Category: សង្គម និងសេដ្ឋកិច្ច

  • ដឹងទេថា ទិវាកុមារអន្តរជាតិ ១មិថុនា កើតមានចាប់ពីពេលណា?

    ដឹងទេថា ទិវាកុមារអន្តរជាតិ ១មិថុនា កើតមានចាប់ពីពេលណា?

    ចាប់តាំងពីឆ្នាំ ១៩៥០ រហូតមក ជារៀងរាល់ឆ្នាំ មនុស្សជាតិនៅលើសាកលលោកតែងតែប្រារព្ធ និងចូលរួមនៅក្នុងទិវា ១មិថុនា ដែលរំលឹកដល់ការចង់ចាំមិនភ្លេចនូវអំពើឧក្រិដ្ឋកម្មដ៏ព្រៃផ្សៃ និងយង់ឃ្នងរបស់ពួកហ្វាស៊ីស ដែលបានធ្វើកាលពីថ្ងៃទី១០ មិថុនា ឆ្នាំ១៩៤២ ដោយការសម្លាប់ប្រជាជនយ៉ាងរង្គាលនៅក្នុងភូមិ លីឌីស៊ែ នៃសាធារណរដ្ឋសហព័ន្ធឆែក និងស្លូវ៉ាគឺ សរុបចំនួន ១៩២នាក់ ជាពិសេសនៅក្នុងកសិដ្ឋានអូរ៉ាក ដែលក្នុងនោះរួមមានកុមារ ១០៥នាក់ ត្រូវបានយកទៅសម្លាប់ ខណៈដែលម្តាយរបស់ក្មេងៗទាំងនោះក៏ត្រូវបានក្រុមហ្វាស៊ីសបញ្ជូនទៅឃុំនៅជំរុំរបស់ខ្លួន ហើយផ្ទះសម្បែងដែលមាននៅក្នុងភូមិត្រូវដុតបំផ្លាញគ្មានសល់។

    រំលងក្រោយមកនៅថ្ងៃទី ១០ មិថុនា ឆ្នាំ ១៩៤៤ ពួកឧក្រិដ្ឋកម្មហ្វាស៊ីស បានចាប់មនុស្ស ១,១០០នាក់ ដែលក្នុងនោះមានកុមារតូចៗចំនួន២០០នាក់ យកទៅចាក់សាំងដុតទាំងរស់នៅតំបន់អូរ៉ាឌូ នៃប្រទេសបារាំង។ បន្ទាប់ពីមានសោកវិនាសកម្ម ដែលធ្វើឱ្យអ្នកស្នេហាសន្តិភាពនានា បានក្រោកឈរឡើងធ្វើការតស៊ូប្រឆាំង រហូតកើតមានសង្រ្គាមដែលបណ្តាលឱ្យមានមហន្តរាយដល់ទ្រព្យសម្បតិ្ត និងអាយុជីវិតផងដែរ។

    ចលនាតស៊ូត្រូវបានធ្វើឡើងរយៈពេលពេញមួយឆ្នាំ។ នៅឆ្នាំ ១៩៤៥ លទ្ធិហ្វាស៊ីស ត្រូវបានរលំរលាយដោយសារថ្វីដៃរបស់កងទ័ពអតីតសហភាពសូវៀត។ មនុស្សជាតិទាំងអស់មានសេចក្តីសោមនស្សរីករាយ ដោយបានរួចផុតពីគ្រោះមហន្តរាយនៃលទ្ធិហ្វាស៊ីសដ៏យង់ឃ្នងមួយនេះ។

    នៅក្នុងអំឡុងខែមេសាឆ្នាំ ១៩៤៩ សម្ព័ន្ធនារីប្រជាធិបតេយ្យអន្តរជាតិបានបើកសម័យប្រជុំនាទីក្រុងមូស្គូ ហើយបានសម្រចយកថ្ងៃទី ១ មិថុនា ឆ្នាំ ១៩៥០ ជារៀងរាល់ឆ្នាំ ដើម្បីប្រារព្ធជាទិវាកុមារអន្តរជាតិ ក្នុងគោលបំណងឧទ្ទិសដល់កុមាររាប់រយនាក់ដែលបានស្លាប់យ៉ាងអណោចអធម។

    សេចក្តីសម្រេចនេះត្រូវបានទទួលការឯកភាពពីស្ថាប័ននានានៅលើសាកលលោក ដោយក្នុងនោះរួមមានអង្គការសម្ព័ន្ធសហជីព កម្មការអន្តរជាតិ និងអង្គការសហព័ន្ធយុវជនប្រជាធិបតេយ្យពិភពលោកផងដែរ។ ចាប់តាំងពីពេលនោះមក ពិភពលោកទាំងមូលបានកំណត់យកថ្ងៃទី ១ ខែមិថុនា ជាទិវាចងកំហឹងពោរពេញដោយការឈឺចាប់ ហើយក៏ជាទិវាមួយដែលបំផុសស្មារតីដល់មនុស្សជាតិទាំងមូលឱ្យយកចិត្តទុកដាក់ទៅលើសុខុមាលភាពកុមារទូទៅ និងជាទិវាសាមគ្គីអន្តរជាតិរបស់កុមារនៅលើពិភពលោក ហើយក៏បន្តអនុវត្តរហូតមកដល់ពេលបច្ចុប្បន្ននេះ៕

     

  • អ្នកចាំទី Begovic បំពេញការផ្ទេរចេញពី Chelsea ទៅកាន់ក្លិប Bournemouth

    អ្នកចាំទី Begovic បំពេញការផ្ទេរចេញពី Chelsea ទៅកាន់ក្លិប Bournemouth

    ក្លិប Bournemouth បានបំពេញការចុះហត្ថលេខាជាមួយនឹងអ្នកចាំទី Asmir Begovic ពីក្លិប Chelsea ក្នុងតម្លៃខ្លួនបិទជិតមួយ ដែលត្រូវបានគេជឿជាក់ថា មានចំនួន១០លានផោន (ស្មើនឹង១២,៨លានដុល្លារអាមេរិក)។ ការផ្ទេរនេះនឹងត្រូវបំពេញជាផ្លូវការនៅថ្ងៃទី១ ខែកក្កដា ហើយអ្នកចាំទីអន្តរជាតិបូស្នីវ័យ២៩ឆ្នាំរូបនេះនឹងត្រូវចុះហត្ថលេខាលើកុងត្រារយៈពេលវែងមួយ។

    Begovic នឹងវិលទៅកាន់កន្លែងដែលរូបគេធ្លាប់បានលេង ក្រោយពីបានចំណាយពេលក្នុងនាមជាកីឡាករកម្ចីនៅឯក្លិប Bournemouth ពីក្លិប Portsmouth កាលពីខែសីហា ឆ្នាំ២០០៧ ដោយបានធ្វើការបង្ហាញខ្លួន៨លើក។ Begovic បានចូលរួមជាមួយនឹង Chelsea ដែលក្រុមម្ចាស់ជើងឯកក្របខ័ណ្ឌ កាលពីឆ្នាំ២០១៥ ដោយចេញពីក្លិប Stoke ក្នុងកិច្ចសន្យារយៈពេល៤ឆ្នាំក្នុងតម្លៃខ្លួន៨លានផោន ប៉ុន្តែគេបានបង្ហាញខ្លួនត្រឹមតែ៣៣លើកប៉ុណ្ណោះសម្រាប់ក្លិបមួយនេះក្នុងរដូវកាលពីរលើកចុងក្រោយនេះ តាមរយៈការដើរតួជាអ្នកចាំទីជម្រើសទី២បន្ទាប់ពីអ្នកចាំទីជម្រើសទី១ Thibaut Courtois។

    បច្ចុប្បន្ន រូបគេនឹងបំពេញការផ្ទេរទៅកាន់ក្លិប Bournemouth ដើម្បីប្រជែងតំណែងជាមួយនឹងអ្នកចាំទីជម្រើសទី១ Artur Boruc វ័យ៣៧ឆ្នាំ ដែលមានកុងត្រារហូតដល់ឆ្នាំ២០១៨ ក្រោយពីប្រើប្រាស់លក្ខខណ្ឌនៃការបង្ហាញខ្លួនក្នុងកុងត្រារបស់គេ។
    Begovic បានប្រាប់គេហទំព័ររបស់ក្លិប Bournemouth ថា៖ «AFC Bournemouth គឺជាក្លិបដ៏អស្ចារ្យ
    និងមានមហិច្ឆតាមួយដែលត្រៀមរាល់អ្វីៗទាំងអស់សម្រាប់អនាគតដ៏ត្រចះត្រចង់»។ កីឡាកររូបនេះបានបន្ថែមទៀតថា៖ «ក្នុងការស្ថិតជាផ្នែកមួយក្នុងក្រុមឈ្នះពាននៅឯ Chelsea គឺជារឿងដ៏អស្ចារ្យមួយ ប៉ុន្តែ ខ្ញុំមានអារម្មណ៍នៅពេលនេះថា វាជាពេលវេលាដ៏ត្រឹមត្រូវមួយក្នុងការធ្វើការផ្លាស់ប្តូរហើយ ពីព្រោះខ្ញុំចង់លេងកីឡាបាល់ទាត់ឲ្យបានទៀងទាត់»៕
    ប្រភពពី៖ Sky Sport

  • អាណាព្យាបាល និងយុវជនកម្ពុជាមួយចំនួនស្គាល់ពីជំនាញការងារមិនអស់

    អាណាព្យាបាល និងយុវជនកម្ពុជាមួយចំនួនស្គាល់ពីជំនាញការងារមិនអស់

    ការសិក្សា និងការជ្រើសរើសជំនាញការងារជារឿងចាំបាច់មួយសម្រាប់ជីវិតរបស់យុវជន ព្រោះនៅពេលដែលពួកគេមានក្តីស្រឡាញ់ពិតប្រាកដចំពោះការងារដែលខ្លួនកំពុងធ្វើ ពួកគេនឹងអាចអភិវឌ្ឍសមត្ថភាពរបស់ខ្លួនឯងបានល្អបំផុត។ តែប្រសិនបើពួកគេត្រូវបង្ខំចិត្តឱ្យជ្រើសរើសមុខវិជ្ជាណាមួយដែលខ្លួនមិនពេញចិត្តវិញ ពួកគេប្រាកដជាត្រូវប្រឈមមុខជាមួយបញ្ហាជាច្រើន ជាពិសេសគឺធ្វើការខុសជំនាញ ដែលអាចរាំងស្ទះដល់ដំណើរនៃការអភិវឌ្ឍសមត្ថភាពខ្លួនឯងក្នុងពិភពការងារ។

    លោក រិន រ៉ាវុធ អតីតឯកអគ្គរដ្ឋទូតយុវជនរបស់អូស្ត្រាលី និងជាអ្នកនិពន្ធសៀវភៅស្តីពីការជ្រើសរើសជំនាញបានលើកឡើងថា នៅកម្ពុជាដោយសារតែនៅទីជនបទភាគច្រើនមិនសូវសម្បូរអាជីពការងារ ឬស្ថាប័នសំខាន់ៗទៅដល់ អាណាព្យាបាលមួយចំនួនធំមិនបានស្គាល់អំពីជំនាញ និងអាជីពឱ្យបានច្បាស់លាស់នោះទេ កត្តានេះបានធ្វើឱ្យអាណាព្យាបាលទាំងអស់នោះ ចាប់ផ្តើមរុញច្រានកូនៗរបស់ពួកគាត់ ឬទាក់ទាញឱ្យជ្រើសរើសតែអាជីពមួយចំនួនតូចដែលគាត់បានស្គាល់នៅក្នុងសហគមន៍។

    លោក រ៉ាវុធ បាននិយាយថា៖ «មានយុវជនខ្លះមានសមត្ថភាពលើផ្នែកស្ថាបត្យកម្ម ឬផ្នែកបច្ចេកទេសជាដើម តែដោយសារតែអាណាព្យាបាលគាត់ស្គាល់តែជំនាញនៅក្នុងសហគមន៍ដូចជាគ្រូពេទ្យ ឬគ្រូបង្រៀនជាដើម គាត់ក៏បានដាក់កំហិតឱ្យកូនរបស់គាត់ចាប់យកអាជីពនោះទាំងសាមីខ្លួនកូនមិនមានទេពកោសល្យ ឬស្រឡាញ់ចូលចិត្តអាជីពទាំងនោះសោះ»។
    បញ្ហាដូចដែលបានរៀបរាប់ខាងដើមនេះ អាចរុញច្រានឱ្យយុវជនមួយចំនួនបាត់បង់ឱកាសក្នុងការអភិវឌ្ឍខ្លួនឯង ហើយនិងខកខានក្នុងចាប់យកឱកាសការងារនៅក្នុងសង្គមដែលត្រូវនឹងចំណង់ចំណូលចិត្តរបស់ខ្លួនឯងទៀតផង។

    ទន្ទឹមនឹងឥទ្ធិពលរបស់ក្រុមគ្រួសារដែលអាចជះឥទ្ធិពលមិនល្អទៅលើកូនៗនេះ ទីភ្នាក់ងារជាតិមុខរបរ និងការងារ បានបង្ហាញផងដែរថា យុវជនកម្ពុជាភាគច្រើនបានសិក្សាតែលើអាជីពគ្រប់គ្រង និងសេវាកម្ម ដែលអាជីពទាំងអស់នេះកំពុងតែលើសតម្រូវការរបស់សង្គម ហើយបែរជាមិនចាប់អារម្មណ៍ជំនាញបច្ចេកទេសផ្សេងៗដែលសង្គមកំពុងត្រូវការទៅវិញ។ ជំនាញអាជីពជាច្រើននៅក្នុងសាកលវិទ្យាល័យមួយចំនួន និងត្រូវជាមួយនឹងសមត្ថភាពរបស់យុវជនផងនោះ ត្រូវបានពួកគេមើលរំលង ឬមិនជ្រើសរើសយកវា ព្រោះពួកគេសម្លឹងមើលឃើញតែជ្រុងមួយនៃការងារដែលសម្បូរមនុស្សរៀន និងចាប់យកតែការងារមួយចំនួនដែលពួកគេធ្លាប់ស្គាល់តែប៉ុណ្ណោះ ហើយមិនព្រមព្យាយាមស្វែងយល់ពីអាជីពដទៃទៀតដែលមានលក្ខណៈពិសេសផ្សេងពីគ្នាឡើយ។

    ទោះបីជាយ៉ាងណាក៏ដោយ ដោយសារតែមានការអប់រំផ្សព្វផ្សាយពីទីភ្នាក់ងារជាតិមុខរបរ និងការងារ រួមទាំងក្រសួងអប់រំ យុវជន និងកីឡាផងនោះ យុវជនមួយចំនួនចាប់ផ្តើមស្គាល់ពីជំនាញដែលមានគុណតម្លៃសម្រាប់ខ្លួនឯង និងសង្គមកាន់តែច្រើនឡើងពីមួយឆ្នាំទៅមួយឆ្នាំ តែទោះបីជាយ៉ាងនេះក្តី ក៏វិសមភាពនៃការជ្រើសរើសជំនាញនាពេលបច្ចុប្បន្ន កំពុងស្ថិតក្នុងស្ថានភាពគួរឱ្យព្រួយបារម្ភដែរ៕

  • យូរី ចេញមុខបកស្រាយរឿង អតីតគូស្នេហ៍ចោទនាងសាវា

    យូរី ចេញមុខបកស្រាយរឿង អតីតគូស្នេហ៍ចោទនាងសាវា

    បន្ទាប់ពីមានការលើកឡើងរបស់លោករ៉េត អតីតអ្នកដឹកនាំនៅក្នុងផលិតកម្មសាន់ដេ មកលើតារាចម្រៀងយូរី ថានាងជានារីសាវាទៅស្រវាអ្នកថ្មីបន្ទាប់ពីពួកគេបានរួមរស់ជាមួយគ្នាអស់រយៈពេល 4 ឆ្នាំមកហើយនោះ បានធ្វើឱ្យមានការភ្ញាក់ផ្អើលជាខ្លាំងក្នុងបណ្ដាញសង្គម ។

    ខណៈរឿងរ៉ាវទាំងនោះបានចែកចាយក្នុងបណ្ដាញសង្គម ក៏ដូចជាបណ្ដាញសារព័ត៌មានក្នុងស្រុកយ៉ាងគគ្រឹកគគ្រេងនាពេលព្រឹកមិញនេះ រំលងបានមិនយូរប៉ុន្មាន កញ្ញា យូរី ក៏បានCall មកអ្នកយកព័ត៌មានគេហទំព័រឡារ៉ែន Online ដើម្បីធ្វើការបកស្រាយនូវការពិត។

    កញ្ញា យូរី បានទទួលស្គាល់នូវការពិតថា ពួកគេទាំងពីរ(លោករ៉េត និងយូរី)ពិតជាធ្លាប់មានទំនាក់ទំនងស្នេហានឹងគ្នាដូចអ្វីដែលគេបានលើកឡើងនោះមែន ប៉ុន្ដែរហូតមកដល់ពេលនេះ ពួកគេបានបញ្ចប់សម្ព័ន្ធមេត្រីភាពរវាងគ្នារួចហើយ។ នាងបន្ដថា៖”ការពិតខ្ញុំនឹងគាត់បានចប់គ្នាអស់ហើយ វាគ្រាន់តែជារឿងអតីតកាលប៉ុណ្ណោះ ហើយទាក់ទងនឹងរឿងខ្ញុំមានអ្នកថ្មី គឺជារឿងយល់ច្រឡំទេ ហើយខ្ញុំក៏បានដោះស្រាយជាមួយគាត់រួចរាល់អស់ហើយដែរ។

    តារាចម្រៀងរូបនេះបានលើកឡើងថា នាងពុំបានដឹងរឿងដែលអតីតគូស្នេហ៍យល់ច្រឡំមកលើនាងនេះទេ ព្រោះមួយរយៈចុងក្រោយនេះនាងឧស្សាហ៍ចេញទៅច្រៀងតាមបណ្ដាខេត្ដ។ ពិសេសយប់ម្សិលមិញក៏នាងជាប់រវល់ច្រៀងនៅស្រុកដំដែក ខេត្ដសៀមរាប ក៏ពុំបានដឹងរឿងអ្វីដែរ។ គ្រាន់តែនាងងើបឡើងពេលព្រឹក ក៏ស្រាប់តែឃើញរឿងនេះត្រូវបានគេចែកចាយក្នុងបណ្ដាញសង្គមតែម្ដង។

    យូរីបញ្ជាក់ថា ក្រោយពីនាងបានឃើញព័ត៌មាននៅព្រឹកនេះ ក្នុងអំឡុងម៉ោងប្រមាណជា 9ព្រឹក នាងបានCall ទៅដោះស្រាយជាមួយលោករ៉េត នោះរួចហើយ។ ជាលទ្ធផលអ្នកទាំងពីរបានសម្រេចឈប់និយាយអ្វីប៉ះពាល់ពីគ្នាទៅវិញទៅមក នឹងបានកែប្រែពីអ្វីដែលធ្លាប់យល់ច្រឡំមករាប់អានគ្នាដូចមិត្ដធម្មតាវិញ។

    បើទោះជាមានការបង្ហាញរូបភាពស្និទ្ធស្នាលរវាងនាង និងអតីតគូស្នេហ៍ ធ្វើឱ្យមហាជនមានការភ្ញាក់ផ្អើលដែលគេគិតថា អាចប៉ះពាល់ដល់កិត្ដិយសនាងក៏ដោយ ក៏តារារូបនេះនៅតែការពារអតីតគូស្នេហ៍ថា៖ ”ការពិតគាត់ជាមនុស្សល្អទេ តែដោយសារតែការយល់ច្រឡំទើបគាត់ធ្វើបែបនេះ ខ្ញុំក៏ពុំបានខឹងគាត់ដែរ។ ជាមួយគ្នានោះនាងក៏បានសំណូមពរឱ្យបណ្ដាសារព័ត៌មានផ្អាកការសរសេរដោយវិភាគលើកំហុសភាគីម្ខាងៗដើម្បីបញ្ជៀសនូវការយល់ច្រឡំបន្ដទៀត។

    ជាមួយគ្នានេះយូរី បានបកស្រាយថា នាង និងលោកប៊ីម៉ូ មិនមែនជាគូស្នេហ៍នឹងគ្នាទេ នាងគ្រាន់តែជាមិត្ដរួមការងារដែលមហាជនបានស្គាល់ថា ពួកយើងជាដៃគូដ៏ស័ក្តិសមក្នុងបទ”ចាក់ទឹកដូង” និងបទ ”នំប៉័ងប៉ាតេ” ប៉ុណ្ណោះ។

    ជុំវិញការបង្ហោះរូបភាពទាំងនេះត្រូវបានកញ្ញាយូរី បញ្ជាក់ថា ការបង្ហោះរូបភាពនេះនាង គិតថា វាដូចជាមិនចោទ ឬមានបញ្ហាអ្វីឡើយសម្រាប់នាង ព្រោះវារូបភាពបង្ហាញពីក្ដីស្រឡាញ់មិនមែនជារូបភាពអាក្រាតអ្វីនោះទេ។
    ម្យ៉ាងបើទោះជានាងជាតារាចម្រៀងក៏នាងមានសិទ្ធិបុគ្គលក្នុងការមានស្នេហាដែរ។ផ្ទុយទៅវិញនាងទទួលស្គាល់ថាវាក៏អាចជះឥទ្ធិពលមិនល្អសម្រាប់អាជីពរបស់ខ្លួនដែលអាចធ្វើឱ្យប៉ះពាល់ដល់ប្រជាប្រិយភាពនាងខ្លះដែរ ។

    នាងបន្ដថា ចំពោះផលិតកម្មសាន់ដេ យល់យ៉ាងណាចំពោះរឿងដែលកើតឡើងលើនាងនេះ ក៏នាងមិនទាន់អាចធ្វើការបកស្រាយបានដែរ ដោយសារតែក្នុងព្រឹកនេះនាងពុំទាន់បានទំនាក់ទំនងគ្នាជាមួយក្រុមហ៊ុននៅឡើយ៕

     

     

  • យូរី ត្រូវប្ដីមិនស្របច្បាប់បង្ហាញពីការឈឺចាប់ បន្ទាប់ពីនាងស្រវារកអ្នកថ្មី

    យូរី ត្រូវប្ដីមិនស្របច្បាប់បង្ហាញពីការឈឺចាប់ បន្ទាប់ពីនាងស្រវារកអ្នកថ្មី

    អតីតអ្នកដឹកនាំនៅផលិតកម្មសាន់ដេលោក រ៉េត បច្ចុប្បន្នជាអ្នកដឹកនាំនៅផលិតកម្មថោន បានបង្ហាញសារឈឺចាប់មួយ បន្ទាប់ពីលោកបានប្រើជីវិតរួមរស់ជាមួយកញ្ញា យូរី យ៉ាងផ្អែមល្ហែមតាមបែបអនីតិសង្វាស គ្រាដែលលោកបានដឹងថា នាងកំពុងតែស្រវាទៅរកអ្នកថ្មី។

    ក្នុងសារនោះលោក រ៉េត បានសរសេរនៅលើបណ្តាញសង្គម Facebook ថា៖ «អូនអើយ យើងនៅជាមួយគ្នា៤ឆ្នាំហើយ ដូចប្តីប្រពន្ធអ៊ីចឹង អ្វីក៏យើងធ្លាប់ធ្វើជាមួយគ្នាដែរ សុខជាជាមួយគ្នា រំភើបលំបាក និងសប្បាយបែបណាក៏យើងហែលឆ្លងអស់ហើយដែរ។ តើហេតុអ្វី ពេលនេះអូនក្បត់បងកើត តើអូនសប្បាយណាស់មែនទេ ដែលបានក្បត់បង សាហាវយ៉ាងនេះ តើពេលនេះបងត្រូវធ្វើបែបណា តើបងអាចសូមរៀបរាប់រឿងយើងទាំងអស់ឱ្យចេញមកដើម្បីបន្ធូរអារម្មណ៍ឈឺចាប់ពេលនេះបានទេ?»

    បើទោះជាក្នុងសារមួយនេះលោករ៉េតពុំបានបញ្ជាក់ថា កញ្ញា យូរី កំពុងមានទំនាក់ទំនងស្នេហាជាមួយប្រុសណាក៏ដោយ ក៏ប៉ុន្ដែនៅក្នុងបណ្ដាញសង្គមជាច្រើនបានបញ្ជាក់ថា បុរសជាសង្សារថ្មីរបស់នាងយូរី ដែលស្វាមីមិនស្របច្បាប់របស់នាងកំពុងតែលើកឡើងនេះជាតារាចម្រៀងរូបសង្ហាវ័យក្មេងគឺលោកប៊ីម៉ូហ្នឹងឯង។ ទោះជាព័ត៌មាននេះបានក្លាយជាប្រធានបទយ៉ាងក្ដៅគគុកក៏ដោយ ក៏ប៉ុន្ដែគេមិនទាន់បានទទួលចម្លើយពីសាមីខ្លួន គឺកញ្ញាយូរីនៅឡើយទេ។

    ដោយឡែកអ្នកយកព័ត៌មានគេហទំព័រ ឡារ៉ែន Online បាន Call ទៅលេខទូរស័ព្ទរបស់កញ្ញាយូរី តែមានបុរសម្នាក់ជាអ្នកទទួលជំនួសដោយអះអាងថា ជាហ្វ៊ែនរបស់នាង បានមកលេងផ្ទះរបស់នាងទើបមានទូរស័ព្ទរបស់យូរីនៅក្នុងដៃលោក ដោយពេលនោះលោកកំពុងតែនៅជាមួយម្ដាយមីងរបស់កញ្ញា យូរី។ លោកឆ្លើយបញ្ជាក់ថា លោកមិនដឹងច្បាស់ថាកញ្ញា យូរី បានដឹងអំពីព័ត៌មានដែលចុះផ្សាយពីនាងនៅថ្ងៃនេះឬមិនទាន់នោះទេ? ប៉ុន្ដែកន្លងមកលោកពុំដែលបានដឹងថា នាង (យូរី) មានសង្សារទេ។

    គួរបញ្ជាក់ថា កន្លងមកនៅពេលអ្នកសារព័ត៌មានសាកសួរអំពីបញ្ហាស្នេហានាងតែងតែប្រកែកថាគ្មានទំនាក់ទំនងជាមួយបុរសណាម្នាក់ទេ ព្រោះនាងរវល់ជាមួយការងារសិល្បៈស្ទើរតែរកពេលសម្រាកមិនបានផង មានពេលឯណាមកសប្បាយជាមួយរឿងស្នេហា។

    ទោះជាយ៉ាងណាតារាចម្រៀងវ័យក្មេងដែលត្រូវបានលោករ៉េតចោទប្រកាន់ថា ជាសង្សារថ្មីរបស់យូរី គឺលោកប៊ីម៉ូ បានសរសេរសារតាមរយៈហ្វេសប៊ុកបង្ហាញពីអារម្មណ៍ខ្លួនដោយបានលើក ឡើងថា ប្រសិនបើប្រុសម្នាក់នោះជាបុរសល្អ មិនមែននារីម្នាក់នោះគេបោះបង់ចោលទេ ព្រោះរយៈពេល៤ឆ្នាំហើយដែលនាងត្រូវរស់នៅក្រោមគំនាប ការគំរាមកំហែង និងអំពើហិង្សា។ ទោះជាយ៉ាង​ណា​យើងស្វាគមន៍ជានិច្ចនូវការបកស្រាយអំពីសាមីខ្លួន គឺកញ្ញាយូរី៕

  • លោក Wenger យល់ព្រមបន្តកុងត្រារយៈពេល២ឆ្នាំទៀតជាមួយក្លិប Arsenal

    លោក Wenger យល់ព្រមបន្តកុងត្រារយៈពេល២ឆ្នាំទៀតជាមួយក្លិប Arsenal

    លោក Arsene Wenger គ្រូបង្វឹករបស់កាំភ្លើងធំ Arsenal បានយល់ព្រមចុះកុងត្រាថ្មីរយៈពេល២ឆ្នាំទៀត ដើម្បីបន្តរជ្ជកាលរយៈពេល២១ឆ្នាំរបស់លោកក្នុងក្លិបនេះ។ លោក Wenger និងម្ចាស់កម្មសិទ្ធិក្លិបគឺលោក Stan Kroenke បានជួបប្រជុំគ្នាកាលពីថ្ងៃចន្ទ ដើម្បីកំណត់ទៅលើអនាគតរបស់គ្រូបង្វឹកសញ្ជាតិបារាំងរូបនេះ ខណៈដែលការសម្រេចចិត្តផ្សេងៗគឺអាស្រ័យទៅលើប្រធានតំណាងផ្នែកនីមួយៗទាំងស្រុងក្នុងកិច្ចប្រជុំរបស់ក្រុមប្រឹក្សាកាលពីថ្ងៃអង្គារ ម្សិលមិញ។ ក្លិប Arsenal កំពុងតែមានផែនការក្នុងការធ្វើការប្រកាសរឿងនេះជាផ្លូវការនៅថ្ងៃពុធនេះ។

    ក្រុមកាំភ្លើងធំមួយនេះ បានបញ្ចប់ក្នុងចំណាត់ថ្នាក់លេខ៥ នៅលើតារាងនៃក្របខ័ណ្ឌ Premier League នារដូវកាលនេះ ហើយនេះគឺជាការបញ្ចប់ក្រៅចំណាត់ថ្នាក់កំពូលទាំង៤ជាលើកទី១ក្រោមការដឹកនាំរបស់លោក Wenger បើគិតចាប់តាំងពីឆ្នាំ១៩៩៦មក។ ពួកគេបានបញ្ចប់រដូវកាលដោយដេញតាមពីក្រោយក្រុមម្ចាស់ជើងឯក Chelsea រហូតដល់ទៅ១៨ពិន្ទុ ប៉ុន្តែបានផ្តួលក្រុមតោខៀវមួយនេះ ក្នុងលទ្ធផល ២-១ ដើម្បីឈ្នះពាន FA Cup នៅកីឡាដ្ឋាន Wembley កាលពីថ្ងៃសៅរ៍។ កិច្ចសន្យារបស់លោក Wenger នឹងត្រូវផុតកំណត់នៅចុងរដូវកាលនាពេលបច្ចុប្បន្ននេះ។

    លោក Wenger បានដឹកនាំឲ្យក្រុមកាំភ្លើងធំឈ្នះពានក្របខ័ណ្ឌ Premier League ៣លើក និងពាន FA Cup ៣លើកក្នុងរយៈពេល៩រដូវកាលដំបូងរបស់លោកក្នុងនាមជាគ្រូបង្វឹក។ កាលពីរដូវកាលឆ្នាំ២០០៣-២០០៤ លោកបានក្លាយជាអ្នកចាត់ការទូទៅដំបូងគេចាប់តាំងពីរដូវកាលឆ្នាំ១៨៨៨-១៨៨៩ ក្នុងការដឹកនាំឲ្យក្រុមមួយឆ្លងផុតក្របខ័ណ្ឌកំពូលក្នុងរដូវកាលទាំងមូលដោយការមិនស្គាល់ចាញ់សោះ៕

    ប្រភពពី៖ BBC

  • H.I Micro Insurance ចាយទុនរាប់សិបលាន ដើម្បីផ្ដល់សេវារ៉ាប់រងលើដងផ្លូវ

    H.I Micro Insurance ចាយទុនរាប់សិបលាន ដើម្បីផ្ដល់សេវារ៉ាប់រងលើដងផ្លូវ

    ជាគោលដៅគិតគូរចំពោះបញ្ហាអាយុជីវិតប្រជាពលរដ្ឋក្នុងគ្រាជួបគ្រោះថ្នាក់ចរាចរណ៍ ដែលបានកើតឡើងនៅតាមដងផ្លូវដោយចៃដន្យ ក្រុមហ៊ុន អេច.អាយ ម៉ៃក្រូ អិនស៊ូរេន (H.I Micro Insurance) បានប្រើទុនសរុបរង្វង់ 30លានដុល្លារ ដើម្បីផ្ដល់សេវាកម្មធានារ៉ាបរងលើបញ្ហានេះ។

    លោកសារិន រ៉ាត់ណាត់ដាណៃ នាយកនៃក្រុមហ៊ុន H.I Micro Insurance បានបញ្ជាក់ថាវត្ដមានរបស់ក្រុមហ៊ុនH.I Micro Insurance ជាសក្ខីភាពបញ្ជាក់ឱ្យឃើញពីកិច្ចសហការរវាងអ្នកវិនិយោគមកពីប្រទេសកម្ពុជា ថៃ និង អូស្រ្តាលី ដោយផ្ដោតការយកចិត្ដទុកដាក់លើសុវត្ថិភាពតាមដងផ្លូវនៅកម្ពុជាព្រោះបញ្ហាសុវត្ថិភាពចរាចរណ៍នៅតែជាក្តីកង្វល់របស់រាជរដ្ឋាភិបាលកម្ពុជា។

    លោកបន្ដថា RVI ជាសេវាធានារ៉ាប់រងគ្រោះថ្នាក់ចរាចរណ៍ គ្របដណ្តប់លើជនរងគ្រោះនៅក្នុងប្រទេសកម្ពុជា។ ជនរងគ្រោះទាំងអស់នឹងទទួលបានការព្យាបាលភ្លាមៗ និងសេវាហិរញ្ញវត្ថុក្នុងករណីមានគ្រោះថ្នាក់ចរាចរណ៍ដើម្បីធ្វើយ៉ាងណាធានាឱ្យបានការថែរក្សាអាយុជីវិតប្រជាជនកម្ពុជា។

    លោក សារិន រ៉ាត់ណាត់ដាណៃ បានបញ្ជាក់ថា៖”ការសម្រេចចិត្តបង្កើត RVI នេះឡើង គឺដោយសារអត្រាគ្រោះថ្នាក់ចរាចរណ៍នៅកម្ពុជា នៅមានកម្រិតខ្ពស់ ដែលជាមូលហេតុសំខាន់ ធ្វើឲ្យមានអត្រាមនុស្សស្លាប់ និងពិការភាពច្រើន ព្រមទាំងក្លាយជាបន្ទុក ផ្នែកហិរញ្ញវត្ថុដល់ក្រុមគ្រួសារ និងសង្គមជាតិ”។

    គួរបញ្ជាក់ថា សេវាកម្ម RVI មានលក្ខណៈពិសេសមួយ គឺជនរងគ្រោះទាំងសងខាង រួមទាំងអ្នកថ្មើរជើង ឬភាគីពាក់ព័ន្ធក្នុងគ្រោះថ្នាក់ចរាចរណ៍ទាំងអស់ នឹងត្រូវបានបញ្ជូនទៅមន្ទីរពេទ្យ ភ្លាមៗមុនអ្វីទាំងអស់។ ជនរងគ្រោះទាំងអស់ មិនចាំបាច់ចំណាយពេលឈ្លោះប្រកែកគ្នា រកខុសត្រូវឡើយ ពោលគឺខាងក្រុមហ៊ុននេះ នឹងធានារ៉ាប់រង នឹងចេញថ្លៃសំណងលើការព្យាបាល និងហរិញ្ញវត្ថុផ្សេងៗ ដោយទុកការស្វែងរកខុសត្រូវជាបន្ទុករបស់សមត្ថកិច្ចស៊ើបអង្កេតពេលក្រោយ៕

  • LG នឹងបង្ហាញស្មាតហ្វូនថ្មីស្ទើរគ្មានគែម និងថ្មមានថាមពលខ្លាំង

    LG នឹងបង្ហាញស្មាតហ្វូនថ្មីស្ទើរគ្មានគែម និងថ្មមានថាមពលខ្លាំង

    ក្រោយដាក់ចេញនូវទូរស័ព្ទ LG G6 ជាមួយការប្រើប្រាស់នូវបន្ទះឈីប Snapdragon 821 និងជាស្មាតហ្វូនដែលស្ទើរតែគ្មានគែមជាលើកដំបូងហើយនោះ ថ្មីៗនេះមានលេចឮដំណឹងមកថា ក្រុមហ៊ុននឹងត្រៀមបង្ហាញខ្លួនស្មាតហ្វូនថ្មីមួយទៀតដែលមានរាងកាន់តែស្រស់ស្អាត ហើយមានការរចនាផ្ទៃខាងមុខស្ទើរតែគ្មានសល់គែម និងមានថាមពលថ្មធំខ្លាំងរហូតដល់ទៅ 5500 mAh។

    តាមប្រភពដែលបានចុះផ្សាយ បានឱ្យដឹងថា ក្រុមហ៊ុន LG នឹងធ្វើឱ្យអ្នកគាំទ្រមានការភ្ញាក់ផ្អើលជាមួយនឹងស្មាតហ្វូនស៊េរីថ្មី ដែលវានឹងក្លាយជាស្មាតហ្វូនដ៏អស្ចារ្យបំផុតសម្រាប់ឆ្នាំ 2017នេះ និងក៏ជាស្មាតហ្វូនដំបូងរបស់ខ្លួនដែលប្រើបន្ទះឈីប Snapdragon 835។ ទូរស័ព្ទថ្មីនោះ ត្រូវបានគេបង្ហើបឱ្យដឹងថាជា LG V30 ត្រូវបានរចនាឡើងដោយក្រុម DBS Designing ដែលមានរាងលំនាំដូច LG G6 ប៉ុន្តែវាមានទំហំអេក្រង់លាតសន្ធឹងពេញផ្ទៃខាងមុខនៅសល់គែមកាន់តែស្តើងបំផុត ដូចនឹង Galaxy S8 ដែរ។

    ទូរស័ព្ទ V30 នឹងត្រូវបំពាក់ជាមួយនឹងអេក្រង់ទំហំ 5.8 អ៊ីញ ប្រភេទ OLED Display មាន Aspect ratio 18:9 កម្រិតបង្ហាញ QHD ហើយនៅតែរក្សាកូនអេក្រង់តូចមួយនៅផ្នែកខាងលើដដែល។ ក្នុងនោះ វានឹងបំពាក់នូវកាមេរ៉ាភ្លោះ ដោយខាងក្រោយអាចមានទំហំ 13MP ហើយខាងមុខមានទំហំ 8.0MP ហើយមាន Ram ទំហំ 6GB ជាមួយអង្គផ្ទុកទិន្នន័យក្នុងម៉ាស៊ីនស្រាប់ 128GB។ LG V30 នឹងភ្ជាប់មកជាមួយនូវប្រព័ន្ធប្រតិបត្តិការ Android O ជាមួយមុខងារ Daydream និងបច្ចេកវិទ្យាការពារជ្រាបទឹកផងដែរ។ យ៉ាងណាមិញ ព័ត៌មាននេះ នៅមិនទាន់ដឹងថ្ងៃច្បាស់លាស់នៅឡើយទេ ប៉ុន្តែក៏នៅមិនយូរទៀតដែរ៕

  • Huddersfield ឈ្នះកៅអីទៅ Premier League ក្រោយពីផ្តួល Reading ដោយប៉េណាល់ទី

    Huddersfield ឈ្នះកៅអីទៅ Premier League ក្រោយពីផ្តួល Reading ដោយប៉េណាល់ទី

    ក្រុម Huddersfield Town បានឈ្នះសិទ្ធិទៅប្រកួតក្របខ័ណ្ឌ Premier League ក្នុងរដូវកាលដ៏រំភើបមួយ ខណៈដែលគ្រាប់បាល់ប៉េណាល់ទីរបស់កីឡាករ Christopher Schindler បានជួយឲ្យក្រុមរបស់ខ្លួនទទួលជ័យជម្នះដោយការស៊ុតបាល់ប៉េណាល់ទីក្នុងលទ្ធផល ៤-៣ លើក្រុម Reading ក្នុងការប្រកួតក្របខ័ណ្ឌ Championship វគ្គ Playoff ផ្តាច់ព្រ័ត្រ កាលពីថ្ងៃចន្ទ។

    ក្រុមរបស់លោក David Wagner នឹងត្រូវឡើងទៅលេងក្នុងក្របខ័ណ្ឌកំពូលរបស់អង់គ្លេសជាលើកទី១ក្នុងរយៈពេល៤៥ឆ្នាំ ក្រោយពីធ្វើបានយ៉ាងល្អក្នុងពេលស៊ុតបាល់ប៉េណាល់ទីកាត់សេចក្តី បន្ទាប់ពីការប្រកួតបានបញ្ចប់ក្នុងលទ្ធផលស្មើ ០-០ នៅកីឡដ្ឋាន Wembley។ ការឈ្នះសិទ្ធិទៅលេងក្នុងក្របខ័ណ្ឌ Premier League របស់ក្រុម Huddersfield នឹងធ្វើឲ្យពួកគេទទួលបានចំណូលយ៉ាងហោចណាស់១៧០លានផោន (ស្មើនឹង២១៨លានដុល្លារអាមេរិក) ហើយតួលេខនេះអាចនឹងកើនឡើងរហូតដល់ទៅ២៩០លានផោន ប្រសិនបើក្លិបនេះគេចផុតពីការធ្លាក់ចេញនៅរដូវកាលបន្ទាប់។ លោក Wagner បានឲ្យដឹងថា៖ «ខ្ញុំពិតជារីករាយណាស់ និងពិតជាមានមោទនភាពចំពោះកីឡាកររបស់ខ្ញុំ ក៏ដូចជាគ្រប់គ្នាក្នុងក្លិបនេះខ្លាំងណាស់។ កីឡាកររបស់យើងបានធ្វើយ៉ាងល្អឥតខ្ចោះ អំឡុងពេលនៃការប្រកួតវគ្គ Playoff នេះ»។

    លោក Wagner ដែលបានដឹកនាំឲ្យក្រុម Huddersfield បញ្ចប់ក្នុងចំណាត់ថ្នាក់លេខ៥ក្នុងរដូវកាលឆ្នាំ២០១៦-២០១៧ មានអារម្មណ៍ថា ការឈានទៅប្រកួតក្នុងក្របខ័ណ្ឌ Premier League របស់ក្លិបនេះ អាចជាសមិទ្ធផលដ៏អស្ចារ្យបំផុតមួយរបស់ក្រុមរបស់ខ្លួន៕

    ប្រភពពី៖ Reuters

  • ដាំស្លឹកបាស លើផ្ទៃដីតែ 10អា អាចបេះលក់ មួយថ្ងៃបានពី 20-50ដុល្លារ

    ដាំស្លឹកបាស លើផ្ទៃដីតែ 10អា អាចបេះលក់ មួយថ្ងៃបានពី 20-50ដុល្លារ

    ស្លឹកបាសជាប្រភេទវល្លិ៍បន្លែម្យ៉ាងដែលភាគច្រើនដុះដោយខ្លួនឯងនៅតាមរបងផ្ទះ ឬដុះតោងនៅតាមដើមឈើផ្សេងៗដោយមិនចាំបាច់មានអ្នកថែទាំវាឡើយ គ្រាន់តែរដូវវស្សាមកដល់មានភ្លៀងធ្លាក់ វានឹងដុះលូតលាស់បានល្អអាចបេះស្លឹកខ្ចីៗ ស្រស់ៗមកស្លធ្វើជាម្ហូបអាហារមានរសជាតិឈ្ងុយឆ្ងាញ់ទៀតផង។

    ដោយមើលឃើញភាពងាយស្រួលដាំដុះ និងងាយស្រួលថែទាំបែបនេះ កសិករនៅតាមតំបន់ជាយក្រុងមួយចំនួនដែលមានដីធំៗនៅជាប់ក្នុងភូមិ ឬនៅខាងក្រោយភូមិបានចាប់ផ្តើមបោះបង់ការងារដែលកំពុងធ្វើទៅឱ្យដទៃសិន រួចងាកមកចាប់របរដាំស្លឹកបាសលក់វិញម្តង ព្រោះអាចរកប្រាក់បានច្រើនគួរសម និងសល់ពេលទំនេរច្រើនសម្រាប់ជួបជុំគ្រួសារមើលថែទាំកូនចៅទៀតផង។

    កសិករ កែវ ស្រីលៀង  ភេទស្រី អាយុ3០ឆ្នាំ រស់នៅភូមិកោះគ ឃុំរកាខ្ពស់ ស្រុកស្អាង ខេត្តកណ្តាល ដែលបានចាប់របរដាំដំណាំស្លឹកបាសនេះ ប្រមាណជាង 7ឆ្នាំមកហើយ ក្រោយពីធ្លាប់បម្រើការងារនៅក្នុងរោងចក្រកាត់ដេរហើយ តែមិនសល់ប្រាក់កាសបម្រុងទុកក្នុងគ្រួសារសោះ ហើយជួនកាលចាយមិនដល់ខែទៀតផង។

    អ្នកស្រីបានឱ្យដឹងថា គាត់បានដាំដំណាំស្លឹកបាសនេះលើដីទំហំទទឹង10ម៉ែត្រ និងបណ្តោយ100ម៉ែត្រស្មើនឹង 10អា ដែលជាមធ្យមអាចផ្តល់ឱ្យគាត់នូវប្រាក់ចំណូលចន្លោះពី8ម៉ឺនរៀលក្នុង1ថ្ងៃឡើង ដោយថ្ងៃខ្លះពេលណាម៉ូយបញ្ជាទិញច្រើន ចំណូលអាចឡើងដល់ទៅ20ម៉ឺនរៀលក៏មានដែរ។ អ្នកស្រីបញ្ជាក់ថា ស្លឹកបាសចំនួន10ដុំតូចៗ លក់បោះដុំឱ្យម៉ូយបានតម្លៃ 2000ទៅ2200រៀល ហើយម៉ូយមកទទួលទិញដល់ផ្ទះតែម្តង មិនចាំបាច់លំបាកដឹកយកទៅលក់នៅផ្សារខ្លួនឯងនោះទេ។

    កសិករបានឱ្យដឹងថាវិធីសាស្រ្តនៃការដាំដុះមិនលំបាកនោះទេ មុននឹងដាំគឺត្រូវភ្ជួររាស់ដី ហាលទុកចោលរយៈពេល1អាទិត្យជាមុន ទើបឆូតលើកជារង និងយកគ្រាប់បាសមកសាប ហើយស្រោចទឹក។ បន្ទាប់ពីកូនដើមស្លឹកបាសដុះ យើងយកដើមឬស្សីតូចៗមកដោតខ្វែងហើយចងខ្សែតាមបណ្តោយរង ដើម្បីឱ្យវល្លិ៍ស្លឹកបាសតោងវារឡើង ដោយក្នុង1ថ្ងៃត្រូវស្រោចទឹកចំនួន3ដង ហើយក្រោយពីពេលដាំរហូតដល់ពេលបេះស្លឹកបាន ត្រូវប្រើរយៈពេលពី1ខែ10ថ្ងៃ ទៅ1ខែកន្លះ។ លុះកាត់រួចម្តង 20ថ្ងៃក្រោយទើបអាចកាត់បានម្តងទៀត។ ក្រៅពីនោះដើម្បីការពារស្លឹកកុំឱ្យកើតមានជំងឺក្រាស៊ី ក្នុង1ខែគេត្រូវបាញ់ថ្នាំម្តងដែរ រហូតដល់20ថ្ងៃក្រោយពីការបាញ់ថ្នាំទើបគេកាត់ស្លឹកបាសលក់ទៀត។ ស្លឹកបាសចាប់តាំងពីដាំរហូតដល់គេរើដកចោលដាំថ្មី គឺស្ថិតចន្លោះពី2ឆ្នាំ ទៅ3ឆ្នាំ បន្ទាប់ពីបង្គោលទ្រើងពុក និងដើមរបស់វាចាស់ពេក។

    ឈ្មួញកណ្តាលម្នាក់ឈ្មោះអ្នកស្រី សុខ ហេង បានឱ្យដឹងដែរថា គាត់បានចាប់របររកស៊ីទិញស្លឹកបាសនេះជាង5ឆ្នាំមកហើយ ហើយយកទៅលក់បោះដុំឱ្យម៉ូយនៅផ្សារនាគមាស រាជធានីភ្នំពេញ ក្នុងនោះគាត់ទិញចូល 1ដុំធំស្មើនឹង10ដុំតូចៗក្នុងតម្លៃ2000 ទៅ2200រៀល យកទៅលក់ចេញបាន2500រៀលក្នុងមួយដុំធំ ចំណែកឯតម្រូវការរបស់ទីផ្សារវិញនោះគឺគ្មានអ្វីចោទនោះទេ មានប៉ុន្មានគេយកទាំងអស់៕