Category: សង្គម និងសេដ្ឋកិច្ច

  • Rooney បង្ហើបថា រូបគេអាចនឹងចេញពី Man Utd ពេលបញ្ចប់រដូវកាលនេះ

    Rooney បង្ហើបថា រូបគេអាចនឹងចេញពី Man Utd ពេលបញ្ចប់រដូវកាលនេះ

    Wayne Rooney បានបញ្ជាក់យ៉ាងច្បាស់ថា អាជីពរយៈពេល ១៣ឆ្នាំរបស់គេក្នុងក្លិប Manchester United នឹងត្រូវឈានដល់ទីបញ្ចប់នៅរដូវក្តៅនេះ ខណៈដែលខ្សែប្រយុទ្ធរូបនេះ បានទទួលស្គាល់ថា រូបគេត្រូវតែចាកចេញពីកីឡដ្ឋាន Old Trafford ដើម្បីមានឱកាសលេងការប្រកួតឲ្យបានកាន់តែច្រើន។

    Rooney បានបាត់បង់តំណែងក្នុងជម្រើសទាំង១១នាក់ដំបូងរបស់គេនៅរដូវកាលនេះ ហើយក៏ជួបការលំបាកក្នុងការធ្វើឲ្យខ្លួនគេផ្ទាល់ស្ថិតក្នុងបញ្ជីឈ្មោះរបស់ក្រុមដែលត្រូវបានជ្រើសរើសដោយលោក Jose Mourinho ដែលជាអ្នកចាត់ការទូទៅ ផងដែរ។
    នៅពេលដែលត្រូវបានចោទសួរអំពីរឿងអនាគត Rooney បានឆ្លើយថា៖ «តើខ្ញុំចង់បន្តនៅឬទេ? ខ្ញុំបានស្ថិតនៅជាមួយនឹងក្លិបនេះអស់រយៈពេល ១៣ឆ្នាំមកហើយ ប៉ុន្តែ ខ្ញុំចង់លេងកីឡាបាល់ទាត់។ នៅទីនេះឬ? ពិតណាស់! ខ្ញុំគិតថា កីឡាបាល់ទាត់មានការផ្លាស់ប្តូរ។ អ្នកមានជម្រើសផ្សេងគ្នាក្នុងអាជីពរបស់អ្នក។ នៅរដូវកាលនេះ ខ្ញុំមិនបានចូលលេងឲ្យបានច្រើនតាមដែលខ្ញុំចង់បានឡើយ»។ ខ្សែប្រយុទ្ធអន្តរជាតិអង់គ្លេសរូបនេះបានឲ្យដឹងថា៖ «ខ្ញុំបានព្យាយាមជួយក្រុមនេះទាំងនៅក្នុង និងក្រៅទីលានប្រកួត។ ខ្ញុំតែងតែផ្តោតអារម្មណ៍ក្នុងការលេង ប៉ុន្តែខ្ញុំជាកីឡាករបាល់ទាត់ម្នាក់ ហើយខ្ញុំចង់លេងកីឡាបាល់ទាត់។ ខ្ញុំលេងកាន់តែច្រើនប្រកួត ខ្ញុំកាន់តែមានកម្រិតលេងល្អឡើង ហើយខ្ញុំក៏មានអារម្មណ៍ថា បានជួយក្រុមកាន់តែច្រើនផងដែរ»។

    Rooney បានបន្ថែមទៀតថា៖ «ពិតណាស់ ខ្ញុំចង់លេង ខ្ញុំចង់លេងគ្រប់ការប្រកួតទាំងអស់។ ពេលខ្លះ ហ្នឹងហើយជាកីឡាបាល់ទាត់ ហើយខ្ញុំត្រូវតែរក្សាការខិតខំព្យាយាម និងដណ្តើមយកឱកាសរបស់ខ្ញុំ។ ពេលទទួលបានការកោះហៅ ខ្ញុំនឹងប្រឹងឲ្យអស់ពីសមត្ថភាពរបស់ខ្ញុំដើម្បីជួយដល់ក្រុមនេះ»៕
    ប្រភពពី៖ The Guardian

  • កម្មវិធីពានរង្វាន់បញ្ញវន្តពិភពលោកបើកទ្វារឱ្យកុមារកម្ពុជាប្រកួតសមត្ថភាពជាអន្តរជាតិ

    កម្មវិធីពានរង្វាន់បញ្ញវន្តពិភពលោកបើកទ្វារឱ្យកុមារកម្ពុជាប្រកួតសមត្ថភាពជាអន្តរជាតិ

    កម្មវិធីពានរង្វាន់បញ្ញវន្តពិភពលោក ជាកម្មវិធីដែលត្រូវបានបង្កើតឡើងនៅក្នុងឆ្នាំ 2017 នេះ ដែលកម្មវិធីនេះបានប្រមូលផ្តុំសិស្សានុសិស្សប្រមាណជាង 20,000 នាក់មកពី 50ប្រទេសក្នុងពិភពលោកដើម្បីធ្វើការប្រកួតប្រជែងជារៀងរាល់ឆ្នាំ។ គោលបំណងសំខាន់នៃកម្មវិធីប្រកួតពានរង្វាន់បញ្ញវន្តពិភពលោកនេះ គឺចង់ជំរុញឱ្យកុមារពីគ្រប់តំបន់ និងទីកន្លែងក្នុងពិភពលោកស្រឡាញ់ការសិក្សា មានទំនុកចិត្តលើខ្លួនឯង និងទទួលស្គាល់ករណីយកិច្ចរបស់ខ្លួនថាជាពលរដ្ឋសកល។


    ថ្មីៗនេះកម្មវិធីពានរង្វាន់បញ្ញវន្តពិភពលោក បានសហការជាមួយនឹងអង្គការ STEAM Cambodia បង្កើតកម្មវិធីនេះឡើងនៅកម្ពុជា ដើម្បីផ្តល់ឱកាសឱ្យសិស្សកម្ពុជាមានឱកាសប្រកួតប្រជែងជាលក្ខណៈសកល។ វិញ្ញាសាដែលនឹងត្រូវប្រកួតមាន 4 គឺ ការប្រកួតប្រជែងពិភាក្សា ការសរសេរដោយការសហការគ្នា ការប្រកួតប្រជែងបញ្ញា និងការប្រកួតឆ្លើយសំណួរ។ ហើយប្រធានបទនៃការស្រាវជ្រាវ គឺស្តីពីបច្ចេកវិទ្យាបញ្ជូនយានអវកាសទៅពិភពព្រះចន្ទ និងការព្យាករអាថ៌កំបាំងប្រវត្តិសាស្រ្តឆ្ពោះទៅរកវិទ្យាសាស្រ្ត និងសិល្បៈ។

    តាមរយៈកម្មវិធីនេះ កុមារកម្ពុជាដែលនឹងត្រូវក្លាយជាបញ្ញវន្តនឹងមានឱកាសបញ្ចេញសមត្ថភាពតាមជម្រើសរបស់ខ្លួនសម្រាប់ការប្រកួតនៅជុំអន្តរជាតិប្រចាំឆ្នាំ 2017 នៅទីក្រុងហាណូយ ទីក្រុងអាថែន ឬនៅទីក្រុងកាប់ថោន មុននឹងត្រូវបានជ្រើសរើសឱ្យទៅប្រកួតយកជើងឯកនៅសាកលវិទ្យាល័យ Yale University នៅសហរដ្ឋអាមេរិក។

    លក្ខខណ្ឌដែលអាចចូលរួមប្រកួតបានគឺ បេក្ខជនចាំបាច់មានអាយុចាប់ពី 10 ដល់ 14ឆ្នាំ សម្រាប់កម្រិតកុមារ និងចាប់ពីអាយុ 15ឆ្នាំឡើងទៅ សម្រាប់មនុស្សធំដែលនៅក្នុងនោះពួកគេត្រូវចាប់ក្រុម ដែលក្នុងមួយក្រុមៗមានសមាជិក 03នាក់៕

  • ក្រុមបាល់ទាត់នារីរបស់កម្ពុជាឈ្នះ សិង្ហបុរី ២-១ ខណៈល្ងាចនេះ បន្តប៉ះហ្វីលីពីន

    ក្រុមបាល់ទាត់នារីរបស់កម្ពុជាឈ្នះ សិង្ហបុរី ២-១ ខណៈល្ងាចនេះ បន្តប៉ះហ្វីលីពីន

    ក្រុមបាល់ទាត់នារីអាយុក្រោម១៥ឆ្នាំកម្ពុជា(U-15)បានប្រកួតឈ្នះក្រុមបាល់ទាត់នារីរបស់សិង្ហបុរី កាលពីសប្ដាហ៍មុនលើទឹកដីប្រទេសឡាវក្នុងព្រឹត្តិការណ៍បាល់ទាត់នារីជ្រើសរើសជើងឯកអាស៊ីអាគ្នេយ៍ AFF U15 Girls’ Championship 2017 នោះ នឹងបន្តប្រកួតដណ្ដើមយកពិន្ទុនាល្ងាចនេះបន្តទៀត។


    នេះគឺជាការប្រកួតទី២ក្នុងពូលB របស់ក្រុមU-15នារីកម្ពុជា និងក្រុមU-15នារីហ្វីលីពីន បន្ទាប់ពីក្រុមទាំងពីររកបាន៣ពិន្ទុរៀងៗខ្លួនកាលពីការប្រកួតទី១នាដើមសប្ដាហ៍កន្លងទៅ ក្នុងនោះក្រុមU-15នារីកម្ពុជា បានយកឈ្នះក្រុមបាល់ទាត់នារីសិង្ហបុរី ២-១ និងក្រុមU-15នារីហ្វីលីពីនបានលត់ក្រុមU-15នារីឥណ្ឌូនេស៊ី ២-០ ។

    តាមរយៈលទ្ធផលខាងលើ ក្រុមទាំងពីរសុទ្ធតែត្រូវការឈ្នះរៀងៗខ្លួនសម្រាប់ការប្រកួតទី២ល្ងាចនេះ ដើម្បីបង្កើនឱកាសប្រជែងកៅអីវគ្គពាក់កណ្ដាលផ្ដាច់ព្រ័ត្រពានរង្វាន់ AFF U15 Girls’ Championship 2017 ។ ហើយក្រៅពីជំនួបរវាងក្រុមទាំងពីនេះ ក្រុមU-15នារីឥណ្ឌូនេស៊ី និងសិង្ហបុរីក៏ត្រូវជួបគ្នានាល្ងាចថ្ងៃទី១១ ខែឧសភា ឆ្នាំ២០១៧នេះផងដែរ ៕

  • ហេតុផលដែលចេះតែអូសបន្លាយពេលរៀបការរបស់កញ្ញា វ៉ាន់ នីឡា កូនស្រីតាវ៉ិចទ័រ

    ហេតុផលដែលចេះតែអូសបន្លាយពេលរៀបការរបស់កញ្ញា វ៉ាន់ នីឡា កូនស្រីតាវ៉ិចទ័រ

    ភ្នំពេញៈ បើគិតមកដល់ពេលនេះតារាកំប្លែងរាងតូចច្រឡឹងកញ្ញា វ៉ាន់ នីឡា បានភ្ជាប់ពាក្យមួយគូស្នេហ៍កំលោះ ផន រង្សី ដែលជាកូនប្រុសរបស់លោក ភី សុគន្ធធី ចាងហ្វាងផលិតកម្ម ភីសុគន្ធធី អស់រយៈពេលជិតមួយឆ្នាំហើយ ប៉ុន្ដែមកដល់ពេលនេះហើយ នីឡា នៅតែមិនទាន់បង្ហើបពីដំណឹងថ្ងៃចូលរោងការទទួលពរជ័យសិរីមង្គលជាមួយគូដណ្ដឹងរូបសង្ហានៅឡើយ ទោះបីជាអ្នកទាំងពីរស្រឡាញ់ និង បានបណ្តើរគ្នាដោយភាពផ្អែមល្ហែមខ្លាំងដូចជាប្តីប្រពន្ធយ៉ាងណាក្តី។

    ការអូសបន្លាយពេលនេះត្រូវបានមហាជនមានការងឿងឆ្ងល់យ៉ាងខ្លាំង និងជជីកសួររកហេតុផលទៀត ដោយអ្នកលេងបណ្តាញសង្គមមួយចំនួនបានបញ្ចេញជាមតិសរសើរជូនពរឲ្យពួកគេចេះស្រឡាញ់គ្នា និងថែរក្សាគ្នាដល់ចាស់កោងខ្នង កុំឲ្យបែកបាក់ដូចតារាដទៃទៀត។ ក៏ប៉ុន្តែក៏មានមតិរិះគន់ដែរ ដោយអ្នកខ្លះបាននិយាយថា «ហេតុអ្វីចាំបាច់ ភ្ជាប់ពាក្យទាំងវ័យក្មេងបែបនេះ?» រីឯអ្នកខ្លះវិញបានពោលពាក្យថា «ខ្លាចកូនអត់មានស្វាមីមែនទេបានជាឆាប់រៀបចំទុកដាក់យ៉ាងនេះ?»។

    តបនឹងចម្ងល់ទស្សនិកជនជាច្រើនទាក់ទងនឹងពិធីមង្គលនេះ លោក សុវណ្ណ ឬទ្ធី ហៅតា វិចទ័រអ្នកដឹកនាំកម្មវិធីប្រចាំស្ថានីយទូរទស្សន៍ CTN ជាឪពុករបស់តារាកំប្លែងស្រីវ័យក្មេង វ៉ាន់ នីឡា បានបង្ហើបប្រាប់ថា៖ «ចំពោះគម្រោងរៀបការមិនទាន់ប្រញាប់ពេកទេអាចនៅយូរប្រមាណជា ២ ឆ្នាំទៀតឯណោះទើបគិតគូរ ព្រោះពេលនេះកូនខ្ញុំនាងនៅក្មេងពេក មិនទាន់អាចចេះកសាងសង្គមគ្រួសារបានល្អនោះឡើយ»។

    ខណៈកញ្ញា វ៉ាន់ នីឡា ក៏ធ្លាប់បានបញ្ជាក់ផងដែរទាក់ទងទៅនឹងភាពស្រពេចស្រពិលក្រោយពេលរៀបការរូចដែលថា តើកញ្ញា វ៉ាន់នីឡា នឹងបន្តការងារសិល្បៈដូចជាពេលបច្ចុប្បន្ននេះទៀតឬយ៉ាងណា ?។ ចំពោះភាពស្រពេចស្រពិលនេះ តារាកំប្លែងស្រីវ័យក្មេងដែលដុះពន្លកពីថ្នាលក្រុមកំប្លែងនាយពែកមី និងមានឪពុកបង្កើតជាអ្នកដឹកនាំកម្មវិធីនោះក៏ធ្លាប់បានបង្ហើបប្រាប់ដែរថា៖ «ទោះបីជាយ៉ាងណាក៏នាងខ្ញុំមិនបោះបង់ចោលសិល្បៈដែរ ព្រោះថានាងខ្ញុំស្រឡាញ់អាជីពមួយនេះខ្លាំងណាស់ ហើយក៏សូមអរគុណដល់អនាគតស្វាមីរបស់នាងខ្ញុំផងដែរ ដែលតែងតែយល់ដល់ការងាររបស់នាងខ្ញុំកន្លងមក។ ពេលវេលា ២ ឆ្នាំទៀតនេះ វាគ្រប់គ្រាន់ទាំងវ័យ និងភាពទទួលខុសត្រូវខ្ពស់ដែលអាចបង្កើតគ្រួសារថ្មីមួយប្រកបដោយសុភមង្គលបាន»។

    គួរបញ្ជាក់ដែរថា កាលពីភ្ជាប់ពាក្យនៅថ្ងៃទី១៩ ខែឧសភា ឆ្នាំ២០១៦ នោះ តារាកំប្លែង និង ជាអ្នកជំនួញវ័យក្មេងកញ្ញា វ៉ាន់ នីឡា មានវ័យ១៧ ឆ្នាំ ខណៈគូដណ្តឹងជាកូនប្រុសថៅកែចាងហ្វាងផលិតកម្មភីសុគន្ធីភាពយន្តឈ្មោះលោក ផន រង្សី មានវ័យ ២៤ ឆ្នាំ៕

  • ចំណេះដឹងអ្វីខ្លះដែលយុវជនគួរមាន ដើម្បីទទួលបានការងារល្អ?

    ចំណេះដឹងអ្វីខ្លះដែលយុវជនគួរមាន ដើម្បីទទួលបានការងារល្អ?

    អ្នកអប់រំជាច្រើនលើពិភពលោកបានរកឃើញថា ការអប់រំនៅក្នុងសាលាតែម្យ៉ាងមិនទាន់គ្រប់គ្រាន់ដើម្បីទទួលបានការងារធ្វើនៅក្នុងសង្គមមួយ ដែលកំពុងមានការអភិវឌ្ឍយ៉ាងលឿននាសតវត្សទី21 នេះនោះទេ។ វាជាសម័យបច្ចេកវិទ្យា និងការប្រកួតប្រជែងយ៉ាងស្រួចស្រាល់លើជំនាញការងារ និងការវិនិយោគជាដើម កត្តានេះធ្វើឱ្យអាជីពជាច្រើនបានកើតឡើង ជាមួយនឹងលក្ខខណ្ឌការងារដែលតម្រូវឱ្យសិស្ស និសិ្សតត្រូវតែបំពេញ។

    យោងតាមទិន្នន័យដែលបានបង្ហាញដោយទីប្រឹក្សានៃទីភ្នាក់ងារជាតិមុខរបរ និងការងារនៅកម្ពុជា លោកស្រី អ៊ូច ជាច័ន្ទមល្លិកា បានលើកឡើងក្នុងសិក្ខាសាលាស្តីពីការអប់រំ តម្រង់ទិសវិជ្ជាជីវៈថា តាមការស្រាវជ្រាវគេរកឃើញថា ជំនាញដែលបុគ្គលិកនៅកម្ពុជាកំពុងត្រូវការគឺមានដូចជា ជំនាញអនុវត្តន៍ជាក់ស្តែង 39.2% ជំនាញភាសាបរទេស 31.5% ជំនាញគ្រប់គ្រងអតិថិជន 17.5% ជំនាញដោះស្រាយបញ្ហា 15.4% ជំនាញបច្ចេកវិទ្យាព័ត៌មានកម្រិតខ្ពស់ ឬជំនាញ Software 14% ជំនាញបច្ចេកវិទ្យាព័ត៌មាន និងកុំព្យូទ័រមូលដ្ឋាន 19.6% ជំនាញទំនាក់ទំនងផ្ទាល់មាត់ 12.6% ជំនាញធ្វើការងារជាក្រុម 9.1% ជំនាញគម្រោង 7% ជំនាញទំនាក់ទំនងតាមរយៈការសរសេរ 5.6% ជំនាញរដ្ឋបាល 4.9% ជំនាញគិតលេខ 4.9% និងជំនាញយុទ្ធសាស្ត្រគ្រប់គ្រងចំនួន 3.5%។

    បន្ថែមពីលើនេះ លោក ស៊ាង សុបញ្ញា នាយកវិទ្យាស្ថានកម្ពុជា-អាស៊ាន បានលើកឡើងថា ដើម្បីក្លាយខ្លួនជាបុគ្គលដែលមានការងារធ្វើ និងកម្រិតសមត្ថភាពជាអន្តរជាតិ ពួកគេគួរតែមានជំនាញធំៗជាគោល 2 គឺជំនាញភាសាឱ្យច្បាស់ និងជំនាញបច្ចេកទេសឱ្យច្បាស់។ ភាពច្បាស់នៃជំនាញភាសានេះ គឺមិនមែនគ្រាន់តែអានបាន ឬនិយាយស្តាប់គ្នាបែបធម្មតាបាននោះទេ គឺចាំបាច់ត្រូវចេះច្បាស់លាស់អាចបកប្រែ ឬសរសេរលិខិតជាផ្លូវការបានដោយរលូន។ នៅពេលដែលយើងអាចយល់ច្បាស់ពីភាសាហើយ យើងនឹងមានទុនមួយសម្រាប់ការស្រាវជ្រាវជាសកល ដើម្បីឈានទៅដល់ភាពជាអ្នកជំនាញដែលមានគុណភាពក្នុងការគិត និងអនុវត្តន៍ខ្ពស់។

    នាយកវិទ្យាស្ថានខាងលើបានលើកឡើងផងដែរថា ចំពោះជំនាញបច្ចេកទេសវិញ ក៏ជាជំនាញចាំបាច់មួយផងដែរ ព្រោះនាពេលបច្ចុប្បន្ននេះ អាស៊ានបានបើកចំហនូវអាជីពមួយចំនួនដើម្បីឱ្យប្រជាជននៅក្នុងប្រទេសដែលជាសមាជិកទាំងអស់ មានឱកាសស្វែងរកការងារធ្វើនៅក្នុងប្រទេសទាំង 10នោះ។ ប្រសិនបើយើងមានជំនាញច្បាស់លាស់ ហើយចេះប្រើភាសាច្បាស់លាស់ យើងនឹងអាចឈោងចាប់ទីផ្សារការងារនៅបរទេស មិនមែនប្រកួតប្រជែងតែនៅក្នុងប្រទេសកម្ពុជាប៉ុណ្ណោះទេ។

    បញ្ហារបស់យុវជនកម្ពុជានាពេលបច្ចុប្បន្ន គឺពួកគេមិនទាន់មានជំនាញទី2 នេះច្បាស់នៅឡើយ ដែលវាធ្វើឱ្យពួកគេមិនមានភាពរឹងមាំ ឬមានភាពស្ទាក់ស្ទើរមិនច្បាស់លាស់៕

  • អាជីវកម្មតម្បាញសូត្រផ្តល់ការងារដល់ពលរដ្ឋខ្មែរ 2ម៉ឺននាក់

    អាជីវកម្មតម្បាញសូត្រផ្តល់ការងារដល់ពលរដ្ឋខ្មែរ 2ម៉ឺននាក់

    នៅក្នុងប្រទេសកម្ពុជា សូត្រត្រូវបានចាត់ទុកជាផលិតផលអាទិភាពដែលមានសក្តានុពលនាំចេញដូចបានកំណត់នៅក្នុងយុទ្ធសាស្ត្រសមាហរណកម្មពាណិជ្ជកម្មកម្ពុជា CTIS ដែលបានផ្តល់ការងារ និងប្រាក់ចំណូលជូនអ្នកតម្បាញដែលជាស្ត្រីភាគច្រើននៅជនបទប្រមាណជា ២ម៉ឺននាក់នេះបើតាមរបាយការណ៍ក្រសួងពាណិជ្ជកម្ម ។

    ដើម្បីលើកកម្ពស់វិស័យសូត្រនៅកម្ពុជាឱ្យមានសកម្មភាពរស់រវើក ក្រសួងពាណិជ្ជកម្មកម្ពុជាបានជួបពិភាក្សាជាមួយសហព័ន្ធសូត្រអន្តរជាតិនៃប្រទេសចិន ដើម្បីផ្តល់ឱកាសជូនតំណាងក្រុមហ៊ុនសូត្រកម្ពុជា និងចិនធ្វើការផ្លាស់ប្តូរព័ត៌មាន និងដកស្រង់បទពិសោធល្អៗពីគ្នាទៅវិញទៅមក សំដៅជំរុញការអភិវឌ្ឍវិស័យសូត្រប្រណីតរបស់កម្ពុជាឱ្យកាន់តែប្រសើរឡើង។

    ឯកឧត្តម ប៉ាន សូរស័ក្តិ មានប្រសាសន៍ថា ក្រសួងពាណិជ្ជកម្មបានខិតខំប្រឹងប្រែងក្នុងការអភិវឌ្ឍវិស័យសូត្រប្រណីតតាមរយៈគម្រោងពិពិធកម្ម និងពង្រីកការនាំចេញដំណាក់កាលទី1 (CEDEP 1) នៃកម្មវិធីពង្រឹងក្របខ័ណ្ឌសមាហរណកម្ម (EIF) និងការបង្កើតគណៈកម្មការសូត្រជាតិជាមួយយុទ្ធសាស្ត្រអភិវឌ្ឍន៍សូត្រជាតិ ឆ្នាំ 2016-2020 “គម្រោងនេះបានជួយពង្រឹងសមត្ថភាពផលិតករសូត្រកម្ពុជាទាក់ទិននឹងវិធីសាស្ត្រពិនិត្យគុណភាពសរសៃសូត្រ ការរចនាម៉ូដផលិតផល ការរៀបចំផែនការ និងយុទ្ធសាស្ត្រទីផ្សារ ការទំនាក់ទំនងជាមួយអតិថិជន ការដោះស្រាយបញ្ហាផ្នែកបញ្ជាទិញ និងការចូលរួមពិព័រណ៍ពាណិជ្ជកម្មអន្តរជាតិ”។

    ឯកឧត្តមបន្តថា បច្ចុប្បន្នគណៈកម្មការសូត្រជាតិរបស់កម្ពុជាកំពុងប្រើប្រាស់យុទ្ធសាស្ត្រនេះធ្វើជាផែនទីបង្ហាញផ្លូវដើម្បីកៀងគរជំនួយហិរញ្ញវត្ថុ និងបច្ចេកទេសបន្ថែមពីលេខាធិការដ្ឋាន EIF និងដៃគូអភិវឌ្ឍន៍អន្តរជាតិផ្សេងៗ សំដៅអភិវឌ្ឍចង្វាក់តម្លៃសូត្រប្រណីតរបស់កម្ពុជា និងគាំទ្រប្រតិបត្តិការរបស់ក្រុមហ៊ុនផលិតសូត្រទាំង14នៅកម្ពុជា។

    យោងតាមរបាយការណ៍របស់មជ្ឈមណ្ឌលពាណិជ្ជកម្មអន្តរជាតិ (ITC) បានឲ្យដឹងថា ការផលិតវត្ថុធាតុដើមពីសូត្រក្នុងមួយឆ្នាំ គិតជាមធ្យមមានចំនួន 80ពាន់តោន ហើយនៅក្នុងនោះសរសៃសូត្រជាង 70% មានប្រភពមកពីប្រទសចិន។ ពាណិជ្ជកម្មសូត្រសកល ត្រូវបានគេប៉ាន់ស្មានថា មានតម្លៃប្រមាណជា 25ពាន់លានដុល្លារ។៕

  • ភិន សុដាលី ប្រាប់ពីបទពិសោធ និងផលលំបាកខ្លះៗនៃការថែទាំកូនស្រីម្នាក់ មុនទិវាមាតាអន្តរជាតិ

    ភិន សុដាលី ប្រាប់ពីបទពិសោធ និងផលលំបាកខ្លះៗនៃការថែទាំកូនស្រីម្នាក់ មុនទិវាមាតាអន្តរជាតិ

    ភ្នំពេញៈ ខណៈទិវាមាតាអន្តរជាតិកាន់តែខិតជិតមកដល់សម្រាប់ឆ្នាំ២០១៧ នេះ ស្រាប់តែគេឃើញតារាសម្តែងស្រីមេម៉ាយកូនមួយក្តៅស្រួយ សម្រស់ផូរផង់មិនចាញ់ក្រមុំ អ្នកនាង ភិន សុដាលីស អតីតជាភរិយាមិនបានរៀបការរបស់តារាសម្តែងប្រុស និងជាពិធីករទូរទស្សន៍លោក ប៉ែន ចំរ៉ុង ដោយពួកគេសម្រេចត្រឹមចុះអេតាស៊ីវិលភ្លាមៗនោះ បានបង្ហោះសារចែករំលែកក្តីស្រឡាញ់ និងចែករំលែកបទពិសោធខ្លះៗក្រោយពីបានក្លាយជាម្តាយរបស់កូនស្រីខ្លួនឈ្មោះ ភិន សុខេធើរីណា ដែលមានវ័យ ៧ ខែហើយ។

    អ្នកនាង ភិន សុដាលីស បានប្រាប់ឲ្យដឹងក្នុងបទសម្ភាសមួយថា៖ «នៅក្នុងទិវាមាតាអន្តរជាតិនេះ ក្នុងនាមជាម្តាយម្នាក់ និងជាសិល្បការិនីមួយរូបផងដែរនោះ នាងខ្ញុំពិតជាបានជួបការលំបាកជាច្រើន ប៉ុន្តែក្នុងនោះក៏មានពេលវេលាសប្បាយចិត្ត និងសុភមង្គលលាយឡំជាមួយគ្នាដែរ។ ជារៀងរាល់ពេលមុនចេញទៅថត ខ្ញុំមានកាតព្វកិច្ចជាម្ដាយដែលត្រូវបំពេញដូចជា នៅពេលព្រឹកក្រោយក្រោកពីគេង នាងខ្ញុំតែងតែទៅប្រឡែងលេងជាមួយកូនស្រីសំណព្វចិត្តសិន បន្ទាប់មកទើបធ្វើការបំបៅទឹកដោះគោ រួចទើបយកកូនស្រីទៅងូតទឹកសម្អាតខ្លួន ក្រោយមកទៀតក៏ធ្វើការបំបៅលើកទីពីរ រួចទើបដាក់ឲ្យគេគេងវិញ»។

    កូនស្រីដ៏ស្រស់ស្អាតរបស់អ្នកនាង ភិន សុដាលីស ឈ្មោះ ភិន សុខេធើរីណា ហៅក្រៅថា ខេត មានវ័យ ៧ ខែហើយ ខណៈទារិកានេះបានកើតនៅវេលាម៉ោង ៤ និង ៤២ នាទី ល្ងាចនៃថ្ងៃទី ៦ ខែតុលា ឆ្នាំ ២០១៦។ ចំណែកឯសាលក្រមលែងលះដែលបានចេញដោយចៅក្រមសាលាដំបូងកាលពីល្ងាចថ្ងៃទី ២០ ខែកក្កដា ឆ្នាំ២០១៦ បានបញ្ចប់បដិវត្តន៍ស្នេហារបស់គូស្នេហ៍ជាតួអង្គទុំទាវសម័យទំនើបនាសតវត្សរ៍ទី ២១ គឺលោក ប៉ែន ចំរ៉ុង និងអ្នកនាង ភិន សុដាលីស ដែលកាលពីពេលមុននេះពួកគេបានខិតខំពុះពារជម្នះរនាំងប្រពៃណី «នំមិនធំជាងនាឡិ» តែមិនបានយូរប៉ុន្មានក៏ផ្ដាច់និស្ស័យស្នេហ៍តាមផ្លូវច្បាប់ទៅ វិញ៕

  • ទិន្នន័យក្នុង iCloud មិនប្រាកដថាសំខាន់ទាំងអស់នោះទេ ចុះបើចង់លុបចោលខ្លះ ត្រូវចូលតាមណា?

    ទិន្នន័យក្នុង iCloud មិនប្រាកដថាសំខាន់ទាំងអស់នោះទេ ចុះបើចង់លុបចោលខ្លះ ត្រូវចូលតាមណា?

    ជាក់ច្បាស់ណាស់ថា រាល់ទិន្នន័យដែលលោកអ្នកបានធ្វើការ Backup ទៅដាក់ក្នុង iCloud គឺសុទ្ធតែសំខាន់ ប៉ុន្តែបើពេលវេលាកន្លងហួសទៅយូរ ឬលោកអ្នកដែលមានទូរស័ព្ទប្រើច្រើន និងមានការ Backup ច្រើនដូចគ្នា ធ្វើឱ្យឯកសារខ្លះក៏លែងសូវសំខាន់ ឬលែងមានប្រយោជន៍តទៅទៀត។ ដូច្នេះ លោកអ្នកប្រហែលជាចង់លុបវាចេញខ្លះ ដើម្បីរក្សាទំហំផ្ទុកឱ្យទំនេរខ្លះ សម្រាប់ទុកដាក់អ្វីៗផ្សេងទៀត កុំឱ្យចង្អៀតពេញឥតបានការ។ ខាងក្រោមនេះ ជាវិធីក្នុងការលុបទិន្នន័យចាស់ៗចោលនៅក្នុង iCloud ដែលលោកអ្នកគិតថា លែងចង់ទុកនៅតទៅទៀត។

    1. មុនដំបូង សូមចូលទៅកាន់ Settings -> General
    2. បន្ទាប់មក Storage & iCloud Usage
    3. បន្ទាប់មកទៀត ចុចលើ Manage Storage
    4. រួចចុចលើឈ្មោះទូរស័ព្ទ iPhone ឬ iPad
    5. ចុងក្រោយ ចុចលើ Delete Backup ហើយចុចលើ Turn Off & Delete

    សូមបញ្ជាក់ថា៖ ការដែលចូលទៅលុប Backup លើ iCloud នេះ សូមឱ្យប្រាកដក្នុងចិត្តថា វាជាទិន្នន័យដែលមិនសំខាន់ ព្រោះបើមិនដូច្នោះទេ យើងមិនអាចយកវាត្រឡប់មកវិញបានទេ៕
    ប្រភព៖ idownloadblog

  • Sanchez ជួយឲ្យក្រុមកាំភ្លើងធំ Arsenal ស្ថិតក្នុងការប្រជែងតំណែងកំពូលទាំង៤

    Sanchez ជួយឲ្យក្រុមកាំភ្លើងធំ Arsenal ស្ថិតក្នុងការប្រជែងតំណែងកំពូលទាំង៤

    ខ្សែបម្រើប្រយុទ្ធ Alexis Sanchez បានធ្វើឲ្យក្រុមកាំភ្លើងធំ Arsenal ស្ថិតក្នុងការប្រជែងសម្រាប់តំណែងកំពូលទាំង៤នៅលើតារាងនៃក្របខ័ណ្ឌ Premier League តាមរយៈការដណ្តើមបានជ័យជម្នះជាលើកទី១របស់ពួកគេនៅលើទឹកដីក្រុម Southampton ក្នុងរយៈពេល១៤ឆ្នាំ ក្រោយពីកត់ត្រាជ័យជម្នះក្នុងលទ្ធផល ២-០ កាលពីថ្ងៃពុធម្សិលមិញ។

    ខ្សែបម្រើប្រយុទ្ធអន្តរជាតិសញ្ជាតិស៊ីលីវ័យ២៨ឆ្នាំរូបនេះ បានទម្លុះតំបន់ខ្សែបម្រើរបស់ក្រុម Southampton មុនពេលស៊ុតបាល់បំប៉ោងសំណាញ់ទីនៅនាទី ទី៣០។ គ្រាប់បាល់បញ្ចូលទីនេះ បានធ្វើឲ្យរូបគេក្លាយជាកីឡាកររបស់ក្រុម Arsenal ដំបូងគេដែលស៊ុតបាល់បញ្ចូលទីបាន២០គ្រាប់ក្នុងរដូវកាលមួយ បើគិតចាប់តាំងពីខ្សែប្រយុទ្ធ Robin van Persie រកគ្រាប់បាល់បញ្ចូលទីសរុបបានក្នុងចំនួននេះដូចគ្នាដែរកាលពី៥ឆ្នាំមុន។

    ខ្សែប្រយុទ្ធ Olivier Giroud បានចូលលេងក្នុងនាមជាកីឡាករបម្រុង ក្នុងតង់ទី២ ដើម្បីបំពេញការទទួលជ័យជម្នះរបស់ក្រុមតាមរយៈការតែតបាល់បញ្ចូលទីយ៉ាងល្អនៅនាទី ទី៨៣។ ការទទួលជ័យជម្នះនេះ មានន័យថា ក្រុមរបស់លោក Arsene Wenger ដេញតាមពីក្រោយក្រុមឈរលេខ៤ Manchester City តែ ៣ពិន្ទុប៉ុណ្ណោះ ក្រោយពីបានប្រកួតក្នុងចំនួនស្មើគ្នា និង៤ពិន្ទុតាមពីក្រោយក្រុមលេខ៣ គឺ Liverpool ខណៈដែលនៅសល់មួយប្រកួតទៀតក្នុងដៃ។ បច្ចុប្បន្នក្រុម Arsenal នឹងត្រូវធ្វើដំណើរទៅជួបក្រុម Stoke នៅថ្ងៃសៅរ៍នេះ មុនពេលបញ្ចប់យុទ្ធនាការលីករបស់ពួកគេជាមួយនឹងការប្រកួតលើទឹកដីខ្លួនឯងជាមួយនឹងក្រុម Sunderland និង Everton។

    លោក Wenger អ្នកចាត់ការទូទៅរបស់ក្រុម Arsenal បានឲ្យដឹងថា៖ «យើងបានផ្តោតអារម្មណ៍ ហើយខ្ញុំមានអារម្មណ៍ថា នៅពេលដែលយើងរងនូវការខកចិត្ត យើងបានស្ថិតនៅជាមួយគ្នា»។ គ្រូបង្វឹកសញ្ជាតិបារាំងរូបនេះបានបន្ថែមទៀតថា៖ «យើងបានការពារមិនឲ្យមានគ្រាប់បាល់ចូលទីរបស់យើងបានមួយប្រកួតទៀតហើយ និងខ្ញុំដឹងថា យើងអាចធ្វើដំណើរឆ្ពោះទៅមុខ និងរកគ្រាប់បាល់បញ្ចូលទីបានទៀត។ ក្រុមទាំងមូលពិតជាមានថាមពល មានការផ្តោតអារម្មណ៍ និងបានបង្ហាញពីការស្រេកឃ្លានដ៏គួរឲ្យជឿជាក់ក្នុងការឈ្នះការប្រកួតនេះ»៕

    https://www.youtube.com/watch?v=VembzbJU9Xo
    ប្រភពពី៖ Mirror

  • សាច់ក្រក​ចម្រុះ​ជាតិ​សាសន៍

    សាច់ក្រក​ចម្រុះ​ជាតិ​សាសន៍

    សាក​ចំណាយពេល​គិត​បន្តិច​ទៅ​មើលថា គ្រាន់តែ​សាច់ក្រក​ចៀនធម្មតាៗតែមួយ​មុខ​មាន​រសជាតិ​ឈ្ងុយឆ្ងាញ់ អាច​ទាក់ទាញ​ចិត្តបាន​មិនតិច​ទៅហើយ ចុះ​ទម្រាំ​បានទទួល​ទាន​សាច់ក្រក​ចម្រុះជាតិ​សាសន៍​មកពី​ច្រើន​តំបន់ផ្សេងៗគ្នា​ស្ថិតនៅលើ​ផ្ទៃ​ចាន​តែមួយ តើ​មាន​ភាព​អស្ចារ្យ​ដល់​កម្រិតណាទៅ​ហ្ន៎! តោះ… កុំ​នៅ​ស្មាន​ទៀត​អី បើ​ចង់ដឹង​កាន់តែច្បាស់​លោកអ្នក​អាច​ទៅកាន់​ភោជនីយដ្ឋាន Cowboy ដែលមាន​ស្ថិតនៅតាម​បណ្តោយ​ផ្លូវ​ប៉ាស្ទ័រ កែង​ផ្លូវ​លេខ242 ខណ្ឌដូនពេញ រាជធានី​ភ្នំពេញ​បាន ឬក៏​អាច​សាកល្បង​ចម្អិន​នៅផ្ទះ​បាន​ដោយ​ខ្លួនឯង ដោយ​គ្រាន់តែ​ធ្វើតាម​ការណែនាំ​ដូចខាងក្រោម​នេះ។

    + គ្រឿងផ្សំ
    * សាច់ក្រក​អ៊ីតា​លី
    * សាច់ក្រក​ប្រា​វឺ​ស
    * សាច់ក្រក​សាច់ជ្រូក​ចំហុយ​ផ្សែង
    * សាច់ក្រក​អាល្លឺម៉ង់
    * ខ្ទឹមបារាំង
    * ដំឡូងបារាំង​តូច
    * ម៉ា​ស្តា​ត​ម៉ដ្ឋ

    + វិធី​ធ្វើ
    យក​សាច់ក្រក​ទាំងអស់​ទៅ​អាំង លើកលែងតែ​សាច់ក្រក​អាល្លឺម៉ង់ ដែល​ត្រូវ​យកទៅ​ស្ងោរ។ ដោយឡែក ចំពោះ​ខ្ទឹមបារាំង និង​ដំឡូងបារាំង​តូច ត្រូវ​យកទៅ​ឆា​ជាមួយ​ប៊័រ​ឱ្យ​ឆ្អិន​ល្អ​ជាការ​ស្រេច៕