Category: សង្គម និងសេដ្ឋកិច្ច

ទូរស័ព្ទស្មាតហ្វូនបំពាក់អេក្រង់ 4K ជាមួយនឹងបច្ចេកវិទ្យា HDR ដំបូងគេក្នុងពិភពលោករបស់ក្រុមហ៊ុន Sony បានបង្ហាញវត្តមានក្នុងទីផ្សារកម្ពុជា ហើយកាលពីល្ងាចថ្ងៃម្សិលមិញបានធ្វើការសម្ពោធជាផ្លូវការជាមួយនឹងតម្លៃប្រមាណ 699 ដុល្លារ។

ទូរស័ព្ទXperia XZ Premiumនេះ ជាស៊េរីកំពូលរបស់ក្រុមហ៊ុនដែលមានបំពាក់បច្ចេកវិទ្យាចុងក្រោយ ទាំងអេក្រង់ កាមេរ៉ា សមត្ថភាពដំណើរការ និងថាមពលថ្ម។ XZ Premiumនៅតែរក្សារចនាបទដូចគ្នាទៅនឹង Xperia XZ ដែរ ប៉ុន្តែមានសមត្ថភាពកាមេរ៉ាខ្លាំងដែលវាអាចថតរូបយឺតៗ (Slow-motion960fps) បានល្អលើសទូរស័ព្ទដទៃដល់ទៅ4ដង ដែលគ្មានស្មាតហ្វូនណាមួយអាចធ្វើបានឡើយ។ វាក៏មានមុខងារទប់រំញ័រ Steady-shot 5 Axis និងប្រើ Motion Eye Camera ដែលមានតែមួយគត់ពី Sony។

ការមកដល់ថ្មីនេះ វាប្រើនូវអេក្រង់ប្រភេទ Trilluminos Display ទំហំ 5.5 អ៊ីញ ដែលវាអាចបង្ហាញរូបភាពបានដល់ទំហំ 4K និងមានភ្ជាប់នូវបច្ចេកវិទ្យាបង្កើនពណ៌-ពន្លឺ HDR និងXreality ដំបូងគេ អាចបង្ហាញរូបភាពបានច្បាស់ល្អមែនទែន បើប្រៀបធៀបនឹងអេក្រង់ Full HD ឬQuad HD។

តាមការបញ្ជាក់ពីអ្នកតំណាងក្រុមហ៊ុន Sony បានឱ្យដឹងថា ទូរស័ព្ទនេះ បានបំពាក់ស៊ិនស័រ CMOS ថ្មីមាន 3 ស្រទាប់ជាប់គ្នាហើយក៏មានបំពាក់ RAM ដាច់ដោយឡែកមួយទំហំ 1GB សម្រាប់ផ្ទុក និងគណនារូបភាពបានលឿនជាងមុន ដែលមិនពឹងផ្អែកលើ RAM របស់ទូរស័ព្ទឡើយ។ លោកបន្តថាទូរស័ព្ទនេះ មានកាមេរ៉ាក្រោយទំហំ 19 MPមានកម្រិត Aperture F2.0 ទំហំ 1/2.3 អ៊ីញ អាចថតវីដេអូ 4K បានទំហំ 60fps និងវីដេអូ Full HD បាន 240fps។

សម្រាប់សមត្ថភាពម៉ាស៊ីន ត្រូវបាន Sony បំពាក់នូវឈីប Snapdragon 835 ជំនាន់ចុងក្រោយក្នុងឆ្នាំ 2017ជាមួយនឹង CPU ចំនួន 8 គ្រាប់ មានល្បឿន 2.45 Ghzនិងមាន GPU Adreno 540។ ក្នុងនោះ វាក៏មាន RAM ទំហំ 4GB និង Memory ក្នុងម៉ាស៊ីន ទំហំ 64GBថាមពលថ្ម 3200 mAhអាចប្រើប្រាស់បានពេញមួយថ្ងៃ និងមានបច្ចេកវិទ្យាសាកថ្មរហ័ស QuicK-charge 3.0 ផងដែរ៕

ភ្នំពេញ ៖ មន្រ្តីជាន់ខ្ពស់ក្រសួងកសិកម្មបានថ្លែងថា កម្ពុជានឹងសម្រេចបានការនាំចេញអង្កររបស់ខ្លួនទៅកាន់ទីផ្សារអន្តរជាតិបានប្រមាណជា ៦០ម៉ឺនតោននៅដំណាច់ឆ្នាំ២០១៧នេះ។

លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ឲ្យដឹងតាមទូរស័ព្ទនាព្រឹកថ្ងៃទី៣០ ឧសភានេះថា ការនាំចេញអង្កររបស់កម្ពុជានៅរយៈពេល៤ខែឆ្នាំ2017នេះមានកំណើនច្រើនដែលជាសញ្ញាវិជ្ជមានមួយហើយយើងសង្ឃឹមថា នៅដំណាច់ឆ្នាំនេះការនាំចេញអាចសម្រេចបានប្រមាណជា៦០ម៉ឺនតោន។

លោកបន្តថា កម្ពុជានៅតែមានសង្ឃឹមលើទីផ្សារដែលគេធ្លាប់បានបញ្ជាទិញកាលពីឆ្នាំកន្លងទៅ អ្វីដែលពិសេសនោះគឺការបន្ថែមកូតានាំចេញអង្ករទៅចិន១០ម៉ឺនតោនលើសពីឆ្នាំមុន ដែលឆ្នាំនេះចិនធានាទិញអង្ករពីកម្ពុជាចំនួន២០ម៉ឺនតោនផងដែរ។

យោងតាមតួលេខពីការិយាល័យច្រកចេញចូលតែមួយសម្រាប់បំពេញបែបបទនាំចេញអង្ករបានបង្ហាញថា ការនាំចេញអង្កររយៈពេល៤ខែដើមឆ្នាំបានចំនួន២១ម៉ឺនតោន ស្មើនឹងកំណើនប្រមាណ៥ភាគរយបើធៀបរយៈពេលដូចគ្នាកាលពីឆ្នាំ២០១៦។

លោកឧកញ៉ា ភួ ពុយ ប្រធានសមាគមសម្ព័ន្ធរោងម៉ាស៊ីនកិនស្រូវកម្ពុជា និងជាអគ្គនាយកធនាគារស្រូវបានថ្លែងថា ការនាំចេញអង្កររបស់កម្ពុជាឆ្នាំនេះមានសភាពល្អប្រសើរ ដោយសារទីផ្សារចិនជាទីផ្សារអំណោយផលមួយសម្រាប់កម្ពុជា ព្រោះរដ្ឋាភិបាលចិនអនុញ្ញាតឲ្យកម្ពុជានាំចេញរហូតដល់៣០ម៉ឺនតោននៅឆ្នាំក្រោយ។ លោកបន្តថា អង្កររបស់យើងសង្ឃឹមលើទីផ្សាចិនច្រើន ប៉ុន្តែទីផ្សារឥណ្ឌូនេស៊ី ហ្វីលីពីន យើងមិនអាចនាំចេញទៅបានទេ ដោយសារអង្កររបស់កម្ពុជាមានតម្លៃថ្លៃ មិនអាចប្រកួតប្រជែងជាមួយអង្ករផលិតនៅប្រទេសថៃ និងប្រទេសវៀតណាមបាននោះទេ។

លោកបន្តថា “បច្ចុប្បន្នកម្ពុជាអស់ស្រូវពីស្តុកសម្រាប់នាំចេញ ប៉ុន្តែការប្រមូលផលនឹងចាប់ផ្តើមនៅខែសីហាខាងមុខនេះ ដូច្នេះការនាំចេញអង្ករឆ្នាំនេះមិនមានបញ្ហានោះទេ”៕

ក្រោមការសម្របសម្រួលដោយផ្ទាល់ពី ឯកឧត្តម ជា សុផារ៉ា ទេសរដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ គិតត្រឹមល្ងាចថ្ងៃទី៣០ ខែឧសភា​ ឆ្នាំ២០១៧ ប្រជាពលរដ្ឋរស់នៅក្នុងអគារប៊ុលឌិង-ស បានចុះកិច្ចសន្យាលក់បន្ទប់ស្នាក់នៅបានចំនួន ៤៦៤បន្ទប់ ស្មើនឹង ៩៤,៣០% នៃចំនួន សរុប ៤៩២បន្ទប់​ហើយ និងបើយោងតាមច្បាប់សហកម្មសិទ្ធិ បើសិនជាមានអ្នករស់នៅលើអគារ ៧៥% បានយល់ព្រម នោះមានន័យថា ការចុះកិច្ចសន្យាលក់-ទិញ ត្រូវអនុវត្ត ១០០%។

នៅថ្ងៃទី០៦ ខែមិថុនា ខាងមុខខាងក្រសួង និងគណៈកម្មការតំណាងឲ្យពលរដ្ឋរស់នៅលើអគារ រួមទាំងធនាគារនឹងរៀបចំផ្ដល់ប្រាក់ជូនពលរដ្ឋប៊ុលឌិងប្រមាណជា ២០០គ្រូសារ ដោយ​គ្រួសារនីមួយៗអាចទាក់ទងទៅកាន់ក្រសួង ដើម្បីទទួលបានព័ត៌មានលម្អិតទាក់ទងនឹងការទទួលប្រាក់ ហើយក្រោយពីទទួលបាន​ប្រាក់​ ពួកគាត់នឹងរើអីវ៉ាន់​ចេញពី​អគារតែម្ដង ចំណែកគ្រួសារដែលនៅសល់ នឹងរើចេញតាមក្រោយបន្តិចម្ដងៗ ទៅតាមការកំណត់របស់ក្រសួង។ ជាមួយគ្នានោះផងដែរ ឯកឧត្តម ជា សុផារ៉ា បានផ្ដល់ប្រាក់ដឹកជញ្ជូនចំនួន ១០០ដុល្លារ និងនៅថ្ងៃទី១០ ខែមិថុនា ខាងមុខនឹងមានកម្មវិធីជប់លៀងលាគ្នាផងដែរ ដែលរៀបចំដោយក្រសួងដែនដី៕

សកម្មភាពពុះដីឡូត៍លក់កំពុងកើនឡើងយ៉ាងផុលផុសក្នុងប៉ុន្មានឆ្នាំចុងក្រោយនេះ ធ្វើឲ្យអ្នកនៅក្នុងវិស័យនេះបានធ្វើការព្រមានផង និងលើកឡើងពីឱកាសក្នុងការទទួលបានប្រាក់ចំណេញក្នុងវិស័យនេះផងដែរ។

តើការទិញដីឡូត៍បង់រំលស់មានភាពល្អប្រសើរ និងប្រឈមហានិភ័យអ្វីខ្លះ លោក ច្រឹក សុខនីម អគ្គនាយកក្រុមហ៊ុនអចលនទ្រព្យ Century21 Mekong បានពន្យល់ពីបញ្ហានេះ។

តើចរន្តនៃការពុះដីឡូត៍លក់ផ្តល់អត្ថប្រយោជន៍អ្វីខ្លះ?
ការពុះដីឡូត៍លក់មានចំណុចវិជ្ជមានច្រើនដូចជា ធ្វើឲ្យមានសកម្មភាពអភិវឌ្ឍន៍ថ្មីៗនៅតំបន់ជាយក្រុង ឬតំបន់ដទៃទៀត និងជំរុញឲ្យមនុស្សទៅរស់នៅច្រើន ព្រមទាំងធ្វើឲ្យអ្នកក្រីក្រអាចមានលទ្ធភាពទិញបាន ដែលជួយឲ្យមានការអភិវឌ្ឍនៅមូលដ្ឋានណាមួយបានឆាប់រហ័ស។

តើអ្នកទិញដីឡូត៍ប្រឈមបញ្ហាអ្វីខ្លះ?
អ្នកទិញដីឡូត៍អាចប្រឈមមុខនឹងបញ្ហាមួយចំនួន ដូចជា ដីឡូត៍នោះមានទំហំតូចៗ មានម្ចាស់ខុសៗគ្នាដែលធ្វើឲ្យសំណង់សាងសង់មិនសូវមានរបៀបរៀបរយនោះទេ។ ចំណែកប្រព័ន្ធលូ ទឹកស្អាត និងបណ្តាញអគ្គិសនីក៏គ្មានស្តង់ដារដែរ ប្រសិនជាអ្នកវិនិយោគពុះដីឡូត៍លក់ មិនបានធ្វើការវិនិយោគលើវិស័យនេះ។

តើអ្នកទិញដីឡូត៍គួរប្រុងប្រយ័ត្នយ៉ាងដូចម្តេច?
អ្នកទិញដីឡូត៍ គួរសាកសួរអ្នកវិនិយោគពីប្រព័ន្ធហេដ្ឋារចនាសម្ព័ន្ធនានា ទាក់ទងនឹងប្រព័ន្ធទឹក ភ្លើង និងផ្លូវច្បាប់ ដូចជា តើអ្នកវិនិយោគពុះដីឡូត៍លក់នោះមានប្លង់រឹងឬអត់? ប្រសិនជាមាន ត្រូវទាមទារការកាត់ប្លង់រឹង។ បើម្ចាស់ដីឡូត៍មានប្លង់ទន់ ឬប្លង់ត្រឹមខណ្ឌ ត្រូវបញ្ជាក់ពីខណ្ឌ និងទាមទារការកាត់ប្លង់ត្រឹមខណ្ឌឲ្យបានត្រឹមត្រូវ ដើម្បីបញ្ចៀសហានិភ័យនៅពេលអនាគត។

តើអ្នកពុះដីឡូត៍លក់គួរធ្វើដូចម្តេច ដើម្បីបញ្ចៀសហានិភ័យទៅអនាគត?
អ្នកពុះដីឡូត៍លក់ គួរមានការប្រុងប្រយ័ត្នទាក់ទងនឹងបញ្ហាផ្លូវច្បាប់ ដើម្បីកុំឲ្យមានការតវ៉ាពីអ្នកទិញដីនាពេលអនាគត។ អ្នកវិនិយោគពុះដីឡូត៍លក់ អាចកសាងហេដ្ឋារចនាសម្ព័ន្ធឲ្យបានល្អប្រសើរ ដើម្បីឱ្យគម្រោងរបស់ខ្លួនមាននិរន្តរភាព ដោយការបំពាក់ប្រព័ន្ធទឹក ភ្លើង លូត្រឹមត្រូវ តែវានឹងធ្វើឲ្យមានការចំណាយខ្ពស់ ដែលនឹងធ្វើឲ្យតម្លៃដីឡើងថ្លៃខ្ពស់ និងពិបាកលក់ផងដែរ។ នេះជាបញ្ហាប្រឈមរបស់អ្នកវិនិយោគលើដីពុះឡូត៍លក់។

តើការវិនិយោគលើដីឡូត៍ទទួលបានប្រាក់ចំណេញខ្ពស់ឬទេ?
ការទិញដីឡូត៍ទុកលក់យកចំណេញ ពិតជាអាចចំណេញបាន ប៉ុន្តែកម្រិតនៃប្រាក់ចំណេញអាស្រ័យលើធនធានរបស់ពួកគេដែលបានវិនិយោគលើដីឡូត៍នោះ ប៉ុន្តែជាទូទៅការវិនិយោគលើដីឡូត៍ទុកលក់យកចំណេញ មិនសូវមានភាពចំណេញខ្ពស់ប៉ុន្មានទេ មិនដូចជាការទិញដីធំៗឡើយ។ វាចំណេញតាមទំហំទឹកប្រាក់ដែលអតិថិជនបានវិនិយោគជាក់ស្តែង និងស្ថិតលើថា តើតំបន់នោះមានការអភិវឌ្ឍឆាប់រហ័សកម្រិតណា៕

ភ្នំពេញ៖ ការផ្តល់ឥណទានក្នុងវិស័យមីក្រូហិរញ្ញវត្ថុឆ្នាំនេះ បានរក្សាកំណើនទាបជាងមុន ប៉ុន្តែគុណភាពនៃឥណទាន មានភាពប្រសើរជាង បើធៀបជាមួយឆ្នាំមុន ដោយសារការផ្តល់ឥណទានពីស្ថាប័នមីក្រូហិរញ្ញវត្ថុនានាកាន់តែមានការប្រុងប្រយ័ត្នជាងមុន។

លោក ជា ផល្លារិន អគ្គនាយកគ្រឹះស្ថានមីក្រូហិរញ្ញវត្ថុអម្រិត បានថ្លែងឲ្យដឹងតាមទូរស័ព្ទនាព្រឹកថ្ងៃទី៣០ ឧសភានេះថា ក្នុងរយៈពេល ៤ខែ ដើមឆ្នាំនេះ ការផ្តល់ឥណទានក្នុងវិស័យមីក្រូហិរញ្ញវត្ថុមានកំណើន ១០ភាគរយ ធៀបរយៈពេលដូចគ្នាកាលពីឆ្នាំមុន ប៉ុន្តែទំហំនៃកំណើនឆ្នាំនេះមានការថមថយល្បឿន ដោយសារការដាក់របារការប្រាក់របស់ធនាគារជាតិ ដែលបានអនុវត្តកាលពីដើមខែមេសា។ លោកបន្តថា ទោះបីជាមានកំណើនយឺតជាងឆ្នាំមុន ប៉ុន្តែសុខភាពនៃឥណទានមានគុណភាពជាងមុន ដោយសារការផ្តល់ឥណទានកាន់តែមានការប្រុងប្រយ័ត្ន។

លោកបន្តថា «ជាទូទៅស្ថានភាពនៃឥណទានមានភាពល្អប្រសើរ ទោះជាថមថយល្បឿនបន្តិចក្តី ប៉ុន្តែវាមិនមានសញ្ញាគួរឲ្យបារម្ភនោះទេ»។

ប្រធានសមាគមមីក្រូហិរញ្ញវត្ថុកម្ពុជា និងជាអគ្គនាយកគ្រឹះស្ថានមីក្រូហិរញ្ញវត្ថុស្ថាបនា លោកឧកញ៉ា ហួត អេងតុង បានថ្លែងថា ការផ្តល់ឥណទានរបស់ហត្ថាកសិករកើនមានទំហំទឹកប្រាក់២០លានដុល្លារក្នុងរយៈពេល៤ខែដើមឆ្នាំនេះ ដែលកំណើននេះមានទំហំប្រហាក់ប្រហែលគ្នាធៀបនឹងឆ្នាំមុន។ ទំហំឥណទាន និងគុណភាពនៃឥណទានក្នុងស្ថាប័នហត្ថាកសិករ និងក្នុងវិស័យទាំងមូលនៅតែរឹងមាំ ទោះជាមានការដាក់របារការប្រាក់ពីធនាគារជាតិក្តី។

លោកបន្តថា ទោះជាមានការដាក់របារការប្រាក់ក៏ដោយ ក៏គ្រឹះស្ថានមីក្រូហិរញ្ញវត្ថុនានាមិនរងផលប៉ះពាល់នោះទេ ហើយក៏មិនមានការបិទការិយាល័យឥណទាននៅតាមទីជនបទដែរ គ្រាន់តែការផ្តល់ប្រាក់ដល់អតិថិជនកាន់តែមានការប្រុងប្រយ័ត្នជាងមុន ដើម្បីធ្វើឲ្យប្រាកដថាឥណទានរបស់យើងមានគុណភាព៕

មួយរយៈចុងក្រោយនេះគេសង្កេតឃើញថា ប្រជាប្រិយភាពរបស់កញ្ញា ឈិន សៀវម៉ី មានសម្ទុះកើនឡើងគួរឱ្យកត់សម្គាល់តាមរយៈការងារមួយចំនួនដូចជាថតស្ប៉ត និងសម្ដែងភាពយន្ដជាច្រើន។ ទោះជាយ៉ាងនេះក្ដី តារាសម្ដែងរូបនេះបានបញ្ជាក់ថា ទំរាំដើរមកដល់ចំណុចនេះ ជីវិតរបស់នាងបានជួបនឹងរឿងរ៉ាវជាច្រើន។

ពាក់ព័ន្ធការសម្ដែងកញ្ញា ឈិន សៀវម៉ី ធ្លាប់សម្ដែងជាច្រើនរឿងមកហើយ ប៉ុន្ដែនាងពុំធ្លាប់ទទួលបានតំណែងតួឯកឡើយ ទើបតែថ្មីៗនេះនាងទទួលបានតំណែងតួឯកស្រីជាមួយនាយគ្រឿន។ ទោះជានាងមិនចាប់អារម្មណ៍ចំពោះតំណែងនេះក៏ពិតមែន តែស្ថិតក្នុងឋានៈជាតួឯកស្រីលើកដំបូងក៏បានធ្វើឱ្យនាងរំភើបចិត្ដមិនតិចដែរ។

កញ្ញា ឈិន សៀវម៉ី ប្រាប់ថា ពីដំបូងនាងធ្លាប់គិតថាការចូលប្រឡូកក្នុងសិល្បៈ គឺងាយស្រួល សប្បាយ ប៉ុន្ដែការពិតពុំមែនដូច្នោះទេ គឺត្រូវជួបឧបសគ្គ និងរឿងរ៉ាវជាច្រើនដែលធ្វើឱ្យនាងស្ទើរតែដកខ្លួនចេញពីវិថីនេះម្ដងៗទៅហើយ។ នាងបញ្ជាក់ថា ៖”ពេលខ្ញុំចូលសិល្បៈដំបូង ខ្ញុំគ្មានមធ្យោបាយធ្វើដំណើរ និងត្រូវជិះជាមួយមិត្ដភ័ក្ដិ ពេលទៅដល់កន្លែងថតយឺតយ៉ាវក៏ត្រូវគេស្ដីឱ្យទៀត។ ការសម្ដែងគ្រាដំបូងរបស់ខ្ញុំពុំទាន់មានបទពិសោធពេលថតខុស ក៏ត្រូវអ្នកដឹកនាំរឿងស្តីបន្ទោស មានពេលខ្លះខ្ញុំទប់ទឹកភ្នែកសឹងតែមិនបាន”។

តារាសម្ដែងរូបនេះរៀបរាប់បន្ដថា លុះមកដល់បច្ចុប្បន្ន គ្រាដែលនាងទទួលបានតំណែងតួឯកទើបដឹងថា ការតស៊ូវាពិតជាបានហុចនូវផ្លែផ្កាពិតប្រាកដមែន។

ជាមួយគ្នានេះឈិន សៀវម៉ី បានបង្ហាញពីអារម្មណ៍ពិតរបស់នាងថា៖ «ខ្ញុំពុំមែនជាតារាសម្ដែងមានឈ្មោះបោះសំឡេងណាស់ណានោះទេ ប៉ុន្ដែខ្ញុំចង់ចែករំលែកបទពិសោធនេះដល់អ្នកស្រករក្រោយៗខ្ញុំថា ប្រសិនបើចង់ប្រឡូកចូលសិល្បៈលុះត្រាតែមានចិត្ដអំណត់ និងតាំងចិត្ដតស៊ូ ព្រមទាំងស្រឡាញ់វា ទើបយើងដើរដល់គោលដៅដែលយើងចង់ទៅ»៕

ក្នុងជំនួបពិភាក្សាជាមួយគណៈប្រតិភូក្រុមហ៊ុនថៃ ដែលផ្តោតសំខាន់ទៅលើការបង្កើតរោងចក្រផលិតទឹកស្អាត និងលក់ដុំបន្តទៅអ្នកចែកចាយផ្ទាល់ទៅដល់ផ្ទះប្រជាពលរដ្ឋ ឯកឧត្តមទេសរដ្ឋមន្រ្តី ចម ប្រសិទ្ឋ រដ្ឋមន្ត្រីក្រសួងឧស្សាហកម្ម និងសិប្បកម្មបានបញ្ជាក់ថា នៅត្រឹមឆ្នាំ 2025 ពលរដ្ឋរស់នៅតាមទីប្រជុំជនទាំងអស់នឹងមានទឹកស្អាតប្រើប្រាស់100%។

ឯកឧត្តមទេសរដ្ឋមន្រ្តី បានបញ្ជាក់ថា គោលនយោបាយទឹកស្អាតរបស់រដ្ឋាភិបាល បានឈរលើគោលការណ៍ 4 យ៉ាងគឺ ទឹកមានគុណភាព-សុវត្ថិភាព-និរន្តរភាព-និងតម្លៃសមរម្យ គឺក្នុងគោលដៅលើកកម្ពស់សុខមាលភាព និងកម្រិតជីវភាពរស់នៅរបស់ប្រជាពលរដ្ឋទូទៅ។

ឯកឧត្តមទេសរដ្ឋមន្ត្រីក៏បានណែនាំទីតាំងមួយចំនួនសម្រាប់ឲ្យតំណាងក្រុមហ៊ុនថៃពិនិត្យលទ្ធភាពវិនិយោគលើវិស័យនេះដែរ ដែលមានដូចជា៖ នៅខេត្តព្រះសីហនុ ខេត្តកំពង់ស្ពឺ ជាដើម ប៉ុន្តែទីតាំងដែលមានសក្តានុពលគឺតំបន់នៅស្រុកចន្ទ្រា ខេត្តស្វាយរៀង ជាប់ព្រំដែនវៀតណាម ដែលអាចយកប្រភពទឹកដ៏ច្រើនបានពីទន្លេ វ៉ៃកូ ខេត្តស្វាយរៀង ។

ចំណែកតំណាងក្រុមហ៊ុនថៃ បានសម្តែងនូវការរីករាយចំពោះអនុសាសន៍ និងការណែនាំរបស់ឯកឧត្តមទេសរដ្ឋមន្ត្រី ដែលជាមូលដ្ឋានក្នុងការសិក្សា និងពិនិត្យលទ្ធភាពវិនិយោគនៅកម្ពុជា៕

កំណត់ហេតុប្រចាំថ្ងៃ គឺជារឿងដែលយុវជនភាគច្រើនចូលចិត្តធ្វើ តែក៏មានយុវជនមិនតិចដែរដែលចាប់ផ្តើមសរសេរវាហើយបោះបង់ចោលវិញ។ មានអ្នកខ្លះសរសេរកំណត់ហេតុប្រចាំថ្ងៃដើម្បីកត់ត្រាពីអារម្មណ៍ និងលទ្ធផលការងារ ឬដើម្បីតែបញ្ចេញនូវការព្រួយបារម្ភ ក៏ដូចជាភាពសប្បាយក្នុងចិត្តទៅក្នុងអត្ថបទប៉ុណ្ណោះ។ ទម្លាប់នៃការសរសេរកំណត់ហេតុប្រចាំថ្ងៃត្រូវបានអ្នកស្រាវជ្រាវផ្នែកអប់រំផ្លូវចិត្តរកឃើញថា វាបានផ្តល់ផលវិជ្ជមានជាច្រើនដល់ការគិត និងបង្កើនភាពស្វាហាប់ក្នុងជីវិត។

១. កំណត់ហេតុព្យាបាលរបួសស្នាមក្នុងចិត្ត
នៅពេលដែលមនុស្សម្នាក់មានការឈឺចាប់ ឬមានបញ្ហាអ្វីមួយកើតឡើង ពួកគេត្រូវការបំផុតក្នុងការបញ្ចេញរឿងនោះពីក្នុងខ្លួនទៅឱ្យអ្នកដទៃបានដឹង។ ជាធម្មតា មនុស្សចូលចិត្តស្តាប់រឿងសប្បាយៗ ហើយក៏គ្មានមនុស្សណាម្នាក់សុខចិត្តស្តាប់រឿងរ៉ាវក្នុងចិត្តរបស់មនុស្សម្នាក់ទៀតជារៀងរាល់ពេលនោះដែរ ព្រោះវាសុទ្ធសឹងជារឿងដែលនាំឱ្យឈឺក្បាល តែកំណត់ហេតុគឺអាចនៅជាមួយអ្នកគ្រប់ពេលវេលា។ នៅពេលដែលមានការមិនសប្បាយចិត្ត ជួបរឿងភ្ញាក់ផ្អើលក្នុងជីវិត និងមានការតក់ស្លុតបន្ទាប់ពីបានឃើញរឿងដែលពិបាកទទួលយកក្នុងជីវិត អ្នកអាចសរសេរវាក្នុងសៀវភៅកំណត់ហេតុដើម្បីឱ្យរឿងរ៉ាវទាំងអស់នោះវាបានចេញពីក្នុងខ្លួន ហើយវាក៏ធ្វើឱ្យអ្នកមានភាពធូរស្រាលក្នុងចិត្តដែរ។ គុណសម្បត្តិនេះផងដែរ ក៏អាចជំរុញឱ្យអ្នកស្ងប់អារម្មណ៍ ហើយធ្វើឱ្យមានអារម្មណ៍រឹងមាំដើម្បីបន្តគិតពីរឿងវិជ្ជមានរហូតបង្កើតជាសកម្មភាពប្រកបដោយគុណតម្លៃក្នុងជីវិត។

២. កំណត់ហេតុជួយឱ្យខួរក្បាលមានរបៀបរៀបរយ និងឆ្លាតជាងមុន
ការសរសេរកំណត់ហេតុ ជារឿងពេញនិយមមួយរបស់សិស្សនិស្សិតដែលពូកែ និងបុគ្គលិកដែលមានគំនិតអភិវឌ្ឍន៍ច្រើននៅក្នុងក្រុមហ៊ុន ព្រោះទម្លាប់នៃការកត់ត្រាសមិទ្ធផលដែលអាចធ្វើបាន រួមទាំងបញ្ហាដែលបានកើតឡើងអាចជួយឱ្យមនុស្សស្ងប់ចិត្ត ហើយងាយរកឃើញឡើងវិញពីប្រភពនៃបញ្ហា។ នៅពេលដែលមនុស្សណាម្នាក់មានអារម្មណ៍ស្ងប់ ហើយរកឃើញប្រភពនៃបញ្ហាដែលយាយីដល់ការងារ និងដំណើរជីវិត ពួកគេនឹងអាចរកឃើញដោយងាយនូវដំណោះស្រាយឆ្លាតវៃដើម្បីជម្នះវាឱ្យបាន។ អ្នកដែលសរសេរកំណត់ហេតុប្រចាំថ្ងៃ ភាគច្រើនជាអ្នកដែលមើលឃើញពីដំណោះស្រាយលើបញ្ហាខ្ពស់ជាងមនុស្សធម្មតា ព្រោះរាល់បញ្ហាអវិជ្ជមាននៅក្នុងគំនិតរបស់គេត្រូវបានកត់ត្រាទុកយ៉ាងរៀបរយ ដែលអាចអនុញ្ញាតឱ្យគាត់មានពេលគិតពីវិធីជម្នះវាបានល្អ។

៣. កំណត់ហេតុប្រចាំថ្ងៃជាភស្តុតាងសម្រាប់ជីវិត
មនុស្សតែងតែសោកស្តាយជាមួយនឹងរឿងរ៉ាវអាម៉ាសនៅក្នុងជីវិតនាពេលអតីតកាល តែក៏ចង់បង្ហាញពីការខិតខំប្រឹងប្រែង និងមោទនភាពនៃជីវិតទៅកាន់អ្នកដទៃផងដែរ។ ការសរសេរសៀវភៅកំណត់ហេតុបានធ្វើឱ្យមនុស្សមួយចំនួនក្លាយជាអ្នកល្បីល្បាញបាន ហើយក៏ធ្វើឱ្យមេរៀនជីវិតដែលបានកត់ទុកនោះក្លាយជាគំរូនៃការរៀនសូត្រសម្រាប់មនុស្សដទៃផងដែរ។
ហេតុនេះការសរសេរសៀវភៅកំណត់ហេតុ គឺជាភស្តុតាងសំខាន់បំផុតមួយដែលអាចអប់រំមនុស្ស រួមទាំងជាមោទនភាពមួយសម្រាប់ជីវិតខ្លួនឯងទៀតផង៕