សង្គម និងសេដ្ឋកិច្ច - La Reine Media

(World Cup 2022)- Ronaldo ត្រូវបានការពារដោយ Nuno Gomes

អតីតកីឡាករខ្សែប្រយុទ្ធ Nuno Gomes យល់ថា Cristiano Ronaldo មិនគួរត្រូវបានរិះគន់ចំពោះអ្វីដែលគាត់ធ្វើបាននៅ World Cup សម្រាប់ ព័រទុយហ្កាល់។

Nuno Gomes គិតថា អ្នកគាំទ្រមិនគួររំខាន Ronaldo បន្ទាប់ពី ក្រុមជម្រើសជាតិព័រទុយហ្កាល់ ត្រូវបានជម្រុះពី World Cup 2022។ «សូមទុកឱ្យ Ronaldo បានសុខផង» Gomes និយាយដូច្នេះ និងបន្ថែមថា «Ronaldo ពូកែលំដាប់កំពូលលើពិភពលោកក្នុងរយៈពេល 15 ឆ្នាំកន្លង ហើយគាត់មិនចាំបាច់បញ្ជាក់អ្វីបន្ថែមទៀតឡើយ។ ជនជាតិព័រទុយហ្កាល់ គួរតែដឹងគុណចំពោះអ្វីដែលគាត់ធ្វើបាន»។

កីឡាករ Gomes រកបាល់បាន 26 គ្រាប់នៅក្នុង 76 ប្រកួតសម្រាប់ ព័រទុយហ្កាល់ ក្នុងអំឡុងពីឆ្នាំ 1996 ដល់ 2011 និងជាមិត្តរួមក្រុមជាមួយ Ronaldo រយៈពេល 8 ឆ្នាំ។ បច្ចុប្បន្ន Ronaldo ជាមួយនឹងគ្រួសារកំពុងស្ថិតនៅ កាតា នៅឡើយ ក្រោយពី ព័រទុយហ្កាល់ ត្រូវបានជម្រុះត្រឹមវគ្គ 1/8 នៅ World Cup 2022។ Ronaldo កំពុងជាកីឡាករសេរី និងមិនទាន់កំណត់ថា នឹងទាត់ឱ្យក្លឹបណានៅឡើយ៕

អតីតកីឡាករខ្សែប្រយុទ្ធរបស់ ព័រទុយហ្កាល់ Nuno Gomes

December 13, 2022

CEO របស់ Xiaomi ចាត់ទុក iPhone ជាស្ដង់ដាសម្រាប់ប្រកួតប្រជែង

សហស្ថាបនិករបស់ក្រុមហ៊ុន Xiaomi លោក Lei Jun បានចាត់ទុក iPhone ជាស្ដង់ដារបស់វិស័យបច្ចេកវិទ្យាទូរស័ព្ទ និងប្ដេជ្ញាចិត្តប្រកួតប្រជែងជាមួយនឹងផលិតផលរបស់ Apple។

«មិនថាជាផ្នែកទន់ ឬផ្នែករឹង យើងចាត់ទុក iPhone ជាស្ដង់ដា» លោក Lei Jun ថ្លែងដូច្នេះនៅក្នុងព្រឹត្តិការណ៍បង្ហាញ Xiaomi 13 Pro កាលពីចុងសប្ដាហ៍កន្លង។ សហស្ថាបនិក និងជានាយកប្រតិបត្តិរបស់ Xiaomi រូបនេះក៏បានអះអាងថា គំនិតនេះគឺជា «ចំណុចចាប់ផ្ដើម ហើយតាមរយៈនេះយើងអាចមានឱកាសដើម្បីយកឈ្នះ iPhone នាពេលអនាគត»។

យោងតាម SCMP ក្រៅពីការចាត់ទុក iPhone ជាស្ដង់ដា ក្រុមហ៊ុនចិនមួយនេះក៏បានចាត់ទុក Apple ជាគូប្រជែងផងដែរ។ នៅក្នុងព្រឹត្តិការណ៍ខាងលើ លោក Jun បានសន្យាថា «នឹងធ្វើចិត្តឱ្យក្លាហាន និងប្ដេជ្ញាចិត្ត» ដើម្បីធ្វើសង្គ្រាមជាមួយនឹងបណ្ដាម៉ូដែល iPhone របស់ Apple។

Xiaomi 13 និង 13 Pro គឺជាម៉ូដែលស្មាតហ្វូនថ្មីក្នុងត្រកូលលំដាប់ខ្ពស់របស់ក្រុមហ៊ុនចិន និងមានតម្លៃបន្តបន្ទាប់គឺ 3,999 យន់ និង 4,999 យន់។ ផលិតផលទាំងនេះមានតម្លៃទាបជាងធៀបនឹង iPhone 14 ដែលមានតម្លៃចាប់ពី 5,999 យន់ នៅប្រទេសចិន។

ក្នុងព្រឹត្តិការណ៍បង្ហាញផលិតផលថ្មីនេះ Xiaomi ក៏បានណែនាំពីនាឡិកាឆ្លាតវៃ Watch S2 និងកាសគ្មានខ្សែ Buds 4 ផងដែរ៕

December 13, 2022

គ្រូបង្វឹក Luis Enrique ថា «Messi ស័ក្ដិសមនឹងតំណែងជើងឯក World Cup»

អតីតគ្រូបង្វឹករបស់ក្រុមជម្រើសជាតិអេស្ប៉ាញ Luis Enrique ចង់ឃើញ Lionel Messi បញ្ចប់អាជីពដែលឡើងដល់កម្រិតកំពូលរបស់ខ្លួនដោយនាមជាជើងឯក World Cup 2022 ជាមួយនឹង អាហ្សង់ទីន។

«នៅពេល អេស្ប៉ាញ មិនអាចបន្តដំណើរទៅមុខ ខ្ញុំចង់ឱ្យ អាហ្សង់ទីន ក្លាយជាជើងឯក World Cup ព្រោះថា Lionel Messi ស័ក្ដិសមនឹងទទួលបាន» គ្រូបង្វឹក Enrique ថ្លែងនៅក្នុងកិច្ចសម្ភាសកាលពីថ្ងៃទី 12 ធ្នូដូច្នេះ។

«មេទ័ព» វ័យ 52 ឆ្នាំរូបនេះធ្លាប់បាននិយាយដល់ប្រការនេះនៅមុន World Cup ចាប់ផ្ដើមការប្រកួតនៅ កាតា។ ក្រុមអេស្ប៉ាញ របស់ Enrique បានចាញ់នៅវគ្គ 1/8 ក្រោមថ្វីជើងរបស់ ក្រុមម៉ារ៉ុក ខណៈដែល អាហ្សង់ទីន ប៉ះ ក្រូអាត នៅវគ្គពាក់កណ្ដាលផ្ដាច់ព្រ័ត្រនាវេលាម៉ោង 2 ថ្ងៃទី 14 ធ្នូខាងមុខ។

«ជាមួយនឹងអ្វីដែល Messi បានរួមចំណែកក្នុងពិភពបាល់ទាត់ នឹងមិនយុត្តិធម៌ឡើយបើសិនគាត់ព្យួរស្បែកជើងដោយមិនទាន់មានតំណែងជើងឯក World Cup» គ្រូបង្វឹក Enrique បន្ថែមដូច្នេះ។ យោងតាមអតីតខ្សែបម្រើរបស់ Barca កីឡាករ Messi នៅតែមានកម្លាំង និងចំណូលចិត្តគ្រប់គ្រាន់ដើម្បីប្រកួតសម្រាប់ អាហ្សង់ទីន នៅក្នុងការប្រកួតដែលនៅសល់របស់ World Cup លើកនេះ។

លោក Enrique ធ្លាប់បានដឹកនាំ Messi កាលពីលេងឱ្យ Barca ក្នុងអំឡុងពីឆ្នាំ 2014 ដល់ 2017។ ពួកគេរួមគ្នាដណ្ដើមបានពានរង្វាន់ពីរនៅ La Liga, 3 ពានរង្វាន់នៅ Copa del Rey, 1 ពាន់រង្វាន់នៅ Champions League និង 1 ពាន់រង្វាន់នៅ FIFA Club World Cup។ ក្រោយមក គ្រូបង្វឹក Enrique បានដឹកនាំក្រុមអេស្ប៉ាញ ប៉ុន្តែមិនទាន់ដណ្ដើមបានពានរង្វាន់ណាមួយ។ លោក Enrique ត្រូវបានសហព័ន្ធបាល់ទាត់អេស្ប៉ាញ បញ្ចប់កិច្ចសន្យាកាលពីថ្ងៃទី 07 ធ្នូ ក្រោយពីត្រូវបានជម្រុះនៅ World Cup 2022។

Messi កំពុងលេងនៅ World Cup ក្នុងរដូវកាលទី 5 ហើយនេះក៏អាចជារដូវកាលចុងក្រោយនៃអាជីពរបស់គាត់។ នៅ World Cup 2022 គិតត្រឹមពេលនេះ Messi រកបាល់បាន 4 គ្រាប់ និងបង្កើតឱកាសស៊ុតបញ្ចូលទីជោគជ័យបាន 2 គ្រាប់៕

December 13, 2022

អារ៉ាប៊ីសាអូឌីត មានគម្រោងសាងសង់អគារកម្ពស់ 2 គីឡូម៉ែត្រ ដើម្បី «យកឈ្នះ» អគារ Burj Khalifa

អាជ្ញាធររបស់ អារ៉ាប៊ីសាអូឌីត កំពុងអញ្ជើញបណ្ដាក្រុមហ៊ុនស្ថាបត្យកម្មមកគូរប្លង់សម្រាប់អគារខ្ពស់បំផុតថ្មីមួយដែលគ្រោងនឹងសាងសង់នៅ រដ្ឋធានីរីយ៉ាដ។

អារ៉ាប៊ីសាអូឌីត នឹងសង់អគារកម្ពស់ 2 គីឡូម៉ែត្រនៅ រីយ៉ាដ នេះបើតាម MEED ចុះផ្សាយកាលពីថ្ងៃទី 07 ធ្នូ 2022។ អគារខ្ពស់កប់ពពកថ្មីដែលកំពុងត្រូវបានពិចារណាដោយមូលនិធិវិនិយោគសាធារណៈរបស់អារ៉ាប៊ីសាអូឌីត (PIF) នេះនឹងស្ថិតនៅក្នុងតំបន់ពង្រីកថ្មីទំហំ 18 គីឡូម៉ែត្រក្រឡានៅភាគខាងជើងនៃ រដ្ឋធានីរីយ៉ាដ។ អាជ្ញាធរកំពុងកំណត់តំបន់ដែលត្រូវបើកការដ្ឋាននៅក្បែរព្រលានយន្តហោះអន្តជាតិ King Khalid និងកំពុងធ្វើការសិក្សាលម្អិត។

អគារខ្ពស់ជាងគេបង្អស់លើពិភពលោកនាបច្ចុប្បន្នគឺ Burj Khalifa នៅទីក្រុង ឌូបៃ ដោយមានកម្ពស់ 828 ម៉ែត្រ។ យោងតាមក្រុមអ្នកម៉ៅការសំណង់ អគារទាំងឡាយណាដែលមានកម្ពស់ 2 គីឡូម៉ែត្រ ក្នុងតំបន់ នឹងត្រូវចំណាយថវិកាសាងសង់ឡើងដល់ 5 ពាន់លានដុល្លារអាម៉េរិក។

អាជ្ញាធរអារ៉ាប៊ីសាអូឌីត បានអញ្ជើញក្រុមហ៊ុនអភិវឌ្ឍសំណង់ ក្រុមហ៊ុនស្ថាបត្យកម្មសំណង់ និងក្រុមហ៊ុនគ្រប់គ្រងគម្រោងជាដើមចំនួន 8 ស្ថាប័ន ដើម្បីចូលរួមការប្រកួតប្រជែងក្នុងការរចនាអគារកប់ពពកថ្មីនេះ។

អារ៉ាប៊ីសាអូឌីត កំពុងអនុវត្តគម្រោងសាងសង់ធំៗជាច្រើន ក្នុងនោះមានដូចជា គម្រោងព្រលានយន្តហោះស្ដេច Khalid និងមហាគម្រោងទីក្រុង NEOM តម្លៃ 500 ពាន់លានដុល្លារអាម៉េរិក ក៏ដូចជាទីក្រុងបណ្ដោយត្រង់ The Line ប្រវែង 170 គីឡូម៉ែត្រជាដើម៕

December 13, 2022

គ្រោងសាងសង់ស្ពានតភ្ជាប់ពីផ្លូវជាតិលេខ 1 ទៅកាន់ស្រុកល្វាឯម ខេត្តកណ្តាល ត្រូវចំណាយទុន 200 លានដុល្លារអាម៉េរិក

នៅពេលដ៏ខ្លីខាងមុខ រាជរដ្ឋាភិបាលកម្ពុជា នឹងសាងសង់ស្ពានចំនួន 3 ថែមទៀត ក្នុងនោះ ស្ពានទី 1 ឆ្លងកាត់ទន្លេមេគង្គ ភ្ជាប់ពីក្រចេះទៅកំពង់ធំ និងស្ពាន 2 ទៀតនៅ ភ្នំពេញ និងខេត្តកណ្ដាល។

សម្តេចតេជោ ហ៊ុន សែន បានថ្លែងអំពីគម្រោងខាងលើនៅ ប្រទេសប៊ែលហ្ស៉ិក ក្នុងឱកាសអញ្ជើញសំណេះសំណាលជាមួយបងប្អូនខ្មែរនៅ អឺរ៉ុប កាលពីយប់ថ្ងៃទី 12 ធ្នូ 2022។

យោងតាមសម្ដេចតេជោ ស្ពានទាំងនេះរួមមាន ៖ ស្ពានទីមួយ ៖ ស្ពានឆ្លងកាត់ទន្លេមេគង្គ ត្រង់ខេត្តក្រចេះ ដែលតភ្ជាប់ពី ខេត្តក្រចេះ ឆ្ពោះទៅខេត្តកំពង់ធំ ហើយនឹងត្រូវបើកការដ្ឋាននៅដើមខែមករា 2023។ ស្ពានទីពីរ ៖ ស្ពានមិត្តភាពកម្ពុជា-សាធារណរដ្ឋកូរ៉េ ដែលភ្ជាប់ពីផ្សាររាត្រី-ជ្រោយចង្វារ និងពីជ្រោយចង្វារ-អរិយក្សត្រ។

ស្ពានទីបី ៖ ស្ពានភ្ជាប់ពីផ្លូវជាតិលេខ 1 ទៅកាន់ស្រុកល្វាឯម ខេត្តកណ្តាល ដែលត្រូវចំណាយទឹកប្រាក់ប្រមាណ 200 លានដុល្លារអាម៉េរិក។

December 13, 2022

(World Cup 2022) – Top 5 កីឡាករឆ្នើមបំផុតគិតត្រឹមមុនវគ្គពាក់កណ្ដាលផ្ដាច់ព្រ័ត្រ

ទំព័រ Goal បានជ្រើសរើសកីឡាករ 5 រូបដែលត្រូវបានចាត់ទុកថា ឆ្នើមជាងគេ គិតត្រឹមមុនវគ្គពាក់កណ្ដាលផ្ដាច់ព្រ័ត្ររបស់ World Cup 2022។

យោងតាមទំព័រ Goal កីឡាករ Lionel Mess របស់ អាហ្សង់ទីន កំពុងនាំមុខគេនៅក្នុងបញ្ជីចំណាត់ថ្នាក់ Top 5 ខាងលើ។ គិតមកដល់បច្ចុប្បន្ន តារាបាល់ទាត់វ័យ 35 ឆ្នាំរូបនេះ រកបាន 4 គ្រាប់ និងបង្កឱកាសស៊ុតបញ្ចូលទីជោគជ័យបាន 2 គ្រាប់។

ឈរលំដាប់ទីពីរគឺ Mbappe របស់ ក្រុមជម្រើសជាតិបារាំង។ ក្នុង 5 ប្រកួតកន្លងមក កីឡាករកើតឆ្នាំ 1998 នេះ រកបាន 5 គ្រាប់ ដែលនាំឱ្យគាត់ឈរលើកំពូលតារាងចំណាត់ថ្នាក់ស្ដីពីស្ដេចកម្ទេចសំណាក់។

លំដាប់បន្ទាប់បានទៅលើខ្សែប្រយុទ្ធ Antoine Griezmann (បារាំង), អ្នកចាំទី Donminik Livakovic (ក្រូអាត) និងខ្សែការពារ Achraf Hakimi (ម៉ារ៉ុក)៕

December 13, 2022

(World Cup 2022) – នេះជាក្រុមដែលត្រូវបានព្យាករថា អាចក្លាយជាម្ចាស់ជើងឯកក្នុងអត្រាខ្ពស់បំផុត

ស្ថិតិរបស់ Five Thirty Eight បានបង្ហាញអំពីអត្រានៃឱកាសដណ្ដើមបានពានរង្វាន់ជើងឯករបស់ 4 ក្រុមដែលមានវត្តមានក្នុងវគ្គពាក់កណ្ដាលផ្ដាច់ព្រ័ត្រនៅ World Cup 2022។

ការវិភាគដែលយោងទៅតាម «សន្ទស្សន៍កម្លាំងបាល់ទាត់» (SPI) របស់ Five Thirty Eight បានបង្ហាញថា អាហ្សង់ទីន គឺជាក្រុមនាំមុខគេស្ដីពីសមត្ថភាពនៃការដណ្ដើមបានពានរង្វាន់ជើងឯក World Cup 2022 ក្នុងអត្រា 37%។

SPI គឺជាពាក្យតំណាងការគណនាតាមរយៈការដាក់ពិន្ទុលើសមត្ថភាពវាយលុក និងការពាររបស់បណ្ដាក្រុមបាល់ទាត់ជម្រើសជាតិ។ ចំណែក Five Thirty Eight គឺជា គេហទំព័ររបស់ អាម៉េរិក ដែលផ្ដោតលើការសិក្សាស្រាវជ្រាវ ការស្ទង់មតិ ការស្រង់ស្ថិតិក្នុងវិស័យនយោបាយ កីឡា និងសេដ្ឋកិច្ច។

កន្លងមក មុនពេលគ្រាប់បាល់ World Cup 2022 ចាប់ផ្ដើមរមៀល ក្រុមអាហ្សង់ទីន ឈរត្រឹមលំដាប់ទី 4 ប៉ុណ្ណោះ ក្នុងចំណោមបេក្ខភាពសម្រាប់តំណែងជើងឯក ដោយមានអត្រា 8%។ ដំណាក់កាលនោះ Five Thirty Eight វាយតម្លៃថា ប្រេស៊ីល គឺជាក្រុមដែលមានឱកាសដណ្ដើមបានពានរង្វាន់ជើងឯកខ្ពស់បំផុត ក្នុង អត្រា 22%។ បន្ទាប់ពី ប្រេស៊ីល គឺក្រុមរបស់ អេស្ប៉ាញ (11%) និង បារាំង (9%)។

ក៏ប៉ុន្តែ នៅពេលវគ្គ 1/8 បានបញ្ចប់ ក្នុង top 4 នៃបេក្ខភាពជើងឯកដែលត្រូវបានព្យាករថា មានឱកាសច្រើនជាងគេ នៅសល់តែ អាហ្សង់ទីន និង បារាំង។ មុននោះ នៅពេល ប្រេស៊ីល ត្រូវបានជម្រុះពីវគ្គ 1/8 ដោយសារតែចាញ់ ក្រូអាត ក្នុងការប្រកួតទាត់ប៉េណាំងទី អេស្ប៉ាញ ឯណោះវិញក៏បានចាញ់ ម៉ារ៉ុក ហើយក៏ត្រូវហាលអាវត្រឹមវគ្គនេះ។

សម្រាប់វគ្គពាក់កណ្ដាលផ្ដាច់ព្រ័ត្រ ក្រុមដែលឈរលំដាប់បន្ទាប់ពី អាហ្សង់ទីន ស្ដីពីដែលដែលឱកាសដណ្ដើមបានពាន់រង្វាន់ជើងឯក World Cup 2022 គឺក្រុមរបស់ បារាំង ដោយមានអត្រា 35%។ បន្ទាប់ពី បារាំង គឺក្រុមរបស់ ក្រូអាត ដោយមាន 16% និងឈរក្រោយគេគឺ ម៉ារ៉ុក ដោយមាន 13%។

នៅវគ្គពាក់កណ្ដាលផ្ដាច់ព្រ័ត្រ អាហ្សង់ទីន នឹងប៉ះ ក្រូអាត នៅម៉ោង 2 ថ្ងៃទី 14 ធ្នូ។ មួយថ្ងៃក្រោយមក នឹងមានការប្រកួតរវាង បារាំង និង ម៉ារ៉ុក៕

December 13, 2022

គម្រោងសាងសង់ស្ពានឆ្លងកាត់ទន្លេមេគង្គ-ខេត្តក្រចេះ នឹងប្រកាសបើកការដ្ឋាននាពេលឆាបៗ

«គម្រោងសាងសង់ស្ពានឆ្លងកាត់ទន្លេមេគង្គ-ខេត្តក្រចេះ» និង «គម្រោងលើកកម្ពស់គុណភាពផ្លូវជាតិ លេខ 7 (ពីទីប្រជុំជនស្គន់ ដល់ក្រុងកំពង់ចាម)» គ្រោងនឹងរៀបចំកម្មវិធីប្រកាសបើកការដ្ឋាននាដើមខែមករា ឆ្នាំ 2023 នេះបើតាម ក្រសួងសាធារណការ និងដឹកជញ្ជូន។

ព័ត៌មានខាងលើត្រូវបានលើកឡើងនៅ ទីស្តីការក្រសួងសាធារណការ និងដឹកជញ្ជូន នាព្រឹកថ្ងៃទី 12 ធ្នូ 2022 ក្នុងកិច្ចប្រជុំស្ដីពីការរៀបចំកម្មវិធីប្រកាសបើកការដ្ឋានគម្រោងសាងសង់ហេដ្ឋារចនាសម្ព័ន្ធខាងលើ ដែលគ្រោងនឹងធ្វើឡើងនៅខែមករា 2023 ខាងមុខ។

យោងតាមក្រសួងសាធារណការ គម្រោងទាំងនេះទទួលបានហិរញ្ញប្បទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន៕

December 12, 2022

ឧទ្យានផ្ទះកញ្ចក់កសិកម្មទំនើបមួយផលិតបន្លែបាន 3,600 តោនជារៀងរាល់ឆ្នាំ

Shouguang គឺជាមជ្ឈមណ្ឌលផលិត និងចែកចាយបន្លែធំជាងគេមួយនៅ ប្រទេសចិន ដោយមានចំការបន្លែផ្ទះកញ្ចក់ទំនើបជាច្រើន។

នៅឯឧទ្យានកសិកម្មទំនើបបែបថ្មីនៅទីក្រុង Shouquang ខេត្ត Shandong ប្រទេសចិន កសិករកំពុងតែញាប់ដៃញាប់ជើងក្នុងការបេះបន្លែក្នុងផ្ទះកញ្ចក់។ Ma Xiuli ជាកសិករដាំបន្លែមួយរូបនិយាយថា «យើងប្រមូលផលប្រហែល 500 គីឡូក្រាមជារៀងរាល់ថ្ងៃ។ ពេលនេះជាពេលប្រមូលផលកម្រិតខ្ពស់។ បរិមាណបន្លែក្នុងផ្ទះកញ្ចក់របស់ខ្ញុំ ជាមធ្យមពី 22,500 ដល់ 25,000 គីឡូក្រាមក្នុងមួយឆ្នាំ»។

Shouguang គឺជាមជ្ឈមណ្ឌលផលិត និងចែកចាយបន្លែធំជាងគេមួយនៅ ប្រទេសចិន។ ឧទ្យានបែបទំនើបថ្មីនេះមានផ្ទះកញ្ចក់ប្រហែល 160 ខ្នង ផ្ដល់ទិន្នផលបន្លែ 3,600 តោនជារៀងរាល់ឆ្នាំ។

«ផ្ទះកញ្ចក់របស់យើងមានសមត្ថភាពគ្រប់គ្រងសីតុណ្ហភាពបានល្អ» លោក Li Guangju មកពីមន្ទីរកសិកម្ម និងជនបទរបស់ក្រុង Shouquang ថ្លែងដូច្នេះ និងបន្តថា «នៅពេលសីតុណ្ហភាពខាងក្រៅធ្លាក់ចុះ -13 ទៅ -14 អង្សាសេ យើងនៅតែអាចកែប្រែកម្ដៅខាងក្នុងពី 13 ដល់ 14 ឬដល់ទៅ 15 អង្សាសេក៏មាន»។

លោក Li Guangju បញ្ជាក់ថា សីតុណ្ហភាពដូចខាងលើអាចធានាចំពោះការរីកលូតលាស់របស់តាសក់ផ្អរ ត្រប់ ប៉េងប៉ោះជាដើម។ យោងតាម លោក Li Guangju មជ្ឈមណ្ឌលខាងលើ មានបំពាក់ឧបករណ៍ឆ្លាតវៃ ដែលជួយបង្កើនទិន្នផល ក៏ដូចជាគុណភាពបន្លែផងដែរ។

ដោយសារតែ Shouquang គឺជាមជ្ឈមណ្ឌលផ្គត់ផ្គង់បន្លែមួយដ៏សំខាន់របស់ ប្រទេសចិន ដូច្នេះ អាជ្ញាធរ ក៏ដូចជាកសិករ បាន និងកំពុងខិតខំធានាការផ្គត់ផ្គង់បន្លែឱ្យបានទាន់ពេលសម្រាប់ទីផ្សារនានាក្នុងប្រទេស។

Zhang Linlin មកពីនាយកដ្ឋានកសិកម្ម និងជនបទរបស់ទីក្រុង Shouquang ឱ្យដឹងថា Shouquang គឺជាដែនដីកសិកម្មរបស់ ប្រទេសចិន ដោយមានផ្ទៃដីដាំដុះសរុប 40,000 ហិកតា ដែលផ្ដល់ទិន្នផលប្រចាំឆ្នាំឡើងដល់ 4.5 លានតោន៕

December 12, 2022

ស្រីស្អាតជប៉ុន គ្រងមកុដបវរកញ្ញាទេសចរណ៍ពិភពលោកឆ្នាំ 2022

បវរកញ្ញាជប៉ុន Hanawa Erina បានគ្រងមកុដបវរកញ្ញាទេសចរណ៍ពិភពលោកឆ្នាំ 2022 (Miss Tourism World 2022 នៅក្នុងរាត្រីផ្ដាច់ព្រ័ត្រ ដែលបានធ្វើឡើងនៅ ប្រទេសវៀតណាម កាលពីយប់ថ្ងៃទី 10 ធ្នូ។

តំណាងរបស់ ជប៉ុន គឺស្រីស្អាត Erina Hanawa បានយកឈ្នះលើបេក្ខភាព 50 រូប មុននឹងបានគ្រងមកុដបវរកញ្ញាទេសចរណ៍ពិភពលោកឆ្នាំ 2022។

ដោយមានសក់ខ្លី មុខមាត់ប្រកបដោយភាពស្រស់ស្រាយ និងកម្ពស់ 172 សម Erina ធ្លាប់ទទួលបានពានរង្វាន់បេក្ខនារីដែលត្រូវបានស្រលាញ់ចូលចិត្តបំផុត។ ស្រីស្អាតរូបនេះក៏ទទួលបានការសរសើរនៅក្នុងអំឡុងចូលរួមការប្រលងបវរកញ្ញាទេសចរណ៍ពិភពលោកឆ្នាំ 2022។

តំណាងរបស់ ហ្វ៊ីលីពីន ដណ្ដើមបានតំណែងបវរកញ្ញាទេសចរណ៍ពិភពលោកលំដាប់រងទីមួយ ខណៈបេក្ខភាពរបស់ វៀតណាម ដណ្ដើមបានតំណែងបវរកញ្ញាលំដាប់រងទីពីរ។ ចំណែកលំដាប់រងទីបីបានទៅលើតំណាងមកពី រុស្ស៊ី និង ទីបួនបានទៅលើតំណាងមកពី នីហ្សេរីយ៉ា។

នៅក្នុង Top 12 នៃរាត្រីផ្ដាច់ព្រ័ត្ររបស់ព្រឹត្តិការណ៍ប្រលងបវរកញ្ញាទេសចរណ៍ពិភពលោកឆ្នាំ 2022 រួមមាន ជប៉ុន ឥណ្ឌូណេស៊ី អ៊ីតាលី ថៃ ហ្កាណា តួកគី សិង្ហបុរី ចិន ហ្វ៊ីលីពីន រុស្ស៊ី នីហ្សេរីយ៉ា និង វៀតណាម៕

December 12, 2022

Category: សង្គម និងសេដ្ឋកិច្ច