Category: សង្គម និងសេដ្ឋកិច្ច

ដោយសារតែ​កូនក្រមុំ​ជា​មនុស្ស​ម្នាក់​ដែលមានភាព​សំខាន់បំផុត​នៅក្នុង​ថ្ងៃនេះ ហេតុនេះហើយ​បានជា​ការជ្រើសរើស​អ្នក​ផាត់មុខ​ដែល​ពេញ​ទៅដោយជំនាញ​ក្នុងការ​ផាត់មុខ​គឺជា​រឿង​សំខាន់បំផុត ហើយ​អ្វីដែល​យើង​គ្រប់គ្នា​តែង​សម្គាល់​ឃើញ​នោះ​គឺ អ្នកភ្នួ​ង​ស្ទើរតែ​គ្រប់គ្នា​ទាំងអស់ តែងតែ​ផាត់មុខ​កូនក្រមុំ​ឱ្យមាន​ភាព​ក្រាស់​ខ្លាំង​ជាង​ពេល​ធម្មតា។ អ្នកភ្នួ​ង​គេ​មិនមែន​ចេះតែ​ធ្វើតាម​គ្នា ឬ​ធ្វើ​តាមតែ​ចិត្ត​នឹកឃើញ​នោះទេ តែ​ដែល​គេ​ធ្វើ​នេះ​ព្រោះតែ​គេ​មានហេតុផល​របស់គេ ចំណែកឯ​ហេតុផល​នោះ​គឺ ៖

កូនក្រមុំ​ត្រូវការ​ភាពលេច​ធ្លោ​ជាងអ្នកណាៗទាំងអស់ ហើយក៏​ត្រូវតែ​តុបតែង​ឱ្យ​ស្អាត​ប្លែកជាង​ពេល​រាល់ដង​ដែល​កូនក្រមុំ​ធ្លាប់​តុបតែង​ផងដែរ ហើយ​ការផ្លាស់ប្តូរ​ដើម្បី​ភាពស្រស់ស្អាត​ប្លែក​ភ្នែក​នេះ​អាចធ្វើ​ទៅបាន​គឺ​ត្រូវ​ពឹងផ្អែក​លើការ​ផាត់មុខ​នេះហើយ។

– ការ​ផាត់មុខ​ក្រាស់​មាន​ប្រសិទ្ធភាព​ក្នុង​ការជួយ​បិទបាំង​ភាពស្លេកស្លាំង ស្នាម​មុន ស្លាកស្នាមផ្សេងៗ ស្បែក​កន្ទួល​ក្រហម ឬ​ខូង និង​ស្នាម​ខ្មៅ​ស្រអាប់ ហើយ​អ្វីដែល​ពិសេស​ជាងនេះទៀត​នោះ​គឺ ការ​ផាត់មុខ​អាចជួយ​ឱ្យ​ទម្រង់​មុខ​របស់​កូនក្រមុំ​មើលទៅ​សម​ស្អាត​ទៀតផង។

– ការតុបតែង​មុខ​ឱ្យបាន​ក្រាស់​ជាង​ធម្មតា​ក៏ដើម្បី​បន្ថែម​ភាពស្រស់ស្អាត​នាពេល​ថតរូប​ផងដែរ។ ធ្លាប់​ឮ​ដែរ​ទេ​នៅពេលដែល​អ្នក​និយាយថា “ផាត់មុខ​ក្រា​ស់អ៊ី​ចឹ​ង​ខ្លាច​ថា​អាក្រក់​មើល​ទេ?” តែ​ពេលនោះ​អ្នក​តែង​មុខ​ក៏​ប្រាប់​វិញ​ថា “មិន​អី​ទេប៉ុណ្ណឹង​ទើប​ពេល ​ថតរូប​ទៅ​មើល​ឃើញ​ស្រស់ស្អាត” ហើយ​បន្ទាប់ពីនោះ​អ្នកនឹង​ឃើញថា​វា​ពិត​ដូច​អ្នក​តែង​មុខ​ប្រាប់​មែន។

– បើទោះជា​ថ្ងៃនេះ​កូនក្រមុំ​ផាត់មុខ​ឱ្យ​ក្រាស់ជាង​ពេល​ធម្មតា​ក៏ដោយ ក៏​មិន​ធ្វើឱ្យ​អ្នកមានអារម្មណ៍​ថា​ក្រាស់​ជ្រុល​ពេក​ដែរ ព្រោះ​នៅពេល​ដែល​អ្នក​ភ្នួ​ង​បន្ថែម​គ្រឿងអលង្ការ សម្លៀកបំពាក់ និង​គ្រឿង​តុបតែងផ្សេងៗទៀត​នោះ កូនក្រមុំ​នឹង​មើលទៅ​ស្អាត និងស័ក្តិសម​បំផុត។

តាមរយៈ​ការរៀបរាប់​ខាងលើ​អ្នក​ប្រហែលជាលែង​ឆ្ងល់​ហើយ​មែន​ទេ​ថា ហេតុអ្វី​បានជា​អ្នក​ភ្នួ​ងចូលចិត្ត​តែង​មុខ​ឱ្យ​កូនក្រមុំ​រាង​ក្រាស់​ជាង​ពេលធម្មតា។ ប៉ុន្តែ​អ្វី​ដែលជា​ចំណុច​ពិសេស​មួយទៀតដែល​អ្នក​គួរ​ដឹង​នោះ​គឺ​ភាព​ក្រាស់​នៃ​ការ​ផាត់ម្សៅ​លើ​ផ្ទៃមុខ​កូនក្រមុំ​មិនមាន​ភាពស្មើគ្នា​នោះទេ អ្នកខ្លះ​អាច​ក្រាស់​តិច អ្នកខ្លះ​អាច​ក្រាស់​ខ្លាំងនិយាយ​រួម​គឺ​វា​អាស្រ័យទៅលើ​ស្បែក​មុខ​របស់​កូនក្រមុំ​ដែរ។

បើ​កូនក្រមុំ​ណា​ដែលមាន​ស្បែកមុខ​ស​ស្អាត គ្មាន​ស្នាម ភ្លឺ​ម៉ដ្ឋ​រលោង​ជាស្រេច​ហើយ​នោះ បរិមាណ​នៃ​ការប្រើ​ម្សៅ និង​ភាពក្រាស់​នៃ​ការ​ផាត់ម្សៅ​ក៏​នឹងមាន​កាន់តែ​តិច ដូច្នេះសម្រាប់​អនាគត​កូនក្រមុំ​ណា​ដែល​មិន​ចង់​ប្រើម្សៅ​ជា​ជំនួយ​ច្រើនពេក​ទេនោះ ត្រូវតែ​ថែរក្សា​សម្រស់​ផ្ទៃមុខ​របស់ខ្លួន​ឱ្យ​បានល្អ​ស្អាត​ជាមុនឱ្យ​ហើយ​ទៅ៕

នៅពេលជិតដល់ថ្ងៃប្រឡង សិស្ស ឬនិស្សិតភាគច្រើនតែងតែមានអារម្មណ៍ភ័យខ្លាចនិងព្រួយបារម្ភ ហើយមានអ្នកខ្លះទៀតថែមទាំងខំប្រឹងអានសៀវភៅមេរៀនដែលគរជាច្រើនក្បាលក្នុងពេលតែមួយទៀតផង។ មានសិស្សមួយចំនួនបានគិតថាពេលជិតប្រឡង គឺជាពេលដែលពិបាករៀនជាងគេ ហើយពីមួយថ្ងៃទៅមួយថ្ងៃគឺកាន់ជ្រួលច្របល់ មិនដឹងថាត្រូវចាប់មេរៀនណាទុកមេរៀនណាដើម្បីសិក្សាឡើយ។

យុវជន នាង កុសល និស្សិតនិទ្ទេស B+ នៅថ្នាក់វិទ្យាល័យបានលើកឡើងថា នៅពេលដែលជិតប្រឡង គឺយើងទាមទារឱ្យមានភាពវៃឆ្លាតបន្តិចតែសម្រាប់ប្អូន គឺប្អូនមិនចំណាយពេលវេលាអានមេរៀនទាំងអស់នោះទេ ភាគច្រើនប្អូនយកមេរៀនដែលបានរៀនហើយមកសរសេរវាសង្ខេបឡើងវិញ ឬមើលសៀវភៅដែលបានកត់ចំណាំនៅក្នុងថ្នាក់មកមើល ព្រោះសៀវភៅសរសេរមានទំព័រតិចជាង តែបង្កប់ដោយចំណុចសំខាន់ៗច្រើន។

យុវជន នាង កុសល បាននិយាយថា៖ «ខ្ញុំចូលចិត្តអានសៀវភៅដែលទើបនឹងរៀនហើយថ្មីៗជាមុន បន្ទាប់មកទើបខ្ញុំមើលមេរៀនចាស់ៗដែលបានសិក្សា។ នៅពេលដែលខ្ញុំធ្វើបែបនេះ ខ្ញុំអាចមានទំនុកចិត្តច្រើនព្រោះមេរៀនដែលទើបនឹងរៀនហើយ វាងាយចាំ និងនៅ ថ្មីៗ បន្ទាប់ពីទុកចិត្តលើខ្លួនឯងច្បាស់ហើយ ទើបបន្តទៅអានមេរៀនចាស់ៗជាបន្តទៀត»។ យុវជនខាងលើបានបន្ថែមទៀតថា សិស្សមួយចំនួនអាចនឹងសាកល្បងមើលឯកសារត្រួសៗដែលខ្លួនធ្លាប់បានរៀនហើយ បន្ទាប់មកទើបសាកល្បងព្យាយាមធ្វើតេស្តសមត្ថភាពខ្លួនឯងតាមរយៈការឆ្លើយសំណួរសំខាន់ៗដែលយើងគិតថាអាចនឹងមានចេញនៅពេលប្រឡង។

បង្ហាញពីវិធីដោះស្រាយបញ្ហាពេលជិតប្រឡងនេះដែរ កញ្ញា លឹម លីឆាយ និស្សិតដែលកំពុងសិក្សាផ្នែកទំនាក់ទំនងអន្តរជាតិនៅឯបរទេសបានថ្លែងថា ដើម្បីដោះស្រាយបញ្ហានៅពេលជិតប្រឡង សិស្សគួរតែសម្រាក និងរៀបចំតារាងនៃកម្មវិធីសិក្សាឱ្យបានច្បាស់លាស់។

កញ្ញា លឹម លីឆាយ បាននិយាយថា៖ «នៅពេលដែលយើងមានកម្មវិធីច្បាស់លាស់ យើងនឹងងាយស្រួលក្នុងការអានសៀវភៅដោយស្ងប់ចិត្តព្រោះយើងដឹងច្បាស់ពីពេលវេលានៃឯកសារដែលត្រូវអាន។ ម្យ៉ាងវិញទៀត យើងគួរគិតឱ្យបានច្បាស់ពីមេរៀនដែលពូកែហើយ និងមិនសូវពូកែ ដើម្បីធ្វើការរំឭកឱ្យមានតុល្យភាព ទើបចំណេញពេលវេលា»។

កញ្ញា លឹម លីឆាយ បានបន្តទៀតថា ការកំណត់ពេលវេលាច្បាស់លាស់ ទោះបីជាពេលនោះខ្លីក៏ដោយក៏វាអាចជួយឱ្យខួរក្បាលយើងមានរបៀប និងទប់ស្កាត់ក្តីភ័យខ្លាចបានមួយចំនួនផងដែរ៕

កីឡាករ ង៉ែត រដ្ឋា របស់ក្លិបតាព្រហ្មមានជ័យត្រូវតស៊ូជាមួយអ្នកប្រដាល់ថៃផ្លាយ ណយ (Phlay Noy) ខណៈដែលអ្នកប្រដាល់កម្ពុជា សង្ឃឹមឈ្នះម្ដងទៀតដើម្បីរក្សាតំណែង ដែលក្នុងនោះ ស្ថិតិប្រកួតជាង ៧៣ដង ឈ្នះ៦២ដង ចាញ់៨ដង និង ស្មើពិន្ទុ៣ដង។

នេះជាជំនួបប្រកួតក្នុងព្រឹត្តិការណ៍ខ្សែក្រវាត់ខារ៉ាបាវទម្ងន់៦៣,៥០គីឡូក្រាមលើសង្វៀនអាស៊ីអាគ្នេយ៍នៅរសៀលថ្ងៃទី២០ឧសភាខាងមុខ។ ចំណែកឯគូប្រកួតរបស់ ង៉ែត រដ្ឋា វិញ គឺជាអ្នកប្រដាល់ថៃដែលមានប្រវត្តិប្រកួតចំនួន៦៩ដង ឈ្នះ៥៦ដង ចាញ់១២ដង និងស្មើពិន្ទុ១ដង ។

ផ្លាយ ណយ ជាអ្នកប្រដាល់ថៃដែលមានចិត្តត្រជាក់ណាស់ តែគេប្រើជើងទាត់បានល្អ គេមិនសូវជាពូកែលេងកែងប៉ុន្មានទេ តែបើកណ្ដាប់ដៃ និងជង្គង់វិញ អ្នកប្រដាល់ថៃរូបនេះវ៉ៃចេញធ្ងន់ៗល្អណាស់ តែសម្រាប់រដ្ឋាវិញ កែងរបស់គេក៏មិនសូវជាច្បាស់ប៉ុន្មានឡើយ តែគេនៅតែចូលចិត្តប្រើកែង កណ្ដាប់ដៃ និង ជង្គង់ដែលវ៉ៃបានត្រឹមតែល្អមើលប៉ុណ្ណោះ តែអ្នកប្រដាល់រូបនេះទាត់បានល្អ ហើយខ្លាំងល្អណាស់ មានអ្នកប្រដាល់មិនតិចទេដែលត្រូវរដ្ឋាទាត់ឲ្យបាក់ដៃ ប្រកួតលែងកើតអស់មួយជីវិតក៏មាន។ រវាងង៉ែត រដ្ឋា និង ផ្លាយ ណយ តើនរណាឈ្នះ និងនរណាចាញ់ គេលំបាកនឹងប៉ាន់ស្មានជាមុនណាស់ តែអ្នកប្រដាល់ទាំងពីររូបនេះ គេជឿថានឹងប្រកួតគ្នាដល់ចប់ទឹកទី ៥ មិនខាន ។

ការប្រកួតគ្នាក្នុងព្រឹត្តិការណ៍ដណ្តើមខ្សែក្រវាត់នេះដែរ អ្នកប្រដាល់កម្ពុជារឿង សារ័ត្ន មកពីក្លិបទ័ពឆត្រយោង៩១១នឹងត្រូវជួបជាមួយអ្នកប្រដាល់ថៃឡាក់ ឡាយ (Lack Lay)។ សារ័ត្នដែលមានប្រវត្តិប្រកួតចំនួន៦៦ដង ឈ្នះ៥៦ដង និងចាញ់១០ដងនោះ មួយប្រកួតដំបូងរបស់គេបានទទួលជ័យជម្នះ តែចំពោះឡាក់ ឡាយវិញ មួយប្រកួតដំបូងរបស់គេជួបនឹងបរាជ័យ។ សូមជម្រាបថា អ្នកប្រដាល់ថៃរូបនេះមានប្រវត្តិប្រកួតចំនួន៦៦ដង ឈ្នះ៥០ដង ចាញ់១៤ដង និង ស្មើពិន្ទុ ២ ដង ។

សម្រាប់ការប្រកួតលើកនេះម្នាក់ៗសុទ្ធតែត្រូវការឈ្នះដើម្បីប្រជែងគ្នាសន្សំពិន្ទុក្នុងការរកកៅអីនៅវគ្គពាក់កណ្ដាលផ្ដាច់ព្រ័ត្រដូចគ្នា ។ សារ័ត្ន បើមួយប្រកួតនេះគេបានទទួលជ័យជម្នះនោះ គេមិនសូវជាបារម្ភប៉ុន្មានទេ តែបើចាញ់វិញ អ្វីៗអាចស្ថិតក្នុងភាពស្រពេចស្រពិល…។ ចំពោះឡាក់ ឡាយដែលការប្រកួតដំបូងជួបបរាជ័យវិញនោះ បើការប្រកួតលើកនេះចាញ់ទៀត ឱកាសសម្រាប់ដណ្ដើមកៅអីឡើងទៅវគ្គពាក់កណ្ដាលផ្ដាច់ព្រ័ត្រក៏ទំនងជាលំបាកដែរ។ តើរឿង សារ័ត្ន នឹងជួបសំណាងល្អ ឬឡាក់ ឡាយជាអ្នកជួបសំណាងល្អ?។តែយើងសង្ឃឹមថា សារ័ត្ននឹងមិនធ្វើឲ្យអ្នកគាំទ្ររបស់គេអស់សង្ឃឹមឡើយ៕

បើតាមទំព័រ Facebook របស់ក្លឹបបាល់ទាត់ភ្នំពេញក្រោនកាលពីព្រឹកម្សិលមិញនេះ ក្រុមណាហ្គាវើលត្រូវជួបប្រកួតមិត្តភាពកម្ដៅសាច់ដុំជាមួយនឹងក្លឹបភ្នំពេញក្រោន នៅថ្ងៃទី ២០ ខែឧសភា នៅកីឡដ្ឋាន RSN ខណៈដែលអ្នកគាំទ្រអាចចូលរួមទស្សនាបានដោយសេរី ពុំមានការលក់សំបុត្រឡើយ ។

ការណាត់គ្នាប្រកួតជាលក្ខណៈមិត្តភាពរវាងក្រុមលំដាប់កំពូលតារាងទាំងពីរនេះ គឺស្របពេលដែលលីកកំពូលកម្ពុជារដូវកាលថ្មី ឆ្នាំ២០១៧ផ្អាកការប្រកួតមួយសប្ដាហ៍ បន្ទាប់ពីបញ្ចប់ការប្រកួតសន្សំពិន្ទុក្នុងជើងទី១ កាលពីចុងសប្ដាហ៍មុនរួចមក ។

យ៉ាងណាមិញនៅជំនួបក្នុងជើងទី១ រវាងក្រុមខ្លាំងទាំងពីរ គឺភ្នំពេញក្រោន បានយកឈ្នះណាហ្គាវើលក្រៅទឹកដី ១-០ កាលពីខែកុម្ភៈកន្លងទៅ ។ គួរបញ្ជាក់ថា ជាបណ្ដោះអាសន្ននៅពេលនេះ ក្រុមណាហ្គាវើល កំពុងឈរលើលេខរៀងទី៣ ក្នុងតារាងពិន្ទុលីកកំពូលកម្ពុជា បន្ទាប់ពីបញ្ចប់ការប្រកួតសន្សំពិន្ទុជើងទី១ ចំនួន ១១ប្រកួតដោយឈ្នះ៦ ស្មើ៣ និងចាញ់២ និងមាន ២១ពិន្ទុរួចមក ។

រីឯអតីតក្រុមជើងឯក ៦សម័យកាល ភ្នំពេញក្រោន កំពុងឈរលើលេខរៀងទី៥ និងមាន១៨ពិន្ទុ ជាមួយលទ្ធផល ១១ប្រកួតដូចគ្នា តែឈ្នះ៥ ស្មើ៣ និងចាញ់៣ ៕

នាសម័យបច្ចុប្បន្ន ប្រព័ន្ធនៃការធ្វើដំណើរបានរីកដុះដាលខ្លាំង ដែលធ្វើឱ្យការភ្ជាប់ទំនាក់ទំនងពីប្រទេសមួយទៅប្រទេសមួយកាន់តែមានលក្ខណៈជិតស្និទ្ធ ហើយកត្តានេះបានផ្តល់ឱកាសឱ្យយុវជនជាច្រើនបានស្វះស្វែងរកការសិក្សានៅបណ្តាប្រទេសនានាដែលគេពេញចិត្ត។

លោក កុលផេង វឌ្ឍនា អ្នកនិពន្ធ និងជាអតីតនិស្សិតពូកែនៅបរទេសម្នាក់បានលើកឡើងថា អ្នករៀនគួរបើកខួរក្បាលឱ្យទូលាយ ហើយគិតថាខ្លួនឯងរស់នៅក្នុងពិភពលោកដ៏ធំធេងមួយ មិនមែនរស់នៅតែក្នុងប្រទេសកម្ពុជានោះទេ។ យើងអាចមានឱកាសច្រើនដើម្បីហោះទៅឱ្យឆ្ងាយ ហើយសម្លឹងឱ្យបានទូលាយឡើងដើម្បីទទួលយកចំណេះដឹងថ្មីៗពីគ្រប់ទីកន្លែង។

លោក កុល ផេង វឌ្ឍនា បាននិយាយថា៖ «នៅពេលដែលយើងបើកចិត្តឱ្យទូលាយ ទទួលយកចំណេះដឹងពីគ្រប់ទីកន្លែងក្នុងពិភពលោក យើងនឹងមានការគិតដែលទូលំទូលាយ ហើយបទពិសោធដែលយើងទទួលបានពីបណ្តាប្រទេសទាំងអស់នោះ នឹងក្លាយជាមេរៀនល្អៗសម្រាប់ការអភិវឌ្ឍប្រទេសរបស់យើង»។

អ្នកនិពន្ធម្នាក់នេះបានបញ្ជាក់ទៀតថា យុវជនកម្ពុជានាពេលនេះមិនមែនរស់នៅតែម្នាក់ឯងនោះទេ ហើយក៏មិនគួរគិតបែបចង្អៀតពេកដែរ។ ឱ្យតែមានការតស៊ូ និងការតាំងចិត្តច្បាស់លាស់ នោះអ្នកទាំងអស់គ្នាពិតជាអាចមានឱកាសទៅសិក្សានៅបរទេស និងអាចក្លាយជាសិស្សពូកែនៅបរទេសបានទាំងអស់ ។

ស្រដៀងគ្នានេះដែរ កញ្ញា ណារ៉ា សុខេមា យុវនារីខ្មែរដែលធ្លាប់ឆ្លងកាត់ការធ្វើដំណើរទៅធ្វើកម្មសិក្សា និងសិក្សាជាង ៤០ ប្រទេសបានលើកឡើងថា តាមពិតទៅយុវជនកម្ពុជាពិតជាអាចប្រកួតប្រជែងផ្នែកចំណេះដឹងជាមួយនឹងបណ្តាប្រទេសដទៃ ហើយអ្វីដែលកាន់តែសំខាន់ក្នុងការរុញច្រានយើងឱ្យក្លាយជានិស្សិតដែលអាចសិក្សានៅបរទេសបាននោះ គឺកម្លាំងចិត្ត។ កញ្ញាបានបន្តថា ការជំរុញទឹកចិត្តខ្លួនឯងជារឿងសំខាន់មួយដែលយុវជនត្រូវធ្វើ ព្រោះថានៅពេលដែលយើងមានការតាំងចិត្តច្បាស់លាស់ ហើយហ៊ានសម្រេចចិត្តចេញទៅប្រកួតប្រជែង នោះឱកាសនឹងមានកាន់តែច្រើន។

កញ្ញា ណារ៉ា សុខេមា បាននិយាយថា៖ «យុវជនកម្ពុជា គួរមានសេចក្តីក្លាហានក្នុងការដាក់ពាក្យទៅសិក្សា ឬធ្វើកម្មសិក្សានៅបរទេស។ មានកម្មវិធីខ្លះគឺងាយស្រួលជាប់បំផុត គ្រាន់តែមិនមានមនុស្សហ៊ានដាក់ពាក្យតែប៉ុណ្ណោះ ហេតុនេះអ្នកណាចាប់ឱកាសបាន គឺអ្នកនោះនឹងជោគជ័យ»។

យុវនារីម្នាក់នេះបានលើកឡើងផងដែរថា នៅពេលដែលយើងមានការគិតគូរច្បាស់លាស់ និងបង្កើតចំណង់ដែលយើងចង់ទៅសិក្សានៅបរទេសឱ្យក្លាយជាបំណងយ៉ាងមុតមាំនោះ យើងនឹងមានចិត្តតស៊ូដើម្បីធ្វើឱ្យសុបិនក្លាយជាការពិត៕

ជាមួយនឹង​រូបភាព​ដូចដែល​បានដាក់​បង្ហាញ​នៅលើ​ទំព័រ​នេះ​ស្រាប់ “នី​ស័​រ​សាឡាដ” គឺជា​ប្រភេទ​អាហារ​ដែល​បណ្តា​ពួក​ជនជាតិបែប​បស្ចិមប្រទេស​មាន​ការនិយម​ចូលចិត្ត​ទទួលទាន​ជាខ្លាំង ក្រោម​ការដាក់​លាយ​បញ្ចូល​គ្នា​នូវ​ពពួកបន្លែស្រស់ៗជាច្រើន​ប្រភេទ ហើយក៏មាន​វត្តមាន​របស់​សាច់​ត្រី​សមុទ្រ​មាន​រសជាតិ​ឆ្ងាញ់ គឺ​សាច់​ត្រី​សាល់​ម៉ុ​ន និង​សាច់​ត្រី​ធូ​ណា​ផងដែរ។ សូម​ចូលរួម​សាកល្បង​ទទួលទាន​មុខម្ហូប​មួយ​នេះ​ទាំងអស់គ្នា ដែល​នាំ​ដោយ​ចុងភៅ​ប្រចាំ​ភោជនីយដ្ឋាន Cowboy។

+ គ្រឿងផ្សំ
* ត្រី​សាល់​ម៉ុ​ន
* ត្រី​ធូ​ណា
* បន្លែ​គ្រប់មុខ (Mix salad)
* ពងមាន់
* ដំឡូងបារាំង
* ផ្លែ​អូ​លីវ​ខ្មៅ
* ខ្មឹ​ម​បារាំង
* ប៉េងប៉ោះ​តូច
* នី​ស័​រ​ដ្រេះ​សី​ង

+ វិធី​ធ្វើ
ដំបូង​លាយ​បន្លែ​គ្រប់មុខ​ចូលគ្នា​ជាមួយ​ដំឡូងបារាំង ផ្លែ​អូ​លីវ​ខ្មៅ ខ្ទឹមបារាំង និង​ប៉េងប៉ោះ​តូច។  យក​ត្រី​សាល់​ម៉ុ​ន​ទៅ​ចៀន​រួច​ទុក​មួយអន្លើ។ បន្ទាប់មក​យក​ត្រី​ធូ​ណា​មក​លាយ​ជាមួយនឹង​ម៉ា​យ៉ូ​ណេ​ស រួច​រោយ​ពីលើ​មិច​សាលាដ​ជាមួយ​នី​ស័​រ​ដ្រេះ​សី​ង បន្ទាប់មក​ដាក់​ពងមាន់ និង​ត្រី​សាល់​ម៉ុ​ន​ពីលើ​គឺ​រួចរាល់​អាច​ទទួលទាន​បាន​ហើយ៕