Category: សង្គម និងសេដ្ឋកិច្ច

  • វាយកូនមិនមែនជាវិធីបង្រៀនរបស់អាណាព្យាបាលដែលឆ្លាតវៃទេ

    វាយកូនមិនមែនជាវិធីបង្រៀនរបស់អាណាព្យាបាលដែលឆ្លាតវៃទេ

    អាណាព្យាបាលភាគច្រើនតែងតែបង្រៀនកូន ឬអប់រំកូនដោយការវាយ និងការគំរាមដើម្បីឱ្យកូនឈប់ធ្វើរឿងទាំងឡាយណាដែលពួកគាត់គិតថាមិនត្រឹមត្រូវ។ ការធ្វើបែបនេះ ត្រូវបានគេរកឃើញថាជាវិធីមិនត្រឹមត្រូវដែលអាចជះផលអវិជ្ជមានដល់កូនៗនៅថ្ងៃអនាគត ដូចជាធ្វើឱ្យកូនមានភាពភ័យខ្លាចច្រើន ខ្វះភាពជាអ្នកដឹកនាំ និងមិនហ៊ានសម្រេចចិត្តលើបញ្ហាសំខាន់ៗក្នុងជីវិតជាដើម។

    ខាងក្រោមនេះជាវិធីមួយចំនួនសម្រាប់អាណាព្យាបាលដើម្បីអប់រំកូនៗកុំឱ្យធ្វើខុស និងស្គាល់ពីកំហុសខ្លួនឯង។
    ១. ប្រាប់ហេតុផលឱ្យបានច្បាស់លាស់
    ជាទូទៅក្មេងដែលធ្វើខុសគឺបណ្តាលមកពីពួកគេមិនយល់ពីហេតុផល និងផលប៉ះពាល់នៃទង្វើរបស់ខ្លួន។ មានក្មេងខ្លះមិនទាំងដឹងថាហេតុអ្វីបានជាអាណាព្យាបាលវាយ ឬជេរស្តីលើរូបគេផង ព្រោះគេមិនដឹងថាសកម្មភាពដែលគេកំពុងធ្វើនេះជាអំពើខុសឆ្គងនោះទេ។ ជម្រើសល្អបំផុតសម្រាប់អាណាព្យាបាល គឺឧស្សាហ៍បង្រៀនកូនៗពីហេតុ និងផលនៃសកម្មភាពដែលខុសឆ្គង រួមទាំងបង្ហាញផ្លូវដែលល្អដល់កូនៗដើម្បីជាជម្រើសសម្រាប់ពួកគេ។

    ជាធម្មតានៅពេលដែលពួកគេយល់ច្បាស់ពីហេតុផលហើយ ក្មេងៗឆាប់ទទួលយកបំផុត នៅពេលនោះគេនឹងស្អប់អំពើអាក្រក់ ហើយថែមទាំងហ៊ានប្រដៅដល់មនុស្សចាស់ថែមទៀតផង នៅពេលដែលមនុស្សធំនោះភ្លេចខ្លួនធ្វើរឿងរ៉ាវណាដែលខុសឆ្គង។ បើកូនរបស់អ្នកស្ថិតក្នុងស្ថានភាពចាស់ទុំបែបនេះអ្នកប្រាកដជាលែងចង់វាយ ឬសម្លុតទៀតហើយ។

    ២. ត្រូវចេះលើកទឹកចិត្ត កុំចេះតែចាប់កំហុស
    អាណាព្យាបាលជាច្រើនគិតថា ការមិនសូវធ្វើល្អដល់កូនគឺកុំឱ្យកូនស្គាល់ចិត្ត ឬកុំឱ្យកូនបានចិត្តជាដើម។ ហេតុនេះនៅពេលដែលកូនធ្វើល្អ គាត់មិនបានបង្ហាញពីការគាំទ្រដល់កូននោះទេ តែនៅពេលដែលកូនធ្វើខុសគាត់បែរជាដាក់ពិន័យយ៉ាងធ្ងន់ធ្ងរទៅវិញ។ ទង្វើបែបនេះ អាចធ្វើឱ្យអាណាព្យាបាលបង្រៀនកូនបានតែរូបភាពខាងក្រៅប៉ុណ្ណោះ កូនៗអាចគ្រាន់តែខ្លាច តែមិនគោរពនោះទេ។ រាល់សកម្មភាពមិនល្អគេគ្រាន់តែផ្អាកមួយរយៈនៅពេលដែលអាណាព្យាបាលស្ថិតនៅចំពោះមុខពួកគេ ហើយលួចធ្វើវិញនៅពេលដែលយើងមិននៅ។

    ចំណុចសំខាន់ដែលគួរធ្វើគឺ ចេះលើកទឹកចិត្តនៅពេលដែលកូនបានធ្វើល្អ ដើម្បីឱ្យពួកគេរក្សាបាននូវទង្វើទាំងអស់នោះ ហើយបង្រៀនពួកគេឱ្យស្គាល់ពីកំហុស និងហ៊ាននិយាយដោយត្រង់ថាទង្វើណាដែលមិនគួរធ្វើ ឬសកម្មភាពណាដែលយើងនឹងដាក់ពិន័យដល់ពួកគេប្រសិនបើគេធ្វើដដែលៗ។

    ៣. ធ្វើជាគំរូល្អដល់កូន
    អាណាព្យាបាលភាគច្រើនសម្លុតកូន នៅពេលដែលឃើញកូនប្រើសម្តីមិនល្អដាក់អ្នកដទៃ តែភ្លេចថាកូនចេះការប្រើភាសាមិនល្អនេះពីខ្លួនឯង ហេតុនេះ ដើម្បីមិនឱ្យកូនមានចំណុចខុសឆ្គងច្រើន អាណាព្យាបាលត្រូវកាត់បន្ថយកំហុសឆ្គងរបស់ខ្លួនឱ្យបានជាមុនសិន៕

  • Angelina Jolie ត្រៀមរើផ្ទះទៅនៅក្បែរអតីតស្វាមី Brad Pitt

    Angelina Jolie ត្រៀមរើផ្ទះទៅនៅក្បែរអតីតស្វាមី Brad Pitt

    មិនចិត្តដាច់ពេកទេ សម្រាប់កំពូលតារាសម្ដែងស្រីមេម៉ាយដូចជា Angelina Jolie ដែលនៅទីបំផុតក៏យល់ព្រមឱ្យអតីតស្វាមី Brad Pitt អាចជួបកូនៗបាន បើទោះបីជាកាលពីដំបូងអាចមានលក្ខខណ្ឌជាច្រើនមកតវ៉ា តែចុងក្រោយនេះ តារាសម្ដែងស្រីម្នាក់នេះ បានលះបង់ដល់ថ្នាក់រើផ្ទះដើម្បីទៅរស់នៅក្បែរគ្នាវិញ ។

    អ្នកម្ដាយកូន ៦នាក់រូបនេះ បានប៉ងទិញភូមិគ្រឹះថ្មីមួយក្នុងតម្លៃ ១៩លានផោនដ៍ ក្នុងទីក្រុង Los Feliz ដែលភូមិគ្រឹះថ្មីនេះ ស្ថិតនៅឆ្ងាយពីផ្ទះរបស់Brad Pitt នៅទីក្រុង LA ត្រឹមតែ ១.៦គីឡូម៉ែត្រ តែប៉ុណ្ណោះ ។ ប្រភពជិតស្និទ្ធនឹងតារាបបូរមាត់ស្អាតម្នាក់នេះ បាននិយាយថា “Angelina Jolie ចាប់អារម្មណ៍ចង់រើទៅរស់នៅក្បែរ Brad Pitt ដើម្បីឲ្យគាត់បានមកជួបកូនៗ បានងាយស្រួលឡើងវិញ ព្រោះពេលនេះ នាងស្នាក់នៅទីក្រុង ម៉ាលីប៊ូ ដែលវាហាក់ដូចជាឆ្ងាយពេកហើយសម្រាប់កូនៗរបស់ពួកគេ”។

    គួរបញ្ជាក់ផងដែរថា គូស្នេហ៍ Angelina Jolie និង Brad Pitt បានលែងលះគ្នាដោយសារតែ Angelina Jolie បានប្ដឹងចោទប្រកាន់ថា Brad Pitt បានប្រើអំពើហិង្សា​លើ​ Maddox ដែលជាកូនចញ្ចឹមរបស់ Angelina Jolie បានសុំពីប្រទេសកម្ពុជា៕

  • Monaco ជឿជាក់ខ្ពស់ មុនពេលប៉ះ Juventusនៅរាត្រីនេះ

    Monaco ជឿជាក់ខ្ពស់ មុនពេលប៉ះ Juventusនៅរាត្រីនេះ

    លោក Leonardo Jardimដែលជាគ្រូបង្វឹក កំពុងតែលើកទឹកចិត្តឲ្យក្រុម Monaco មានការជឿជាក់ នៅមុនពេលពួកគេត្រូវប្រឈមមុខនឹងការងារដ៏លំបាកមួយក្នុងទីក្រុង Turin ជាកន្លែងដែលពួកគេត្រូវប៉ះជាមួយនឹងក្រុមសេះបង្កង់ Juventus។

    បើទោះបីជាដេញតាមពីក្រោយក្នុងលទ្ធផល ២-០ ពីការប្រកួតជើងទី១កាលពីសប្តាហ៍មុនក៏ដោយ ប៉ុន្តែ ក្រុមកំពុងនាំមុខលើតារាងក្របខ័ណ្ឌ Ligue 1 មួយនេះ នៅតែមានការជឿជាក់ ខណៈដែលពួកគេកំពុងតែផ្តោតទៅលើការប្រកួតរបស់ពួកគេក្នុងក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី២ នៅរាត្រីនេះ។ លោក Jardimគ្រូបង្វឹករបស់ Monaco បានឲ្យដឹងថា៖ «យើងត្រូវតែរក្សានូវការជឿជាក់ ត្រូវខិតខំលេងក្នុងការប្រកួតរបស់យើង និងបង្ហាញទម្រង់លេងឲ្យបានល្អ។ ប្រសិនបើយើងអាចរកគ្រាប់បាល់បញ្ចូលទីក្នុងពេលចាប់ផ្តើមប្រកួត អ្វីៗអាចនឹងមានការផ្លាស់ប្តូរ»។ គ្រូបង្វឹករូបនេះបានប្រាប់បន្តថា៖ «យើងនឹងត្រូវតែវាយសម្រុកជាមួយនឹងស្មារតីដោយគ្មានសម្ពាធ។ ក្នុងជើងទី១ យើងមានចំនួននៃការស៊ុតបាល់សំដៅទីដូចក្រុម Juventusដែរ ប៉ុន្តែ ពួកគេមានភាពមុតស្រួចជាង។ ពិតណាស់ ពួកគេមានភាពចាស់ទុំជាងយើង ហើយយើងបានទទួលបរាជ័យ ដោយសារតែយើងមិនទទួលបានប្រយោជន៍ពីឱកាសក្នុងការស៊ុតបញ្ចូលទីរបស់យើង»។

    លោក Jardimបានបន្ថែមទៀតថា៖ «យើងត្រូវតែរក្សាការធ្វើឲ្យមានក្តីសង្ឃឹម ហើយគោលបំណងរបស់យើងគឺការឈានទៅដល់វគ្គផ្តាច់ព្រ័ត្រ។ ខ្ញុំពិតជាមានមោទនភាពចំពោះកីឡាកររបស់ខ្ញុំ និងអ្វីដែលពួកគេបានធ្វើនៅពេលនេះខ្លាំងណាស់ ទោះបីជាលទ្ធផលនៅយប់ថ្ងៃអង្គារនេះចេញមកបែបណាក៏ដោយ»។ ក្រុម Juventusបានបង្ហាញពីភាពរឹងមាំក្នុងតំបន់ការពារដ៏គួរឲ្យកត់សម្គាល់ ខណៈដែលពួកគេបានធ្វើការរាំងខ្ទប់ទាំងស្រុងទៅលើតំបន់ប្រយុទ្ធរបស់ Monaco ពិសេសពួកគេបានទម្លាក់ក្រុម Barcelona កាលពីជុំមុនរួចស្រេចទៅហើយ តាមរយៈការមិនបណ្តោយឲ្យ Lionel Messiនិងមិត្តរួមក្រុមរបស់គេ រកគ្រាប់បាល់បញ្ចូលទីបានសូម្បីតែមួយគ្រាប់។ Juventusបានបណ្តោយឲ្យមានគ្រាប់បាល់ចូលទីចំនួន២គ្រាប់ប៉ុណ្ណោះ ក្នុងការប្រកួត៥លើកក្នុងចំណោមការប្រកួត១៥លើកចុងក្រោយក្នុងយុទ្ធនាការនេះ។ ក្រុមសេះបង្កង់មួយនេះ ក៏មិនទាន់ស្គាល់ចាញ់ផងដែរក្នុងការប្រកួតលើទឹកដីខ្លួនឯងក្នុងរយៈពេល ២០ខែកន្លងមកនេះ ខណៈដែលពួកគេរបូតគ្រាប់បាល់ត្រឹមតែ២គ្រាប់គត់ក្នុងការប្រកួតក្របខ័ណ្ឌ Champions League ចំនួន១១លើក។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺយប់នេះ៕

    ប្រភពពី៖ The Guardian

  • តំបន់សេដ្ឋកិច្ចពិសេស និងភណ្ឌាគារគយមានដែនកំណត់ រំពឹងអាចមានលំហូរសាច់ប្រាក់វិនិយោគរាប់រយលានដុល្លារ

    តំបន់សេដ្ឋកិច្ចពិសេស និងភណ្ឌាគារគយមានដែនកំណត់ រំពឹងអាចមានលំហូរសាច់ប្រាក់វិនិយោគរាប់រយលានដុល្លារ

    ខណៈតំបន់សេដ្ឋកិច្ចពិសេស និងភណ្ឌាគារគយមានដែនកំណត់របស់ក្រុមហ៊ុន Kerry Worldbridge Logistics ដាក់ឱ្យដំណើរការជាផ្លូវការនោះ ត្រូវបានថ្នាក់ដឹកនាំរំពឹងថា នៅពេលអនាគតឆាប់ៗខាងមុខនោះ តំបន់នេះនឹងផ្ដល់ការងារដល់ប្រជាជនកម្ពុជា និងមានលំហូរសាច់ប្រាក់វិនិយោគរាប់រយលានដុល្លារ។

    លោកឧកញ៉ា សៀ ឫទ្ធី ប្រធានក្រុមប្រឹក្សាភិបាលក្រុមហ៊ុន Kerry Worldbridge Logistics បានលើកឡើងថា តាមរយៈការបង្កើតតំបន់សេដ្ឋកិច្ចពិសេស និងភណ្ឌាគារគយមានដែនកំណត់ វាជាសក្ខីភាពបង្ហាញឱ្យឃើញកាន់តែច្បាស់ពីការរីកចម្រើននៃវិស័យភ័ស្ដុភារ ដឹកជញ្ជូន និងភណ្ឌាគារគយមានដែនកំណត់ក្នុងកម្រិតស្ដង់ដារអន្ដរជាតិ ដូចបណ្ដាប្រទេសនានាក្នុងតំបន់ និងលើពិភពលោក។

    លោកឧកញ៉ាបន្ដថា សមិទ្ធផលនេះវាមិនមែនបង្កើតឡើងសម្រាប់តែប្រយោជន៍ក្រុមហ៊ុនប៉ុណ្ណោះទេ ពោលគឺគម្រោងនេះវានឹងជួយបង្កើនសក្ដានុពលទីផ្សារពលកម្មជូនប្រជាជនកម្ពុជាជាច្រើនម៉ឺននាក់ដែលអាចចាត់ទុកថា វាជាចលករដ៏សំខាន់មួយក្នុងការចូលរួមចំណែកកាត់បន្ថយភាពក្រីក្រនៅក្នុងសង្គមជាតិទាំងមូល។

    ប្រធានក្រុមប្រឹក្សាភិបាលក្រុមហ៊ុន Kerry Worldbridge Logistics បញ្ជាក់ថា៖”នៅពេលតំបន់សេដ្ឋកិច្ចពិសេសបានធ្វើប្រតិបត្ដិការការងាររបស់ខ្លួនពេញលេញ វានឹងអាចផ្ដល់ការងារជូនដល់ប្រជាពលរដ្ឋក្នុងស្រុកមិនតិចជាង2ម៉ឺននាក់ឡើយ។ ពិសេសវានឹងអាចទាក់ទាញចំណាប់អារម្មណ៍អ្នកវិនិយោគផ្ទាល់ពីបរទេសមកបណ្ដាក់ទុននៅទីនេះដែលធ្វើឱ្យមានលំហូរសាច់ប្រាក់វិនិយោគមិនតិចជាង300លានដុល្លារអាមេរិកឡើយ”។

    គួរបញ្ជាក់ថា គម្រោងធុរកិច្ចរបស់ក្រុមហ៊ុន Kerry Worldbridge Logistics បានបើកការដ្ឋានសាងសង់តាំងពីខែកក្កដា ឆ្នាំ2015 ក្រោមទុនវិនិយោគ100លានដុល្លារដែលក្រុមហ៊ុនបានចំណាយសាច់ប្រាក់អស់ប្រមាណ60លានដុល្លារអាមេរិកទៅលើផ្នែកទី1នៃគម្រោង។

    បច្ចុប្បន្នតំបន់សេដ្ឋកិច្ចពិសេសនេះបានដាក់ឱ្យដំណើរការជាផ្លូវការដោយបានសម្រិតសម្រាំងធនធានមនុស្សដ៏មានសមត្ថភាពដែលមានបទពិសោធការងារជាយូរឆ្នាំដើម្បីបម្រើការងារដូចជា ការដឹកជញ្ជូន ការចល័ត ការផ្ទេរ និងការរក្សាទំនិញសព្វសារពើររបស់អតិថិជនប្រកបដោយប្រសិទ្ធភាព និងសុវត្ថិភាពខ្ពស់៕

  • ភ្លើងអគ្គិសនីនៅខេត្តស្ទឹងត្រែងត្រូវបានបញ្ចុះតម្លៃជាង50%

    ភ្លើងអគ្គិសនីនៅខេត្តស្ទឹងត្រែងត្រូវបានបញ្ចុះតម្លៃជាង50%

    អាជ្ញាធរអគ្គិសនីកម្ពុជាបានសម្រេចបញ្ចុះតម្លៃភ្លើងអគ្គិសនីប្រើប្រាស់ក្នុងលំនៅដ្ឋាន និងសហគ្រាសនានានៅខេត្តស្ទឹងត្រែង មកនៅត្រឹម 1000រៀលក្នុងមួយគីឡូវ៉ាត់ម៉ោង ខណៈដែលតម្លៃកាលពីមុនខ្ពស់រហូតដល់2100រៀល ក្នុងមួយគីឡូវ៉ាត់ម៉ោង។

    មន្រ្តីនៃអាជ្ញាធរអគ្គិសនីបានឱ្យដឹងថា កាលពីពេលថ្មីនេះមន្ត្រីជំនាញការិយាល័យថាមពល និងប្រេងកាតបានចុះទៅពិនិត្យមើលការតភ្ជាប់បណ្តាញចរន្តអគ្គិសនីឲ្យទៅសេវាករ ហ៊ុយ ចេង ដើម្បីបានផ្គត់ផ្គង់ការប្រើប្រាស់អគ្គិសនីប្រភពពីបណ្តាញ​តង់ស្យុងមធ្យម 22kV របស់អង្គភាពអគ្គិសនីខេត្តស្ទឹងត្រែងដែលនឹងត្រូវបានបញ្ចុះតម្លៃពី 2100៛ / kWh មកត្រឹម 1000៛/kWh ទៅតាមការកំណត់ថ្លៃជាថ្មីរបស់អាជ្ញាធរអគ្គិសនីកម្ពុជា ដែលពលរដ្ឋអ្នកប្រើប្រាស់សេវាកម្មអគ្គិសនីក្នុង​ដែន​អាជ្ញាបណ្ណរបស់សេវាករ ហ៊ុយ ចេង នៅស្រុកសៀមប៉ាង ខេត្តស្ទឹងត្រែងនឹងបានទទួលតម្លៃអគ្គិសនីតាមគោលការណ៍កំណត់របស់រាជរដ្ឋាភិបាល ដោយកាលពីពេលមុនសេវាករផ្គត់ផ្គង់អគ្គិសនីតាមរយៈម៉ាស៊ីនឌីយេហ្ស៊ែល(ឯកជន) ដែលមានតម្លៃដើមផលិតថ្លៃខ្លាំង តែពេលនេះគឺសេវាករបានទទួលពីបណ្តាញអគ្គិសនីមានតម្លៃថោកជាងពីពេលមុន។

    យ៉ាងណាក៏ដោយ ការបញ្ចុះតម្លៃភ្លើងខាងលើត្រូវបានគេមើលឃើញថា នៅតែមានតម្លៃខ្ពស់ជាងនៅតាមបណ្តាខេត្តមួយចំនួនទៀតដដែល ខណៈដែលរដ្ឋាភិបាលបានប្រកាសបញ្ចុះតម្លៃភ្លើងនៅទូទាំងប្រទេសមកនៅត្រឹមតែជាង 300រៀលក្នុងមួយគីឡូវ៉ាត់ម៉ោងប៉ុណ្ណោះ៕

  • ហេតុអ្វីចាំបាច់ត្រូវរៀនតាម E-learning?

    ហេតុអ្វីចាំបាច់ត្រូវរៀនតាម E-learning?

    នាពេលបច្ចុប្បន្ននេះ ដោយសារតែបណ្តាញបច្ចេកវិទ្យាមានការរីកចម្រើន ការសិក្សារបស់សិស្សនិស្សិតក៏បានផ្លាស់ប្តូរឆ្ពោះទៅរកភាពល្អប្រសើរឡើង និងកាន់តែទំនើប។ E-learning ជាបណ្តាញសិក្សាថ្មីដែលមានប្រយោជន៍ និងមានប្រសិទ្ធភាពបំផុតដែលបណ្តាសាកលវិទ្យាល័យល្បីៗលើពិភពលោកបានប្រើប្រាស់ក្នុងរយៈពេល 10ឆ្នាំចុងក្រោយនេះ។

    បង្ហាញពីគុណតម្លៃនៃកម្មវិធី E-learning លោកគ្រូ ហៀន សំបឿន ប្រធានមជ្ឈមណ្ឌលការសិក្សាពីចម្ងាយ បានលើកឡើងថា ការសិក្សាតាមបែប E-learning ជាការសិក្សាដែលមានប្រសិទ្ធភាពមួយក្នុងចំណោមវិធីសាស្រ្តសិក្សាដែលមានសក្តានុពលលើពិភពលោក។ ការសិក្សាតាមរបៀបនេះ គឺអាចធ្វើឱ្យអ្នកសិក្សាចំណេញពេលវេលាច្រើន ព្រោះគាត់អាចសិក្សាបានគ្រប់ទីកន្លែងដែលមានអ៊ីនធើណេតតាមរយៈទូរស័ព្ទដៃ និងកុំព្យូទ័រ។ ម្យ៉ាងវិញទៀត មេរៀនទៀតសោតក៏សុទ្ធសឹងតែជាមេរៀនដែលផលិតដោយសាស្រ្តាចារ្យដែលមានជំនាញ និងមានភាពច្បាស់លាស់។

    លើសពីនេះទៅទៀត ការសិក្សាតាមបែប E-learning មានភាពងាយស្រួលក្នុងការស្រាវជ្រាវជាងការសិក្សាតាមបែបធម្មតា ព្រោះនៅក្នុងកម្មវិធី E-learning គឺភាគច្រើនបានដាក់ឱ្យប្រើប្រាស់ជាអន្តរជាតិ។ សិស្សនិស្សិតកម្ពុជា អាចចូលទៅមើលមេរៀនរបស់ប្រទេសដទៃតាមរយៈគណនី (User) ផ្ទាល់ខ្លួនបានដោយឥតគិតថ្លៃ។ ចំណុចនេះអាចផ្តល់ឱកាសល្អដល់អ្នកសិក្សាឱ្យមានគំនិតច្នៃប្រឌិតខ្ពស់ជាងមុនតាមរយៈការប្រៀបធៀបមេរៀន និងចំណុចសំខាន់ៗជាច្រើនទៀតនៃឯកសារយ៉ាងសម្បូរបែបដែលពួកគេបានជួបប្រទះ។

    ពិសេសជាងនេះទៅទៀតការសិក្សាតាមបែប E-learning អាចជំរុញឱ្យសិស្សនិស្សិតកម្ពុជាអាចមានសមត្ថភាពប្រកួតប្រជែងជាមួយនឹងបណ្តាប្រទេសដទៃលើកម្រិតនៃការយល់ដឹង និងការអនុវត្តការងារជាក់ស្តែង តាមរយៈបណ្តាញបច្ចេកវិទ្យា។ អ្នករៀនតាម E-learning ភាគច្រើនជាអ្នកដែលនៅស្និទ្ធជាមួយនឹងបច្ចេកវិទ្យា និងបណ្តាញព័ត៌មានយ៉ាងសម្បូរបែបដែលត្រូវបានផលិតឡើងជាវីដេអូដូចជាការបង្រៀនរបស់សាស្ត្រាចារ្យដែរ តែអ្វីដែលល្អបំផុតនោះគឺ សម្រាប់ E-learning ពួកគេអាចរៀនសាឡើងវិញបានគ្រប់ពេលវេលាបើទោះបីជាមិនស្ថិតក្នុងថ្នាក់រៀនក៏ដោយ។ ក្រៅពីនេះ នៅពេលដែលមានសំណួរ សិស្សអាចចោទសួរ ទៅកាន់សាស្រ្តាចារ្យបានតាមរយៈគេហទំព័រដែលពួកគេអាចនឹងទទួលចម្លើយបានភ្លាមៗ ឬរង់ចាំក្នុងរយៈពេលខ្លីដើម្បីទទួលបានចម្លើយគ្រប់យ៉ាងដែលទាក់ទងនឹងប្រធានបទសំខាន់នៃមេរៀន។

    នាពេលបច្ចុប្បន្ននេះ គ្រឹះស្ថានអប់រំធំៗមួយចំនួនបានដាក់ឱ្យដំណើរការកម្មវិធី E-learning ដោយក្នុងនោះមានដូចជា វិទ្យាស្ថានបច្ចេកវិទ្យាកម្ពុជា សាកលវិទ្យាល័យជាតិគ្រប់គ្រង សាកលវិទ្យាល័យជាតិកសិកម្ម និងសាកលវិទ្យាល័យវិទ្យាសាស្រ្តសុខាភិបាលជាដើម៕

  • ដឹងពីតម្លៃ Nokia 3310 ពេលមកដល់ស្រុកខ្មែរ

    ដឹងពីតម្លៃ Nokia 3310 ពេលមកដល់ស្រុកខ្មែរ

    បន្ទាប់ពីដាក់បង្ហាញកាលពីខែកុម្ភៈ ឆ្នាំ 2017 ទូរស័ព្ទ Nokia 3310 ថ្មីត្រូវបានក្រុមហ៊ុន HMD បញ្ចេញលក់ជាបណ្ដើរៗហើយនៅតាមប្រទេសមួយចំនួនក្នុងពិភពលោក នៅឡើយតែកម្ពុជា អាចនឹងមកដល់នៅចុងខែនេះ។ ក្នុងនោះតម្លៃរបស់ទូរស័ព្ទស៊េរីចាស់ តែផ្លាស់ប្ដូរមុខមាត់ថ្មីនេះ ត្រូវបានគេបង្ហើបឱ្យដឹងថានឹងអាចមានតម្លៃប្រមាណ 50 ដុល្លារពេលមកដល់ស្រុកខ្មែរ។

    អ្នកគ្រប់គ្រងតំណាងក្រុមហ៊ុន Nokia ប្រចាំកម្ពុជា លោក សុផេង ធ្លាប់បានបង្ហើបឱ្យដឹងថា តម្លៃដែលដាក់ចេញ គឺប្រហាក់ប្រហែលគ្នានឹងតម្លៃនៅលើទីផ្សារសកលដែរ តែវាអាចប្រែប្រួលខ្លះ អាស្រ័យលើពន្ធនាំចូលតាមប្រទេសនីមួយៗ។ ដោយឡែកទូរស័ព្ទ Nokia 3310 អាចនឹងមានតម្លៃប្រហាក់ប្រហែល ឬដូចគ្នាពេលមកដល់ស្រុកយើង។

    លោកបន្តថា ៖ «នៅប្រទេសក្រៅ តម្លៃវាពេលចេញលក់គឺប្រហែល 50 ដុល្លារ ហើយស្រុកខ្មែរយើងក៏ប្រហែលអ៊ីចឹងដែរ។ ខ្ញុំគិតថាមិនខុសគ្នាច្រើនទេ»។ ក្រៅពីទូរស័ព្ទ Nokia 3310 ហើយ នៅមានស្មាតហ្វូនប្រើ Android ចំនួន 3 ម៉ូដែលទៀតដែលត្រៀមដាក់បង្ហាញខ្លួននៅក្នុងទីផ្សារកម្ពុជាយើងដែរ ប៉ុន្តែព័ត៌មានជាក់ច្បាស់យ៉ាងណានោះ សូមរង់ចាំដល់ចុងខែឧសភា។ លោកសុផេង បន្ថែម។

    សម្រាប់លក្ខណៈសម្បត្តិទូរស័ព្ទ Nokia3310ដែលត្រៀមដាក់ចេញមានអេក្រង់ 2.4 អ៊ីញ និងមានទំហំតួខ្លួន បណ្តោយ115.6 x ទទឹង51 x កម្រាស់ 12.8 មីល្លីម៉ែត្រ និងមានទម្ងន់ 79.6 ក្រាម។ ទូរស័ព្ទនេះ អាចដាក់ Memory បានទំហំ 16MP ប្រភេទ microSD ដំណើរការដោយប្រព័ន្ធប្រតិបត្តិការ Nokia Series 30+ អាចថតរូបបានលើទំហំកាមេរ៉ា 2MP មានភ្លើង LED Flash ហើយមានថ្ម 12000mAh អាចដោះដូរបាន៕

  • កម្ពុជា​នឹង​បាន​អ្វី​ខ្លះ​ក្នុង​នាម​ជា​ម្ចាស់ផ្ទះ​វេទិកា​សេដ្ឋកិច្ច​ពិភពលោក?

    កម្ពុជា​នឹង​បាន​អ្វី​ខ្លះ​ក្នុង​នាម​ជា​ម្ចាស់ផ្ទះ​វេទិកា​សេដ្ឋកិច្ច​ពិភពលោក?

    កម្ពុជា​នឹង​ធ្វើ​ជា​ម្ចាស់​ផ្ទះ​នៃ​វេទិកា​សេដ្ឋកិច្ច​ពិភពលោក​ជា​លើក​ដំបូង​មិន​ធ្លាប់​មាន​ក្នុង​ប្រវត្តិសាស្ត្រ​នៅ​ថ្ងៃ​ទី10 ខែឧសភា សប្តាហ៍​នេះ​។ ក្នុង​នាម​ជា​ម្ចាស់​ផ្ទះ​នៃ​វេទិកា​សេដ្ឋកិច្ច​ពិភពលោក​ តើ​កម្ពុជា​​នឹង​ទទួល​បាន​អ្វី​ខ្លះ​ដើម្បី​ជា​ប្រយោជន៍​ដល់​ប្រទេស?

    ឯកឧត្តម​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រី​ក្រសួង​សាធារណការ ​និង​ដឹកជញ្ជូន ដែល​ជា​ប្រធាន​គណៈ​កម្មការ​អន្តរ​ក្រសួង​រៀបចំ​វេទិកា​សេដ្ឋកិច្ច​ពិភពលោក បាន​មាន​ប្រសាសន៍​ថា នេះ​មិន​មែន​ជា​ភាព​ចៃដន្យ ឬ​ជា​កិច្ច​ប្រជុំ​វិលជុំ​ដូច​កិច្ចប្រជុំ​កំពូល​អាស៊ាន​នោះ​ទេ។ ការ​ដែល​គេ​ផ្តល់​សិទ្ធិ​ឱ្យ​កម្ពុជា​ធ្វើ​ជា​ម្ចាស់​ផ្ទះ​នា​ពេល​នេះ​គឺ​ដោយ​សារ​ប្រទេស​កម្ពុជា​មាន​សុខ​សន្តិភាព និង​ស្ថិរភាព​នយោបាយ​ល្អ​ប្រសើរ ពិសេស​មាន​កំណើន​សេដ្ឋកិច្ច​ថេរ​ជា​រៀង​រាល់​ឆ្នាំ​ក្នុង​រង្វង់​ជាង​7%​នា​អំឡុង​2​ទសវត្សរ៍​កន្លង​មក​នេះ។ ឯកឧត្តម​បានលើក​ឡើង​​ថា វេទិកា​នេះ​នឹង​មាន​ថ្នាក់​ដឹកនាំ ពាណិជ្ជករ អ្នក​ប្រាជ្ញា និង​សាស្ត្រាចារ្យ​ល្បីៗ​លើ​ពិភពលោក​មក​ចូល​រួម ដោយ​ពួក​គេ​នឹង​ពិភាក្សា​លើ​ប្រធាន​បទ​មួយ​ចំនួន​ដូច​ជា បញ្ហា​យុវជន បច្ចេកវិទ្យា និង​កំណើនសេដ្ឋកិច្ច។

    ឯកឧត្តម​មាន​ប្រសាសន៍​ថា៖​“ដោយ​សារតែ​កម្ពុជា​មាន​កំណើន​សេដ្ឋកិច្ច​ជាង​7%​ជា​រៀងរាល់​ឆ្នាំ ទើប​គេ​ទទួល​​​ស្គាល់​ និង​អនុញ្ញាត​ឱ្យ​យើង​ធ្វើ​ជា​ម្ចាស់​ផ្ទះ​ដើម្បី​គេ​បាន​រៀនសូត្រ​ពី​កម្ពុជា និង​អាច​​ដក​ស្រង់​យក​បទ​ពិសោធន៍​ល្អៗ​ពីគ្នា​ទៅ​វិញ​ទៅ​មក​ក្នុង​ន័យ​ថា ​តើ​ធ្វើ​ដូចម្តេច​ដើម្បី​ជួយ​ដល់​យុវជន​ឱ្យ​ពួក​គេ​អាច​ក្លាយ​ទៅ​ជា​អ្នក​ដឹកនាំ​ដ៏​មាន​សក្តានុពល​នៅ​ថ្ងៃ​អនាគត”។

    ជាមួយ​គ្នា​នេះ​ដែរ ឯកឧត្តម​បណ្ឌិត កៅ គឹមហួនរដ្ឋមន្ត្រី​ប្រតិភូ​អម​នាយករដ្ឋមន្ត្រី ក៏​បាន​ប្រាប់​ឱ្យ​ដឹង​ដែរ​ថា វេទិកា​សេដ្ឋកិច្ច​ពិភពលោក​ស្តី​ពី​អាស៊ាន​នេះ គឺ​ជា​ឱកាស​របស់​កម្ពុជា​ក្នុង​ការ​បង្ហាញ​មុខ​មាត់​ថ្មី​មួយ​ទៀត​ទៅ​កាន់​ពិភព​លោក ពិសេស​កម្ពុជា​នឹង​ត​ភ្ជាប់​បណ្តាញ​ទំនាក់​ទំនង​នៅ​លើ​ពិភពលោក​បាន​កាន់​តែ​ច្រើន​ថែម​ទៀត​។

    ឯកឧត្តម​បាន​ថ្លែង​ថា​៖​“ប្រធាន​បទ​ដែល​នឹង​លើក​ឡើង​នេះ​គឺ​បាន​ឆ្លុះ​បញ្ចាំង​ទៅ​បច្ចុប្បន្ន​ភាព​នៃ​តម្រូវ​ការ និង​អ្វីៗ​ដែល​គួរ​យក​ចិត្ត​ទុក​ដាក់​ជា​អទិភាព ដោយ​ក្នុង​នោះ​រួម​មាន​បញ្ហា​យុវជន បច្ចេកវិទ្យា និង​កំណើន ដែល​កំណើន​នេះ​រួម​មាន​ កំណើន​សេដ្ឋកិច្ច កំណើន​ការងារ​ក្នុង​តំបន់ កំណើន​នៃ​ការ​តភ្ជាប់​ទំនាក់​ទំនង និង​កំណើន​ផ្សេងៗ​ទៀត”។ វេទិកា​នេះ​មាន​សារ​សំខាន់​ជា​ច្រើន ទាំង​សារ​សំខាន់​ផ្នែក​នយោបាយ សេដ្ឋកិច្ច និង​ការទូត។ វេទិកា​នេះ​ក៏​នឹង​មាន​ការ​ជជែក​ពិភាក្សា​គ្នា​ទៅ​លើ​តម្រូវការ​ផ្សេងៗ និង​រួមគ្នា​រក​ដំណោះ​ស្រាយ​សម្រាប់​អាស៊ាន ក៏​ដូចជា​ពិភព​លោក​ទាំង​មូល​ផង​ដែរ។

    ក្នុង​នាម​ជា​ម្ចាស់​ផ្ទះ​នៃ​វេទិកា​នេះ កម្ពុជា​ត្រូវ​គេ​រំពឹង​ថា​នឹង​អាច​ទាក់​ទាញ​វិនិ​យោគិន​ពី​ក្រៅ​ប្រទេស​ឱ្យ​ចូល​មក​បណ្តាក់​ទុន​នៅ​កម្ពុជា​បាន​កាន់​តែ​ច្រើន​ថែម​ទៀត ដើម្បី​ចូលរួម​ជា​មួយ​រាជរដ្ឋាភិបាល​ក្នុង​ការ​ផ្តល់​ការងារ​ដល់​យុវជន​ខ្មែរ និង​ជួយ​លើក​កម្ពស់​កំណើន​សេដ្ឋកិច្ច​ជាតិ​ឱ្យ​កាន់​តែ​ប្រសើរ​ថែម​ទៀត។ កម្ពុជា គឺ​ជា​ប្រទេស​ស្ថិត​នៅ​ចំណុច​កណ្តាល​នៃ​បណ្តា​ប្រទេស​ក្នុង​តំបន់​អាស៊ាន ដែល​នេះ​គឺ​ជា​លក្ខណៈ​អំណោយ​ផល​យ៉ាង​ខ្លាំង​ក្នុង​ការ​ដឹក​ជញ្ជូន​ទំនិញ ក៏​ដូច​ជា​វត្ថុធាតុ​ដើម​ផ្សេងៗ​ទៅ​កាន់​ប្រទេស​ដទៃ​ក្នុង​តំបន់ និង​ពិភព​លោក ប៉ុន្តែ​អ្វី​ដែល​កំពុង​រាំង​ខ្ទប់​ក្នុង​ការ​ទាក់ទាញ​អ្នក​វិនិយោគបរទេស​​នោះ គឺ​បណ្តាញ​ផ្លូវ​ថ្នល់​ដែល​មិន​ទាន់​​មាន​ភាព​ល្អ​ប្រសើរ និង​តម្លៃ​អគ្គិសនី​នៅ​មាន​កម្រិត​ខ្ពស់​បើ​ធៀប​ជា​មួយ​ប្រទេស​ជិត​ខាង។

    គួរ​កត់​សម្គាល់​ថា បច្ចុប្បន្ន​នេះប្រជាជន​នៅ​ក្នុង​តំបន់​អាស៊ាន​មាន​ប្រមាណ​ជាង​600លាន​នាក់ ដោយ​ក្នុង​នោះ​​50% ជា​យុវជន​ក្រោម​អាយុ​30ឆ្នាំ ដែល​នេះ​គឺ​ជា​កម្លាំង​ស្នូល​ដ៏​សំខាន់​សម្រាប់​អនាគត​តំបន់​អាស៊ាន​ទាំង​មូល​។ អាស៊ាន​បាន​ក្លាយ​ជា​ទីផ្សារ​ធំ​លំដាប់​ទី​3 នៅ​អាស៊ី និង​លំដាប់​ទី7 នៅលើ​ពិភពលោក ដែល​មាន​ទំហំ​ពាណិជ្ជ​កម្ម​ធំ​លំដាប់​ទី 4 បន្ទាប់​ពី​ប្រទេស​ចិន អាល្លឺម៉​ង់ និង​អាមេរិក៕

  • ល្ងាចនេះ ខេត្តកណ្ដាលនឹងបញ្ចប់ការប្រកួតកីឡាប្រណាំងទូកដណ្ដើមពានរង្វាន់សម្ដេច ក្រឡាហោម ស ខេង

    ល្ងាចនេះ ខេត្តកណ្ដាលនឹងបញ្ចប់ការប្រកួតកីឡាប្រណាំងទូកដណ្ដើមពានរង្វាន់សម្ដេច ក្រឡាហោម ស ខេង

    បើតាមអ្នកស្រី ប្រាក់ សម្ផស្ស មន្ត្រីរបស់សហព័ន្ធកីឡាប្រណាំងទូកកម្ពុជាបានឱ្យដឹងថា៖ នាល្ងាចនេះព្រឹត្តិការណ៍ប្រកួតកីឡាប្រណាំងទូកប្រពៃណីខ្នាតអន្តរជាតិ និងទូកកានូកាយ៉ាក់ពានរង្វាន់ “សម្តេច ក្រឡាហោម ស ខេង” លើកទី៤ នៅក្រុងតាខ្មៅ ខេត្តកណ្ដាលនឹងប្រារព្ធពិធីបិទជាផ្លូវការហើយ នៅវេលាម៉ោង៤នេះ បន្ទាប់ពីបានចាប់ផ្ដើមតាំងពីថ្ងៃទី ៧ ខែ ឧសភា ចុងសប្ដាហ៍មុននេះ។

    អ្នកស្រីបន្តថា៖ ព្រឹត្តិការណ៍ការប្រកួតជ្រើសរើសជើងឯកកីឡាប្រណាំងទូកប្រពៃណីខ្នាតអន្តរជាតិ និងទូកកានូកាយ៉ាក់ ពានរង្វាន់ “សម្តេចក្រឡាហោម ស ខេង” លើកទី៤ នេះ កន្លងមកយើងទទួលបាននូវជោគជ័យល្អប្រសើរណាស់ តែក៏មានចំណុចខ្វះខាត និងបញ្ហាប្រឈមខ្លះៗដែរ ដែលតម្រូវឲ្យមានការត្រួតពិនិត្យ និងកែសម្រួលលើបទបញ្ជារួម ព្រមទាំងបទបញ្ជា បច្ចេកទេសកីឡាទូក ទាំង២ប្រភេទមួយចំនួនដែរ។

    ការប្រកួតឆ្នាំនេះមាន ៨ សមាគម រាជធានី ខេត្ត ក្រសួង ដែលរួមមានខេត្តកណ្តាល ខេត្តព្រៃវែង ខេត្តកំពង់ឆ្នាំង ខេត្តកំពង់ធំ ខេត្តស្វាយរៀង ខេត្តកំពង់ស្ពឺ ខេត្តបាត់ដំបង និងភ្នំពេញ។ ជាមួយគ្នានេះដែរលទ្ធផលកាលពីម្សិលមិញនេះ ប្រភេទទូកប្រពៃណីអន្តរជាតិរបស់ម្ចាស់ផ្ទះខេត្តកណ្តាលរកបានមេដាយ១០គ្រឿង ក្នុងនោះមេដាយមាស២គ្រឿង ប្រាក់៣គ្រឿង និងមេដាយសំរិទ្ធ៥គ្រឿង។

    សម្រាប់វិញ្ញាសាប្រណាំងចម្ងាយ៨០០ម៉ែត្រនារី៖ទូក៧មករា ចិត្តតែមួយខេត្តកណ្តាលទទួលបានមេដាយមាសទូកពោធិ៍មានជ័យបារមីតេជោខេត្តកណ្តាល ទទួលបានមេដាយប្រាក់ និងទូកពញាព្ញតេជសែនជ័យ ទទួលបានមេដាយសំរិទ្ធ។

    រីឯវិញ្ញាសាប្រណាំងចម្ងាយ៨០០ម៉ែត្របុរស ៖ ទូកធ្នូ-សរាជសីហ៍ ក្រសួងមហាផ្ទៃទទួលបានមេដាយមាស ទូកពេជ្រកុមារសែនជ័យខេត្តកណ្តាលទទួលបានមេដាយប្រាក់ ទូកពោធិ៍មង្គលសែនជ័យ ខេត្តកណ្តាល និងទូកព្រែករាំងច័ន្ទហេងតេជោសែនជ័យ ទទួលបានមេដាយសំរិទ្ធ។

    ចំពោះវិញ្ញាសាប្រណាំងចម្ងាយ៨០០ម៉ែត្រនារីចម្រុះ ៖ ទូកមហាសេនាចក្រីខេត្តកំពង់ស្ពឺទទួលបានមេដាយមាស ទូក៧មករាចិត្តតែមួយខេត្តកណ្តាលទទួលបានមេដាយប្រាក់ ទូកពោធិ៍មានជ័យបារមីតេជោ ខេត្តកណ្តាលទទួលបានមេដាយប្រាក់ និងទូកពញាព្ញតេជសែនជ័យទទួលបានមេដាយសំរិទ្ធ។

    ដោយឡែកវិញ្ញាសាប្រណាំងចម្ងាយ៥០០ម៉ែត្រ ប្រភេទទូកកាយ៉ាក់ ៖ កីឡាករ សែម មករា ខេត្តកណ្តាលទទួលបានមេដាយមាស កីឡាករ ទ ហៀត ក្រសួងមហាផ្ទៃ ទទួលបានមេដាយប្រាក់ កីឡាករ លាភ ហេង ខេត្តបាត់ដំបង និងកីឡាករ សែម បញ្ញា ខេត្តកណ្តាលទទួលបានមេដាយសំរិទ្ធ៕

  • ស្ត្រីកម្ពុជាក្លាយជា King of the mountain នៅភ្នំបូកគោ ក្នុងចំណោមកីឡាការិនី មកពី៨ប្រទេសផ្សេងទៀត

    ស្ត្រីកម្ពុជាក្លាយជា King of the mountain នៅភ្នំបូកគោ ក្នុងចំណោមកីឡាការិនី មកពី៨ប្រទេសផ្សេងទៀត

    នេះជាលើកទី១ហើយដែលកីឡាការិនីប្រណាំងកង់មួយរូបដែលត្រូវបានគេស្គាល់ថាជាកីឡាការិនីប្រណាំងកង់ដ៏ឆ្នើមរបស់កម្ពុជាបានបន្តជ័យជម្នះរបស់ខ្លួនមួយទៀតនាឆ្នាំ ២០១៧នេះ ដោយបានក្លាយជាកំពូលអ្នកជិះកង់ (King of the mountain) ប្រចាំព្រឹត្តិការណ៍ប្រណាំងកង់អន្តរជាតិលើកទី១នៅកំពូលភ្នំបូកគោ។

    ស្ត្រីដែលលេងកីឡាប្រណាំងកង់ល្អជាងគេនៅក្នុងប្រទេសកម្ពុជា អ្នកស្រី ហេង ស៊ីវឡាងបានជាប់ចំណាត់ថ្នាក់លេខ១ ក្នុងចំណោមកីឡាការិនីមកពី៨ប្រទេសផ្សេងទៀតជុំវិញពិភពលោកដែលបានចូលរួមការប្រកួតកីឡាប្រណាំងកង់អន្តរជាតិកម្រិតអាជីពលើកដំបូងលើភ្នំបូកគោដែលទើបតែបញ្ចប់កាលពីពេលថ្មីៗនេះ។

    ក្រោយឆ្លងកាត់ការប្រកួតអស់រយៈពេល២ថ្ងៃចាប់ពីថ្ងៃទី៦ ដល់ថ្ងៃទី៧ ខែឧសភា នៅលើកំពូលភ្នំបូកគោ កីឡាការិនី ហេង ស៊ីវឡាង បានក្លាយជាម្ចាស់ជើងឯកលើវិញ្ញាសាជិះកង់ពីជើងភ្នំមកកំពូលភ្នំចម្ងាយ៣០គីឡូម៉ែត្រ និងជិះចម្ងាយ៥១គីឡូម៉ែត្រ។ ជ័យជម្នះនេះបានធ្វើឲ្យកីឡាការិនី ហេង ស៊ីវឡាង ក្លាយជាកំពូលអ្នកជិះកង់ (King of the mountain) ប្រចាំព្រឹត្តិការណ៍ប្រណាំងកង់អន្តរជាតិលើកទី១នៅកំពូលភ្នំបូកគោ។

    កាលពីថ្ងៃទី០៦ ខែឧសភា ឆ្នាំ២០១៦ការប្រណាំងកង់រយៈចម្ងាយ៣២គីឡូម៉ែត្រ ដោយកំណត់ការប្រើពេលវេលាប្រណាំងជិះពីក្រោមឡើងមកលើភ្នំនោះ អ្នកស្រី ស៊ីវឡាងបានយកឈ្នះកីឡាការិនី៥រូបដែលបានចូលរួម ដែលមាន កម្ពុជា ម៉ាឡេស៊ី និងថៃហើយក្នុងនោះមានកីឡាការិនីម្នាក់ ជាជម្រើសជាតិរបស់ប្រទេសម៉ាឡេស៊ីបានចូលរួមប្រកួតជាមួយអ្នកស្រីផងដែរ ប៉ុន្តែមិនអាចយកឈ្នះអ្នកស្រីបានឡើយ និងជាមួយគ្នានោះមានកីឡាការិនីថៃម្នាក់បានបោះបង់សិទ្ធិប្រកួតនៅក្នុងថ្ងៃប្រកួត។

    ថ្ងៃចុងក្រោយនៃការប្រកួតរយៈចម្ងាយ ៥១គីឡូម៉ែត្រផ្នែកនារីកាលពីថ្ងៃទី០៧ ខែឧសភា ឆ្នាំ២០១៧ ដោយត្រូវជិះពីលើភ្នំចុះក្រោមព័ទ្ធជុំវិញ រួចឡើងមកលើភ្នំវិញ ជ័យជម្នះលេខ១ក៏បានទៅលើកីឡាការិនី ហេង ស៊ីវឡាង មកពីក្រុម Flying Bikes ប្រើរយៈពេល១ម៉ោង ៣២នាទី ៤៩វិនាទី លេខ២ បានទៅលើកីឡាការិនី ហេង សៀវហ្គិច មកពីក្រុម Fly Bikes ប្រើពេល១ម៉ោង ៤១នាទី ៤៣វិនាទី និងលេខ៣ កីឡាការិនី Lim Pek Yen មកពីប្រទេសម៉ាឡេស៊ីដែលជាជម្រើសជាតិនោះ ប្រើពេល១ម៉ោង៤១នាទី១វិនាទី។

    បូកសរុបលទ្ធផលទាំងពីរថ្ងៃ គណៈកម្មការខ្មែរ និងម៉ាឡេស៊ី ដែលរៀបចំការប្រកួតបានវាយតម្លៃឱ្យអ្នកនាង ហេង ស៊ីវឡាង ជាប់ជយលាភីលេខ១ នៃការប្រណាំងកង់អន្តរជាតិលើភ្នំបូកគោប្រចាំឆ្នាំ២០១៧។

    ជានារីស្រឡាញ់ការប្រណាំងកង់ម្នាក់ និងលើកមុខមាត់ប្រទេសជាតិយើងបានបង្ហើបថា “សម្រាប់ការប្រណាំងកង់លើភ្នំនេះជួបការលំបាកច្រើន ដូចជាធ្វើឱ្យតឹងជើង ជាដើម។ ដូច្នេះមុនការប្រកួត ត្រូវធ្វើការហ្វឹកហាត់រយៈពេលប្រហែលមួយអាទិត្យ ឬពីរអាទិត្យសម្រាប់ទឹកដីលើភ្នំនេះយ៉ាងហោចឱ្យបានពីរបីដងដែរ ទើបធ្វើឱ្យសាច់ដុំជើងមិនឈឺ និងស៊ាំជើង។ តាមធម្មតាផ្លូវឡើងភ្នំខ្ញុំមិនសូវពូកែប៉ុន្មានទេ ប៉ុន្តែខ្ញុំបានហ្វឹកហាត់ប៉ុន្មានដងដែរ ទើបស៊ាំ មិនសូវពិបាកប៉ុន្មាន»។

    សូមរំឭកថា អ្នកស្រី ហេង ស៊ីវឡាង ធ្លាប់ដណ្តើមបានជយលាភីលេខ១ក្នុងការប្រណាំងកង់លើភ្នំបូកគោក្នុងចម្ងាយ៣២គីឡូម៉ែត្រកាលពីឆ្នាំ២០១៣។ អ្នកស្រីក៏បានក្លាយជាម្ចាស់ជយលាភីលេខ១ ក្នុងការជិះចម្ងាយ១១៧គីឡូម៉ែត្រ ក្នុងការប្រកួតប្រណាំងកង់ដើម្បីកុមារលើកទី១១ ឆ្នាំ២០១៦ផងដែរ។

    កម្មវិធីប្រកួតប្រណាំងកង់បើកទូលាយម៉ាឡេស៊ីឆ្នាំ២០១៦ចម្ងាយផ្លូវ១០៥គីឡូម៉ែត្រដែលមានកីឡាករ កីឡាករិនីចូលរួមសរុបប្រមាណ៣,០០០នាក់ អ្នកស្រីហេង ស៊ីវឡាង បានឈ្នះជយលាភីលេខ១ផ្នែកនារីដោយប្រើពេល២ម៉ោង ៤២នាទី។ ក្នុងកម្មវិធីប្រណាំងកង់របស់ម៉ាឡេស៊ីនេះដដែល អ្នកស្រីបែរជាទទួលបានត្រឹមចំណាត់ថ្នាក់លេខ៤ ប៉ុណ្ណោះកាលពីដើមឆ្នាំ២០១៧។

    កាលឆ្នាំ២០១៥ ព្រឹត្តិការណ៍ស៊ីហ្គេមលើកទី២៨ នៅប្រទេសសិង្ហបុរី អ្នកស្រីបានឈរនៅចំណាត់ថ្នាក់លេខ២ និងលេខ៣ រួចទៅហើយ ប៉ុន្តែដោយសារគ្រោះអកុសល អ្នកស្រីមិនឈ្នះលេខ១បានដោយសារមកពីកីឡាការិនីជនជាតិវៀតណាមមានចេតនាជិះកៀរឲ្យអ្នកស្រីដួលទើបមិនអាចយកមេដាយមាសមកជូនជាតិបាននៅពេលនោះ។

    កន្លងមកថ្មីៗនេះ អ្នកស្រីទើបតែត្រឡប់មកពីហ្វឹកហាត់នៅប្រទេសប្រទេសកូរ៉េក្រោមការជួយជ្រោមជ្រែងរបស់គណៈកម្មការជាតិអូឡាំពិកកម្ពុជា និង សហព័ន្ធកីឡាប្រណាំងកង់ដើម្បីចង់ឱ្យកីឡាការិនីហេង ស៊ីវឡាង អាចដណ្តើមបានមេដាយមាស ជូនជាតិក្នុងព្រឹត្តិការណ៍ SEA GAME ២០១៧ នៅប្រទេសម៉ាឡេស៊ី នាពេលខាងមុននេះ៕