួតបើកឆាកនៅ រដូវកាល World Cup។ ក្នុង 21 រដូវកាលមុននោះ ក្រុមម្ចាស់ផ្ទះ 22 ក្រុម សុទ្ធតែរកបានពិន្ទុ ក្នុងនោះមាន 16 ក្រុមបានឈ្នះ និង 6 ស្មើ។ World Cup 2002 គឺជារដូវកាល់តែមួយគត់ដែលមាន 2 ប្រទេសធ្វើជាម្ចាស់ផ្ទះ គឺ ជប៉ុន និង កូរ៉េខាងត្បូង។

ការប្រកួតបើកឆាកនៅ World Cup 2022 ក៏ធ្វើឱ្យមានការភ្ញាក់ផ្អើលជាខ្លាំងនៅពេលកៅអីរាប់ពាន់ត្រូវបានទុកឱ្យនៅទំនេរនៅក្នុងតង់ទីពីរ។ យោងតាមទំព័រ Marca អ្នកគាំទ្ររបស់ក្រុមម្ចាស់ផ្ទះប្រហែល 15,000 នាក់ បានចាកចេញពីកន្លែង ក្រោយពី ក្រុមកាតា ចាញ់ក្រុមរបស់ អេក្វាទ័រ ខណៈដែលទំព័រ Ole វិញ យល់ថា អ្នកគាំទ្រចាកចេញគឺដើម្បីចៀសវាងការកកស្ទះផ្លូវ។

ទំព័រ Marca សរសេរថា ការចាកចេញរបស់ទស្សនិកជនគឺព្រោះតែពួកគេឃ្លាន។ អាហារឆាប់អស់ ចំណែកភេសជ្ជៈក៏មិនមានអ្វីក្រៅពីទឹកសុទ្ធ និងភេសជ្ជៈផ្អែម។ ប្រទេសកាតា ហាមការលក់ភេសជ្ជៈមានជាតិអាល់កុលនៅក្នុងកីឡដ្ឋាន។

ពិធីបើកការប្រកួតនៅ World Cup 2022 របស់ កាតា

នៅកីឡដ្ឋាន Al Bayt អ្នកគាំទ្រមួយចំនួនត្រូវពាក់អាវរងា ដោយសារតែគណៈកម្មការកីឡដ្ឋានបើកប្រព័ន្ធម៉ាស៊ីនត្រជាក់ដើម្បីជួយឱ្យកីឡាករទទួលបានផាសុកភាពជាងមុននៅក្នុងអាកាសធាតុឡើងកម្ដៅដល់ 32 អង្សាសេនៅ ប្រទេសកាតា៕

November 21, 2022

Category: សង្គម និងសេដ្ឋកិច្ច