Category: សង្គម និងសេដ្ឋកិច្ច

  • គុក 11កន្លែង ដែលល្បីល្បាញថា មានភាពសាហាវឃោរឃៅខ្លាំងបំផុតលើពិភពលោក…

    គុក 11កន្លែង ដែលល្បីល្បាញថា មានភាពសាហាវឃោរឃៅខ្លាំងបំផុតលើពិភពលោក…

    តើលោកអ្នកចង់ដឹងទេថា គុកដែលជាប់លេខ 1 ស្ថិតនៅក្នុងប្រទេសណា?!

    មានឈ្មោះថាគុកហើយនោះ ប្រាកដណាស់ថា គ្មាននរណាម្នាក់ចង់ចូលទៅនៅក្នុងទីនោះឡើយ តែនៅពេលធ្វើខុសក៏ត្រូវតែនិយាយគ្នាទៅតាមច្បាប់ និងពេលចូលទៅនៅក្នុងគុកហើយ លោកអ្នកនឹងមិនដឹងឡើយថា នឹងត្រូវជួបអ្វីខ្លះ? អាចនឹងត្រូវជួបនឹងសេចក្តីឈឺចាប់ សេចក្តីលំបាកវេទនា ឬសេចក្តីស្លាប់ ឬអ្នកខ្លះអាចនឹងបានជួបនឹងមិត្តភាពល្អៗនៅក្នុងគុកក៏អាចថាបានដែរ។

    ខាងក្រោមនេះគឺ គុកដ៏សាហាវៗលើពិភពលោកទាំង 11 កន្លែង តែមានគុកណាខ្លះនោះ សូមតាមដានជាបន្ត (និងសូមកុំភ្លេចថា នៅក្នុងចំណោមនោះមានគុកនៅក្នុងស្រុកខ្មែរយើងមួយដែរ)

    11 . គុក បាងខ្វាង ប្រទេសថៃ

    ជាប់ឈ្មោះនៅក្នុងលំដាប់ចុងប៉ូចគេរបស់បញ្ជីនេះ ល្បីល្បាញរឿងមានភាពសាហាវឃោរឃៅគួរសម អ្នករៀបរៀងសំណៅរឿងនេះបានឱ្យហេតុផលថា គឺជាគុកដែលមានទាំងទង្វើអំពើហិង្សាទៅលើអ្នកទោស ការរស់នៅចង្អៀតណែន គ្មានអនាម័យ ដល់ថ្នាក់លើកឱ្យក្លាយជាគុកដែល Hardcore មួយដែរនៅលើពិភពលោកនេះ។

    10 . គុក Rikers Island នីវយ៉ក ប្រទេសសហរដ្ឋអាមេរិក

    ជាគុកដែលល្បីល្បាញរឿងធ្វើអំពើហិង្សាលើអ្នកទោស និងធ្លាប់មានអ្នកទោសស្លាប់ដោយសារអំពើហិង្សានៅក្នុងទីនោះរួចមកហើយ។

    9 . គុក San Quentin

    កសាងឡើងនៅឆ្នាំ 1852 ជាគុកដែលចំណាស់បំផុតនៅក្នុងរដ្ឋ កាលីហ្វ័រនៀ ជាកន្លែងដែលគេល្បីល្បាញថា មានបញ្ហារឿងអំពើហិង្សាកើតឡើងជាបន្តបន្ទាប់ ដោយក្នុងឆ្នាំ 2006 មានកើតការចលាចលមួយឡើង ដោយសារពួកអ្នកទោសបានព្យាយាមហែកគុករត់ ធ្វើឱ្យមានអ្នករងរបួសច្រើនជាង 100 នាក់ និងស្លាប់ 2 នាក់ ធ្វើឱ្យខាងសមត្ថកិច្ចត្រូវតែបន្ថែមភាពម៉ឺងម៉ាត់នៅក្នុងគុកមួយនេះកាន់តែខ្លាំងឡើង។

    8 . គុក Alcatraz Island

    តាំងនៅលើកោះ Alcatraz ដែលស្ថិតនៅខាងក្រៅឈូងសមុទ្ររបស់ សានហ្វ្រានស៊ីស្កូ។ ជាគុកសម្រាប់ដាក់អ្នកទោសឧក្រិដ្ឋដែលគ្រោះថ្នាក់បំផុតក្នុងប្រវត្តិសាស្រ្ត តែនៅទីបំផុតក៏ត្រូវបានបញ្ជាឱ្យបិទក្នុងឆ្នាំ 1963 ដោយសារតែថវិកាមិនគ្រប់គ្រាន់ក្នុងការជួសជុលឱ្យល្អឡើងវី្។

    7 . គុក La Sabaneta

    ស្ថិតនៅក្នុងប្រទេសវេណេហ្សូ៊អេឡា ដែលកសាងឡើងសម្រាប់ដាក់អ្នកទោស 15,000 នាក់ តែបែរជាមានអ្នកទោសរស់នៅបញ្ច្រៀតគ្នាណែនដល់ទៅ 2,5000 ទៅវិញ ខណៈដែលអ្នកយាមគុកក៏មានការខ្វះខាតដូចគ្នា គឺអ្នកយាមគុកម្នាក់ត្រូវមើលឃុំគ្រងអ្នកទោសដល់ទៅ 150 នាក់។ ក្នុងឆ្នាំ 1994 មានអ្នកស្លាប់ដល់ទៅ 108 នាក់ និងឆ្នាំបន្ទាប់មក មានអ្នកទោសរងរបួស 624 នាក់ ស្លាប់ 196 នាក់ ដោយសារអំពើហិង្សានៅក្នុងគុក។

    6 . គុក Gitarama

    ជាគុកដែលកសាងឡើងសម្រាប់ដាក់អ្នកទោសត្រឹមតែ 500 នាក់ប៉ុណ្ណោះ តែបែរជាមានអ្នកទោសច្រើនដល់ទៅ 6,000 នាក់ត្រូវបានដាក់នៅក្នុងទីនោះ ហើយដោយចំនួនដែលច្រើនហៀរគុកយ៉ាងនេះ ជំងឺដំបៅក្លាយរាលដាលក៏កើតមានឡើងយ៉ាងធ្ងន់ធ្ងរនិងដោយគ្មានការព្យាបាលអ្វីទាំងអស់ តែបណ្តោយទុកឱ្យដំបៅនោះស្អុយរលួយ រហូតដល់ត្រូវកាត់អវយវៈដែលកើតដំបៅនោះចោលនៅទីបំផុត ឬអ្នកខ្លះដល់ថ្នាក់ស្លាប់ក៏មាន។ អ្នកទោសភាគច្រើននៅក្នុងគុកនេះបានមកពីការសម្លាប់បំបាត់ពូជសាសន៍ក្នុងប្រទេស Rwanda។

    5 . គុក La Sante

    ស្ថិតនៅក្នុងទីក្រុងប៉ារីស ប្រទេសបារាំង អ្នកទោសជាច្រើនបានធ្វើអត្តឃាត ដោយសារតែមិនអាចទ្រាំនិងស្ថានភាពក្នុងគុកនេះបាន។ ក្រៅពីអ្នកយាមគុកហើយ នៅមានអ្នកទោសមួយចំនួនតាំងខ្លួនជាអ្នកមានអំណាច និងគំរាមកំហែងធ្វើបាបអ្នកទោសដែលទន់ខ្សោយជាង។ ខាងពន្ធនាគារព្យាយាមកែបញ្ហានេះ ដោយការពន្លែងអ្នកទោសចេញពីបន្ទប់ឃុំឃាំង 4 ម៉ោងក្នុងមួយថ្ងៃ ដើម្បីបន្ធូរភាពតានតឹងក្នុងអារម្មណ៍ឱ្យបានច្រើនឡើង។

    4 . គុក Diyarbakir

    ស្ថិតនៅក្នុងប្រទេសទុរគី អំពើហិង្សានៅក្នុងគុកមួយនេះមិនបានកើតចេញពីពួកអ្នកទោសទេ តែកើតចេញពីបណ្តាអ្នកយាមគុកទាំងឡាយទៅវិញ។ ក្នុងឆ្នាំ 1996 ប៉ូលិស និងក្រុមមន្រ្តីគុកបានប្រើអំពើហិង្សាទៅលើអ្នកទោស ធ្វើឱ្យមានអ្នកស្លាប់ 10 នាក់ និងរងរបួស 23 នាក់ទៀត។

    3 . គុក Tadmor

    ជាគុកដែលបង្កើតឡើងមកដើម្បីកាត់បន្ថយគុណតម្លៃនៃភាពជាមនុស្សរបស់អ្នកទោស ដោយសារហេតុកាណ៍ក្នុងឆ្នាំ 1980 នៅពេលប្រធានាធិបតី Hafez Al-Assad ត្រូវកងកម្លាំងប្រឆាំងវាយលុក គាត់បានបញ្ជាឱ្យទាហាននាំពួកអ្នកទោសចេញពីគុកនេះទៅវាយប្រហារសត្រូវវិញដែរ បន្ទាប់ពីនោះគុកនេះក៏ត្រូវបានបិទទ្វារក្នុងឆ្នាំ 2001 តែក៏ត្រឡប់មកបើជាថ្មីឡើងវិញនៅឆ្នាំ 2011។

    2 . គុក Carandiru Penitentiary

    ស្ថិតនៅក្នុងប្រទេស ប្រេស៊ីល ជាគុកជាប់លំដាប់លេខ 2 ខាងផ្នែកកាចសាហាវឃោរឃៅ និងពោរពេញដោយអំពើហិង្សា និងថែមទាំងមានអ្នកទោសចំនួន 1 ភាគ 5 របស់គុកនេះឆ្លងមេរោគ HIV ទៀតផង។ នៅក្នុងគុកនេះមានទាំងរឿង ប្រើអំណាចឥទ្ធិពលងងឹត រោគរាតត្បាត និងអំពើហិង្សាគ្រប់សព្វទាំងអស់។

    1 . មន្ទីសន្តិសុខ ស 21 ឬគុកទួលស្លែង

    ជាគុកដែលជាប់លំដាប់លេខ 1 ក្នុងពិភពលោកលើភាពសាហាវឃោរឃៅហួសពីការនឹកស្មាន និងត្រូវបានបង្កើតឡើងដោយពួកខ្មែក្រហមក្នុងអំឡុងឆ្នាំ 1975។ អំពើសាហាវយង់ឃ្នងហួសវិស័យមនុស្សត្រូវបានធ្វើឡើងដោយពួកក្រុមអ្នកយាមគុកវ័យក្មេងៗដែលបានប្រើអំពើហិង្សាលើអ្នកទោសដែលពួកគេចោទថាជាជនក្បត់បក្សដូចជាសត្វធាតុ។ មានអ្នកទោសដែលត្រូវស្លាប់នៅក្នុងគុកនេះក្នុងចន្លោះឆ្នាំ1975 – 1978 ប្រមាណជាជិត 30.000 នាក់។ គេនិយាយថា អ្នកទោសដែលសំណាងល្អបំផុតរបស់គុកនេះគឺ អ្នកទោសដែលចូលមកហើយត្រូវគេយកទៅសម្លាប់ចោលតែម្តង ព្រោះអ្នកទោសនោះមិនចាំបាច់រងទុក្ខវេទនាដោយការធ្វើទារុណកម្មយ៉ាងសាហាវឃោរឃៅរហូតដល់ស្លាប់ពីសំណាក់ពួកអ្នកយាមគុកវ័យក្មេងទាំងនោះ៕

    ស្រាវជ្រាវដោយៈ តាវ៉ែនតា

  • ធនាគារអេស៊ីលីដា ប្រកាសប្តូរប័ណ្ណថ្មីដែលមានសុវត្ថិភាពជាងមុន

    ធនាគារអេស៊ីលីដា ប្រកាសប្តូរប័ណ្ណថ្មីដែលមានសុវត្ថិភាពជាងមុន

    ធនាគារអេស៊ីលីដា ភីអិលស៊ី ដែលជាធនាគារពាណិជ្ជនាំមុខគេនៅកម្ពុជា បានប្រកាសនៅថ្ងៃទី26 ខែឧសភានេះ ដោយអំពាវនាវដល់អតិថិជនរបស់ខ្លួន ដែលមានប័ណ្ណអេធីអឹម (ATM) ចាស់ប្រភេទ Magnetic stripe card សូមមកផ្លាស់ប្តូរទៅជាកាតថ្មីហៅថា EMV Chip Card ដែលកាន់តែមានសុវត្ថិភាពខ្លាំងជាងមុន។

    លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី មានប្រសាសន៍ថា នេះគឺជាការរីកចម្រើនយ៉ាងឆាប់រហ័សមួយនៃប្រព័ន្ធព័ត៌មានវិទ្យា និងធានាឱ្យមានសុវត្ថិភាពខ្ពស់ ការពារហានិភ័យក្នុងការក្លែងបន្លំ និងអាចប្រើប្រាស់មុខងារបន្ថែមទៀតនាពេលអនាគត និងអាចតភ្ជាប់ជាមួយពិភពលោកបាន។

    លោកមានប្រសាសន៍បន្ថែមថា បច្ចុប្បន្នធនាគារ អេស៊ីលីដា មានប័ណ្ណអេធីអឹមចាស់ប្រភេទ Magnetic Stripe ប្រហែល 800.000ប័ណ្ណ ដែលនឹងត្រូវជំនួសថ្មីដោយប័ណ្ណអេធីអឹម EMV Chip។ អតិថិជនទាំងអស់អាចទំនាក់ទំនងមកការិយាល័យធនាគារអេស៊ីលីដា ដែលនៅជិតលោកអ្នកបំផុតដើម្បីប្តូរយកប័ណ្ណអេធីអឹម EMV Chip ចាប់ពីពេលនេះតទៅ។

    គួរបញ្ជាក់ថា ប័ណ្ណអេធីអឹម EMV Chip ថ្មីនេះអាចប្រើប្រាស់បានជាមួយនឹងម៉ាស៊ីនឆូតកាតប្រហែល 4.000 នៅតាមទីតាំងដែលមានស្លាកសញ្ញា ACLEDA Bank Gold Dot ដូចជាក្នុងផ្សារទំនើប សាកលវិទ្យាល័យ សណ្ឋាគារ ស្ថាប័ន ក្រុមហ៊ុន សណ្ឋាគារផ្សេងៗជាច្រើនទៀត ដើម្បីធ្វើប្រតិបត្តិការទិញផលិតផល សេវាកម្ម ដាក់ប្រាក់ ដកប្រាក់ ទូទាត់វិក្កយបត្រ បញ្ចូលទឹកប្រាក់តាមទូរសព្ទដៃ ឬពិនិត្យមើលសមតុល្យគណនី ជាដើម។ល៕

  • ទីបំផុតលោក Mark Zuckerberg ទទួលបានសញ្ញាបត្រហើយ បន្ទាប់ពីបោះបង់ការសិក្សាជាង 12ឆ្នាំ

    ទីបំផុតលោក Mark Zuckerberg ទទួលបានសញ្ញាបត្រហើយ បន្ទាប់ពីបោះបង់ការសិក្សាជាង 12ឆ្នាំ

    ទីបំផុតស្ថាបនិក Facebook លោក Mark Zuckerberg បានទទួលសញ្ញាបត្រពីសាកលវិទ្យាល័យ Harvard ដែលលោកបានបោះបង់ចោលការសិក្សាកាលពីជាង 12ឆ្នាំមុន រហូតក្លាយជាមហាសេដ្ឋីបន្ទាប់ពីបានបង្កើតក្រុមហ៊ុនបច្ចេកវិទ្យាមួយ នេះបើយោងតាមគេហទំព័រ Telegrapth។

    លោក Mark Zuckerberg បានបង្កើត Facebook នៅក្នុងបន្ទប់អន្តេវាសិកដ្ឋាននៅឆ្នាំ 2004 ហើយភាពជោគជ័យរបស់លោកក៏ចាប់ផ្តើមចេញពី Harvard ផងដែរ។ ដំបូងឡើយ Facebook ត្រូវបានដាក់ឱ្យប្រើប្រាស់តែក្នុងសាកលវិទ្យាល័យ Harvard តែប៉ុណ្ណោះ បន្ទាប់មកក៏ពង្រីកទៅកាន់សាកលវិទ្យាល័យ Ivy League University មុននឹងក្លាយជាបណ្តាញសង្គមដ៏មានប្រជាប្រិយភាពបំផុតក្នុងពិភពលោក។

    រយៈពេល ១២ឆ្នាំបន្ទាប់ពីបានចាកចេញពីសាកលវិទ្យាល័យ Harvard ដើម្បីធ្វើការងារពេញម៉ោងនៅក្រុមហ៊ុន Facebook លោក Mark Zuckerberg មិនដែលបោះបង់ចោលគោលបំណងរបស់លោកក្នុងការត្រឡប់មកទទួលយកសញ្ញាបត្ររបស់លោកនោះឡើយ។ នៅពេលដែលលោកបានសិក្សានៅសាកលវិទ្យាល័យ Harvard ក្រុមហ៊ុន Facebook បានផ្លាស់ប្តូរទីតាំងនៃការិយាល័យកណ្តាលរបស់ខ្លួនទៅកាន់រដ្ឋកាលីហ្វ័រនីញ៉ា តែ Zuckerberg នៅតែបន្តព្យាយាមចុះឈ្មោះចូលរៀន រហូតដល់ពេលដែលលោកត្រូវបង្ខំចិត្តចាកចេញពីសាលាតែម្តងនៅខែវិច្ឆិកា ឆ្នាំ2015។

    ការទទួលសញ្ញាបត្ររបស់លោក Mark Zuckerberg នៅពេលនេះគឺហាក់មានរយៈពេលលឿនជាងលោក Bill Gates ដែលបានបោះបង់ចោលការសិក្សានៅឆ្នាំ 1975 ហើយរង់ចាំអស់រយៈពេលដល់ទៅ 32ឆ្នាំ ទម្រាំទទួលបានសញ្ញាបត្រពីសាកលវិទ្យាល័យមួយនេះ បើគិតចាប់ពីថ្ងៃដែលលោកចាកចេញពី Harvard នៅឆ្នាំ 1975 ហើយទទួលបានសញ្ញាបត្រនៅឆ្នាំ 2007។

    នៅក្នុងកម្មវិធីទទួលសញ្ញាបត្រនេះ លោក Mark Zuckerberg ក៏ត្រូវបានអញ្ជើញឱ្យឡើងថ្លែងសុន្ទរកថាដូចដែលមានខ្លឹមសារនៅក្នុងខ្សែវីដេអូខាងក្រោមនេះ ៖

  • ដឹងឬទេថា ញ៉ាំចេកអាំងមានអត្ថប្រយោជន៍អ្វីខ្លះដល់សុខភាព?

    ដឹងឬទេថា ញ៉ាំចេកអាំងមានអត្ថប្រយោជន៍អ្វីខ្លះដល់សុខភាព?

    មានមនុស្សជាច្រើនមិនសូវនិយមទទួលទានចេកអាំងទេ ព្រោះពួកគេគិតថា រសជាតិរបស់ចេកអាំងមិនសូវជាត្រូវមាត់ និងមិនមានរសជាតិឆ្ងាញ់ដូចអាហារទំនើបនៅតាមហាង តែលោកអ្នកគួរតែដឹងអំពីអត្ថប្រយោជន៍របស់ចេកអាំង ដែលមានគុណប្រយោជន៍អាចព្យាបាលជំងឺបានច្រើនប្រភេទ ។ ឥឡូវនេះយើងមកអាន និងដឹងជាមួយគ្នាអំពីអត្ថប្រយោជន៍របស់ចេកអាំងថា តើមានអ្វីខ្លះ?

    ១.ជួយកាត់បន្ថយអាការឈឺក និងអាការចុកដើមទ្រូង ដោយសារការក្អកស្ងួត គួរទទួលទានពី ៥ ទៅ ៦ ផ្លែ និងថែមទាំងអាចជួយសម្រាលអាការរមាស់កបានទៀតផង។
    ២.ជួយរឿងក្លិនមាត់ អាចបំបាត់បាត់ក្លិនមាត់បានយ៉ាងប្រសើរ។ យកល្អគួរតែពិសាចេកណាំវ៉ាស្រស់ ឬអាំងនៅពេលក្រោកពីគេងភ្លាមៗ រួចហើយសឹមទៅដុះសម្អាតធ្មេញ វានឹងអាចជួយបំបាត់ក្លិនមាត់បានយ៉ាងល្អប្រសើរ។
    ៣.ជួយបំបាត់អាការទល់លាមក ឬជួយដល់ប្រព័ន្ធរំលាយអាហារឱ្យដំណើរការបានស្រួលដូចធម្មតា ដូច្នេះគួរទទួលទានផ្លែចេកទុំមុនពេលចូលគេង ១ ទៅ ២ ផ្លែ ហើយពិសាទឹកឱ្យបានច្រើន នឹងជួយសម្រួលឱ្យការបន្ទោរបង់បានស្រួលឡើងវិញ។
    ៤.ជួយព្យាបាលអាការរាករូសបាន ព្រោះនៅក្នុងផ្លែចេកមានសារជាតិកាកសរសៃ ដែលជួយសម្រួលប្រព័ន្ធរំលាយអាហារ នឹងជួយព្យាបាលមិនឱ្យហើមពោះដោយសាររាករូសបានទៀតផង ។
    ៥.ជួយព្យាបាលជំងឺក្រពះ ដោយការទទួលពី ៥ ទៅ ៦ ផ្លែរយៈពេល ៣ ទៅ ៤ ដង ក្នុងមួយសប្តាហ៍។
    ៦.សម្បកចេក អាចជួយព្យាបាលរោគរមាស់ ដោយសារសត្វល្អិតខាំ ឬស្រមោចខាំបាន ព្រោះវាមានឥទ្ធិពលក្នុងការសម្លាប់មេរោគផ្សិត និងមេរោគបាក់តេរីផ្សេងទៀតនៅលើស្បែក។

    សរុប ៖ ទាំងអស់នេះគឺជាការយល់ដឹងអំពីគុណប្រយោជន៍របស់ផ្លែចេក និងចេកអាំងចំពោះសុខភាព ដែលវាជាអាហារមួយងាយស្រួលរកមកទទួលទាន និងមាននៅក្បែរៗខ្លួនយើងទៀតផង៕

  • Griezmann ប្រកាសថា គេចង់បន្តនៅ Atletico ក្នុងពេលមានការចាប់អារម្មណ៍ពី Man Utd

    Griezmann ប្រកាសថា គេចង់បន្តនៅ Atletico ក្នុងពេលមានការចាប់អារម្មណ៍ពី Man Utd

    តារាឆ្នើម Antoine Griezmann បានប្រកាសថា រូបគេចង់បន្តនៅជាមួយនឹងក្លិប Atletico Madrid និងចង់ប្រជែង​ដណ្តើមយកពានផ្សេងៗជាច្រើនទៀត ស្របពេលកំពុងតែមានការអារម្មណ៍យ៉ាងខ្លាំងពីសំណាក់ក្លិប Manchester United។

    ក្រុមបិសាចក្រហមមួយនេះ កំពុងតែត្រៀមដាក់សំណើដេញថ្លៃក្នុងទឹកប្រាក់៨៥លានផោន (ស្មើនឹង១១០លានដុល្លារអាមេរិក) សម្រាប់ Griezmann វ័យ២៦ឆ្នាំ ដែលទើបតែបានប្រកាសកាលពីពេលថ្មីៗថា រូបគេត្រៀមលក្ខណៈរួចរាល់ហើយក្នុងការចាកចេញពីក្លិបយក្សរបស់ក្របខ័ណ្ឌ La Liga មួយនេះ។ ប៉ុន្តែ ទោបីជាយ៉ាងណា ក្នុងពេលនិយាយទៅកាន់គេហទំព័ររបស់ Atletico ខ្សែប្រយុទ្ធអន្តរជាតិបារាំងរូបនេះ បានបញ្ជាក់ថា រូបគេពិតជាស្រេកឃ្លានក្នុងការបន្តនៅជាមួយនឹងក្រុមរបស់លោក Diego Simeone ដោយសន្យាថា នឹងប្រជែងដណ្តើមយកពានរង្វាន់ផ្សេងៗទៀត។

    Griezmann បានឲ្យដឹងថា៖ «វាបានក្លាយជាឆ្នាំដ៏អស្ចារ្យមួយ ហើយជាការរំពឹងទុក ខ្ញុំអាចអភិវឌ្ឍជារៀងរាល់ឆ្នាំ និងឈ្នះពានជាច្រើនទៀតជាមួយនឹងក្រុមនេះ។ ខ្ញុំនឹងធ្វើរាល់អ្វីៗទាំងអស់ដែលអាចទៅរួច»។ រូបគេបាននិយាយរួចជាស្រេចអំពីការប្រជែងនៅរដូវកាលក្រោយ និងរបៀបដែល Atletico ត្រូវតែពង្រឹងក្រុមរបស់ខ្លួនជាមួយនឹងមិត្តរួមជាតិបារាំងរបស់គេគឺ Alexandre Lacazette ដែលស្ថិតយ៉ាងប្រកៀកក្នុងការផ្ទេរមកនៅអេស្ប៉ាញដែរ។

    អតីតតារាឆ្នើមរបស់ក្លិប Real Sociedad រូបនេះបានឲ្យដឹងថា៖ «យើងពិតជារីករាយណាស់ ពីព្រោះយើងបានសម្រេចគោលដៅរបស់យើង ហើយយើងប្រហែលជាអាចសម្រេចបាននូវគោលដៅជាច្រើនទៀត។ នៅឆ្នាំក្រោយនេះ យើងនឹងមានគោលដៅ និងការប្រជែងថ្មីៗ»៕
    ប្រភពពី៖ The Sun

  • Orlando Bloom ទទួលខុសត្រូវនារីរត់តុ បន្ទាប់ពីលួងលោមនាងឡើងស្ថានសួគិ៍បានសម្រេច

    Orlando Bloom ទទួលខុសត្រូវនារីរត់តុ បន្ទាប់ពីលួងលោមនាងឡើងស្ថានសួគិ៍បានសម្រេច

    តារាសម្ដែងប្រុសរូបសង្ហា Orlando Bloom បានធ្វើឱ្យនារីរត់តុម្នាក់ ត្រូវបានបណ្ដេញចេញពីការងារ បន្ទាប់ពីពួកគេទាំងពីរបានជួបគ្នាក្នុងភោជនីយដ្ឋាន ហើយនាំគ្នាទៅឡើងស្ថានសួគិ៍នៅក្នុងបន្ទប់របស់តារាសម្តែងរូបសង្ហា ដោយមិនខ្វល់ពីម៉ោងការងារ។


    Orlando បានទាក់ទងទៅកាន់អ្នកគ្រប់គ្រងភោជនីយដ្ឋានល្បីដែលមានឈ្មោះថា Chiltern Firehouse ដើម្បីតាមរកនារីរត់តុម្នាក់ឈ្មោះ Vivian Ross មានវ័យ ២២ឆ្នាំ ដែលត្រូវបានខាងភោជនីយដ្ឋានបណ្ដេញចេញពីការងារ បន្ទាប់មានសម្ព័ន្ធភាពផ្លូវភេទជាមួយតារាប្រុសរូបនេះហើយ។ គួរជម្រាបបន្ថែមថា Orlando បាននាំនាង Vivian Ross ទៅផឹកស្រា និងប្រឡែងគ្នានៅលើគ្រែក្នុងបន្ទប់របស់ខ្លួន ប្រៀបដូចជាគូស្នេហ៍កំពុងផ្អែមល្ហែមជាមួយគ្នា និងស្និទ្ធស្នាលនឹងគ្នារហូតដល់នាងហ៊ានចេញចូលបន្ទប់របស់គេដូចជាបន្ទប់ផ្ទាល់ខ្លួនដែរ ។

    ជាចុងក្រោយ ពិតជាស៊យមែនទែនសម្រាប់ Vivian Ross ខណៈដែលអ្នកគ្រប់គ្រងសណ្ឋាគារ និងភោជនីយដ្ឋានខាងលើ បានឃើញនាងនៅលើគ្រែរបស់តារាសម្ដែង Orlando Bloom ដោយចៃដន្យ ហើយក៏សម្រេចបណ្ដេញនាងចេញពីការងារភ្លាមៗនោះតែម្ដង ដែលវាជាការដាក់ទោសចំពោះបុគ្គលិកដែលមានភាពស្និទ្ធស្នាលជាមួយភ្ញៀវជ្រុលពេក។

    បន្ទាប់ពីកើតហេតុការណ៍ខាងលើ Orlando Bloom ក៏បានមកសូមទោសអ្នកគ្រប់គ្រងភោជនីយដ្ឋាននោះ និងសូមការអនុញ្ញាតសុំលេខទូរស័ព្ទរបស់ Vivian Ross ដើម្បីទូរស័ព្ទទៅសូមទោសនាង ដែលខ្លួនបានបង្កហេតុការណ៍នេះឡើង ព្រមទាំងទទួលខុសត្រូវចំពោះរូបនាងផងដែរ ក៏ប៉ុន្ដែខាងអ្នកគ្រប់គ្រងភោជនីយដ្ឋាន Chiltern Firehouse បានត្រឹមតែប្រាប់ថា “យើងគ្មានទំនាក់ទំនង និងលែងដឹងឮពីនាងទៀតហើយ“ ៕

  • Costa ស្រេកឃ្លានក្នុងការលើកពាន FA Cup ពេល Chelsea ប៉ះ Arsenal ថ្ងៃសៅរ៍នេះ

    Costa ស្រេកឃ្លានក្នុងការលើកពាន FA Cup ពេល Chelsea ប៉ះ Arsenal ថ្ងៃសៅរ៍នេះ

    ខ្សែប្រយុទ្ធ Diego Costa នឹងសម្លឹងរកការធ្វើឲ្យរដូវកាលដ៏រង្គោះរង្គើរបស់គេបញ្ចប់ដោយការឈ្នះពានពីរ នៅពេលដែលក្រុមតោខៀវ Chelsea ជួបជាមួយនឹងក្រុម Arsenal ក្នុងការប្រកួតពាន FA Cup វគ្គផ្តាច់ព្រ័ត្រ នាកីឡដ្ឋាន Wembley នៅថ្ងៃសៅរ៍នេះ។

    ខ្សែប្រយុទ្ធអន្តរជាតិអេស្ប៉ាញរូបនេះ ធ្លាប់បានស្ថិតយ៉ាងប្រកៀកក្នុងការចាកចេញពីក្លិប Chelsea ដើម្បីទៅចូលរួមជាមួយនឹងក្រុមក្របខ័ណ្ឌរបស់ចិន Super League កាលពីខែមករា ប៉ុន្តែទីបំផុតបានសម្រេចចិត្តបន្តនៅ និងបានស៊ុតបាល់បញ្ចូលទី២០គ្រាប់ដើម្បីជួយឲ្យក្រុមរបស់ខ្លួនឈ្នះពានក្របខ័ណ្ឌ Premier League។ ការប្រកួតនៅថ្ងៃសៅរ៍នេះ ត្រូវបានគេរំពឹងទុកថា នឹងក្លាយជាការប្រកួតលើកចុងក្រោយរបស់គេក្នុងនាមជាកីឡាកររបស់ Chelsea ហេតុនេះ Costa នឹងស្រេកឃ្លានក្នុងការបង្ហាញពីថ្វីជើងរបស់គេ។

    លោក Gary Neville អតីតប្រធានក្រុមនៃក្លិប Manchester United បាននិយាយថា៖ «Costa គឺជាសត្វមួយក្បាល នៅពេលដែលរូបគេមិនបានរកគ្រាប់បាល់បញ្ចូលទី រូបគេនឹងជួយឲ្យមិត្តរួមក្រុមរបស់គេរកឱ្យបាន។ ក្នុងការលេងជាមួយនឹងខ្សែប្រយុទ្ធតែម្នាក់ វានឹងក្លាយជារឿងដ៏លំបាកមួយក្នុងការបំពេញចន្លោះ ប្រសិនបើរូបគេចាកចេញពីក្លិបនេះ»។ លោក Neville បានបន្ថែមទៀតថា៖ «ការយកកីឡាករម្នាក់មកបំពេញកន្លែងរបស់គេ នឹងក្លាយជារឿងដ៏លំបាកមួយ។ រូបគេជាខ្សែប្រយុទ្ធកំពូលម្នាក់ និងមានភាពមុតស្រួចក្នុងតំបន់ប្រយុទ្ធ»។

    Costa វ័យ២៨ឆ្នាំ បានបង្កើតឲ្យមានការចាប់អារម្មណ៍ភ្លាមៗក្នុងកីឡាបាល់ទាត់អង់គ្លេស ក្រោយពីបានផ្ទេរមកពីក្លិប Atletico Madrid កាលពីឆ្នាំ២០១៤។ រូបគេបានស៊ុតបាល់បញ្ចូលទី២០គ្រាប់ក្នុងយុទ្ធនាការលីកជាលើកទី១របស់គេដើម្បីជួយឲ្យក្រុម Chelsea លើកពាន និងបានស៊ុតបាល់បញ្ចូលទី១គ្រាប់ដ៏សំខាន់ ខណៈដែលក្រុមតោខៀវ បានផ្តួលក្រុម Tottenham Hotspur ក្នុងការប្រកួតពាន League Cup វគ្គផ្តាច់ព្រ័ត្រ។

    Arsenal បានទម្លាក់ក្រុម Man City តាមរយៈការដណ្តើមបានជ័យជម្នះក្នុងលទ្ធផល ២-១ ក្នុងវគ្គពាក់កណ្តាលផ្តាច់ព្រ័ត្រ ស្របពេលដែលក្រុម Chelsea បានយកឈ្នះលើជើងខ្លាំង Tottenham ក្នុងលទ្ធផល ៤-២។ ការប្រកួតរវាងក្រុមឈ្នះទាំងពីរនេះនឹងចាប់ផ្តើមនៅម៉ោង១១:៣០ យប់នេះ៕
    ប្រភពពី៖ The Sun

  • Ariana Grande បោះបង់ការប្រគំតន្ដ្រី មកគោរពវិញ្ញាណក្ខន្ធនៅទីក្រុង Manchester

    Ariana Grande បោះបង់ការប្រគំតន្ដ្រី មកគោរពវិញ្ញាណក្ខន្ធនៅទីក្រុង Manchester

    ដោយក្តីគោរព និងក្ដីស្រឡាញ់ស្រណោះសោកសៅចំពោះមនុស្សដែលបានស្លាប់ដោយសារការបោកគ្រាប់បែកនៅក្នុងការប្រគំតន្រ្តីរបស់ខ្លួននោះ តារាចម្រៀងស្រីAriana Grande បានបោះបង់ការប្រគំតន្រ្តី និងជិះយន្ដហោះផ្ទាល់ខ្លួនមកគោរពវិញ្ញាណក្ខន្ធអ្នកស្លាប់នៅក្នុងទីក្រុង Manchester ប្រទេសអង់គ្លេស។

     

    កាលពីថ្ងៃទី ២៥ ខែឧសភា ឆ្នាំ២០១៧ សារព័ត៌មាន BBC បានរាយការណ៍ថា តារាចម្រៀងស្រីជនជាតិអាមេរិក នាង Ariana Grande បានបោះបង់ការប្រគំតន្ត្រីលំដាប់ពិភពលោក Dangerous Woman Tour ដើម្បីមកគោរពវិញ្ញាណក្ខន្ធអ្នកដែលបានបាត់បង់ជីវិត និងរបួសជាច្រើននាក់ដោយសារការបំផ្ទុះគ្រាប់បែកនៅក្នុងទីក្រុង Manchester កាលពីសប្ដាហ៍កន្លងទៅនេះ ។

    គួរបញ្ជាក់ផងដែរថា ការប្រគំតន្ត្រីទាំង ២ លើក ដែលត្រូវធ្វើឡើងនៅថ្ងៃទី ២៥ -២៦ ខែឧសភា នៅទីក្រុងឡុងដ៍ ត្រូវបាននាងបោះបង់ចោលមិនសម្តែងបន្ត រួមជាមួយការប្រគំន្ត្រីនៅទីក្រុង Poland ប្រទេសអាល្លឺម៉ង់ នៅដើមខែមិថុនា ក៏នាងបានបោះបង់ចោលដូចគ្នា ព្រោះអំឡុងពេលនេះនាងត្រូវការ ចូលរួមសម្ដែងនូវអារម្មណ៍សោកស្តាយ និងគោរពវិញ្ញាណក្ខន្ធចំពោះអ្នកបាត់បង់ជីវិតឱ្យបានយ៉ាងសមរម្យ ដោយនាងបានប្រកាសថា នឹងចាប់ផ្ដើមទទួលការប្រគំតន្ត្រីឡើងវិញនៅថ្ងៃទី ៧ ខែមិថុនា ឆ្នាំ២០១៧ នៅប្រទេសបារាំង៕

  • អង្គការមូលនិធិអាស៊ីនៅកម្ពុជា រួមគ្នាជាមួយក្រសួងអប់រំ ផលិតវីដេអូស្តីពីអាជីពការងារ

    អង្គការមូលនិធិអាស៊ីនៅកម្ពុជា រួមគ្នាជាមួយក្រសួងអប់រំ ផលិតវីដេអូស្តីពីអាជីពការងារ

    អាជីពការងារ ជាប្រធានបទសំខាន់មួយដែលត្រូវបានមនុស្សគ្រប់មជ្ឈដ្ឋានលើកឡើង ហើយវាក៏ជាចំណុចស្នូលមួយសំខាន់ផងដែរនៃផ្នែកធនធានមនុស្សនៅក្នុងសង្គម។ និស្សិតជាច្រើននៅកម្ពុជាមិនទាន់បានយល់ដឹងច្បាស់នៅឡើយពីអាជីពការងារដែលសម្បូរបែបនៅក្នុងសង្គម ហើយធ្វើឱ្យពួកគេជ្រើសរើសយកតែជំនាញណាដែលពួកគេស្គាល់ ដែលវាបង្កើតឱ្យមានវិសមភាពនៃអាជីពការងារនៅក្នុងសង្គម។

    ដោយមើលឃើញពីភាពចាំបាច់នៃការស្វែងយល់ពីអាជីពការងារនៅកម្ពុជា អង្គការមូលនិធិអាស៊ីប្រចាំនៅកម្ពុជា បានសហការជាមួយនឹងក្រសួងអប់រំ យុវជន និងកីឡា ផលិតវីដេអូស្តីពីអាជីពការងារ ឬ Career Introductory Video ដើម្បីផ្តល់ព័ត៌មានជាមូលដ្ឋានផ្នែកអាជីពការងារដល់សិស្សនិស្សិត ពីជម្រើសការងារ ទីផ្សារការងារ និងការរៀបចំខ្លួន តម្រង់ទិសមុខវិជ្ជាទៅថ្ងៃអនាគត។ វីដេអូទាំងអស់នេះត្រូវបានផ្សាយជាសាធារណៈនៅក្នុងបណ្តាញ Youtube និងទំព័រ Facebook ជាផ្លូវការរបស់ក្រសួង អប់រំ យុវជន និងកីឡា។

    ក្នុងចំណោមវីដេអូទាំងអស់នោះ មានបង្ហាញពីអាជីពសំខាន់ៗមួយចំនួនដូចជា វិស្វករសំណង់ស៊ីវិល អ្នកដឹកនាំខ្សែភាពយន្ត វេជ្ជបណ្ឌិតវះកាត់ វិស្វករអគ្គិសនី អ្នកស្រាវជ្រាវបរិស្ថាន និងអាជីពដែលកំពុងមានក្នុងទីផ្សារនៅកម្ពុជាជាច្រើនទៀត៕

    ព័ត៌មានលម្អិតចូលទៅកាន់ Facebook ក្រសួងអប់រំ

  • Navas, Clichy, Caballero និង Sagna ចាកចេញពីក្លិប Man City

    Navas, Clichy, Caballero និង Sagna ចាកចេញពីក្លិប Man City

    ខ្សែបម្រើស្លាបអន្តរជាតិអេស្ប៉ាញ Jesus Navas និងខ្សែការពារពោរពេញដោយបទពិសោធរបស់បារាំង Gael Clichy ជាមួយនឹងកីឡាករពីរនាក់ផ្សេងទៀតកាលពីថ្ងៃព្រហស្បតិ៍ត្រូវបានចាកចេញពីក្លិប Manchester City ក្រោយពីផុតកិច្ចសន្យានៅរដូវកាលនេះ។

    Man City បានប្រកាសកាលពីល្ងាចថ្ងៃព្រហស្បតិ៍ថា អ្នកចាំទីបម្រុង Willy Caballero ដែលបានសង្គ្រោះបាល់ប៉េណាល់ទី៣គ្រាប់ក្នុងពេលយកឈ្នះលើក្រុម Liverpool ក្នុងការប្រកួតពាន League Cup វគ្គផ្តាច់ព្រ័ត្រ កាលពីឆ្នាំ២០១៦នោះ ក៏នឹងត្រូវចាកចេញផងដែរ។ នាថ្ងៃដ៏មមាញឹកនៃការជម្រុះកីឡាករចេញពីក្រុម ដែលបានជួបនូវរដូវកាលដ៏ខកចិត្ត ក្រោយពីមិនបានឈ្នះពានអ្វីសោះក្នុងឆ្នាំទី១របស់លោកគ្រូបង្វឹក Pep Guardiola មិត្តរួមជាតិរបស់ Clichy គឺខ្សែការពារអន្តរជាតិបារាំង Bacary Sagna វ័យ៣៤ឆ្នាំ ក៏នឹងចាកចេញពីក្លិបនេះផងដែរ។ កីឡាករទាំងបួននឹងចូលរួមជាមួយនឹងខ្សែការពារជើងចាស់របស់អាហ្សង់ទីន Pablo Zabaleta ក្នុងការចាកចេញ ក្រោយពីកិច្ចសន្យារបស់ពួកគេបានបញ្ចប់។

    Navas វ័យ៣១ឆ្នាំ បានបង្ហាញខ្លួនក្នុងការប្រកួតក្របខ័ណ្ឌ Premier League ច្រើនជាង១០០លើកសម្រាប់ក្រុម Man City ក្នុងរយៈពេល៤ឆ្នាំដែលរូបគេបានចំណាយពេលនៅទីនោះ ដោយបានស៊ុតបាល់បញ្ចូលទី៤គ្រាប់ និងបានក្លាយជាសមាជិកដ៏សំខាន់ក្នុងការជួយឲ្យក្រុមនេះឈ្នះពានក្នុងរដូវកាលឆ្នាំ២០១៣-២០១៤។ លោក Txiki Begiristain ប្រធានផ្នែកកីឡាបាល់ទាត់របស់ Man City បានឲ្យដឹងថា៖ «ការធ្វើការជាមួយនឹង Jesus គឺជារឿងដ៏រីករាយមួយ។ ការខិតខំព្យាយាម ការលះបង់ ភាពជាកីឡាករអាជីព និងការស្រេកឃ្លានក្នុងការឈ្នះពានរបស់គេ បង្ហាញឲ្យឃើញជារៀងរាល់ថ្ងៃ»៕
    ប្រភពពី៖ Reuters