សង្គម និងសេដ្ឋកិច្ច - La Reine Media

មហាសេដ្ឋី 5 រូបដែលរកប្រាក់បន្ថែមបានច្រើនជាងគេបង្អស់ក្នុងឆ្នាំ 2022

មហាសេដ្ឋីស្ទើរតែទាំងអស់នៅលើពិភពលោក ក្នុងឆ្នាំនេះ សុទ្ធតែបាត់បង់ប្រាក់យ៉ាងច្រើន ប៉ុន្តែ នៅតែមាន 5 រូបនៅ ទ្វីបអាស៊ី ដែល «ខុសគេ» ដោយរកប្រាក់បន្ថែមបានជិត 100 ពាន់លានដុល្លារអាម៉េរិក។

2022 គឺជាឆ្នាំដែលប្រកបដោយការប្រែប្រួលសម្រាប់ក្រុមអ្នកមានកំពូលៗរបស់ពិភពលោក។ យោងតាម Forbes មហាសេដ្ឋីទាំងឡាយ បានបាត់បង់ប្រាក់ជាង 1.9 ទ្រីលានដុល្លារអាម៉េរិក ដែលភាគច្រើនដោយសារតម្លៃភាគហ៊ុនចុះថោក ខណៈដែលអតិផរណាកើនឡើងខ្ពស់ខ្លាំង និងកំណើនសេដ្ឋកិច្ចត្រលប់ជាយឺតទៅវិញ។

ក្នុងគ្រាដែលសេដ្ឋកិច្ចពិភពលោកមានឱនភាពរួម មហាសេដ្ឋកិច្ចមួយភាគតូចបែរជា «ដើរបញ្ច្រាសទិស»។ មហាសេដ្ឋី 5 រូបដែលមានទ្រព្យកើនឡើងសរុបជាង 93 ពាន់លានដុល្លារក្នុងឆ្នាំ 2022 សុទ្ធតែជាជនជាតិអាស៊ី។

អ្នកដែលនាំមុខគេនៅក្នុងបញ្ជីនេះគឺ មហាសេដ្ឋីឥណ្ឌា លោក Gautam Adani។ គាត់គឺជាប្រធានក្រុមហ៊ុន Adani ដែលរកស៊ីក្នុងពហុវិស័យ។ កាលពីខែកុម្ភៈ លោក Adani បានក្លាយជាអ្នកមានជាងគេនៅ អាស៊ី និងទី 10 លើពិភពលោក ដោយមានទ្រព្យសរុប 90.1 ពាន់លានដុល្លារអាម៉េរិក។ យោងតាម Forbes ថ្ងៃទី 09 ធ្នូ 2022 លោក Adani រកបានប្រាក់ 55 ពាន់លានដុល្លារថែមទៀត ធៀបនឹងដើមឆ្នាំ។

Low Tuck Kwong គឺជាមហាសេដ្ឋីដែលមានទ្រព្យកើនឡើងខ្ពស់លំដាប់ទីពីរ (16 ពាន់លានដុល្លារ) ក្នុងឆ្នាំនេះ។ ដោយសារទ្រព្យថ្មី មហាសេដ្ឋីជាពលរដ្ឋឥណ្ឌូណេស៊ី នេះ កំពុងមានទ្រព្យ 18.6 ពាន់លានដុល្លារអាម៉េរិក។ លោក Low ក៏ត្រូវបានចាត់ទុកថាជាស្ដេចរ៉ែធ្យូងថ្មនៅ ឥណ្ឌូណេស៊ី ផងដែរ។

Colin Zheng Huang (ជនជាតិចិន) ស្ថាបនិករបស់ផ្សារអនឡាញ Pinduoduo រកបានជាង 11 ពាន់លានដុល្លារបន្ថែមទៀតក្នុងឆ្នាំនេះ។ ភាគហ៊ុនរបស់ Pinduoduo ឡើងថ្លៃ 35% ចាប់ពីឆ្នាំដើម។ បច្ចុប្បន្ន Huang មានទ្រព្យ 31.6 ពាន់លានដុល្លារ។

ទ្រព្យរបស់ Wu Yiling (ជនជាតិចិន) ផ្សារភ្ជាប់ជាមួយនឹង Lianhua Qingwen ជារុក្ខជាតិឱសថបុរាណមួយប្រភេទជួយព្យាបាលកូវីដ-19 របស់ក្រុមហ៊ុន Shijianzhuang Yiling Pharmaceutical ដែលមានទីស្នាក់ការកណ្ដាលនៅប្រទេសចិន។ Wu គឺជាប្រធានក្រុមហ៊ុននេះ។ ឆ្នាំ 2022 លោក Wu រកបានប្រាក់ 4.1 ពាន់លានដុល្លារបន្ថែមទៀត បន្ទាប់ពីតម្លៃភាគហ៊ុន Shijiazhuang Yiling កើន 61%។

មហាសេដ្ឋីចុងក្រោយក្នុងបញ្ជី top 5 របស់ Forbes នេះ គឺអ្នកមានក្នុងវិស័យភេសជ្ជៈនៅ ឥណ្ឌា Ravi Jaipuria។ ឆ្នាំនេះ ប្រធានក្រុមហ៊ុន RJ Corp រកបាន 3.9 ពាន់លានដុល្លារបន្ថែមទៀត។ Varun Beverages គឺជាអ្នកវេចខ្ចប់ធំបំផុតរបស់ PepsiCo នៅលើពិភពលោក។ តម្លៃភាគហ៊ុនរបស់ក្រុមហ៊ុនផ្សេងទៀតរបស់ Jaipuria គឺ Devyani International ក៏កើន 12%។ ក្រុមហ៊ុននេះកំពុងដំណើរការអាហារដ្ឋានមួយចំនួនដូចជា KFC, Pizza Hut និង Costa Coffee ជាដើម នៅ ឥណ្ឌា៕

December 27, 2022

កម្ពុជា បើកការប្រកួតដណ្ដើមពានរង្វាន់ជើងឯកកីឡាទោចក្រយានថ្នាក់ជាតិឆ្នាំ 2022 ដើម្បីត្រៀមសម្រាប់ស៊ីហ្គេម 2023

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន បានប្រកាសបើកការប្រកួតកីឡាទោចក្រយាន ដើម្បីជ្រើសរើសជើងឯកថ្នាក់ជាតិ ប្រចាំឆ្នាំ 2022 ដែលធ្វើឡើងនៅ ខេត្តសៀមរាប នាព្រឹកថ្ងៃទី 27 ធ្នូនេះ។

ក្នុងពិធីបើកការប្រកួតដែលមានការចូលរួមពីក្រុមមន្ត្រីរបស់ ក្រសួងពាណិជ្ជកម្ម ថ្នាក់ដឹកនាំខេត្តសៀមរាប ក៏ដូចជាតំណាងក្រុមហ៊ុនឯកជននានា ក្រុមកីឡាករ កីឡាការិនី និងភ្ញៀវជាតិ-អន្តរជាតិ ឯកឧត្តម ប៉ាន សូរស័ក្តិ បានណែនាំឱ្យកីឡាករ-កីឡាការិនីទាំងអស់ត្រូវឈរលើស្មារតីកីឡា ដើម្បីសុខភាព សន្តិភាព មិត្តភាព សាមគ្គីភាព និងបង្កើនគុណផលបច្ចេកទេស។

ឯកឧត្តមប្រធានសហព័ន្ធ ក៏បានស្នើដល់មន្ត្រីគណៈកម្មការបច្ចេកទេសសហព័ន្ធខ្មែរកីឡាទោចក្រយាន ត្រូវខិតខំប្រឹងប្រែងយកអស់កម្លាំងកាយចិត្ត ប្រកបដោយស្មារតីទទួលខុសត្រូវខ្ពស់ក្នុងការរៀបចំព្រឹត្តិការណ៍នេះ។

យោងតាម ប្រធានសហព័ន្ធខ្មែរកីឡាទោចក្រយាន នេះជាការប្រកួតប្រចាំឆ្នាំចុងក្រោយហើយ មុននឹងដល់ពេលដែល កម្ពុជា ត្រូវធ្វើជាម្ចាស់ផ្ទះ រៀបចំការប្រកួតកីឡាស៊ីហ្គេមលើកទី 32 ឆ្នាំ 2023។

ក្រសួងពាណិជ្ជកម្ម ឱ្យដឹងថា ក្រោមគម្រោងថវិកាគាំទ្ររបស់ក្រសួងអប់រំ យុវជន និងកីឡា សហព័ន្ធខ្មែរកីឡាទោចក្រយាន សហការជាមួយរដ្ឋបាលខេត្តសៀមរាប រៀបចំការប្រកួតកីឡាទោចក្រយានជ្រើសរើសជើងឯកថ្នាក់ជាតិ ប្រចាំឆ្នាំ 2022 ដើម្បីជ្រើសរើសកីឡាករ-កីឡាការិនីឆ្នើមប្រចាំឆ្នាំ សម្រាប់ហ្វឹកហាត់បំប៉នសមត្ថភាព ត្រៀមចូលរួមការប្រកួតកីឡាស៊ីហ្គេម លើកទី 32 ឆ្នាំ 2023៕

December 27, 2022

ក្រុមជម្រើសជាតិថៃ ឈរលើកំពូលតារាងនៅ AFF Cup 2022 ក្រោយប៉ះ ហ្វ៊ីលីពីន កាលពីម្សិលមិញ

(ប្រទេសថៃ)- Teerasil Dangda រកបាន 2 គ្រាប់ និងបង្កឱកាសបាន 1 គ្រាប់ ជួយឱ្យ ក្រុមជម្រើសជាតិថៃ យកឈ្នះ ហ្វ៊ីលីពីន 4-0 ក្នុងពូល A នៅ AFF Cup 2022 កាលពីថ្ងៃទី 26 ធ្នូ 2022។

ក្រោយ 2 ប្រកួតដែលប៉ះនឹង ព្រុយណេ និង ហ្វ៊ីលីពីន ក្រុមបាល់ទាត់ជម្រើសជាតិថៃ បានស៊ុតផ្ដាច់រហូតដល់ 60 ដង ក្នុងនោះមាន 28 គ្រាប់ហោះចំទី ជួយឱ្យ ពួកគេរកបាន 9 គ្រាប់ និងមាន 6 ពិន្ទុ ដែលនាំឱ្យ ថៃ នាំមុខគេនៅពូល A ដោយសារតែ គ្រាប់បាល់ចំណេញ (goal difference) ច្រើនជាង ឥណ្ឌូណេស៊ី។

ក្រុមជម្រើសជាតិថៃ រក្សាសមាជិកក្រុមដដែល ធៀបនឹងការប្រកួតជាមួយ ព្រុយណេ ដែលនេះនាំឱ្យ ថៃ មិនពិបាកក្នុងការផ្ដួល ហ្វ៊ីលីពីន នៅលើទីលាន Thammasat នៅប្រទេសថៃ។

ក្រោយឈ្នះ ហ្វ៊ីលីពីន កាលពីម្សិលមិញ ក្រុមជម្រើសជាតិថៃ ដណ្ដើមបានតំណែងនាំមុខពូល A ពីដៃ ឥណ្ឌូណេស៊ី។ ហ្វ៊ីលីពីន ដែលបានបរាជ័យលើកទីពីរក្រោយ 3 ប្រកួត ទំនងជានឹងត្រូវជម្រុះ។ នៅជុំបន្ទាប់ ថៃ នឹងធ្វើជាភ្ញៀវនៅលើទីលានរបស់ ឥណ្ឌូណេស៊ី នៅថ្ងៃទី 29 ធ្នូ ចំណែក ហ្វ៊ីលីពីន វិញ បានសម្រាក។ ក្រុមហ្វ៊ីលីពីន នឹងប៉ះ ឥណ្ឌូណេស៊ី នៅជុំចុងក្រោយ ដែលត្រូវធ្វើឡើងនៅថ្ងៃទី 02 មករា 2023។

កីឡាករថៃ Teerasil Dangda អបអរជ័យជម្នះលើ ហ្វ៊ីលីពីន កាលពីថ្ងៃទី 26 ធ្នូ

AFF Cup 2022 (AFF Mitsubishi Electric Cup 2022) ថ្ងៃនេះនឹងមានការប្រកួតរវាង ឡាវ និង សិង្ហបុរី នៅម៉ោង 17 ល្ងាច ខណៈ វៀតណាម និង ម៉ាឡេស៊ី ប៉ះគ្នានៅម៉ោង 19 និង 30 នាទី។ ដោយឡែក កម្ពុជា វិញ នឹងជួបក្រុម ព្រុយណេ នៅថ្ងៃទី 29 ធ្នូខាងមុខ៕

December 27, 2022

Man Utd ត្រូវតែបំបែកឯតទគ្គកម្ម បើចង់ទិញកីឡាករវ័យក្មេងឆ្នើមបំផុតនៅ World Cup

ក្លឹប Man Utd និង Liverpool នឹងត្រូវបំបែកឯតទគ្គកម្មស្ដីពីតម្លៃនៃការដោះដូរ បើសិនជាចង់ទិញខ្សែបម្រើរបស់ អាហ្សង់ទីន Enzo Fernandez ពី Benfica។

យោងតាមសារព័ត៌មានអង់គ្លេស Sunsport ក្លឹប Benfica មិនមានចេតនាលក់ Fernandez ក្នុងតម្លៃ «ទាបជាង 1 សេន» ធៀបនឹងលក្ខខណ្ឌតម្លៃ 127 លានដុល្លារអាម៉េរិក។ ខ្សែបម្រើវ័យ 21 ឆ្នាំនេះ ទើបតែបានចូលរួមជាមួយក្លឹបរបស់ ព័រទុយហ្កាល់ កាលពីរដូវក្ដៅឆ្នាំនេះ ហើយកិច្ចសន្យានៅសល់រហូតដល់ឆ្នាំ 2027។

ដូច្នេះ Man Utd នឹងត្រូវបំបែកឯតទគ្គកម្មក្នុងការដោះដូររបស់ក្លឹប បើសិនចង់ទិញ Fernandez នៅខែមករា 2023។ ឯតទគ្គកម្មបច្ចុប្បន្នរបស់ Man Utd នៅតែជាករណីទិញដូរតម្លៃ 107 លានដុល្លារអាម៉េរិក ដែលបាននាំយកខ្សែបម្រើ Paul Pogba ត្រលប់ទៅកាន់ទីលាន Old Trafford កាលពីឆ្នាំ 2016។

ដូចគ្នានេះដែរ Liverpool ក៏ត្រូវបំបែកកំណត់ត្រា 102 លានដុល្លាររបស់ Darwin Nunez ពី Benfica នៅរដូវដោះដូរកីឡាករឆ្នាំ 2022 បើចង់ចុះកិច្ចសន្យាជាមួយ Fernandez នាពេលខាងមុខ។

ក្លឹប Newcastle ត្រូវបានគេជឿថា ជា «ចំណត» ថ្មីដែលមានសក្ដានុពលរបស់ Fernandez ប៉ុន្តែ គ្រូបង្វឹក Eddie Howe ទទួលស្គាល់ថា ថ្លៃដោះដូរកីឡាករនេះគឺខ្ពស់ណាស់។

ពី អេស្ប៉ាញ Real Madrid ក៏កំពុងស្រាវជ្រាវរកវិធីដើម្បីទិញ Fernandez ក្នុងករណីមិនអាចទិញ Jede Bellingham របស់ ក្រុមជម្រើសជាតិអង់គ្លេស។

Fernandez ទទួលបានការសាទរខ្លាំងនៅពេលបណ្ដើរបាល់ និងស៊ុតបាល់ហោះកោងខ្ពស់សំដៅទី ជួយឱ្យ អាហ្សង់ទីន ឈ្នះ ម៉ិកស៊ិក 2-0 ក្នុងការប្រកួតជុំទីពីរនៃវគ្គសន្សំពិន្ទុរបស់ World Cup 2022។ ក្រោយរកបាន 1 គ្រាប់នេះ Fernandez ក៏ក្លាយជាកីឡាករជម្រើសដំបូង ហើយត្រូវបានជ្រើសរើសជាកីឡាករវ័យក្មេងឆ្នើមបំផុតនៅ World Cup 2022។

Fernandez មានតម្លៃខ្លួនស្មើនឹងខ្សែបម្រើ Cristian Romero របស់ Tottenham ហើយក៏ជាកីឡាករដែលមានតម្លៃខ្លួនខ្ពស់ជាងគេលំដាប់ទីពីរក្នុង ក្រុមជម្រើសជាតិអាហ្សង់ទីន បន្ទាប់ពី Lautaro Martinez៕

December 26, 2022

ក្រសួងការងារជូនដំណឹងអំពីការជ្រើសរើសបេក្ខជនសម្រាប់អាហារូបករណ៍សម្រាប់ឆ្នាំសិក្សាថ្មី

នៅក្នុងចំណោមលក្ខខណ្ឌនៃចុះឈ្មោះសុំអាហារូបករណ៍ ក្រសួងផ្ដល់អាទិភាពចំពោះបេក្ខនារីក្រីក្រនៅតំបន់ដាច់ស្រយាល និងជនជាតិភាគតិច រួមនឹងជនពិការផងដែរ។

ក្រសួងការងារ និងបណ្តុះបណ្តាលវិជ្ជាជីវៈ ប្រកាសជូនដំណឹងថា ក្នុងឆ្នាំសិក្សា 2022-2023 ក្រសួងនឹងជ្រើសរើសបេក្ខជនចំនួន 24,238 នាក់ ឱ្យទទួលអាហារូបករណ៍ចូលរៀនកម្រិតសញ្ញាបត្របច្ចេកទេស និងវិជ្ជាជីវៈ 1 (C1) 2 (C2) និង 3 (C3) កម្រិតសញ្ញាបត្រជាន់ខ្ពស់/បរិញ្ញាបត្ររង បច្ចេកទេស/ឯកទេស (HDT/S) និងកម្រិតបរិញ្ញាបត្របច្ចេកវិទ្យា/ឯកទេស/សញ្ញាបត្រវិស្វករ (BT/S/BE) ទៅតាមចំនួន ជំនាញ/មុខរបរ និងគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈដូចក្នុងសេចក្ដីជូនដំណឹងខាងក្រោម។

ព័ត៌មានផ្សេងៗទៀត បេក្ខជនអាចធ្វើការទំនាក់ទំនងផ្ទាល់ជាមួយគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈនីមួយៗដែលខ្លួនមានបំណងចូលរៀន។

December 26, 2022

4 ក្រុមហ៊ុនគ្រោងវិនិយោគជាង 16 លានដុល្លារបង្កើតរោងចក្រថ្មីនៅកម្ពុជា

គម្រោងបង្កើតរោងចក្រថ្មីចំនួន 4 កន្លែងនៅ ភ្នំពេញ និងខេត្តព្រះសីហនុ ដែលមានទុនវិនិយោគសរុបប្រមាណជាង 16 លានដុល្លារអាម៉េរិកនេះ នឹងបង្កើតការងារជាង 700 នាក់។

គណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាគម្រោងវិនិយោគ ជូនដល់ក្រុមហ៊ុនចំនួន 4 រួមមាន ៖

ក្រុមហ៊ុន QUAN MING SHUN (CAMBODIA) NEW MATERIALS CO., LTD. ៖ គម្រោងបង្កើតរោងចក្រផលិតក្តារប៉ាកេ និងក្តារបន្ទះ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, ក្នុងទុនវិនិយោគប្រមាណ 6.6 លានដុល្លារអាម៉េរិក និងអាចបង្កើតការងារបានចំនួនប្រមាណ 300 នាក់។

ក្រុមហ៊ុន CHUANGJU PLASTICS (CAMBODIA) CO., LTD. ៖ គម្រោងបង្កើតរោងចក្រផលិតថង់ប្លាស្ទិក ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, ក្នុងទុនវិនិយោគប្រមាណ 6.1 លានដុល្លារអាម៉េរិក និងអាចបង្កើតការងារបានចំនួនប្រមាណ 300 នាក់។

ក្រុមហ៊ុន TB PACKAGING (CAMBODIA) CO., LTD. ៖ គម្រោងបង្កើតរោងចក្រផលិតផលិតផលធ្វើពីក្រដាស ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ, ខេត្តព្រះសីហនុ, ក្នុងទុនវិនិយោគចំនួន 2 លានដុល្លារអាម៉េរិក និងអាចបង្កើតការងារបានចំនួនប្រមាណ 80 នាក់។

ក្រុមហ៊ុន VP PRINTING AND PACKAGING CO., LTD. ៖ គម្រោងបង្កើតរោងចក្របោះពុម្ព និងផលិតផលិតផលវិចខ្ចប់ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស រ៉ូលយ៉ាល់ គ្រុប ភ្នំពេញ, រាជធានីភ្នំពេញ ក្នុងទុនវិនិយោគប្រមាណ 1.6 លានដុល្លារអាម៉េរិក និងអាចបង្កើតការងារបានចំនួនប្រមាណ 60 នាក់៕

December 26, 2022

ក្រុមហ៊ុនចិន អភិវឌ្ឍបណ្ដាញផ្កាយរណបផ្គត់ផ្គង់អ៊ីនធើណិតដូច Starlink

ក្រុមហ៊ុនឯកជន GalaxySpace របស់ ប្រទេសចិន កំពុងបង្កើនល្បឿនក្នុងការស្រាវជ្រាវ និងអភិវឌ្ឍ «បណ្ដុំផ្កាយរណប» ដើម្បីបង្កើតបណ្ដាញបញ្ជូនអ៊ីនធើណិត 5G ទូទាំងសកលលោក។

GalaxySpace បានឱ្យដឹងថា បណ្ដាញផ្កាយរណបអ៊ីនធើណិតដែលពួកគេរចនាឡើង អាចដាក់ត្រួតលើគ្នារាប់សិបគ្រឿង និងបាញ់បង្ហោះដំណាលគ្នាក្នុងរ៉ុក្កែតតែមួយ ដែលនេះអាចជួយកាត់បន្ថយការចំណាយទៅលើការប្រើប្រាស់រ៉ុក្កែត និងពេលវេលាសម្រាប់សាងសង់បណ្ដាញផ្កាយរណប។

ក្រុមហ៊ុន GalaxySpace បានកំណត់គោលដៅបាញ់បង្ហោះបណ្ដាញផ្កាយរណបទៅក្នុងគន្លងគោចរកម្រិតទាបរបស់ផែនដី និងបង្កើតបណ្ដាញអ៊ីនធើណិត 5G នៅទូទាំងពិភពលោក។ កាលពីថ្ងៃទី 05 មីនា 2022 ក្រុមហ៊ុននេះបានបាញ់បង្ហោះផ្កាយរណប 6 គ្រឿងពីមជ្ឈមណ្ឌលបាញ់បង្ហោះផ្កាយរណប Xichang ជាទីដែលបានបញ្ជាក់អំពីបច្ចេកវិទ្យាអ៊ីនធើណិត និងសមត្ថភាពនៃការផ្ដល់សេវាកម្មរបស់ «បណ្ដុំផ្កាយរណបអ៊ីនធើណិត»។

Chang Ming ប្រធានគម្រោងផ្កាយរណបរបស់ GalaxySpace បានឱ្យដឹងថា ការអភិវឌ្ឍប្រព្រឹត្តទៅបានរលូន។ ផ្កាយរណបដែលអាចត្រូវបានដាក់ត្រួតលើគ្នារបស់ក្រុមហ៊ុននេះនឹងត្រូវបានបាញ់បង្ហោះនៅដើមឆ្នាំក្រោយ៕

December 26, 2022

«បញ្ជីឈ្មោះក្រុមកីឡាករបាល់ទាត់ឆ្នើមបំផុតប្រចាំឆ្នាំ 2022» របស់ L’Équipe

Lionel Messi និង Kylian Mbappe ជាដើម សុទ្ធតែមានឈ្មោះ ប៉ុន្តែ Cristiano Ronaldo វិញ មិនមានវត្តមាននៅក្នុងបញ្ជីឈ្មោះស្ដីពីកីឡាករឆ្នើមបំផុតប្រចាំឆ្នាំ 2022 ដែលជ្រើសរើសដោយទីភ្នាក់ងារសារព័ត៌មានកីឡាបារាំង L’Équipe។

ក្នុងក្រុមទម្រង់ 4-4-2 ដែល L’Équipe បានប្រកាសកាលពីថ្ងៃទី 24 ធ្នូ 2022 Mbappe និង Karim Benzema ត្រូវបានដាក់ជាគូនៅលើខ្សែប្រយុទ្ធ។ Mbappe ទទួលបានជោគជ័យក្នុងឆ្នាំនេះ ទាំងនៅក្នុងថ្នាក់ក្លឹប ទាំងថ្នាក់ក្រុមជម្រើសជាតិ ដោយរកបាន 55 គ្រាប់។ ខ្សែប្រយុទ្ធវ័យ 24 ឆ្នាំនេះ បង្កើតបាន hat-trick (ស៊ុតបញ្ចូលទី 3 គ្រាប់ក្នុង 1 ប្រកួត) ក្នុងវគ្គផ្ដាច់ព្រ័ត្រនៅ World Cup 2022 ពេលប៉ះនឹង អាហ្សង់ទិន ហើយដណ្ដើមបានស្បែកជើងមាសសម្រាប់តំណែងស្ដេចកម្ទេចសំណាញ់ ដោយរកបាន 8 គ្រាប់ និងដណ្ដើមបានពាន Ligue 1 ជាមួយនឹងក្លឹប PSG។

Benzema មិនបានចូលរួមប្រកួតនៅ World Cup 2022 ប៉ុន្តែ ជាកីឡាខ្លាំងនៅថ្នាក់ក្លឹប ដោយសាររកបានពានរង្វាន់ធំៗចំនួន 3 ក្នុង 1 រដូវកាល (Treble) រួមមាន Super Cup អេស្ប៉ាញ, La Liga, Champions League នាំឱ្យគាត់ទទួលបានគ្រាប់បាល់មាស។ ជាសរុប Benzema ស៊ុតបញ្ចូលទីបាន 31 គ្រាប់ក្នុង 12 ខែកន្លង។

កីឡាករបារាំង មួយរូបផ្សេងទៀតដែលមានឈ្មោះក្នុងបញ្ជីរបស់ L’Équipe គឺ Theo Hernandez។ ចំណែក Messi ត្រូវបានដាក់ក្នុងខ្សែបម្រើខាងស្ដាំក្នុងក្រុមរបស់ L’Équipe។ Messi មិនសូវជោគជ័យនៅ PSG ប៉ុន្តែ នៅ World Cup 2022 កីឡាករអាហ្សង់ទីន រូបនេះ ដណ្ដើមបានពានរង្វាន់ជាច្រើន ដោយស៊ុតបញ្ចូលទីបាន 7 គ្រាប់។

L’Équipe ក៏បានលើកតម្កើង កីឡាករ 4 រូបនៅ លីគកំពូលអង់គ្លេស (English Premier League) គឺ Kevin de Bruyne, Kyle Walker, Casemiro និង Virgil van Dijk។ អតីតមិត្តរួមក្រុមពីរនាក់របស់កីឡាករប្រេស៊ីល គឺ ខ្សែបម្រើ Luka Modriic និងអ្នកចាំទី Thibaut Courtois ក៏មានវត្តមានផងដែរ។

ទីតាំងចុងក្រោយក្នុងក្រុមរបស់ L’Équipe គឺបានទៅលើ Josko Gvardiol។ នៅ World Cup 2022 ខ្សែការពារវ័យ 20 ឆ្នាំនេះ ទប់ស្កាត់បាល់បាន 37 លើក និងអូសបាល់ឡើងទៅលើបាន 202 លើក ហើយដណ្ដើមបានបាល់ 48 លើក។

បញ្ជីឈ្មោះក្រុមកីឡាករបាល់ទាត់ឆ្នើមបំផុតឆ្នាំ 2022 របស់ L’Équipe

Cristiano Ronaldo មិនមានឈ្មោះក្នុងបញ្ជីនេះរបស់ L’Équipe។ នៅ Man Utd កីឡាករនេះបាត់បង់តំណែងជាកីឡាករជម្រើសដំបូង និងរកបានតែ 3 គ្រាប់។ នៅ World Cup 2022 Ronaldo ក៏រកបានតែ 1 គ្រាប់ និងបាត់បង់តំណែងជាកីឡាករជម្រើសដំបូងនៅពេល ព័រទុយហ្កាល់ ឈ្មោះ ស្វ៊ីស 6-1 ក្នុងវគ្គ 18 ក្រុម និងចាញ់ ម៉ារ៉ុក 0-1 ក្នុងវគ្គ 8 ក្រុម។

L’Équipe គឺជាទីភ្នាក់ងារសារព័ត៌មានកីឡាដែលត្រូវបានបង្កើតឡើងកាលពីឆ្នាំ 1946 និងមានឈ្មោះល្បីល្បាញ និងពេញនិយមជាងគេនៅ ប្រទេសបារាំង៕

December 26, 2022

កម្ពុជា បើកការដ្ឋានស្ដារ និងលើកកម្រិតគុណភាពផ្លូវជាតិលេខ 41 ពីខេត្តកណ្ដាលដល់ខេត្តកំពក

ផ្លូវជាតិលេខ 41 អតីតផ្លូវព្រះបាទអង្គឌួង ពីថ្នល់ទទឹង ខេត្តកណ្ដាល រហូតដល់ស្រុកជុំគិរី ខេត្តកំពត ត្រូវបានប្រកាសបើកការដ្ឋានស្ដារ និងលើកកម្រិតគុណភាពនៅព្រឹកថ្ងៃទី 26 ធ្នូ 2022 នេះបើតាម ក្រសួងសាធារណការ និងដឹកជញ្ជូន។

ក្នុងពិធីសម្ពោធក្រោមអធិបតីភាពសម្ដេចតេជោ ហ៊ុន សែន ឯកឧត្ដមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានឱ្យដឹងថា គម្រោងស្ដារ និងលើកកម្រិតគុណភាពផ្លូវជាតិលេខ 41 នឹងត្រូវសាងសង់ជាប្រភេទផ្លូវក្រាលបេតុងកៅស៊ូ AC កម្រាស់ 5 សង់ទីម៉ែត្រ និងពង្រីកទទឹងតួផ្លូវរហូតដល់ 12 ម៉ែត្រ។ គម្រោងនេះ នឹងពង្រីកស្ពានចាស់ចំនួន 1 កន្លែង ដាក់លូ បំពាក់កាមេរ៉ាត្រួតពិនិត្យល្បឿនជាដើម។ល។

ផ្លូវជាតិលេខ 41 នេះ ឆ្លងកាត់ខេត្តចំនួន 4 រួមមាន ខេត្តកណ្តាល កំពង់ស្ពឺ តាកែវ និងខេត្តកំពត ក៏ដូចជាតភ្ជាប់ទៅកាន់កំពង់ផែពហុបំណងខេត្តកំពត និងមជ្ឈមណ្ឌលភស្តុភារកម្មដែលកំពុងសាងសង់ កំពង់ផែទេសចរណ៍ខេត្តកំពត និងកំពង់ផែទេសចរណ៍ខេត្តកែប-កោះទន្សាយ ដែលទើបសាងសង់រួច។ តាមរយៈខ្សែផ្លូវជាតិលេខ 3 លេខ 4 លេខ 31 និងលេខ 33 ផ្លូវជាតិលេខ 41 នេះក៏តភ្ជាប់ទៅតំបន់ទេសចរណ៍ធម្មជាតិ ដែលនៅតាមបណ្តាខេត្តព្រះសីហនុ ខេត្តកែប និងខេត្តកំពតផងដែរ។

គម្រោងដែលមានប្រវែងសរុបជាង 95 គីឡូម៉ែត្រ គិតចាប់ពីថ្នល់ទទឹង (ចំណុចប្រសព្វផ្លូវជាតិលេខ 4) ខេត្តកណ្តាល ទៅដល់ស្រុកជុំគិរី (ចំណុចប្រសព្វផ្លូវជាតិលេខ 3) ខេត្តកំពត នេះ នឹងត្រូវអនុវត្តការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន (CRBC) ហើយគ្រោងនឹងបញ្ចប់ការសាងសង់នៅអំឡុងឆ្នាំ 2026។ គម្រោងនេះនឹងចំណាយថវិកាសរុបជាង 67 លានដុល្លារអាមេរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន និងថវិកាបដិភាគរបស់រាជរដ្ឋាភិបាលកម្ពុជា៕

December 26, 2022

តម្លៃខ្លួនរបស់កីឡាករជម្រើសជាតិអាហ្សង់ទីន កើនឡើងខ្ពស់ ក្រោយ World Cup 2022

តម្លៃខ្លួនរបស់ក្រុមជម្រើសជាតិអាហ្សង់ទីន កើន 69 លានដុល្លារអាម៉េរិក បន្ទាប់ពីដណ្ដើមបានពានរង្វាន់ជើងឯក World Cup 2022 នេះបើតាមសារព័ត៌មានកីឡារបស់ អាល្លឺម៉ង់ Transfermarkt ចុះផ្សាយកាលពីថ្ងៃទី 23 ធ្នូ។

ក្រុមជម្រើសជាតិអាហ្សង់ទីន មានកីឡាករ 7 រូបដែលមានតម្លៃខ្លួនកើនឡើងខ្ពស់នៅក្នុងទីផ្សារទិញដូរកីឡាករ ពិសេសគឺ Enzo Fernandez។ ដោយតម្លៃខ្លួនកើនពី 37 លាន ឡើងដល់ 58 លានដុល្លារអាម៉េរិក Fernandez គឺជាកីឡាករដែលមានតម្លៃខ្លួនកើនឡើងខ្ពស់ខ្លាំងជាងគេនៅឆ្នាំ 2022។

កាលពីរដូវក្ដៅ 2021 Benfica ទិញកីឡាករ Fernandez វ័យ 21 ឆ្នាំ ពី River Plate ក្នុងតម្លៃមិនដល់ 13 លានដុល្លារអាម៉េរិក។ Benfica ត្រូវបានគេជឿថា នឹងរកបានប្រាក់ចំណេញច្រើនពីការដោះដូរកីឡាករ Fernandez នៅរដូវកាលទិញដូរកីឡាករខាងមុខ។ កិច្ចសន្យារបស់ Fernandez ជាមួយនឹង Benfica នៅមានសុពលភាពដល់ឆ្នាំ 2027។

Fernandez ទទួលបានការសាទរខ្លាំងនៅពេលបណ្ដើរបាល់ និងស៊ុតបាល់ហោះកោងខ្ពស់សំដៅទី ជួយឱ្យ អាហ្សង់ទីន ឈ្នះ ម៉ិកស៊ិក 2-0 ក្នុងការប្រកួតជុំទីពីរនៃវគ្គសន្សំពិន្ទុរបស់ World Cup 2022។ ក្រោយរកបាន 1 គ្រាប់នេះ Fernandez ក៏ក្លាយជាកីឡាករជម្រើសដំបូង ហើយត្រូវបានជ្រើសរើសជាកីឡាករវ័យក្មេងឆ្នើមបំផុតនៅ World Cup 2022។ Fernandez មានតម្លៃខ្លួនស្មើនឹងខ្សែបម្រើ Cristian Romero របស់ Tottenham ហើយក៏ជាកីឡាករដែលមានតម្លៃខ្លួនខ្ពស់ជាងគេលំដាប់ទីពីរក្នុង ក្រុមជម្រើសជាតិអាហ្សង់ទីន បន្ទាប់ពី Lautaro Martinez។

ក្នុង ក្រុមជម្រើសជាតិអាហ្សង់ទីន ក្រៅពី Fernandez ក៏នៅមានកីឡាករច្រើនរូបទៀតដែលមានតម្លៃខ្លួនកើនឡើងខ្ពស់ រួមមានដូចជា Julian Alvarez កើនពី 34 លាន ឡើងដល់ 53 លានដុល្លារអាម៉េរិក និង Lionel Messi 53 លានដុល្លារ។

កីឡាករអាហ្សង់ទីន ដែលត្រូវបានកំណត់តម្លៃខ្លួនទាបជាងគេគឺ Nicolas Otamendi (3.1 លានដុល្លារ), Franco Armani (3.4 លាន), Alejandro Gomez (4.2 លាន) និង German Pezzella (5.3 លាន)។ ចំណែកកីឡាករលេចធ្លោ រួមមាន Emiliano Martinez (26.6 លាន), Alexis Mac Allister (34 លាន), Rodrigo De Paul (37 លាន), និង Nahuel Molina (19 លាន)។

តម្លៃខ្លួនសរុបរបស់កីឡាករជម្រើសជាតិអាហ្សង់ទីន នាបច្ចុប្បន្នគឺ 757 លានដុល្លារអាម៉េរិក ខ្ពស់ជាង 69 លានដុល្លារ ធៀបនឹង 688 លានដុល្លារ មុន World Cup 2022៕

December 24, 2022

Category: សង្គម និងសេដ្ឋកិច្ច