សង្គម និងសេដ្ឋកិច្ច - La Reine Media

(AFF Cup 2022) – សិង្ហបុរី និងវៀតណាម នៅព្រលប់នេះ តើក្រុមណាអាចឡើងដល់វគ្គពាក់កណ្ដាលផ្ដាច់ព្រ័ត្រ?

ដោយមាន 6 ពិន្ទុស្មើគ្នា តើរវាង សិង្ហបុរី និង វៀតណាម ក្រុមមួយណាជាអ្នកដណ្ដើមបានសំបុត្រឡើងទៅកាន់វគ្គពាក់កណ្ដាលផ្ដាច់ព្រ័ត្រមុនគេមួយជុំ នៅ AFF Cup 2022 ក្នុងការប្រកួតនៅព្រលប់ថ្ងៃទី 30 ធ្នូនេះ?

គ្រូបង្វឹករបស់ក្រុមវៀតណាម Park Hang-seo ប្រមូលផ្ដុំកូនសិស្សខ្លាំងៗបំផុតបានគ្រប់ចំនួន ក្នុងនោះមានទាំងខ្សែបម្រើ Nguyen Quang Hai ដែលកំពុងលេងឱ្យក្លឹប Pau FC នៅ ប្រទេសបារាំង។ ចំណែក សិង្ហបុរី វិញ មិនអាចរក្សាបាននូវថាមពលដូចកាលពី AFF Cup 2020 ជារដូវកាលមួយដែលពួកគេបានឡើងដល់វគ្គពាក់កណ្ដាលផ្ដាច់ព្រ័ត្រ ដោយសារតែពេលនេះពួកគេបាត់បង់ខ្សែប្រយុទ្ធលេខមួយ Ikhsan Fandi និងខ្សែបម្រើ Adam Swandi ព្រោះតែរងរបួស។

ក្នុងគ្រាដែលក្រុមនានាបានឆ្លងកាត់ការប្រកួតដ៏លំបាក វៀតណាម បែរជាឡើងដល់កំពូលតារាងដោយងាយ ក្រោយឈ្នះម្ចាស់ផ្ទះឡាវ 6-0 និងឈ្នះភ្ញៀវម៉ាឡេស៊ី 3-0 បើទោះជាត្រូវលេងដោយខ្វះជើង។

បើសិនជារកបាន 3 ពិន្ទុទៀតនៅក្នុងការប្រកួតលើទឹកដីរបស់ សិង្ហបុរី នៅព្រលប់នេះ ក្រុមវៀតណាម នឹងឡើងដល់វគ្គពាក់កណ្ដាលផ្ដាច់ព្រ័ត្រឆាប់ជាងគេមួយជុំ។ ក្រោយការឈ្នះលើ សិង្ហបុរី នៅម៉ោង 19 និង 30 នាទីព្រលប់នេះ វៀតណាម ងាយស្រួលគិតគូរដល់ជុំចុងក្រោយនៅពូល B ដែលត្រូវប៉ះ មីយ៉ាន់ម៉ា នៅថ្ងៃទី 03 មករា 2023 ដើម្បីរើសគូប្រកួតនៅវគ្គពាក់កណ្ដាលផ្ដាច់ព្រ័ត្រ ហើយអាចអនុញ្ញាតឱ្យកីឡាករសំខាន់ៗមួយចំនួនសម្រាកយកកម្លាំង ឬសាកល្បងវិធីថ្មីសម្រាប់ការប្រកួតវគ្គជម្រុះផ្ទាល់។

សិង្ហបុរីមានជ័យជម្នះពីរលើក ប៉ុន្តែការលេងរបស់ពួកគេមិនទាន់ធ្វើឱ្យមានទំនុកចិត្តនៅឡើយ។ ពួកគេត្រូវទាត់រហូតដល់ការប្រកួតថែមម៉ោង ទើបរកបានគ្រាប់បាល់ទីពីរដើម្បីយកឈ្នះ ឡាវ ក្នុងជុំទីពីរ។ ក្នុងការប្រកួតជុំដំបូង កូនសិស្សរបស់ Takayuki Nishigaya ការពារតំបន់គ្រោះថ្នាក់មិនបានល្អ ធ្វើឱ្យ មីយ៉ាន់ម៉ា នាំមុខ 2 គ្រាប់ ហើយត្រូវខំប្រឹងខ្លាំងទើបបានឈ្នះ 3-2 នៅលើវាលស្មៅរបស់ខ្លួន។

ចំណុចដែល សិង្ហបុរី មានប្រៀបជាង វៀតណាម គឺបានលេងនៅលើវាយស្មៅសិប្បនិម្មិត។ ប៉ុន្តែ គ្រូបង្វឹករបស់ក្រុមវៀតណាម អះអាងថា ពួកគេមិនញញើតឡើយ ព្រោះកូនសិស្សរបស់គាត់ក៏ធ្លាប់ទទួលបានបទពិសោធន៍នៅលើវាលស្មៅប្រភេទនេះ។

ការប៉ះគ្នាកន្លងមក ក៏ធ្វើឱ្យ សង្ហបុរី មានអារម្មណ៍មិនសូវល្អ។ ក្រោមការដឹកនាំរបស់គ្រូបង្វឹកជនជាតិកូរ៉េខាងត្បូង ក្រុមជម្រើសជាតិវៀតណាម សុទ្ធតែបានឈ្នះលើ ក្រុមសិង្ហបុរី។

ក៏ប៉ុន្តែ សិង្ហបុរី ទំនងជានឹងប្រើយុទ្ធសាស្ត្រការពារកម្រិតខ្ពស់ ដើម្បីធានាសុវត្ថិភាពសម្រាប់សំណាញ់ទីរបស់ពួកគេ មុនពេលរង់ចាំឱកាសវាយបកនៅពេល វៀតណាម បាត់បង់អំណត់ និងភ្លេចខ្លួន៕

December 30, 2022

ការនាំចេញរថយន្តអគ្គិសនីរបស់ចិន កើនឡើងខ្ពស់ខ្លាំង ដោយសារតម្រូវការនៅអឺរ៉ុប

ការនាំចេញរថយន្តអគ្គិសនីរបស់ចិន បានបង្កើតឯតទគ្គកម្មថ្មី ដោយកើនជាងទ្វេដងក្នុងខែវិច្ឆិកា ធៀបនឹងដំណាក់កាលដូចគ្នាកាលពីឆ្នាំកន្លង មួយផ្នែកគឺដោយសារអ្នកផលិតរថយន្តរបស់ អឺរ៉ុប ងាកមកផលិតនៅ ប្រទេសចិន។

ក្រុមអ្នកផលិតរថយន្តនៅ ប្រទេសចិន បាននាំចេញរថយន្តអគ្គិសីសរុបតម្លៃ 3.2 ពាន់លានដុល្លារអាម៉េរិក ក្នុងខែវិច្ឆិកា 2022 នេះបើតាមទិន្នន័យពីអគ្គនាយកពន្ធដារចិន។ បណ្ដាប្រទេសអឺរ៉ុប មានដូចជា អង់គ្លេស និង បែលហ្ស៊ិក ជាដើម គឺជាអ្នកនាំចូលរថយន្តអគ្គិសនីពី ប្រទេសចិន ច្រើនជាងគេ ដោយមានចំណែកជិត 70%។

ការនាំចេញរថយន្តអគ្គិសនីរួមចំណែកជាងពាក់កណ្ដាលនៅក្នុងចំណោមបរិមាណរថយន្តដែល ចិន បាននាំចេញក្នុង 2 ខែបន្តបន្ទាប់ ក្នុងនោះ ខែវិច្ឆិកា លក់បាន 6 ពាន់លានដុល្លារអាម៉េរិក។

តួលេខទាំងនេះត្រូវបានលើកឡើងក្នុងគ្រាដែលក្រុមអ្នកផលិតរថយន្តរបស់ អឺរ៉ុប មានដូចជា Volkswagen និង BMW ជាដើម បានកំណត់គោលដៅផលិតគ្រឿងបន្លាស់ និងរថយន្តនៅ ប្រទេសចិន ដោយសារតែលទ្ធភាពនៃការផលិតរថយន្តអគ្គិសនីនៅក្នុងស្រុកនៅមានកំណត់។

ក្រុមហ៊ុនចិន SAIC Motor ដែលជាអ្នកគ្រប់គ្រង MG Motors ក៏បានពង្រីកបណ្ដាញចែកចាយដើម្បីលក់រថយន្តអគ្គិសនីនៅ អឺរ៉ុប តាមរយៈការនាំចូលពី ប្រទេសចិន។

Tesla បាននាំចេញរថយន្តជាង 37,000 គ្រឿងពី ប្រទេសចិន ទៅកាន់ អឺរ៉ុប កាលពីខែកន្លង ក្រោយពីបាននាំចេញតែ 60 គ្រឿងនៅក្នុងខែមីនា និងមិនបាននាំចេញក្នុងខែមេសា នៅពេលក្រុមហ៊ុននេះផ្អាកការដំឡើង ដោយសារកូវីដ-19 នៅ សៀងហៃ៕

December 30, 2022

«កម្ពុជាត្រូវតែឈ្នះថៃ» នៅថ្ងៃទី 02 មករា 2023 ទើបបានឡើងទៅវគ្គពាក់កណ្ដាលផ្ដាច់ព្រ័ត្រ

ដោយមានកម្លាំងខ្លាំងក្លា កម្ពុជា បានយកឈ្នះលើ ព្រុយណេ 5-1 នៅក្នុងការប្រកួតជុំទីបួនក្នុងពូល A នៅ AFF Cup 2022 កាលពីម្សិលមិញ។

ជ័យជម្នះខាងលើនេះជួយឱ្យកូនសិស្ស និងគ្រូបង្វឹក Honda ជឿជាក់ជាងមុន នៅពេលត្រូវប្រកួតជាមួយក្រុមរបស់ ថៃ នៅថ្ងៃទី 02 មករា 2023។

ក្នុង 3 ប្រកួតដំបូងៗនាពេលកន្លងនៅ AFF Cup 2022 (AFF Mistubishi Electric Cup 2022) ក្រុមជម្រើសជាតិកម្ពុជា បានឈ្នះ ហ្វីលីពីន 3-2, ចាញ់ឥណ្ឌូណេស៊ី 1-2 និងឈ្នះព្រុយណេ 5-1។

កម្ពុជា នៅសល់ 1 ប្រកួតទៀតដែលត្រូវប៉ះនឹង ថៃ នៅថ្ងៃទី 02 មករា 2023 ដោយកម្ពុជាធ្វើជាភ្ញៀវ។ ដើម្បីមានសិទ្ធិឡើងទៅប្រកួតនៅវគ្គពាក់កណ្ដាលផ្ដាច់ព្រ័ត្រ កម្ពុជា ត្រូវតែយកឈ្នះលើ ថៃ នៅក្នុងការប្រកួតនេះ។

កាលពីម្សិលមិញ AFF Cup 2022 មានការប្រកួតរវាង ក្រុមថៃ និងឥណ្ឌូណេស៊ី ដោយទទួលបានលទ្ធផល 1-1 ជួយឱ្យពួកគេមាន 7 ពិន្ទុដូចគ្នា ចំណែក កម្ពុជា តិចជាងនេះ 1 ពិន្ទុ។

សូមទស្សនាឡើងវិញ «កម្ពុជា ឈ្នះ ព្រុយណេ 5-1 ក្នុងការប្រកួតជុំទីបួនក្នុងពូល A នៅ AFF Cup 2022 កាលពីម្សិលមិញ» ៖

December 30, 2022

ទំហំពាណិជ្ជកម្មរវាង កម្ពុជា-ចិន កើនឡើងដល់ជាង 14 ពាន់លានដុល្លារ ក្នុងឆ្នាំ 2022

(កំពត)- ទំហំពាណិជ្ជកម្មកម្ពុជា-ចិន នៅឆ្នាំ 2022 នេះ មានរហូតដល់ 14,500 លានដុល្លារអាម៉េរិក កើនជាង19% ហើយសង្ឃឹមថា នឹងកើនឡើងថែមទៀត នេះបើតាមប្រសាសន៍របស់ប្រមុខរាជរដ្ឋាភិបាលកម្ពុជា ថ្លែងក្នុងពិធីបើកការដ្ឋានស្តារ និងលើកកម្រិតគុណភាពភាពផ្លូវជាតិលេខ 31 និង 33 នៅព្រឹកថ្ងៃទី 30 ធ្នូ 2022។

មូលហេតុដែលធ្វើឱ្យទំហំ ពាណិជ្ជកម្មកើនឡើងនេះ ត្រូវបានសម្ដេចតេជោ ហ៊ុន សែន អះអាងថា ដោយសារ ប្រទេសទាំងពីរមានកិច្ចព្រមព្រៀងពាណិជ្ជកម្មសេរី ដែលជួយឱ្យកម្ពុជា អាចនាំចេញទំនិញទៅ ប្រទេសចិន បានច្រើនជាងមុន។

ក្នុងពិធីសម្ពោធបើកការដ្ឋានខាងលើ ប្រមុខរាជរដ្ឋាភិបាលបានមានប្រសាសន៍ថា «ឆ្នាំនេះទំហំពាណិជ្ជកម្មកម្ពុជា-ចិន មានចំនួនរហូតដល់ 14,500 លានដុល្លារអាម៉េរិក មានកំណើនដល់ជាង 19% ហើយនៅពេលខាងមុខ ខ្ញុំសង្ឃឹមថា នឹងមានសមត្ថភាពនាំទំនិញទៅកាន់ទីផ្សារប្រទេសចិន កាន់តែច្រើន តាមរយៈកិច្ចព្រមព្រៀងពាណិជ្ជកម្មសេរី ដែលចិន ផ្តល់អាទិភាពខ្ពស់ អនុគ្រោះពន្ធរហូតដល់ 97.43%»។

ទំហំពាណិជ្ជកម្មរវាងកម្ពុជា និងចិន កាលពីឆ្នាំកន្លង បានឡើងដល់ជាង 11 ពាន់លានដុល្លារអាម៉េរិក ខណៈឆ្នាំនេះ គ្រោងនឹងបង្កើនទំហំពាណិជ្ជកម្មទ្វេភាគីឱ្យបានឡើងដល់ 15 ពាន់លានដុល្លារអាម៉េរិក៕

December 30, 2022

ស្ដេចបាល់ទាត់ Pele ទទួលមរណភាពហើយ!

(ប្រេស៊ីល)- និមិត្តរូបបាល់ទាត់របស់ ប្រេស៊ីល Pele ដែលជួយឱ្យប្រទេសនេះដណ្ដើមបានពានរង្វាន់ជើងឯក World Cup ចំនួន 3 លើក និងត្រូវបានចាត់ទុកថាជាកីឡាករអស្ចារ្យបំផុតគ្រប់សម័យកាល បានទទួលមរណភាពកាលពីថ្ងៃទី 29 ធ្នូ ក្នុងវ័យ 82 ឆ្នាំ។

Kely Nascimento កូនស្រីរបស់លោក Pele បានបញ្ជាក់នៅលើ Instagram ថា លោក Pele បានទទួលមរណភាពក្រោយពីការសម្រាកព្យាបាលមួយរយៈពេលនៅមន្ទីរពេទ្យ Albert Einstein ក្នុងទីក្រុង Sao Paulo ប្រទេសប្រេស៊ីល ដោយសារជំងឺមហារីកពោះវៀន ខ្សោយតម្រងនោម និងបេះដូង។

មន្ទីរពេទ្យ Albert Einstein ក៏បានឱ្យដឹងថា លោក Pele បានទទួលមរណភាពដោយសារ «ខ្សោយគ្រឿងក្នុង» ក្រោយការព្យាបាលជំងឺមហារីកមួយរយៈពេលយូរ។

កំពូលតារាបាល់ទាត់នាបច្ចុប្បន្ន ក្នុងនោះមានដូចជា Messi, Neymar, Kylian Mbappe ឬអតីតកីឡាករ Franz Beckenbauer និងប្រធានាធិបតីជាប់ឆ្នោតរបស់ ប្រេស៊ីល Luiz Inacio Lula da Silva ជាដើម សុទ្ធតែបានបង្ហោះសារចូលរួមរំលែកទុក្ខ នៅលើបណ្ដាញសង្គម។

លោក Pele កើតឆ្នាំ 1940 នៅក្នុងទីក្រុង Tres Coracoes ភាគអាគ្នេយ៍នៃប្រទេសប្រេស៊ីល និងត្រូវបានដាក់ឈ្មោះឱ្យថា Edson Arantes do Nascimento។ លោកធ្លាប់ជាអ្នកលក់សណ្ដែកដីតាមដងផ្លូវដើម្បីជួយសម្រាលទុក្ខរបស់គ្រួសារ។ លោកត្រូវបានគេដាក់រហ័សនាមថា Pele ដោយសារបញ្ចេញសំឡេងខុសពីពាក្យ Bile ដែលជាឈ្មោះរបស់អ្នកចាំទីនៅ Vasco de Sao Lourenco ជាទីដែលឪពុករបស់លោកធ្លាក់ប្រកួត។

លោក Pele មានភាពលេចធ្លោតាំងពីអាយុ 15 ឆ្នាំ នៅពេលគាត់បានទៅប្រកួតលក្ខណៈផ្លូវការជាមួយក្លឹប Santos។ លោក និងក្លឹបនេះដណ្ដើមបានពានរង្វាន់ជាច្រើន រួមទាំងពានរង្វាន់អន្តរទ្វីបកាលពីឆ្នាំ 196-1963។

លោក Pele បង្កើតបានឯតទគ្គកម្មគ្រប់សម័យកាល ដោយរកបាន 1,281 គ្រាប់ក្នុង 1,363 ប្រកួត ឱ្យក្លឹប Santos (1956-1974), ក្រុមជម្រើសជាតិប្រេស៊ីល និង New York Cosmos (1975-1977)។

https://www.youtube.com/watch?v=f_bOy28LdXc

លោក Pele បានឡើងដល់ចំណុចកំពូលនៃភាពអស្ចារ្យនៅ World Cup 1970 នៅ ម៉ិកស៊ិក ជាទីដែលលោករួមចំណែកនៅក្នុងក្រុមដែលមនុស្សជាច្រើនចាត់ទុកថាជាក្រុមអស្ចារ្យបំផុតគ្រប់សម័យកាល ដោយមានកំពូលថ្វីជើងជាច្រើនរូប មានដូចជា Rivellino, Tostao និង Jaizinho ជាដើម

លោក Pele ធ្លាប់កាន់តំណែងរដ្ឋមន្ត្រីក្រសួងកីឡា របស់ ប្រទេសប្រេស៊ីល ពីឆ្នាំ 1995 ដល់ 1998។ Pele ក៏ត្រូវបានគេមើលឃើញថា មានភាពស្និទ្ធស្នាលជាមួយនឹង រដ្ឋាភិបាលប្រេស៊ីល ផងដែរ។

កាលពីខែកញ្ញា 2021 លោក Pele ត្រូវវះកាត់ដុំសាច់ក្នុងពោះវៀន ហើយមកដល់ខែវិច្ឆិកា 2022 លោកបានចូលពេទ្យដើម្បីវាយតម្លៃឡើងវិញអំពីវិធីព្យាបាល ប៉ុន្តែស្ថានភាពកាន់តែអាក្រក់ទៅៗ។

បើទោះស្ថិតនៅលើគ្រែពេទ្យ ប៉ុន្តែលោក Pele តែងរក្សាស្មារតីជឿជាក់។ លោកបង្ហោះសារជាញឹកញាប់នៅលើបណ្ដាញសង្គម ក្នុងពេល World Cup 2022 កំពុងប្រព្រឹត្តទៅនៅ កាតា។ លោក Pele ក៏ធ្លាប់បង្ហោះសារជូនពរ ប្រធានក្រុម Messi ផងដែរ នៅពេល អាហ្សង់ទីន ដណ្ដើមបានពានរង្វាន់ជើងឯក៕

December 30, 2022

ផ្លូវជាតិលេខ 31 និងលេខ 33 នឹងបើកការដ្ឋានស្តារ និងលើកកម្រិតគុណភាពនៅថ្ងៃស្អែក

នៅថ្ងៃទី 30 ធ្នូ 2022 ស្អែកនេះ ផ្លូវជាតិលេខ 31 និងលេខ 33 នឹងត្រូវបានសម្ពោធបើកការដ្ឋានស្តារ និងលើកកម្រិតគុណភាព នេះបើតាម ក្រសួងសាធារណការ និងដឹកជញ្ជូន ឱ្យដឹងនៅរសៀលថ្ងៃទី 29 ធ្នូ។

យោងតាមក្រសួង គម្រោងស្តារ និងលើកកម្រិតគុណភាពផ្លូវជាតិលេខ 31 នេះ មានប្រវែងជាង 53 គីឡូម៉ែត្រ រាប់ពីផ្លូវបែកគុស (ចំណុចប្រសព្វផ្លូវជាតិលេខ 3) រហូតដល់ផ្សារកំពង់ត្រាច (ចំណុចប្រសព្វផ្លូវជាតិលេខ 33) ដោយឆ្លងកាត់តាម ខេត្តតាកែវ និងខេត្តកំពត។

ចំណែកផ្លូវជាតិលេខ 33 ដែលមានប្រវែងជាង 52 គីឡូម៉ែត្រ រាប់ចាប់ពីផ្លូវជាតិលេខ 3 ត្រង់គីឡូម៉ែត្រលេខ 148+100 ស្ថិតក្នុង ខេត្តកំពត រហូតដល់ច្រកលក (ព្រំដែនកម្ពុជា-វៀតណាម)។

ផ្លូវជាតិលេខ 31 និងផ្លូវជាតិលេខ 33 នេះ ជាផ្លូវដ៏មានសារសំខាន់សម្រាប់វិស័យដឹកជញ្ជូន ទេសចរណ៍ កសិកម្ម ក៏ដូចជាសេដ្ឋកិច្ចក្នុងស្រុក និងអន្តរជាតិ។

ពិធីសម្ពោធបើកការដ្ឋានស្តារ និងលើកកម្រិតគុណភាពនៅថ្ងៃស្អែកនឹងត្រូវបានធ្វើឡើង ក្រោមអធិបតីភាពដ៏ខ្ពង់ខ្ពស់របស់ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន៕

December 29, 2022

ចុងក្រោយ តម្លៃរបស់រថយន្តអគ្គិសនី Tesla មួយទឹក ក៏ «ព្រមធ្លាក់ចុះ»

ប្រការនេះគឺជារឿងល្អសម្រាប់អតិថិជនដែលចង់ទិញរថយន្ត Tesla ប៉ុន្តែ វានឹងបង្កឱ្យមានសម្ពាធដល់តម្រូវការប្រើប្រាស់រថយន្តថ្មីរបស់ក្រុមហ៊ុននេះ។

ក្នុងប៉ុន្មានឆ្នាំកន្លង នៅពេល Tesla ដំឡើងថ្លៃរថយន្តថ្មី រថយន្តមួយទឹកក៏ឡើងថ្លៃតាម។ ដើមឆ្នាំ 2022 រថយន្ត Model Y មួយទឹកត្រូវបានលក់ក្នុងតម្លៃខ្ពស់ជាង ធៀបនឹង Model Y ថ្មី។

ក៏ប៉ុន្តែ ក្នុងខែនេះ ដោយសារតែ Tesla កំពុងតែបញ្ចុះតម្លៃរថយន្តថ្មីរបស់ខ្លួន ចុងក្រោយ យើងក៏ចាប់ផ្ដើមឃើញថា រថយន្តអគ្គិសនី Tesla មួយទឹកត្រូវធ្លាក់ថ្លៃទៅតាមនោះដែរ។

«រថយន្តអគ្គិសនី Tesla មួយទឹក ជាមធ្យមមានតម្លៃ 55,754 ដុល្លារនៅក្នុងខែវិច្ឆិកា ថយចុះ 17% ធៀបនឹងកម្រិតខ្ពស់បំផុត 67,297 ដុល្លារក្នុងខែកក្កដា» នេះបើយោងតាម Reuters។

និន្នាការនៃការធ្លាក់ថ្លៃនេះនឹងជួយឱ្យរថយន្ត Tesla មួយទឹក ងាយស្រួលលក់ជាងមុន ប៉ុន្តែវាក៏នឹងប៉ះពាល់អវិជ្ជមានដល់សកម្មភាពជំនួញក្នុងវិស័យរថយន្តមួយទឹកដែលកំពុងរីកចម្រើនរបស់ Tesla ក៏ដូចជាការលក់រថយន្តថ្មីរបស់ក្រុមហ៊ុននេះផងដែរ៕

December 29, 2022

វៀតណាម មានអតិរេកពាណិជ្ជកម្មជាង 11 ពាន់លានដុល្លារអាម៉េរិក ក្នុងឆ្នាំ 2022

ការប៉ាន់ប្រមាណរបស់ ការិយាល័យស្ថិតិវៀតណាម បានឱ្យដឹងថា ឆ្នាំ 2022 តុល្យភាពពាណិជ្ជកម្មទំនិញរបស់ប្រទេសនេះ មានអតិរេកពាណិជ្ជកម្ម 11.2 ពាន់លានដុល្លារ ខ្ពស់ជាងឆ្ងាយ ធៀបនឹង 3.32 ពាន់លានដុល្លារកាលពីឆ្នាំកន្លង។

យោងតាមទិន្នន័យរបស់ការិយាល័យស្ថិតិ ការនាំចេញទំនិញក្នុងខែធ្នូ 2022 សម្រេចបាន 29.66 ពាន់លានដុល្លារ កើន 2.2% ធៀបនឹងខែវិច្ឆិកា និងថយចុះ 14% ធៀបនឹងខែធ្នូឆ្នាំ 2021។ តាមការប៉ាន់ប្រមាណ ក្នុងត្រីមាសទីបួន ឆ្នាំ 2022 ការនាំចេញសម្រេចបាន 89.5 ពាន់លានដុល្លារ ថយចុះ 7.1% ធៀបនឹងត្រីមាសទីបីនៃឆ្នាំបីឆ្នាំ 2022 និងថយចុះ 6.1% ធៀបនឹងដំណាក់កាលដូចគ្នាក្នុងឆ្នាំកន្លង។

តុល្យភាពពាណិជ្ជកម្មនៃការនាំចេញ-នាំចូលទំនិញរបស់ វៀតណាម ក្នុងខែធ្នូ 2022 មានអតិរេកពាណិជ្ជកម្ម 0.5% គ្រាដែលពេញមួយឆ្នាំ 2022 មានអតិរេកពាណិជ្ជកម្មប្រមាណ 11.2 ពាន់លានដុល្លារ ខ្ពស់ជាងឆ្ងាយ ធៀបនឹង 3.32 ពាន់លានដុល្លារកាលពីឆ្នាំកន្លង។

គិតជារួម ក្នុងឆ្នាំ 2022 ការនាំចេញទំនិញត្រូវបានប៉ាន់ប្រមាណឃើញថា សម្រេចបាន 371.85 ពាន់លានដុល្លារ កើន 10.6% ធៀបនឹងឆ្នាំ 2021។ ចំណែកការនាំចូលវិញ សម្រេចបាន 360.65 ពាន់លានដុល្លារ កើន 8.4% ធៀបនឹងឆ្នាំកន្លង។

បច្ចុប្បន្ន សហរដ្ឋអាម៉េរិក នៅតែជាទីផ្សារនាំចេញទំនិញធំជាងគេបង្អស់របស់ វៀតណាម ដោយសម្រេចបានប្រមាណ 109.1 ពាន់លានដុល្លារ។ ប្រទេសចិន គឺជាទីផ្សារនាំចូលទំនិញធំបំផុតរបស់ វៀតណាម ដោយសម្រេចបាន 119.3 ពាន់លានដុល្លារ៕

December 29, 2022

កីឡាករបារាំង Mbappe ៖ «ពួកយើងកំពុងរង់ចាំ Messi ត្រលប់មកវិញ»

(បារាំង)- យោងតាម Kylian Mbappe ការប្រកួតវគ្គផ្ដាច់ព្រ័ត្រ World Cup 2022 មិនបានធ្វើឱ្យល្អក់កករទំនាក់ទំនងល្អរវាងគាត់ និង Lionel Messi ឡើយ។

បន្ទាប់ពី ក្រុមជម្រើសជាតិបារាំង បានចាញ់ អាហ្សង់ទីន នៅវគ្គផ្ដាច់ព្រ័ត្ររបស់ World Cup នៅ កាតា កីឡាករបារាំង Mbappe ត្រូវរងការចំអកជាច្រើនពី អាហ្សង់ទីន ពិសេសគឺ សមាជិកក្រុមជម្រើសជាតិអាហ្សង់ទិន។

កាលពីថ្ងៃទី 28 ធ្នូ នៅពេលត្រូវបានសួរអំពីការចំអកទាំងឡាយពីសំណាក់កីឡាកររបស់ អាហ្សង់ទីន Mbappe ឆ្លើយថា «…នោះមិនមែនជាបញ្ហារបស់ខ្ញុំ។ …ប្រការសំខាន់ពេលនេះគឺចូលរួមឱ្យអស់ពីកម្លាំងកាយចិត្តសម្រាប់ក្លឹប។ ពួកយើងកំពុងរង់ចាំ Messi ត្រលប់មកវិញ ដើម្បីអាចចាប់ផ្ដើមយកជ័យជម្នះ និងរកគ្រាប់បាល់ឡើងវិញ»។

Mbappe ក៏បានឱ្យដឹងថា បាននិយាយគ្នាជាមួយ Messi ដែលជាប្រធានក្រុមជម្រើសជាតិរបស់ អាហ្សង់ទីន រួចហើយ ក្រោយការប្រកួតវគ្គផ្ដាច់ព្រ័ត្រនៅ World Cup 2022។ Mbappe បានជូនពរមិត្តរួមក្រុមនៅក្លឹប PSG ព្រោះថា ការដណ្ដើមពានរង្វាន់ជើងឯក World Cup គឺជាភារកិច្ចសំខាន់បំផុត។

ក្នុងវគ្គផ្ដាច់ព្រ័ត្រនៅ កាតា កាលពីថ្ងៃទី 18 ធ្នូ Mbappe រកបាន 3 គ្រាប់ ចំណែក Messi រកបាន 2 គ្រាប់ ខណៈដែល បារាំង ស្មើនឹង អាហ្សង់ទីន 3-3 ក្រោយទាត់បាន 120 នាទី។ ក្នុងវគ្គប្រកួតស៊ុតប៉េណាំងទី ក្រុមទាំងពីរសុទ្ធតែបានសម្រេចភារកិច្ច ប៉ុន្តែសរុបមក អាហ្សង់ទីន ឈ្នះ 4-2។

Mbappe ស៊ុតបញ្ចូលទីដោយជោគជ័យនៅនាទីទី 90+6 ជួយឱ្យ PSG ឈ្នះ Strassbourg 2-1 នៅក្នុងការប្រកួតដណ្ដើមពានរង្វាន់ Ligue 1

Mbappe ត្រលប់មកហាត់នៅ PSG បន្ទាប់ពីវគ្គផ្ដាច់ព្រ័ត្រនៅ World Cup 2022 បញ្ចប់ទៅបាន 3 ថ្ងៃ។ កាលពីយប់ថ្ងៃទី 28 ធ្នូ ខ្សែប្រយុទ្ធវ័យ 24 ឆ្នាំរូបនេះ បានស៊ុតបញ្ចូលទីដោយជោគជ័យនៅនាទីទី 90+6 ជួយឱ្យ PSG ឈ្នះ Strassbourg 2-1 នៅក្នុងការប្រកួតដណ្ដើមពានរង្វាន់ Ligue 1 (Ligue 1 Uber Eats) របស់ បារាំង។

Messi មិនទាន់ត្រលប់ទៅកាន់ក្លឹប PSG។ មេដឹកនាំក្លឹបនេះអនុញ្ញាតឱ្យ Messi ទៅកាន់ អាហ្សង់ទីន រហូតដល់ថ្ងៃទី 01 មករា 2023 ដើម្បីអបអរជ័យជម្នះ៕

December 29, 2022

ការនាំចេញរបស់ ថៃ សម្រេចបានលើសពីគោលដៅឆ្នាំ 2022 ប៉ុន្តែឱនភាពពាណិជ្ជកម្មកើនឡើងខ្ពស់

កាលពីថ្ងៃទី 28 ធ្នូ ឧបនាយករដ្ឋមន្ត្រី រដ្ឋមន្ត្រីក្រសួងពាណិជ្ជកម្មថៃ Jurin Laksanawisit បានឱ្យដឹងថា ការនាំចេញទំនិញរបស់ប្រទេសនេះ អាចបន្តថយចុះក្នុងខែធ្នូ ដោយសារឧនភាពសេដ្ឋកិច្ចសកល ប៉ុន្តែជឿជាក់ថា ការនាំចេញពេញមួយឆ្នាំ 2022 នឹងមានកំណើនប្រហែល 7%។

យោងតាមទិន្នន័យរបស់ ក្រសួងពាណិជ្ជកម្ម ការនាំចេញរបស់ ប្រទេសថៃ ក្នុង 11 ខែដំបូងនៃឆ្នាំ 2022 បានកើន 7.6% ដោយសម្រេចបាន 9.16 ទ្រីលានបាត (ប្រហែល 265.34 ពាន់លានដុល្លារអាម៉េរិក) លើសពីគោលដៅ 9 ទ្រីលានបាតសម្រាប់ឆ្នាំនេះ។ ចំណែកពាណិជ្ជកម្មឆ្លងដែនក្នុងដំណាក់កាលដូចគ្នា សម្រេចបាន 944 ពាន់លានបាត ថយចុះ 0.51% ធៀបនឹងឆ្នាំកន្លង។

ក៏ប៉ុន្តែ ការនាំចេញរបស់ ថៃ ក្នុង 11 ខែដំបូងនៃឆ្នាំ 2022 បានធ្លាក់ចុះ 6% ធៀបនឹង 11 ខែដើមឆ្នាំ 2021 ដោយថយមកនៅត្រឹម 22.3 ពាន់លានដុល្លារអាម៉េរិក ខណៈដែលការនាំចូលកើន 5.6% ដោយសម្រេចបាន 23.65 ពាន់លានដុល្លារអាម៉េរិក។ តួលេខរបស់ខែធ្នូក៏ត្រូវបានព្យាករថា នឹងថយចុះធៀបនឹងឆ្នាំកន្លង។ ក្រៅពីនេះ ប្រទេសថៃ ក៏មានឱនភាពពាណិជ្ជកម្មរហូតដល់ 15.08 ពាន់លានដុល្លារអាម៉េរិក ក្នុង 11 ខែកន្លង។

បណ្ដាទីផ្សារនាំចេញដែលមានកំណើនខ្ពស់ជាងគេក្នុងខែវិច្ឆិកា 2022 របស់ ថៃ រួមមាន អ៊ីរ៉ាក់ (215.6%), បារ៉ែន (153.1%), អារ៉ាប៊ីសាអូឌីត (40.1%), អង់គ្លេស (22.2%) និង ឡាវ (21.3%)៕

December 29, 2022

Category: សង្គម និងសេដ្ឋកិច្ច