សង្គម និងសេដ្ឋកិច្ច - La Reine Media

ផ្លូវល្បឿនលឿនភ្នំពេញ-សីហនុ ផ្ដល់ឧបករណ៍ ETC-OBU ដើម្បីប្រើគន្លង ETC ដោយឥតគិតថ្លៃ បំណងចូលរួមទប់ស្កាត់ការកកស្ទះចរាចរណ៍នៅបញ្ជរបង់ប្រាក់

«ទទួលយកឧបករណ៍ ETC-OBU ដោយឥតគិតថ្លៃ ដើម្បីប្រើប្រាស់គន្លង ETC សម្រាប់ចេញចូលផ្លូវល្បឿនលឿនភ្នំពេញ-ក្រុងព្រះសីហនុ (ចាប់ពីថ្ងៃទី 28 វិច្ឆិកា ឆ្នាំ 2022 ដល់ 01 មករា 2023)» ប្រកាសរបស់ក្រុមហ៊ុនគ្រប់គ្រងផ្លូវល្បឿនលឿនភ្នំពេញ-ក្រុងព្រះសីហនុ ផ្សាយនៅព្រឹកថ្ងៃទី 30 វិច្ឆិកា 2022។

ដើម្បីចូលរួមទប់ស្កាត់ការកកស្ទះចរាចរណ៍នៅបញ្ជរបង់ប្រាក់ ក៏ដូចជាផ្តល់ភាពងាយស្រួល ជូនដល់បងប្អូនអ្នកបើកបរ នៅលើផ្លូវល្បឿនលឿន ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានរៀបចំជាការផ្តល់ជូនពិសេស នូវការបំពាក់ឧបករណ៍ ETC-OBU ជូនដល់បងប្អូនប្រជាពលរដ្ឋដោយឥតគិតថ្លៃ ចាប់ពីថ្ងៃទី 28 ខែវិច្ឆិកា 2022 រហូតដល់ថ្ងៃទី 01 មករា 2023 ខាងមុខនេះ នៅគ្រប់បញ្ជរបង់ប្រាក់ទាំង 8 ទីតាំង នៃផ្លូវល្បឿនលឿន។

ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានឱ្យដឹងថា «ដើម្បីទទួលបានឧបករណ៍ ETC-OBU សូមបងប្អូនភ្ជាប់មកជាមួយនូវអត្តសញ្ញាណបណ្ណម្ចាស់យានយន្ត បណ្ណសំគាល់យានយន្ត ឬវិញ្ញាបនបត្រត្រួតពិនិត្យបច្ចេកទេសយានយន្ត (ឆៀក)»។

ចំពោះគន្លងនេះ បងប្អូនអាចបញ្ចូលសមតុល្យទៅក្នុងផ្លាកលេខសម្គាល់យានយន្តជាមុន តាមកម្មវិធីធនាគារក្នុងទូរស័ព្ទដៃ (Mobile Banking) នៃគ្រឹះស្ថានហិរញ្ញវត្ថុ និងធនាគារដៃគូ របស់ក្រសួងសាធារណការ និងដឹកជញ្ជូន។

បច្ចុប្បន្នមានគ្រឹះស្ថានដៃគូ ចំនួន 7 ដែលបានដាក់ឱ្យប្រើប្រាស់ នូវកម្មវិធី Mobile Banking ដើម្បីបញ្ចូលសមតុល្យទឹកប្រាក់ តាមរយៈផ្លាកលេខសម្គាល់យានយន្ត ក្នុងនោះរួមមាន៖ ធនាគារ ជីបម៉ុង (Chip Mong Bank), ធនាគារ អេស៊ីលីដា (ACLEDA Bank), ធនាគារ វឌ្ឍនៈអាស៊ីចំកាត់ (ABA Bank), ធនាគារវីង(Wing Bank), ធនាគារ វឌ្ឍនៈ (VATTANAC Bank), ធនាគារកាណាឌីយ៉ា (Canadia Bank) និង លីហួរវេរលុយ។

សូមចូលទៅកាន់គេហទំព័រដែលអាចប្រើប្រាស់ធនាគារទូទាត់កម្រៃប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុ បានតាម https://ew.mpwt.gov.kh ។

បន្ថែមពីលើជម្រើសការប្រើប្រាស់គន្លងផ្លូវ ETC បងប្អូនក៏អាចជ្រើសយកការចេញចូលតាមគន្លង ANPR ផងដែរ ដែលតម្រូវអោយបញ្ចូលសមតុល្យជាមុនទៅក្នុងផ្លាកលេខដូចគ្នា។

*ទំនាក់ទំនង៖ ⁃ ព័ត៌មានពីសេវាកម្ម៖ 1399, ព័ត៌មានទូទៅ៖ 1275

November 30, 2022

សារព័ត៌មានអង់គ្លេស និយាយថា មហាសេដ្ឋីចិន Jack Ma កំពុងរស់លាក់ខ្លួននៅ តូក្យូ

មហាសេដ្ឋីចិន Jack Ma កំពុងតែរស់លាក់ខ្លួនដោយសប្បាយ កាត់បន្ថយវត្តមាននៅទីសាធារណៈក្នុងរយៈពេលជិត 6 ខែកន្លងនៅ រាជធានីរបស់ ប្រទេសជប៉ុន នេះបើតាម Financial Times។

Financial Times ដែលមានទីស្នាក់ការកណ្ដាលនៅ ក្រុងឡុងដ៍ ប្រទេសអង់គ្លេស និងជាកម្មសិទ្ធិរបស់ក្រុមហ៊ុន Nikkei ជប៉ុន កាលពីថ្ងៃទី 29 វិច្ឆិកា បានចុះផ្សាយថា ក្នុងអំឡុងជិតកន្លះឆ្នាំដែលបានរស់នៅក្នុង រាជធានីតូក្យូ មហាសេដ្ឋី Jack Ma រួមនឹងគ្រួសារទៅកាន់តំបន់សម្រាកលំហែកាយនៅជាយក្រុងជាញឹកញាប់ ហើយជួនកាលទៅកាន់ សហរដ្ឋអាម៉េរិក និង អ៊ីស្រាអែល។

នៅ តូក្យូ ស្ថាបនិករបស់ Alibaba រស់នៅដោយស្ងាត់ស្ងៀម ចៀសវាងការចាប់អារម្មណ៍របស់សាធារណជន។ មហាសេដ្ឋីចិនរូបនេះ មានចុងភៅ និងក្រុមអង្គរក្សផ្ទាល់ខ្លួន។

លោក Jack Ma ប្រើប្រាស់សេវាកម្មនៅក្លឹបមួយចំនួននៅខណ្ឌ Ginza និងតំបន់ហិរញ្ញវត្ថុ Marunouchi។ ក្នុងនោះ ក្លឹបនៅ Ginza គឺជាទីកន្លែងសម្ងាត់សម្រាប់ក្រុមអភិជនចិន នៅពេលពួកគេស្នាក់នៅ ឬបំពេញបេសកកម្មរយៈពេលយូរនៅ រាជធានីរបស់ ជប៉ុន។

ប្រភពព័ត៌មានឱ្យដឹងថា មិត្តភ័ក្ដិរបស់លោក Ma នៅ ប្រទេសចិន និយាយថា មហាសេដ្ឋីរូបនេះចាប់ផ្ដើមទម្លាប់គូរគំនូរដើម្បី «សម្លាប់ពេលវេលា»។ អ្នកខ្លះថា លោក Ma កំពុងពង្រីកផលប្រយោជន៍ផ្នែកជំនួញរបស់គាត់នៅ ប្រទេសជប៉ុន។ លោក Ma បានផ្ទេរអំណាចក្នុងការគ្រប់គ្រងក្រុមហ៊ុន Alibaba និង Ant ទៅឱ្យមនុស្សជំនាន់ថ្មី។

មូលនិធិ Jack Ma និងក្រុមហ៊ុន Ant មិនបានឆ្លើយតបនឹងសំណើសុំបកស្រាយអំពីព័ត៌មានខាងលើនេះនៅឡើយ។

លោក Jack Ma អាយុ 58 ឆ្នាំ ធ្លាប់ជាមហាសេដ្ឋីលំដាប់ទីមួយនៅ ប្រទេសចិន។ លោក Ma គឺជាស្ថាបនិករបស់ Alibaba និង Ant Gourp ជាក្រុមហ៊ុនដែលមានវឌ្ឍនភាពឡើងដល់ចំណុចកំពូលក្នុងវិស័យឯកជន និងធ្លាប់ត្រូវបានវាយតម្លៃខ្ពស់ជាងបណ្ដាក្រុមហ៊ុននៅ សហរដ្ឋអាម៉េរិក លើកលែងតែ Apple, Amazon និង Google។

ក៏ប៉ុន្តែ អាជ្ញាធរចិន កាលពី 2 ឆ្នាំមុន បានចាប់ផ្ដើមបញ្ចេញឥរិយាបថរឹតបន្តឹងទៅលើបណ្ដាក្រុមហ៊ុនបច្ចេកវិទ្យា ក្នុងនោះ ក្រុមហ៊ុន Ant Group របស់លោក Ma ក៏ត្រូវបានផ្អាកដំណើរការ IPO ដែលមានតម្លៃ 37 ពាន់លានដុល្លារអាម៉េរិក ទៅតាមបញ្ជាផ្ទាល់របស់ ប្រធានាធិបតីចិន។

Alibaba ក៏ត្រូវបានអាជ្ញាធរចិន ពិន័យ 2.8 ពាន់លានដុល្លារអាម៉េរិក ដោយចោទថា បានរំលោភច្បាប់ប្រឆាំងការរកស៊ីផ្ដាច់មុខ។ មុននោះ លោក Ma ត្រូវបានគេសំគាល់ឃើញថា ជំទាស់នឹងការកំណត់ស្ដីពីបច្ចេកវិទ្យា និងហិរញ្ញវត្ថុរបស់ ប្រទេសចិន។

ចាប់តាំងពីពេលនោះមក លោក Jack Ma ហាក់បាត់ខ្លួនពីការតាមដានរបស់សាធារណជន ហើយកន្លែងស្នាក់នៅរបស់លោកបានក្លាយជាប្រធានបទដែលមានមនុស្សចាប់អារម្មណ៍ច្រើន៕

November 30, 2022

អាយុទើបតែ 30 សោះ ទទួលបានមរតកជិត 16 ពាន់លានដុល្លារពី Red Bull

Mark Mateschitz ទទួលមរតកជិត 50% នៃភាគហ៊ុន Red Bull ពីឪពុក Dietrich Mateschitz និងក្លាយជាមនុស្សដែលរស់ក្នុងទំនាន់សហស្សវត្សរ៍ មានទ្រព្យច្រើនជាងគេនៅ អឺរ៉ុប។

ជាកូនរបស់មហាសេដ្ឋី Dietrich Mateschitz ដែលបានទទួលមរណភាព ទើប Mark បានទទួលមរតក 49% នៃភាគហ៊ុន Red Bull ដែលឪពុករបស់គាត់ជាសហស្ថាបនិក។ ចំណែកភាគហ៊ុនដែលនៅសល់គឺជាកម្មសិទ្ធិរបស់អ្នកជំនួញជនជាតិថៃ Chaleo Yoovidgya។

ការស្នងមរតកជាភាគហ៊ុននៃក្រុមហ៊ុនផលិតភេសជ្ជៈប៉ូវកម្លាំងធំជាងគេលើពិភពលោក រួមនឹងក្រុមប្រណាំងឡានប្រភេទ Formula One (F1) ចំនួន 2 នាំឱ្យ Mark Mateschitz មានទ្រព្យសរុបឡើងដល់ 15.7 ពាន់លានដុល្លារអាម៉េរិក នេះបើតាម Bloomberg Billionaires Index។ បើគិតតាមទិន្នន័យជាក់ស្ដែង មកដល់ថ្ងៃទី 29 វិច្ឆិកា 2022 លោក Mark Mateschitz គឺជាអ្នកមានជាងគេលំដាប់ទី 90 នៅលើពិភពលោក ដោយមានទ្រព្យ 16.4 ពាន់លានដុល្លារអាម៉េរិក។ គាត់ក៏ជាមហាសេដ្ឋីដែលមានទ្រព្យច្រើនជាងគេនៅ ប្រទេសអូទ្រីស។

លោក Dietrich Mateschitz និងកូនប្រុស Mark Mateschitz

មុននោះ កាលពីថ្ងៃទី 22 តុលា សហស្ថាបនិករបស់ Reb Bull លោក Dietrich Mateschitz បានទទួលមរណភាពក្នុងអាយុ 78 ឆ្នាំ។ យោងតាម Fortune លោក Mark Mateschitz បានក្លាយជាមហាសេដ្ឋីដែលស្ថិតក្នុងក្រុមមនុស្ស «រស់ឆ្លងសហស្សវត្សរ៍» (អ្នកកើតក្នុងអំឡុងទសវត្សរ៍ឆ្នាំ 1980 ដល់ពាក់កណ្ដាលទសវត្សរ៍ឆ្នាំ 1990) ដែលមានទ្រព្យច្រើនបំផុតនៅ អឺរ៉ុប និងទី 4 ក្នុងពិភពលោក៕

November 30, 2022

(World Cup 2022) – អាម៉េរិក ជូនដំណើរចាកចេញរបស់ អ៊ីរ៉ង់ ដោយលទ្ធផល 1-0

ក្រោយពីបានឈ្នះលើ អ៊ីរ៉ង់ 1-0 ដោយសារថ្វីជើងរបស់ Christian Pulisic កាលពីយប់ថ្ងៃទី 29 វិច្ឆិកា ក្រុមជម្រើសជាតិអាម៉េរិក ដណ្ដើមបានសំបុត្រដែលនៅសល់ក្នុងពូល B ឡើងទៅកាន់វគ្គ 1/8 របស់ World Cup 2022។

គ្រាប់បាល់ជ័យជម្នះតែមួយគ្រាប់គត់ត្រូវបានទាត់នៅនាទីទី 38 នៅពេល Weston McKennie បញ្ជូនបាល់ឱ្យ Sergino Dest រុលទៅកាន់ស្លាបខាងស្ដាំ។ Dest តែតបញ្ជូនទៅកាន់តំបន់គ្រោះថ្នាក់ដើម្បីឱ្យ Christian Pulisic ស្កាត់ស៊ុតប៉ើងសំណាញ់របស់ Alireza Beiranvand។

ដោយត្រូវការតែមួយពិន្ទុះទៀតដើម្បីបន្តដំណើរ ដូច្នេះ នៅក្នុងកីឡដ្ឋាន Al Thumana ក្រុមរបស់ អ៊ីរ៉ង់ ផ្ដោតទៅលើការការពារច្រើនជាង។ ក្នុងតង់ទីមួយ អ៊ីរ៉ង់ គ្រប់គ្រងបាល់បាន 39% និងទុកឱ្យ អាម៉េរិក បញ្ចេញកម្លាំង។

វិធីសាស្ត្រខាងលើរបស់ អ៊ីរ៉ង់ បានធ្វើឱ្យ អាម៉េរិក ជួបការលំបាក។ ក្រោយរកបានមួយគ្រាប់នៅនាទីទី 38 ដែលជាថ្វីជើងរបស់ Pulisic អាម៉េរិក ត្រូវទាត់រហូតដល់នាទីថែមម៉ោង ទើបអាចស៊ុតបញ្ចូលទីរបស់ អ៊ីរ៉ង់ ជាលើកទីពីរ។ ក៏ប៉ុន្តែ គ្រាប់បាល់នេះមិនត្រូវបានទទួលស្គាល់ ដោយសារ Weah អកហ្សឺ។

https://www.youtube.com/watch?v=Onc5HEhApn4

ចូលដល់តង់ទីពីរ ការប្រកួតមានសភាពខ្លាំងក្លា ដោយសារ អ៊ីរ៉ង់ ត្រូវការរកឱ្យបានគ្រាប់បាល់ស្មើ។ ក្រុមអាម៉េរិក ចាប់ផ្ដើមយកចិត្តទុកដាក់លើការការពារ ធ្វើឱ្យ អ៊ីរ៉ង់ គ្រប់គ្រងបាល់បានច្រើន។ ក៏ប៉ុន្តែ ចុងក្រោយ អ៊ីរ៉ង់ នៅតែចាញ់ អាម៉េរិក 0-1។

បរាជ័យនេះ នាំឱ្យ អ៊ីរ៉ង់ បាត់បង់តំណែងលេខ 2 ក្នុងពូល ហើយក្លាយជាតំណាងរបស់ អាស៊ី ទីពីរដែលត្រូវចាកចេញពី World Cup 2022 បន្ទាប់ពី ក្រុមម្ចាស់ផ្ទះ កាតា។ ចំណែក អាម៉េរិក វិញ ត្រូវបន្តដំណើរទៅមុខ ប៉ុន្តែក៏រងការខូចខាតច្រើននៅពេល Pulisic និង McKennie សុទ្ធតែចាកចេញពីទីលានប្រកួតដោយសាររងរបួស។

November 30, 2022

(World Cup 2022) – អតីតតារាបាល់ទាត់ David Beckham ស្នាក់នៅក្នុងសណ្ឋាគារតម្លៃ 24,000 ដុល្លារ/យប់ នៅ កាតា

អតីតតារាបាល់ទាត់ David Beckham ត្រូវបានគេជឿថា បានស្នាក់នៅក្នុងបន្ទប់មួយដែលត្រូវបានគេប្រៀបប្រដូចទៅនឹង «សណ្ឋាគារក្នុងសណ្ឋាគារ» ដោយមានតម្លៃ 24,000 ដុល្លារអាម៉េរិក/យប់ នៅពេលគាត់ស្ថិតនៅក្នុង ប្រទេសកាតា ដើម្បីតាមដាន World Cup 2022។

ទំព័រ Daily Mail កាលពីថ្ងៃទី 28 វិច្ឆិកា បានឱ្យដឹងថា អតីតកីឡាករជម្រើសជាតិអង់គ្លេស វ័យ 47 ឆ្នាំរូបនេះ បានស្នាក់នៅជិតមួយសប្ដាហ៍ ក្នុងសណ្ឋាគារ Mandarin Oriental នៅ រដ្ឋធានីដូហា ប្រទេសកាតា។

លោក David Beckham ស្នាក់នៅបន្ទប់ suite Baraha View ដែលស្ថិតនៅជាន់ខ្ពស់បំផុតរបស់សណ្ឋាគារ និងមានកន្លែងហូបចុកដោយឡែក អ្នកបម្រើដោយឡែក មានទីលាន និងអាងហែលទឹកដោយឡែក។ល។

បន្ទប់ប្រភេទខាងលើនេះ មានតម្លៃរហូតដល់ 24,000 ដុល្លារអាម៉េរិក សម្រាប់ការស្នាក់នៅមួយយប់។ ក៏ប៉ុន្តែ Beckham បានចាកចេញពីបន្ទប់នេះកាលពីចុងសប្ដាហ៍កន្លង ក្រោយពីមានលេចឮព័ត៌មានស្ដីពីទីកន្លែងស្នាក់នៅរបស់គាត់នៅលើបណ្ដាញសង្គម៕

បន្ទប់ប្រភេទ suite Baraha View នៅ ក្នុងសណ្ឋាគារ Mandarin Oriental

November 29, 2022

ទុនវិនិយោគសរុបសម្រាប់វិស័យឧស្សាហកម្មនៅ កម្ពុជា មកដល់ពាក់កណ្ដាលខែនេះ កើន 3 ពាន់លានដុល្លារ ធៀបនឹងឆ្នាំកន្លង

(ភ្នំពេញ) – កម្ពុជា មានរោងចក្រសរុបកើនដល់ 1,968 រោងចក្រ និងមានទុនវិនិយោគសរុប ប្រមាណជាង 16 ពាន់លានដុល្លារអាមេរិក គិតត្រឹមពាក់កណ្តាលខែវិច្ឆិកា 2022 នេះបើតាមការឱ្យដឹងនាថ្ងៃនេះរបស់ ឯកឧត្តម ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

យោងតាម ឯកឧត្តម ហេង សុខគង់ បច្ចុប្បន្ន កម្ពុជា មានរោងចក្រសរុបឡើងដល់ 1,968 រោងចក្រ ក្នុងនោះមានការចុះបញ្ជីរោងចក្រថ្មីចំនួន 161 រោងចក្រ រាប់ចាប់ពីដើមឆ្នាំ 2022 ដល់ពាក់កណ្ដាលខែវិច្ឆិកា 2022។ រដ្ឋលេខាធិការក្រសួងឧស្សាហកម្ម បញ្ជាក់ថា ទុនវិនិយោគសរុបរបស់រោងចក្រទាំងនោះ មានជាង 16 ពាន់លានដុល្លារ ច្រើនជាងប្រមាណ 3 ពាន់លានដុល្លារ បើធៀបនឹងឆ្នាំ 2021។

នៅក្នុងឆ្នាំ 2022 នេះ កម្ពុជា មានរោងចក្រត្រូវបិតទ្វារចំនួន 72 រោងចក្រ ប៉ុន្តែ នេះគឺជាដំណឹងល្អមួយ ព្រោះថា តួលេខនេះទាបជាងឆ្ងាយ បើធៀបទៅនឹង ១៤៨ រោងចក្រដែលត្រូវបានបិទទ្វារកាលពីឆ្នាំ 2021 នេះបើយោងតាមប្រភពព័ត៌មានក្នុងស្រុក៕

November 29, 2022

រកបានប្រាក់ចំណូល 3 ពាន់លានរៀល/ឆ្នាំ ពីការលក់របស់របរទាំងឡាយដែលមនុស្សគ្រប់គ្នាសុទ្ធតែមាន

មុនឆ្នាំ 2015 Mona Mejia គឺជាអ្នកម្ដាយ និងមេផ្ទះដែលមើលថែកូន 3 នាក់ នៅក្នុងទីក្រុង Houston ប៉ុន្តែបច្ចុប្បន្ន ក្នុងវ័យ 44 ឆ្នាំ នាងអាចរកបាន 735,000 ដុល្លារអាម៉េរិក (ជាង 3 ពាន់លានរៀល) ក្នុងមួយឆ្នាំ ដោយប្រកបរបររកស៊ីនៅផ្ទះ នេះបើតាម Insider។

Mona Mejia លក់ខោអាវ សម្ភារៈប្រើប្រាស់ក្នុងផ្ទះ និងប្រដាប់លេងទាំងចាស់ ទាំងថ្មី តាមរយៈបណ្ដាញសង្គម។ ដំបូង Mona Mejia លក់តែរបស់ចាស់ៗដែលនាងមាន ហើយក្រោយមកយកប្រាក់បន្តិចបន្ដួចនោះទៅទិញខោអាវដែលក្រុមហ៊ុន ឬម្ចាស់ហាងលក់លាងឃ្លាំង ឬសល់ក្នុងឃ្លាំងច្រើន យកមកលក់វិញក្នុងតម្លៃថ្លៃជាង។

ឆ្នាំ 2015 គ្រួសាររបស់ Mejia ត្រូវការប្រាក់ចំណូលបន្ថែមដើម្បីផ្គត់ផ្គង់ជីវភាព។ បន្ទាប់ពីមានការណែនាំពីបងស្រី Mejia ក៏បានចាប់ផ្ដើមដាក់លក់របស់របរដែលនាងមាននៅលើថ្នាល Poshmark។ លើកដំបូង Mejia លក់បានរ៉ូបមួយតម្លៃ 36 ដុល្លារ ក្រោយពីបើកគណនីបាន 11 ម៉ោង។ ពេលចាប់ផ្ដើមដាក់លក់ទំនិញច្រើនជាងមុន នាងដឹងថា ទាំងអស់សុទ្ធតែលក់ដាច់ក្នុងរយៈពេលដ៏ខ្លី ហើយបានប្រាក់ភ្លាមៗ។

ពីរឆ្នាំក្រោយមក ស្វាមីរបស់ Mejia ត្រូវវះកាត់ព្យាបាលបេះដូង។ ពេលនោះ Mejia ត្រូវរកប្រាក់តែឯងដើម្បីចិញ្ចឹមគ្រួសារ។ នាងក៏ចាប់ផ្ដើមដាក់លក់ទំនិញនៅលើថ្នាលបច្ចេកវិទ្យាផ្សេងៗគ្នា និងរកបានប្រហែល 1,000 ដុល្លាររៀងរាល់សប្ដាហ៍។ អំឡុងពេលនោះ Mejia រកបានប្រាក់ខ្ទង់ 50,000 ដុល្លារ/ឆ្នាំ។

ក៏ប៉ុន្តែ រហូតដល់ជិតមួយឆ្នាំមុន នៅពេល Mejia ចាប់ផ្ដើមលក់នៅក្នុងការឡាយ (live) តាម Instagram, TikTok និង Facebook ទើបការរកស៊ីប្រកបដោយជោគជ័យរបស់នាងបាន «ផ្ទុះឡើង» ពិតប្រាកដ។

Mejia សហការជាមួយក្រុមហ៊ុនផ្គត់ផ្គង់ទំនិញនានាដើម្បីទទួលបានតម្លៃទាបជាងទីផ្សារ។ យុទ្ធសាស្ត្រនេះបានជួយឱ្យនាងមានប្រៀបជាងគូប្រជែងដទៃ។ Mejia ក៏ថែមទាំងអាចរកបានប្រាក់ពីក្រុមហ៊ុននានា នៅពេលនាងស្លៀកពាក់ឈុតដែលស្នើដោយក្រុមហ៊ុនទាំងនោះ នៅពេលឡាយវីដេអូតាមបណ្ដាញសង្គម។

កាលពីឆ្នាំ 2021 Mejia ធ្លាប់រកបានប្រាក់ចំណូល 735,000 ដុល្លារ ពីមុខជំនួញ និងការសហការរវាងនាង និងបណ្ដាក្រុមហ៊ុនសម្លៀកបំពាក់។

បើទោះជាការដែលមានមនុស្សតាមដានច្រើនលើបណ្ដាញសង្គម អាចនាំមកនូវអត្ថប្រយោជន៍ក្នុងការលក់ទំនិញ ប៉ុន្តែ អ្នកអាចចាប់ផ្ដើមពីពេលនេះបាន មិនបាច់រង់ចាំដល់ល្បីឈ្មោះនោះទេ នេះបើតាម Mona Mejia។

ប្រាក់ចំណូលរបស់ Mejia បានកើន 30% ក្នុងរយៈពេល 6 ខែកន្លងទៅ។ នាងក៏មានផែនការបើកហាងលក់រាយ «pop up» មួយនៅឆ្នាំក្រោយ នៅក្នុងទីក្រុង Houston សហរដ្ឋអាម៉េរិក៕

November 29, 2022

(World Cup 2022) – អ្នកគាំទ្រពាក់អាវស៊ុភើម៉ែន កាន់ទង់តំណាងភេទទីបី រត់ចូលកណ្ដាលទីលានបាល់ទាត់

អ្នកគាំទ្រកីឡាបាល់ទាត់ម្នាក់ ពាក់អាវអ្នកក្លាហាន (superman) កាន់ទង់រូបឥន្ទធនូដែលតំណាងឱ្យសហគមន៍ភេទទីបី រត់សំដៅចូលទៅកណ្ដាលទីលានបាល់ទាត់ World Cup ក្នុងការប្រកួតរវាង ព័រទុយហ្កាល់ និង អ៊ុយរូហ្កាយ កាលពីម្សិលមិញ។

ភ្លាមៗក្រោយការរត់ចូលទីលានប្រកួត បុរសម្នាក់ដែលពាក់អាវមានប៉ាក់អក្សរសរសេរថា «សង្គ្រោះអ៊ុយក្រែន» និង «គោរពស្ត្រីអ៊ីរ៉ង់» ក៏ត្រូវបានក្រុមសន្តិសុខឃាត់ខ្លួន។ ហេតុការណ៍នេះកើតឡើងនៅលើទីលានប្រកួតនៃកីឡដ្ឋាន Lusail នៅ ប្រទេសកាតា ជាទីដែលមានការប្រកួតរវាង ក្រុមជម្រើសជាតិព័រទុយហ្កាល់ និងក្រុមរបស់ អ៊ុយរូហ្កាយ កាលពីថ្ងៃទី 28 ខែវិច្ឆិកាកន្លងទៅ។

គណៈកម្មការ World Cup មិនទាន់បង្ហើបឱ្យដឹងអំពីអត្តសញ្ញាណរបស់បុរសខាងលើនៅឡើយ ហើយក៏មិនច្បាស់ថា បុរសនេះអាចប្រឈមមុខនឹងការចោទប្រកាន់ ឬមួយត្រូវចាប់ឃុំខ្លួន ឬយ៉ាងណានៅឡើយដែរ។

November 29, 2022

ផ្លូវអណ្ដែតលើផ្ទៃទឹកទន្លេ ប្រវែងរាប់រយម៉ែត្រ អាចទ្រទម្ងន់មនុស្សបាន 10,000 នាក់

(ប្រទេសចិន) – ផ្លូវអណ្ដែតលើផ្ទៃទឹកទន្លេប្រវែង 500 ម៉ែត្រ នៅក្នុងខេត្ត Hubei ត្រូវបានសាងសង់ឡើងពីទូយោជ័រទន់ polyethylene មិនមានសសរទ្រ ប៉ុន្តែ អាចឱ្យរថយន្តបរពីលើបានយ៉ាងស្រួល។

ស្ពានអណ្ដែតគ្មានទម្រ Shiziguan ស្ថិតនៅក្នុងស្រុក Xuan’en ខេត្ត Hubei ប្រទេសចិន។ ផ្លូវនេះត្រូវបានស្ថាបនាលើផ្ទៃទឹកទន្លេមួយនៅក្នុងតំបន់ខាងលើ និងមានជម្រៅប្រហែល 60 ម៉ែត្រ។

ផ្លូវអណ្ដែតខាងលើ ថ្មីៗនេះទទួលបានចំណាប់អារម្មណ៍ច្រើន នៅពេលអ្នកលេងបណ្ដាញសង្គមចែករំលែកតៗគ្នាអំពីទិដ្ឋភាពរថយន្តបើកបរឆ្លងកាត់តាមផ្លូវនេះ។ ទិដ្ឋភាពក្នុងវីដេអូបង្ហាញថា ផ្លូវនេះធ្វើចលនាឡើងចុះ ប្រៀបដូចសត្វនាគកំពុងហែលលើផ្ទៃទឹកទន្លេដែលស្ថិតនៅកណ្ដាលព្រៃភ្នំ។

ផ្លូវអណ្ដែតលើទឹកនេះមានប្រវែង 500 ម៉ែត្រ និងទទឹង 4.5 ម៉ែត្រ។ ថ្វីបើមិនមានសសរ ប៉ុន្តែស្ពានដែលត្រូវបានសាងសង់ពីជ័រ polyethylene មួយខ្សែនេះនៅតែរក្សាលំនឹងបានល្អ និងទ្រាំបានទម្ងន់របស់មនុស្ស 10,000 នាក់ដែលឈរពីលើក្នុងពេលតែមួយ។

ដើម្បីចៀសវាងការបង្កឱ្យមានរលកធំៗដែលប៉ះពាល់ដល់ទន្លេ ក៏ដូចជាសុវត្ថិភាពរបស់មនុស្ស ល្បឿននៃការបើកបររថយន្តលើដងផ្លូវអណ្ដែតនេះ ត្រូវបានកំណត់។

អ្នកគ្រប់គ្រងផ្លូវអណ្ដែតលើទឹក Shiziguan បានឱ្យដឹងថា មនុស្សជាង 350,000 នាក់បានមកលេងស្ពាននេះនៅក្នុងរយៈពេល 10 ខែដើមឆ្នាំ 2022៕

November 29, 2022

កម្ពុជា ប្ដេជ្ញាជំរុញឱ្យមានរថយន្តអគ្គិសនីយ៉ាងតិច 40% នៅឆ្នាំ 2050

កម្ពុជា ប្ដេជ្ញាចិត្តជំរុញការប្រើប្រាស់រថយន្តអគ្គិសនីឱ្យបានយ៉ាងតិច 40% និង ម៉ូតូអគ្គិសនីយ៉ាងតិច 70% នៅឆ្នាំ 2050 នេះបើតាម រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា។

ប្រសាសន៍ខាងលើរបស់ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ត្រូវបានលើកឡើងនៅក្នុងកម្មពិធីសម្ពោធដាក់ឱ្យប្រើប្រាស់ស្ថានីយបញ្ចូលថាមពលយានយន្តអគ្គិសនី (EV Charging Stations) នៅទីស្ដីការក្រសួងសាធារណការ និងដឹកជញ្ជូន នាព្រឹកថ្ងៃទី 29 វិច្ឆិកា 2022។

ក្នុងព្រឹត្តិការណ៍នេះ ឯកឧត្តមទេសរដ្ឋមន្ត្រី ស៊ុន ចាន់ថុល បានមានប្រកាសថា កម្ពុជា បានចុះកិច្ចព្រមព្រៀងជាមួយ អង្គការសហប្រជាជាតិ ស្ដីពីការកាត់បន្ថយសកម្មភាពបំភាយឧស្ម័នកាបូន ហើយ កម្ពុជា ប្ដេជ្ញាចិត្តជំរុញការប្រើប្រាស់រថយន្តអគ្គិសនីឱ្យបានយ៉ាងតិច 40% និង ម៉ូតូអគ្គិសនីយ៉ាងតិច 70% នៅឆ្នាំ 2050។

លោករដ្ឋមន្ត្រីក៏បានលើកឡើងអំពីមូលហេតុធំៗមួយចំនួនដែលពលរដ្ឋគ្រប់រូបគួរតែងាកមកប្រើប្រាស់យានយន្តដែលដើរដោយថាមពលអគ្គិសនី ក្នុងនោះមានដូចជា ការកាត់បន្ថយការបំពុលបរិស្ថាន ដែលល្អសម្រាប់សុខភាព ការកាត់បន្ថយការចំណាយបានច្រើនធៀបនឹងយានយន្តចំហេះក្នុងជាដើម។ ជាងនេះ កម្ពុជា ក៏បន្ថយពន្ធនាំចូលរហូតដល់ 50% ផងដែរ សម្រាប់យានយន្តអគ្គិសនី។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន

ប្រមុខដឹកនាំក្រសួងសាធារណការ និងដឹកជញ្ជូន ក៏បានលើកជាឧទាហរណ៍ជាក់ស្ដែងថា ក្នុងចម្ងាយផ្លូវ 400 គីឡូម៉ែត្រដូចគ្នា អ្នកជិះរថយន្តសាំងនឹងត្រូវចំណាយប្រាក់អស់ 60 ដុល្លារអាម៉េរិក ខណៈអ្នកប្រើប្រាស់រថយន្តអគ្គិសនីត្រូវចំណាយអស់តែ 20 ដុល្លារប៉ុណ្ណោះសម្រាប់ការចាក់សាំង និងការបញ្ចូលថាមពលអគ្គិសនី។

ឯកឧត្តម ស៊ុន ចាន់ថុល មានប្រសាសន៍បញ្ជាក់ថា ចំនួនរថយន្តអគ្គិសនីដែលបានចុះឈ្មោះនៅ កម្ពុជា បច្ចុប្បន្នមានរហូតដល់ 556 គ្រឿង ច្រើនជាង 11 ដង ធៀបនឹង 45 គ្រឿងកាលពីឆ្នាំ 2021។ ចំណែកស្ថានីយបញ្ចូលថាមពលអគ្គិសនីសម្រាប់យានយន្តអគ្គិសនីវិញ នៅទូទាំងប្រទេស បច្ចុប្បន្នមាន 8 កន្លែង ប៉ុន្តែ ក្រសួងសាធារណការ អះអាងថា ចំនួននេះនឹងកើនឡើងដល់រាប់រយកន្លែងនៅឆ្នាំក្រោយ បន្ទាប់ពីមានគម្រោងវិនិយោគរបស់ ក្រុមហ៊ុនចិន BYD និង EV Energytech ។ល។

November 29, 2022

Category: សង្គម និងសេដ្ឋកិច្ច