Category: សង្គម និងសេដ្ឋកិច្ច

លោក Conte ប្រាប់ឲ្យ Chelsea ផ្តោតលើការលើកពានពេលប៉ះ West Brom រាត្រីនេះ
លោក Antonio Conte គ្រូបង្វឹករបស់ Chelsea បានច្រានចោលពាក្យចចាមអារ៉ាមផ្សេងៗដែលថា លោកត្រូវបានគេទាក់ទងឲ្យផ្ទេរទៅដឹកនាំក្លិប Inter Milan ខណៈដែលក្រុមរបស់លោកកំពុងតែត្រៀមសម្រាប់ការប្រកួតនៅលើទឹកដីក្រុម West Bromwich Albion នៅរាត្រីនេះ និងបើសិនដណ្តើមបានជ័យជម្នះ នឹងធ្វើឲ្យក្រុមតោខៀវ ឈ្នះពានក្របខ័ណ្ឌ Premier League តែម្តង។ ការដណ្តើមបានជ័យជម្នះនៅកីឡដ្ឋាន The Hawthorns នឹងធ្វើឲ្យក្រុម Chelsea ក្លាយជាម្ចាស់ជើងឯកក្នុងរដូវកាលជាលើកទី១របស់លោក Conte ក្នុងនាមជាគ្រូបង្វឹករបស់ក្លិបស្ថិតក្នុងទីក្រុងឡុងដ៍មួយនេះ ក៏ដូចជាធ្វើឲ្យពួកគេស្ថិតលើផ្លូវឆ្ពោះទៅកាន់ការឈ្នះពានពីរក្នុងរដូវកាលតែមួយ ខណៈដែល Chelsea ក៏ត្រូវប៉ះជាមួយនឹងក្រុម Arsenal ក្នុងពាន FA Cup វគ្គផ្តាច់ព្រ័ត្រ ផងដែរ។
Chelsea កំពុងនាំមុខ៧ពិន្ទុដាច់លើក្រុមឈរលេខ២ Tottenham Hotspurs និងត្រូវការត្រឹមតែ៣ពិន្ទុទៀតប៉ុណ្ណោះពីការប្រកួតក្នុងលីក៣ប្រកួតចុងក្រោយរបស់ពួកគេ នៅរដូវកាលនេះ ដើម្បីឈ្នះពាន Premier League។ ប៉ុន្តែបើទោះបីលោក Conte បានជួបលទ្ធផលយ៉ាងល្អឥតខ្ចោះនៅឯកីឡដ្ឋាន Stamford Bridge ក៏ដោយ ក៏វានៅតែមាននូវពាក្យចចាមអារ៉ាមផ្សេងៗថា លោក អាចនឹងវិលទៅកាន់ប្រទេសអ៊ីតាលីរបស់លោកវិញ។ គ្រូបង្វឹករូបនេះត្រូវបានគេទាក់ទងឲ្យទៅដឹកនាំក្លិប Inter ចាប់តាំងពីក្លិបយក្សរបស់អ៊ីតាលីមួយនេះបានបណ្តេញលោក Stefano Pioli ចេញពីតំណែងកាលពីដើមរដូវកាលនេះ។ លោក Conte បានឲ្យដឹងកាលពីថ្ងៃព្រហស្បតិ៍ថា៖ «ខ្ញុំនៅសល់រយៈពេល២ឆ្នាំទៀតក្នុងកិច្ចសន្យារបស់ខ្ញុំជាមួយនឹង Chelsea។ វាពិតជារឿងដ៏ត្រឹមត្រូវណាស់ នៅពេលដែលអ្នកចាប់ផ្តើមធ្វើការជាមួយនឹងក្លិបថ្មីមួយ ហើយឆន្ទៈរបស់អ្នកគឺការបន្តធ្វើការងារនេះ និងបង្កើនការងាររបស់ពួកគេឲ្យបានច្រើនឆ្នាំ។ ពិតណាស់ នេះគឺជាឆន្ទៈរបស់ខ្ញុំ»។ គោលដៅជាអាទិភាពនៅពេលនេះ គឺការឈ្នះពាន Premier League ហើយការរងបរាជ័យរបស់ក្រុមមាន់ខ្នាយមាស Tottenham Hotspur នៅលើទឹកដីក្រុម West Ham United កាលពីសប្តាហ៍មុន ស្របពេលដែលក្រុម Chelsea បានយកឈ្នះលើក្រុម Middlesbrough កាលពីថ្ងៃចន្ទ បានកាត់បន្ថយសម្ពាធក្នុងការប្រជែងពានតែម្តង។
Chelsea នឹងឈានទៅកាន់ការប្រកួតនេះ ក្រោយពីឈ្នះដល់ទៅ៤លើកជាប់ៗគ្នា និងចាញ់តែមួយលើកគត់ពីការប្រកួត៥លើកចុងក្រោយរបស់ពួកគេ។ ការប្រកួតនេះនឹងចាប់ផ្តើមនៅម៉ោង២ទៀបភ្លឺ៕
ប្រភពពី៖ Sports.yahoo
May 12, 2017
ការអភិវឌ្ឍអគារប៊ូលឌីង-ស បានចាប់ផ្ដើមចេញដំណើរការហើយដោយមិនរង់ចាំអ្នកបដិសេធទេ
កាលពីព្រឹកមិញនេះអាជ្ញាធរនៃក្រសួងរៀបចំដែនដីនគរូបនីយកម្ម និងសំណង់បានជួបជាមួយប្រជាពលរដ្ឋដែលរស់នៅក្នុង”អគារប៊ូលឌីង-ស” ដើម្បីជជែកចរចារកដំណោះស្រាយបញ្ចប់បញ្ហា បន្ទាប់ពីការជួបជជែកគ្នាចរចាលើតម្លៃលក់លើកទី1ពុំបានសម្រេចម្តងរួចមក។
ប្រជាពលរដ្ឋទាំង 493គ្រួសារដែលរស់នៅលើ «អគារប៊ូលឌីង-ស» បានជួបជាមួយឯកឧត្ដមជា សុផារ៉ា ទេសរដ្ឋមន្ដ្រី រដ្ឋមន្រី្ដក្រសួងរៀបចំដែនដីនគរូបនីយកម្មនិងសំណង់ ដើម្បីជជែករកដំណោះស្រាយបញ្ចប់បញ្ហាឈានទៅដល់ការអភិវឌ្ឍអគារប៊ូលឌីង-ស។ ក្រោយពីមានការលើកឡើងនូវហេតុផលជាច្រើនពីសំណាក់ប្រជាពលរដ្ឋ និងអ្នកវិនិយោគរួចមក ជាលទ្ធផលត្រូវបានប្រជាជនប្រមាណជាង 90%ទទួលយកការទិញកម្មសិទ្ធិឯកជននៅក្នុងអគារដ៏ចាស់មួយនេះក្នុងតម្លៃ 1400ដុល្លារអាមេរិកក្នុងមួយម៉ែត្រការ៉េដោយគិតទៅលើចំនួនការ៉េនៅក្នុងមួយយូនីត។ ទោះជាយ៉ាងនេះក្ដី ក៏គេសង្កេតឃើញថា នៅមានប្រជាពលរដ្ឋមួយចំនួនបានអះអាងថា ពួកគេពុំយល់ព្រមលក់កម្មសិទ្ធិឯកជនរបស់ខ្លួនក្នុងតម្លៃនោះឡើយ។
ទោះជាយ៉ាងណា ដើម្បីឈានទៅដល់ការបញ្ចប់បញ្ហា អាជ្ញាធរបានសម្រេចអោយអ្នកដែលយល់ព្រមលក់កម្មសិទ្ធិឯកជនរបស់ខ្លួនចាប់ផ្ដើមធ្វើកិច្ចសន្យាយល់ព្រមលក់ ដើម្បីទទួលបានប្រាក់នៅថ្ងៃទី06 ខែមិថុនា ឆ្នាំ2017។
ឯកឧត្ដមជា សុផារ៉ា ទេសរដ្ឋមន្ដ្រី រដ្ឋមន្រី្ដក្រសួងរៀបចំដែនដីនគរូបនីយកម្ម និងសំណង់ បានលើកឡើងថា លោកមានសេចក្ដីរីករាយដោយសារតែសង្កេតឃើញមានប្រជាជនជាច្រើនសប្បាយចិត្ដជាមួយនឹងដំណោះស្រាយនេះ ដោយពួកគាត់យល់ព្រមទទួលយកនូវការទិញក្នុងតម្លៃ 1400ដុល្លារក្នុងមួយម៉ែត្រការ៉េ។ ឯកឧត្ដមបន្ដថា បន្ទាប់ពីដំណើរការងារតាមនីតិវិធីនៃការទិញ-លក់អស់ហើយ ក្រុមការងារនឹងចាប់ផ្ដើមធ្វើការងារនេះចាប់ពីថ្ងៃទី06 ខែមិថុនា ដល់ថ្ងៃទី06 ខែកក្កដា ឆ្នាំ2017។
ក្នុងនោះខាងក្រុមហ៊ុនក៏នឹងជួយសម្រួលតម្លៃដឹកជញ្ជូនឥវ៉ាន់ដល់ប្រជាពលរដ្ឋនៅពេលដែលពួកគាត់រើឥវ៉ាន់ចេញពីអគារនោះចំនួន ១០០ដុល្លារទៀតផង។
ជាមួយគ្នានេះរដ្ឋមន្រី្ដក្រសួងរៀបចំដែនដីនគរូបនីយកម្ម និងសំណង់ បានបញ្ជាក់ថា៖ «ចំពោះអ្នកដែលមិនទាន់ឯកភាព យើងមិនទាន់ច្បាស់ថាត្រូវធ្វើយ៉ាងណានោះទេ? ប៉ុន្ដែពេលខ្លះគាត់អាចនឹងយល់ព្រមហើយ តែគាត់ចេះតែនិយាយអ៊ីចឹងទៅ និងអ្វីដែលសំខាន់ គឺយើងរង់ចាំមើលតាមស្ថានភាពជាក់ស្ដែង»៕
May 12, 2017
តារាសម្តែងពន្លកថ្មីកញ្ញា សាឡាត់ ស្រីឡាង រំពឹងកុនភាគនៅ CTN មានប្រិយមិត្តគាំទ្រច្រើន
ភ្នំពេញៈ ក្រោយពីមានឱកាសចាប់យកការថតកុនទាំងរឿងដុំ និងសម្តែង MV នានាជាហូរហែមកនោះ រាសីរបស់តារាសម្តែងស្រីវ័យក្មេងជារលកក្រោយដែលឈានជើងចូលទៅប្រឡូកវិស័យសិល្បៈភាពយន្តកញ្ញា សាឡាត់ ស្រឡាង ក៏ស្រាប់តែទទួលបានលាភផ្សេងមួយទៀតគឺការថតកុនភាគរឿង «ទីបញ្ជប់នៃស្នេហ៍» របស់ផលិតកម្ម LD Picture ដែលនឹងត្រូវចាក់បញ្ចាំងនៅលើកញ្ចក់ទូរទស្សន៍ CTN ក្រៅពីកុនភាគរឿង «មន្តស្នេហ៍ក្រមុំបាយឆា» របស់ទូរទស្សន៍ PNN ហើយនោះ។
នាពេលថ្មីៗនេះ កញ្ញា សាឡាត់ ស្រីឡាង ដែលមានរូបរាងស្ល៊ីម ទម្ងន់ ៥០ គីឡូ និងកម្ពស់១.៧០ ម៉ែត្រ ទទួលបានការគាំទ្រខ្លាំងពីប្រិយមិត្តអ្នកទស្សនាភាពយន្តភាគរឿង «មន្តស្នេហ៍ក្រមុំបាយឆា» របស់ទូរទស្សន៍ PNN និងរឿងដុំទើបតែចាក់បញ្ចាំងតាមរោងកុននានាគឺរឿង «ជួបស៊យ» ដែលជាភាពយន្តនិពន្ធ និងដឹកនាំសម្តែងដោយតារាកំប្លែង នាយ គ្រឿន ដែលមានតួសម្តែងជាច្រើនដូចជាកញ្ញា គៀត សុវណ្ណឡាង លោក ជា សុវណ្ណនរាហ៍ លោក ងួន សុបិន្ត អ្នកនាង ខ្ញុង អ្នកនាង ប៉ែន សុផានី លោក ទេព រិនដារ៉ូ នាយ ពែក មី ឌីជេ ប៊ីក ឌីជេ កាកា និងនាយ ក្រូច។
កញ្ញា សាឡាត់ ស្រីឡាង បានប្រាប់ពីអារម្មណ៍របស់ខ្លួន និងក្តីរំពឹងសម្រាប់បទពិសោធថ្មីនាពេលសម្តែងកុនជួបជាមួយនឹងតួប្រុសរូបសង្ហាក្នុងរឿង «ទីបញ្ជប់នៃស្នេហ៍» ឲ្យឡារ៉ែនដឹងថា៖ «នេះជាលើកទីមួយ ដែលបានសម្តែងរួមគ្នា និងមានអារម្មណ៍រំភើបចិត្តខ្លាំងទៅតាមសាច់រឿង ជាមួយនឹងតួប្រុសរូបសង្ហា។ហើយការសម្តែងជាមួយគាត់លើកទីមួយនេះដែរ ក៏សង្ឃឹមថានឹងទទួលបានការគាំទ្រពីបងប្អូនទាំងអស់គ្នា និងអរគុណទុកជាមុនសម្រាប់ការគាំទ្ររឿងនេះ។ ទីបព្ចាប់នៃស្នេហ៍ មានចាក់បញ្ចាំងនៅទូរទស្សន៍ CTN ដែលនេះជាវណ្ណកម្មរបស់ផលិតម្ម LD Picture ហើយពេលវេលានៃការចាក់បញ្ជាំងចាប់ពីថ្ងៃចន្ទដល់ថ្ងៃសុក្រ វេលាម៉ោង ៧ ដល់ ៨ ល្ងាច»៕
May 12, 2017
ប្រាក់ចំណូលរបស់ HTC បន្តធ្លាក់ចុះ
គិតត្រឹមខែមេសា ឆ្នាំ 2017 នេះ ប្រាក់ចំណូលរបស់ក្រុមហ៊ុនបច្ចេកវិទ្យាដ៏ធំរបស់តៃវ៉ាន់ នៅបន្តធ្លាក់ចុះពីមួយខែទៅមួយខែ ឥតស្រាកស្រាន្ដ បង្កជាក្ដីកង្វល់ធំមួយដល់ក្រុមហ៊ុន ដែលត្រូវតែដោះស្រាយជាបន្ទាន់។
HTC បានធ្លាក់ចំណូល 9.29% ធៀបនឹងរយៈពេលដូចគ្នាកាលពីឆ្នាំ 2016។ ចំណូលសរុបមួយរយៈ 4ខែដើមឆ្នាំ 2017 ក្រុមហ៊ុនទទួលបានតែ 635 លានដុល្លារ មានការធ្លាក់ចុះ 6.45% ធៀបនឹងរយៈពេលដូចគ្នាក្នុងឆ្នាំ 2016 ដោយពេលនោះ HTC ទទួលបាន 676 លានដុល្លារ។
អ្នកវិភាគមួយចំនួនលើកឡើងថា ការបន្តធ្លាក់ចុះនេះ អាចបណ្ដាលមកពីក្រុមហ៊ុន HTC ដាក់ចេញនូវស្មាតហ្វូនដែលមិនត្រូវចិត្តអ្នកប្រើប្រាស់ ខណៈទូរស័ព្ទមកពីក្រុមហ៊ុន Samsung កំពុងតែវាយលុកខ្លាំងលើទីផ្សារស្មាតហ្វូនសកល។ ជាអាទិ៍ស្មាតហ្វូនស៊េរីថ្មី HTC U Ultra និង HTC U Play មិនមានដំណើរការល្អ ការលក់មិនគ្រប់តាមចំនួនដែលបានគ្រោងទុក ធ្វើឱ្យចំណូលបន្តធ្លាក់។
តែទោះបីជាយ៉ាងណា ចំណូលនេះអាចងើបឡើងវិញបន្តិច ប្រសិនបើទូរស័ព្ទ HTC U 11 បង្ហាញខ្លួនមែន។ ការសន្និដ្ឋាន ផ្អែកលើសមត្ថភាពខ្លះដែលព័ត៌មានបែកធ្លាយបានចុះផ្សាយ និងការមើលឃើញពីសម្ទុះនៃការគាំទ្ររបស់អ្នកប្រើប្រាស់៕
May 12, 2017
Man United ទម្លាក់ Celta ទាំងព្រលឹងចុងសក់ ដើម្បីជួប Ajax ក្នុង Europa វគ្គផ្តាច់ព្រ័ត្រ
ក្រុមបិសាចក្រហម Manchester United បានទម្លាក់ក្រុម Celta Vigo ដើម្បីកក់កៅអីរបស់ពួកគេទៅកាន់ក្របខ័ណ្ឌ Europa League វគ្គផ្តាច់ព្រ័ត្រ កាលពីថ្ងៃព្រហស្បតិ៍ ក្រោយពីបានបញ្ចប់ក្នុងលទ្ធផលស្មើទាំងព្រលឹងចុងសក់ ១-១ កាលពីថ្ងៃព្រហស្បតិ៍ ដើម្បីពេញជ័យជម្នះទាំងពីរជើងនៃវគ្គពាក់កណ្តាលផ្តាច់ព្រ័ត្រនេះ ២-១។
Man United ហាក់ដូចជាត្រូវឈានទៅវគ្គផ្តាច់ព្រ័ត្រដោយងាយស្រួលទៅហើយនាកីឡដ្ឋាន Old Trafford នៅពេលដែលខ្សែបម្រើ Marouane Fellaini បានតែតបាល់បំប៉ោងសំណាញ់ទីនៅដើមតង់ទី១ ដើម្បីជួយឲ្យពួកគេមានគ្រាប់បាល់នាំមុខមុន ក្រោមការបញ្ជូនបាល់យ៉ាងល្អរបស់ខ្សែប្រយុទ្ធវ័យក្មេង Marcus Rashford។ ប៉ុន្តែ ក្រុមរបស់លោក Jose Mourinho បានរងនូវការវាយបកវិញ និងបានជួបការភិតភ័យ ក្រោយពីកីឡាករ Facundo Roncaglia បានរកគ្រាប់បាល់តាមស្មើសម្រាប់ក្រុមភ្ញៀនៅនាទី ទី៨៤ ដើម្បីកាត់បន្ថយលទ្ធផលទាំងពីរជើងមកត្រឹម ២-១។
នៅរយៈពេលប៉ុន្មាននាទីចុងក្រោយ ក្រុម Celta ស្ទើរតែបានបំពេញការវាយបកដ៏មិននឹកស្មានដល់ទៅហើយ ប៉ុន្តែ Man United បានជួបសំណាងដើម្បីឈានទៅប្រកួតវគ្គផ្តាច់ព្រ័ត្រជាមួយនឹងក្រុម Ajax Amsterdam ក្នុងទីក្រុង Stockholm ប្រទេសស៊ុយអែត នាថ្ងៃទី២៤ ខែឧសភា។ ក្រុមយក្សរបស់ហូឡង់ Ajax បានឈ្នះកៅអីរបស់ពួកគេទៅកាន់វគ្គផ្តាច់ព្រ័ត្រនៃក្របខ័ណ្ឌ Europa League វគ្គផ្តាច់ព្រ័ត្រ បើទោះបីចាញ់ក្រុម Lyon ក្នុងលទ្ធផល ៣-១ ក្នុងការប្រកួតវគ្គពាក់កណ្តាលផ្តាច់ព្រ័ត្រ ជើងទី២របស់ពួកគេក៏ដោយ។
លោក Jose Mourinho អ្នកចាត់ការទូទៅរបស់ក្រុម Man United បានប្រាប់ទូរទស្សន៍ BT Sport ថា៖ «យើងបានរងនូវសម្ពាធរហូតដល់បញ្ចប់ការប្រកួត ហើយវាជាការប្រកួតមានលក្ខណៈបើកចំហរ រហូតដល់នាទីចុងក្រោយ។ ក្រោយពីការប្រកួត១៤លើក យើងឈានទៅវគ្គផ្តាច់ព្រ័ត្រ។ ប្រសិនបើយើងឈ្នះពាន Europa League ខ្ញុំកាន់តែមានការរីករាយជាងនេះទៅទៀត។ វានឹងក្លាយជាពានដ៏អស្ចារ្យ»៕:
ប្រភពពី៖ The Mirro
May 12, 2017
ឆ្ងល់ទេ…គ្រាន់តែញ៉ាំឪឡឹក ម៉េចហាមមិនឱ្យញ៉ាំទឹក?
បើតាមអ្នកជំនាញដែលបកស្រាយតាមរយៈគេហទំព័រ Soha បានឲ្យដឹងថា រាងកាយរបស់មនុស្សយើងត្រូវការ PH ដើម្បីរំលាយអាហារក្នុងកម្រិតជាក់លាក់ប្រាកដមួយ ហើយប្រសិនបើក្រោយពេលទទួលអាហារហើយ អ្នកពិសាទឹកចូលទៅបន្ថែមច្រើនទៀតនោះ PH ដែលជួយរំលាយអាហារនឹងត្រូវបានបំផ្លាញទាំងស្រុងដោយសារបរិមាណជាតិទឹកលើស ។
ចំពោះអាហារផ្លែឈើដែលមានជាតិកាកសរសៃ ដូចជាស្វាយ ល្ហុង ត្រសក់ស្រូវ -ល- មិនត្រូវបានណែនាំថា ជាប្រភេទអាហារដែលបំផ្លាញ PH ជួយរំលាយអាហារឡើយ បើទោះបីវាជាអាហារប្រភេទជួយសម្រួលដល់ប្រពន្ធរំលាយអាហារក្ដី តែផ្លែឈើដែលមានជាតិទឹកច្រើនដូចជា ឪឡឹក វិញ វាជាអាហារមានអត្ថប្រយោជន៍ចំពោះរាងកាយដោយសារតែវាសម្បូរទៅដោយជាតិទឹកច្រើន តែប្រសិនបើយើងទទួលទានវាច្រើន និងមិនត្រឹមត្រូវតាមក្បួនផងនោះ វានឹងបំប្លែងសារធាតុចិញ្ចឹម ទៅជាសារធាតុពុលនៅក្នុងខ្លួន ហើយវានឹងបំផ្លាញការរំលាយអាហាររបស់ PH និងថែមទាំងធ្វើឱ្យអាហាររំលាយមិនបានល្អ ហើយជួយជំរុញលំហូរកាកអាហារនៅក្នុងពោះវៀនធំឱ្យរអឹលរលូនទៀតផង ដែលជាហេតុបណ្ដាលឱ្យមានអាការរាករូស ចុកពោះ ហើមពោះ ទៅវិញ ។
ដូច្នោះរាល់ការទទួលទានផ្លែឪឡឹក នឹងមិនត្រូវបានអនុញ្ញាតឲ្យពិសាទឹកភ្លាមៗនោះទេ ព្រោះជាតិទឹកបានបំផ្លាញសារធាតុ PH រំលាយអាហារ ហើយថែមទាំងធ្វើឱ្យការរំលាយអាហារមិនប្រក្រតីទៀតផង ។
ដើម្បីជាការណ៍ល្អ ប្រសិនបើលោកអ្នកបរិភោគផ្លែឪឡឹកហើយ សូមរង់ចាំរយៈពេលប្រមាណជា ៣០ ទៅ ៤០ នាទីក្រោយ សឹមពិសាទឹកតាមក្រោយ ៕
May 12, 2017
ធនាគារ AIIB ចាប់អារម្មណ៍លើឥណទានសម្បទានកម្រិតទាប និងវិស័យ៣នៅកម្ពុជា
ដោយសម្លឹងឃើញពីសក្ដានុពល និងកំណើនសេដ្ឋកិច្ចនៅក្នុងប្រទេសកម្ពុជា និងការគ្រប់គ្រងបំណុលសាធារណៈប្រកបដោយប្រសិទ្ធភាព និងចិរភាព បានធ្វើឱ្យថ្នាក់ដឹកនាំនៃធនាគារវិនិយោគហេដ្ឋារចនាសម្ព័ន្ធអាស៊ី (AIIB) ចាប់អារម្មណ៍ចង់បង្កើតកិច្ចសហប្រតិបត្ដិការលើវិស័យឥណទានសម្បទានកម្រិតទាប និងវិស័យចំនួន៣។
ការលើកឡើងបែបនេះកើតឡើងនៅក្នុងជំនួបរវាងទេសរដ្ឋមន្រ្ដី រដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុ ឯកឧត្ដមអូន ព័ន្ធមុនីរ័ត្ន និងលោកលី គុនជីន ជាប្រធានធនាគារ AIIB និងជាសហប្រធាននៃវេទិកាសេដ្ឋកិច្ចពិភពលោកស្ដីពីអាស៊ានសម្រាប់ឆ្នាំ2017។
ថ្លែងក្នុងឱកាសនោះឯកឧត្ដមអូន ព័ន្ធមុនីរ័ត្ន ទេសរដ្ឋមន្រ្ដី រដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុបានលើកឡើងថា បច្ចុប្បន្នកម្ពុជានៅតែមានលទ្ធភាពក្នុងការទទួលយកឥណទានដែលមានកម្រិតសម្បទានខ្ពស់ពីដៃគូអភិវឌ្ឍន៍នានានៅឡើយ ដូច្នេះកម្ពុជានៅមិនទាន់មានគោលនយោបាយខ្ចីពីធនាគារ AIIB ដែលមានលក្ខខណ្ឌឥណទានសម្បទានកម្រិតទាបនេះទេ។
ទោះជាយ៉ាងនេះក្ដីរដ្ឋមន្រ្ដីក្រសួងសេដ្ឋកិច្ច និងហិរញ្ញវត្ថុ បានសម្ដែងនូវសេចក្ដីសោមនស្សចំពោះចំណាប់អារម្មណ៍របស់ថ្នាក់ដឹកនាំនៃធនាគារ AIIB មកលើកម្ពុជា ដោយឯកឧត្ដមបានជំរុញឱ្យមានការធ្វើកិច្ចសហប្រតិបត្ដិការលើគម្រោងវិនិយោគសាធារណៈតាមយន្ដការភាពជាដៃគូរវាងរដ្ឋ និងឯកជន ព្រោះវានឹងអាចជួយកៀងគរអ្នកវិនិយោគឯកជនសម្រាប់បម្រើការអភិវឌ្ឍ និងមិនបង្កើតឱ្យមានបន្ទុកបំណុលសាធារណៈដល់កម្ពុជា។
ទោះជាយ៉ាងណា ឯកឧត្ដមលី គុនជីន បានមានប្រសាសន៍ថា AIIB ពិតជាមានឆន្ទៈខ្ពស់ក្នុងការធ្វើកិច្ចសហប្រតិបត្ដិការជាមួយរាជរដ្ឋាភិបាលកម្ពុជាដោយមិនផ្ដោតតែលើការកាត់បន្ថយភាពក្រីក្រប៉ុណ្ណឹងទេ គឺលោកបានផ្ដោតលើហេដ្ឋារចនាសម្ព័ន្ធ និងវិស័យបង្កើនផលិតភាពដែលគាំទ្រដល់ចិរភាពកំណើនសេដ្ឋកិច្ច។ ជាមួយគ្នានេះដែរ ឯកឧត្ដមក៏បានឯកភាពលើកិច្ចសហប្រតិបត្ដិការជាមួយគ្នាលើគម្រោងវិនិយោគសាធារណៈតាមយន្ដការPPP។
ឯកឧត្ដមអូន ព័ន្ធមុនីរ័ត្នបានកោតសរសើរដល់ថ្នាក់ដឹកនាំធនាគារ AIIB ដែលខំស្វែងរកលទ្ធភាពចូលធ្វើកិច្ចសហប្រតិបត្ដិការជាមួយរដ្ឋាភិបាលកម្ពុជាពិសេសសហប្រតិបត្ដិការវិនិយោគសាធារណៈតាមយន្ដការPPP និងការគាំទ្ររបស់ឯកឧត្ដមលី គុនជីនដល់វិស័យទាំងបីមានដូចជា ហេដ្ឋារចនាសម្ព័ន្ធរូបវន្ដជនបទដូចជាផ្លូវលំ ប្រព័ន្ធធារាសាស្រ្ដ,វិស័យឧស្សាហកម្មកែច្នៃផលិតផលកសិកម្ម, វិស័យតភ្ជាប់ដូចជាផ្លូវថ្នល់ និងបណ្ដាញអគ្គិសនីជាដើម៕
May 12, 2017
Man Utd និង Ajax សម្លឹងកៅអីវគ្គផ្តាច់ព្រ័ត្រដូចគ្នានៅរាត្រីនេះ
ក្រុមបិសាចក្រហម Manchester United នឹងសម្លឹងរកការប្រើប្រាស់ការមានប្រៀបក្នុងផ្ទះខ្លួនឯង ក៏ដូចជាគ្រាប់បាល់នាំមុខកាលពីជើងទី១ ដើម្បីទម្លាក់ក្រុម Cetla Vigo ក្នុងពេលក្រុមទាំងពីរជួបគ្នានៅកីឡដ្ឋាន Old Trafford ក្នុងការប្រកួតក្របខ័ណ្ឌ Europa វគ្គពាក់កណ្តាលផ្តាច់ព្រ័ត្រ ជើងទី២ នៅរាត្រីនេះ។ ស្របពេលជាមួយគ្នានេះ ក្រុម Ajax ក៏សម្លឹងរកកៅអីទៅវគ្គផ្តាច់ព្រ័ត្រផងដែរ ក្រោយពីផ្តួលក្រុម Lyon ៤-១ ក្នុងផ្ទះខ្លួនឯងកាលពីជើងទី១ វគ្គពាក់កណ្តាលផ្តាច់ព្រ័ត្រ តែនៅពេលនេះពួកគេត្រូវធ្វើដំណើរទៅកាន់ទឹកដីរបស់ក្រុម Ligue 1 Lyon មួយនេះម្តង។
ការស៊ុតបាល់ពិន័យ Free-kick ចូលទីយ៉ាងល្អក្នុងតង់ទី២របស់ខ្សែប្រយុទ្ធវ័យក្មេង Marcus Rashford បានជួយឲ្យក្រុម Man United ទទួលជ័យជម្នះ ១-០ ក្នុងការប្រកួតជើងទី១ កាលពីសប្តាហ៍មុន ក៏ដូចជាធ្វើឲ្យក្រុមរបស់លោក Jose Mourinho ស្ថិតយ៉ាងប្រកៀកឆ្ពោះទៅកាន់វគ្គផ្តាច់ព្រ័ត្រក្នុងទីក្រុង Stockholm នាថ្ងៃទី២៤ ខែឧសភាខាងមុខ។ ក្រុម Man United មិនស្គាល់ចាញ់សោះក្នុងការប្រកួតក្របខ័ណ្ឌអឺរ៉ុបលើទឹកដីខ្លួនឯងចំនួន១៧លើក ប៉ុន្តែ ពួកគេក៏ត្រូវតែប្រុងប្រយ័ត្នផងដែរ ខណៈដែលក្រុមរកគ្រាប់បាល់បញ្ចូលទីបានរាល់ការប្រកួតក្រៅទឹកដីក្នុងក្របខ័ណ្ឌ Europa League ទាំង៦លើករបស់ពួកគេនៅរដូវកាលនេះ។
ជាមួយគ្នានេះ ខ្សែបម្រើ Ander Herrera ជឿជាក់ថា ការមានប្រៀបក្នុងផ្ទះខ្លួនឯង ក៏ដូចជាការបង្ហាញពីការគាំទ្ររបស់អ្នកគាំទ្រនៃក្រុមបិសាចក្រហម Man United នឹងលើកទឹកចិត្តឲ្យពួកគេឆ្លងផុតដំណាក់កាលនេះ។ ខ្សែបម្រើអន្តរជាតិអេស្ប៉ាញរូបនេះបានឲ្យដឹងថា៖ «ពួកគេតែងរកគ្រាប់បាល់ក្រៅទឹកដីបានក្នុងរាល់ការប្រកួតដែលពួកគេបានលេងក្នុងយុទ្ធនាការនេះ ហេតុនេះ យើងត្រូវតែដឹងពីបញ្ហានោះ»។ Herrera បានបន្ថែមទៀតថា៖ «ពួកគេជាក្រុមដ៏ខ្លាំងមួយ និងជាក្រុមប្រកបដោយគ្រោះថ្នាក់នៅពេលដែលពួកគេលេងនៅក្រៅទឹកដី ហើយយើងចាំបាច់ត្រូវការអ្នកគាំទ្រនៅលើទឹកដីរបស់យើង។ ខ្ញុំនឹងប្រាប់ពួកគេថា យើងត្រូវការពួកគេក្នុងការបង្កើតឲ្យមានបរិយាកាសដ៏ល្អមួយ និងបរិយាកាសលំបាកមួយសម្រាប់គូប្រកួត ដែលអាចនឹងធ្វើឲ្យទៅវគ្គផ្តាច់ព្រ័ត្របាន»។
ដោយឡែក លោក Peter Bosz គ្រូបង្វឹករបស់ Ajax បានឲ្យដឹងថា៖ «យើងនឹងត្រូវតែបង្កើតឱកាសឲ្យបានច្រើន និងត្រូវតែរក្សានូវអារម្មណ៍ស្ងប់ និងត្រៀមលក្ខណៈឱ្យបានល្អនៅពេលដែលយើងបាត់បង់បាល់»។ ការប្រកួតទាំងពីរនឹងចាប់ផ្តើមនៅម៉ោង២:០៥ទៀបភ្លឺ៕
May 11, 2017
តើគួរទិញផ្ទះដែលមានគម្រោង Shop house ឬលំនៅដ្ឋានរស់នៅធម្មតា?
ទោះបីវិស័យអចលនទ្រព្យនៅកម្ពុជាមានការរីកចម្រើនខ្លាំងនៅរយៈប៉ុន្មានឆ្នាំចុងក្រោយនេះក៏ដោយ ប៉ុន្តែគម្រោង “Shop house” ដែលជាគម្រោងផ្ទះល្វែងសម្រាប់រស់នៅផង និងប្រកបអាជីវកម្មផងនោះមិនសូវមានច្រើននៅឡើយទេ។ ប៉ុន្តែទោះជាយ៉ាងណាក្តី ដើម្បីបំពេញតាមតម្រូវការអតិថិជនរបស់ខ្លួន ម្ចាស់បុរីមួយចំនួនបានចាប់ផ្តើមអភិវឌ្ឍគម្រោង Shop House ឱ្យមានចំនួនកាន់តែច្រើនឡើងៗហើយ។
អ្នកស្រី ឃិត សុភក្រ្ត ដែលបានទិញផ្ទះល្វែងនៅបុរីមួយក្នុងក្រុងភ្នំពេញមានប្រសាសន៍ថា ដើមឡើយគ្រួសាររបស់អ្នកស្រីមានបំណងទិញផ្ទះល្វែងរស់នៅធម្មតាជាលក្ខណៈគ្រួសារតែប៉ុណ្ណោះ ប៉ុន្តែនៅពេលគិតយូរៗទៅ ខ្លួនជាស្រ្តីមេផ្ទះមានតួនាទីនៅផ្ទះជាអ្នកមើលថែកូន ហើយមិនអាចទៅធ្វើការខាងក្រៅបាន ក៏សម្រេចចិត្តជាមួយគ្រួសារទិញផ្ទះ Shop House នេះដើម្បីអាចប្រកបអាជីវកម្មបានផង មើលថែទាំកូននៅផ្ទះបានផង «ខ្ញុំគិតថា ពេលមានម្តាយនៅមើលថែ កូនមានភាពកក់ក្តៅខ្លាំងជាជាងយកកូនទៅផ្ញើនៅតាមសាលានានាដែលមិនដឹងថាគេមើលថែកូនយើងបានល្អ ឬមិនល្អនោះឡើយ»។
តែដោយឡែកសម្រាប់អ្នកស្រី រិន លីតា វិញបានមានប្រសាសន៍ថា ដោយសារជាប់រវល់ការងារឯកជន អ្នកស្រីមិនបានគិតគូរទិញផ្ទះបែបShop House ទេ គឺត្រឹមតែទិញផ្ទះដើម្បីរស់នៅធម្មតាប៉ុណ្ណោះ ចំណែកកូនគឺត្រូវបង់លុយទៅឱ្យសាលាដើម្បីឱ្យគេមើលថែកូនផង និងឱ្យកូនបានរៀនទីនោះផង «ពេលក្មេងនៅសាលា ក្មេងមានការប្រាស្រ័យទាក់ទងល្អ មានភាពឆ្លាតវៃ និងរៀនឆាប់ចេះ ឧទាហរណ៍បើក្មេងរៀនភាសាអង់គ្លេស ក្មេងលេងជាមួយគ្នាអាចនិយាយភាសាអង់គ្លេសបានឆាប់រហ័ស គួបផ្សំនឹងគ្រូមើលថែផងអាចតម្រង់ទិសសិស្សបានកាន់តែប្រសើរទៀត»។

ពាក់ព័ន្ធករណីនេះកញ្ញា ងួន វិច្ចិកា ប្រធានផ្នែកលក់គម្រោងបុរីដ៏ល្បីល្បាញមួយ ដែលមានទីតាំងនៅតាមបណ្តោយផ្លូវជាតិលេខ 6A បានឲ្យដឹងថា ដោយសារក្រុមហ៊ុនតែងគិតគូរពីអាជីវកម្ម និងប្រាក់ចំណូលរបស់អតិថិជនដែលមកទិញផ្ទះក្នុងបុរី ទើបបុរីតែងរៀបចំឱ្យមានគម្រោងលំនៅដ្ឋានបែប Shop House ដើម្បីឱ្យគាត់អាចស្នាក់នៅបានផង និងប្រកបអាជីវកម្មបានផង ហើយតែងបានការគាំទ្រខ្លាំងពីអតិថិជន «ជាក់ស្តែងបច្ចុប្បន្ន បុរីរបស់យើង ចំនួនពីរ បានទទួលជោគជ័យលើសពីការរំពឹងទុករបស់ក្រុមហ៊ុន ដោយលក់អស់100% ខណៈដែលសម្ទុះនៃការទិញលក់អចលនទ្រព្យក្នុងប្រទេសកំពុងមានតម្រូវការខ្ពស់»។
យោងតាមក្រុមអ្នកជំនាញផ្នែកអចលនទ្រព្យឱ្យដឹងថា ជាទូទៅគម្រោង Shop House តែងមានការគាំទ្រខ្លាំងជាងគម្រោងផ្ទះល្វែងលំនៅដ្ឋានធម្មតា ទោះជាគម្រោង Shop House មានតម្លៃថ្លៃជាងផ្ទះល្វែងលំនៅដ្ឋានធម្មតាក៏ដោយ។ ការដែលមានអតិថិជនគាំទ្រច្រើនលើគម្រោង Shop House នេះគឺ ទោះជាគ្រួសារបស់ខ្លួនមានការងាររវល់ មិនអាចប្រកបអាជីវកម្មបានក៏ដោយ ក៏ម្ចាស់លំនៅដ្ឋានអាចជួលបន្តបាន ដែលទទួលបានតម្លៃជួលច្រើនជាងផ្ទះល្វែងលំនៅដ្ឋានធម្មតាទៀតផង៕
May 11, 2017
ទោះជា កញ្ញា ខេមរៈ ស្រីពៅ បង្ហាញវត្តមានក្តី តែការវិលចូលសង្វៀនសិល្បៈវិញនៅតែមិនទាន់ច្បាស់
ភ្នំពេញៈ ខណៈពេលមហាជនជាអ្នកគាំទ្ររបស់តារាចម្រៀងស្រីសម្បុរស្រអែម កញ្ញា ខេមរៈ ស្រីពៅ ដែលជាប្អូនស្រីបង្កើតរបស់កំពូលតារាចម្រៀងប្រុសនៅទ្រនំផលិតកម្មសាន់ដេ លោក ខេមរៈ សិរីមន្ត មានការត្រេកអរ និងភ្ញាក់ផ្អើលខ្លាំងពេលបានឃើញវត្តមាននាងចូលរួមនៅក្នុងពិធីរៀបចំមង្គលការកាលពីថ្ងៃទី៧ ខែឧសភា ឆ្នាំ២០១៧កន្លងមកនេះក្តី តែពន្លឺនៃការវិលចូលទៅកាន់សង្វៀនសិល្បៈវិញគឺនៅមិនទាន់ដឹងច្បាស់លាស់នោះឡើយ។
បើតាមការអះអាងរបស់លោក ខេមរៈ ភារុណ ដែលជាបងប្រុសច្បងបង្កើត អ្នកនាំពាក្យ និងជាអ្នកនិពន្ធទំនុកច្រៀងប្រចាំផលិតកម្មសាន់ដេផង បានបង្ហើបប្រាប់ឡារ៉ែនអំពីវត្តមានរបស់ប្អូនស្រីដែលបានមកដល់ស្រុកខ្មែរវិញ និងប្រាប់ពីមូលហេតុមិនទាន់ច្បាស់លាស់នៃការវិលចូលអាជីពសិល្បៈវិញនោះថា៖ «អូ!ប្អូនស្រីខ្ញុំ នាងបានវិលមកស្រុកខ្មែរវិញប្រហែលជាពីរបីខែហើយ។ ការដែលនាងបង្ហាញខ្លួនក្នុងពិធីមង្គលការមុននេះគឺនាងទៅចូលរួមពិធីមង្គលការបងប្អូននៅខេត្តកំពង់ចាម។ សភាពជំងឺរបស់នាងបានធូរគ្រាន់បើច្រើនហើយមកទល់ពេលនេះ។ ចំពោះពេលវេលានៃការវិលមកប្រកបអាជីពសិល្បៈចម្រៀងវិញនោះ ទោះបីជាខ្ញុំជាបងបង្កើតមែន តែរឿងនេះក៏នៅមិនទាន់ដឹងច្បាស់ដែរ ដោយយើងទុកការសម្រេចចិត្តនេះទៅលើរូបគាត់គិតចុះ»។
ទោះជាយ៉ាងណាក្តី បើយោងតាមសារដែលកញ្ញាខេមរៈ ស្រីពៅ បានបង្ហោះផ្តាំផ្ញើសួរសុខទុក្ខដល់អ្នកគាំទ្រនាង នាពេលចូលរួមពិធីមង្គលការកាលពីថ្ងៃទី៧ ខែឧសភា កន្លងទៅនោះ ស្រីពៅបានសរសេរថា៖ «នឹកFan សំណព្វចិត្តណាស់! នឹកចេញពីបេះដូងពិតៗ ថតបានចេះតែថតទៅហិហិហិ» និងសារមួយទៀតសរសេរថា៖«សួស្តីបងប្អូនទាំងអស់គ្នា នាងខ្ញុំចង់សួរថា សុខសប្បាយជាទេបងប្អូន?» ។
ទាំងអស់នេះគឺជាការបញ្ជាក់ថា តារាស្រីរូបនេះកំពុងតែមានការនឹករឮកដល់មហាជនណាស់ និងប្រាកដជាមិនអាចបោះបង់ចោលអាជីពខ្លួននោះឡើយ។ ម្យ៉ាងទៀត នាពេលកន្លងទៅថ្មីៗនេះ គឺមុនថ្ងៃបុណ្យចូលឆ្នាំថ្មីប្រពៃណីខ្មែរ ក៏ត្រូវបានគេដឹងដែរថា កញ្ញាខេមរៈ ស្រីពៅ បានបង្កើតស្នាដៃមួយដំបូងគេក្នុងការចាប់ផ្តើមវិលមករកទ្រនំសិល្បៈរួចទៅហើយដែរ គឺនាងបាននិពន្ធទំនុកច្រៀង និង Melody បទចម្រៀងថ្មីមានចំណងជើងថា «ស្រុកខ្ញុំគេរាំតែអញ្ចឹង» ឲ្យបងប្រុសបង្កើតគឺលោក ខេមរៈ សិរីមន្ត នាឱកាសមុនចូលឆ្នាំថ្មីកន្លងទៅ និងទទួលបានការគាំទ្រយ៉ាងខ្លាំងទៀតផង៕
May 11, 2017