សង្គម និងសេដ្ឋកិច្ច - La Reine Media

អេស្ប៉ាញ់ «ក្លាយជាក្រុមដែលចាញ់ការប្រកួតប៉េណាំងទីច្រើនបំផុតនៅ World Cup»

បរាជ័យនៅចំពោះមុខ ម៉ារ៉ុក កាលពីយប់ថ្ងៃទី 06 ធ្នូ គឺជាការចាញ់លើកទី 4 របស់ អេស្ប៉ាញ ក្នុងការប្រកួតប៉េណាំងទីនៅក្នុងប្រវត្តិសាស្ត្រ World Cup។

លើកដំបូងដែល អេស្ប៉ាញ បានចាញ់ក្នុងការប្រកួតប៉េណាំងទីនៅ World Cup គឺក្នុងឆ្នាំ 1986។ ពេលនោះ ក្រោមការដឹកនាំរបស់គ្រូបង្វឹក Miguel Munoz ក្រុមអេស្ប៉ាញ ចាញ់ បែលហ្ស៊ិក 4-5 បន្ទាប់ពីស្មើ 1-1 ក្នុងការប្រកួត 120 នាទី នៅវគ្គ 8 ក្រុម។ អតីតខ្សែប្រយុទ្ធ Eloy គឺជាកីឡាករតែម្នាក់គត់ដែលទាត់ប៉េណាំងទីមិនបានសម្រេច។

នៅ World Cup 2002 អេស្ប៉ាញ ត្រូវទាត់ប៉េណាំងទីនៅក្នុងការប្រកួត 2 លើក ក្នុងវគ្គជម្រុះផ្ទាល់ (knock-out)។ នៅវគ្គ 1/8 នោះ ថ្វីបើ Juanfran និង Valeron ទាត់ប៉េណាំងទីខុសគោលដៅ ប៉ុន្តែ ពួកគេនៅតែឈ្នះ អៀរឡង់ 3-2 ក្រោយពីរកបាន 1-1 ក្នុងអំឡុង 120 នាទី។ នេះគឺជាការប្រកួតប៉េណាំងទីតែមួយគត់នៅ World Cup ដែល អេស្ប៉ាញ បានឈ្នះ។

ក្រោយពីរកមិនបានគ្រាប់បាល់ (0-0) ពេលទាត់ជាមួយ កូរ៉េខាងត្បូង ក្នុងវគ្គ 1/8 នៅ World Cup 2002 អេស្ប៉ាញ ជាថ្មីម្ដងទៀត ត្រូវប្រកួតប៉េណាំងទី។ ពេលនោះ អេស្ប៉ាញ ត្រូវចាញ់ កូរ៉េខាងត្បូង 3-5។

បញ្ហាដូចខាងលើបានកើតឡើងចំពោះ អេស្ប៉ាញ ជាថ្មីនៅ World Cup កាលពី 4 ឆ្នាំមុន នៅពេលពួកគេចាញ់ក្រុមម្ចាស់ផ្ទះ World Cup 2018 រុស្ស៊ី នៅវគ្គ 8 ក្រុម។

អត្រានៃការទាត់ប៉េណាំងទីជោគជ័យរបស់ អេស្ប៉ាញ នៅ World Cup គឺត្រឹមតែ 57.8% ប៉ុណ្ណោះ ដោយសម្រេចបាន 11 នៅក្នុងចំណោម 19 គ្រាប់ដែលបានទាត់។

ការប្រកួតចាញ់ ម៉ារ៉ុក នៅលើទីលាន Education City កាលពីយប់ថ្ងៃទី 06 ធ្នូ ក៏បានបង្ហាញថា អេស្ប៉ាញ ទាត់ប៉េណាំងទីបរាជ័យទាំងស្រុង។ Pablo Sarabia ទាត់ចំបង្គោលទីនៅពេលស៊ុតប៉េណាំងទីគ្រាប់ដំបូង មុនពេលគ្រាប់បាល់របស់ Carlos Soler និង Sergio Busquests ត្រូវបានអ្នកចាំទី Bono ចាប់បាននៅក្នុងការស៊ុត 2 គ្រាប់ដែលនៅសល់។

https://www.youtube.com/watch?v=nKsOe7hDgMA

ការបរាជ័យ 0-3 ខាងនេះក៏ធ្វើឱ្យ អេស្ប៉ាញ យកឈ្នះលើ អង់គ្លេស និង អ៊ីតាលី ក្នុងការឡើងទៅកាន់តំណែងដែលគ្មានក្រុមណាមួយចង់បាន នោះគឺ «ក្រុមដែលចាញ់ប៉េណាំងទីច្រើនបំផុតនៅក្នុងប្រវត្តិសាស្ត្រ World Cup»។ ចំណែកក្រុមដែលទាត់ប៉េណាំងទីល្អបំផុតនៅ World Cup គឺ អាហ្សង់ទីន ក្នុងនោះ ពួកគេបានឈ្នះ 4 ប្រកួត ក្នុងការទាត់ 5 ប្រកួត៕

December 7, 2022

ព័រទុយហ្កាល់ ឈ្នះយ៉ាងកក្រើកមេឃនៅវគ្គ 1/8 របស់ World Cup 2022

(កាតា)- ខ្សែប្រយុទ្ធ Goncalo Ramos បង្កើតបាន hat-trick (រកបាន 3 គ្រាប់ក្នុង 1 ប្រកួត) ដំបូង នៅពេលទាត់ជំនួស Cristiano Ronaldo ជួយឱ្យព័រទុយហ្កាល់ ឈ្នះ ស្វ៊ីស 6-1 នៅវគ្គ 1/8 របស់ World Cup 2022 កាលពីយប់ថ្ងៃទី 06 ធ្នូ។

គ្រូបង្វឹក Fernando Santos ដាក់ Ronaldo ជាកីឡាករបម្រុង បន្ទាប់ពីគាត់បាននិយាយថា មិនពេញចិត្តនឹងឥរិយាបថរបស់ប្រធានក្រុមរូបនេះ។ បើទោះជាត្រូវបានដាក់ឱ្យនៅជាកីឡាករបម្រុង ប៉ុន្តែ Ronaldo ក៏បានទាក់ទាញចំណាប់អារម្មណ៍របស់អ្នកកាន់កាមេរ៉ា នៅពេលគោរពទង់ជាតិ។ កាមេរ៉ាប្រហែលជាង 10 តម្រង់ទៅរកក្រុមជម្រើសជាតិនៅលើទីលានប្រកួត ខណៈជិត 100 កាមេរ៉ា បាញ់សំដៅទៅតំបន់បច្ចេកទេស ជាទីដែល Ronaldo កំពុងស្ថិតនៅជាកីឡាករបម្រុង។ គាត់ច្រៀងដណ្ដើរ សើចបណ្ដើរ នៅពេលក្លាយជាកីឡាករបម្រុងនៅក្នុងរដូវកាលបាល់ទាត់ផ្លូវការរបស់ ព័រទុយហ្កាល់ រាប់ចាប់ពីឆ្នាំ 2008។

ក៏ប៉ុន្តែ នៅពេលបាល់ចាប់ផ្ដើមរមៀលលើទីលានប្រកួត ក្រុមកីឡាករព័រទុយហ្កាល់ ក៏ដណ្ដើមបានចំណាប់អារម្មណ៍ឡើងវិញ ពិសេសគឺខ្សែប្រយុទ្ធវ័យ 21 ឆ្នាំ Goncalo Ramos ដែលទាត់ជំនួស Ronaldo។ នេះគឺជាលើកដំបូងដែល Ramos ទាត់ក្នុងនាមជាកីឡាករសំខាន់សម្រាប់ ព័រទុយហ្កាល់។ ប៉ុន្តែ Ramos បានធ្វើឱ្យមានការភ្ញាក់ផ្អើលខ្លាំងនៅពេលបង្កើតបាន hat-trick ជាលើកដំបូងនៅក្នុងការប្រកួតដណ្ដើមពានរង្វាន់ ហើយក៏ជា hat-trick ដំបូងនៅវគ្គជម្រុះផ្ទាល់របស់ World Cup រាប់ចាប់ពីឆ្នាំ 1990។

Ramos រកបានគ្រាប់បាល់ដំបូងជូន ព័រទុយហ្កាល់ ខណៈគ្រាប់ទីពីររកបានដោយកីឡាករ Pepe ដែលពាក់ស្លាកជាប្រធានក្រុមជំនួស Ronaldo។ Ramos រកបានគ្រាប់ទីពីររបស់ខ្លួន ដែលជាគ្រាប់ទីបីសម្រាប់ ព័រទុយហ្កាល់នៅដើមតង់ទីពីរ។ Ramos សម្រេចបាន hat-trick របស់ខ្លួននៅនាទីទី 67។

និយាយរួម ទាំង 6 គ្រាប់ដែលក្រុមជម្រើសជាតិរបស់ ព័រទុយហ្កាល់ រកបាន គឺសុទ្ធតែជាជ័យជម្នះដែលបង្កើតឡើងដោយការទាត់ដ៏គួរឱ្យជក់ចិត្ត។

ក្នុងការប្រកួតនេះ Ronaldo មិនបានចូលរួម ប៉ុន្តែ ដោយត្រូវរង់ចាំដល់ការប្រកួតបន្ទាប់នៃវគ្គ knock-out ពេលដែល ព័រទុយហ្កាល់ ប៉ះនឹង ម៉ារ៉ុក នៅថ្ងៃទី 10 ធ្នូ លើទីលាន Al Thumama។ បើសិនជាបានឡើងដល់វគ្គពាក់កណ្ដាលផ្ដាច់ព្រ័ត្រ Ronaldo និងក្រុមព័រទុយហ្កាល់ នឹងត្រូវជួប ក្រុមបារាំង៕

https://www.youtube.com/watch?v=D8wVDyEeWRM

December 7, 2022

Neymar ដើរតាមដាន Pele និង Ronaldo របស់ ប្រេស៊ីល នៅ World Cup

(កាតា)- គ្រាប់បាល់ដែលបានស៊ុតបញ្ចូលទីជប៉ុន បានជួយឱ្យ Neymar ក្លាយជាកីឡាករទីបីក្នុងប្រវត្តិសាស្ត្ររបស់ ប្រេស៊ីល ដែលរកបានគ្រាប់បាល់នៅក្នុង World Cup ចំនួន 3 រដូវកាល បន្ទាប់ពី Pele និង Ronaldo។

Neymar បានចូលរួម World Cup លើកដំបូងក្នុងវ័យ 22 ឆ្នាំ កាលពីឆ្នាំ 2014។ កីឡាករនេះស៊ុតបញ្ចូលទីបាន 4 គ្រាប់នៅក្នុង World Cup ដែល ប្រេស៊ីល ជាម្ចាស់ផ្ទះ និងបានស៊ុតបញ្ចូលទីរបស់ ក្រូអាត និង កាមេរុន។ ដល់ World Cup 2018 នៅ រុស្ស៊ី Neymar ក៏រកបាន 2 គ្រាប់ទៀត។

World Cup 2022 កីឡាករ Neymar រកបានគ្រាប់បាល់ដំបូងនៅពេលប៉ះនឹងក្រុមរបស់ ជប៉ុន ក្នុងវគ្គ 1/8។ ឯតទគ្គកម្មរបស់ ប្រេស៊ីល បច្ចុប្បន្ននៅតែជារបស់ Pele ដោយសារតែគាត់រកបានគ្រាប់បាល់សរុប 12 គ្រាប់ នៅក្នុង 14 ប្រកួតរបស់ World Cup ចំនួន 4 រដូវកាលបន្តបន្ទាប់ ចាប់ពីឆ្នាំ 1958 ដល់ 1970។

ចំណែក Ronaldo Nazario ក៏ចូលរួមលេងនៅ World Cup បាន 4 រដូវកាល ប៉ុន្តែ រកបានគ្រាប់បាល់តែក្នុង 3 រដូវកាល គឺ 1998, 2002 និង 2006 ក្នុងនោះ គ្រាប់បាល់សរុបដែលកីឡាកររូបនេះរកបានគឺ 15 គ្រាប់ នៅក្នុង 19 ប្រកួត៕

December 6, 2022

កម្ពុជា ទទួលបានប្រាក់កម្ចី 50 លានដុល្លារពីធនាគារអភិវឌ្ឍអាស៊ី ដើម្បីអភិវឌ្ឍសេដ្ឋកិច្ច និងលើកកម្ពស់ការប្រកួតប្រជែក

(ហ្វ៊ីលីពីន)- ធនាគារអភិវឌ្ឍអាស៊ី (ADB) បានអនុម័តប្រាក់កម្ចីដែលមានតម្លៃ 50 លានដុល្លារអាម៉េរិក ទៅតាមកម្មវិធីរង 1 នៃកម្មវិធីពាណិជ្ជកម្ម និងសមត្ថភាពប្រកួតប្រជែង ក្នុងបំណងជួយដល់ រាជរដ្ឋាភិបាលកម្ពុជា ក្នុងការធ្វើពិពិធកម្មសេដ្ឋកិច្ច និងបង្កើនសមត្ថភាពប្រកួតប្រជែងជាសកល។

កម្មវិធីខាងលើនឹងជួយស្ដារសេដ្ឋកិច្ចក្រោយវិបត្តិកូវីដ-19 នៅ កម្ពុជា តាមរយៈការគាំទ្រដល់ការកែទម្រង់របស់ រាជរដ្ឋាភិបាល ដើម្បីកែលំអបរិស្ថានវិនិយោគ និងពាណិជ្ជកម្ម ការជំរុញវឌ្ឍនភាពរបស់បណ្ដាអាជីវកម្មខ្នាតតូចបំផុត និងសហគ្រាសធុនតូច និងមធ្យម រួមនឹងការកែលំអគោលនយោបាយពាណិជ្ជកម្ម ក៏ដូចជាការសម្រួលវិស័យពាណិជ្ជកម្ម។

កម្មវិធីនេះក៏នឹងជួយឱ្យ កម្ពុជា កែលំអការអនុវត្តកិច្ចព្រមព្រៀងពាណិជ្ជកម្មក្នុងតំបន់ និងបង្កើនកិច្ចសហប្រតិបត្តិការស្ដីពីការសម្រួលកិច្ចការពាក់ព័ន្ធនឹងវិស័យពាណិជ្ជកម្ម ដើម្បីបង្កបង្កើតឱកាសសម្រាប់សហគ្រាសកម្ពុជា ក្នុងការនាំចេញទំនិញផងដែរ៕

December 6, 2022

(World Cup 2022)- ប្រេស៊ីល មានឱកាសជាង 50% ដែលអាចឡើងដល់វគ្គផ្ដាច់ព្រ័ត្រ

(កាតា)- ទំព័រស្ថិតិ FiveThirtyEight វាយតម្លៃថា ប្រេស៊ីល មានសមត្ថភាព 51% ដែលអាចឡើងដល់វគ្គផ្ដាច់ព្រ័ត្រ និង 32% អាចក្លាយជាជើងឯក World Cup 2022 ក្រោយការប្រកួតមួយចំនួនកាលពីយប់ថ្ងៃទី 05 ធ្នូ។

World Cup 2022 នៅសល់ 10 ក្រុមទៀត បន្ទាប់ពីការប្រកួតកាលពីយប់មិញ ក្នុងនោះ 3 គូដែលនឹងប្រកួតក្នុងវគ្គ 1/8 ត្រូវបានកំណត់រួចហើយគឺ ហូឡង់-អាហ្សង់ទីន, អង់គ្លេស-បារាំង និង ប្រេស៊ីល-ក្រូអាត។ 2 គូក្រៅពីនេះនៅក្នុងវគ្គ 1/8 គឺ អេស្ប៉ាញ-ស្វ៊ីស និង ព័រទុយហ្កាល់-ម៉ារ៉ុក នឹងប្រកួតនៅយប់ថ្ងៃទី 06 ធ្នូនេះ។

ក្នុងចំណោម 10 ក្រុមដែលបានរៀបរាប់ខាងលើ ប្រេស៊ីល ត្រូវបានចាត់ទុកថាជាបេក្ខភាពលេចធ្លោជាងគេ ដោយមានឱកាស 77% អាចឡើងដល់វគ្គពាក់កណ្ដាលផ្ដាច់ព្រ័ត្រ និង 51% អាចឡើងដល់វគ្គផ្ដាច់ព្រ័ត្រ និង 32% អាចក្លាយជាជើងឯក។

អាហ្សង់ទីន ឈរលំដាប់ទី 2 ដោយមានឱកាស 58% អាចឡើងដល់វគ្គពាក់កណ្ដាលផ្ដាច់ព្រ័ត្រ, 24% អាចឡើងដល់វគ្គផ្ដាច់ព្រ័ត្រ និង 13% អាចក្លាយជាជើងឯក។ ចំណែកឱកាសរបស់ អាហ្សង់ទីន, អេស្ប៉ាញ, អង់គ្លេស និង បារាំង មានប្រហាក់ប្រហែលគ្នា។ រីឯ ហូឡង់ និង ព័រទុយហ្កាល់ ស្ថិតក្នុងក្រុមដែលមានភាគរយតិចជាង ដោយមានសមត្ថភាពអាចដណ្ដើមបានតំណែងជើងឯកតែ 7% និង 6% ប៉ុណ្ណោះ។

Fivethirtyight ដែលជាទំព័រជំនាញក្នុងការវិភាគ ស្រង់ស្ថិតិនៅក្នុងវិស័យនយោបាយ សេដ្ឋកិច្ច និងកីឡាជាដើម ត្រូវបានបង្កើតឡើងកាលពីឆ្នាំ 2008 នៅ សហរដ្ឋអាម៉េរិក។ ទំព័រនេះត្រូវបានទីភ្នាក់ងារសារព័ត៌មានធំៗរបស់ពិភពលោកដូចជា The New York Times, ESPN, ABC News ជាដើម និយមប្រើប្រាស់៕

December 6, 2022

ចំនួនយានយន្តអគ្គិសនីនៅ កម្ពុជា កើនឡើងជិត 5,600 ភាគរយ ធៀបនឹងឆ្នាំកន្លង

គិតត្រឹមខែតុលា ឆ្នាំ 2022 ចំនួនយានយន្តអគ្គិសនីដែលបានចុះបញ្ជីនៅ កម្ពុជា បានកើនឡើងដល់ 625 គ្រឿង ពោលគឺកើនប្រហែល 5,582% បើធៀបទៅនឹងឆ្នាំ 2021 នេះបើតាម ឯកឧត្តម ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូន។

ប្រសាសន៍របស់ ឯកឧត្តម ពៅ ម៉ាលី ត្រូវបានលើកឡើងកាលពីថ្ងៃទី 05 ធ្នូ 2022 នៅក្នុងពិធីបើកសិក្ខាសាលាស្តីពីការប្រមូលធាតុចូលលើសេចក្តីព្រាងគោលនយោបាយអភិវឌ្ឍន៍យានយន្តអគ្គិសនី ដោយមានការចូលរួមពីក្រុមការងារអន្តរក្រសួងចំនួន 9 ស្ថាប័ន តំណាងអភិបាល នៃគណៈ អភិបាល 25 រាជធានី-ខេត្ត រួមនឹងដៃគូអភិវឌ្ឍជាច្រើនរួមមាន អង្គការ UNDP ធនាគារពិភពលោក និងវិស័យឯកជន។

ឯកឧត្តម ពៅ ម៉ាលី ថ្លែងថា ចំនួនយានយន្តអគ្គិសនីដែលបានចុះបញ្ជីនៅ កម្ពុជា គិតត្រឹមខែតុលា ឆ្នាំ 2022 បានកើនឡើងដល់ 625 គ្រឿង ពោលគឺកើនប្រហែល 5,582% បើធៀបទៅនឹងឆ្នាំ 2021។ ក្រសួងសាធារណការ បានឱ្យដឹងថា រាជរដ្ឋាភិបាលបានយល់ព្រមជាគោលការណ៍ឱ្យ ក្រសួងនេះបង្កើត និងដឹកនាំក្រុមការងារអន្តរក្រសួង ដើម្បីតាក់តែងលិខិតបទដ្ឋានគតិយុត្ត គោលនយោបាយ និងយុទ្ធសាស្ត្រជាតិសម្រាប់គ្រប់គ្រង និងអភិវឌ្ឍន៍យានយន្តអគ្គិសនីនៅ កម្ពុជា។

យោងតាម រដ្ឋលេខាធិការក្រសួងសាធារណការ ថ្មីៗនេះ ក្រសួងបាន និងកំពុងរៀបចំសេចក្តីព្រាងគោលនយោបាយជាតិស្តីពីការដឹកជញ្ជូន ផែនទីចង្អុលផ្លូវបណ្តាញស្ថានីយបញ្ចូលថាមពលយានយន្តអគ្គិសនី ការ លើកទឹកចិត្តអ្នកប្រើប្រាស់យានយន្តអគ្គិសនី ការរៀបចំផែនទីបង្ហាញផ្លូវក្នុងការរៀបចំហេដ្ឋារចនាសម្ព័ន្ធគាំទ្រនានា ការលើកទឹកចិត្តឱ្យមានការបង្គុំដំឡើង និងផលិតយានយន្តអគ្គិសនីនៅ កម្ពុជា ផងដែរ៕

រថយន្តអគ្គិសនី 7 គ្រឿង ត្រូវបានប្រគល់ជូន ក្រសួងសាធារណការ និងដឹកជញ្ជូន ក្នុងពិធីសម្ពោធបើកឱ្យដំណើរការជាផ្លូវការស្ថានីយបញ្ចូលថាមពលយានយន្តអគ្គិសនី នៅទីស្ដីការក្រសួងសាធារណការ កាលពីថ្ងៃទី 29 វិច្ឆិកា 2022

ម៉ូតូអគ្គិសនី 30 គ្រឿង ត្រូវបានប្រគល់ជូន ក្រសួងសាធារណការ និងដឹកជញ្ជូន ក្នុងពិធីសម្ពោធបើកឱ្យដំណើរការជាផ្លូវការស្ថានីយបញ្ចូលថាមពលយានយន្តអគ្គិសនី នៅទីស្ដីការក្រសួងសាធារណការ កាលពីថ្ងៃទី 29 វិច្ឆិកា 2022

December 6, 2022

Tesla កាត់បន្ថយការផលិតរថយន្តអគ្គិសនីនៅ Shanghai ប្រទេសចិន

ក្រុមផលិតរថយន្តអគ្គិសនីអាម៉េរិក Tesla មានផែនការកាត់បន្ថយការផលិតនៅឯរោងចក្រក្នុងទីក្រុង Shanghai ដោយសារតែតម្រូវការជាក់ស្ដែងមិនសមតាមបំណង នេះបើតាមប្រភពព័ត៌មានរបស់ Bloomberg។

ការកាត់បន្ថយខាងលើនឹងមានសុពលភាពចាប់ពីសប្ដាហ៍នេះ។ ប្រភពព័ត៌មានរបស់ Bloomberg ឱ្យដឹងថា ឥរិយាបថនេះអាចបន្ថយបរិមាណរថយន្តរបស់ Tesla ប្រហែល 20%។ ការសម្រេចនេះត្រូវបានលើកឡើងបន្ទាប់ពី Tesla បានវាយតម្លៃរយៈពេលខ្លីចំពោះទីផ្សារចិន។ តំណាងរបស់ Tesla នៅ ប្រទេសចិន បានបដិសេធការស្នើសុំការអធិប្បាយទាក់ទងនឹងបញ្ហានេះ។

ក៏ប៉ុន្តែ ក្រុមហ៊ុនរបស់ មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស នៅតែអាចបង្កើនបរិមាណឡើងវិញនៅពេលតម្រូវការទីផ្សារបានកែលំអ។ នេះគឺជាលើកដំបូងហើយដែល Tesla កាត់បន្ថយបរិមាណដោយខ្លួនឯងសម្រាប់រោងចក្រនៅ Shanghai។ ការកាត់បន្ថយច្រើនលើកមុននោះគឺដោយសារបទបញ្ជាបិទខ្ទប់ដើម្បីបង្ការកូវីដ-19។

ការកាត់បន្ថយបរិមាណខាងលើបង្ហាញថា តម្រូវការទីផ្សាររថយន្តអគ្គិសនី Tesla នៅ ប្រទេសចិន មិនអាចតាមទាន់ការផ្គត់ផ្គង់របស់រោងចក្រនៅ Shanghai បន្ទាប់ពីបរិមាណនៃការផលិតត្រូវបានដំឡើងទ្វេដង ពោលគឺប្រហែល 1 លានគ្រឿង/ឆ្នាំ។

Junheng Li នាយកប្រតិបត្តិរបស់ក្រុមហ៊ុនស្រាវជ្រាវភាគហ៊ុន JL Warren Capital បានឱ្យដឹងថា សមត្ថភាពផលិតរបស់រោងចក្រ Tesla នៅ Shanghai គឺប្រហែល 85,000 គ្រឿង/ខែ។

ប្រភពព័ត៌មានឱ្យដឹងថា មូលហេតុឫសគល់នៃការកាត់បន្ថយបរិមាណរថយន្តរបស់ Tesla នៅ Shanghai គឺមកពីមានការប្រកួតប្រជែងដែលកាន់តែមានច្រើនឡើងពីបណ្ដាក្រុមហ៊ុនក្នុងស្រុក ក្នុងនោះមាន BYD និង Guangzhou Automobile Group ជាដើម៕

December 6, 2022

ទ្វីបអាស៊ី អស់មានក្រុមតំណាងនៅ World Cup 2022 ក្រោយពី កូរ៉េខាងត្បូង និងជប៉ុន ត្រូវបានជម្រុះ

(កាតា)- បរាជ័យរបស់ ជប៉ុន និង កូរ៉េខាងត្បូង កាលពីយប់ថ្ងៃទី 05 ធ្នូ 2022 បានធ្វើឱ្យ ទ្វីបអាស៊ី ត្រូវអស់តំណាងនៅ World Cup 2022។

កូរ៉េខាងត្បូង ប៉ះនឹងក្រុមរបស់ ប្រេស៊ីល ក្នុងនាមជាក្រុមតំណាងឱ្យ ទ្វីបអាស៊ី ចុងក្រោយនៅ World Cup 2022 ប៉ុន្តែ ពួកគេត្រូវបាននាំមុខ 4 គ្រាប់នៅនាទីទី 36។ បរាជ័យ 1-4 នៅលើកីឡដ្ឋាន Al Janoub កាលពីយប់មិញ នាំឱ្យ Son Heung-min និងក្រុមជម្រើសជាតិកូរ៉េខាងត្បូង ត្រូវអស់ការប្រកួតនៅ World Cup 2022 ចាប់ពីពេលនោះ។

ប៉ុន្មានម៉ោងមុនការប្រកួតរវាង កូរ៉េខាងត្បូង និង ប្រេស៊ីល ជប៉ុន ក៏បានចាញ់ ក្រូអាត 1-3 ក្នុងការស៊ុតបាល់ប៉េណាំងទី (Penalty Soot-out)។ បរាជ័យរបស់ កូរ៉េខាងត្បូង និង ជប៉ុន បានធ្វើឱ្យ ទ្វីបអាស៊ី ត្រូវអស់ក្រុមតំណាងរលីង នៅ World Cup 2022។ កាលពីថ្ងៃទី 03 ធ្នូ អូស្ត្រាលី ត្រូវចាកចេញពី World Cup 2022 ត្រឹមវគ្គ 1/8 ក្រោយពីចាញ់ អាហ្សង់ទីន 1-2។

ថ្វីបើត្រូវអស់ក្រុមតំណាងនៅ World Cup 2022 ប៉ុន្តែ រដូវកាលបាល់ទាត់ពិភពលោកលើកនេះគឺជាជោគជ័យធំមួយសម្រាប់វិស័យបាល់ទាត់របស់ អាស៊ី ក៏ដូចជា សម្ព័ន្ធបាល់ទាត់ទ្វីបអាស៊ី (Asian Football Confederation)។

ជោគជ័យនៅ World Cup លើកនេះរបស់ អាស៊ី រួមមាន ៖ អារាប៊ីសាអូឌីត បានផ្ដួល អាហ្សង់ទីន 2-1 មុនពេលត្រូវហាលអាវ។ ក្រោយមក ជប៉ុន ក៏ឈ្នះ អាល្លឺម៉ង់ និង អេស្ប៉ាញ ជាមួយនឹងគ្រាប់បាល់ឈ្នះដូចគ្នានេះដែរ។ ជុំចុងក្រោយនៃវគ្គចែកពូល កូរ៉េខាងត្បូង ក៏បានឈ្នះ ព័រទុយហ្កាល់ ជួយឱ្យ សម្ព័ន្ធបាល់ទាត់ទ្វីបអាស៊ី មានតំណាងរហូតដល់ទៅ 3 ជាលើកដំបូងនៅវគ្គ 8 ក្រុម រួមមាន អូស្ត្រាលី ជប៉ុន និង កូរ៉េខាងត្បូង៕

December 6, 2022

(World Cup 2022)- គ្រូបង្វឹកជប៉ុន ឱនក្បាលនៅចំពោះមុខអ្នកគាំទ្រ ក្រោយការប្រកួតជាមួយក្រូអាត

(កាតា)- គ្រូបង្វឹក Hajime Moriyasu ដើរទៅខាងមុខជួរកៅអីរបស់អ្នកគាំទ្រ និងឱនក្បាលសុំទោស ក្រោយពី ក្រុមជម្រើសជាតិជប៉ុន ត្រូវបាន ក្រុមក្រូអាត ជម្រុះពី World Cup 2022 នៅវគ្គ 1/8 កាលពីយប់ថ្ងៃទី 05 ធ្នូ។

ក្រោយពីចាញ់ ក្រូអាត នៅកីឡដ្ឋាន Al Janoub គ្រូបង្វឹក Hajime Moriyasu ដើរទៅខាងមុខជួរកៅអីសម្រាប់អ្នកគាំទ្រជប៉ុន ហើយឱនក្បាលចុះមួយសម្ទុះដើម្បីសម្ដែងការសុំទោស។ នេះគឺជារូបភាពខ្ពស់បំផុតនៅក្នុងការសម្ដែងការអរគុណ ឬសុំទោសក្នុងវប្បធម៌របស់ ជនជាតិជប៉ុន។

ជប៉ុន បានបញ្ចប់ការប្រកួតនៅ World Cup 2022 របស់ខ្លួនបន្ទាប់ពីបានចាញ់ ក្រូអាត 1-3 កាលពីយប់មិញក្នុងការស៊ុតបាល់ប៉េណាំងទី (Penalty Soot-out)។ នៅ World Cup លើកនេះ ជប៉ុន បានផ្ដួលម្ចាស់ជើងឯកឆ្នាំ 2014 (អាល្លឺម៉ង់) និង 2010 (អេស្ប៉ាញ) ផងដែរ។

កីឡាករជប៉ុន មិនអាចទប់ទឹកភ្នែកបាននៅពេលត្រូវចាកចេញពី World Cup 2022 បើទោះនេះគឺជាលើកទីពីរបន្តបន្ទាប់ដែលពួកគេបានឆ្លងផុតវគ្គចែកពូលនៅ World Cup៕

https://www.youtube.com/watch?v=9qaEOVtM9l8

December 6, 2022

(World Cup 2022)- ចាញ់ប្រេស៊ីល 1-4 គ្រូបង្វឹករបស់ កូរ៉េខាងត្បូង លាលែងពីតំណែង ខណៈគ្រូបង្វឹករបស់ប្រេស៊ីល រាំអបអរជ័យជម្នះ

(កាតា)- គ្រូបង្វឹក Paulo Bento ប្រកាសថា មិនពន្យារកិច្ចសន្យាជាមួយ ក្រុមជម្រើសជាតិកូរ៉េខាងត្បូង ភ្លាមៗបន្ទាប់ពីការប្រកួតចាញ់ ប្រេស៊ីល 1-4 នៅវគ្គ 8 ក្រុមរបស់ World Cup 2022 កាលពីយប់ថ្ងៃទី 05 ធ្នូ។

«ដំណើររបស់យើងបានបញ្ចប់ ហើយឥឡូវគឺជាពេលដែលត្រូវគិតអំពីអនាគត។ ខ្ញុំនឹងឈប់ដឹកនាំក្រុមជម្រើសជាតិកូរ៉េខាងត្បូង។ ខ្ញុំនឹងឈប់សម្រាក ហើយក្រោយមកនឹងគិតមើលថានឹងធ្វើអ្វីទៀត។ ខ្ញុំទើបតែបានប្រកាសប្រាប់កីឡាករ និងប្រធានសម្ព័ន្ធ» លោក Bento និយាយក្រោយពីការប្រកួតនៅកីឡដ្ឋាន 974 ដូច្នេះ។

យោងតាមគ្រូបង្វឹកជនជាតិព័រទុយហ្កាល់ ការសម្រេចចិត្តនេះត្រូវបានធ្វើឡើងតាំងពីខែកញ្ញា ប៉ុន្តែ ទើបតែប្រកាសនៅពេល ក្រុមជម្រើសជាតិកូរ៉េខាងត្បូង បញ្ចប់ការប្រកួតនៅ World Cup 2022។ លោក Bento ក៏បានអះអាងថា មិនអាចមានមោទកភាពជាងនេះ នៅពេលដឹកនាំ ក្រុមជម្រើសជាតិកូរ៉េខាងត្បូង ក្នុងរយៈពេល 4 ឆ្នាំកន្លង។ គ្រូបង្វឹករូបនេះថែមទាំងចាត់ទុកថា នេះគឺជាក្រុមបាល់ទាត់មួយក្នុងចំណោមក្រុមដែលល្អបំផុតដែលលោកធ្លាប់បានដឹកនាំកន្លងមក បើសិនមិនចង់និយាយថា ល្អផ្ដាច់គេ។

គ្រូបង្វឹករបស់ ក្រុមជម្រើសជាតិប្រេស៊ីល លោក Tite ក្នុងការប្រកួតឈ្នះ កូរ៉េខាងត្បូង 4-

អំពីការប្រកួតចាញ់ ប្រេស៊ីល 1-4 លោក Bento និយាយថា «ខ្ញុំខកចិត្តណាស់ជាមួយនឹងលទ្ធផលនេះ ប៉ុន្តែក៏មានមោទកភាពខ្លាំងចំពោះអ្វីដែលក្រុមកីឡាករធ្វើបានក្នុង 4 ឆ្នាំកន្លង»។

លោក Bento គ្រប់គ្រងក្រុមជម្រើសជាតិកូរ៉េខាងត្បូង ចាប់ពីខែសីហា 2018 ទៅតាមកិច្ចសន្យាដែលត្រូវអស់សុពលភាពនៅខែធ្នូ 2022។ លោក Bento ធ្លាប់ជួយឱ្យ ក្រុមជម្រើសជាតិកូរ៉េខាងត្បូង ក្លាយជាជើងឯកលើកទី 5 នៃពានរង្វាន់បាល់ទាត់អាស៊ីខាងកើត។

https://www.youtube.com/watch?v=3gCYissxkJA

ទន្ទឹមនឹងការសោកស្ដាយរបស់គ្រូបង្វឹក Bento ក៏ដូចជា ក្រុមជម្រើសជាតិកូរ៉េខាងត្បូង គ្រូបង្វឹករបស់ ប្រេស៊ីល ឯណោះវិញ បានរាំរែក និងសម្ដែងភាពសប្បាយរីករាយជាខ្លាំង បន្ទាប់ពីបានយកឈ្នះ កូរ៉េខាងត្បូង 4-1 នៅក្នុងការប្រកួតខាងលើនេះ៕

December 6, 2022

Category: សង្គម និងសេដ្ឋកិច្ច