សង្គម និងសេដ្ឋកិច្ច - La Reine Media

ករណីឆេះកាស៊ីណូនៅ ប៉ោយប៉ែត ៖ ប្រហែល 50 នាក់កំពុងជាប់គាំង ខណៈរាប់សិបនាក់ត្រូវបានសង្គ្រោះ

ករណីអគ្គិភ័យដ៏ធំមួយបានកើតឡើងនៅក្នុងកាស៊ីណូ និងសណ្ឋាគារ Grand Diamond City ដែលមានទីតាំងនៅ ក្រុងប៉ោយប៉ែត ខេត្តបន្ទាយមានជ័យ កាលពីយប់ថ្ងៃទី 28 ធ្នូ 2022។

យ៉ាងហោចណាស់មានមនុស្ស 10 បានស្លាប់ ដែលភាគច្រើនជាជនជាតិថៃ និងប្រហែល 30 នាក់រងរបួស នៅក្នុងហេតុការណ៍អគ្គិភ័យនៅកាស៊ីណូខាងលើ។

មូលហេតុនៃករណីអគ្គិភ័យត្រូវបានគេជឿថា កើតឡើងដោយសារការផ្ទុះធុងហ្កាសនៅខាងក្នុងកាស៊ីណូ។ អណ្ដាតភ្លើងបានឆាបឆេះច្រើនម៉ោង បណ្ដាលឱ្យមួយផ្នែករបស់អគារត្រូវស្រុត។

កម្លាំងពន្លត់អគ្គិភ័យគ្រប់គ្រងអណ្ដាតភ្លើងបានស្ទើរទាំងស្រុងហើយ។ គិតត្រឹមព្រឹកថ្ងៃនេះ មនុស្សចំនួន 50 នាក់ត្រូវបានជួយសង្គ្រោះ ប៉ុន្តែនៅមានប្រហែល 50 នាក់ទៀតកំពុងជាប់គាំងខាងក្នុងសណ្ឋាគារ។ កាស៊ីណូនេះមានបុគ្គលិកប្រហែល 400 នាក់កំពុងធ្វើការ៕

December 29, 2022

ស្ពានឆ្លងផ្លូវមានរង្វង់មូលលើអាកាសដំបូងគេនៅកម្ពុជា ចាប់ផ្ដើមការសាងសង់

(ភ្នំពេញ)- នៅប៉ុន្មានថ្ងៃទៀតប៉ុណ្ណោះ គ្រឿងចក្រជាច្រើនទៀតសម្រាប់ការសាងសង់ស្ពានអាកាសព្រះមុនីវង្ស នៅក្នុងទឹកដីខណ្ឌចំការមន និងខណ្ឌមានជ័យ នឹងត្រូវបាននាំមកកាន់ការដ្ឋាន នេះបើតាម ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ឱ្យដឹងកាលពីម្សិលមិញ។

មកដល់បច្ចុប្បន្ន ស្ពានអាកាសព្រះមុនីវង្ស ដែលជាស្ពាន 2 ជាន់ បានចាប់ផ្តើមដំណើរការក្នុងការដ្ឋានសាងសង់ដោយមានគ្រឿងចក្រ និងអ្នកជំនាញបច្ចេកទេសកំពុងធ្វើការ បន្ទាប់ពីត្រូវបានសម្ពោធបើកការដ្ឋានកាលពីព្រឹកថ្ងៃទី 31 ខែសីហា 2022។

យោងតាមលោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនភ្នំពេញ ស្ពានដែលសាងសង់ដោយ ក្រុមហ៊ុនវិនិយោគអាណិកជនកម្ពុជា OCIC នេះ នឹងជួយសម្រួលការធ្វើចរាចរណ៍ក្នុងរាជធានីភ្នំពេញ បានមួយផ្នែកធំ។

ស្ពានអាកាសព្រះមុនីវង្ស ដែលមានចំណុចប្រសព្វត្រង់មហាវិថីសម្តេចតេជោ ហ៊ុន សែន និងមហាវិថីព្រះមុនីវង្ស ជាមួយវិថីកងយោធពលខេមរភូមិន្ទនេះ ត្រូវចំណាយថវិកា 36,776,500 ដុល្លារអាម៉េរិក និងចំណាយពេលសាងសង់ចំនួន 36 ខែ នេះបើតាម ប្រមុខរាជរដ្ឋាភិបាល ដែលបានថ្លែងក្នុងឱកាសសម្ពោធបើកការដ្ឋានកាលពីខែសីហា។

បច្ចុប្បន្ន នៅក្នុង រាជធានីភ្នំពេញ មានស្ពានអាកាសចំនួន 6 ត្រូវបានដាក់ឱ្យប្រើប្រាស់ រួមមាន ស្ពានអាកាសក្បាលថ្នល់, ស្ពានអាកាស 7 មករា (ពេទ្យលោកសង្ឃ), ស្ពានអាកាស និងផ្លូវក្រោមដីស្ទឹងមានជ័យ, ស្ពានអាកាស និងផ្លូវក្រោមដី 5 មករា (តិចណូ), ស្ពានអាកាសមិត្តភាពកម្ពុជា-ចិនសែនសុខ (ផ្សារដីហុយ), ស្ពានអាកាស និងផ្លូវក្រោមដីចោមចៅ។ ចំណែក ស្ពានអាកាសឫស្សីកែវ កំពុងដំណើរការសាងសង់នៅឡើយ៕

December 29, 2022

(AFF Cup 2022)- ក្នុងប្រកួតនៅរសៀលនេះ គ្រូបង្វឹកឥណ្ឌូណេស៊ី ប្ដេជ្ញាផ្ដួលក្រុមជម្រើសជាតិថៃ ឱ្យបាន

(ឥណ្ឌូណេស៊ី)- យោងតាមគ្រូបង្វឹក Shin Tae-yong ក្រុមបាល់ទាត់ជម្រើសជាតិឥណ្ឌូណេស៊ី កំពុងមានវឌ្ឍនភាពល្អ ហើយអ្នកគាំទ្រអាចជឿជាក់បានថានឹងមានលទ្ធផលប្រសើរ នៅរសៀលថ្ងៃទី 29 ធ្នូនេះ នៅពេល ឥណ្ឌូណេស៊ី ត្រូវប៉ះ ថៃ នៅ AFF Cup 2022។

Shin Tae-yong ធ្លាប់ជួយឱ្យក្រុមជម្រើសជាតិកូរ៉េខាងត្បូង ដណ្ដើមបានជោគជ័យមួយចំនួននៅ World Cup 2018 ដូច្នេះ លោកក៏ត្រូវបានគេរំពឹងខ្ពស់នៅពេលដឹកនាំក្រុមឥណ្ឌូណេស៊ី។ ប៉ុន្តែ ក្រោម «បញ្ជាការ» របស់លោក Tae-yong ក្រុមឥណ្ឌូណេស៊ី មិនទាន់បង្កើតបានភាពអស្ចារ្យនៅឡើយ ពិសេសនៅក្នុងការប្រកួតច្រើនលើកជាមួយនឹង ថៃ។

ឥណ្ឌូណេស៊ី និង ថៃ ធ្លាប់រកបាន 2 គ្រាប់ស្មើគ្នានៅជុំទីពីរនៃវគ្គជម្រុះនៅ World Cup 2022, ឥណ្ឌូណេស៊ី ចាញ់ ថៃ 0-4 នៅពេលធ្វើជាម្ចាស់ផ្ទះ និង 2-2 នៅពេលធ្វើជាភ្ញៀវក្នុងវគ្គផ្ដាច់ព្រ័ត្រនៅ AFF Cup 2020។ នៅពេលដឹកនាំក្រុម U23 របស់ ឥណ្ឌូណេស៊ី កូនសិស្ស និងគ្រូបង្វឹក Tae-yong ក៏បន្តចាញ់ U23 របស់ ថៃ នៅវគ្គពាក់កណ្ដាលផ្ដាច់ព្រ័ត្រ SEA Games 2021 ផងដែរ។

ក៏ប៉ុន្តែ នៅមុនការប៉ះគ្នានៅជុំទីបួនក្នុងពូល A របស់ AFF Cup 2022 ដែលនឹងធ្វើឡើងនៅរសៀលនេះ គ្រូបង្វឹកជនជាតិកូរ៉េខាងត្បូង Shin Tae-yong សន្យាថា នឹងផ្ដួលក្រុមជម្រើសជាតិថៃ៕

December 29, 2022

(AFF Cup 2022)- គ្រូបង្វឹកក្រុមជម្រើសជាតិថៃ មិនញញើតនឹងអ្នកគាំទ្ររបស់ ឥណ្ឌូណេស៊ី

(ឥណ្ឌូណេស៊ី)- គ្រូបង្វឹក Mano Polking ចូលចិត្តភាពខ្លាំងក្លានៅកីឡដ្ឋាន Gelora Bung Karno និងមានជំនឿថា ក្រុមបាល់ទាត់ជម្រើសជាតិថៃ នឹងយកឈ្នះលើក្រុមម្ចាស់ផ្ទះឥណ្ឌូណេស៊ី នៅជុំទីបួនក្នុងពូល A របស់ AFF Cup 2022 ដែលនឹងធ្វើឡើងនៅម៉ោង 16 និង 30 នាទីថ្ងៃទី 29 ធ្នូនេះ។

Gelora Bung Karno ដែលអាចដាក់មនុស្សបាន 80,000 នាក់ ត្រូវបានចាត់ទុកថាជាកីឡដ្ឋានធំជាងគេមួយលើពិភពលោក។ ប៉ុន្តែ ក្រោយហេតុការណ៍ស្លាប់មនុស្សរាប់រយនាក់កាលពីខែតុលានៅទីលាន Kanjuruhan កីឡដ្ឋាន Bung Karno ក៏ត្រូវបានអនុញ្ញាតឱ្យទទួលទស្សនិកជនត្រឹមតែ 25,000 នាក់ប៉ុណ្ណោះ នៅក្នុងការប្រកួតជាមួយ កម្ពុជា និង 40,000 នាក់នៅពេលប៉ះនឹង ក្រុមថៃ នាពេលខាងមុខ។ យ៉ាងនេះក៏ដោយ ចំនួននេះក៏នៅតែជាចំណុចពឹងផ្អែកធំសម្រាប់ការលើកទឹកចិត្តរបស់ ក្រុមជម្រើសជាតិឥណ្ឌូណេស៊ី។

នៅពេលត្រូវបានសួរអំពីសម្ពាធផ្លូវចិត្តពីអ្នកគាំទ្រក្រុមម្ចាស់ផ្ទះ គ្រូបង្វឹករបស់ ថៃ Mano Polking ក៏បានបង្ហាញភាពមិនយកចិត្តទុកដាក់។ «ពួកយើងចាត់ទុកថា នោះគឺជាការលើកទឹកចិត្តក្នុងការប្រកួត» លោក Mano ឆ្លើយតបដូច្នេះ និងបន្តថា «យើងមានកីឡាករដែលមានបទពិសោធន៍ច្រើនដូចជា Teerasil Dangda, Theerathon Bunmathan ឬ Sarach Yooyen។ ពួកគេធ្លាប់ឆ្លងកាត់ស្ថានការណ៍ប្រកួតបែបនេះជាច្រើនលើក ហើយពួកគេដឹងថាត្រូវជួយដល់មិត្តរួមក្រុមបែបណានៅក្នុងស្ថានការណ៍លំបាក»។

ក្រោយពីឆ្លងកាត់បាន 2 ប្រកួត និងដណ្ដើមបាន 6 ពិន្ទុដូចគ្នានៅ AFF Cup 2022 ក្រុមជម្រើសជាតិថៃ បច្ចុប្បន្នមាន គ្រាប់បាល់ចំណេញ +9 ច្រើនជាង 1 គ្រាប់ធៀបនឹង +8 របស់ ឥណ្ឌូណេស៊ី។ ក្រុមណាដែលបានឈ្នះនៅថ្ងៃនេះ (29 ធ្នូ) នឹងនាំមុខគេនៅពូល A ជាក់ជាមិនខាន។

នៅក្នុងការប្រកួតវគ្គផ្ដាច់ព្រ័ត្រ AFF Cup 2020 ក្រុមថៃ បានឈ្នះលើ ឥណ្ឌូណេស៊ី 4-0 ពេលធ្វើជាភ្ញៀវ និងស្មើគ្នា 2-2 ពេលធ្វើជាម្ចាស់ផ្ទះ មុនពេលឡើងទទួលពានរង្វាន់ជើងឯក។ ថ្វីបើដូច្នោះក៏ដោយ តែគ្រូបង្វឹក Polking នៅតែវាយតម្លៃខ្ពស់ទៅលើសមភាគី Shin Tae-yong គ្រូបង្វឹករបស់ ក្រុមឥណ្ឌូណេស៊ី ដែលធ្លាប់បានជួយឱ្យ កូរ៉េខាងត្បូង យកឈ្នះលើ អាល្លឺម៉ង់ ក្នុងវគ្គសន្សំពិន្ទុនៅ World Cup 2018។

នៅ AFF Cup 2022 គ្រូបង្វឹក Polking យល់ថា ក្រុមជម្រើសជាតិជើងខ្លាំងចំនួន 3 ដែលអាចប្រកួតប្រជែងជាមួយ ថៃ សម្រាប់តំណែងជើងឯក រួមមាន ឥណ្ឌូណេស៊ី, ម៉ាឡេស៊ី និង វៀតណាម៕

December 29, 2022

ការប្រកួតវគ្គផ្ដាច់ព្រ័ត្រ AFF Cup 2020 នឹងកើតឡើងជាថ្មីនៅជុំចុងក្រោយនៃពូល A របស់ AFF Cup 2022

យោងតាមព័ត៌មានពីទំព័របាល់ទាត់អាស៊ាន (ASEAN FOOTBALL) ទិដ្ឋភាពចាស់នៅវគ្គផ្ដាច់ព្រ័ត្រ AFF Cup 2020 រវាង ឥណ្ឌូណេស៊ី និង ថៃ ដែលនឹងបង្ហាញជាថ្មីនៅថ្ងៃស្អែត ទទួលបានការគាំទ្រដ៏សម្បើមពីទស្សនិកជន។

ជាក់ស្ដែង បើទោះជា សហព័ន្ធកីឡាបាល់ទាត់ឥណ្ឌូណេស៊ី បានបញ្ចេញសំបុត្រ 50,000 សម្រាប់ការប្រកួត «វគ្គផ្ដាច់ព្រ័ត្រ» របស់ពូល A នៅ AFF Cup 2022 រវាង ឥណ្ឌូណេស៊ី និង ថៃ ប៉ុន្តែក្រោយការដាក់លក់តែប៉ុន្មានម៉ោងប៉ុណ្ណោះ សំបុត្រទាំងនោះត្រូវបានទិញអស់គ្មានសល់។

នេះគឺជាការប្រកួតដែលត្រូវបានចាត់ទុកថាសំខាន់នៅពូល A របស់ AFF Cup 2022។ ថៃ គឺជាគូប្រជែងដែលមាន «និស្ស័យ» ច្រើនជាមួយនឹង ឥណ្ឌូណេស៊ី។ នៅពានរង្វាន់ AFF Cup កន្លងទៅថ្មីៗដែលធ្វើឡើងនៅ សិង្ហបុរី «ដំរីប្រយុទ្ធថៃ» ដណ្ដើមបានពាន់រង្វាន់ជើងឯកពី ឥណ្ឌូណេស៊ី ធ្វើឱ្យក្រុមជម្រើសជាតិរបស់ប្រទេសដែលមានកោះច្រើនជាងគេលំដាប់ទី 6 លើលោក ត្រូវជាប់លេខ 2 ជាលើកទី 6 នៅក្នុងការប្រកួតពានរង្វាន់ធំបង្អស់ប្រចាំ ASEAN។

បច្ចុប្បន្ន ទាំង ឥណ្ឌូណេស៊ី ទាំង ថៃ សុទ្ធតែកំពុងបញ្ចេញអំណាចដ៏អស្ចារ្យនៅ AFF Cup 2022 ដោយរកបាន 6 ពិន្ទុដូចគ្នាក្រោយការប្រកួត 2 ជុំ និងស៊ុតបញ្ចូលទីបានច្រើនគ្រាប់។ ថៃ កំពុងនាំមុខបណ្ដោះអាសន្នលើគូប្រជែង ដោយមានគ្រាប់បាល់ចំណេញ (goal different) ច្រើនជាងតែ 1 គ្រាប់ប៉ុណ្ណោះ។

ក្រុមបាល់ទាត់ជម្រើសជាតិឥណ្ឌូណេស៊ី នឹងត្រូវប្រកួតជាមួយជើងឯកថៃ នៅវេលាម៉ោង 16 និង 30 នាទី ថ្ងៃទី 29 ធ្នូ 2022 ខាងមុខ៕

December 28, 2022

Volkswagen នឹងបញ្ចេញរថយន្តអគ្គិសនីម៉ូដែលថ្មីមួយនៅក្នុងពិព័រណ៍ CES 2023

កាលពីថ្ងៃទី 27 ធ្នូ 2022 ក្រុមហ៊ុន Volkswagen បានបញ្ជាក់ថា សមាជិកថ្មីនៅក្នុងប្រភេទរថយន្តអគ្គិសនីរបស់ខ្លួននឹងត្រូវបានបង្ហាញនៅឯពិព័រណ៍អេឡិចត្រូនិក CES ឆ្នាំ 2023 ដែលនឹងធ្វើឡើងនៅដើមឆ្នាំក្រោយ។

ក្រុមហ៊ុនផលិតរថយន្តរបស់ អាល្លឺម៉ង់ នេះ មិនទាន់បង្ហើបឱ្យដឹងអំពីព័ត៌មានណាមួយផ្សេងទៀតដែលទាក់ទិននឹងម៉ូដែលរថយន្តខាងលើនៅឡើយ។

អ្វីដែលសាធារណជនបានដឹង នោះគឺថ្ងៃបង្ហាញខ្លួនរបស់វា គឺថ្ងៃទី 03 មករា 2023 ហើយរថយន្តនោះនឹងត្រូវបានបិទបាំង។ Volkswagen នឹងដាក់បង្ហាញរថយន្តខាងលើក្នុងមជ្ឈមណ្ឌលសន្និបាត Las Vegas នៅ Tech East ចាប់ពីថ្ងៃទី 05 ដល់ 08 មករា 2023។

ក្រៅពីម៉ូដែលរថយន្តអគ្គិសនីថ្មីនេះ Volkswagen ក៏នឹងបង្ហាញម៉ូដែល ID.4 ដ៏ល្បីឈ្មោះរបស់ខ្លួន និងកំណែ ID Buzz ផងដែរ។

ការដាក់បង្ហាញរថយន្ត van Buzz នៅ អាម៉េរិកខាងជើង គ្រោងនឹងធ្វើឡើងនៅឆ្នាំ 2023 ប៉ុន្តែ អតិថិជនត្រូវរង់ចាំរហូតដល់ឆ្នាំ 2024៕

December 28, 2022

បន្ទប់ស្នាក់នៅរបស់ Lionel Messi ពេលចូលរួម World Cup ក្លាយជាសារមន្ទីរ

សាកលវិទ្យាល័យកាតា កន្លែងដែលក្រុមបាល់ទាត់ជម្រើសជាតិរបស់ អាហ្សង់ទីន «បោះទ័ព» នៅពេលចូលរួមប្រកួតនៅ World Cup 2022 បានប្រកាសថា បន្ទប់របស់កំពូលតារាបាល់ទាត់ Lionel Messi នឹងក្លាយជាសារមន្ទីរតូចមួយ។

កាលពីថ្ងៃទី 27 ធ្នូ 2022 សារព័ត៌មានកាតា QNA បង្ហោះនៅលើ Twitter ថា បន្ទាប់ដែល Messi ស្នាក់នៅ ពេលចូលរួម World Cup 2022 នឹងលែងបើកទ្វារទទួលភ្ញៀវស្នាក់នៅទៀតហើយ។ ប៉ុន្តែ បន្ទប់នេះនឹងត្រូវរក្សាគ្រប់យ៉ាងដែលកំពូលតារាបាល់ទាត់អាហ្សង់ទីន បន្សល់ទុក ឱ្យដូចទៅនឹងសារមន្ទីរតូចមួយ សម្រាប់ទទួលភ្ញៀវមកទស្សនា។

«…វានឹងជាភស្ដុតាងសម្រាប់បង្ហាញអំពីសមិទ្ធិផលធំធេងដែល Messi ដណ្ដើមបាននៅ World Cup 2022» Hitmi al Hitmi ប្រធានផ្នែកសារព័ត៌មាន និងទំនាក់ទំនងសាធារណៈប្រចាំសាកលវិទ្យាល័យកាតា បានប្រាប់សារព័ត៌មាន Al Sharq ដូច្នេះ។

នៅពេលចូលរួមប្រកួតនៅ World Cup 2022 ក្រុមរបស់ អាហ្សង់ទីន មិនបានស្នាក់នៅឯសណ្ឋាគារដូចក្រុមដទៃឡើយ ប៉ុន្តែពួកគេជ្រើសយកអន្តេវាសិកដ្ឋានរបស់ សាកលវិទ្យាល័យកាតា ទៅវិញ។ ទ្រព្យសម្បត្តិរបស់សាកលវិទ្យាល័យនេះធ្លាប់ត្រូវបាន Liverpool ប្រើប្រាស់នៅពេលចូលរួមប្រកួតនៅ Club World Cup 2019 ដែលក្នុងនោះមានទីតាំងលំហមួយចំនួន មានបន្ទប់ហាត់ប្រាណ អាងហែលទឹក និងទីលានបាល់ទាត់មួយសម្រាប់ហ្វឹកហាត់។

មូលហេតុមួយទៀតដែលនាំឱ្យ ក្រុមអាហ្សង់ទីន សម្រេចចិត្ត «បោះទ័ព» នៅសាកលវិទ្យាល័យកាតា គឺដោយសារបរិវេណធំទូលាយរបស់អន្តេវាសិកដ្ឋាន ដែលជួយឱ្យកូនសិស្ស និងគ្រូបង្វឹក Lionel Scaloni អាចអាំងសាច់ជប់លៀងតាមប្រពៃណី។

នៅ World Cup 2022 Messi ស៊ុតបញ្ចូលទីបាន 7 គ្រាប់ ក្នុងនោះមាន 2 គ្រាប់នៅក្នុងការប្រកួតឈ្នះ បារាំង ក្នុងវគ្គផ្ដាច់ព្រ័ត្រ ដែលរួមចំណែកជួយឱ្យ អាហ្សង់ទីន ក្លាយជាជើងឯក៕

December 28, 2022

(AFF Cup 2022)- វៀតណាម និងម៉ាឡេស៊ី បង្កព្យុះភ្លៀង «រក» កាតពិន័យនៅវគ្គសន្សំពិន្ទុ

(វៀតណាម)- កាតក្រហមចំនួន 2 និងកាត់លឿងចំនួន 6 ត្រូវបានអាជ្ញាកណ្ដាលជនជាតិជប៉ុន Ryuji Sato ហូតចេញ នៅក្នុងការប្រកួតដែល វៀតណាម បានឈ្នះ ម៉ាឡេស៊ី 3-0 នៅជុំទី 3 នៃវគ្គសន្សំពិន្ទុក្នុងពូល B របស់ AFF Cup 2022។

ក្នុងការប្រកួតកាលពីព្រលប់ម្សិលមិញ នៅនាទីទី 12 ខ្សែប្រយុទ្ធវៀតណាម Van Toan បានទទួលកាតលឿងព្រោះតែទាញផ្ដួលខ្សែប្រយុទ្ធរបស់ ម៉ាឡេស៊ី Darren Lok ដើម្បីទប់ទល់នឹងការវាយបក។

នេះគឺជាកាតពិន័យដំបូងក្នុងចំណោម 8 កាតដែលអាជ្ញាកណ្ដាលត្រូវហូតចេញពីហោប៉ៅ ដែលនេះគឺជាចំនួនច្រើនបំផុតនៅ AFF Cup 2022 គិតមកដល់បច្ចុប្បន្ន។ មុននោះ ការប្រកួតដ៏សាហាវរវាង មីយ៉ាន់ម៉ា និង ម៉ាឡេស៊ី នៅជុំដំបូង ក៏ទទួលបានកាតលឿងចំនួន 8 ប៉ុន្តែ មិនមានកាត់ក្រហមនោះទេ។

4 នាទីក្រោយពី វៀតណាម រកបាន 1 គ្រាប់ដំបូង Van Toan ក៏ត្រូវទទួលកាតលឿងទីពីរ។ អាជ្ញាកណ្ដាល ហូតកាតក្រហម បណ្ដេញ Van Toan ចេញពីការប្រកួត នាំឱ្យ វៀតណាម ត្រូវទាត់ដោយខ្វះមនុស្សចាប់ពីនាទី ទី 32។ នេះគឺជាកាតក្រហមដំបូងក្នុងបទពិសោធន៍ទាត់ជាង 200 ប្រកួតរបស់កីឡាករវ័យ 26 រូបនេះ។

ក្នុងប៉ុន្មាននាទីចុងក្រោយនៃតង់ទីមួយ អាជ្ញាកណ្ដាលបានហូតកាតលឿងចំនួន 2 ទៀតសម្រាប់កីឡាកររបស់ ម៉ាឡេស៊ី។ ជាសរុប ក្នុងតង់ទីមួយ អាជ្ញាកណ្ដាល Sato បានហូតកាតចំនួន 5 ដងក្នុងនោះមានកាតលឿងចំនួន 2 និងកាតក្រហមចំនួន 1 សម្រាប់កីឡាករវៀតណាម Van Toan។

5 កាតពិន័យគឺជាចំនួននៅតិចនៅឡើយ ធៀបនឹងកំហុសរបស់កីឡាករទាំងពីរក្រុម។ កីឡាករវៀតណាម ត្រូវបានទាញពីក្រោយ ឬរុញពីមុខ ខណៈដែល កីឡាករម៉ាឡេស៊ី ត្រូវរងកែងដៃច្រើនលើក ប៉ុន្តែអាជ្ញាកណ្ដាលមិនបានឃើញ ឬមិនផ្លុំកញ្ចែពិន័យ។

ចុងតង់ទីមួយ Van Hau របស់ វៀតណាម ប្រើកែងដៃវាយចំមុខរបស់កីឡាករម៉ាឡេស៊ី ធ្វើឱ្យគូប្រកួតខឹង និងលេងខូចសងសឹក។ អាជ្ញាកណ្ដាល Sato គ្រាន់តែធ្វើការព្រមានប៉ុណ្ណោះ។ វគ្គសន្សំពិន្ទុ AFF Cup 2022 មិនមានវីដេអូជំនួយសម្រាប់អាជ្ញាកណ្តាល (VAR-Video Assistant Referee) ដូច្នេះ នាំឱ្យមានការសម្រេចជាច្រើនរបស់អាជ្ញាកណ្ដាល ត្រូវរងការរិះគន់។

តង់ទីពីរបន្តឡើងកម្ដៅ នៅពេលកាតលឿង 1 ទៀតត្រូវបានហូតសម្រាប់កីឡាករវៀតណាម ដោយសារតែ Van Hau នៅនាទីទី 60 បានច្រានផ្ដួលខ្សែការពារ Azam Azmi។ ពេលពួកគេដួល Azmi ក៏សងសឹកដោយការជាន់លើ Van Hau ធ្វើឱ្យអាជ្ញាកណ្ដាលត្រូវហូតកាតក្រហមបណ្ដេញ Azmi ចេញពីទីលាន។ វៀតណាម ទទួលបានបាល់ពិន័យ និងស៊ុតបញ្ចូលទីបានសម្រេច។ ម៉ាឡេស៊ី ត្រូវ វៀតណាម នាំមុខ 2-0។

នាទីទី 83 Hoang Duc ស៊ុតប៉ើងសំណាញ់របស់ ម៉ាឡេស៊ី ជួយឱ្យ វៀតណាម ឈ្នះការប្រកួត 3-0 ហើយក៏បាននាំមុខគេនៅពូល B៕

December 28, 2022

(AFF Cup 2022)- ម៉ាឡេស៊ី ប៉ះ វៀតណាម នៅព្រលប់នេះ គឺជាការប្រកួតរបស់គ្រូបង្វឹកកូរ៉េខាងត្បូងពីររូប

គ្រាដែលគ្រូបង្វឹក Park Hang-seo ជួយឱ្យក្រុមជម្រើសជាតិរបស់ វៀតណាម ដណ្ដើមបានកេរ្ដិ៍ឈ្មោះល្បីនៅ អាស៊ីអាគ្នេយ៍ ក្នុងរយៈពេលច្រើនឆ្នាំកន្លង គ្រូបង្វឹក Kim Pan-gon ដែលមកពី កូរ៉េខាងត្បូង ដូចគ្នា ក៏បានជួយ ម៉ាឡេស៊ី មិនតិចនោះដែរ។

មិនត្រឹមតែជាការប្រកួតរបស់ក្រុមកីឡាករទាំងសងខាងនោះឡើយ ជុំចុងក្រោយរបស់ពូល B នៅ AFF Cup 2022 រវាង វៀតណាម និង ម៉ាឡេស៊ី នៅវេលាម៉ោង 19 និង 30 នាទី ព្រលប់ថ្ងៃទី 27 ធ្នូនេះក៏ត្រូវបានគេទន្ទឹងរង់ចាំផងដែរ ព្រោះតែជាការប្រកួតរវាងកូនសិស្សរបស់គ្រូបង្វឹកពីររូបដែលជា ជនជាតិកូរ៉េខាងត្បូង ដូចគ្នា។

គ្រូបង្វឹករបស់ក្រុមម៉ាឡេស៊ី លោក Kim Pan-gon ធ្លាប់ត្រូវបានគេសង្ស័យអំពីចំណេះដឹងទាក់ទងនឹងការបង្វឹក និងដឹកនាំការប្រកួត ដោយសារតែជា អតីតប្រធានផ្នែកបច្ចេកទេសរបស់ សហព័ន្ធបាល់ទាត់កូរ៉េខាងត្បូង មិនមែនដឹកនាំកីឡាករដោយផ្ទាល់។

ក៏ប៉ុន្តែ គ្រូបង្វឹកវ័យ 53 ឆ្នាំរូបនេះ កំពុងទទួលបានការគាំទ្រច្រើនឡើងៗ បន្ទាប់ពីឈ្នះ ហ្វ៊ីលីពីន ក្នុងការប្រកួតមិត្តភាពកាលពីខែមីនា 2022។ លោក Pan-gon ក៏បាននាំក្រុមជម្រើសជាតិម៉ាឡេស៊ី ឆ្លងផុតវគ្គជម្រុះនៅ ASIAN CUP 2023 ដោយបានឈ្នះ តួកម៉េនីស្ថាន និង បង់ក្លាដែស។ លោក Pan-gon និងកូនសិស្សក៏បានយកឈ្នះលើ ថៃ នៅ King’s Cup 2022 ផងដែរ។ ជ័យជម្នះទាំងនេះកំពុងជួយឱ្យ ក្រុមរបស់ ម៉ាឡេស៊ី មានសង្ឃឹមនៅ AFF Cup 2022។

ការប្រកួតជុំទីមួយនៃពូល B នៅ AFF Cup 2022 ម៉ាឡេស៊ី បានឈ្នះ ឡាវ 5-0 ហើយជុំទីពីរ ម៉ាឡេស៊ី ក៏បានឈ្នះលើ មីយ៉ាន់ម៉ា 1-0។

ចំណែកក្រុមជម្រើសជាតិវៀតណាម ដែលដឹកនាំដោយគ្រូបង្វឹកជនជាតិកូរ៉េខាងត្បូង លោក Park Hang-seo វិញ ក្រៅពីមានក្រុមកីឡាករដែលល្អ ពួកគេក៏មានសញ្ញាជឿជាក់សំខាន់ នោះគឺថា ក្រោមការដឹកនាំរបស់លោក Hang-seo ក្រុមវៀតណាម មិនធ្លាប់បានចាញ់ ម៉ាឡេស៊ី ម្ដងណាឡើយ។ ម្យ៉ាងទៀត ការប្រកួតនៅព្រលប់នេះក៏ត្រូវបានធ្វើឡើងនៅលើទឹកដីរបស់ វៀតណាម ផងដែរ៕

December 27, 2022

«រថយន្តអគ្គិសនីវៀតណាម VF8 ជួបបញ្ហាធ្ងន់ធ្ងរ»! Youtuber Tom Peng បើកកកាយអំពីកំហុសទាំងនេះ

ជារថយន្តអគ្គិសនីផលិតនៅ វៀតណាម VinFast VF8 ទទួលបានការសាទរពីអ្នកប្រើប្រាស់ ប៉ុន្តែ មិនយូរប៉ុន្មាន ម៉ូដែលនេះជួបបញ្ហាជាច្រើនដែលបង្កការរំខានរបស់ម្ចាស់រថយន្ត។

បញ្ហាមួយចំនួនដែលកើតមាននៅលើ VinFast VF8 រួមមានដូចជា «កំពុងបើកបរក៏ស្រាប់តែម៉ូទ័រអគ្គិសនីឈប់ដើរ», «អំពូលភ្លើងផ្ដល់សញ្ញា និងអំពូលភ្លើងហ្វាបិទដោយឯកឯង» , «បញ្ហាផ្នែកទន់ (សហ្វវ៉ែរ)», «បញ្ហា ផ្ដល់សញ្ញាមិនត្រឹមត្រូវ» ជាដើម។ល។ ហើយកំហុសដែលជួបជាញឹកញាប់គឺ «បញ្ហាបញ្ចូលថាមពលអាគុយ 12V», «បញ្ហាប្រព័ន្ធ BEV»។ អ្នកប្រើប្រាស់ជាច្រើនក៏បានរាយការណ៍អំពីបញ្ហាទាំងនេះ។ អ្នកខ្លះនៅតែជួបបញ្ហាដដែល បើទោះបានធ្វើបច្ចុប្បន្នភាពផ្នែកទន់ថ្មី។

Youtuber Tom Peng គឺជាអ្នកចូលចិត្តក្រុមហ៊ុនផលិតរថយន្តអគ្គិសនីវៀតណាម VinFast ហើយ VinFast VF8 គឺជារថយន្តដែល Tom ជិះរាល់ថ្ងៃ ប៉ុន្តែ កំហុសខាងលើកើតមានកាន់តែញឹកញាប់ បង្កការរំខាន និងខាតពេលវេលាច្រើន។ ក្នុងវីដេអូនៅលើ Youtube លោក Tom Peng បានថតអំពីបញ្ហាទាំងឡាយដែលគាត់បានជួបប្រទះពេលប្រើប្រាស់រថយន្ត VinFast VF8។

ក្រោយពីវីដេអូត្រូវបានបង្ហោះលើបណ្ដាញសង្គម លោក Tom Peng នៅតែមិនទាន់ឱ្យដឹងថា កំហុសទាំងនេះត្រូវបានដោះស្រាយទាំងស្រុងហើយ ឬនៅ។

Tom Peng គឺជាអ្នកជំនួញដើមកំណើតអាស៊ី សញ្ជាតិកាណាដា។ បច្ចុប្បន្ន Tom Peng រកស៊ីនៅ វៀតណាម និងមានរថយន្តអគ្គិសនី VinFast 2 គ្រឿង គឺ VF E34 និង VF8។ ក្រៅពីនេះ លោក Tom Peng ក៏មានរថយន្តទំនើប និងរថយន្តប្រណិតផ្សេងទៀត ដូចជា Mercedes និង Bentley ផងដែរ។

December 27, 2022

Category: សង្គម និងសេដ្ឋកិច្ច