សង្គម និងសេដ្ឋកិច្ច - La Reine Media

កំពូលមហាសេដ្ឋី Warren Buffet បង្ហើបប្រាប់គន្លឹះធ្វើឱ្យលោកជោគជ័យ

តើអ្នកចង់ដឹងទេថា រាល់ថ្ងៃមហាសេដ្ឋី Warren Buffet មានទម្លាប់ដូចម្ដេចខ្លះ ក្នុងការធ្វើឱ្យខ្លួនរបស់គាត់ទទួលបានជោគជ័យដូចសព្វថ្ងៃនេះ?

ខាងក្រោមនេះគឺជាទម្លាប់មួយចំនួនដែលមហាសេដ្ឋីរូបនេះ តែងតែធ្វើជាប្រចាំដើម្បីក្លាយជាអ្នកមានទ្រព្យសម្បតិ្ត និងសុខភាពល្អផងដែរ៖

១) មហាសេដ្ឋី Warren Buffet ចូលចិត្តញ៉ាំដូចជាកូនក្មេងអាយុ ៦ឆ្នាំ
អាថ៌កំបាំងរបស់ មហាសេដ្ធី Warren Buffet ដែលធ្វើឱ្យគាត់នៅតែក្មេងគឺ គាត់តែងតែញ៉ាំ Coca-Cola ហើយ និងការ៉េម។ នៅពេលដែលគេសួរគាត់ថា តើគាត់អាចធ្វើឱ្យខ្លួនរបស់គាត់នៅមានសុខភាពល្អបានដោយរបៀបណាជាមួយនឹងការញ៉ាំអាហាដែលមានជាតិអំបិល និងស្ករ? គាត់ក៏បានឆ្លើយថា ខ្ញុំបានឆែកមើលតារាងគណនាតម្លៃ ហើយនឹងអាត្រានៃការស្លាប់ដ៏ទាប់បំផុតគឺកូនក្មេងអាយុ៦ឆ្នាំ។ ហេតុដូច្នេះហើយខ្ញុំក៏សម្រេចចិត្តញ៉ាំដូចជាកូនក្មេងអាយុ ៦ឆ្នាំដើម្បីជួយធ្វើឱ្យខ្ញុំមានសុខភាពល្អ។

២) មហាសេដ្ឋី Warren Buffet បានចំណាយពេលវេលារបស់គាត់ 80ភាគរយ ក្នុងការអានជារៀងរាល់ថ្ងៃ
ចាប់តាំងពីពេលដែលគាត់ភ្ញាក់ពីដេក ដោយមហាសេដ្ឋីរូបនេះ បានចំណាយពេលក្នុងការអានកាសែតមុនគេបំផុត បន្ទាប់មកទើបអានសៀវភៅផ្សេងៗតាមក្រោយ។ តាមពិតទៅ គាត់ប៉ាន់ស្មានថា គាត់បានចំណាយពេលវេលារបស់គាត់ប្រហែលជា 80ភាគរយក្នុងមួយថ្ងៃក្នុងការអាន។ នៅពេលដែលគេសួរគាត់ថា អ្វីទៅជាគន្លឹះក្នុងការទទួលបានភាពជោគជ័យរបស់គាត់? Warren Buffet បានចង្អុលទៅកាន់គំនរសៀវភៅហើយនិយាយថា ចូរអានឱ្យបាន 500ទំព័រជារៀងរាល់ថ្ងៃ។ អ្នកអានបានកាន់តែច្រើន ចំណេះដឹងរបស់អ្នកនឹងកាន់តែកើន នៅពេលដែលចំណេះដឹងអ្នកកាន់តែកើន អ្នកនឹងកាន់តែឆ្លាត នៅពេលដែលអ្នកកាន់តែឆ្លាត អ្នកនឹងរកលុយបានកាន់តែច្រើនផងដែរ។ នេះគឺជាគន្លឹះឆ្ពោះទៅរកភាពជោគជ័យរបស់ខ្ញុំ។

គួរបញ្ជាក់ផងដែរថា លោក Warren Buffet ជាមហាសេដ្ឋីលំដាប់ទី2 វ័យ 86ឆ្នាំ ដែលមានលុយច្រើនជាងគេបំផុត បន្ទាប់ពីលោក Bill Gates ដោយគិតត្រឹមថ្ងៃនេះ លោក Warren Buffet មានលុយប្រមាណ 77ពាន់លានដុល្លារអាមេរិក៕

May 8, 2017

សាន សុម៉ាលី តួស្រីល្បីក្នុងរឿងកាកីត្អូញថា ទីផ្សារសិល្បៈស្ងាត់ដូចចោរលួចសេះ

ភ្នំពេញៈ ទើបតែវិលមកពីសម្តែង និងកើបលុយដុំនៅអូស្រ្តាលីចំនួន ៥ សប្តាហ៍ សោះក៏ស្រាប់តួសម្តែងស្រីចូលចិត្តព្រលែងដើមទ្រូងសិចស៊ី កញ្ញា សាន សុម៉ាលី និងជាតួស្រីល្បីក្នុងភាពយន្តរឿងកាកី បានរអ៊ូររទាំថា ខ្លួនចាស់ហើយមិនសូវមានទីផ្សារក្នុងសង្គមសិល្បៈទៅវិញ។

តារាសម្តែងស្រីចូលចិត្តតុបតែងខ្លួនបែបសិចស៊ី កប់ស៊េរី បញ្ចេញសាច់ក្បាលពោះ និងដើមទ្រូងយ៉ាងគ្រហើៗ សាន សុម៉ាលី ស្រាប់តែថ្មីៗនេះនាងបានរអ៊ូរថា៖ «ហេតុខ្លួនខ្ញុំចាស់ និងសម្រស់ក៏លែងសូវស្អាត ទើបមិនសូវមានផលិតកម្មណាគេ ហៅទៅថតកុនទៀតដូចជាតួស្រីក្មេងៗ និងស្អាតៗជំនាន់ក្រោយ។ ដោយសារតែខ្លួនកាន់តែមានវ័យជ្រេ សម្រស់ក៏លែងសូវស្អាតផូរផង់ដូចកាលមុន និងតម្លៃខ្លួនថតកុនក៏មិនសូវខ្ពស់ដូចតារាស្រីវ័យក្មេងសាច់សខ្ចីមិនអាចប្រជែងបាន» ។

កញ្ញា សាន សុម៉ាលី ក៏ត្អួញត្អែរពីមូលហេតុខ្លះនាំឲ្យមានភាពស្ងាត់ទីផ្សារថា៖ «វិស័យភាពយន្តកាន់តែរីកដុះដាលគ្រាន់ជាងមុនបន្តិច ហើយតារាសម្តែងស្រករក្រោយក៏សម្បូរ និងមានសម្រស់ស្រស់ស្អាតៗច្រើនទៀត ដូច្នេះខ្ញុំពិបាកប្រកួតប្រជែងនឹងពួកគាត់ណាស់។ បច្ចុប្បន្ននេះ ខាងផលិតកម្ម និងអ្នករៀបចំកម្មវិធីទៀតសោត គេក៏រើសយកសិល្បករ សិល្បការិនី ដែលអាចចេះទាំងច្រៀង និងចេះទាំងការសម្តែងផងដែរ»។

គួររំឮកថា តារាចម្រៀង និងសម្តែងស្រីប្រុស ៦ដួង រួមមានកញ្ញា សាន សុម៉ាលី កញ្ញា នៅ សូនីតា កញ្ញា មាស វ៉ារី លោក ម៉ាដូណា លោក អាឡិច ចាន់ត្រា និងពិធីការិនីផ្នែកសម្របសម្រួលកម្មវិធីកញ្ញា ដារ៉ា នីតា បានហោះហើរទៅចូលរួមនៅក្នុងកម្មវិធីសប្បុរធម៌មួយគឺការសម្តែងសិល្បៈនៅជាច្រើនរដ្ឋក្នុងប្រទេសអូស្ត្រាលីកាលពីខែកុម្ភៈ៕

May 8, 2017

អាហារ 5យ៉ាង ដែលមិនអាចខ្វះបាន សម្រាប់ស្ត្រី 30ឆ្នាំឡើង

អាហារចាំបាច់ចំពោះរាងកាយជានិច្ច អ្នកណាៗក៏ដឹងដែរ ទើបថ្ងៃនេះយើងមានអាហារសុខភាព 5យ៉ាងមកផ្ញើនារីៗ ជាអាហារដ៏ល្អដែលមិនអាចខ្វះបាន ដើម្បីមើលថែទាំសុខភាព និងការពាររោគដែលតែងកើតច្រើននៅក្នុងក្រុមនារីៗយើងពេលអាយុកាន់តែច្រើនឡើង ដូច្នេះយើងនាំគ្នាទៅមើលថា តើមានអ្វីខ្លះ?

1/ យ៉ាអួជាតិខ្លាញ់តិច រសជាតិធម្មជាតិ ជួយកាត់បន្ថយការកើតមហារីកសុដន់ និងការឆ្លងមេរោគក្នុងរន្ធស្បូន ក្រៅពីនេះនៅមានកាល់ស្យូមខ្ពស់ ការពារបញ្ហាពុកឆ្អឹងបានទៀតផង។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 3-5ដង។

2/ ត្រីដែលមានខ្លាញ់ ដូចជា ត្រីសាលម៉ុន ត្រីមែកឃើរេល និងត្រីសាឌីន មានជាតិអាស៊ីតអូមេហ្កា 3 ជួយការពារជំងឺរលាកសន្លាក់ឆ្អឹងរូម៉ាតយដ៍ ជំងឺអេសអឹលអីុ ដែលកើតច្រើននៅលើស្ត្រីច្រើនជាងបុរស។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 2-3ដង។

3/ សណ្តែក ទាំងសណ្តែកដែលទទួលទានបានទាំងកួ ដូចជា ពពាយ សណ្តែកកួ សណ្តែកហោឡាន់តៅ សណ្តែកអង្គុយ សណ្តែកក្រហម និងសណ្តែកខ្មៅ ដែលមានហ្វៃប៊ើរខ្ពស់ មានសារធាតុដែលមានឬទ្ធិទប់ស្កាត់អង់ហ្ស៊ីមប្រូទិអេស ដែលជួយការពារ និងកាត់បន្ថយការបំបែកខ្លួនរបស់កោសិកាមហារីក ជួយការពារមហារីកសុដន់ ហើយដែលសំខាន់គឺ ហុចផលល្អដល់អ័រម៉ូនភេទស្រី។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 2-3ដង។

4/ ផ្លែប៉េងប៉ោះ និងឪឡឹក មានសារធាតុឡៃខូពីន ជួយការពារមហារីកសុដន់ មានសារធាតុអ៊ែនទីអុកស៊ីដេនត៍ ធ្វើឱ្យមើលទៅឃើញនៅក្មេងវ័យ ព្រោះជួយការពារស្បែកមិនឱ្យត្រូវកាំរស្មីអ៊ុលត្រាវីយ៉ូឡេបំផ្លាញ។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 3-5ដង។

5/ ប៊ីរី ដូចជា ប្លូ៊ប៊ីរី ស្ត្រប៊ីរី រ៉ាសប៊ីរី មានអ៊ែនថូសៃអ៊ែនស៍ (Anthocyans) ដែលមានតួនាទីសំខាន់ក្នុងការជួសជុលកោសិកាក្នុងរាងកាយរបស់យើង ក្រៅពីនេះនៅមានការងារស្រាវជ្រាវមួយដែលអះអាងថា វាជួយកាត់បន្ថយភាពប្រថុយប្រថានក្នុងការកើតមហារីកបានច្រើនប្រភេទ ដូចជា មហារីកសុដន់ មហារីកប្រព័ន្ធរំលាយអាហារជាដើម។
កម្រិតដែលគួរទទួលទាន៖ ទទួលទានក្នុងមួយសប្តាហ៍ 3-4ដង។

ចង់ក្លាយជានារីរូបស្អាតសុខភាពល្អ ចូរកុំខកខានអាហារទាំង 5ប្រភេទដូចបានរៀបរាប់ពីខាងលើនេះ ព្រមទាំងត្រូវនាំគ្នាមើលថែទាំខ្លួនតាំងពីថ្ងៃនេះតទៅ៕

May 8, 2017

លោក Conte ជឿជាក់ខ្ពស់ក្នុងការឈ្នះពាន Premier League មុនពេលប៉ះ Middlesbrough រាត្រីនេះ

លោក Antonio Conte បានបញ្ជាក់ថា លោកទើបតែចាប់ផ្តើមប៉ុណ្ណោះ ខណៈដែលក្រុម Chelsea កំពុងតែខិតយ៉ាងប្រកៀកក្នុងការឈ្នះពានក្របខ័ណ្ឌ Premier League។ គ្រូបង្វឹកសញ្ជាតិអ៊ីតាលីរូបនេះ នឹងនាំយកយកពានកំពូលរបស់អង់គ្លេសទៅកាន់កីឡដ្ឋាន Stamford Bridge ប្រសិនបើក្រុមរបស់លោកផ្តួលក្រុម Middlesbrough នៅរាត្រីនេះ និងយកឈ្នះលើក្រុម West Brom នៅថ្ងៃសុក្រ ខាងមុខ។ បន្ទាប់មក លោកនឹងត្រូវសម្រាកនៅរដូវក្តៅ ដើម្បីចាប់ផ្តើមធ្វើការជួសជុលក្រុម Chelsea ដើម្បីធ្វើឲ្យពួកគេកាន់តែមានភាពខ្លាំងក្លា។

លោក Conte បានឲ្យដឹងថា៖ «ពិតណាស់ យើងកំពុងតែស្ថិតក្នុងដំណាក់កាលនៃការផ្លាស់ប្តូរ។ យើងបាត់បង់កីឡាករជាច្រើនដែលបានបង្កើតប្រវត្តិសាស្ត្ររបស់ក្លិបនេះ»។ ខ្សែប្រយុទ្ធ Diego Costa នឹងត្រូវចាកចេញដើម្បីចូលរួមជាមួយនឹងក្លិបនៅចិននារដូវក្តៅនេះ ហើយលោក Conte បានបញ្ជាក់ថា៖ «នៅរដូវកាលនេះ យើងបានបាត់បង់ខ្សែការពារ Ivanovic យើងបានបាត់បង់ Mikel ហើយនៅរដូវកាលក្រោយ យើងនឹងបាត់បង់ John Terry ពោលគឺកីឡាករបីនាក់។ កុំភ្លេចថា Oscar បានចាកចេញកាលពីខែមករា ដែលនៅពេលនោះយើងបានលក់រូបគេចេញ»។

គ្រូបង្វឹករូបបានបន្ថែមទៀតថា៖ «បច្ចុប្បន្ន វាពិតជាលំបាកណាស់ក្នុងការប្រឈមមុខនឹងបញ្ហាទាក់ទងនឹង Costa ហើយខ្ញុំមិនចង់គិតពីបញ្ហានេះឡើយ។ ខ្ញុំចង់ផ្តោតទៅលើការប្រកួតបច្ចុប្ប និងត្រៀមលក្ខណៈឲ្យរួចរាល់ក្នុងការប្រឈមមុខនឹងរាល់ស្ថានភាពទាំងអស់ និងស្វែងរកដំណោះស្រាយដ៏ត្រឹមត្រូវ»។ Chelsea អាចនឹងទិញចូលកីឡាករថ្មី៦នាក់ក្នុងពេលបើកទីផ្សារដោះដូរកីឡាករ ដើម្បីពង្រឹងក្រុមរបស់ខ្លួន។ ក្រុម Chelsea នឹងឈានទៅកាន់ការប្រកួតនេះ ដោយការជឿជាក់ ក្រោយពីចាញ់តែមួយលើកគត់ពីការប្រកួតក្នុងផ្ទះខ្លួនឯង៥លើកចុងក្រោយរបស់ពួកគេ ប៉ុន្តែ ឈ្នះដល់ទៅ៤លើក។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕

ប្រភពពី៖ Mirror

May 8, 2017

កុលាបក្រហម ធ្លាក់ទៅក្របខ័ណ្ឌទី៣ ខណៈ Newcastle លើកពាន Championship

កុលាបក្រហម Blackburn Rovers បានក្លាយជាក្រុមម្ចាស់ជើងឯកក្របខ័ណ្ឌ Premier League ដំបូងគេក្នុងការធ្លាក់ទៅលេងក្នុងក្របខ័ណ្ឌលំដាប់ទី៣នៃកីឡាបាល់ទាត់របស់អង់គ្លេស កាលពីអាទិត្យ ស្របពេលដែលក្រុម Newcastle បានឈ្នះពាន Championship នៅថ្ងៃប្រកួតចុងក្រោយដ៏រំភើប។

ស្របពេលជាមួយគ្នានេះ ការដណ្តើមបានជ័យជម្នះផ្សេងទៀតសម្រាប់អតីតម្ចាស់ជើងឯកអឺរ៉ុប២សម័យកាល Nottingham Forest ដែលបានយកឈ្នះលើក្រុម Ipswich ៣-០ និង Birmingham City ដែលបានផ្តួលក្រុម Bristol City ១-០ បានធ្វើឲ្យក្រុម Blackburn ត្រូវធ្លាក់ចេញតែម្តង។ Blackburn បានក្លាយជាម្ចាស់ជើងឯកក្របខ័ណ្ឌ Premier League កាលពីឆ្នាំ៩៩៥ ប៉ុន្តែ ជោគវាសរបស់ពួកគេបានលិចលុងកាន់តែជ្រៅក្រោមការកាន់កាប់របស់ក្រុមហ៊ុនរបស់ឥណ្ឌា Venky’s។

លោក Rafael Benitez និងក្រុម Newcastle របស់លោក បានខិតខំព្យាយាមយ៉ាងខ្លាំងដើម្បីផ្តួលក្រុម Burnley ក្នុងលទ្ធផល ៣-០ ប៉ុន្តែ ការធ្វេសប្រហែសរបស់អ្នកចាំទី David Stockdale នៃក្រុមរបស់ Brighton បានជួយឲ្យក្រុមសារិកាព្រៃមួយនេះ វិលទៅកាន់ក្របខ័ណ្ឌ Premier League ក្នុងនាមជាម្ចាស់ជើងឯក។ ក្រុម Brighton បានបញ្ចប់ដោយស្ថិតក្នុងចំណាត់ថ្នាក់លេខ២ ក្រោយពីទទួលបានត្រឹមលទ្ធផលស្មើ ១-១ នៅលើទឹកដីក្រុម Aston Villa កាលពីថ្ងៃអាទិត្យ។ លោក Benitez ដែលឈ្មោះរបស់លោកត្រូវបានអ្នកគាំទ្រស្រែកច្រៀងបន្ទរតាមគ្នានោះ បានឲ្យដឹងថា៖ «អ្វីដែលត្រូវតែមានមោទនភាពនោះគឺថា ការខិតខំព្យាយាមដែលបានធ្វើអំឡុងពេលរដូវកាលនេះ បានទទួលលទ្ធផលនៅថ្ងៃនេះ»៕

ប្រភពពី៖ Reuters

May 8, 2017

លោក Mourinho មិនខកចិត្ត ទោះការមិនស្គាល់ចាញ់របស់ Man Utd បញ្ចប់ក្រោមដៃ Arsenal

កំណត់ត្រានៃការមិនស្គាល់ចាញ់ក្នុងការប្រកួតលីករបស់ក្រុមបិសាចក្រហម Manchester United បានឈានដល់ទីបញ្ចប់ទាំងការខកចិត្ត ពេលប្រកួតជាមួយនឹងក្រុមរបស់លោក Arsene Wenger នាកីឡដ្ឋាន Emirates ក្រោយពីក្រុមរបស់លោកបានរងបរាជ័យក្នុងលទ្ធផល ២-០ ក្រោមស្នាដៃក្រុម Arsenal កាលពីថ្ងៃអាទិត្យ។

គ្រាប់បាល់ស៊ុតបញ្ចូលទីក្នុងចន្លោះពេលដ៏រហ័សពីសំណាក់ខ្សែបម្រើ Granit Xhaka និងខ្សែប្រយុទ្ធ Danny Welbeck បានជួយឲ្យក្រុមកាំភ្លើងធំ Arsenal ដណ្តើមបានជ័យជម្នះដ៏សំខាន់មួយ និងបានបំបែកបច្ចេកទេសការពារនៃក្រុមរបស់លោក Jose Mourinho ដើម្បីបង្កើនឱកាសរបស់ពួកគេក្នុងការប្រជែងយកចំណាត់ថ្នាក់កំពូលទាំងបួន។ Man United មិនធ្លាប់ចាញ់សោះពីការប្រកួតទាំង២៥លើកចុងក្រោយរបស់ពួកគេ ក្រោយពីចាញ់ក្រោមស្នាដៃក្រុម Chelsea ក្នុងលទ្ធផល ៤-០ នៅកីឡដ្ឋាន Stamford Bridge បើទោះបីពាក់កណ្តាលនៃលទ្ធផលទាំងនោះ បានបញ្ចប់ក្នុងលទ្ធផលស្មើក៏ដោយ។ ទោះបីជាយ៉ាងណា ពួកគេបានជួបលទ្ធផលដ៏ខកចិត្តពេលបញ្ចប់ការប្រកួត ខណៈដែលលោក Mourinho បានធ្វើការផ្លាស់ប្តូរកីឡាករដល់ទៅ៨នាក់ទៅលើសមាជិកក្រុមដែលបានផ្តួលក្រុម Celta Vigo ក្នុងលទ្ធផល ១-០ ក្នុងការប្រកួតក្របខ័ណ្ឌ Europa League វគ្គពាក់កណ្តាលផ្តាច់ព្រ័ត្រ ជើងទី១ កាលពីថ្ងៃព្រហស្បតិ៍។

លោក Mourinho អ្នកចាត់ការទូទៅរបស់ក្រុម Man United បានឲ្យដឹងថា៖ «យើងបានផ្លាស់ប្តូរកីឡាករ៨នាក់។ ពិតណាស់ យើងបានដឹងថា យើងនឹងមិនមានភាពខ្លាំងក្លាពេញលេញឡើយ។ នោះគឺជាការសម្រេចចិត្តមួយ។ យើងចង់ដណ្តើមពាន Europa League ពីព្រោះវាសំខាន់ជាងការបញ្ចប់ក្នុងចំណាត់ថ្នាក់កំពូលទាំង៤ទៅទៀត»។ គ្រូបង្វឹកសញ្ជាតិព័រទុយហ្គាល់រូបនេះ បានបន្ថែមទៀតថា៖ «ពានចុងក្រោយដែលខ្ញុំបានឈ្នះគឺមានរយៈពេល៣ខែមកហើយ។ ខ្ញុំមិនខ្វល់ពីបញ្ហានោះឡើយ។ ថ្ងៃព្រហស្បតិ៍ គឺជាការប្រកួតដ៏សំខាន់ប្រចាំរដូវកាលនេះ។ ខ្ញុំសង្ឃឹមថា Old Trafford មានអារម្មណ៍បែបនេះ ពីព្រោះយើងត្រូវការ Old Trafford»៕

ប្រភពពី៖ The Sun

May 8, 2017

ស្ងាត់ៗ ពេជ្រ សោភា ពាក់ចិញ្ចៀនបញ្ចាំចិត្តរឹតចំណងស្នេហ៍ពីលោក សក្កដា

ភ្នំពេញៈ មួយរយៈចុងក្រោយនេះ គេស្រាប់តែបានឃើញតារាចម្រៀងស្រីចាស់វស្សានៅលើទ្រនំផលិតកម្មហង្សមាសអ្នកនាង ពេជ្រ សោភា បង្ហាញសិ្នទ្ធិស្នាលនឹងតារាសម្តែងប្រុសលោក ឆឺម សក្កដា និងមានសារផ្អែមល្ហែមទៀតផង ដែលសរបញ្ជាក់ថា ចំណងស្នេហ៍ពួកគេពិតជាមានពន្លឺត្រចះត្រចង់ទៅមុខ។ តែក៏មានការលើកឡើងពីមហាជនខ្លះដែរថា ពួកគេគ្រាន់តែសម្តែងប៉ុណ្ណោះ មិនមានអ្វីកើតឡើងជាពិតនោះទេ។

ហាក់ដូចជាចង់មានការបញ្ជាក់ឲ្យមហាជនដឹង នាពេលថ្មីៗនេះ គេឃើញមានការពាក់ចិញ្ចៀនគូស្នេហ៍រវាងតារាចម្រៀងជាគ្រូបង្វឹកនៅក្នុងកម្មវិធី The Voice Cambodia អ្នកនាង ពេជ្រ សោភា និងលោក ឆឹម សក្កដា បង្ហោះតាមបណ្តាញសង្គមអ៊ីនស្តាក្រាម និងសារមួយនៅតាមហ្វេសប៊ុកសរសេរថា៖ «សំខាន់យើងទាំងពីរសប្បយចិត្ត ទោះជារឿងអ្វីក៏ដោយ ឲ្យតែជួបគ្នាAlways សប្បាយចិត្ត និងនិយាយរឿងល្អឲ្យស្តាប់ទៀត»។

ចំពោះរឿងចិញ្ចៀនគូស្នេហ៍ដែលធ្វើឲ្យមហាជនភ្ញាក់ផ្អើល និងសង្ស័យនោះ ត្រូវបានម្ចាស់បទចម្រៀង «ឆ្កែរាំបុកប៉ោត» និង«រាំឡូយកប់លូ» និងបទ «ហុយៗ» ដែលមានស្រុកកំណើតពីខេត្តព្រៃវែង អ្នកនាង ពេជ្រ សោភា បង្ហើបថា៖ «អត់ទាន់បើកចំហដល់ម្លឹងនោះទេ! តែអរគុណដែរសម្រាប់ការយកចិត្តទុកដាក់ពីសំណាក់បងប្អូនមហាជនតាមដានពីជីវិតគូរបស់ពួកយើង។ សូមបងប្អូនចំណាយពេលតាមដានរឿងយើងបន្តិចទៀតសិនចុះ នឹងជ្រាបហើយ!»៕

May 8, 2017

សល់តែ១សប្តាហ៌ទៀតទេ គូរស្នេហ៍ភេទដូចគ្នា នៅកម្ពុជា នឹងរៀបការហើយ

សេចក្តីស្រលាញ់ គឺមានន័យធំធាងណាស់ចំពោះមនុស្សទូទៅ ដែលគ្មាននរណាអាចកំណត់បានទេ អ្នកខ្លះស្រលាញ់ស្រីដូចគ្នា អ្នកខ្លះស្រលាញ់ប្រុសដូចគ្នា ហើយក៏មានអ្នកខ្លះមានកូនក្រមុំពីរនាក់ ស្រលាញ់កូនកំលោះតែម្នាក់ក៏មាន។
តែបើលោកអ្នកយល់ពីក្តីស្រលាញ់ពិតប្រាកដ លោកអ្នកនឹងអាចស្វែងរកសុភមង្គល និងគូរស្នេហ៍ពិតអោយ ជីវិតខ្លួនឯងបាន។ ស្នេហាមិនត្រូវបានបែងចែកភេទនោះទេ សំខាន់គូរស្នេហ៍មួយគូរដែលយល់ពីក្តីស្នេហ៍ស៊ីជម្រៅរវាងគ្នានឹងគ្នា។ តួរយ៉ាងដូចគូរស្នេហាមួយគូរខាងក្រោមនេះ គាត់ជាបុរសដូចគ្នា តែពួកគាត់ពុះពារ និងហ៊ានប្រឈមមុខជាមួយក្រុមគ្រួសារ និងសង្គម។

មិនធម្មតាទេទម្រាំមានថ្ងៃនេះ លោកអ្នកប្រហែលមិនបានដឹងថា ការស្រលាញ់ភេទដូចគ្នាត្រូវប្រឈមបញ្ហាអ្វីខ្លះ ដែលពួកគេម្នាក់ៗត្រូវឆ្លងកាត់ មិនមែនតែមួយគូរនេះទេ ពេលបច្ចុប្បន្នគឺសង្កេតឃើញថា មានច្រើនឡើងៗ។ នៅក្នុង គណនី Facebook ដែលមានឈ្មោះថា Toto Mayuko (Toto) បានបង្ហោះក្នុង គណនីរបស់ខ្លួនថាពួកគេនឹងរៀបការនៅថ្ងៃទី១៤ ខែឧសភា ឆ្នាំ២០១៧ នេះហើយ ជាមួយម្ចាស់គណនី Facebook ដែលមានឈ្មោះថា Veas Dara Nako ដែលជាគូរស្នេហ៍របស់លោក។ ហើយក្នុងនោះក៏ឃើញមានការជូនពរជាច្រើនផងដែរ។ បើសិនជាយើងចេះអោយតម្លៃលើស្នេហា និងមានភាពស្មោះត្រង់នឹងគ្នា នោះស្នេហារបស់អ្នកនឹងបានជោគជ័យ ហើយក៏សូមជូនពរអោយស្រលាញ់គ្នាជារៀងរហូត។

ប្រភព : Facebook

May 7, 2017

បទថ្មី «បំពេម្តាយ» ធ្វើឲ្យ មាស សុខសោភា បង្ហូរទឹកភ្នែកពិតៗ

ភ្នំពេញៈ មិននឹកស្មានថាបទថ្មីមានចំណងជើងថា «បំពេម្តាយ» ធ្វើឲ្យកំពូលតារាស្រីឈរលើទ្រនំផលិតកម្មថោន អ្នកនាង មាស សុខសោភា កប់អារម្មណ៍អួលដើមក ច្រៀងលែងចេញទំរាំត្រូវគឺចំណាយពេលច្រើនលើកឯណោះ។

ទោះបីជាខ្លួនធ្លាប់ ឆ្លងកាត់បទពិសោធន៍ស្ទើរគ្រប់រសជាតិនៅក្នុងឈុតឆាកថតសម្តែងបទជាង១០ឆ្នាំហើយក៏មិនដែលមានអារម្មណ៍រន្ធត់បែបនេះដែរគឺបទ «បំពេម្តាយ» ធ្វើឲ្យអ្នកនាង មាស សុខសោភា ស្រែកច្រៀងលែងចេញ បែរជាចេញទឹកភ្នែកជោគជាំលើផែនថ្ពាល់ទាំងគូជំនួសសំនៀងរ៉ៃកណ្តឹងដ៏ក្រអួនក្រអៅខ្លួន។

ប្រភពពីលោក អ៊ុក រតនា អ្នកដឹកនាំសម្តែងរបស់ផលិតកម្មថោនបានបង្ហើបឲ្យដឹងថា៖ «តារាចម្រៀងស្រី មាស សុខសោភា អួលដើមក ច្រៀងមិនចេញ និងបង្ហូរទឹកភ្នែក មកពីគាត់ចូលអារម្មណ៍ស្លុងនឹងអត្ថន័យបទចម្រៀងនេះ។ ពិសេសទៅទៀតគឺបទនេះក៏មានវត្តមានអ្នកម្តាយជាទីស្រឡាញ់របស់អ្នកនាងផ្ទាល់ចូលរួមសម្តែង ដោយក្រុមការងារយើងលាក់ការសំងាត់គឺមិនប្រាប់ ឲ្យដឹងមុន។ ក៏ស្រាប់តែអ្នកនាង មាស សុខសោភា ភ្ញាក់ផ្អើលក្នុងអារម្មណ៍យ៉ាងខ្លាំង ខណៈក្រុមការងារគ្រាន់ប្រាប់គាត់ថានឹងមានបទសម្ភាសន៍មួយត្រូវនិយាយពីអារម្មណ៍ពិតចំពោះម្តាយមុនពេល ចេញទៅកាណាដា នោះឯង»។

លោក អ៊ុក រតនា បន្តថា៖ «ទំរាំគាត់ប្រមូលអារម្មណ៍ល្អ អាចបង្ហើរសំនៀងបាននោះ គឺគាត់ជាប់គាំងពីរបីដងឯណោះ ទើបយើងអាចចាប់យកការថតជាការបាន។ គាត់ថា មកពីអារម្មណ៍នឹកស្រណោះឃើញកាលគ្រានៅពីក្មេងម្តាយធ្លាប់បីបាច់ថែរក្សា និងបំពេគាត់ ខណៈបទចម្រៀងហាក់ជម្រុញទឹកចិត្តឲ្យកូនៗចេះបំពេម្តាយវិញទើបស្រក់ទឹកភ្នែកទប់លែងបានដូច្នេះនឹងឯង»៕

May 7, 2017

RB Leipzig ឈ្នះកៅអីទៅលេងក្នុង Champions League ជាស្វ័យប្រវត្តិ

ក្រុម RB Leipzig បានបញ្ចប់យុទ្ធនាការនៃក្របខ័ណ្ឌ Bundesliga ជាលើកដំបូងរបស់ពួកគេជាមួយនឹងការឈ្នះសិទ្ធិជាស្វ័យប្រវត្តិទៅលេងក្នុងក្របខ័ណ្ឌ Champions League នារដូវកាលក្រោយ ខណៈដែលខ្សែប្រយុទ្ធ Timo Werner បានស៊ុតបាល់បញ្ចូលទី២គ្រាប់ ក្នុងពេលក្រុមខ្លួនទទួលជ័យជម្នះ ៤-១ លើក្រុម Hertha Berlin កាលពីថ្ងៃសៅរ៍។ Leipzig ដែលត្រូវបានបង្កើតឡើងដោយក្រុមហ៊ុនភេសជ្ជៈប៉ូវកម្លាំង Red Bull កាលពីឆ្នាំ២០០៩នោះ ទើបតែបានឈានទៅប្រកួតក្របខ័ណ្ឌកំពូលរបស់អាល្លឺម៉ង់ នៅក្នុងរដូវកាលនេះប៉ុណ្ណោះ ក្រោយពីឡើងផុតពីក្របខ័ណ្ឌបួន ក្នុងរយៈពេល៧ឆ្នាំ។

ពួកគេបច្ចុប្បន្នស្ថិតក្នុងចំណាត់ថ្នាក់លេខ២នៅលើតារាង និងមានភាពជាក់លាក់ក្នុងការបញ្ចប់ក្នុងចំណាត់ថ្នាក់កំពូលទាំង៣ ដែលមានន័យថា នឹងត្រូវឈ្នះកៅអីទៅលេងក្នុងក្របខ័ណ្ឌ Champions League វគ្គចែកពូល។ លោក Ralph Hasenhuettl គ្រូបង្វឹករបស់ក្រុម Leipzig បានឲ្យដឹងថា៖ «ខ្ញុំពិតជាមានមោទនភាពណាស់។ វាពិតជាគ្មានកន្លែងណាល្អប្រសើរជាងនេះក្នុងការអបអរនៅពីមុខអ្នកគាំទ្រដ៏ច្រើនបែបនេះឡើយ»។ ពួកគេក្លាយជាក្លិបស្ថិតក្នុងក្របខ័ណ្ឌ Bundesliga ដំបូងគេបើគិតចាប់តាំងពីក្លិប Kaiserslautern កាលពីឆ្នាំ១៩៩៨ ក្នុងការឈ្នះកៅអីជាស្វ័យប្រវត្តិទៅកាន់ក្របខ័ណ្ឌ Champions League ភ្លាមៗ ក្រោយពីបានឈ្នះសិទ្ធិទៅលេងក្នុងក្របខ័ណ្ឌកំពូល។ ខ្សែប្រយុទ្ធសញ្ជាតិអាល្លឺម៉ង់ Werner វ័យ២១ឆ្នាំ បច្ចុប្បន្នបានរកគ្រាប់បាល់បញ្ចូលទីក្នុងការប្រកួតលីកចំនួន២១គ្រាប់នៅរដូវកាលនេះ៕

ប្រភពព័ត៌មាន៖ Channel News Asia

May 7, 2017

Category: សង្គម និងសេដ្ឋកិច្ច