យោងតាមតម្លៃក្នុងទីផ្សារអន្តរជាតិ ថ្លៃលក់រាយប្រេងឥន្ធនៈចាប់ពីថ្ងៃទី 11 ដល់ 20 ធ្នូ 2022 នឹងត្រូវលក់ 4,368 រៀល/លីត្រ សម្រាប់សាំងធម្មតា និង 4,718 រៀល/លីត្រ សម្រាប់ប្រេងម៉ាស៊ូត។ ប៉ុន្តែ រាជរដ្ឋាភិបាលកម្ពុជា បានបញ្ចុះតម្លៃលក់រាយប្រេងឥន្ធនៈនៅ កម្ពុជា ចំនួន 6.5 សេនដុល្លារ/លីត្រ។
ដូច្នេះ ថ្លៃលក់រាយប្រេងឥន្ធនៈសម្រាប់អនុវត្តពីថ្ងៃទី 11 ដល់ 20 ធ្នូ 2022 នឹងចុះមកនៅត្រឹម 4,100 រៀល/លីត្រ សម្រាប់សាំងធម្មតា និង 4,450 រៀល/លីត្រ សម្រាប់ប្រេងម៉ាស៊ូត។
អតីតខ្សែប្រយុទ្ធរបស់ អាហ្សង់ទីន Jorge Valdano បានអះអាងថា Lionel Messi កំពុងទាត់នៅ World Cup 2022 ក្នុងលំដាប់មួយដែលដូចទៅនឹងអតីតកំពូលតារាបាល់ទាត់ Diego Maradona។
«Messi កំពុងបង្ហាញបាននូវភាពអស្ចារ្យនៃបាល់ទាត់» Valdano ប្រាប់ទំព័រ TyC Sport កាលពីថ្ងៃទី 11 ធ្នូដូច្នេះ និងបន្តថា «គាត់ (Messi) កំពុងតភ្ជាប់បានទាំងស្រុង និងបង្ហាញបុគ្គលិកលក្ខណៈដូចទៅនឹង Maradona នៅ World Cup។ ខ្ញុំស្រលាញ់ចូលចិត្ត Messi តាំងតែពីបានឃើញគាត់លេងបាល់ដំបូង។ គាត់គឺជាមនុស្សទេពក្នុងរយៈពេល 20 ឆ្នាំមកហើយ។ អ្នកណាមិនស្រលាញ់ចូលចិត្ត Messi បញ្ជាក់ថា អ្នកនោះមិនចូលចិត្តបាល់ទាត់»។
Messi រកបាល់បាន 6 គ្រាប់នៅ World Cup 2022 តិចជាង Kylian Mbappe តែ 1 គ្រាប់ប៉ុណ្ណោះ។ ប្រធានក្រុមអាហ្សង់ទីនរូបនេះ សុទ្ធតែរកបានគ្រាប់បាល់ក្នុង 2 ប្រកួតនៅវគ្គជម្រុះផ្ទាល់។
Valdano គឺជាកីឡាករជម្រើសជាតិអាហ្សង់ទីន ដែលបានស៊ុតបញ្ចូលទីរបស់ អាល្លឺម៉ង់ខាងលិច ក្នុងវគ្គផ្ដាច់ព័ត្រនៅ World Cup 1986 ជួយឱ្យក្រុមរបស់ អាហ្សង់ទីន ដណ្ដើមបានពានជើងឯកនៅ ម៉ិកស៊ិក។ លោក Valdano ធ្លាប់លេងឱ្យ Real Madrid នៅដំណាក់ចុងក្រោយនៃអាជីពរបស់គាត់ ពីឆ្នាំ 1984 ដល់ 1987 និងបានដឹកនាំក្លឹបនេះពីឆ្នាំ 1994 ដល់ 1996។
ចំណែក Maradona វិញ មិនត្រឹមតែលេងបានល្អជាងគេនៅ World Cup 1986 នោះទេ តែក៏ត្រូវបាន FIFA ជ្រើសរើសជា «កីឡាករឆ្នើមបំផុតប្រចាំសតវត្សរ៍ទី 20» ផងដែរ។ លោក Maradona បានទទួលមរណភាពកាលពីថ្ងៃទី 25 វិច្ឆិកា 2020 ក្នុងវ័យ 60 ឆ្នាំ។ លោក Valdano យល់ថា «ស្មារតីរបស់ Maradona កំពុងត្រូវបានបង្ហាញនៅក្នុងក្រុមជម្រើសជាតិអាហ្សង់ទីន នាបច្ចុប្បន្ន»៕
Youssef En-Nesyri លោតឡើងដល់កម្ពស់ 2.78 ម៉ែត្រ ក្នុងពេលតែតប៉ើងសំណាញ់របស់ ព័រទុយហ្កាល់ នៅវគ្គ 1/8 World Cup 2022 ជិតស្មើនឹងកំណត់ត្រាលោតខ្ពស់របស់ Cristiano Ronaldo។
នាទីទី 42 នៃការប្រកួតក្នុងវគ្គ 1/8 នៅក្នុងកីឡដ្ឋាន Al Thumama ខ្សែការពារ Yahia Attiyat Allah ប្លោងគ្រាប់បាល់ពីស្លាបខាងឆ្វេងទៅកាន់តំបន់គ្រោះថ្នាក់។ អ្នកចាំទីរបស់ ព័រទុយហ្កាល់ Diego Costa ធ្វើឱ្យមានកំហុសនៅពេលរត់សំដៅទៅគ្រប់គ្រងបាល់ប៉ុន្តែមិនបានសម្រេច ខណៈដែល Youssef En-Nesyri ហាក់សង្កត់លើមុខខ្សែបម្រើ Ruben Dias និងតែតបញ្ចូលទីបានជោគជ័យ។
យោងតាមទូរទស្សន៍ belN Sports ដែលជាដៃគូសហការ World Cup 2022 របស់ FIFA ប្រចាំតំបន់មជ្ឈិមបូព៌ា និងអាហ្វ្រិកខាងជើង En-Nesyri បានប៉ះគ្រាប់បាល់នៅលើកម្ពស់ 2.78 ម៉ែត្រ។ ខ្សែប្រយុទ្ធរបស់ ម៉ារ៉ុក នេះមានកម្ពស់ 1.88 ម៉ែត្រ ដូច្នេះមានន័យថា គាត់លោកកម្ពស់ជិត 1 ម៉ែត្រ។
Ronaldo ដែលជាគូប្រជែងរបស់ En-Nesyri នៅលើទីលាន Al Thumama និងល្បីឈ្មោះថាលោកបានខ្ពស់ខ្លាំង ក៏លោតខ្ពស់ជាង En-Nesyri តែបន្តិច និងបានតែម្ដងគត់ កាលពីរដូវកាល Champions League 2012-2013 ដែលកាលណោះ Ronaldo លោកដល់កម្ពស់ 2.93 ម៉ែត្រ។
កីឡាករ En-Nesyri បានចូលរួមជាមួយក្រុមជម្រើសជាតិម៉ារ៉ុក តាំងពីឆ្នាំ 2016 ហើយមកដល់បច្ចុប្បន្ន គាត់រកបាន 17 គ្រាប់នៅក្នុង 55 ប្រកួត៕
បណ្ដាក្រុមហ៊ុនឯកជនដែលមានមូលធនទីផ្សារធំជាងគេនៅ ប្រទេសចិន បាន «ធ្លាក់ថ្លៃ» ជាង 50% ក្នុងរយៈពេល 2 ឆ្នាំ ក្នុងនោះ ភាគច្រើនកើតឡើងក្នុងវិស័យបច្ចេកវិទ្យា និងអចលនទ្រព្យ។
វិទ្យាស្ថានស្រាវជ្រាវ Hurun ដែលមានទីស្នាក់ការនៅទីក្រុង Shanghai ប្រទេសចិន ទើបតែបានប្រកាសនូវបញ្ជីចំណាត់ថ្នាក់ 500 ក្រុមហ៊ុនដែលមានតម្លៃជាងគេលើពិភពលោក (Hurun Global 500)។ ឆ្នាំនេះ តម្លៃសរុបរបស់ក្រុមហ៊ុនទាំង 500 នេះ បានថយចុះ 19%។ 340 ក្រុមហ៊ុនមានមូលធនទីផ្សារថយចុះ ឬនៅទ្រឹងដដែល។
«វិស័យដែលបានរងផលប៉ះពាល់ច្រើនជាងគេគឺការលក់រាយ ពិសេសគឺពាណិជ្ជកម្មអនឡាញ ដោយសារអតិផរណាកើនឡើងខ្ពស់ បណ្ដាលឱ្យបណ្ដាក្រុមហ៊ុនសម្របសម្រួលផ្នែកទូទាត់ប្រាក់ និងប្រគល់ទំនិញត្រូវដាំក្បាលចុះ» Rupert Hoogewerf ប្រធានក្រុមហ៊ុន និងជាប្រធានក្រុមស្រាវជ្រាវរបស់ Hurun ឱ្យដឹងដូច្នេះ។
ប្រទេសចំនួន 3 ដែលមានក្រុមហ៊ុនស្ថិតក្នុងបញ្ជីខាងលើច្រើនជាងគេគឺ សហរដ្ឋអាម៉េរិក ចិនដីគោក និងជប៉ុន។ ចំនួនក្រុមហ៊ុនអាម៉េរិក ដែលមានឈ្មោះក្នុងបញ្ជីចំណាត់ថ្នាក់នេះ គឺច្រើនជាងពាក់កណ្ដាល ធៀបនឹងចំនួនសរុប ពោលគឺមាន 260 ក្រុមហ៊ុន និងមានតម្លៃសរុប 30.4 ទ្រីលានដុល្លារអាម៉េរិក ស្មើនឹង 65%។ ចំណែក ប្រទេសចិន វិញ ឈរលំដាប់ទីពីរ ដោយមាន 35 ក្រុមហ៊ុន ស្មើនឹង 6% នៃតម្លៃសរុប។
ដោយឡែក Top 10 ស្ដីពីក្រុមហ៊ុនមានតម្លៃជាងគេលើពិភពលោក សុទ្ធតែជារបស់ សហរដ្ឋអាម៉េរិក។ ឆ្នាំនេះ ថ្វីបើបាត់បង់តម្លៃ 2.4 ទ្រីលានដុល្លារ ប៉ុន្តែ Top 10 ស្ដីពីក្រុមហ៊ុនមានតម្លៃជាងគេលើពិភពលោក នៅតែរួមចំណែកបាន 21% ក្នុងចំណោមតម្លៃសរុបរបស់ Top 500។ Alphabet បានយកឈ្នះ Amazon និងបានកាន់កាប់តំណែងលេខ 3 ខណៈដែល Amazon លេខ 4, Apple ឈរលំដាប់លេខ 1, Microsoft ជាប់លេខ 2, Tesla លេខ 5, Berkshire Hathaway លេខ 6៕
យោងតាម Bloomberg ក្រុមហ៊ុន Apple កំពុងកំណត់គោលដៅបញ្ចេញរថយន្តអគ្គិសនីនៅឆ្នាំ 2026 យឺតជាងមួយឆ្នាំ ធៀបនឹងគម្រោងដំបូង។
ខុសពីផែនការដំបូង រថយន្តអគ្គិសនីនេះនឹងមានតម្លៃក្រោម 100,000 ដុល្លារអាម៉េរិក ហើយ Apple ក៏នឹងបោះបង់មហិច្ឆតាដែលថា Apple Car នឹងបំពាក់មុខងារបើកបរស្វ័យប្រវត្តកម្រិត 4 ឬ 5 ដែលមិនចាំបាច់មានអន្តរាគមន៍ពីមនុស្ស។ Apple Car នឹងប្រើប្រាស់ប្រព័ន្ធបើកបរស្វ័យប្រវត្តកម្រិត 3 ពោលគឺកម្រិតខ្ពស់ ប៉ុន្តែត្រូវការអន្តរាគមន៍របស់អ្នកបើកបរនៅក្នុងស្ថានការណ៍គ្រោះថ្នាក់។
រថយន្ត Apple Car នឹងអនុញ្ញាតឱ្យអ្នកបើកបរកំសាន្តអារម្មណ៍ជាមួយនឹងអេក្រង់ទូរទស្សន៍ ដូចជា ការលេងហ្គេម ឬមើលភាពយន្តជាដើម នៅពេលបើកបរលើផ្លូវល្បឿនលឿន។
ពុំទាន់មានព័ត៌មានដែលថា Apple នឹងសហការជាមួយក្រុមហ៊ុនបច្ចេកវិទ្យាណាមួយនៅឡើយ ប៉ុន្តែ Apple នឹងចូលរួមក្នុងការអភិវឌ្ឍផ្នែកទន់ និងផ្នែករឹងដើម្បីជួយដល់មុខងារបើកបរស្វ័យប្រវត្ត។ នេះមិនមែនជារឿងថ្មីនៅក្នុងវិស័យផលិតរថយន្ត ព្រោះថា កន្លងមក Huawei ក៏ធ្លាប់បានសហការជាមួយក្រុមហ៊ុនផលិតរថយន្តអគ្គិសនី Seres ដើម្បីផលិត AITO M5។
យោងតាមអ្នកយកការណ៍របស់ Bloomberg ក្រុមហ៊ុន Apple កំពុងចំណាយប្រាក់ប្រហែល 1 ពាន់លានដុល្លារអាម៉េរិក/ឆ្នាំ សម្រាប់គម្រោងផលិតរថយន្ត Apple Car (Project Titan)។
ក្រុមហ៊ុនមិនទាន់បង្ហើបឱ្យដឹងអំពីរូបរាងចុងក្រោយរបស់ Apple Car ប៉ុន្តែមានព័ត៌មាននិយាយថា ការរចនារូបរាងរបស់ Apple Car ត្រូវបានកំណត់ថានឹងរួចរាល់នៅឆ្នាំ 2023 និងបំពាក់មុខងារនានាសព្វគ្រប់នៅឆ្នាំ 2024 ហើយសាកល្បងបើកបរទ្រង់ទ្រាយធំនៅឆ្នាំ 2025 មុននឹងនឹងបង្ហាញខ្លួនក្នុងទីផ្សារនៅឆ្នាំ 2026។
តាមគម្រោង រថយន្ត Apple Car ដែលនឹងមានតម្លៃក្រោម 100,000 ដុល្លារអាម៉េរិកនេះ នឹងប្រកួតប្រជែងផ្ទាល់ជាមួយនឹង Tesla Model S ឬ EQS របស់ Mercedes-Benz៕
ការបញ្ជូនបាល់ទៅឱ្យខ្សែការពារ Nahuel Molina ស៊ុតបញ្ចូលទីរបស់ ហូឡង់ បានសម្រេច បានជួយឱ្យ Lionel Messi បំបែកបានកំណត់ត្រាបង្កឱកាសរបស់ Pele ក្នុងបណ្ដាវគ្គជម្រុះផ្ទាល់នៅ World Cup។
នាទីទី 35 Messi បណ្ដើរបាល់នៅតំបន់កណ្ដាល ឆ្លងផុត Nathan Ake រួចបញ្ជូនបាល់រហ័សដើម្បីឱ្យ Molina រុលចូលទៅកាន់តំបន់គ្រោះថ្នាក់ និងស៊ុតផ្ដាច់ ផ្ដួលអ្នកចាំទី Andries Noppert របស់ ហូឡង់ ក្នុងវគ្គជម្រុះផ្ទាល់របស់ World Cup 2022 កាលពីយប់មិញ។ «Messi ពិតជាមិនមែនមនុស្ស ព្រោះថា មានអ្នកណាទៅឃើញផ្លូវបញ្ជូនបាល់បែបនេះ» ទំព័រ SportBible មានយោបល់ដូច្នេះ។
Messi បង្កឱកាសសម្រាប់ការស៊ុតបញ្ចូលទីជោគជ័យបាន 5 លើកមកហើយ ក្នុងវគ្គជម្រុះផ្ទាល់ នៅ World Cup ដែលនេះបានជួយឱ្យប្រធានក្រុមជម្រើសជាតិអាហ្សង់ទីន រូបនេះ បំបែកបានកំណត់ត្រាចាស់របស់ «ស្ដេចបាល់ទាត់» Pele របស់ ប្រេស៊ីល ដែលធ្លាប់បង្កឱកាសបាន 4 ដង នេះបើតាមក្រុមហ៊ុនស្រាវជ្រាវ Opta។
កីឡាករ Messi បានបង្កឱកាសឱ្យមិត្តរួមក្រុមស៊ុតបញ្ចូលទីបានជោគជ័យជាលើកដំបូងនៅ World Cup 2010 ហើយបន្ទាប់មកគឺនៅ World Cup 2014, 2018 និងបច្ចុប្បន្ន៕
កាលពីយប់ថ្ងៃទី 09 ធ្នូ Lionel Messi រកបានគ្រាប់បាល់ និងបង្កបានឱកាស ប៉ុន្តែ ការស៊ុតបញ្ចូលទី 2 គ្រាប់របស់ Wout Weghorst ធ្វើឱ្យ អាហ្សង់ទីន និង ហូឡង់ ត្រូវទាត់បាល់ប៉េណាំងទី ហើយ អាហ្សង់ទីនក៏ឈ្នះ 4-3 និងបានបន្តដំណើរទៅវគ្គពាក់កណ្ដាលផ្ដាច់ព្រ័ត្រ។
ចំណែក ប្រេស៊ីល វិញ កាលពីយប់ថ្ងៃទី 09 ធ្នូ ក៏ត្រូវបាន ក្រូអាត ទម្លាក់ចេញពី World Cup 2022 ដោយចាញ់ 2-4 នៅក្នុងការទាត់បាល់ប៉េណាំងទី ក្រោយពីពួកគេរកបាន 1 គ្រាប់ដូចគ្នាក្នុងរយៈពេល 120 នាទី ក្នុងការប្រកួតនៅវគ្គ 1/8។
ការធ្វើដំណើរនៅ World Cup 2022 របស់ ប្រេស៊ីល បានបញ្ចប់ដោយការឈឺចាប់នៅចំពោះមុខគូប្រកួតដែលស័ក្ដិសមជា «ស្ដេចប៉េណាំងទី»។ ក្រូអាត បានឈ្នះបន្តបន្ទាប់ 4 លើកនៅក្នុងការទាត់ប៉េណាំងទីនៅ World Cup។
ការចាញ់របស់ ប្រេស៊ីល នៅ World Cup លើកនេះ គឺជារឿងដ៏គួរឱ្យភ្ញាក់ផ្អើលបំផុត ដោយសារ ប្រេស៊ីល ថ្មីៗនេះត្រូវបានគេចាត់ទុកថាជាបេក្ខភាពទីមួយសម្រាប់តំណែងជើងឯក World Cup 2022 ប៉ុន្តែបែរជាចាញ់គូប្រកួតដែលត្រូវបានវាយតម្លៃទាបទៅវិញ។
ក្រោយការប្រកួតចាញ់ ក្រូអាត គ្រូបង្វឹករបស់ ប្រេស៊ីល សុំលាឈប់ពីតំណែង។ ចំណែក Messi វិញក៏បានបំបែកកំណត់ត្រារបស់ Pele នៅ World Cup បន្ទាប់ពី អាហ្សង់ទីន ឈ្នះ ហូឡង់ កាលពីយប់មិញ៕
ដោយមានសមត្ថភាពផ្នែកជំនួញដ៏អស្ចារ្យតែពីនៅក្មេង បច្ចុប្បន្នមហាសេដ្ឋីបារាំង Bernard Arnault គឺជាអ្នកមានទ្រព្យច្រើនជាងគេលើពិភពលោក ដោយទើបតែដណ្ដើមបានតំណែងនេះកាលពីព្រឹកមិញ។
បង្កើតបានក្រុមហ៊ុន LVMH ដ៏ធំដែលជាអ្នកគ្រប់គ្រងយីហោប្រណិត Louis Vuitton, Tag Heuer, Christian Dior និង Celine។
គិតត្រឹមព្រឹកថ្ងៃទី 09 ធ្នូ 2022 មហាសេដ្ឋី Bernard Arnault និងគ្រួសារ នាំមុខគេក្នុងបញ្ជីចំណាត់ថ្នាក់មហាសេដ្ឋីទៅតាមពេលវេលាជាក់ស្ដែងភ្លាមៗរបស់ Forbes ដោយមានទ្រព្យតម្លៃ 186.6 ពាន់លានដុល្លារអាម៉េរិក។ ចំណែកមហាសេដ្ឋី Elon Musk ដែលជាស្ថាបនិករបស់ Tesla វិញ ឈរលំដាប់ទីពីរ ដោយមានទ្រព្យតម្លៃ 185 ពាន់លានដុល្លារ។
ដោយមានសមត្ថភាពផ្នែកជំនួញដ៏អស្ចារ្យតែពីនៅក្មេង មហាសេដ្ឋីបារាំង Bernard Arnault បង្កើតបានក្រុមហ៊ុនដ៏ធំ LVMH ដែលគ្រប់គ្រងយីហោផលិតផលប្រណិត Louis Vuitton, Tag Heuer, Christian Dior និង Celine។ លោក Bernard Arnault គឺជាប្រធាន និងនាយកប្រតិបត្តិរបស់ LVMH។
លោក Bernard Arnault កើតឆ្នាំ 1949 នៅក្នុងគ្រសារធូរធារមួយដែលប្រកបមុខជំនួញនៅ Roubaix ប្រទេសបារាំង។ ឪពុករបស់គាត់មានក្រុមហ៊ុនសំណង់ Ferret-Savinel ចំណែកម្ដាយគឺជាអ្នកចូលចិត្តសម្លៀកបំពាក់ប្រណិតរបស់ Dior។
តាំងពីនៅក្មេង Bernard Arnault បានបង្ហាញនូវសមត្ថភាពរកស៊ីដែលគួរឱ្យកោតសរសើរ។ សមត្ថភាពផ្ទាល់ខ្លួន បូកនឹងការសិក្សា រួមនឹងការទទួលបានបទពិសោធន៍ពីឪពុកទៀតនោះ លោក Bernard Arnault ក៏ចេះតែទទួលបានជោគជ័យនៅក្នុងមុខជំនួញ៕
(សហរដ្ឋអាម៉េរិក)- យន្តហោះអគ្គិសនី Dragon ដែលមានស្លាបកង្ហារចំនួន 8 និងល្បឿន 101 គីឡូម៉ែត្រ/ម៉ោង ត្រូវបានលក់ក្នុងតម្លៃ 99 ពាន់ដុល្លារអាម៉េរិក។
ក្រុមហ៊ុនផលិតឧទ្ធម្ភាគចក្រអាម៉េរិក RotorX បានចូលប្រលូកក្នុងការប្រកួតលើវិស័យយន្តហោះអគ្គិសនី (eVTOL) ផ្ទាល់ខ្លួន ដែលអាចហោះឡើង និងចុះចតដោយត្រង់ ជាមួយនឹងម៉ូដែលយន្តហោះដែលមានស្លាប់កង្ហារច្រើន ឈ្មោះ Dragon នេះបើតាម New Atlas ចុះផ្សាយកាលពីថ្ងៃទី 08 ធ្នូ។
យន្តហោះ Dragon អាចដឹកទម្ងន់បាន 113 គីឡូក្រាម អាចត្រូវបានបញ្ជាដោយចង្កូត អាចហោះបណ្ដែតខ្លួនដោយស្វ័យប្រវត្ត និងចុះចតដោយស្វ័យប្រវត្ត។ យន្តហោះនេះបំពាក់ម៉ូទ័រអគ្គិសនី 16 kW សម្រាប់កង្ហារនីមួយ។ ដើម្បីធានាសុវត្ថិភាព ក្រុមហ៊ុន RotorX ក៏បានបំពាក់ឆត្រយោងមួយផងដែរ។ អ្នកបើកបរមិនបាច់មានបណ្ណបើកបរឡើយ។
ដូចទៅនឹង Jetson One របស់ ក្រុមហ៊ុនស៊ុយអែត យន្តហោះ Dragon អាចហោះក្នុងមួយជើងបានរយៈពេលប្រហែល 20 នាទី និងមានល្បឿន 101 គីឡូម៉ែត្រ/ម៉ោង។ អ្នកទិញយន្តហោះ Dragon នឹងទទួលបានឧបករណ៍សម្រាប់ដំឡើង ឬរុះរើដោយខ្លួនឯង។ ប៉ុន្តែ ក៏អាចទៅកាន់ទីស្នាក់ការ Advanced Tactics នៅ California ដើម្បីដំឡើងយន្តហោះ និងទទួលការបណ្ដុះបណ្ដាលផងដែរ។
RotorX នឹងចាប់ផ្ដើមប្រគល់ទំនិញដល់អតិថិជននៅខែសីហា 2023។ ខណៈដែលតម្លៃរបស់ Jetson One គឺ 92,000 ដុល្លារអាម៉េរិក តម្លៃលក់តាមការគ្រោងទុនរបស់ Dragon គឺ 99,000 ដុល្លារ។ ប៉ុន្តែ RotorX កំពុងទទួលការបញ្ជាទិញជាមុនដោយតម្លៃកក់ 19,500 ដុល្លារ និងតម្លៃលក់ដំបូងត្រឹមតែ 85,000 ដុល្លារប៉ុណ្ណោះ៕
អតីតខ្សែប្រយុទ្ធ Fred និយាយថា គាត់ចង់ឃើញ ប្រេស៊ីល ប៉ះ អាហ្សង់ទីន នៅវគ្គពាក់កណ្ដាលផ្ដាច់ព្រ័ត្រនៅ World Cup 2022។
«ខ្ញុំសង្ឃឹមថា ប្រេស៊ីល និង អាហ្សង់ទីន នឹងប្រយុទ្ធគ្នានៅវគ្គពាក់កណ្ដាលផ្ដាច់ព្រ័ត្រ» Fred និយាយនៅលើទូរទស្សន៍ TV Globo ដូច្នេះ។ «ខ្ញុំចង់ឃើញការប្រកួតនោះច្របូកច្របល់ ប្រវាយប្រតប់។ Neymar នឹងស៊ុតបញ្ចូលទីពីការពិន័យ ហើយ Messi ត្រូវយំ»។
Fred លេងឱ្យ ប្រេស៊ីល ក្នុងអំឡុងពីឆ្នាំ 2005 ដល់ 2014 ក្នុងនោះគាត់បានចូលរួម និងរកបានគ្រាប់បាល់នៅ World Cup 2006 និង 2014។ កីឡាកររូបនេះចំណាយពេលច្រើនក្នុងអាជីពសម្រាប់ការលេងឱ្យក្លឹបប្រេស៊ីល លើកលែងតែដំណាក់កាលពីឆ្នាំ 2005-2009 ដែលលេងឱ្យ Lyon។ កីឡាករខ្សែប្រយុទ្ធវ័យ 39 ឆ្នាំនេះ បានចូលនិវត្តន៍កាលពីខែមេសា 2022 ព្រោះតែរងរបួសច្រើន។
ប្រេស៊ីល និង អាហ្សង់ទីន បានប៉ះគ្នា 4 ប្រកួតនៅ World Cup ហើយសុទ្ធតែមានការប្រកួតយ៉ាងស្វិតស្វាញ និងហិង្សា។ លើកដំបូងគឺនៅ World Cup 1974 នៅ អាល្លឺម៉ង់ខាងលិច ដែលកាលណោះ អាហ្សង់ទីន ចាញ់ ប្រេស៊ីល 1-2 និងត្រូវជម្រុះត្រឹមជុំទីពីរនៃវគ្គចែកពូល ដែលប្រហាក់ប្រហែលនឹងវគ្គ 1/8 បច្ចុប្បន្ន។
4 ឆ្នាំក្រោយមក (1978) ប្រេស៊ីល និង អាហ្សង់ទីន ស្មើគ្នា 0-0 នៅជុំទីពីរនៃវគ្គចែកពូល ប៉ុន្តែចុងក្រោយ Mario Kempes និងមិត្តរួមក្រុមអាហ្សង់ទីន ដណ្ដើមបានសិទ្ធិធ្វើដំណើរទៅមុខ និងយកបានពានរង្វាន់ជើងឯក។
World Cup 1982 នៅ អេស្ប៉ាញ ក្រុមប្រេស៊ីល និង អាហ្សង់ទីន បានជួបគ្នាម្ដងទៀត។ លើកនេះ ប្រេស៊ីល ឈ្នះ 3-1 ចំណែក Diego Maradona ត្រូវទទួលកាតក្រហម ដោយសារតែទាត់ខ្សែបម្រើ Batista។ World Cup 1990 នៅ អ៊ីតាលី ប្រេស៊ីល ចាញ់ អាហ្សង់ទីន 0-1 ហើយនៅក្រោយការប្រកួត កីឡាករប្រេស៊ីល ចោទថា ក្រុមគ្រូបង្វឹករបស់ អាហ្សង់ទីន បានឱ្យដបទឹកមានថ្នាំងងុយដេកមកឱ្យខ្លួនផឹក តែក្រោយមកទៀត Maradona ឱ្យដឹងថា នោះគឺជាទឹកទេព។
ដើម្បីប៉ះគ្នាលើកទី 5 នៅ World Cup ប្រេស៊ីល និង អាហ្សង់ទីន សុទ្ធតែត្រូវឈ្នះ ក្រូអាត និង ហូឡង់ នៅវគ្គ 1/8។ FiveThityEight យល់ថា ឱកាសដើរបន្តរបស់ ប្រេស៊ីល គឺ 77% ចំណែក អាហ្សង់ទីន គឺ 56%។ ប្រការនេះបង្ហាញថា ភាគរយនៃការប៉ះគ្នារបស់ ប្រេស៊ីល និង អាហ្សង់ទីន នៅវគ្គពាក់កណ្ដាលផ្ដាច់ព្រ័ត្រគឺ 43%៕