សង្គម និងសេដ្ឋកិច្ច - La Reine Media

ធនាគារ JPMorgan បង្កើតកាបូបអេឡិចត្រូនិចសម្រាប់ប្រាក់ឌីជីថលគ្រីបតូ (Cryptocurrency)

ធនាគារ JPMorgan (សហរដ្ឋអាម៉េរិក) បង្កើតកាបូបអេឡិចត្រូនិចសម្រាប់ប្រាក់ឌីជីថល ដើម្បីត្រៀមផ្ដល់សេវាកម្មផ្ទេរ ដោះដូរ និងទូទាត់ប្រាក់។ល។

JPMorgan Chase បានចុះបញ្ជីជាផ្លូវការ និងទទួលបានវិញ្ញបនបត្រសម្រាប់ «កាបូបឌីជីថល JPMorgan» ពី ការិយាល័យស្លាកសញ្ញា និងអាជ្ញាប័ណ្ណអាម៉េរិក (USPTO) ដែលនេះបង្ហាញថា ក្រុមហ៊ុនហិរញ្ញវត្ថុខ្នាតយក្សនេះបន្តវាយលុកជ្រៅទៅក្នុងវិស័យផ្ដល់សេវាកម្មប្រាក់ឌីជីថល និង Bitcoin សម្រាប់អតិថិជនបច្ចុប្បន្នរបស់ពួកគេ។

JPMorgan នឹងផ្ដល់សេវាកម្មដែលទាក់ទងនឹងការផ្ទេរប្រាក់ដោយប្រើប្រាស់បច្ចេកវិទ្យា Blockchain, សេវាកម្មដោះដូរ សេវាសម្រួលការទូទាត់ដោយប្រាក់ឌីជីថល ក្នុងនោះមានការទូទាត់ដោយការប្រើកាតឥណទាន និងប្រាក់ឌីជីថលសុទ្ធផងដែរ។

កាបូបអេឡិចត្រូនិចខាងលើរបស់ JPMorgan ក៏ធ្វើជាអ្នកសម្របសម្រួលក្នុងការទូទាត់ឆ្លងប្រទេស និងសេវាគ្រប់គ្រងគណនីសែកនិម្មិតទៀតផង។

យីហោកាបូបឌីជីថលរបស់ JPMorgan ត្រូវបានអនុម័តកាលពីថ្ងៃទី 15 វិច្ឆិកា 2022 បន្ទាប់ពីបានដាក់ពាក្យស្នើសុំចុះឈ្មោះស្លាកសញ្ញាពាណិជ្ជកម្មកាលពីឆ្នាំ 2020។

បើទោះជា CEO Jamie Dimon កន្លងមកធ្លាប់បានជំទាស់ទៅនឹងការប្រើប្រាស់ប្រាក់ឌីជីថលគ្រីបតូ ប៉ុន្តែ JPMorgan នៅតែចូលរួមកាន់តែជ្រៅទៅក្នុងវិស័យថ្មីនេះ។ ឥរិយាបថនេះកើតឡើងនៅពេលទីផ្សារប្រាក់ឌីជីថលគ្រីបតូ កំពុងជួបវិបត្តិ ក្រោយករណីដួលរលំរបស់ FTX និងការធ្លាក់ថ្លៃរបស់ Bitcoin៕

November 23, 2022

BYD ផលិតថ្មផ្ទុកថាមពល sodium-ion ក្នុងបរិមាណច្រើន សម្រាប់រថយន្តអគ្គិសនីនៅឆ្នាំ 2023?

ក្រុមហ៊ុនខ្នាតយក្ស CATL គឺជាស្ថាប័នដំបូងគេដែលណែនាំអំពីថ្មផ្ទុកអគ្គិសនីប្រភេទ sodium-ion ប៉ុន្តែ BYD អាចជាក្រុមហ៊ុនដំបូងគេដែលប្រើប្រាស់ថ្មប្រភេទនេះនៅក្នុងការផលិតទ្រង់ទ្រាយធំ។

សារព័ត៌មានក្នុងស្រុក LatePost បានផ្សាយថា ក្រុមហ៊ុនផលិតរថយន្តចិន BYD នឹងផលិតថ្មផ្ទុកថាមពលប្រភេទ sodium-ion ចាប់ពីត្រីមាសទី 2 ឆ្នាំ 2023 ហើយពួកវានឹងត្រូវបានប្រើប្រាស់នៅលើរថយន្តអគ្គិសនី Qin EV, Dolphin និង Seagull របស់ BYD ដែលកំពុងពេញនិយមខ្លាំងនៅ ប្រទេសចិន។

យោងតាម LatePost ផ្នែកអភិវឌ្ឍថ្មផ្ទុកថាមពលរបស់ BYD ដែលមានឈ្មោះថា FinDreams ទទួលខុសត្រូវក្នុងការអភិវឌ្ឍ និងផលិតថ្មប្រភេទ sodium-ion ក្នុងបរិមាណច្រើន ដែលបច្ចុប្បន្នកំពុងស្ថិតក្នុងដំណាក់កាលកំណត់ម៉ូដែល។

រថយន្តអគ្គិសនី Qin EV របស់ក្រុមហ៊ុនចិន BYD

រថយន្តអគ្គិសនី Qin EV និង Dolphin សុទ្ធតែមានតម្លៃចាប់ពី 14,000 ដុល្លារឡើងទៅ ហើយម៉ូដែលថ្មីរបស់ BYD គឺ Seagull នឹងត្រូវបានបង្ហាញក្នុងទីផ្សារនៅឆ្នាំក្រោយ ហើយមានតម្លៃចាប់ពី 11,100 ដល់ 14,000 ដុល្លារអាម៉េរិក៕

November 23, 2022

បុគ្គលិក Twitter សប្បាយរីករាយពេលត្រូវ អ៊ីឡុន ម៉ាស បញ្ឈប់ពីការងារ

ជំនួសឱ្យការខកចិត្ត បុគ្គលិករបស់ Twitter មួយចំនួនបានសម្ដែងការសប្បាយរីករាយ ហើយខ្លះទៀតថែមទាំងជប់លៀងនៅពេលត្រូវមហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស (Elon Musk) បញ្ឈប់ពីការងារ។

ភ្លាមៗបន្ទាប់ពីបានចូលក្ដោបក្ដាប់បណ្ដាញសង្គម Twitter មហាសេដ្ឋី អ៊ីឡុន ម៉ាស បានចាប់ផ្ដើមសកម្មភាពជាច្រើនដើម្បីកែទម្រង់បណ្ដាញសង្គមនេះ ក្នុងនោះមានទាំងការផ្លាស់ប្ដូរតំណែងសំខាន់ៗ ក៏ដូចជាបញ្ឈប់បុគ្គលិកមួយភាគធំផងដែរ។

ដើមខែវិច្ឆិកា លោក ម៉ាស បានសម្រេចចិត្តបញ្ឈប់បុគ្គលិកជាង 50% ក្នុងចំណោមបុគ្គលិកសរុប 7,500 នាក់របស់ Twitter និងស្នើឱ្យពួកគេជ្រើសរើសរវាងការខំប្រឹងធ្វើការ និងការលាឈប់។ អ្នកដែលមិនបានឆ្លើយតបអ៊ីមេលរបស់លោក ម៉ាស តាមពេលវេលាដែលបានកំណត់ នឹងត្រូវបានចាត់ទុកថា បានទទួលយកការបញ្ឈប់ពីក្រុមហ៊ុន។

ប្រភពព័ត៌មានឱ្យដឹងថា មានបុគ្គលិកជាច្រើនសម្រេចចិត្តនៅស្ងៀម និងយល់ព្រមចាកចេញពីក្រុមហ៊ុន។ ប៉ុន្តែ ជំនួសឱ្យការខកចិត្ត បុគ្គលិករបស់ Twitter មួយចំនួនបានសម្ដែងការសប្បាយរីករាយនៅពេលពួកគេសម្រេចចិត្តលាឈប់ពីក្រុមហ៊ុន។

បុគ្គលិកជាច្រើនបានបង្ហោះរូបថត និងវីដេអូលើបណ្ដាញសង្គម បង្ហាញអំពីទិដ្ឋភាពពួកគេរាប់ថយក្រោយរហូតដល់វិនាទីចុងក្រោយដែលត្រូវឆ្លើយតបអ៊ីមេលរបស់លោក ម៉ាស។ បុគ្គលិកខ្លះថែមទាំងជប់លៀងទៀតផង នៅពេលត្រូវ CEO របស់ Tesla បញ្ឈប់ពីការងារ។

តាមការគណនា បុគ្គលិករបស់បណ្ដាញសង្គម Twitter ប្រហែល 1,200 នាក់ បានសម្រេចចិត្តទទួលយកការបញ្ឈប់ពីមហាសេដ្ឋី អ៊ីឡុន ម៉ាស៕

November 23, 2022

កីឡដ្ឋានសម្រាប់ World Cup 2022 ទាំង 8 របស់ កាតា ពេលមើលពីលើមេឃ

ផ្កាយរណប Landsat 9 របស់ ណាសា (NASA) ថតរូបកីឡដ្ឋានថ្មីមួយចំនួននៅជុំវិញ រដ្ឋធានីដូហា របស់ ប្រទេសកាតា ជាទីដែលកំពុងប្រារព្ធព្រឹត្តិការណ៍បាល់ទាត់ World Cup 2022។

ក្រុមបាល់ទាត់ជម្រើសជាតិទាំង 32 និងអ្នកគាំទ្រជាង 1 លាននាក់ បានសម្រុកទៅកាន់ ប្រទេសកាតា នៅក្នុងខែវិច្ឆិកា 2022 ដើម្បីចូលរួមព្រឹត្តិការណ៍ប្រកួតបាល់ទាត់ពិភពលោក។ ទីតាំងប្រកួត World Cup រដូវកាលនេះគឺ ដូហា ដែលជារដ្ឋធានីរបស់ កាតា ស្ថិតនៅតាមតំបន់ឆ្នេរនៃឈូងសមុទ្រពែក្ស (Persian Gulf) ភាគខាងកើតប្រទេសនេះ។

រូបភាពធម្មជាតិរបស់ ដូហា ត្រូវបានថតកាលពីថ្ងៃទី 13 វិច្ឆិកា 2022 ដោយឧបករណ៍ Operational Land Imager-2 (OLI-2) នៅលើផ្កាយរណប Landsat 9 របស់ ទីភ្នាក់ងារអវកាសអាម៉េរិក (ណាសា)។

កីឡដ្ឋានទាំងឡាយស្ថិតក្នុងចំណោមសំណង់ដែលងាយមើលឃើញបំផុតរាប់ចាប់ពីឆ្នាំ 2010 ជាពេលដែល កាតា ត្រូវបានជ្រើសរើសជាម្ចាស់ផ្ទះសម្រាប់ World Cup 2022។

កីឡដ្ឋានសម្រាប់ World Cup រដូវកាលនេះ មានចំនួន 8 ក្នុងនោះ មាន 7 ត្រូវបានសាងសង់ពីឆ្នាំ 2010។ ទាំងអស់សុទ្ធតែស្ថិតនៅក្នុងរង្វង់អង្កត់ផ្ចិត 54 គីឡូម៉ែត្រ ជុំវិញ រដ្ឋធានីដូហា ធ្វើឱ្យ World Cup 2022 ក្លាយជាព្រឹត្តិការណ៍ដែលមានទីតាំងប្រកួតនៅផ្ដុំគ្នាបំផុតរាប់ចាប់ពីឆ្នាំ 1930៕

November 23, 2022

ឥណ្ឌូណេស៊ី លក់ដេញថ្លៃកោះគ្មានមនុស្សរស់នៅជាង 100 ដើម្បីអភិវឌ្ឍតំបន់លំហែកាយ

តំបន់អភិរក្ស Widi ដែលមានកោះគ្មានមនុស្សរស់នៅជាង 100 ជិតនឹងត្រូវបានលក់ដេញថ្លៃនៅក្នុងការជួញដូរអចលនទ្រព្យដែលត្រូវបានគេយល់ថា ធំបំផុតក្នុងប្រវត្តិសាស្ត្ររបស់ ទ្វីបអាស៊ី។

«មហាសេដ្ឋីគ្រប់រូបអាចកាន់កាប់កោះជាកម្មសិទ្ធិផ្ទាល់ខ្លួន ប៉ុន្តែ មានតែម្នាក់គត់ដែលនឹងក្លាយជាម្ចាស់របស់កោះទាំង 100 នេះ» CNN កាលពីថ្ងៃទី 22 វិច្ឆិកា ដកស្រង់សម្ដីរបស់ Charlie Smith អនុប្រធានក្រុមហ៊ុនអចលនទ្រព្យ Sotheby’s Concierge Auctions នៅ សហរដ្ឋអាម៉េរិក បានឱ្យដឹងដូច្នេះ។

Sotheby’s Concierge Auctions ដែលជាអ្នករៀបចំព្រឹត្តិការណ៍លក់ដេញថ្លៃចាស់វស្សា នឹងធ្វើជាភាគីតាមដានការលក់ដេញថ្លៃនេះ។ ក្រុមហ៊ុននេះក៏បានត្រៀមខ្លួនរួចរាល់សម្រាប់ជួយដល់អ្នកវិនិយោគ ក្នុងការសាងសង់តំបន់កំហែកាលនៅលើកោះទាំងនេះ។

ច្បាប់របស់ ឥណ្ឌូណេស៊ី កំណត់ថា ជនបរទេសមិនអាចទិញកោះនៅប្រទេសនេះ។ តំបន់អភិរក្ស Widi ដោះស្រាយបញ្ហានេះតាមរយៈការបង្កើតក្រុមហ៊ុនភាគហ៊ុនរួម PT។ Leadership Islands Indonesia (LII) គឺជាអ្នកផ្ដល់ជំនួយដល់អ្នកចូលរួមព្រឹត្តិការណ៍លក់ដេញថ្លៃ។ ដូច្នេះ អ្នកវិនិយោគនឹងមានសិទ្ធិអភិវឌ្ឍកោះទាំងនោះដោយសេរី។

ព្រឹត្តិការណ៍លក់ដេញថ្លៃតំបន់អភិរក្ស Widi ដែលមានកោះជាង 100 និងមានផ្ទៃក្រឡាសរុបជាង 10,000 ហិកតា នឹងចាប់ផ្ដើមពីថ្ងៃទី 08 ធ្នូដល់ 14 ធ្នូ 2022។ បច្ចុប្បន្ន តម្លៃដំបូងមិនទាន់ត្រូវបានបង្ហើបឱ្យដឹងនៅឡើយ ប៉ុន្តែ អ្នកចូលរួមដេញថ្លៃត្រូវតែកក់ប្រាក់ 100,000 ដុល្លារអាម៉េរិក៕

November 23, 2022

ស្ថានីយផ្គត់ផ្គង់អគ្គិសនីដំណើរការស្វ័យប្រវត្តនៅលើឋានព្រះចន្ទ (វីដេអូ)

ក្រុមហ៊ុនធុរកិច្ចថ្មីរបស់ កាណាដា អភិវឌ្ឍស្ថានីយផលិតថាមពលដើរដោយពន្លឺព្រះអាទិត្យចល័តអាចបញ្ចូលអគ្គិសនីឱ្យបណ្ដារ៉ូបូតដែលផ្លាស់ទីចូលទៅក្នុងតំបន់ជម្រាលងងឹតនៅលើឋានព្រះចន្ទ។

តំបន់ជម្រាលងងឹតជានិច្ចនៅប៉ូលខាងត្បូងរបស់ព្រះចន្ទ ត្រូវបានអ្នកវិទ្យាសាស្ត្រយកចិត្តទុកដាក់ជាខ្លាំង ព្រោះតែវាអាចជាកន្លែងដែលលាក់អាថ៌កំបាំងស្ដីពីអតីតកាលរបស់ប្រព័ន្ធព្រះអាទិត្យ។ ប៉ុន្តែ ដោយសារតែពន្លឺព្រះអាទិត្យមិនចាំងទៅលើតំបន់ទាំងនោះ បណ្ដារ៉ូបូតដែលទៅកាន់ជម្រាលងងឹត នឹងត្រូវពឹងលើតែថាមពលតិចតួចនៅក្នុងថ្មរបស់ពួកវា។

ដើម្បីផ្ដល់ថាមពលស្ថិរភាពបន្ថែមទៀតទៅឱ្យរ៉ូបូតស្រាវជ្រាវព្រះចន្ទនាពេលអនាគត ក្រុមហ៊ុនធុរកិច្ចថ្មីរបស់ កាណាដា Stells Space គ្រោងនឹងនាំ «ស្ថានីយថាមពលដំណើរការស្វ័យប្រវត្ត» ទៅចុះលើដីរបស់ឋានព្រះចន្ទនៅឆ្នាំ 2025 ដើម្បីផ្គត់ផ្គង់អគ្គិសនីដល់តំបន់ជម្រាលគ្មានពន្លឺ អនុញ្ញាតឱ្យរ៉ូបូតបញ្ចូលថាមពលឡើងវិញ នេះបើតាម Space ចុះផ្សាយកាលពីថ្ងៃទី 21 វិច្ឆិកា 2022។

ស្ថានីយថាមពលខាងលើមានឈ្មោះថា Mobile Power Rover 1 (MPR-1)។ យន្តការនេះដំណើរការតាមរយៈការដាក់ដុំសម្រាប់ផ្ដល់ថាមពលនៅតំបន់ជម្រាលងងឹត បន្ទាប់មក MPR-1 នឹងឈរត្រដាងផ្ទាំងសូឡាក្រោមពន្លឺថ្ងៃ រួចបញ្ជូនអគ្គិសនីតាមខ្សែកាបទៅកាន់ដុំសម្រាប់បញ្ចូលថាមពល ដែលនៅទីនោះ បណ្ដារ៉ូបូតអាចទាញយកអគ្គិសនីដោយមិនបាច់ប្រើខ្សែ៕

November 23, 2022

(World Cup 2022)-អារ៉ាប៊ីសាអូឌីត អនុញ្ញាតឱ្យពលរដ្ឋឈប់សម្រាកមួយថ្ងៃ ក្រោយក្រុមជម្រើសជាតិឈ្នះ អាហ្សង់ទីន

មហាក្សត្រ Salman ប្រកាសឱ្យប្រជាពលរដ្ឋទាំងអស់របស់ អារ៉ាប៊ីសាអូឌិត ឈប់សម្រាកពីការងារនៅថ្ងៃទី 23 វិច្ឆិកា ដើម្បីអបអរជ័យជម្នះរបស់ក្រុមបាល់ទាត់ជម្រើសជាតិប្រទេសនេះ ដែលបានយកឈ្នះលើក្រុមរបស់ អាហ្សង់ទីន នៅ World Cup 2022។

«ថ្ងៃស្អែក 23 វិច្ឆិកា នឹងជាថ្ងៃសម្រាករបស់បុគ្គលិកទាំងអស់នៅក្នុងស្ថាប័នរដ្ឋ និងក្រុមហ៊ុនឯកជន ក៏ដូចជាសិស្សសាលាគ្រប់កម្រិត» ប្រកាសរបស់មហាក្សត្រ Salman របស់ អារ៉ាប៊ីសាអូឌីត លើកឡើងដូច្នេះ។

ការសម្រេចឱ្យមានការឈប់សម្រាកពីការងារមួយថ្ងៃដែលត្រូវបានមហាក្សត្រ Salman អនុម័តនេះ ត្រូវបានធ្វើឡើងទៅតាមសំណើរបស់រាជទាយាទ Mohammed bin Salman ដើម្បីអបអរជ័យជម្នះរបស់ក្រុមបាល់ទាត់ជម្រើសជាតិអារ៉ាប៊ីសាអូឌីត ដែលបានយកឈ្នះលើក្រុមរបស់ អាហ្សង់ទីន ក្នុងការប្រកួតនៅ World Cup 2022 ។

ជ័យជម្នះ 2-1 របស់ អារ៉ាប៊ីសាអូឌីត នៅចំពោះមុខ អាហ្សង់ទីន កាលពីថ្ងៃទី 22 វិច្ឆិកា ត្រូវបានគេចាត់ទុកថាជារឿងគួរឱ្យភ្ញាក់ផ្អើលបំផុតក្នុងប្រវត្តិសាស្ត្រ World Cup។ ប្រទេសមជ្ឈិមបូព៌ាមួយនេះបានយកឈ្នះលើបេក្ខភាពលំដាប់កំពូលមួយសម្រាប់តំណែងជើងឯករបស់រដូវកាលនេះ។

Lionel Messi រកបានមួយគ្រាប់ឱ្យ អាហ្សង់ទីន នៅក្នុងការទាត់បាល់ពិន័យនៅនាទីទី 10 ប៉ុន្តែ ការស៊ុតបញ្ចូលទី 2 គ្រាប់របស់ អារ៉ាប៊ីសាអូឌីត នៅក្នុងតង់ទីពីរ បានធ្វើឱ្យក្រុមរបស់ អាម៉េរិកខាងត្បូង ត្រូវបរាជ័យយ៉ាងអាម៉ាស់៕

https://www.youtube.com/watch?v=O3ubNZjK9mQ

November 23, 2022

(World Cup 2022)-អ្នកសារព័ត៌មានអាម៉េរិក ថា ត្រូវអាជ្ញាធរកាតា ស្នើឱ្យដោះអាវពេលចូលទស្សនាការប្រកួត

អ្នកសារព័ត៌មានអាម៉េរិក Wahl បានឱ្យដឹងថា គាត់ត្រូវបានគេបង្ខំឱ្យដោះអាវដែលមានរូបឥន្ទធនូ ដែលជានិមិត្តសញ្ញាគាំទ្រសហគមន៍ភេទទីបី នៅពេលទៅទស្សនាការប្រកួតបាល់ទាត់ World Cup នៅ ប្រទេសកាតា។

Grant Wahl អ្នកសារព័ត៌មានអាម៉េរិក ដែលធ្លាប់ធ្វើការឱ្យ Sports Illustrated ហើយបច្ចុប្បន្នមានគេហទំព័រផ្ទាល់ខ្លួន បានឱ្យដឹងថា គាត់ត្រូវបានឃាត់ខ្លួនក្នុងរយៈពេលខ្លីនៅខាងក្រៅកីឡដ្ឋាននៅ កាតា ព្រោះតែពាក់អាវមានរូបឥន្ទធនូដែលគាំទ្រដល់សហគមន៍ភេទទីបី (LGBTQ)។

លោក Wahl ប្រាប់ថា កម្លាំងសន្តិសុខរបស់ World Cup មិនអនុញ្ញាតឱ្យគាត់ចូលទស្សនាការប្រកួតរវាង ក្រុមជម្រើសជាតិអាម៉េរិក និង រាជាណាចក្រ Wales នៅកីឡដ្ឋាន Ahmad Bin Ali ក្នុងតំបន់ Al Rayyan និងបានស្នើឱ្យគាត់ដោះអាវនោះចេញ។ Wahl ក៏បាននិយាយថា ទូរស័ព្ទរបស់គាត់ត្រូវគេរឹបអូសនៅពេលគាត់បង្ហោះហេតុការណ៍នេះនៅលើ Twitter។

យោងតាមលោក Wahl មេសន្តិសុខម្នាក់ ក្រោយមកក៏បានរកគាត់ និងបានសូមអភ័យទោស ហើយអនុញ្ញាតឱ្យគាត់ចូលទៅក្នុងកីឡដ្ឋាន។ លោក Wahl ក៏បានឱ្យដឹងថា បានទទួលបានការសូមអភ័យទោសពីតំណាងរបស់ FIFA ផងដែរ។

ទាក់ទិននឹងហេតុការណ៍ខាងលើ មកដល់បច្ចុប្បន្ន ភាគីខាង FIFA មិនទាន់មានប្រតិកម្មឆ្លើយតបបែបណានៅឡើយ។

កាតា ចាត់ទុកស្នេហារបស់មនុស្សភេទដូចគ្នាគឺជា «រឿងខុសច្បាប់»។ ច្បាប់របស់ កាតា ចែងថា គូស្នេហ៍មនុស្សភេទដូចគ្នាអាចត្រូវបានពិន័យជាប្រាក់ និងដាក់ពន្ធនាគារ។ រដ្ឋាភិបាលកាតា ក៏មិនទទួលស្គាល់អាពាហ៍ពិពាហ៍មនុស្សភេទដូចគ្នា ក៏ដូចជាសកម្មភាពគាំទ្រសិទ្ធិរបស់សហគមន៍ LGBTQ៕

November 22, 2022

ដាណឺម៉ាក សាងសង់កោះសិប្បនិម្មិតសម្រាប់ដាក់ទួរប៊ីនខ្យល់ខ្នាតយក្ស 600 គ្រឿងដើម្បីផលិតអគ្គិសនី

ក្រោយសាងសង់រួចរាល់នៅឆ្នាំ 2030 កោះថាមពលដែលមានទុនវិនិយោគ 34 ពាន់លានដុល្លារអាម៉េរិកនេះ អាចផ្គត់ផ្គង់អគ្គិសនីតាមតម្រូវការរបស់មនុស្ស 10 លានគ្រួសារនៅ អឺរ៉ុប។

កោះសិប្បនិម្មិតដែល ប្រទេសដាណឺម៉ាក កំពុងសាងសង់នេះ អាចដាក់ទួរប៊ីនខ្យល់ខ្នាតយក្ស កម្ពស់ 260 ម៉ែត្រចំនួន 600 គ្រឿង។ កោះនេះធំប៉ុនទីលានបាល់ទាត់ចំនួន 18 បូកចូលគ្នា និងស្ថិតនៅចម្ងាយពីឧបទ្វីប Jutland 80 គីឡូម៉ែត្រទៅទិសខាងលិច ដើម្បីប្រើប្រាស់កម្លាំងខ្យល់នៅលើសមុទ្រឱ្យបានជាអតិបរមា។

តាមផែនការរបស់ រដ្ឋាភិបាលដាណឺម៉ាក គម្រោងនេះនឹងត្រូវធ្វើឱ្យរួចរាល់នៅឆ្នាំ 2030។ កោះសិប្បនិម្មិតនេះនឹងផ្គត់ផ្គង់អគ្គិសនីបានច្រើនជាងទ្វេដង ឬ 3 ដងនៅក្នុងអនាគត ធៀបនឹងបរិមាណអគ្គិសនីដែល ដាណឺម៉ាក់ ផលិតបានពីបណ្ដាស្ថានីយនៅលើសមុទ្រនាបច្ចុប្បន្ន និងខ្ពស់ជា 1.5 ដង ធៀបនឹងបរិមាណអគ្គិសនីដែលប្រទេសនេះប្រើប្រាស់ក្នុងមួយឆ្នាំ ដែលនេះអាចផ្គត់ផ្គង់តាមតម្រូវការរបស់មនុស្ស 10 លានគ្រួសារនៅ អឺរ៉ុប។

កោះសិប្បនិម្មិតនេះក៏មានថ្មសម្រាប់ផ្ទុកថាមពលអគ្គិសនី និងរោងចក្រអេឡិចត្រូលីស (electrolysis plant) សម្រាប់ផលិតអ៊ីដ្រូបៃតងផងដែរ។

សហភាពអឺរ៉ុប ក៏កំពុងមានគម្រោងបង្កើនការផលិតអគ្គិសនីដើរដោយកម្លាំងខ្យល់នៅលើសមុទ្រពី 12 GW នាបច្ចុប្បន្ន ឱ្យឡើងដល់ 300 GW នៅឆ្នាំ 2050។ កោះថាមពលខាងលើរបស់ ដាណឺម៉ាក អាចជាជំហានដ៏ធំមួយឆ្ពោះទៅរកគោលដៅនោះ។ ឆ្នាំ 2040 អគ្គិសនីផលិតពីកម្លាំងខ្យល់លើសមុទ្រអាចផ្គត់ផ្គង់តាមតម្រូវការរបស់មនុស្ស 150 លានគ្រួសារនៅពាសពេញ ទ្វីបអឺរ៉ុប៕

November 22, 2022

ហេតុអ្វីមហាសេដ្ឋីទីមួយនៅប្រទេសវៀតណាម ចំណាយប្រាក់រាប់រយលានដុល្លារដើម្បីសង់រោងចក្រផលិតថ្មផ្ទុកថាមពលក្នុងរយៈពេលមិនដល់មួយឆ្នាំ?

ថ្មផ្ទុកថាមពលត្រូវបានគេចាត់ទុកថាជាកត្តា «ស្លាប់រស់» នៅក្នុងការអភិវឌ្ឍរថយន្តដើរដោយអគ្គិសនី ខណៈដែលស្ថានភាពខ្វះប្រភពផ្គត់ផ្គង់ត្រូវបានគេព្យាករថានឹងមានសភាពធ្ងន់ធ្ងរក្នុងរយៈពេលច្រើនឆ្នាំខាងមុខ។

មហាសេដ្ឋីវៀតណាម ហ្វាំ ញឹត វឿង សង់រោងចក្រផលិតថ្មផ្ទុកថាមពល 2 កន្លែង តម្លៃរាប់រយលានដុល្លារអាម៉េរិក

ថ្មីៗនេះ ក្រុមហ៊ុន VinES និងក្រុមហ៊ុន Gotion, Inc. បានចាប់ផ្ដើមអនុវត្តគម្រោងសង់រោងចក្រផលិតថ្មផ្ទុកថាមពលសម្រាប់រថយន្តអគ្គិសនីនៅ ប្រទេសវៀតណាម។

គម្រោងនេះមានទុនសរុប 275 លានដុល្លារអាម៉េរិក លើផ្ទៃដីទំហំ 14 ហិកតា និងអាចផលិតថ្មដែលអាចផ្ទុកអគ្គិសនីបាន 5 GWh/ឆ្នាំ ស្មើនឹងថ្មចំនួន 30 លាន cell ក្នុងមួយឆ្នាំ។ តាមផែនការ រោងចក្រនេះនឹងចាប់ផ្ដើមដំណើរការផលិតក្នុងបរិមាណច្រើនចាប់ពីត្រីមាសទី 3 ឆ្នាំ 2024 និងក្លាយជារោងចក្រផលិតថ្ម LFP ដំបូងនៅ វៀតណាម ដែលនេះក៏រួមចំណែកក្នុងការបង្កើតការងាររាប់រយកន្លែងសម្រាប់ប្រជាជនក្នុងតំបន់។

មុននោះ កាលពីខែធ្នូ 2021 VinES បានបើកការដ្ឋានសាងសង់រោងចក្រផលិត និងវេចខ្ចប់ប្រអប់ថ្មមួយនៅលើផ្ទៃដី 8 ហិកតា សម្រាប់ដំណាក់កាលដំបូង ដែលអាចផលិតប្រអប់ថ្មបាន 100,000 ក្នុងមួយឆ្នាំ ដោយចំណាយដើមទុនប្រហែល 160 លានដុល្លារអាម៉េរិក។ បច្ចុប្បន្នការងារសាងសង់រោងចក្រនេះកំពុងស្ថិតក្នុងដំណាក់កាលបង្ហើយចុងក្រោយ មុនពេលដាក់ឱ្យដំណើរការចាប់ពីខែធ្នូ 2022 ដើម្បីផ្គត់ផ្គង់ថ្ម Lithium សម្រាប់រថយន្តអគ្គិសនី VinFast។

រោងចក្រផលិតរថយន្តអគ្គិសនី VinFast របស់ Vingroup

យោងតាមមេដឹកនាំក្រុមហ៊ុន VinES ក្រុមហ៊ុនបណ្ដាក់ទុនរួមគ្នាជាមួយនឹង Gotion គឺជាផ្នែកមួយដ៏សំខាន់ក្នុងយុទ្ធសាស្ត្រ «ម្ចាស់ការ» ស្ដីពីប្រភពផ្គត់ផ្គង់ថ្មផ្ទុកអគ្គិសនីសម្រាប់រថយន្ត VinFast និងយុទ្ធសាស្ត្រក្លាយជាក្រុមហ៊ុនផ្ដល់សេវាកម្មផ្នែកថាមពលរបស់ VinES ក៏ដូចជាយុទ្ធសាស្ត្រ «មុម 3» នៃក្រុមហ៊ុន Vingroup របស់ មហាសេដ្ឋីវៀតណាម ហ្វាម ញឹត វឿង (Pham Nhat Vuong)។

ពិភពលោកកំពុងតែខ្វះថ្មផ្ទុកថាមពលសម្រាប់រថយន្តអគ្គិសនី

វិស័យឧស្សាហកម្មរថយន្តកំពុងតែមានការប្រែប្រួលយ៉ាងខ្លាំងក្លា ក្នុងគ្រាដែលរថយន្តដើរដោយប្រេងឥន្ធនៈហ្វូស៊ីល កំពុងតែត្រូវបានបង្ខំឱ្យ «ចាកចេញ» បន្តិចម្ដងៗ ហើយទុកកន្លែងសម្រាប់រថយន្តអគ្គិសនី (EV)។ យោងតាម អង្គការថាមពលអន្តរជាតិ (IEA) បរិមាណរថយន្តអគ្គិសនីដែលលក់ចេញក្នុងទីផ្សារត្រូវបានព្យាករថានឹងកើនឡើងខ្ពស់ខ្លាំងក្នុងឆ្នាំ 2022 ពោលគឺនឹងឡើងដល់ 13% នៅទូទាំងពិភពលោក។

ក្នុងការផលិតរថយន្តអគ្គិសនី គេមិនអាចមិននិយាយដល់បច្ចេកវិទ្យាស្នូលរបស់រថយន្តប្រភេទនេះ នោះគឺថ្មផ្ទុកថាមពល ព្រោះវាមានចំណែករហូតដល់ 1/3 នៅក្នុងការចំណាយសរុបសម្រាប់ការផលិតរថយន្តអគ្គិសនីមួយគ្រឿង។ ថ្មផ្ទុកអគ្គិសនីបច្ចុប្បន្ន កំពុងខ្វះក្នុងបរិមាណច្រើន ហើយគ្រោងនឹងខ្វះច្រើនបន្ថែមទៀតនៅពេលបណ្ដាក្រុមហ៊ុនផលិតរថយន្ត នាំគ្នាបោះបង់ម៉ាស៊ីនចំហេះក្នុង។

មូលហេតុទាំងឡាយខាងលើនេះហើយ បាន និងកំពុងជំរុញឱ្យ មហាសេដ្ឋីវៀតណាម ក៏ដូចជាក្រុមហ៊ុន Vingroup ផ្ដោតសំខាន់ទៅលើការផលិតថ្មផ្ទុកថាមពលសម្រាប់រថយន្តអគ្គិសនី៕

November 22, 2022

Category: សង្គម និងសេដ្ឋកិច្ច