Category: សង្គម និងសេដ្ឋកិច្ច

ស្អែកនេះ ប្រជាពលរដ្ឋនឹងចូលទៅដោះស្រាយបញ្ចប់ការអភិវឌ្ឍលើសំណង់អគារ «ប៊ូលឌីង ស»
នៅសល់តែមួយថ្ងៃទៀតប៉ុណ្ណោះ អាជ្ញាធរនៃក្រសួងរៀបចំដែនដីនគរូបនីយកម្ម និងសំណង់ ត្រូវជួបជាមួយប្រជាពលរដ្ឋរស់នៅក្នុង «អគារប៊ូលឌីង ស» ដើម្បីជជែកចរចារកដំណោះស្រាយបញ្ចប់បញ្ហា បន្ទាប់ពីការជួបគ្នាលើកទីមួយពុំបានសម្រេចលទ្ធផលល្អ។
បន្ទាប់ពីការជួបសំណេះសំណាលរវាងអាជ្ញាធរ និងប្រជាពលរដ្ឋចំនួន493គ្រួសារដែលរស់នៅក្នុងសហគមន៍ប៊ូលឌីងសលើកទីមួយកាលពីថ្ងៃទី07 ខែមេសា ឆ្នាំ2017 កន្លងទៅ ប្រជាពលរដ្ឋទាំងអស់បានឯកភាពលក់អគារជាចំណែកកម្មសិទ្ធឯកជនទាំងស្រុងរបស់ខ្លួនទៅឱ្យអ្នកវិនិយោគហើយ ប៉ុន្ដែបញ្ហានៅតែអូសបន្លាយរហូតមកដល់ថ្ងៃនេះ នៅពុំទាន់បានដោះស្រាយបានចប់នៅឡើយ។
បច្ចុប្បន្នអាជ្ញាធរបានចេញលិខិតជាសាធារណៈដើម្បីអញ្ជើញប្រជាពលរដ្ឋរស់នៅលើអគារប៊ូលឌីងសទាំងអស់ឱ្យចូលមកដោះស្រាយបញ្ចប់នូវបញ្ហាទាំងនោះ និងឈានទៅដល់ការអភិវឌ្ឍ។
កន្លងមកអាជ្ញាធរធ្លាប់បានបញ្ជាក់ថា មូលហេតុក្រសួងមានបំណងចង់ដោះស្រាយទៅលើសំណង់អគារប៊ូលឌីងនេះ ដោយសារតែមើលឃើញពីភាពចំណាស់ និងភាពទ្រុឌទ្រោមនៃអគារនេះ។ ម្យ៉ាងអគារនេះវាបាត់បង់នូវភាពរឹងមាំអស់ទៅហើយ ដូច្នេះទើបអាជ្ញាធរមានការបារម្ភខ្លាចអ្នករស់នៅលើអគារនោះជួបនឹងហានិភ័យដោយសារការបាក់រលំនៃអគារដ៏ទ្រុឌទ្រោមមួយនេះ។
មូលហេតុដែលធ្វើឱ្យមានការអូសបន្លាយក្នុងការចរចារហូតមកដល់ពេលនេះ គឺដោយសារតែអាជ្ញាធរបានដាក់តម្លៃទិញជាគោលការណ៍រួមនៅក្នុងសំណង់អគារនេះក្នុង1ម៉ែត្រការ៉េ ក្នុងរង្វង់តម្លៃ 1350ដុល្លារអាមេរិក ប៉ុន្ដែប្រជាពលរដ្ឋទាំង 493គ្រួសារបានទាមទារសុំឱ្យដំឡើងថ្លៃដល់តម្លៃ 2200ដុល្លារអារមេរិក ក្នុង1ម៉ែត្រការ៉េ។
ទោះជាយ៉ាងនេះក្ដី គេរំពឹងថាការជួបចរចាតម្លៃអគារប៊ូលឌីងសជាលើកទីពីរនេះ អាចនឹងត្រូវបញ្ចប់ទៅដោយជោគជ័យ ដើម្បីអនុញ្ញាតឱ្យអ្នកវិនិយោគមានលទ្ធភាពចូលទៅអភិវឌ្ឍនៅតំបន់នោះ និងឈានទៅដល់ការបង្កើនសោភ័ណភាពរបស់រាជធានីភ្នំពេញឱ្យកាន់តែល្អប្រសើរឡើងថែមទៀត។
គួរបញ្ជាក់ដែរថា កាលពីអតីតកាល គម្រោងអគារប៊ូលឌីងសនេះ គឺជាផ្នែកមួយនៃគម្រោងអភិវឌ្ឍន៍ដ៏ធំសម្បើមស្ថិតជាប់មាត់ទន្លេបាសាក់ ដែលបានសាងសង់នៅលើដីចាក់បំពេញវាលលិចទឹក តាមបណ្តោយដងទន្លេបាសាក់។ អគារនេះ ត្រូវបានរចនាឡើងដោយស្ថាបត្យករខ្មែរ លោក លូ បានហាប់ ជាមួយនឹងស្ថាបត្យកររុស្ស៊ី លោក វ្ល់ាឌីមៀរ បូឌៀនស្គី (Vladimir Bodiansky) ហើយត្រូវបានសម្ពោធដាក់អោយប្រើប្រាស់នៅឆ្នាំ 1963។ អគារប៊ូលឌីង មានកម្ពស់ 4ជាន់ មានបន្ទប់ចំនួន 468 ដែលបន្ទប់នីមួយមានទំហំចាប់ពី33ម៉ែត្រការ៉េ ដល់47,5ម៉ែត្រការ៉េ។
បច្ចុប្បន្នគម្រោងនេះ គឺស្ថិតនៅក្នុងការសិក្សារវាងក្រសួងរៀបចំដែនដី នគរូបនីយកម្ម និងសំណង់ ជាមួយក្រុមហ៊ុនជប៉ុន Arakawa ដែលគ្រោងចំណាយថវិកាប្រមាណ 70-80លានដុល្លារ រួមមាន ការសាងសង់ទីតាំងស្នាក់នៅបណ្តោះអាសន្ន និងអគារថ្មីមានកម្ពស់ 21ជាន់ ដែលក្នុងនោះមានទាំងការត្រៀមធ្វើទីតាំងចំណតរថយន្ត 3ជាន់ កន្លែងលក់ដូរ1ជាន់ និងកន្លែងស្នាក់នៅចំនួន 5ជាន់ ដោយបន្ទប់ស្នាក់នៅនីមួយៗ មានទំហំធំជាងមុន10% ហើយចាប់ពីជាន់ទី 9ឡើងទៅនឹងផ្តល់ជាកម្មសិទ្ធិវិនិយោគរបស់ក្រុមហ៊ុនជប៉ុន Arakawa៕
May 11, 2017
វិធីសាស្រ្តក្នុងការធ្វើឱ្យក្ដីស្រមៃក្លាយជាការពិត
មនុស្សគ្រប់រូបតែងខិតខំប្រកបការងារដើម្បីសម្រេចក្ដីប្រាថ្នារៀងៗខ្លួន ដោយមានអ្នកខ្លះសម្រេចបាននូវអ្វីៗដែលខ្លួនប្រាថ្នាស្ទើរទាំងស្រុង ខណៈអ្នកខ្លះទៀតហាក់មិនអាចសម្រេចបាននូវអ្វីដែលខ្លួនប៉ងប្រាថ្នានោះឡើយ។
ខាងក្រោមនេះគឺជាគន្លឹះមួយចំនួនដែលអាចជួយឱ្យអ្នកសម្រេចគោលដៅក្នុងជីវិត៖
1. ចាប់ផ្ដើមបំបែកគោលដៅជាផ្នែកតូចៗ
ការបំបែកគោលដៅជាផ្នែក/កំណាត់តូចៗ គឺជាគនឹ្លះមួយដ៏ល្អក្នុងការត្រៀមខ្លួនដើម្បីទទួលយកភាពជោគជ័យ។ ការដែលអ្នកមិនបំបែកគោលដៅជាផ្នែកៗតូចដើម្បីយកមកធ្វើ វានឹងធ្វើឱ្យអ្នកមានការឈឺក្បាល និងស្មុគស្មាញខ្លាំងនៅក្នុងការធ្វើការងារមួយឱ្យបានសម្រេចលទ្ធផលធំ។ បើសិនអ្នកមានគោលដៅធំ គួរតែបំបែកវាជាផ្នែកតូចៗដើម្បីឱ្យអ្នកមានភាពងាយស្រួលក្នុងការសម្រេចគោលដៅទាំងនោះមួយដំណាក់កាលម្តងៗ។
2. ផ្ដល់អនុភាពចំពោះការធ្វើការជាប្រព័ន្ធ
ប្រសិនបើអ្នកចង់ទទួលបានជោគជ័យ អ្នកត្រូវតែធ្វើការងារជាលក្ខណប្រព័ន្ធ ពីព្រោះការប្រើប្រាស់ប្រព័ន្ធនឹងជួយឱ្យអ្នកមានភាពងាយស្រួលក្នុងការធ្វើការងារយ៉ាងមានប្រសិទ្ធភាព។ ចូរពឹងផ្អែកលើប្រព័ន្ធឱ្យបានច្រើនជាងការពឹងផ្អែកតែទៅលើមនុស្ស។
3. ត្រូវស្វែងរកជំនួយនៅពេលជួបបញ្ហា
យើងទាំងអស់គ្នាមិនមែនសុទ្ធតែពូកែគ្រប់រឿងនោះទេ ដោយមានពេលខ្លះក៏មានរឿងដែលធ្វើឱ្យយើងខកចិត្តដែរ។ នោះហើយគឺជាផ្នែកដ៏សាមញ្ញនៅក្នុងជីវិតរបស់មនុស្ស។ គន្លឹះក្នុងការទទួលបានភាពជោគជ័យគឺជាការដែលយើងត្រូវចេះស្វែងរកជំនួយនៅពេលដែលជួបបញ្ហាមិនអាចដោះស្រាយបាន។ មនុស្សឆ្លាត និងពូកែតែងតែស្វែងរកជំនួយពីអ្នកដទៃនៅពេលដែលពួកគេជួបបញ្ហាពិបាកដោះស្រាយ៕
May 11, 2017
Isco ជួយឲ្យ Real ទម្លាក់ Atletico ជាលើកទី៤ ដើម្បីទៅវគ្គផ្តាច់ព្រ័ត្រនៃ Champions League
ក្រុម Real Madrid របស់លោក Zinedine Zidance បានសង្គ្រោះការប្រកួតរបស់ខ្លួនយ៉ាងល្អដោយធ្វើឲ្យទាំងក្រុម Atletico Madrid និងលោក Diego Simeone ជួបនឹងការខកចិត្តដ៏ធំមួយ ក្រោយពីក្រុម Real បានរងបរាជ័យក្នុងលទ្ធផល ២-១ ក្នុងការប្រកួតជើងទី២នៃវគ្គពាក់កណ្តាលផ្តាច់ព្រ័ត្រ កាលពីថ្ងៃពុធម្សិលមិញនេះ ប៉ុន្តែ ទោះជាក្រុមរបស់លោក Zinedine Zidance ចាញ់ក្នុងការប្រកួតជើងទីពីរនេះក៏ដោយ ក៏នៅតែបានឈានទៅវគ្គផ្តាច់ព្រ័ត្រដដែល ជាមួយនឹងលទ្ធផលរួមទាំងពីរជើងគឺ ៤-២។
កីឡាករ Saul Niguez និង Antoine Griezmann របស់ Atletico បានធ្វើឲ្យក្រុម Real ស្ថិតក្នុងការភិតភ័យ តាមរយៈការស៊ុតបាល់បញ្ចូលទី២គ្រាប់នៅត្រឹមតែនាទី ទី១៦។ ប៉ុន្តែ សុបិនអាក្រក់របស់ Real បានបញ្ចប់ត្រឹមតែនាទី ទី៤២ ប៉ុណ្ណោះ ដោយនៅពេលនោះខ្សែប្រយុទ្ធ Karim Benzema បានអូសបាល់ផុតខ្សែការពារ៣នាក់របស់ក្រុម Atletico ដើម្បីបញ្ជូនបាល់យ៉ាងល្អទៅឲ្យ Toni Kroos ដែលបានបង្ខំឲ្យអ្នកចាំទី Jan Oblak ត្រូវធ្វើការសង្គ្រោះបាល់ទាំងលំបាកមួយ ប៉ុន្តែ Isco បានបន្ថែមបាល់ផ្លាតចេញពីដៃអ្នកចាំទីចូលទីតែម្តង។
ក្រុមរបស់លោក Simeone ស្ទើរតែធ្វើការស្រោចស្រង់ជ័យជម្នះដ៏អស្ចារ្យមួយបានទៅហើយ ប៉ុន្តែការរងបរាជ័យដ៏ធ្ងន់ធ្ងររបស់ពួកគេក្នុងលទ្ធផល ៣-០ កាលពីការប្រកួតជើងទី១ នាសប្តាហ៍មុន បានបង្ហាញថា ជាការរងបរាជ័យដ៏ធំមួយ ខណៈដែលពួកគេបានធ្លាក់ចេញក្រោមស្នាដៃក្រុម Real ក្នុងការប្រកួតក្របខ័ណ្ឌ Champions League នេះជាលើកទី៤ជាប់ៗគ្នាហើយ។
ក្រុម Real ដែលជាម្ចាស់ការពារតំណែងជើងឯកក្របខ័ណ្ឌ Champions League នឹងធ្វើដំណើរទៅកាន់ទីក្រុង Cardiff នាថ្ងៃទី ៣ ខែមិថុនា ដើម្បីជួបជាមួយនឹងក្រុម Juventus ដោយសម្លឹងរកការក្លាយជាក្រុមដំបូងគេក្នុងការការពារពានរង្វាន់នេះយ៉ាងជោគជ័យក្នុងរយៈពេល២៥ឆ្នាំ ក្រោមរូបមន្តថ្មីនៃយុទ្ធនាការរបស់ UEFA។
លោក Zidane គ្រូបង្វឹករបស់ក្រុម Real បានឲ្យដឹងថា៖ «ខ្ញុំពិតជារីករាយណាស់ក្នុងការឈានទៅវគ្គផ្តាច់ព្រ័ត្រនេះ។ វាគឺជាដំណើរផ្លូវដ៏វែងឆ្ងាយមួយក្នុងការទៅកាន់ទីនោះ ហើយវាក៏ជាផ្លូវដ៏វែងឆ្ងាយផងដែរក្នុងការឈានទៅដល់វគ្គនោះក្នុងរយៈពេល២ឆ្នាំជាប់ៗគ្នា។ ខ្ញុំត្រូវតែអបអរចំពោះក្រុមមួយនេះ»៕
https://www.youtube.com/watch?v=zoVKLQ-VSd0
ប្រភពពី៖ The Sun
May 11, 2017
ធ្វើម៉េចដឹងបានថា កូនកើតប្រតិកម្មចាញ់អាហារ?
ប្រតិកម្មចាញ់អាហារ គឺការដែលប្រព័ន្ធទប់ទល់ជាតិពុលក្នុងរាងកាយកើតភាពវិលវល់ គិតថាសារធាតុអាហារដែលប្រក្រតីមិនមានគ្រោះថ្នាក់ចំពោះរាងកាយបែរទៅជាមានគ្រោះថ្នាក់ ទើបមានប្រតិកម្មប្រឆាំងនឹងសារធាតុបង្កប្រតិកម្មចាញ់ក្នុងអាហារនោះ ដោយសាងបដិបក្ខប្រាណឡើងមកតតាំងនឹងសារធាតុនោះ ធ្វើឱ្យកើតជាអាការប្រតិកម្មចាញ់ ដូចជា កណ្តាស់ ខ្លួនប្រាណហើម ឡើងក្រហម ឬឡើងកន្ទួលនៅលើស្បែកជាដើម ដូច្នេះបើអ្នកម្តាយសង្ស័យថា កូនតូចមានអាការប្រតិកម្មចាញ់ អ្នកម្តាយគួរតែទៅប្រឹក្សាជាមួយគ្រូពេទ្យកុមារជាបន្ទាន់។
តើអ្នកម្តាយនឹងជួយកូនតូចយ៉ាងណា បើកូនមានអាការប្រតិកម្មចាញ់អាហារ?
1/ កត់ត្រាទុកថា តើកូនញ៉ាំអ្វីខ្លះក្នុងមួយថ្ងៃៗ ដើម្បីរកមូលហេតុនៃការកើតប្រតិកម្មចាញ់នោះ។
2/ ឱ្យកូនញ៉ាំអាហារប្រភេទថ្មីរៀងរាល់4ថ្ងៃ ក្នុងអំឡុងឱ្យអាហារបន្ថែមតាមវ័យ វានឹងជួយសង្កេតតាមដានមើលប្រតិកម្មថ្មីៗរបស់កូនបាន។
3/ ចំណាំទុកថា អាហារណាមួយដែលកូនញ៉ាំហើយកើតមានប្រតិកម្មចាញ់ ដើម្បីចៀសវាងកុំឱ្យកូនញ៉ាំលើកក្រោយទៀត។
4/ នៅពេលកូនកើតប្រតិកម្មចាញ់អាហារ ឬថ្នាំពេទ្យ ចូរប្រញាប់នាំកូនតូចទៅមន្ទីរពេទ្យជាបន្ទាន់ ដើម្បីទទួលការព្យាបាលយ៉ាងត្រឹមត្រូវ និងទាន់ពេលវេលា។
5/ ចំណែកអាការអាហារមិនរំលាយវិញ អាចពិបាកសង្កេតឃើញជាងបន្តិច តែវិធីដែលល្អបំផុតគឺ ប្រឹក្សាជាមួយគ្រូពេទ្យឱ្យជួយវិនិច្ឆ័យ និងផ្តល់ពាក្យប្រឹក្សា ដើម្បីនឹងបានចាត់ការបញ្ហាបានត្រឹមត្រូវ និងច្បាស់លាស់៕
May 11, 2017
មណ្ឌលគិរី កន្លែងកម្សាន្តដ៏ស័ក្តិសមសម្រាប់ថ្ងៃឈប់សម្រាក
គ្រាន់តែឈានជើងចូលដល់ទឹកដីនៃខេត្តមណ្ឌលគិរីភ្លាម អារម្មណ៍ហត់នឿយដែលបណ្តាលមកពីការធ្វើដំណើរអស់រយៈពេលស្ទើរពេញមួយព្រឹក ហាក់រលាយបាត់ទៅដោយមិនដឹងខ្លួន។
ទេសភាពនៃធម្មជាតិដ៏ស្រស់បំព្រង រួមផ្សំជាមួយនឹងផ្កាស្មៅភ្នំដែលកំពុងយោលយោគតាមកម្លាំងខ្យល់បក់នៅតាមដងផ្លូវ អាកាសធាតុដ៏ត្រជាក់ពីរុក្ខជាតិតាមដងភ្នំ បានឆក់យកសេចក្តីនឿយហត់ទាំងឡាយ បន្សល់ទុកនូវទឹកចិត្តរីករាយ និងក្តីអន្ទះសារចង់ដឹងថាតើទីតាំងដែលនឹងត្រូវទៅកម្សាន្តនោះវាស្រស់ស្អាតដល់កម្រិតណាទៅ? បើគ្រាន់តែទេសភាពតាមដងផ្លូវសោះក៏អាចធ្វើឱ្យយើងមានអារម្មណ៍ថា ហាក់ដូចជាកំពុងតែស្ថិតនៅភពផ្សេងគ្នាទាំងស្រុងពីកន្លែងដែលយើងរស់នៅជារៀងរាល់ថ្ងៃទៅហើយនោះ។
នៅពេលដែលបានឃើញរូបសត្វគោព្រៃពីរក្បាលដែលស្ថិតនៅចំកណ្តាលផ្លូវ នោះមានន័យថា អ្នកបានចូលមកដល់ទីរួមខេត្តមណ្ឌលគិរីហើយ។ នៅទីនោះអ្នកអាចស្វែងរកកន្លែងស្នាក់នៅ កន្លែងទទួលទានអាហារ ព្រមទាំងផ្សារដែលអាចចូលទិញឥវ៉ាន់នៅក្នុងផ្សារខេត្តនោះបានតាមចំណូលចិត្តផងដែរ ហើយបន្ទាប់ពីនោះវាជាពេលវេលាដែលអ្នកត្រូវធ្វើដំណើរកម្សាន្តម្តង។
មណ្ឌលគិរី អាចនាំក្រសែភ្នែករបស់អ្នកឱ្យទៅទស្សនាកន្លែងកម្សាន្តជាច្រើនកន្លែងដូចជា ទឹកធ្លាក់អូររមីស ចំការស្រល់ ភ្នំដោះក្រមុំ សមុទ្រឈើ ភូមិជនជាតិ ចំការកាហ្វេ និងទីតាំងទឹកជ្រោះជាច្រើនកន្លែងទៀត ប៉ុន្តែតំបន់ទេសចរណ៍ដែលមានឈ្មោះល្បីជាងគេគឺទឹកជ្រោះប៊ូស្រា។ ទឹកជ្រោះប៊ូស្រាចែកចេញជា 3ដំណាក់ ដំណាក់ទី1 មានកម្ពស់ប្រមាណ12ម៉ែត្រ ដែលមានមុខកាត់ 15ម៉ែត្រនៅរដូវវស្សា។ ដំណាក់ទី2 មានកម្ពស់ពី15 ទៅ20ម៉ែត្រ និងមានមុខកាត់ទទឹង 20ម៉ែត្រ មានកម្ពស់18 ទៅ25ម៉ែត្រ ចំណែកនៅរដូវប្រាំង គឺមានមុខកាត់ត្រឹមតែ 13ម៉ែត្រប៉ុណ្ណោះ។ ដំណាក់ទីពីរនេះមានចម្ងាយប្រមាណជា150ម៉ែត្រពីដំណាក់ទីមួយ។ ចំណែកដំណាក់ទី3 ស្ថិតនៅឆ្ងាយពីដំណាក់ទី2 ដែលមិនអាចទៅដល់បាន ព្រោះជាតំបន់ព្រៃក្រាស់ និងសម្បូរសត្វសាហាវរស់នៅ។ បន្ទាប់ពីនោះ អ្នកទេសចរអាចបន្តទៅកន្លែងមួយផ្សេងទៀតគឺទឹកជ្រោះសែនមនោរម្យ ដែលមានចម្ងាយត្រឹមតែ 5គីឡូម៉ែត្រពីទីរួមខេត្ត ហើយទឹកធ្លាក់នៅទីនោះក៏មាន 3ដំណាក់ដែរ ប៉ុន្តែវាមានទ្រង់ទ្រាយតូចជាងទឹកជ្រោះប៊ូស្រា។

ចំណែកទឹកជ្រោះរមនា គឺចម្ងាយប្រមាណជា 11គីឡូម៉ែត្រពីទីរួមខេត្ត ហើយតំបន់ទឹកជ្រោះនេះហ៊ុមព័ទ្ធជុំវិញដោយដំណាំផ្សេងៗជាច្រើនដូចជា ដំណាំកោស៊ូ ស្វាយចន្ទី កាហ្វេនិងរុក្ខជាតិ ព្រមទាំងព្រៃឈើតូចធំជាលម្អនៅក្នុងតំបន់មួយនេះ។ ទឹកជ្រោះនេះ ក៏ជាតំបន់គួរឱ្យទាក់ទាញចំពោះទេសចរផងដែរ ដោយមានទឹកធ្លាក់កម្ពស់5ម៉ែត្រ ហូរធ្លាក់ទៅក្នុងអាងទឹកធំមួយដែលបង្កនូវភាពងាយស្រួលដល់អ្នកទេសចរក្នុងការងូតទឹកកម្សាន្ត។ មិនទាន់អស់ត្រឹមនេះនោះទេមណ្ឌលគិរីនៅមានកន្លែងគួរឱ្យចាប់អារម្មណ៍ជាច្រើនទៀត ដែលអ្នកគួរតែទៅមើលឱ្យឃើញដោយផ្ទាល់ភ្នែក ដូច្នេះសង្ឃឹមថាថ្ងៃសម្រាកខាងមុខនេះ វានឹងក្លាយជាតំបន់ទេសចរណ៍មួយដែលស្ថិតនៅក្នុងជម្រើសរបស់អ្នក៕

May 11, 2017
រឿងតុក្កតាមួយចំនួនកំពុងបំផ្លាញក្មេងៗដែលអាណាព្យាបាលនឹកស្មានមិនដល់
អាណាព្យាបាលមួយចំនួនធំបានបណ្តោយឱ្យកូនតូចៗនៅជាមួយឧបករណ៍អេឡិចត្រូនិក ឬបណ្តោយកុមារតូចៗឱ្យមើលរឿងតុក្កតាដោយរំពឹងថា អាចនឹងធ្វើឱ្យពួកគេឆ្លាតជាងមុន តែថ្មីៗនេះមានអ្នកជំនាញខាងចិត្តវិទ្យាកុមារបានរកឃើញថា មានរឿងតុក្កតាមួយចំនួនកំពុងបំផ្លាញក្មេងៗទៅវិញ។
យោងតាមគេហទំព័រ novakdjokovicfoundation.org ដែលជាគេហទំព័រនិយាយអំពីការអប់រំ និងអំពើហិង្សាបានបង្ហាញថា ក្មេងៗជាច្រើនលើពិភពលោក កំពុងងប់ងល់ជាមួយនឹងរឿងតុក្កតាខណៈរឿងតុក្តតាទាំងអស់នោះមានបង្កប់ដោយអំពើហិង្សា និងគំរូអាក្រក់ជាច្រើនដល់ពួកគេ។ ខាងក្រោមនេះជារឿងតុក្កតាមួយចំនួនដែលត្រូវបានគេរកឃើញភាពអវិជ្ជមានជាច្រើន។
១. រឿងឆ្មា និងកណ្តុរ (Tom and Jerry)

អាណាព្យាបាលជាច្រើនប្រហែលជាមិននឹកស្មានដល់ទេថា រឿងតុក្កតាកំប្លុកកំប្លែង Tom and Jerry ដែលសូម្បីតែមនុស្សធំក៏ចូលចិត្តដែរនោះ ជារឿងដែលបង្កប់ដោយហិង្សា។ ក្នុងវគ្គជាច្រើនរបស់រឿងឆ្មា និងកណ្តុរបានបង្ហាញពីឈុតឆាកវាយប្រហារ រួមទាំងការដោះស្រាយបញ្ហាដោយការសងសឹកគ្នាទៅវិញទៅមក។ នៅពេលដែលក្មេងៗបានមើលរឿងនេះហើយ ពួកគេអាចនឹងយកគំរូតាម ដោយប្រើប្រាស់ហិង្សាដើម្បីទាមទារនូវអ្វីដែលគេចង់បាន ឬដើម្បីយកឈ្នះលើក្មេងដទៃទៀតដែលមានគំនិតមិនស្របជាមួយនឹងខ្លួន។
២. រឿង Pokemon

Pokemon ជារឿងដែលបានបង្កើតឡើងដោយផលិតករ Satoshi Tajiri នៅក្នុងឆ្នាំ 1995។ តាមពិតទៅរឿងនេះមានចំណងជើងពីដំបូងគឺ “Pocket Monster” តែក្រោយមកគឺត្រូវបានហៅកាត់មកត្រឹម Pokemon វិញ។
រឿងមួយនេះត្រូវបានរដ្ឋាភិបាលជប៉ុនបញ្ឈប់ការចាក់ផ្សាយ បន្ទាប់ពីមានក្មេងៗជាច្រើនត្រូវចូលមន្ទីរពេទ្យនៅក្នុងឆ្នាំ 1997 ដោយសារតែបញ្ហាភ្លើង Flash ពណ៌ក្រហម និងពណ៌ខៀវនៅក្នុងវគ្គខ្លះរបស់រឿងតុក្កតានេះដែលធ្វើឱ្យក្មេងៗមានបញ្ហាភ្នែក។ ទូរទស្សន៍ជាច្រើនបានបញ្ឈប់ការចាក់ផ្សាយរឿងមួយនេះបន្ទាប់ពីមានការប្រកាសអាសន្នថាបានប៉ះពាល់ដល់សុខភាពភ្នែករបស់ក្មេងៗ តែនៅកម្ពុជា រឿងតុក្កតាមួយនេះនៅតែមានវត្តមាននៅឡើយក្នុងបណ្តាញ YouTube និងបណ្តាញសង្គម ដែលអ្នកខ្លះបានយកមកបង្ហោះសាឡើងវិញ។
៣. រឿង Oggy and the Cockroaches

Oggy and the Cockroaches ជាប្រភេទរឿងតុក្កតាភាគថ្មីមួយទៀតដ៏មានប្រជាប្រិយភាពដែលគ្រប់គ្នាសុទ្ធតែដឹងថា មានលក្ខណៈស្រដៀងនឹងរឿងឆ្មា និងកណ្តុរដែរ។ រឿងមួយនេះ វគ្គខ្លះក៏បានបង្ហាញដល់ក្មេងៗនូវគុណវិបត្តិផងដែរ តាមរយៈឈុតឆាកអវិជ្ជមានមួយចំនួនដែលក្មេងៗមិនគួរធ្វើតាម ឬធ្វើឱ្យក្មេងៗក្លាយជាមនុស្សខូច ហើយទន្ទឹមនឹងនោះ នៅមានវគ្គខ្លះទៀតសុទ្ធសឹងតែជាសកម្មភាពហិង្សា ដែលអាចប៉ះពាល់ដល់ការគិតរបស់កុមារ។ រឿងមួយនេះបានបង្ហាញផងដែរអំពីការពួនស្ទាក់ដើម្បីដណ្តើមរបស់របរគ្នា រួមជាមួយនឹងការប្រើល្បិចជាច្រើនដើម្បីបំផ្លាញគ្នា។ ហេតុនេះអាណាព្យាបាលគួរពិចារណាឱ្យបានច្បាស់មុននឹងអនុញ្ញាតឱ្យកូនៗមើលរឿងតុក្កតាណាមួយនោះ៕
May 11, 2017
សេន ប៊ុនថេន និង មឿន សុភា នាំខ្សែក្រវាត់ចំនួន ២ និងពាន ១គ្រឿងពីប្រទេសបារាំង មកជូនកម្ពុជា
កាលពីល្ងាចម្សិលមិញនេះ ក្រុមអត្តពលិករួមជាមួយនឹងថ្នាក់ដឹកនាំកីឡាប្រដាល់ក្បាច់គុនខ្មែរ បាន អញ្ជើញទៅទទួលស្វាគមន៍ កីឡាករ សេន ប៊ុនថេន និង មឿន សុភា នៅព្រលានយន្តហោះអន្តរជាតិ ភ្នំពេញ ដោយពួកគេទាំងពីរបានប្រកួតឈ្នះម្ចាស់ផ្ទះបារាំង ដណ្ដើមបានខ្សែក្រវាត់ ២ និង ពាន១គ្រឿង មកជូនកម្ពុជា។ ខណៈដែលកីឡាករ ឡៅ ចន្ទា្រ បានបរាជ័យ មិនអាចយកខ្សែក្រវាត់មកជូនជាតិ និងអ្នកគាំទ្របាន។
កីឡាករបីរូបនេះ បានចាប់ផ្តើមប្រកួតតាំងពីថ្ងៃទី១៥ ខែមេសា ឆ្នាំ២០១៧ ក្នុងការប្រកួតដណ្តើមខ្សែក្រវាត់មិត្តភាពអន្តរជាតិ នៅលើទឹកដីនៃប្រទេសស្ថិតក្នុងទ្វីបអឺរ៉ុប ខណៈកីឡាករ មឿន សុភា និង សេន ប៊ុនថេន បានផ្តួលគូប្រកួត គឺកីឡាករម្ចាស់ផ្ទះបារាំង ដើម្បីឈ្នះខ្សែក្រវាត់បានម្នាក់១ដូចគ្នា។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ បានមានប្រសាសន៍ថា៖ លទ្ធផលដ៏ល្អប្រសើរខាងលើ គឺជាសញ្ញាណមួយដ៏ល្អ សម្រាប់វិស័យកីឡាគុនខ្មែរ ដែលត្រៀមបង្ហាញវត្តមានលើកដំបូងក្នុងការប្រកួតកីឡាស៊ីហ្គេម លើកទី២៩ នទីក្រុងគូឡាឡាំពួ ប្រទេសម៉ាឡេស៊ីនាខែសីហាខាងមុខនេះ ។

ដោយឡែកកីឡាករ ម៉ឺន សុភា និង ឡៅ ចន្ទ្រា ដែលជាបេក្ខភាពជម្រើសជាតិត្រៀមស៊ីហ្គេម ឆ្នាំ២០១៧នេះ បានលើកឡើងថា ការប្រកួតនៅបារាំង មានឧបសគ្គមួយចំនួនបានកើនឡើង ប៉ុន្ដែក្នុងនាមកីឡាករកម្ពុជា ពួកគេបានព្យាយាមយ៉ាងខ្លាំង ទម្រាំដណ្ដើមបានជ័យជម្នះជូនជាតិ លើកលែងតែ ឡៅ ចន្ទ្រា ដែលវាយខុសបច្ចេកទេស ត្រូវបានអាជ្ញាកណ្ដាលកាត់សេចក្ដីឲ្យចាញ់ ។ ប៉ុន្ដែយ៉ាងណាពួកគេ បានប្ដេជ្ញាបង្កើនការហ្វឹកហាត់ឲ្យបានកាន់តែល្អប្រសើរឡើងទៀត ដើម្បីត្រៀមស៊ីហ្គេម នាខែសីហាខាងមុខ ។
ចំណែកកីឡាករ សេន ប៊ុនថេន ដែលដណ្ដើមបានខ្សែក្រវាត់ ១គ្រឿងដែរនោះ បាននិយាយថា ខ្លួនមិននឹកស្មានថាអាចយកឈ្នះកីឡាករម្ចាស់ផ្ទះបារាំងដើម្បីក្លាយជាម្ចាស់ក្រវាត់បែបនេះទេ ។ ប៉ុន្ដែទោះជាបែបនេះក្ដី នេះគឺជាការប្រកួតលើកចុងក្រោយរបស់ខ្លួនហើយ ដោយលោកប្រាថ្នាចង់ធ្វើជាគ្រូបង្វឹកវិញម្ដង និងបញ្ឈប់ការឡើងសង្វៀនទៀតហើយ ។
គួរបញ្ជាក់ផងដែរថា បន្ទាប់ពីការប្រកួតរបស់ពួកគេបានបញ្ចប់រួចនោះ កីឡាករទាំងបីនាក់បានស្នាក់នៅប្រទេសបារាំងដើម្បីធ្វើការហ្វឹកហាត់បន្ថែមទៀត ហើយពួកគេបានចែករំលែកបទពិសោធរបស់ខ្លួនជាមួយកីឡាករក្នុងក្លឹបប្រដាល់មួយចំនួននៅក្នុងប្រទេសនោះ។ សូមជម្រាបផងដែរថា កីឡាករ២រូបក្នុងចំណោម ៣រូបនោះគឺ មឿន សុភា និង ឡៅ ចន្រ្ទា ត្រូវធ្វើការហ្វឹកហាត់ដើម្បីត្រៀមចេញទៅប្រកួតនៅ SEA GAME 2017 នៅទីក្រុងគូឡាឡាំពួ នៃប្រទេស ម៉ាឡេស៊ីខាងមុខនេះផងដែរ៕
May 10, 2017
លោក Simeone ជំរុញឲ្យ Atletico ផ្តល់ការខកចិត្តដល់ Real ម្តង នៅរាត្រីនេះ
លោក Diego Simeone បានលើកទឹកចិត្តឲ្យក្រុម Atletico Madrid ជម្នះលើឧបស័គ្គ ក៏ដូចជាសំណាងអាក្រក់ផ្សេងៗឱ្យបាន នៅពេលធ្វើជាម្ចាស់ផ្ទះទទួលក្រុមដែលស្ថិតក្នុងទីក្រុងតែមួយជាមួយគ្នាគឺ Real Madrid នៅក្នុងការប្រកួតក្របខ័ណ្ឌ Champions League វគ្គពាក់កណ្តាលផ្តាច់ព្រ័ត្រ ជើងទី២ នាកីឡដ្ឋាន Vicente Calderon នារាត្រីនេះ។
Atletico នឹងត្រូវជួបការងារដ៏ធំមួយក្នុងការស្រោចស្រង់ពីការរងបរាជ័យ ៣-០ ក្នុងការប្រកួតជើងទី១កាលពីសប្តាហ៍មុន ប្រសិនបើពួកគេចង់គេចឲ្យផុតពីការធ្លាក់ចេញពីយុទ្ធនាការនេះជាលើកទី៤ជាប់ៗគ្នា ក្រោមស្នាដៃក្រុម Real។ ក្រុមយក្សអេស្ប៉ាញ Real បានទម្លាក់ក្រុម Atletico បីរដូវកាលជាប់ៗគ្នាក្នុងក្របខ័ណ្ឌកំពូលអឺរ៉ុប ក្រោយពីបានយកឈ្នះលើគូប្រកួតរបស់ពួកគេ ៤-១ នៅនាទីបន្ថែម១៥នាទីពីរដងនៃវគ្គផ្តាច់ព្រ័ត្រ កាលពីឆ្នាំ២០១៤ មុននឹងយកឈ្នះលើក្រុម Atletico ម្តងទៀត ក្នុងលទ្ធផលទាំងពីរជើង ១-០ វគ្គ៨ក្រុមចុងក្រោយ ឆ្នាំ២០០១៥។ Atletico បានបន្តជួបការខកចិត្តពេលប៉ះ Real ក្នុងវគ្គផ្តាច់ព្រ័ត្រនៃក្របខ័ណ្ដ Champions League កាលពីឆ្នាំ២០១៦ ដែលកាលនោះ ពួកគេបានរងបរាជ័យដោយការស៊ុតបាល់ប៉េណាល់ទី ក្រោយពីបញ្ចប់ត្រឹមលទ្ធផលស្មើ ១-១ បន្ទាប់ពីរយៈពេល១៥នាទីពីរដង។
នៅមុនពេលឈានទៅកាន់ការប្រកួតនៅថ្ងៃនេះ លោក Simeone បានប្រាប់ក្នុងសន្និសីទសារព័ត៌មានថា៖ «វាពិតជាលំបាកណាស់ វាលំបាកក្នុងការលើកទឹកចិត្តដល់កីឡាករក្នុងការប្រកួតមួយបែបនេះ។ យើងបានរងបរាជ័យក្នុងលទ្ធផល ៣-០ ក្នុងការប្រកួតលីក និងក្នុងការប្រកួតជើងទី១។ យើងក៏ធ្លាប់រងបរាជ័យក្នុងការប្រកួតវគ្គផ្តាច់ព្រ័ត្រ២លើកផងដែរ ហេតុនេះ វានឹងក្លាយជាការប្រកួតដ៏ស្វិតស្វាញមួយ»។
គ្រូបង្វឹករូបនេះបានបន្ថែមទៀតថា៖ «យើងត្រូវតែការពារឲ្យបានល្អនៅថ្ងៃនេះ។ ភាពរឹងមាំក្នុងតំបន់ការពារ នឹងរក្សាក្តីសង្ឃឹមរបស់យើងបានក្នុងការប្រកួតនេះ»។ ការប្រកួតនេះនឹងចាប់ផ្តើមនៅម៉ោង១:៤៥ទៀបភ្លឺ៕
ប្រភពពី៖ Daily Star
May 10, 2017
តំណាងកម្ពុជា២ក្រុមប៉ះម្ចាស់ផ្ទះសិង្ហបុរី ក្នុងការប្រកួត RHB Singapore Cup 2017
នេះជាព្រឹត្តិការណ៍ប្រកួតដ៍អស្ចារ្យមួយ ដែលក្រុមណាហ្គាវើល និង បឹងកេត បានទទួលបានសិទ្ធិពីសហព័ន្ធកីឡាបាល់ទាត់កម្ពុជា (FFC) ធ្វើជាអ្នកតំណាងឱ្យប្រទេសកម្ពុជាចេញទៅប្រកួតដណ្ដើមពានរង្វាន់ RHB Singapore Cup 2017 នៅប្រទេសសិង្ហបុរី នាចុងខែឧសភានេះ។
យោងតាមលទ្ធផលចាប់ឆ្នោតកាលពីម្សិលមិញ បានឲ្យដឹងថា ក្រុមជើងឯកលីកកំពូលកម្ពុជា២ជំនាន់ បឹងកេត ត្រូវជួបក្រុមកំពុងឈរលេខរៀងទី៤ នៃលីកកំពូលសិង្ហបុរី គឺក្រុម Warriors FC ខណៈក្រុមណាហ្គាវើល ត្រូវជួបក្រុម Balestier Khalsa ដែលកំពុងឈរលេខរៀងទី៧ ក្នុងក្របខណ្ឌលីកកំពូលសិង្ហបុរីបច្ចុប្បន្ន ។
នេះជាការប្រកួតបាល់ទាត់ពានរង្វាន់ RHB Singapore Cup 2017 ដោយក្រុមតំណាងកម្ពុជាទាំងពីរ ត្រូវជួបក្រុមម្ចាស់ផ្ទះសិង្ហបុរីដូចគ្នា នាថ្ងៃទី២៩ ខែឧសភាខាងមុខនេះ ។ នេះមិនមែនជាលើកទី១ នោះទេ ដែលក្រុមបឹងកេត និងណាហ្គាវើលចូលរួមប្រកួតពានរង្វាន់អន្ដរជាតិមួយនេះ ពោលគឺនេះជាលើកទី២ហើយ សម្រាប់ក្រុមបឹងកេត តែជាលើកទី៣ សម្រាប់ក្រុមណាហ្គាវើល ។
ប៉ុន្ដែការចូលរួមលើកចុងក្រោយដោយក្រុមណាហ្គាវើល កាលពីឆ្នាំ២០១៦កន្លងទៅ គឺបានបរាជ័យយ៉ាងធ្ងន់ធ្ងរ ក្រោមថ្វីជើងក្រុម Global របស់ហ្វីលីពីន ដោយចាញ់ក្នុងលទ្ធផល ៥-០ ៕
May 10, 2017
លោកថោង ខុន៖ ការអភិវឌ្ឍអត្តពលិកថ្នាលវ័យក្មេង ហាក់បីដូចជាចំណេះដឹងថ្មីសម្រាប់គ្រូបង្វឹក
ប្រធានគណៈកម្មាធិកាជាតិអូឡាំពិកកម្ពុជា (NOCC) លោកថោង ខុន បានថ្លែងបែបនេះនៅក្នុងពិធីបើកសិក្ខាសាលាមួយកាលពីល្ងាចម្សិលមិញនេះនៅទីស្នាក់ការ NOCC ក្នុងវគ្គ អភិវឌ្ឍន៍អត្តពលិកថ្នាល និងរបៀបដឹកនាំជាក្រុម ដែលមានរយៈពេលសិក្សា ៤ថ្ងៃ។

វគ្គសិក្សានេះ NOCC បានអញ្ជើញគ្រូជំនាញពីជប៉ុន និង អាល្លឺម៉ង មកបង្រៀនដល់សិក្ខាកាមចំនួន៧០នាក់មកពីបណ្តាសហព័ន្ធកីឡាទាំងអស់ដើម្បីពង្រឹង និងពង្រីកលើការអភិវឌ្ឍអត្តពលិកថ្នាល និងរបៀបដឹកនាំជាក្រុម ដើម្បីកុំឱ្យមានបញ្ហា និងទទួលបានជោគជ័យសម្រាប់ដំណើរឆ្ពោះទៅកាន់ឱកាសដែលកម្ពុជាធ្វើជាម្ចាស់ផ្ទះ SEA GAME នៅឆ្នាំ២០២៣។
លោកបានមានប្រសាសន៍បែបនេះថា៖ ការអភិវឌ្ឍអត្តពលិកថ្នាល ហាក់បីដូចជាចំណេះដឹងថ្មីមួយសម្រាប់គ្រូបង្វឹក និងមន្រ្តីបច្ចេកទេសកីឡាទាំងអស់នៅពេលនេះ ពីព្រោះកន្លងមកយើងបណ្តុះបណ្តាលតែជំនាញលើអត្ត ពលិកពេញវ័យ ហើយការអនុវត្តសកម្មភាពហ្វឹកហាត់ភាគច្រើនសង្កត់ធ្ងន់ទៅលើតែក្រុមជម្រើសជាតិពេញវ័យ បើទោះបីប្រភេទកីឡាខ្លះទើបនឹងមានក្រុមអត្តពលិកថ្នាលវ័យក្មេងក៏ដោយ ក៏ចំណេះដឹងជំនាញបង្ហាត់មិនទាន់ច្បាស់លាស់នៅឡើយ ក្នុងរយៈពេលមួយឆ្នាំពីរឆ្នាំកន្លងមកនេះ។
លោកបន្តថា៖ កិច្ចការជំនាញរឹង សហព័ន្ធកីឡាជាតិនីមួយៗត្រូវប្រាកដថាមន្រ្តីបច្ចេកទេស គ្រូបង្វឹក អាជ្ញាកណ្តាល ចៅក្រម ពិតជាបានឆ្លងកាត់ការបណ្តុះបណ្តាល និងការហាត់ហ្វឹកហ្វឺនពិតប្រាកដទើបមានលក្ខណៈរឹងមាំផ្នែកបច្ចេកទេសកីឡាជំនាញ។ ចំណែកឯកិច្ចការជំនាញទន់ សហព័ន្ធកីឡាជាតិនីមួយៗ ត្រូវប្រាកដថា ថ្នាក់ដឹកនាំពិតជាឈរលើទស្សនៈភាពជាអ្នកដឹកនាំ “Leadership” គ្រប់គ្រាន់ក្នុងការបង្កើតឱ្យមានសុខដុមនីយកម្មការងារកីឡារបស់ខ្លួន ដោយស្មារតីក្រុម “Team Spirit” ស្មារតីសហការ “Cooperation Spirit” ស្មារតីទទួលខុសត្រូវប្រកបដោយអភិបាលកិច្ចល្អ “Good Governance” ក្នុងកិច្ចការប្រចាំថ្ងៃរបស់សហព័ន្ធកីឡាជាតិនីមួយៗ។
លោកសង្កត់ធ្ងន់ថា៖ សម្រាប់ខ្លួនខ្ញុំផ្ទាល់សង្ឃឹមថា សិក្ខាសាលានេះនឹងអាចផ្ដល់នូវពុទ្ធិថ្មី បច្ចេកទេសថ្មី ឥរិយាបថដឹកនាំថ្មី ដល់សិក្ខាកាមទាំងអស់យកទៅបម្រើការងារសហព័ន្ធកីឡាជាតិរបស់ខ្លួនប្រកបដោយស្មារតីទទួលខុសត្រូវខ្ពស់ និងមានប្រសិទ្ធភាពឈានទៅរកឧត្តមភាពកីឡាជំនាញនីមួយៗនាការប្រកួតកីឡា SEAGames ឆ្នាំ ២០២៣ នៅកម្ពុជា។
គួរបញ្ជាក់ផងដែរថា វគ្គនេះ មានរយៈពេល ៤ថ្ងៃ គឺចាប់ពីថ្ងៃទី ៩ ដល់ថ្ងៃទី ១២ ខែឧសភា ឆ្នាំ ២០១៧ នៅទីស្នាក់ការNOCCផ្ទាល់៕
May 10, 2017