សង្គម និងសេដ្ឋកិច្ច - La Reine Media

ស្ពានមិត្តភាពកម្ពុជា-កូរ៉េខាងត្បូងតម្លៃជាង 245 លានដុល្លារ នឹងចាប់ផ្ដើមស្ថាបនានៅឆ្នាំក្រោយ

គម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ នឹងត្រូវចុះហត្ថលេខារវាងរាជរដ្ឋាភិបាល នៃព្រះរាជាណាចក្រកម្ពុជា និង រដ្ឋាភិបាលនៃសាធារណរដ្ឋកូរ៉េថ្ងៃទី 09 ធ្នូ នៅវិមានសន្តិភាព ហើយចាប់ផ្ដើមសាងសង់នៅឆ្នាំក្រោយ នេះបើតាម អ្នកនាំពាក្យក្រសួងសាធារណការ និងដឹកជញ្ជូន និងក្រសួងការបរទេសកម្ពុជា។

គម្រោងសាងសង់ស្ពានមិត្តភាពកម្ពុជា-កូរ៉េខាងត្បូង ឆ្លងទន្លេសាប និងទន្លេមេគង្គ ពីផ្សារចាស់ រាជធានីភ្នំពេញ ទៅជ្រោយចង្វារ និង អរិយ្សត្រ ខេត្តកណ្ដាល ដែលនឹងចំណាយថវិកា 245,909,000 ដុល្លារអាមេរិកនេះ គឺជាស្ពានខ្សែកាបដែលមានជើងសសរទម្រខ្ពស់សំខាន់ចំនួនពីរ ហើយជើងសសររង្វើល ងាយស្រួលកប៉ាល់ឆ្លងកាត់ពីខាងក្រោម។

យោងតាមលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន ស្ពានដែលមានប្រវែងសរុបជាង 2 គីឡូម៉ែត្រនេះ នឹងជួយសម្រួលឱ្យការធ្វើចរាចរណ៍ កាត់បន្ថយការកកស្ទះចេញចូលរាជធានីភ្នំពេញ និងតភ្ជាប់ទៅតំបន់អភិវឌ្ឍន៍អរិយក្សត្រ ស្វាយជ្រុំ។

គម្រោងស្ថាបនាស្ពានខាងលើនេះស្ថិតក្នុងចំណោមគម្រោងហេដ្ឋារចនាសម្ព័ន្ធចំនួនពីរនៅ កម្ពុជា ដែលផ្ដល់ឥណទានសម្បទានដោយ កូរ៉េខាងត្បូង។ ឥណទានសម្បទានតម្លៃ 1,500 លានដុល្លារអាម៉េរិក សម្រាប់ កម្ពុជា ពីឆ្នាំ 2022-2026 របស់ កូរ៉េខាងត្បូង គ្រោងនឹងចុះហត្ថលេខានៅថ្ងៃនេះ។

ឥណទានសម្បទានដែលផ្ដល់ដោយ កូរ៉េខាងត្បូង នេះ នឹងចូលរួមចំណែកដ៏សំខាន់ក្នុងការខិតខំរបស់ កម្ពុជា ដើម្បីពន្លឿនការអភិវឌ្ឍសេដ្ឋកិច្ច ក៏ដូចជាការពង្រឹងបន្ធែមនូវទំនាក់ទំនងល្អទ្វេភាគីដែលមានស្រាប់រវាង កម្ពុជា និង កូរ៉េខាងត្បូង នេះបើតាម ក្រសួងការបរទេសកម្ពុជា៕

December 9, 2022

សម្ដេចតេជោអញ្ជើញប្រជាពលរដ្ឋទៅលេងបុណ្យសមុទ្រនៅក្រុងព្រះសីហនុ

នៅលើទំព័របណ្ដាញសង្គម នាព្រឹកមិញ ប្រមុខរាជរដ្ឋាភិបាលកម្ពុជា បង្ហោះសារអញ្ជើញប្រជាពលរដ្ឋទៅលេងបុណ្យសមុទ្រនៅ ខេត្តព្រះសីហនុ ដែលធ្វើឡើងចាប់ពីថ្ងៃទី 09 ដល់ 11 ធ្នូ 2022។

សម្ដេចតេជោ បានសរសេរថា «កំពុងធ្វើដំណើរលើផ្លូវល្បឿនលឿនពី ភ្នំពេញ ខេត្តព្រះសីហនុ។ យើងនឹងខិតខំកសាងផ្លូវល្បឿនលឿនមួយខ្សែទៀតតភ្ជាប់ពីភ្នំពេញទៅបាវិត ព្រំដែនវៀតណាម។ សូមអញ្ជើញទៅលេងបុណ្យសមុទ្រនៅ ក្រុងព្រះសីហនុ ថ្ងៃស្អែក 10 ធ្នូ 2022»។

យោងតាម ក្រសួងទេសចរណ៍ ពិធីបុណ្យសមុទ្រលើកទី 9 ដែលចាប់ផ្ដើមពីថ្ងៃទី 09 ដល់ 11 ធ្នូ 2022 នេះនឹងធ្វើឡើងអមជាមួយនឹងការធ្វើជាម្ចាស់ផ្ទះរៀបចំមហាសន្និបាត ក្លិបឆ្នេរសមុទ្រដែលស្អាតបំផុតលើសកលលោក ចាប់ពីថ្ងៃទី 09 ដល់ 14 ខែធ្នូ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»។

គិតមកដល់ពេលនេះ សេវាកម្មស្នាក់នៅក្នុង ក្រុងព្រះសីហនុ មានការកក់យ៉ាងច្រើនដើម្បីត្រៀមមកកម្សាន្ត នាឱកាសបុណ្យសមុទ្រ ប៉ុន្តែមិនទាន់ខ្វះកន្លែងស្នាក់នៅសម្រាប់ទេសចរនៅឡើយ ដោយសារថា ក្រុងព្រះសីហនុ មានបន្ទប់ស្នាក់នៅសរុបជាង 9,000 បន្ទប់ឯណោះ នេះបើតាម លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ៕

December 9, 2022

(World Cup 2022)- អាល្លឺម៉ង់ ៖ ក្រុម WAGs (គូស្នេហ៍របស់កីឡាករ) គឺជាមូលហេតុមួយនាំឱ្យពួកគេបរាជ័យ

ទំព័រ Bild របស់ អាល្លឺម៉ង់ ចុះផ្សាយថា នៅក្នុងសន្និសីទសារព័ត៌មានដើម្បីស្វែងរកមូលហេតុនៃការបរាជ័យរបស់ ក្រុមជម្រើសជាតិអាល្លឺម៉ង់ នៅ World Cup 2022 ក្រុម WAGs (គូស្នេហ៍របស់កីឡាករ) របស់ ក្រុមជម្រើសជាតិ ត្រូវបានមេដឹកនាំមួយចំនួននៅ សហព័ន្ធបាល់ទាត់អាល្លឺម៉ង់ «ហៅឈ្មោះ»។

ក្រោយរដូវកាល World Cup 2018 ដែលមិនបានឆ្លងផុតវគ្គចែកពូល ក្រុមជម្រើសជាតិអាល្លឺម៉ង់ ក៏បានប្ដេជ្ញាចិត្តខ្ពស់សម្រាប់រដូវកាលនៅ កាតា។ ប៉ុន្តែ ពួកគេនៅតែលេងមិនបានល្អដដែល ហើយក៏មិនអាចឡើងដល់វគ្គ 1/8 ជាលើកទីពីរនៅ World Cup ពីររដូវកាលចុងក្រោយនេះ។

ក្រោយបរាជ័យនៅ កាតា ក្រុមអាល្លឺម៉ង់ ក៏ត្រលប់ទៅស្រុកវិញ។ ថ្មីៗនេះ សហព័ន្ធបាល់ទាត់អាល្លឺម៉ង់ (DFB) បានធ្វើសន្និសីទ 2 ម៉ោងដើម្បីវិភាគ រកមូលហេតុនៃការបរាជ័យរបស់ ក្រុមជម្រើសជាតិ នៅ World Cup 2022។

មានមូលហេតុជាច្រើនត្រូវបានលើកឡើង ក្នុងនោះក៏មានការពិតដែលថា គ្រូបង្វឹក Hansi Flick បានអនុញ្ញាតឱ្យប្រពន្ធ និងមិត្តស្រីរបស់កីឡាករ ស្នាក់នៅក្នុងសណ្ឋាគាររបស់ក្រុម។ ប្រធានសហព័ន្ធបាល់ទាត់អាល្លឺម៉ង់ Bernd Neuendorf និងអនុប្រធាន Joachim Watzke យល់ថា វត្តមានរបស់ Wags បានធ្វើឱ្យកីឡាករអាល្លឺម៉ង់ ត្រូវបែកអារម្មណ៍។ ក្រុមមេដឹកនាំរបស់ DFB មិនពេញចិត្តនៅពេលឃើញកីឡាករត្រូវថែទាំកូន។

យោងតាម Bild គ្រូបង្វឹក Flick នឹងនៅតែបន្តការងារជាធម្មតា។ លោក Flick នឹងដឹកនាំក្រុមជម្រើសជាតិរបស់ អាល្លឺម៉ង់ ទៅប្រកួតនៅ Euro 2024៕

December 9, 2022

អេស្ប៉ាញ មានគ្រូបង្វឹកថ្មី បន្ទាប់ពីបានចែកផ្លូវគ្នាជាមួយ Luis Enrique

យប់ថ្ងៃទី 08 ធ្នូ សម្ព័ន្ធបាល់ទាត់អេស្ប៉ាញ (RFEF) ប្រកាសជាផ្លូវការថា «ចែកផ្លូវគ្នា» ជាមួយគ្រូបង្វឹក Luis Enrique ក្រោយពីក្រុមជម្រើសជាតិអេស្បា់ញ បានចាញ់ ម៉ារ៉ុក ក្នុងការប្រកួតនៅវគ្គ 16 ក្រុម ហើយក្លាយជាក្រុមជម្រើសជាតិទី 5 ដែលបានបញ្ឈប់ការងាររបស់គ្រូបង្វឹកនៅ World Cup 2022។

បច្ចុប្បន្ន RFEF បានប្រកាសបង្ហាញអ្នកដែលត្រូវចូលមកជំនួសគ្រូបង្វឹក Luis Enrique សម្រាប់ដំណាក់កាលថ្មី នោះគឺគ្រូបង្វឹកមកពីក្រុម U21 លោក Luis de la Fuente។

គ្រូបង្វឹកថ្មីនេះគឺជាមនុស្សដែលត្រូវបានប្រធានកីឡារបស់ RFEF លោក Jose Francisco Molina ស្នើដោយផ្ទាល់ទៅកាន់ប្រធាន RFEF លោក Luis Rubiales។ គ្រូបង្វឹក Ruente នឹងបង្ហាញខ្លួនជាផ្លូវការនៅខែមីនា 2023 នៅវគ្គជម្រុះ EURO 2024។

លោក Ruente ធ្លាប់ជាកីឡាករម្នាក់នៅ Athletic Bilbao។ គាត់បានចុះកិច្ចព្រមព្រៀងតាំងពីពេលមានអាយុ 15 ឆ្នាំ ហើយឆ្លងកាត់ 7 ឆ្នាំនៅទីនេះ មុននឹងបានទៅកាន់ Sevilla។

ក្រោយមក លោក Ruente ក៏បានត្រលប់មកកាន់ Bilbao និងបញ្ចប់អាជីពជាកីឡាករនៅ Deportivo Alaves បន្ទាប់ពីបានចូលរួមប្រកួតជាង 250 លើកនៅពានរង្វាន់ La Liga ក៏ដូចជាធ្លាប់បានក្លាយជាកីឡាករ U21 អន្តរជាតិ និងជើងឯក Olympic។

ឆ្នាំ 2013 លោក Ruente ដឹកនាំក្រុម U19 អេស្ប៉ាញ ហើយក្រោយមកក៏បន្តធ្វើការជាមួយក្រុម U21 និង U23 អេស្ប៉ាញ។

December 9, 2022

ខ្សែភាពយន្ត «Avatar 2» ទទួលបានការវាយតម្លៃថា ពោរពេញដោយភាពមហស្ចារ្យ

ក្រុមអ្នកវិភាគអន្តរជាតិសម្ដែងការកោតសរសើរចំពោះវគ្គពីរនៃខ្សែភាពយន្តរឿង «Avatar» ថា ប្រកបដោយភាពអស្ចារ្យ និងមានទិដ្ឋភាពបង្ហាញពីមនោសញ្ចេតនាគួរឱ្យរំជួលចិត្តច្រើនជាងវគ្គមួយ។

យោងតាម Variety ក្រោយការរង់ចាំអស់ 13 ឆ្នាំ អ្នកវិភាគល្បីឈ្មោះជាច្រើនរូបក៏ត្រូវបានក្រុមអ្នកផលិតរបស់ខ្សែភាពយន្តរឿង Avatar: The Way of Water អញ្ជើញឱ្យចូលរួមព្រឹត្តិការណ៍បញ្ចាំង និងរិះគន់នៅ ក្រុងឡុងដ៍ កាលពីដើមសប្ដាហ៍កន្លង។

លទ្ធផលនៃការវាយតម្លៃដំបូងរបស់ក្រុមអ្នកវិភាគ ត្រូវបានបង្ហោះលើបណ្ដាញសង្គម។ ភាគច្រើន អ្នកវិភាគបានវាយតម្លៃវិជ្ជមានទៅលើខ្សែភាពយន្តនេះ។ អ្នកវិភាគច្រើនរូបបានកោតសរសើរថា វគ្គថ្មីនេះពោរពេញដោយការស្រមៃដ៏អស្ចារ្យដែលជាស្នាដៃរបស់អ្នកដឹកនាំ James Cameron និងបច្ចេកទេសកាត់តវីដេអូនៅក្នុងខ្សែភាពយន្ត។

«នេះគឺជាចំណុចកំពូលនៃសិល្បៈរៀបរាប់រឿងរ៉ាវ និងការផលិតភាពយន្ត» អ្នកវិភាគ Erik Davis និយាយដូច្នេះ។ ចំណែក Josh Horowitz ពិធីករនៃកម្មវិធី Happy Sad Confused និយាយថា «ខ្ញុំមិនដែលមានមន្ទិលចំពោះគាត់ (លោក James Cameron)…។ …ពោរពេញដោយមនោសញ្ចេតនា និងមហស្ចារ្យ»។

វគ្គពីររបស់ Avatar ត្រូវបានបញ្ចេញកាលពីពាក់កណ្ដាលខែធ្នូ 2022 និងមានគម្លាតពីវគ្គមួយ 13 ឆ្នាំ។ ចំណែក 3 វគ្គបន្ទាប់ទៀតរបស់ខ្សែភាពយន្តនេះក៏ត្រូវបានរៀបគម្រោងផលិត ហើយគ្រោងនឹងចាប់បញ្ចាំងនៅឆ្នាំ 2024, 2026 និង 2028។

វគ្គដំបូងរបស់ Avatar ដែលបានចាប់បញ្ចាំងកាលពីឆ្នាំ 2009 បានយកឈ្នះលើ Titanic ដែលដឹកនាំរឿងដោយលោក Cameron ដូចគ្នា និងបានក្លាយជាខ្សែភាពយន្តដែលមានអ្នកទស្សនាច្រើនជាងគេបង្អស់នៅគ្រប់សម័យកាល និងរកបានចំណូល 2.8 ពាន់លានដុល្លារអាម៉េរិកនៅក្នុងរយៈពេល 13 ឆ្នាំកន្លង៕

December 8, 2022

ផ្លូវខេត្ត 2 ខ្សែ ប្រវែងសរុបជាង 43 គីឡូម៉ែត្រ គ្រោងដាក់ឱ្យប្រើប្រាស់នៅ 2 សប្ដាហ៍ទៀត

ផ្លូវខេត្ត 2 ខ្សែ ប្រវែងសរុបប្រមាណជាង 43 គីឡូម៉ែត្រ គ្រោងនឹងត្រូវបានសម្ពោធបើកឱ្យប្រើប្រាស់ជាផ្លូវការនៅថ្ងៃទី 22 ខែធ្នូ ឆ្នាំ 2022 ខាងមុខ នេះបើតាមការឱ្យដឹងនៅថ្ងៃនេះពី ក្រសួងសាធារណការ និងដឹកជញ្ជូន។

ឯកឧត្តម សួង ហេង រដ្ឋលេខាធិការ ក្រសួងសាធារណការ និងដឹកជញ្ជូន នាព្រឹកនេះបានអញ្ជើញដឹកនាំកិច្ចប្រជុំគណៈកម្មការសម្រាប់ត្រៀមរៀបចំពិធីសម្ពោធបើកឱ្យប្រើប្រាស់ជាផ្លូវការ ផ្លូវខេត្តលេខ 146បេ និង ផ្លូវខេត្តលេខ148 ដែលមានប្រវែងសរុបប្រមាណ 43.02 គីឡូម៉ែត្រ ស្ថិតនៅក្នុង ខេត្តព្រះសីហនុ ដោយមានការអញ្ជើញចូលរួម មន្ត្រីជំនាញពាក់ព័ន្ធជាច្រើនរូប។

កិច្ចប្រជុំនេះត្រូវបានរៀបចំឡើងក្នុងគោលបំណងដើម្បី ធ្វើការបែងចែកតួនាទីនិងភារកិច្ចជូនដល់សមាជិកសមាជិកានៃគណៈកម្មាការ និងអនុគណៈកម្មការសម្រាប់ត្រៀមរៀបចំពិធីសម្ពោធ ដើម្បីឱ្យប្រព្រឹត្តិទៅបានដោយរលូន។

យោងតាម ក្រសួងសាធារណការ ពិធីសម្ពោធបើកឱ្យប្រើប្រាស់ជាផ្លូវការផ្លូវខេត្តលេខ 146បេ និង ផ្លូវខេត្តលេខ148 នេះ គ្រោងនឹងប្រព្រឹត្តទៅនៅថ្ងៃទី 22 ខែធ្នូ ឆ្នាំ 2022 ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕

December 8, 2022

គម្រោងផ្លូវល្បឿនលឿនវែងបំផុតនៅភាគខាងត្បូងវៀតណាម ដែលតភ្ជាប់មកក្បែរព្រំដែនកម្ពុជា

(វៀតណាម)- គម្រោងផ្លូវល្បឿនលឿន ចូវដុក-កឹនធើ-សុកទ្រាំង (មាត់ជ្រូក-ព្រែកឫស្សី-ឃ្លាំង) ដែលមានប្រវែង 188 គីឡូម៉ែត្រ និងរត់ឆ្លងកាត់ខេត្តអានយ៉ាង ទីក្រុងកឹនធើ ខេត្តហូវយ៉ាង និងខេត្តសុកទ្រាំង គឺជាផ្លូវល្បឿនលឿនវែងបំផុតនៅភាគខាងត្បូងរបស់ វៀតណាម ឬហៅថា ដែនដីសណ្ដទន្លេមេគង្គ។

យោងតាម ក្រសួងដឹកជញ្ជូនវៀតណាម ផ្លូវល្បឿនលឿនដែលទទួលបានទុនវិនិយោគជាង 44 ទ្រីលានដុង (ប្រហែល 1,877,000,000 ដុល្លារអាម៉េរិក) នេះ មាន 4 គន្លងសម្រាប់រថយន្ត និងអាចបើកបរក្នុងល្បឿន 100 គីឡូម៉ែត្រ/ម៉ោង។

អំពីវឌ្ឍភាព ការត្រៀមសម្រាប់ការវិនិយោគ និងការអនុវត្តគម្រោងផ្លូវល្បឿនលឿនវែងបំផុតនៅភាគខាងត្បូងរបស់ វៀតណាម នេះ ត្រូវបានចាប់ផ្ដើមពីឆ្នាំ 2022 ហើយតាមផែនការ កំណាត់ផ្លូវសំខាន់ៗមួយចំនួនក្នុងគម្រោងនឹងត្រូវបានបញ្ចប់នៅឆ្នាំ 2025 និងរួចរាល់ទាំងស្រុងជាស្ថាពរនៅឆ្នាំ 2026 ដើម្បីដាក់ឱ្យប្រើប្រាស់ដំណាលគ្នានៅឆ្នាំ 2027។

December 8, 2022

កាតា ចាប់ផ្ដើមរុះរើកីឡដ្ឋានដែលសាងសង់ឡើងពីកុងតឺន័រចំនួន 974 ទូ

កម្មករចាប់ផ្ដើមរុះរើកីឡដ្ឋានបណ្ដោះអាសន្ន 974 នៅក្នុងតំបន់ Ras Abu Aboud រដ្ឋធានីដូហា ក្រោយការប្រកួតចុងក្រោយបានកន្លងទៅច្រើនថ្ងៃ។

កីឡដ្ឋាន 974 ត្រូវបានសម្ពោធដំណើរការកាលពីថ្ងៃទី 20 វិច្ឆិកា 2022 និងត្រូវបានប្រើប្រាស់សម្រាប់តែ 13 ប្រកួតប៉ុណ្ណោះ រួមមាន 6 ប្រកួតរបស់ Arab Cup និង 7 ប្រកួតរបស់ World Cup។ ការប្រកួតចុងក្រោយដែលធ្វើឡើងនៅលើកីឡដ្ឋាននេះគឺការប៉ះគ្នារវាងក្រុមជម្រើសជាតិរបស់ ប្រេស៊ីល និង កូរ៉េខាងត្បុង នៅក្នុងវគ្គជម្រុះផ្ទាល់កាលពីថ្ងៃទី 05 ធ្នូ ក្នុងនោះក្រុមមកពី អាម៉េរិកខាងត្បូង បានឈ្នះ 4-1។

ប៉ុន្មានម៉ោងបន្ទាប់ពីសំឡេងកញ្ចែបានបញ្ចប់ការប្រកួត គេឃើញរថយន្តដឹកទំនិញ និងរថយន្តស្ទូច បានមកកាន់កីឡដ្ឋាន 974។ កាលពីថ្ងៃទី 07 ធ្នូ ក្រុមកម្មករចាប់ផ្ដើមរុះរើផ្នែកខាងក្រៅកីឡដ្ឋាន។

ក៏ប៉ុន្តែ នេះមិនមែនជាទីបញ្ចប់របស់កីឡដ្ឋាន 974 ឡើយ។ យោងតាម Financial Times កាតា គ្រោងដឹកជញ្ជូនកុងតឺន័រទាំង 974 ទូនេះទៅកាន់ អ៊ុយរូហ្កាយ ដែលមានចម្ងាយពី ដូហា ប្រហែល 13,000 គីឡូម៉ែត្រ បើធ្វើដំណើរតាមផ្លូវសមុទ្រ។

អ៊ុយរូហ្កាយ មានផែនការសាងសង់កីឡដ្ឋានទៅតាមរចនាសម្ព័ន្ធដើម និងប្រារព្ធការប្រកួតបាល់ទាត់នៅទីនោះក្នុងឆ្នាំ 2030 បើសិនប្រទេសនេះទទួលបានសិទ្ធិធ្វើជាម្ចាស់ផ្ទះ World Cup។ អ៊ុយរូហ្កាយ សង្ឃឹមថា គំនិតផ្ដួចផ្ដើមដែលត្រូវបានស្នើក្នុងបំណងកាត់បន្ថយការចំណាយទៅលើការសាងសង់កីឡដ្ឋាន និងក្រោយការប្រកួត នឹងជួយឱ្យពួកគេទទួលបានសន្លឹកឆ្នោតគាំទ្រគ្រប់គ្រាន់ដើម្បីមានសិទ្ធិប្រារព្ធព្រឹត្តិការណ៍ World Cup 2030 ដែលជាវេលាគម្រប់ខួប 100 ឆ្នាំ រាប់ចាប់តាំងពី អ៊ុយរូហ្កាយ បានទទួល World Cup លើកដំបូង។

974 ស្ថិតក្នុងចំណោមកីឡដ្ឋានចំនួន 7 នៅ កាតា ដែលត្រូវបានសាងសង់ថ្មីសម្រាប់ទទួល World Cup 2022 ហើយក៏ជាកីឡដ្ឋានបណ្ដោះអាសន្នដំបូងគេក្នុងប្រវត្តិសាស្ត្រ World Cup ផងដែរ។ កីឡដ្ឋាន 974 ត្រូវបានសាងសង់ឡើងពីកុងតឺន័រចំនួន 974 ទូ អាចដាក់មនុស្សបាន 40,000 នាក់។ 974 ក៏ជាលេខកូដតំបន់របស់ កាតា នៅក្នុងវិស័យទុរគមមនាគមន៍អន្តរជាតិទៀតផង៕

December 8, 2022

ក្រុមហ៊ុនអាម៉េរិក Tesla ដាក់លក់រថយន្តអគ្គិសនីនៅ ទីផ្សារប្រទេសថៃ ជាផ្លូវការ

ក្រុមហ៊ុនផលិតរថយន្តអគ្គិសនីអាម៉េរិក Tesla បានបង្ហាញរថយន្តអគ្គិសនីចំនួន 2 ម៉ូដែលរបស់ខ្លួននៅ ប្រទេសថៃ កាលពីថ្ងៃទី 07 ធ្នូ ដែលនេះគឺជាជំហានដំបូងរបស់ក្រុមហ៊ុននៅក្នុងតំបន់ដែលគ្រប់គ្រងដោយអ្នកផលិតរថយន្តជប៉ុន តាំងពីយូរមកហើយ។

ការបង្ហាញម៉ូដែលរថយន្តអគ្គិសនីដែលមានតម្លៃពី 1.7 លានបាត ដល់ 2.5 លានបាត (ប្រហែល 48,447 ដុល្លារ ដល់ 71,205 ដុល្លារអាម៉េរិក) ខាងលើនេះ ត្រូវបានធ្វើឡើងនៅពេល ប្រទេសថៃ ជំរុញការប្រើប្រាស់ និងផលិតរថយន្តអគ្គិសនីដោយការកាត់បន្ថយអត្រាពន្ធ និងការផ្ដល់ជំនួយផ្សេង។

នៅក្នុងទីផ្សារប្រទេសថៃ Tesla Model 3 និង Model Y ដែលត្រូវបានបង្ហាញគឺមាន 3 កំណែ ៖ RWD, Long Range AWD និង Performance។

Tesla មានគម្រោងចាប់ផ្ដើមលក់រថយន្តអគ្គិសនីរបស់ខ្លួននៅក្នុងទីផ្សារធំជាងគេលំដាប់ទីពីររបស់ អាស៊ីអាគ្នេយ៍ តាមរយៈថ្នាលបច្ចេកវិទ្យា ហើយការប្រគល់ទំនិញនឹងចាប់ផ្ដើមពីដើមឆ្នាំ 2023។

នៅក្នុងទីផ្សារថៃ Tesla នឹងត្រូវប្រកួតប្រជែងជាមួយនឹងបណ្ដាក្រុមហ៊ុនចិន មានដូចជា BYD និង Great Wall Motors ជាដើម ដែលក្រុមហ៊ុនទាំងនេះលក់រថយន្តដែលមានតម្លៃចាប់ពី 23,000 ដុល្លារអាម៉េរិក។

ថៃ គឺជាកន្លែងផលិត និងដំឡើងរថយន្តធំជាងគេលំដាប់ទី 4 នៅ អាស៊ី សម្រាប់បណ្ដាក្រុមហ៊ុនដូចជា Toyota និង Honda ជាដើម។ ប្រទេសថៃ ផលិតរថយន្តបានចាប់ពីប្រហែល 1.5 ដល់ 2 លានគ្រឿងជារៀងរាល់ឆ្នាំ ក្នុងនោះ ប្រហែលពាក់កណ្ដាលត្រូវបាននាំចេញទៅបរទេស៕

December 8, 2022

Air Asia មានគម្រោងបង្កើតក្រុមហ៊ុនអាកាសចរណ៍នៅកម្ពុជា នាពេលឆាប់ៗនេះ

(ភ្នំពេញ)៖ ឯកឧត្តម ជា បូរ៉ា រដ្ឋលេខាធិការនៃក្រសួងទេសចរណ៍ បានអនុញ្ញាតឱ្យតំណាងក្រុមហ៊ុនអាកាសចរណ៍ Air Asia ចូលជួបពិភាក្សាការងារទាក់ទងនឹងគម្រោងបង្កើតទីស្នាក់ការរបស់ខ្លួននៅ កម្ពុជា។

យោងតាម ក្រសួងទេសចរណ៍ នាថ្ងៃព្រហស្បតិ៍ ទី 08 ធ្នូ 2022 នៅទីស្តីការក្រសួង ឯកឧត្តម ជា បូរ៉ា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានទទួលជួប ពិភាក្សាការងារជាមួយតំណាងក្រុមហ៊ុនអាកាសចរណ៍ Air Asia លើការបង្កើតទីស្នាក់ការនៅ កម្ពុជា។ តំណាង Air Asia បានឱ្យដឹងថា ក្រុមហ៊ុនបុត្រសម្ព័ន្ធរបស់ក្រុមហ៊ុននេះនឹងមានឈ្មោះថា Air Asia Cambodia ដែលនឹងធ្វើពិធីចុះហត្ថលេខា និងប្រកាសជាផ្លូវការនាទី 09 ធ្នូ 2022។

ក្រុមហ៊ុនបានឱ្យដឹងថា កម្ពុជា ជាប្រទេសទី 5 ក្នុងតំបន់អាស៊ី ដែលមានទីស្នាក់ការរបស់ Air Asia ហើយក្រុមហ៊ុនគ្រោងចាប់ផ្តើមដំណើរការជើងហោះហើរនៅ កម្ពុជា ចាប់ពីឆ្នាំ 2023 ខាងមុខ។

ជំនួបរវាង ក្រសួងទេសចរណ៍កម្ពុជា និងតំណាង Air Asia កាលពីព្រឹកថ្ងៃទី 08 ធ្នូ 2022

តំណាង Air Asia បញ្ជាក់ថា ក្រុមហ៊ុនមានគម្រោងទាក់ទាញទេសចរជាតិ និងអន្តរជាតិឱ្យបាន 3 ទៅ 4 លាននាក់/ឆ្នាំ ក្នុងនោះ ជំហានដំបូង គ្រោងដាក់ដំណើរការយន្តហោះប្រភេទ Boeing A321 ចំនួន 4 គ្រឿង ដើម្បីតភ្ជាប់គោលដៅអន្តរជាតិក្នុងតំបន់អាស៊ាន, ចិន និង ឥណ្ឌា និងគោលដៅក្នុងស្រុកពី ភ្នំពេញ-សៀមរាប-ខេត្តព្រះសីហនុ។

ការវិនិយោគរបស់ក្រុមហ៊ុន Air Asia នឹងនាំមកនូវទេសចរបន្ថែមទៀតមកទស្សនា កម្ពុជា ជាពិសេសបានចូលរួមផ្សព្វផ្សាយពីគោលដៅរបស់ កម្ពុជា ទៅកាន់ពិភពលោក ក្រសួងទេសចរណ៍ សង្ឃឹមដូច្នេះ៕

December 8, 2022

Category: សង្គម និងសេដ្ឋកិច្ច