Category: សង្គម និងសេដ្ឋកិច្ច

Monaco ស្រេកឃ្លានលើកពាន Ligue 1 ពេលប៉ះ St Etienne នៅរាត្រីនេះ
លោក Leonardo Jardim គ្រូបង្វឹករបស់ Monaco បានធ្វើការព្រមានដល់ក្រុមរបស់លោកប្រឆាំងនឹងការខ្វះនូវការផ្តោតអារម្មណ៍ផ្សេងៗ នៅពេលដែលពួកគេត្រូវធ្វើជាម្ចាស់ផ្ទះទទួលក្រុម St Etienne នៅរាត្រីនេះខណៈដែលពួកគេកំពុងសម្លឹងរកការលើកពាន Ligue 1 នៅរដូវកាលនេះ។
ក្រុម Monaco ត្រូវការត្រឹមតែ១ពិន្ទុប៉ុណ្ណោះពីការប្រកួត២លើកចុងក្រោយរបស់ពួកគេដើម្បីឈ្នះពានក្របខ័ណ្ឌកំពូលរបស់បារាំងជាលើកទី១ បើគិតចាប់តាំងពីឆ្នាំ២០០០មក ស្របពេលដែលពួកគេកំពុងតែនាំមុខ៣ពិន្ទុដាច់លើក្រុមឈរលេខ២ Paris Saint-Germain ដែលនៅសល់ត្រឹមតែ១ប្រកួតទៀតប៉ុណ្ណោះ។ វាបានក្លាយជាសប្តាហ៍ដ៏ជោគជ័យមួយសម្រាប់ក្លិបមួយនេះ នៅពេលដែលលោក Jardim បានឈ្នះពានអ្នកចាត់ការទូទៅឆ្នើមប្រចាំឆ្នាំក្នុងក្របខ័ណ្ឌ Ligue 1 ស្របពេលដែល Danijel Subasic និងខ្សែប្រយុទ្ធ Kylian Mbappe ក៏បានឈ្នះពានអ្នកចាំទីឆ្នើម និងកីឡាករវ័យក្មេងឆ្នើមបំផុតប្រចាំឆ្នាំរៀងៗខ្លួនដែរនៅក្នុងកម្មវិធីប្រគល់រង្វាន់កាលពីល្ងាចថ្ងៃអាទិត្យ។ ស្របពេលជាមួយគ្នានេះដែរ ក្រុម Monaco ក៏កំពុងតែស្ថិតយ៉ាងប្រកៀកក្នុងការឈ្នះពាន Ligue 1 ផងដែរ។ ប៉ុន្តែ ទោះបីជាយ៉ាងណា លោក Jardim ចង់ឲ្យកីឡាកររបស់លោកបំភ្លេចចោលនូវបរិយាកាសរីករាយជុំវិញខ្លួន និងផ្តោតអារម្មណ៍ទៅលើការប្រកួតនៅរាត្រីនេះឱ្យដូចការប្រកួតផ្សេងៗទៀតដែរ។
គ្រូបង្វឹករូបនេះបានប្រាប់អ្នកយកព័ត៌មានក្នុងសន្និសីទសារព័ត៌មានមុនការប្រកួតថា៖ «យើងត្រូវតែលេងដូចធម្មតាជាមួយនឹងមហិច្ឆតា និងឥរិយាបថដូចពេលមុន។ យើងនឹងមិនលេងដោយចង់បញ្ចប់ក្នុងលទ្ធផលស្មើឡើយ។ គោលបំណងរបស់យើងគឺការធ្វើឲ្យក្រុមនេះទទួលបានលទ្ធផលដ៏ល្អបំផុត និងស្ថិតនៅឲ្យឆ្ងាយពីឥរិយាបថរីករាយផ្សេងៗសិន»។
ក្រុម Monaco នឹងឈានទៅកាន់ការប្រកួតនេះប្រកបដោយការជឿជាក់ ខណៈដែលពួកគេបានឈ្នះ៥លើកពីការប្រកួតក្នុងលីកលើទឹកដីខ្លួនឯងទាំង៥លើកចុងក្រោយរបស់ពួកគេ ខណៈ St Etienne ឈ្នះតែ២លើកគត់ពីការប្រកួតក្រៅទឹកដី៥លើកចុងក្រោយរបស់ពួកគេ។ ការប្រកួតនេះនឹងចាប់ផ្តើមនៅម៉ោង២ទៀបភ្លឺរាត្រីថ្ងៃនេះ៕
ប្រភពពី៖ ESPN

May 17, 2017
Arsenal និង Man City ឈ្នះដូចគ្នាដើម្បីរក្សាការប្រជែងយកកៅអីកំពូលទាំងបួន
Alexis Sanchez បានរក្សាក្តីសង្ឃឹមរបស់ Arsenal ក្នុងការប្រជែងយកកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ ខណៈដែលគ្រាប់បាល់ស៊ុតបញ្ចូលទី២គ្រាប់របស់គេបានជួយឲ្យក្រុមកាំភ្លើងធំមួយនេះ យកឈ្នះលើក្រុម Sunderland ក្នុងលទ្ធផល ២-០ នាកីឡដ្ឋាន Emirates កាលពីថ្ងៃអង្គារ។ ខ្សែប្រយុទ្ធអន្តរជាតិស៊ីលីរូបនេះ បានក្លាយជាវីរបុរសម្តងទៀតសម្រាប់ក្រុមរបស់លោក Arsen Wenger ខណៈដែលពួកគេបានធានាថា ការប្រជែងរបស់ពួកគេជាមួយនឹងក្រុមហង្សក្រហម Liverpool សម្រាប់តំណែងលេខ៤ នឹងត្រូវបន្តរហូតដល់ថ្ងៃចុងក្រោយនៃរដូវកាលនេះ។
ទោះបីជាយ៉ាងណា ក្រុម Arsenal ដែលកំពុងតែស្ថិតក្នុងចំណាត់ថ្នាក់លេខ៥ ពិតជាត្រូវការអព្ភូតហេតុក្នុងការឈ្នះកៅអីទៅលេងក្នុងក្របខ័ណ្ឌ Champions League ក្នុងរដូវកាលថ្មីជាលើកទី២០ជាប់ៗគ្នា។ ការដណ្តើមបានជ័យជម្នះជាលើកទី៦របស់ក្រុម Arsenal ពីការប្រកួត៧លើកចុងក្រោយរបស់ពួកគេ បានជួយឲ្យពួកគេដេញតាមពីក្រោយក្រុមហង្សក្រហម Liverpool ត្រឹមតែ១ពិន្ទុប៉ុណ្ណោះ ខណៈដែលនៅសល់ការប្រកួត១លើកទៀតមុននឹងបញ្ចប់រដូវកាលនេះ។ ស្របពេលជាមួយគ្នានេះដែរ គ្រាប់បាល់ស៊ុតបញ្ចូលទីពីសំណាក់កីឡាករ Gabriel Jesus, Kevin de Bruyne និង Yaya Toure បានជួយឲ្យក្រុម Manchester City ស្ថិតយ៉ាងប្រកៀកក្នុងការបញ្ចប់ក្នុងចំណាត់ថ្នាក់កំពូលទាំងបួន ក្រោយពីពួកគេបានយកឈ្នះលើក្រុម West Brom ក្នុងលទ្ធផល ៣-១ កាលពីថ្ងៃអង្គារ។ ខ្សែប្រយុទ្ធ Hal Robson-Kanu បានវាយបកបានមួយគ្រាប់វិញដើម្បីជួយឲ្យក្រុមភ្ញៀវ West Brom ជួបការរីករាយបន្តនៅកីឡដ្ឋាន Etihad។ បច្ចុប្បន្នក្រុមរបស់លោក Pep Guardiola ត្រូវការត្រឹមតែ១ពិន្ទុគត់នៅលើទឹកដីក្រុម Watford នៅថ្ងៃប្រកួតចុងក្រោយនៃរដូវកាលនេះដើម្បីឈ្នះកៅអីទៅកាន់ក្របខ័ណ្ឌ Champions League៕

ប្រភពពី៖ The Sun
May 17, 2017
គ្មានអ្វីថ្មីប្លែកទេ អ៊ីចឹងតើ Apple បញ្ចេញ iOS 10.3.2 មកដើម្បីអ្វី?
ម្សិលមិញនេះ ក្រុមហ៊ុន Apple បានប្រកាសដាក់ចេញនូវប្រព័ន្ធប្រតិបត្តិការ iOS កំណែទម្រង់ថ្មី 10.3.2 មួយទៀត សម្រាប់ដាក់ឱ្យអ្នកប្រើប្រាស់ iPhone, iPad និង iPod Touch ធ្វើការ Update មុនក្រោយគ្នាតែមួយខែប៉ុណ្ណោះពីកំណែទម្រង់ iOS 10.3.1។
កំណែទម្រង់ថ្មីនេះ ហាក់មិនមានអ្វីប្លែកថ្មីគួរឱ្យកត់សម្គាល់ខុសពីកំណែទម្រង់មុនប៉ុន្មានទេ ដូច្នេះតើអ្វីទៅជាគោលគំនិតចម្បងនៃការដាក់ឱ្យ Update នេះ? ជាក់ស្តែង Apple ពិតជាមិនបានបង្ហាញភាពប្លែកគ្នារវាងកំណែទម្រង់ថ្មីនេះមែន ប៉ុន្តែការដាក់ចេញនេះ គឺក្រុមហ៊ុនចង់ពង្រឹងទៅលើប្រព័ន្ធសុវត្ថិភាព ប្រព័ន្ធដំណើរការ iOS ខណៈ iOS 10.3.1 នៅមានចន្លោះប្រហោងដែលនាំឱ្យមានការជ្រៀតចូល និងវាយលុកពីក្រុមបង្កើតកម្មវិធី Jailbreak ហើយបិទនូវចន្លោះប្រហោងក្នុងប្រព័ន្ធសុវត្ថិភាពមួយចំនួន ចៀសវាងមានការជ្រៀតចូលដល់ទិន្នន័យសំខាន់ៗ និងព័ត៌មានឯកជនរបស់អ្នកប្រើប្រាស់។
កំណែទម្រង់ថ្មីនេះ ក៏នឹងដោះស្រាយបញ្ហាដែលកម្មវិធី VPN មួយចំនួនមិនដំណើរការ និងដោះស្រាយពាក្យបញ្ជានៅក្នុង SiriKit សម្រាប់ប្រើប្រាស់នៅក្នុងរថយន្តផងដែរ។ និយាយជារួមទៅ iOS 10.3.2 គ្មានមុខងារអ្វីប្លែកថ្មីទេ ដោយវាគ្រាន់តែជាការ Update ដ៏តូចមួយប៉ុណ្ណោះ ព្រោះថា iOS ជំនាន់ទី 11 ក៏ត្រៀមនឹងចេញនាពេលខាងមុខដែរ ក្នុងព្រឹត្តិការណ៍ Apple WWDC ប៉ុន្តែវាអាចចាំបាច់ប្រសិនបើលោកអ្នករកឃើញថាទូរស័ព្ទ iPhone ឬ iPad របស់លោកអ្នកមានបញ្ហាណាមួយពេលប្រើប្រាស់ (Bug )។
យ៉ាងណាមិញ សម្រាប់លោកអ្នកដែលចង់ Update អាចចូលទៅ Update តាមរយៈ Settings-> General -> Software Update-> Download and Install បាន៕
May 17, 2017
អ្នកជំនាញផ្នែកប្រដាល់សកលរបស់អន្តរជាតិ មកបណ្ដុះបណ្តាលគ្រូបង្វឹកកម្ពុជា
នេះជាវគ្គបំប៉នដ៏សំខាន់មួយដែលឧបត្ថម្ភដោយអង្គការសាមគ្គីអូឡាំពិកអន្តរជាតិ ដោយមានគ្រូឧទ្ទេសនាមគឺលោក Rubasinghe Kankawamge Indrasgna អ្នកជំនាញមកពីសហព័ន្ធកីឡាប្រដាល់អន្តរជាតិប្រទេសស្រីលង្កា ដែលគេស្គាល់ថាមានជំនាញខ្លាំងលំដាប់ផ្កាយ៣របស់អន្តរជាតិបានមកចែករំលែកបទពិសោធល្អៗមួយចំនួនដល់សិក្ខាកាមកម្ពុជាចំនួន២៥រូបដែលជាគ្រូប្រដាល់ អាជ្ញាកណ្ដាល ចៅក្រមមកពីបណ្ដាក្លិប សមាគមនានាចំណុះឲ្យសហព័ន្ធដែលបានមកចូលរួមក្នុងវគ្គសិក្សាដ៏សំខាន់នេះ ។

នេះជាវគ្គបណ្ដុះបណ្ដាលលើកដំបូងរបស់សហព័ន្ធកីឡាប្រដាល់សកលកម្ពុជា ដែលទើបតែបំបែកខ្លួនចេញពីសហព័ន្ធកីឡាប្រដាល់គុនខ្មែរកាលពីពេលថ្មីៗកន្លងទៅនេះ។ វគ្គនេះនឹងមានការប្រឡងនៅពេលបញ្ចប់ការសិក្សា អ្នកដែលប្រឡងជាប់នឹងបានទទួលសញ្ញាបត្រកម្រិតផ្កាយ ១ ពីសហព័ន្ធប្រដាល់អន្តរជាតិ។
អគ្គលេខាធិការជាតិអូឡាំពិកកម្ពុជា លោកវ៉ាត់ ចំរើនបានថ្លែងថា៖ នេះជាការហ្វឹកហាត់តាមរបៀបវិទ្យាសាស្ត្រកីឡា ព្រោះវិទ្យាសាស្ត្រមានការប្រែប្រួលជារៀងរាល់ឆ្នាំ ហេតុនេះគ្រូត្រូវតែស្គាល់ពីបច្ចេកទេសថ្មីៗរបស់ពិភពលោកដើម្បីឲ្យសហព័ន្ធនេះក្លាយជាសហព័ន្ធដែលមានសក្ដានុពល ។
ការពង្រឹងបច្ចេកទេសគឺជាកត្តាសំខាន់ដែលសហព័ន្ធ គ្រូបង្វឹកត្រូវតែដឹង។ គ្រូបង្វឹកកីឡាមិនមែនជាគ្រូបង្រៀននោះទេ ព្រោះគ្រូកីឡាត្រូវតែមានធនធានបច្ចេកទេសត្រឹមត្រូវ ចេះស្រាវជ្រាវ រកចំណុចថ្មី ចេះសង្កេតពីកីឡារបស់ខ្លួនថា តើខ្សោយពីអ្វីខ្លះ និងខ្លាំងអ្វីខ្លះ? បែបនេះទើបក្លាយជាគ្រូបង្វឹកដែលមានសមត្ថភាពខ្ពស់ ។
គួរបញ្ជាក់ផងដែរថា៖ វគ្គសិក្សានេះមានរយៈពេល១០ថ្ងៃ ចាប់ពីថ្ងៃទី១៦ ដល់ថ្ងៃទី២៦ ខែឧសភា ទើបបញ្ចប់៕
May 17, 2017
ហួសចិត្ត! តារាបាល់ទាត់នារីនៅបូស្ន៊ី ដាល់គូប្រកួតខ្លួន និងរងពិន័យព្យួរជើងអស់មួយជីវិត!
តារាកីឡាបាល់ទាត់នារីដ៏ឆ្នើមម្នាក់ បានរងការពិន័យព្យួរជើងអស់មួយជីវិត ក្រោយពីបានដាល់ទៅលើគូប្រកួតរបស់ខ្លួនចំក្បាលយ៉ាងខ្លាំងក្លា។ កីឡាការិនី Silvija Sekacic មិនអាចលេងកីឡាបាល់ទាត់បានទៀតឡើយនៅក្នុងប្រទេសបូស្ន៊ីរបស់នាង ក្រោយពីបានវាយទៅលើកីឡាការិនីដែលជាគូប្រកួតរបស់ខ្លួនគឺ កីឡាការិនី Adnu Ljubanovic រហូតដល់ដួលទៅលើទីលានប្រកួត។

នាង Sekacic បានវាយកីឡាការិនីដែលជាគូប្រកួតរបស់ខ្លួនយ៉ាងសន្ធាប់ មុនពេលឡើងអង្គុយសង្កត់ពីលើដើម្បីដាល់ទៅលើក្បាលរបស់កីឡាការិនីម្នាក់នោះ រហូតទាល់តែពួកគេទាំងពីរត្រូវបានបំបែកចេញដោយកីឡាការិនីផ្សេងទៀត និងមន្ត្រីប្រចាំការប្រកួត។
សកម្មភាពនេះបានធ្វើឱ្យមានការភ្ញាក់ផ្អើលយ៉ាងខ្លាំងក្នុងអំឡុងការប្រកួតរវាងក្រុម Zeljeznicar និង Mladost ក្នុងក្របខ័ណ្ឌលីកផ្នែកនារីរបស់ប្រទេសបូស្ន៊ី។
បើទោះបីស្ថានភាពផ្សេងៗមានភាពធូរស្រាល ហើយនាង Sekacic របស់ក្លិប Zelkenznicar បានរងពិន័យកាតក្រហមហើយក៏ដោយ ប៉ុន្តែកីឡាការិនីរូបនេះមិនបានបង្ហាញពីការសោកស្តាយណាមួយឡើយ ដោយនាងបាននិយាយថា៖ «ការរងពិន័យកាតក្រហមមិនមែនជាបញ្ហាអ្វីឡើយ ព្រោះយ៉ាងហោចណាស់ក៏ខ្ញុំបានវាយទៅលើរូបនាងនោះដែរ»។
ក្នុងសេចក្តីថ្លែងការណ៍មួយបន្ទាប់ពីហេតុការណ៍នោះ ក្លិប Mladost បានឲ្យដឹងថា៖ «វាគ្មានពាក្យអ្វីត្រូវថ្លែងទៅលើបញ្ហានេះឡើយ។ វាអាចនិយាយបានថា ឥរិយាបថបែបនេះមិនមែនជាការប្រព្រឹត្តដោយមានការពិចារណាឡើយ។ មនុស្សដូចជា Silvija មិនស័ក្តិសមក្នុងការលេងបាល់ទាត់ឡើយ ហើយនាងពិតជាស័ក្តិសមហើយចំពោះការរងពិន័យព្យួរជើងអស់មួយជីវិតនោះ»៕
ប្រភពពី៖ The Sun
May 17, 2017
ប្រពន្ធដើម នាយ ហុងដា ធ្លាក់ខ្លួនក្រលំបាកតោកយ៉ាកខ្លាំងរហូតគ្មានប្រាក់មកមើលកូនប្រុសជាប់ឃុំ
ភ្នំពេញៈ បន្ទាប់ពីបានចាប់ឃាតករដែលសម្លាប់ប្រពន្ធចុងរបស់តារាកំប្លែងនាយហុងដា គឺជាកូនប្រុសបង្កើតរបស់ប្រពន្ធដើម គឺនាងឃ្មឹបដែលមានឈ្មោះថា ខា សុខេន មានវ័យ ១៨ ឆ្នាំមកនោះ មហាជនក៏មានការភ្ញាក់ផ្អើលយ៉ាងខ្លាំង និងរឹតតែចង់ដឹងទៅទៀតអំពីបច្ចុប្បន្នភាពរបស់នាងឃ្មឹបថា តើនៅទីណាម៉េចបានបណ្តោយកូនឲ្យក្លាយជាឃាតករសម្លាប់ប្រពន្ធចុងឪពុករបស់ខ្លួនបែបនេះទៅវិញ?
នៅរាត្រីថ្ងៃទី ១៥ ខែឧសភា ឆ្នាំ២០១៧ យប់មិញនេះក៏ស្រាប់តែមានការបង្ហោះរូបថតស្តីពីបច្ចុប្បន្នភាព និងលេខទូរស័ព្ទទំនាក់ទំនងរបស់នាងឃ្មឹប ដែលមានជីវភាពលំបាកលំបិនខ្លាំងមែនទែនដែលបង្ហោះដោយគណនីហ្វេសប៊ុកឈ្មោះ Keo Virakboth និងប្រកាសថា៖ « យប់មិញនេះខ្ញុំបាទប្រទះឃើញអ្នកនាងឃ្មឹប ប្រពន្ធដើមលោកហុងដា។ សភាពគាត់គួរឲ្យអាណិតណាស់ រកតែអង្ករច្រកឆ្នាំងសឹងតែពុំបានផង រកលុយមកមើលកូនក៏មិនបានទៀត គ្មានលុយមួយរៀលទេ! សូមពុកម៉ែបងប្អូនជួយគាត់ផង មើលមុខគាត់ក៏ដឹងថាគាត់គ្មានលុយដែរ»។
កាលពីរសៀលម៉ោង១៥.០០ នាថ្ងៃទី១២ ខែឧសភា ឆ្នាំ២០១៧កន្លងទៅ កម្លាំងជំនាញការិយាល័យព្រហ្មទណ្ឌអាវុធហត្ថរាជធានីភ្នំពេញបានសហការជាមួយមូលដ្ឋានអាវុធហត្ថខណ្ឌដង្កោ និងខណ្ឌជ្រោយចង្វារធ្វើការឃាត់ខ្លួនជនសង្ស័យចំនួន២នាក់ ជាគូស្នេហ៍នឹងគ្នាដែលជាប់សង្ស័យពាក់ព័ន្ធករណីសម្លាប់ប្រពន្ធក្រោយរបស់នាយហុងដា ដែលគេគ្រប់គ្នាស្គាល់ថាជាតារាកំប្លែងម្នាក់ក្នុងវិស័យសិល្បៈនោះ។
ជនសង្ស័យទី១ មានឈ្មោះ ខា សុខេន ហៅនិត ភេទប្រុស អាយុ១៨ឆ្នាំ ជាកូនប្រុសបង្កើតរបស់លោកហុងដា និងជនសង្ស័យទី២ មានឈ្មោះ នេត រស្មីកន្និកា ភេទស្រី អាយុ១៧ឆ្នាំ មុខរបរបុគ្គលិកនៅហាងរស្មីបឹងកក់ ត្រូវជាស្រីស្នេហ៍។ តាមការស៊ើបអង្កេតរបស់សមត្ថកិច្ចអាវុធហត្ថរាជធានីភ្នំពេញ ជនសង្ស័យបានសារភាពថា រូបគេពិតជាបានធ្វើសកម្មភាពសម្លាប់ម្តាយចុងឈ្មោះ ស៊ឹម ចន្ធី អាយុ១៩ឆ្នាំ ពិតបា្រកដមែន គឺធ្វើសកម្មភាពតែម្នាក់ឯង កាលពីយប់ថ្ងៃទី១០ ខែឧសភា ឆ្នាំ២០១៧ នៅបន្ទប់ខុនដូរបស់ឪពុកបង្កើតគេ(នាយហុងដា) តែក្រោយពេលសម្លាប់រួច សង្សាររបស់គេបានចេញមកពីធ្វើការវិញទាន់ ខ្លួនក៏បានអង្វរសង្សារកុំឲ្យឆោឡោ និងជួយយកភួយមករុំសាកសព អូសទៅទុកនៅបន្ទប់ទឹក ព្រមទាំងដោះយកកងដៃ ២១កង ចិញ្ជៀន ១វង់ ទូរស័ព្ទម៉ាកណូគាមួយគ្រឿង និងម៉ូតូមួយគ្រឿងរួចចាកចេញពីទីនោះតែម្តង។
គួរបញ្ជាក់ផងដែរថា អតីតតារាកំប្លែងអ្នកនាងរ៉េន សុធារី ហៅនាងឃ្មឹប បានចូលប្រឡូកក្នុងពិភពសិល្បៈតាំងពីឆ្នាំ១៩៩៩ តាមរយៈឪពុកនាងគឺនាយជី វ៉ាន់ស៊ុយ ដែលទើបទទួលមរណភាពកាលពីឆ្នាំ២០១៣។ នាងឃ្មឹប បានរៀបការជាមួយនឹងនាយហុងដា ជាសិស្សច្បងរួមក្រុម ហើយបង្កើតបានកូនពីរនាក់ តែដោយសារអំណាចទឹកប្រាក់នាងឃ្មឹបក៏បានរត់ចោលនាយហុងដា ក្រោយពីរស់នៅជាមួយគ្នាជាប្តីប្រពន្ធអស់រយៈពេល ១២ ឆ្នាំមក៕
May 16, 2017
តើ លី អ៉ីវ៉ាធីណា បកស្រាយយ៉ាងណា ចំពោះពិធីរៀបការមិនសំខាន់សម្រាប់នាង?
ភ្នំពេញៈ នាពេលថ្មីៗនេះបានធ្វើឲ្យមហាជនមានការភ្ញាក់ផ្អើល និងនឹកស្រណោះសម្តីរបស់តារាចម្រៀងស្រីសាច់សខ្ចី រាងតូចល្អិត តែសំឡេងពីរោះរណ្តំចិត្តអ្នកស្តាប់ ជាកូនកាត់ចិនកញ្ញា លី អ៉ីវ៉ាធីណា ដែលសរសេរក្នុងសារមួយឃ្លាថា «រៀបការពិតជាមិនសំខាន់អ្វីបន្តិចសោះឡើយសម្រាប់រូបនាង!» ដែលបានបង្ហោះតាមគណនីហ្វេសប៊ុកនាង។
សាររបស់តារាចម្រៀងស្រីកញ្ញា លី អ៉ីវ៉ាធីណា ដែលទើបតែចេញ Official Audio បទថ្មីបំផុតរបស់ខ្លួននៅលើទ្រនំផលិតកម្មថោនដែលមានចំណងជើងថា «អប្សរាសក់ខ្មៅ» ជាបទចម្រៀងតាមលំនាំដើមបកស្រាយដោយម្ចាស់សំនៀងដើមគឺអ្នកស្រី សុង សេងហ៊ន ដែលត្រូវបានផលិតកម្មថោនលើកយកមកធ្វើបទភ្លេងថ្មី និងច្រៀងសាជាថ្មីនោះ បានផ្ទុះជាពាក្យចោទសួរដេញដោលគ្នាបែកផ្សែងពេញបណ្តាញសង្គមតែម្តង ដោយពួកគេបានលើកឡើងថា បើរៀបការមិនសំខាន់សម្រាប់កញ្ញា លី អ៉ីវ៉ាធីណា មែននោះ អ៊ីចឹងមានន័យថា នាងធ្លាប់បានរៀបការរូចហើយ មែនទេ? អ្នកខ្លះលើកឡើងថា ឬមួយក៏នាងចូលចិត្តវិធីផ្លូវកាត់ៗ ដោយគ្រាន់តែស្រឡាញ់គ្នាហើយនាំគ្នាទៅចុះអេតាស៊ីវិលជាការស្រេចតែម្តង? ខណៈដែលអ្នកខ្លះទៀតនិយាយថា សារនោះប្រហែលជានាងគ្រាន់តែនិយាយលេងទេដឹង?។
តែពេលបកស្រាយប្រាប់ឡារ៉ែន តារាចម្រៀងស្រីដែលបច្ចុប្បន្នមានវ័យ៣២ឆ្នាំ ដែលមហាជនក៏ធ្លាប់បានស្គាល់ និងល្បីផងដែរជាមួយទឹកដមសំនៀងដ៏ពីរោះពេលច្រៀងជាភាសាចិនដ្បិតតែនាងជាកូនកាត់ខ្មែរ-ចិននោះបានបកស្រាយលម្អិតមកវិញថា៖ «ចា៎ស ខ្ញុំពិតជានិយាយបែបនោះមែន! ខ្ញុំនិយាយថាដូច្នោះ គឺមើលឃើញថាស្រ្តីភាគច្រើនមានការខ្វល់ខ្វាយខ្លាំងទៅនឹងពិធីរៀបការ ខណៈនាងខ្ញុំវិញគិតថា រៀបការមិនសំខាន់នោះទេ ហើយអ្វីដែលសំខាន់គឺការរកបានគូស្នេហ៍ណាដែលចេះយល់ចិត្តគ្នា និងឲ្យតម្លៃគ្នាទៅវិញទេ»។
ទោះជាយ៉ាងណា មើលទៅតារាចម្រៀងស្រីរូបនេះពិតជាមិនចង់មានន័យថា នាងពិតជាចង់រំលងពិធីអាពាហ៍ពិពាហ៍តាមប្រពៃណីជាតិបែបកូនកាត់ខ្មែរ-ចិននោះឡើយ ដោយកញ្ញា លី អ៉ីវ៉ាធីណា តារាស្រីជាថៅកែលើជំនួញផ្នែកសេវាកម្មរៀបចំតុបតែងផ្កាស្រស់ក្នុងពិធីមង្គលការ ឬជប់លៀងដែលមានយីហោថា «B florist» នោះបានបន្ថែមថា៖ «ប្រសិនបើរៀបការ នាងខ្ញុំក៏មិនចោលពិធីប្រពៃណីខ្មែរបែបល្បាយកាត់ប្រពៃណីចិនដែរ ព្រោះនាងខ្ញុំជាកូនចៅកាត់ចិន។ តែពេលនេះ រឿងគូគាប់ហ្នឹងសុំលាក់សិនហើយ មិនទាន់ចង់ជម្រាបប្រាប់នោះទេ»៕
May 16, 2017
Kuyt ជួបការរីករាយ ខណៈ Feyenoord លើកពានរបស់ហូឡង់
Dirk Kuyt បានរងនូវការសើចចំអកឲ្យ នៅពេលដែលរូបគេបានវិលទៅកាន់ក្លិបដើមរបស់គេវិញគឺ Feyenoord កាលពី២ឆ្នាំមុន និងបាននិយាយនៅកាលនោះថា ពួកគេអាចនឹងឈ្នះពានក្របខ័ណ្ឌកំពូលរបស់ហូឡង់ ប៉ុន្តែទីបំផុត ខ្សែប្រយុទ្ធជើងចាស់រូបនេះ ដែលនឹងឈានចូលវ័យ៣៧ឆ្នាំនៅខែកក្កដាខាងមុខ បានជួបនូវការរីករាយកាលពីថ្ងៃអាទិត្យ នៅពេលដែលរូបគេបានស៊ុតបាល់បញ្ចូលទី៣គ្រាប់ ធ្វើឱ្យក្រុមរបស់គេទទួលជ័យជម្នះ ៣-១ លើក្រុម Heracles Almelo ដើម្បីឈ្នះពានរបស់ហូឡង់នៅថ្ងៃចុងក្រោយនៃរដូវកាលនេះ។
ក្នុងអាជីពដ៏ជោគជ័យរបស់គេ Kuyt បាននិយាយថា ពាននេះគឺជាពានសំខាន់ជាងគេ។ ស្របពេលដែលក្រុម Feyenoord បានធ្វើការអបអរការឈ្នះពានជាលើកទី១របស់ពួកគេ បើគិតចាប់តាំងពីឆ្នាំ១៩៩៩មក។ Kuyt ដែលធ្លាប់ជាអតីតកីឡាកររបស់ Liverpool បានប្រាប់អ្នកយកព័ត៌មានថា៖ «ខ្ញុំបានដឹងនៅពេលដែលខ្ញុំបានវិលមកក្លិបចាស់វិញកាលពី២ឆ្នាំមុនថា យើងអាចឈ្នះពានជើងឯកនេះ។ គ្រប់គ្នាសើចចំអកឲ្យខ្ញុំ នៅពេលដែលខ្ញុំបាននិយាយបែបនេះ»។

Kuyt ដែលបានចាប់ផ្តើមអាជីពជាលើកដំបូងរបស់គេជាមួយនឹងក្លិប Feyenoord មុននឹងផ្ទេរទៅកាន់ក្រុមហង្សក្រហម Liverpool កាលពីឆ្នាំ២០០៦ និងក៏បានលេងឲ្យក្លិប Fenerbahce ផងដែរនោះបានបន្ថែមទៀតថា៖ «ខ្ញុំបានលេងការប្រកួតក្របខ័ណ្ឌ Champions League វគ្គផ្តាច់ព្រ័ត្រមួយលើក និងព្រឹត្តិការណ៍ World Cup វគ្គផ្តាច់ព្រ័ត្រមួយលើក ក៏ដូចជាក្នុងក្លិបដ៏មានប្រជាប្រិយភាពជាច្រើន។ ប៉ុន្តែនេះគឺជាពេលវេលាដ៏ល្អបំផុតនៃអាជីពរបស់ខ្ញុំ»៕
ប្រភពព័ត៌មាន៖ BBC
May 16, 2017
Fabregas ជួយឲ្យ Chelsea បន្តឈ្នះក្នុងដំណើរឆ្ពោះទៅកាន់ការអបអរការឈ្នះពាន
ខ្សែបម្រើ Cesc Fabregas បានរកគ្រាប់បាល់ឈ្នះឱ្យ Chelsea ក្នុងពេលដែលក្រុមតោខៀវនេះ ដណ្តើមបានជ័យជម្នះដ៏សែនរំភើបក្នុងលទ្ធផល ៤-៣ លើក្រុម Watford កាលពីថ្ងៃចន្ទ មុននឹងពួកគេបំពេញការអបអរសម្រាប់ការឈ្នះពានក្របខ័ណ្ឌ Premier League នៅថ្ងៃចុងក្រោយនៃយុទ្ធនាការនេះ ដោយត្រូវប៉ះជាមួយក្រុម Sunderland នៅថ្ងៃអាទិត្យខាងមុខនេះ។
ខ្សែការពារ John Terry រកបានគ្រាប់បាល់បើកឆាកក្នុងការបង្ហាញខ្លួនជាលើកដំបូងនៃការប្រកួត២លើកចុងក្រោយរបស់គេសម្រាប់ក្រុមម្ចាស់ជើងឯក Chelsea នេះ។ ប្រធានក្រុមរបស់ក្រុមតោខៀវមួយនេះនឹងចាកចេញពីក្លិបនៅរដូវក្តៅនេះ ក្រោយពីបានចំណាយពេលអស់ ២២ឆ្នាំនៅជាមួយក្រុមនេះបានធ្វេសប្រហែសនៅរយៈពេលប៉ុន្មាននាទីក្រោយមក ខណៈដែល Watford បានធ្វើការវាយបកវិញដោយរកបានគ្រាប់បាល់តាមស្មើ តែរយៈពេល១០នាទីមុនពេលសម្រាកតង់ទី១ ខ្សែការពារ Cesar Azpilicueta បានស៊ុតបាល់ពីចម្ងាយបញ្ចូលទីយ៉ាងល្អដើម្បីជួយឲ្យក្រុម Chelsea មានគ្រាប់បាល់នាំមុខវិញ មុនពេលខ្សែប្រយុទ្ធ Michy Batshuayi បានបន្ថែមការនាំមុខរបស់ក្រុមខ្លាំងមួយនេះនៅនាទីទី៤២។
កីឡាករ Daryl Janmaat និង Stefano Okaka បានធ្វើការវាយបកដើម្បីជួយឲ្យក្រុម Watford រកបានគ្រាប់បាល់តាមស្មើវិញ ប៉ុន្តែ Fabregas បានរក្សានិងការពារជាប់ធ្វើឲ្យក្រុមរបស់លោក Antonio Conte ស្ថិតនៅលើដំណើរផ្លូវឆ្ពោះទៅកាន់ការក្លាយជាក្រុមដំបូងគេក្នុងការឈ្នះ ៣០ប្រកួតក្នុងចំណោមការប្រកួតក្របខ័ណ្ឌកំពូលអង់គ្លេសចំនួន៣៨ប្រកួតនាពេលនេះតែម្តង។
លោក Conte គ្រូបង្វឹករបស់ Chelsea បានប្រាប់ទូរទស្សន៍ BBC Sport ថា៖ «វាជារាត្រីដ៏សំខាន់មួយ ពីព្រោះយើងបានឈ្នះពាន។
ខ្ញុំបានសម្រេចចិត្តផ្លាស់ប្តូរកីឡាករ៩នាក់ទៅលើជម្រើសទាំង១១នាក់ដំបូង និងបានផ្តល់ឱកាសដល់កីឡាករវ័យក្មេងជាច្រើន។ ខ្ញុំត្រូវតែរីករាយពីព្រោះការឆ្លើយតបពិតជាល្អណាស់»៕
ប្រភពពី៖ The Sun
May 16, 2017
សាកលវិទ្យាល័យធំបំផុត 5 នៅអាស៊ី
ស្ថាប័នកំណត់ចំណាត់ថ្នាក់សាកលវិទ្យាល័យល្បីបំផុតលើពិភពលោក The World Universities Ranking បានបង្ហាញលទ្ធផលរបស់ខ្លួនបន្ទាប់ពីបានធ្វើការស្រាវជ្រាវ និងប្រមូលព័ត៌មានពីសាកលវិទ្យាល័យធំៗចំនួន 100ក្នុងតំបន់។
ព័ត៌មានទាំងអស់នេះមានសារសំខាន់ណាស់សម្រាប់អ្នកដែលមានបំណងសិក្សានៅក្រៅប្រទេស ឬស្វែងរកអាហារូបករណ៍ដើម្បីសិក្សាលើជំនាញដែលខ្លួនស្រឡាញ់នៅអាស៊ី។
ខាងក្រោមនេះជាចំណាត់ថ្នាក់សាកលវិទ្យាល័យធំបំផុត 5 (Top 5 Universities Ranking) នៅអាស៊ី៖
1. សាកលវិទ្យាល័យ National University of Singapore នៃប្រទេសសិង្ហបុរី

2. សាកលវិទ្យាល័យ Peking University នៃសាធារណរដ្ឋប្រជាមានិតចិន

3. សាកលវិទ្យាល័យ Tsighua Uniniversity នៃសាធារណរដ្ឋប្រជាមានិតចិន

4. សាកលវិទ្យាល័យ Nanyang Technology University នៃប្រទេសសិង្ហបុរី

5. សាកលវិទ្យាល័យ University of Hong Kong នៅទីក្រុងហុងកុង៕
May 16, 2017