សង្គម និងសេដ្ឋកិច្ច - La Reine Media

Man City និង Real ប្រជែងគ្នាទិញ Mbappe ពី Monaco ក្នុងតម្លៃខ្លួន១១០លានផោន

ក្លិប Manchester City កំពុងតែស្ថិតក្នុងការប្រជែងទិញខ្សែប្រយុទ្ធវ័យក្មេងដ៏ឆ្នើម Kylian Mbappe ពីក្លិប Monaco ក្នុងតម្លៃខ្លួន១១០លានផោន (ស្មើនឹង១៤២លានដុល្លារអាមេរិក)។ Man City និង Real Madrid គឺជាក្លិបដែលបានបង្ហាញពីការចាប់អារម្មណ៍ជាផ្លូវការទៅលើខ្សែប្រយុទ្ធវ័យ១៨ឆ្នាំរូបនេះ។

តម្លៃខ្លួនរបស់កីឡាករវ័យក្មេងរូបនេះនឹងត្រូវបំបែកកំណត់ត្រានៃតម្លៃខ្លួន៨៩លានផោន ដែលក្លិប Manchester United បានចំណាយទៅឲ្យក្លិប Juventus ដើម្បីទិញយកខ្សែបម្រើដ៏មានឥទ្ធិពល Paul Pogba កាលពីរដូវក្តៅមុន។ ក្លិប Man United និង Paris Saint-Germain ក៏កំពុងតែចាប់អារម្មណ៍ទៅលើការផ្ទេរនេះផងដែរ។ ទាំង Man City និង Real បានចាប់ផ្តើមធ្វើការប្រជែងគ្នាដើម្បីនាំយកខ្សែប្រយុទ្ធវ័យក្មេងដ៏មានទេពកោសល្យរូបនេះ ខណៈដែលការប្រជែងនឹងកាន់តែក្តៅគគុកក្នុងពេលបិទរដូវកាល។

Mbappe បានស៊ុតបាល់បញ្ចូលទីក្នុងការប្រកួតទាំងពីរលើកពេលជួបជាមួយនឹងក្រុម Man City ខណៈដែលក្រុម Monaco បានទម្លាក់ក្រុមរបស់លោក Pep Guardiola ឲ្យធ្លាក់ចេញពីក្របខ័ណ្ឌ Champions League វគ្គ១៦ក្រុមចុងក្រោយ។ បំណងរបស់ Mbappe គឺការចូលរួមជាមួយនឹងក្លិប Real Madrid ហើយបើទោះបី Man City ស្ទាក់ស្ទើរក្នុងការចំណាយតម្លៃខ្លួនជាកំណត់ត្រាទៅលើកីឡាករវ័យ១៨ឆ្នាំរូបនេះ ក៏ដោយ ប៉ុន្តែ ពួកគេហាក់មានឱកាសតែមួយក្នុងការនាំយករូបគេ លុះត្រាតែ Real បោះបង់ការប្រជែងទិញ៕

ប្រភពព័ត៌មាន៖ The Sun

May 3, 2017

សម្បូរខ្លាញ់ក្បាលពោះ គួរពិសាទឹកក្រូចសើច

ទឹកក្រូចសើច មិនត្រឹមតែជួយសម្រកទម្ងន់បានល្អនោះឡើយ វាមានសមត្ថភាពសម្រកខ្នាញ់ក្បាលពោះបានប្រសើរទៀតផង ដែលបទពិសោធន៍នេះត្រូវបានបកស្រាយដោយ អ្នកជំនាញម្នាក់បានបកស្រាយថា គុណប្រយោជន៍របស់ទឹកក្រូចសើច អាចជួយព្យាលបាលអ្នកជំងឺប៉ោងសរសៃឈាមបានធូសះស្បើយ ហើយមិនត្រឹមតែប៉ុណ្ណោះទេ សង្កេតឃើញថា អ្នកជំងឺបានស្រកគីឡូតាមប្រាថ្នាទៀត ជាពិសេសគឺបរិវេណខ្លាញ់ក្បាលពោះ ។

វត្ថុធាតុផ្សំ ៖
១.ក្រូចសើច ១០ ផ្លែ
២.ទឹកឆ្អិន ២ លីត្រ

វិធីធ្វើ៖
យកក្រូចសើចលាងឲ្យស្អាច ហាន់ជាចំណិតឆ្កឹះគ្រាប់ចេញ ហើយច្របាច់យកទឹកសុទ្ធ បន្ទាប់មកយកទៅដាំជាមួយទឹក ២ លីត្រ រម្ងាស់យកតែ ១លីត្រ ហើយច្រកដាក់ដបក្លាសេក្នុងទូទឹកកក ។

ការអនុវត្តន៍៖
ទទួលទានព្រឹក ១ កែវ ល្ងាច ១ កែវ ជារៀងរាល់ថ្ងៃ ក្នុងរយៈពេល ៣០ ថ្ងៃធានាសម្រកខ្លាញ់បាន ៥ គីឡូក្រាម ៕

May 3, 2017

អ៊ីវ៉ា ភ្ញាក់ផ្អើលខ្លាំងនឹងដំណឹងថា នាងមានសុទ្ធតែឧកញ៉ាតាមសុំស្នេហ៍

ភ្នំពេញៈ ខណៈប្រជាប្រិយភាពខ្លួនកំពុងតែឆក់យកចិត្តមហាជនគាំទ្រដោយទឹកដមសំនៀងរបស់កញ្ញា អ៊ីវ៉ា តារាចម្រៀងរះនៅកំពូលក្នុងទ្រនំសាន់ដេ និងល្បីខ្លាំងជាទេពធីតាសម្ផស្សមានមន្តស្នេហ៍ អន្ទងស្នេហ៍បុរសៗឲ្យលង់ស្នេហ៍ច្រើននាក់ ហើយថ្មីៗនៅលេចឮព័ត៌មានថា នាងមានឧកញ៉ាច្រើននាក់តាមដាក់ពាក្យសុំស្នេហ៍ និងប្រកាសទ្រព្យធនដើម្បីត្រៀមជំនួនជូននាងទៀតផងបើត្រូវចិត្ត។

ដោយឡែកដំណឹងនេះគឺផ្ទុយស្រឡះតែម្តង ខណៈសូម្បីតែនាងខ្លួនឯងផ្ទាល់ កញ្ញា អ៊ីវ៉ា មានកំណើតពីទឹកដីខេត្តកំពង់ស្ពឺ ជាតារាចម្រៀងសម្លេងស្រទន់ប្រចាំផលិតកម្មសាន់ដេ ក៏ភ្ញាក់ផ្អើលនឹងព័ត៌មាននេះទៀតផងដោយថ្មីៗនេះក៏ស្រាប់តែមានពាក្យរន្ទឺនេះឡើង។ តែយ៉ាងណាតារាចម្រៀងរូបនេះ ក៏ហាក់សម្តែងការភ្ញាក់ផ្អើលនិងព័ត៌មាន បង្ហាញពីខ្លួនមានមន្តស្នេហ៍នោះ ខណៈនាងក៏បានបង្ហោះបង្ហើរសារជាសាធារណៈក្នុងបណ្តាញសង្គម ដែលធ្វើឲ្យមហាជនគិតថា ទំនងជានាងធុញទ្រាន់នឹងស្នេហាតាមរញ៉េរញ៉ៃនោះហើយបានជានាងពោលបែបនោះ។ កញ្ញា អ៊ីវ៉ាសរសេរក្នុងហ្វេសប៊ុករបស់នាងថា៖ «ដឹងស្អីទេលោកអើយ!លោកហើយ!ក៏សំបូរឧកញ៉ាមកពីណាច្រើនម្ល៉េះបើរាល់ថ្ងៃរកតែអ្នកធំមួយមកធ្វើជាគូស្នេហ៍មិនបានផង»។

តារាចម្រៀងស្រីសាច់សខ្ចីញេញ អ៊ីវ៉ា បន្តថា៖ «បើឲ្យខ្ញុំមិននឿយណាយនឹងព័ត៌មាននេះម៉េច បើពេលនេះ រកតែស្នេហាជាមួយអ្នកធម្មតា គ្មានផង បែរជាល្បីតែនឹងរឿងឧកញ៉ាតាមស្នេហ៍ទៅវិញ។ មិនគិតថាយ៉ាងណាទេ នៅពេលនេះខ្ញុំមិនទាន់ចង់គិតរឿងដូចអ្វីដែលល្បីកន្លងមកទេ»៕

May 3, 2017

គោលការសំខាន់ចំនួន២ ក្នុងការដំណើរការអាជីវកម្ម

មានវិធីសាស្ត្រច្រើនណាស់ក្នុងការទទួលបានជោគជ័យក្នុងការធ្វើអាជីវកម្ម ហើយវាអាស្រ័យទៅលើវិធីសាស្ត្រ និងយុទ្ធសាស្ត្ររបស់បុគ្គលម្នាក់ៗក្នុងការគ្រប់គ្រងជីវកម្មរបស់ពួកគេ។ ទោះបីជាយ៉ាងណាក៏ដោយ ខាងក្រោមនេះគឺជាគោលការដ៏សំខាន់ក្នុងការដំណើរការអាជីវកម្មឱ្យទទួលបានជោគជ័យ។

១) ច្បាប់សំខាន់ទី១៖ អ្នកត្រូវតែមានបំពង់នាំការលក់ចេញ ដែលមានសក្ដានុពលមួយ។ ការមានបំពង់នាំការលក់ដែលមានសក្ដានុពលមួយនៅទីនេះ គឺមានន័យថាអ្នកត្រូវតែមានក្រុមការងារ ដែលពូកែខាងផ្នែកលក់។ ក្រុមនេះគឺជាក្រុមដែលអាចស្វែងរក និងរក្សារអតិថិជនដែលមានសក្ដានុពលឱ្យបានច្រើនតាមតែអាចធ្វើទៅបាន ដើម្បីអាចឱ្យក្រុមហ៊ុនលក់ផលិតផល ឬផ្ដល់សេវាកម្មបានកាន់តែច្រើនទៅដល់អតិថិជន។ ក្រុមមួយនេះគឺជាដង្ហើមរបស់ក្រុមក្រុមហ៊ុន ព្រោះថាក្រុមហ៊ុនអាចរីកចម្រើនក៏ដោយសារតែមានការចូលរួម និងសហការបានយ៉ាងល្អពីក្រុមនេះផងដែរ។ ហេតុដូច្នេះហើយ អ្នកត្រូវតែពង្រឹង និងបណ្ដុំបណ្ដាលក្រុមផ្នែកលក់របស់អ្នកឱ្យបានពូកែថែមទៀតដើម្បីអាចផ្គត់ផ្គងទៅដល់អតិថិជនឱ្យបានកាន់តែច្រើនថែមទៀត។

២) ច្បាប់សំខាន់ទី២៖ «កុំពឹងតែទៅលើអតិថិជនម្នាក់» គន្លឹះសំខាន់ដទៃមួយផ្សេងទៀតក្នុងការគ្រប់គ្រង និងដំណើរការក្រុមហ៊ុន។ កុំពឹងតែទៅលើអតិថិជនតែម្នាក់ ប្រសិនបើអតិថិជនតែម្នាក់ជាអ្នកទទួលខុសត្រូវទៅលើផ្នែកដ៏ធំនៃក្រុមហ៊ុនរបស់អ្នក នោះអ្នកកំពុងតែស្ថិតនៅក្នុងបញ្ហាហើយ។ អ្នកប្រាកដជាមិនមានបញ្ហានៅថ្ងៃនេះ ប៉ុន្ដែអ្នកនឹងមានបញ្ហានៅថ្ងៃក្រោយ។ ប្រសិនបើអតិថិជនរូបនោះ សម្រេចចិត្តក្នុងការលុបចោលកុងត្រាក្រុមហ៊ុនរបស់អ្នកចោល តើនឹងមានអ្វីកើតឡើង? ហេតុដូច្នេះហើយអ្នកត្រូវតែមានអតិថិជនដែលមានសក្ដានុពលឱ្យបានច្រើននៅក្នុងដៃ ក្នុងការជៀសវាងក្នុងការធ្វើឱ្យក្រុមហ៊ុនរបស់អ្នកដួលរលំបាន៕

May 3, 2017

ប្រាប់តគ្នា !! ទទួលទានសាច់អាំងញឹកញយ កើតជំងឺមហារីក

ជារៀងរាល់ថ្ងៃ ប្រសិនបើអ្នកទទួលទានសាច់អាំងជាញឹកញាប់ពេក ឬនិយមទទួលទានសាច់អាំងរាល់ថ្ងៃ នោះមិនបានសេចក្ដីថា អ្នកកំពុងទទួលទានអាហារប៉ូវថាមពលឡើយ ផ្ទុយទៅវិញអ្នកកំពុងប្រឈមមុខជាមួយការកើតជំងឺមហារីកហើយ។ បើតាមអ្នកជំនាញបានឲ្យដឹងថា ដើម្បីទទួលទានអាហារប្រភេទសាច់អាំងទាំងឡាយ ដែលជៀសផុតពីជំងឺមហារីកបាន គួរតែទទួលទានតាមវិធីបែបនេះ៖

១.គួរអាំងបន្លែ ផ្សិត ផ្លែឈើ ជាជាងអាំងសាច់គ្រប់ប្រភេទ
២.ប្រសិនបើចង់អាំងសាច់គោ ឬត្រី គួរតែជ្រើសសាច់ណាដែលមិនមានជាប់ខ្លាញ់
៣.មិនត្រូវអាំងសាច់ដែលកក ដោយការក្លាសេ ត្រូវទុកឲ្យរលាយទឹកកកជាមុនសិន
៤.អាំងសាច់ក្នុងម៉ាស៊ីនកំដៅអាហារ microwave ២ ទៅ ៥ នាទីជាមុនសិន ដើម្បីសម្លាប់មេរោគមហារីកជាប់នឹងសាច់ ៩០ភាគរយ
៥.រុំ ឬចងអាហារឲ្យជិតមុនយកទៅអាំង រយៈពេល ១នាទីមុនអាំង ព្រោះវាជួយការពារមេរោគមិនឲ្យទុំជាប់អាហារ
៦.ហាមប្រើកំដៅភ្លើងក្ដៅខ្លាំង ក្នុងការអាំងសាច់ ព្រោះវាបណ្ដាល់ឲ្យខ្លោច ដែលជាសារធាតុបង្ករមេរោគមហារីក
៧.បើអាំងដោយចង្រ្កានហ្គាស់ ត្រូវបន្ថយសីតុណ្ហភាពឲ្យទាបបំផុត យកល្អគួរប្រើចង្រ្កានធ្យូង
៨.បើអាំងចង្រ្កានធ្យូង គួរប្រើចង្ក្រានឡួវ ជាជាងចង្ក្រានប្រើអុស
៩.ជៀសវាងអាំងសាច់កុំឲ្យខ្លោច

ជាចុងក្រោយ ប្រសិនបើអ្នកនិយមទទួលទានអាហារអាំង សូមជៀសវាងការអាំងរហូតដល់ខ្លោច ឬគ្រាមពេក ព្រោះអ្នកអាចនឹងប្រឈមមុខជាមួយជំងឺមហារីកបានគ្រប់ពេលវេលា ៕

May 3, 2017

Monaco ដាក់ការជឿជាក់លើ Falcao ក្នុងពេលប៉ះ Juventus រាត្រីនេះ

ក្រុមប្រជុំដោយកីឡាករវ័យក្មេង Monaco នឹងសម្លឹងរកការបង្ហាញពីទម្រង់លេងឲ្យល្អ ហើយពួកគេនឹងដាក់ការជឿជាក់ទៅលើខ្សែប្រយុទ្ធ Radamel Falcao ក្នុងការទម្លុះតំបន់ការពារដ៏រឹងមាំរបស់ក្រុមសេះបង្កង់ Juventus ក្នុងពេលក្រុមទាំងពីរជួបគ្នាក្នុងការប្រកួតជើងទី១នៃក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ នៅរាត្រីនេះ។

ខ្សែប្រយុទ្ធអន្តរជាតិកូឡុំប៊ីរូបនេះ នឹងទទួលតួនាទីជាប្រធានក្រុមពេល Monaco ជួបជាមួយនឹងក្រុមយក្សរបស់អ៊ីតាលី ដែលមានតារាឆ្នើម Gonzalo Higuain ក្នុងតំបន់ប្រយុទ្ធរបស់ពួកគេ ក្នុងការប្រកួតនាកីឡដ្ឋាន Stade Louis II។ Monaco បានទទួលការកោតសរសើរយ៉ាងខ្លាំងនៅរដូវកាលនេះ ក្រោយពីបានបង្ហាញពីទម្រង់លេងយ៉ាងល្អជាមួយនឹងក្រុមប្រជុំដោយកីឡាករវ័យក្មេងរបស់ពួកគេ ស្របពេលតារាឆ្នើមៗដូចជា Kylian Mbappe, Bernardo Silva និង Thomas Lemar នឹងក្លាយជាគោលដៅរបស់ក្លិបធំៗនៅអឺរ៉ុប នារដូវក្តៅខាងមុខ។ ពួកគេបានរកគ្រាប់បាល់បញ្ចូលទីជិត១៥០គ្រាប់ ក្នុងរាល់យុទ្ធនាការទាំងអស់ និងបានធ្វើឲ្យពួកគេផ្ទាល់ស្ថិតយ៉ាងប្រកៀកក្នុងការឈ្នះពានរបស់បារាំង។

Monaco បានស៊ុតបាល់បញ្ចូលទីយ៉ាងហោចណាស់៣គ្រាប់ក្នុងមួយប្រកួត ក្នុងរាល់ការប្រកួតវគ្គចាញ់ធ្លាក់ទាំង ៤ប្រកួតមកទល់ពេលនេះ ក្នុងនោះរាប់បញ្ចូលទាំងការផ្តួលក្រុម Manchester City របស់លោក Pep Guardiola និងក្រុម Borussia Dortmund ផងដែរ ដើម្បីឈានទៅវគ្គពាក់កណ្តាលផ្តាច់ព្រ័ត្រ ជាលើកទី១បើគិតចាប់តាំងពីឆ្នាំ២០០៤។ លោក Vadim Vasilyev ប្រធានក្លិប Monaco បានប្រាប់ស្ថានីយទូរទស្សន៍របស់បារាំង TF1 ថា៖ «ខ្ញុំតែងតែជឿជាក់ទៅលើ Radamel ហើយតាំងពីចាប់ផ្តើមរដូវកាលនេះ ខ្ញុំបាននិយាយរួចជាស្រេចថា រូបគេនឹងវិលទៅកាន់ទម្រង់លេងដ៏ល្អបំផុតរបស់គេវិញ។ គ្មាននរណាម្នាក់គិតបែបនោះឡើយ ប៉ុន្តែ បច្ចុប្បន្ន យើងបង្ហាញឲ្យឃើញរួចជាស្រេច»។ ក្រុម Monaco បានកម្តៅសាច់ដុំសម្រាប់ការប្រកួតនេះ តាមរយៈការផ្តួលក្រុម Toulouse ៣-១ ក្នុងការប្រកួត Ligue 1 កាលពីថ្ងៃសុក្រ កន្លងទៅ។ ស្របពេលជាមួយគ្នានេះ Juventus ដែលជាក្រុមម្ចាស់ជើងឯករងកាលពីឆ្នាំ២០១៥ បានបញ្ចប់ក្នុងលទ្ធផលស្មើ ២-២ នៅលើទឹកដីក្រុម Atalanta ក្នុងការប្រកួតក្របខ័ណ្ឌ Serie A ក្រោយពីរបូតគ្រាប់បាល់នៅជិតបញ្ចប់ការប្រកួត។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕

ប្រភពពី៖ Eurosports

May 3, 2017

ទាំង Man United និង Liverpool កំពុងតែប្រទាញប្រទង់គ្នាដើម្បីទិញយក Fabregas ពី Chelsea

Cesc Fabregas កំពុងតែស្ថិតនៅចំកណ្តាលនៃការប្រជែងគ្នាទិញក្នុងតម្លៃខ្លួន២៥លានផោន (ស្មើនឹង៣២លានដុល្លារអាមេរិក) រវាងក្លិបបិសាចក្រហម Manchester United និងក្រុមហង្សក្រហម Liverpool។

លោក Jurgen Klopp គ្រូបង្វឹករបស់ក្រុម Liverpool បានធ្វើឲ្យមានការប្រទាញប្រទង់គ្នានេះ តាមរយៈការឈានចូលក្នុងការប្រជែងទិញខ្សែបម្រើរបស់ក្លិប Chelsea វ័យ២៩ឆ្នាំរូបនេះ នារដូវក្តៅខាងមុខនេះ។ ស្របពេលជាមួយគ្នានេះ លោក Jose Mourinho ដែលជាអតីតអ្នកចាត់ការទូទៅរបស់ Fabregas ក៏កំពុងតែកោតសរសើរទៅលើកីឡាករដ៏មានបទពិសោធរូបនេះផងដែរ និងពិតជាចង់នាំយករូបគេនៅកីឡដ្ឋាន Old Trafford ក្នុងនាមជាផ្នែកមួយនៃគម្រោងចំណាយក្នុងពេលបិទរដូវកាលនេះ។

លោក Klopp ក៏ចង់ពង្រឹងតំបន់ការពាររបស់លោកផងដែរ ជាពិសេសស្របពេលដែលក្លិប Barcelona ហាក់បង្ហាញយ៉ាងច្បាស់ពីការចាប់អារម្មណ៍របស់ខ្លួនទៅលើ Philippe Coutinho។ ក្លិប AC Milan, Bayern Munich, Atletico Madrid និងក្លិបស្ថិតក្នុងក្របខ័ណ្ឌ Super League របស់ចិន ក៏កំពុងតែចាប់អារម្មណ៍ទៅលើ Fabregas ផងដែរ ប៉ុន្តែ រូបគេចង់បន្តលេងនៅប្រទេសអង់គ្លេស។ ខ្សែបម្រើអន្តរជាតិអេស្ប៉ាញរូបនេះ បានជួបការលំបាកក្នុងការប្រជែងយកកៅអីក្នុងជម្រើសទាំង១១នាក់ដំបូងនៅកីឡដ្ឋាន Stamford Bridge នារដូវកាលនេះ ក្រោយពីការផ្ទេរចូលរបស់ N’Golo Kante ក្នុងតម្លៃខ្លួន២៩លានផោន កាលពីឆ្នាំមុន៕

ប្រភពពី៖ The Sun

May 3, 2017

Ronaldo ធ្វើឲ្យ Atletico ត្រូវការអព្ភូតហេតុ ដើម្បីសង្គ្រោះការធ្លាក់ចេញ

កំណត់ត្រានៃការរកគ្រាប់បាល់បញ្ចូលទីរបស់ខ្សែប្រយុទ្ធ Cristiano Ronaldo ត្រូវបានចាត់ទុកថា ជាកំណត់ត្រាពិសេសតែមួយ ដោយលោកគ្រូបង្វឹក Zinedine Zidane ខណៈដែលការរកគ្រាប់បាល់បញ្ចូលទី៣គ្រាប់របស់គេ បានជួយឲ្យក្រុម Real Madrid ស្ថិតយ៉ាងប្រកៀកក្នុងការឈានទៅវគ្គផ្តាច់ព្រ័ត្រមួយផ្សេងទៀតនៃក្របខ័ណ្ឌ Champions League តាមរយៈការផ្តួលក្រុម Atletico Madrid ៣-០ កាលពីថ្ងៃអង្គារ។

ការស៊ុតបាល់បញ្ចូលទី៣គ្រាប់របស់ Ronaldo គឺជាការរកបានជាលើកទី២នៅពេលប្រកួតជាមួយនឹងក្រុម Atletico នៅរដូវកាលនេះ និងជាលើកទី២ជាប់ៗគ្នាក្នុងក្របខ័ណ្ឌ Champions League ក្រោយពីក៏បានស៊ុតបាល់បញ្ចូលទី៣គ្រាប់ផងដែរដើម្បីផ្តួលក្រុម Bayern Munich ក្នុងការប្រកួតវគ្គ៨ក្រុមចុងក្រោយ។ លោក Zidane បានឲ្យដឹងថា៖ «ការរកគ្រាប់បាល់បញ្ចូលទីគឺជាសមត្ថភាពដែលរូបគេមានខ្លាំងជាងកីឡាករផ្សេងៗ ដែលធ្វើឲ្យរូបគេមានលក្ខណៈយ៉ាងពិសេសតែមួយ»។ ការទទួលជ័យជម្នះនេះបានធ្វើឲ្យក្រុម Real បន្តធ្វើការគ្រប់គ្រងលើក្រុម Atletico ក្នុងក្របខ័ណ្ឌ Champions League ក្នុងរយៈពេលបួនរដូវកាលចុងក្រោយនេះ។

Real បានទម្លាក់ក្រុមរបស់លោក Diego Simeone រាល់ការជួបគ្នាទាំង៣លើកក្នុងក្របខ័ណ្ឌកំពូលអឺរ៉ុបរយៈពេល៣រដូវកាលចុងក្រោយនេះ ក្នុងនោះរាប់បញ្ចូលទាំងក្នុងវគ្គផ្តាច់ព្រ័ត្រកាលពីឆ្នាំ២០១៤ និងឆ្នាំ២០១៥ ផងដែរ។ Ronaldo បានធ្វើឲ្យក្រុម Real Madrid ចាប់ផ្តើមយ៉ាងល្អតាមរយៈការរកគ្រាប់បាល់បើកឆាកនៅទីនាទី ទី១០ មុននឹងស៊ុតបាល់បញ្ចូលទី២គ្រាប់ទៀតនៅរយៈពេល២០នាទីចុងក្រោយ។ Ronaldo បានឲ្យដឹងថា៖ «ក្រុមនេះពិតជាអស្ចារ្យណាស់។ ខ្ញុំបានរកគ្រាប់បាល់បញ្ចូលទី ប៉ុន្តែ ក្រុមនេះ លេងបានយ៉ាងអស្ចារ្យតាំងពីចាប់ផ្តើមប្រកួត»។ ការទទួលជ័យជម្នះក៏បានជួយឲ្យ Real ស្ថិតនៅផ្លូវក្នុងការក្លាយជាក្រុមដំបូងគេក្នុងការការពារពាន Champions League យ៉ាងជោគជ័យក្នុងរយៈពេល២៧ឆ្នាំ៕

ប្រភពពី៖ worldsoccertalk

May 3, 2017

សារ៉ាយ សក្ខណា ក្តាប់ឱកាសកើបប្រាក់ក្រៅប្រទេស ក្រោយពីអាជីវកម្មនឹងថឹង

ភ្នំពេញៈ តារាសម្តែងស្រីសម្បុរស្រអែម ញញឹមស្រស់ អ្នកនាង សារ៉ាយ សក្ខណា ដែលស្វាមីជាអាណិកជនអាមេរិកមានដើមទុនរាប់សិបម៉ឺនដុល្លារ ដែលទើបតែបើកហាងកែសម្ផស្ស XENO ហើយមមាញឹកការងាររកស៊ីខ្លាំងសឹងតែផ្តាច់ខ្លួនចេញផុតពីការងារសិល្បៈទៅហើយនោះ ឥឡូវក៏ស្រាប់តែចាប់បានឱកាសកើបប្រាក់ពីវិស័យសិល្បៈសាជាថ្មីឡើងវិញ ដោយនាងនឹងត្រូវចេញទៅសម្តែងនៅប្រទេសអូស្រ្តាលីនាថ្ងៃទី៥ ខែ ៥ ខាងមុខនេះ។

ឱកាសចាកចេញទៅសម្តែងក្នុងកម្មវិធីសិល្បៈនោះ ក្រៅពីតារាសម្តែងស្រី ដែលមានស្វាមីជាមេធាវីអាណិកជនមកពីសហរដ្ឋអាមេរិក លោក កែវ មន្រ្តី និងបានពង្រីកការងាររកស៊ីជូនម្តាយគឺហាងស៊ុប យីហោ «Sakhana Family Soup» ស្ថិតនៅក្បែរភោជនីយដ្ឋានហេងហេង ម្ដុំទួលគោកនោះ ក៏ឃើញវត្តមានតារាចម្រៀងស្រីពីរដួងទៀតចូលរួមដែរមានតារាចម្រៀងស្រីអ្នកនាង ឈួន ស្រីម៉ៅ និងអ្នកនាង យ៉ាន លីនដា ដែលអតីតជាភរិយារបស់លោក យ៉ែម សំអូន។

យ៉ាងណាគេក៏មិនបានដឹងច្បាស់ការសម្តែងមានប៉ុន្មានថ្ងៃ ក្នុងគោលដៅអ្វី និងត្រូវវិលត្រឡប់មកវិញពេលណាដែរ ខណៈពេលនេះតារាសម្តែងស្រីបានថតឈុតកុនបញ្ចប់រឿង «ក្រមុំកូន១» ដែលនៅសល់ឲ្យផលិតកម្ម Red Picture និងកុនថ្មីពីររឿងឲ្យផលិតកម្មពីរផ្សេងគ្នា នាពេលអមដំណើរស្វាមីរកទីកន្លែងបើកហាងកែសម្ផស្ស កំពុងតែរួមរស់ជុំស្វាមីនៅឯសហរដ្ឋអាមេរិក មិនអាចទំនាក់ទំនងសាកសួរបានឡើយ។ តែបើតាមប្រសាសន៍របស់អ្នកស្រី ផាន់ សម្ផស្ស ជាម្តាយរបស់តារាសម្តែងស្រី សារ៉ាយ សក្ខិណា បង្ហើបប្រាប់ថា៖ «ការសម្តែងនោះដូចជាត្រូវបានសមាគមខ្មែរនៅអូស្រ្តាលីអញ្ជើញគាត់ [សក្ខណា] ទៅ ហើយខ្ញុំក៏មិនដឹងច្បាស់ដែរថា មានចំនួនប៉ុន្មានថ្ងៃ តែដូចជាឮថា មានរយៈពេលមិនយូរឡើយគឺប្រហែលរយៈពេលខ្លីតែប៉ុណ្ណោះ»។ អ្នកស្រី ផាន់ សម្ផស្ស ក៏បានប្រលយឲ្យដឹងបន្តថា៖ «គាត់មិនប្រាប់ថា នឹងត្រូវមកស្រុកខ្មែរវិញសិននោះទេ ប្រហែលជាគាត់ចេញដំណើរពីអាមេរិកឆ្ពោះទៅកាន់ប្រទេសអូស្រ្តាលី តែម្តងហើយមើលទៅ។ ឯរឿងមើលការខុសត្រូវលើហាងកែសម្ផស្ស ដែលពីមុនគ្មានអ្នកមើលនោះ ឥឡូវនេះនាងដូចជារកបានអ្នកមើលការខុសត្រូវជំនួសហើយដែរ ទើបបានជានាងហ៊ានព្រលែងដៃបែបនេះ»៕

May 3, 2017

គន្លឹះក្នុងការចាប់ផ្ដើមអាជីវកម្មដោយប្រើប្រាស់ដើមទុនតិច

សហគ្រិនជាញឹកញាប់មានគំនិតធ្វើអាជីវកម្មដ៏អស្ចារ្យ ប៉ុន្តែអ្វីដែលជាឧបសគ្គរបស់ពួកគាត់គឺការខ្វះដើមទុនដើម្បីចាប់ផ្ដើមអាជីវកម្ម។ ដើមទុនគឺជារឿងដ៏សំខាន់បំផុតមួយចំណោមបញ្ហាទាំងអស់ ដើម្បីបង្កើតអាជីវកម្មមួយឱ្យដំណើរការទៅមុខបាន។

ខាងក្រោមនេះគឺជាគន្លឹះមួយចំនួនក្នុងការចាប់ផ្ដើមអាជីវកម្មដោយប្រើប្រាស់ដើមទុនតិច៖

១) ចូរបង្កើតអាជីវកម្មណា ដែលប្រើចំណេះ និងជំនាញរបស់អ្នក
វាអាចជាការចាប់ផ្ដើមដោយប្រើដើមទុនតិច ឬក៏គ្មានដើមទុន នៅពេលដែលអ្នកបើកអាជីវកម្មណា ដែលដោយប្រើចំណេះ និងជំនាញច្បាស់លាស់របស់អ្នក។ នៅពេលអ្នកបង្កើតអាជីវកម្មមួយឡើង ដោយប្រើចំណេះ ជំនាញ និងបទពិសោធន៍ នោះការចំណាយក្នុងការបង្កើតអាជីវកម្មគឺអស់តិច ហើយភាពបរាជ័យក៏មានតិចផងដែរ។ លើសពីនេះទៅទៀត នៅពេលដែលអាជីវកម្មរបស់អ្នកត្រូវបានបង្កើតឡើងដោយជំនាញផ្ទាល់ខ្លួន នោះអ្នកអាចកាត់បន្ថយការចំណាយមួយចំនួនទៅលើទីប្រឹក្សា ជំនួយការ រួមទាំងបុគ្គលិក។

២) ជៀសវាងការចំណាយណាមួយដែលមិនចាំបាច់
នៅពេលដែលអ្នកចាប់ផ្ដើមអាជីវកម្មមួយ អ្នកនឹងមានការចំណាយយ៉ាងច្រើន ហើយការចំណាយខ្លះមិនអាចជៀសផុត ដូច្នេះហើយអ្នកត្រូវគិតឱ្យបានល្អិតល្អន់ទៅលើការចំណាយដែលចាំបាច់ និងចំណាយមិនចាំបាច់។ ចូរសន្សំសំចៃនៅពេលដែលអ្នកកំពុងតែចាប់ផ្ដើមជាលើដំបូង ពីព្រោះវានឹងធ្វើឱ្យក្រុមហ៊ុន ឬក៏អាជីវកម្មរបស់អ្នក អាចនឹងជួបការបរាជ័យ។ ចូរប្រុងប្រយ័ត្ន និងមានការកត់ត្រាឱ្យបានត្រឹមត្រូវរាល់ការចំណាយទាំងអស់របស់ក្រុមហ៊ុន៕

May 2, 2017

Category: សង្គម និងសេដ្ឋកិច្ច