សង្គម និងសេដ្ឋកិច្ច - La Reine Media

(World Cup 2022)- ប្រធានាធិបតីបារាំង ចុះលើកទឹកចិត្តកីឡាករ បន្ទាប់ពីចាញ់ អាហ្សង់ទីន នៅវគ្គផ្ដាច់ព្រ័ត្រ

ប្រធានាធិបតីបារាំង លោក ម៉ាក្រុង ចុះទៅកាន់ទីលានប្រកួតនៅ កាតា ដើម្បីលើកទឹកចិត្តខ្សែប្រយុទ្ធ Mbappe បន្ទាប់ពី បារាំង ចាញ់ អាហ្សង់ទីន ក្នុងការប្រកួតទាត់ប៉េណាំងទី នៅវគ្គផ្ដាច់ព្រ័ត្ររបស់ World Cup 2022។

លោក អេម៉ានុយអែល ម៉ាក្រុង កាលពីថ្ងៃទី 18 ធ្នូ 2022 បានធ្វើដំណើរទៅកាន់កីឡដ្ឋាន Lusail Iconic ប្រទេសកាតា ដើម្បីតាមដានការប្រកួតវគ្គផ្ដាច់ព្រ័ត្រ World Cup 2022 រវាងក្រុមជម្រើសជាតិរបស់ បារាំង និង អាហ្សង់ទីន។ នៅលើជួរកៅអីពិសេស លោក ម៉ាក្រុង បានសម្ដែងការសប្បាយរីករាយនៅពេលក្រុមរបស់ បារាំង រកបានគ្រាប់បាល់ស្មើនៅក្នុង 2 តង់ដំបូង ក៏ដូចជាតង់ថែមម៉ោងបន្ទាប់។

ប៉ុន្តែ នៅក្នុងការប្រកួតស៊ុតប៉េណាំងទីដើម្បីកំណត់អ្នកឈ្នះ ភាពអស្ចារ្យរបស់អ្នកចាំទី Emiliano Martinez បានជួយឱ្យ អាហ្សង់ទីន យកឈ្នះលើ បារាំង និងដណ្ដើមបានពានរង្វាន់ជើងឯក។ ក្រុមកីឡាកររបស់ បារាំង តួចចិត្ត អស់សង្ឃឹម ក្នុងនោះ ខ្សែប្រយុទ្ធ Kylian Mbappe ដែលរកបាន 3 គ្រាប់មុននឹងត្រូវទាត់ប៉េណាំងទី មិនសប្បាយចិត្តសោះ។

លោក ម៉ាក្រុង ដាក់ដៃលើស្មារបស់ Mbappe និងនិយាយលើកទឹកចិត្

ប្រធានាធិបតីបារាំង បានចុះទៅកាន់ទីលានប្រកួត លើកទឹកចិត្ត Mbappe ដែលលេងបានល្អក្នុងការប្រកួត ប៉ុន្តែនៅតែមិនអាចជួយឱ្យ បារាំង ដណ្ដើមបានជើងឯក។ លោក ម៉ាក្រុង ដាក់ដៃលើស្មារបស់ Mbappe និងនិយាយលើកទឹកចិត្ត។ ប៉ុន្តែ Mbappe មិនអាចសប្បាយចិត្តបាន នៅពេលមើលទៅកាន់ទិដ្ឋភាពក្រុមរបស់ អាហ្សង់ទីន កំពុងអបអរជ័យជម្នះ។

ដោយរកបាន 8 គ្រាប់នៅ World Cup លើកនេះ Mbappe ទទួលបានស្បែកជើងមាស និងក្លាយជាកីឡាករដែលរកបាន 3 គ្រាប់ដំបូងគេក្នុងវគ្គផ្ដាច់ព្រ័ត្រនៅ World Cup រាប់ចាប់ពីឆ្នាំ 1966៕

December 19, 2022

Messi ពាក់អាវមហាក្សត្រកាតាប្រទាន លើកពាន World Cup 2022

(កាតា)- កំពូលតារាបាល់ទាត់វ័យ 35 ឆ្នាំ Lionel Messi ពាក់អាវធំក្រៅដែលមហាក្សត្រកាតា ប្រទាន នៅពេលលើកពាន World Cup ជាលើកដំបូងក្នុងអាជីព ជាមួយនឹងក្រុមជម្រើសជាតិអាហ្សង់ទីន។

ក្រោយការប្រកួតវគ្គផ្ដាច់ព្រ័ត្រ World Cup 2014 នៅ ប្រេស៊ីល Lionel Messi បានលើកពានបាល់មាស World Cup ប៉ុន្តែ បានត្រឹមតែសម្លឹងមើលពានជើងឯក World Cup ពីចម្ងាយជាមួយនឹងទឹកមុខមិនសូវសប្បាយចិត្ត។ ក៏ប៉ុន្តែ ក្រោយការប្រកួតផ្ដាច់ព្រ័ត្រកាលពីយប់មិញ (18 ធ្នូ 2022) នៅ កាតា ប្រធានក្រុមជម្រើសជាតិអាហ្សង់ទីន លើកនេះដណ្ដើមបានទាំងពាន់ជើងឯក World Cup បានទាំងពានបាល់មាស។

Messi រកបាន 2 គ្រាប់ ជួយឱ្យ អាហ្សង់ទីន ស្មើនឹង បារាំង 3-3 នៅវគ្គផ្ដាច់ព្រ័ត្រ មុនពេលស៊ុតបានជោគជ័យជាមួយនឹងលទ្ធផល 4-2 នៅក្នុងការប្រកួតទាត់បាល់ប៉េណាំងទី។ កំពូលកីឡាកររូបនេះតំណាងឱ្យ អាហ្សង់ទីន ឡើងទទួលពានមាស World Cup ពីមហាក្សត្ររបស់ កាតា ព្រះអង្គម្ចាស់ Tamim bin Hamad Al Thani និងប្រធាន FIFA លោក Gianni Infantino។

មុនពេលប្រគល់ពានមាស ព្រះអង្គម្ចាស់ Al Thani បានប្រទានអាវធំក្រៅ bisht ពណ៌ខ្មៅទៅឱ្យ Messi ដើម្បីសម្ដែងការកោតសរសើរ។ អាវ bisht ត្រូវបានប្រើប្រាស់សម្រាប់តែមេដឹកនាំសាសនាអ៊ីស្លាម ឬមន្ត្រីរដ្ឋាភិបាល នៅក្នុងព្រឹត្តិការណ៍ពិសេសប៉ុណ្ណោះ។

ក្រោយមក Messi ទទួលពានមាសពី ព្រះអង្គម្ចាស់ Al Thani និងលោក Infantino។ Messi ឆ្លៀតថើបពានជើងឯកជាលើកដំបូងក្នុងអាជីពរបស់ខ្លួន។ នេះក៏ត្រូវបានចាត់ទុកថាជារង្វាន់ពិសេស និងមានតម្លៃបំផុតចំពោះអាជីពជាកីឡាករមួយរូប ហើយក៏ជាពានជើងឯកទីបីដែលបានទៅលើ អាហ្សង់ទីន បន្ទាប់ពីឆ្នាំ 1978 និង 1986។

December 19, 2022

ពាន់រង្វាន់ជើងឯក World Cup 2022 បានទៅលើ អាហ្សង់ទីន

អាហ្សង់ទីន និង បារាំង រកបាន 3 គ្រាប់ដូចគ្នាក្នុង 2 តង់នៃវគ្គផ្ដាច់ព្រ័ត្រ មុនពេលយកឆ្នះ 4-2 ក្នុងការស៊ុតប៉េណាំងទី ដែលនាំឱ្យ អាហ្សង់ទីន បានក្លាយជាជើងឯក World Cup 2022 នៅយប់ថ្ងៃទី 18 ឈានចូលវេលាទាបភ្លឺថ្ងៃទី 19 ធ្នូ 2022។

នៅក្នុងតង់ទីមួយ អាហ្សង់ទីន នាំមុខ 2-0 ក្នុងនោះ មានការស៊ុតផ្ដាច់ 6 ដង។ បារាំង មិនបានស៊ុតផ្ដាច់ម្ដងណាឡើយនៅក្នុង 45 នាទីដំបូងនៃវគ្គផ្ដាច់ព្រ័ត្រនេះ។

ចូលដល់តង់ទីពីរ នាទីទី 80 ខ្សែបម្រើអាហ្សង់ទីន បង្កកំហុស និងត្រូវរងបាល់ពិន័យប៉េណាំងទី។ Mbappe ស៊ុតបញ្ចូលទី ជួយឱ្យ បារាំងរកបាន 1-2។ នាទីទី 82 Messi បណ្ដោយឱ្យបាត់បាល់ នាំឱ្យ បារាំងវាយលុក។ Mbappe គ្រប់គ្រងបាល់ និងស៊ុតផ្ដាច់បានជោគជ័យ ជួយឱ្យបារាំងរកបាន 2-2។

នាទីទី 109 Messi រកបាន 1 គ្រាប់ទៀត ជួយឱ្យ អាហ្សង់ទីន នាំមុខ 3-2។ ប៉ុន្តែ នាទីទី 118 Mbappe របស់ បារាំង រកបានគ្រាប់បាល់ hattrick ជួយឱ្យលទ្ធផលបាន 3-3។

នាទីទី 120+3 ត្រូវបានបញ្ចប់ ដោយលទ្ធផល 3-3។ ដូច្នេះ ការប្រកួតដោយទាត់ប៉េណាំងទី ត្រូវបានប្រើប្រាស់ដើម្បីជម្រើសរើសម្ចាស់ជើងឯក។

អាហ្សង់ទីន ឈ្នះ 4-2 ក្នុងវគ្គទាត់ប៉េណាំងទី ហើយក៏បានក្លាយជាម្ចាស់ពានរង្វាន់ជើងឯក World Cup 2022៕

December 19, 2022

(ផ្ដាច់ព្រ័ត្រ World Cup 2022)- អាហ្សង់ទីន -បារាំង តង់ទីពីរ

តង់ទីពីរបានចាប់ផ្ដើម…

Messi បន្តសម្រុកទៅមុខ និងបញ្ជូនបាល់ទៅកាន់ស្លាបខាងស្ដាំដើម្បីឱ្យ Di Maria ប្លោងល្មម ហើយ De Paul ស៊ុតផ្ដាច់។ Rabiot បានទទួលកាតលឿង បន្ទាប់ពីបង្កកំហុសច្រើនដងលើ De Paul។

ខ្សែប្រយុទ្ធអាហ្សង់ទីន ស៊ុតផ្ដាច់សំដៅទីដោយជើងឆ្វេង ប៉ុន្តែមិនអាចយកឈ្នះអ្នកចាំទីរបស់បារាំង កីឡាករ Lloris។

នាទីទី 60 Messi វិះរកបានមួយគ្រាប់ទៀត បន្ទាប់ពី Di Maria បញ្ជូនបាល់ពីស្លាបខាងឆ្វេងទៅកាន់តំបន់គ្រោះថ្នាក់។ De Paul ទទួលបាន រួចបញ្ជូនឱ្យ Messi។ កីឡាករពាក់អាវលេខ 10 មានឱកាសស៊ុតផ្ដាច់ ប៉ុន្តែ មិនបានសម្រេច ដោយសារយឺតជាងខ្សែការពាររបស់ បារាំង។

នាទីទី 64 Di Maria របស់ អាហ្សង់ទីន ត្រូវបានប្ដូរចេញ ទុកកន្លែងឱ្យ Acuna។

នាទីទី 71 បារាំង បានស៊ុតផ្ដាច់លើកដំបូង ដោយ Mbappe ប៉ុន្តែមិនបានជោគជ័យ។ នាទីទី 72 Hernandez និង Griezmann របស់ បារាំង ត្រូវបានប្ដូរចេញ ដើម្បីឱ្យ Camavinga និង Coman ចូលជំនួស។

បារាំង បានទាត់បាល់ពិន័យប៉េណាំងទី។ នាទីទី 80 ខ្សែបម្រើអាហ្សង់ទីន បង្កកំហុស និងត្រូវរងបាល់ពិន័យប៉េណាំងទី។ Mbappe ស៊ុតបញ្ចូលទី ជួយឱ្យ បារាំងរកបាន 1-2។

នាទីទី 82 Messi បណ្ដោយឱ្យបាត់បាល់ នាំឱ្យ បារាំងវាយលុក។ Mbappe គ្រប់គ្រងបាល់ និងស៊ុតផ្ដាច់បានជោគជ័យ ជួយឱ្យបារាំងរកបាន 2-2។

តង់ទីពីរ ថែមម៉ោង 8 នាទី។

នាទីទី 90+3 Kylian Mbappe សម្រុកចូលពីស្លាបខាងឆ្វេងទៅកាន់ចំណុចកណ្ដាល ហើយក៏ស៊ុតផ្ដាច់ ប៉ុន្តែបរាជ័យ។

នាទីទី 90+5 បារាំងវិះរកបានមួយគ្រាប់ទៀត ពេលទាត់បាល់ពិន័យ។

នាទីទី 90+7 Messi ស៊ុតផ្ដាច់ ប៉ុន្តែបាល់បានហោះចាំអ្នកចាំទី។

Acuna ទទួលកាត់លឿងនៅនាទីចុងក្រោយ។

ក្រោយការប្រកួតពីរតង់ លទ្ធផល 2-2។

នាទីទី 91 តង់បន្ថែមទីមួយចាប់ផ្ដើម

នាទីទី 94 Rabiot របស់ បារាំង ត្រូវបានប្ដូរចេញ ហើយ Fofana ចូលមកជំនួស។

នាទីទី 100 បារាំងមានប្រៀបជាង

នាទីទី 102 De Paul និង Alvarez របស់ អាហ្សង់ទីន ត្រូវបានប្ដូរចេញ និងជំនួសដោយ Paredes និង Lautaro Martinez។

នាទីទី 105 Messi បញ្ជូនបាល់ទៅមកជាមួយនឹងកីឡាករអាហ្សង់ទីន មុនពេលបញ្ជូនឱ្យ Lautaro Martinez ប្រឈមមុខនឹង Lloris ប៉ុន្តែ មិនអាចធ្វើអ្វិបាល។

នាទីទី 105+1 តង់បន្ថែមទីមួយបានបញ្ចប់ដោយ 2-2 បន្ទាប់ពី Lautaro Martinez ធ្វើឱ្យបាត់បង់ឱកាសទីពីរ។

នាទីទី 108 Messi ស៊ុតពីចម្ងាយ ប៉ុន្តែ មិនអាចកម្ទេចសំណាញ់របស់ Lloris ដដែល។

នាទីទី 109 Messi រកបាន 1 គ្រាប់ទៀត។

នាទីទី 113 បារាំង ប្ដុរកីឡាករ ដោយ Konate ចូលជំនួស Varane។

នាទីទី 114 Paredes របស់ អាហ្សង់ទីន ត្រូវបានពិន័យកាតលឿង។

នាទីទី 118 Mbappe របស់ បារាំង រកបានគ្រាប់បាល់ hattrick ជួយឱ្យលទ្ធផលបាន 3-3។

នាទីទី 120 តង់បន្ថែមទីពីរ ថែមម៉ោង 3 នាទី។

នាទីទី 120+3 ត្រូវបានបញ្ចប់ ដោយលទ្ធផល 3-3។ ដូច្នេះ ការប្រកួតដោយទាត់ប៉េណាំងទី ត្រូវបានប្រើប្រាស់ដើម្បីជម្រើសរើសម្ចាស់ជើងឯក។

ការទាត់ប៉េណាំងទី ចាប់ផ្ដើម ដោយ បារាំង ទាត់មុន។ Mbappe ស៊ុតបានជោគជ័យលើ Martinez របស់ អាហ្សង់ទីន ចំណែក Messi ក៏បានឈ្នះ Lloris របស់ បារាំង។

ប៉េណាំងទីជុំទីពីរ Emiliano Martinez កម្ចាត់បាល់របស់ Coman បានជោគជ័យ ហើយ អាហ្សង់ទីន ក៏រកបាន 1 គ្រាប់ទៀត។

ជុំទីបី Tchouameni ទាត់ចេញក្រៅ ចំណែក Paredes យកឈ្នះលើ Lloris។ អាហ្សង់ទីននាំមុខ 3-1 ក្នុងការទាត់ប៉េណាំងទី។

ជុំទីបួន Kolo Muani យកឈ្នះលើ Martinez ធ្វើឱ្យ បារាំងបរាជ័យ ខណៈ អាហ្សង់ទីន បានជោគជ័យ។

អាហ្សង់ទីន ឈ្នះ 4-2 ក្នុងវគ្គទាត់ប៉េណាំងទី។ Messi ដណ្ដើមបានតំណែងជើងឯក World Cup ជាលើកដំបូងក្នុងអាជីព៕

December 18, 2022

(ផ្ដាច់ព្រ័ត្រ World Cup 2022)- អាហ្សង់ទីន នាំមុខ បារាំង 2-0 ក្នុងតង់ទីមួយ ៖ Messi លេចធ្លោជាងគេ

បារាំង ក្នុងឈុតអាវពណ៌ខៀវ ជាអ្នកទាត់បាល់មុន ខណៈ អាហ្សង់ទីន ពណ៌ខៀវខ្ចីលាយស និងខោពណ៌ស។

កីឡាករទាំងពីក្រុមបានបង្កកំហុសលើគ្នា និងបង្កើតឱកាសស៊ុតជាបន្តបន្ទាប់តាំងពីដើមទី ប៉ុន្តែក៏មិនមានភាគីណារកបានគ្រាប់បាល់ រហូតដល់មានការពិន័យប៉េណាំងទី ក្រោយពី Dembele បានបង្កកំហុសលើកីឡាករខ្សែប្រយុទ្ធ Di Maria របស់ អាហ្សង់ទីន នៅតំបន់គ្រោះថ្នាក់។

ពីចម្ងាយ 11 ម៉ែត្រ Messi ស៊ុតបាល់ប៉េណាំងទីបានជោគជ័យ។ នេះគឺជាគ្រាប់បាល់ទី 6 របស់ Messi នៅ World Cup 2022, ទី 12 នៅ World Cup និងទី 97 នៅក្នុងក្រុមជម្រើសជាតិអាហ្សង់ទីន។

ជាង 30 នាទីដំបូងនៃការប្រកួត ក្រុមអាហ្សង់ទីន គ្រប់គ្រងបាល់បាន 60%, ស៊ុតផ្ដាច់បាន 5 ដង ក្នុងនោះមាន 2 ដងទាត់ចំទិសអ្នកចាំទី។ បារាំងមិនទាន់បានស៊ុតផ្ដាច់ម្ដងណានៅឡើយក្នុងអំឡុងពេលនេះ។

នាទីទី 36 អាហ្សង់ទីន រកបានមួយគ្រាប់ទៀត នាំឱ្យក្រុមនេះនាំមុខ បារាំង 2-0។

Lionel Messi និង Angel Di Maria គឺជាអ្នករកបាន 2 គ្រាប់ឱ្យ អាហ្សង់ទីន នៅក្នុងតង់ទីមួយនៃវគ្គផ្ដាច់ព្រ័ត្ររបស់ World Cup 2022 នាយប់ថ្ងៃទី 18 ធ្នូ 2022។

នៅក្នុងតង់ទីមួយ អាហ្សង់ទីន ស៊ុតផ្ដាច់ 6 ដង ក្នុងនោះ 3 គ្រាប់ហោះចំទិសអ្នកចាំទី។ បារាំង មិនបានស៊ុតផ្ដាច់ម្ដងណាឡើយនៅក្នុង 45 នាទីដំបូងនៃវគ្គផ្ដាច់ព្រ័ត្រនេះ។

តង់ទីពីរបានចាប់ផ្ដើម…

December 18, 2022

រថយន្តអគ្គិសនីជិត 6 ពាន់គ្រឿងត្រូវបានលក់ក្នុងពិព័រណ៍មួយនៅប្រទេសថៃ

ការបញ្ជាទិញរថយន្តអគ្គិសនី 5,800 គ្រឿងនៅក្នុងពិព័រណ៍រថយន្តអន្តរជាតិប្រទេសថៃ កំពុងរួមចំណែកលើកទឹកចិត្តដល់កិច្ចខិតខំរបស់រដ្ឋាភិបាលថៃ ក្នុងបំណងអភិវឌ្ឍវិស័យឧស្សាហកម្មរថយន្តអគ្គិសនីនៅប្រទេសនេះ។

អ្នកគ្រប់គ្រងពិព័រណ៍នេះបានឱ្យដឹងថា រថយន្តអគ្គិសនីសរុប 15% ស្ថិតក្នុងចំណោមរថយន្ត 36,679 គ្រឿង ត្រូវបានបញ្ជាទិញជាមុន នៅក្នុងរយៈពេល 12 ថ្ងៃនៃពិព័រណ៍ដែលបានបញ្ចប់កាលពីថ្ងៃទី 12 ធ្នូកន្លងទៅ។

រដ្ឋមន្ត្រីក្រសួងឧស្សាហកម្មថៃ Suriya Juangroongruangkit ថ្លែងថា រថយន្តអគ្គិសនីរបស់ ប្រទេសចិន ទទួលបានការពេញនិយមជាងគេ។ «ទីផ្សាររថយន្តអគ្គិសនីនៅ ប្រទេសថៃ បានរីកចម្រើនយ៉ាងឆាប់រហ័ស ចាប់តាំងពីរដ្ឋាភិបាលផ្ដល់កញ្ចប់ជំនួយដែលមានតម្លៃជាង 57 លានដុល្លារអាម៉េរិក» រដ្ឋមន្ត្រីឧស្សាហកម្មថៃ អះអាងដូច្នេះ។

កាលពីខែកុម្ភៈកន្លងទៅ រដ្ឋាភិបាលថៃ បានអនុម័តខ្ទង់ប្រាក់ជំនួយពី 2,000 ដល់ 4,300 ដុល្លារ អាស្រ័យលើប្រភេទ និងម៉ូដែលរថយន្ត សម្រាប់ការទិញរថយន្តអគ្គិសនីមួយគ្រឿង ដើម្បីជំរុញតម្រូវការប្រើប្រាស់ចំពោះរថយន្តអគ្គិសនីដែលផលិតពីឆ្នាំ 2022 ដល់ 2023។

ប្រធានក្រុមហ៊ុន Inter-Media Consultant លោក Kwanchai Paphatphong ថ្លែងថា «ក្នុងអំឡុងពិព័រណ៍ BYD បានទទួលការបញ្ជាទិញជាមុនច្រើនជាងគេ ដោយមាន 2,714 គ្រឿងត្រូវបានកក់។ បន្ទាប់មកគឺរថយន្តអគ្គិសនី Ora Good Cat របស់ GWM (1,212 គ្រឿង), រថយន្តអគ្គិសនីរបស់ក្រុមហ៊ុន Neta (827 គ្រឿង) និងក្រុមហ៊ុនអង់គ្លេស MG (ជាង 600 គ្រឿង)៕

December 17, 2022

រ៉ូបូតឆ្លាតវៃជួយប្រមូលផលផ្លែឈើជំនួសកម្លាំងមនុស្ស

ក្រុមហ៊ុនធុរកិច្ចថ្មីរបស់ អ៊ីស្រាអែល បានទទួលជោគជ័យក្នុងការអភិវឌ្ឍរ៉ូបូតហោះមួយប្រភេទដែលមានសមត្ថភាពបេះផ្លែឈើជំនួសមនុស្ស។

នៅក្នុងតំបន់មួយចំនួនរបស់ពិភពលោក ឱ្យតែដល់រដូវប្រមូលផលផ្លែឈើ កសិករតែងតែជួបបញ្ហាខ្វះកម្លាំង។ ដើម្បីដោះស្រាយបញ្ហានេះ ក្រុមហ៊ុនបច្ចេកវិទ្យា Tevel របស់ អ៊ីស្រាអែល ក៏បានអភិវឌ្ឍរ៉ូបូតហោះដែលមានជំនាញក្នុងការបេះផ្លែឈើ។

រ៉ូបូតនេះហោះក្បែរពីលើ ឬពីខាងដើមឈើ ដើម្បីពិនិត្យ និងបេះផ្លែដែលដល់ពេលត្រូវប្រមូលផល។ ពួកវាប្រើប្រាស់ដៃដែលអាចស្រូបទាញផ្លែឈើ ហើយទម្លាក់ចូលទៅក្នុងធុងដោយការប្រុងប្រយ័ត្ន។

យោង Yaniv Maor នាយកប្រតិបត្តិ និងជាស្ថាបនិករបស់ក្រុមហ៊ុន Tevel បានឱ្យដឹងថា «រ៉ូបូតហោះដែលយើងអភិវឌ្ឍ មានរូបរាងតូច លឿន និងសន្សំសំច័យប្រាក់»។

រ៉ូបូតនេះបំពាក់កាមេរ៉ាដែលអនុញ្ញាតឱ្យវាដឹងថា ផ្លែណាត្រូវបេះ ផ្លែណាមិនទាន់ដល់ពេលត្រូវបេះ។ វាក៏បំពាក់ប្រព័ន្ធពិសេសដែលជួយឱ្យដំណើរការបន្តបន្ទាប់ដោយមិនខ្លាចអស់ថាមពលអគ្គិសនី និងអាចធ្វើការគ្រប់កាលៈទេសៈ។

បច្ចុប្បន្ន រ៉ូបូតរបស់ Tevel អាចបេះផ្លែឈើមួយចំនួនមានដូចជា ប៉ោម សារី ស្វាយ ប៊ឺរ និងជម្ពូ។ ក្រៅពី អ៊ីស្រាអែល រ៉ូបូតនេះក៏ត្រូវបានប្រើប្រាស់នៅ សហរដ្ឋអាម៉េរិក និងបណ្ដាប្រទេសនៅ អឺរ៉ុប។ ប៉ុន្តែ ក្រុមហ៊ុន Tevel ឱ្យដឹងថា កំពុងមានគម្រោងវាយលុកទីផ្សារចិន និងជប៉ុន ផងដែរ៕

December 17, 2022

ក្រសួងសាធារណការ ប្រកាសពីវឌ្ឍនភាពនៃគម្រោងស្តារឡើងវិញកំណាត់ផ្លូវជាតិលេខ 8 ចាប់ពីគីឡូម៉ែត្រ 25+820 ដល់គីឡូម៉ែត្រ 29+300

រដ្ឋលេខាធិការក្រសួងសារធារណការ និងដឹកជញ្ជូន កាលពីថ្ងៃទី 15 ធ្នូ បានអញ្ជើញដឹកនាំក្រុមការងាររបស់ក្រសួង ចុះពិនិត្យការដ្ឋានគម្រោងស្ដារឡើងវិញកំណាត់ផ្លូវជាតិលេខ 8 ចាប់ពីគីឡូម៉ែត្រ 25+820 ដល់គីឡូម៉ែត្រ 29+300។

ឯកឧត្តម នូ សុវត្ថិ រដ្ឋលេខាធិការក្រសួងសារធារណការ និងដឹកជញ្ជូន បានណែនាំឱ្យក្រុមវិស្វកម្មដែលទទួលអនុវត្តគម្រោង ត្រូវអនុវត្តឱ្យបានត្រឹមត្រូវតាមកិច្ចសន្យា និងត្រូវជួយសម្រួលដល់ការធ្វើដំណើររបស់បងប្អូនប្រជាពលរដ្ឋ នេះបើតាម ក្រសួងសាធារណការ និងដឹកជញ្ជូន។

គម្រោងស្ដារឡើងវិញកំណាត់ផ្លូវជាតិខាងលើ មានប្រវែងសរុប 2,480 ម៉ែត្រ និងទទឹង 24.51 ម៉ែត្រ ក្នុងនោះក៏មានសួនច្បារទទឹង 3 ម៉ែត្រនៅកណ្ដាលទ្រូងផ្លូវ ព្រមទាំងមានលូបង្ហូរទឹកភ្លៀងនៅសងខាងផ្លូវ និងមានបំពាក់បង្គោលភ្លើង និងភ្លើងបំភ្លឺពេលយប់ផងដែរ។

យោងតាមក្រសួងសាធារណការ និងដឹកជញ្ជូន គិតមកដល់បច្ចុប្បន្ន គម្រោងដែលត្រូវបានអនុវត្តដោយកងវិស្វកម្មសម្តេចតេជោសៀមរាប (ក្រុម ក) នេះ សម្រេចបាន 50% រួចហើយ៕

December 17, 2022

កូរ៉េខាងត្បូង សាងសង់ព្រលានយន្តហោះអណ្ដែតលើសមុទ្រនៅ Busan

ទីក្រុង Busan របស់ កូរ៉េខាងត្បូង ថ្មីៗនេះបានដាក់សំណើស្ដីពីគម្រោងសាងសង់ព្រលានយន្តហោះអណ្ដែតលើសមុទ្រមួយកន្លែងដែលគ្រោងស្ថាបនារួចរាល់នៅឆ្នាំ 2029។

គម្រោងសាងសង់ព្រលានយន្តហោះអណ្ដែតលើទឹកត្រូវបានលើកឡើងដើម្បីជំរុញដំណើរការក្នុងការស្ថាបនាព្រលានយន្តហោះថ្មី Gadeok។ ព្រលានយន្តហោះ Gadeok នេះនឹងមានស្ថានីយអ្នកដំណើរនៅលើដីគោក ខណៈដែលផ្លូវរត់របស់យន្តហោះនឹងសាងសង់លើផ្ទៃសមុទ្រ។

យោងតាមអាជ្ញាធរក្រុង Busan ការសាងសង់ផ្លូវរត់របស់យន្តហោះក្នុងទម្រង់អណ្ដែតលើទឹកនេះ ស៊ីពេលតិចជាង ធៀបនឹងការដែលត្រូវកែលំអដីក្នុងការស្ថាបនាលើដីគោក។ វិធីថ្មីនេះក៏មិនសូវប៉ះពាល់បរិស្ថាន និងងាយពង្រីកបន្ថែម។

ក៏ប៉ុន្តែ ការសាងសង់ព្រលានយន្តហោះលើផ្ទៃទឹកនឹងត្រូវចំណាយប្រាក់ច្រើន ដែលអាចឡើងដល់ 11 ពាន់លានដុល្លារអាម៉េរិក និងអាចប្រឈមនឹងបញ្ហាមួយចំនួនទាក់ទងនឹងសុវត្ថិភាព ក្នុងនោះមានដូចជាសមត្ថភាពនៃការទប់ទល់នឹងខ្យល់ព្យុះជាដើម៕

December 17, 2022

បារាំង ពង្រាយប៉ូលិសរាប់ម៉ឺននាក់ដើម្បីធានាសន្តិសុខសម្រាប់វគ្គផ្ដាច់ព្រ័ត្រ World Cup

អាជ្ញាធរបារាំង បានប្រកាសថា ប៉ូលិសប្រហែល 14,000 នាក់ នឹងធ្វើសកម្មភាពនៅទូទាំងប្រទេសដើម្បីធានាសន្តិសុខនៅក្នុងថ្ងៃប្រកួតបាល់ទាត់ពិភពលោក វគ្គផ្ដាច់ព្រ័ត្រ។

យោងតាមផែនការដែលត្រូវបានលើកឡើងនៅចំពោះមុខរដ្ឋមន្ត្រីក្រសួងមហាផ្ទៃបារាំង Gerald Darmanin កាលពីថ្ងៃទី 16 ធ្នូ កងកម្លាំងនេះនឹងចូលរួមរក្សាសន្តិសុខនៅ រដ្ឋធានីបារីស ជាទីដែលត្រូវបានព្យាករថា នឹងមានការជួបជុំមនុស្សម្នាទ្រង់ទ្រាយធំ ក្នុងករណី បារាំង ដណ្ដើមបានជ័យជម្នះ។

មហាវិថី Champs-Elysees គឺជាកន្លែងដែលធ្លាប់មានព្រឹត្តិការណ៍អបអរធំៗនៅក្នុងពេលដែល បារាំង ដណ្ដើមបានជើងឯក World Cup នៅក្នុងឆ្នាំ 1998 និង 2018។ មនុស្សប្រហែល 600,000 នាក់ បានប្រមូលផ្ដុំគ្នានៅទីនេះ ដើម្បីចូលរួមអបអរសាទរកាលពី 4 ឆ្នាំមុន។ មហាវិថីនេះនឹងហាមយានជំនិះនៅថ្ងៃទី 18 ធ្នូ ហើយកម្លាំងសមត្ថកិច្ច 2,750 នាក់ នឹងយាមល្បាតនៅក្បែរៗនោះ។

កាលពីថ្ងៃទី 14 ធ្នូ មនុស្សប្រហែល 40 នាក់ត្រូវបានប៉ូលិសបារាំងចាប់ខ្លួន នៅពេលព្យាយាមចូលរួមជាមួយនឹងក្រុមមនុស្សដែលកំពុងជប់លៀងជ័យជម្នះ ក្រោយពី ក្រុមជម្រើសជាតិបារាំង បានយកឈ្នះលើ ម៉ារ៉ុក ក្នុងវគ្គពាក់កណ្ដាលផ្ដាច់ព្រ័ត្រ។ «ពួកគេទៅចូលរួមដើម្បីបង្កហេតុ» នេះបើតាមរដ្ឋមន្ត្រី Darmanin និយាយអំពីក្រុមមនុស្សខាងលើ។

មុននោះ ក៏មានការប៉ះទង្គិចគ្នានៅ បារាំង បន្ទាប់ពី ក្រុមបាល់ទាត់ជម្រើសជាតិប្រទេសនេះ បានផ្ដួល ក្រុមម៉ារ៉ុក នៅក្នុងវគ្គ 1/8។ សមត្ថកិច្ចបារាំង បានបាញ់ផ្សែងបង្ហូរទឹកភ្នែកដើម្បីរំសាយក្រុមមនុស្ស៕

December 17, 2022

Category: សង្គម និងសេដ្ឋកិច្ច