សង្គម និងសេដ្ឋកិច្ច - La Reine Media

Sialkot គឺជាប្រភពផលិត និងផ្គត់ផ្គង់បាល់ទាត់ដ៏ធំរបស់ពិភពលោក

ទីក្រុងភាគឦសានរបស់ ប៉ាគីស្ថាន រួមចំណែក 70% ក្នុងប្រភពផ្គត់ផ្គង់បាល់ទាត់នៅលើពិភពលោក បូករួមទាំងបាល់ទាត់ Al Rihla នៅ World Cup 2022។

រាប់ទាំងវគ្គផ្ដាច់ព្រ័ត្រនៅ World Cup 2022 នេះ FIFA បានប្រើប្រាស់បាល់ Al Rihla និង Al Hilm ដែលផ្គត់ផ្គង់ដោយក្រុមហ៊ុន Adidas យ៉ាងតិច 300,000 គ្រាប់។ ការផលិតបាល់ប្រភេទនេះត្រូវបាន Adidas ប្រគល់ឱ្យក្រុមហ៊ុនចិន និងក្រុមហ៊ុនប៉ាគីស្ថាន Forward Sport ដោយមានរោងចក្រធំជាងគេនៅ Sialkot ប្រទេសប៉ាគីស្ថាន។

តំណាងរបស់រោងចក្រខាងលើបានឱ្យដឹងថា ពួកគេរួមចំណែក 33% នៃបរិមាណសរុបរបស់បាល់ Al Rihla។ នេះគឺជារដូវកាលទីបីបន្តបន្ទាប់ដែល Forward Sports បាន និងកំពុងផ្គត់ផ្គង់បាល់សម្រាប់ World Cup។ World Cup រុស្ស៊ី 2018 Forward Sports បានផ្គត់ផ្គង់បាល់ដែលមានឈ្មោះថា Telstar 18 ចំណែក World Cup ប្រេស៊ីល 2014 រោងចក្រនេះផ្គត់ផ្គង់បាល់ឈ្មោះ Brazuca។ World Cup 2022 ក្រុមហ៊ុន Forward Sports បានផលិតបាល់ Al Rihla ដោយប្រើបច្ចេកវិទ្យាដែលពួកគេបានអភិវឌ្ឍតាំងពីឆ្នាំ 2007។

ក៏ប៉ុន្តែ បើគិតជារួម Forward Sports គ្រាន់តែជាផ្នែកមួយប៉ុណ្ណោះនៅក្នុងភាពល្បីល្បាញរបស់ទីក្រុង Sialkot ក្នុងវិស័យផលិតឧបករណ៍កីឡាអន្តរជាតិ។ ក្នុងវិស័យបាល់ទាត់ ទីក្រុងនេះមានរោងចក្រប្រហែល 1,000 ដែលមានកម្មករធ្វើការសរុបប្រហែល 60,000 នាក់ (ស្មើនឹង 8% នៃចំនួនប្រជាជនសរុបរបស់ទីក្រុងនេះ)។

ដោយមានហេដ្ឋារចនាសម្ព័ន្ធ និងធនធានមនុស្សនេះ Sialkot ត្រូវបានគេប្រដូចទៅនឹងរោងចក្រផលិតបាល់ទាត់ដែលដេរដោយដៃធំបំផុតលើពិភពលោក ដោយរួមចំណែក 70% នៃប្រភពផ្គត់ផ្គង់ និង 80% នៃបរិមាណបាល់ទាត់ដែលដេរដោយដៃ។

យោងតាម Bloomberg Businessweek បាល់ដែលដេរដោយដៃមានភាពមាំមួនជាងបាល់ដែលដេរដោយម៉ាស៊ីន។ បាល់ស្ទើរតែទាំងអស់នៅ Sialkot ត្រូវបានផលិតពីស្បែកចម្រុះ (cotton, polyester និង polyurethane)។ វត្ថុធាតុដើមសម្រាប់ផលិតបាល់នេះត្រូវបាននាំចូលពីច្រើនប្រទេស។ បាល់តម្លៃទាបបំផុតគឺប្រើប្រាស់វត្ថុធាតុយកមកពី ប្រទេសចិន។ ចំណែកបាល់គុណភាពខ្ពស់ជាងនេះគឺប្រើប្រាស់វត្ថុធាតុរបស់ កូរ៉េខាងត្បូង។ ដោយឡែក បាល់សម្រាប់ទាត់នៅ អឺរ៉ុប គឺត្រូវប្រើវត្ថុធាតុរបស់ ជប៉ុន៕

December 16, 2022

កម្ពុជាលក់លេខរថយន្តពិសេស និងពិសេសផ្ទាល់ខ្លួនសរុបបានជាង 343 ពាន់លានរៀល

គិតមកដល់ខែវិច្ឆិកា 2022 ការលក់ស្លាកលេខចុះបញ្ជីរថយន្តរកបានចំណូលសរុបបានជាង 343 ពាន់លានរៀល នេះបើតាម របាយការណ៍របស់គណៈកម្មការអន្តរក្រសួង ដែលគ្រប់គ្រងការលក់លេខចុះបញ្ជីរថយន្ត។

តួលេខខាងលើត្រូវបានប្រកាសកាលពីថ្ងៃទី 15 ធ្នូ 2022 នៅក្នុងកិច្ចប្រជុំពិភាក្សាប្រចាំខែវិច្ឆិកា 2022 ស្តីពីវឌ្ឍនភាពនៃការលក់លេខចុះបញ្ជីយានយន្តរបស់ គណៈកម្មការអន្តរក្រសួង ដែលប្រព្រឹត្តទៅនៅទីស្ដីការក្រសួងសាធារណការ ក្រោមអធិបតីភាពលោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន។

របាយការណ៍របស់គណៈកម្មការអន្តរក្រសួង បានឱ្យដឹងថា គិតមកដល់ខែវិច្ឆិកា 2022 ការលក់ស្លាកលេខចុះបញ្ជីរថយន្តសម្រេចបានសរុបប្រមាណជាង 231 ពាន់លេខ រកបានចំណូលសរុបជាង 343 ពាន់លានរៀល ( 85 លានដុល្លារអាមេរិក) ក្នុងនោះ លេខពិសេសលក់បានជាង 215 ពាន់លេខ រកបានចំណូលជាង 231 ពាន់លានរៀល (57 លានដុល្លារអាម៉េរិក) និងលេខពិសេសផ្ទាល់ខ្លួនលក់បានជាង 15 ពាន់លេខ រកបានចំណូលជាង 112 ពាន់លានរៀល (28 លានដុល្លារអាមេរិក)។

ដោយឡែក ចាប់ពីខែមករា ដល់ខែវិច្ឆិកា 2022 គណៈកម្មការអន្តរក្រសួងខាងលើ រកបានចំណូលពីការលក់លេខចុះបញ្ជីពិសេស និងលេខចុះបញ្ជីពិសេសផ្ទាល់ខ្លួនសរុបជាង 78 ពាន់លានរៀល (19 លានដុល្លារអាមេរិក) កើនឡើងប្រមាណ 27% ធៀបនឹងរយៈពេលដូចគ្នាក្នុងឆ្នាំកន្លង៕

លោកជំទាវរដ្ឋលេខាធិការ ក៏បានបញ្ជាក់ថា ចំណូលមួយផ្នែកដែលបានមកពីកម្មវិធីពិព័រណ៍ការលក់លេខចុះបញ្ជីលេខពិសេសផ្ទាល់ខ្លួននាពេលខាងមុខ នឹងត្រូវយកទៅរួមចំណែកជួយដល់មន្ទីរពេទ្យគន្ធបុប្ផា៕

December 16, 2022

ប្រទេសថៃអាចបង្កើនការនាំចូលបង្គាដើម្បីឆ្លើយតបនឹងតម្រូវការក្នុងស្រុក

ជាប្រទេសមួយក្នុងចំណោមប្រទេសដែលនាំចេញបង្គាច្រើនជាងគេ ប៉ុន្តែបច្ចុប្បន្ន បរិមាណបង្គារបស់ ប្រទេសថៃ កំពុងថយចុះខ្លាំងដោយសារជំងឺ ដូច្នេះហើយប្រទេសនេះកំពុងតែ «គាំទ្រ» ដល់បង្គាដែលនាំចូលពីបរទេសដើម្បីផ្គត់ផ្គង់តាមតម្រូវការទីផ្សារក្នុងស្រុក។

បរិមាណបង្គារបស់ ប្រទេសថៃ កំពុងស្ថិតក្នុងដំណាក់កាលថយចុះពាក់កណ្ដាល បើធៀបនឹងបរិមាណខ្ពស់បំផុតក្នុងឆ្នាំនេះ នៅពេលជំងឺបានបង្កការខាតបង់ដល់កសិដ្ឋាននានារបស់ប្រទេសនេះ ធ្វើឱ្យមានសម្ពាធដល់រដ្ឋាភិបាលក្នុងការធានាប្រភពផ្គត់ផ្គង់សម្រាប់អ្នកប្រើប្រាស់ក្នុងប្រទេស និងការជួយដល់ប្រជាកសិករដែលចិញ្ចឹមបង្គាជាលក្ខណៈគ្រួសារ។

បង្គាគឺជាទំនិញសំខាន់ខ្លាំងសម្រាប់ជីវភាពរស់នៅរបស់ប្រជាជនថៃ ដោយសារវាមិនត្រឹមតែជាគ្រឿងផ្សំចម្បងសម្រាប់មុខម្ហូបក្នុងស្រុកដូចជាតុមយ៉ាំ (Tom Yum) ជាដើមនោះទេ ប៉ុន្តែ បង្គាក៏ជាកម្លាំងជំរុញសេដ្ឋកិច្ចរបស់ប្រទេសនេះផងដែរ។

វិស័យចិញ្ចឹមបង្គានៅ ប្រទេសថៃ បានរងផលប៉ះពាល់ធ្ងន់ធ្ងរដោយសារជំងឺមួយចំនួនដូចជា ជំងឺបង្គាឆាប់ងាប់ (EMS – Early Mortality Syndrome) ជាដើម អស់រយៈពេលជាង 10 ឆ្នាំមកហើយ។ បរិមាណបង្គារបស់ប្រទេសនេះគ្រោងនឹងសម្រេចបានតែ 270,000 តោនក្នុងឆ្នាំ 2022 ថយចុះច្រើនធៀបនឹងជាង 600,000 តោនកាលពីឆ្នាំ 2021។

គិតត្រឹមឆ្នាំ 2012 ប្រទេសថៃគឺជាអ្នកនាំចេញបង្គាលំដាប់កំពូលរបស់ពិភពលោក ប៉ុន្តែបានធ្លាក់មកនៅក្រោម ឥណ្ឌា និង អេក្វាទ័រ ចាប់ពីឆ្នាំ 2016។

កាលពីខែសីហា 2022 រដ្ឋាភិបាលប្រទេសថៃ បានសម្រេចឱ្យនាំចូលបង្គាប្រហែល 10,000 តោនពី ប្រទេសអេក្វាទ័រ និង ឥណ្ឌា ដើម្បីទប់ទល់នឹងស្ថានភាពខ្វះប្រភពផ្គត់ផ្គង់ក្នុងស្រុក។ ទន្ទឹមនឹងនេះ អាជ្ញាធរថៃ ក៏បានកំណត់គោលដៅផលិតបង្គាឱ្យបាន 400,000 តោនជារៀងរាល់ឆ្នាំ គិតចាប់ពីឆ្នាំក្រោយ៕

December 16, 2022

ការនាំចេញ-នាំចូលទំនិញរបស់វៀតណាម ឡើងដល់ 700 ពាន់លានដុល្លារអាម៉េរិក

យោងតាមទិន្ន័យពី អគ្គនាយកដ្ឋានគយវៀតណាម គិតត្រឹមថ្ងៃទី 14 ធ្នូ 2022 ការនាំចេញ-នាំចូលទំនិញរបស់ប្រទេសនេះ បានកើនឡើងដល់ 698.5 ពាន់លានដុល្លារអាម៉េរិក ហើយដល់ថ្ងៃទី 15 ធ្នូ បានឡើងដល់ខ្ទង់ 700 ពាន់លានដុល្លារ។

តម្លៃសរុបនៃការនាំចេញ-នាំចូលទំនិញនៅទូទាំងប្រទេសនេះ ក្នុងរយៈពេល 11 ខែដំបូងនៃឆ្នាំ 2022 សម្រេចបាន 673.7 ពាន់លានដុល្លារ ដោយកើន 11.8% (ស្មើនឹងកំណើន 70.92 ពាន់លានដុល្លារ) ធៀបនឹងអំឡុងពេលដូចគ្នាក្នុងឆ្នាំ 2021។ ក្នុងនោះ ការនាំចេញរបស់ប្រទេសនេះសម្រេចបាន 342.19 ពាន់លានដុល្លារ និងការនាំចូលសម្រេចបាន 331.51 ពាន់លានដុល្លារ។

លទ្ធផលខាងលើនេះបង្ហាញថា តុល្យភាពពាណិជ្ជកម្មរបស់ វៀតណាម មានអតិរេករហូតដល់ 10.68 ពាន់លានដុល្លារ ខ្ពស់ជាងឆ្ងាយបើធៀបនឹង 4 ពាន់លានដុល្លារពេញមួយឆ្នាំ 2021។

ក្នុងប៉ុន្មានឆ្នាំចុងក្រោយនេះ សហរដ្ឋអាម៉េរិក គឺជាទីផ្សារនាំចេញធំបំផុត ហើយ ប្រទេសចិន គឺជាទីផ្សារនាំចូលធំបំផុតរបស់ វៀតណាម។ គិតចាប់ពីដើមឆ្នាំមកដល់ដំណាច់ខែវិច្ឆិកា 2022 ការនាំចេញទំនិញទៅកាន់ទីផ្សារអាម៉េរិក សម្រេចបាន 101 ពាន់លានដុល្លារ កើន 17.7% (ស្មើនឹង 15.2 ពាន់លានដុល្លារ) ធៀបនឹងដំណាក់កាលដូចគ្នាកាលពីឆ្នាំកន្លង។

ចំណែកការនាំចូលទំនិញពីប្រទេសចិនវិញ សម្រេចបាន 109.46 ពាន់លានដុល្លារ កើន 10% (ស្មើនឹង 9.93 ពាន់លានដុល្លារ)។ ដូច្នេះ ការនាំចេញទំនិញទៅកាន់ សហរដ្ឋអាម៉េរិក និងនាំចូលទំនិញពី ប្រទេសចិន ក្នុង 11 ខែកន្លងក្នុងឆ្នាំ 2022 សុទ្ធតែលើសពី 100 ពាន់លានដុល្លារ ដែលនេះគឺជាកំណត់ត្រាថ្មីមិនធ្លាប់មានពីមុនមកសម្រាប់ វៀតណាម៕

December 16, 2022

(World Cup 2022)- Benzema បដិសេធការចូលរួមប្រកួតវគ្គផ្ដាច់ព្រ័ត្រ

បើទោះជាត្រូវបានសហព័ន្ធបាល់ទាត់បារាំង (FFF) អញ្ជើញ ប៉ុន្តែ ខ្សែប្រយុទ្ធ Karim Benzema នៅតែបដិសេធការត្រលប់ទៅកាន់ កាតា ដើម្បីចូលរួមប្រកួតទល់នឹង អាហ្សង់ទីន។

របួសរបស់ Benzema បានជាសះស្បើយ និងត្រលប់ទៅហ្វឹកហាត់ជាមួយ Real ចាប់តាំងពីចុងសប្ដាហ៍កន្លង។ យោងតាមទំព័រ Mundo Deportivo (អេស្ប៉ាញ) FFF បានពិចារណាដល់លទ្ធភាពនាំយកខ្សែប្រយុទ្ធវ័យ 34 ឆ្នាំនេះត្រលប់ទៅកាន់ កាតា វិញ និងអនុញ្ញាតឱ្យទាត់ក្នុងនាមជាកីឡាករជម្រើសដំបូងដែលត្រូវប៉ះនឹង អាហ្សង់ទីន នៅវគ្គផ្ដាច់ព្រ័ត្ររបស់ World Cup 2022។

ចំណែកភាគី Real ក៏បានត្រៀមរួចរាល់ដើម្បីឱ្យ Benzema ហោះទៅកាន់ កាតា បើសិនត្រូវបានហៅត្រលប់ទៅវិញ។ អំពីទ្រឹស្ដី Benzema នៅតែអាចចូលរួមការប្រកួតបិទបញ្ចប់ World Cup 2022 ព្រោះថា គាត់នៅមានឈ្មោះក្នុងបញ្ជីរបស់ FIFA។

ពេលត្រូវបានសួរអំពីព័ត៌មានខាងលើ បន្ទាប់ពីការប្រកួតក្នុងវគ្គពាក់កណ្ដាលផ្ដាច់ព្រ័ត្រដែលបានឈ្នះ ម៉ារ៉ុក 2-0 កាលពីយប់ថ្ងៃទី 14 ធ្នូ អ្នកគ្រប់គ្រងក្រុមជម្រើសជាតិបារាំង Deschamps ដកដង្ហើមវែង គ្រវីក្បាលបដិសេធការឆ្លើយតប និងស្នើឱ្យសួរសំណួរផ្សេង។ មុនវគ្គពាក់កណ្ដាលផ្ដាច់ព្រ័ត្រ លោក Deschamps ក៏បានអះអាងថា «ខ្ញុំយកចិត្តទុកដាក់ទៅលើតែកីឡាករដែលមានឈ្មោះក្នុងបញ្ជីកំពុងប្រកួតប៉ុណ្ណោះ»។

យោងតាម Relevo ដែលជាទំព័រសារព័ត៌មានកីឡានៅ ម៉ាឌ្រីដ Benzema មិនពេញចិត្ត មានអារម្មណ៍ថាត្រូវ «រងរបួស» ព្រោះតែការខ្វះការយោកយល់ និងការអធិប្បាយប្រកបដោយភាពសោះអង្គើយរបស់ Deschamps។ ដូច្នេះហើយ Benzema ក៏មិនមានបំណងត្រលប់ទៅកាន់ កាតា សូម្បីតែនៅពេលត្រូវបានគ្រូបង្វឹកកោះហៅ។

Benzema រងរបួស និងត្រូវខកខានការហ្វឹកហាត់នៅ កាតា កាលពីថ្ងៃទី 19 វិច្ឆិកា។ ក្នុងថ្ងៃដដែល សម្ព័ន្ធបាល់ទាត់បារាំង ក៏បានបញ្ជាក់ពីការលុបឈ្មោះ Benzema ពីបញ្ជីឈ្មោះកីឡាករដែលត្រូវចូលរួមប្រកួតនៅ World Cup 2022។ Benzema គិតថា ការសម្រេចចិត្តរបស់ Deschamps គឺ «លឿនពេក» ព្រោះថា គាត់អាចជាសះស្បើយមុនពេល World Cup 2022 បានបញ្ចប់៕

December 16, 2022

(World Cup 2022)- ការប្រជែងដណ្ដើមតំណែង «កំពូលអ្នកកម្ទេចសំណាញ់» ជិតមកដល់ហើយ

(កាតា)- មុនការប្រកួតផ្ដាច់ព្រ័ត្ររវាង អាហ្សង់ទីន និង បារាំង គេឃើញថា កំពូលតារាបាល់ទាត់ 4 រូបរបស់ក្រុមទាំងពីរគឺ Messi, Mbappe, Giroud និង Alvarez សុទ្ធតែមានឱកាសក្លាយជាស្ដេចកម្ទេចសំណាញ់នៅ World Cup 2022។

ខាងក្រោមនេះគឺជាស្ថិតិខ្លះៗអំពីចំនួនគ្រាប់បាល់ដែលកំពូលតារាបាល់ទាត់ទាំង 4 រូបខាងលើរកបាន ក៏ដូចជាបង្កឱកាសស៊ុតបញ្ចូលទីបានសម្រេចនៅ World Cup 2022 ៖

(រូបខាងលើ) – Lionel Messi របស់ អាហ្សង់ទីន រកបាន 5 គ្រាប់, បង្កឱកាសបាន 3 គ្រាប់ និងប្រកួតក្នុងរយៈពេល 570 នាទី។

Kylian Mbappe របស់ បារាំង រកបាន 5 គ្រាប់, បង្កឱកាសបាន 2 គ្រាប់ និងប្រកួតក្នុងរយៈពេល 477 នាទី។

Julian Alvarez (ស្ដាំ) របស់ អាហ្សង់ទីន រកបាន 4 គ្រាប់, បង្កឱកាសបាន 0 គ្រាប់ និងប្រកួតក្នុងរយៈពេល 364 នាទី។

Olivier Giroud (ឆ្វេង) របស់ បារាំង រកបាន 4 គ្រាប់, បង្កឱកាសបាន 0 គ្រាប់ និងប្រកួតក្នុងរយៈពេល 383 នាទី។

នៅ World Cup 2022 មានកីឡាករ 7 រូបដែលទាត់បញ្ចូលទីបាន 3 គ្រាប់ រួមមាន Richarlison (ប្រេស៊ីល), Valencia (អេក្វាទ័រ), Rashford, Saka (អង់គ្លេស), Gakpo (ហូឡង់), Ramos (ព័រទុយហ្កាល់) និង Morata (អេស្ប៉ាញ)។ ក៏ប៉ុន្តែ ពួកគេសុទ្ធតែស្ថិតក្នុងក្រុមដែលត្រូវបានជម្រុះ និងមិនមានឱកាសប្រកួតទៀតឡើយ៕

December 15, 2022

ក្រុមហ៊ុនអប់រំរបស់ អ្នកឧកញ៉ា គួច ម៉េងលី ប្រកាសពីពេលវេលាឡើងផ្សារហ៊ុន

ក្រុមហ៊ុនអប់រំ MJQ Education ដែលមានសាលាចំនួន 15 សាខា ត្រៀមខ្លួនឡើងផ្សារហ៊ុន នៅចុងខែមីនា ឬដើមខែមេសា ឆ្នាំ 2023 នេះបើតាម អ្នកឧកញ៉ាបណ្ឌិត គួច ម៉េងលី ថ្លែងនៅក្នុងពិធីបើកសម្ពោធក្រុមហ៊ុនដឹកជញ្ជូន អឹម ជេ ឃ្យូ ត្រាវែល ឯ.ក នៅព្រឹកថ្ងៃទី 15 ធ្នូ 2022។

អ្នកឧកញ៉ាបណ្ឌិត គួច ម៉េងលី ដែលជាស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិ នៃក្រុមហ៊ុន ម៉េងលី ជេ គួច អេឌ្យូខេសិន (MJQ Education) បានប្រកាលពីកាលបរិច្ឆេទនៃការបោះផ្សាយលក់មូលបត្រជាសាធារណៈលើកដំបូង (IPO) នេះ បន្ទាប់ពីបានប្រកាសត្រៀមយកសាលាឡើងផ្សារហ៊ុនកាលពីពេលកន្លងទៅថ្មីៗនេះ។

«ការឡើងទីផ្សារហ៊ុននេះនឹងចាប់ផ្ដើមនៅចុងខែ 3 និងដើមខែ 4 ហើយនឹងចាប់ផ្ដើមប្រកាសលក់ ហើយនិងផ្សព្វផ្សាយពីខែ 1 ទៅ» អគ្គនាយកប្រតិបត្តិនៃក្រុមហ៊ុន ម៉េងលី ជេ គួច អេឌ្យូខេសិន ថ្លែងដូច្នេះ និងបញ្ជាក់ថា បច្ចុប្បន្ននេះ ក្រុនហ៊ុនត្រូវការថវិកាដើម្បីពង្រីកសាខាសាលាទៅតាមខេត្ដ និងតំបន់ដាច់ស្រយាល។

អ្នកឧកញ៉ាបណ្ឌិត គួច ម៉េងលី ក៏បានបង្ហើបឱ្យដឹងថា អនាគតក្រុមហ៊ុន MJQ Education នឹងពង្រីកសាលាឱ្យបានយ៉ាងតិច 160 សាខានៅទូទាំងប្រទេស៕

December 15, 2022

ពិព័រណ៍ផលិតផលខ្មែរ និងទំនិញនាំចេញ-នាំចូល លើកទី 15 ចាប់ផ្ដើមទទួលភ្ញៀវ

(ភ្នំពេញ)- ពិព័រណ៍ផលិតផលខ្មែរ និងទំនិញនាំចេញ-នាំចូលលើកទី 15 ត្រូវបានសម្ពោធបើកទទួលភ្ញៀវឡើងវិញនៅមជ្ឈមណ្ឌលសន្និបាត និងពិព័រណ៍កោះពេជ្រ ក្រោយការផ្អាក 2 ឆ្នាំ ដោយសារជំងឺរាតត្បាត។

ពិព័រណ៍ផលិតផលខ្មែរ និងទំនិញនាំចេញ-នាំចូល លើកទី 15 នេះ នឹងធ្វើឡើងក្នុងរយៈពេល 4 ថ្ងៃ រាប់ចាប់ពីថ្ងៃទី 15 ដល់ 18 ធ្នូ 2022 នេះបើតាមក្រុមអ្នករៀបចំកម្មវិធី។ ពិព័រណ៍នេះមានស្តង់សរុបចំនួន 268 ស្តង់ ដែលមានដូចជា ស្តង់របស់ សហព័ន្ធស្រូវអង្ករ អង្គការ សមាគមអាជីវកម្ម ក្រុមហ៊ុន សហគ្រាសក្នុងស្រុក និងក្រុមហ៊ុនមកពីបរទេស និងស្ដង់របស់អាជ្ញាធរកម្ពុជាជាដើម។

ក្នុងពិព័រណ៍នេះមានការចូលរួមតាំងបង្ហាញរបស់ស្ថាប័នមកពីប្រទេសមួយចំនួន មានដូចជា ប្រទេសថៃ វៀតណាម ឡាវ ឥណ្ឌូណេស៊ី សិង្ហបុរី កូរ៉េខាងត្បូង ជប៉ុន ចិន ឥណ្ឌា ប៉ាគីស្ថាន អ៊ីតាលី តួកគី និងសហរដ្ឋអាម៉េរិក ផងដែរ។

យោងតាមអ្នករៀបចំពិព័រណ៍ បណ្ដាផលិតដែលដាក់តាំងបង្ហាញក្នុងឱកាសនេះគឺផ្ដោតសំខាន់ទៅលើផលិតផលកសិកម្ម មានដូចជាបន្លែ ផ្លែឈើ ផលិតផលកែច្នៃពីកសិផល ម្ហូបអាហារ ភេសជ្ជៈ ក៏ដូចជាគ្រឿងអលង្ការ និងគ្រឿងសំអាងជាដើម។ល។

December 15, 2022

(World Cup 2022)- គ្រូបង្វឹករបស់ ម៉ារ៉ុក ៖ «ខ្ញុំចង់ឱ្យ បារាំង លើកពានជើងឯក»

លោក Walid Regragui សង្ឃឹមថា បារាំង ដណ្ដើមបានជោគជ័យនៅវគ្គផ្ដាច់ព្រ័ត្រ ដើម្បីឱ្យ ម៉ារ៉ុក អាចមានមោទកភាព ព្រោះចាញ់តែម្ចាស់ពានជើងឯក World Cup 2022។

«ខ្ញុំជូនពរប្រទេសបារាំង។ យើងនឹងគាំទ្រពួកគេ» លោក Regragui ដែលជាជនជាតិម៉ារ៉ុក កើតនៅ ប្រទេសបារាំង ប៉ុន្តែក្រោយមកក៏បានលេង និងដឹកនាំក្រុមជម្រើសជាតិរបស់ ម៉ារ៉ុក ថ្លែងដូច្នេះ បន្ទាប់ពីការប្រកួតនៅវគ្គពាក់កណ្ដាលផ្ដាច់ព្រ័ត្រកាលពីយប់ថ្ងៃទី 14 ធ្នូ។

លោក Regragui បន្ថែមថា «យើងចង់ឱ្យ បារាំង ដណ្ដើមបានជោគជ័យនៅវគ្គផ្ដាច់ព្រ័ត្រ ដើម្បីអាចនិយាយបានថា យើងខ្ញុំចាញ់តែម្ចាស់ជើងឯកពិភពលោក។ ប្រការនោះអាចនឹងល្អសម្រាប់ពួកយើង»។

នៅវគ្គផ្ដាច់ព្រ័ត្រ បារាំង នឹងត្រូវប៉ះ អាហ្សង់ទីន នៅយប់ថ្ងៃទី 18 ធ្នូ។ ចំណែក ម៉ារ៉ុក នឹងត្រូវជួប ក្រូអាត ក្នុងការប្រកួតដណ្ដើមពានរង្វាន់លេខ 3 មុននោះមួយថ្ងៃ។ យោងតាមលោក Regragui ឱកាសសម្រាប់ក្រុមទាំងពីរនេះគឺ 50-50។ «បើសិនជា បារាំង ឈ្នះការប្រកួតផ្ដាច់ព្រ័ត្រម្ដងទៀត នោះនឹងជាជ័យជម្នះពីរលើកផ្ទួនៗក្នុងប្រវត្តិសាស្ត្រ។ ពួកគេគឺក្រុមជម្រើសជាតិឆ្នើមបំផុតលើពិភពលោកក្នុងរយៈពេលច្រើនឆ្នាំកន្លង» លោក Regragui អះអាងដូច្នេះ។

លោក Walid Regragui គ្រូបង្វឹករបស់ ក្រុមបាល់ទាត់ជម្រើសជាតិម៉ារ៉ុក

ក្នុងប្រវត្តិសាស្ត្រ មានតែ អ៊ីតាលី (ឆ្នាំ 1934, 1938) និង ប្រេស៊ីល (ឆ្នាំ 1958, 1962) ប៉ុណ្ណោះ ដែលជាក្រុមជម្រើសជាតិដណ្ដើមបានពាន់រង្វាន់ជើងឯក 2 លើកបន្តបន្ទាប់៕

December 15, 2022

(World Cup 2022)- រកឃើញមូលហេតុដែលជួយឱ្យ ម៉ារ៉ុក ឡើងដល់វគ្គពាក់កណ្ដាលផ្ដាច់ព្រ័ត្រ

ដោយសារតែមានកម្លាំងពីពលរដ្ឋនៅបរទេស ក្រុមបាល់ទាត់ជម្រើសជាតិរបស់ ម៉ារ៉ុក បាន និងកំពុងតែមានអំណាចខ្លាំងនៅ World Cup 2022។

យោងតាមស្ថិតិរបស់ Guardian កីឡាកររបស់ក្រុមជម្រើសជាតិម៉ារ៉ុក ចំនួន 14 នាក់ ក្នុងចំណោម 26 នាក់ គឺជាពលរដ្ឋកើតនៅបរទេស។ ពួកគេគឺជាកូនចៅរបស់គ្រួសារជនជាតិម៉ារ៉ុក ដែលទៅរស់នៅឯប្រទេសដទៃ។ ក្នុងចំណោមកីឡាករជម្រើសជាតិម៉ារ៉ុក 14 នាក់ដែលកើតនៅបរទេស មាន 4 នាក់កើតនៅ ហូឡង់, 4 នាក់កើតនៅ បែលហ្ស៊ិក, 2 នាក់កើតនៅ បារាំង, 2 នាក់កើតនៅ អេស្ប៉ាញ, 1 នាក់កើតនៅ អ៊ីតាលី និង 1 នាក់កើតនៅ កាណាដា។

កីឡាករភាគច្រើនក្នុងចំណោម 14 នាក់ខាងលើ កំពុងលេងក្នុងនាមជាកីឡាករជម្រើសដំបូង (មិនមែនបម្រុង) ដែលនេះបាន និងកំពុងជួយឱ្យ ម៉ារ៉ុក ឡើងដល់វគ្គពាក់កណ្ដាលផ្ដាច់ព្រ័ត្រនៅ World Cup 2022។ ក្នុងការប្រកួតដែលបានជម្រុះ អេស្ប៉ាញ នៅវគ្គ 1/8 ក្រុមជម្រើសជាតិម៉ារ៉ុក បានបញ្ចេញ «កីឡាករអានិកជន» រហូតដល់ 8 នាក់ ដែលទាត់ក្នុងនាមជាកីឡាករជម្រើសដំបូង ក្នុងនោះមានទាំងអ្នកចាំទីផងដែរ។

ប្រធានក្រុមគ្រូបង្វឹករបស់ ក្រុមបាល់ទាត់ជម្រើសជាតិម៉ារ៉ុក លោក Walid Regragui ក៏ជា «អានិកជនម៉ារ៉ុកនៅបរទេស»។ លោក Walid កើតនៅ Corbeil-Essonnes ជាតំបន់ជាយក្រុងបារីស ប្រទេសបារាំង៕

ការប្រកួតចុងក្រោយនៃវគ្គពាក់កណ្ដាលផ្ដាច់ព្រ័ត្ររបស់ World Cup 2022 រវាង បារាំង និង ម៉ារ៉ុក នឹងចាប់ផ្ដើមនៅម៉ោង 02 ទៀបភ្លឺ ថ្ងៃទី 15 ធ្នូ 2022 (យប់នេះ)។ មួយក្នុងចំណោម 2 ក្រុមនេះនឹងត្រូវឡើងទៅប្រកួតជាមួយក្រុមជម្រើសជាតិរបស់ អាហ្សង់ទីន ដែលកំពុងរង់ចាំជាស្រេច៕

December 14, 2022

Category: សង្គម និងសេដ្ឋកិច្ច