Category: សង្គម និងសេដ្ឋកិច្ច

  • រដ្ឋាភិបាលដាក់ទិសដៅឱ្យកម្ពុជា ដាច់ខាតត្រូវតែមានទីលានកីឡាស្ដង់ដារនៅតាមសាលារៀនរបស់រដ្ឋ មុនឆ្នាំ ២០២៣

    រដ្ឋាភិបាលដាក់ទិសដៅឱ្យកម្ពុជា ដាច់ខាតត្រូវតែមានទីលានកីឡាស្ដង់ដារនៅតាមសាលារៀនរបស់រដ្ឋ មុនឆ្នាំ ២០២៣

    កាលពីពេលថ្មីៗកន្លងទៅនេះ ប្រមុខថ្នាក់ដឹកនាំរបស់រាជរដ្ឋាភិបាលកម្ពុជាបានដាក់ចេញ នូវយុទ្ធសាស្ត្រក្នុងការអភិវឌ្ឍវិស័យកីឡានៅតាមសាលារៀនមុនពេលកម្ពុជាធ្វើជាម្ចាស់ផ្ទះកីឡាស៊ីហ្គេម ឆ្នាំ ២០២។

    លោក ព្រំ ប៊ុនយី ទីប្រឹក្សាក្រសួងអប់រំ យុវជន និងកីឡាបានមានប្រសាសន៍ថា៖ ពាក់ព័ន្ធ នឹងយុទ្ធសាស្ត្ររបស់សម្តេចអគ្គមហាសេនាបតីតេជោ ហ៊ុន សែន ដែលបានដាក់ចេញមកឲ្យក្រសួងអប់ រំយុវជន និងកីឡាអនុវត្តនោះ បច្ចុប្បន្នក្រសួងកំពុងជំរុញបង្កើតឱកាសសម្រាប់សិស្សមធ្យមសិក្សាដែលមានអាយុក្រោម១៨ឆ្នាំដើម្បីបញ្ជូនទៅចូលរួមប្រកួតកីឡានៅក្រៅប្រទេស ដូចជាព្រឹត្តិការណ៍ School Game នៅប្រទេសសិង្ហបុរីក្នុងអំឡុងខែកក្តដា ឆ្នាំ២០១៧ ខាងមុខនេះជាដើម។

    លោកបានមានប្រសាសន៍បែបនេះថា៖ នៅក្នុងយុទ្ធសាស្ត្រសំខាន់ៗរបស់ប្រមុខរដ្ឋាភិបាលបានបញ្ជាក់យ៉ាងច្បាស់ថា នៅតាមសាលារៀនរបស់រដ្ឋ ចាប់ពីពេលនេះតទៅត្រូវបង្កើតឲ្យមានទីលានកីឡា ហើយទីលានកីឡានោះទៀតសោត ត្រូវតែស្របតាមស្តង់ដារបច្ចេកទេស ដើម្បីឲ្យសិស្សតាមសាលារៀនរដ្ឋមានការអនុវត្តផ្នែកអប់រំកាយដើម្បីសុខភាព និងធនធានកីឡាចេញពីសិស្សនៅតាមសាលារៀនរបស់រដ្ឋទូទាំងប្រទេស។

    ចំពោះផែនការរបស់ក្រសួងដែលត្រៀមបញ្ជូនសិស្សអាយុក្រោម១៨ឆ្នាំ ឬហៅថាកីឡាករ- កីឡាការិនីថ្នាលឱ្យមានឱកាសបានចេញទៅប្រកួតនៅក្រៅប្រទេសបែបនេះ គឺក្នុងន័យឲ្យពួកគេស៊ាំធ្លាប់ជាមួយព្រឹត្តិការណ៍កីឡាអន្តរជាតិ និងដកស្រង់បទពិសោធថ្មីៗ និងដឹងពីកម្រិតសមត្ថភាពរបស់ខ្លួនឯង ហើយត្រូវខិតខំហ្វឹកហាត់បន្ថែមទៀត ។

    សូមបញ្ជាក់ថា នៅខែកក្តដាខាងមុខនេះ ក្រសួងអប់រំ យុវជន និងកីឡា នឹងបញ្ជូនសិស្សអាយុក្រោម១៨ឆ្នាំចំនួន៥ប្រភេទកីឡាទៅចូលរួមការប្រកួតក្នុងព្រឹត្តិការណ៍ School Game នៅប្រទេសសិង្ហបុរី ដូចជាប្រភេទកីឡាវាយកូនឃ្លីលើតុ(ប៉េងប៉ុង) កីឡាវាយសី កីឡាវាយកូនបាល់(តឺនីស) កីឡាអត្តពលកម្ម និងកីឡាហែលទឹក ៕

  • លោក Allardyce លាលែងពីតំណែងអ្នកចាត់ការទូទៅរបស់ Crystal Palace

    លោក Allardyce លាលែងពីតំណែងអ្នកចាត់ការទូទៅរបស់ Crystal Palace

    លោក Sam Allardyce បានប្រកាសកាលពីថ្ងៃអង្គារថា លោកបានចុះចេញពីតំណែងអ្នកចាត់ការទូទៅរបស់ក្រុម Crystal Palace ហើយ ដោយសារតែហេតុផលគ្រួសារក្រោយពីកាន់តំណែងបានរយៈពេលត្រឹមតែ ៥ ខែប៉ុណ្ណោះក្នុងក្លិបរបស់ក្របខ័ណ្ឌ Premier League មួយនេះ។

    គ្រូបង្វឹកវ័យ៦២ឆ្នាំដែលបានដឹកនាំក្រុមបាល់ទាត់ជម្រើសជាតិអង់គ្លេសត្រឹមតែ១ប្រកួតនោះ បាននិយាយថាលោកមិនមានមហិច្ឆតាក្នុងការទទួលការងារផ្សេងឡើយ ដោយបានទទួលស្គាល់ថា លោកពិតជាដឹងគុណដល់ក្លិប Crystal ដែលបានផ្តល់ឱកាសឲ្យលោកក្នុងការស្តារកេរិ៍្តឈ្មោះរបស់លោកត្រឡប់មកវិញ។ លោក Allardyce បានចូលកាន់តំណែងនេះក្នុងក្លិប Crystal Palace បន្ទាប់ពីការចាកចេញរបស់លោក Alan Pardew កាលពីខែធ្នូ ក្នុងកិច្ចសន្យារយៈពេល២ឆ្នាំកន្លះ និងបានជួយឲ្យក្រុមមានរហស្សនាមថា ឥន្ទ្រីកំណាចមួយនេះ ឈ្នះ៨លើក ក្នុងចំណោមការប្រកួត២១លើក និងពួកគេបានបញ្ចប់ក្នុងចំណាត់ថ្នាក់លេខ១៤ នៅលើតារាងនៃក្របខ័ណ្ឌ Premier League។

    ក្រោយពីកិច្ចពិភាក្សាផ្សេងៗជាមួយនឹងលោក Steve Parish ដែលជាប្រធានក្លិបរួចមក លោក Allardyce បានឲ្យដឹងនៅក្នុងសេចក្តីថ្លែងការណ៍មួយថា៖ «ពេលខ្លះ នេះគឺជាការសម្រេចចិត្តដ៏លំបាកមួយ ប៉ុន្តែពេលខ្លះនេះគឺជាការសម្រេចចិត្តដ៏សាមញ្ញមួយ»។ គ្រូបង្វឹកចាស់វស្សារូបនេះបានបន្ថែមទៀតថា៖ «ខ្ញុំតែងតែដឹងគុណដល់ក្លិប Crystal Palace និងលោក Steve Parish ចំពោះការផ្តល់ឱកាសឲ្យខ្ញុំក្នុងការចាកចេញទាំងភាពរីករាយ ក្រោយពីបានជួយឲ្យក្លិបនេះរក្សាវត្តមានរបស់ពួកគេក្នុងក្របខ័ណ្ឌ Premier League»៕
    ប្រភពពី៖ Reuters

  • ខេត្តក្រុងចំនួន 6 ជាគោលដៅសំខាន់របស់ព្រឹត្តិការណ៍បារឃែម ឆ្នាំ 2017-2018 នេះ

    ខេត្តក្រុងចំនួន 6 ជាគោលដៅសំខាន់របស់ព្រឹត្តិការណ៍បារឃែម ឆ្នាំ 2017-2018 នេះ

    ក្រោយដំណើរការរៀបចំកម្មវិធីលើកកម្ពស់វិស័យបច្ចេកវិទ្យា និងការចាប់ផ្ដើមជំនួញនៅកម្ពុជា អស់រយៈពេល 10ឆ្នាំមក កម្មវិធីបារឃែម មានគម្រោងរួចជាស្រេចហើយសម្រាប់ឆ្នាំ 2017-2018 ក្នុងដំណើរការរៀបចំព្រឹត្តិការណ៍ថ្នាក់តំបន់នៅតាមបណ្ដាខេត្តក្រុងគោលដៅចំនួន 6 ដើម្បីអនុញ្ញាតឱ្យយុវជនវ័យក្មេងអាចមានឱកាសចូលរួមទទួលយកចំណេះដឹងថ្មីៗក្នុងវិស័យបច្ចេកវិទ្យា និងអាចបង្ហាញស្នាដៃដែលពួកគេមានផងដែរ។

    លោក បេ ចន្ត្រា អ្នករៀបចំកម្មវិធីបារឃែមកម្ពុជាបានលើកឡើងថា រយៈពេល 10 ឆ្នាំមកនេះ បារឃែមមានអ្នកចូលរួមជាង 2 ម៉ឺននាក់ ក្នុងចំណោម 10 ខេត្តក្រុងដែលកម្មវិធីនេះបានទៅដល់ ហើយសម្រាប់ឆ្នាំ 2017-2018 នេះ មានខេត្តក្រុងចំនួន 6 សំខាន់ៗ ដែលក្រុមលោកបានកំណត់យក ក្រោមការឧបត្ថម្ភ និងគាំទ្រដោយក្រុមហ៊ុន Smart។

    លោកបន្តថា តាមរយៈការសហការ និងគាំទ្រនេះធ្វើឱ្យបារឃែមកម្ពុជា អាចដំណើរការកម្មវិធីចែករំលែកចំណេះដឹងដល់យុវជន និងសហគ្រិននៅតាមបណ្ដាខេត្តមួយចំនួន ដូចជា រតនគីរី កំពង់ចាម កំពត បាត់ដំបង សៀមរាប និងរាជធានីភ្នំពេញ។ ហើយអ្វីដែលសំខាន់គឺ ក្រុមការងាររបស់លោក មានលទ្ធភាពអញ្ជើញវាគ្មិនជំនាញៗនៅរាជធានីភ្នំពេញ និងក្នុងតំបន់ចូលរួមធ្វើបទបង្ហាញ និងចែករំលែកបទពិសោធដល់យុវជនតាមបណ្ដាខេត្តដោយផ្ដោតលើការបញ្ជ្រាបការយល់ដឹងអំពី Startups Business ការប្រកួតប្រជែងគំនិតអាជីវកម្ម ការប្រើប្រាស់បច្ចេកវិទ្យាសម្រាប់ការរៀនសូត្រ ការងារ និងអាជីវកម្ម។

    លោក ចន្ត្រា បន្ថែមថា អាជីវកម្មចាប់ផ្តើមថ្មី និងវិស័យបច្ចេកវិទ្យានឹងចូលរួមចំណែកយ៉ាងសំខាន់ក្នុងកំណើនសេដ្ឋកិច្ចរបស់កម្ពុជា ក៏ដូចជាភាពរុងរឿងនៃសង្គមកម្ពុជាផងដែរ។ តាមរយៈកម្មវិធីនេះ វាអាចផ្ដល់ឱកាសដល់ក្រុមហ៊ុនបច្ចេកវិទ្យា Startups ថ្មីៗអាចបង្ហាញ និងតាំងពិព័រណ៍ផលិតផល និងសេវាកម្មរបស់ខ្លួនដល់សាធារណជនចូលរូមទូទៅនៅកន្លែងកម្មវិធីផងដែរ។

    ដោយឡែកកម្មវិធីបារឃែមកម្ពុជា ឆ្នាំ 2017 ដែលត្រៀមធ្វើនៅពេលឆាប់ៗនេះ វាជាសិក្ខាសាលាបច្ចេកវិទ្យា និងការចាប់ផ្ដើមជំនួញដែលមានគោលបំណងចែករំលែកចំណេះដឹងដល់យុវជន និងសហគ្រិននៅតាមបណ្ដាខេត្ត អំពីការប្រើប្រាស់បច្ចេកវិទ្យាសម្រាប់ការសិក្សា ការងារ និងទំនាក់ទំនង ព្រមទាំងចំណេះដឹងអំពីការចាប់ផ្ដើមជំនួញ ដូចជាជ្រើសរើសគំនិតអាជីវកម្ម ការស្វែងយល់ពីការបង្កើតគំរូអាជីវកម្ម ស្វែងយល់អំពីអតិថិជន ការផលិត ផលិតផល និងសេវាកម្ម ផ្សព្វផ្សាយនិមិត្តសញ្ញាអាជីវកម្ម ទីផ្សារ និងការរៀបចំគម្រោងចំណាយ ចាប់ផ្ដើមអាជីវកម្ម ជាដើម។ល។

    លោក Thomas Hundt អគ្គនាយកក្រុមហ៊ុន Smart Axiata បានឱ្យដឹងថា ភាពជាដៃគូនេះបានឆ្លុះបញ្ចាំងនូវការចូលរួមជាបន្តបន្ទាប់របស់ក្រុមហ៊ុន Smart ក្នុងគំនិតផ្តួចផ្តើម ជួយជំរុញសហគ្រិនថ្មីៗក្នុងវិស័យបច្ចេកវិទ្យា និងឌីជីថលសំដៅអភិវឌ្ឍសហគមន៍អ្នកចាប់ផ្ដើមជំនួញថ្មីនៅប្រទេសកម្ពុជាឱ្យបានរីកលូតលាស់ទៅមុខជាលំដាប់។ ជាមួយនឹងការធ្វើសិក្ខាសាលាចែករំលែកចំណេះដឹង និងការជួយបង្ហាត់បង្ហាញពីអ្នកជំនាញ ក្រុមហ៊ុន Smart Axiata សង្ឃឹមថា កម្មវិធីនេះនឹងលើកទឹកចិត្តឱ្យយុវជនកម្ពុជាកាន់តែច្រើនអាចបង្កើត និងប្រើប្រាស់បច្ចេកវិទ្យាបានត្រឹមត្រូវ និងបណ្តុះផ្នត់គំនិតសហគ្រិនភាពរបស់ពួកគេ ដើម្បីសម្រេចបាននូវក្តីសុបិនរបស់ខ្លួន៕

  • Youtube Channels ល្អបំផុតសម្រាប់សិស្សវិទ្យាល័យលើពិភពលោក

    Youtube Channels ល្អបំផុតសម្រាប់សិស្សវិទ្យាល័យលើពិភពលោក

    នៅក្នុងសតវត្សរ៍ទី21នេះ បណ្តាញបច្ចេកវិទ្យាបានកែសម្រួលថ្នាក់រៀនមួយចំនួនពីការបង្រៀនតាមបែបបុរាណ មកជាថ្នាក់រៀនបច្ចេកវិទ្យា (flip classroom)។ ទន្ទឹមនឹងនេះ សិស្សក៏អាចសិក្សាស្រាវជ្រាវបានដោយខ្លួនឯងផងដែរនៅគ្រប់ពេលទំនេររបស់ខ្លួនតាមរយៈគេហទំព័រសំខាន់ៗ រួមទាំង Channels Youtube ដែលធ្វើការផ្សព្វផ្សាយពីចំណេះដឹងជាសាធារណៈផងដែរ។

    Youtube ត្រូវបានបង្កើតឡើងនៅក្នុងឆ្នាំ 2005 តែវាទើបត្រូវបានគេប្រើប្រាស់ច្រើននៅក្នុងវិស័យអប់រំនាពេលថ្មីៗនេះតាមរយៈការអភិវឌ្ឍមុខងារថ្មីៗ ដែលឆ្លើយតបនឹងការអប់រំ។ ម្យ៉ាងវិញទៀតតាមរយៈការស្ទង់មតិនៅសហរដ្ឋអាមេរិកបានរកឃើញថា មានសិស្សភាគច្រើនប្រើប្រាស់ Youtube ក្នុងគោលបំណង 2 សំខាន់ៗ គឺការកម្សាន្ត និងមុខងារអប់រំរបស់វា។

    ដោយមើលឃើញថា Youtube មានសារៈសំខាន់សម្រាប់សិស្សវិទ្យាល័យ គេហទំព័រ education world ដែលជាគេហទំព័រអប់រំដ៏ល្បីល្បាញមួយបង្ហាញថាមាន Channels Youtube មួយចំនួនកំពុងក្លាយជា Channel ដែលមានតម្លៃជាសកល និងល្អបំផុតសម្រាប់សិស្សវិទ្យាល័យ ដូចជា ៖

    1. Crash Course
    វាជា Channel មួយដែលពោរពេញទៅដោយភាពទាក់ទាញជាមួយនឹងរូបភាពកំប្លុកកំប្លែង និងរូបតុក្កតាគួរឱ្យទាក់ទាញជាមួយនឹងមេរៀនអក្សរសិល្ប៍ រូបវិទ្យា ប្រវត្តិវិទ្យា ជីវវិទ្យា សង្គមវិទ្យា និងមេរៀនប្រកបដោយគុណតម្លៃជាច្រើនទៀត។ វីដេអូទាំងអស់នោះ ភាគច្រើនគឺសុទ្ធសឹងតែឆ្លើយតបទៅនឹងមេរៀនរបស់សិស្សនៅក្នុងសាលា ព្រមទាំងអាចជួយឱ្យសិស្សដឹងនូវព័ត៌មានពាក់ព័ន្ធនឹងការសិក្សាច្រើនមុនពេលមេរៀនសំខាន់ពិតប្រាកដចូលមកដល់ទៀតផង។

    2. Big Think
    Big Think ជា Channel ដែលត្រូវបានបង្ហាញដោយអ្នកជំនាញពូកែៗ ដែលបង្ហាញពីគំនិត និងជំនាញដែលត្រូវមាននៅក្នុងសតវត្សរ៍ទី21នេះ។ ជាធម្មតាវីដេអូនៅក្នុង Channel នេះជាវីដេអូបែបសាមញ្ញ តែវាបានបំផុសគំនិតសិស្សឱ្យមានការគិតយ៉ាងស៊ីជម្រៅ និងអប់រំផ្លូវចិត្តបានល្អថែមទៀតផង។ ប្រធានបទសំខាន់ៗនៃ Channel នេះមានដូចជា វិទ្យាសាស្រ្តនយោបាយ ចិត្តវិទ្យា និងសង្គមសាស្ត្រ ជាដើម។

    3. TED-Ed
    សិស្សភាគច្រើននៅលើពិភពលោករួមទាំងកម្ពុជាផង ប្រហែលជាបានស្គាល់ TED-Ed ដែលជា Channel Youtube ល្បីមួយដែលប្រមូលផ្តុំដោយគំនិតទូលំទូលាយ ព្រមទាំងបង្ហាញពីប្រធានបទ និងចំណេះដឹងដែលមនុស្សគ្រប់គ្នាស្មានមិនដល់។ រហូតមកដល់ពេលនេះ មានវីដេអូដែលផលិតឡើងជាគំនូរជីវចលមិនតិចជាង 500 រឿងទេ ដែលត្រូវបានបង្ហោះនៅក្នុង Channel អប់រំមួយនេះ។ វាក៏បានបែងចែកជាផ្នែកសំខាន់ៗចំនួន 2 ដើម្បីអប់រំមនុស្ស គឺ TEDYouth Talks និង TED-Ed Professional Development។

    4. Bright Storm
    Bright Storm ជា Channel ដែលបង្ហាញពីវីដេអូរបស់គ្រូបង្រៀនជាច្រើនដែលបង្រៀននៅលើក្តាខៀន។ អ្នកដែលបង្រៀននៅក្នុងវីដេអូទាំងអស់នេះ សុទ្ធសឹងតែជាអ្នកដែលមានបទពិសោធ និងសមត្ថភាពខ្ពស់ក្នុងការបង្រៀន។ វាក៏បានបង្ហាញផងដែរនូវភ័ស្តុតាងពិសោធជាក់ស្តែងនៅក្នុងមេរៀននីមួយៗដើម្បីឱ្យសិស្សងាយយល់ និងកម្សាន្តក្នុងពេលដែលកំពុងសិក្សាជាមួយវីដេអូផងដែរ៕

  • យុគ ចិន្ដា បង្កើតក្រុម TMS ដើម្បីផ្ដល់ឱកាសការងារស្ដង់ដារដល់តារាសិល្បៈជំនាន់ក្រោយ

    យុគ ចិន្ដា បង្កើតក្រុម TMS ដើម្បីផ្ដល់ឱកាសការងារស្ដង់ដារដល់តារាសិល្បៈជំនាន់ក្រោយ

    ដោយសម្លឹងឃើញពីសក្ដានុភាពរបស់តារាសិល្បៈកម្ពុជានាពេលបច្ចុប្បន្នកាន់តែមានសមត្ថភាពខ្ពស់ស្ទើរតែគ្រប់ជំនាញនោះ អ្នកនាងយុគ ចិន្ដា ពិធីការិនីរៀមច្បងនៅក្រុមហ៊ុន CBS ដែលមានស្ថានីយទូរទស្សន៍ CTN My TV និង CNC នៅពីក្រោយខ្នង បានកៀងគរតារាចម្រៀង 8 រូប និងក្រុមរាំចំនួន 2 ក្រុម ដើម្បីចូលមកក្នុងក្រុម TMS (Talent Managerment Service)។

    ក្នុងនាមអ្នកនាងយុគ ចិន្ដា ជាអ្នកគ្រប់គ្រងផ្ទាល់របស់ក្រុម TMS អ្នកនាងបានលើកឡើងថា មូលហេតុបង្កើតក្រុមនេះឡើង គឺដោយសារតែអ្នកនាងសម្លឹងឃើញបច្ចុប្បន្នមានតារាសិល្បៈយើងមានសមត្ថភាពច្រើន ប៉ុន្ដែពួកគេពុំទាន់មានជម្រកណាមួយឱ្យបានច្បាស់លាស់ និងកក់ក្ដៅនៅឡើយ ដូច្នេះទើបក្នុងនាមនាងខ្ញុំជាអ្នកស្ថិតក្នុងរង្វង់សិល្បៈដូចគ្នាក៏មានគំនិតកៀងគរពួកគេទាំងនោះឱ្យចូលមកនៅក្នុងក្រុមតែមួយគឺ ក្រុម TMS ហ្នឹងឯង ។

    អ្នកនាងបន្ដថា ដោយសារតែក្រុម TMS ស្ថិតនៅក្រោមចំណុះទូរទស្សន៍ចំនួនបី ដូច្នេះទើបយើងជឿជាក់ថា ពួកគាត់នឹងមានឱកាសទទួលបានការងារធ្វើកាន់តែច្រើនបន្ថែមទៀត គ្រាន់តែពួកគាត់ប្រឹងប្រែងបង្កើនសមត្ថភាពខ្លួនឯងឱ្យបានកាន់តែខ្លាំងប៉ុណ្ណោះ ទីផ្សារការងារនឹងមានកាន់តែធំមិនខាន។

    ទោះជាយ៉ាងណាអ្នកនាងយុគ ចិន្ដា បានបន្ថែមទៀតថា៖ ”បើទោះជាយើងប្រមូលបានតារាចម្រៀងOriginal Song បានចំនួន 8 រូបដែលសុទ្ធតែជាអ្នកមានសមត្ថភាពខ្ពស់មែនក៏ដោយ ក៏ប៉ុន្ដែសមត្ថភាពគាត់ក៏ត្រូវតែមានការបង្ហាត់បង្ហាញពីអ្នកជំនាញជើងចាស់ដែលមានបទពិសោធបន្ថែមទៀតដែរ ទើបពួកគាត់អាចឈានទៅកាន់ទីផ្សារអន្ដរជាតិបាន”។

    គួបញ្ជាក់ថា ដើម្បីចូលជាសមាជិករបស់ក្រុម TMS តារាសិល្បៈគ្រប់ជំនាញត្រូវមានសមត្ថភាពផ្ទាល់ខ្លួនណាមួយដែលលេចធ្លោ ដើម្បីឱ្យគេជឿជាក់ថា ពួកគាត់អាចមានទេពកោសល្យ និងគំនិតច្នៃប្រឌិតផ្ទាល់ខ្លួនបាន។ TMS និងទទួលបម្រើសេវាកម្មដល់ក្រុមហ៊ុននានាដែលត្រូវការតារាចម្រៀង តារាសម្ដែង និងអ្នករាំក្នុងគ្រប់កម្មវិធីផងដែរ៕

    លោក ម៉ា ច័ន្ទបញ្ញា តារាចម្រៀងនៅក្នុងក្រុម TMS បានបញ្ជាក់ថា៖ ”ខ្ញុំពិតជាមានមោទនភាពខ្លាំងណាស់ដែលបានចូលរួមក្នុងក្រុមមួយនេះ។ តាមពិតខ្ញុំមានសមត្ថភាពអាចធ្វើអ្វីបានច្រើនក្រៅពីការច្រៀង និងនិពន្ធបទថ្មីៗ ប៉ុន្ដែដោយសារកន្លងមកខ្ញុំគ្មានឱកាស ដូច្នេះការចូលមកនៅក្នុងក្រុមTMS នេះ គឺជារឿងមួយដែលត្រឹមត្រូវបំផុត ដោយសារតែខ្ញុំអាចមានឱកាសបញ្ចេញរាល់សមត្ថភាពដែលខ្ញុំមាន តាមរយៈស្ថានីយទូរទស្សន៍ចំនួនបីបាន”៕

  • Beyoncé រៀបចំពិធី Baby Shower ដើម្បីត្រៀមទទួលកូនភ្លោះដែលជិតប្រសូត

    Beyoncé រៀបចំពិធី Baby Shower ដើម្បីត្រៀមទទួលកូនភ្លោះដែលជិតប្រសូត

    បន្ទាប់ពីបានបង្ហោះរូបភាពតាំងគភ៌របស់ខ្លួនកាលពីខែកុម្ភៈ នៅលើបណ្ដាញសង្គម អ៊ីនស្តាក្រាម (Instagram) ផ្ទាល់ខ្លួនហើយនោះ កំពូលតារាចម្រៀងស្រី Beyoncé ក៏បានបន្តបង្ហោះរូបភាពរបស់ខ្លួនថ្មីៗបន្តទៀត ព្រមទាំងរៀបចំពិធីជប់លៀង Baby Shower ដើម្បីត្រៀមទទួលកូនភ្លោះដែលកំពុងជិតប្រសូត ហើយពិធីនេះត្រូវបានរៀបចំតាមបែបបទរបស់ជនជាតិអាហ្រិ្វក ។

    តារាស្រីវ័យ ៣៥ឆ្នាំបានរៀបចំកម្មវិធីជប់លៀង Carter Push Party ក្នុងភូមិគ្រឹះផ្ទាល់ខ្លួន ជាលក្ខណៈក្រុមជនជាតិអាហ្វ្រិក ព្រមទាំងបង្ហាញរូបភាពបញ្ចេញក្បាលពោះដែលកំពុងតាំងគភ៌ជិតគ្រប់ខែ ជូនអ្នកគាំទ្រនៅលើបណ្ដាញអ៊ីនស្តាក្រាមរបស់នាង និងអ្វីដែលមិនអាចខ្វះបាននោះគឺ Jay Z ជាស្វាមីតារាចម្រៀងរ៉េប បានចូលមករាំច្រៀងជាមួយភរិយាយ៉ាងសប្បាយរីករាយ ថែមទាំងនៅមានអ្នកស្រី Tina Knowles LawSon ដែលជាម្ដាយបង្កើតរបស់ Beyoncé ចូលរួមថតឃ្លីបវីដេអូបង្ហោះដើម្បីបង្កឱ្យកម្មវិធីខាងលើកាន់តែមានភាពសប្បាយរីករាយ និងអធិកអធមឡើងទៀតផង៕

  • ផលិតកម្មភាពយន្តឥណ្ឌាបង្ហាញតួអង្គ Rambo ថ្មី

    ផលិតកម្មភាពយន្តឥណ្ឌាបង្ហាញតួអង្គ Rambo ថ្មី

    នៅក្នុងយុគសម័យថ្មីនេះ ការបង្កើតមនុស្សយន្ដ (Robot) ដើម្បីសម្តែងក្នុងខ្សែភាពយន្ដ បានកើតឡើងជាច្រើន តែទីបំផុតតួអង្គ Rambo ដ៏ល្បីល្បាញបានវិលត្រឡប់មកវិញនៅក្នុងខ្សែភាពយន្តថ្មីដូចគ្នា តែមិនមែនជាវណ្ណកម្មរបស់ខាងក្រុមហ៊ុន ហូលីវូដ នោះទេ។

    ពិភពភាពយន្ត Bollywood ដ៏ល្បីល្បាញរបស់ប្រទេសឥណ្ឌានឹងនាំយកខ្សែភាពយន្ដរឿងបាញ់ប្រហារដ៏ល្បីគឺរឿង Rambo ដែលធ្លាប់បានផលិតកាលពី ៣៥ ឆ្នាំមុន មកផលិតជាថ្មីម្ដងទៀត ដោយមានវត្តមានតារាសម្ដែងល្បីដូចជាលោក Tiger Shroff មកសម្ដែងជាតួអង្គ Rambo ដែលគ្រោងនឹងដាក់បញ្ចាំងនៅឆ្នាំ ២០១៨ ខាងមុខនេះ។ នៅក្នុងសាច់រឿងរបស់ខ្សែភាពយន្តផលិតជាថ្មីដោយក្រុមហ៊ុន Bollywood ដ៏ល្បីល្បាញរបស់ឥណ្ឌាមួយនេះគឺ តួឯកជាអ្នករួចជីវិតចេញពីការជួយកងប្រតិបត្តិការសម្ងាត់របស់ឥណ្ឌា នៅពេលដែលលោកបានត្រឡប់មកផ្ទះវិញ ស្រាប់តែបានឃើញហេតុការណ៍នៅក្នុងស្រុកកំណើតរបស់ខ្លួនធ្លាក់ចូលទៅក្នុងភ្នក់ភ្លើងសង្គ្រាម ហើយលោកក៏ត្រូវរត់គេចទៅលាក់ខ្លួននៅក្នុងព្រៃជ្រៅប្រកបដោយគ្រោះថ្នាក់បំផុត គឺនៅលើភ្នំ ហ៊ីម៉ាឡាយ៉ា ព្រមទាំងប្រើយុទ្ធសាស្ដ្រដែលធ្លាប់បានហ្វឹកហាត់ ដើម្បីកម្ចាត់ និងការពារប្រជាជនពីពួកសត្រូវឈ្លានពាន។

    គួរបញ្ជាក់ផងដែរថា តារាឯកប្រុសខាងលើបានថ្លែងក្នុងការផ្ដល់បទសម្ភាសជាមួយសារព័ត៌មានកម្សាន្តរបស់ឥណ្ឌាថា “ការដែលបានចូលរួមចំណែកសម្ដែងជាតួឯកក្នុងរឿងល្បីមួយ ដែលធ្លាប់បានមើលតាំងតែពីនៅក្មេងនោះ វាហាក់ដូចជាក្ដីសុបិនដ៏ធំមួយអ៊ីចឹង និងមានអារម្មណ៍ថាជាកិត្តិយសខ្លាំងណាស់ដែលបានទទួលឱកាសសម្តែងលើកនេះ ហើយខ្ញុំក៏ជឿថា ខ្ញុំត្រូវតែមានទំនុកចិត្តលើខ្លួនឯងដើម្បីសម្ដែងចេញមកឱ្យបានល្អបំផុត ប៉ុន្ដែខ្ញុំមិនបានរំពឹងគិតថា នឹងជំនួសតំណែងលោក Sylvester Stalone បាននោះឡើយ“។

    គួររំលឹកបន្តិចដែរថា លោក Tiger Shroff គឺកូនប្រុសបង្កើតរបស់តារាសម្ដែងឥណ្ឌាជើងចាស់ លោក Jackie Shroff ហើយលោកបានទទួលភាពល្បីល្បាញនៅក្នុងខ្សែភាពយន្តរឿងដំបូងរបស់លោកដែលមានចំណងជើងថា Heropanit កាលពីឆ្នាំ ២០១៤ ថែមទាំងទទួលបានពានរង្វាន់តារាសម្ដែងឆ្នើមនៅក្នុងកម្មវិធី Filmfare Award កាលពីឆ្នាំ២០១៦ ដែលបានធ្វើឱ្យលោកមានកេរ្ដិ៍ឈ្មោះល្បីល្បាញពេញសកលលោកផងដែរ៕

  • កញ្ញា ស៊ូ ស៊ីរីកា ក្លាយជាអ្នកតំណាងហាងកាហ្វេដ៏ល្បីមកពីប្រទេសថៃ

    កញ្ញា ស៊ូ ស៊ីរីកា ក្លាយជាអ្នកតំណាងហាងកាហ្វេដ៏ល្បីមកពីប្រទេសថៃ

    គ្រាន់តែបានល្បីឈ្មោះក្នុងនាមជាតារាចម្រៀងស្រីចំណូលថ្មីរបស់ផលិតកម្មថោនភ្លាម អតីតបេក្ខភាពប្រកួតចម្រៀងរបស់កម្មវិធីលំដាប់ពីភពលោក កញ្ញា ស៊ូ ស៊ីរីកា ត្រូវបានគេកត់សម្គាល់ឃើញថា កំពុងតែទទួលបានការគាំទ្រយ៉ាងខ្លាំងពីសំណាក់យុវវ័យ ខណៈដែលក្រៅពីមានសំឡេងពីរោះនោះ តារាចម្រៀងស្រីដែលមានចំណូលចិត្តបកស្រាយចម្រៀងជាភាសាអង់គ្លេសរូបនេះ ថែមទាំងអាចរាំបែបចង្វាក់ញ័រញាក់កន្ត្រាក់អារម្មណ៍បានយ៉ាងល្អថែមទៀតផង។

    ដោយសារតែភាពល្បីល្បាញ និងប្រជាប្រិយភាពកំពុងបន្តកើនឡើងជាលំដាប់បែបនេះ កាលពីចុងខែឧសភា កន្លងទៅនេះ ស៊ូ ស៊ីរីកា ត្រូវបានអ្នកជំនួញក្នុងស្រុកម្នាក់ ដែលទទួលយក Franchise នៃហាងកាហ្វេដ៏ល្បីពីប្រទេសថៃ ផ្តល់កិត្តិយសដល់កញ្ញា ក្នុងនាមជាអ្នកតំណាងផលិតផលប្រចាំនៅកម្ពុជា ។

    ជាមួយនឹងទឹកមុខរីករាយ សប្បាយចិត្តនឹងតំណែងជាអ្នកតំណាងហាងកាហ្វេដ៏ល្បីមកពីប្រទេសថៃ និងទើបតែបើកដំណើរការលក់ទីតាំងដំបូងស្ថិតនៅក្នុងមជ្ឈមណ្ឌលពាណិជ្ជកម្ម ហេង អាស៊ី ម្ដុំស្តុបបូកគោមួយនេះ ម្ចាស់បទចម្រៀង «ស្រឡាញ់បងលើសហើយ» កញ្ញា ស៊ូ ស៊ីរីកា បានបញ្ជាក់យ៉ាងដូច្នេះថា ៖ «មុនដំបូងខ្ញុំអត់បានដឹងថា ត្រូវបានបងស្រីម្ចាស់ហាងជ្រើសខ្ញុំធ្វើជាអ្នកតំណាងហាងរបស់គាត់នោះទេ ប៉ុន្តែស្រាប់តែមុនថ្ងៃបើកសម្ពោធហាង ស្រាប់តែគាត់បានទូរស័ព្ទទាក់ទងមកខ្ញុំ ហើយប្រាប់ពីដំណឹងនេះ ធ្វើឱ្យខ្ញុំភ្ញាក់ផ្អើលខ្លាំងមែនទែន ព្រោះវាគឺជាលើកដំបូងសម្រាប់ខ្ញុំដែលធ្វើជាអ្នកតំណាងផលិតផល និងហាងដ៏ល្បី Best Coffee។ នៅក្នុងឱកាសនេះផងដែរ ក្នុងនាមខ្ញុំជាអ្នកតំណាងប្រចាំនៅកម្ពុជានាពេលនេះ សូមបញ្ជាក់ថា កាហ្វេ ដែលមានគុណភាពលំដាប់អន្តរជាតិ ឈ្ងុយឆ្ងាញ់ បែបធម្មជាតិ មិនមានជាតិគីមី គឺកាហ្វេ Best Coffee ដែលប្រិយមិត្តទាំងអស់អាចមកទទួលទាននៅទីតាំងដូចបានជម្រាបជូនខាងលើនេះ ហើយក្រៅពីនេះរាល់អតិថិជនទាំងអស់ក៏អាចអង្គុយយ៉ាងត្រជាក់ចិត្តនៅក្នុងហាងមួយនេះផ្ទាល់» ៕

  • ទំហំពាណិជ្ជកម្មទ្វេភាគី នឹងជំរុញវិស័យដឹកជញ្ជូនរវាងកម្ពុជា-ថៃក្នុងឆ្នាំ 2017 ដែលរំពឹងថានឹងកើនឡើង 5%

    ទំហំពាណិជ្ជកម្មទ្វេភាគី នឹងជំរុញវិស័យដឹកជញ្ជូនរវាងកម្ពុជា-ថៃក្នុងឆ្នាំ 2017 ដែលរំពឹងថានឹងកើនឡើង 5%

    នៅក្នុងឆ្នាំ 2016កន្លងទៅនេះ ទំហំពាណិជ្ជកម្មទ្វេភាគីរវាងប្រទេសថៃ និងកម្ពុជាបានកើនដល់ 5.6ពាន់លានដុល្លារ មានទំហំប្រហាក់ប្រហែលនឹងឆ្នាំ 2015 ដែរ ហើយសម្រាប់ឆ្នាំ2017 គេរំពឹងទុកថានឹងកើនឡើងដល់ 5.8 ពាន់លានដុល្លារ ឬកើនឡើងប្រហែល 5% នេះជាកាលើកឡើងរបស់លោក ជិរ៉ាវុធ សុវ៉ាន់ណាអាត ភារធារីស្ថានទូតថៃទទួលបន្ទុកផ្នែកពាណិជ្ជកម្ម ការិយាល័យកិច្ចការពាណិជ្ជកម្ម ស្ថានឯកអគ្គរាជទូតថៃប្រចាំកម្ពុជា ថ្លែងនៅក្នុងសន្និសីទកាសែតកាលពីព្រឹកថ្ងៃទី 23 ខែឧសភា ឆ្នាំ2017នេះ។


    ជាមួយនឹងទំហំពាណិជ្ជកម្មដ៏ច្រើននេះ នឹងជំរុញការអភិវឌ្ឍការដឹកជញ្ជូនរវាងប្រទេសទាំងពីរ និងជួយពង្រឹងការដោះដូរពាណិជ្ជកម្មគ្នាឱ្យបន្តរីកចម្រើនទៅមុខ។ ការធ្វើពាណិជ្ជកម្មសម័យទំនើបទាមទារឱ្យមានហេដ្ឋារចនាសម្ព័ន្ធការដឹកជញ្ជូនងាយស្រួលដែលភ្ជាប់ការដឹកជញ្ជូនទំនិញទៅកាន់ឃ្លាំងស្តុកទំនិញបានឆាប់រហ័ស។ ប្រទេសថៃមានប្រព័ន្ធគ្រប់គ្រងការដឹកជញ្ជូនដែលមានការអភិវឌ្ឍដ៏ប្រណីតដែលអាចភ្ជាប់ប្រទេសកម្ពុជាជាមួយប្រព័ន្ធការដឹកជញ្ជូនដ៏រលូនទៅកាន់បណ្តាប្រទេសអាស៊ាន និងបណ្តាប្រទេសផ្សេងៗទៀតក្នុងតំបន់។

    រាជរដ្ឋាភិបាលថៃ សម្លឹងឃើញនូវសារៈសំខាន់នៃការជំរុញការដឹកជញ្ជូន ជាពិសេសពាណិជ្ជកម្មទ្វេភាគី និងមានគោលនយោបាយជំរុញហេដ្ឋារចនាសម្ព័ន្ធរូបវ័ន្ត ការដឹកជញ្ជូនទំនិញ និងសេវាកម្មឱ្យមានកម្រិតស្តង់ដារអន្តរជាតិដែលផ្តល់អត្ថប្រយោជន៍ដល់ការអភិវឌ្ឍធុរកិច្ចរវាងប្រទេសទាំងពីរ។ លោកក៏បានធ្វើការពន្យល់បន្ថែមទៀតថា៖ ជាមួយនឹងការអភិវឌ្ឍសេដ្ឋកិច្ចបែបនេះនឹងឈានទៅរកការពង្រីកអាជីវកម្មក្នុងតំបន់បានយ៉ាងឆាប់រហ័ស។ លោកស៊ិន ចន្ធី ប្រធានសហព័ន្ធអ្នកឈានមុខក្នុងវិស័យដឹកជញ្ជូនកម្ពុជា Cambodia Freight Forwarders Association (CAMFFA) បានលើកបង្ហាញអំពី “ការតភ្ជាប់ទំនាក់ទំនងការដឹកជញ្ជូនរវាងកម្ពុជា – ថៃ ដែលជាគន្លឹះឈានទៅរកភាពជោគជ័យក្នុងវិស័យដឹកជញ្ជូន”។

    លោកបានចង្អុលបង្ហាញថា ការតភ្ជាប់ទំនាក់ទំនងការដឹកជញ្ជូនរវាងកម្ពុជា – ថៃ បានកើតឡើង និងត្រូវបានពង្រឹងពីមួយឆ្នាំទៅមួយឆ្នាំតាមរយៈការដោះដូរលិខិតអនុញ្ញាតអោយចេញចូលរថយន្ត និងតារាងតម្លៃពន្ធគយឆ្លងដែនរវាងប្រទេសទាំងពីរ ឈានឆ្ពោះទៅកាន់ការបង្កើតឱ្យមាននូវទំហំការដឹកជញ្ជូនកាន់តែច្រើនឡើង និងការបើកច្រកព្រំដែនថ្មីៗរវាងប្រទេសទាំងពីរ។ ការអនុវត្តបែបនេះនឹងជួយឱ្យការដឹកជញ្ជូនទំនិញទៅដល់ដៃអតិថិជនបានកាន់តែឆាប់រហ័ស កាត់បន្ថយថ្លៃដើមក្នុងការផ្ទេរឆ្លងកាត់តាមច្រកព្រំដែននៃប្រទេសវៀតណាម និងជួយផ្ទេរទំនិញទៅកាន់ប្រព័ន្ធដឹកជញ្ជូនក្នុងប្រទេសកម្ពុជាដើម្បីដឹកទៅកាន់គោលដៅនីមួយៗក្នុងប្រទេសកម្ពុជាបានឆាប់រហ័ស។

    លោកស៊ិន ចន្ធី បានសម្លឹងឃើញឱកាសក្នុងការពង្រឹងពាណិជ្ជកម្ម និងការប្រកួតប្រជែងទ្វេភាគីរវាងប្រទេសទាំងពីរ និងការតភ្ជាប់គ្នាដើម្បីបម្រើដល់គោលដៅផ្សេងទៀតក្នុងអាស៊ានតាមរយៈដំណើរការដ៏ងាយស្រួល អត្រាចំណាយដែលមានភាពប្រកួតប្រជែង កាត់បន្ថយពេលវេលាក្នុងការដឹកជញ្ជូន និងការបើកច្រកថ្មីៗ។ ដើម្បីឱ្យអ្វីៗដែលបានលើកឡើងនេះអាចកើតឡើងបាន លោកស៊ិន ចន្ធី យល់ឃើញថា ពិព័រណ៌ TILOG-LOGISTIX 2017 គឺជាទម្រង់ពង្រឹងការតភ្ជាប់ពាណិជ្ជកម្មទ្វេភាគី តាមរយៈការរៀបចំឱ្យមានការជួបគ្នារវាងសហគ្រិននៃប្រទេសទាំងពីរ និងចែករំលែកការដឹកជញ្ជូន និងការតភ្ជាប់ទំនាក់ទំនងរវាងប្រទេសទាំងពីរ។

    ជាមួយនឹងប្រធានបទដូចគ្នានេះដែរ លោកថងយូ ឃុងខាន់ អគ្គនាយកសហភាពការដឹកជញ្ជូនផ្លូវគោកថៃក៏បានបង្ហាញទស្សនៈគាំទ្រនូវសារៈសំខាន់នៃការតភ្ជាប់ការដឹកជញ្ជូនក្នុងតំបន់ ដោយធ្វើការចង្អុលបង្ហាញថា វាមានសារៈសំខាន់បំផុតសម្រាប់ការរីកលូតលាស់នៃសេដ្ឋកិច្ច និងការដោះដូរពាណិជ្ជកម្មតាមព្រំដែននៃបណ្តាប្រទេស CLMV ដែលជាទីផ្សារដ៏មានសក្តានុពលបំផុតក្នុងតំបន់ដែលនឹងរីកលូតលាស់បានខ្ពស់ផងដែរ។ កម្ពុជាផ្តោតសំខាន់ទៅលើការដឹកជញ្ជូនផ្លូវគោក ដែលមានការចំណាយពេលតិចក្នុងការដឹកជញ្ជូនទំនិញតាមផ្លូវថ្នល់រវាងប្រទេសទាំងពីរ។ កំណែទម្រង់ការតភ្ជាប់ការដឹកជញ្ជូនរវាងប្រទេសទាំងពីរមានសារៈសំខាន់បំផុត និងជួយជំរុញពាណិជ្ជកម្មរវាងប្រទេសទាំងពីរឱ្យបន្តរីកលូតលាស់បានជាដរាប ហើយនឹងឈានទៅរកកំណែទម្រង់ហេដ្ឋារចនាសម្ព័ន្ធដឹកជញ្ជូនរវាងសហគ្រិនក្នុងតំបន់ និងចុងបញ្ចប់នឹងបង្កើតឡើងនូវបណ្តាញការដឹកជញ្ជូនដ៏ទាន់សម័យសម្រាប់ការដឹកជញ្ជូនទំនិញទៅកាន់ឃ្លាំងទំនិញ៕

  • Everton យល់ព្រមលើតម្លៃខ្លួន ២៥លានផោនដើម្បីទិញ Sigurdsson ពី Swansea

    Everton យល់ព្រមលើតម្លៃខ្លួន ២៥លានផោនដើម្បីទិញ Sigurdsson ពី Swansea

    Everton បានឈានដល់ការព្រមព្រៀងគ្នាមួយជាមួយនឹងក្លិប Swansea ដើម្បីនាំយក Gylfi Sigurdsson ប៉ុន្តែខ្សែបម្រើរូបនេះកំពុងតែរក្សាជំហរនៃការទាមទារប្រាក់បៀវត្សរ៍១២ម៉ឺនផោន (ស្មើនឹង១៥,៥៧ម៉ឺនដុល្លារអាមេរិក) ក្នុងមួយសប្តាហ៍។ ក្លិបទូកក្តោងមួយនេះ បានឈានជើងចូលទីផ្សារទិញ-លក់កីឡាករភ្លាមៗដើម្បីទិញយកខ្សែបម្រើឆ្នើមរបស់ Swansea គឺ Sigurdsson ស្របពេលដែលរូបគេក៏ស្ថិតក្នុងការចាប់អារម្មណ៍ពីសំណាក់ក្លិប Tottenham និង Southampton ផងដែរ។

    ក្លិបទាំងពីរ (Swansea និង Everton)ត្រូវបានគេជឿជាក់ថា បានឈានដល់តម្លៃខ្លួនប្រមាណជា២៥លានផោន (ស្មើនឹង៣២,៤លានដុល្លារអាមេរិក) ដែលស្មើនឹងចំនួនទឹកប្រាក់ដែលក្លិប Everton បានចំណាយក្នុងការទិញខ្សែបម្រើស្លាប Yannick Bolasie ពីក្លិប Crystal Palace កាលពីរដូវក្តៅមុនដែរ។


    បច្ចុប្បន្ន Everton សង្ឃឹមថា អាចឈានដល់កិច្ចព្រមពៀងផ្សេងៗជាមួយនឹង Sigurdsson ដែលទទួលបានចំណូល៨ម៉ឺនផោនក្នុងមួយសប្តាហ៍ក្នុងក្លិប Swansea ហើយរូបគេកំពុងតែទាមទារការដំឡើងប្រាក់បៀវត្សរ៍ ដើម្បីបំពេញការផ្ទេរទៅកាន់ Everton៕
    ប្រភពពី៖ Mirror