Category: សង្គម និងសេដ្ឋកិច្ច

  • Philipp Lahm និង Xabi Alonso នឹងបង្ហាញខ្លួនជាលើកចុងក្រោយឲ្យ Bayern មុនចូលនិវត្តន៍

    Philipp Lahm និង Xabi Alonso នឹងបង្ហាញខ្លួនជាលើកចុងក្រោយឲ្យ Bayern មុនចូលនិវត្តន៍

    ក្រុម Bayern Munich នឹងត្រូវតែនិយាយថា លាហើយទៅកាន់វីរបុរសដ៏ឆ្នើមពីរនាក់នៅថ្ងៃសៅរ៍ស្អែកនេះ នៅពេលដែលខ្សែការពារ Philipp Lahm និងខ្សែបម្រើ Xabi Alonso ត្រូវចូលនិវត្តន៍ពីកីឡាបាល់ទាត់អាជីព។

    ការប្រកួតក្នុងផ្ទះខ្លួនឯងរបស់ក្រុម Bayern ជាមួយនឹងក្រុម Freiburg នឹងក្លាយជាព្រឹត្តិការណ៍ដ៏រំជួលចិត្តមួយ ខណៈដែលម្ចាស់ជើងឯករបស់ក្របខ័ណ្ឌ Bundesliga មួយនេះ នឹងត្រូវលើកពានក្នុងរដូវកាលនេះជាលើកទី៥ជាប់ៗគ្នារបស់ពួកគេ។

    Lahm វ័យ៣៣ឆ្នាំ និង Alonso វ័យ៣៥ឆ្នាំ ធ្លាប់បានឈ្នះរាល់ពានសំខាន់ៗទាំងអស់ និងបានក្លាយជាកីឡាករដ៏សំខាន់ក្នុងការប្រកួត២លើកក្នុងចំណោមការប្រកួតដ៏ធំបំផុតប្រចាំសតវត្សរ៍ទី២១នេះ។ ខ្សែបម្រើការពារ Alonso បានរកគ្រាប់បាល់ទី៣ដ៏សំខាន់របស់ក្រុម Liverpool ក្នុងពេលពួកគេធ្វើការវាយបកពីការដេញតាមពីក្រោយ ៣-០ ក្នុងតង់ទី១នៃការប្រកួតក្របខ័ណ្ឌ Champions League វគ្គផ្តាច់ព្រ័ត្រជាមួយនឹងក្រុម AC Milan កាលពីឆ្នាំ២០១៥ នៅមុនពេលដណ្តើមបានជ័យជម្នះក្នុងលទ្ធផល ៣-២ ដោយការស៊ុតបាល់ប៉េណាល់ទី ក្នុងទីក្រុង Istanbul។

    ដោយឡែក Lahm បានធ្វើជាប្រធានក្រុមនៃក្រុមបាល់ទាត់ជម្រើសជាតិអាល្លឺម៉ង់ ក្នុងនាមជាខ្សែការពារស្លាបស្តាំ ដោយពេលនោះក្រុមរបស់គេបានស៊ុតបាល់បញ្ចូលទី៤គ្រាប់ក្នុងតង់ទី១ ដើម្បីបំបាក់ក្រុមម្ចាស់ផ្ទះប្រេស៊ីល យ៉ាងចាស់ដៃក្នុងលទ្ធផល ៧-១ ក្នុងការប្រកួតព្រឹត្តិការណ៍ World Cup ឆ្នាំ២០១៤ វគ្គពាក់កណ្តាលផ្តាច់ព្រ័ត្រ។ Alonso ក៏បានបង្កើតភាពអស្ចារ្យក្នុងក្លិបធំៗបីរបស់ពិភពលោកផងដែរ ដែលរួមមាន Liverpool, Real Madrid និង Bayern។ រូបគេបានសម្តែងការដឹងគុណរបស់គេសម្រាប់ការផ្ទេរទៅកាន់ក្លិប Liverpool កាលពីឆ្នាំ២០០៤ ពោលគឺរយៈពេល៥ឆ្នាំ ក្រោយពីបានចុះហត្ថលេខាលើកុងត្រាអាជីពជាលើកទី១របស់គេជាមួយនឹងក្លិប Real Sociedad របស់អេស្ប៉ាញ ដើម្បីនាំឲ្យគេក្លាយជាកីឡាករឆ្នើមរហូតមកទល់ពេលនេះ៕
    ប្រភពពី៖ BBC

  • ទឹម រដ្ឋា ពិតជាកែដើមទ្រូងផ្គាប់ចិត្តមិត្តប្រុសថ្មីជាតិអាមេរិកមែនឬ?

    ទឹម រដ្ឋា ពិតជាកែដើមទ្រូងផ្គាប់ចិត្តមិត្តប្រុសថ្មីជាតិអាមេរិកមែនឬ?

    ភ្នំពេញៈ ថ្មីៗនេះ ស្រាប់តែមហាជន ដែលចូលចិត្តតាមប្រមាញ់ពីជីវិតឯកជនរបស់តារាសម្តែងល្បីៗ ក៏ស្រាប់តែនាំគ្នាចាប់អារម្មណ៍ខ្លាំងទៅនឹងទំហំដើមទ្រូងរបស់សម្តែង និងម៉ូដែល កញ្ញា ទឹម រដ្ឋា ដោយបានព្រលយមាត់ថា « អូ!ល្វែងលើរបស់កញ្ញា ទឹម រដ្ឋា ឥឡូវដូចជារាងធំជាងមុន ប្រហែលនាងទៅកែកុនអ្វីបន្ថែមដើម្បីផ្គាប់ចិត្តមិត្តប្រុសថ្មីលោក Jovany Antonio សញ្ជាតិអាមេរិកទេដឹង?»។

    តារាសម្តែងស្រីមានរាងស្ល៊ីម កែវភ្នែកដូចកូនកាត់អឺរ៉ុប ដែលមហាជននិយមហៅថាតារាស្រីឆ្វាក់ស្នេហ៍ច្រើនតែកន្លង់បរទេស កញ្ញា ទឹម រដ្ឋា បានប្រាប់ដោយអស់សំណើចថា៖ «ពិតជាមើលឃើញខុសប្លែកអ៊ីចឹងមែនឬ? ហើយម៉េចក៏ខ្ញុំមិនដឹងខ្លួនអ៊ីចឹង?»។

    តារាស្រីដែលកាលពីមុនធ្លាប់មានមិត្តប្រុសជនជាតិប៉ាគីស្ថាន និងក្រោយមកមានគេសង្ស័យថាប្រុងបង្កាត់ភ្លើងស្នេហ៍ជាមួយបុរសប្រេស៊ីល និងពេលនេះមានមិត្តប្រុសថ្មីលោក Jovany Antonio សញ្ជាតិអាមេរិក កញ្ញា ទឹម រដ្ឋា បានបញ្ជាក់ថា៖ «ខ្ញុំអត់បានទៅកែកុនអ្វីនោះទេ! ពីដើមយ៉ាងម៉េចគឺនៅដូចមុនទាំងអស់។ បើនាងខ្ញុំកែមែននោះ ក៏គ្មានអ្វីត្រូវលាក់បាំងដែរព្រោះនាងខ្ញុំជាតារារបស់មហាជន»។

    ដោយឡែកការងារសិល្បៈរបស់កញ្ញា ទឹម រដ្ឋា ហាក់ដូចជាមិនសូវមានទីផ្សារខ្លាំងនៅឡើយទេ ខណៈតារាស្រីដែលមហាជនធ្លាប់បានប្រសិទ្ធនាមថាតារាសម្តែងស្រីសម្បូរមន្តស្នេហ៍ទាក់ទាញតែកន្លង់បរទេសនោះរអ៊ូថា៖ «អត់ដឹងថាមកពីហេតុអ្វីទេបានជាការងារសិល្បៈឆ្នាំថ្មីនេះ ដូចជាស្ងាត់ឲ្យច្រៀបតែម្តង!»៕

  • លោក Allegri ជំរុញឲ្យ Juventus ដណ្តើមយកពាន Serie A ថ្ងៃអាទិត្យនេះឱ្យបាន

    លោក Allegri ជំរុញឲ្យ Juventus ដណ្តើមយកពាន Serie A ថ្ងៃអាទិត្យនេះឱ្យបាន

    លោក Massimiliano Allegri បានជំរុញឲ្យក្រុមដែលកំពុងប្រមាញ់រកការឈ្នះពាន៣ Juventus របស់លោក លុបចោលនូវការភិតភ័យផ្សេងៗ នៅមុនពេលការប្រកួតក្របខ័ណ្ឌ Champions League វគ្គផ្តាច់ព្រ័ត្រជាមួយនឹងក្រុម Real Madrid នាខែក្រោយ តាមរយៈការឈ្នះពានក្របខ័ណ្ឌ Serie A នៅថ្ងៃអាទិត្យនេះឱ្យបាន ក្រោយពីបានលើកពាន Italian Cup បានមួយហើយ។

    ក្រោយពីបានឈ្នះពានក្របខ័ណ្ឌ Champions League ត្រឹមតែ២លើកគត់ក្នុងចំណោមការឈានទៅដល់វគ្គផ្តាច់ព្រ័ត្រ៨លើក ក្រុមយក្សដែលមានមូលដ្ឋាននៅទីក្រុង Turin មួយនេះ កំពុងតែប្តេជ្ញាចិត្តថា នឹងធ្វើការស្តារមុខមាត់សម្រាប់ការចាញ់យ៉ាងអាម៉ាស់ក្នុងលទ្ធផល ៣-១ ក្រោមស្នាដៃក្រុម Barcelona កាលពីឆ្នាំ២០១៥ នៅពេលដែលពួកគេត្រូវជួបជាមួយនឹងក្រុមម្ចាស់ជើងឯក១១សម័យកាល Real Madrid ក្នុងទីក្រុង Cardiff នៅថ្ងៃទី៣ ខែមិថុនា ខាងមុខនេះ។

    ក្រុមសេះបង្កង់ Juventus បានបោះជំហានឆ្ពោះទៅកាន់ការឈ្នះទាំងពានលីក និងពាន Italian Cup ក្នុងរដូវកាលតែមួយជាលើកទី៣ជាប់ៗគ្នា កាលពីថ្ងៃពុធ ក្រោយពីបានកត់ត្រាជ័យជម្នះក្នុងលទ្ធផល ២-០ លើក្រុម Lazio ក្នុងការប្រកួតពាន Italian Cup វគ្គផ្តាច់ព្រ័ត្រ ខណៈដែលខ្សែការពារ Dani Alves និង Leonardo Bonucci សុទ្ធសឹងរកបានគ្រាប់បាល់បញ្ចូលទី ព្រមទាំងបានបង្ហាញពីទម្រង់លេងយ៉ាងរឹងមាំនៅកីឡដ្ឋាន Stadio Olimpico។ ប៉ុន្តែ ការរងបរាជ័យរបស់ក្រុម Juventus នៅលើទឹកដីក្រុម Roma កាលពីសប្តាហ៍មុន ដែលកាលនោះពួកគេបានចាញ់ក្នុងលទ្ធផល ៣-១ បានរារាំងមិនឲ្យក្រុមរបស់លោក Allegri លើកពានកំពូល(serie A)របស់អ៊ីតាលី ជាបណ្តោះអាសន្ន។

    ដោយសារតែក្រុម Juventus ត្រូវប្រកួតជាមួយនឹងក្រុមស្ថិតក្នុងតំបន់កាត់ចោល Crotone នោះមានន័យថា ក្រុមម្ចាស់ផ្ទះកំពុងតែមានប្រៀបក្នុងការឈ្នះនៅថ្ងៃអាទិត្យនេះ។ Juventus នឹងធ្វើដំណើរទៅកាន់ការប្រកួតនេះ ដោយដឹងថា ការដណ្តើមបានជ័យជម្នះនឹងធ្វើឲ្យពួកគេលើកពាន Serie A ក្រោយពីពួកគេបាននាំមុខដល់ទៅ៤ពិន្ទុដាច់នៅលើកំពូលតារាង ខណៈដែលនៅសល់ត្រឹមតែ២ប្រកួតទៀតប៉ុណ្ណោះ នៅរដូវកាលនេះ។ ក្រុម Juventus មិនស្គាល់ចាញ់សោះពីការប្រកួតលីកក្នុងផ្ទះខ្លួនឯង៥លើកចុងក្រោយរបស់ពួកគេ ដោយឈ្នះដល់ទៅ៤លើក និងស្មើ១លើក។ ការប្រកួតនេះនឹងចាប់ផ្តើមនៅម៉ោង៩យប់៕
    ប្រភពពី៖ Daily Star

  • ធនាគារពិភពលោកអះអាងថា អត្រាកំណើនសេដ្ឋកិច្ចកម្ពុជាឈរលំដាប់ទី6 នៅលើពិភពលោក

    ធនាគារពិភពលោកអះអាងថា អត្រាកំណើនសេដ្ឋកិច្ចកម្ពុជាឈរលំដាប់ទី6 នៅលើពិភពលោក

    បន្ទាប់ពីកំណើនសេដ្ឋកិច្ចមានភាពរឹងមាំអស់រយៈពេលជាងពីរទសវត្សរ៍កន្លងមក កម្ពុជាបានទទួលចំណាត់ថ្នាក់ជាប្រទេសដែលមានចំណូលមធ្យមកម្រិតទាប គិតត្រឹមឆ្នាំ 2015 ដែលមានចំណូលជាតិសរុបក្នុងមនុស្សម្នាក់កើនឡើងដល់ 1070ដុល្លារអាមេរិក។ ដឹកនាំដោយផ្នែកនាំចេញសម្លៀកបំពាក់ និងទេសចរណ៍ កម្ពុជារក្សាបាននូវអត្រាកំណើនសេដ្ឋកិច្ចជាមធ្យម 7.6 ភាគរយនៅចន្លោះពីឆ្នាំ 1994 ដល់ ឆ្នាំ 2015 ដែលបានឈរក្នុងលំដាប់ថ្នាក់ទី6នៅលើពិភពលោក។

    យោងតាមការប៉ាន់ស្មានបឋមរបស់ធនាគារពិភពលោក ដែលបានចេញផ្សាយនៅពេលថ្មីៗនេះបានឲ្យដឹងថា កំណើនសេដ្ឋកិច្ចបានថយចុះបន្តិចបន្តួចពី 7.0 ភាគរយក្នុងឆ្នាំ 2015 មកនៅ 6.9 ភាគរយក្នុងឆ្នាំ 2016 ក៏ប៉ុន្តែគេរំពឹងថាកំណើននេះនឹងនៅតែមានភាពរឹងមាំក្នុងរយៈពេលពីរឆ្នាំទៅមុខទៀត ព្រោះការងើបឡើងវិញនៃវិស័យទេសចរណ៍ រួមជាមួយនឹងការពង្រីកសារពើពន្ធ នឹងជួយបំពេញការថយចុះលើផ្នែកនាំចេញសម្លៀកបំពាក់ និងកំណើនលើផ្នែកសំណង់។

    របាយការណ៏បច្ចុប្បន្នភាពចុងក្រោយនេះបញ្ជាក់ថា ភាពក្រីក្របន្តធ្លាក់ចុះនៅក្នុងប្រទេសកម្ពុជា ទោះបីជាការធ្លាក់ចុះនេះមានសភាពយឺតជាងកាលពីឆ្នាំកន្លងទៅក្តី។ នៅក្នុងឆ្នាំ 2014 អត្រានៃភាពក្រីក្រមាន 13.5 ភាគរយ បើធៀបនឹងឆ្នាំ 2007 ដែលមានដល់ទៅ 47.8 ភាគរយ ខណៈដែលកម្ពុជាបានសម្រេចគោលដៅអភិវឌ្ឍន៍សហសវត្សរ៍ ដោយបានកាត់បន្ថយអត្រាភាពក្រីក្របាន 50ភាគរយក្នុងឆ្នាំ 2009។

    គ្រួសារប្រជាពលរដ្ឋខ្មែរភាគច្រើនលើសលប់ដែលបានរួចចាកផុតពីភាពក្រីក្រ និងមានជីវភាពរីកចម្រើនត្រឹមតែតិចតួចប៉ុណ្ណោះ ចំណែកឯប្រជាពលរដ្ឋប្រហែល4.5លាននាក់ទៀតកំពុងរស់នៅក្បែរបន្ទាត់នៃភាពក្រីក្រ។

    វិស័យសុខាភិបាល និងអប់រំនៅតែជាបញ្ហាប្រឈមធំ និងជាអាទិភាពសម្រាប់ការអភិវឌ្ឍរបស់កម្ពុជា។ 33 ភាគរយ (ឬប្រហែល 0.5លាននាក់) នៃកុមារអាយុក្រោម 5ឆ្នាំ មានកាយសម្បទាក្រិនមិនលូតលាស់ ខណៈដែលចំនួនកុមារចុះឈ្មោះចូលរៀនពិតប្រាកដ នៅកម្រិតបឋមសិក្សាបានកើនឡើងពី 82 ភាគរយក្នុងឆ្នាំ 1997 ដល់ 97 ភាគរយនៅឆ្នាំ 2016។ អត្រាបញ្ចប់កម្រិតមធ្យមសិក្សាបឋមភូមិមាន 43 ភាគរយនៅក្នុងឆ្នាំ 2013 ដែលអត្រានេះមានកម្រិតទាបក្រោមធម្យមភាគសម្រាប់បណ្តាប្រទេសដែលមានប្រាក់ចំណូលមធ្យមកម្រិតទាប។ 79 ភាគរយនៃប្រជាពលរដ្ឋទូទាំងកម្ពុជា (12.3លាននាក់) មិនទាន់មានទឹកស្អាតប្រើប្រាស់ និង 58 ភាគរយ (9.3លាននាក់) មិនបានទទួលសេវាអនាម័យសាធារណៈដែលមានលក្ខណៈល្អប្រសើរនៅឡើយទេ (ឆ្នាំ 2015)។

    កម្ពុជាមានការរីកចម្រើនល្អក្នុងការកែលម្អកម្មវិធីសុខភាពមាតា កម្មវិធីអភិវឌ្ឍន៍កុមារតូចៗ និងកម្មវិធីអប់រំថ្នាក់បឋមសិក្សានៅតំបន់ជនបទ។ អត្រាស្លាប់របស់់ម្តាយក្នុង 1សែនកំណើតរស់ បានថយចុះពី 472 នៅឆ្នាំ 2005 មកនៅត្រឹម 161នាក់ នៅឆ្នាំ 2015 អត្រាស្លាប់របស់កុមារអាយុក្រោម5ឆ្នាំ បានថយចុះពី 83 ក្នុង 1ពាន់កំណើតរស់ក្នុងឆ្នាំ 2005 មកនៅត្រឹមតែ 28.7 នៅឆ្នាំ 2015។

    ទោះបីជាសម្រេចបានសមិទ្ធផលទាំងនេះក្តី ក៏កម្ពុជានៅតែមានបញ្ហាប្រឈមសម្រាប់ការអភិវឌ្ឍមួយចំនួនទៀតដែរ ដូចជា ការផ្គត់ផ្គង់សេវាសាធារណៈដែលមានគុណភាពមិនល្អធ្វើឲ្យរាំងស្ទះដល់ការងារអភិវឌ្ឍន៍លើគ្រប់វិស័យ រដ្ឋបាលដីធ្លី និងការគ្រប់គ្រងធនធានធម្មជាតិ ចីរភាពបរិស្ថាន និងអភិបាលកិច្ចល្អ។ ការបោះជំហានទៅមុខ និងជោគជ័យនៃការដោះស្រាយបញ្ហាប្រឈមទាំងនេះនឹងមិនមែនពឹងផ្អែកតែទៅលើការថែរក្សាស្ថេរភាពម៉ាក្រូសេដ្ឋកិច្ច ការបង្កើនភាពសម្បូរបែបនៃសេដ្ឋកិច្ច និងភាពប្រកួតប្រជែងសម្រាប់ការនាំចេញប៉ុណ្ណោះទេ ប៉ុន្តែវាត្រូវតែពឹងផ្អែកលើការកែលម្អគុណភាពនៃការផ្គត់ផ្គង់សេវាសាធារណៈ រួមទាំងការបង្កើនការបែងចែក និងប្រើប្រាស់ធនធានហិរញ្ញវត្ថុសាធារណៈ និងធនធានមនុស្សផងដែរ៕

  • តើ Note 7 ត្រៀមដាក់លក់ជាថ្មីនោះ ជាទូរស័ព្ទចាស់ដែលប្រមូលចូល ឬជារបស់ផលិតថ្មី?

    តើ Note 7 ត្រៀមដាក់លក់ជាថ្មីនោះ ជាទូរស័ព្ទចាស់ដែលប្រមូលចូល ឬជារបស់ផលិតថ្មី?

    ដូចដែលប្រិយមិត្តបានដឹងហើយថា ទូរស័ព្ទ Galaxy Note 7 ត្រូវបានក្រុមហ៊ុន Samsung ធ្វើការប្រមូលចូលវិញទាំងអស់ ដើម្បីសុវត្ថិភាពរបស់អ្នកប្រើប្រាស់ ក្រោយកើតហេតុការណ៍អាក្រក់ក្នុងអំឡុងពេលសាកថ្ម។ យ៉ាងណាមិញ ស្មាតហ្វូនមួយនេះ បានលេចឮដំណឹងមកថា នឹងមានវត្តមានលើទីផ្សារជាថ្មីម្ដងទៀត ក្រោយពីមានការសម្រួលលក្ខណៈបច្ចេកទេស ដែលរួមមានថាមពលថ្ម និងទម្លាក់តម្លៃឱ្យទាបជាងមុន។ តែអ្វីដែលជាចម្ងល់នោះគឺ តើទូរស័ព្ទ Note 7 ដែលត្រៀមដាក់លក់ជាថ្មីហ្នឹង ជាទូរស័ព្ទដែលប្រមូលចូលវិញនោះ ឬជាទូរស័ព្ទផលិតថ្មី?

    ទាក់ទងនឹងរឿងនេះដែរ លោក ជា សុជាតិ នាយកគ្រប់គ្រងផ្នែកទីផ្សារនៃក្រុមហ៊ុន Thai Samsung Electronics ប្រចាំប្រទេសកម្ពុជា បានទទួលស្គាល់ថា រឿងការបង្ហាញខ្លួនម្ដងទៀតរបស់ Note 7 វាជាការពិត ប៉ុន្តែអាចមិនមែនក្នុងទីផ្សារកម្ពុជាទេ ព្រោះគិតត្រឹមខែឧសភា ឆ្នាំ 2017 នេះ មិនទាន់មានដំណឹងណាមួយស្តីពីការវិលត្រឡប់របស់ Note 7 មកទីផ្សារស្រុកខ្មែរវិញនៅឡើយទេ។ ក្នុងនោះលោកបានបញ្ជាក់ថា ការប្រមូលស្មាតហ្វូននេះចូលវិញ ត្រូវបានក្រុមហ៊ុនយកទៅធ្វើការពិនិត្យមើល ដើម្បីកំណត់ពីមូលហេតុ ហើយចុងក្រោយ គឺ Samsung នឹងយកទូរស័ព្ទទាំងនោះទៅកម្ទេចចោលទាំងអស់។

    លោកថា៖ «ខ្ញុំគិតថា គេកម្ទេចចោល របស់ដែលគេផលិតហើយខុសត្រូវតែកម្ទេចចោល បើវត្ថុធាតុដើមយើងអាចកែច្នៃវាឡើងវិញបាន តែម៉ាស៊ីនវិញ បើចេញមកហើយមានបញ្ហា យើងត្រូវតែកម្ទេចវាចោល គឺមិនមែនយកម៉ាស៊ីនដែលមានបញ្ហានោះមកជួសជុល ហើយយកមកលក់វិញនោះទេ»។

    បន្ថែមពីនេះ មានព័ត៌មានថ្មីមួយទៀតពី Note 7 ដែលត្រូវបានគេចុះផ្សាយថា វានឹងត្រូវប្តូរឈ្មោះទៅជា Galaxy Note FE ដែលមកពីពាក្យ “Fandom Edition” ជាមួយនឹងការកែខៃត្រង់គុណភាពថ្ម ហើយ Note FE នឹងមានលក់ក្នុងតម្លៃ ប្រហែល 1/3 នៃតម្លៃ Note 7 ដើម ចាប់ពីចុងខែមិថុនា នេះទៅ។

    ទូរស័ព្ទប្រមាណ 300,000 គ្រឿងនឹងត្រូវផលិត និងចែកចាយលក់ ខណៈដែល Samsung កំពុងមានទំនុកចិត្តទៅលើប្រជាប្រិយភាពនៃកំពូលថេប្លេតរបស់ខ្លួន ហើយលក្ខណៈសម្បត្តិរបស់ស្មាតហ្វូនផលិតថ្មីនេះនឹងរក្សាទុកនៅដដែល ខុសតែទំហំថ្មដែលត្រូវទម្លាក់មកនៅត្រឹមតែ 3200mAh វិញប៉ុណ្ណោះ៕

  • គ្រូបង្វឹករបស់ Spurs សន្យាថា Kane មិនមែនសម្រាប់លក់ទេ!

    គ្រូបង្វឹករបស់ Spurs សន្យាថា Kane មិនមែនសម្រាប់លក់ទេ!

    លោក Mauricio Pochettino បានបញ្ជាក់ថា វាមិនអាចទៅរួចឡើយដែល Harry Kane នឹងត្រូវអនុញ្ញាតឲ្យចាកចេញពីក្លិប Tottenham Hotspurs នោះ ក្រោយពីខ្សែប្រយុទ្ធដ៏សំខាន់របស់លោកម្នាក់នេះ បានស៊ុតបាល់បញ្ចូលទី៤គ្រាប់ ក្នុងពេលក្រុមពួកគេបានបំបាក់ក្រុម Leicester យ៉ាងចាស់ដៃក្នុងលទ្ធផល ៦-១ កាលពីថ្ងៃព្រហស្បតិ៍ម្សិលមិញ។

    Kane កំពុងតែស្ថិតលើដំណើរផ្លូវឆ្ពោះទៅកាន់ការបញ្ចប់រដូវកាលប្រកួតក្នុងនាមជាអ្នករកគ្រាប់បាល់បានច្រើនជាងគេក្នុងក្របខ័ណ្ឌ Premier League សម្រាប់រដូវកាលពីរលើកជាប់ៗគ្នា ក្រោយពីបានបង្ហាញទម្រង់លេងយ៉ាងមុតស្រួចនាកីឡដ្ឋាន King Power។ ខ្សែប្រយុទ្ធអន្តរជាតិអង់គ្លេសរូបនេះបច្ចុប្បន្នរកបាន២៦គ្រាប់ ដែលធ្វើឲ្យរូបគេនាំមុខ២គ្រាប់លើខ្សែប្រយុទ្ធ Romelu Lukaku របស់ក្លិប Everton ខណៈដែលនៅសល់ការប្រកួតតែ១លើកទៀតប៉ុណ្ណោះក្នុងការប្រជែងយកពានរង្វាន់ស្បែកជើងមាស។

    នោះគឺជាការបង្ហាញពីប្រភេទនៃទម្រង់លេងដ៏ល្អឥតខ្ចោះមួយដែលលោក Pochettino ជឿជាក់ថា Kane កំពុងតែធ្វើដំណើរឆ្ពោះទៅកាន់ការក្លាយជាខ្សែប្រយុទ្ធម្នាក់ក្នុងចំណោមខ្សែប្រយុទ្ធដ៏ឆ្នើមបំផុតក្នុងពិភពលោក។ ស្របពេលជាមួយគ្នានេះ ក្លិបកំពូលៗក្នុងទ្វីបអឺរ៉ុបកំពុងធ្វើការពិចារណាទៅលើការដាក់សំណើក្នុងទឹកប្រាក់ដ៏ច្រើនសន្ធឹកសន្ធាប់ដើម្បីទិញយក Kane ក្នុងពេលបិទរដូវកាលនេះ ប៉ុន្តែ លោក Pochettino មិនមានបំណងក្នុងការលក់ខ្សែប្រយុទ្ធដ៏មុតស្រួចរបស់លោកឡើយ ទោះក្នុងតម្លៃខ្លួនខ្ពស់បែបណាក៏ដោយ។ លោក Pochettino បានបញ្ជាក់ថា៖ «វាច្បាស់ណាស់ថា យើងនឹងរក្សាទុកកីឡាករដែលយើងចង់រក្សាទុក។ យើងពិតជាស្ងប់អារម្មណ៍ទៅលើកីឡាករសំខាន់ៗរបស់យើង។ ពួកគេរីករាយក្នុងការនៅទីនេះ ហើយយើងមានគម្រោងដ៏រំភើបមួយ»៕


    ប្រភពពី៖ The Guardian

  • កញ្ញាឯកកម្ពុជាពីររូបនឹងទៅចូលរួមប្រកួតក្នុងកម្មវិធីកញ្ញាឯកចិនពិភពលោក

    កញ្ញាឯកកម្ពុជាពីររូបនឹងទៅចូលរួមប្រកួតក្នុងកម្មវិធីកញ្ញាឯកចិនពិភពលោក

    កញ្ញាឯករបស់កម្ពុជាពីររូបនឹងត្រូវចេញដំណើរទៅចូលរួមប្រកួតក្នុងកម្មវិធីកញ្ញាឯកចិនពិភពលោកឆ្នាំ2017 ក្រោមប្រធានបទ” The Beauty of heart, The world of Wisdom” ដែលកម្មវិធីនេះនឹងប្រព្រឹត្ដទៅនៅទីក្រុង Pataling Jaya , Selango នៃប្រទេសម៉ាឡេស៊ី ។

    ក្រោមកិច្ចសហការរវាងណាហ្គាវើល និង Arises Agency បានធ្វើឱ្យកញ្ញាលី ណៃស៊ីម មកពីទីក្រុងភ្នំពេញ និងកញ្ញា លឹម ណយ មកពីខេត្ដសៀមរាបត្រូវចេញដំណើរទៅប្រកួតក្នុងកម្មវិធីកញ្ញាឯកចិនលំដាប់ថ្នាក់អន្ដរជាតិដែលកម្មវិធីនេះនឹងប្រព្រឹត្ដទៅនៅថ្ងៃទី 26ខែឧសភា ឆ្នាំ 2017។ វាគឺជាលើកទី1ហើយសម្រាប់កញ្ញាឯកទាំងពីររូបដែលតំណាងឱ្យប្រទេសកម្ពុជាបានទៅចូលរួមប្រកួតនៅក្នុងកម្មវិធីនេះ។

    កញ្ញា លឹម ណយ បានបញ្ជាក់ថា ជាមោទនភាពខ្លាំងបំផុតសម្រាប់រូបនាងដែលបានចូលរួមក្នុងកម្មវិធីដ៏ធំដែលនាងមិនធ្លាប់បានស្រមៃពីមុនមក។ កញ្ញា បានបន្ដទៀតថា៖”ខ្ញុំសន្សាថា តាមរយៈកម្មវិធីនេះខ្ញុំនឹងពាំនាំនូវអ្វីដែលល្អៗពីប្រទេសកម្ពុជា ពិសេសខេត្ដសៀមរាប ជាខេត្ដដែលពោរពេញទៅដោយតំបន់ទេសចរណ៍ ទៅកាន់ឆាកអន្ដរជាតិឱ្យពួកគេបានស្គាល់កាន់តែច្បាស់អំពីប្រទេសយើង”។

    កម្មវិធីប្រកួតកញ្ញាឯកចិនពិភពលោកត្រូវបានបង្កើតឡើងនៅក្នុងឆ្នាំ2005 ដើម្បីជួយលើកកម្ពស់ សន្ដិភាព សុឆន្ទៈ និងចំណងមិត្ដភាពក្នុងចំណោមកញ្ញាឯកដែលបានចូលរួមទាំងអស់។ ពិសេសកម្មវិធីនេះមានគោលបំណងប្រមូលនារីដែលមានសម្រស់ស្រស់ស្អាតបំផុត និងមានជាប់សែស្រឡាយចិនមកពីជុំវិញពិភពលោកដើម្បីជួយលើកកម្ពស់វប្បធម៌ និងទំនៀមទម្លាប់ប្រពៃណីចិន។

    ដោយឡែកកញ្ញា លី ណៃស៊ីម បានប្រាប់ថា នាងបានរស់នៅទីក្រុងភ្នំពេញតាំងពីក្មេង នាងបានឃើញការរីកចម្រើនរបស់រាជធានីភ្នំពេញមានការវិវឌ្ឍទៅមុខយ៉ាងលឿន ដូច្នេះនាងនឹងប្រាប់ទៅដល់អ្នកដែលបានចូលរួមក្នុងកម្មវិធីនោះឱ្យបានដឹងអំពីការវិវឌ្ឍ និងភាពរីកចម្រើននៃរាជធានីភ្នំពេញ៕

  • 4 សំណួរសម្រាប់អ្នកចង់ក្លាយខ្លួនជាគ្រូបង្រៀន

    4 សំណួរសម្រាប់អ្នកចង់ក្លាយខ្លួនជាគ្រូបង្រៀន

    ការជ្រើសរើសអាជីពជាចំណុចអាទិភាពមួយដែលមនុស្សគ្រប់រូបត្រូវគិតគូរ តែអ្នកដែលត្រូវគិតច្រើនជាងគេនោះ គឺអ្នកអប់រំ។ ការងារក្នុងវិស័យអប់រំមិនមែនងាយស្រួលដូចការគិតរបស់មនុស្សមួយចំនួននោះទេ ហើយការងារជាគ្រូបង្រៀនក៏ជាការងារមួយដែលអាចសម្រេចវាសនាមនុស្ស និងជីវិតខ្លួនឯងផ្ទាល់បាន។

    មុននឹងជ្រើសរើសយកអាជីពជាគ្រូបង្រៀន អ្នកស្រាវជ្រាវផ្នែកអប់រំ នៃគេហទំព័រល្បីៗដូចជា Education world ឬThe Athlantic Education ជាដើម រួមជាមួយគ្រូបង្រៀនល្បីៗលើពិភពលោកបានកំណត់យកវិធីសាស្រ្តមួយចំនួនដើម្បីទុកជាគំនិតសម្រាប់អ្នកដែលចង់ក្លាយជាគ្រូបង្រៀនពិចារណាមុននឹងសម្រេចចិត្តធ្វើការងារនៅក្នុងអាជីពមួយនេះ។

    ១. តើអ្នកអាចគ្រប់គ្រងការងារបម្រើសេវាអតិថិជន (Customer Service) បានទេ?
    ការងារជាគ្រូបង្រៀនជាការងារដែលត្រូវជួបមនុស្សច្រើន ដែលខុសប្លែកពីការងារបម្រើសេវាអតិថិជន (customer service) ដទៃទៀត។ ក្នុងនាមជាមន្ត្រីរាជការស៊ីវិល ដែលបម្រើការងារលើផ្នែកអប់រំ ការងារនេះត្រូវប្រឈមមុខជាមួយនឹងការទំនាក់ទំនងជាច្រើន ដូចជាការទាក់ទងដោយផ្ទាល់ចំពោះតម្រូវការរបស់សិស្ស ការទាក់ទងជាមួយអាណាព្យាបាលរបស់សិស្ស ហើយព័ត៌មានផ្ទាល់ខ្លួនរបស់គ្រូបង្រៀនមួយចំនួនក៏ត្រូវបានបង្ហាញផងដែរ។ អ្នកនឹងត្រូវធ្វើរបាយការណ៍ពីថ្នាក់រៀន ពីការបង្រៀន រាយការណ៍ពីការវិវឌ្ឍ រួមទាំងកម្មវិធីបង្រៀនជាច្រើនផ្សេងទៀតទៅសាលា និងអាណាព្យាបាល។ ក្រៅពីនេះ អ្នកនឹងត្រូវក្លាយជាអ្នកសម្របសម្រួលរវាងសិស្ស និងសិស្ស សិស្ស និងអាណាព្យាបាល អាណាព្យាបាល និងសាលាជាដើម។ គ្រប់គ្នាជាអតិថិជនរបស់គ្រូបង្រៀន ហើយគ្រប់គ្នាគឺសុទ្ធតែជាបុគ្គលអាទិភាពដែលអ្នកត្រូវយកចិត្តទុកដាក់។

    ២. តើអ្នកស្រឡាញ់ការដោះស្រាយបញ្ហាដែរឬទេ?
    ការដោះស្រាយបញ្ហាបន្ទាន់ៗជាអ្វីដែលអ្នកអប់រំ ជាពិសេសគ្រូបង្រៀនត្រូវតែបានជួបនៅក្នុងអាជីព។ បញ្ហានានានឹងចូលមករៀងរាល់ពេលដែលអ្នកធ្វើការ មិនត្រឹមតែក្នុងម៉ោងបង្រៀនប៉ុណ្ណោះទេដែលអ្នកត្រូវដោះស្រាយបញ្ហា ពេលខ្លះពេញមួយថ្ងៃអ្នកមានបញ្ហាត្រូវដោះស្រាយរហូត។ មានសិស្សច្រើនណាស់ដែលចាប់យកមិនបានពីអ្វីដែលអ្នកបានបង្រៀន រឿងហ្នឹងហើយដែលទាមទារឱ្យមានចម្លើយសម្រាប់ពួកគេ។ អ្នកត្រូវដោះស្រាយបញ្ហានានាដែលមាននៅក្នុងការបង្រៀន ជាមួយមិត្តរួមការងារ និងជាមួយសាលា ដែលពេលខ្លះគ្រប់បញ្ហាទាំងអស់នេះអាចនឹងធ្វើឱ្យអ្នកធុញ តែពេលខ្លះទៀតវាអាចធ្វើឱ្យអ្នកពេញចិត្ត និងមោទនភាពជាមួយនឹងជំនួយរបស់អ្នកដែលបានឱ្យទៅកាន់មនុស្សគ្រប់គ្នានោះ។

    ៣. តើអ្នកស្រឡាញ់សហគមន៍ដែរឬទេ?
    ជាការពិតណាស់ ពេលខ្លះគ្រូបង្រៀន មិនមែនបង្រៀនតែនៅក្នុងតំបន់ដែលខ្លួនរស់នៅរាល់ថ្ងៃនោះទេ ហើយពួកគាត់ក៏មិនមានភាពចាំបាច់អីដែលត្រូវដើរទៅគ្រប់ទីកន្លែងនោះដែរ តែពួកគាត់ត្រូវស្គាល់ផ្នែកភាគច្រើននៃសហគមន៍តាមដែលអាចធ្វើទៅបាន។ គ្រូបង្រៀនត្រូវស្គាល់ពីវប្បធម៌ របៀបរបបនៃការរស់នៅរបស់មនុស្សក្នុងសហគមន៍ កម្រិតយល់ដឹងរបស់អាណាព្យាបាលរបស់សិស្ស កន្លែងសំខាន់ៗដែលគ្រូបង្រៀនគិតថាមានសារៈសំខាន់សម្រាប់ការរស់នៅ ដើម្បីអាចធ្វើជាទុននៃគំនិតសម្រាប់ការស្វែងយល់ឱ្យច្បាស់ពីតម្រូវការរបស់សិស្ស។ គ្រូបង្រៀនត្រូវដឹងពីប្រភពរបស់សិស្ស ដើម្បីងាយស្រួលផ្តល់ឱ្យពួកគេនូវអ្វីដែលពួកគេចង់បាន ហើយក្លាយខ្លួនជាបុគ្គលដែលគូរឱ្យគោរពម្នាក់សម្រាប់កូនសិស្ស និងអាណាព្យាបាលរបស់ពួកគេ។

    ៤. តើអ្នកចូលចិត្តការសម្តែងដែរឬទេ?
    គ្រូបង្រៀនគឺជាអ្នកសម្តែងដែលពោរពេញទៅដោយសិល្បៈ និងប្រកបដោយចំណេះដឹង។ ក្នុងចំណោមរឿងរ៉ាវដែលគ្រូបង្រៀនត្រូវធ្វើក្នុងអាជីពរបស់ខ្លួន ការសម្តែង ឬសកម្មភាពនៅលើឆាកគឺមានប្រហែលជា 85% ដើម្បីធ្វើបទបង្ហាញ ឬពន្យល់ពីមេរៀនថ្មីៗដែលទាក់ទាញ។

    ការបង្រៀនមិនមែនងាយស្រួលដោយគ្រាន់តែនិយាយឱ្យតែរួចពីមាត់នោះទេ តែត្រូវមានសិល្បៈក្នុងការនិយាយ ព្រមទាំងដឹងពីកាលៈទេសៈក្នុងការអូសទាញចិត្តសិស្សឱ្យរីករាយជាមួយនឹងការអប់រំ ដើម្បីផ្លាស់ប្តូរពួកគេឱ្យក្លាយជាធនធានដ៏សំខាន់សម្រាប់សង្គមនាពេលអនាគត៕

  • HTC ដាក់ចេញស្មាតហ្វូន U11 ស្ដារមុខមាត់ថ្មី

    HTC ដាក់ចេញស្មាតហ្វូន U11 ស្ដារមុខមាត់ថ្មី

    ដូចអ្វីដែលព័ត៌មានចចាមអារ៉ាមបានលេចឮមែន ក្រុមហ៊ុន HTC ពិតជាបានដាក់ចេញនូវស្មាតហ្វូនស៊េរីថ្មីត្រកូល U ដើម្បីស្ដារមុខមាត់ដែលធ្លាក់ចុះហៅលែងឮនោះមែន។ ស្មាតហ្វូនថ្មីនេះត្រូវបានបំពាក់ជាមួយនឹងអេក្រង់ទំហំ 5.5 អ៊ីញ Super LCD ជាមួយកម្រិត QHD resolution (2560x1440px)។

    HTC U11 បំពាក់ជាមួយនឹងបន្ទះឈីប Snapdragon 835 ជំនាន់ចុងក្រោយរបស់ក្រុមហ៊ុន Qualcomm ដូចនឹងទូរស័ព្ទGalaxy S8 និង Galaxy S8 Plus ដូច្នោះដែរ។ ស្មាតហ្វូននេះមាន Ram ទំហំ 4GB, Memory ក្នុងម៉ាស៊ីនទំហំ 64GB អាចបន្ថែមទំហំបានដល់ទៅ 2TB និងមានថ្មថាមពល 3000mAh អាចសាកបានលឿនលើមុខងារ QuickCharge 3.0។

    ចំពោះសមត្ថភាពកាមេរ៉ា U11 អាចថតរូបបានច្បាស់ និងរហ័ស ខណៈវាមានទំហំ 12MP ប្រភេទ UltraPixel 3 មានកម្រិត f/1.7 aperture អាចថតរូបបានល្អទោះបីនៅទីកន្លែងខ្សោយពន្លឺ និងមានភ្ជាប់នូវមុខងារទប់លំនឹង OIS ហើយអាចថតវីដេអូបានក្នុងកម្រិត 4K។ សមត្ថភាពកាមេរ៉ាកម្រិតនេះ ត្រូវបានក្រុមដាក់ពិន្ទុ DxOMark ឱ្យដល់ទៅ 90ពិន្ទុខ្ពស់ជាងទូរស័ព្ទ Google Pixel ដែលបានត្រឹម 89 ប៉ុណ្ណោះ។ អ្វីកាន់តែពិសេសជាងនេះទៀត លោកអ្នកអាចប្រើប្រាស់ HTC U11 ថតរូបភាពជាប្រភេទ RAW Format បានផងដែរ។ កាមេរ៉ានេះអាចថតរូបភាពត្រឹមកម្រិត1080p ប៉ុណ្ណោះ វាមិនអាចថតក្នុងទម្រង់ 4K បាននោះទេ។ កាមេរ៉ាខាងមុខរបស់ស្មាតហ្វូននេះមានទំហំ15MP ដែលអាចថតកម្រិត 150 ដឺក្រេជាប្រភេទ Wide-Angle Lens។ ជាពិសេស វាអាចថតរូបភាព Selfie Panoramas បានផងដែរ។

    HTC បានធ្លាក់ចំណូល 9.29% ធៀបនឹងរយៈពេលដូចគ្នាកាលពីឆ្នាំ 2016។ ចំណូលសរុបមួយរយៈ 4ខែដើមឆ្នាំ 2017នេះ ក្រុមហ៊ុនទទួលបានតែ 635 លានដុល្លារ មានការធ្លាក់ចុះ 6.45% ធៀបនឹងរយៈពេលដូចគ្នាក្នុងឆ្នាំ 2016 ដោយពេលនោះ HTC ទទួលបាន 676 លានដុល្លារ។

    អ្នកវិភាគមួយចំនួនលើកឡើងថា ការបន្តធ្លាក់ចុះនេះ អាចបណ្ដាលមកពីក្រុមហ៊ុន HTC ដាក់ចេញនូវស្មាតហ្វូនដែលមិនត្រូវចិត្តអ្នកប្រើប្រាស់ ខណៈទូរស័ព្ទមកពីក្រុមហ៊ុន Samsung កំពុងតែវាយលុកខ្លាំងលើទីផ្សារស្មាតហ្វូនសកល។ ជាអាទិ៍ស្មាតហ្វូនស៊េរីថ្មី HTC U Ultra និង HTC U Play មិនមានដំណើរការល្អ ការលក់មិនគ្រប់តាមចំនួនដែលបានគ្រោងទុក ធ្វើឱ្យចំណូលបន្តធ្លាក់។

    តែទោះបីជាយ៉ាងណា ចំណូលនេះអាចងើបឡើងវិញបន្តិច ប្រសិនបើទូរស័ព្ទ HTC U 11 បង្ហាញខ្លួនមែន។ ការសន្និដ្ឋាននេះ ផ្អែកលើសមត្ថភាពខ្លះដែលព័ត៌មានបែកធ្លាយបានចុះផ្សាយ និងការមើលឃើញពីសម្ទុះនៃការគាំទ្ររបស់អ្នកប្រើប្រាស់៕

  • ពែកមី ខឹងគេចុះផ្សាយថា នាយ គ្រឿន រងរបួស ព្រោះត្រូវគេដេញកាប់រយះក្បាលដេរ ១០ ថ្នេរ

    ពែកមី ខឹងគេចុះផ្សាយថា នាយ គ្រឿន រងរបួស ព្រោះត្រូវគេដេញកាប់រយះក្បាលដេរ ១០ ថ្នេរ

    ភ្នំពេញៈ ដោយសារមានរូបនាយគ្រឿនមានស្នាមរបួស និងមានព័ត៌មានចេញផ្សាយភ្លាមៗថា នាយ គ្រឿន ត្រូវគេដេញកាប់របួសរយះយ៉ាងធំនៅត្រង់ចិញ្ចើម ដេរ១០ថ្នេរ ហើយបាត់ប្រាក់ក្នុងកាបូបអស់ និងខានថតកុនទៀតនោះ ទើបធ្វើឱ្យក្តៅក្រហាយដល់នាយពែកមី ដែលភ្លាមៗនោះក៏បានបង្ហោះសារប្រាប់ថា៖ «ប្អូនប្រុសខ្ញុំ តែតបាល់បុកក្បាលគ្នាបែកធំណាស់បងប្អូនអើយ ជួបស៊យ» ។

    នាយពែកមីដែលជាបងប្រុសបង្កើតរបស់នាយគ្រឿនតារាកំប្លែងល្បី និងជាពិធីករក្នុងកម្មវិធីល្បែងកម្សាន្ត របស់ទូរទស្សន៍ CTN បានប្រាប់ថា៖ «ទោះបីខ្ញុំបានបញ្ជាក់ថា មានរបួសដោយសារលោតតែតបាល់បុកក្បាលគ្នាប៉ុណ្ណឹងហើយក៏ដោយ ក៏នៅតែមានព័ត៌មានចេញផ្សាយមិនពិតថា នាយគ្រឿនត្រូវគេដេញកាប់រយះក្បាល ដោយអត់មានបានសាកសួរសាមីខ្លួន និងបងប្អូនគេអីបន្តិចសោះ ការពិតនាយគ្រឿនលេងបាល់ទាត់នៅខ្សែប្រយុទ្ធ លោតតែតបាល់បុកក្បាលគ្នាជាមួយខ្សែការពារនៅទីលានក្បែរផ្ទះជិតស្ថានីយទូរទស្សន៍ស៊ីធីអ៊ិន កាលពីល្ងាចម៉ោង ៥ និងដេរតែ ៨ ថ្នេរ ទេ!»។

    តារាកំប្លែងនាយ ពែកមី បានបន្តថា៖ «ខ្ញុំដឹងថាព័ត៌មានច្បាស់ជាសរសេរចង់ឲ្យគេចាប់អារម្មណ៍ចង់មើលមិនខាន តែសុំកុំឲ្យហួសពីការពិតពេក ខុសពីឧត្តមគតិខ្លួនធ្វើអី! ហើយខ្ញុំក៏សូមជម្រាបបងប្អូនដែរថា ទោះបីជានាយគ្រឿនរងរបួសក៏មិនប៉ះពាល់ទៅដល់ការថតកំប្លែង ឬកម្មវិធីទូរទស្សន៍ និងច្រៀងកាត់សក់ឡើយ គ្រាន់តែអត់អាចថតកុនបានប៉ុណ្ណោះ»៕