សង្គម និងសេដ្ឋកិច្ច - La Reine Media

មិត្តរួមក្រុមនៅបារាំង ឈរជាជួរ ទទួលស្វាគមន៍ Lionel Messi មកកាន់ក្លឹប PSG

(បារាំង)- Lionel Messi ត្រូវបានទទួលស្វាគមន៍យ៉ាងកក់ក្ដីពីមិត្តរួមក្រុម នៅពេលត្រលប់ទៅកាន់ បារីស ដើម្បីហាត់សមជាមួយក្លឹប PSG ក្រោយរយៈពេល 2 សប្ដាហ៍ដែលបានសម្រាកបន្ទាប់ពី World Cup 2022 នៅ កាតា បានបញ្ចប់។

ព្រឹកថ្ងៃទី 04 មករា 2023 Messi បានទៅដល់ទីលានហ្វឹកហាត់ PSG។ នេះគឺជាលើកដំបូងហើយដែលគាត់បង្ហាញខ្លួននៅឯក្លឹប បន្ទាប់ពី អាហ្សង់ទីន ដណ្ដើមបានពានរង្វាន់ជើងឯក World Cup 2022។

លើកចុងក្រោយបង្អស់ដែល Messi លេងឱ្យក្លឹប PSG គឺនៅក្នុងការប្រកួតឈ្នះ Auxerre កាលពីថ្ងៃទី 13 វិច្ឆិកា 2022 នៅ Ligue I មុនពេលទៅចូលរួមប្រកួត និងជួយឱ្យ អាហ្សង់ទីន ក្លាយជាជើងឯក World Cup កាលពីខែធ្នូ 2022។

Messi ត្រូវបានទទួលស្វាគមន៍យ៉ាងកក់ក្ដៅពីមិត្តរួមក្រុមនៅក្លឹប PSG ក្នុងនោះមាន Neymar (មកពី ប្រេស៊ីល), Carlos Soler (មកពី អេស្ប៉ាញ), Nuno Mendes (មកពី ព័រទុយហ្កាល់) ជាដើម។ល។

បន្ទាប់ពីស្វាគមន៍គ្នានៅបន្ទប់ផ្លាស់សម្លៀកបំពាក់ Messi ក៏បានចេញមកទីលានហ្វឹកហាត់ ដោយមានការទទួលអបអររបស់សមាជិកក្លឹប PSG។ មិត្តរួមក្រុម បុគ្គលិករបស់ក្លឹប ឈរជាជួរ ទះដៃ អបអរសាទរប្រធានក្រុមរបស់ អាហ្សង់ទីន។

តំណាងគណៈកម្មការគ្រប់គ្រងក្លឹប PSG របស់ បារាំង ក្រោយមកក៏បានប្រគល់ពានអនុស្សាវរីយ៍ជើងឯក World Cup ដល់ Messi។

កំពូលតារាបាល់ទាត់អាហ្សង់ទីន បានយល់ព្រមពន្យារសុពលភាពនៃកិច្ចសន្យាមួយឆ្នាំទៀតជាមួយនឹង PSG និងត្រូវទាត់ឱ្យក្លឹបរហូតដល់ឆ្នាំ 2024។ តាមគម្រោង កិច្ចព្រមព្រៀងនេះនឹងត្រូវបានចុះហត្ថលេខាឆាប់ៗនេះ៕

January 5, 2023

Messi និង Ronaldo អាចប៉ះគ្នាលើទឹកដីអារ៉ាប៊ីសាអូឌីត នៅដើមឆ្នាំនេះ

ខ្សែប្រយុទ្ធ Cristiano Ronaldo ប្រហែលជានឹងត្រូវប៉ះ Lionel Messi នៅពេលក្រុមរបស់ក្លឹប PSG របស់ បារាំង មកកាន់ អារ៉ាប៊ីសាអូឌីត ដើម្បីប្រកួតមិត្តភាពនៅចុងខែមករានេះ។

យោងតាម Sunsport ក្លឹប PSG ធ្លាប់រៀបគម្រោងមកកាន់ អារ៉ាប៊ីសាអូឌីត ដើម្បីទាត់មិត្តភាពជាមួយក្រុម All Stars ដែលមានតារាបាល់ទាត់មកពីពីរក្លឹបរបស់ប្រទេសនេះ រួមមានក្លឹប Al Hilal អ្នកការពារជើងឯកនៅ AFC Champions League និងក្លឹប Al Nassr ដែលជាក្លឹបថ្មីរបស់ Ronaldo។

ការប្រកួតមិត្តភាពខាងលើស្ថិតក្នុងក្រមខណ្ឌ Riyadh Season Cup ដែលគ្រោងនឹងធ្វើឡើងនៅចុងខែមករា 2022 ប៉ុន្តែត្រូវពន្យារពេលដោយសារកូវីដ។ PSG និងពីរក្លឹបរបស់ អារ៉ាប៊ីសាអូឌីត នឹងបើកកិច្ចប្រជុំនាពេលខាងមុខ ដើម្បីកំណត់កាលបរិច្ឆេទនៃការប្រកួតមិត្តភាពនេះ។ ការប្រកួតនេះទំនងជាអាចត្រូវធ្វើឡើងនៅក្នុងថ្ងៃទី 19 មករា 2023។

Ronaldo មានសិទ្ធិគ្រប់គ្រាន់ដើម្បីចូលរួមក្នុងការប្រកួតមិត្តភាពនេះ ដោយសារបានក្លាយជាកីឡាកររបស់ក្លឹប Al Nassr ទៅហើយ។ បើសិនជាបានចូលទាត់ Ronaldo ប្រហែលជានឹងអាចបានប៉ះនឹង Messi ដែលជាកីឡាកររបស់ក្លឹប PSG។ ក៏ប៉ុន្តែ គេមិនទាន់ប្រាកដថា Messi នឹងបានចូលរួមប្រកួត ឬយ៉ាងណានៅឡើយ ព្រោះថា PSG មិនទាន់មានវត្តមានរបស់កីឡាករនេះ ក្រោយពី អាហ្សង់ទីន ដណ្ដើមបានជើងឯក World Cup 2022៕

January 4, 2023

ខ្សែភាពយន្ត «Avatar 3» នឹងនិយាយអំពីកុលសម្ព័ន្ធភ្លើង Na’vi នៅលើពិភព Pandora

កំពូលអ្នកដឹកនាំរឿង «Avatar» លោក James Cameron ឱ្យដឹងថា វគ្គបីនៃខ្សែភាពយន្តរឿង «Avatar» នឹងនិយាយអំពីកុលសម្ព័ន្ធគោរពបូជាចំពោះព្រះអគ្គីនៅឯពិភព Pandora និងបង្ហើបអំពីជ្រុងមួយនៃភាពអវិជ្ជមានរបស់កុលសម្ព័ន្ធ Na’vi។

យោងតាម Variety កាលពីថ្ងៃទី 31 មករា 2023 អ្នកផលិតភាពយន្តជនជាតិកាណាដា លោក Cameron បានប្រាប់ឱ្យដឹងថា «វគ្គបីនឹងគាស់កកាយអំពីវប្បធម៌ថ្មី។ ភ្លើងនឹងត្រូវបានតំណាងដោយកុលសម្ព័ន្ធ Ash (ផេះ)។ ខ្ញុំចង់ណែនាំអំពីកុលសម្ព័ន្ធ Na’vi នៅក្នុងជ្រុងមួយថ្មី។ មកដល់បច្ចុប្បន្ន ខ្ញុំទើបតែបានបង្ហាញនូវចំណុចវិជ្ជមានរបស់ពួកគេ។ នៅក្នុងវគ្គដំបូងៗ មានសកម្មភាពអវិជ្ជមានរបស់មនុស្សជាតិ និងផ្នែកវិជ្ជមានរបស់ Na’vi។ នៅក្នុងវគ្គបី យើងនឹងធ្វើផ្ទុយពីនេះ»។

អ្នកដឹកនាំរឿងក៏បាននិយាយថា នឹងបន្តស្វែងយល់តំបន់ដីថ្មី អភិវឌ្ឍរឿងរ៉ាវរបស់តួអង្គសំខាន់ៗ។ «ខ្ញុំអាចអះអាងបានថា បណ្ដាវគ្គចុងក្រោយនឹងល្អមើលបំផុត។ វគ្គដំបូងៗគ្រាន់តែជាឈុតឆាកណែនាំ ដូចទៅនឹងរបៀបដែលយើងរៀបចំតុអាហារមុនពេលបើកពិធីជប់លៀង» លោក Cameron បញ្ជាក់ដូច្នេះ។

វគ្គបីរបស់ Avatar ត្រូវបានធ្វើឡើងរួចរាល់ ហើយគ្រោងនឹងបញ្ចាំងនៅរោងកុនចាប់ពីខែធ្នូ 2024។ មុននោះ លោក Cameron ក៏ធ្លាប់បានបង្ហើបឱ្យដឹងថា វគ្គប្រាំ នឹងនាំកុលសម្ព័ន្ធ Na’vi មកកាន់ផែនដី។ យោងតាម Variety វគ្គបីអាចជាការប្រឈមមុខដាក់គ្នារវាងបណ្ដាកុលសម្ព័ន្ធដែលរស់នៅលើពិភព Pandora។ តួអង្គឯក Jake Sully ត្រូវបានកុលសម្ព័ន្ធនានាទម្លាក់កំហុសមកលើ ដោយសារតែមហន្តរាយដែលបង្កឡើងដោយពួក Sky People (មនុស្សពីផែនដី)។

កំពូលអ្នកដឹកនាំរឿង «Avatar» លោក James Cameron

ប្រាក់ចំណូលនៅទូទាំងសកលលោករបស់ Avatar 2 បច្ចុប្បន្នបានឡើងដល់ប្រហែល 1.44 ពាន់លានដុល្លារអាម៉េរិក។ វាត្រូវបានចាត់ទុកថាជាកំពូលស្នាដៃរបស់លោក James Cameron។ Avatar 2 ត្រូវបានចាប់ផ្ដើមថតតាំងពីឆ្នាំ 2010 បន្ទាប់ពីវគ្គមួយបានក្លាយជាភាពយន្តដែលទាក់ទាញអ្នកមើលនៅរោងកុនបានច្រើនជាងគេគ្រប់សម័យកាល។

វគ្គបីនៃខ្សែភាពយន្តរឿង «Avatar» នឹងនិយាយអំពីកុលសម្ព័ន្ធគោរពបូជាចំពោះព្រះអគ្គីនៅឯពិភព Pandora

«Avatar: The Way of Water» និយាយអំពី Jake Sully (Sam Worthington) និង Neytiri (Zoe Saldana) កសាងគ្រួសារនៅលើពិភព Pandora។ ពួកគេមានកូនជាមួយគ្នា 4 នាក់។ ប៉ុន្តែ ជីវភាពសុខសាន្តរបស់ពួកគេមិនបានអូសបន្លាយពេលយូរឡើយ បន្ទាប់ពីមនុស្សពីផែនដីត្រលប់ទៅសងសឹក៕

January 4, 2023

AFF Cup 2022 – កាលបរិច្ឆេទការប្រកួត «វគ្គពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រ»

ក្នុងការប្រកួតវគ្គពាក់កណ្ដាលផ្ដាច់ព្រ័ត្រ អ្នកការពារជើងឯកថៃ ត្រូវប៉ះក្រុមរបស់ ម៉ាឡេស៊ី ខណៈ វៀតណាម ត្រូវប្រកួតជាមួយ ឥណ្ឌូណេស៊ី។

វគ្គពាក់កណ្ដាលផ្ដាច់ព្រ័ត្រនៅ AFF Cup 2022 ឥណ្ឌូណេស៊ី នឹងប៉ះ វៀតណាម នៅថ្ងៃទី 06 មករា វេលាម៉ោង 19 និង 30 នាទី។ នៅថ្ងៃទី 07 មករា វេលាម៉ោង 19 និង 30 នាទី ម៉ាឡេស៊ី ត្រូវប្រកួតនឹង ថៃ។ ថ្ងៃទី 09 មករា ម៉ោង 19 និង 30 នាទី វៀតណាម ត្រូវទាត់ជាមួយ ឥណ្ឌូណេស៊ី។ ថ្ងៃទី 10 មករា ម៉ោងដដែល ថៃ ត្រូវប៉ះនឹង ម៉ាឡេស៊ី។

ចំណែកវគ្គផ្ដាច់ព្រ័ត្រវិញ មួយគូនឹងត្រូវប្រកួតនៅថ្ងៃទី 13 មករា ម៉ោង 19 និង 30 នាទី ហើយមួយគូទៀតនឹងត្រូវប៉ះគ្នានៅថ្ងៃទី 16 មករា ម៉ោងដដែល៕

January 4, 2023

មនុស្សរាប់សែននាក់មកគោរព និងជូនដំណើរសពស្ដេចបាល់ទាត់ Pele ជាលើកចុងក្រោយ

(ប្រេស៊ីល)- មនុស្សប្រហែល 230,000 នាក់ បានមកគោរពវិញ្ញាណក្ខន្ធ ដាក់កម្រងផ្កា និងរាប់ម៉ឺននាក់មកកាន់ទីក្រុង Santos ជូនដំណើរសពស្ដេចបាល់ទាត់ Pele ជាលើកចុងក្រោយ។

ពិធីគោរពវិញ្ញាណក្ខន្ធ ដាក់កម្រងផ្កាយជូនសពស្ដេចបាល់ទាត់ Pele ត្រូវបានធ្វើឡើងនៅលើទីលានបាល់ទាត់ Vila Belmiro ដែលជាទីលានប្រកួតរបស់ក្លឹប Santos នៅវេលាម៉ោង 10 ថ្ងៃទី 02 មករា ម៉ោងនៅ ប្រេស៊ីល។ ក្រុមគ្រួសារសពបានត្រៀមសម្រាប់កិច្ចការបន្ទាប់ចុងក្រោយជូនសពលោក Pele មុនពេលបិទក្ដារមឈូសបញ្ចុះសព។

ក្នុងរយៈពេល 24 ម៉ោង មនុស្សប្រហែល 230,000 នាក់ បានមកគោរពវិញ្ញាណក្ខន្ធលោក Pele។ មនុស្សម្នាតម្រង់ជួរប្រវែង 2 គីឡូម៉ែត្រ រង់ចាំចូលគោរពវិញ្ញាណក្ខន្ធ។ ប្រធានាធិបតីប្រេស៊ីល លោក Luiz Inacio Lula da Silva និងប្រធាន FIFA ក៏បានចូលរួមពិធីនេះដែរ។

ក្រោយពិធីខាងលើ សពរបស់លោក Pele ត្រូវបានដង្ហែចាកចេញពីទីលាន Vila Belmiro ហើយតម្កល់លើរថយន្តដើម្បីបន្តហែតាមដងផ្លូវនៅ Santos។

ទីឋានសម្រាកចុងក្រោយរបស់សពលោក Pele គឺជាអគារ 14 ជាន់ដែលមានបន្ទប់បញ្ចុះសពចំនួន 14,000 បន្ទប់។ សពលោក Pele ត្រូវបានបញ្ចុះនៅជាន់ទី 9 ជាទីដែលអាចមើលទៅកាន់ទីលានបាល់ទាត់ Vila Belmiro។

ស្ដេចបាល់ទាត់ Pele បានទទួលមរណភាពកាលពីថ្ងៃទី 29 ធ្នូ 2022 ក្នុងវ័យ 82 ឆ្នាំ ដោយសារជំងឺមហារីកពោះវៀន។ លោកធ្លាប់ស៊ុតបញ្ចូលទីបាន 1,279 គ្រាប់ ក្នុងនោះមានឯតទគ្គកម្ម 643 គ្រាប់សម្រាប់ក្លឹប Santos និងកំណត់ត្រា 77 គ្រាប់សម្រាប់ក្រុមជម្រើសជាតិប្រេស៊ីល។ លោក Pele បានជួយឱ្យ ប្រេស៊ីល ដណ្ដើមបានជើងឯក World Cup ចំនួន 3 លើក គឺនៅឆ្នាំ 1958, 1962 និង 1970៕

January 4, 2023

ខាងក្នុងកសិដ្ឋានស្វ័យប្រវត្ត «គ្មានមនុស្ស» នៅប្រទេសចិន (វីដេអូ)

កសិដ្ឋាន Beidahuang Seven Stars ផលិតគ្រាប់ធញ្ញជាតិជាង 20 ពាន់លានគីឡូក្រាមជារៀងរាល់ឆ្នាំ ដោយសារប្រើប្រាស់បច្ចេកវិទ្យាស្វ័យប្រវត្តឆ្លាតវៃ។

ស្ថិតនៅភាគឦសានប្រទេសចិន កសិដ្ឋាន «គ្មានមនុស្ស» Beidahuang Seven Stars គឺជាទីតាំងទំនើបមួយ ជាទីដែលបុគ្គលិកអាចគ្រប់គ្រង និងដំណើរការកសិដ្ឋានទាំងមូលដោយប្រើតែកុំព្យូទ័រ។

ក្នុងកសិដ្ឋាននេះមានរថភ្លើងស្វ័យប្រវត្ត សម្រាប់ដឹកជញ្ជូនកូនរុក្ខជាតិ។ ការដាំស្រូវក៏ប្រើប្រាស់បច្ចេកវិទ្យាស្វ័យប្រវត្ត ដោយមិនត្រូវការមនុស្សធ្វើការដោយផ្ទាល់។

បណ្ដាប្រព័ន្ធឆ្លាតវៃ ត្រូវបានប្រើប្រាស់រួមផ្សំជាមួយនឹងផ្កាយរណប ដើម្បីគ្រប់គ្រងកសិដ្ឋាន។ នៅរដូវប្រមូលផល ម៉ាស៊ីនគ្មានមនុស្សបើកបរ នឹងចេញទៅវាលស្រែដើម្បីច្រូតកាត់បោកបែនស្រូវ។

កសិដ្ឋាន «គ្មានមនុស្ស» Beidahuang Seven Stars ផលិតគ្រាប់ធញ្ញជាតិបានជាង 20 ពាន់លានគីឡូក្រាមជារៀងរាល់ឆ្នាំ អាចផ្គត់ផ្គង់ស្បៀងដល់មនុស្ស 160 លាននាក់/ឆ្នាំ៕

January 4, 2023

ទិដ្ឋភាពនៃពីធីបង្ហាញខ្លួនរបស់ Ronaldo នៅក្លឹប Al Nassr របស់អារ៉ាប៊ីសាអូឌីត

ក្នុងព្រឹត្តិការណ៍បង្ហាញខ្លួនកាលពីព្រលប់ថ្ងៃទី 03 មករា 2022 កីឡាករព័រទុយហ្កាល់ Cristiano Ronaldo បានអះអាងថា មកចូលរួមក្លឹប Al Nassr ដើម្បីស្វែងរកបទពិសោធន៍លំបាក ទាំងក្នុង និងក្រៅទីលានប្រកួត។

នៅវេលាម៉ោងប្រហែល 23 និង 05 នាទី ម៉ោងនៅ កម្ពុជា Ronaldo បង្ហាញខ្លួននៅខាងក្រៅវាលស្មៅ Mrsool Park។ គាត់ត្រូវបានក្រុមអង្គរក្សអមការពារចូលទៅក្នុងបន្ទប់សន្និសីទសារព័ត៌មានរួមជាមួយនឹងគ្រូបង្វឹក Rudi Garcia និងប្រធាន Musalli Al-Muammar។

ក្នុងសន្និសីទនេះ Ronaldo និយាយថា «ពី 10 15 ឆ្នាំកន្លង បាល់ទាត់បានប្រែប្រួលច្រើន។ ក្រុមនានាបានត្រៀមខ្លួនម៉ត់ចត់ជាងមុន។ គ្រប់គ្នាអាចឃើញប្រការនេះនៅ World Cup។ អារ៉ាប៊ីសាអូឌីត ឈ្នះក្រុមជើងឯក។ កូរ៉េខាងត្បូង បណ្ដាក្រុមនៅ អាហ្វ្រិក សុទ្ធតែបង្កភាពភ្ញាក់ផ្អើល។ ពេលនេះ ការយកឈ្នះមួយប្រកួតមិនមែនងាយស្រួលឡើយ។ ដូច្នេះហើយ ចំពោះខ្ញុំ ការមកកាន់ អារ៉ាប៊ីសាអូឌីត ប្រកួត មិនមែនជាទីបញ្ចប់របស់អាជីពនោះទេ»។

Ronaldo បន្ថែមថា អ្នកដែលបានចំអកឱ្យគាត់ ទាក់ទងនឹងការមកចូលរួមជាមួយក្លឹប Al Nassr «ពិតជាមិនបានយល់អ្វីអំពីបាល់ទាត់» ព្រោះពានរង្វាន់ជើងឯកនៅប្រទេសអាស៊ីខាងលិចមួយនេះ ពិតជាមានការប្រកួតប្រជែងខ្ពស់។ «បើសិនជាអាច ខ្ញុំចង់ឱ្យគ្រូបង្វឹកអនុញ្ញាតឱ្យខ្ញុំចូលប្រកួតភ្លាមៗនៅថ្ងៃស្អែក» Ronaldo សង្កត់ធ្ងន់ដូច្នេះ។

ក្រោយពីសន្និសីទសារព័ត៌មានបានបញ្ចប់ Ronaldo ក៏បានជួបមិត្តរួមក្រុមថ្មីនៅក្នុងបន្ទប់ផ្លាស់សម្លៀកបំពាក់ ហើយចេញទៅបង្ហាញខ្លួននៅចំពោះមុខអ្នកគាំទ្រប្រហែល 25,000 នាក់។ អ្នកគាំទ្រទាំងនេះបានរង់ចាំជាង 1 ម៉ោង ដើម្បីបានឃើញកំពូលតារាបាល់ទាត់ជនជាតិព័រទុយហ្កាល់ ក្នុងឈុតកីឡា។

Ronaldo អះអាងថា គាត់មានមោទកភាពនៅពេលបានមកកាន់ Al Nassr ព្រោះថា នេះគឺជាឧបសគ្គថ្មីក្នុងអាជីព ក្រោយពីសម្រេចបានគ្រប់យ៉ាងនៅ អឺរ៉ុប។ «ខ្ញុំបានបដិសេធការអញ្ជើញពីក្លឹបជាច្រើននៅ អឺរ៉ុប អាម៉េរិក ប្រេស៊ីល អូស្ត្រាលី ឬ ព័រទុយហ្កាល់ ដើម្បីមកទីនេះ ដោយសង្ឃឹមថា អាចជួយជាប្រយោជន៍តាមរយៈបទពិសោធន៍ និងការយល់ដឹងរបស់ខ្លួន»។

Ronaldo បានថ្លែងអំណរគុណចំពោះការទទួលស្វាគមន៍ពី អារ៉ាប៊ីសាអូឌីត។ ខ្សែប្រយុទ្ធវ័យ 34 ឆ្នាំនេះក៏បានចុះហត្ថលេខ និងចែកបាល់ជូនអ្នកគាំទ្រមួយចំនួនផងដែរ។

សមាជិកគ្រួសាររបស់ Ronaldo ក៏ត្រូវបានណែនាំបង្ហាញនៅក្នុងព្រឹត្តិការណ៍ខាងលើនេះ។ ព្រឹត្តិការណ៍នេះបានបញ្ចប់បន្ទាប់ពី Ronaldo និងគ្រួសារ ដើរទៅកាន់ផ្លូវក្រោមដី អមជាមួយនឹងសំឡេងហ៊ោពីអ្នកគាំទ្រ។

Ronaldo បានទៅដល់ព្រលានយន្តហោះ Riyadh កាលពីព្រឹកថ្ងៃទី 03 មករា 2022 និងត្រូវបានទទួលស្វាគមន៍ដោយប្រធានក្លឹប Al Nassr។ នៅក្លឹបនេះ CR7 នឹងទទួលបានប្រាក់បៀវត្សរ៍ 75 លានដុល្លារ/ឆ្នាំ។ ប្រាក់ចំណូលសរុបរបស់គាត់អាចឡើងដល់ 200 លានដុល្លារអាម៉េរិក បើបូករួមទាំងចំណូលពីម្ចាស់ឧបត្ថម្ភ និងផ្សាយពាណិជ្ជកម្ម៕

https://www.youtube.com/watch?v=yy21yj1zbxQ

January 4, 2023

AFF Cup 2022 – គ្រូបង្វឹកមីយ៉ាន់ម៉ា ថា «វៀតណាមលេងមិនទាន់បានល្អ»

(វៀតណាម) – យោងតាមគ្រូបង្វឹក Antoine Hey ក្រុមជម្រើសជាតិវៀតណាម លេងមិនទាន់បានល្អ បើទោះបានយកឈ្នះលើ មីយ៉ាន់ម៉ា 3-0 នៅជុំចុងក្រោយក្នុងពូល B នៅ AFF Cup 2022។

វៀតណាម ពិតជាមានភាពលេចធ្លោនៅពេលទទួលក្រុមរបស់ មីយ៉ាន់ម៉ា លើទីលាន My Dinh នៅ ហាណូយ កាលពីព្រលប់ម្សិលមិញ។ ក្រុមវៀតណាម គ្រប់គ្រងបាល់បាន 58% និងស៊ុតផ្ដាច់បាន 20 លើក ក្នុងនោះមាន 6 លើក បាល់ហោះចំគោលដៅ។

វៀតណាម បានយកឈ្នះលើ មីយ៉ាន់ម៉ា ក្នុងលទ្ធផល 3-0 ដោយថ្វីជើងរបស់ Nguyen Tien Linh និង Chau Ngoc Quang បន្ទាប់ពីកីឡាករ Kyaw Zin Lwin របស់ មីយ៉ាន់ម៉ា បានធ្វើឱ្យបាល់ចូលទីខ្លួនឯង។

ក៏ប៉ុន្តែ គ្រូបង្វឹករបស់ មីយ៉ាន់ម៉ា លោក Antoine Hey យល់ថា «វៀតណាម លេងមិនទាន់បានល្អពិតប្រាកដនៅឡើយ បើទោះជាបានឈ្នះ 3-0។ ដំបូង ពួកគេទាត់មិនមានស្ថិរភាព បែកអារម្មណ៍។ ជាក់ស្ដែង វៀតណាម ត្រូវការកែលំអបន្ថែមទៀត ដើម្បីអាចលេងបានល្អជាងនេះនៅវគ្គពាក់កណ្ដាលផ្ដាច់ព្រ័ត្រ»។

បើទោះជាលេងមិនទាន់បានល្អ ប៉ុន្តែ វៀតណាម នៅតែបញ្ចប់វគ្គសន្សំពិន្ទុដោយឈរលើកំពូលតារាងពូល B និងមាន 10 ពិន្ទុ ដោយរកបាន 12 គ្រាប់ និងមិនទាន់ចាញ់ 1 គ្រាប់ណាឡើយ។ ក្រុមនេះនឹងត្រូវប៉ះ ឥណ្ឌូណេស៊ី នៅវគ្គពាក់កណ្ដាលផ្ដាច់ព្រ័ត្រដោយធ្វើជាភ្ញៀវនៅថ្ងៃទី 06 មករា ហើយ 3 ថ្ងៃក្រោយមក នឹងធ្វើជាម្ចាស់ផ្ទះ។ ចំណែក មីយ៉ាន់ម៉ា វិញ ត្រូវបានជម្រុះជាផ្លូវការពី AFF Cup 2022៕

January 4, 2023

AFF Cup 2022 – កម្លាំងរបស់ក្រុមជម្រើសជាតិវៀតណាម និងមីយ៉ាន់ម៉ា ដែលត្រូវប៉ះគ្នានៅព្រលប់នេះ

ក្នុងការប្រកួតនៅវេលាម៉ោង 19 និង 30 នាទីព្រលប់ថ្ងៃទី 03 មករានេះ វៀតណាម កំពុងមានប្រៀបជាងក្រុមរបស់ មីយ៉ាន់ម៉ា និងអាចបានឡើងទៅកាន់វគ្គពាក់កណ្ដាលផ្ដាច់ព្រ័ត្រ។

ការប្រកួតជុំចុងក្រោយនៃវគ្គចែកពូលនៅ AFF Cup 2022 រវាង វៀតណាម និង មីយ៉ាន់ម៉ា នៅព្រលប់នេះ នឹងត្រូវធ្វើឡើងនៅលើទឹកដីរបស់ វៀតណាម។

បច្ចុប្បន្ន មីយ៉ាន់ម៉ា ស្ថិតនៅលើចំណាត់ថ្នាក់ទី 159 ក្នុងបញ្ជីរបស់ FIFA ខណៈ វៀតណាម ជាប់ចំណាត់ថ្នាក់ទី 96។

អំពីលទ្ធផលនៃការប្រកួតថ្មីៗរបស់ក្រុមទាំងពីរ រួមមានដូចខាងក្រោម ៖

January 3, 2023

រថភ្លើងក្រុងដែលដំណើរការដោយថាមពលអ៊ីដ្រូសែន បំភាយតែទឹកដំបូងគេនៅអាស៊ី (វីដេអូ)

(ប្រទេសចិន)- រថភ្លើងក្រុងដំណើរការដោយអ៊ីដ្រូសែន និងបំភាយតែទឹកដំបូងគេនៅអាស៊ី ត្រូវបានបើកបរចេញពីរោងចក្រនៅទីក្រុង Chengdu ខេត្ត Sichuan កាលពីសប្ដាហ៍កន្លង។

រថភ្លើងដែលត្រូវបានអភិវឌ្ឍដោយក្រុមហ៊ុនផ្លូវដែក Changchun Railway និងក្រុមហ៊ុនផ្លូវដែក Chengdu នេះ ប្រើប្រាស់បច្ចេកវិទ្យារបស់រថភ្លើងរាងគ្រាប់កាំភ្លើង Fuxing និងមានល្បឿន 160 គីឡូម៉ែត្រ/ម៉ោង ដោយប្រព័ន្ធថាមពលអ៊ីដ្រូសែន ដែលជាប្រភពផ្គត់ផ្គង់អគ្គិសនីកម្លាំងខ្លាំង និងមានស្ថិរភាពយូរអង្វែង អាចរត់បាន 600 គីឡូម៉ែត្រ ក្រោយការបញ្ចូលថាមពលមួយពេញ។

យោងតាមសារព័ត៌មានប្រចាំថ្ងៃរបស់ Chengdu រថភ្លើងនេះប្រើប្រាស់ថ្មផ្ទុកថាមពលអ៊ីដ្រូសែន និងបច្ចេកវិទ្យាបញ្ចូលថាមពលថ្មរហ័ស (Supercapacitor) ដើម្បីផ្គត់ផ្គង់ថាមពល។ ថាមពលនេះត្រូវបានបង្កើតឡើងដោយប្រតិកម្មអេឡិចត្រូគីមី (electrochemical reaction) របស់អ៊ីដ្រូសែន និងអុកស៊ីសែនក្នុងថ្មផ្ទុកថាមពល។ ប្រតិកម្មនេះបំភាយតែទឹក និងមិនមានអនុផលផ្សេងឡើយ ព្រមទាំងមានស្ថិរភាព និងមិនមានសំឡេងរំខានច្រើន។

រថភ្លើងដែលដំណើរការដោយអ៊ីដ្រូសែន ធ្វើដំណើរ 500 គីឡូម៉ែត្ររាល់ថ្ងៃក្នុងល្បឿន 160 គីឡូម៉ែត្រ/ម៉ោង អាចកាត់បន្ថយឧស្ម័នកាបូនឌីអុកស៊ីតជាង 10,000 គីឡូក្រាមក្នុងមួយឆ្នាំ នេះបើតាមក្រុមអ្នកអភិវឌ្ឍខាងលើ។

រថភ្លើងនេះក៏អាចត្រូវបានប្រើប្រាស់ទូលំទូលាយសម្រាប់ផ្លូវដែកក្នុងតំបន់ដែលមិនទាន់មានបណ្ដាញអគ្គិសនីផងដែរ។

ប្រទេសចិន មានមហិច្ឆតាក្នុងការអភិវឌ្ឍវិស័យថាមពលអ៊ីដ្រូសែន។ ដល់ឆ្នាំ 2025 ប្រទេសនេះគ្រោងនឹងមានមធ្យោបាយធ្វើដំណើរប្រហែល 50,000 គ្រឿងដែលប្រើប្រាស់ថ្មអ៊ីដ្រូសែន ហើយបរិមាណផលិតផលអ៊ីដ្រូសែនប្រចាំឆ្នាំដែលបានមកពីថាមពលកកើតឡើងវិញនឹងសម្រេចបានពី 100,000 ដល់ 200,000 តោន នេះបើតាមផែនការដែលត្រូវបានប្រកាសកាលពីខែមីនា 2022 ដោយគណៈកម្មការកំណែទម្រង់ អភិវឌ្ឍជាតិ និងរដ្ឋបាលថាមពលជាតិ របស់ ប្រទេសចិន៕

January 3, 2023

Category: សង្គម និងសេដ្ឋកិច្ច