Category: សង្គម និងសេដ្ឋកិច្ច

ក្លាយជាមនុស្សដែលមានភាពចាស់ទុំគឺជាឥរិយាបថមួយដែលយុវជនគ្រប់រូបចង់ធ្វើ តែពេលខ្លះការគ្រប់គ្រងខ្លួនឯងពីស្ថានភាពមួយ ដែលពោរពេញទៅដោយការប្រែប្រួលទាំងចិត្តគំនិត រាងកាយ និងបរិស្ថានជុំវិញខ្លួន ជារឿងពិបាកមួយសម្រាប់ពួកគេ។

វិធីសាស្រ្តដើម្បីក្លាយជាមនុស្សចាស់ទុំ មិនពិបាកពេកនោះទេគ្រាន់តែមនុស្សមួយចំនួនមិនបានដឹងតែប៉ុណ្ណោះ។

ខាងក្រោមនេះជាលក្ខណៈមួយចំនួនដែលសម្គាល់ថា យុវជនរូបនោះជាមនុស្សចាស់ទុំ៖
១. មានគំនិតស៊ីជម្រៅ និងមិនឆេវឆាវ
នៅពេលដែលមនុស្សណាម្នាក់ បានឆ្លងកាត់ការអប់រំ រួមទាំងបទពិសោធជីវិតច្រើនគេនឹងក្លាយជាមនុស្សម្នាក់ដែលមានការគិតស៊ីជម្រៅ មិនមែនធ្វើអ្វីមួយតាមការនឹកឃើញ ឬឆាប់ខឹង និងឆាប់ជឿតាមការអូសទាញណាមួយនោះទេ។ ម្យ៉ាងវិញទៀត នៅពេលដែលពួកគេមានភាពចាស់ទុំ គេក៏នឹងអាចបង្កើតគំនិតថ្មីៗ រួមទាំងមានភាពច្នៃប្រឌិតក្នុងការដោះស្រាយបញ្ហានានាប្រកបដោយហេតុផល រួមទាំងគំនិតដែលមនុស្សចាស់មួយចំនួនមិនអាចធ្វើបានថែមទៀតផង។

២. មានស្មារតីរឹងប៉ឹង និងមានឯករាជ្យភាព
យុវជនភាគច្រើនចង់បានឯករាជ្យភាព តែអាណាព្យាបាលព្យាយាមមិនផ្តល់ឱកាសដល់ពួកគេ។ កត្តាមួយចំនួនដែលអាណាព្យាបាលមិនសូវផ្តល់ភាពឯករាជ្យឱ្យពួកគេគឺ មកពីម្តាយឪពុកមើលឃើញពីភាពឡេះឡោះ និងភាពទន់ជ្រាយនៅក្នុងគំនិត ដែលកូនៗស្តែងចេញមកតាមរយៈការនិយាយស្តី និងសកម្មភាព។ ហេតុនេះមនុស្សដែលមានភាពចាស់ទុំ ភាគច្រើនជាអ្នកដែលស្ងប់ស្ងាត់ រីករាយ និងមានការគិតផ្ទាល់ខ្លួនបានយ៉ាងច្បាស់លាស់។ នៅពេលដែលយុវជនណាម្នាក់មានគោលជំហរច្បាស់លាស់នៅក្នុងការគិត ពួកគេនឹងអាចក្លាយជាអ្នកដែលអាណាព្យាបាលទុកចិត្ត ហើយបង្កើតបាននូវចន្លោះឯករាជ្យភាពសម្រាប់ខ្លួនឯងប្រកបដោយភាពរឹងមាំ។

៣. មានឆន្ទៈក្នុងការកំណត់លើវាសនាខ្លួនឯង
អាណាព្យាបាលតែងតែខ្វល់ខ្វាយច្រើនពីការកំណត់លើវាសនារបស់កូនៗ តែគាត់ប្រហែលជាមិនពិបាកសម្រេចចិត្តពេកទេ នៅពេលដែលកូនៗរបស់គាត់ជាមនុស្សដែលមានឆន្ទៈខ្ពស់ក្នុងការសម្រេចគោលដៅជីវិតរបស់គេ។ មនុស្សដែលមានភាពចាស់ទុំ ភាគច្រើនជាអ្នកដែលហ៊ានបង្ហាញពីគោលដៅជីវិត និងបំណងប្រាថ្នារបស់ខ្លួនដល់អាណាព្យាបាល ព្រមទាំងមានវិធីធ្វើវាឱ្យជោគជ័យថែមទៀតផង៕

ភ្នំពេញៈ ប្រាក់ចំណូលប្រចាំឆ្នាំសម្រាប់ប្រជាពលរដ្ឋខ្មែរ នឹងកើនដល់ ១៩០០ដុល្លារសម្រាប់មនុស្សម្នាក់នៅឆ្នាំ២០២០ខាងមុខ។ នេះបើយោងតាមការព្យាកររបស់ក្រសួងសេដ្ឋកិច្ច និងហិរញ្ញវត្ថុ។

យោងតាមរបាយការណ៍របស់ក្រសួងសេដ្ឋកិច្ច ដែលបានចេញផ្សាយកាលពីពេលថ្មីៗនេះបានបង្ហាញថា ប្រាក់ចំណូលប្រជាពលរដ្ឋខ្មែរនៅឆ្នាំ២០១៦ មានចំនួន ១៣០២ដុល្លារ នឹងកើនឡើងដល់ ១៩០០ដុល្លារសម្រាប់មនុស្សម្នាក់នៅឆ្នាំ ២០២០ខាងមុខ។ របាយការណ៍នេះក៏បានចង្អុលបង្ហាញដែរថា កម្ពុជានឹងសម្រេចគោលដៅក្នុងការក្លាយជាប្រទេសមានប្រាក់ចំណូលមធ្យមលំដាប់ខ្ពស់នៅឆ្នាំ ២០៣០ និងក្លាយជាប្រទេសមានប្រាក់ចំណូលខ្ពស់នៅឆ្នាំ ២០៥០ខាងមុខ។

ប្រទេសដែលមានប្រាក់ចំណូលមធ្យមកម្រិតខ្ពស់ គឺសំដៅដល់ប្រជាពលរដ្ឋម្នាក់មានប្រាក់ចំណូលចាប់ពី ៤៨០០ដុល្លារ ដល់ជាង ១២០០០ដុល្លារក្នុងមួយឆ្នាំសម្រាប់មនុស្សម្នាក់ នេះបើយោងតាមការកំណត់របស់ធនាគារពិភពលោក។

សេដ្ឋវិទូកម្ពុជាលោកបណ្ឌិត ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិបានថ្លែងថា អ្វីដែលជាការព្យាកររបស់ក្រសួងសេដ្ឋកិច្ច និងហិរញ្ញវត្ថុនេះ មានលក្ខណៈវិទ្យាសាស្រ្ត និងអាចទុកចិត្តបាន ព្រោះលោកជាអ្នកជ្រើសរើសអ្នកជំនាញទាំងនោះដោយផ្ទាល់។ ពួកគេពិតជាពូកែ និងមានទេពកោសល្យ។

លោកបន្តថា “ខ្ញុំជឿថា ការព្យាករនេះផ្អែកលើវិទ្យាសាស្រ្តមិនមែនផ្អែកលើនយោបាយនោះទេ”។ លោកបណ្ឌិត ម៉ី កល្យាណ បានបន្តថា ផ្អែកលើកំណើនសេដ្ឋកិច្ចរបស់កម្ពុជា ការរក្សាបាននូវស្ថិរភាពសង្គម នយោបាយ និងលំនឹងម៉ាក្រូសេដ្ឋកិច្ច ព្រមទាំងលំហូរទុនវិនិយោគដោយផ្ទាល់ពីបរទេសកាន់តែច្រើន ព្រមទាំងគោលនយោបាយអភិវឌ្ឍន៍វិស័យឧស្សាហកម្មសម្រាប់ឆ្នាំ២០១៥ ២០២៥ នឹងធ្វើឲ្យកម្ពុជាសម្រេចបានតាមគោលដៅរបស់ខ្លួន៕

ជារៀងរាល់ឆ្នាំចាប់ពីខែឧសភារហូតដល់ខែកក្កដា កសិករដែលដាំធុរេនមានការរីករាយសប្បាយចិត្តណាស់ ក្នុងការប្រមូលផលធុរេនយកមកលក់នៅលើទីផ្សារ ប៉ុន្តែអតិថិជននៅតាមទីប្រជុំជនវិញ មានការលំបាកខ្លាំងក្នុងការរកទិញធុរេនធម្មជាតិរបស់ខ្មែរយកមកពិសា ដូច្នេះដើម្បីឱ្យបានដឹងច្បាស់យើងនាំគ្នាមកមើលពីវិធីសាស្រ្តងាយៗ ក្នុងការពិនិត្យមើលថា តើណាមួយជាធុរេនធម្មជាតិក្នុងស្រុក ឬធុរេននាំចូលពីក្រៅស្រុកដូចជាប្រទេសថៃ ឬវៀតណាមជាដើម?

លោក ស្រ៊ន គឹមស្រេង អាជីវករលក់ធុរេនធម្មជាតិ តាមបណ្តាញសង្គមហ្វេសប៊ុក មានប្រសាសន៍ថា ធុរេនធម្មជាតិរបស់ខ្មែរមានលក្ខណៈខុសពីធុរេននាំចូលពីប្រទេសថៃ និងប្រទេសវៀតណាម ធុរេនរបស់ខ្មែរមានសម្បករាងក្រាស់បន្តិច ពេលពុះរួចចូរ ពិនិត្យទៅលើគែមសម្បកខាងក្រៅ នឹងឃើញមានពណ៌ខៀវស្រស់ ចំណែកទងរបស់វាមានថ្នាំងពីរកង់ ហើយពេលដែលវាទុំខ្លាំង ថ្នាំងទី1 នឹងជ្រុះបាត់នៅសល់តែថ្នាំងទី2 ប៉ុណ្ណោះ នោះគឺអាចសម្គាល់ថា ជាធុរេនខ្មែរដែលទុំអាចពិសាបានហើយ។

លោកបន្តថា សម្រាប់ធុរេននាំចូលពីប្រទេសថៃវិញនៅលើទងមានថ្នាំងខ្លះដែរ តែភាគច្រើនមានថ្នាំងតែ 1 ប៉ុណ្ណោះ ចំណែកសម្បកវារាងស្តើង ពេលដែលពុះរួចពិនិត្យទៅលើគែមសម្បកខាងក្រៅនោះមានពណ៌លឿងថ្លា មិនខៀវស្រស់ដូចធុរេនខ្មែរនោះទេ។ ចំណែកធុរេនវៀតណាម ក៏មានលក្ខណៈស្រដៀងគ្នានឹងធុរេននាំចូលពីប្រទេសថៃដែរ តែភាគច្រើននៅលើទងមិនមានថ្នាំងនោះទេ។

គួរបញ្ជាក់ថា លោក គឹម ស្រេង នាំចូលធុរេនពីភូមិបែកអន្លង់ និងស្រែវាល ស្រុកចំការលើ ខេត្តកំពង់ចាម ចែកចាយនៅលើទីផ្សារតាមបណ្តាញសង្គមហ្វេសប៊ុកក្នុងក្រុងភ្នំពេញ។ លោកថា ឆ្នាំនេះធុរេនរាងយឺតខែបន្តិចមិនទាន់សម្បូរខ្លាំងនៅឡើយ ហើយជួនកាលទុំមិនទាន់ម៉ូយកុម្ម៉ង់ទៀតផង ដោយលក់ក្នុងមួយគីឡូក្រាមតម្លៃ 23000រៀល។ យ៉ាងណាក៍ដោយ នៅពេលធុរេនផ្តល់ផលច្រើនប្រហែលជាកន្លះខែទៀតនេះ លោកនឹងដាក់លក់នៅស្តង់កែងស្តុបបូកគោត្រង់ហ្ការ៉ាស់ឡានហាក់ស្រ៊ុន ក្នុងក្រុងភ្នំពេញ៕